المراهقة والأربعيني الحلقة (63)

المراهقة والأربعيني

 

الجزء الثاني

الحلقة  (63)

اضرب على خدو ما يرد فاقد .. اصرخ بكل صوتي الحكوووووولي واصحي بي ..

فاتت هيام وخالات حلا .. صرخت هيام واجت خذتو من حظني وتصيح ولجن ماااي .. نذب على وجهو وما يصحى ..

فات الحجي و علي وراه .. يصيحون علينا نبتعد منو .. شالو علي على ظهرو .. ونزل بيى..

خلاه بسيارة الحجي وساق هو و الحجي وهيام صعدت وياهم .. وراحو ..

اني كمت ابجي بمكاني وكلبي نار كمت افور يربي راح يروح مني يربي والله ما اريد كولشي بس خلي سالم اليه ..

سمعت الحجي تصيح ٦ليه .. فتت عليها والدموع تجري وتكولي :- شجالو توا صعد كلشي ما بي شوكعو ولج

-ما اعرف يوم والله ما اعرف كليلي شسوي راح يضيع من اديه شسوي

-اخ يوليدي يمه ماااااا ترتاحن الا تجلطنو .. اكلكم عوفو السوالف ولت راحت ولجن الرجال تعباااان عيفووووووه .. كل وحده تشكي بصفحه

اخلاص :- صحتج يا خاله صحتج ان شاءالله ما بي شي هاي ما ترتاح الا تموتكم واحد واحد كرطت راس اخوه وابنو وبعد الله عالم ..

... كعدت ابجي وتركتها .. و حلا تبجي وواكفه بالكراج .. فات نائل كال وينو صراع

. كلنالو اخذو الحجي ..

.... خالات حلا اخذن من خاطر الحجيه وكامن راحن لبيوتهن بس اخلاص بقت كاعده تهدي بحلا وترد للحجيه ..

اخابر بهياام ومترد اخابر الحجي وعلي هم ميردون .. اخر شي رد علي ..

-شلونو صراع علي احجي فدوه گلبي نااار

-ضغطو صاعد ديعالجو لا تخافين .. كاعد يسوولو تحاليل وان شاءالله خير .. طمني جديتي وضلي يمها ..

-امك وينها ..  ما ترد ليش

-موبايلها بالسياره .. لا تقلقون شويه ونرد ..

... نزلت طمنت الحجيه و كعدت يمها وعلى نار كاعده شوكت يجي رجلي واعرفو بي شي .. شنو قابل الضغط جديد عليه ويوكع بس هو ما جاي يتحمل وجروحو جثيره بجسمو

... نور و اخلاص لمن البيت و سون عشى .. صاحت نور على اكل وجابت للحجيه ما ردت  ولا هي قبلت تاكل بس  جبرناها لان وراها علاج.

رجعت خابرت على علي  :- شو تأخرتو

-بالدكتور بعدنا سوينالو تحاليل برا لان بالمستشفى تتأخر

-شكو شبي غير تكولي

-يردون يتأكدون من الالم اللي براسو   ف كتبوله مفراس وطلعنا نسويلو .. بس نكمل نرجع لا يضل بالكم

سديتو منو ... واني اغلي .. يارب فدوه احمي واحفظو من كل شر دخيلك ..

حلا :- ها شكالو

- بعدهم ناخذي تحاليل من برا يردون يعرفون الم راسو شنو سببو .

-ياربي شلون والله تعب اني كلو صوجي شكيتلو على محمد لو ساكته امداني اخ ياربي اخ .. راح يروح بابا مني شلون بيا ..

.. لل٩ يلا اجه صراع جايبي كوا يمشي .. نزلتلو اركض حظنتو ووابوس بي .. :- ابويه وامي انت حبيبي والله ضل بالي عليك كلبي اشتعل نار

.. اني احظن وحلا تحظن بيه ونبوس وهو كوا يبتسملنا ..

الحجي :- وخرن عنو وخرررن خلنو يرتاح جاتلاتو بهمجن وخرررن ..

هيام شايله علاكة التحاليل .. هي وعلي كاضبي .. وخرنا منو وكعدوه ..

-ام علي شبي شطلع عندو

-شقيقه براسو ويحتاجلو راحه وما يتعصب وعلاج منتظم واكل منتظم .. يعني اذا نريدو نهتم بي

-بعيوني اشيلو والله بس خلي سالم  وما يتاذى

.. ابتسملي .. وراد يكوم

-وين خويه اكعد ارتاح

-مشيني لأمي بالغرفه ..

.. مشى للحجيه كاعده بمكانها وبالها خطيه نار عليه .. بس شافتو فتحت اديها وعيونها صبن ..

هو هم ما كال .. كعد ع التخت وتمدد على رجلها وهي تبوس و تدعي ربها يحفظو ويحمي .. وتگلو ابقى يمي يمه هينا گبال عيني لا تصعد انه اعلمهن شلون يهتمن بيك و شحدها التصل يمك وتحجي ..

.. جر ايدها وباسها :- بخير يمه بخير انه لا تشغلين بالج

-والله يوليدي راحت عافيتي هبطات عليك والله هديت حيلي يا يمه ..

وانفتحت تبجي دموع ..

-شنو القصه يمه هاي معناها تكليلي كوم ولا تكعد يمي .. بس بجي والله ما بيه شي كولو يا الله ..

تقربت كعدت يمو واخذت ايدو :- عساك دوم بخير حبيبي غير من خوفنا عليك

.. مسح على خدي وطبطب :- كوميني اصعد لغرفتي ارتاح ..

دا اكومو فات نائل .. مشتري العلاج اللي موصي الدكتور :- هذا ليليان العلاج على وقتو مو تنسين اكو علاج حتى بليل تكعدي وتنطي

هيام :- وقتي الموبايل ونبهي وكتبي ع التنبيه (علاج صراع ) حتى ما تنسين

- تمام

كعدتو و مشيناه اني ونائل .. وهو يحجي :- ولكم اكدر امشي والله الوجع براسي خو ما برجليه .. عوفوني

عاد تركو نائل وضحك وكالو :- ان شاءالله حديد ابو حرب ما بيك شي ما يكسرك مرض ..

بقى يمشي وراه لحد ما وصلو للتخت وهو يوصي ع العلاج ..

جبتلو كلابيه الو ما بيت خفيفه .. غيرتلو واحاول ما اركز بجروحه واحرجو .. تجيت ظهرو للتخت وخليت المخاد وراه وانطيتو الريموت ونزلت حلا مسويتلو شوربه ..

اخذتها وصعدت عشيتو وانطيتو العلاج و مدد .. خليتو بحظني و كعدت انومو ..

واني انومو صافن وسأل :- ليليان

-سولفيلي لما رحتي للشيخ منو شافج

-عقدت حاجبي .. منو يعني ؟

-يعني شلون مشيتي منو تلگاچ شكالولج انه ما ناسي بس كلت افضالج واكعد وياج .. نهيتها صح بس لا عبالج ناسي

-ليش تشغل بالج اسولفلك بس مو هسه ..

شال راسو .. من احجي وياج تحجين ما انتي اللي تكليلي هسه وما هسه .. احجي

-شبيك صراع

-لتكليلي شبيييك .. ما مخبل انه وتكليلي شبيك سألتج جاوبي يلا

-بقيت متفاجئه .. تعدلت .. يعني لكيت رجال بالباب مال المضيف .. كتلو اريد الشيخ كال شتردين ومنو انتي حس بيا ابجي كال امشي وياي

-ومشيتي

-اي

-منگبه لو هيج وجهج مسردح

-لا منكبه

-ما ضيفوج

-لا شلون فوتوني لبيتهم و ضيفوني خوش ناس مؤدبين .

-يعني دحكو وجهج

-لا

-عجل شلون ضيفوج واكلتي وانتي منكبه .. احجي شافو وجهج    منو جان عدهم

-انت شنو التريد توصلو بالضبط

-اليوم عمي حجالو حجايه وهو يصعد بسيارتو خلاني افور .. لج انه يكلي حرمتك كسرت وجوهنا جدام الشيخ وجهه اصفر وشگرة و رياجيل الشيخ ادحك بيها وانه عمك استصعبتها فوك طيحة عكلنا الرياجيل ادحك بوجوه حريمنا

.... كالولي منگبه عمي شلون يگول عليج هيج

-لا والله منكبه ما نزعتو حتى من هم اخذوني ما نازعتو بس يم النسوان من انطوني مي واكل وكعدني نزعتو بس كدام احد ابد ما نزعتو

-تعرفين هسه مال ادفنج على هلعمله .. يعني هسه انه شلون اواجه العالم .. حرمتي تفوت دواوين لج ما فكرتي بيا لو رجعت شنو موقفي

-صراع كتلك جنت منكبه ومن ضيم اهلك اني رحت للشيخ  .. واساسا اني ما رايحه للشيخ .. اني شردت منهم ومن ظلمهم كلت اكتل روحي تحت اي سياره تفوت اذب نفسي واخلص ..

-ما اعرف الصوج بيمن اشمرو ما اعرف انتي مظلومه و اهلي يصيحون نزلت عگلنا

-من ايدهم .

نزل رجلو من التخت وبقى يفرك براسو ويفكر ..

-ترا دا تأذي نفسك بهلكلام كافي انسى شي فات وراح كااافي

-شنسىىىىىىى ولج انه يدحكون بمرتي وتكليلي انسىىىىى عار لو كوااااا....

-محد مدحك بيا صراع كتلك والله منكبه كافي ارحم نفسك والله تعبت

-تعبتي منين يولو

-منك كل مر........قاطعني

-تعبني منيييي عجل امشي اطلعي مني

-مو منك من هسالفه.......

-كتلج طلعيييييي لا اريدج تهتمين بيا ولا تشوفييييييني ارتااااحي

-صراع مو هيج

-طلعييييييييي

-تركتو وطلعت .. ابجي نزلت لغرفة الحجيه هيام رايحه والكل طاش .. جريت فراش و فرشت

الحجيه :- عجل وصراع ؟

-ما يريدني يمو يگلي طلعي ..

تمددت واندرت ابجي ..

-يااا ولج مريض شلون اتركي وحدو .. شويه وطلعي يمو تره تعبانه نفسيتو وما يعرف شيسوي مو هين الشافو تحملي

-تمام يمه بس يهدئ اطلع .. القبل ابقى وان بعدو معصب انزل ..

.. بقيت كاعده بمكاني ساعه الوم حظي وساعه اصبر بنفسي واكول تحملي .. بين هلتفكير و نحنا كاعدين من الفجر وذبح وعزيمه و بعدها ووكع وتعبنا بجي وراه كل هذا تعب ثكل راسي ونمت ..

نمت و النومه نومه ونسيت انطي علاجو ب٣ بليل .. و الموبايل فوك تركتو ..

ب٥ وما اسمع بس صياحو بالبيت ويصيح راسي راااااح ينفجرررر راسي ..

فزيت مثل المخبله من الفراش مدري شحجت الحجيه .. ما اهتميت .. طلعت .. اول ما طلعت انضربت بي .. جاي نازل جوا

هو دحكني وضرب راشدي رجعني لطشني بالباب وكظبو نائل

وهو يصرخ :-  نااااااايمه ما اهمج اموت وانكبرررررر ما يهمججججججج ..  تريدين ادفنييييييني وتخلصين منيييييي

ولكم راااااااااااسيييي راح اموووووت رااااسي ..

... احس الدم بكصتي لان اجت بحافة الباب وما اهتميت صعدت واني ما احس بالدنيا شنو بيها مثل المخبله اريد اتذكر علاجو وين .

ونائل يصيح عليه من جوااا ونور اجت تكلي ولج علاجو وين .. اريد ادحك دربي ما افسر .. ادور بلا عقل وما احجي حتى دموع ماكو وكصتي تخر دم ..

افتح بالجراره واسدها وما ادحك العلاج .. اخر شي نور صاحت :- ولج مو هذا شبيج ثوليتييييي جرتو ونزلت ..

كوا انطاه نائل العلاج واني مشيت للدرج كعدت عليه وادحكلهم من فوك وهم بالهول .. ما اعرف شجاني حتى دموع نشفت بعيوني ..

احس القهر جاي ياكل بجسمي وما عاد الي طاقه اتحمل وهو بعدو يصيح ..

دحكني كاعده ادحك بيه .. صاح :- لو اموت ما يهمها ما عولت كلتلها طلعي راحت وما درت عني  ..

.... اني صافنه بي شسوي وشتصرف وياه .  تصل بيا مرات ينهد حيلي وبعد ما اعرف شتصرف .. احس لهين وعجزت عن اي فعل ..

... صعدو نائل .. فوك .. اني گمت من الدرج وفات مني .. ردت افوت يمو .. ما قبل ضل يصيح  :- طلعي مني ما اريد اگابلچ

.. تركتو وطلعت .. والقهر احسو يفور بداخلي ودموعي مدري ليش نشفو .. ضلت بس الجرحه ابلعومي تذبحني ومعرف شلون اداريها ...

للحظه حسيت الدموع نعمه انزل بيها قهري وارتاح ..

.. طلع نائل :- لا اتركينو ليليان صح يتعب بس يرادلو خلك لازم نهتم بي والا نخسرو تره اذا بقى هيج تعمى عيونه ويجن .. لازم نعالجو ونصبر عليه .. صبري بعد اخوج ..

.. هزيت راسي .. ومشيت فتت للغرفه .. متمدد نايم ويحجي بعدو اعصاب ..

شال ايدو :- شعندج جيتي ..

-كعدت

-كومي كبالي ما اريد اشوفج

.. لميت نفسي و ضميت رجليه لصدري و دفنت راسي بين جسمي ورجليه وقفلت اديه على نفسي .. وهو يحجي

-لا عبالج انتي متحنلتني انه اعرف تفكيرج حتى كصتج هاي المدمايه جايه تقهريني بيا عوووود شوووف تره اني متحمله منك وساكته ..

تفكير يهود افهمج ..

تركتيني ونمتي لا كلتي رجلي ولا اهتميتي خليتني اصيح للسما وارد من الوجع وانت نايمه

روحي كملي نووومج كووومي مني

كووومي

-على نفس وضعيتي وبس القهر ياكل بگلبي

-حتى هذا سكوتج تريدين تعذبيني بي جاي تبينيلي انه مخبل ومتحملتني وما تردين علي

انه كالولي مصلاويه يااااابه اكسر عظم يصب خباثه بس انه غبي صدكت وحابج من كل عقلي .. بس انه اعرف شلون اتصرف وياج

انتي ليش مااااا تردين . سااااافلتني .. رديييييي

-شلت راسي دحكت بي

-اهدئ صراع الله يخليك

-انه اهدئ ولج مجنووووون انه وتكليلي اهدئ اليوم اطلعهم من كبورهم وادفنج

حقيرا .. ويشمر عليه بالغراض اللي ع الميز .. كلبه كووووومي اطلعي منيييييي ... جايه كبالي تريد تموووووتني

-رديت راسي بين رجليه وهو يشمر ويضرب كمت اشهك من القهر بدون دموع ..

جر ايدي ومشاني للباب  طردي وهفو ورايه .. رحت للحمام .. كمت اشمر على وجهي مي واغسل بوجهي ..

واخذ نفس وارجع .. اريد استوعب حجم المشكله واتحمل بس ما اكدر اكمل تعبت..

نزلت كن الصبح توا طالع .. سيارة الحجي ما موجوده يمكن رايح لبيت صالح اخذ اخلاص وبات هناك يمهم لان ام سعد هناك ..

كعدت بالحديقه .. مدري ليش تمنيت حظن امي يمي احط راسي بحظنها واصرخ من كل گلبي واكول يوم والله تعبت كلما جاي اكبر جاي اتحمل هم اكبر من عمري

دفنيني واخذيني يمج انتي وبابا عايفيني هينا بهلدنيا اعاني وحدي ليش ارحموني واخذوني يمكم ..

تمشيت بالحديقه واني افكر .. وكفت كدام المرايا ادحك بوجهي صبح و ضوا بلا شمس طالعه كل ملامحي بانت بشكل واضح

مدري ليش جت على بالي اغنية اسمها (يمرايتي من كم سنه لليوم اديش اتغيرت .. من كم سنه لليوم انا كم مره اخسرت )

كمت اردد الكلمات على الساني دنكت ومن جد بجيت على نفسي .. :- ليش ربي ليييش كافي فدوه والله تعبت ..

... شكيت وبجيت لوحدي ... لحد ما حسيت هدأت نفسي .. رجعت صعدت فوك .. فتحت الغرفه وفتت هو متمدد ع حافة السرير و وجهو للجهه الثانيه ..

رديت اكعد .. حسيت على انفاسو هو ما نايم .. كعدت ع التخت وتقربت يمو .. حطيت راسي على راسو وحظنت صدرو بيدي

اخذ نفس .. كن حسره ... كضب ايدي :- اذيتج هواي مو

-لتشيل هم .. ارتاح وبس

-ما جاي ارتاح وانه ائذيج .. ولا جاي اكدر اضبط نفسي من اتوجع ..

-سوي اللي يجي على بالك .. بستو براسو ورجعت خليت راسي .. بس خليك بخير

.. رجع ظهرو فتح اديه واخذني بحظنو .. باس راسي ومد ايدو يمسح ع الجرح البراسي

-اوديج لبيت خالج ارتاحي هناك لما تتحسن حالتي ..

-ما اريد اتركك .. خليني يمك ..

-ما اكدر اشوفج متأذيه

-تريدني ارتاح ؟

-سكت

-طيب بسرعه وارجعلي الله يخليك .. بس روحه لا تفكر اروح واخليك ..

رفع راسي .. دحك بوجهي .. تقرب باسني .. بقى يتبادل وياي المشاعر ناسيين شنو جنه قبل ساعه .. دخلنا بجو خاص بينا .. هبة مشاعر شرحنا فيها لبعض شكد واحد يحب و يشتاك للاخر ومستعد يتحمل اكثر و اكثر لأجلو ..

... غفينا وما حسينا غير الظهر .. فزيت بسرعه .. كمت اخذت العلاج .. وكعدتو .. كعد بس كال الا ريوك ما يصير على معده فارغه ..

-دقايق واحظرلك الريوك

-اكفي قبلها حظريلي الحمام ..

-تمام .. طلعتلو ملابس واخذتلو منشفه ورحت للحمام .. فات هو وسد الباب ..

ضحكت .. افتح يمعود نائل موجود عيب ..

-اي وشسويلو .. قابل كاتب ع الباب حرمتي وياي لحد يتگرب ..

-جج دخليني اطلع

-مو اذيتج البارحه عجل خليني اغسلج جروحج بيدي ..

-ما اريد .. صراااع .. جج .. وخررر .. مجنووون .. هههههه

.... سبح وهلص وطلع واني بقيت حتى ملابس اليه ما جايبه شلون مشكله هاي .. شلون بالمجنون مالي اني .. حيخبلني والله .. دك الباب ..

... فتحت .. انطاني ثوب .. ديلا ... بس ثوب

-عجل شعرفني بالباقي .. طلعي يلا راسي اذاني خل اخذ العلاج ..

-اوووف .. لبست و ركضت للغرفه هو عيبدل ملابس طلعه

-وين ..

-اتفق على البيت اكمل بنائو اخلص شغلي ..  هذا البيت بعد ما اضل بي طكت روحي

-بس مريض لا تطلع

-عجل انسجن .  بس خلصي بساع فضيني بس خل اخذ علاجي حتى ما اتأذى..

-زين عجل انزل واني جاي وراك

-عود ليش

-هسه شعليك دنزل

-ضحك ..

-صراع لا تخليني هسه اصرخ والم الناس شنو انهديت ..

-هههههههه تمام نازل

-طلع وسد الباب .. حرام اذا رجلي صاحي والله مخبل .  وراح يخبلني وياه واني عقلي منا شلون تمام ..

بدلت ومشطت واخذت العلاج ونزلت لكيت حلا مسويتلو الاكل .  بس لكمتين و شرب الجاي و اخذ العلاج وطلع هو ونائل .

دحكت بوجهي حلا .. حسيتها ضاجت .. وراحت صعدت .  نزلت نور ضحكت

-شنو باليل تهرجونا بصياحكم وبوره الصياح تعرسون

-شنو

-مبارك خيه رجلج طابعلو بصمه .  وجرت حجابي ومشت تضحك... رحت للحمام .. دحك رگبتي اهوووو  رجعت لسوالف مصروعي التخجلني ..

... بقينا اسبوع  .. حالنا بين وبين مره عرسان ومره كاب عياطو بسبب الم راسو بس هيج هيج متحمله المهم هو بخير ..

بس بعدو نفسيتو تعبانه ما صحى يمثل القوه بس هو مهدود حيلو ..

وكف عمال بناء ع البيت و رجع سيارتو ورجع شوي شوي يمارس شغلو بس الجيش لسه ما رجع .. بس اعمالو بزنز ..

الحجي بالنهار يمنا وبليل ما نلكاه رايح لام سعد و سعد عوايلو عد اهلهن وهو عند عمو .  وام سعد يم اختها ام اخلاص ..

... اندكت الباب صراع جان كاعد متمدد والابتوب على رجليه يشتغل واني واكفه اكوي بملابسو

حلا :- بابا جدو يريدك جوا

-شكو ؟

-ما اعرف بس عمو سعد يمكن كاعد بالأستقبال

-كليلو صراع نايم

-تمام

... ترك اللابتوب وصفن .. اني اكوي وعيني عليه رجع اندك الباب..

نائل:- ابو حررررب .. كاعد

-لبسي حجابج بسع .. هاااا نائل .. دحك لبست .. فوت فوت

-ها الله بالخير

-هلا بيك

-اكدر احجي وياك كلمتين اذا ما تعبان

-اي حدر اكعد .. طلعي ليليان شويه

-لا لا بقيها عادي ما عندي شي

... استمريت اكوي

-ابو حرب انه لليوم يمكن الوحيد ما حجيت بسالفتك ولا ادخلت لا من علركت سعد ولا من عاىكت امي صحيح ..

-هز راسو بمعنى اي

-شوف خويه ذيج امي وسعد اخوي وحزام ظهري وانت جبيرنا واخوي وتاج راسي وما كدرت اصف وي احد ف اكتفيت عنكم واهدي بيكم على كد ما اكدر وما صفيت وي طرف

انه عشت وياك و بغرفة الحجيه اكثر مما عشت بغرفة امي ووي سعد .. ارتبيت يمك وتحت ايد الحجيه

ولهذا لليوم انه تحت ايدك ما تركتك بحالتك هاي وطلعت رغم المكتوله امي ومطروده وانهانت .. ان جانت هي سبب او لا كلت امي هي امي واخوي احزام ظهري ما اتركو باصعب حالتو لهيج حتى ما عاتبتك ولا ادخلت ..

.. خويه انت جبيرنا ومن زمان عندك كلمه اذا نضل بحجي النسوان نخرب ..

-بس سعد طاعن بعرضي نائل

-ما طاعن والله اخذها مني معليك بالحجي .. صراع احجي وياك هيج لو هيج .. مرتك هم غلطانه وهي هاي تسمعني انت غايب وهي مرت مفقود وناسنا هينا ما ترحب وعلاقتها وي علي غلط بغلط .

انه وياك نفهم هم اخوان وما عدهم شي بس ناسنا ما ترحم وعمي ابو وجدان صيحها بالفاتحه وخلا الما يشتري يتفرج .  غير تجوز ؟!! تروح من فجريات الله بلا حجاب وبثوب خفيف وبلباب تاخذ منو العلاج ..

وتعرف محمد وعلي وعداوتهم هذا مصورو وذاك يتهم ومكاون ما يسكتون .. ورغم هاي كلنالها جوزي من علي وسكتي وفضينا السالفه وطردنا علي من الحجي

وما جازت .. ردت بليل طلعت وياه واني ما موجود

ليليان :- غير سعد طردني

-الحجي ما وكفج .. نور ما صاحت بيج وكالتلج فوتي ولا ترحين ..

خويه انت احكم هيام ما بالبيت وليليان جايه من الموصل براس اخوي يعني لو تنصب ذهب ما تنحب وتبات ابيت شاب امو ما موجوده وشوف الناس شتحجي ..

بنيه صغيره وشكره ورجلها مفقود و بايتع ابيت علي .. والله خويه الطشنا .. وانه ما ادري هي راحت .. جيت بيومها ب الوحده نمت الصبح كالتلي نور تخبلت ورحت كبل جبتها وجيت ..

هاي كدامك هي جانت بالأردن ياخذهن علي ويطلع مول ويمشون سينما فد يوم اني لو الحجي حجينا لو كنالج كعدي .. نعرف انتي شنو و علي شنو وما نحجي

بس هينا صعبه يا صراع انت تعرف ناسنا شنو .. علاقة الولد بالبنيه غلط عدنا لو شما جانت نيتهم خو صداقه هلشي ما يمشي عدنا صح لو لا ؟

.. صراع ساكت ويهز راسو ..

-خويه سعد اخونا وحالتو تعبانه بيتو ماجر و المؤجر ما يطلع الا شهرين وعوايلو عد نسابتنا ولو شما يكون هو اخونا وبذمتنا .. والضفر ما يطلع من اللحم ومرجوعو علينا ..

ابن ادم لو طاح صاح اخ .. اذا انا وانت نتركو يطيح ونكفلو على غلط عجل وين الخوه ..

هو غلطان انه وياك غلطان من السما للكاع .. بس هذا اخونا ونحن يا صراع جنه ٦ وصفينا بس انه وياك وهو .. تعتقد اكو شي يستاهل ندمر الخوه لاجلها ..

-لا

-لا والله ؟ .. الصار خويه كلو من وره النسوان وهاي اخلاص سوسه والله سوسه تجي هينا تحش بامي وامي تحش بسعد  و الحجي وتخلي نارنا كابه وتمشي .. واحجي واصيح ولكم كافي مشاكل واسكت واهدي وترد تحش بيهم لهلحيه

تستاهل نخلي العالم تتشمت بينا من وره النسوان ومكاونهن وحجيهن ..

غلط وياك سعد وتجاوز على حرمتك ..حقك هذا هو جوا جاي يبوس راسك ويعتذر منك ويطلب المسامحه .. انزل وياي خويه واترك الفات يموت .. وخل نرجع خوتنا ونشد ظهرنا ..

-ان شاءالله انزل وهسه انه نازل وراك ..

... طلع نائل .. اندرتلو ردت احجي

-طلعيلي دشداشتي الجوزيه

-يعني را......

-هششششش بلا كلام طلعيلي دشداشتي بسع ..

-طلعتلو .. دشداشتو .. لبسها وسحب الغتره خلاها على جتافو .. رش عطر ونزل .. مشيت وراه فات للأستقبال ..

كاملو سعد باس راسو .. :- هلا ابو حرب هلا خويه .. حكك عليه وشما تحجي انه قابل غلطت وبعد سبحانو الما يغلط و المسامح كريم

-هاي هي خويه عفا الله عما سلف وانت اخوي وحزام ظهري .. صح جرحتني من تهمت حرمتي

-والله ساعة شيطان و اهي مثل بنتي وكل قصدنا نلم شغلك وهذا ابوي شاهد شكد جانو يخابرونه على شغلك متوقف ومحد يكضبو .. وهي هم تجاوت علي كم مرا وانه تجاوزت بس ما تسوه وانت اخوي وجيت اعتذر منك وابوس راسك واكلك انه الغلطان

- ماكو مشاكل ان شاءالله خواتنا باقيه ... ليلياااان

... اني جنت واكفه بالكيلدور اسمع .. عدلت حجابي ودخلت

-ها ابو حرب

-حدري سلمي على ابو محمد

-اخذت نفس .. شكد صعبه واني اكرهو .. خزرني .. عود سلمي . كتلو هلا ابو محمد شلونك

-هلا خويه هلا بيج

الحجي:- انتي بنيتنه يابه ونحن ما نكرهج الله يشهد بغلاة بناتي بس شويه السانج ولو انه هم ضربتج بس ابوج وامون ان شاءالله وما نريد مشاكل ضاله بعائلتنه .

-تمام حجي ..

-السانها من يطول ينكص .. بس انه الاكصو .. ايد تنمد على حرمتي وبنتي تنمد عليه ... وان شاءالله ماكو مشاكل .. وانت سعد تروح هسه تاخذ سيارة نائل وتجيب عوايلك وتكعدهم .. انه شهر واخلص بيتي واخلي هلبيت الك و لابوي ..

-ان شاءالله الله يديمك خويه ويحفظك ..

... اعتذرت منهم و صاح على حلا نزلت تعذر من عمها و وخابر هيام تجي .. سلمت على سعد وسعد سلم عليها ..

بس علي ما اجه ..  رفض وكال لامو كولي خالو انه بالشغل ..

.. سعد راح جاب عوايلو ورجعهم ورجع امتلى البيت .. بقت بس ام سعد .. الحجي صف وي صراع ومثل امك و انت هم ما قصرت بيها ووو صراع اختصرها وياه وكلو حجي ىوح جيبها انه ما عندي شو وياها بس حذرها السانها لو رجعت طالتو عليه لو على عرضي تكبر اكبر من اول ..

گالو لا خذها مني هاي بعد ما تندك بيها ولا تصل يمها ولا الها شغل بحرمتك ..

وراح اخذ سيارتو وطار لام سعودي ..

تركتهم وصعدت وهو دز على حسابو كص لحم و كباب و بيبسي على روح حرب وكلها التمت تاكل

و الحجيه امو فرحااااااانه تكلو كحلة عيني يوليدي من ما ضيعت اهلك ولميتهم هيج اريدك وليدي .. الرسول يكول ( لا يدخل الجنة قاطع )

وهو فرحان انطلق وياهم ..

... لو سالوني على احساسي .. ما اعرف .. احبهم .. مستحيل ... اكرهم .. لا ما طبعي حقد على احد ..

بس ما ضجت من رجعو .. صراع يرتاح باهلو مثل سمجه وهم الماي ما اكدر اصير انانيه وازعل لان صالح اهلو يبقى اخوه وحزام ظهرو لو طاح اني ما اكدر اوكفلو كد ما اخوتو يوكفوله ..

فمان ماكو احس ولا حسيت بشي .. عفتهم وصعدت .. صعد صراع .. واكفه ع المرايه امكيج ..

لف اديه على خصري ويبوس بكتفي بهدو ويهمس .. لتهتمين ... شايفه ذوله الجوا كلهم .. بالله لاخليهم يتمنون يعيشون بمكانج يوم ..

بيتج جاي ينبني ٥٠٠ متر بس الج وتحت امرتج لوحدج .. ما اخليج تحتاجين لاي بشر ولا اخلي بشر يندك بيج ..

.. اندرت وصرت كبالو .. مديت اديه اعدل بياخاتو و دحكت بعيونو .. احبك ..

-اموت على ربج

-ههههه وتقرب بوسني .......يتبع

☆☆☆☆☆☆