المراهقة والأربعيني الحلقة (60)

المراهقة والأربعيني

 

الجزء الثاني

الحلقة  (60)

سمعت هيام تصيح ولج ليلياااااااان فتحي ليلياااااااان ابو حرب

ما وعيت شنو كالت ركضت فتحت الباب شفت دموعها بعينها و تضحك وحظنتني حيل

-شبي صراع

-ابو حرب عاااايش ليليااان عاااايش راح يجيبوووه

- لا لا عتجذبين الله عليج

-ولج والله و صلاة محمد خبر ع الحجي بصلاح الدين وراح يرحون هسه يجيبوه

-صرخت من كل كلبي وحظنتها وابجي .. لا لا ما اصدك عايش يااااااا الله .. الشكر للرب شكرا ياربيييي .. احجي وابجي واضحك .. مشاعر ما اعرف شلون جمعتها بلحظة وحده يمكن گلبي حيطك من الفرحه ..

تركتها ونزلت اشوفهم مهووسين يردون يرحون نائل يصيح نور حزامي و الحجي يصيح يابه عكالي ..

صحت شوكت تجيبوه .. شوكت حيجي بس جاوبوني .. كلها مخبوصه ..

الحجي :- ليلياااان

- هااا عمو .. رحت ركض بلكي اسمع نتفة خبر عن صراع ..

-اسمعي بنيتي الصار و الدار ما نريدو ينفتح تراه ابو حرب مريض وراح نجيبو وما نريد نزيد عليه المشاكل ما تعرفين داعش شعامله بي ف الفات مات ونحن ولد اليوم مفهووم ؟

-ليش هو شبي

-كتلج مريض سمعي الكلام بنيتي ولا تسوين مشاكل ولا تفتحين الموضوع وتقهري

-بگلبي گلت هسه صرت بنيتك .. هزيت راسي لا لا ما احجي ما اريد اخسرو بس خل يرجع ..

.. تركني ومشى .. صحت وراه شوكت يجي .. ما رد بعد .. صعدت بوجهي للغرفه شكو شي بي طلعتها ..

حتى الجربايه و الميز تواليت و كلشي .. هلكد اله حط بيه قوه على فجأه .. غيرت ديكور الغرفه و هيام جت تساعدني ..

طلعتها تلمعت وهواها يجنن من النظافه وريحة المعقمات و العطور بس حتى يرتاح شويه ..

درت الهيام :- هسه شلونها

-طلعت تخبل بس بقت صاحبتها

-صاحبتها !

-عجل الغرفه تتنضف وصاحبتها الوجه كلو شعر .. حدري احفلج وانضفج يجي يدحك بجهرتج لو بالغرفه

-ضحكت .. هم صدك

كضبتني حفافه و واكس وتنظيف وسبحت و كعدت اسحب شعري بالكاويه و امكيج واني افكر هيج راح اشوفه هيج راح اشمه معقوله راح يكف كبالي بطولو ..

ارد اصفن اكول خاف هذا ملعوب ثاني منهم .. بس شراح يستفادون .. يمكن يكولون هيج حتى لا يجي الشيخ .. بس لا ممعقوله هيام جت وخبرتني وهي فرحانه والحجي وصاني لا لا اكيد حيرجع

يربي خاف حلم وابد ما حابه اصحى منو .. اغمض وافتح مو حلم حقيقه .. ادحك ع السرير عود معقوله اليوم هو يملي التخت بطولو هينا واني ادحكلو ..

اخذت نفس .. يارب لا تستكثر عليه هلفرحه ورجعلياه من تمام ..

دحكت ع الساعه صارت ٣ ونص .. نزلت جوا .. اكو فرق محد يسمعني كلام اليوم ولا احد يغلط ولا احد يتأمر ويكولي حطي ايدج لو اشتغلي .

كلها ادحكلي ونظرتهم مفتهمتها .. دخلت لحجيه .. كاعد ومنزله رجليها ما بيها تكف .. بست راسها ..

-يمه راح يرجعلي

-الله ايحفظو الج يبنيتي .. بس ليليان يمه انه تعبانه بس اوصيج

-بشنو

-لا تجيبيلو سيرة الصار خلي الفات يولي

-عجل اسكت على اللي سوو

-يمه اهو راح يرجع تعبان والله عليم الدواعش شعاملين بحالو . لا نكثر عليه الحمل خلي الأيام البعضها ولا تطلع منج .  هم تكبرين بعينو و هم تشيلين عنو ..

-بالله سمع من غيري وتهمني وصدك

-ما تعرفين وليدي انه اعرفو .. لا تخافين .. لو حجه انه وياج .. بس هااا ليليان ايالج وبالج تجيبين سيرة محمد

-يوم هذا بالأخص اريد اشرب من دمو ع السواه

-لا ييمه محمد طايش و السواه غيره من علي و اهم منو جانو صغار وهلغيره بيناتهم .. و ابو حرب ييمه ما يتفاهم بالشرف ايدو و السلاح

وشفتي بعينج بس عرف رجل اسما عندو علاقه من بعيد بحلا راح حطلو جيله برجلو وعوقو للرجال وهاي عود بحسابو هو مسامح لجل ما ييتم جهال اخاو ويرملها .

شحال لو سمع محمد كاضبج لو شمسوي بيج حرام ينوم الجيله براسو وتكبر المشاكل ما تصغر يا بنيتي طميها هسالفه ابد لا تذكرينها ..

-واذا طلعت من واحد غيري مراح يتهمني

-لا تخافين محد يحجي كلها اطم هسالفه و لو فرض وانحجت انه اكلو ما خليتها تحجي وابريج بس المهم هسالفه تنسيها تمام ؟

-تمام بس خل يرجع والرب ما اريد شي غيرو

-يرجع ان شاءالله وتتكحل عيونه بشوفته ..

-مو كأنهم تأخرو ؟

-يجون ان شاءالله ..

ردت اكوم حچت هيام :- خايبه ساعة الأنتظار تكتل ما اتحمل وعيني ع الساعه

-اي والرب صدك الساعه ما فاركت عيوني

-شرايج نكسر الأنتظار ونصعد نغسل السطح صعدت قبل شويه من جنت انضف وياج شحالو وابو حرب لو شافو هيج كلو تراب يحجي

-يلا .. صعدنا للسطح مدينا الصوندات وغسلنا .. هي بالمكناسه و الصونده واني بالماسحه انشف .. غسلنا نصو وكعدنا نرتاح وهو ماكو .. ادحك للسطح كاعو مفشگه من الرمي و الضرب مال داعش .. لو باقين على هلرمي اكيد ميتين ..

عجل سعد ما مات ؟  هو العار شيموتو .. احجي بداخلي واني ادحك وكمنا كملنا شطف .. سمعنا هوسه جوا ..

دحكت من السطح فوك .. صحت هيام تعالي .. زلم سدت الكراج وهوسه وكامو يدبجون وطبل .. واشتغل الرمي دنكنا لا تجينه الطايره ..

صاحت هيام ولج اجه والله اجه ..

اني كالت هيج .. ما ادري شلون طفرت وركض ركض ع الدرج وهي تصح وراي :- على كيفج يولي لا تكعين ولج تلحكييين

نزلت بعدو ما فات للهول وكن العالم كلها التمت معرف شوكت اجوي .. طلعت للكراج ديذبحون يم رجلو خروف ..

دحكتلو والعيون جرت .. يربي هذا حقيقه لو عيوني تتخايلو .. انطو البرنو ورمى بالجو بس نصو رايح ذاك الضخم والجتافو شعرضها ..

هزيييل  وضعفااان ومسمر حيل و ما كن ينشاف من كد ما لحيتو عاليه وشعرو كثيف وحالتو حاله كن واحد طالع عبر الزمن

تركهم ومشى و الحجي ونائل و من ولد عمو مشو وراه وجا عندنا .. انطى البرنو النائل و اول ما نزل على امو حظنها وكام يبجي بصوت عالي وهي هم على صوتها بالبجي

يبوس براسها وبأديها ويرد يحظن بيها ويبجي والناس تبجي على منظرهم .. وهي كاعده على كرسي متحرك

كام منها حظن هيام وهي تكلو گرت عيني بيك خويه هسه طلعت شمس الله وضواها .  باسها براسها وشال راسو جت عينو بعيني .. وعيوني تجري واديه على حلكي ممصدكه هو كبالي ..

راحت حلا الحظنو حضنها حيل وهي تبوس بيه وتبجي .. مسح دموعها وباسها براسها .. و مدلي ايدو وفتحلي حظنو ..

رحتلو طايره تشكلت برگبتو  وحظنتو حيل و هو عصرني بحظنو ورفعني الو  .. كمت ابجي من كل گلبي ..

اليوم ردلي ابويه ورجعت امي وحيو كل هلي برجعتو .. اليوم راح اكدر اكف وما اخاف من احد .. اليوم راح اكدر اتنفس براحه ..

حاظني حيل باديه وراسو بركبتي وحسيتو يبجي .. بعدت وكضبت راسو .. مسحت دموعو من خدو :- ابويه وامي انته والله هسه ردت الروح بيه .. متعرف شكد مشتاقتلك ..

احجي واريد ادحك بيه الدموع متكف من عيوني .. من حرارتهن تنزل ع الخد بسرعه وتوكع .. مسح دنوعي وحجه

:- ما اريد اشوف هلدموع كفيهن يولو والله مشتاكلج ..

رديت حظنتو من كل عقلي وابجي من كلبي .. اريد اتنفسو اريد احس بيه من صدك هو رجعلي .. نسيت الناس كلها ما فزيت غير على عمة حلا اخت اخلاص .. تحط ايدها على ظهري وتكولي

:- گرت عينج حبيبه برجعة زلمتج ..

ابتعد وهمس:- حظريلي الحمام ع السريع

.. وراح يسلم على عماتو ونسوان اخوتو والاطفال يدنك ويبوس بيهم .. والهول انهرج كلها موجوده ..

واني ادحك الطولو وفرحانه بوجودو بيناتنا وناس تكلو اكعد هينا وناس تكلو اطلع يم الزلم وناس تصيح تركو على راحتو وناس تكلو اصعد ارتاح .. وانخبصو بيه

هو سحب نفسو وجر خطواتو للدرج يصعد .. واني هايمه ادحك بطولو .. الا ما ندستني هيام

:- خايبه يولي شعندج واكفه  مو صعد طلعي وراااه

-فزيت هااا .. ادحك كلها ادحك بوجهي .. خجلت طلعت وراه ركض للغرفه لكيتو متمدد  ع السرير وايدو على وجهو .. وبالحذاء ..

كعدت يمو فز .. يدحك منا ومنا ..

-ها شبيك

-وسخت الفرلش مو ؟؟

-لا عمري اخذ راحتك .. مديت ايدي دا انزعو القميص

بعد ايدي بسرعه :- ما يحتاج .. رد نام .. اني صافنه بهيئتو مستمتعه ع التمام ما حابه اروح لحظه ..

شال ايدو :- اني خلصت مو لو حلم هاذ

-خلصت الله ياخذهم .. اني هينا يمك لا تهتم .. بستو بركبتو وتمددت يمو .. كعد

-لا اكوم اسبح انه جايف

-اسبحك

-لا ما يحتاج بس حظرتي

-كلشي محظره روح .. طلع وصاح على نائل جوا ... ردلو .. جاااايك ..

فات نائل لغرفتو طلع مكينة حلاقه وكال ليليان ع السريع جرجف وكرسي ..

رحت جبت ع السريع وخليتو ..  كعد نائل يزينلو شعرو ولحيتو اللي صايره كأنها داعشيه من كد ما عاليه ..

مدنك ونائل يزين ولا رفع راسو .. كن هموم الدنيا على راسو ونظرتو مو صاحيه .. يفز ويدحك بساع ويحاول يدارك امرو ويرد يستغفر ويغمض عيونو

ما اعرف على لحظه حسيتو هذا مو صراع كن مبدل بس يشبهو .. ما متوازن .. مبين مريض بس شنو مرضو ؟

جت حلا وكعدت يم ايدو تبوس بيها .. فز .. فتح عيونو وسعها .. فرك وجهو وابتسملها .. واخذ ايدها .. وباسها :- شلونج باباتي

-هسه صرت زينه بشوفتك

-ابتسملها وباس ايدها و مسح على خدها .. رفع عينو اني واكفه .. هم ابتسملي

-يهنيالي متتصور شكد مشتاقتلك

بقى يدحك بوجهي ما حجه ولا بعد عينو لحد ما نائل نزل راسو حتى يحددلو شعرو ..

كمل .. فات للحمام واني نظفت المكان ورحت للغرفه .. طلعت شلحه بيضه لبستها .. ادحك على روحي هسه يله انتبهت على نفسي شكد ضعفانه

القماش ستن ابيض وناعم ولطش على جسمي حسيتو ممسوح كل ملامح ما بي .. الا تكول مضروبه اوتي

كمت ادحك لوجهي .. يمكن سنه اني مشايفه المرايا .. مو ما اشوفها كبالي بس ما اركز بيها لو اهتملها واهتم لتفاصيلي ..

هسه رجعت اتعرف على وجهي وادحك بيه .. نثرت شعري كاويتو وناعم .. ورشيت عطر وكعدت انتظرو كن طول ساعه وما طلع ..

شويه وانفتح الباب .. اندرت فات هو .. ابتسملي من شافني متحظرتلو .. رحت حظنتو .. لمني بأثنين اديه

اخذني ع التخت كعدني على رجلو وايدو على خصري :- ليش هلكد ضعفانه ما عفتج هيج اخر مره جنتي زينه

-ليش فراكك هين ؟ .. هذا اثر فركاك بيه .. اخذت نفس

-شششش لا تشكين يولي والله ما ضلي گلب  ويتحمل .. خلص گلبي ..

-سولفلي شسوو بيك ذوله الكلاب

-لا تذكريني بهالسالفه لا تجيبيها گبالي ..

-ابتسمتلو .. تمام .. بستو بخدو وهو يمشي ايدو على شعري ويلعب بخصلاتو .. لحد ما سحبني الو ..

للحظه حستو ما اعرف شبي .. ما كن طبيعي .. مو هو صراع .. مشتاقلي ومشتاقتلو بس ديعبر عن حبو بغضب وعاقد حواجبو ومتعصب .. ومتعنف حيل

حس انو اني اتأذيت تحت ايدو ..  انقطع عني وسحب الغطا وكعد .. حسيت مو على بعضو .. دنك حط وجهو بين اديه وكن يجر نفس مثل المنشول ..  يبجي !!

.. ردت اغير الموضوع ما احسسو بضعفو .. حطيت ايدي على كتفو وكلتلو :- حبيبي تريد اسويلك اكل ..

-طلعي برا

-صراع

-ليليان نزلي اتركيني لوحدي و اطلعي برا انه شويه وانزل وراج ..

.. ما حجيت لفيت نفسي و نزلت رجليه من السرير ودا اروح للكنتور .. ما احس الا و يصرخ :- كتلج طلعي برااااااااااا وضرب التيبللام فلشو للكاع ..

..تصنمت بمكاني .. ومتعجبه شبي شنو الزعجو .. اندار يدحكلي وعيونو حمرررر ويخزر ..

فتتحت الكنتور سحبت ثوب لبست بساع وطلعت حتى بلا حجاب .. رحت لغرفة حلا .. بنات هيام و حنين كاعدات ..اخذت حجاب منهم و طلعت

وكفت بالصاله الفوك .. اخذتلي زاويه كعدت واني لسه ممستوعبه هو شبي وليش هيج متوتر وضايج .. بقت تنزل دوعي ع السكت ..

لميت نفسي مسحت دموعي وفتت غسلت .. دحكت لنفسي بالمرايا .. كن فرحتي تلاشت من وجهي .. بس يلا مو مهم .. المهم هو يمي شيريد يسوي خل يسوي ..

مسحت وجهي وابتسمت لنفسي بالمرايا  وكأن دا انطيها دافع للأستمرار ان تكمل .. بس ما كدرت دنكت وحطيت وجهي بأثنين اديه وبجيت ..

ليش ربي مدا تكمل فرحتي .. شنو بي وليش هيج صاير .. يخوف نظراتو مو طبيعيه .. للحظه اتخيلو وحش وبودو يفترس ..

غسلت وجهي مرتين وطلعت نزلت يمهم .. البيت مخبوص ناس تطلع وناس ترجع .. وقت مغربيه و الناس تصلي .. وروجه اطك روجه ..

وگفت بالمطبخ ع الطباخ .. ما على اهتمام  مدري بشنو اگلب وصافنه .. لحد ما صاحت نور .. ليليان احاركت الشعريه دكلبي ..

فزيت .. و بعدتها عن النار وكلتلها كملي  .. طلعت للصاله دحكتو نزل .. فات مني وما دحك بوجهي ..

راح للأستقبال ..اخذت نفس يله يكفيني وجودو بالبيت ..  صعدت للغرفه نظفتها من اللي كسرو وفتحت الشبابيك لأن ريحة الجكاير تكتل ..

بقيت شويه و رديت نزلت .. شافتني هيام :- شبيج شو ما على بعضج

-ما اعرف شبي ما كن طبيعي مدر شصايرلو

-الله عالم اشعاملين بي وهيج صاير .. تحملي المهم رجعلنا سالم

-لا يمه فدوه الو كلشي بس خلي فوك روسنا ..

بقيت الهي نفسي وياهن بس فكري وبالي كلو وياه وشنو صايرلو وهيج متغير ..

حطينا سفر و الناس وو .. شكد الهول جبير بس ما كفى .. سحبنا الجهال كلها حتى حلا و البكدها كالولهن صعدن فوك ..

عمامهم وولد عمهم و نسوانهم وسفره شطووولها ..

تعشو و هو وياهم ادحكلو بس يشيل مرك ويخلي ع التمن ويخوط يخوط مياكل وصافن .. انتبلهو الحجي

:- ابو حرب يابه شو ما كلت

-رفع راسو صفن بوجه ابو .. وهز راسو وكام يفرك بوجهو .. ما رد .. كلها انتبهتلو ان هو ما طبيعي ..

بس مشوها بضحك وما حسسو انو اكو شي ..

شلنا العشا وكعدو وهيام نقلت الحجيه وكعدتها بالهول .. راد هو يكوم يعين امو ما خلا نائل كالو اني اشيل عنك .. جرحك ..

... جرحك .. ليش وين مجروح .. مشفتو .. اتذكرت ابد ما هلاني انزعلو قميصو وحتى من جا يمي ما خلعو .. معقوله يستحي مني ما يشوفني جرحو .

كعدنا الحجيه وهو كعد يمها مدنكلها راسو يستمع ويحجي وياها وكل شويه بايس راسها وبايس ايدها ..

وهو دا يستمع صدت عينو بعيني واني ادحكلهم ما شلت عني من عليهم .. ابتسملي .. اوووه مدري كن ردت الروح بيه ..

التفت على بنت سعد من نوال عمرها سنه تقريبا حليوه جان يكللها :- يمه هاي ياهي بنت من ؟

-رؤى هاي بنت سعد

-من صدك سعد صارت عندو بنيه .. شو حدري بعد عمج .. الطفله هم بضحكه مشتلو تاتي كوه تمشي اول خطواتها ..

صراع:- يمه مو تشبه حرب

-ابتسمت .. اي يمه صح تشبهو الله يرحمو .

.. ادحك بالطفله صدك تشبه حرب اول مره انتبه وكن الكل اول مره ينتبهون بيها شبه من حرب .. كعدها على رجلو يلاعبها ويشمشم بيها ويبوس .. انوب كام يشرب بيها جاي بخاشوكه .. وهي تضحك وتصفك بحظنو ..

لشويه دمرت نفسها .. مشاها .. روحي لماما تغسلج يلا .. وبوسها وكام :- من رخصتكم انه تعبان اروح انام

كالولو لا مرخوص اخذ راحتك يابه .. شفتو يصعد .. اندرت ع الحجيه تخزر  .. عود طلعي وراه .. سويتلها حركه بجتافي بمعنى ما  .. ما اصعد

لهناك وكن خف البيت من الخطار وكمت اشيل بالمنفضات وانضف .. ادحك السعد ما يحط عينو بعيني ابد وابنو محمد كن اختفى

مشيت للمطبخ دحكت هيام واكفه وي نائل وحاطه ايدها على حلكها .. تگربت منهم ..   واسمع لنائل

-مو زين عايش نص الوياه بالسجن ميتين .. سجون داعش ترعب ما تنحمل الله عالم شلون معذبينه وشيتذكر من سجنهم ..

من لحكنا ع الأستجواب وهم ياخذون افادتهم ..  ٧ بالوحده وياه .. ٥ من صحبانو شيعه كصو روسهم يمو و اللي فجرو راسو بالرمي .. والدم على وجوهم .. وهم مأسرينهم بامر من الوالي ويرفع امرهم لابو بكر البغدادي .. لان دحكو جناسيهم من العشاير المعروفه بالانبار رادو بيهم حجه وتفاوض وي العشاير مقابلهم يتمردون ..

مو زين وهسه يكدر يحجي ويانا ويلاشينا .. نفسيتو منهاره وبعد لسه شكد راح يعاني من حالتو ليما يشفى ويتعافى ..

هزت راسها هيام واندارتلي تبجي .. :- يولي ذبحتيني انتي زلمتج مو اجه وذاك فوك ما تصعدين

-ام علي اخاف منو

نائل :- شسوه

-ما كن طبيعي ما اعرف دا احسو وحش اخاف اتقرب منو ..

-تحملي ليليان يحتاج وكفتنا وياه هلفتره لازم ما نحسسو هو تعبان واتصرفي وياه طبيعي .. صعدي هسه وابقي يمو ..

-تمام .. صعدت وافرك ايد بأيد .. مدري ليش گلبي يرجف .. فتحت الباب مطفي الضوا .. فتحت گلوب صفر ..

دحكتو نايم وهادئ .. تقربت على كيفي ومشيت للسرير وتمددت .. حس .. اخذ نفس ومد ايدو وسحبني لحظنو ..  ما حجه ..

.. مد ايدو على بطني يتلمسها :- شگد جان عليج من اجهضتي

-اندرتلو يحجي وهو نايم .. شهر ونص

-فتح عيونو .. دحكلي منعس .. الله يعوضنا ان شاءالله لا تهتمين

-ما يهمني المهم انت رجعت حسك عندي ما ابدلو بالدنيا كلها

.. باس خدي .. تعدلت وانتجيت ع التاج مال التخت وخليت راسو على صدري .. اخذ نفس عالي وحظني كن ارتاح .. بقيت ادلك راسو وكصتو و امسح عليه لحد ما غط بنومو ..

دحكت للغرفه .. دخل الرب اشقد ايغير الأحوال بليله ويوم .. البارحه نايمه هينا وابجي وما اعرف مصيري وين ..

والليله هو بحظتي وكن ملكت الدنيا بغرفة ضواها احمر وكلشي بيها هادئ و نظيف ويستدعي للراحه ..

خلص كابوسهم وخلصت منهم .. رجعت ارتاح وانام وما اهتم الأي شي رغم هو مريض بس مطمنه هو موجود ويشيل عني ما عاد اشيل همومي بنفسي واخاف .

زمن الخوف منهم انتهى .. بستو براسو وهو نايم ودعيت ربي يحفظو طول العمر وما يفرقني عنو

بقى نايم على صدري واني منتجيه وايظي على رلسو لحد ما غفيت .. للفجر حسيتو يگوم للصلاة

احس ظهري تكسر لان ما نايمه عدل .. اندرت تغطيت وكملت نومي ما حسيت عليه بعد ..

الا الصبح .. فتحت عيوني .. الساعه ١٠ ونص .. اندرت وراي .. نايم على بطنو ودافن راسو بالمخده ..

ادحكلو .. خلصان .. جان شعلو  من ينام ضخم .. هسه جسمو خلصان .. طابك ..

تعدلت ردت انزل رجليه من التخت .. طلع كاعد ما نايم بساع كال :- وييين ..

-صباح الخير

-حدري لهين لا تبتعدين عني ..

-يمك .. سحبني الو .. ورفع راسو ..

-زعلانه مني ؟

-لا ليش تكول هيج

-لأن البارحه ما كدرت........ قبل ليحجي قاطعتو وبستو ..

بعدت وجهي حجه :- خليج يمي لا اتركيني والله تعبان ..

-ما اطيق اتركك اساسا .. اني ما صدك على الله ترجعلي من كل عقلك اتركك ؟ يمك والله يمك .. ورجعت حظنتو وبقيت يمو .

عبرت ال١١ وهو بس مخلي راسو على صدري وصافن ما ينطق ولا يحاجيني ..عاد بادرت و كلمتو

:- جوعان ؟

-هز راسو بمعنى لا ..

-كال نائل مجروح وين جرحك ..

-اخذ نفس وكام عني وتعدل  انتجى ع التخت .. وما رد ..

-تريد احظرلك حمام

-هز راسو بمعنى لا ..

.. ليش مينطق وهلكد ساكت .. وكل سؤال ميجاوب وكولشي ميريد ..

فتح التلفزيون .. دارها ع قنوات الأخبار ويگلب قناة قناة ما تعجبو ..

طر الريموت ودار وجهو .. فتحت الموبايل .. وبقيت ادحك بي اتصفح ..

لشويه و كال :- نصي التلفزيون

ادحك للتلفزيون على اخبار و بلا صوت .. كتم

اندرتلو متعجبه .. شنصي ..

شال الريموت وركعني بي :- كتلج نصيييييييييي التلفزيووووووووووون

فزيت من مكاني طفيت التلفزيون كلو .. واحكلو .. يفرك بوجهو ويمسح براسو وركبتو ومختنك ميعرف شيسوي يروح منا ويجي منا شلون الواحد محترك .

اني واكفه متصنمه ادحك بحالتو .. اندارلي بخزره .. ماعت اعضاي جواتي :- ادحكين علي وتكولين وتكولين هذا مجنون مو

- لا ما هيج

-دتشوفيني مخبل ومو صاحي مو

-لا بس اهدئ .

-اهدئ يعني مجنون

-حشاك مو هيج و الرب .

-انتي جاااااي تضحكييييين علياااا دفعني للكاع  حيل  ... نمت ورافعه اديه  .. ما قصدي ادحكلك والله

دنك يريد يخنكني ..  كمت ازحف على مقعدي وراجع لورا .. لا والله ما قصدي اضوجك .. و دموعي كامو يجرون ..

كضبني من زندي وجرني ووكفني حيل احس انخلعت بيدو .. ورافع اديه اخامي لنفسي منو ..

وهو نفسو عالي وخازرني .. دحكني بهالحاله .. بساع ترك ايدي وكعد بالكاع وانتجى ع التخت ويفرك بوجهو .

-صراع

-ما اذيج اني

-اعرف بس لتضوج نفسك

-اطلعي اتركيني لوحدي

-ما اهتم اذيني بس ارتاح الله يخليك .. احجي والدموع تجري

-طلعي ليليان لا تخلين ايذيج واتاذى طلعي مني .. تركيني ..

.. طلعت بسرعه منو ورحت للحمام اشمر مي على وجهي وابجي اشمر وابجي .. اخر شي كعدت ابجي عليه حيل ..

ربي ساعدو دايتأذى وما ديرتاح يا امي العذراء وقفي معانو اترجاج  لا تتركي ..

... رديت وكفت كبال المرايا .. لا لازم اصير قويه واوكف وياه وما اضعف .. احجي وي روحي واكول :- ليليان خليج اقوى من هيج لخاطرو لخاطر يرجع حبيبج صاحي متعافي لحظنج ..

احجي وساعه اضحك واشجع بروحي و ساعه ابجي على حالتو ..  مسحت دموعي ..

نزلت ما دحكت بوجه احد .. بوجهي للمطبخ كلت اسويلو ريوك وعصير بارد يريحو ويريح اعصابو ...

سارحه احظر وافكر بي .. فات الحجي للمطبخ وام سعد واكفه هي ونور يطبخن

:- ليليان كون فتحتي موضوع وي ابو حرب

-اندرتلو .. شحاجي .. مال اكضبو اطلع حركة گلبي بي :- عمو حالتو ما تسمح احجي كلمه ولا حالتي تسمح اتركني بحالي الله يخليك ..

ام سعد :- اجه رجلها وشاخت علينا .. استقري وحطي رجليج بالكاع .. لا تفرحين بعمرج

-اني افرح وانتي موجوده ما بالحيف .. لا تخافين ما فرحانه .. فرحي .  اخذت الصينيه .. والحجي يصيح :- وكحه لا بارك الله بالبطن النگلتچ يلصفيرا .. السانها طلع بطول النعال

.. عفتهم وفتت للغرفه كاعد بنفس مكانو .. اخذت نفس .. وخليت الأكل يمو وفتحت ايدو وكعدت بحظنو

-الله يخليك اكل ويايه شويه

دحك عليه :-  شجاي تكولين عني بداخلج

-دا اكول الحمد لله رجعلي ويا فرحتي الما سايعتها الكون بوجودك

- وخربت فرحتج مو ؟

-لا ابد .. وجودك كافي لو شما تسوي .. تتذكر من تمرضت لما ماتت امي و كلتلك مليت مني مو .. كتلي الزواج مو فندق شوكت ما تسوء الخدمه نضوج ونمشي .. الزواج بيتنا لو شي خرب نصلحو ونعيش بسعاده مو صح ؟

-ابتسم ولمني بحظنو :- دا ترديلي الدين يعني ؟

-لا ماكو دين بين المتزوجين .. بس انت هيج ربيتني واني تربيتك وهيج اتعلمت منك ..

-وجودج جنه بالنسبه اليه ..

-عجل مدام اني جنه تكدر تاكل وياي لان والله جعت .

-هههههه تمام

كام ياكل شويه شويه .. انطيتو العصير وكتلو طيب برتقال فريش.. اشرب .. اخذ  يشرب .. واني اكل وياه ما على مشتهى بس اريدو ياكل ويتقوى ويرجعلي نفس اول

.. يمكن بعمري مة اتخيل نفسي هيج ادبر واتصرف وامتلكو بس جاي اذب كل حيلي في سبيل يرجعي

.. عدحاول ما اغلط ولا غلطه ويتعصب ..

وياه داحس مثل اليلعب بنار وحذر منها بس تغلط تحرگك رغم ما هي دافيه و ضاويه مكانك ..

.. دياكل واندار .. امي هم سألت عليّ ؟

-ما فتت عليها نسيت

-ترك الاكل .. اروح انزل اشوفها يمكن بالها يمي وما تكدر تتحرك .  وانه ما عندي مبايل تخابرني عليه .

ترك ونزل .. لملمت وشلت الصينيه ونزلت ... كعد يم امو ساعه ..  يسولف ويحجي  وصلا يمها ..

انوب طلع بالصاله كعد وي الحجي يحجون سياسه و هو شاركهم .. الحجي يگلو الفضل العشايرنا لو ما الغيره ما تحررت الرمادي ..

صراع :- الا الفضل الاول لأهل الجنوب وابطال الحشد الشعبي الانتفضو يحاربون بدمهم حتى يناصرونا الا لو تبقى ع الدوله بايعتنا ..

بس هم اثبتو ان العراق واحد ما تفرقو الطوائف و لا الديانات من دفعو دمهم ثمن حتى يحررون الرمادي  وكل شبر بالعراق وان شاءالله بغيرتهم وبغيرة عشايرنا وقواتنا الأمنيه الموصل راجعه ..

-يعني راح تتحرر الموصل ؟

-بحيل الله راجعه .. داعش خلصت لعبتهم بالعراق .. هم دخلو للتفرقه ..  من الشيعي ساند اخوه السني وتكاتفو .. خربت اللعبه وحان موعد انسحابهم .  والانتصار قريب ..

... بقى يحجي وياهم بالسياسه وانفتح .. هو بالسياسه يرتاح و بالسياسه يدمر وينهار وما خربتو غير السياسه ..

وهم يحجون جرجروه شويه وحاولو يسألو عن وضعو بالسجن ... وحجاها الحجي :- انتم مسجونين مجموعه لو واحد واحد

:- مجموعه تقريبا ٤٠ واحد بمكان واحد باليوم حصتنا كسرة خبز يابس و كلاص ماي خايس طعمو ما ينحمل ومن حلك الحلك نشرب ..

ايام و شهور و نحن ساكتين اليحجي بينا مجبورين نفتن عليه في سبيل ما ياخذونا للتعذيب..

المحظوظ البينا يزور التعذيب مره بالأسبوع .. اخذ نفس .. كلبجات و سياط وكلاب  ووو .. راد يكمل سكت .. فرك وجهو .

ما انسى ذاك اليوم الحاصرونا بيه ومحد نقذنا ...  عامر صديقي داس لغم وتفجرت اعضائو جدامي .. بس اصبعتو وكعت يم رجلي ..

و اوس كاعد يمي دخن جكاره وما احس الا يتقنص راسو وينضرب وبس حرارة دمو على وجهي و اليذبحك تعوف صاحبك بلا راس وتشرد بروحك ..

يحجي وكام ما يتنفس .. يكضبونا مثل المجرمين الانجاس يكتفونا ويگف عليك واحد نجس يتأمر ويضرب بيك وانت مدنج ما تحجي ولا تنطق ..

يذبح بصحبانك واحد واحد وانت كاعد تنتظر دورك شوكت يذبحونك و ريحة الدم اااه يا ريحة الدم .. ما انساها لو شما اطول الدنيا ..

واخرها يجي يمك ويكلك انت سني من عشيرة كذا تفيدني ويسحلك وانت تتمنى يكتلك وتخلص من ذلتو ..

فوك ال٢٠ سنه خدمة جيش بهالكاع وبايع روحك للوطن تالي يجيك واحد وصخ مهتلف يذلك ومحد يهتملك ..

لا الوطن الدفعت دمك الو ولا الدوله الضحيت لأجلها ولا العشيره ولا اي بشر ..  هاي تالية واحد عندو خدمة ٢٥ سنه جيش ..  محد بحالو ولا احد.يسأل عنو ..

كام يفرك براسو وبوجهو .. تعب حيل وهو يتذكر .. ابد ما ارتاح رغم فتحو موضوع ثاني لان عرفو تنرفز وتعب ..

البيت رغم الخطار كف الظهر بس عيال بيتنا جثيرين .. بيت سعد عائلتين .. وبيت نائل وهيام وبناتها .. و الجهال وووو هوسه ونوال تصيح نووور والحجي يصيح ولك ناااايل و تعال وروح ..

وصراع تعب تعب احسو خلصت طاقتو .. كام يكضب بالفراش يصك على ايدو يكضب بملابسو .. ردت اكوملو اكلو كوم ..

بس سبقني ووكف على حيلو وصاح كاااااااااافي ما تشبعوووووووون گر گر گر حجي حجي حجي كااااااااافي انعل شيب اهلكم ذبحتوووووني

ما اريدلي بشر هينا باالله لو دحكتلي واحد لشردكم والله .. وانفتح بيهم غلط وفشار كلها طشت لغرفها ..

وهو كعد بالهول ويكلهم اني اريدلي حجه اذبحلي واحد .. كاعدلكم هينا لو سمعت صوت من غرفة واحد بيكم لا افرغ ٧ چيلات براسو وانعل اهلو لابو الجابكم عليا

اني ختلت بالمطبخ .. وكلها بالغرف .. حتى هيام خنست يم الحجيه ..

... كلت يا الله سعد طلع .. ارجع والكاه راجعلي وبدل العائله جايبلي اثنين .. فاتحلي ملجئ هيناااااا كواوي.........

ما تكولون هذا تعبان مهجووووم راسو زن ورن ما تشبعون  ..... ويفتر بالهول ويكسر شكو كبالو ويصيح .. وبس صوتو بالبيت

راد يصعد صاح ليلياااااااان فزيت من مكاني ورحت ركض .. وهو يصعد ع الدرج صعدت وراه ..

هستوا صعد وداس الفوك وشاف نور طلعت جهالها من الحمام و الصوندا بيدها وبسكوت كالت دفوووووت انعل ابوكم لابو الجابكم عليا وضربت الصوندا بضهر الطفل ضل يصرخ ويطفر بمكانو من الالم ..

صراع ويريدلو حجه و وكف كاللها تعاي تعاي .. ولج تسبين المرحوم بكبرو وتنيمين الصوندا بظهر الطفل اليوم شيخلصج مني ..

حدري خل انومها بفادج دشوووووف تتحمليها مثلو .. هي فاتت للغرفه وخلت الطفل يصرخ ..

اريد اجر بصراع وهو يصرخ والله اليوم ما ارحمها .. ونائل جوا يغلط علبها و هي ردتو .. ما مجبوره اتحمل جنون اخوك ..

هي كالت هيج وصراع سمعها .. دفر الباب وكالو اليوم اذا ما اطلعتها والله اشردكم من البيت .. اني مجنووون ..

ونائل كضبها كتل ودفرات شلون تكولين على اخوي مجنون .. تركت صراع وفتت اريد اخلص نور من ادين نائل ما اكدر ..

صعد الحجي وام سعد .. وصراع يكلو لا تضربها اتركها بس والله لخليها تحلم بجهالها على جزات تصرفها

شالها نائل و شمرها برا .. ويكلها ما تضلين هينا دقيقه .. وورقة طلاكج وراج توصل ..

وصراع فات للغرفه اذته حيل بكلمة مجنون .. وهي تبجي وتتوسل لا تاخذون جهالي والله غلطت ..

وتبوس بيدي حاجي رجلج لا يطردني والله غلطت خل يضربني بس لا يحرمني من جهالي والله من حركة گلبي

حرت شسوي لا اكدر احاجي صراع ولا اكدر اشوفها هيج تبجي گبالي .. صاح صراع ليلياااان .....يتبع

☆☆☆☆☆

حالة صعبه لاسدنا صراع .. الله يعين ابطالنا شكد عانو وهم يدافعون لهذا البلد .. ومحد بحالهم

☆☆☆☆☆☆