المراهقة والأربعيني الحلقة (85)

المراهقة والأربعيني

الجزء الثاني

الحلقة  (85)

انسحب الباب ، عرفت صراع جا ، بقيت كاعده ، طول لحتى فات ، بس فات حتى ما سلم عليه ، گبل لغرفة امو ، شويه وارتفع صوتو بس ما عدافتهم على شنو يحجي ..

دكوم اتسمع صاح على نور ، بقيت كاعده بمكاني ، وادحك اشنو صاير شبي ؟ طلع من غرفة الحجيه و هو اعصاب

دحك بيه بخزره و طلع ع الدرج وكال :- تعالي اصعدي احاجيج

هو صعد قبلي ، دا اسأل زكح :- ويييينج

صعدت ع السريع فتت هو لاف اديه ورا ظهرو ويمشي بالغرفه دحك بيه كال :- فوتي وسدي الباب

سديت الباب وفتت بس الصراحه خفت وجهو ما يبشر بخير كتلو :- شكو شتريد

-من يمتى حسج يعلى على امي

-ما معليه صوتي

جا كضبني من فكي ورجعني ع الكنتور حصرني وخازني :- احجي لا احرگچ هينا

-هاي شبيك

صرخ بوجهي :-احجييييي

-هاي منو محشدك عليه اني لو معليه صوتي اكول ،

-اصبري

عافني وطلع من الباب صاح :- نوووور تعالي لهين

وفات :- تجي ونشوف

فاتت كال الها :- حدري لشوف وداعة ولدج تحجين ، ليليان علت صوتها على الحجيه

-اغزي الشيطان خويه والله ما تستوجب ومصارين البطن تتكاو..... قاطعها

- احجي نوووور

-والله هي انفعلت بس...... رد قاطعها

-يعني رفعت صوتها

-اي

ع السريع كاللها :- مشكوره هاي روحي وسدي الباب وراج ..

راحت اندار عليه :- هااا وفوكاها تدعين عليه وعلى امي و جدام منو ، جدام اخوي ؟

ولج انه من يوم الخذتج وصرتي مرتي اخجل احاسبج جدامهم لو اقلل منج واكول لو بينتلهم احترامي يحترموها ويهابوها ، وانتي شسويتي ؟

هو يحجي واني مدنكه ما رفعت عيني لأن فعلا انفعلت ، رفع ايدو ع السريع رفع اديه فوك راسي ضرب الكنتور بعصبيه وزكح

دحكي ولج وحك من احل القسم اذا تتكرر لو تنعاد لأطلعلج صراع مال ايام گبل وما ارحمج والله ، احترمي نفسج واستري عليها وخليني متحملج

فاتت الحجيه :- لا تأذيها صراع

-عجل عقليها لأن راسي راح يطك ، لا تفهم بالعقل ولا بالضرب عجزت وياها شسوي

-مالك شغل انت ، انه وياها ، سوالف نسوان ابني

اجت وكفت يمي :- هذه امي واكفه ، اخلاص ما اريد تتقربين يمها ، كافي مشاكل ما اريد مفهووم

-الحجيه:- مفهوم وليدي مفهوم بس لا اتعب راسك ، روح ييمه روح انه احجي وياها

طلع وعافنه ، اندرت عليها وبجيت :- فوك ما زوجتي عليه وتشكيني الو بس حتى يحب اخلاص ، شنو صارلج ليش هيج ويايه

-خايبه انه ما شكيتو ، سعد الكاضبو بالباب وكايلو ضب حرمتك ترزل بامك ، وانه جذبتو وراح صاح على نور يستفسر منها ، انه ما ارضى يأذيج بس احترمي نفسج وعوفي اخلاص بحالها

-ما اعوفها ، خل تطلع من عينا ما اعوفها ، هذا رجلي

-مرا ما تاكل مرا ، دحكي انه و ام سعد مو حبايب

-اني ما الي شغل بيج ، صراع الي وحدي

-ماهو ملك احد كبلج جان لغيرج ، وجيتي انتي

-وما يجي غيري ولا راح اقبل

-لو تحبينو صدك انطي مجال ، ذيج هم مثلج مره واذا انتي بعدج ابداية عمرج هي اخر فرص عمرها بالخلفه خل تجرب حظها عسى اتحصللها طفل يسندها الانانيه مو حلوه

-ومنو كاضبها ، شنو خلصو رياجيل العراق ما بقى الا رجلي تعلكوها براسو

- سكتي اجا

فات هو وعصبي وعاقد حواحبو :- ما تفتهم لو تعقلين منا ليباجر ، جلب اجرب نايم بمخها بس يهوس ويهبش كلشي ما تفتهمين منو لا يرضى يهدى ولا يرضى يعقل

-وشعقل تخلف من اخلاص والله ما اقبل

-وهو منو رايد خلفه من قنادر ، انه وين احجي وانتي وين تحجين

-دحك امك دتريد تقنعني بلكت اخليك تروحلها

-وليش انه امشي بكيفج لو ردت ؟ انه اخلاص ما اريدها ولا راح اتقبلها ومصيرها ترجع لبيت اهلها

الحجيه :- ما يصير وليد....... قاطعها

-رحمه لوالديج يمه لا تفتحيلي سالفه جديده ، تره كافي علي مشاكل هلعرمه هاي

... عافتنا الحجيه وطلعت ، وگف صلى واني كعدت ، بقيت ادحك بيه :- من اغلط وما يتعدى عليه هينا تصير عندي ردة فعل واحس بتأنيب ضمير انو اني ظالمتو وهو تحملني

كمل صلاة وجر السبحه وكعد يسبح ومدنك راسو بس عاقد حواجبو اعصاب ، كمت من مكاني بست خدو ، تفاجئ رفع راسو يدحك بيا

كمبصت يموي وتجيت رجليه على رجليه و كتلو :- ما قصدي ادعي عليك والعذراء

-بس انتي دعيتي و جدام الكل ، شكد ما جاي افزعلج واكول ظالمها انتي تهينيني وما تسنديني

-بس اني ما قصدي عليك ، هي استفزتني وتكولي اريدلو ولد كلتلهم عساكم بعمركم ما تشوفون الولد

-اي وهاي دعوه لو لا ؟ تدعين علي ما تصيرلي خلفه ؟

-قصدي من اخلاص ، ليش اني ما اتمنى يصير عدنا طفل

-هم رديت وكلتيلي اخلاص ، يول منين تحبل من الحايط ، انتي ليش تتكاونين على شيء انه ناهي منو ، تروحي تدعين جدام الكل عليه وانه كايلج ما اريدها !

شيحجون خلي يحجون ، كلامج ويايه بس ، لو ردتي تدعين تعاتبين بيناتنا بغرفتنا ، ليش تنطين بيه كبال الكل ؟

-بعد ما انطي اسفه

-مو هي المشكله كل مره تكليلي اسفه وتنعاد

-لا بعد ما تنعاد والله

دحك بيه بأبتسامه :- المطلوب ؟

- ما احب تزعل مني

اخذ تنهيده و ترك السبحه وفتح اديه ، كعدت بحظنو ، ضمني بصدرو وكام يرفع الشعر من وجهي ، رفعت ادحك بيه ، باس خشمي :- وكحه بس ما بيدي اعشگچ

:- ههههه ، صراع اكدر اطلب منك شي ؟

- انتي ما تطلبين ، اميرتي تطلب وانه انفذ

ابتسمت وكمت العب بدكم دشداشتو :- اريد بيتزا حاره حيل وعليها موطه

عقد حواجبو :- شهل تلعوص هاذ

-هيج على بالي مشتهيتها

صفن :- حاسبه لنفسج انتي ؟

-شنو يعني

- صار شهر ونص لشهريتج مو ؟

صفنت :- معقوله

-دا اشك

-عجل گوم جيبلي تحليل حمل حتى اشوف

-بس ما اريد كلمه تطلع برا

-ماشي ما اكول

- يلا كومي

راح واني بقيت بالغرفه ، رتبت نفسي و عدلت مكياج ، رجع هو فات ، استغربت :- شبسرعه رجعت

-مو ع السريع رحت واجيت

اخذت التحليل ورحت للحمام ، حللت ، الخط ضعيف ما مبين كلش ، اخذتو ورحت شوفوت ، بقى يدحك ويايه وسألني :- يعني شنو ؟

-ما اعرف شو ممبين

-امشي نطلع نروح نحلل دم

درت وجهي صفنت حجه :- لا تصفنين بدلي

رحت بدلت ع السريع و گمت نزلت وياها ، هو حاط ايدو ورا ظهري يمشيني ، فتح الباب كال الها :- حجيه انه ماخذ ليليان شويه نشم هوى محتاجه شي ؟

درت اخلاص ع الدرج تنزل وعينها علينه ، و الحجيه كالتلو :- سلامتك يمه روح

طلعنا اني وياه ، اخذني مختبر ، حللو دم ، وكعدنا ننتظر ، شويه وطلع التحليل صاحو ليليان جرجيس

كام هو جاب التحليل ، ورجع العيون تلمع من الفرحه

-ها

يهمس :- حامل

-صددددددك

-شششش ، خل نطلع

-يااااي

طلعنا بالسياره ، ع السريع اخذني بحظنو :- يولو اموووت عليج بالقران ، اخو ول يابه ويصير عندي طفل مثلج الا اجن

-اني اريدو يشبهك

-شتسوين بيه هلاملح انه ، اريدو جمالو مسيحي على تركماني وخلطه تجنن مثل خبالج

-ههههه

فتح اغنية ( كولي يحلو منين الله جابك ) وبقى يغني وياها وكل شويه يكرص خدي و فرحاااان منطلق

اخذلي بيتزا وعلبة ايس كريم وطلعنا للبيت ، گبل لا نصل حجه :- ما اريد جنس مخلوق يعرف بالحمل

-ليش

-احسن ، خلي يثبت والله كريم ، تمام ؟

-تمام

...فتنا للبيت عيتعشون ، كعدنا وياهم ، وطلعت البيزا مالتي وطلعت الايس كريم جاي اشمرها ع البيتزا حجت حلا :- الله والله مشتهيتها تنطيني

هي حجت واني كلبت الايس كريم فوكها

-خبيثه مو كتلج مشتهيتها

نائل عقد عواجبو ومد بوزو بطريقة لعبانه نفسو :- ليليان شنو التلعوص هاذ خرب غيرتج ليش هيج

الحجيه :- ليش خربتيها يا يمه

صراع :- ولكم عوفو البنيه تاكل اليحلالها شلكم بيها هي هيج طخ ابعقلها

نائل:- عاد ليليان عليها شلون عقل يصفن المطي

كلهم ضحكو ، اني مندمجه افرد الموطه ع البيتزا بالخاشوكه ، وهم كلهم لعبانه نفسهم من الموضوع

اخلاص ادحك بخزره ، شلت قطعه و اكلت وصحت يممممممم وهم كلهم لعبت ارواحهم ودارو وجهم

ضحك صراع وجر قطعه من عندي وكال :- على عنادهم جيبي اشاركج التلعوص حياتي

اني ادحك بي مبتسمه اخذها اكلها وصاح :- اااااالله شنو هلاكله الملعوصه هاي دليميه وحاطيلها شكر

كلنا ضحكنا وهو رجع البيدو وعقج خشمو :- طاح حظج على هلاكله هاي

و اني اضحك عليه ، كامت اخلاص صبتلو جاي وحطتو كبالو :- لعبت نفسك اشرب جاي

هو كال الها :- اي والله صدك لعبت نفسي

واخذ الجاي منها وشرب وكال :- مشكوره

تغيرت ملامحي وكمت اكل بسكوت ، كملت ربع منها وبعد ما ردتها ، انطيتها لجهال نائل وكعو عليها ،

رحت اغسل ، وصراع كاعد ع التخم ، اجتو اخلاص وباست راسو وكالتو :- اريدك تسامحني ما اندك بليليان بعد ولا اتكربلها

هز راسو :- وكال الها مسامحه ، بس لو انعادت احسابي وياج مو وياها ،لان انتي الجبيره

اخلاص :- لا والله انه ما تكربت منها بس هي طلعت فشرت عليه وضربتني بالنعال بلا ما احجي وانه بكد امها ، مع هذه اني مسامحتها لخاطرك

تقربت منها :- انتي ما حجيتي لو كلتيلي اني كتلو يروح يطيب خاطرج خفت تموتين من حركتج ، شنو جاي تجذبين

الحجي:- المره تريد تفتح صفحه وياج ليش ادورين مشاكل

اخلاص :- انه ما حجيت هيج مع هذا انه اتعذر منج لو ضايقتج ، ابن عمي تعبان وانه ما الي نيه ادوخ راسو ، خلينه نصير حبايب ونريح بالو ، ما فوك قهرو احنه

بقيت فاتحه حلكي ، وهو يدحك بنائل ، نائل بيدو استكان الجاي وكالو :- حلو واحد يثني واثنين يتكاون عليه وعلى راحتو

صراع :- وطياح حظو همات

نائل :- ههههههههههه

اخلاص :- لا حشاك ابو حرب ، انه ما رايده منك اي شي بس يخليك خيمه فوك راسي

ليليان :- دحك اللواكه دحك ، ولي منو يلا

-ليش تغلطين تره انه بعمر امج

صراع :- ليليااان

-ما ليليان ولا بطيخ ، جاي تتلوكلك دحك

نائل :- هيي هوو السبع يطلع دم ، يلا تكاونن ، نووور فد جيس حب من حلويات الجهال

نائل قلب الموضوع ضحك وصراع يضحك وياه ما مركز بينا واني ادحك عليها بحقد وهي بحقاره

ردت اصعد ، بس لا تحلم اعوفو الها وهي كاعده يمو اني هم كعدت

هو طكاها ضحكه ونائل يأشر عليه وخربان ضحك ويكلو :- مال صوره واصورك وانت و حريمك

عافنا كاعدات وكام وهو يضحك ، راح للاستقبال هو ونائل ، اني صعدت فوك ، بقيت افتر ، متحملت نزلت لكيت اخلاص تسوي نركيله الو

جريت القمجي :- مالج شغل انتي معليج بزلمتي يلا صعدي

اخلاص :- والله لخليج تموتين من الحركه وهسه جيبي خل اسوي نركيله لحبيبي

-حبيبج شنو ولي ما تسوين ، طفيت الطباخ

راحت لصراع كالتلو :- انه ما اريد ادوخ راسك بس هي حيل تتجاوز وانه ما ارد ، بس كللها تبعد عني ولا تغلط

-يعني شلون تالي وياجن

اخلاص :- انه ما جايه يمها بس ردت اعمرلك النركيله .

-ما اريد شي اصعدن نامن

بقينا واكفات ندحك ابعض ، زكح بينا ، اثنينا طلعنا ، بقيت كاعده بالهول ، فاتو ولد عمومتهم يدحكون طوبه ، هي ما ردت سوت النركيله ولفت الحجاب وفاتت مني وخلت

كمت وراها ، بس ما كدرت افوت ، لان هم ولد عمها متعوده عليهم اما اني ميقبل افوت كدامهم

طلعت و تكولي :- ضلي بحرگتج حبيبه ، تصبحين على خير ..

عافتني وطلعت ، واني بقيت كعده انتظرو ، اخرها صعدت متحملت ، بس ما نمت لل١٢ ونص يلا صعد فوك

تلكيتو من الباب :- شكو تاخذ نركيله منها ها ؟

-هاي شبيج ليليان

-وتسأل شبيه ، شنو نسيت لواكتها

-لا ما نسيت تجاوزاتج اللي غطيتهم بضحك وكمت ، مره بكد امج تكليلها لوكيه

-هاااه هسه صرتي لا تتجاوزين عليها ، مو انت الگلتلي ساعديني اهججها .

-و هيج اليهجج ؟ انتي جاي تحطين الحق اليه وجاي تفشليني الي ، لان اذا تجاوزتي اكثر لازم اردج ، بينما هي مشتغله لواكه بعقل خلتني استحي اردها وسكتت عاد مثلج كل كل عقل ما عندج اسمج تهوسين فوك راسي

-وشلون ؟

-استخدمي اسلوبها ولا تتحرشين بيها ،

تخصرت وقوست عيوني : - واكعد ادللك واتلوكلك مثلها ؟

ابتسم :- لازم صعبه عليج ادلليني ؟

-لا مو هيج بس اني ما اعرف باللواكه وبعدين ، شنو اني مقصره وياك ؟

-اذا تنتبهين لروحج فكلشي ما جاي تسويلي ، لا ريوك ولا غدا ولا عشا ولج حتى ملابسي ما عدتي تغسلين وتكوين ، منتبه لنفسج

انه ادلل واكعد ابوس براسج وانتي شغلتج تهوسين وتفينين ، بس الى متى ناويه تحسين على روحج ؟

كعدت بأنزعاج :- يعني هسه اني طلعت ولا شيء ؟

-انتي كلشي بالنسبه اليه ، بس ليليان مثل ما انه رجال وعليه واجبات انتي هم مره

يولي اطلع وارد ما تدرين عني سأكلت واشربت ، ارجع من الدوام محترك ، الله يساعدك ما الكاها منج ، شغل بالبيت انتي ما جاي تنزلين ، ملابس الي ما كاعد تنظفين ، حتى بفراشي ما جاي تجين ولو ردت بالكوه تالي الف حجايه والف دعوه اتلكاها منج ، مجذب ؟

انه ما جاي اقارنج بيها بس الرسول يكول ( والمرأة راعية في بيت زوجها وهي مسؤله عن رعيتها ) انطيني واجب انتي مسويتو غير اللسان و النوم ؟

تره لأن احبج متحمل ، الا لو غيرج من زمااان طلگ لأن كلشي ما محصل ، والزواج اخذ وعطا

- هزيت راسي ورحت للفراش ، هو راح يبدل ، بقيت افكر :- فعلا اني مقصره وممنتبه النفسي ، بس هو من القهر اني حتى ايدي متاخذ شغل ، شسوي ؟

بس هذا ما عذر ، جنت براحتي هسه وياي ضره ، حتى لو ما يريدها اذا بقت هيج تعني واني هشكل راح يصير وياها ، لا لا لا هو يكرها ميحبها ويعرف لواكتها

بس اذا حبها ؟ اني اجيت لهين هو يكرهني و يعتبرني مو شريفه وبمرور الوكت اثبتتلو اني اشرف من الحجو عليه ، زين لو هي اثبتتلو ان هي مو حقيره واستخدمت الطيب وياه ،

دخت ..

جاي تسكت وكت اعصابو وتخلي يضرب ويقسي ومن تشوفو يضحك تجي تبوس راسو وتعتذر وتتلوكلو وتخلي يسامحها ، تستخدم الأسلوب اللي الف مره طلبو مني هو واني ما اكدر استخدمو

وكت اعصابي افقد واضيع كلشي وابقى الوص بالكلام وما اعرف شحجي ، شسوي ، احس هي اكبر مني بعقلها تعرف تثمن تصرفاتها اني ما اكدر اتصرف مثلها

هسه من صدك حسيت حجم المشكله اللي اني بيها ، جنت من اقصر وازعل ما اهتم ، هسه لو قصرت اكو التاخذ مكاني وتخليني اموت احس حياتي صارت تسابق ، ما بيها راحه

بجيت كد ما احتاريت وبقيت بدوامة تفكير ، ما صحيت من حسباتي غير هو يفوت للفراش و يرفع راسي ويخليني على ايدو

-ول ول ليش هلدموع كلو لأن كتلج مقصره بكم حاجه ، يولو والله ما اريد كلشي البنطنج كافي علي لا تقهرين نفسج

-ما هيج صراع ، اني ما اعرف اتصرف ، وهي ما تشبهني ، تفتهم اكثر مني بهواي

- طبيعي غير اكبر منج هي

- اني بس السان و نوم ، وما بيه فايده

-لتوكفين هلكلام ابالج انه حجيتو الج من باب النصيحه ، ولا تخافين انه اعرف افرق بيناتكم ،

هوستج علي اهون من عقلها ، لان بهوستج براءه وبعقلها وتصرفاتها اتلمس حقاره ، فلا تتوقعين انه تمر عليه تصرفاتها

-يعني انت تحبني ؟

- سؤالج هذا سالفة اللي يدحك الكمر بليلة تمامو ويكول شوكت يبين الگمر ، كل تصرفاتي شتعكسلج ؟

-تشفق عليه

-اشفق عليج ! ليش ؟ ماكو شفقه تصل لهل حد ، يول بعمري ما دك گلبي لغيرك والله ، ومن اتحمل واصبر لان احبج ومو لان مشفق عليج ومو بس اني متحملج انتي هم متحملتني ، خاف تكولين مقصره ، ما بينه الملاك كلنه عدنا طباكات ونتحمل بعض ، مو هيج الحب لو لا ؟

-حظنتو بحيره وبقى يمسح على راسي رفعت راسي :- ليش تزوجتها ليش دتعذبني

-ليليان انه رجل عشيره وجلمة الناس مو سهله علي ، يول لو عمي جدتم الديوان كايلي انطيتك بنتك بيها مجال اردها ، بس ابوي خطبها بديوان زلم تفتهمين ؟

من كلت لا وما اريدها كل عمامي وكفو ضدي حتى اقرب ناسي ، لأن هاي تعتبر كسره الها ودا ابين ان بنت عمي بيها عاله وما اريدها واكسر بيها وبقسمتها طول العمر لان انخطبت بديوان و اللي انخطبتلو ردها وهو يكون ابن عمها

انه من اردهم واكول لا قابل خايف لو يحطون السيف على ارگبتي ؟ بس اذا عمامي كلهم زعلو و اهلي وانه رافض وكاسر بيها ومعتزل ابيتي

تعرفين الناس شلون لطختني بالكلام ؟ الخسيس البيهم الجاي ما يطول يحجي وياي بترس حلكو يكول ابو حرب صار اخو مريته طارد اهلو ومعتكف ويا مرتو وبايع اهلو وناسو لاجلها

شلون ما خاولت ارفض واصالح اهلي ، جانو ضدي والا اتزوجها والكلام ثكل عليه ، اكدر اعوف امي واخذ واطلع برا ، والده و جبيره بالعمر وبس انه ابنها مالها احد غيري ، ولا اكدر اكعد واتحمل الحجي بحگي

كل عمري يكلولي اخو اخيتك من تالي ولجل وحده حقيره ، ينكالي اخو مريته وطارده اهلو ومكابلها ؟

اخذتها وخليتها عندي مؤقت ، بس ما انسالهم هللعبه الماصخه ، خاصه الحجي ، شايلو حقد بگلبي بكد الدنيا ، بس تنفيذها مو بليله ويوم ، يحتاجلها وكت وعقل ..

ما خنتج مثل ما تتصورين ، ولا قبلت اتركيني ، بس حسبيها ازمه وكت وسانديني نعديها

وهسه غمضي عيونج ولا تشغلين بالج بشيء بس اللي ابطنج ، خلينه فرحانين بي و ننسى البقيه

.. ابتسمتلو و ضلينه مع بعض

..... ثاني يوم ، گلت لازم اتحظرلو واحظر كلشي ، كعدت الصبح بنشاط ، كتلو انزل اسويلك ريوك

كال :- لا عمري خليج مرتاحه متأخر لازم اطلع بسرعه هناك اتريك

حجاها ونزل ، نزلت وراه ، لكه اخلاص منصي النار ع القوري ومحظرتلو الاستكان وحتى شكر مخليه ، ومسويه الريوك ، كالتلو اكعد تريك

اخذ الجاي شرب ع السريع وكاللها :- مشكوره ، مستعجل

بقيت صافنه هاي شوكت كعدت ، عفتها وصعدت ، كلت لازم انظف غرفتي وارتبها ، نظفت ، حسيت يحتاج فد اكسسوارات و الغرفه باهته لأن من خبالاتنا اني وصراع كل ما ضجنا كسرنا فما باقي شي مصحرين

، دحكت الساعه ب٩ نزلت الغرفة نائل ، دكيت الباب فتحلي :- صباح الخير

-هلا صباح النور

-اريد اروح للسوك محتاجه غراض خلي نور تروح وياي

-و الجهال

نور :- اي والله نائل انه هم محتاجه انزل للسوك

ليليان :- خلي الجهال يم عمتي واخلاص ونحن ما نتأخر

نائل :- خوش عجل بدلو خل اوصلكم بسيارتي وعود انتو ردو بفورتات مو تكسي

- ماشي بس انطيني موبابلك اخابر لصراع اخبرو

شال موبايلو وانطانياه ، خابرت صراع :- الوو

-الو هلا حبيبي

-هلا عمري كولي

-اريد انزل للسوك

-اخاف عليج وانتي حامل شعندج

-ما عليه شي والله بس محتاجه انزل

-مفتاح الخزنه عندي ، جوا ايدج عندج اخءي وانه ارد انطيج

-اخذ من الحجيه

-ماشي ، ودحكي هين ، زرق ورق على وجهج ما اريد والجبه سوده البسيها لا تلبسين الوان ، فهمتي ؟

-احبك

-اموت على ربج

ضحكت وقفلتو ، ورحت اخذت فلوس ونزلت للسوك ، انطيت النور وياي ٥٠ الف ، هم خطيه ما عدها وهم حتى ما تضل عينها على خيزداني من اصرف وهي ما عدها

اشتريت شنو احتاجو مكياج وملابس وتحفيات اشكال الوان للغرفه ، رجعنا الظهر ، على ما رتبت التحفيات ع الغرفه و فتت سبحت و لبست وهستوني مكيجت بعدني ممكمله سمعت صراع جا ، استعجلت بالمكياج حتى انزل اتلكاه واسويلو اكل ، نزلت لكيت اخلاص دا تحطلو الغدا

ضجت حيل ، رفع راسو يبتسملي وكال :- هلا يحلوه ، شطالعه اليوم شنو هلجديد

-ردت اصبلك غدا

الحجيه:- اذا انتي ملتهيه بنفسج وناسيه الرجال ، هسه نازلتلو ، همي نفسج ونزلي قبل لا يجي وحظريلو وماكو فرق بينج وبين اخلاص اثنينج نسوانو

- شنو اثنينه...... قاطعني

ابتسم :- جبيلج خاشوكه واكلي وياي حياتي

بقيت صافنه بوجهو ، غمزلي واشرلي اجي يمو ، رحت همسلي :- كعدي اكلي وبس

اجت اخلاص تنشف باديها رادت تكابلو ، كعدت واني كابلتو وانتجيت على رجلو واخذت خاشوكتو ، حتى ما لحكت اجيبلي خاشوكه

هو يضحك لان حس دا اسابقها ، كعدت هي كدامنه تاكل

اخلاص :- اكلي بس مو فوك اهمالج جاي ماخذ خاشوكت الرجال ع الاقل حركي نفسج وجيبيلج خاشوكه

-معليج ، تغارين لأن يكش منج وما يخليج تاكلين بخاشوكته

-ليليااان اكلي وسكتي ، ول يابه صرعتني ، هاي راح تبقن هيج تتناكرن

الحجيه :- وانت المستفاد

-شمستفاد بدوخة الراس ؟ اكلي يابه ، ما اريد

كام من عدنا ، رحت وراه ، دخل للغرفه واني حجيت :- هاي كلبه ما دا تنطيني مجال والله اني ردت اسويلك اكل بس...... قاطعني وهو يكضبني ويشمرني ع التخت

صفنت بوجهو هو مثبت اديه فوكي و يدحك مبتسم :- شبيك

-محظرتلي الغرفه وكل هترتيب و الجمال وتريدني اتغدا بأكل ، ول انه اريد اتغده بيج

-يعني حلوه طالعه

-گمر والله ، دحكي فرق بين الخدامه و الاميره ، لو راحت الخدامه تجي الف خدامه ، بس الأميره محد يعوض مكانها ، وانتي اميرتي

..... وكلعاده طيرني بكلامو المعسول

بقينا مع بعض ، وحتى الحمام رحنالو سوا ، طلع قبلي واني طلعت بالبرنص وراه ، واخلاص بغرفتها مفتوح الباب ، فتت من الباب واني اغني :- انا لحبيبي وحبيبي الي يا بومه طايره لا بئى تسألي

ضربت الباب بوجهي ، رحت للغرفه واني اضحك ، لكيتو متمدد ومتغطي نايم ، بدلت ورحت يمو

للظهر نزلت اخلاص و الحجيه بالغرفه وهي تبجيلها وتكولها :- ما جاي تنطيني مجال يشوفني منين ما يلتفت طلعت بوجهو وهو ما يشوف غيرها

و الحجيه تكلها :- اصبري يمه ، تراها حالج حالها من اجت هم ما يريدها ، هذا ابو حرب يدرس سالفتو يلا يخطيها ، ابقي هيج وياه وشوفي لا ما لان گلبو

رحت للمطبخ ريحة معجنات ، فتحت الفرن ، دا تسوي كعك ، فاتت هيام سلمت عليه رديت عليها بثگل

:- زعلانه يولي ؟

-ليش ميحقلج

-حقج بس والله لمصلحتج ما كلنالج

-هااا صدكت ، اخر وحده اتوقعتها تغدر بيه انتي

- انه ما غدرت احد انه بس ساندت اخوي

- اي الله يديمها

-الا خبريني شلونها وجه الجلب وياج

- سباق الثيران الينطح يربح

-هههههههه هجي صايرين وما ادري

-كعدنا نسولف وسولفتلها كل البداخلي رغم حاقده عليها بس ما عندي غيرها اشكيلها وتنصحني

- سمعي ليليان ، هاي جاي ادكلو ناعم ، وكثرة الدك ع الحديد يفك ، ديري بالج ، بس خلي ابالج ، اكو نوعين رياجيل ، بيهم اللي نقطة ضعفو بطنو بحيث تغري بجمال وترتيب اكلو ، وبيهم نقطة ضعفو رغبتو ، ما يهتم للاكل على كد ما يهتم لفراشو ، انتي شوفي رجلج نقطة ضعفو وين واشتغلي عليها ، مو معناها تهملين النقطه الثانيه لا بس شبعي عينو باللي يريدو ولا تقصرين بالبقيه ، يصير الج ومحد تكرب منو

ولا تكولين حيوان ، كل جنس بينا نقطة ضعف ، النسوان بيهن صنفين ، بيها اللي تغريها الفلوس واهم شي فلوس وطلعه وبيها اللي نقطة ضعفها العاطفه ، امنعيها من كلشي بس دللي عواطفها و الرجال كذلك نقطة ضعفو اثنين يا بطن يا فراش

صيري ذكيه وعرفي رجلج ودللي ولا تخلي الها ، تراه اليوم يحبج ومتحمل اخبالج ، بعد يومين يجزع من كثر هوساتج ويميل للهادئه و الماتشكي

-لو بيدي اشنق اخوج وافض السالفه على هلزواجه هاي الحطني بيها ، دا احس نفسي بمارثون ياهو اليربح

-هاي قسمتج بعد تحملي

فاتت اخلاص هيام كامت للهول ،

اخلاص :- صراع فوك ؟ صيحيلو يتعلل ويانه سويت كعك يضوكو..

-ميحب الحلا هو ميريد

-وانتي منو مصخم وجهج وطالب رأيج دكلج صيحي .. حتى لو يكعد يشرب جاي ..

-ميريد يكابل خلقتج الحلوة .. كوه هي الرجال من يوم اللي فتي ولليوم ميحب يكابلج حسي على روحج عاد .

-يولي احجي عدل لا امسح بيج الكاع والله

-والله عاد وجهج يلوك للكاع اذا تردين مسحي بي ..

فاتت نور :- هاا شكو

اخلاص:- ينزل واعلمج شلون امسح بوجهي الكاع .. الا اخلي هو اليمسحج ..

-ههههههي ضحكتيني ..

-وتشوفين يلمصلاويه

-شالت القوري حطتو بالصينيه ومشت ووجهه تكول خريطه احمر واصفر ومتعرف الوان المكياج شنو اذا الضلال لونو سمائي وهي ملحه ..

هزيت ايدي .. نور تضحك

نور:- هاي مصدكه بروحها تخلي مكياج

-مكياج عربان بعد .. هايشه وامكيجه العوبه تلزكت بي واخذتو العانس

مشيت للهول هي مخليه الصينيه كبال الحجيه الكلبه تعرف وين ادك ناعم .. صبت جاي وتكول :- نور كملي خل اصعد اصيح صراع واجي

صابه بس ٥ كلاصات جاي يعني محاسبتني .. نور صبت ووزعت لام سعد وعمتي و هيام خلت كبالها عاد اني اخذت كلاص خلوص وكعدت اشرب بيه ..

نزلت هي والحجيه تكلها :- ها شكالج ..

-كال جاي

... كعدت :- عجل كلاصي

وانتبهت بيدي :- انتي شنو تاخذين الكلاصي من الصينيه متستحين

-اووي شنو هلنفسيه من يا بيت جايه انتي مشايفه كلاصات .. كومه كلاصات عندي بالكاونتر عادي كومي اخذي .. والا اكلج حتى جايج مو طيب اخذي

- ليكون مصدكه هذا بيتج ..

-بيتي وغصب عنج يعجبج يعجبج مميعجبج ذاك الباب ..

-عمه حاجيها ترضين لاسلوبها وياي هيج هسه اني حاجيه وياها شيء ..

عمتي دارت وجهه عليه وهزت راسها وتكلها تركيها بنيتي انتي العاكله الجبيره ..

-يعني العاكله محد يردها وهي تتجاوز ..

دتحجي نزل صراع رادت تحجي اخلاص ندستها الحجيه عود سكتي ..

... كعد كتلو صحي النوم حبيبي هم زين طلعت من الغرفه من ذاك اليوم الاكشر ولليوم حتى نزله لهين مكمت تنزل سوده عليه ..

دحك عليا بطرف عيونو وكاللها :- اخلاص صبيلي جاي ..

كامت تجيبلو استكانتو .. صبتو وحطتو كبالو

هو فتح سالف وي امو وهيام على كرايبهم واني اگلب بالتلفزيون .. ونور وي جهالها تلعب تحجي وتنطقو يحجي

.. واخلاص وام سعد يحجن ..

فات الحجي من برا كال الها :- يابه اخلاص اخوج بالاستقبال كومي سلمي عليه وشوفي

هي ركضت ، رد كالو :- ابو حرب نسيبك جاي كوم سلم يابه ...

سوا حركه بحلكو وحرك راسو بمعنى .. خيولي

شويه وفاتت أخلاص وبيدها البوم صور وتكلها :- عمة صور العرس طلعو

بقيت ادحك عليها وهي تشوف الحجيه ونور وام سعد وصراع داير وجهو للتلفزيون

كامت كعدت يمو .. كالتلو :- شوف الصور شكد حلوات

وادحكلي بحقاره هو دار وجهو عليهن وكاللها :- اي

ورجع وجهو للتلفزيون ..

اني احس دمي فار من الصور .. اني من اتذكر ذيج الساعه من دخلوها ابدله بيضه اموت مو تنوب صور موثقات ..

كام هو من الهول كالتلو عمتي .. :- يمه ما تطلع ..

-لا والله يمه ما ناوي اطلع صاعد لغرفتي كولي

-عود ردتك تجيبلي هاذ الحبوب.

-اخذو منها وكاللها بليل اجيبو ..

.. صعد كمت صعدت يمو .. فتح الابتوب وكعد يشتغل عليه واني افكر بالصور

-صراع شوكت اطلكها ..

شال راسو :- شكو

-مليت اريد افتهم شوكت اطلكها شنو مكتوب عليه اشوفها كل يوم كبالي ما جاي اتحمل .. بودي افعل بيها جريمه ما اطيقها .

-ما جاوب رد يشتغل ..

-اي ضل لتجاوب وغلس يجي اليوم الاهج بي واخلص من هلبيت ..

-يولو تره تعبت من هسالفه بالقران كم مرة كتلج ما اريدها وبس تصحلي فرصه اطلكها . بس كافي فكيني رحمة لميتينج كاعد اشتغل ما تشوفين

-كمت منو بنتر وتركتو ونزلت .. الاذان يأذن وكلهم ديتوضون واخلاص صعدت لغرفتها ..

دخلت غرفة الحجية .. دحكت ابن نائل منومتو نور على تخت الحجيه ويبجي مشيت جاي اشيلو دحكت البوم الصور مال اخلاص وفوكو الفلم مال الصور ..

صحت نور اجت اخذت ابنها وراحت .. دحكت الحجيه بالهول تصلي واخلاص صاعده وناسيه الالبوم .. دخلت وقفلت الباب ..

طلعت المقص .. وسحبت الصور من مكانهم كمت اصفطهم واكصصهم صغار صغار .. لحد ما سويتهم طحين وبالي يم الباب ..

خليتهم بقلب الالبوم القصات وجبت الفلم وسحبت الشريط وحركتو .. وهم كصصتو وخليتو ..

ورجعت المقص وكلشي لمكانو .. فتحت الباب شفت اخلاص راحت للمطبخ .. فلتت لغرفتي ..

دخلت للغرفه الخوفه بكلبي مدري ليش اخاف منها .. اندرت وصراع كاعد على سجادتو يسبح و يدحك بوجهي وحجه

-شو وجهج لونو مخطوف شبيج

-ما رديت كعدت

-يولي مسويتلج مصيبه

هزيت راسي :- اي

-ول يابه ابتليت .. شمسويه ولج

اجيت يمو .. وكعدت ع التخت كبالو :- توعدني متحجي

-ليش ناويه تخليني شريك بجرايمج انوب ؟

-مو هو اول وتالي تعرف ف اعرف مني احسن ما تعرف من غيري

-سمعيني شمفينه يولي

-كصكصت الصور مال اخلاص وحركت الفلم

-هاي ليش هيج ، شنو هلتصرفات ليليان

-ما بيدي من كعدت تشوف بيهم اني احترك دمي

. يعني مصورة اتعس لحظات حياتي وتريدني اسكت ؟

-تسكتين شنو انتي ليش ادورين مشاكل الصور مو يمج ولا حتى شوفتهن الج حتى تضوجين

-بس انت بيهن .. وانت بس اليه ما اقبل تصير لغيري .. مكافي جنت اتمنى بس بدلة عرس واوكف كدام العالم وايدي بأيدك واكول يا ناس هذا رجلي ..

وصارت احلامي وامنياتي كلها الها وانوب تصورهن وابقى اتذكر عرسك انت وياها واموت ، ما اتحمل كافي متحملتها بهذا البيت ..

-بس اللي سويتي تصرفات جهال .. كافي ولج كافي راح تجلطيني والله

-شنو اللي كافي هاا مجرب شعور شنو تنخان واللي تنخان وياه عايش وياك تره جاي اموت باليوم الف موته وتكلي كافي

-كتلج انه مااا.......

-لا تكول ما اريدها وهلسوالف مدامها ابيتي اني ممرتاحه واتجرع الموت بشوفتها

دنحجي صاحت هي عمه هاي منو مسوي بالالبوم هيج .. وصوتها شعلوو

اندرتلو :- عرفت

-اي شنو تخافين

-لا شنو اخاف هي وانعالي

-عجل نزلي وكليلها اني واعترفي دام ما تخافين وصايرتلي فاندام ..

-لا ختولي ما انزل

-هز راسو وابتسم وهو عينو ع السبحه ورد يكمل تسبيح .. اندكت الباب ..

صحت فوت واني مددت رجليه ع التخت وكضبت الريموت اكلب ..

.. فاتت اخلاص .. ليليان هاي انتي هيج مسويه بالالبوم ..

.. دحكت عليها ودرت وجهي :- لا ..

-لا انتي

صراع:- اني الشككتهم وما اريد.كل صوره تبقى يلا

-انت ليش ادافعلها بدل ما تحاسبها ..

-انه شكلت

-مو انت الشككتهم ومتأكده هي مثل ما اشوفك هسه كبالي

-يعني افتهم منج انه جذاب وجاي اجذب ؟

.. صفنت بوجهو .. كاللها :- انكلعي

طلعت بساع .. اندارلي :- ارتحتي هسه .. احسن هلمشاكل ..

نزلو دموعي معرف ليش .. احس جاي اسوي شغلات حقيره مو كن طبعي ولا من اخلاقي بس من غيرتي وناري اللي بكلبي دا احير شسوي احس تخبلت ..

.. هو شافني ابجي صاح :- وفوكها انتي التبجين ..

-اني مو هيج ولا اعرف احقر وي البشر بس من وراك كمت اسوي اشياء ما من طبعي .. خبلتني والله خبلتني ..

نمت ودرت وجهي .. هو اخذ نفس وتقرب :- يول انه ما طايقها اكثر منج .. ولج وربج اكرهه ما اريدها .. بس صبري

-لا تكولي صبري جاي اموت اطردها تعبت ..

- خبالات حمل حياتي ، كعدي بالغرفه ومعليج بيهم ، ارتاحي انتي هينا ولا اتعبين نفسج

سمع صوت الحجي جوا يصيح ، كام من عندي ونزل ما نزلت بس سمعت صوت صراع يتصايح ويا الحجي ويكلو :- لا تدخل لو احركها ما اسمحلك اطفيها

الحجي متماون وياه وكالو :- الضاهر انه مالي احترام هينا بعد

و صراع يكلو :- محد جاي يمك دا اكولك لا تدخل نفسك بحريمي ، واذا جاي تتحجج براسي على طلعه وابالك تكضبني من ايدي التوجعني و تكعد تصفط علي كدام عمامي وتشكيني ، فلا تقصر حجي مو انه الامشي لكيفك ، ما ناسيلك عملتك تراني

الحجي ما متحمل ، ماخذ ام سعد وطالع ، وصراع صعد عصبي ، غطيت راسي و ما حجيت ، ولا هو حجه بس يخزر بيه وكعد ع اللابتوب رد يشتغل

نزلت الكل بغرفتو ، هدوء ، سويت عشاء النا وصعدت ، كابلني اكل بدون حجي ، كملت و رحت نمت ، وهو بقى يشتغل

ثاني يوم الظهر هو مموجود نزلت للبيت ، لگيت خوات اخلاص موجودات وحلا هم جايه ، سمعت اكو خطار بالاستقبال ، نور مموجوده سألت الحجيه

:- منو بالأستقبال

-صديقات اخلاص جايات يباركن

- ها

فتت للمطبخ ، شميت ريحة الجاي مهيل و الاستكاين محظره ، دحكت وراي ماكو احد ، شلت اللامندوزي وعبيت نصو بالقوري

وعفتو رحت للثلاجه ،فاتت اخلاص ، اني فاتحه الثلاجه ، جان تضربني على كتفي وترفعني من جتف الدشداشه :- دحكي هين ، لا عبالج ساكتتلج هيج ، لا تره عايفتو الج بمزاجي و فيني و خبصي نفسج براحتج ، مرد ابن عمي الي وانتي برا البيت من يبكي كثيرا يضحك اخيرا ، وانه راح اضحك وكل هلبيت يصير الي بس جايتج شويه شويه حان وكتج واجه دورج

- وخري مني يلا

جريت ثوبي منها ، بس خفت لان اني ما اكدرلها ، بجف اموت تحت اديها ، عافتني وكالت :- صبري عليه عيوني لا العبج حبل ليما تكعين

عافتني ومشت لعب نفسي من خلقتها عابت هلجهرة حشى خلقة الله، خاطه بالتاتو الماجك على حواجبها وثخان وطوال وسوووود وهي وجهه اجلح ومن تحجي حواجبها تتحرك ويه كل كلمه ، جنها قرقوز

اكو فنانه اسمها رند الحنين دوم اشوف تحشيش على مكياجها بالفيس ، اخلاص نفس مكياجها وهم ضخمه مثل ذيج ، تجيب وتحط بهلمكياج مو بتناسق و العمر مبين بوجهه مو مال شابه ، لاعبه بجهرتها جوله ..

عفتها ومشيت للهول ، هن صبن الجاي وراحن للاستقبال ، شويه وكبت العيطه وكلها تصيح يييييع الجاي حامض ، طلعت نور و ام وسام وحلا ويكولن والله فشله منو حاط اللمندوزي بدل الشكر ونور تكولها اخلاص حطت الشكر

غسلن الاستكاين و جددن الجاي ، وودنهن ، وهم صاحن :- ياااااع خايبه شني ما عدكم شكر لعبتو ارواحنه

و حلا تحلف تكوللهن :- والله حطيت شكر

اني كاعده بالهول متمدده ع التخم واكلب بالتلفزيون ولا على بالي ، شوي وراحن ، راحت اخلاص للمطبخ وتكوللهن :- والله فشلتني شنو ما ضكتن الشكر

كامن يتضوكن بالشكر ، واخت اخلاص الثانيه ضاكت اللي بالقوري وكالتلها :- ما بالشكر حبيبه قوري الجاي مشمرور بيه لامندوزي

واخلاص اجت للهول ، جرتني من دشداشتي :- الا صدك انتي بلا مستحى ، انتي شنو تريدين تفشليني

كامت تاخذ بيه وترد وتصيح :- ولج والله باصبع افرج تره جثير تحملتج هينا اذبحج

ودفعتني للكاع طلعت الحجيه صاحت بيها :- يا يا ليش هيج وياها اخلاص

اني بقيت ابجي ، لان دفعتني حيل على اركبي

واخلاص تكولها :- عمه متت منها ما تنجرع مدري شلون انتم جارعيها تسوي روحها زعطوطه وهي كلش زين تفتهم ....

جاي تحجي ، فات صراع ، درتلو دموعي بعيني واخلاص مستمره تحجي ، من شافتو سكتت ،

دحك بيا وحجه :- شنو الصاير شنو هلصوت

-دفعتني بالكاع ضربتني

ام وسام :- ابو حرب تقبلها.......

بعدها ما حاجيه وهو هجم على اخلاص ، كضبها من شعرها و صرخ :- بكدددددج وتضربيها بالكااااع وادفعيهاااااااا

تراكضن كلهن عليه ، صاح :- لو واحد بيكم ادخل والله متلومون الا انفسكم بعدوووووو

وبعدهن كلهن بس ام وسام بقت تجر بي ، جابها براشدي و دفرها للكاع دفع اختها ودنك كضبها من شعرها ::- ساقطه ويطلعلج حسسسسسس ابيتي ، والله اشعل شيب الخلفج بنت القندراااااا

طلع نائل من الغرفه ، كضبو من جتفو وهو يصيح :- عوفني يول هاي جايه للمهانه خليني اهينها وانعل سلفاها لهل ما عدها كرامه

ام وسام :- لا والله ما جايه للمهانه ، ما تريدها ما بلازم انه اخذ اختي ونمشي ، والله ما ابقيها عندك وحتى بنتك ما اريدها

-درب السد لا رد انعل ابوج لابو ابنج وياج ، اخذيهااا يلااا

نائل يجر بصراع ويهدي الوضع وحلا تتوسل بام وسام تترك اخلاص ، و الحجيه تسكت بهذا وهاذ

ام وسام :- انه ماخذه اختي وانت خليك بايع لحمك لجل وحده مصلاويه مسمومه الله يهجم هلبيت فوكك وفوك راس مرتك يلظااااالم

هو صاح وراها :- روحي اخذي اختج طالك بالثلاث........يتبع

☆☆☆☆☆☆