ليتني استطيع فعلها الحلقة (3)

ليتني استطيع فعلها

 

الحلقة  (3)

المكان : السجن
التوقيت : الثانية بعد منتصف الليل

تقرب و گعد و هو يتلفت و حجة : انت اسماعيل طاهر ؟

-منو انت ؟

-ما عليك اني منو، عندي وياك سالفة اذا وصلتها تحصل منها ملايين وبيوت

-يا ملايين و يا فلوس و اني مسجون انت شرايد مني ؟

-لا تخاف باجر راح تطلع، لأن مو انت المطلوب
فأذا تريد تستفاد اني راح افيدك

- و شلون استفاد ؟

-بالاول تنطيني حجاية الحرف الاحجيلكياه ما يطلع ، و اذا طلع ما راح يخلونك تعيش

-انت جاي تورطني خويه اچفيني شرك رحمة لوالديك

-اسمعني، شغلنا يعتمد على السرية
اذا صرت كتوم و تشتغل راح تفتح قصور و تكوم تلعب بالملايين لعب

-شني هاي السالفة ؟

-بالاول توعدني

-يابه اخذها حجاية ما احجي

-توصل هاي الورقة لواحد اسمه حجي محمود يشتغل فيترچي بمنطقة الطوبچي، و تنطي الورقة و تگله ابو ساجد يسلم عليك و يگول اني عد عيناك

-منو هذا حجي محمود ؟

-شغلنا ما بيه كثرة اسئلة، تروحله و هو يفهمك........

ديار : لما رجعت للبيت خالد انصدم و معرف يروح لأخوه المصوب لو المرته التنزف ، اني دخلت لبيت مها لكيت اسامه كاعد بالهول

-يلا اسامه خل نروح للبيت مالتنا

-مو ماما كالت النا ابقو هنا

-لا لا خل نروح لبيتنا تحسن

فاتت مها و الحجية ام امجد و هي تكول : عمت عيني انسبو اسباية اللهم يعديها على خير و يجفي الشر

مها تبجي مسحت خشمها و باوعتلي : وين جنتي ديار ؟

- يم وحدة صديقة وياي بالمدرسة رحت اخذ منها الملزمة

- اكعدي ليش واكفه ؟

- لا اريد اروح لبيتنا

-امج تجي بالليل و تاخذكم اكعدوا

... افكر لا مرت خالد تكوله ردت على الموبايل و يعرفني و يجي يفضحني كدام عيال مها، فكلت : لا لا احتاج هوايه اشياء بالبيت ، كوم اسامة

اخذت اسامه و رحنا للبيت
عادة البيت ما بيه قفل، مجرد تفتح و تفوت
ما بيه شيء حتى نخاف ينباك، فالباب بس نردة من نطلع و نسركيه

لكيت السركي مفتوح ..
فتنا للكراج ، ردنا نفتح باب البيت الداخلي ما ينفتح
هو هذا اصلا ما بيه قفل باب حديد سركي من برا و سركي من جوا ، منو مسرگيه من جوا ؟
الا اكو احد جوا

اسامة : منو جوا ديار شو الباب ما ينفتح

كمنا ندك بالباب حيل، شويه و طلعت ماما
فتحت الباب : شجابكم ؟

-انت موجوده ؟ لعد ليش مخليتنا ابيت مها ؟
دا نحجي طلع رجال غريب من الحمام

اسامه بقى صافن بالرجال
باوعت لأمي و خزرتها

الأم : بوري الحمام جان عاطل و صلحه عمو، يلا حبايبي فوتو جوا حتى اسويلكم الغدا

دفعتنا جوا، اسامه راح و اني بقيت خازره بيها
بقت تدفع بوجه ضاحك و هي تكرص بزندي و تهمس : فوتي جوا بسرعه ، مشكور عيني ابو اموني تعبناك

- بالخدمه يابه
طلع و اشرلها
و هي دفعتني جوا وطلعت برا و ردت الباب وراها

احترك دمي فتت للغرفة افتر من العصبية
بودي احركها
لا اشرب من دمها

رحت وراها، لكيتها واكفه ويا، انطاها فلوس خلت بصدرها و مدري شحجوا و سدت الباب و فاتت

دفعتني و مشت مني

بس ردت انطق هسه دا اكول : ش.......
قاطعتني و هي تكولي : ما اسمع منج و لا صوت الرجال اجا يصلح الحمام غير هذا الكلام ما اريد

- بس.......

-گلت ما اريد اسمع منج ولا صوت

صرخت بصوت عالي :- لا مو على كيفج كافي كششتيني بروحي بعمري كرهتيني حتى حياتي

ضربتني راشدي ..
-اني امج مترفعين صوتج عليه افتهمتي

-جاي تعلميني تعلميني ؟
تربيني يعني ؟ من يمتى ؟!
بابا بالسجن و انت هنا بهذا الحال

-و عساه يموت و اني شخصني بأبوج ؟ و بعدين لا تعتقدين ما اعرف منو سوا هالفلم
رحت لسلمان و سلمان حجالي

-يعني شنو ؟

-كلش زين اعرف انت اللي بلغتي على ابوج
و ما كلت لاحد تبقين بنتي و اخاف عليج تنضرين

-تخافين عليه ؟!!
انت لو تخافين عليه جان خفتي على سمعتي شيكولون عليه لو عرفوا امي هيج ؟

-منو يكول ؟
وشعلينا ؟
كلام الناس ما راح يوكلنا خبز، هاي الدنيا يرادلها الكوي يا امي بعدج صغيرة تكبرين و تعرفين

-شاعرف ؟ انو لازم اشتغل مثلج حتى اعيش شو ذوله الناس كلهم عايشين بس موووووو مثلج

-و شعرفج بيهم ؟
اكو احد يجي يكولج اني هيج سويت ؟
كل واحد يشتغل من جوا لجوا حبيبتي

- اللي افتهمه من كلامج دا تنصحيني اشتغل مثلج من جوا لجوا

- وشفايتلج ؟
بس انت حتى شغل الجوا ما يفيدج

-قصدج مشوهه ؟

-عوفينا من هالكلام جبت ويايه جدر تمن و عليه مرك صبيلنياه بصينية دناكل

-اشبعي انت، اني ما اريد
درت عنها و روحي تفور

-ابقي البومة ابقي نگي
ابوج السكران عايفكم براسي، تاكلون و تشربون بتعبي و بعدين تجي تستشرف على راسي بت اسماعيل السكران

عفتها و فتت جوا
تقرب يمي اسامه: ماما و هذا الرج.....

قاطعته : اسسسي لا تحجي بهيج شيء اسامه اني وياك معلينا ابماما ولا ابابا افتهمت ناكل و نشرب هنا من نكبر نطلع من هذا البيت و نعوفهم

-وين نروح ؟

-ما اعرف هسه عوفني اسكت
بقى كاعد يمي و اني صافنه بزماني، و شايلة هموم اكبر من همومي
فاتت اثار اختي، ذبيت حرگت گلبي من امي بيها

-ولي منا يلا ما اريد اشوفج هنا يلا

كمت من حيلي طلعتها من الغرفة و دفعتها للكاع بقت تبجي، اجت امي تركض شالتها و تغلط عليه و ترزل اني صفكت الباب بوجها و فتت كعدتت

هي فاتت تحجي و دفرتني برجلها و هي تغلط و طلعت، صاحت : اساااامه تعال تزقنب

-ما اريد

- ابقى انت و هاي اختك مثل البوم واحد مگابل اللاخ ما الله ياخذكم انتم و ابوكم و اخلص

حطيت المخدة و تمددت و اسامة يمي
بقينه فوك الساعتين اني وياه گاعدين
اسامة : ديار اني جعت

-حتى اني بس ما اريد اكوم و اشوف امي

-اروح اشوفها نامت لو لا ؟

- روح

...راح و اجا : ما موجودة

-لعد وينها

-يمكن طلعت

-كوم لعد خل ناكل

طلعنا للمطبخ خلينا الجدر و گعدنا ناكل، فاتت هي شايله اثار على ايدها و بالايد الثانية بطل سفن ع النص، خلتا گبالنا و حجت : ابوكم احتمال باجر يطلع

اسامه : يعني بابا مو ارهابي ؟

-لا ماما مو ارهابي
وتباوعلي ..
دنكت

- هم راح يطلع و يگابلنا لا هله ولا مرحبا

-اليسمعج ميكول نفسج الكعدتي تلطمين و تبجين عد بيت امجد لما اخذوا

-لعد شسوي گبال الناس اطك اصبعتين و اهزلهم جتف على حبست رجلي، و الا اني ما اطيق اشوف خلقته

-اطلكي ، خلصيني منا عاد مو انت و ابوي كافي اتحملج

-ولج وين انطي وجهي بيكم ، اخذكم و اشحد
خليني ساتره عليكم بهالبيت و نشوف وين تريد توصل خل توصل، الا صدك ولج ابن ام رافد ابن عم مها متصوب خطية

- اي اخو خالد سمعت

- شمعنى اخو خالد ؟
خالد ابنهم الوسطاني

-شمعرفني هيج اجا على الساني

-هااا ، همو نفسكم نروح يمهم هنا شنسوي ضوجة هناك الناس ملتمة

-لا ما اريد

-ليش

-هيج اريد انام

-براحتج اني اكوم اروحلهم انت لملمي البيت و نامي ارجع ما اريد الكا وصخ ...
(بيت خالد)

ضحى: اخ ولج يمة اخذيني وياج بعد ما ابقى يوم واحد لخالد، اخ يا خالد اخ ما توقعت تسوي بيه هيج
.... تبجي

-اسكتي ماما اسكتي تروحين وياي للبيت عد خالد بعد ما الج كعده

اخت خالد : استهدي بالرحمن خالة اخوي مصوب و اللخ يفتر و الدنيا مكلوبه فوك روسنا مو انتم و الدنيا علينا خل نفتهم بالاول

-شنفتهم هاي بنتي تنزف و اخوج الشفية لحد هسه ما بين ملتهي بنسوانه ، خلي يفيدنه

خالد : ها السلام عليكم
تقربت يم ضحى بسرعه ؛ شجاج شصاير متحركة واكعة ؟
دفعتني منها و دارت وجهه و امها صاده عني

شصاير ؟ بتول فهميني

- اخوي شلونه خالد طمني

-زين زين

ضحى:- و تروح تشوف اخوك يلا تجيني زين يخالد

- بس كلولي شصاير وياج عفتج ما بيج شيء

بتول : خويه ماكو شيء نزف بسيط و انطوها علاج وكالولها ممنوع الحركة، و هاي طالعين للبيت

-الحمدلله، يلا لعد خل اوصلكم

ضحى:- منو هاي الجنت وياها ؟

-منو ؟

-تغشم نفسك خالد، بعد سوالفك و جذبك ما يعبرن عليه، يوم واحد ما ابقالك بالبيت اخذني لاهلي

-لا تخبليني شصاير ؟

-طلعتلي بنية على موبايلك تتنعوص و تكلي لا تزعجينا و هو حبيبي و سدت الموبايل بوجهي و بعدين انقفل اخابر عليك ما تجاوب ، تخوني خالد ؟

-و كتاب الله ما عندي شيء جنت دا اشتغل بالأستوديو و اركب الكاميرات ، منو هاي ما ادري و بعدين جهازي طافي شحن

-منو جانت وياك

-ماكو بس .......
تذكرت ديار صفنت، شنو القصة شصاير معقوله !!

-بس شنو لا تقنعني اكو وحدة جانت وياك اذا ما تكول منو هي والله ما ابقالك

-ضحى لا تتخبلين شتعرفيني ابو نسوان ؟
ما عندي شيء والله، يمكن واحد من جماعتي مسوي بيج مقلب

- الصوت السمعته صوت بنيه اني متأكدة

-هسه امشي للبيت والله كريم نتفاهم هناك، منا الناس عيب يطلع صوتنا

-والله ما ارجع ولا اريدك الا تكلي مني هاي الحجت وياي و الا تحلم ارجعلك

-الظاهر انت تعبانه، استراحيلج اسبوع عد اهلج ارتاحي و بعدين نتفاهم

بقت تحجي اندرت عنها و حجيت: بتول انتظركم بالسيارة

الأم: والله و هو ابو الراهي ولا جنه مسوي شي

بتول: خاله انت تهديهم لو تشعلين النار بيهم ، لوما خالد سنين يتعارك حتى ياخذ ضحى، يجي يخونها هسة !!

-لا اخوج ما احترم بنتي شوفي تعامله وياها حتى حمد لله على سلامتج ما كال الها

-والله خالة اجا يستفسر و ناشف ريگه الرجال و بتج استلمته بالأكشر وين و شلون و هسه جايه تلومين
امشن امشن

..... بيت ديار .....

ماما طلعت تتفقد اخبار عد بيت ام رافد و اني بقيت بالبيت، ردت انام ما اجا نوم

عندي راديو شكله كأنه موبايل بقيت ادوس بيه و اكلب اذاعات و افتر بالبيت حتى تصفى الأذاعة
لأن لا دش ولا اريل عدنا باقين هيج ناكل و انام و على هالراديو

طلعت اغنية (اتمنى روحي تصير ) بقيتها وكعدت بالمطبخ مددت رجلية و انتجيت ع الحايط واني اسمع الأغنية و اباوع بحيطان البيت و عقلي يروح بعيد ..

جنت گبل .. لما اريد ابتعد عن واقعي .. اروح اخترعلي عالم اخر اتخيل بيه نفسي حلوة و ممشوهة و الكل تحبني و تتمناني و اعيش فد قصة حب مع شخص من خيالي

الشيء اللي صار بعد مشفت خالد، صرت اتخيله هو فارس احلامي .. وكأن هو ما متزوج ولا عنده اطفال ويحبني و اني احبه و اخترعلي سوالف و دراما بينا من عقلي ..

بقيت متچيه راسي و طايرة ويا الأغنية بخيالي الحالم

رجعت صفنت بالحايط .. اني ليش ابقى اتحلم بيه و اخدع نفسي و امننها بخيالي ؟
لا عمره خالد راح يحبني ولا يتقبلني
والله يعلم لما راح يعرف اني هيج سويت ويا مرته شنو راح يسوي !

بس هو يبقى عالم ثاني
اتخيله بس بخيالي لأن لو ما هذا الخيال فلا اصبر على عيشة اهلي بهذا وضعهم

جريت الراديو و رجعت اكلب بيه،حسيت احد صار فوك راسي !!
رفعت وجهي بسرعة .. و اشوف ابويه كبالي
فزيت من مكاني بقوة
: اااا هلو بابا

-امج وين ؟

- ما اااا ما شسمه ما ادري ، لا لا اااا

-احجييييي شبيييج

-راحت، ااا راحت ااا للبيت

-يا بيت

-مال بيت شسمه ااا عمو ابو رافد

-ليش شكو بهالليل ؟

-ابنهم بالأنفجار

-مات !!.

-لا لا بالمتسفشى ااا المستشفى اي

-اخوج وين اسامه مشتاقله صيحيلياه

-اي
ما عولت بس يكولي اسامه رحت للغرفه ركض حتى اصيح اسامه ، ما لكيته ما موجود
صحت، بابا اسامه ما موجود

-تعاي جاي

رحتله و متخوفه و محد بالبيت سألني : ما عرفتي ليش سجنوني و منو هذا المبلغ عليه ؟

هنا رجف گلبي من الخوف، جاوبته : ااا ما اعرف احنا ماما جانت مخليتنا بالشسمه... هذا ... بيت عيال مها
خلتنا يمهم

:عدنا ثلج شوفي الثلاجة و ثرميلي خيار و لبن بسرعه يلااا

- اي اييي
ركضت اطلع دولكة من الثلاجة، طلعت الثلج البداخله و ضربته بالكاع تكسر جمعته بالدولكه ، بلا غسل خليتلهيا بدولكة كزاز ثانية و كلاص الشرب مالته، وديتهم اله

رفعلي عينه خليت كدامه .. حجه : طلعي شوفي اخوج وينه

-اي

لزمت الباب حطيت النعال برجلي و ركضت من البيت، طلعت ادور بالشارع اسامة ماكو ، رحت لبيت ام رافد اصيح امي ..

متردده ادخل اخاف يشوفني خالد كبالهم و يرزلني
.. دخلت و عفت التفكير وراي
لكيت امي كاعدة ويا النسوان تسولف و تشرب جاي واثار كاعدة يمها ..
اشرتلها تجي هزت براسها

وكفت انتظرها، اجاني صوت من وراي : هنا ديار

التفتت

- شنو معنى السالفة السويتيها ؟

-يا سالفة ؟

-شوفي اكثر شي اكرهه بالدنيا من اوكف كبال بنية و تنكر عينك عينك، انت فاهمتني شنو اقصد
و الا اگلج المثلج حتى كلمة ما تسوى اعاتبها و احجي بيه وياها ، انسانة مريضة و انصحج تروحين تتعالجين من العقد اللي بمخج

راد يمشي ، رجع باوعلي : و عود هم انتقمي مني لأن گتلچ مريضة

...العبرة وكفت بزردومي وبلعتها ، دنكت ما رديت
اجا صوت امي و هي تحجي وياه : ليش خاله ليش تكول عليها مريضة مو عيب عليك بنية و تكسر بخاطرها

-اكول لو تعوفين الحجي و تلتهين بتربية بتج هواي احسن

- يااااا انييييي ما مربية بتيييي ، وينج عيني ام رافد خيه تعاي اسمعي ابنج شيكلي ترضيها اني بتي ما مترباية شسوتلك خالة عيب هالكلام و الكلمة مردودة عليك

ديار: يمه كافي اسكتي خل نروح للبيت
اجت ام رافد وكفت و هي تهدي بأمي و اني اجر بيها واثار نطت بجي و هي مستمرة ترزل بخالد، هو عافها و طلع ما رد ..

بقت امي تلوم و تعاتب بأم رافد على تجاوز ابنها جريتها كوة وكلتلها: دكافي جلبتي عوفيييه

اثار فرفح كلبها من البجي و هي تلزم بذيال امي حتى تشيلها، امي عصبيه و تمشي بقوة صفگتها على وجها لطمتها بالكاع و صاحت بيه
-فوك ما ارد اعتبارج وما ارضى احد يتشمت بوووووضعج، شيلي اختج يلا

- ما اشيلها ولا تسوين روحج خايفة عليه انت اول الناس المتشمت بوضعي و كل مرة تسمعيني حجي و تعيريني و هاي انت امي، ليش اترجى من الغريب يقدر وضعي ما دام بعمرج ما اهتميتيلي لا تدخلين بأموري

عافتني و مشت بعصبية و اثار اختفى صوتها وراي، التفتت والكاها نايمة بالكاع و سكرانة من البجي و حلكها صاير ازرگ

ركضتلها بسرعه كومتها
وصرخت بوجهه : كافي كافي كافي
خافت مني و حظنتني، ضمت راسها بصدري ومستمرة تصرخ

شلتها و ادك على ظهرها و امشي ورا امي

هي تمشي بحرارة، خالد جان واكف براس الفرع جاي يدخن جكارة، وكفت مدري شنو حجت وياه، هو شمر الجكارة من ايده و سحكها برجله

ركضت يمهم حتى اعرف شيحجون..

خالد: خاله محشومة مو قصدي اهينج ابيتنا البيت بيتج و اعذريني بس يا ام اسامة بتج بعمر حرج ولا رقيب و لا حسيب و الواجب ع الاماية بهيج عمر تفتح سبع عيون مو بس عيونها الأثنين

-و انت منو گال الك اني ما منتبها على بنتي

-لا ادري و ازيدج علم اليوم ساعتين هي يمي، راحت وياي لأستوديو التصوير لو اني عار جان بامكاني كلشي اسوي ولا وتعتقدين البنيه هذا وضعها محد يباوعلها و ما عليها خطر اكو بشر اخس من الحيوانات ميهمهم المظهر على كد ما تهمه غريزته الحيوانية و الوكت مو خوش وكت

... التفتت عليه امي، اني مدنكة : صدگ طالعة وياه ؟

- العفو ام اسامه الحساب مو هنا اكعدي ويا بتج وفهميها و علميها، ولا تلومين عليها، اني ما حجيت هيج حتى احرضج عليها لأن الصوج بيج

الام الحريصة تعرف شلون تربي بتها
جان بدال ما كاعدة ويا النسوان الزم مها و اشوف بتي شسوت و وين راحت جاوبت امتحان حتى لو عندج شغل هذا ما يمنع حرصج على بتج، شغل المرأة الأساسي ضناها ..

وهسه اترخص منكم عندي شغل
باوعلي ودار وجهه ركب سيارته ومشى

اني بقيت صافنه بيه وهو يمشي لحد ما صعد وراحت السيارة ، انتبهت على امي متخصرة وتباوع عليه

-لازم عاجبج ؟

نزلت اثار من ايدي: لا عاجبني ولا شي اني راجعه للبيت

-اوكفي
شالت اثار اللي رجعت تبجي: لعد شعندج طالعه وياه اليوم ؟

-هيج

ضحكت و كالت : خالد خوش خالد والله و تعرفين تختارين هه

ومشت ...

بقيت امشي وراها و عقلي مشغول بكلامه و شكله و انفعالاته و هو يحجي و گلبي يرجف
انتبهت اسامه واكف ويا ولد صديقه ، ركضتله ..

-هاي وينك يا اسامة صار ساعة ادور عليك ؟

-- شتريدين ؟

-بابا يسأل عنك

الأم: ليش هو ابوج وين ؟

-بالبيت

-طلعوه يعني ؟

-اي مع الاسف

-امشو امشو دنشوف يمتى يجي اليوم النخلص بيه من شكل ابوكم ونفتك

دخلنا للبيت هي راحت للاستقبال تحجي ويا ابوية و اني واسامه فتنا للبيت، حميت جاي و عدنا صمون يابس تعشينا اني و اسامة
اجت اثار تاكل ويانا عفت الاكل و فتت

فرشت و تمددت و انتقلت لعالم خيالي و اني عود زوجة خالد و هو هيج عصبي و يحاسبني و يخاف عليه

بقيت افكر
رغم اذيت مرته بس هو حسيته خايف عليه و ينصح امي بحرگة حتى تنتبه عليه :- معقوله حبني ؟

لل٥ الصبح و اني سارحة بخيالي و كل شوي عقلي ينتجلي افلام وياه واتخياله يحبني
.. رحت بهذه الليلة بخيال و احلام الها اول ما الها تالي

...... بيت خالد ......

رجعت ب ٣ بالليل للبيت ، ضحى من ما قبلت تروح لاهلها عرفتها تريد تحاسبني حتى تعرف مني البنية الجنت وياها، واخاف اگلها وتروح تسوي مشاكل ويا ديار

ديار مريضة و مرضها اهلها و الناس اللي تتشمت بيها وصايرتلهم مثل اللغم اليدوس عليها تنفجر بيه متفكر هي شنو راح يصير بيها ولا عواقب افعالها وين توديها
كل همها ترضي نفسيتها المدمرة بسبب هالعالم اللي ما يرحم الضعيف بيه

مثل هيج انسان لازم تتعامل وياه بحذر، لا تتعاطف ولا تشد

وضحى اذا عرفت البنية الحجت وياها ع الموبايل ديار متأكد مليون بالمية ما راح تسكت و ولا ديار راح تسكت لو تأذت
وكتها تعال يا عمي حلها

دخت و اني افكر بحجة تقنع ضحى و تقتنع ان اني ما خاينها، و المشكلة ما جاي الكة حجة و اذا بقيت ساكت راح تكبر المشكلة البيناتنا و تبقى تتاذى و هي حامل ..

....فتت للغرفة بس الكلوب الصفر مشتغل و هي نايمة و البنات يمها
سديت الباب على كيف ..
وكعدت افتح بالحذاء ، تحركت بفراشها، شالت راسها شافتني موجود تعدلت كعدت

-واخيرا شرفت ؟

-ضحى نامي هسه و الصباح رباح

-لا والله ؟
كامت على حيلها، شوف اكلك تكلي هاي منو لا وحق الله وسماواته ساعة ما ابقالك بهذا البيت

-اذا ما ثاقة بيه و بنظرج اني ابو نسوان براحتج ذاك بيت اهلج و روحي ارتاحي مني

لطمت خدها : آآآآآئ خالد ترضاها اطلكني، انت تحجي وياي هيج

- عجزت ضحى كافي جزعتيني الساعة ٣ وصوتج طالع

-والله ما يرتاحلي گلب ولا يغمضلي جفن لا ما اعرف الخنتني وياها منو

-يابه جاي اگلچ و القران و الكعبة و المسيح و اليهود
ولج وحق الكواوي..... احلف براس كل واحد عار ما خاينج كااااااافي

بعد بيمن احلفلج و تصدكين ، ما تصدكين روحي فكيني
عفتلها الغرفة وطلعت.

نزلت من غرفتي تمددت على الكرويته بالصالة بقيت اكلبها منا اجيبها منا : شلون يا ربي تخلص

لهناك سمعت بناتي يبجون وهي مريضة فكمت اشوف البنات شبيهم، دخلت لكيتها محظرتلها جنطة هالكبره ومكعدة البنات من النوم و جاي تلبس بيهم

-هاي شجاي تسوين ؟!

تحجي و هي تشهك و الدموع تارسه عيونها:- اذا تهون عليك عشرتي طلكني اني بعد ما اكدر ابقى هنا

-لا اله الا الله، اللهم طولج يا روح ، ولج يبنت الناس ما خليت مقدس ما حلفتلج بيه ، صارلنا كم سنة شفتي مني شي ؟

-لازم نسيت سوالفك بسوريا ؟

-وشسويت بسوريا اني مصور و شغلتي اصور بنات شباب اي شي يطلعلي واشوف رزقتي قابل شعندي، استهدي و عوفي البنات نايمات رحمة للكعبة

-خالد اذا ما تكلي هاي منو الحجت وياي هيج والله ما ابقى حلفت الك بالله

-مدام حلفتي و اصريتي ودكيتي رجل، فأخذيها مني الجنت وياها ديار، ولو مشيتي الها و حجيتي وياها و فشلتيني و ما بقيتيلي اعتبار و ثقة وحق من انزل القرأن يا ضحى ما تبقين ابيتي و اطلع كلب ابن سطعش كلب لو اجيتج بعد

........ بيت ديار ......

نايمة و غاطة بنومتي، و اسمع اثار تبجي ما تريد تروح ويا ماما، مدرت بال، درت وجهي وجريت البطاني لفوك راسي، اجت اثار ختلت بفراشي و شبگت ظهري تبجي بخنيگ

اجت امي فوك راسنا و هي تجر بيها، نطت من البجي
وخرت اللحاف من راسي : تره نعسانه ما نايمة الليل عوفوني انام

-ونومة اهل الگبور مجاي تشوفين فردة هالنعال عاصية و ما تقبل تروح بكد القندرة و تعاند شلون اكدر اسيطر عليجن بعد

ويجي هالسايب ابن ام رافد يحاسبني لان ما اضبط بتي و انتن وحدتجن ما تنكدر الله ياخذجن و اخلص

-اهووووووووو دكافي اريد انام وليييي روحي

-اوجعوا نامت بضلوعج منو هاي التولي

ضربتني على راسي و طلعت و هي تدعي عليه
رجعت لفيت البطانية واثار تلزم بملابسي حيل، دفعتها
- ما راح اطير مطمورة يمج وخري ايدج النكسة مني يلا

اندارت لزمت بملابس اسامه و حضنته و نامت و هي تشهك .

بقيت دايرة وجهي منها، حاولت ارجع انام
طار النوم من عيني

موقف اثار رجعني لعمر خمس سنين
وكتها جنت طفلة عمرها خمس سنوات
اخاف من ابوية فانط من البجي حتى امي تاخذني وياها للشغل

تشتغل ٥ ساعات و بعدها تطلع لبيت ما اعرفه شنو، تبقيني يم واحد رجال و تفوت هي ويا شخص ما اعرفه للغرفة

الرجال اللي ابقى وياه يبقى يتحارش بجسمي و يأذيني
طفلة و انط من البجي و اصيح على امي بالغرفة و ما تطلعلي ..

لما تطلع اني مفرفح گلبي ولما اشكيلها ما تسمعني تبقى تحجي و تضحك ويا الوياها وما تسمع كل الصراخ و البجي اللي ابجيه ..

اتعس ايام حياتي هي ايام طفولتي
من موت اختي انهار
الى حرك جسمي
الى وضع ابوية
الى تصرفات امي
الى وضعي و التشوه الصارلي و اني اشوف الاطفال تضحك عليه و تكش مني و ما تلعب وياي.

كل حقد العالم انزرع بگلبي من وره الناس اللي بعمرها ما رحمتني ...

لما اتذكرت هذه الأيام ما حسيت على دموعي و هي مغركه مخدتي بلا ما ادري

انتبهت لاثار رغم سكتت بس بعد الشهكة بصدرها، انكلبت على جيهتها، خليت ايدي على راسها، اندارتلي بسرعة تباوعلي

ابتسمتلها و الدموع بخدي: اكيد اللي عانيته جاي تشوفي مو ؟

ما افتهمت شنو احجي بس من شافتني ابتسمت اجت حضنتني حيل، بقيتها بحضني و امسد على شعرها

-اكو عمو يأذيج ؟
بقت تحجي السانها ثكيل ما افتهمت عليها، رجعتها لحضني و گلت الها : بعد منا و جاي ما اخليج تروحين ويا ماما تبقين ويانا اني و اسامة ماشي

بقت بس حاضنتني و ما اعرف شدردم

لهناك كعد اسامة وكعدنا كلنا نضحك و نسولف و لعبتهم قالا بالا وهي انطلقت تضحك من كل گلبها

سمعنا صوت بابا كعد، كمنا مستغربين تباوعله
-هاي من يمتى ابوي يكعد الصبح يلبس و يطلع ؟
كل عمره يكعد الظهر ..

ما باوعلنا و لا كال شنو تحتاجون ، بس سد الباب و راح، رحت للمطبخ لكيت امي مبقية الف دينار ع الكاونتر

:اسامة ابقى يم اثار بس اروح اجيب ريوك و صمون و اجي

لبست نعالي و طلعت، اتمشى بالفرع، شفت سلمان ابو الرعاويص نايم بالشارع ع الرصيف ، تقربت يمه

ضربته برجلي: سوووويج

فز من النوم : الوصخة ليش تضربين

-ليش نايم بالشارع

-عمه حليمة طردتني من البيت

-ليش ؟!

جاي احجي وياه شو هذا كام من مكانه ونزع بجامته وطلع : خب هييييي هيييي لا تنزع بالشارع يمعووود صدك انت سويج

ردت اعوفه و اروح
: بس شوفي بس شوفي ديار
باوعته جسمة صاير ازرگ : هاي شبيك مضروب منو مسوي بيك هيج

-هي ضربتني بحديدة على ظهري و على رجلي بس رجلي توجعني

-الله لا ينطيها العمصة هاي ليش هيج مسويه بيك ؟

-لان اكلت كيكة رغيده، و رغيدة الوصخة ضلت تبجي هي كتلتني و طردتني

-كوم وياي كوم، راح اروح اجيب ريوك و اجي

-رجلي توجعني

-اتجى على ايدي خل اخذك لبيتنا

عاونته و مشيته لبيتنا و كعد بالكراج و صحت اسامة و اثار يكعدون يمه على ما اروح اشتري وارجع

طلعت للشارع امشي، واحجي ويا روحي : اذا اجيب ب٥٠٠ بيض و صمون ب٥٠٠ ميكفينا اني و اسامه و سلمان سويج و اثار

خل امر على مها اشوف بيني وبينها اذا عدها خبز تكدر تنطيني و الباقي اشتري بيه بيض و جبن

مشيت لبيت مها، باوعت لبيت ابو رافد سياراتهم بالباب و من بينهم سيارة خالد ، اخذت نفس طويل و فتت لبيت ابو امجد

دكيت باب المطبخ لكيت مها و ام امجد كاعدات بالهول ، صاحت الحجيه : تعاي بنيتي لا ادكين

صبحت عليهم و سألوني على ابوي كلتلهم طلع و مها طارت من الفرح وبقن يسولفن ويايه، اخر شي كلت الها: ما عندج خبز ؟

-اي عندي خير من الله

الحجية : جنج على خبز بنيتي الحلوة دويره

ابتسمت الها، طلعت الي ٥ كرص
مها:-هاي بعد لو كافي

-لا لا كافي

-هاج هذا عجين مال كباب البارحة زاد مني بالعشا اخذي محد ياكله

- ماشي

-اي واكلج ديار

- ها ؟

-الظهر رجعيلنا، طابخين ثواب لعمي المرحوم وراح اعزلج جدرية

-واصل ان شاءالله

عفتهم وطلعت لاسواق الحجي عمر، اخذت ب٥٠٠ بيض كلت اسوي ويا عجين الكباب يكفينا، و خل اخذ وياي هيج حلويات النا نسلس بيهن، اخذت جبس باوعت للمصاص : عمو هذا ١٠ بربع مو ؟

-لا ٤

-شنو عمو كول يا الله

-شوفي ولج تشترين لو تولين منا ؟

-على كيفك عمو هاي اخذنا ٥ و سكتنا بس لا تاكلنا ترا ما ماخذين بلاش و بعدين الينطي الله ينطي انت ما تريد الله ينطيك ؟

-ننطي للمحتاج مو المثلج

ضجت من جوابة، درت وجهي و كلت اله : شكرا عمو

-تعاي تعاي بنيتي لا تزعلين انت حبابه و خوش بنية بس من تجين تنهبيني نهب وما تنطين غير هالربع و الخمسمية

-ما يحتاج عمو بعد ما اشتري منك

- لا لا تعاي تعاي اخذي هذا نص كارتونه جكليت هو شويه يابس بس تكدرون تسوونه مثل المصقول اتمصمصون بيه .

باوعتله گلبته، شلت وحدة اكلتها: اي يفيده مشكور حجي

-هلا بيج بنيتي

اخذت الحلويات و الريوك والخبز و الكباب ورحت للبيت .. صدك لو كالو الرزق من الله يجيك بلا حساب

مشيت للبيت سويتلهم ريوك وكعدنا بالكراج نتريك باوعت لسلمان ياكل سريع : خب هييي الخايس على كيفك شنو تاكل ويا عميان نريد ناكل

-الوصخة اسكتي جوعان

-وجوعتهم خوما بس انت
باوعت لأسامه الفاهي كوه ياكل و هاي اثار تاكل بلا خبز، صكعتها على راسها : اكلي عدل مو خدامتج اني

برطمت و مكامت تاكل : تاكلين لو اجيب النعال ؟

اخذت خبزه و كوه كامت تاكل و هي تباوعلي بطرف عيونها

خو هذا الفاهي اخوي معصعص باقي بس فاك حلكة و يحجي و ذوله ما خلو شي بالصينية، سويتله لفه و خليتها بيدة و كلتلهم : من تكملون جايبتلكم حلويات

هم من الفرحة حتى الريوك عافوه ..
: والله اذا ما اتخلصون الريوك وتشبعون نص فردة نعال ما انطيكم ، شنو تريدون تخلصون حلوياتي

رجعوا اكلو بسرعة
سلمان: سويلنا عزيمة عزيمة خل ناكل حلويات

-سم بگلبك شنو مخلفتك و ناسيتك اني

-الوصخة لا تخليني اكتلج

-بيك خير اكتل مرت ابوك و اختك مو كدرتك عليه ابو الرعاويص

-هن غير ثنين

-ثنينهن كتلنك ؟

-اي

كمت من مكاني : كملو ريوك هسه ارجع

رحت لبيت اهل سلمان شفت الباب اكدر افتحه ، بقيت اباوع بيه و اتمعن

: فلا ابيتلها هالسوايه السوتها العمصه فوك ما خذت ورثه و حق ابوه وشلت حاله فوكاها طاردته من بيت ابوه،اني الج حليمة العمصة

باوعت زين البيت بيه دجة و بعدين درج تنزل للكراج يلا تفتح الباب .. خطرت ابالي فكرة
رحت ركضت للبيت ، اخذت استكان زيت
-كومو وياي يلا

سلمان: رجلي توجعني

-ابقى انت اسامه تعال
سلمان دير بالك على اثار مو تعوفها واذا اذيتها الا اصلخك

اخذت اسامة و رحت لبيت سلمان، فتحت الباب على كيف و كلت اله : اسامه ادهن الدرج و الدچة بالزيت على كيفك بلا ما اطلع صوت و اطلعلي

- خاف تشوفني

-اذا طلعتلك اني ادخل احجي وياها و نطلعلنه حجة و نفلت

-شنسوي يعني

-هسه انت بس نفذ اللي گلت الك عليه و معليك
الصارت صارت و الما صارت نعوفها لله

راح على اطراف رجليه دهن الكاعية مال الدرج و الدچه زيت بسرعة و رجعلي .. سديت الباب وراه
وبأثنين اديه ربدت الباب حيل خبصت البيت عليهم خبص

طلعت حليمة العمصة تركض: ها هاا ها منوووو.......ويا ما جاي تحجي و تركض زلكت رجلها بالزيت وعدل وكعت على ظهرها
كامت تصرخ وتحاول تكوم و هي تصيح : يا يمممممممممه خايبين متت تكسررررت ضلوعي
و طلعت بتها تركض

-افلت اسامه

ركضنا اني و اسامه ميتين من الضحك بس هلكد ارتاحيت، فتحت باب البيت سلمان بعده يعلف ، ضربته على راسه
: خذتلك حقك من احليمة العمصة رابع مربع يالخايس

-الوصخة وين الحلويات يلااااا

-خو همك بس بطنك، بس لا صدك يلا خل نحتفل
رحت جبتلهن الحلويات طشرتهن بصينية و كعدنا ناكل ونضحك.

.................

اسماعيل : مرحبا حجي

- يا هلا و مرحبا تفضل اغاتي

-والله حجي جاي اسأل عن حجي محمود

-وصلت ، انا حجي محمود ... كول

- والله دزني عليك واحد.اسمه ابو ساجد و دز بيدي الك مكتوب
طلعت الورقة من جيبي و انطيتها اله، باوع الورقة تلفت يمنى يسرى وكال : فوت جوا نحجي

فتت وياه : انت جنت بالسجن

-اي والله حجي

-تشتغل شغلتنا و تضم سرنا ؟

-اني عد عيناك ححي انت امر و اني انفذ، والله حجية مليت ادور شغل و عائلتي بلا لگمة و شايل همهم شتخليني اشتغل
بقى يحجي ع الشغل و يفهمني وكال
-اكو شي محتاجة انا هسه اذا سويته الك 2000دولار

- الفين دولار يا نعمتك ربي گلي وانه راسي تحت جدمك

-رايدلي شخص ينفذلي عملية جهادية على معرفتك تجيبه النا وكتها تصير منا و بينا وتكوم تلعب بالفلوس لعب

بس هاا لو طلعت حجاية من حلكك و كشفت امرنا اعتبر من باجر بيتك مفجر و انت و عائلتك تنذبح

-لا لا حجي اني راح اشتغل وياكم و ان شاءالله ايد وحدة و ما اخيب ضنك

-عفية بيك اجرك عند الله عظيم، و اكو شغله ثانية

-شني هي ؟

- باجر تطلع ويا اخوتك تنفيذ عملية صغير

- شني هاي العملية

- عملية اختطاف و هاي صورة المختطف.....يتبع

☆☆☆☆☆☆