المراهقة والأربعيني الحلقة (57)

المراهقة والأربعيني

 

الجزء الثاني

الحلقة  (57)

صاح ع الحجي وكالو هاي المره شنو مصيرها هينا .. بنيه حمره خضره وشبابنا طايشين تتورط بيهم يتورطون بيها ونتصخم ورجلها ماهو راضين بهلحجي انتم

الحجي :- فوتي جوا يولي لا اطلعين

صالح :- ابو صراع البت زغيره والبيت كلو شباب هي ضلتها هينا شنو .. خل تروح لأهلها

ردت افوت بس استوقفتني كلمتو .. ما مكفي فضحني كدام الكل ويريد بطردني من بيت رجلي ..

اندرتلو :- العفو عمو بس هلحجي ما اله داعي علي اخوي واحنه عشنا ابيت واحد سنه ونص مرت حرام عليكم تجون هسه تتهمون بيا واطعنون..

واذ ع البيت مو من حك اي احد يطردني . ما كاعده عد احد اني البيت بيت رجلي وكاعده بي المتضايق مني براحته ما مجبور على عيشتي ..

صالح :- هلاااااا استلم ابو صراع اجت العصر وتريد القصر .. لو ما بيها خله ما تكول اطعنون بيا .. محد طعن بيها بس البعبو طلي يمعمع ..

خذ هلجلمتين يابو صراع .  هلمصلاويه راح تطر عكالك بالكاع وتريد حك وحكوك وتلعب على ولدك صگله

كامو يتصايحون واني واكفه و الكل يطمش .. والحجي يصيح بيا افوت و علي يدافع ويكلو حرام عليكم سويتو من الحبه كبه .. كل الحجيته وين امي لا تبقون ادور تزلل عليها لين شفتوها ما الها احد  ..

عاد جدو نزل رزايل عليه . هو ما تحمل طلع واني فتت للهول روحي طالعه وابجي .. اجت هيام متأخره .. شصار يولي

-غير عمهم هذا بس حبت الجاكيت ..... قاطعتني اخلاص

:- عمى بعينج هذا شنو احترمي يولي لا افرك حلكج يا ناقصة اصل  تاج راسج ابوي حيوانه

- اصلي يشرفج ويشرف عشيرتج لا تجيبين طاري اهلي على السانج افتهمتي

... اني تصايحت هيج .. لو كلهن كبن عليه انتي تشرفين عشايرنا . من تالي انتي تشرفينا وكل وحده طلعتلي السانها متر ولو بودهم ياكلوني ..

اخ يا كسرتي منين اجيبو ويردهم عني ... ذاك الجان يفوت بعين الواحد لو حجه وياي ..تالي وحده مثل اخلاص تهيني ؟!!!

ما رديت .. بقت هيام ادافع عني وفوتتني بغرفة الحجيه .. كعدت ابجي .. جان تفوت ام سعد

-دموع التماسيح ذن لا تخليهن حجه وتكعدين من الشغل فارجي وكومي خلصي شغلج يلاااا

... اندرتلها من طرف عيني وما رديت ..

-مو احجيييي وياج .. وجت شالتني من جتف دشداشتي

-ترن والله مو بحالج دعوفيني .  دفعتها و صعدت ابجي بغرفتي .. اوووف صراع شكول عليك من خليتني بهذله ..

فرحان مبقيلي فلوس .. بس كلي فلوسك بيمن حمتني هسه .. ارتاحيت من سبيتني وعلعلت گلبي ليييش...

شويه و دگت الباب اخلاص ..

-دحكي هينا يولي .. انه التمنيته وانتي الجيتي من تالي اخذتي والله ثم والله ما اخليج ترتاحين على جزات حرماني منو ..

- شو طلعي يلا ما ناقصتج بلا ...

كضبتني من صدر دشداشتي وتصيح :- ولج سمعييييي زييييييين .. احترمي نفسج لا هينا ادفنج والله تره ناري شابه من وراج

دفعتها دووووخري العانس وخررررري .. اني گلت هيج لو هاي نامت عليه وكفخات ما ادري الضربه منين اتلكاها وهي ضخمه واني يادوبي اطلع نصها ... كمت اصرخ بكل صوتي

فاتت عليها هيام وتكاونت وياها .. :- الا صدك ما تستخين شوووووو ودفعتها .  ولج اخليصه وحك كسرة اخوية وفكده لو تكربتي منها لأخلي سيرتج على كل السان ولي

-ولج انتي اطولين توصليني نسيتي لو اذكرج من جان اكوي صاكرج وخالج خدامه لرجليه

-ولج انه خدامتج مو بالحيف لو ما خايسه والم خيستج  .. وتكاونت وياها واني الم بشعري وعلى صفحه انزويت وابجي ..

دفعتها هيام من الغرفه ..  و بقت تتكاون وياها بره .. كعدت بالكاع ابجي .. وينك صراع وينك ليش هيج تركتني .. والله بعد ما اتحمل ..

دنكت وكمت ابجي حيل .. رجعت فاتت هيام :- ليليان كومي نزلي ويانه اشتغلي لا تنعزلين بغرفتج تره والله بعد ما بيه اتحمل .. المن اصير .. كومي ولتخلين الحجي على راسي ..

... مسحت دموعي .. ونزلت .. هلكد مكسوره .. وكفت بالمطبخ اغسل ودموعي تهل .. وكلها تشتغل ولا احد داري عني لو يكلي شبيج وشنو اليوجعج ..

ذاك اللي لو بجيت يكولي طلبي شنو تريدين بس لا تبجين والله تأذيني دموعج .. يا ترى هو هسه يحس بالامي ودموعي لو لا ..

ما اكول ميت ولا عندي امل عايش .. لان ماكو احد سلم من داعش واتأمل .. بس احساسي ضايع ..

لا اتامل يرجع و لا اكدر اكولن مات و ائيس .. جت ام سعد ..

:- تركي الستكاين صارلج ساعه تلعوصين بيهن وهن زفرات طلعي للجدور اللي بالحديقه غسلين

-بس اكو زلم برا

-وتستحين يبربو....... شو طلعي يلا بلا عياره بس تتشاردين ومسويه روحها تشتغل واكفتلها على استكانين    يلا

-تركت من ايدي .. احس القهر ذبحني ما عاد اكدر اتحمل .. اخذت زاهي وسيم واسفنج .. وطلعت احك واغسل بالجدوره .. اني و حنين بنت سعد ..

تقرب محمد لزمنا الصوندا .. ويسولف وي اختو .. واني هم بقهري .. مدنكه اغسل وما احس الا عيون محمد عليه ..

نكت اتفكد روحي .. الكا صدري طالع لان مدنكه والحجاب لافتو على ركبتي .. ع السريع عدلت نفسي ..

بقى يركز بعيوني .. كبر هذا من شوكت هيج يدحك بسخافه .. حتى اني اكبر منه .. صح هو اطول مني واضخم حسب بنيته بس عمرا اني اكبر منه بسنه شلون يتجرئ هيج يدحك

شكد كرهت روحي .. هذه النظرات فقط جنت اشوفها من صراع من جان يتمناني .. وما اطيقهن من غيرو احس دا اخونو    والشعور مقرف ومؤذي حيل ..

لا اكدر ادخل واترك الجدوره ولا طايقه ابقى .. اخذت الحجاب ودخلتو جوا الثوب كلو حتى لا ينزل ويطلع شي مني .. وبقيت اجلف بحرگه من الغثه اللي اني بيها

تقرب مني واني كاعده ويكلي جيبي بلا جيبي .. وياخذ مني ويطخ بيا .  نفرت منو بساع .. وخزرتو وهو اخذ يجلف عني ومبتسم ..

ع السريع علي صار گبالي .. جانت عيونو على حنين .. دحك لكاني مخزره .. بحاجبو سوا حركه بمعنى شبيج ..

تركت وفتت جوا .. جان يصيح محمد وراي .. وين ليليان كملي ما بقى شي ..

علي :- امي صاحتها .. ووكف بمكاني يريد يجلف .. ومحمد وكف كبالو

:- انت لا تدخل

-ومنو يمك انت .. انه اريد اغسلهن ..

محمد خزر حنين تفوت .. و علي دنك مهتم بقى يشتغل .. جا نائل يصيح ان يخلصون بسرعه يردون الجدوره وجا يشطف وياهم وكام يصيح ع الجوا محد بيهن تجي تغسل .. شوفو الجدوره كلها دهن ..

وبقى يزكح .. اندرت النور .. انطيني عابد من ايدج واطلعي وي نائل فدوا .. ما كالت .. كامت بسرعه وانطتني الطفل .

.. اخذت جاي وبسكت وكعدت اطعمو .. وبالي مشوش .. اني هيج تاليتي .. راح ارجع لأول محطه بحياتي ويتحرشون بيا ويتبلون عليه مثل ما سوا عابد ابنهم بيا ..

دحكت للطفل بالله انت شذنبك ويخلون بركبتك اسم لواحد نكس .. الله لا ينطيك يحيى الرب ياخذ حقي منك الله لا يوفقك ..

غسلت للطفل ورحت يم الحجيه متمدده .. كعدت يمها والف فكره تأخذني وتجيبني واحس من القهر معدتي تشتعل نار .. وابقى افرك بصدري و عيوني ناار من القهر

-ها ليليان شبيج يمه

-لشوكت نضل هشكل حجيه

-يا شكل

- خلينا نستقل لبيت وحدنا اني وياج ونبتعد عن كل هذولا

-ياهم هذولا تقصدينهم

-ام سعد الحجي اخلاص وابوها وكلهم .. ما اريد اضل تحت حكمهم ..

-صاير شي

-شفتي عمهم شسوا بيا .. كدام الكل فضحني واني ما الي ذنب خلا كل الموجودون يدحكون  شعندي وياه

يا حسافه والله ابيت صراع وانطعن وانداس .. وهو ما موجود امدا الدنيا الخذتو وخلت هذا وذاك يصيحني ومحد يردهم ويخش بعينهم ..

-صبري بنيتي بس خل اگف على حيلي وشويه اتقوى .. اكصم هلبيت ونعيش انه وياج بي .. حلا ومصيرها لرجلها .. راسي وراسج وانتي بنيتي

-يعني اكو امل نخلص ..

-لا تكطعين الامل بالله بنيتي .. صراع مو اقوى من الله ويحميج .. مثل ما سخرلج صراع يسخرلج غيرو .. الماعندو اب عندو رب ييمه ما ينسالو عبد ..

بس لا تأيسين الطيب و الخوش انسان ربو يدخلو جثير امتحانات حتى يختبرو .. الدنيا ييمه مدرسه نحن طلابها .  اليصبر ويتعب ويجتهد ويقاوم ينول و الكسلان و الموزين بيها مرتاح وبالنهايه يخسر

.. هي هاي الدنيا يبنيتي يحتاجلها حيل

-هزيت راسي اي ... حسيت كلامها شوي خفف عني .. كمت بست راسها .. الرب يحفظج امي انتي

-الله يوفقج ويبعد شر ابن ادم عنج بنيتي ..

.. كام يبجي الطفل كمت بي اتمشى .. واسمع اخلاص وامها واختها .. يحجن بيناتهن بالممر ...

وامهن تكولهن :- والله هضيمه هاي المصلاويه وتصيح بترس حلكها هذا بيت رجلي .. هلكح.... من تالي بيت رجلها وذيج المكروده الباع بيتها وذهبها واخذ الوراها و الوراها في سبيل يكبر شغلو .. وتجي الدايحه بحظن حظنين تاخذ الاول و التالي ..

-بحلمها والله لا ما اهججها ما اطلع انه اخلاص

.... اخذت نفس .. شكم ذيب منتظر ياكل بلحمي .. وشسوي .. اكعد اتاني وهم ياكلون بيا لو شلون ..

.. مشيت وياهم شيكولون احاول ما ارادد واتعرض للظلم اكثر .. يامرون اتحمل واكوم واكول يجي يوم وتفرج ونعزل اني و الحجيه ..

ام سعد تامر وتغلط .. و الحجي تحرضو ام سعد ويزكح و يتأمر عليه  وسعد يجي وهو ونسوانو و من ورا خشمو يحاجيني ..

.. اكعد واتذكرلي موقف لصراع من ام سعد خبستني بالكراج وما خلتني افوت من الشمس وجا كلبها فوك روسهم والحجي يتوسل بيا ومن يريد يغلط يدحك للباب خاف يجي صراع ويشوفو يغلط عليا ويعصب اكثر ..

من اتذكر هيج مواقف من حياتي شكد تتعب نفسيتي وتهيج معدتي حراره تذبح من القهر ..

الصعب ان تحس بنفسك وتسكت .. غصه لو تشرب نهر ما تجرعها ..

بعد يومين من الفاتحه خلصو عزيمه عد بيت همهم عزام ورجعو لبيت الحجي هينا .. اني ما انام فوك .. كلو يم الحجيه ..

سبحت فوك و نزلت .. سمعت سعد و الحجي وبيت عمهم صالح كاعدين يتعللون بالاستقبال ( جاي وجذب )

ف سمعتهم داخلين بسالفه .. واسمع صالح يگلو

- ابو صراع انت راضي هالمره تكعد ابيتك

-عجل وين تروح وصراع ما خابر علي مره جان لا ما گال يابه هلله هلله بالمصلاويه يتيمه تراها عينكم عليها ..

-عجل يابه انه ما كايلك اطردها .. بس انت عندك ولد نائل و محمد يروح ويرد وعلي وهي زغيره لو واحد عجبتو ووكع بيها وهم شباب طايشين بذيج الساعه احنه شنسوي ؟

غير الفضيحه تتركب بروسنا  ..

-شيرو علي شسوي

-انت تشيرنا ابو صراع بيك الخير و البركه بس خليني انبهك هلمصلاويه عينها على حلال ابنكم و بأذنك سمعت من حاجيتها وردتني هذا بيت رجلي

يعني جاي تكلي انجب انته ما الك اي كلمه ابيتي .. بس غير انه سكتت وكتها من المشاكل

-لا محشوم نكص راسها لو ترفع عينها وياك شحدها

-انه لمصلحتكم احجي قابل خاش بجيبي فلس ؟ بس لازم تامنون حلال ابنكم مايروح للغربه

الحجي :- بس يا ابو بندر صراع انطاني وصيتو گبل لا يموت وكال يابه العندي لمرتي و بنتي ما اريدهن يضيعن وكم مره وصاني لأن عرف بنفسو الموت محاوطو ..

سعد :- اكلك يابه هو صراع كتب وصيتو لو هيج حجي لسان

- لا والله يابه حاجاني

-عجل يابه هلجلمتين الكالهن انساهن اجعلو ما حاجيهن.. حجي عمي صدك ونبهني الله يبارك بي .. تعب هلمكررود تالي يروح لدريد خالها .  تعب وشكى والمسحي هذا تجي تكة فلوس وحلال بلاش

هو خالها حتى للفاتحه ما جا .. وتريد ننطي حلال المرحوم للهل مصالوه ذول الدواعش الا يطلعلك يحيى يكعدلك ركبه ونص ويريد اختو ..

احنه لازم نخليها تتنازل

الحجي :- صراع مفقود يابه ما ميت ويتوزع ورثو ويتقسم .. لا قانون ولا شرع يقبل يتقسم لو احد ياخذ شي

-عجل تسوينه وكاله هي و امو و حلا و نحن ندير حلال اخونا لبين ما يرجع خوما نخلي بيد اليسوا و المايسوا ؟ وعسى يطلع عايش ويردلنا بسلامه وان ما رد .. تمر ٤ سنوات ولذاك الوكت نتصرف ..

صالح :- حلا لها رجال يومين وتمش وهو مو غريب هم من عمامنا وامو بتنا ..

سعد :- لا عمي حتى حلا  شنو تريد سلام الاعرج من تالي يلعب بحلالنا .

صالح :- بس هذا ابوها ومن حكها وهي بنيه مكسوره وما الها احد تسوي وكاله لرجلها وتعيش بخير ابوها لا بذلة سلام وابنو ..

سعد :- والله انه حتى بأبن سلام هاذ ما راضي .. مدري شلون لعبو بعگل المرحوم وخلوه يوافق الا كلو من هويمه هاي ام الدروب ..

..... واكفه واتصنت عليهم .. اندرت ولكيت حلا وراي ..

-شكو

-لج قهر حلا والله قهر  .. اني ما اسمح لنفسي افكر بي ميت وهم بكل صلافه كاعدين يكولون المرحوم و يقسمون بأموالو .

-على بابا ؟

-اي

-دشوف منو هذا اللي يحجي وابويا ما ندري عنو ..

وخرتني وفاتت ..

وكالت :- هاا شو شنو الموضوع

الحجي:- ماكو شي جدي روحي نامي

محمد :- سوالف مال كبار و الكبار من تحجي الزعاطيط تسكت وما تناقش ..

حلا :- عجل اسكت انت ولا تناقش ..

جدو تره ميصير ه الحجي ...... بعدها ما دايره وجها والا محمد يكضبها من راسها ويصرخ ولج منو هذا الزعطوط ..

وطفرها بخصرها وللكاع دفرات .. طفر جدها وسعد و الحجي يدون يخلصوها من ايدو كاضبها من شعرها ويجر بيها وهي تصرخ بكل صوتها ..

ويزكح هذا :- ولج انه اطلعين صوتج وياااااي هينا ادفنج والله ..

دفعو جدها :- ابعد ولك ما عاش اليكضب حليوه وانه اشتم الهوى .. ابعد ..

محمد وكف بوجهو ويكلو :- لا عبالك ما افهم لا هامتك حلا ولا الخلفها كل همك فلوس تخلي بجيبك من وراها وتلف الاول والتالي ..

فاتت هيام تصيخ شالت حلا وتجر بيها :- الله اكبر عليك ناقص ولك يتيمة اخوي هاي وتكضبهااا .. الله لا ينطيك ان شاءالله

صاح الحجي وسعد بمحمد وطردوه .. وحلا صوتها عالي :- اني هذا الجربوع يضربني ما بالجيف والله لكلب الدنيا على راسه والله .. وتبجي وتشمر بديها وخاتله وره جدها ...

:- اسكتي عمه اسكتي الله يكسر ايدو بجاه النبي محمد

وعمهم طلع زعلان شلون محمد تجاوز عليه وكاللهم هذا حجي انه ما اقبل بي .. طلع .. شافني كبالو .. خزرني و مشى .. وطلع الحجي وراه ويصيح ابو بندررر

صاحت حلا وهي كاعده تمسح بدموعها وهيام يمها واكفه :-كاعدييييين يقسمون بورث ابوي بكل صلاااافه . زكح بيها الحجي وسعد هد عليها .. والله ما ينلاب بيج من يسحلج  عرررررمه

هيام:- هذا يا ورث يحجون عنو

سعد -لا تدخلين يهويمه وخلي الأمور هاي النا

-الكم منو .. انتو شو من صدك ما تستحون بعدو ما نعرف خبر عنو وانتم حايرين بفلوسه

سعد :- انتي كل كلمه ما الج بيناتنا فهمتي ...طلعي من الموضوع ..

:- والله وحلالك الجو يا سعد بغياب راعيها .

-انجبيييييي كلبببببببه جلمه ما اسمع من السانج اكصو والله

-والله عمت عين الدنيا الخذت الزين وخلتك تتجاوز علي يا سعد ..

- واسحك راسج بالقوندرا فهمتييييي ...

.. فات علي طاير وتكاضب وي خالو سعد من صدر دشداشتو

-انته تسحك رااااااس امي ادفنك هينااااا والله

هيام :- عليييييي ولك عليييي . وكامت تجر بي

وعلي وسعد تكاونو .. جا محمد من ورا و يضرب علي بظهره وتلازمو .. علي وسعد ويتعاركون .

فتت اجر بسعد وابعد بي عن علي وهيام تجر بعلي وحلا تتذابح وي محمد وكضبتو بعضه من زندو ..

وهذا كضبها من شعرها وللكاع جر سحلها ... صرخت عوفهاااااا حقييييير .. واجر بيها و ام سعد فات وتصيح .. ونزلت نور تجر بمحمد انريد بس يفك منها ..

ضربتها هيام بالتحفيه وعلى ظهرو .. وكل وحده بينا تبجي وتتصارخ .. وناس تكافش بناس .. انطبخنا وعلي كل دفره ينطيها لمحمد وذاك يضرب ويرجع الحلا

فات نائل يركض جاي من برا .. وكام يصرخ .. طرد علي ومحمد برا و كضب سعد وزكح بينا نفوت جوا..

اخذنا حلا ودخلنا جوا بس شنو حالنا .. نلهث ونبجي وكلوبنا تريد تطلع من الكونه والحده الصارت ..

كعدنا بغرفة الحجيه وهيام ربعت بالكاع وتصيح .. شكووووول عليك صرااااااع ارتاحييييييت من انسبت بتك ورااااك منين تجيبك هسه صراع .

وحلا تصرخ وتضرب ع الكاع وتصيح جده هسه تخلقيلي صرااااع اريد ابوي من جوا الكاااااع جددددده ..

و الحجيه كاعده بسريره ومدنكه راسها ما حجت .. مريضه لا تكوم ولا تتصايح .. بس دموعها جرت بلا ما تحجي اي كلمه ..

نور كابلتنا وكعدت تبجي ويانا .. وام سعد تهوس وتصيح العايقات الما يستحن هجامات البيوت .. يتكاونن وي الزلممممم

شويه وفات نائل :- هيام خويه انه ما رايد اغثج بس تجاوزج على سعد ما مقبلو وعيب .. كعدتج هينا طولت لمي جهالج واخذي ابنج وروحي البيتج انه انزل مرتي تخدم الحجيه ..

هيام :- هاي المرجيه منك ... عود انت الزين البيهم ..وتاليتك تطردني .. ضربت الكاع وكامت بهمه .. مشكور يبن ابوي

وزحكت ابناتها ينزلن غراضهن ..

نائل:- انه ما طاردج هيام .. انه ارد افض المشكله ..

... هزت راسها وتكلها .. يرحم الجان ما يصيحني الا ام علي وانه اصغر منو .. ودموعها تجري بحراره على خدها ..

-رحت يمها .. ام علي لا تمشين فدوا معليج بيهم هو بيت صراع ما بيتهم ..

-وخري مني ليليان ..  بعدني وجرت بناتها وطلعت ..

... نائل ما رد من طلعت تركها وصعد فوك .. واني كعدت ابجي بالهول بحركه .. اااااااخ يا صراع ااااخ ..

رد فات محمد يصرخ وينها هااااي ام الولد وينهااااا هسه تنطيني موبايلها لا اكطع الماي و الهوى عليها والله ..

وراد بفوت لغرفة الحجيه على حلا .. الباب مقفوله كام يضرب بالباب ويدفر .. اندارلي

:- انتي هييي صعدي جيبيلي مبايلها يلا

- دحكتلو ورديت راسي منو .. ما باقي عليه بس فطور رجليه ..

-شنو ما عاجبج انه ...

- كمت ردت اصعد .. جان يلزمني من زندي :- شو دحكي هينا ..

وي ما كضبني جبتو براشدي .. مو انت التطخ جسمي سااااااافل

.. رد كضبني من ركبتي ويخنك بيا ... ويكلي خل اشوفج شلون انا سافل .. ويخنك واني اصيح واخرمش بي ..

و ام سعد تكلو بعد ايدي ربيها لهل بلا اصل ... رد نزل نائل جرني من ايدو ودفعني وراه وانطاه بوكس

- من تمد ايدك على حرمة خالك راسك اكسرها سكططططططط اطلع من هينا يلا برااااا .. وذاك يصيح

.... واني اكح وابجي ومختنكه وكعدت بمكاني وطلعت نور جت يمي .. وتهمس كسر بيدو انشاءالله اللهي تنكص كومي حبيبه كومي

ام سعد - لا والله خلي يربيها

-يممممممه انتي لا تدخلين .. كااااافي .. هلبيت هاذ من يوم يومو بس مكاوووووون كااااافي ما شبعتووو مو نهجم فوكانا ما كافي المصايب البكلبنا تزيدوهاااااا

طلعت حلا :- عمو كاعدين يقسمون بورث ابويا ويحجون بفلوسه ويقسمووون انته ترضاها

-انتي اتكصيييين السانج واتكعدييين وكححححححه .  حسج ما اسمعو  حقيررره .. الصوت صوت عايقه واصل ليبرا  اليكول كاوليه عدنا چلبه

.. تركتو وصعدت تبجي لغرفتها وتتحسب عليه .. صاح وراه مو اصعد بالقران اجنزج يول تتحسبييين ..

رد فات الحجي .. هاااا

-شهااا يا يابه شهااااا تارك امة الثقلين مكلوبه ومحد داري عن دارك ..

-يولو عمك زعل من وره هلسكط حميد

... اندار نائل و اني كاعده و ابجي و نور يمي ..

-صعدي ليليان فوك فضيها ما اريد اسمعلي حس هينا .. كافي الفوك جتافن هاد حيلنا .. وبيكم حيل مكاون ..

... مشيت لغرفة الحجيه وكعدت يم سريرها وابجي و هي ولا صوت .. لا اني حجيت ولا هي .. فرشت يمها وبقيت بفراشي دموعي بللت مخدتي من كد القهر و الذله الشفتها ..

قهر يربي والله قهر ما تنبلع .. هيج انسبي وراه .. شكد جان يزكح ويضرب ونتكاون ما حسيت بالذله مثل اليوم .. اني محمد يضربني ..

ما نمت للفجر .. كعدت الحجيه ساعدتها تتوضى حتى تصلي وجبتلها الخشبه مال الصلاة الخاصه بيها ..

تريد تخلص صلاتها .. كطعت كالت رجعيني راسي راح ينفجر من الوجع رجعيني ما اكدر ..

رجعتها .. جبت جهاز الضغط حطيتو بأيدها وشفت ضغطها ١٧ ... شلت الموبايل وخابرت على هيام اسألها عن العلاج .

دك .. مغلق .. خابرت على علي

-الو

-ها ليليان

-امك نايمه

-اي توها نامت .. محتاجه شي

-اي اريد اسألها عن علاج الحجيه ضغطها صاعد و لا تتخربط

- ها ها هسه اكعدها

... كعدها واجت تحجي وياي .. ها ليليان

-بس علاج الحجيه ماكو

-بالجراره غير

-حبوب الضغط ماكو

-يا يا دشوف جنطتي يمكن ناسيته بيها .. مشت ودورت .. اي والله هذا .. هسه اخلي علي يجيبو الج طلعي اخذي منو

-تمام بعثي ..

رحت طلعت  فتحت قفل باب الكليدور وطلعت للكراج ... الجو ازرك كن يريد يطر الصبح .. الجو بيه بروده ..

واكفه و مجتفه اديه وامسح على زنودي من البرد .. تلمست .. نسيت الحجاب جوا .  يلا هم كلهم نايمين واني اساسا ما البس حجاب من علاوي لأن مثل اخوي جنا عايشين سوا ابيت واحد سنه ونص .. فما البس منو ..

حسيت صوت مشي يم الباب ركضت .. فتحت الباب .. فات

-هذا

-شكد انطيها ؟

-هي وحده عجل شكد .. اروح .. راد يطلع .. اندارلي واني وراه اريد اسد الباب ... حلا وين كون اذوها

-لا لا نائل صاح بيها وصعدت فوك

-ديري بالج عليها خطيه قهرتني .. وشتحتاجين راسليني ماشي

-تمام بس روح .. بردت خل افوت .. ابتسم وطلع ..  مع السلامه ..

-الله وياك .  سديت الباب ورحت ركض للبيت افوت .. دخلت واندرت اريد اقفل الباب..

وما احس الا انسحب للأستقبال ... ومحمد كدامي ودافعني للحايط و حصر نفسو وياي ..

ردت ادفعو .. يا حقييير وخر .. وهو حاط راسو يم اذني ويهمس لو صرختي اتجيبين الحجي الج ما يمسني شي افتهمتي فخليج حبابه يا حلوه

-وخر يا حيوااااان وخرر ... خل ايدو على حلكي وقيدني بيه .. لو علي ما دفعتي يحلالج مووو

-اريد اصرخ لو اوخر .. احس روحي طلعت .. كامت دموعي تجري واني احرك براسي واحاول ابعد بنفسي ..

وما احس الا اندك باب الكليدور وانسحب السيم وانفتح .. محمد بسرعه ابتعد عني

بس ابعد مني صحت ياوحيوان يا حقيرر... فات علي ع الصوت

-شسوالج .

-اني شفتو وصرخت كمت ابجي .. علي بلا حجي تلازم وي محمد وبوكسيات ومكاون من الفجر ..

طلع الحجي يركض بس بالشورت الأبيض ... وزكح ياااااااابه .. ولكم من الصببببح ..

وعلي واكع بوكيات واذاك يرجع البوكس .. علي الحلك و الخشم يخر دم ... وذاك وجهو صار خريطه والحجي يفاكك وام سعد تضرب بعلي على ظهرو حتى يوخر ..

نزل نائل يركض بالفانيله الداخليه و الشورت .. وكام يصيح وفاكك بيناتهم

ذاك كاعد ويمسح بالدم .. و علي واكف و يزكح كواااااااااا.... لو طخيتها بالقران احرك ناااااااقص .

محمد :- ما غيرك كوا...... اخ الكح ...

هذا حجه هيج وعلي هد نائل يدفع و الحجي ويكلو بس حدر يميييييييييي واعلمممممك ..

دفعو علي برا  ونور نزلت لف بحجابها .. متكولي شصار احتركنا صارنا يومين انجنيتووو .. اني فتت جوا ابجي

واسمع محمد يكلو هاي المصلاويه الكح.... تتواعد وياه بالفجريات ومخلصيها مباوس بالباب ...

فتحت عيوني ... وضربت على صدري عزا العزاني .. اخذت حجاب ع القنفه و طلعت ... خاف ربك والله جذاب حراااام علييييييك

محمد :- انه اجذب مووو .. فتح الموبايل و مصور لقطه لما علي راد يطلع واندارلي واني وراه وسأل على حلا .. بس جنا قريبين .. بس ما بيها اي قصد جنت دا اسد الباب وراه .........يتبع

☆☆☆☆☆☆☆

شيكولون ؟ .. (ثاري الأبو يا ناس خيمه .. و فيهه على عياله وحريمه )

متابعه ممتعه

☆☆☆☆☆☆