المراهقة والأربعيني الحلقة (71)

المراهقة والأربعيني

الجزء الثاني

الحلقة  (71)

اخذت غراضي ومستمسكاتي واخذت الجبه ونزلت الكل نايم .. طلعت للگراج لبست الجبه وطلعت..

بقيت امشي امشي وادردم ويا روحي .. فلا ابقى .. طكت روحي متت .. شنو حايط انصيص عدهم..

وصلت للشارع .. حسيت على روحي .. وين اروح ؟ بقيت ادحك منا منا .. كلت خل اروح لبيت هيام اخليها تخابرلي خالو .. وابقى عدها ليما يجي..

مشيت لبيت هيام .. دكيت الباب ساعه يلا طلعت هيام عيونها مبقبقه نوم .. شافتني واتفاجئت

.. -ها يولي خيرج ؟
-اني بعد ما ارجع لاخوج خابريلي خالو خل يجي ياخذني
-شو فوتي فوتي
-فتت ووكفت بالگراج .. عفيه خابري بعد ما اريد ابقى هينا مليت طكت روحي
-صراع يدري انتي طالعه ؟
- لا واساسا اريدو يطلكني ومالو شغل بيا اذا اني طلعت بنت كلب وبنت حرام
-عزا العزاج يولي طالعه بلا ميدرون
-اي و ....
-اشششششش اجيب عباتي ونرجع تردين خالج هناك يجي يلا يلا ..

راحت جابت عبايتها بساع و تمشي بيا..
-ام علي والله مليت ما اريد ارجع خل يطلكني
-نصل هناك ونتفاهم امشي يولي ..

اخذتني للبيت سيارة صراع ماكو .. بعدو ما جاي .. نزعتني الجبه بالكراج و الجنطه وضمتهن وكالت امشي انفوت..

فتنا لسه محد كاعد .. :- امشي نطلع فوك..

مشيت وكعدت ابجي من صدك :- يعني شلون مجبوره اعيش هينا تره ما صايره .. على اقل شي انسب وانهان ما اكدر اتحمل بعد مليييت

-بس كليلي شصاير يولي البارحه عفتكم وعين الله عليكم شجالكم بين ليله وضحاها انطبختو

اني خبزتي خلصت ويا اخوج لهينا وبس كافي .. تحملتو من جان يضرب ويوميه سابيني وتحملت فراكو بالغربه وتحملت اهلو بغيابو وتحملت مرضو من جا وتعب .. كافي تعبت والله تعبت اتحمل .. يا ناس تعبت اريد اهج مليت الا اسوي بروحي شي يلا ترتاحووون
-استهدي بالرحمن كولي يا الله واتعوذي من ابليس يبنيتي لو كل واحد اخذ قراراتو بساعة عصبيه جان نص البيوت انهجمت ..

وين ترحين يولي كعدي واستري على نفسج وج والله يحبج و يعشك التراب اللي تمشين عليها .. وين تلكين مثل حبو الج

-يا حب ام علي دخيل ربج يا حب وهو يسب باهلي وتللي بنت كلب وبنت حرام . اليحب ما ياذي .. وهو حيل اذاني
- ميخالف بس اهدي وكولي يا الله ويصير خير .. انتو رجعتو تكاونتو على سالفة ابويا وجيتو ؟
-لا سالفه بيني وبينو
-دكعدي حبيبه اهدي وارتاحي خل ننزل نتريك ونريح ويحلها الحلال
-لا اني اريدج تساعديني اخلص من هينا ما ابقى ..
-يولي راح اطلعين انانيه و مو خوش ادميه ما يكولون بيناتهم هسه يكولون زعلت لان جاب اهلو واطلعين انتي اللي تفرقين اللحم من العظم ..

زلمتج ادبي بنص بيتج واعرفي شلون تعاقبي لو غلط .. طالعه وعايفه بيت شكبرو شكدو المن اللميعه ؟
هذا بيتج و ابو حرب زلمتج وراعي بيتج وهم الزلم هيج طبعهم ساعة وكتهم من بتعصبون ما يعرفون شنو يكولون...

المفروض واحد يحتوي اللاخ ما اثنينكم اعصاب يولو يصير تنافر .. هو يتحملج ويكبر عقلو من تتخبلين وانتي تتحملي وتكبرين عقلج من يصير اعصاب واحد يتحمل اللاخ خوما نريدها كلها حلوه . واحد ساعة المر يتحمل وبعدين اذا كالج بنت كلب خوما ابوج الله يرحمو صار كلب ؟ و لو كالج انتي عيوني وانطيج عيني خوما صدك صرتي عينو لو انطاج عينو ؟
كلو هذا يا امي حجي السان نحن نروح نهجم ببوت على هلسان هذا .. ساعة عصبيه يهدئ ويجي يعتذر واتفهمي وياهم وعلمي حدوده
المره الزين التعلم رجلها مو تهج منو .. المثل اليكول ابنج وما تربي ورجلج وما تعلمي . شلون ما تعلمي يصير وياج..
ولا تكولين ما يتعلم ولج والله ابو حرب ما جان هيج .. لا يعترف بحجي مرا ولا يعبر .. ما علمتي يحترمج ؟ ما علمتي يكف ايدو وبعد ما يضرب ؟ .. يولي على تال عمرو تغير والتعلم وهلشي الج انتي علمتي
وعلمي بعدو واصبري وهو يصبر وهاي بعد الله اليحلها . يلا حبيبه نزلي و تريكي والله انه حاسبتج مثل بنتي لو اختي والله ما حاسبتج مرت اخو..
... حسيت كلامها شوي هداني بعد ما جنت نار مستعره .. نزلت اني وياها وهي تنصح وتحجي وهيج علمي وهيج كوليلو
.. كعدت الحجيه .. وتفاجئت ام علي عدنا من الصبح :- صباح الخير يمه شو اليوم غباشي
-هلا يلحبيبه ماكو شي شفت بيج رؤيا وضل بالي عليج واجيت لكيتج نايمه .. كامت باست راسها . شلونج يمه شلون صحتج
-هلا ييمه الحمدلله بخير لا يضل بالج كلشي ما بيه .
.. صدكت الحجيه الفلم وحطينا الريوك و الحجي طلع هو وام سعد ونور و الجهال يتريكون .. وبقو يسولفون . واني ادير بسالفه ابالي . بعدني ما بالعتها .

شنو يغلط ويسب ولازم اتحمل ولو غلطت اني بنص حرف انكتل والكل يصير مفتي واتحملي ومحد بيهم ينصحو ويكلو اتحمل لو غلط .. هلوضع ميصرفلي يجي واكلو طلكني ما اضل.

فات هو ونحن نتريك .. سلم عليهم من ورا خشمو .. وكعد . كالو الحجي :- ها يابه خيرك شو ما على بعضك

-ما بيه شي حجي راسي دايخ ..
... اشر الحجي النور ادخل جهالها جوا .. وهدو السوالف .. سالتو الحجيه متريك .. ما رد .. بقى مدنك راسو وبأديه يفرك براسو .

تركتهم وطلعت فوك .. شوي وجا فات ورايا لا سلام ولا كلام وهو الزعلان .. فتح الكنتور و بقى يبدل..

دحك كاعده :- ما تكومين تسويلي زقنبوت لو الا اطلب

- تقربت مشيت يمو . اريد احجي وياك
-ما اريد اسمع .. نزلي بلا
-طلگني..

حجى باستهزاء :- نعم ؟
- طلكني لهين وبس ارحم نفسك وارحمني وخلينا نخلص
-اسطوانه جديده هاي لو شنو ؟
- لا بس ما بعد اكدر اكمل اريد اشوف دنيتي اشوف وجه ربي الى متى ابقى اعاني ..و لدكولي مكصر وياج لو غالط بحكج .. مو كلها فلوس وطلعة ..
-عجل شنو يلبطرانه ..
-احترام ما تحترم وما تقدر عيشتي وياك كل ما جالها تصعب وما عاد الي حيل اتحمل طلكني الله يخليك
-كلمة طلگني هاي لو سمعتها مرة اللخ بالقران ما تلومين الا نفسج ..
-بجيت وكعدت ع التخت . عجل شلون اني مليت مليت كافي
دحك :- والله انتي جاهل

-وحتى الجاهل لو غلطت على ابوه ما يقبل ويبقى يبجي وانت تسب ابويه بگبرو ليش شنو مسويلك هو .
-كعد يمي .. كافي يلا لتبجيني .. عمي انه الكلب وانه المو خوش ادمي واحترك ابوي واحتركت عشيرتي بعد ؟ بس لتبجين
يولو وحك الله اعشكج وكل هذا انه عليش مو لان رايدج وراغب بيج .. قلة نسوان لو شنو بس والله ما تحلى بعيني غيرج..

بس انتي بارده يولو انه محترك ابو ابوي وانتي ام الراهي .. اريدج تذوبين بيا مثل ما انه ذايب بيج .. تحبيني مثل ما احبج وما اكدر افرط بيج .. مو لو عصبت ساعه تكليلي طلگني .. ما يصير

-انت ما تحبتي لان اليحب صدك ما ياذي
- اي صدك كولي النفسج ترا انه شبعان اذية الله وكعني بعشك وحدة بگد بزري وميت عليها وهي لا ابالي ومعدها طكة احساس
ملهوف عليها بكد رحمة الله وما عرف شسوي ولو تريد ماي عيوني ميغلى عليها .. بس لو تفهمني وادير بالها عليه بس منين اجيب احساس للي ما يحس

-والله عجل اني شكول الله بلاني بواحد متت بي وشفت بي كل الحنية وحبيتو بس ميقدر وميعذر
و وكت العصبية الله ميحملو اني شسوي گولي

-ابتسم .. لان مطي وميفهم
- ليش
-لو يفهم جان ميحجي ولا يتعصب ويحرك اعصابو ويرجع يتندم هو لو يفتهم جان حالو حال غيرو يشيل بكلبو ويخبيها ويساير مرتو ويروح من وراها بغير شغلات يطلعها
بس انه مو هيج والله ما اريد ااذيج انتي روحي بس انه هذا طبعي والله زين مني اطباعي متغيرة من اخذتج الا ما جنت هيج .. جنت من صدك ما انحمل
فتح اديه حتى اجي بحظنو .. ما اهتميت .. بقيت امسح بعيوني..
-عمي ما بلازم انه الاحضن وهذا خدج ابوسو هم بس فكيها ولا تبجين .. وهسه صافي يلبن ؟
-لا
-ول يابه ليش شكو بعد ؟
-توعدني بعد ما تسب ابويه ولا تغلط عليهم ما الهم ذنب ليش ..
- عمي بعد اسب اهلي ما اسب اهلج بس فكيها يلحاقده ..
-رجعت راسي بحظنو .. والله احبك وانته ابويه وانت امي بس من تتعصب على كيفك بيا مو يكولون ابن ادم ليما يموت يحتاج تعلوم
-بالله حكج عليه بس مرة اللخ لو سمعت كلمة طلكني والله لخلي الحزام يلعب على جسمج
-شلت راسي دحك شوف حتى حبك تهديد ويخوف
-هههههه عجل شلون شكول ؟
-كولي حبيبتي ليليان هاي الكلمه بعد لا تعيديها ما احب اسمعها
-اوووي هاي انه هيج لازم احجي هههييي شو حدري لشوف حدري يلبطرانه ..

حطني على صدرو وتمدد وساعه يحجي ويتغزل .. بعدها گام كال :- جوعان يلا كومي سويلي اكل..

نزلنا سوا .. شافتنا هيام .. ضحكت كامت توزع ابتسامات بالمجان وتغمزلي .. لمحها صراع
:- هو بعد اخوج شكو فرحانه ؟ .
-لا خويه جان اكو ذبان بالبيت والحمدلله راح طار من اجيت انت
-رفع حواجبو وكاللها .. هاا خير انشاءالله ومسح على لحيتو ومشى
رحت سويتلو اكل وحطيتلو طبله وكعد بالهول ع التخم ياكل وكعدت يم هيام..
-هااا يولي طارو ذباناتج ؟
-اي ومو اسمهم ذبانات اسمهم عصافير
-شصار وشسويتي ؟ تحجي همس وتستفسر
- انطيتو درس وعلمتو
-اي عفيه يستاهل
-لا ما اسمحلج زوجي رجاءا
علت صوتها وسمعتو :- هاااااااه هسه صار زوجج عجل ياهو الگبل شويه الدموع و المخاط سوا وما اريدو وحيلكم عني هو ياكل ومدنك وعود ما منتبه .. خاجاها وهو مدنك :- ما تريدني انه اريدها انتي بس خليج بعيظه ولا تدخلين بعد اخوج مره ورجالها وتكاونو انتي شكو .. حجاها وهو مبتسم ومدنك

-هاااا هيج صارت والله عمي صوجي .. من صباحيات الله حتى غسلت وجهي واجيت اشرد الذبان من البيت تالي هاي جزاتها فاتت ام سعد للمطبخ صراع حجه وهو يدحك ورا ام سعد :- اي غير كل الذبان منج لو بس تولين مني انه ابخير محد حسدنا غيرج..
... دنگنا اني وهيام خربنا ضحك وهو ياكل ومدنك ويبتسم ..

مد راسو احمد من باب غرفتهم :- عمو اتع ؟

-ومنو حابسك يا عمو ما تتع ..

اجا الطفل يركض للصينيه ياكل .. و وصراع يخلي كبالو..

كام يلعوص كالو :- حدر حدر دشوف .. طلعلو الف وطلع بيد ثانيه ربع .. ياهو التريدو
اخذ الالف .. ضحك صراع وباسو بخدو :- ابن ابوك يول الله يرحمو جان يعرف ال١٠ من ال٢٥ من الملمس .. يكول كلبي يحس بالحمر مثلو لونو
انطاهم هو واخو وكاللهم :- روح الماما ضمو فلوسكم يلا..
.. كمل اكل وانتظر للصلاة صلا ونام ...

انتبهت ع الدم انقطع عندي مو مثل كل مره شهريتي تستمر .. اجت بليل انقطعت ثاني يوم الظهر .. بس بقى ملازمني الم بظهري يذبحني..

مرت ٤ ايام .. والدم باليوم ينزل قليل وينقطع بس الم ظهري يزيد ويزيد...

الظهر تمدد صراع ع الموبايل و گال :- ليون اكويلي ملابسي خاف اطلع العصر

.. رغم الم ظهري رحت مديت الطاوله مال الكوي وبديت اكوي ..

دحگت بصراع مركز بموبايلو و ما اعرف اش صار بحالو هو عادة ما يدحك فيديوهات سخيفه يستحرم وحتى لو شفنا فيلم وطلعت بيه هيج لقطه .. يدور القناة او يعدي اللقطه .. ومن اكولو ليش..

يبوسني ويكولي تريدين سويها بالحلال ولا تملين عينج بالحرام وتتحملين اثم على شي ما يسوى..

بس شلة اصدقاء هو يحبهم ومن اعز اصدقائو بس على كولتو يسميهم ( عفطيه ) عدهم كروب مشترك ع الواتساب .. هلكد يفشرون بيه .. ويبعثون شغلات سخيفه و يحششون يعني رياجيل بيناتهم هو يحذرني ادخل محادثتهم واقرأ لو اشوف لان فشار ما ينلبس عليه ثوب .. يكولي مو حلو تقرين هيج سوالف متناسبج..

بس اني فضولي يدفعني اقرأ ورغم فعلا من سوالفهم تخجل حتى من روحك بس يشبعون ضحك بفشارهم . حتى مرات اكو كلمات ما افهمها و ما احسخا فشار اجي اكلو ع المعنى ويزكح بيا وميقبل يلوث سمعي بهيج الفاظ وافكار..

مره دخلت على محادثتهم .. باعثين فيديو سخيف مضحك .. ف هو حجاي وكايللهم :- خوات الكح.... بطلو هلسوالف انه استحرم ما كوا.... مثلكم وادحك بهلتلعوص هاذ..

وهم نازلين بي تصنيف لان يگللهم استحرم هذا اليدز بصمه يعفط بيها ويضحك وهذا اليكلو بركاتك شيخنا ما تجي تقرا على بواسيري بلكن اطيب وهو باقي يفشر عليهم ويضحك وياهم..
..... فبيوم اللي كاعده اكوي .. هو فاتح فيديو .. والشيطان وازو وبقى صافن بي ما غلقو . لحد ما كتلو :- صراع شبيك شو وضعك ما طبيعي ع السريع قفل الجهاز وتركو جنب .. واستغفر ربو :- لا هيج ماكو شي .. دحك بيا واني اكوي .. كملت .. فتحلي اديه
رحت كعدت بحظنو .. بقى يلعب بخصلات شعري :- سبحتي

-اي بس ظهري ذابحني الم مدري شبي كوه اگف .. دا احجي وهو بوس بكتفي وبعد شعري يشم .. لفحتني ريحة العطر مالتو ..

بعدتو :- صراع بس شويه ريحتك تلعب النفس .. خلع الجاكيت وكال :- هاي نزعتو .. حدري يمي..
-العطر بيك صراع مو بالجاكيت وحتى ظهري يوجعني .. اجت الريحه بخشمي .. دفعتو حيل وردت اكوم ما قبل ضاج وتعصب بشكل كمت ادافع وياه واصيح واكلو قدر يا اهي دكلك ظهري يوجعني ولعبانه نفسي دووووخر .. ورديت دفعتو بقوه..

الا ينگلب وحش شلون ادفعيني .. امشي بكيفج اني .. وبقى يفشر ويصيح وغصبني واني اخس روخي عتطلع..
.. بعدها ابتعد مني اخذ ملابس وطلع للحمام وهو ضايج سبح وطلع من البيت واني بقيت بمكاني ذبحني الألم .. كمت اتلوى وابجي دمووع من كل عقلي ..
رحت سبحت احس الالم زاد .. بقيت بغرفتي ابجي .. احس صخنت والدم رجع عندي بس كانو نزيف ..

اخذت الموبايل اخابرو ميرد .. عبالو دا الومو او اصالحو .. تكبر وكلما اتصل ما يرد .. بس الالم البيه بعد ما يخليني اتحمل ليما يجي...

طلعت رقم نائل واتصلت جاوب :- الو

-نائل الحكني فدوه دا اموووت
-شكو يولي
-بس اتصل بابو حرب كلو جاي اموت من الألم
-انه جاي بالطريق بدلي وهسه اخابرو .. عسريع ..

گمت لبست الجبه و وبقيت اتلوى اريد اكوم للحجاب .. احس ظهري ما ديعيني..

شويه وفاتت نور كن مخبرها نائل :- ها يولي شجالج شصاير .. شو كومي كومي.

كومتني واني ابجي .. شوي ونائل وكف على باب الغرفه يصيح :- ها بعد اخوج گولي يا الله مشوني واني ابجي وصايره فلم .. نزلوني و الحجي يصيح شكو والحجيه تتفقدني شبيج فات صراع...
:- ها يولو شبيج
-انت اكرهك وخررر مني راح اموووت ..

ما رد .. اخذ ايدي ومشاني للسياره صعدني وصعدت وياي نور وتمشي وهي توصي بعمتي وام سعد يديرون بالهم ع الجهال..

اخذوني للمستشفى .. ومشوني لصالة الولاده ودخلت وحدي .. فحصو كالو اسقاط .. دتسقط..

تفاجئت يعني اني حامل ؟؟ من دريت احس روحي فارت .. طفل وراح مني بسببو .. واني اللي اتمنى وانتظرو ع النار ويسقط..

بعثوني على سونار وطلعت هو كاعد ابد ما نطق .. من شافني كام واجت نور وعيوني تجري

-هااا ؟
-طفل وديسقط وبردون سونار ..

هوو احس فرفح قهر .. گام يفرك وجهو ويستغفر ربو
امشي واحجي .. كلو منك عسقط طفلي وانت السبب ذبحبتني دمرتني فلا ابقى وياك بعد..

هو ابد ما رد بس احتقن بشكل والقهر بين عليه ونفس ياخذ وينطي و الضغط ارتفع عندو...

بقيت انتظر السونار .. واني اتلوى .. اخذت ورحت .. حجت وياه الدكتوره :- صارلها شكد تنزف وانتو ساكتين ؟ من تموت صحتو ماتت ؟ تره رحمها كلش تعبان و لازم توقعلهم على العمليه لو تعسرت نرفعلها الرحم..

كمت ابجي من صدك وهو كاللها :- يصير اخذها مستشفى احسن
جاوبتو :- ما تستحمل حالتها لازم للعمليات فورا خل تمشي .. وللا ينفجر رحمها و تموت..

طلعت دموعي تجري و هو يعصر بعيونو الضغط صعد لراسو ما عاد يدحك رادت يتقرب مني ويهديني .. بعدتو وكتلو :- لو صار بيه شي بذمتك وبسببك وما اسامحك طول عمري

.. لبست ملابس العمليه واني ادعي والقديسه مريم ما وكعت من الساني واني اطلبها تساندني ...

دخلوني الصاله وسوولي العمليه .. ما حسيت الا واني بغرفه وهيام و الحجيه على راسي و هو كاضب ايدي .. باسن راسي واتحمدلي بالسلامه.
... اثناء البنج جنت ابجي و اصيح صراع لا تتركني صراع اخاف وخابصه الدنيا بأسمو .. فبقى كاضب ايدي وما تركني من دحكني كعدت .. حظني وحط راسو على راسي وما حجه .. واني اون و ابجي .. بعدتو عني و ابجي من الالم انطوني مسكن ومنومات ونمت .. لهناك كعدت ورجعوني للبيت .. و صراع ما جا يمي ولا حجه بس عيونو من يدحك بيها الف حجاية اعتذار وندم..

للظهر بدا عندي نزف .. فخافو عليه اخذوتي للدكتوره .. انطتني علاج سألتها على داء القطط كالت ما عندج وطبيعي بس يمكن شايله ثقل وواكع

... الحجيه ما قنعت بهذا الكلام .. كالت الهم سالفتها ما خاليه كلما تحبل تسقط و الحجه شكل هل ناخذها شيخ ونشوف علتها بقوتي يومين جوا بغرفة الحجيه يداروني وصراع يشوي اللخم و المعلاك ويبعثو بأيد بنتو ما يفوت للغرفه لان كلتلهم ما اطيق ادحك وجهو..

ما عرفو البيناتنا شنو .. كل الكلتو الهم ان تكاونا ووكع الطفل وهو ما برر ولا حجه ويا احد .. وحيل مقهور على حالتي و الطفل الخسرناه بسبب لحظة شيطان ضيعتو ورادت تفقدو عائلتو من كمت امشي على طولي ووكفت .. الحجيه لحت اروح وياها على مره تعرفها تشتغل بالقران وتعرف بسوالف روحانيه وتكول عنها خوش مره ومو نصابه وحتى لو ماكو شي تنطيج طلسم حرز ترقيلج

.. لبست و طلعت بالكراج انتظرها .. هو كاعد ع المسطبه و اللابتوب كدامو
مشيت الو وحجيت :- تحسب احسابك اخبر خالو وارفع عليك دعوة طلاق
رفعلي راسو .. دحك وبقى صافن بعيوني .. اخذ نفس وهز راسو :- ان شاءالله بس گومي على حيلج وصيري زينه و اللي تريدي يجرالج..
.. طلعت الحجيه وكالت يلا امشي :- مشيت منو وصعدت ويا الحجي والحجيه واخذوني .

دخلونا على بيت المرا .. غرفه بيها صور ايات قرأنيه وقران جبير مفتوح واجت كعدت كبالها .. دحكت بيه وبقت تسالني اسئله غريبه وحتى سألتني لذا شفت او صار وياي شي غريب حجيتلها بس ع البزون الاسود..

اخر شي گالتلها حجيه جنتج بيها تابعه على حملها ما يثبت عدها حمل ما دام التابعه بعدها .. والبنيه حاركيلها ومسويلها اعمال على بيتها ورجلها..

انوب اندارتلي و گالتلي يعدي المغرب عليج وانتي نگسه

-مفتهمت شنو يعني
-يعني مو طاهر
الحجيه :- جنتي مو مسلمه مسيحيه ما تفتهم هلامور

-ردت سالتني :- يعدي المغرب عليج وعلى جنابه ..
-بقيت صافنه بوجها .. اندرت على عمتي فهمتني الموضوع
كتلها اي يعني احيانا ابقى نايمه وهو يطلع يصلي .. وقت لما اكعد اسبح.

گالت "- اكبر غلط تنامين المغرب لو يعدي عليج وانتي مو طاهره .. المغرب وقت نزول الجن وهلوقت خطر اغلب الناس ما تامن بس هو هذا اللي يصير اللي يصرخ المغرب مو مزين حتى الطفل ما يصير تتركو يبجي المغرب وحدو تشيلو...

ورجعت حاجتني على علاقتي بزوجي وان مشاكلكم تصير بين اللحظه و الثانيه وتحسون ما طايقين بعض واحيانا توصل للطلاق وتخلصون من مشكله تطلعلكم اللخرى..

گلتلها اي .. جاوبتني ان العين عليكم قويه وانتي نجمج ضعيف بساع تتأثرين بس رجلج ايمانو قوي فما يتأثر مثلج..

غرفتج طهريها بملح و خل مسحيها وعلى طول خلي القران يشتغل بيها .. وكتبتلي طلاسم وووووووووو حجي وسوالف معقده كومه .. صراحه ما اصدك اكو جن وتابعه وهلسوالف .. بس سايرة الحجيه هيج .. الرب هو الحافظ راح يحفظني طلسم ؟
رجعت و الحجيه توصي البس الطلسم و اعالج التابعه و توصي واني اكولها حجيه بربج تصدگين اكو تابعه اش هسالفه هاي ؟
دخلنا البيت والحجي تحجي لصراع وهو هم ما ائمن جاوبها :- حجيه الحافظ الله وانه مخليها يمو ان جان كيد ساحر لو عمل شيطان كل شر يكع بنحر صاحبو..
.. عفتهم يحجون ورحت صعدت فوك اخذت غراض من غرفتي ورحت للغرفه الثانيه استقريت بيها ..

هو شاف بس ما حجه .. تركني على راحتي .. اخذت ملابس ورحت سبحت .. كملت دا اطلع .. انتبهت البرنص الوردي مال الحمام مالتي ماكو بس برنص صراع الابيض وينو ؟
تركت وطلعت بالغرفه لا صرت اطلع منها ولا انزل .. ساعه ووكتي على موبايلي .. تعرفت على بنيه طيوبه وبقيت صداقه وياها هي تشكيلي واني احجيلها وصعدتني ادمن وياها بكروب والتهيت بهلسوالف ايااام...

صراع ما اشوفو ولا ادحك بوجهو .. يبعثلي حلويات بأيد الجهال محمد و احمد .. يبعثلي اكل جاهز بيد حلا بس ما يفوت هو يخاف افاتحو بموضوع الطلاق..

وهو يعرف حيل متضايقه منو بس احس بيه لما يجي بليل يوسني بشعري على كيف يغطي ويطلع بلا ما اشوفو او ادحك وجهو لان اسوي روحي نايمه.

مرت ٨ ايام ما التقيت بي غير مره .. دا اطلع للحمام .. حاولت افتحو .. ما فتح .. صحت منو هينا ؟
ماكو رد .. بس انفتح باب الحمام وهو يشد بالبرنص على خصرو وگفت على صفحه .. هو بقى يدحك بيا .. اخذ نفس قوي ومشى للغرفه دخلت الحمام .. ردت اسبح .. دحكت الشامبو مالتي ماكو .. شنو القصه لا الشامبو ولا البرنص وينهم..

نزلت جو بالحمام ماكو .. سألت الحجيه متعرف حلا هم متعرف..

صراع ابيتنا هذا اثثلي الحمام بشكل حلو ف يجيبلي الشامبو و البلسم و السيروم وسائل استحمام و العطر وصابونة ابط سيت واحد بعلبه .. خاصه بالحمام رجعت ادور بالحمام مو بس الشامبو حتى العطر ماكو . فاتت حلا صحت :- حلااا.
-هاا
-بس روحي سالي ابوج شايف البرنص مالتي و الشامبو والعطر
-ليش متسألي انتي ؟
-ملج علاقه بس روحي سألي
-راحت واني مشيت اتصنت ع الباب شيكوللها .. سمعتو :- لا والله بابا ما شايفهم
تركت ورحت للغرفه كضبت الموبايل وبقيت اراسل تسيت السبحه .. ل١١ بليل .. دحكت عندي رساله بالطلبات مكتوب بيها ( تتذكرين يا ليليان من وكعتي من الستاره على ظهري وتكسرت انا بمكانج وانضربت من ابويه لان وكعتي رغم اني المتاذي ؟)

بس شفت الكلام .. احس دماغي وگف ع السريع عرفت منو المرسل ونزلو دموعي وجاوبت بلا اي تردد

-ولو موجود هو هسه جان اني بخير و ضاربك وضارب كل واحد مأذيني ..

تركت الموبايل و حطيت ايديه على وجهي وبجيت .. سمعت اشعار ماسنجر..

دحكت .. مكتوب :- استاهل وحيل بابو زايد بيه .. ورساله لخ :- شلونج شخبارج

-وتسال شلوني وانت الشمرتتي بنص النار .. الك عين تسأل ..

اتصل .. كمت ع السريع قفلت الباب وجاوبتو :- تتصل بعد كل هسنين وتسال انت الضيعتني انت البعتني ليش يحيى ليش مو اني اختك

-متندم والله ليليان اني مو بخير
-ليش شبيك ؟
-اكبر غلط سويتو بحياتي انظميت لداعش
-من ايدك ما كانت بتجي تحجي وتنصح بيك وانت معند .. وتالي راحت وانت السبب ومو بس باجي وامي هم انت خسرتني كولشي
-واني هم هسرت كلشي ليليان ما بقالي غيرج ولا بقالج غيري .. سامحيني
-اش اسامح هاا .. اسامح لما بعتني لو لما قتلت امي لو انظمامك لداعش لو اش اسامح
-اني ما قتلت امج والله ولا امي هم انهزمو وانقتلو ع الحدود وما اكدر احجي ولا اتراجع لان انقتل
-وبقيت تقتل حتى لا تنقتل ؟
-لا ما قتلت والله تعرفيني ما اطيق احل غجل دجاجه اقتل .
-عجل اخو صراع منو قتلو
-ما اني اللي قتلتو والله
-بس جا تهديد وقتها باسمك ..
-اي بس مو اني اللي اقتلتو
-وينك انت هسه
-انهزمت صار ٨ اشهر رحت لديالى وطلعت للعماره كعدت كم شهر وهسه اني بكربلاء ..
-اشلون كاعد بكربلاء ما كضبوك
-اتهزم من هنا الى هنا . قررت اني وكم واحد اعرفو نطلع بر لاوربا تهريب ونخلص
-شوكت ؟
-ما اعرف يمكن خلال هلشهرين .. لا تكولين لرجلج انتي على اتصال وياي ولا تحجين لأي بشر ..
-شلون عرفت حسابي ؟
-شفت معلقه لميلان بنت خالتج ودخلت راسلتج
-و اللي تريدو مني هسه شنو وعلى شنو راجع
-ما رايد بس اشتاقيتلج ..
-ما دا اصدك كلامك هذا وراه ملعوب لو حقيقي ؟
-لا صدكيني متندم .. الا شلونو رجلج وياج ..
-شلونو يعني بعتني الو وتسال شلونو اريد اطلق
-يعني ما صفيتي وياه . اخر مره سالت عليج امج كالت يحبها وما فرط بيها بس اهلو يكرهوها
-ما اريدهم تعبت و اريد اخابر خالو اطلق واخلص
-تريدين اطلعين وياي لاوربا اني ما عندي اشكال خلينا نسند بعض ونعوض الفات
-وشلون نطلع لاوربا مو سهل
-مو سهل بس نستقر خصوصا اذا رجعنا لعمامنا ورجعنا نسبنا المسيحي حنستفاد و نعيش ..
-اخاف
-هو صعب بس كل الطلعو ارتاحو وعاشو وراتب وشقق ونعيش غير حياة
-واصدقائك ذول الدواعش الوياك شلون ؟ ..
-وشعليج بيهم هم مثلي هم شردو من داعشلان اكتشفنا هالتنظيم لا ينتمي لدين ولا ابد شغلهم يقتلون ويخربون ويسرقون ويغتصبون نساء يعني هسه اطلعين وياي

-دا احجي وياه .. طن باذني اشعار .. دحكت .. لايك من صراع ع الماسنجر ... انرعبت .. كتلو يحيى روح روح جا صراع
-حذفي المحادثات ع السريع ولا تجيبيلو سيره ابد ..
-قفلت منو وفتحت محادثة صراع ...رأسا انبعث رابط فيديو ع اليوتيوب ..

دخلت شفتو اغنية لهيثم يوسف اسمها اضعف كدامك بس انت .. كلت هذا بطران عبالو يصالحني بأغنيه .. يحلم.

دحكت اكو اشاره ان هو ديكتب برساله .. انتظرت شنو يكتب .. بس طول رحت فتحت الأغنيه وسمعتها...

الاغنيه حلوه....

وفعلا تعبر عن صراع .. اسمع بالغنيه وافتح بالمحادثه بعدو يكتب..

لحد ما بعثها رساله شطوووووولها مكتوب بيها( هذه اغنيه من احب الاغاني على قلبي جنت اسمعها من جنت بريعان شباب واعيد بيها باليوم فوك ال١٠ مرات واعيشها بس جنت اتمنى عندي انسان احبو من كل گلب ي اهديها الو واكلو اضعف كدامك بس انت .

رغم جنت متزوج بس ما حسيت مشاعري بهلاغنيه لوجدان .. كبرت وتبت من الاغاني وتركتها ونسيت احب وحسيت اني ما الي نصيب في يوم احب بشر بس الله بعد عمر ال٤٠ بلاني بعشك وحده ما تفهمني ولا تحس بيا .. عشت وياها كل مشاعر الحب وهي ما تعرف .. احترك واذوب وانصهر بيها وهي ما تحس كل كلمه بهلاغنيه هي طالعه من نص گلبي الج صار ١٠ ايام ما اجيت ولا تقربت منج مو تكبر ولا لاني ما احبج بس ما اريد اخسرج .. وحك كل حرف بالقران اعشكج ولا بعمري فكرت اجرحج وكل جروحي الج بلا قصد والله . ومن اذيج اتأذى اكثر منج باضعاف شيبت والشيب ملى راسي والقهر اخذ مني هواي وانه ما رايد من الدنيا بس انتي .. لا بعمري عشت كبلج ولا حييت .. من اصير بين اديج انسى كل طفولتي التعذبت بيها وكل الناس الياذوني انسى شغلي وقهري واتعابي انسى داعش شسووي بيا ومن تنمعيني منج ايام اتعب والله اتعب . ما غصبتج بس لان احبج واعشكج واريدج بكل طريقه وما جاي اعرف شلون احتويج..

ما اكلج سامحيني اعرف ما استحق .. بس عليج بكل دمعه نزلت من عيوني عليج لا تحرميني منج)
كملت الرساله .. وما احس بدموعي هن يجرن وحدهن .. انكيتو لايك ما عندو نت عرفتو حجى كل البگلبو وتركني افكر بكلامو واقرر اش هليله هذي .. يحيى طلع فجأ ويعرض عليه اسافر واشوف حياتي وصراع يعتذر ويكولي انتي كل حياتي.

اني شنو اختار وشنو اقرر .. احس الرب تركني كدام شارعين .. يا اختار حياتي واترك القهر و العذاب ويا صراع .. يا اختارو وانسى احلامي وامنياتي واتحمل وياه كلشي..

بقيت اروح وارجع وافكر اخلص منو ومن اهلو واشوف نفسي .. وارجع اكول ما اكدر ما اطيق يوم اعيش بلباه هو مو مجرد زوج واطلقو .. هو بيت واهل واصدقاء وكلشي بس صعب صعب حيل اكمل وياه تعبت وطاقه ما بقت عندي اتحمل اكثر افتر افتر افتر وافكر وما اعرف اش اقرر ..دحكت الساعه ٣ ونص مشيت للحمام واني ما حاشه بروحي من كد ما عقلي مشغول ويفكر اسامح لو اترك واروح.

وكفت جوا الدوش بملابس ويجري الماي فوك راسي واني حاطه ايديا على عيوني و مخي مشغول اخر شي انتبهت على نفسي .. الماي يجري من ملابسي نزعت .. ما جايبه ملابس .. اخذت البرنص مالتو مرجعو لبستو وخاولي لميت شعري وطلعت .. وراسي الف فكره بيه  توقفت يم غرفتو .. فتحت الباب .. مطفى الضو بس خفيف اصفر مال التيبللام .. تقربت منو اكثر...

دحكت بوجهو نايم وحاط ايدو على كصتو .. بقيت ادحك بملامحو وافكر .. لا ما اكدر اتركو .. ابد ابد تقربت منو وبستو وهو نايم .. بساع فز و استقبلني .. رفع الغطا ودخلني لسريرو .. رجعني للدخت وبعد الخاولي من شعري..

ويمسح على شعري وهى وجعي ويتنفس قوي .. همست لا تحجي اي شي ما اريد اسمع .. همس بهلفه :- اعشگچ حيل احبج.....يتبع

☆☆☆☆☆☆