المراهقة والأربعيني الحلقة (82)

المراهقة والأربعيني

الجزء الثاني

الحلقة  (82)

طلع صراع عصبي من البيت ، و الحجي هم ما بقى وطلع لبيت سعد ، شويه ورديت نزلت كعدت يم الحجيه ، حيل متضايقه مني ..

جانت نور وام سعد كاعدات ف كالت الحجيه :- وتالي وياج ليليان ، شلون بيج

-واني شكو ، الكل يتعدى عليه وترجعون عليه

-وبعدج ماخذه دور المظلومه وتتشكين ، يول تعبتي الرجال خافي ربج ، انتي تريدين تموتي لابني تريدين اتجلطي ..

مكاونكم الفجريات وصوتج واصل لأخر الشارع ما جن عندج مستحى ، حسي على دمج وكولي هلرجال تعبان شو انتي لا بفراشو فالحه ولا بلكمتو مدبرتها

نايمه لل٣ الظهر وهو هلكان بهشغل وفوك حركة دمو يرد ويفلش بالباب عبالو ميته لو شصاير وياج وهبط نص حيلو

واليكتلك يتكاون ويفازعلج و يا ويل الجاب اسمج وانتي وحده كل خير ما بيج

-وشنو هو مقصر دحكي ..

مديت ايدي وشوفتها اصبعي ..

البارحه كضى بيا التوبه ، مره وحده اكفي وكولي حجاية حق لا بس تفازعين لأبنج

-من ايدج ما تعدى عليج لا ما متجاوزه ودايسه بمصرانو ، كل مره يعيل وياج اكل كلبو اكل واحننو عليج بلا ما تدرين بس انتي ما تستاهلي

جان يرادلج واحد يكعدج براشدي ويكومج بجلاق ، يول جا تعبان ما بيج خير تتلكي وتكليلو الكوى يا رجال ، الله ساعدك

لا وجماله فوكاها يروح يوصي اكل جاهز ويكعد يلف ويوكل  ويدحك على حلكج ويتمنى رضاج عبالو نازلتو من الجنه  ، ولج والله ذره ما تستاهلين منو انتي

-لا والله شنو مستكثرتي عليه ، على شنو بالله ، شو صغيره والف واحد يتمناني

.. حجيت هيج لو انجنت :- ولج انتي تحجين هيج ، يولي اطولين ابني انتي وتحجين ، هين يلمصلاويه وحك هذا كتاب الله لا ما زوجتو واكسر خشمج لا ما اجيبلو التترس حظنو جهال واخليج تتحسرين

لا ما اجيب التسوا راسج و اغاتج ، ول شمحصل منج شو مثل شجرة الزينه حلوه وكلشي ما مستفاد منها لا ثمره ولا طيب

عايبه وما تخلفين ولا السان حلو ولا ملكى ، مو زين من ابني راضي بيج ومطول خلك وياج على شنو شايفه روحج

... من حجت هيج سجين وخلتها بكلبي بس تجرعت وما بينت ، كمت بكل هدوء وكلتلها :- براحتج عمه اللي تريدي لا تقصرين بي

.. و طلعت سديت الباب سمعت نور وهي تكولها :- لا حجيه مالج حق تعيرينها  الخلفه من الله هو الرزاق هي شبيدها خطيه

..صعدت ، احس روحي تغلي و النار بگلبي ما راضيه تهدئ :- اشنو بيدي ، انا القلت للرب ياخذ اهلي وييتمني ؟ انا اللي قلتولو ما يعطيني اطفال ويحرمني ؟

... ما بجيت بس العبره خنكت بلعومي و النار صعدت المعدتي انحمست حمس من القهر ومن وجع العبره اللي بحنجرتي

افتر بالصاله واحر النفس كوا وافور بداخلي من الحركه ، رحت ع الحمام استفرغت شكو شي بمعدتي

احس گلبي اشتعل اريد ابجي ماكو دموع ، بس اتنفس قوي ، رجعت للغرفه افتر بيها بحركه ، ما جا كدامي غير تحفية عربانه مال ورد ، شلتها وطريتها بالكاع تفلشت

شلت الفراش وكلبتو  ، طلعت كل مكياجي و وفلوسي وذهبي و اكسسوارتي طريتهم بالكاع بحركه واكسر بيهم :- هذا اللي حاسديني عليه ما اريدم ربي اخذم كلم واعطيني طفل ماااااااريد فلوس وذهب اريد طفل

... هينا من صدك بجيت

اكسر بالغراض واشمر جبت المقص ، دحكت ملابسي الكل تسألني عليها ويكولون يلبسها احلى لبس ، كضبتهم كلهم اكصص واني اردد :- ما اريدهم ما اريدهم اريد طفل

قابله اكعد بخيمه و لكمه باليوم ، بس اريد طفل افرح بي واكف من حجي الناس ومعايرهم بيا ، ربي ارحمنييييييي

شلت المقص طريتو هو و الملابس وكعدت بنص الكنتور ، انهاريت بالبجي و وجهي بين اديه ..

اندكت الباب وفاتت نور بيها شاش ومرهم و كالت :- يا يمه شصاير كاتلين حيه هينا ، يا يا ولج هذا ذهبج ليش هيج كاسره العقد ، هو انتي وينج

دحكت شافتني بالكنتور :- يولي من كل عقلج تاخذين بكلامها وهيج يصير بيج من عمت عينج اي والله ، دكومي شو كومي اشد ايدج و اسويلج ميكباب مدري شيسمونه بهذا المكياج المنثور

-نور اتركيني دخيلج اعصابي منهاره وما الي خلك

-عجل خل انظف غرفتج كبل لا يطلع زلمتج

-جا صراع ؟

-اي جا وجابلج باندج و دهن وسألني عليج

-روحي هسه اني شويه وانظف

-يولي بيج خير گومي لمي كفشتج مسحي وجهج اجعلج طالعه من الگبر بكفاله

.... تحجي وتلم بالملابس وتكول :- يولي ليش هيج مكصصتهن يمصكوعه جان انطيتينياهن دشاديشي كلهن يخزن ما بيهن فكت وجه

دحكت :- يول ليكون حلتلج الكعده بالكنتور شو تكدمي خل اكعد يمج شكلها طيبه الكعده

ابتسمت بلا واهس :- بالله نور كفج عني وجع براسي لو خليتو براس ام سعد تموت بساعتها

رفعت اديها ونحبت :- يرادلهة بخت لو تموت واخلص خايبه لشغل ساجده عبيد واردحلج كاولي بفاتحتها

وكامت اطك اصبع وتهز بعربانتها صفح وتكول :- لطك روحي بحديده واطلع الدم

.. فات صراع انصدم بيها هي الغرفه ع السريع رد طلع وهي انثولت وتنزل بثوبها من الداخليات وتصيح :- فوت خويه فوت

وهو يكول :- اخذي راحتج اسف ما ادري

..طرتلي المرهم والباندج :- الله يسود وجهج شافني وانه اهز بعربانتي امداج يخايبه

فتحت الباب وهو فات :- والله مو ابالي هينا انتي فتت ما ادري

-فوت خويه ماكو شي بس هاي المخبله مطنكره وكاعده بالكنتور  ومتقبل تكوم

راحت نزلت وهو يدحك بالغرفه مستغرب :- ول يابه ابخت الله شصاير هينا ، مار اعصار بغرفتي وانه ما ادري

يمشي ويتعثر بالغراض و الكزاز ، شفتو ع السريع انفجرت وبقيت ابجي :- عمى بعيني هاي كلو امبور ضربتج هيج صاير بحالج ، كسر بيدي ان شاءالله

شو بويه ايدج طلعي دشوف

مديتلو ايدي دا اكوم ، انضرب راسي بالكنتور ، كعدت ابجي بالزايد  :-صراع اريد طفل

- ادللي هسه انزل اشتريلج طفل من السوك ، يول جاهل انتي كاعده تبجين شو دكومي

كمت وياه كعدني ع السرير ، بقى يمسح بوجهي وبشعري :- شصاير وياج بس كليلي ليش هيج جاي تذبلين ، ولج جينا من تركيا جنج ورده شصارلج

-امك

-انه ما اخلص من حجي ابوي تطلعلي امي ، شبيها امي

:- سولفتلو كلامها

تنهد وجرني لحظنو :- كافي لتبجين ، الف مره كتلج انه ما رايد طفل ولا تهتمين

-بس اني اريد

-انطاج طفل وطلع معوق لو مريض لو شوف شبي ، ساعتها شتسوين ؟

-حتى لو اني اريدو

- يرزق من يشاء يا يابه شلنا بالطفل خلينه انه وياج راسي وراسج كافي ، شو كومي خل الف ايدج ، بالله انطيني

.. كعد يدهنلي اصبعي ولفو اباندج كتلو :- شككت الملابس وكسرت كلشي

-فدوه بس عقلي وكبري انه اجيبلج كلشي والله

.. بقى يلف كمل كال :- ها هسه احسن

- اي

-بس تدرين ؟

-شنو

-ول يابه نور شلون تهز الا اشرد

ضربتلو على صدرو :- عابتلك يابو عين زايغه

-لا والله بحسبة هيام اختي بس فاجئتني

-شصار انت وابوك

- ابوي من يوم يومو مسممني بعيشتي ، من جنت صغير يكتلني لجل يرضي لميعه وكبر وكع براسي وهسه يعيرني لان افزعلج وجن ناسي نفسو

-مو يكولون البعير ما يحس بحدبتو

-طاح حظج على هلمثل هاذ ، يول السانج احترمي مهمها كان ابويه ورجال جبير ما يصير تتجاوزين

-محد كايلو يدخل بيناتنا ، وهلايام يا الجاي حاشر خشمو بحياتنا ، لا اني شاكيه منك ولا انت شاكي مني ويكعدون يحاسبونه ، حتى لو امك وابوك مالهم علاقه بينا

-شسوي ول اصرخ بعلو صوتي لا تدخلون وهم ما يكفون ، شردت منهم تلزكو بذيالي ، انطيني الحل شبيدي ، غير يحس وياخذ هلفكر الحاطها عندي ويكعد ابيتو اللي انطيتو الو ، على حظي مكابلني وكاعد مراقبني شلون الف اكل لحرمتي

الا اصير گبحي واطرد من صدك ، وهم ما اخلص على ابو طرد ابوه لجل حرمتو، وشدو روسكم يكرعان ما ادري شلون تفك سمموني بعيشتي وحك لا اله الا الله

-هو بس ابوك ، حتى امك صايره ضدي

-مالج علاقه امي اني احجي وياها ، كومي غسلي وجهج وبدلي هل اخذج شويه اغيرلج جو ، لا تكعدين هينا تنوحين جن ميتلج احد ، والله شو الله ما دا ينطيني طفل

... كام مني نزل ، اني كمت الملم بالغرفه ، نزلت اجيب مكناسه من جوا ، سمعتو يححي ويا امو يكولها :- ارد افتهم شنو استفاديتي من كعدتي تعيريها لان ما عدها خلفه ، شبيج يمه شجالج

-انت عقلك خذتو هلطايشه المصلاويه

-انتي دتكولين طايشه ، وما الها احد غيري ، مجبور استوعبها واحتويها ، كليلي وين تروح

- شتستوعب هاي تفرعنت وما صارت تنكضب ، تتجاسر وتكول جاهل وتسامحها

- انه ما سامحتها بس لان اذيتها ، وكل السوتو حقها بس ما جان لازم تحجي لان اخلاص الجلب اطهر منها ، تعض وما تنعض ومن تعض تسمم

-ومرتك ما مگصره ، صوتها واصل لاخر العالم الفجر فزعنا مدري عبالنا شكو وكلنا واكفين ، حتى عيب من اخوك من يسمع حسها

- بمه الله بالخير عليج ، الله من يوم يومو باليني وحاطني بأمتحان ويختبرني ، شكلج بركبتي وانه طفل وتحملت مسؤليتج ، رد ادور ابوي وولدو صارو بركبتي وهنوب بنت طايشه علقها على كدها وما الها احد الاعاتبو ومثل ما تحملتكم واستوعبتكم انه مجبور اتحملها واستوعبها

شسويلها اطردها قابل ؟

-لا تدعي المسؤليه انت تحبها وماشي وراها على عمى عينك

-وليش ما احبها ، واساسا شنو بيها ما ينحب

-وشبيها هي من باجر انه اجيبلك احسن منها

- والله لو بحوريه ما ابدلها ، مثل ما انه عندي طباكات ومتحملتني هي عدها طيش واتحملها ، انه لا شايف بهدوئها ولا بصبرها

من انخطفت ووكعت منو لمني ؟ منو احتواني غيرها ؟ دريتي عني عن علاجي ؟ ، ايام وليالي اجن واكسر الغرفه فوك راسها ، حجايه ما حجت ولا شكت مني ، وفوك كل هذا تجي تبوس براسي وتكولي لا تهتم المهم عندي ترجعلي وتصير بخير  ،كل هذا ما يصير بعيني واتحملها ؟

من اتعب وتتحملني  عفيه ومن تتعب  لو عقلها خف اكسرها و اتركها ؟

ولا تكليلي صوتها ،ماكو احد ينداس وما يطلعلو صوت

هي ما عدها غير صوتها ادافع بيه عن نفسها بس لو تكدرلكم ، محد عايفها بحالها ما جايه يم احد هي كافيه شرها بخيرها وساكته ، عوفوها

انه وياها مره ورجال ويا زوجين ما يتكاونون بيناتهم ، انتم شلكم علاقه بينا ، مليت حسو على ارواحكم عاد واتركونا ماكو هيج حاله تره

-انه ما ارتاح لا ما تتزوج عسى اشوفلك خلفه من غيرها

-مالج شغل بيه امي انتي شلج علاقه ، ترتاحين ما ترتاحين شنو بينا انتي انه راضي بعيشتي

-هاااه هسه صارلي مالي راي عليك يصراع يبني ؟

- يمه بيني وبينها لا تدخلين كافي تره ذبحتيني شجرالج عمرج ما حقدتي على جنه ، وجدان ما جنتي تكرهيها جيتي على هاي ، مدي حظي لو حظ هلبنيه الما كعد حظها وياكم

... تركها وطلع .. دحكني كاعده ع الدرج اتسمع ، ما اهتم ، صعد ع السريع ، فات نائل و الحجي وياها يخزر بيا

تركتو وصعدت ، صراع كاعد يدخن ، تقربت يمو بستو بخدو وكعدت على رجلو وحطيت راسي على كتفي ودفنت وجهي برگبتو ، تنهد

-شيصير لو ماكو احد بحياتنا ، لا ابوك ولا امك ولا ام سعد ولا اخلاص ولا اي احد ، مثل لما جنه بتركيا ، شيصير

-جانه انه وياج عشنه احلى اثنين

-وليش منعيش

-ما اكدر

-ليش

-اعوف اهلي ؟ مثل ما احبج احب امي وما اكدر اعوفها ، حتى ابوي ، متأذي منو صح  بس يبقى والد شبيدي وهو ما يفاركني ، اطردو ؟  وين اروح من الله

- وتالي

-الله الوالي ، خليج يمي وانه ارتاح

لف اديه على خصري ، وبقى يدحك بيا ، بوسني و جرني بين اديه ، جثير جنه مشتاقين لبعض من قبل الفاتحه ، فكعدنا مع بعض وكان عراريس

هو ما صدك نفسو ، نسى اهلو ونسى الجوا كلهم وكابلني ، ما طلعنا الا الجوع الساعه ٢ بليل نزلنا ندور اكل ونطبخ مع بعض و الكل نايمين ،

ورحنا الحمام سوا ، ما نمنا الا وجه الصبح ، جان بيومها جمعه فبقى نايم ابد ما نزل ، صلى الظهر وهم رد نام يمي

ما كعدنا غير ب٤ العصر ، نزل هوا واني وراه ، و الحجي يهز ايدو ويحجي ويا الحجيه :- كلنالو انهاها من نوم الظهاري تالي نام وياه وزاد عنها ، مدري هي التعلمو لو هو اليعلمها

ما رد ، كعد يحجي ويا نائل واني رحت احظر غدا النا ، هو اجا كعد يمي بالمطبخ ما كابلهم ، بقى يضحك ويتشاقى ويايه ونحن ناكل ، شويه اني اوكلو و شويه هو ، مرتاحين

طلع بعدها لبيت سعد ورجعلي كالي خل نطلع اني وياج بدلت وطلعنا مع بعض نفتر وهو مشغلي ( سمراء من قوم عيسى ) وصوت الطرب ينكث تراب شويه وغنى ( گولي يا حلو منين الله جابك خزن جرح گلبي من عذابك )

وصراع منطرب يغني وياه خاصه من يكول ( هم هذا نصيبي وانجبر بي لا اني اتوب ولا الله يهدي ) رغم الاغنيه قديمه بس حسيت كلماتها حلوه ، وتقصدنا

-اكولك انت مو ما تسمع اغاني

-ولج هذا ناظم الغزالي قابل مثل الاغاني لو مثل اغاني هلوكت الطايح حظها

-يعني ناظم مو حرام

-اوووو ، هاج طفينا ، من تالي كاعده ادور حلال وحرام

-غير اقلدك

-يدحك بيا ويبتسم ، كرص خدي وجر باس ايدو :- عيدها هاي مال كولي يا حلو

-لازم عجبتج

-ايي هههههههههه

-بقينا كل ساع نعيدها ونمشي ، اكلنا موطه و حلا ، واخذنا كرزات و بقلاوه ورحنا لبيت هيام كعدنا تعللنا وحطت كبالنا فواكه وكاستر

وكل شوي تسألنا :- ابخت الله تعشيتو خل اكوم اسوي عشى

ونحن نكوللها والله شبعانين بس كعدي

عاد سوالف وضحك وعلي وتحشيش وسوالفو الما تخلص ، ل١١ رجعنا للبيت

لكينا نائل كاعد بالحديقه يدخن نركيله و الموبايل يمو مشغل مواويل وعتابه ، صف السياره صراع ونزل صاح :- ها ابو فهد خيرك يولو شو مهموم

-لا والله ما بيه بس طاش راسي من هرجة الجهال وطلعت

... زتلو جيس كرزات وصاح :- هاك فوت تعلل وياهم ولا تضل هينا

ما كال لا اخذو ، بس شكلو هو ونور بيناتهم متحاجين

صعدت اني ، وصراع راح لأمو ، بدلت وغيرت ملابسي وتحظرت وهم سهره حلوه مع بعض ، جددنا نفسيتنا كأنو عرسان

كعدنا الصبح مرتاح هو ع الاخر من ال٧ طلع راح جاب كيمر وكاهي حار ، وكعدو الكل بس نور جان مالها خلك سحبت جهالها وكعدت بالغرفه .

عاد صراع كال :- كومي شيليلها كيمر وكاهي وودي لغرفتها خل تاكل هي وجهالها

جا سعد و جهالو الماتت امهم ، وكعدو يحجون بالصاله ، تركتهم واخذت الاكل لنور وفتت لغرفتها ، لكيتها كاعده ع التخت وجهالها تتباجه وهي مدنكه راسها بين رجليها

شافتني كالت :- فوتي يولي شكو كلفتي نفسج ما اشتهي

-ما على كيفج ، اكلي يلا ، اني اخذ الجهال ..

شلت عبودي ومشيت بي ، وكتلها :- شبيج شو وضعيتج مو تمام

-لج متت وهو ما يحس ، الجهال و البيت و العيال كلهم على راسي ، اكلو اريد اروح لإهلي ، يكولي مو هسه ، حسره عليه شيشة العطر ، لا بيوم يذكرني ولا بيوم يكول هاي شمحتاجه

الرياجيل اشكال الوان تجيب وتحط لنسوانهم الا اني رحمه لو دحك بوجهي ، ولج مليت لا اكدر اطلك ولا اكدر ابقى وياه ، وساعة وكتو ع الموبايل وكل شغلو لنفسو ، يتعطر ويتكشخ ومدري وين يطلع وشحدج تكضبين جهازو الا يتخبل

-ليش مينطيج ، شنو مو يشتغل

-من سقطت الانبار ولليوم وهو شغلو مو تمام ، المعرض عزل و الصيرفه ما هلكد ، واليشتغل بيهن الو وللجهال ، انه بعداد الموته ما بالبال وانذكر بس وكت الخدمه

-لتهتمين يمعوده ،كولي يارب وكعدي اكلي انتي وجهالج ولتهمين ، هههه هي صارت يوم الج ويوم الي

بقيت كاعده يمها لان ما اطيق وجه سعد واكابلو ، وهي ضايجه كملت اكل وكعدنا نسولف ونتشاقى

كملت طلعت خلصت شغل البيت وصعدت الصراع جان كاعد ع اللابتوب ، تقربت يمو

-صراع

-ها عيني

يحجي وعيونو بالموبايل

-اريد ١٥٠ الف

-كلهن كدامج عمري بالخانه ، ومفتاح الخزنه بمحفظتي تلكي

..يحجي وراسو باللابتوب يدوس ومدري شيشتغل

-مو الي لنور خطيه متكاونه هي ونائل ما ينطيها وحتى اول البارحه من شافتني مكصصه الملابس كامت تلوم بيه تكولي جان انطيتينياهن

رفع راسو :- ول ول شصاير بالدنيا ، مرت اخوي هيج معتازه و نحن مو دارين ، ول ابويه ليكون هذا واكف شغلو وما يحجي

-ما اعرف هو ما يخبرك عن شغلو

كام للخزنه مالتو فتحها وهو يجاوبني :- شتعرفين نائل يحجي ؟ اني اعرف شغلو بالنازل ما تشوفي عاف سعد وجا كعد عندي ، لأن سعد يعتمد لو شاف احد وما ينطي الربع ، حتى ما كدر يطلع ايجار

.. طلع ٣٠٠ الف وانطانياها :- هاج روحي انطي الها وكوليلها خلي مصرف تحت ايدج لو احتاجيتي انتي وجهالج ، وشتحتاج كوليليها يكول ابو حرب لا تستحي تجي وانه اخوها ما اقصر

.. اخذتو ورحت نزلت لنور ، الباب مفتوح ، وهي كاعد تسفط بهدوم الكنتور :- جبتلج شي

-شنو ؟

طلعتلها الفلوس :- هذي ٣٠٠ الف اخذتهم من صراع الج ويكول شتحتاج ختكولي لا تستحي

هي شافتهن ، وحظنتني وتتشكر مني :- الله ينطيج ويحفظكم يارب بجاه الحبيب المصطفى اتشكر منج حبيبه ومن ابو حرب

- ول دادا شنو سويت ، الناس البعضها ونحن هينا خوات ، واذا تريدين تروحين لاهلج كولي احاجيه و اني وياه نوصلج ماشي

بقت تتشكر مني وفرحت حيل ، ابتسمت الها وطلعت ، رحت الصراع كتلو على فرحتها ، حظني وكعد يمي

:- تدرين كبرتي بعيني بالزايد

-ليش ؟!

-لأن تفكدتي اهلي وطالبتيني الهم

-اني ما اكره احد بس افعال اهلك بيا ما تنجرع لهيج اني ابوك و ام سعد و سعد وما احبهم ، وهسه امك هم كمت ما احبها

-هههههههه يولي احسج جاهله و جواتج نقيه وهذا اكثر شي حبيتو بيج ، ما صاحبة وجهين التكرهي تعترفين انتي تكرهينو ما تجاملين ولا تتحايلين

-متشوف طايح حظي ؟ لان اني ما عشت ابيئه محيله ، حتى محد كان يضربني ، يحيى خرب لما انظم لداعش ، جان اذا ضوجني ثاني يوم يجيبلي هديه ويصالحني ويبوسني ، بس اهلك يحتاجلهم حيله وواحد يجامل لأن هم هيج

-لا لتصيرين مثلهم ، اليصل يمج انه اردو عنج ، بس خلي اخلاقج نفسها ولا تتاثرين بيهم ،

-و انت ؟

-اني شبيه ؟

-منو يردك لو اذيتني ؟

-گلبي يردني ، بكل مره تغلطين وتتجاوزين ، وبساعة عصبيتي اكول انتهت بعد ما ادحك بيها ، ونفس اللحظه اللي حجيت بيها لو درت ولكيتج تبجي انسى الكلتو والكى نفسي احترك لين اذيتج ،

والله ما جنت هيج ، شحدها وجدان لو رفعت عينها بوجهي ولو انرفع صوتها حسبيها انتهت بيناتنا وخبرت اهلها ياخذوها وطردتها ، بس وياج من صدك تغيرت ، انه وياج مو صراع انسان ثاني

لا تشيلين هم ، لأن هذا ( اشر على گلبو ) مستحبل يتركج ، طفل وانتي امو

-ابتسمت وحظنتو ...

لشويه وكال :- طلعيلي دشداشتي وهيرني ، اليوم الفصل مال بيت عمي

كمت للكنتور وسألتو :- ليش لليوم اكو فصول وفصليه ؟

-عجل ليش ؟

- بس سالفة الفصليه مو انقرضت

-هذا ياهو الگالچ ؟

-مدري غير هيج اسمع

-لا يابه ذاك اليوم بكعده الشيخ ، اخذو فصليه ، ما انقرضت وانما قلت لأن جانت الناس اغلبها فقره وما عدها تنطي فلوس ، تنطي مره لحتى يصير بين العشيرتين صلة رحم و يسكت الثار وما يصير دم

-بس خطيه اشنو ذنبها تعيش بذل وتروح ضحية ثار

-مو شرط ، هي حسب الناس التروحلهم ، ان جانت بكلوبهم رحمه لو لا ، بس مجملا هي تقليد الفصليه مو محبب  لان بيها ظلم

...بدل و كعد يرتب نفسو واني ادحك بيه ، واكول هسه من يشوفنه النسوان اكيد ينعجبن بي ، بس لو يلبس عكال ، يصير مو حلو ، وبتركنو :- صراع ليش ما تلبس عكال بس تلف الجراويه

-شلون البس عكال وابوي بالوجود ؟ ما يصير

-هو ابوك يحل يربط كلشي ماكو ، دلبس عكال شبيك

-ليليان كصري السانج واتأدبي هلكلام ما اريد اسمعو نوبة اللخ ، مفهوم ؟

.. سكتت ، كمل تبديل وطلع ، كلت :- يارب يفگس كل عين وحده ادحگلو

....

صراع :- رحت انه و الحجي للفصل ويا عمامي لمضيف الشيخ ريگان ، حظرتو و وصفينا على كعده ثانيه نفصل بيه ، طلعو اهل العشيره الثانيه ، وبقينا نحن ولد العشيره نتنتاقش ، وبعدها كعدنا نحجي بسوالف اهلنا

على فجأه الححي جان ملتم ويا عمامي ويحجي ، شو كام و گال :- ابو بندر وهاي جدام الكل انه اتشرف اطلب بنتك لأبني ابو حرب على سنة الله ورسولو

وعمي صالح ردو :- كبع واخذ ابو صراع اهي بنيتكم

.. انه بقيت تفاجئ ، لا احجي كلمه ولا اكول ، كامو الزلم تباركلي ، ويجعلها زواجة العمر ، وانه صافن بوجه الحجي ، اندرت تبسمت بوجوهم

وكمت تعذرت منهم وطلعت ، بس احس الدم فار بهامتي ، انه جاهل و هيج يحطني بموقف ، صعدت سيارتي وخابرت الحجي ، ما رد عليه

ليليان :- فات صراع و الوجه احسو مدخن ، يا ستار طلع من البيت مرتاح و ما بي شي شصاير

وكفت كدامو ، دفعني بعصبيه وفات للهول ، ضرب الباب على نائل طلع مفزوع وصراع يكلو تخابر على ابوك ال********* هسه يجي اليوم اگلب الدنيا على راسو والله

نريد نعرف شصاير شبي ، اول مره صراع يفشر بهشكل ع الحجي ، ومعصب اعصاب مو طبيعيه ، نريد نهدي ما يهدئ

جان اكو ميز طعام كزاز بالمطبخ جديد ،  انطاه دفره وينكلب الميز وصوت الانفجار مال البلور مرعب ، تكسر كلو كام يشيل بالكراسي ويركع

نحن كلنا ابتعدنا منو ، وهو شطلع من حلكو جواهر على كد الفشار و الغلط الحجاه بصراخ يا دوب تفهم كلمه منو

كل الفهمتو من كلامو وهو يصرخ على نائل يكلو :- ابوك الكو..... علك الكح... براسي

بس يحجيها بصراخ والدمارات مال وجهو وارگبتو كلها بارزه على كد عصبيتو

فات الحجي و عمهم عزام للبيت حار شحجى وشكال وشغلط وشعمل ، وعمو يريدو يهدئ وصراع يكلو :- بأحلامك اتزوج بنت اخوك السافله

والحجي يردو :- هلمصلاويه انه ما اريدها ولا اريد خلفتنا وساسنا يطلع منها ، وانه مو ابوك لما خذت بنت عمك ، والله يا صراع اتبرى منك الى يوم الدين

.. صراع متعرف شيحجي وشيغلط ، حتى خفت اغار لو اتأثر على كد عصبية صراع ، كل همنا صراع يهدئ

انتهت الحجي طلع من البيت ويغلط عليه وينعل بيا و يوم الدخلت وخذت عقل ابنو وغيرتو عليهم ، وصراع اخذ سويجو وطلع ما ندري وينو

ام سعد لبست عباتها وطلعت ورا الحجي و تكول للحجيه :- نحن طالعين عود خلي هلبيت لهل بلا اصل تخوط بشواربكم بكيفها

.. طلعت و نور غمتها وحجت باذني :- كلو منها انه سمعتها تكول للحجي ، اخطب اخلاص جدام عمامو وشوف شلون يقبل بيها ، باجر عكبه يخلف ، تريد اليشيل اسمكم منها ؟ ما تعرف اصلها مسيحي لو مسلم ، واخوها ارهابي وقنعتو على ابو شلون تخلفون من هاي ، ابنكم من لحمكم اشرف واحسن

واكفين بالمطبخ ، واني صافنه بوجه نور وهي تشكيلي ، فاتت الحجيه وهي تكولي :- بعد شطالبه ابني بثار راح ينجلط كلو من راسج

حجت واخذت عبايتها و طلعت ، صفنت بيها :- ذوله شجاهم ؟ زين اني شنو علاقتي فوك ما عتتخطبولو واني اللي انلام

بقينا اني ونور بالبيت ، اللي مطمني صراع ما قابل بهلزواجه وهو رافضها اكثر مني فبارد راسي وما فكرت

لليل اجا صراع ما يتحاجى بدل بعصبيه وراح دينام ، بس نطقت :- هسه شنو

زكح بيا :- تسكتين مني تره رطوحي واصله لهامتي ، عوفيني

اللي عرفتو الحجيه متكاونه وياه ابيت هيام على ابو الا يتزوج وانه حلفت الا ازوجك وما ارضى عليك الا تتزوج ، وهو هم متكاون وياها ، اخرها زعلانه منو ورايحه البيت الحجي

.. نام على وجهو للصبح ما حجه ، حيل مقهور ، طلع للدوام الصبح بلا ما يحجي ، للظهر نائل اخذ مرتو لاهلها ، بقيت بس اني بالبيت

تحظرت الو وتمكيجت كلت ، اغير نفسيتو ، جا من الدوام هو حيل تعبان تلكيتو ، ابتسم ابتسام ثكيله ، باسني بخدي وفات تمدد ع التخم

شال راسو :- عجل نور وجهالها وينها ؟

-اخذها نائل لأهلها

-وعافج وحدج بالبيت

-شعليه ، قفلت وكعدت انتظرك ، متغدي ؟ اسويلك الغدا

-لا تعبان ما اشتهي ، اصعد انام ..

طلع فوك ، حتى ما دحك اني امكيجه لو لو لا ، او متحظرتلو ، كلش ما الو نفس

للعصر جا اتصال ، بقى يغلط ويسب بالتليفون وقفلو بوجهم ، طلع نائل كايلو الحجي ماخذ امك الحجيه ورايحين لبيت عمي صالح ، وصراع متخبل

مخابر عمو كالو ، عمي انهي الشغله منك ، انه اخلاص مثل اختي ما اريدها وانه رجال صاحب عايله وما احب المشاكل

عمو متخبل شلون ترفض بنتي ، كلو من هلمصلاويه بايع لحمك لجل هلمصلاويه ، وهو يكلو المصلاويه شلها علاقه انه ما رايد هلزواجه واخلاص مثل اختي

عمو ما مقصر لاعب لعب وجامع عمامو على ابو صراع رافض بنتي وكاسر بيها ، يومين عمامو يرحون ويرجعون على صراع ، وصراع رافض ويكولهم ، فهموني انه اخلاص ما اريدها ، اهي غصب

ويكولوله بنت عمك طلبتها بديوان زلم عيب تكسر بيها ، وهوسه وصايرين حل وشد و واهلو كلهم طلعو من البيت زعلو

هو بالبدايه كال خفة وراحه ابرد راسي ، بس حالتو ما تكول هيج ، ولا كن كاعدين وحدنا ومحد ويانا بالبيت ، تحس معذب وعايش العذاب بهلوحده وكانو منفي

هينا اني خفت ووجعني گلبي ورحت گتلو :- صراع يعني شنو الحل

-عوفيها هي تصفى

-واذا ما صفت

-ليلبان انه اخلاص ما اريدها لو تضل اخر مره بالعالم هم ادحك بوجهه ، ولج انه اجيب كح... ابيتي شبيه انجنيت

... من كال هيج اطمئنيت ، وما شلت هم ، بس صرت اتمنى اهلو يرجعون على كد حالتو النفسيه اللي تعبت ، ومو بسبب احد اعرفو ، كلو على مود امو

ولا كانو رجال والشيب تارس راسو ، معلق بيها و كان بعد طفل ومحتاجها ومزوهر بلياها ، كم مره خابرها

مر اسبوعين ونحن

بهلحاله ، بس نائل ويانا ، لا الحجيه رجعت ولا الحجي ، وعمامو ما يحجون

الا بيوم وكت ظهر ، دخلو الحجي و الحجيه وعمهم صالح ومرتو واخلاص سلمو عليه واخلاص جت حظنتني واخذتني بالاحظان وسلام كأن اني اعز احبابها

تفاجئت من دخلتهم ، شويه وشفت صراع فات وراهم ، فات يتبسم بوجهي ، بس ما على طبيعتو ، سلم عليه كتلو :- شنو صالحتهم ؟

-اي

-اشلون ؟

-رحت تفاهمت وياهم وكعدنا وانحلت

-اي احسن

.. اندار لنور وكاللها :- السمج بالسياره نزلو ..

نزلنا اني ونور وصبينا ، وكعدنا ناكل ، بس صراع اكل شويه ، حسيتو بعدو ضايج ، و الوضع ما اعرف ما طبيعي

ما اعرف ليش ما ارتاحيت للوضع ،،،،،،،يتبع

☆☆☆☆☆☆