المراهقة والأربعيني الحلقة (86) الأخيرة

المراهقة والأربعيني

الجزء الثاني

الحلقة  (86) الأخيرة

ام وسام :- انه ماخذه اختي وانت خليك بايع لحمك لجل وحده مصلاويه مسمومه الله يهجم هلبيت فوكك وفوك راس مرتك يلظااااالم

كلها گبت ، نائل سحبو من كتفو ، الحجيه صرخت وتكلو :- استغفر ربك يمه ما صارلها اسبوع

و أخلاص گامت تلطم على خدودها شلوون طلگها و اهو يصرخ :- لو عندج ذرة كرامه لا تبقين عندي ، يولي استحقرج وما طايق اشوفج ابيتي ، اخذي اختج ولي من هينا

وهي تصرخ :- لا تفضحني دخيلك ابن عمي

ودنگت على ايدو ، ابتعد عنها ، ويصرخ على ام وسام :- اخذيهااااا من هينااااااااا

و هي تجر بأخلاص ، وهلي گطعت روحها شلون طلگها ، عافهن يتلاطمن و زكح بيا :- طلعي فوك

ع السريه رحت للدرج وهو رد اخذ سيارتو وطلع من البيت ، ام وسام واختها ما قبلو تبقى اخلاص جروها وطلعو وحلا تتوسل بيها

:- خاله والله هسه يهدئ بابا ويرد ، لا تاخذيها

ما ردت ، راحو ..

... الصراحه رغم الهوسه و الضجه والكتله الأكلتها ،بس فرحت ، رجلي رجعلي بس الي بعد ما شاركتني بي غصب ،،

رحت كعدت بغرفتي ، اخذت نفس ، خليت ايدي على بطني و دحگت بأبتسامه  :- يعمري يروحي انت الرب يحفظك و يحفظ ابوك ويخليكم اليه

انت تعرف ابوك ضربها لخاطري ؟ و مو بس هاي ، طلكها وضل بس النا اني وياك ، تخيل اني وياك وهو نعيش  ، شگد حلوين ؟

بس تعال وصير بسلامه ، راح نصير كلش بخير ، متفقين ؟

ما اكدر ادنك ابوس بطني ، هاي بوسه الك بالهوووو...... قاطعني صراع وهو يفوت للغرفه ، انلصمت بعد ما حجيت

جان اعصاب و متنرفز ، وانفاسو عاليه ، وتحس حركتو بأنزعاج ، جا للتخت وكف ، واني گاعده من الجهه الثانيه  ، شمر السويج و الموبايل ع الميز ، طلع المسدس حطو ، كعد يتنافخ

خفت اتقرب ، دنك حط وجهو بنص اديه و اهو كاعد بتعب ، زحفت ع التخت وحظنتو من ظهرو و خليت راسي عليه

حجه و هو مدنك :-انتي اللي خليتي اللمندوزي ع الجاي للخطار ؟

ما رديت ، تحرك ، ع السريع بعدت عنو ، اندار يدحك بوجهي :- انه اشگلت ؟

- اسفه

-هم اسفه ؟ لسه شكد بعد راح تفينين وتعملين المصايب وتردين تكولين اسفه وايريت لو سوالف تسوى ، تراها سوالف زعاطيط ، كبري عاد مو شليتي حالي

- اني ما قصدي اسوي هيج شغلات ، بس ردت افشلها

-الفشله الي من تسوين هيج ابخطاري ابيتي

- هسه انت ليش ضايج ، لأن طلكتها

-بعدي مني رحمه لوالديج ، وخري

بعد مني وكام للكنتور بأنزعاج ، يطلع ملابس

-راح انزل اصبلك غدا

-ما اريد ، كعدي بمكانج ولا تنزلين ابد

-ليش

-مره بحياتج سمعي الكلمه بلا ما تناقشين

كعدت بمكاني بلا ما احجي ، بدل وجا دينام ، فتح الغاط وتمدد وحط ايدو على عينو ، بقيت ادحك بيه ، اخذت ايدو على كيف جريتها

فتحلي حظنو واندار عليه ، ع السريع دخلت بين اديه ، وبقى نايم ما انطى ردة فعل

:- طلگتها و خلصنا منها مو ؟

-لا تتأملين بهالطلاگ جثير

-ليش

-توقعي باجر ويردوها من الصبح

-لا تقبل

فتح عينو :- كتلج لا تتأملين ، ما راح تطلك بأول اسبوع من زواجها ، هلفكره خليها ابالج

-لا ما ترجعها

-انه ارجعها ؟ انه ارجعلي مرا تزعل ، الف انعال اشمر وراها

-هاااااه ، يعني اذا زعلت تشمر الف نعال وراي ؟

-ليش انتي هم حاسبه روحج ع النسوان

-ليش عجل ؟ شبيه ؟!!!

-اكول نامي ولا ادوخيني رحمه لميتينج ، عوفيني

-كول ما راح ارجعها

-اووووووو ول يابه على هلسالفه الما تخلص

جر ايدو من تحت راسي واندار للجهه الثانيه

-كول اي صراع

- ما رد

-كول اي

ماكو جواب

-اي لا تجاوب ، بس اني ابقى احبك

حظنتو من ظهرو وخليت راسي على راسو ، تنهد

:- ول ابويه بس اناملي ساعه بالقرأن تعبان ، ارجع من ضيم الله الكاجن متكاونات ، خليلي ارتاحلي ساعه

-اي هسه اني شگلت

-ول يرادلج گلب ما مدشن

-مو زين دا اكولك احبك

--عمي مشكوره وكثر الله امثالج بس هيدي ونامي ، تعباان

-عوجت حلكي وابتعدت عنو ، واندرت نمت للجه الثانيه ، ما اتأمل تتطلك ، يعني هم ترجع ؟

لا الله ليگولها

اندار عليه ورد اخذني بين اديه :- لا تفكرين ، كافي نامي .

-هي شنيه بالي واني حره ، هم تتحكم بعقلي يفكر لو لا

-عمي فكري براحتج ، بس هيدي

-انت مو كتلي وخري و وهرت ، شو رديت انداريت

-اووووووو ..

كف الغطا وكام :- اكوم انام بغرفة اخلاص اشرفلي

كعدت على حيلي :- هلا هلا هلا ، شنو يابه على ريحتها

رد للفراش اخذني بين اديه حط رجليه بين رجلي وقفلهن وقفل اديه بايد وحده ، و أيد صم بيها حلكي :- دشوف شلون تحجين بعد ، الا اشعل شيب الخلفوج

-ضحكت و هديت بحظنو ، عاد من صدك شويه ونمت ، يمكن نمت گبلو ، مدري الله من احبل يذب عليه نوم فضاعه ، اصير جني هذا القرد الينام ٢٣ ساعه باليوم

حسيت من تحرك و كعد كعدت ويا ، راح للحمام ، واني رحت لغرفة اخلاص ما مقفوله

فتحت كنتورها  ، تارستو ملابس نوم :- شنو هاي يعني متأمله بي لو شنو

رحت لغرفتي ، جبت المقص ، وشككتلها شكو روب نوم وخليتهم بالخانه ما شمرتهم ، الباب مفتوح ، اندرت لكيت صراع بالبرنص و الخاولي على راسو يدحك ومجتف اديه

:- شنو معنى هالتصرف

-ما الهم لزوم ، انت مو متفق وياهم ما تگربها ، عجل المن مبقيتهم ، شنو انتظرها تغريك بيهم مثلا

-كل عقلج تغريني ، يولو بليلة العرس ردت ازوع منها  يكرم اسم الله ، نص دقيقه ما تحملتها

- ول دادا دحك ، هاي شنو

تقرب يدنك وياي تحت التخت ، يمكن اكثر من ٤ كلاصات جاي و ملابس داخليه الها شامرتهم جوا

- ول طلعيهم للزباله ، خرب بيومها على هالوساخه  لعبت نفسي

-هاي جوا مشتغله بنكالي ، وغرفتها متعرف تنظفها

-ول لو تشوفين اختها گبل شتسوين جان زعتي ابنج من بطنج ، دشمريهم رحمه لمحمد

-ملابسها الداخليه شمرتهم بالكنتور ، و الگلاصات زكح بيا اشمرهم بالزبل لان يابس الجاي عليهم ، كتلو :- ما بيهم شي

:- دشمري من زود سعرهن ، ذن تجرثمن

-هي مدمنه شي اسمو جاي ، ٢٤ ساعه قوريها ع النار وتشرب ، عدنا نائل مثلها يروح ويرجع صاح جاي

شمرتهم ، حجه هو :- قفلي الغرفه وطلعي

-طالعه شعندي باقيه ، ع هالوصاخه ، وفوكاها تصيحلي الخايسه لان ما انزل اعاون بالتنظيف ، ع الاقل مرتبه غرفتي ، ما نادره كبال الناس وخيستي طافحه بغرفتي

-كلمن يعبر عنو ابويه انتي ، هاي حقيقتها ، گبال الناس هلله هلله و وراهم جايفة خلق و اخلاق

انتي بس هوسه ، الا اكبر فارغه ، متشوفين اخاف عليج تنزلين ، اخاف بدفعه منهن تكعين ويروح البطنج

-منو يضربني ، لا لميعه و لا اخلاص ، البيت الي

-حلا هينا ، لا تتعرضيلها ،

-و شلون اكعد بس بالغرفه ؟

- شعندج نازله ، انطيني لشوف ، امي و حلا يمها ، ابوي ولميعه هاجين ، و نور بغرفتها وي جهالها ، انتي المن نازله بعد ؟ ستري على روحج و اكعدي

-بس و ياك انزل ؟

-نزلي وياي ومن اصعد صعدي و لا تقربين من حلا

-ماشي

... بدلنا و نزلنا ، كاعده الحجيه و حلا ، بس حلا كأن تحجي بحرگه ويا جدتها ، من ادحك بيه تخزر ، احس الشرار يطلع من عيونها ، شبه بينها وبين صراع فضيع شكد تشبهو

كعد هو وكال :- ايبااااه شنو هالهدوء هذا ، مال استكان جاي يعدل الراس

حجاها وهو يدحكلي ويتوسل بعيونه

-يأمر حبيبي

الحجيه:- شقضيتك يمه انت ، مطلك مره ما صارلها اسبوع من تزوجتها ونازل مترهي و مرتاح ولا يمك ولا بهمك

-عجل شترديني ؟ ادك والطم وانوح على وحده سز مثل اخلاص

-و ليش شسوت انطيني ذنبها الطلكتها بي شنو

-انه كايللكم مصيرها تطلك ان جان اليوم او باجر ، ما تفرق بسبب او لا ..

-انت ليش تصير ظالم ، الصوج صوج ليليان وانت حطيتو براس اخلاص وطلكتها ، اعدل وحاسبهن اثنينهن ، ليش هاي من تغلط تضحك تصيح فدوه و ذيج طالك

-شتتوقعين مني احترمها و اهي الذاله روحها ؟ وبعدين تجيبين ليلياان على اخلاص

- ليليان صايره ما تنطاق  و اتسوي اليحلالها وانت واكفلها وتفزعلها ع الشينه و الزينه ، ما يصير هيج تره

-شسوت ليليان  انطيني ذنبها يمكن الله عامي عيوني وما اشوف

-اول شي غلطت عليها وضربتها بالنعال وانت كتلت اخلاص وما لمتها ، ردت شككت الصور وانت خليتهن براسك و فزعتلها ، وهسه حطت لامندوزي بجاي خطارك ، وتكول شسوت

-وتجيبين افعالها هاي ، على افعالكم  و حيلكم الحقيره عليه ، ليش يمه نسيتي ، من طعنتي بيه وسادتني الحجي و خليتي اليسوه و الما يسوه يجيب طاريي واصير انه الطاردج ؟

شمرتلها لامندوزي بجاي ، ما فاتت علي بنص فاتحه وتريد تفضحني ابيتي و تحط راسي في سبيل اخذها

ما حجت حجايه بنص ديوان و خطبتلي وخلتني حاير ويا روحي بموقف ما عرفت شكول بي ، تقارنين محايلكم بيها ؟

-هسه عرفت من صدك اهي تارسه مخك وما مخليتك تشوف احد ، خاف الله يمه ولا تصير ظالم

- انه ظالم  من زمااااأان ، توج دريتي ؟

ظالم من جنت اكتل لميعه واهججها من البيت لخاطرج ، ظالم وكت اللي جنت اكتل وجدان واشحدتها لخاطرج ، جنت ظالم بس اخو خيتي

اليوم من افزع لوحده مالها احد بالدنيا غيري انه ظالم بس اخو مريتي ، مو هاي قياساتكم ؟

-لا تاخذنا بلسانك وتلوف الحك الك ، انه يا يوم رضيت تكتل لميعه لو وجدان

- لسه ما شفتي شيء من ظلمي يمه ، بس صبركم عليه

-بس بابا خالتي اخلاص مالها شغل بجدو من خطبها بالديوان وهي خطيه حتى لو غلطت ، تحبك ومن يوم التزوجتك تريد رضاك و اانت ما...... قاطعها

-سكتي بويه سكتي ، ادري السالفه لاحتج ، رجلج ان جان بي خير ما يتركج بلا ذنب لجل امو وابنو ابطنج ، وان جان ما بيه خير خل يولي شعندج بواحد ما بي خير

.... حطيتلو الجاي ، اخذ مني وشرب

الحجيه :- انه باجر اروح لبيت عمك ارجعها صراع ، حرام باول اسبوع الها اطلكها

-وحق من انزل القرأن ، لو خطيتي خطوه يا يمه ، ما تلومون الا انفسكم ، تكعدين بمكانج ، وايالج وبالج تفكرين تلعبين من وراي ، تراه ما عندي شي بعد اخسرو ، حرام بالحرم احط عاليها واطيها

... كاعد و متشخص و استكانتو بيدو ، ويهدد من ورا خشمو برهاوه بس بحيل صدر و كأن واثق من تهديدو

اني كاعده يمو ، للحظه حسيت دنيتي غابه و كل الحواليه ذيابه محاوطتني تريد تاكلني و اهو الاسد مالي اللي الضامه روحي تحتو وهو يزئر ويرد عني

.. كمل استكانتو و گام  گال :- يلا انا اروح ، محتاجين شي ؟

-لا حبيبي سلامتك

مشى واني مشيت وراه طلعت باب الهول ، اندار عليه :- كعدي فوك ولا تنزلين ، ومالج شغل بحلا ، ولا تتكاونين وياها لو حجت ، كعدي بغرفتج ، وهاج ، هذا موبايلي كعدي عليه ، الطفل ابطننج لا تتصادمين ويا احد

-تمام

-شكد باقيلو العيد

-خمس ايام يمكن

-ان شاءالله احاول اخذ اجازه ونطلع انا وياج لتركيا مثل ذيج السفره نريح ونرتاح وانه استفرد  استلذ بهالعسل لوحدي

-ههههه بس و الحمل يعني نكدر ؟

- على بالي اخذج دكتوره باجر نجيك امورج وناخذ رأيها واذا ما صارت ، نحول غرفتنا تركيا ونعيد

..وغمزلي

-اهم شيء عندك العيد

يرفع بحواجبو و يغمز و يكولي :- كلا للطائفيه يولو عيدنا واحد

-هههههههه

بستو بخدو ، وهم باسني بكصتي وكال :- يلا فوتي جوا و ديري بالج على نفسج ، بليل اجي

سديت الباب وراه ، ورجعت اخذت لفه وقوطية بيبسي دا اصعد ، واستلمتني حلا غلط وسب ، تجاهلتها وصعدت ما درت وجهي الها ، قفلت الباب و رحت لفراشي التفيت و حطيت السماعات وكعدت اكمل المسلسل واكل

.. دا اطمش بس هلكد.يتصلون عليه ، يبووو كل شويه كاطعين المسلسل عليه ، واخلي الاتصال يكمل و ارد اطمش

جا اتصال مكتوب ( ام السحوره ) صفنت شنو صراع شعندو ويا ام السحوره ؟ معقول يسوي سحوره ، بس هو يخاف الله وما يؤمن بهالسوالف ، بقيت ادحك ، گلت خل ارد

رديت واستمعت ، جا صوت بجي عرفتها من صوتها اخلاص وهي تكلو :- لا تسدو اروحلك فدوه بس اسمعني

... اني سمعتها اخلاص و هو كات عليها هيج ، من صدك الله ذب عليه ضحك ، طكيتها ضحكه بصووت عالي :-هههههههههههههههههههههه هاي انتي هههههههههه ام السحوره ههههههههههههه

-الله لا يوفقج ان شاءالله بعمرج ما تشوفين الفرح ، يابه يا ليليان والله لندمج واهجج بس اصبري عليه ، عبالج انتي تهججيني

-هههههههههه اعلى ما بخيلج اركبي ام السحووووره

- ولج انه لسه ما حطيتج بمخي ، جان كل همي يرضى علي ، بس من اليوم حسبي ايامج ، بدا العد التنازلي

-ولي الجايفه لو بيج خير عوفي سحورتج ونظفي غرفتج لا بس فالحه تصيرين نادره كدامو ، تراه يعرف كل خياستج و الجيف مالج

... سدت الخط بوجهي :- و الله ويطلعلها تحجي الجايفه تهييي يا الله

بقيت اكمل ، بس ما ارتاحيت كد ما اتصلو عليه ، تكول بداله مو موبايل ، رحت وقفت السيمكارت من الاعدادات و ارتاحيت

فقدت ع المسلسل ما حسيت ، دحكت الساعه ١٠ ، كلت خل انزل اشوف شكو ماكو ، حتى راحة صفحتي من النوم و الكعده

نزلت للمطبخ گبل كن حلا ماكو ، سيارة الحجي و نائل :- شنو هاي  ، الحجي راجع ، عجل وينو شو مالو حس

فاتت نور :- هااا ليليان

-وينج

-خاتله بغرفتي انه وجهال حتى مالي نفس اطلع من كثر المشاكل

-شصاير

-جا ابو وسام هو وسام وياه ، يكول مو نحن النمشي بشور نسوان ، اطلكت اخلاص ولا ما اطلگت حلا بنيتنا واحنا مالنا ابيت صالح ولا شيصير ابيت صراع

-حلللل ، وهذا ابو ثرب

-هههه هذا تلكين سعد ما حط كبالو سمجه وموتو جوع ، رد اجا لصراع يراضي

- والحيزبون وياه مو

-عجل مو بالحيف ، هي راس البلا  ، ودحكي هين ، رجعتها هاي لجل مصيبه وشوفي شنو خطه ابالها لهيج جابت الحجي و اجت

-و يطبها مرض

- حطي زلمتج بحظينج وداري مثل الماي بالصينيه ، تراج حيل ضايكهن حبو الج وطلاكو لخاطرج ، شو شراح يسون ، لا تنطيهن مجال ، داري الگمر وعيفي النجوم وراج تخوط

-لا تخافين هو اساساً ما يهتملهم

..... دنحجي انفتح باب الگراج دحكتو صراع ، نور اخذت ماي من الثلاجه وراحت الغرفتها ، هو صف سيارتو و فات

:- ها الله يساعدهم

-هلا عمري

-الحجي جا ؟

- اي جا ، ظتشوف سيارتو

- انه اشوف مصيبه براس لميعه ، دنشوف شعدها هلمره وخايطتو من راسو وجايبتو ، موبايلي وين ؟ هم اتصلو

-وووووو

-كون رديتي

-بس على ام السحوره

ديمشي واني وراه واحجي وكف ودار وجهو و كال :- لييييش تريدين ، انه مو منبه من احط الموبايل عندج لا ترفضين احد ولا تردين ؟

- ما عبالي هي ، عبالي انت متفق ويا وحده تشتغل بالسحوره

-ليليان بربج ، انه ما رايد ارد على احد وعذري ما ادري بالموبايل ، تكومين انتي تردين عليه ، شيكلون عني ، حتى جهازو بأيد مرتو ترد ع اليعجبها

-اني ما تصورتها هيج ، شمدريني بتفكيركم ، وما رديت ولا رفض ،بس اخلاص

-وهاي كافي تشهرني على كل السان

-كولهم ناسي موبايلي بالبيت ما ادري عنو

هز راسو ومشى حجبت وراه :- حلا راحت

وكف واندار :- وين راحت

- جا سلام اخذها يكول نحن ما نمشي بشور نسوان ومالنا شغل لا بصراع ولا بيت صالح

-وهو الافضل ، رحمه طلع براسهم خير

فات لغرفة الحجيه و اني وراه :- ها يمه شلونج

ما تحجي وياه ، نزع الغتره من راسو وتمدد شال ايدها ونام على رجلها وبقى يبوس بأيدها :- شمعة بيتي انتي يمه لا تزعلين بروح ابوج

-عجل اعدل ييمه

-ما اريدها يمه اهي مو غصب ، انه كبل لا اتزوجها كلتلهم لا تتوقعون اعدل ومصيرها لو طلاك لو تنام بصف اختها ، وكل هذا هن رضن وكالن كافي بس اسمها بسد اسمك

-الرحمه حلوه يبني ، وانت ما جاي ترحم

-كافي تدخلون انتي و الحجي بحياتي واليرحم والديكم ، الحجي يحاسبني عليهن ويطلع زعلان ويكعد يم عمامي اشكال الوان يحجي علي وانه طاردو لجل مرتي و انتي تدخلين وتزعلين واطلع انه الغاضبج بسبب نسواني

عيفوني انه احل امري بامر ، ترانه مو زغير ، الشيب ترس راسي ، فكوني ولا تدخلون ، انه اعرف منو اريد ومنو ابعد

-انه كل الردتو الك خلفه

-الخلفه جايتج يمه ابطن هلمصكوعه هاي

-ابخت محمد عليك

-اي والله حامل بس ما ردتها تكول اخاف عليها منهن ، ما تشوفين طار عگلي من سمعت ضاربتها ودافعتها ، هاي فاهيه ما بيها حظ من وكعه تسگط وتروح لهيج اكلها استقري بغرفتج ولا تنزلين

-اي من الاول گلي يا ابني وفرح گلبي ، ولج انتي حامل صدك

ابتسمت الها :- اي رحنا حللنا دم اني وياه وكالولي حامل

-بالخير ان شاءالله ، ولج صعدي تسطحي يمصكوعه لا تضلين رايحه راده ع الدرج ، وانت لا تكربها جثير لا تسگط مو كاضبها فوك و مختلي بيها

فتح عيونو وحلكو و رد عقد حواجبو :- يممممممه ابخت الله شنو القضيه حتى هاي حاطه روحج بيها

-يولو هاي ما تكضب طفل ، داريها ، لازم اخذها باجر لهاي ام رحمن تنطيها حجاب تعلكو بركبتها خاف صدك بيها تابعه وتاذيها

-اخذيها وين ما تريدين بس لا تكولين لاحد يمه خليها بيناتنا

-لا يول المن اكول شبيه انجنيت ، غير يطكنها عين يكومنها بمكانها

.. اني كاعده واطمش عليهم و ابتسم ، عاد گام منها كتلو :- اسويلك عشا ؟

-لا عمري متعشي اخذي راحتج ، راح للأستقبال كاعد نائل و الحجي ، سمعتو يكلو :- هاا حجي الله بالخير ،

دحكت ، دنك باس راسو

و هو يكلو هلا يابه هلا بيك

عفتهم صعدت ، ربع ساعه و فات وراي  ، اني واكفه ، قفل اديه عليه وحط راسو بكبتي من ورا يشم ،

:- شكد مدخن

-لعبت نفسج ؟

-لا اشتهيت ادخن ، عندك جكاره

ابتعد ، اندرتلو عاكد حواجبو :- ها يولو خلصنا من التلعوص اجانا التدخين

-والله هيج اشتهيت

-يول ستري علي لا باجر تشتهيلج بيره وابتلي

-اي وشبيها البيره تره عصير حالو حال الشربت بس انتم مكبرين الموضوع

-اكسر راسج والله ، امشي ولي ادب سز ، تريدلها بيره

-ههههههههه ، لا ما اريد بيره ، اريد جكاره بربك

-مو زين عليج

-يطلع بالجاهل

- نيكوتين مو زين ع الجاهل ، كعدي

.. عافني  راح سبح و رجع  ، اخذ الجهاز مني وكعد ، واني حطيت راسي على رجلو وكعدت اطمش ع التلفزيون ، لهناك طفينه ونمنا

ثاني يوم جان جمعه كعدنا الصبح ريوك كيمر عرب و عسل جايب و فرحان ومرتاح و ام سعد لو بأيدها تشرب من دمنا على نظراتها

وكفنا نشوي سمج للغدا ، كال :- حظريلي جنطه باجر اطلع واجب لديالى فد يومين و ارد

دا نحجي اندكت الباب و انجر انفتح ، فاتت عمهم صالح و اخلاص وياه و امها ، صراع دنك للسمج يگلبو ما عارلهم اهتمام

كتلو :- اجت هاي الما تستحي

- هششش اسكتي

- وشراح تسوي

-فوتي جوا ليليان

اخذت نفس و فتت للمطبخ ، طلع الحجي و گالو :- ابو حرب عمك جوا حدر يابه

.. فاات اخلاص من الباب الثانيه :- شلونج ليليان

اندرت ع السريع دحكت بيها ، ما رديت عفتها و دا امشي جان تكلي :- رجعت حظري نفسج

عفتها ودا اطلع ، طلعت الحجيه ، جان اخلاص توخرني و اطر نفسها ع الحجيه و تحظنها وتبجي وتكلها :- عمه دخيلج و الله انه مالي ذنب يكسر بيه باول اسبوع انطيني ذنبي شسويت

عفتهم و رحت يم الدرج ، لا بيه اطلع و لا بيه ابقى ، گلبي اشتعل نار من شفتها ، اريد اسمع رد صراع شنو

فات صراع للاستقبال وكب الصياح بين صالح و صراع

صراع يكلو :- لو عدكم كرامه ما تردوها اليه

و عمو يكلو :- لو بيك خير ما تذب لحمك وتلفي وحده ما تعرف گرعة ابوها منين

وصراع يردو اشرف من بنتك اللي تنزع بضل الفواتح حالها حال الساقطه

و كبو مكاون ما نعرف منو يصيح ، نائل و الحجي و صالح و فاتو الحجيه و ام سعد وام اخلاص وكلها تكومت بالاستقبال

واني واكفه استمع ، اخر شي عمو ذب كلمه و كال :- يول بنتي لليوم بنيه ما ماخذها ، انت لو رجال تاخذها

وصراع انجن نزل غلط وفشار عليه ويكلو :- نيشانها  انطيتو بيد خالتها  تريدون تعيبوني وتلفوها علي كواوي.....

وكام يصيح ويفشر ، اخرها نائل و الحجيه و نور جرو صراع و الحجي طلع صالح وكالو :- بنتك بامانتي لا تخاف عوفها و روح

وناس تجر و ناس تعر ، ما نعرف منو اليحجي و منو اليصيح ، صراع عافهم وطلع ، وصالح هم اخذ مرتو وطلع

و اخلاص فاتت مني وهي تلعبلي بحواجبها ، و همستلي :- شفتي تره انه اكدر اكلب الدنيا ، بس ساكته بمزاجي ، ولسه الحبل الحبل ع الجرار

دفعتها و صحت :- امشي ولي عاننننننس

صاحت الحجيه :- ليليااان تره ما ناقصينج ، روحي لغرفتج ومعليج

دحكت عليهم بخزره و رحت للغرفه ، كمت افور ، يعني شنو شيردون منو ، ياخذها مره لخ ويتقربلها ، لو اموت هم اخلي ، اني كوه اتناسى ليلة عرسو وتنعاد ، امووت

بقيت متزوهره بالغرفه و الدقيقه تمر سنه واني انتظرو ، لليل و اهو ما راجع

ب ال١ يلا فات للبيت ، سمعتو يصيح فوك ، وضرب باب وصعد ، فات للغرفه هم ضرب الباب وبقى ينزع و يطر بالكاع بعصبيه

-يعني شنو صراع

زكح :- تره ما ناااااقصج ، صمي حلكج واسكتي عني

-اي اي طلع حرگتك بيه ، هو انب شمحصله غير تتكاون وياهم واني الأكع بيها

جا بعصبيه عليه :-ولج انتي تسكتين مني لو شلووووون

رفعت اديه فوك راسي احامي لنفسي ، اندار مني بعصبيه ، اخذ خاولي وطلع للحمام

طلعت فراش ونزلت نمت بالگاع ، بس شنو حراره بداخلي احس نار تفور

فات هو ، ما دحك ولا شاف فراشي ، بدل و هو عصبي يشمر تشمر ، راح للتخت لف راسو وما حجه

بقيت بمكاني ، هم شافت عيني نوم ، للصبح ما عرفت طعم الراحه ، مثل سمجه ومطلعيها من الماي

ما ادري شوكت غفت عيني ، كعدت ب١٢ الظهر ، دحكت الخانه مالتو ، جنطتو ماكو يعني طالع للواجب

نزلت ، لكيت هيام عدنا ، موصيها تاخذها للدكتوره ، يريد يشوف صدك حجيهم لو يلفقون عليه ..

لهناك اخذت اخلاص وطلعن ، واني على نار اريد اشوف صدك ما ماخذها

افتر بالبيت ، طلعت الحجيه  :-امشي اخذج لام رحمن تكطعلج

دحكت بيها ، انا بيا حالك والحجيه وين تفكر :- ما بيه يمه اتركيني بحالي

-لا تهتمين لهل امور اكعدي بغرفتج و ثبتي اللي ابطنج

-بس هذا اللي هامكم ، واني طززززز بألف انعال ما تهتمولي لو شما صار بيه و لو شما حسيت محد بيكم يهتم

-ها يولي رديتي تخبلتي

-بالله كليلي شستفاديتي من زوجتي ، هااا كليلي بس سممتي عيشتي

-ولج اتسطحي ومعليج بهالسوالف

- مو اني هينا حايط مرمر  ولا جن هذا رجلي وانتم جاي تنسقولو لحتى يصل مرتو مره ثانيه

-اهي كلتيها مرتو

-بس اني مرتو ، و لو صارت غيري اني ما اصير

- ولج اعقلي و اصعدي ليليان

- انتو ما خليتو عندي عقل خبلتووووووووني ، الله لا ينطييييكم

عفتهم وصعدت فوك ، اغلي احس نار ومشتعله جواتي ، رحت للحمام استفرغت كل البطني  ، كمت احس روحي عتطلع من جسمي من القهر

لهناك سمعت صوت هيام جوا ، نزلت ع السريع ، كلتلها :- ها

- فعلا ما ماخذها ، لسه الغشاء موجود ، مجرد جرح صاير بليلة العرس

- يعني شنو

-ليليان لا تتخبلين ، دتشوفين ما طايقها وحتى ما متحمل وياها يبقى بمجرد ما شايف دم منسحب منها ، وكو متجرع نفسو ، لا تخسرينو

خلي ياخذها ويصم خلك الوادم و يعوفها

- هههههههههه انتو تريدون تضحكون عليه بهالكلام

-والله ليليان ما نضحك عليج ، هذا اللي لازم يصير و اللي لازم تكعدين وتقنعين نفسج بي وتصبير بس ليله

-لو اموت ، ما اكدر ، انجن ،  يرجع يمها اتخببببل ما اقبل

-هلشي لازم اول و نالي راح ياخذها ، خلي برضاتج لا غصب عنج وتصير سالفه بيناتكم ، تحملي يوم واحد

- ما اتحمل ما اتحمل ، انتو تريدون تخبلوني ، الله ياخذكم الله لا ينطيكممممم

- طلعت اخلاص ، شافتني ابجي ، ضحكت و صعدت

كضبتني هيام و كالت :- صعدي و ستري على نفسج

دفعتها :- ما اريد وخري عني ..

فتت لغرفة الحجيه ، اخذت موبايلها وصعدت لغرفتي ، خابرت صراع ، رد ، اهو كال :- الو

واني انهديت بي :- ما تكربلها ولا تروح يمها اموووت تعرف شنو اموت

-ليليان جوزي عني ، تره روحي واصله لهامتي

-توصل لهامتك ، تطلع ، تموت ، اخلاص ما توصلها فهمتت

-ليليااااااان

-لا ليليان و لا بطيخ كتلك ما تقربها ، و لو كربتها نضره ما ادحك بخلقتك

-بنت القندراااا اني ما ادحكين بخلقتي حقييييرا

- ما حقير الا انت واهلك  متت من حقارتكم اااااالله يااااااخذكم

- دنعل ابوج لابو شيب الخلفج  ولج اصل واعلمج شلون تتجاوزييييين ساقطه

- و الله ما يلفي الساقطه غير الكوا....  ما تشوف ملفي اخلاص لان تناسبك

- ولج انه كوا......  ولج ارجع لا ما *************

- كام يفشر بشكل مقرف ، قفلت الخط بوجهو  ، رجع ع السريع اتصل

رديت زكح بوجهي :- و االله ما انسالجياها ، ارجع واعلمج الكوا.... منو يا ****%$،،*****

قفلو بوجهي ، ضربت الموبايل و كعدت ابجي ، فقدت بلحظه لا اني عرفت شحجي و  لا هو كضب اعصابو ، كمنا نترادم بالحجي اني وياه من حركة گلبي طلعتها كلها بي

ما طلعت من الغرفه ابد ، بس ابجي ، كمت بليل طلعت اغسل وجهي من الدموع احس خدودي مشكت ،

طلعت بوجهي اخلاص :- مشككه ملابس نومي  و تواسين بروحج ، ههه ، حركي نفسج و خلي ابالج ، من يجي ، اول غرفه راح تكون غرفتي اليفوت عليها ، خل احبل ، لا ما طلعتج من هلبيت سحل و على شرط هو اليسحلج مو انه

-لا تفرحين بعمرج ، تره ما

اخذتي الا افضالتي ، بالعافيه عليج ، انتي وياه تتناسبون

دفعتها ومشيت وهي تصيح وراي :- والله لاخبرو واكلو هالكلام وعود من يجي كعدي تمسكني وبرريلو

- ما رديت عليها ، فتت للغرفه ، و خليت راسي بفراشي ابجي ، شسوي من يوم يومي ، لا الي احد اشكيلو ولا احد افرغ  همي يمو ، كلهم احسهم ذيابه وتنهش بيه ، واني ما عندي غير الساني ادافع بيه وافراشي ابجيلو واشكيلو

دك الجهاز ، دحكتو ، صراع ، رديت :- الو

زكح بوجهي :- انه فضالتج ولج تكليلها حكو ما يكدر ياخذج صار شايب كوا امشي حالو ، ول اكضبج ليليااااااان الا احركج حيوووووانه

:- بس اني ما.......

قاطعني وهو يصرخ ويغلط وسد الخط بوجهي ، اخذت نفس :- هي هاي كملت خاف جانت ناقصه ، الحقيره شلون داكتلو على وتر حساس ، ينجن لو يسمع هالكلام

لثاني يوم ما طلعت ولا وريت نفسي لاحد ، كلو بغرفتي ، بس الحجيه تبعثلي اكل ، لو بيد نور لو لفات بيد الجهال ، بس يا روح تشتهي

صبح الصبح اني نايمه الساعه ب١١ ، ما احس الا و واحد يندس راسي قوي ، يندهني ، فززيت مرعوبه

- كومي لشوف ، منو هذا الكوا....

كضبني من اذني

-وخر مني

-ولج انه شايب وما اكدر

جابني بجف على خدي ، وكومني من شعري ويصرخ شلون تجاوزت عليه ، ما نسالياها

ضربني كم جف و هو يرجف ، بودو ياكلني واني ابعد بي ، جر حجابي و خلاه على راسي و كال :- نزلي جدامي بلا حس ، لو سمعت نفسج ، اءبحج

طلعت كدامو ، اني امشي و هو وراي ، طلعني للكراج و وداني ورا البيت ، كعدني بالكرفان مال الادوات الاحتياطيه

:- هينا تكعدين لليل ما اطلعين  و الا احركج ، و بختج باللي ابطنج ما اكدر ائذيج ، الا اخخخخخخ جان شوفتج هالكوا... شيسوي

كعدت ، وقفل الباب عليه وراح ، حرارة خدي من جفو و الجو حار بالكرفان يذبح ، ساونا وكاعده بيها ، واكثر بعد ، حراره تموع الحديد

ظهريه وشمس عاموديه و الادوات يمي كلها حديد تبث حراره وين ما اكعد انجوي ، كام العرك ينزل من جسمي مثل الماي ، ملابسي تبللت كد ما صدك عركت

كمت استفرغ من الحراره و راسي احسو تنسطر وابجي وافكر ، شلون راح اصبر لليل بهالحر و بهالمكان

ساعه و رد فتح الباب ، شافني ابجي و مستفرغه ، اشرلي اطلع ، طلعت وخزرت بوجهو

:- اكرهك الى ابعد ما تتصور

وخرني وسد الباب ، ومشى ، رحت وراه للبيت ، هو راح للاستقبال ، و اني ع السريع صعدت للحمام ، فتت جوا الماي و هلكد الله ذب عليه دموع   من صدك كمت ابجي من كل گلبي

طلعت للغرفه لكيتو مشغل سبلت و الغرفه  بارده ، لاف راسو ونايم ، جريت  فراش و فرشت بالكاع و كعدت

للمغرب صلى و نزل ، شويه ونزلت وراه ، لكيت اخلاص واكفه و تحجي وياه و هو اديه بجيوبو و مدنك راسو يستمع

شافني ، ع السريع طلع اديه من جيوبو ، وكاللها :- يصير خير

و مشى ..

لعب گلبي و حسيت ، قربت ساعة موتي ، كعدت اراقبو وين ما يروح ، و حس اني نظراتي تراقبو كل ما دار عينو دحكني ع السريع و يسوي نفسو ما مهتم ..

بقو يتعللون ، واخلاص انسحبت وصعدت ، بقت عيني عليه و هو عينو ع التلفزيون ، ما منتبه ان القناة افلام كارتون ، مركز واعرف بالو مو وياه التلفزيون

كلهم شويه شويه انسحبو ينامون ، و اني كاعدتلو ، ادار عليه و رغم هو ما يحجي وياي كال :- ما راح تصعدين تنامين

-معليك بيه ما جايني نوم

هز راسو و صعد ، صعدت وراه ، بكل صلافه ، توجه لغرفة اخلاص وفات كدام عيني .. حسيت مثل واحد و حز نحري من الوريد للوريد

فتت للغرفه اريد اتنفس ما اكدر ، تخبلت ،، كمت اروح واجي و افرك بركبتي العبره خنكتني ، احس روحي عتطلع من جسمي

بعمري ما انسى هاللحظه لصراع بعمري

ما اعرف شلون صبح عليه الصبح ، ب ٩  ، نزلت مرعوبه ، هو ماكو و هي نايمه بغرفتها ، عدمتو من حياتي من هاللحظه ، و بعمري ما اسامحو ع اللي سواه بيا

صعدت فوك ، طلعت اخلاص من غرفتها و بيدها سلت هدوم  :- هديت عليها بالغلط  و الصياح :- بواكة الزلم ، حقيرا الله ياخذج ام السحوره

اخلاص :- حيلج حبيبه عني حيلج ، كلو لان تگربلي ليله ، عجل حسبي حسابج من هينا وغادي يومين يمي و يوم يمج

دفعتها وكمت اصيح من كل گلبي و اغلط و هي مشت بكل هدوء للحمام وتكولي :- ما ارد عليج واريح گلبچ و الا اخليج بحرگتچ تموتين واخلص منج

باستني بالهوا ولوحتلي بايدها وسدت الباب ، نجنيت ، نزلت للحجيه ، حرت شحجيت و شعيطت  وصيحت

وهي تكلي :- يولي خافي ربج باللي ابطنج ذبحتي روحج صعدي ، هي كلها يله ليله اليسمعج  يكول مدري شسوه

عفتهم وصعدت لغرفتي ، ما عندي غير دموعي و فراشي اشكيلهم ، و حتى فراشي كمت اشيل واشكك بيه كد ما متت و انجنيت

للظهر سمعت الباب انسحبت ، طلعت من الغرفه ، و بقيت على نار منتظرتو و كاضبه المحجر ، فات هو سلم عليهم و اندار لنائل :- نائل اخذ اخلاص لاهلها

اخلاص :- ليش انه شسويت والله ما سويت شي

-ودي نيشانج لابوج و ابقي يمو و خلي يفرح بيه العار ، انكلعي ولي  ، وديها ناااااائل

حجاها وهو يندار يمشي

رحت للغرفه ع السريع ، بس شنو النار تغلي تغلي بداخلي  فات هو تلكيتو بالاكشر و صررخت :- والك عييييين جاي غرفتي ، اكرهك يا حقيييير حرگت گلبييييي الله ياخذك ااااااالله لاااااينطيك

هو مشى مني بلا ما يرد فتح الكنتور ، واني اصرخ :- ما تسوى عندي ذره استحقرك و ااااااااكرهك

كل هذا و هو واكف ينزع بلا ما يرد ، واني الجي و احجي :- عبالك المراجل بكثرررررة النسواااان ، انت وعدتني ما تكربها من ليلة عرسهااااا ، وين وعدك احجييييييي لا تسكت احجي لا تسفلني

دحك -خلصتي

-انت وعدتني ما تكربها ، بكل صلافه كدامي تروحلهاااااا و ين وعددددددك

جا واخذني  بحظنو وقفلني بين اديه و يكولي :- يكولي بس اهدي

نفرت منو ودفعتو ، تنام يمها بليل وتجي تحظن بياااااااااا ، وخرررر مني ماااا اريد

- والقران غصب عني ، هي بين اديه وانه اتخايلها انتي ما صحيت الا على ريحة العطر ،  ومحمد مجبور شيكولون عني وانه ما ماخذها ، ختولي راحت البيت اهلها

- هو يحجي هيج ويشرحلي شلون جان بحظنها و اني دين ما ضل بعقلي ، تجننت كمت اضرب بيه و اصرخ ، علبة ماكنتوش ع الملحق مال التخت شلتها و ضربتو بيها واني اصرخ ، صدها عنو بيدو وطشت بالغرفه

شلت المخاديد اضرب بيه وهو يصيح :- بس هيدي يول هيدي

شلت الموبايل وضربتو بصدرو  واني اصرخ من كل گلبي اكرهك و خر مني اكرهك  ، صعد نائل و هو يدك ع الباب نور وياه

واني صابني انهيار عصبي ما عرفت اسكت بقيت بس اصرخ ، يريد يهديني ، وكأني بركان ما انلزم ، و هو يحط ايدو على حلكي يريد يسكتني  وان ادفع وانفر بيه و اصرخ :- موتني ولا تخليني بهالحاله جاااااي اموووووت

فاتت الحجيه و هي تصيح :- ولج شجااج يولي

انتبهت الجسمي ، وصرخت :- ولك يمه دحك رجليها كلها دم

هو انتبه و انجن ، واني ما بطلت صريخ ، احس الالم ابطني بس من حركة كلبي ما احس بس الصياح يطلع مني

يريد كضبني يريد بس يجرني و محتقن ويصرخ :- يول راح تسقطين بس هيدي ، بس كل اكضبج

كضبتو حيل وكمت اصرخ بوجع :- ااااااااااااااه

و هو يصرخ عليهم يجيبولي عبايه و حجاب يحطولي ، ما لحكت احس ، وكعت اتخربطت بين اديه وكعت

ما فتحت الا واني بغرفة مستشفى و هو  و امو واكفين  ، دحك كعدت ، دنك باس راسي :- الحمدلله على سلامتج عد الشر و انتي بخير

-طفلي

- فدوه الج ، المهم انتي بخير

- گمت ابجي  واصيح اااااااه بحرگه  ، و هم يحاولون يهدون بيه ، واني اصيح ، لحد ما اجت اكتوره انطتني ابره ، ورجعت هديت و نمت

بقيت كوه احس عليهم شيحجون و شيكولون ،و كأني مبنجه ، حسيت عليهم وهم يطلعوني من المستشفى و يرجعوني للبيت ، الدنيا ليل جان

فتحت عيوني بالبيت ، راد يشيلني ، ما تقبلتو ، كضبت ايد نور وصعدت كوا لغرفتي ، مددتني ، كولشي ما بيه اسوي ،  غير سكوت قاتل من كد التعب و الالم

فات هو ، اني مغمضه عيوني ، تقرب حط ايدو على كصتي ، تنهد ، دنك باس راسي و مشى ، دحكت وراه

طلع محفظتو و الموبايل حطو ع الميز ، واخذ خاولي وراح للحمام ، كفيت الغطا و سندت نفسي تمشيت للميز

اخذت الموبايل ، شاشتو مكسره بس يشتغل ، طلعت رقم خالو و خابرتو  هو كالو الو  و اني بجيت

يريد يعرف شبيه بس اناشغ من البجي كام يسأل بلهفه :- خالو شبيج بس احجي

:- خالو تزوج عليه و سقط طفلي و خسرت كولشي خالو بعد ما اكدر اعيش انقذني فدوه

-تزوج عليج ، شوكت هاي ، و ليش

-بس تعال خالو الله يخليك

- ناويه طلاك خالو ؟

- اي بعد ما اريدو و لا بعمري راح اتحمل اكثر

-باجر اني اجيج الظهر يمج

- ماشي

قفلت الخط و كعدت ابجي ، احس هذه نهايتي ، بعد ما بيه اكمل

فات هو ، مسحت دموعي و اندرت انام ، بدل و اجا يمي :- تأذيتي اعرف و انه جثير اذيتج ، بس والله الدنيا تمشي وياي عكس ، كلما جيت اسعدج ، ائذيج كلما احاول اغير حياتنا للأفضل ، تسوء ما تتحسن

- ما اريد اسمعك

- ابويه انتي بالقران اعشكج ، انتهت و الله ما اكربها

-وعدت وخلفت

- وانه على وعدي ، بس هذا جان مكمل ، انه ما طايق اكربها تعرفين ، يولي تتذكرين وياج شلون جنت من كد ما متولع بيج و متلهف ، ما ضبطت نفسي عليج ، هاي ما اطيق و الله ، ومن ردتها غمضت عيوني وتخايلتج انتي يلا ،

-صراع انت انتهيت من لحظة الفتت بيها گبالي لغرفتها انتهيييييت ، طلعت من گلبي

-ما اطلع ، وما اقبل اطلع ، ما الج غيري و لا الي غيرج ، لا تضوجين ع الطفل والله ما تهمني خلفه ، انه ما رايد غيرج

- اذا تحبني ابتعد ولا تسمعني صوتك

- سكت ، تنهد ، و گام‌ راح نام من الجهه الثانيه ، ساعه و هو متوتر و يتگلب و ما يكدر ينام ..

حسيتو غفى ، دحكت بيه فعلا صراع ، اسمو اسما على مسمى صراع وصنعلي صراع بين عقلي و گلبي

عقلي يكول كافي ، شنو نتحمل اكثر ، ٤ سنوات ما شفنا غير المر و القهر ، خل ننسحب و نعيش ، ما راح نموت من غيرو

و گلبي يكول .. لا خطيه هو مو بيدو ، ديسوي كل اليطلع بيدو وما تضبط وياه ، ما يصير نتركو

عقلي يكول  .. اناني وما يفكر الا برجولته و كرامته و نفسه على احساب مشاعرنه و اوجاعنه

گلبي يكول .. لا مو اناني لو اناني جان ما اهتملنا ، بس هو جاي يتعذب حالو حالنا ، و الحب ما منو غير الاذيه

عقلي يرد لا اناني و كل همو اهلو و ناسو وعمرو ما فكر بينا

وگلبي يجاوب اللي نسوي نحنا انانيه نتركو وهو اللي طلب بس نساندو و دا يتوسل نرضى عنو

وبقيت بين حسباتي ساعه تاخذني حسبه بعقلي وساعه ارد افكر بقلبي و تردني حسبه ثانيه

بس الصحيح هو العقل ، العقل انخلق حتى يفكر و يقرر ، و القلب ما هو الا مضخة دم ، ما لازم ياخذ قراراتي و يمشيني بهواه

اطلع و ابتعد من الانبار كلها و انسى بيوم اني فتت لهين و اجيت ، ٤ سنوات يا ريت امحيهم من حياتي ، واعتبر نفسي يتيمه تهجرت من الموصل و ماتو اهلها

لازم ارجع بعمري ٤ سنوات و اعدم اللحظه اللي شفت بيها صراع و اهلو ، جانت لحظه  قاسيه ، من لحظة الشفتو تالمت ،و لليوم اني اتألم

كافي ..... صار لازم اكول كافي اكف بس ، اني تعبت

اي كافي

..... لثاني يوم هو ماموجود بالدوام ، لميت شكو غراض الي فلوس ذهب ملابس ، كلشي اليه شلتو بجنطة سفر جبيره

لل١ و نص الظهر سمعت صوت خالو جوا ، لبست جبه و حجاب و حذاء و رفعة ايد الجنطه و جريتها و نزلت

الحجيه تخبلت و كفت كدامي :- ولج وين ترحين و تعوفينو ، ليش تحركين كلبو ، يحبج يولي طاردها لاجلج

- ابنج الزوجتي ، خلي الج هو وزوجتو بالعافيه عليج ، خليني اروح

نور :- ليليان لا تخسرين زلمتح يول يحبج و الله اغزي الشيطان واكعدي

-اني هينا انتهيت ، ما اريد اكمل وياريت اذا باقيه بگلوبگم ذرة رحمه ، انطوني ورقة طلاقي و خلوني اعيش

الحجيه :- ولج كعدي ليليان و كولي يا الله لا تتخبلين

ابتعدت منهم و رحت لخالو ، بس شفتو كأن شفت شخص من اهلي ، حظنتو و كمت ابجي من كل گلبي

كال يلا خالو هاي هي ، هي قسمه و ما بلازم ، كلمن ياخذ قسمتو

الحجي :- ابو حنا المرة حرمة ابو حرب يجي وتاخذها من بيتو بشورو ، ما اقبل تطلع من هينا بلا علمو

-ما يحتاج ابو صراع ، اغشع البنت شنو مسوين بيها ، باقيه جلد و عظم ، اتركوها هي تقرر حياتها

- اهي بنيتنه و نحن ما ظلمناها الزواج سنه ، و انه و ابني و كل عمامنا و مرايبنا المتزوج ٢ و ٣ و ٤ .. هءة سنة نبينا و الشرع محلل و تعيش حالها حال العاشو بس هي ما جاي ترضى بنصيبها

-انا احترم دينكم بس هالشي محرم بدينا و صعب ع المسيحيه تقبلو ، قبلت امها من قبل ،  اشنو حصلت ؟

الافضل كلمن يرجع لاهلو و الدينو و بيئتو احسن

انسحب باب الگراج ....

كضبت بأيد خالو حيل ، الحجب طلع الصراع من باب الاستقبال ، صف سيارتو ونزل كالو :- هاي مرتك تريد الطلاك

هو برا يقفل بسيارتو كالو :- اي درب الصد لا رد ، كوللها  يجيها خط طلاكها و فوكو قوندرا

- مو اخلاص ، ليليان

اختفى حسو ، و ع السريع جا فات للأستقبال مستغرب و مو فاهم الوضع ، كام خالو سلم عليه ، واني كاعده مشكله اديه و ادق باضافري من التوتر

صراع :- شنو المشكله ليليان

ما رديت ، رد خالو :- ابو حرب بناتنا ما الها قسمه عندك ، انا اجيت اخذها من هنا

صراع :- هالكلام فارغ ، انا وياها مره و رجال نتكاون و نتزاعل و نرد نتصالح ، كومي ليليان صعدي الغرفتج

-ما الي غرفه ابيتك بعد ، كتلك انت انتهيت من لحظة الفتت كدام عيني لغيري ، افتهمها و اعتقني

-تمام ، فوتي جوا دنحجي

-ما ضل حجي نحجي ، شبعت من الكلام و الحجي و الوعود ، خليني اشوف حياتي

- كومي خالو نروح

- لا ماكو كومي ، مالها طلعه من هالبيت ، هي مالتي ، مرتي حرمتي ، انه بس اللي الي كلمه بيها

-كمت من مكاني و كضبت بايد خالو وهو يحاول يشرحلو انو انتهينا و صراع مو راضي يفهم

صار شي ما متوقع ، سحبني من ايدي الثانيه و جرني لحظنو و باسني براسي و كال :- فدوه لا تكبريها ، شتردين انه خادم ، بس اكعدي

-ما اريد منك كلشي عوفني

ابتعدت منو

وكف بيني و بين خالو :- طلعه الج من هين ماكو ، لا تفكرين ، انسي ماكو روحه ، مكانج هينا ، هذا بيتج ، اكو وحده تعوف بيتها

-البيت اجت راعيتو ، تناسبك وتناسبكم  ، بعمري اني ما ناسبتكم ، عوفني اروح الله يخليك

سحبتني الحجيه ، و نور وياها يجرون بيه ، واني احاول اجر بنفسي و ابجي ، رجعوني للهول،  صراع اباب الاستقبال ، حصروني

عفتهم و ع السريع مشيت للمطبخ و اني اصيح :- دخيل الله عوفوني ، اريد اعيييش عوفوني

كضب ايدي يجر ، ما قبلت ، دخلنا المطبخ  وهو يكولي :- شتريدين انه حاظر ، بس ليليان كعدي ، لا تفكرين بعمرج اني اعوفج

- كافي ابوس ايدك صراع كافي و الله تأذيت ، من يوم التزوجتك و لليوم ، تهتمتوني و ضربتوني و بوكتوني و طعنتو بيه و اشكال الوان العذاب شوفتوني ، عوفني ارتاح منكم الله يخليك

-اشتريلج بيت وين ما يعجبج ، باي مكان يعجبج

-ما اريد ولا اريد ، عمري ما طمعت بيك ، ولا ردت بيك غايه ، كلهم ذول كاعدين ابيتك لاجل فلوسك ، بس اريد افلوسك ، اني ردتك الك .. انت انت انت ، بس بعمرك ما صرت الي

اهلك و ناسك مستحيل يتنازلون بيك اليه ، خليك الهم و اني اللي اسحب نفسي منكم

-تعرفين بيه شكد اعشگچ ، بس اهدي وخلينا نحجي بهدوء لا تبجين

- ما اريد اهدئ  ، اني اريد اعيش

- انه كولشي تريدين اسويلج والله

- ما اريدك ، لا تعتقد بس انت ظالمني و اللوم بس بيك ، اني هم بيه صوج ، نحن بعمرنا ما صرنا البعض ،

لا ديني مثل دينك و لا عمري مثل عمرك و لا بيئتي مثل بيئتك ، تناسيت ديني لاجلك و مشيت بشورك بس لاني احبك و ما  رهمت ، نسيت عاداتنا و بيشيت بعاداتكم لخاطرك ، بس بعمري لا فهمتني و لا فهمتك

عقلي و عقلك ما توافقو ، ما الومك ، بس والله ما افهم عليكم و على عقلياتكم ، كافي اريد اعيش بدون ما اخاف ، تعبت اخاف ، كافي عوفني

... بقى يحاول يجرني يصعدني بلكت يعقلني و ارضى و اني اجر اريد اطلع وما اقبل ، كام يصرخ على اهلو ان يتركونا ، يريد بس يحتويني بين اديه لعل اهدى

بس اني جنت اجر بنفسي وما اقبل ..

فات  الحجي و كضبني و كالو :- خلها تروح و هي تقرر ، اتركها

طلعني للكراج ، و صراع كام يشيل و يكسر و يغلط و ما تعرف شنو يصيح ما سمعت الفهمتو غير ( هجمتو بيتي الله لا يوفقكم )

اخذني خالو واني دموعي تجري ، صعدني بالسياره ، دموعي مثل المطر ، طلع خالو يسلم عليهم ، طلع صراع ، طلع من محفظتو ٣ورقات انطاها بيد خالو وكالو

:- خليها تروح وياك ، تهدالها كم يوم ونشوف بعدها نصلح الامور

خالو سلم عليه ، وهو ما شال عينو عني ، صعد خالو بالسياره ، شلت عيوني بعيونا ، جانو حمممممر  كلهم غضب و الم و العين تلمع و هو يدحك بيا

حرك السياره و مشينا و اني ادحكلو بمرايا الجانبيه ما شال عينو من ورانا لحد ما طلعنا الفرع و اختفى من عيني

من يومها ما رجعت ،،،

شهور مرت ، حاول يصالحني بكل صوره ما قنعت ، لا راضي يطلك و لا اني راضيه ارجع ، عجز شنو يسوي حتى نرجع ، رفضت

لأن اخلاص لليوم على ذمتو ، ٤ مرات يطردها و يريد يطلك ، يصبح الصبح راده للبيت و تبجي و تتوسل ما يطلكها

لليوم هو اسير اهلو و عاداتو وتقاليدو وما طلع عنها ، و اني ما اكدر ، مو انانيه ، بس يا اني يا هم ماكو خيار ثالث

و اعرفو ما يكدر يترك امو ، هي الشيء الوحيد اللي معلكو هناك ، ما يكدر يعوفها و محد الها ، ويجي ،

رفضت كل بيت ، ما اكدر ارجع واخلاص على ذمتو ، واكعد ابيت و ارد احترك كل يوم ، ها راح  وها حجت وياه واعيش بويلات الغيرة القاتله

حاولت ارفع دعوة طلاق ، ما قبل ، وكال رفعي و شتريدين سوي ، مرجعج الحظني وين ترحين ، و لليوم مركبنا واكف ، لا هو يتنازل و يطلك  ولا اني اتنازل و ارجعلو

كل جمعه هو يمنا باربيل ، يحاول يقنعني ، بس حتى ارفض اطلعلو ولا حتى اشوفو

ما مل يراسل و يبعث اشعار حب و اشتياق ، وما رديت  تلوعت بغرامو هواي و گلبي انكوى من نارو و عذابو

لسه يبعثلي مصرفي كامل و ما مخلي قصره عليه ، رغم اني ارفض اي شي منو ، بس هو يكولي ما بكيفج ما اقبل احد.يصرف عليج غيري

واني بالفعل ما محتاجه بيت ابويه اللي بالموصل اجرتو و اخذت ايجارو وعشت عند خالو ، هم وحدهم وبس اني الهم ، صح انغث مرات ، بس اهون من نار الانبار بألف مره

قررت ارجع لدراستي ، بس اخاف اخطي الخطوه ، لان احسو مثل الاسد الهادئ ، ما اريد اهيجو لان اعرف نفسي مو كدو

وحتى خالو لما ردت اطلك كال اني ما اتقارش بصراع ، رجل عشيره و قانون ما ينجرع ، يبهذلنا لو تلاعبنا وياه

و باقيه منتظره صك افراجي لليوم ، يمتى يطلك ، و هو ما بطل يتوسل و لليوم ، ارجعي ارجعي ارجعي

بس خلص ما ارجع بعد ، لازم يعرف ان اني انسان و وهذا الانسان تعب يسامح و يصفح ويقلب صفحات ،

صار  الوكت اللي لازم اقلب صفحتهم و اعيش .........النهايه

☆☆☆☆☆☆☆

الى هنا و تنتهي رواية المراهقة و الاربعيني ..

عمر العنف ، ما كان سبب اصلاح وانما هو سبب بدمار العلاقات و تهديمها ، فارق العمر مو شيء هين و العلاقه بهكذا امر صعبة التوافق ،  ١٠ اشهر مرت على هذه الروايه ، اتمنى استمتعتوا بيها واخذتوا العبره منها و ادعو لبطلة القصه بالتوفيق ، ادعولها من كل قلبكم الله يكتبلها اللي بيه الخير ، ويبعد عنها كل انسان شر يحاول يأذيها ، ادعولها بكل التوفيق الها ، من جد هي انسانه محبوبه تستحق الدعاء ...

تحليل الغلاف

صورة البنت اللي حاطه اديها على وجهه تبين مدى الألم والتعب اللي تعاني منه ،

القيود اللي بأيدها ، وهي قيود واقعها

الوردة المقلوبه بيد رجل ، وهي الحياة السعيده اللي وعدها صراع الليليان وما تحققت وبقى محاول يعطي حياة سعيده ، لكن يبقى الواقع مر ، وتبقى الورده مقلوبه بواقع معاكس

الصليب بلون باهت ، وهي ديانتها اللي انعدمت واللي البطله ما تنازلت عنها وبقت بقلب مسيحي مخلص ليسوع رغم الظروف

بخيال صوره وجود لعائله وطفل ، وهذه احلامها اللي ما تحققت بعائله سعيده و انجاب طفل ، و بقت الاحلام مجرد احلام ما تتحقق

أسم المراهقه بلون وردي يدل على نقاء و براءة المراهقه ، و الكتابه بشكل متكسر وغير مضبود ، وهذه دلاله على طيشها وفطرتها .

(و ) الكبيره ، وهي تختصر كل المشاكل ما بين تلك المراهقه و ذاك الاربعيني بلون اصفر يدل على مرارة وسموم هذه الحياة اللي بينهم

الاربعيني بلون ابيض يدل على ركازه وعقل ناضج بخط متعجرف وهي انانية البطل بأمتلاكه لكل شيء دون خسران

و كالعادة اعراف العاني تبدع بتصميم غلاف الرواية ، شكر خاص مني الها❤

اول عنوانه كتبته لهذه الروايه قبل لا ابدأ بكتابتها ، كان هل بأمكان الحب ان يتعدى الفروقات ، ام يبقى الفارق مفارق ؟

جوابي بنهاية الرواية هو :- الحب وحده مو كفايه ، التفاهم هو اساس العلاقات وليس الحب ، وسيبقى الفارق بفارق👎

اطيب تحيه تقبلوها مني انا زينب ماجد💕

☆☆☆☆☆☆