المراهقة والأربعيني الحلقة (69)

المراهقة والأربعيني

الجزء الثاني

الحلقة  (69)

اني سمعتو كال الهم هلا بيكم . لو شطت للسما .. متت .. متحملت صعدت فوك .. ارجف ارجف .. احس اريد انفجر

اني ما عونت اخلص من شكولهم يردون اليه ويكابلوني .. لو اموت .. كعده هينا ما اكعد ...

رد صعد هو ..

اندرتلو دحك هين .. ساعه ميكعدون هين .. يا اني يا هم

-ليليان كفي عني تره بالله وضلت وياي لهين

-وصلت ما وصلت هذا حجي يفيدك .. ابوك على عيني وراسي .. مرت ابوك ما الها مكان ابيتي .. هسه تنزل تطردها

-شطرد يولي ما تشوفين بعينج صرت مثل بلاع الموس لا اكدر احجي ولا اكدر اسكت .. لا تزيديها علي رحمه لوالديج .. تره متت

-عمري ما اخلص من مرت ابوك .. ما اتحملها افهم .. كوم اطردها .. يلا

.. تركني ولف راسو ونام ..

-مو احجي وياك .. انت شنو ما مهتملي . والله ما ابقالك ..

-استغفرك اللهي واتوب اليك .. يبنت الناس كصي الشر واكعدي

-شو ما اكعد ودشوف شسوي . كمت الم بملابسي .. وهو داير وجهو نايم .. واني اشيل واحط بالجنطه .

شال راسو دحك ":- هاي شدا تسوين

-هسه تاخذني من هينا

-يول هدي ساعه عبرت ال١ من كل عقلج انتي ..

-كتلك ما اكعد ولا راح اكعد يا اني يا مرت ابوك بالبيت

-ولج يولو وانه شبيدي ما تشوفين تركتلهم بيت بكبرا و ردو علي ردود .. كعدي واستهدي برحمن لا تتخبلي علي بتوالي الليل

-ما افتهممممم تطردها يعني تطردها والا اني انزل اطردها والله

- من اطرديها معناها اطردين ابوي ولو فكيتي حلكج ويا ابوي ينكص السانج

-شفت من هسه اكص السانج عجل لو عاشو ويايه شتسوي ما اكعد اخذني يلا

-ولج شلون اطردها .. من اطردها معناها انه اطرد ابوي مو لميعه .. من اخذتج وياي لبيتهم وابوي ما استقبلج مو زعلت وردت اكوم وكتلو هلاهانه الي مو الحرمتي ..

كضبني .. سانديني وشيلي عني .. لا انتي و الزمن ضدي ليلياان ..

-وخر مني لا اريدك ولا اريد اهلك كارهتكم كلكم وما اعرف شلون اخلص منكم ..

طريت الجنطه بنتر . اخذت فراشي .. كضبني :- هاي وين

-ابتعد مني

-مو احاجيج يولي .. اكفيييي

-لا اني مرتك ولا اعرفك .. ويا ويلك لو تقربت مني وحجيت .. يا اني يا هم بالبيت

-ولج لا تتخبلين ردي لفراشج ليليان

-سحبت ايدي وطلعت .. فرشت بالغرفه الثانيه وكعدت .. هلكد بجيت ما عولت اخلص رجعو ردو وراي ..

وين اروح وين انطي وجهي ما اتحمل ادحك بوجهم يوم واحد .. لصبح اني ما نايمه .. سمعت صوت الباب مال غرفتي انفتح .. وفات للحمام توضى يمكن ..ورجع للغرفه .

لهناك و فات للغرفه اللي اني بيها . غمضت عيوني كاني نايمه ..

تقرب .. فتح البطانيه وحشك روحو بفراشي وتمدد وراي وعاكس ايدو .. اعرف ما نايمه .. ولا انه نايم بالقران

كافي تزعلين علي شبيدي .. رجعو غصب عني وهم اهلي اروح اطرد ابوي .. حتى الله ما يقبلها باجر عكبه تندار الدنيا وانه وياج يطردنا بزرنا يصير ؟

.. باسني جوا اذني وحط راسو على راسي .. بعدتو وكعدت .. اطلع مني

-ولج خلصتي عمرج وياي تزعل ما كافي .. اصالحج منا تنبصيلي منا البارحه تصالحنه واليوم نرد نزعل فكينا .

-هاااه و اليكول الذنب ذنبي و انت الفقير .. صراع كوم من يمي الله يخليك

-و التالي ؟

-تتركني

-اخذ نفس .. براحتج

-بقيت بالغرفه .. بجيت لحد ما نمت .. نزلت الصبح .. والحجي يكلو لصراع بس هدماتنا نجيبها اريد منك غرفه .. وهو يكلو ان شاءالله يابه تأمر ..

رديت لغرفتي يربي ما طايقتهم .. بقيت بالغرفه لا اطلع ولا ارجع ..  الظهر .. نزلت للبيت .. الحجي متمدد بالهول وبيدو الريموت و ام سعد تحجي وياه من المطبخ ..

فتت . لكيتها فاتحه المجمده والجدر ع الطباخ وتحجي تضحك ويا ..

تقربت بسرعه .. وطبگت الباب مال المجمد .. :- مطبخي انتي ما الج شغل بيه فهمتي .. ما عفتي بيتنا الخليناه لأبنج وجيتي لحكتيني على بيتي

ام سعد :- شلون تحجين وياي هيج انتي ما تستحين انه اطلع بكد جدتج

-ما اتشرف بجده مثلج يلا وخري من مطبخي ..

-هو هذا الفگري الما شايف وشاف . عافتني وطلعت . صحت :- عفت الخير الج يا ام الخير ..

وراحت يم الحجي تسولفلو وبقت تبجي وتكلو كوم عليش كاعدين هينا مهيونين .. والحجي تخبل ..

خابر على صراع ويكلها كومي ما نضل هينا .. هسه يجي ابو حرب يرجعنا هناك .. بس يا وسفه تجي الغريبه وتحكمنا وتطردنا ..

-عمو اني ما طاردتك .. البيت بيت ابنك .. بس حرمتك اني ما اكدر ابقى وياها .. رجعها عد ولدها وانت ابقى هينا ويانه ..

-تالي عمرنا انتي تحكمينا وتفكرين تستقبلينا لو لا . والله ما بالحيف

-اني شمتحكمه دا اكولك اني مرتك ما احبها ..

فات صراع من برا .. :- هاي شديصير يابه شكو ابخت محمد

-هاي تاليها حرمتك تطردنا .. دقيقه ما انضل هينا

-جذب والله ما طردتهم......... قاطعني

صراع :- اليجذب منو يول .. راسج اكسر هيناااا حيوانه

-دا اكولك اني ما طاردتو والله ما طاردتو .. بس حرمتو اني ما اريدهم

الحجي :- يابه الضاهر الحجي صاير الليليان وانه ما مرحب بيا هينا .. اودعناك

-اكعد يابه رحمه المحمد ... ارد افتهم انه شوكت اخلص من المشاكل مااااااااا كااااافي ... اشرد وترد المشاكل فوك راسي

-يعني نحن مشاكل يصراع.. هاهيه مشكور يابه

بقى صراع يصيح وزكح بيا .. صعدت اركض فوك .. وام سعد تبجي وتكلو والله ما حجيت وياها شي بس ردت اسوي اكل للحجي حتى غدا محد سوا ..  وهي تكلي ما تفوتين مطبخي ...

والحجي يشكي وهي تكبس و الحجيه اجت صفت وياهم وصراع يصيح ويزكح .. تالي اني اللي طلعت بالوجه الاسود

وصعد عصبي .. فات يصيح ويغلط وجننتيتي وذبحتيني وغبيه و خليتيني بموقف محرج جدام اهلي . عقلي اتادبي استهيدي    ولج مليت ولج طكت روحي ..

تصايحت وياه :- مرت ابوك ما اريدها ولا احبها زور لو كوا

-وعساج لا رديتهم .. انه ما كايلج حبي احد .. يول احترمي فكري انه شنو موقفي بينهم .. ولكم شلون احط جيله براسي واخلص من المشاكل .

وين اهج و وين اروح منكم .. لو سمعت صوتج يا ليلياااااان بالحرام ما تلومين الا نفسج ..

-تركني وطلع .. وسمعتو هف باب الغرفه بقوه .. بقيت بالغرفه ابجي على حظي وين ما احطها ما ترهم ولا مكتوبلي الفرح و الراحه

اجت وفوك ما تسرسرح ابمطبخي الحق الها وتتمسكن وهاي ليمتى اني اصبر ما اعرف ...

ساعه اكره صراع واكول ما اتحملو . اتركو وامشي ومرات اكول هو شذنبو هو هم مثلي وانحط امام الامر الواقع ..

.. يومين مرينا ونحن ما نتحاجه هو بغرفه واني بغرفه .. بليل يفوت يتفقد اذا مكشفه لو كاعده .. يغطيني ويبوس راسي ويطلع بلا ما يحجي

بس بالنهار شايل وجهو مو بس عليه .. ع البيت كلو ... حتى ما كام يلفي ع البيت .. يطلع الصبح يرجع الظهر يتغدا ينام ويرد يطلع يرجع بليل يلف راسو وينام . ..

وهلوضع كلش كرهتو . ما عدت اطيقو . اتذكر اول ما صرنا وحدنا شلون عشنا مرتاحين وهو نفسيتو مرتاحه ووين ما نكعد نتمدد انام براحتنا ..

.. هسه هو بغرفه واني بغرفه وما نطيق بعض من المشاكل .. الليل كلو ما انام اتكلب واحس صرت مثل سمجه مزوهره ما اعرف شسوي وشتصرف

احتوي رجلي لو اتركو

... اجت ام يوسف تساعدني بالبيت ولكت الحجي ومرتو .. كالتي شكو شعدهم ؟

-اهلو ورجعو يعيشون ويانا

-يبووو .. وابو حرب شنو كلامو بهسالفه ؟

-يمعوده متكاونين ..

-ليش

-سولفتلها السالفه ..

-انتي مخبله .. ولج احوي رجلج ولا تضيعي شبيج

-شحوي وهو رجع اهلو وياي واني ما عولت خلصت

- واهو شذنبه

-ذنبو اهلو

-لا ولج خطيه المفروض هسه انتي تساندي . لا تصيرين ضده . تدرين هسه هم فرحانين لان يبعدونج عنه .. ليش تخلينهم يفرحون خو لفي رجلج واكسبي وخليهم يموتون من الحركه لان يدللج ..

-واهلو ؟

-ليليان بنيتي ان جنتي راضيه لو ما راضيه هم اهله ورجعو وبس تحجين الصوج بيج .. فليش تخسرين وهم الربحانين ؟

... صفنت .. ما اعرف بس اشوف كلامها صح ان رضيت او قبلت ما عندي غير حل .. بس شلون يعني هاهيه اقبل بوجودهم .

لو اموت .. ما اكدر ما اتحمل .

خلصنا الشغل وراحت وسويت عشا وصعدت ما اكلت

سبحت ولبست تراك شتوي و ولبست كبوس وجواريب وكعدت بالصاله الفوك ادحك ع التلفزيون ..

شويه وصعد .. دحكتو مشى للغرفه اللي انام بيها.. بس لفت انتباهو صوت التلفزيون .. اندار وهو يفتح الباب .. دحكني كاعده ..

تقرب وجا يمي .. حط كدامي علاكة حلويات ..

- ها الله يساعدج ؟ ..

-دحكتلو .. هلا .. ورديت اطمش ..

تقرب .. بردانه

-لا

جر ايدي .. وضمها بين اديه وعصرها .. وشالها باسها ..

-لا تزعلين والله ما اخلي احد بيهم يندك بيج .. وكلشي بكيفج . تشتغلين تنامين تكعدين محد الو حك يحاسبج .. البيت بيتج مو بيت احد غيرج.

بس لا اطولين السانج وياهم لان مرجعها عليه وانه وانتي الخسرانين ..

سحبت ايدي من ايدو و گمت

-وين

-نعسانه اريد انام

-گبل لا تنامين عمريلي النرگيله .. وهاج اخذي هذه العلاگه بيها فحم و معسل وحلويات الج جبت

.. اخذتها من ايدو وهو يدحك بعيوني .. نزلت عمرتلو واني افتح بالحلويات واكل .. نزلت حلا ..

:-. هذه حلويات اذا مشتهيه اكلي

-اي والله بوكتها نزلت اشوف شي اكلو .. ..

استنگت من العلاكه كم حاجه تعجبها وصعدت .. كملت الاركيله .. وسويت عصير برتقال الي بالخلاط .. سمعت صوت الحجي بالاستقبال كاعد ... ع البلازمه ..

سويتلو كلاص جبير بلا شكر .. و رحت اخذتو الو .. الحجي صدك عندو حقاره بس هم عندو طيبه گلب بس يسمع لحجي النسوان وخاصه ام سعد .. كلت اصالحو احسن ما يبقى يسويلي مشاكل .. ويحقر وياي .. لان اذا حاقد عليه يسمع الحجي ام سعد واذا ما عندو شي مرات يكلها تركيها جاهله ..

فتت .. هو دحك بيا :- ها شعندج

-سويتلك شربت برتقال طبيعي بلا شكر .. خليتو كبالو

-مشكوره ..

-عمو ما قصدي اطردك هذا بيتك بس يعني تعرف واني وو .. ما عرفت اصفط جمله على جمله اخجل من الاعتذار ف بساع جبتها من الاخير .. ااا اعذرني

-ما صار شي انتي بنيتي وانه ابوج ..

-هزيت راسي .. حسيت خلص الكلام .. عفتو ودرت وجهي .. لكيت صراع واكف وكاضب يدة الباب ويدحك عليا ومبتسم ..

.. انحرجت اكثر .. عفتو وفتت منو وطلعت .. وهو يكول :- اموت على گلبك الطيب ..

رحت كملتلو الاركيله .. ردت اصعدها ..

-عنج لا تحتركين انه اصعدها ..

-تركتها اخذت كلاصي وصعدت الحلويات

-حدري اكعدي يمي

-لا اريد انام

-عفتو وفتت للغرفه ... بقيت شوي وطفيت كاعد اغفي .. اجه هو .. حشك حالو .. وحظني وضرب عكس وانتجى ..

-شلونها الحلوه اليوم

-اريد انام

-مشتاكلج

-صراع بس شويه .. ردت اجر البطانيه لفوك راسي اتغطى ..

-ليليان مو سالفه هاي .. صارلج ايام سافلتني .. شذنبي

-مرديت

.. رد حظن .. نفرت .. :- كلتلك اريد انام .. وخر

-كافي زودتيها يولي انه رجلج حرام عليح

-اي اني حرام عليه كلشي وانتم كلشي عليكم حلال

-حدري لهين دشوف . شنو اللي حرام عليج هاا .. شنو المقصرو انه وياج

كلتي ضايجه ومطلعتج ؟ كلتي اريد مصرف وما انطيت .. احتاجيتي شي وما جبتو .. كلتي تقسي وياي .. كتلج امشي عدل وانعلت اهلو اليمسج ..

كلتي ظالمني وي اهلك وطلعتج والصار مو بيدي .. يولي حتى بواجباتي ما جاي الح عليج .. لا الح بغسل هدوم ولا بتحظيرة اكل ولا اجبرج على شي .. وحتى جبتلج وحده تساعدج في سبيل ما اتعبين وتكولين البيت جبير ويتعبج ..

انه شمحصل منج فهميني .. يول مقابل كل هاذ ما ردت غير حقي الشرعي وانتي ساعه ووكت تتمنعين والبجداوه يلا تجين وياي

حرام عليج خافي ربج بيا ..

-وانت ما هامك من الدنيا غير هذا .. اصلا تسايسني مو حبا بس حتى تحصل ثمرتك بليل .. وغايتك لنفسك مو اليه

-وليش يابه الله خالقج وما خلق غيرج.. يول ليش من اعتني بيج تكليلي رايد غايتك .. ليش ما تكولين اشتاقلج .. احن لحظنج .. تره لو ردت خيرات النسوان بره .. بس انه تارك كلشي وجاي الج .. حلال ويحلالي بي ..

كافي حسي على دمج .. انه المن متزوج عجل .. ادحك لطولج ترحين وتردين كبالي و هاهيه ..

-اليسمعك يكول اني هاجرتك .. شبيك .. مل الكلتو نعسانه نعسااااانه .

- ول يابه نعسانه شنو گبل شويه كعدتي ..

-هسه شرايد

-ليليان شوكت تفهمين ذبحتيني .. انه الي حك يمج راعيني .. صارلج ايام زعلانه كلت تهدى وبراحتها بس كافي .. طلعتيها من ماعونها ..

-ما الي مزاج ..

- وانه على مزاجج

- اي ونعسانه كتلك اريد انام .. روح

-تره التنام وما ترضي زوجها الله وملائكته يلعنوها .

-لا صدك والله .. هههههه استغفرك ربي .. ليش الرب ما عندو شغل غير ان يدحك بيه رضيتك بليل لو لا .. والله عليك اسوالف

-ما جايب هلكلام من جيبي .. هذا كلام الرسول عليه الصلاة و السلام ..

- ها اها .. واني ما من دينك لا تكعد اطبك شرائع دينك براسي .. اني ما فد يوم فرضت عليك المسيحيه ... .. خلك بدينك .. واتركني بديني ..

-اها هسه صارت دينك وديني .. عجل سمعي اخر جلمتين من ديني واكوم بعدها وما اطول وياج.. ديني يكول ( وانكحوا ما طاب لكم من النساء مثنى وثلاث ورباع )

لان يعرف بعض نسوان طايحة حظ وما ينفع وياها الا تثني ..

گام و طر المخده عليه .. وطلع وهو يردد :- دنعل هلعيشه الجايفه لابو الجابج عليه ..

... صفنت .. هذا من كل عقلو .. غصب خوما غصب

. دكلو نعسانه ما الي خلك .. دروح هم صوجي اهتملك ..

جريت الغطا لراسي .. ونمت .. كعدت الصبح .. نزلت .. هو كاعد ويا الحجي .. وعاقد حواجبو .. دحكني دارو وجهو زعلان

شلون مشكله وياه هذا .. سويتلهم الاكل .. تقربو ياكلون هو ما راد ..

الحجي :- حدر يابه تريك

-عافيه حجي متزقنب ليجدام ما اريد

-هااه شصاير

-ما صاير شي اكل يابه .

بقى اليوم كلو ضايج وما يتحاجى .. حاجاهم على رجعتو للدوام كاللهم راجع هذا الاحد ..

الحجيه :- اوو يايمه هم ترجع للدوام ماكو .. رجعه اترك عايش هيج وشحلاتك .. شنفع الدوام بالله

بعدهم يردون يتفاهمون وياه وهو مطنكر .. زكح

:- انه راجع وما بكيفك احد يكلي ترجع لو لا .. عساني اموت ولا اكعد اكابل الشكول الزفره . وخزرني وكام هف الباب وراه وطلع .

بقو واحد يدحك بالثاني تعجبو بردة فعلو :- شبي

دحكت بيه الحجي وخزرتني ..

كملت شغلي وكعدت يمها .. حاجتني

-شبي صراع شصاير بيناتكم

-ماكو شي هو يتزعل

-هو يتزعل لو انتي

-سكتت بقيت عيوني ع التلفزيون ..

-لا تجاوبين ابقي براسج اليابس .. انتي جوعي الاسد فوك .. واحنه ناكلها جوه بعصبيتو ..

-دحكت عليها .. ابتسمت .. يوم ما مقصره وياه والله .. بس هو ما يقدر

-ابني واعرفو لو ما طاكه روحو .. ما جان عصب

...دنحجي سمعت صوت ناىل اجا .. اخذت حجاب من يم الحجيه وطلعت استقبلتو ورحت سويت جاي وهم كعدو يمو.

رجع فات صراع وكعد وياه .. قدمتلهم جاي .. وهو اخذ مني ما دحك بوجهي ولا كن عبرني ..

نائل كاعد يحجيلو عن سعد ويا صراع .. صدت عيني ع التلفزيون الحجي من كثر دينو حاط القناة على قران ومنصي ..

طلعت اية وانكحوا ما طاب لكم من النساء .. ضحكت وهزيت راسي .. حسيتهم كلهم انتبهوا ودحكو بيا شبيا ضحكت .

كتلهم لا على هاي واشرت ع التفلزيون .. دحكو .. قران طالع

:- كلام الله هذا شنو اللي بكلام الله يضحكج ...جاي تستهزئين بي

-لا يابه مو ع القران والله بس هيج تذكرت سالفه .

-اندارو بأنزعاج وكملو السالفه .. عاد لميت الاستكاين وكلت منو يريد جاي .. ما رادو .. اخذت وطلعت ..

شلون عالم .. يبتلي حتى اليضحك يمهم .. زعل حظرتو بس لان كلنا نعسانين طلعنا صفر ع الشمال لا كانو مدارين ولا مرضينو..

وهاي طبيعتو ويمكن اغلب مشاكلنا هيج .. ان هو عندو هلامر كلش ضروري . واني اعتبرو مزاجي ويعتمد ع المزاج . ما بلازم اذا مالي خلك .

بس هو ما يصرفلو هلكلام .عندو هلامر مهم حالو حال الاكل و الشرب .. حجايتو :- اني ما احب اتلاعب وي النسوان ولا احب ادفع نفسي للحرام لهذا اتزوج واخدم نفسي بالحلال ..

ما اكدر اكول عنو حيوان وكل همو رغبتو .. لان مرات يقدر اذا جان اكو عذر .. بس اذا ماكو عذر اوو يكلبها ويبقى عصبي وما يتحاجى ..

... فرحت غسلت الستكاين ورجعت يمهم .. واسمع ناىل يكلو .. والله ابو حرب لو تفتحلي غرفه يمك .. انه سعد ما اتراهم وياه

صراع:- شنو انه عايف البيت السعد يا نايل غير الكم

-خويه سعد كلو مشاكل وشغل ماكو وهم جثيرين انه المن اصير .. لو طلب وكتلو ما عندي اتخارب وياي ويبقى يصيح .. العيشه وياه ما تنضاك..

حتى لو ما قبلت تنطيني غرفه .. انه اجر بيت واطلع ما اتحمل علوضع

-وهو سعد ليش ما يرجع لبيتو

-المؤجر مو هسه يطلع وانه اكلك هو ما راح يطلع البيت جبير واستانس واحنه شايلين . اعتمد .. كلي اذا ما ترضى اجيبلك عائلتي ..حتى ائجر ..

-بقيت فاتحه عيوني بعيون صراع .. وبكل حقاره كلو لا يابه بيتي جدامك .. هلا بيك ..

- عجل على شنو شيلتنا من ذاك البيت . شنو بس تغيير مكان

صراع :- انتي ما الج دخل ما جايبو بيت الخلفج حقيرااااا امشي من جدامي يلاااا

نائل :- لا حرمتك اذا ما رايدتنا .. انه ما اكعد ثكل عليكم ..

.. عفتهم وصعدت وصراع يبررلو .. طكيت متت .. هاي بس لان ما رضيتو هيج سوا بيا ... دشوف منو تكعدلك .. والله فلا اكعد . لو اعرف يالشارع اصفى ولا اعيش ويا هذا الهمجي ..

فتحت الكنتور وكمت اشيل واعبي .. لميت جنطه و وبدلت ولفيت الحجاب . ونزلت ..

الحجي طالع هو ونائل وصراع ديريد يطلع بسيارتو .. شافني امبدله .. نزل .. واجه

-شكو يولي

-كعده هينا تحلم اكعدلك .. وخل يفيدوك اهلك .. وخر من كدامي

-تعوذي من ابليس وفوتي جوا

-ما افوت ولا اكعد افتهممممممت . وخر من كدام .. دفعتو وفت .. واني فايره ..

طلعت الحجيه و ام سعد وهو موكفني بالكراج ويكلي ..:- صوتج يولو الجيران منا فوتي لا تخزينا

-اخزيك ما اخذيك اني كعده عينا ما اكعد ولا لريدك هسه اطلكني

-ول لا تتخبلين ليليان كعدي اتفاهم وياج

الحجيه:- شصاير يا بنتي دفوتي مو عليتي كلبو لهل رجال

-سلامتكم ما صاير شي .. اني مليت وخلص

. طلكونيييي فكووووني عتقونييييي

-لج حسج لا تعلي ليلياااااااااان

-عفتهم واريد اطلع .. وهو يرجع بيا .. ويكول :- ولج فوتي اتفاهم وياج فوتي

هو يجر واني معنده الا اطلع .. عاد سحبني للسياره وكاللها يمه فوتي انه اتفاهم وياها .. رجعو ..

صعدني واني افور احس اريد اكلو .. اول ما حرك .. صحت :- عناد بيا رجعت اخوك للبيت مووو لان ما رضيتك هيج عاقبتني

-لا والقران ما هيج .  هو حرجني .. وانتي سمعتي الحجي .. شرد عليه .  اطردو

-والله هاي مشكلتك اني طلعت استقر وارتاح .. تالي رجعتهم كلهم .. شسويت عااا شسويت . ما ابقى والله .

-ولج انه راضي .. مو انه الطلعت منهم .. الله باليني بيهم .. شنو اسوي كليلي ..

-كلشي بيدك واعرفك ليش هيج سويت

-انه غبي لج ما ارتاحيت يوم .. ازيد المشاكل فوك راسي واجيب اخوي .. يول لو ما طلعت حتى اشرد ..

- شوف اكلك .. رجعه للبيت اني ما ارجع ... واهلك بي .. مكافي جبت ابوك ومرتو .. هنوب نور ومشاكلها .. واشتغلت وليليان وما اشتغلت .. تعبت وليليان ما تعبت وليلياااان وليلياااان .  لا عمري ما حزرت .  ما ارجع لو تكلب الدنيا

-يول والله اشرط عليهم محد يصل صوبج والبيت بيتج وكفي السالفه وخل اعشيج بره وتهدئ نفوسنا ونرد

-اكلك انت شو ما مهتم ليكون عاجبك

-يول والله و كلام الله وملائكته وسماواته ما قابل . بعد .. بس شبيدي .. ولج والله طكت روحي .. انه ابعد وهم وراي .. وين اشرد كليلي شسوي .. اطردهم ..

اهلي ذول والله ممتحني بيهم وجاي يختبر صبري .. ما اعرف امتحان الله وياي بهلي شوكت يخلص ما اعرف . يهل عالم والله شيب راسي .. تمرضت انتهيت .. محد يحس بيا الله اكبر عليكم

... بقى يصيح ويشكي .. واني عاقده حواجيي وروحي طالعه .. اخر شي سكت وبقى يفر يفر يفر .. وساكتين ..

نزل الليل .. وهو يفر ..

-ولج راح يأذن العشا .. خل نمش لهلنا كافي .. تدرين بيه اعشكج لا تكضبيني من الايد التوجعني

-لا اكضبك ولا تكضبني رجعه ما ارجع .. كتلك والله ما ارجع ..

-فر السياره وطلعني لبيت هيام .. راد ينزل .. صحت :- ما انزل .. تاخذني لبيت خالي هينا ما ابقى

-اي عود ان شاءالله

-تستهزء انت شنو ..  طبك باب السياره وفات لبيت اختو .. ما نزلت بقيت بالسياره .. طلعت هيام وعلي .

هيام :- يا ولج نزلي دشوف نزلي ..

-ما اريد ام علي صيحيلي صراع

علي :- اووو عود هي عبصيه وما تتحاجى دفوتي ام الفواين فوتي صايرتلنا رامبو وهي نيلز دنزليييي

- علي عوفني الله يخليك اريد اروح

-عمي اخذيها من هلشارب الاكس لارج ..  انه اخذج لو للشماعيه هم اخذج بس نزلي ..

جر ايدي وهيام تضحك وتكلي ولج العالم راح تطلع فوتي .. نزلوني وفتت وهو ماد السجاده يصلي ..

كمت انافخ .. اريد افترسو .. فوكاها يصلي عود خايف ربو وهو انتقم مني بس لان ما رضيتو .. بس دصبرلي لا ما طلع الدنيا من عينك لا اسمي ليليان .

كعدنا وهوكعد يضحك وي بنات اختو ويتشاقى وي علي .. وعلي يبسمر بيا وكل حجايه يشمرها بكد راسو . واعصابي ما هدت ..

سوت عشى هيام .. وحطتو ودزت بيبسي    وكالتو گرب خويه . كف دشداشتو وكعد ثنى .. وهو يدحكلي

-يلا يزعلانه شرفي حظرت السلطانه

علي:- هاي سلطانه  يابه هاي زبانه

صراع:- لا لك حدك .. الا ام الفواين هاي ام حرب هاي    النفس اليصعد و الينزل

-اي والله خالو منشول وهاي بالنفس من اتنفس هم تصعد وتنزل مثل ليليان بالضبط بس لا تخاف علاجها كلينس الا ام الفواين لو بطانية احبك هم ما تكضبها ..

.. حجها وكلها غصت ضحك .. اني اندرت .. طاح حظك يا وسخ .. وضحكت ودرت وجهي منو .

هيام:- ولج كربي الياكل بضرسو ينفع نفسو حدري ..

-والرب ما عدشتهي .. اكلو

-ياكلو وصراع يدحك بيا .. كملو وصبتلو جاي وكعدو يسولفون

هيام :- شبيها متكلي

-ام علي بدينج احجي وهاي هي ج.امج وتسمع اريد احاجيها .. وخل تجاوبني ..

منو الاشترى البيت منو اللي بنى واثث.. يول مو انه التمنين وانه التحلمت وانه الشتريت وبنيت . طالبتني هي لو مني ومن كيفي ؟

الي ؟؟؟؟ انه شعندي من يوم يومي انه عايش عد اهلي .. رحت اشتريت بيت شكبره واثثتو كلو بمزاجها والله ماكو حاجه لا ما خذت رايها بيها بس حتى احسسها ان البيت بيتها واعوضها عن المشاكل الشافتهم مني ومن اهلي ..

احجي صحيح لو لا ..

تغلط واسامح

تتجاوز واعدي

تتعصب واكبر عقل

واتفهم واحتوي واراضي واعقل واجيب وادلل واخاف من الكلمه التجرحها ..

بس يا ام علي هي ما وياي ما تساندني .. كل  اقل حق الي ما توفي .. خل تكلي انه شذنبي باهلي .  شو هم الاجو وهم العزمو نفسهم

يابه البيت عفتو الكم يكلولي هااا تطردنا .. صيري بمكاني شسوي .  ؟

هيام :- لا والله ما بيدك شي . شتسوي لميعه وولدها مشكله والله شلون تفتك منهم ما اعرف

صراع :- انه اعرفها خبيثه  و حتى جاي تشتغل بنفسها وتطبخ وما تصخر ليليان لو تحجي وتتمسكن وهاي جيب اليفهمها .

تكف كبالها وتكلها شنو تكضبين مطبخي وتسد المجمده عنها .. وذيج تتمسكن وتتمنالي الزله .. بلكت اصف ويا ليليان وتشرني بالعشيره على ابو امشي بكيف مرتي واموتهم جوع ..

تعبت يا عالم بالقران مليت وما لاكي احد يفهمني ويحس بيا بالله كليلي الحل شنو

مرتي تكول ما اريدك .. وامي تصيح انطيتها عين .. وابوي يصيح ما يريدني بسبب حرمتو .. ولميعه ما ممقصره

بدينكم ابختكم .. انه الياهو اصير وشتصرف ؟

لا اكدر احجي وياها .. اعرف حقها وبيتها وانقهرت

ولا اكدر احاجي ارد امي وهي تصيح انطيتها عين

ولا اكدر اطرد ابوي وحرمتو ولا طليق وجود لمبعه ابيتي ..

كمت اهج من البيت حتى ما الفي والله بس اريد ارتاح .  وما مرتاح .. وهي ..... خل تحجيلج احجي شو سكتي

-هو اءا حجبت اني اكدر احجي .. طلعتني صفر

-انه مطلعج صفر لو جاي اكول حقها .. انتي شلون وياج .. لا تفتهمين عدل ولا تسمعين.. الحل وياج شنو

هيام :- عوفها خويه كولو يا الله هذا بعد الله كاتبو عليك وانت كلت حقها خلها اليوم تهيد وترتاح هينا .  وانه احجي وياها واعقلها .. وان شاءالله ما يصير خاطرك الا طيب ..

طلع وانطى فلوس الهيام .. :- اخذيها باجر الصبح للسوك شوي خل تشتري تغير نفسيتها

-ان شاءالله لا تشيل هم .. روح ارتاح ..

... تركنا وراح .. فرشتلي هيام .. ورحت تمددت .. بقيت الف فكره براسي و وحسبه تاخذني وحسبه تردني .. كلت هاهيه الله ما كاتب عليه الراحه .. ابقيها يم الرب وهو يتولى امري

نمت مدري شوكت .. فزيت على صوت يمي .. وجهي للحايط .. التفتت .. كلت صراع .. ما كدر واجه يمي بليل ..

اندرت ماكو .. الغرفه ضلمه .. وبالزاويه عيون بزوزن سوووووده و العيون تضويى..

الغرفه ضلمه بس شلون مبينه ما اعرفة.. اريد ادور شي .. اضربها ماكو .. اصيح بش بش .. ما تمشي.....

عتوي .. وكام ينفخ بوجهي .. كمت اصرخ .. وعلي كاعد بالهول بساعه فات وفتح الضوا .  :- شكو يولي

ادور .. جانت عين بزون عتوي اسود

-ماكو شي ليليان ..

-يمكن طلع من الشباك .  شال البرده .  الشباك مسدود ..

فاتت هيام :- شكو شنو هلهوسه شصاير

علي:- تصيح عتوي اسود ..

-وينو خاف باب السطح مفتوح روح شوف

... صعد واني ادور .. ما شفت شيء طلع من الباب هذا مكانو ما اتحرك ..

علي :- يوم مقفول الباب ..

- ولج خاف تتحلمين

-لا والله شفتو هينا شنو ما تصدكوني حتى گام ينفخ

بقو يدورون بالبيت كلو .. ماكو عتوي اسود وعلي يكولها :- انه بالهول عينا كاعد مكنك والباب كدامي ما شفت شي طلع بس صرخت بساع طفرتلها .

احس الرعب ملى گلبي .. ربي دهيلك شنو هذا .. اني اخاف ليطلع شبح لو جن .. شلت الموبايل ودكيت على صراع ..

دك .. دك .. دك .. ماكو رد .. رجعت مره لخ اتصلت .. رد وهو نايم :- ها ليليان

-صراع فدوه تعال

-فز .. شكو يولي

-اني حيل خايفه .. .

-جايج هسه دقايق انه يمج......يتبع

☆☆☆☆☆☆