المراهقة والأربعيني الحلقة (65)

المراهقة والأربعيني

 

الجزء الثاني

الحلقة  (65)

دك الباب طلعت المرا اللي اسمها اسمهان :- هلا .. هلا ابو حرب هلا بيك .. شنو هلمفاجئه ..

-هلا ام سيف هلا بيج

-تفضل تفضل

-بس زوجتي وياي

-ها اي هلا بيها ..

-سحب ايدي وفتنا هي ابتسمت بوجهي واندارت تسد الباب ..

فتحت النا الأستقبال ..

صراع :- شلونكم احوالكم

-بخير عساك بخير انتم شلونكم..

فاتت ام صفاء :- هلا هلا ابو حرب هلا يمه .. شلون شلونك زين شلونك بعد .. واجت تبوسني وتسلم ..

صراع :- عجل ابو صفاء وينو ؟

-والله طالعه هسه نخبره .. تفضلو .. ولج اسمهان مي بساع

صراع :- لا مشكوره قبل شويه وكفنا بالطريق اكلنا وشربنا بس خبرولي ابو صفاء

-اي هسه .. بس شبيها زوجتك شو مو على بعضها

-تعبانه شويه

-ها خير ان شاءالله

-كعدنا اثنينا ..وهن طلعن .. فات ابن اسمهان عمره يطلع ب٨ سنوات ..

مدلو ايدو صراع :- هلا بالبطل هلا ياب .. وباوسو .. واجت بنيه ثانيه هم سلمت و كعدت ..

.. فاتت اسمهان بصينيه بيها كليجه و جاي .. وكالتو مد ايدك كليجه البارحه سويتها ..

.. هز راسو و تربع وخلتها گبالو .. اخذ بس الجاي .. وسألها :- خابرتو ابو صفاء

-اي هسه عمتي خابرته

كام هو .. عجل انه اروح بشغله نص ساعه وارجع

-لا وين هسه يجي

-عندي كم شغله ..

... فاتت ام صفاء .. دكك عليها :- خاله عينج عليها تره ما تحجي

-يااا ما تحجي ليش

-انعكد السانها وما عاد تنطق وهل جبتها وجيت اخذها دكتور  .. فرغيلها غرفه خل ترتاح وتمدد انه شويه وارجع ..

.. كمت من مكاني كضبت ايدو واهز براسي .. بمعنى لا تتركني

-ليش خايفه عمري ام صفاء مثل امج وهينا ام سيف مثل اختج .. ارتاحي بس اروح على ولد صاحبي عندي شغل وارجعلج ما اتأخر

بقيت كاضبه ايدو بمعنى ماااااتروح

دحك على ام صفاء :- خاله بس فضيلها الغرفه ..

-اي تعاااي خاله قابل احنه غرب تعالي ...

-مشتني عنو و دخلتني جوا وهو ضل برا . درت عيني يريد يطلع من الباب واسمهان وصلتو تسد الباب

فتت لغرفه .. كعدتني .. وبقيت لا اني متمدده ولا اني كاعده .. وين عافني وراح .. تركوني وحدي واسمع حجيهن بالمطبخ .. عن الغدا ..

جريت موبايلي من الجنطه واشتغلت عليه دك مخابرات وكلما يرد اقفلو وارجع اخابرو ..

سمعت صوت ابو صفاء اجا .. دزيتلو ابو صفاء اجه يلا تعال

مارد .. اخابر اخابر اخابر .. اخر شي رد :- بالقران جاي يابه ومحمد جيت راح اندعم هريتيتي هري بالمكالمات يولو والله جاي

شويه وسمعت صوته برا وهو يحجي وي ابو صفاء ويسلم طلعت من الغرفه ... ورحت يمو ..

سلم عليه ابو صفاء من ما رديت .. اندرلو :- ها شو ما ترد

-تعبانه ومعكود السانها .. صار عدنا حادث وبنت اخوس سعد انطتك عمرها

-يا حول الله ..

-اي والله و هي خافت وانعقد السانها ..

-البقيه بحياتكم ما تستاهل و الله ..

كعدت يمو بالاستقبال .. صبولنا غدا وتقدمنا كلنا ع السفره .. وهم يسولفون .. انتبهت على شغله ان ما سألو على خطفو وكان شايفينو وسائلي و الامر معدي عدهم ..

ياكلون وهم كلهم كعدو سوالف وياه .. وهو مخلي مخده تحتو وثاني رجل وكاعد لان لابس بنطرون يتقيد بالكعده ..

ما اشتهي وهم يسولفون هوايه .. احس دوخوني .. درت وجهي ودحكت اسمها .. ادحك بصراع بقيت مركزه بيها .. كن ما شايفتني .. مندمجه بي سرحانه ...

اندرتلو هو مدنك ياكل ويستمع لابو صفاء يسولف .. ما شايفها بس هاي ما شالت عينها عنو .

.. ندستو .. دار وجهو .. هاا ليش متاكلين

-اشرت على اذتني و اشرت عليه وهزيت ايدي بمعنى موبايلك وين .

-موبايلي

-هزيت راسي اي ..

.. هم كامو يدحكون علينا يردون يعرفون شبيه

صراع :- سيوفي انطيني هذا الموبايل ع الشحن .. واندارلي ليش ما تاكلين    .. ما رديت ..

جابلي الموبايل .. كتبتلو ليش جبتنا هينا .. ليش ما اخذتني للشقه

-مأجرها الشقه ما موجوده

- انته جاي لهينا قبل ؟

-اي طبعا ليش

كتبت :- لا يعني ورا ما رجعت من الخطف ؟

-اي جيت قبل شهر

-شو ما ادري

قرأ:- ابتسم .. ما طولت بيومها رحت الصبح جيت العصر .. اكلي الناس كاعده عيب

- اني ممرتاحه هينا اختنكت خلينا نروح

-اي هسه بس نكمل غدا نطلع للدكتور .. بس اكلي كملي ..

-عاد انفتحو يحجون بسالفتي وليش متححي وام صفاء تكلو تصير هوايه ذيج المره وحده رجلها مات وهم انعقد السانها

وهو يجاريها بالسوالف وارد ادحك بصخمان بعدها ادحك بي تاكل وترد ادحك بيه .. واليقهر غي هم حلوه مرا تلاثينيه بغداديه حلوه بيها شبه من الممثله هند طالب ..

وهذا ابو راس مندمج يسولف واني النار گامت تغلي جواتي بودي اكوم اكلها ..

ادحكلو .. انوب صاير حلو .. لان ترك الجيش كام يربي لحيه وشعر يعتني بي وضعفان ما مثل قبل ماروس ملامحو متغيرا .. وتحسو يلمع كد ما معتني بنفسه والنظافه باينه بي ..

كمت احوس بمكاني .. وهو مو داري عنها لو حاس جان عرفتو من نظراتو .. طمت افور اغلي .. هو عود ليش هيج يترتب .. مو كبر خلص صار شايب يترتب شكو ...

احس اختنكت لا اكدر احجي ولا انطق .. احس روحي محبوسه بداخلي .. كمت ابجي .. دحك بيا

-هاي شبيج ..

-عفتو وكمت رحت للغرفه كلهم انصدمو .. هو راح غسل واجه ورايا

فات "- شبيج يولو شجالج ..

- كمت اخزر بيه وانفخ وادفع بيه .. واون ما يطلع حجي

- بس اهدي اهدي .. على كيفج وكليلي شنو تردين

-كمت اضرب على راسي راح اجن اريد اححي اختنكت ..

كمت بس اون وابجي وادفع بيه .. هو انخبص ميعرف على شنو تعصبت بس يهدي بيا ..

موبايلي ع الميز يشيلو ويحطو بيدي عود كتبيلي خل افتهم .  بس الحراره من الغيره شبت بجسمي ..

لا اكدر اكعد ولا اهدى وفوكاها ما اكدر احجي .. احس واحد حابسني بمكان حيل ضيك

يلزمني الموبايل واتركو ويرد يفتح ايدي ويكلي :- بس اهدي وكتبيلي ..

جريتو واريد اكتب الأدين ترجف حتى تيهت مكان الحروف اسحك وارد اكتب .. بحركه كتبتلو (هاي اسمها كحب........ ما احبهااااااااااااااااااا)

قرأ لج عيب لا تكولين هيج .. وهاي شنو مكرره الحرف الاخير هواي عود دتصيحين ؟ هههههه

كتبتلو :- راح احركك لا تضحك اريد اطلع مناااا

-ههههههههههه شو تعالي يولو .. يبوووه حتى بعصبيتج وانتي خرسه تخبلين مال اكل بالقرأن  ..

ولفني بحظنو وقفل ادي اريد واخرهم وهو يبوس بركبتي و عض اذني خفيف .. نفرت بسرعه كزبر جسمي وعصبت اكثر ..

كمت اضرب بيه بحرگه وكعدت ابجي

-ماشي ماشي .. كومي خل نطلع .. يلا كومي بدلي ..

-طلعت غسلت وجهي ع المغسله .. ودخلت رتبت الحجاب ..

دحكت بالغرفه فجأه .. هاي غرفة النوم المن ؟ وليش هو يدخلها عادي وينام ؟

اندرت اريد اسئلو .. ما اكدر .. موبايل مدري وين .. عفتوو وهو يسألني :- شكو تردين شيء ؟ اشري واني اساعدج .. .

- هزيت راسي لا وكملت لف بالحجاب .. يمكن خاليها اله .. لأن هو ابو البيت ..

اخذني للدكتور يصير بمنطقه الحارثيه اسمو دكتور فالح .. دخلنا انتظرنا .. شوي وفتنا سال عليه صراع وكعد على جنب وحجالو حالتي

.. كعدت كبال الدكتور و بقى يسألني واني اكتب .. فحص اذاني حاول بنطقي ..

اخر شي كالو :- زوجتك ع الأغلب ما بيها شي لأن دا تتذكر كلشي وسمعها ممتاز لكن يمكن تعبانه نفسيتها ومتعرضه لصدمه مسببتلها خلل في النطق ..

هي قادره ع الكلام بس حاليا حالتها تعبانه .. وفرولها الراحه وان شاءالله ما بيها شيء ..

طلعنا منا وكلشي ممفتهمين بس يكول ما بيا شي عجل ليش ما احجي .  اخذني فررني شوي نزلني نتمشى بالاسواق ...

كاضب ايدي ويمشي .. ما ردت اي شي شنو اللي يأشرلي عليه .. اهزلو راسي بمعنى لا .. لحد ما كال عجل خل اخذج اعشيج .

دخلني بمطعم و اكلنا وشربنا .. الوضع هادئ .. كال :- حاولي وي نفسج وانطقي الأحرف .. ا .. ب .. حتى شوي شوي ينطلق السانج ..

.. حاولت مدا يطلع

-ارتاحي لتعبين نفسج خلص

طلعنا من المطعم بقى يفر بيا بالسياره وليل وشوارع بغداد .. هدئت .. ونعست .. بس گبل لا انام    وصلنا متأخرين للبيت ..

دك الباب .. ردت فتحتو اسمهان ... كال الها :- نايمين الحجي و الحجيه مو ؟

-اي نايمين بس اني كاعده وي ابني . تفضلو ..

-اخذني ورحنا للغرفه .. نزعت الجبه .. .. و احس احتاج حمام .. طلعت

الحمام كبال الهول والحجي طلع من الحمام فات تمدد بالهول وكاعد ما نايم ع التلفزيون

رجعت للغرفه دحكت صراع دا يبدل ..

اشرلتو احك براسي واشر عود اريد اسبح

-شنو مفهمت

-رجعت اشرلتو

-راسج يحكج ؟

-هزيت راسي وونيت بانزعاج بمعنى لاااا

-بيج گمل

-تخصرلتلو .. اضحك لو ابجي على حالتي ..

-مفتهمت تريدين تسبحين لو شنو

-هزيت راسي اي

-عجل ما تسبحين كاضبج انه

- بعد ما يفيد اشاير لازم اكتب .. جريت موبايلي ودا اكتب .. اندكت الباب .

صراع :- منو

اسمهان :- اني اني

-تفضلي

-بس جيت اسأل خاف تحتاجون شي قبل لا انام

-ياريت تاخذيها للحمام خاف تستحي ..

-اي امشي على شنو تستحين ..

-مشيت وياها واخذتني للحمام وكالت فوتي .. سبحت وكملت وطلعت .. رجعت الباب مفتوحه وصراع كاعد واسمهان واكفه تحجي وياه...

.. اللي انتبهتلو هو ما يرفع عينو بيها مدنك من يحجي بس هي تحجيلو على سيف ابنها

فتت .. اندارتلي ..

حجه هو :- سهله ان شاءالله باجر اني اتصرف

طلعت وسدت الباب :- تخصرتلو ..

عقد حواجبو :- ها بويه شبيج شو تخصرتي

-اشرتلو عليه وهزيتلو ايدي بعصبيه بمعنى شكو ؟ ..

ضحك واجه :- تدرين حتى بسكوتج تخبلين هيج الخرسان حلوين ..

وحضني .. جريت نفسي منو وسحلت الموبايل كتبت ( لا تغير الموضوع واحجي لا تطلع روحي )

قرأ:- يولو موضوعيش

-اشرتلو ع الباب وكمت اون اااااااااااااا ..

-هههههههههه يتبه خرب بغيرتج .  لج ماكو شي والله على شغلة مصاريف ... جنت دا تحجي ويايه

-كتبتلو :- عجل ليش من فتت نهيتو الموضوع وما حجيتو گبالي ؟؟؟

-لأن خلصت السالفها وكلتلها انه اتصرف وصرفتها حتى انتي تاخذين راحتج .. مو ما تحبيها ..

... اخذت نفس .. واندرت عنو .. ما اعرف ما شاكه بي لأن نضراتو الها مال واحد يحترم وميرفع عينو بعينها يحجي مدنك ما بيناتهم صله بس هي ساقطه وين ما تشوفو تجي ..

احس اكو شي غلط وممرتاحه .. بردت حيل .. واني بس بالبجامه و التشيرت .  الغرفه ما بيها تدفئه .  كضبتني رجفه  ..

شفت هو تراك الو بالجنطه وهو لابس كلابيه .. رحت لبست التراك مالتو البجامه شطولها و القميص شكبره .

هو يدحك بيه متفاجئ .. هاي شبيج شلبستي

كعدت ع التخت بجامتو طويله شديت النهايه منها وسويتها الي مثل الكالون بس الشغله فاكسه تقيد بس المهم ادفى .

-ولج بردانه

-اشرتلو انته روح خل تفيدك سهومه العوجه .. بس شكلو ما افتهم واني اشر و اعيب .. تركتو وتغطيت .

-الك بيها اراده ربي .. جان السانها شطوله ونص عكل ولا عاد هسه راح السانها .. عجل تخبلنا

-اندرتلو ..

-اتقرب بهمه    وحظني يولي لو تضلين فد اسبوعين زياده بلا السان الا تخبلين والله

عفتو وردت انام بقى يتحايل ويجي منا ويروح منا ويصيج :- تراكسودين يولي خافي ربج ادري  برد هو لو هولاكو والف درع لابسه حتى اجدامج شادتهن شلون سالفه هاي

ماكو قفلت ولا اجيت وياه ابد ..

عاد كال يلا شيهم هنه يومين ونصير ابيت وحدنا .. وعود بعدها ادللي الا افين حظج بالقران  ..

تركتو ونمت .. وهو بقى حاظني وحاط راسو على راسي ونام .  بس الصدك دفيت  تراكسودين ولحاف وصروع ..  صارت تمام ..

الصبح كعدت ب العشره .. هو ماكو .. نزعت بس البجامه مالتو وبقيت ابجامتي وتراكو واصل شويه شبر عن ركبي بقيتو و  طلعت ..

هم متريكين ومخلصين شغل وكاعدات يحجن بالغدا..

استحيت هم زين خرسه وما احجي .. جان صرت بموقف محرج

ام صفاء :- هلا خاله كعدتي صباح الخير

-ابتسمت بوجها .. اشرتلها على الغرفه وعلى حلقتي .. بمعنى زوجي وينو ..

بس ما افتهمت .. درت وجهي اخذت نفس .. مليت من هلوضع .. احس قفص بداخلي و الكلام محبوس بيه واريد اطك .

-شنو خاله شبيج قصدج على ابو حرب

هزيت راسي .. اي

-طلع هو وابو صفاء بشغله شويه ويرجع حبيبه

.. اسمهان ادحك بيا ما شالت عينها .. سوتلي ام صفاء ريوك .. وحطتلي ع الطبله وكالت كعدي .. اشرتلها ما اشتهي

ما قبلت الا اكعد .. كعدت واسمهان بعدها ادحك بيا تكول تلفزيون گبالها اخر شي نطقت

-لعد ليش لابسه جاكيت تراكسوده

- استغربت سؤالها ..شنو من صلافه هاي تراكسوده حتى مو تراكسود صراع .. عفت وكمت رجعت للغرفه كضبت الموبايل ودك مخابرات مخابرات مخبارات ...وهو يرد اقطعو وارد اتصل .

لحد ما دز رساله .. راح اجي هسه كافي تتصلين يني جماعه ..

تركتو وكعدت على نار .. ما استحمل وحده تحط عينها على رجلي اموت حتى لو نظره .. ابقى انطحن حتىلو هو ما عندو شي بس هيج اتخبل ..

احسو هو من حقي و من ممتلكاتي الخاصه ميصير وحده تتجرئ تتعرضلو .. ما استغرب لو حرگتها

... بقيت كاعده بمكاني مخنوكه حيل وهو مرت نص ساعه وماكو .. لحد ما اجه اني شبعت بجي ..

فات للغرفه دحكني ابجي تخبل :- على شنووتبجين وليش .. طفله يولو انتي .. كتلج راجع تقهرين نفسج وتوترين حالتج على شنو ..

كتبتلو :- ما احب بغداد اتنرفز هينا رجعني للرمادي

-راجعين بس نخلص غدا

-هزيت راسي وكمت اضرب رجلي بالكاع وما اقبل

- شتريدين شبيج بس كعدي .

... مشيت حطيت ملابسو بالجنطه بحركه اشيل واطر بالجنطه .  لبست جبتي وشلت الحجاب واشرتلو .. هسه اروح .

-حتى بهاي حالتج ما تعوفين عنادج .. كتلج نتغدا ونمشي كعدي عيب منهم طابخين واروح افشلهم ..

-طريت الجنطه وكعدت ع السرير كمت ابجي .. بقى واكف محتار .. اجه

-يولو ما نتأخر .. نص ساعه وتصير الصلاة ونتغدى ونطلع .

درت وجهي منو وابجي .. حظني خلص خلص .. كومي يلا بس لا تبجين كوني دشوف وين تصل وياج ..

كومني لفيت الحجاب وطلعنا .. ابو صفاء تخبل كالو ما اطلعو الا تتغدون الغدا جاهز

صراع :- دايمه بالله شمو جاي اجربكم بس بالقران ما اكدر دحك تعبت حالتها ما اعرف شبيها  .. يدحكون عليه عيوني حمرررر من البجي

من شافوني متوتره واريد اطلع ما اعترضو .. اخذني ورجعني .. والطريق كلو ما نطق .. توقعتو راح يعصب ويلوم تصرفاتي وعصبيتي .. بس تفهم حالتي وما ناقش .

رجعنا للبيت .. فتت .. احس قبض روحي .. كان الطفله صارت كبالي وتضحك .. فوت السياره للكراج .. ادحك للمكان الطلعوها منها ..

ودموعي صبت ..

راح سد الباب هو .. وجا شافني ادحك بالمكان وابجي

:- لا تهتمين هذا قدرها .. المهم هسه ترتاحين حتى تتحسن حالتج وترجعين تحجين ..

... جانو ناس بالبيت واقارب جايين يعزون .  فدخل هو من باب الاستقبال واني من المطبخ ..

فتت نور و ضحى واكفات ..

نور :- ها شلونج

-هزيت راسي ومشيت فتت .. لكيت الحجيه كاعده ويمها ام سعد ونوال و ٣ نسوان من كرابتهم

الحجيه :- شكالولج .

-صفنت بيها .. هذا شنو اكولها .. بس كعدت يمها ما رديت

-شنو ما انطوج علاج

-هزيت راسي اي

ام سعد :- حوبة الطفلة اخرست الله ميضرب بحجارة يول اكص ايديا اذا مو انتي الي دافعتها من حقدج عليا

ولأن حفيدتي هاي وبنت ابني

الحجيه :- شنو هالحجي حبيبية مو لهدرجة هذا قضاء وقدر شتسوي

- لا هالصفرة من فاتت علينا ونحن ممرتاحين من عابد اللي جتلو اخوها الداعشي الى ابنج الي  رادو يموت

ورزقنا الي انكضب وهسه هالطفلة الي راحت

اجدامها شر علينا مشفنا الراحه من فاتت علينا

هي تحجي ونوال تتحسب وتدعي عليا  واني ابجي عفتهم وطلعت وهي تغلط وتسب وعمتي تقنع بيها وتهدي لا تصير مشكله بس ميفيد ..

صراع ما شفتو بعد لليل يلا طلع .. ومغثوث حيل .. فات نام بلا ما يحجي ..

لثاني يوم .. الكل ما يدحك بوجهي .. ناس تصيح عليه امثل وناس تكول هاي حوبة الطفل

واشكال الوان الحجي اسمع وما اكدر احجي وارد بس دموعي تشرح وضعي ..

حاجيت صراع على انو نروح لبيتنا شعدنا باقين ..

كال :- بس خل تمر اسبوع على وفاة الطفله وبعدها نروح نغسل البيت نأثثو ونكعد بي ..

بقيت اصبر روحي ان بس هذا الاسبوع واخلص وحتى هو يكولي تحملي شتسمعين غلسي .. هانت

... اجت هيام وكعدت ويايه تسولف .. وعرفت منها ان بيوم العز صراع متكاون وي الحجي وسعد برا وعمامو لايمي ..

ان مرتك هي سبب بموت الطفله انت تركت حرمتك ما حاسبتها وترجع على امها ..

كايللهم الصوج صوج الام .. الطفله مسؤليتها وانه اكثر من مره صحت الطفله وصخه وترول على ملابسه وما نكضب من الدبك وهي مندمجه بسوالفها ..

وانه الكومت حرمتي كلتلها غسليها اخدودها اكلتها الحلاوه تحسست .. جان حست على روحها وكامت ..

كالو انت شنو ادافعلها .. مرتك ما رجعت الطفله لامها ...

زاكح بيهم .. عجل ذبتها بالشارع غسلتها وحطتها بالكاع والطفله النهار كلو تتمشى بالبيت وتلعب .. تردولكم شماعه تعلكون بيها اخطائكم ..

الصوج صوج امها وابوها من ترك المنهوله مفتوحه ونحن بيتنا مترزس جهال شگال گلبو من عافها ومشى ..

عاد مجاوبو عمو صالح كالو والله وكت زلامنه الحوك ضاله الزعاطيط تخيط بشواربها وعادي هله لجلها ..

وصراع كايم يصيح شلون يحجي ويايه هيج ومتكاون صراع وعمو ويكلو انت دفنت بنتي وصراع يسب ابنتو ..

فاضين المشكله وعزالين عمهم عن صراع وكاعد الحجي وعمو عزام على ابو انت شسوت بيك هلمره ضربت مرت ابوك لاجلها .. وهججت اهلك وهسه موتت طفله وانت ما تحاسبها وفوكها تريد تترك ابوك وتعزلها ابيت .. شجالك

صراع فايره اعصابو ..  كايم متكاون وياهم وتاركهم وصاعدلي .. لهيج ما يحجي وي الحجي لان الحجي ذايعها على ابو صراع مشتري بيت وراح يهدني وانه رجال جبير حتى يكعد هلمصلاويه ومحد يحاجيها ..

صراع حيل متضايق .. لهذا شايل وجهو عنهم وطلع وياي لبغداد وتركهم ..

من رجعت كاعد وياهم ومستقبل ناس بس الحجي يبسمر بي على انه ضليت وحيد ومحد يسندني وكلها راح تعوفني سعد راح يطلع المؤؤجر ويروح لبيتو و صراع راح يشيل واضل انه وحيد ..

صراع ما راد وهذا الحايط لو حجه صراع يحجي .. مغلس على وضعهم فد مره ..

ماكو كلمه تغث ما سمعوني و سمعوه سممونا .. هو يكولون يمشي ويرا مراهقه .. وهو يتخبل من هلكلمه ..

يكلهم شسويت ومشيت بحجيها ...انه مشتري راحة بالي واريد اطلع تعبت .. الى متى انه متحمل فلان وعلان ..

ابويه انه ما تاركه بالشارع .. تركتلو بيتي وعايف وياه اخوي ومرتو تخدمهم.. شسويت جررررمت كل الاريدو بيت اعيش بي مرتاح وبلا مشاكل

واني وين ما افوت .. الله لا ينطيها اخذته لاعبه بعگلو .  مصلاويه حقيره .  وجهه ينكط سم .. واشكال الوان الحجي سمموني كرهوني بروحي ..

ويكومون ويكعدون يكولون بنت عمو ذلها وباع بيتها وكعدها غصب وي اهلو وهلزعطوطه المصلاويه يبنيلها قصر ويكعدها خاف واحد يسمعها حجايه ..

وهسالفه ما تفارك السانهم يروحون ويرجعون بيها ..

حسسوني اني بايكه ابنهم .. مانعتو منهم .  ولا كانو البيت هيانو بصفهم شمرت عصا وهو رجلي زنريد بيت خاص .. لا ماخذه حق من حقوقهم بايكه جبيرهم والكادود مالتهم..

فوك هم الساني اللي شبعت قهر وما اكدر احجي .. حجيهم وسمومهم الما يخلص..

مر اسبوع وهاي حالتنا اصلا اكره انزل جوا وهو قله ما يتواجد بالبيت .. يمكن انزل ساعه .  وهاي الساعه اتسمم بيها واضل مقهوره وشايطه منها اليوم كلو .

من نور وضحى  الشادات ويايه ع الشغل .  لو ام سعد .. لو نوال التكوم تكعد تصيح موتت بناي لو ام سعد اللي حجيها مثلها ومثل شاكلتها

الا ما فد عصريه نزلت .. الحجيه كاعده وصراع بالكراج هو ونائل بالحديقه وهن بالهول كاعدات .

شافتني ام سعد واستلمتني البومه الفكر .. فكرتنا موتت البنيه ومترهيه تريد بيت ونوال دخلت وياها ع الخط وعمتي تسكت  ما تريد مشكله وذن يسمعن حجي ..

عاد انفجرت بوجوهم وصرخت بكل صوتي :-  كااااااااااااااافي الله يااااااااخذكم واخلص تعبت منكممممممممم

شلت الصينيه مال الجاي و كلبتها وكمت شايطه اشيل واطر ورحت للمطبخ اصرخ بجنون وابجي .. وشكو شي ع الكاونتر كسرتو .

جان جدر موجود شلتو وطريتو بنص الكوانتر كسرت البلور والمطبخ من البهارات صار مهرجان الوان واني من ضمنه .

واشيل واشمر بحركه وابجي واكولهم تعبت شطالبيتي شسويتلكم انيييييي ..

نور تجر بيه وضحى و الحجيه كامت و الحجي يصيح عليه .. واني اصرخ بكل صوتي انجنيت ونائل يسكت ويدفع بامو النزلت مصايح..

وما سكتت .. الا ما فات صراع من برا وصاح ولج هسسسس صووووتج ..

... سكتت ..صفنت واندرتلو ..  اني حجيت !!

الحجي:- وعساج لا حجيتي افتكينا من صوتج وطلايبج اسبوع

صراع :- ابتسم واجه يمشى من الكزاز و الهوسه السويتها .. نازله الساحه بقوه يولو .

كضب ايديه :- الحمد لله على سلامتج ..

حظنتو اضحك :- اني حجيت اني حجيت هههههههههه

الحجيه ضحكت :- يلا بالعافيه رب ضارة نافعه .. هجمت البيت وحجت

صراع :- فدوه يولو المهم غردت والله مشتاق الصوتها

-عجل اسستلم اللغوه منا وهيج ..

الحجي ما عجبو هز ايدو .. بس ام سعد فرفحت لان كسرت غراضها   كامت تصيح شلل بيدها ان شاءالله كلهن يخسرهن رجلها اذبحها لهلعرمه

صراع :- مدام غردتي كومي لبسي خل اخذج للبيت نغسلو ..

- ما احس اسمع واحد كد ما فرحت اني رجعت احجي ..

كمت لميت الكسرتهن كلهن بالزباله ومسحت المطبخ وطلعت وياه اني وحلا .. مر على هيام اخذها ورحنا غسلن البيت من فوك ليجوه .

لليل يلا رجعنا هلكانين تعب .. كتلو على هلتعب راح يرجع الساني يختفي ..

-لا تخافين انطلق بعد شيكضبو صاروخ وثار ما يرد ..

فرحت فرح ما طبيعي واني وياه رحنا اخترنا الغراض الزوالي الاثاث    ويوصي وهم يبعثون واني وياه وهيام ونائل وعلي وكلنا انشدينا بالبيت ترتيب

٤ايام يلا خلصناه على ادق تفاصيلو .. طلعنا من بيت الحجي سلم على ابو .  بس الحجي ضاج .. كالو خل يكون بعلمك انه ما راضي    باس راسو وكالو ترضى ان شاءالله وتتعود..

دخلنا البيت .. وييييي هذا بيتنا وخاص بينا بلا مشاكل وبلا وجع راس .. كعدت الحجيه بغرفتها ..

واني وحلا صعدنا فوك .. فرحانين منطلقين .. فتت للغرفه ارتب بملابسنا .. و نصفط .. فات هو .. احس الغرفه تشعشع وكلها مرايات ..

ركضت حظنتو .. واني اكلو ما تعرف شكد فرحانه .. صرنا وحدنااااا .. باس راسي :- انه وعدتج اخلصج منهم واخليج ملكه ويتمنون عيشتج

تشكلت بركبتو وضعت وياه ..

لضثاني يوم كعدني صراع :- كعدي نزلي بالبيت انه رايح ..

-شلت راسي وايدي على عيوني

-وين رايح ..

-لبيت الحجي خابرني جماعه من كرابتنا جايينه .. راح اخذ امي واروح لبوره الغدا نرجع ماشي ..

-ماشي روحي ..

تركتو ورحت للحمام .. سبحت ورجعت .. لكيتو كامل معطر .. :- يلا انه رايح محتاجه شي

-اي

-شنو

-بوسه

-اويلي لو كل الحوايج هيج انه بخير ..

-الخاولي براسي و تشكلت بركبتو وانتجيت على صدرو .. اموت عليك ..

باس خشمي .. ضحكت .. اموووت على ربج

- رفعت نفسي الو وبستو ..

-لا هيج تكليلي اكعد وما يحتاج تروح ..

-حتى الحجي يهججني من الغربيه كلها ويصيح باگت ابنيييي

-ههههههههههههه .. كضب حنجي باس خدي .. يلا ديربالج على نفسج ..

-ماشي .. ترجعلي بالسلامه ..

-ان شاءالله مع السلامه .. و نزل ..

فتت للغرفه رتبت نفسي و طلعت كمت افتر بالبيت وارتب .. ما اشتهيت اكل لأن وحدي ..

بقيت ارتب لساعتين يلا نزلت حلا ..

-صباح الخير

-ضهر النور

-ههه عجل وين بابا وجده

-راحو لبيت الحجي

-شكو يا الله

-كرابتهكم جايين وراح

-هاا شعدنا جوعانه

-والله كلت تنزلين واسوي ابد مشتهيت وحدي ..

-عجل خل نشوف شي ناكلو

فتنا اني وياها للمطبخ ندور ونستفقد ونحجي :- اكلج حلا شعجب حبيتيني

-ههههههه يعني شلون

-ما جنتي هيج .. جنتي تكرهيني

-لا بس من ماتت امج استخطيتج .. وبعدها عشنا بالاردن سنه وتعرفت عليج من قرب شفتج مو مثل ما جنت متخيله ..

وبعدين يعني كبرنا قابل نبقى نتكاون

--ههههههه هم صدك

-وين الزيت

-ما ادري يمكن هينا ..

... دورنا ماكو وهي ثرمت الطماطه واني البصل و الزيت ماكو ..

كلبنا البيت ماكو زيت يمكن صراع ناسي يجيب .. خابرت عليه .. ماكو رد ..

خابرت ع الحجيه .. هينا ناسيه موبايلها .. عجل شلون نلكاه

حلا :- ما عندج فلوس

-لا عندي

-اي دزركي منا هو المحل كبالنا روحي جيبي وتعاي بالعبايه

-لا يمه غير يذبحني

-قبل لا يجي دروحي بسرعه شمدري بابا ..

-لا لا الا صراع ما اتقارش وياه .. هينا يعدمني ...

-اني اوكفلج والله دروحي

-وما تروحين انتي

-دحكي شكلي شلونو .. دتعاااي شوي .. دحكنا من الباب صدك المحل قريب بيناتنا ٣ بيوت ..

فتت اخذت العبايه .  وخطوه تاخذني وخطوه تردني ..

-ولج مو انتي ام البيت وهلله هلله و حيلكم عني دطلعي

-.. دحكت الفرع فارغ .. خوش عجل راح اروح .

دست ومشيت بالعجل لابو

المحل اشتريت بطل زيت .. واندرت شفت سيارة صراع بالباب وهو نزل يفتح بالباب ويدخل بيها ..

وكف گلبي .. حطيت العبايه على وجهي واندرت لا يلكفني الا يثرمني .. فوت السياره وسد الباب..

يا عزززا هسه اني شسوي وين اروح .. ادك الباب .. يمه الا يدمرني .. بقيت ادحك بالفرع فارغ ..

والموبايل مو وياي واتفق وي حلا تطلعلي وخاف افوت ويلكفني شسوي هسه.......يتبع

☆☆☆☆☆☆