المراهقة والأربعيني الحلقة (66)

المراهقة والأربعيني

 

الجزء الثاني

الحلقة  (66)

ادحك شلون يربي .. شلون ادخل .. بقيت التفت منا ومنا .. تقربت من الباب .. ماكو صوت فاتو جوا ..

افوت لو انلگف .. يمه لا انوب يدخل يصيح وما يلكاني ويدورني وعبالو شوف وين رحت .. ادخل احسن لي..

اريد اجر بالباب .. فات ابو الماي ارو .. مي ارو مي ارو .. هسه وكتك دروووح ..

جريت الباب على كيف .. وفتت دحكت الكراج مامو احد .. مشيت مثل الحراميه ونزعت العبايه وخليته وره السندانه

اشيل راسي والكاه كبالي طالع من الحمام الخارجي و عيربط بحزامو و مقدم راسو و عاقد حواجبو و يدحك بيا ..

:- هاي وين جنتي يولي

-بلعت ريكي .. نشف دمي من الخوف ..

-فايته من برا وتتختلين مثل الحراميه وتضمين العبايه .. شمطلعججججج

-لا والله دحك دحك .. ما علقصد والله بس رحت اجيب زيت

-لج زيييييت شنو انه جايب كارتونه جواااا انتي شنو  تضحكين عليّ

-لا والله .. بس اوكف  بس اشرحلك والله .. رفعت اديه وبيدي بطل الزيت .. دحك والله رحت اجيب زيت واسال حلا

تقرب وكضبني من اذني :- انه جايب جوا لو لا

-ما شفتو والله ما شفتو والعباس ابو فاضل ما شفتو ..

عقد حواجبو :- العباس ابو فاضل .. يولو منو معلمج تحلفين هيج ؟

-اني معليه والله معليه هم بالفيس  يحلفون هيج

رفع حواجبو .. ووجهو صار بيه مجال ضحكه ..

حظنتو وكتلو عليك عليك العباس ابو فاضل لا تاذيني والله بعد ما اعيدها ..

ضحك وهز راسو .. وجر راسي منو :- شسويلج هسه ابخت محمد شسويلج كولي

-حلالك يابه شتريد تسوي سوي بس هلمره عديها فدوه ما اعيدها بعد ..

-هههههههههههه .. جر حنجي باسني بخدي وكال :- فوتي يلا

-صدك هاهيه خلصت . فتت اركض ورافع اديه وبطل الزيت بايدي واصيح :- يمااااااي فدوه رحت للعباس ابو فاضل نقذني نقذني  افراج افراج خلصت ..

الحجيه :- دخيلو للعباس شكو يولي

-غير نقذني من حبل المشنقه حجيه شتحجين ..

شفت حلا كبالي ضربتها جلاق .. ضميتي راسج الحيه و طاحت براسي لو ما العباس جان هسه اني بالمغيسل جاي يجفنون بيه

وهي تضحك

صراع :- ههههههههه شلون وياج ام الفواين هلنوب جلاليق

الحجيه :- هههههههههه عاد تعرفينو العباس لو لا ..

-اي شلون ما اعرفو شلون عجل ابن النبي مالتكم غير ؟

حجيتها وصراع رفع راسو وطكها ضحكه بعالي صوتو وهن يضحكن ..

صراع :- اولا مو النبي مالتكم ماكو هيج لفظ ميجوز كولي نبيكم مو النبي مالتكم ..

ثانيا هو مو ابن النبي ابن الامام علي ابن عم النبي عليه الصلاة و السلام

الحجيه :- دخيلو الامام العباس يولو مكانتو جبيره وبختو يشور ..

ليليان :- طبعا يشور ما تشوفين سوالي معجزه الا صروع يضحك لان اني طلعت برا لاااا يحتاج ندونها بالتاريخ .. ما صايره هاي

صراع هز راسو يضحك :- زين انه مو جايب ليش اطلعين .

حلا بابا ماكو دورنا ابد ونخابر عليك مترد  كتلها ركضي جيبي وتعاي بسرعه

الحجيه :- ولجن جوا تختي خلتو هيام .. ما شفتنو

ليليان :- شنو انشم كفا ايدنا وندري جوا التخت .. وبعدين هو زيت شعندج حاطتو جوه السرير غير بالمطبخ

-انتن تبذرن مو امان .. خليتو جوا التخت حتى اعرف شكد اتصرفن ..

-بربج سالفه هاي حجيه تضمين الزيت حتى لا نصرفو عجل المن جايب نحطو تحفيه بالمطبخ .. تدرين جان اني هسه  ميته من وره سالفتج لوما لطف الله

اندرت الصراع :- جيب ذبيحه بثواب العباس

-هنوب ذبيحه .. والله عمي يطلعلج فوك فواينج وطالعه البيت بدون علمي وسكتت وانجبيت و تنوب انه الخسار ذبيحه ..

-بجيت بوجه الله شبيك شبيك شكايلتلك.. قابل كايلتلك  اذبح لميعه .. هو طلي

رفع راسو وضحك من كل كلبو بصوت عالي وحلا هم تضحك و الحجيه عاد كالت :- ولج استهدي ليليان لا تاخذين غيبة العالم ..

صراع:- لا غيبة على الفاسقين يمه ههههههههههههه

الحجيه:- استغفر ربك يمه شجالك شو من اخذت هلصفيره هاي ولليوم كن عقلك خف اذكرنك عاكل يمه وتخاف ربك

-زمان اول حول يمه  ما صراع هسه انه ابو الفواين رجل ام الفواين ..

كمت اضحك على ضحكته يحجي ويضحك من كل گلبو والحجيه هزت بيدها وضحكت :- لا ربحنا عجل

اضحك وانتبهت لحلا كاعده وتضحك .. عاد زكحت بيها :- كومي انتي يلا كووومي لا بس تلگحين المصايب براسي وتكعدين اتضحكين كومي سويلنا ريوك ..

-يااا والله شنو اشتغل عندج

-والله حبيبتي هذا الموجود غدا وامواعينو اليوم عليج يلا .. بما انو اني حاليا مرت اب خل اعيش اللحظه واصير قاسيه ...

صراع يدحك بيه ويضحك عاجبو الموضوع ..

عاد سوتلنا اكل طماطه لاجعه وجاي حار .. وكعدنا تريكنا وصراع كعد ويانه ..

خلصنا هو صعد فوك واني كعدت بغررفة الحجيه .. اخذت مرزات جايبلي هو .. وكعدت ع التخت وفتحت شعري رطب سابحه من فتحتو گب  صار كفشه  و شبشب ابو الجلب مثل الحذاء وبي قيطان والثوب احمر ربع ردن وي الركبه ..

كاعده ع التخت ومخليه السله كبالي اكرس بيها وفاتحه رجليه زاوبه حاده واكرز واشمر واطمش ع التلفزيون وفد مزااااج عالي وحيل مرتاحه ..

الحجيه كاعده يمي بالكاع ادحك وياي ع التلفزيون .. وفاتت حلا : اكولج شنو عفتي الشغل براسي سويت الريوك ونظفت المطبخ وبابا فايت طالع جاي مشتغلتني جايجي

-دحكت عليها ..  صدك يلوكلج شغلة جايجي تفيدج ..

-رفعت حاجبها ما عاجبها

-اكولج صدك عزة الدوري يقربلج شي بيناتتكم كرابه .. مدعبل عليج ولازك وجهه بوجهج شنو موضوعه شو نفس البچم

-ياااااا فدوه شنو احلى مني ترحيلي فدوه عزة الدوري خو يشبهج

-يلا لا تزعلين تشبهين وجه خالتج اخلاص ..

الحجيه: ههههههههه ولج ليليان بطلي غيبه

-والله تروحين فدوه لخالتي اخلاص من تجيبيها على السانج اكصو وهسه اصعد لبابا اخلي يطيح حظج .

الحجيه :- تتقشمر وياج جده لا تضوجين هي مثل اختج

.. ما سمعت راحت صعدت الصراع .. واني على نفس الكعه اكرز واشمر .. فات صراع جتف اديه وانتجه ع الباب

:- شلون وياج ام الفوابن اليوم ما نخلص من فواينج كل شويه طاكتلج سالفه

الحجيه :- تتقشمر وياها والله يمه لا تدخل بيناتهن هن يتجازن

-هاااه حجيه جنها حاليتلج فواينها

-عجل عليمن اتونس غير على هلخبله هاي وين نروح

-اني بنفس كعدتي و اكرس واطمش .  جا كعد يمي ..

-انه بنيتي تشبه اخلاص ولج ؟

-عجل شبيها مو مرا

-عبد الجبار شنشل ليش ما تكعدين راحه ولج

مد اخذ من ايدي كرزات ويدحك برجليه ويهمس :- اروح فدوه لهل كفشه الحلوه دلميها مو بدا گلبي يذوب

-عجل لا ادحك حتى لا اتذوب .. اححي واني دايره وجهي للتلفزيون

ندسني .. دحكتلو عيونو بعد  برجليه مركزه .. دحكلي عض على شفتو واشرلي بحواجبو عود صعدي فوك ..

دحكت بالحجيه متمدده ومطيتنا عكسها .. مديت ايدي على رجلو تلمستها وقربت وجهي لشفايفو قبل لا يبوسني ابتعد وحجيه :- اگولچ يوم شو هيام اليوم ما اجت

بساع كام يحك بركبتو ويدحك بالسكف ويتمتم :- انعل شيب اهلج لابو شيب هيام بنت الاوادم ..

الحجيه :- انه اكلج لو اتركين هيام واطلعين لزلمتج تكابلي بلا ما شالعه كلب وليدي وتلعبين عليه

صراع:- رحم الله امج وابوج يمه .. دحكي شلون امي تفتهم .. يلا سمعي كلام امي واطلعي

-اكولج حجيه بروح ميتينج الله حاط بعلباتج عين .. منين تشوفين

-وانه مغمضه اشوفكم لا تخافين ..

-دا احجي .. كرصني من خصري :- تره صبري خلص طلعيلي لا ابتلي بيج .. حجاها وگام ..‌

-ضحكت وبقيت كاعده اكرز ..

الحجيه:- كومي طلعي يولي حظو هلخايب ذباج عليه طلعي

-صبري خل اخلص كرزاتي شبيج بصلتج محروكه مثل ابنج

- ولج كومي الرجال يريدج تلحكين تعلفين

-يووووه شنو هاي حتى كعده ما نرتاح بيها .. كمت طلعت .. اول ما حطيت رجلي ع الدرج .. سحبني ودخلني للغرفه .. سد الباب وردني ع الباب وبلا كلام مثل المجنون واني ادلل عليهه واوخر منا واجي منا .. خبلته ..

كضبت راسو .. كااااافي .. شنو ما عدنا غرفه

-البيت بيتي و الحلال حلالي .. و وين ما يعجبني امد واخذ ..

-اي اذا هيج حلو عجل .. مديت راسي الو وبوستو .. الا انجن

لحد ما سمعنا صوت الحجي اجه بالصاله ويكول لحلا صيحي ابوج ..

كام طلع وهو يعدل .. لميت شعري وعدلت نفسي وطلعت .. الحجي كاعد وصراع و الحجيه گبالو ..

بس طلعت الحجي دحك بيا و دار وجهو ضاج وصراع خزرني خزره شلعني من الكاع ..  كضبت المحجر وافلت .. صعدت

بدلت ملابسي ... ونزلت .. ردت اسوي عشا .. ما قبل يتعشى الحجي .. يكلو يا حيف تركتني وانه ابوك لخاطر تكابل هلصفيرا الما تستحي ..

توسل بيه رادو يبقى على عشى بس ما قبل راح . عاد اجا صراع للمطبخ رزلني

:- انتي شلون اطلعين جدام ابوي بهلملابس .. الثوب لركبتج و زنودج طالعه وتتمشين كبالو يولو ما تستحين انتي ما تحترمين

-ما علقصد والله نسيت بعد ما اعيدها ..

-بقى خازر بوجهي وحجه :- ادبسز

-لا تزعل والله ما تذكرت ملابسي شبيك ..

-اخذ نفس : دحكي ليليان .. مخيره بهلبيت شتلبسين لبسي عسى ما معرايه بيتج وبكيفج انتي حره.. بس من يجي واحد من اهلي تحترمين نفسج وتلبسين ملابس حالها حال اللي جنتي تلبسيهن هناك مفهوم ..

-تمام مفهوم والله ..

-تركني ومشى ... سويت عشى .. ما تعشى صعد فوك .. تركت الصينيه لحلا و الحجيه وصعدتلو ..

ردت افوت للغرفه سمعت صوت الماي بالحمام .. فتت لبست تراك شتو ولفيت نفسي بردت .. فات هو ينشف ويرجف برد ..

عيبدل .. حظنتو من ضهرو.. لا تزعل شبيك والله ما علقصد .. وابوس بزندو مره ومرتين وتلاثه ..

سحبني .. وباس خدي :- خلص عدت لا تعيديها بعد

-انزل اتعشى

-شبعان .. اطلع شويه لجماعتي .. اذا تاخرت نامي لا تنتظرين ماشي

-تمام .. بستو بخدو ونزلت ..

لثاني يوم .. صراع جان فوك نايم الظهر .. واني و الحجيه كاعدين بالمطبخ ع الصوبه و نسولف وندحك بالتلفزيون ..

اندكت الباب ومره تصيح :- يم الولّيد منو هيين

كمت .. هلا خاله حدري

-شلون يخاله انتي ام البيت عذريني فتت جوا لان دكيت ومحد رد ..

الحجيه :- منو ليليان ..

-ها خاله انه جيرانكم  ام يوسف

-هلا بيج خاله فوتي فوتي عجل ع الباب .. حدري هلا بيج خاله هلا ومرحبا

-هلا بيج حبيبه.. جيت اباركلكم ع البيت واتعرف عليكم

-هلا يخاله كلا الهلا .. الله يبارك بيج

-شكم نفر بالبيت

-بس انه وابني وهاي جنتي وبنت ابني فوك

-بس !!

-اي والله ليش خاله اكو شي

-لا والله الله يستر عليكم ويحفظكم شفت البيت جبير توقعت انتو جثيرين

-لا والله بس البيت الواسع يفتح النفس احسن من الخنكه .

-ان شاءالله الله يفتحها عليكم ويرزقكم .. خاله انه رجلي شهيد كتلو داعش وعندي ٥ ايتام ٣ بنات و وولدين

-بعيني خاله شتحتاجين انه موجوده

-سالمه عينج يبعد عمري لا خاله انه ما اخذ صدقه بس اكول اذا تحتاجون شي انه حاظره .. اغسللكم زوالي هدوم اطبخلكم انظف تريدون اجهزلكم طبخ دولمه كبب برياني .. وتنطوي هلقاسمه الله اصرف بيهن على ايتامي ..

-والله يا يمه بعيني بس  لازم اراجع ابني وانطي خبر ..  وان شاءالله انه ما انساج .. شلون مات رجلج

-والله كتلو داعش الله لا ينطيهم واخوتي كل واحد لاهي بعايلتو .. وشسوي هذا حالي

-ما عندج بيت ماتركلكم راتب

-لا والله خاله جان رجال على گد حالو ماخذ سياره سايبه ويشتغل بيها وينطي لابو الشغل ويطلع منها القاسمه الله هم جانت العيشه صعبه بس من مات حيل انكسر ظهري .. مرت ايام بغيابو لما جنا محاصرين وخلصنا اكل والله يا خاله اروح على الاشجار اكطع منها ورق وناكل انه وجهالي ورق شجر في سبيل لا نموت جوع .. حصره علينا اللكمه بهذلو احوالنا الله لا ينطيهم..

-الله ينتقم منهم هلمجرمين ذول انه هم لوعو جبدي بابني خطفو فوك ال٧ اشهر وما ندري بحالو وانهد حيلي وانجلطت صارلي شهر ها كمت اكف على رجليه .  شبعونا ضيم لله ينتقم منهم

-انه اكوم اروح خاله وانتي رديلي خبر اذا قبل زلمتكم تنقذيني وتسترين على جهالي ..

-ان شاءالله خاله انطينه رقمج .. همه جهالج بالمدرسه

-اي والله ٤ منهم بالمدرسه والصغيره ٤ سنوات .. جبيرتي بصف ٢ متوسط ..

-ان شاءالله يكعد ابو حرب واحجيلج وياه وما يصير خاطرج الا طيب وما انساكم باذن الله ..

-فدوه العينج يبعد عمري ..

باست الحجيه من راسها وبقت تدعي الله يحفظ راعي بيتكم ويرزقو ويستر عليه وعليكم .. وبقت تدعي خطيه فرحت من كالتلها الحجيه ما انساج .. اخذنا رقمها وراحت

وره شويه نزل صراع وكال :- ليليان استكان جاي يرحم اهلج راسي يوجعني

... رحت سويتلو والحجيه فتحت الموضوع وياه :- وهاي المره مسكينه وهيج ايتامها وتكسب بيها اجر ومنها تستفاد البيت جبير وبنيتك يومين ورايحه ومريتك وحدها تتعب ..

وخليها تطبخلنا ونظم بالمجمده .. تخبزلنا احسن من الصمون الما يلزم الگلب تعرف مريتك ما تعرف تخبز ..

صراع :- ان شاءالله حجيه ان شاءالله .. اخذ الاستكانه من ايدي .. وكعد يشرب ..

ليليان :- اي والله حبيبي هم تساعدنا تجي يوم بالاسبوع نسوي حملة تنظيف ع البيت حتى بقية الاسبوع ميتعب بس خفايف . وهم هي تستفاد ..

دحكلي وابتسم :- والله عاد تستاهلين خدامه .. ورفعلي حاجبو .. واخذ الاستكانه يشرب مبتسم

-وليش ما استاهل حك تعب الليل لو نسيت .. و مركتلو بحواجبي .. خزرني واشر بعيونو على حلا جانت كاعده ووجه بالموبايل

حلا :- جده شنو خدامه من شوكت احنه نجيب خدم للبيت .. لو ما جانت تمي تركض و العشا خباز

-انجبي انتي لا تدخلين هذا عمل خير المره محتاجه .. شكلت يبعد امك

... ضاجت حلا وصعدت ..

صراع :- شنعرف عنها يمه وندخلها .. زينه شينه ..

-عجل غير نجربها ونعرف .. شلون نحكم عل الوادم بلا ما نجربهم .. وتكسب بيهم اجر والله يا يمه

-ان شاءالله يمه ان شاءالله الله كريم ..

-والله لو بيدي يوليدي ازوجكياها واخليها بركبتك تكفل ايتامها

-طفر .. هوووووب هووووب ..  حجيه .. واحد منكم يدوس بريك يا جماعه فاتت زايد حمت طشت ماي بروح اهلكم ..

صراع :- ههههههههههههههههههه

الحجيه :- انجبي انتي الثانيه ذوله ايتام وهذا عمل خير مو سوالف غيره وهلتلعوص مالج هاذ

-يااااااا والله شنو بكيفج تثوبين وتعزمين على زلمتي .. شكو ارمله بأمة محمد لازكيه بركبة رجلي .. ادري متزوجتلي رجال لو ديوان الوقف السني شكو ارمله و يتيم مشكلينو بركبة زلمتي كااااافي

ما كافي عليّ اسمهان العوجه متكفل ايتامها .. وكبلها ام مصطفى متكفل    وبعد وبعد .. ورجلي تتكاتل عليه النسوان ..

صراع :- خايبه هوووووووب هووووب فضحتينا يولووو

-ام مصطفى ياهي هاي

-ليش ما تعرفيها

-ولج هييييين يولو هوووب .. كافي .. يمه معليج بيها.. وهاي المره كليلها تجي .. جربيها .. زينه ياريت تساعد ليليان مو زينه .. ما نريد عود من ابعيد نساعد..

-ان شاءالله يمه .. كومي ولج جيبيلي الموبايل خل اخابرها ..

-اي .. بس هااا مو تعزمين ..

-وانه امشي بكيفج

-بكيييفي طبعا زلمتي رجلي زوجي ابو بيتي .. عجل بكيفمن .. دحكي هين لا عبالج ابن لا لا حجيه اختلف الوضعة..

اسمج باول جنسيتو وخلصو منج ودارو الصفحه وكتبو اسمي .. ولهين واينااااف . بعد ما الج حق ..

-اي هي هاي هيه .. يا من تعب يامن شگی يامن على الحاظر لگی .. صار الحجي الج عمي

صراع مبتسم على مداهرنا وضاربها صفنه كوه يدحك توو كاعد ..

رحت جبتلها الموبايل وانطيتها .. والله يا نوريه انتي فلا تكعدين راحه ..

-دجيبي ..

رحت الو .. اصبلك جاي بعد يعمري ؟

-اي والله ياريت ..

-كرصتو من اخدودو .. قبانو لزلمتي اليفكر بيا قبانوووو ..

-اهو شبقيتي بزلمتج يولو هيبت الشوارب راحت وانتي تكرصين بخدودي .. ادري شوارب جدامج ذول لو مكناسة مصري ..

-هههههههههههههه قباني شواربك انااا .. وبستو بخدو .. واخذت الأستكان وجددتلو ..

الحجيه خابرت المره .. و اتفقت وياها كل يوم ثلاثاء تمر بينا تنظيف شامل للبيت من فوك ليجوه .. وتبقى باقي الايام ع الخفيف اشتغلهن براحتي لان ما عدنا احد ...

.. خبز كامت تخبزلنا صفطه نظمو .. دولمه كبب .. زوالي .. حتى الحجيه توديلها ملابسها تغسلهن ما تقبل اني في سبيل تنطيها ثمن الغسل وتساعدها بالمصرف ..

كلش خدمني الموضوع وريحني ..

.. نزلت الصبح ساعه ١٠ ...صراع كاعد يم امو مسويلها ريوك .. هو ميكعدني .. لان اسهر وياه يستخطيني ف يسوي الها والو ويكعدون يتريكون ويسولفون ..

نزلت للدرج .. وكفت ع المغسله قريبه من غرفة الحجيه .. وسمعتها تكلو

-ييمه انت تسوي ريوك ليش ما تكعد النايمات فوك

-شلج بدوختهن يمه . انه ارد اكابلج بلا لغوتهن ومناكرهن   .. خليني ادخل الجنه بجالج وبخدمتج ما تردبن ادخل الجنه انتي ؟

-والله ييمه مو همك جنه .. تستخطي مريتك تكعد وفريتها ع الشرع و البر ..

-ها يمه انتي هم عليه ..

-لا يبعد امك .. انه فرحانه من اشوفكم فرحانين ومتصافين شحلاتكم .  شيخش بجيبي لو زعلتو .. بس يمه لا تفهيها .. علم ايدها ع الشغل .. خليها تتعلم ... تراها حيل ادللت .. وكلشي زايد ما حلو ...

-انه ما عندي اشكال اكعدها .. بس يمه انه نفسيتي مرتاحه وجاي اخدمج واسوي ريوك من طيب خاطر مو لان اريد اشتغل بدالها لا شعلي هذا شغلها .. بس انه مرتاح وعاجبني اسوي ..

وهي هم ممقصره وياي .. كلمتها حلوه .. مداريتج مداريتني .. الليل اليمر مكابلتني بي وما تنام .. عجل انه بليل حاكمها و بالنهار حاكمها .. استخطيها واخليها تنام ..

.. خليها ترتاح جثير تاذت من عدنا . انه كبل جنت ساكمها و ام سعد والحجي وسعد وكلهم على هلجاهل .. خليها ترتاح قابل انه شمسوي كانس ماسح هو جاي و سالك بيض وكلاص جبن .

... فتت .. هاااا تحجون بيا .. صباح الخير

-بنت حلال حدري

.. كربت كعدت يمو . بستو بزندو وحطيت راسي عليه .. احبك ..

.. رفع ايدو ايدو وضمتي بحظنو .. ول يابه شعرج مبلل و الجو بارد ما تخافين على روحج انتي ..

وكرب الصوبه عليه .. الحجيه .. ادحك علينا ومبتسمه .. :- الله يحفظكم ان شاءالله ...

وبقت صافنه شلون اشرب بكلاصو وهو يشرب وراي .. لان هو للان ما يشرب وره احد ابد وكلاصو وحد ..رغم ما انخطف بس مبطل هلعاده .. لكن مني ميكش .. الوحيده يخب يشرب وراي ومتجز روحو ..

فبقت ادحك وما حجت ..

بقينا نسولف ونضحك وجو بارد وملتفين ع الصوبه .. ل١٢ يلا گمنا ..

كال انه رايح اصلي برا .. جبت سمج  كشري وملحي وحظريلي  الحطب برا حتى اشوي . عاجبني سمج ع الفحم ..

-تمام

-مو الكاها مربعه ليليان .. ما نريد اشكال نريد ناكل ول يابه .

-ههههههه هاي شبيك شنو غير كبرت بعدك تعيرني .

-هههههه باس خدي ..فدوه رحت لمريتي الكبرت وكامت تعرف تگشر سمج .. ان شاءالله يوم التشويها بيدج .. الا اذبحلج طلي جواج . لو اذبحلج لميعه

-هههههههه تسويلي فضل لو لميعه .. وبعدين تعال لهبن شنو اني ما اعرف .. اشوي .. راح اشويلك اليوم ودشوف الشوي مالتي شلونو

-لا دخيل ربج .. شبيج اتشاقى وياج والله . انتي افاا احسن طباخه .. الا الشيف مفيد. بس عوفي السمجات مشتهيهن والله .

-هههههههه تمام تما راح اتنازل عن قدراتي ومهاراتي اليوم لخاطرك

-اي بعد ابوج عفيه والله تسوين فضل لو ما استخدمتي قدراتج .. كلشي ولا قدراتج ..

-تخصرتلو شنو مستهين بيا ؟

-لا ياب ما بالحيف انتي ليليان ياهو هذا اليستخف الا املصلو ركبتو .. خخخخخخ .. اودعناج تاخرت ع الصلاة .

-هههههههه .. سديت باب المطبخ وراه ورحت طلعت السمج وحطيتو بصينيه .. وحده بس حيل جبيره .. وترجف بعدها وبراطمها براطم ابو ثرب .. ومخزره سبحان الله اليكول دحام وامدد كبالي بالصينيه ..

ردت انظفها بس ترجف .. خفت .. عاد خذتها للحجيه .. اجت للمطبخ كشرتها .. واني غسلتها وتبلتها .

جا هو  والحجيه نايمه ..  شافها .. صاح اي عفيه عفيه خوش منضفتها .. ولا تاملت تسويها كلت ارجع اكلها مثلها وتخافين منها ترجف طلعتي سباعيه

-شعبالك حبيبي اني ليليان مو لعب جعاب بس غير انت مستهين بقدراتي .

-اي لا لا عفيه عفيه كبرانه صايره مره يولو ..

-ليون وعندك الحساب بعد .. بكل تواضع بعيدا عن التكبر ..

ضحك . وبدل دشداشنو بكلابيه مال بيت وطلع بالكراج .. رتب الحطب .. وكعد يشوي واني تحت ايدو روحي وتعاي .  وجيبي وخلي ..

دلعة التراك مالتي واسعه . وهو يشوي ويتغمز ويتغزل .. كعد السمج ع الشوي وخلاها .. فرك ايدو .. وخلاني وره الكراج ..

-يصير اتغدى عسل شويه كبل السمج ..

-حلالك واخذ ايحلالك

-هم عسل وهم يحجي عسل .. اويلي الله شكد احبج .. وكضب راسي يتبادل وياي .. دك موبايلو .. بقى ايدو على خصري .. و سحب الفون

.دحك .. :- هذا ابوي سكتي .. :- هلا يابه .. اي والله بالبيت .. ليش شصاير .. هاأ .. حدر يمي اتغدى جاي اشوي شلون سمجه اتمناها جدامك.. تغدى وياي ونحجي ان شاءالله اعرفك تحب السمج .. هاا .. اي هلا بيك وبيها .. يلا .. مع السلامه

قفلو ..  :- شنو حيجي يتغدى يمنا؟

-اي هو وام سعد

-اهوووو

-اوجعو يولي احترمي نفسج هذا ابوي .. نا ماكل من چدچ

-وليش تصيح اني ما على ابوك . بس مرت ابوك اكرهه وما احب اگابلها

-ساعة زمان وتولي لا تضلين اطردين بخلك الله .. يبقون اهلي وبيتي مرحب بيهم بكل وكت .. ما انتي التحددين منو اليفوت ومنو لا

-اخذت نفس .. اي زين عجل .. هلا بيهم .. شو وخر خل افوت

-ليليااان

-هسه شكلت .. بس وخر

-لا تضلين تتزعليه هي ساعه ويرحون عندو موضوع يخص العشيره ويريدني اروح وياه العصر .. وابوي يحب السمج كلت يجي ياكل وياي خطيه ..

-واني ما حجيت شي قابل طردتهم .. بس خل اروح

-اخذ نفس .. كافي ليليان خلينا مرتاحين رحمه لاهلج .

-واني شنو سالبه راحتك ..

- لا بس ما اريد شي او زعل يعكر جونا مرتاح وياج هيج .. لا تخربينا ..

الحجيه :- هاي شعدكم لابدين هينا ..

-اندرنا الها .. واتلاطمنا واحد باللاخ دنوخر ..

صراع :-ااااا جنت دا اخذ حطب

ليليان :-جنت ادور نفط

-يا ما تستحون ذاااك هو النفط و الحطب .. جاي تضحكون عليه

-ااا خل اشوف السمجه يمكن استوت .. جعتي يمه مو .. ودنك للسمجه وغير الموضوع

-اي والله يمه جعت .. وريحة هلسمج علكت بديه غسلت مرتين بصابون وما راحت

ليليان :- اااا حجيه لو تفوتين جوه مو احسنلج بارده

صراع:- وشجاب ريحة السمج لاديج يمه ؟

-غير كشرتهن وعلكت بديه ..

دحكلي .. ررفعت راسي للسما :- اليوم الجو صاحي ما بي غيوم .. ما مرجيه منج حجيه ضيعتي قدراتي ومهاراتي

صراع:- طاح حظك يلبالي وطاح حظ قدراتك الفاشوشيه ..

جنت اضن وجنت اضن وخاب ضني .. مره ومره .. تالي طلعت قوندرا ..

-هاي عليج

-مو عليج حياتي على البالي

-هااا .. اروح اجيب الصينيه احسن

-حيبي فرش نتغدى بالحديقه الشمس دافيه احين من البيت .. الححي على جيه

الحجيه :- الحجي راح يجي يتغدى هينا

-اي هو ولميعه

-اييي  هم زين يا ابني طاكه روحي مستاحشه حيل ..

... تركتهم وفتت احظر خبز وطرشي وفراش .. طلعتو الهم وفرشت بالحديقه ومخاد وفد كعده تجنن ما تلوك لدحام ابو ثرب بس بعد هذا حكم القوي ع الضعيف ..

جا هو والسعلوه .. تغدو ويانه وجببي وودي .. وكضاها علينا معاتب .. وانه وحيد واخوتك ما داريه عني وانت هينا مرتاح ما تكول ابوي ياهو الالو ..

كالو :- يابه انه عايفك مو يوميه يمك وشتحتاج وتخابر دقايق وتلكاني فوك راسك قابل وين رايح شو بيتك خطوتين عنا ..

يكلو : لا انت ماهو ابني الاولي المصلاويه خذتك مني الله لا ينطيها .. عسى هلا تفرح ولا تشوف الفرحه بعينها مثل ما خذت احزام ضهري من ببتي وعزلت بي

-هسه عوف هسالفه هاي يابه .. اكل لا يصعد ضغطك .. ويخزر بيه .. حتى لا احجي ويندسني سكتي عديها

.. اخدم بيه ويسب بيه ويدعي عليه .. انكي الجاي ياخذ مني ويكلي لا بارك الله بيج بيوم الاخذتي وليدي مني ..

يمكن لو اموت هلرجال هذا ما احبو .. ولا يرف عليه كلبي واريدو .. يمكن اكرهو اكثر من ام سعد نفسها ..

من بعد هلجيه الگشره الو وسممنا بيها .. وبقى يحجي وي الحجي ان عفتيني انتي و ابنج ورضيتي اتركوني وحدي لجل هلمصلاويه ..

وكام يلوم بيها وهي تحجي وياه . صعد ضغطها .. راح هو ولميعه التحركو من جوا الجوا .. وهي ساكته ومشو وخلو الحجيه مفول الضغط عدها ..

خليناه ع السرير وجاب المضمد الها من راس الشارع قاس ضعطها وانطاها علاج وراح .

حلا اكثر يومها بغرفتها ع الموبايل قله ما تنزل ..

بقينا اني وصراع يم الحجيه وهي هم بقت تلوم بيه .  على ابو حجي ابوك صحيح .. انت جبير تخلي عند سعد ونائل شنو .

تعرفهم واحد جلف والثاني ضارب الدنيا جلاق ومحد داري عن ابوك . ومهما صار ومهما سوا يبقى ابوك .. ومكانتو باقيه .. ما يصير تعق والدك

-يمه انتم محسسيني انه طارو بدار مسنين شبيج يايمه لو ما شيب كلبي من ابوي وردت ارتاح شنو حرام . بيت بكبره عفتو الو ولاخواني وبس ردت راحة بالي .

شنو محرمه عليه الراحه لازم اكعد والمشاكل فوك راسي .  تعرفين مرتي ومرتو ما

يتوالمون وهو ما يعيش عندي وحدو الا لميعه وياه .

-وانت شعليك بمرتك .. تترك ابوك لجل مرتك .  مو جانت وجدان مشاكلها وياي ما تخلص .  شو خليتها كبالي وما عفتني ولا عفت ابوك وشحدها تحجي .. شجالك يمه

-يمه لا تكفريني رحمه لاهلج .. انه وين تاركه ابخت محمد .. تره شاب راسي بالقران .. وجدان طلعتها ما ارتاحيت وياها .. امك وامك .. والخليتها يمج امك وامك .. بعت البيت وخليتها كبالج .

الفرق هسه انه مرتاح .. مستكثرين علي راحتي .. محد يكول مرتاح واشتره راحتو .. المصلاويه يا طلابة المصلاويه ، شلون اذبحعا واريح بالكم منها فهموني الخل شلووووون .. مو سالفه هاي جزعتوني ..

عافها وطلع .. وهي تكلو .. ابوك يول هذا ابوك .. انه ما ارضى تترك ابوك صراع .. دحكتلي بعصبيه ودارت وجهه ..

طلعت الو كاعد .. بالهول وعصبي

-هسه شنو يعني راح نرجع لابوك ؟

-ليليان سكتي مني لا ابتلي بيج بالقران كومي من وجهي

-هو اني شعليه راح اطلع عصبيتك بيا

-ليليااااااان

-لا ليليان ولا بطيخ .. اسمع هلكلمتين ذول .  واحفظهم .. ابوك ومرتو لو كعدو عدنا لو رجعو والله بكبرو ما ابقى عندك دقيقه اهج وما اردلك بعد...

-شنو انتي جاااايه هددين يولي شوووو حدررري هين.....يتبع

☆☆☆☆☆☆