المراهقة والأربعيني الحلقة (58)

المراهقة والأربعيني

الجزء الثاني

الحلقة  (58)

محمد :- انه اجذب مووو ..

فتح الموبايل و مصور لقطه لما علي راد يطلع واندارلي واني وراه وسأل على حلا .. بس جنا قريبين .. بس ما بيها اي قصد جنت دا اسد الباب وراه

علي :- لك كوا..... تلفها علب و تذبها براسي لو ما دخلت للبيت اريد موبايل امي ولكيتها تصرخ منك وتبجي ..
ليليان احجي شجان يسوي

نائل ما سمع علي بس شاف الصوره ضرب علي بوكس و زكح بيه :- كلب انوب بالفجريات وي مرت خااااااالك عااااااار

الحجي :- الله لا يوفقك يلعاااار امش منا لا بارك الله بالبطن النگلتك اطلللللع

علي:- والقراااان جذاااااااااااااب هذااااااااااا جاااااي يتحررررررش بيهاااااااا
محمد :- مااااااكو غيرررك الجذاب ياااااا عااار
ام سعد :- ولكم انه كلت هلمصلااااااااااااويه كحب.......... محد صدكني فضحتناااااا صخمت روووسنا
ليليان :- لا والله لاااااا والرب ما عدنا شي اقسملكم بيسوووع والقديسه مريم طلعت بس لحتى اخذ منو العلاج ..
الحجي:- جوااااااا لچ كح.......
ام سعد :- عزا العزاج ان شاءالله وتريد تذبها براس ابن سعد لهلساقطه البلا اصل ..
.... طردو علي واني فوتوني جوا وابجي واحجي محد يصدكني ... دخلوني بغرفة سعد القديمه وقفلوها عليه ..
الموبايل جان بصدري .. ادك على هيام مقفول جهازها ... وين اروح وين انطي وجهي شحيسوون بيا والله حرام عليهم ..
...بسم الأب و الأبن والروح القدس الاله الواحد امين .. ضميت اديه كدام صدري وغمضت عيوني ودموعي تجري
يسوع لا تتركني اترجاك احيي روح صراع ورجعليها والرب محتاجتو ... صراع ارجعلي دخيلك والله ما الي ذنب ..
واسمع الحجي يصيح بصفحه و ام سعد بصفحه و نائل يتذمر ويغلط على علي .. ويسب ويفشر ...
فاتت هيام ونزلت مكاون وياهم ..
- تخونون ابني واطعنون بي وي مرت خااااله سنه ونص عايش وياها مثل الخوان وانتم شاااااااهديين تجون هسه تخونووووووونه
واجت وهي تصيح فتحت الباب .. حدري ليلياااااان احجي لا تضلييييبن سااااكته احجي مو شرفج هاااذ دااافعي
-ام علي والله خابرتج مغلق خابرت علي ودزيتيلي العلاج بأيدو فتحتلو انطاني العلاج وراح
بس هذا محمد كضبني بالاستقبال وعصرني وي الحايط ادفعو ويكولي لو علي جان ما دفعتي
هيام:- شلوووووووون تحارش بيج محمد
ام سعد :- انهجم بيتج ان شاءالله لفت السالفه على ابن سعيد تريد تشبج ناس بناس يلبلا اااااااااصل يل مصلاويه يلداااااااعشيه
-والرب ما عدتبلا عليه هو حقييير
الحجي :- ولج انتي شنو من بشر يلصفيرا المسمومه من زمان انه اكول انتي حيه مسمومه من جنتي تحشين براس المرحوم ويتكاون ويانا
- ما مررررررحووووم ما ميت كل هذا بس حتى اطردوني من البيت وتفلسوني من املاكو اتمنى من الله يرد هسه الا يكص رووووووسكم والله
نائل جان صاعد يبدل ونزل :- يكص روس منو يول احترمي نفسج ليليااااان فوك شينج كواة عينج
-شينيييي ولكم اشرف راسكم والله اشرف منكمممم
وكضبني الحجي من شعري وكام يفر بي ... اشرف منو يول .... وبقى يضرب بيا ..
وهيام كامت تجر بيا من ايدو واني اصرخ ونائل فاككني من ايدو وردني للغرفه . وام سعد فشار وصياح
و هيام تصرخ :- كاتلتكم الفلووووس هجمتونا على الفلووووس وتخونون ابنيييي وفوكها توليتو مرتو
والله حرام بيكم كل لكمه وتعبها عليكم ... كلكم من ذرااااعه .. لو طلعت من بيتو البارحه لا اليوم هينا واكعد ودشوووووف منو يطردني
يطردوني ويطردون بمرتو ويردون يخلالهم البيت ... نسييييت حجي من بعت البيت على ابنك بيع واخذت الفلوس انطيتها لولد لميعه يكونون ارواحهم بيها وانت ضليييت كاعد عد صراااع وهسه رادين ادورون فلووووس
بقى نائل يتعارك وياها و الحجي و ام سعد ... وهي رجعت فاتت لغرفة سعد .. واني كاعده ابجي ومفرفحه ..
سحبتني من ايدي وودتني بغرفة الحجيه .. وراحت للحجيه تنده بيها تريد تشربها العلاج ..
تنده بيها والحجيه ماكو ... لا حس ولا نفس ... كامت تنده بيها حيل وهي تعبانه صريخ وتصرخ ولج يماااااااا كعدي يماااااااااا ولكم الحكووووووولي امي راحت من ادياااااااا الحكوووولي
فات نائل بسرعه و الحجي و كلهم .. شالها نائل و طلع بيها للسياره يركض ..و الحجي وهيام وياه ...
كمت الطم على خدي وابجي عليها ... اني كل املي بيها وتروح مني وين ارووووح وين انطي وجهي ..
نور جت يمي تستفسر من محمد وعلي سولفتلها بقت تتعذر لنائل وتكولي :- تره والله هو لا رايد فلوس ولا بهمه اي شي بس هو ما يحب المشاكل وتعرفي .. ومنقهر على ابو حرب حيل و من يوم الراح وهو اعصابو تعبانه
وبقت تحجي حجي ولا ابالي اسمعو ... مفرفحه روحي من القهر
بهلأثناء نزلت حلا :- صباح الخير
دحكتلها وهزيت ايدي
-شصاير يولي شو ماكو احد جده وين
نور:- خايبه انتي شايفه المطي اليجي تالي الونه هذا انتي اروح لجهالي اشرفلي
اندارت وراها ادحك بنور وردتلي :- شكو ليليان
-من كل عقلج متسمعين كل الكونه الصارت
-لا جنت سهرانه وي وسام احجي نمت الفجر والسماعات بأذني ما اسمع وجسمي يوجعني من دفرات محمد الجايف نمت ما دريت.. جده وين
-حلا والله سبونا من صدك اتمنى من الله يرجعلنا صراع لج لعبو بحالي لعب ..
-غير افتهم
- سولفتلها الحجي من البدايه من لما خابرت هيام ورد علي ع العلاج لحد ما طلعو وحتى شوفتها مكالماتي وحده على هيام وماكو رد والثانيه على هيام
بقت تبجي هي ... ولج ذوله من صدك ما يستحون انوب بعرض ابويا يطعنون ... والله فلا توقعتها هيج يسوون بينا
-اني اخابر خالي يجي اروح عدهم ولا هاي الذله شسوي اروح لخالي احسن
-انتي شنو غبيه .. ولج هذا بيت ابويه مو جان يكلج من اموت لا ترجعين لأهلج ..
-ولج فضحوني طعنو بشرفي شتحمل بعد وهذا محمد حقير ما امن روحي وياه

-ولج والله سم احطلو بجاي واموته شنو حقير .. تحجي بحركه وتمسح بدموعها
دنحجي وفاتت اخلاص الجنطه بيدها وفتحت اديها وكامت حلا تسلم عليها وذيج تكلها ولج يطكونج ومحد الج والله لاحركهم حرك ..
وحلا كامت تبجي بحظن خالتها وصاح جدها مناك وراحتلو وتبجي بحضن جدها .. كاللها لمي غراضج جدي وخل ناخذج ويانه هناك
اسمعهم واحترك .. احس بس اني مكسوره وما الي احد .. هيام ابنها رجال ويدافعلها وحلا خوالها يتفدوها ..
اكوم الوم ابابويه على تغيير دينو .. واكول غيرت دينك بس حتى تخلف يحيى العار .. عفت اهلك وناسك بس حتى تخلف
لان ابويه اسلم بس حتى يتزوج .. المسيحيه بقت بقلبو وحتى من صرت اني ورثت المسيحيه عنو وعن امي رغم اسلامو هو
اكول لو تارك دينو يمكن هسه الي عمام تسندني توكف وياي .. ضليت هيج محد الي ... الجاي و الرايح يكفخ بيا
كاعده وخابر علي رديت :- الو ها علي
-امي يمج لا هي ولا جديتي يردون وينهم اريد اطلع وخواتي وحدهم بالبيت
-الحجيه تخربطت وشالوها للمستشفى من ٨ الصبح

-الله عليج تحجين صدك
-اي والرب متحملت عساها بحظو و ابختو لمحمد الله ياخذ حقنا منو ...
-وهسه شلون احصلهن لا امي ترد ولا جديتي
-موبايل الحجيه هينا ما سمعتو وامك اخابر عليها مغلق
-اووووووووو هو انه عليمن رجعتلج من اجيت الفجر كالتلي جيب وياك موبايلي ناسيتو وطالعه وانه نسيت ورجعتلج .. الا اكلج هذا السكط شسوالج
-عصرني ع الحايط يكولي لو علي جان ما دفعتي السافل
-والله لشرب من دمو بس خل يصبرلي
-علي ام سعد ما راح تسكت حتى لو الحجي ونائل صدكونا هي تحرض الحجي وهو عربانه بيدها شسوي
-دخل اشوف جديتي هسه وبس تصير زينه احطلها سرير ابيتنا واجيبج وياها وانعل ابوهم لا بو بيتهم ودشوف وحده منجن تتنازل لو تنطي توكيل للحجي لو لسعيد النكس وابنو لا صدك ابتلي بيجن
-وبيتنا هذا
-دخل اشوف هسه بس نفض السالفه والله كريم بس ليليان انه خواتي راح اجيبهن الكم اوصلهن للباب حتى اطلع اروح لامي اشوف جديتي ...
خليهن يمج وقفلن الباب بغرفة الحجيه وكعدن لا تضلن تتمشن بالبيت وحتى صعده فوك ليليان لا تصعدين لبين ما اخلي امي اجيبج لبيتنا
-اني كلت اخابر خالو اروح يمو

-خاليش يولو دعوفي .. شو بيتنا نفسو بيت خالو صراع ما عايشه بجالنا ومفضلين عليج
اروح هسه انه يلا بيباي
-بيباي ... قفلتو ودرت وجهي لكيت اخلاص ماده راسها من الباب وادحك لمنو اخابر ..
بس شافتني ردت الباب وطلعت .. كمت صعدت النور ..
-اكولج خابريلي نائل شوفيلي الحجيه شنو اخبارها
-خابرتو كبل شويه الحجيه صاعد عدها الضغط ومتخربطه من وراه وحالتها انتكست .. مره تعبانه عساها بحظهم وابختهم كلو مشاكل ..
-احنه لو هذا سعد وابنو .
-فوتي بغرفتج و قفلي عليج ومعليج بيهم
-لج اني الذابحني محد صدكني من اكلهم محمد يتحرش وساكتين ومصرين ومصدكين اني عندي علاقه وي علي
-شلون تصير الحقاره بعد .. يصدكوج ليش .. لو صدكوج شلون يربحون هذا سعد وراه مخطط وحتى ابنو تخطيطو .. الا ليش ما راح لبيتهم شعندو بات
-هو من زمان يبات عدنا ما يلفي عد اهلو بس ما جان هيج مسقط ويدحك
-بس من رجعنا لهين ولليوم ما لفى اكثر من الفاتحه وما بات بقى ابيت اهلو ..
دنحجي فاتت حنين :- ها شلونج عمه .. ومشت سلمت على نور
نور :- هلا عمه شنو اجيتو
-اي كلنا جابنا بابا .. ماما ومرت ابويه جوا
... جنت منتظرتها تسلم بس خلصتها سوالف وي نور ومسلمت .. نور اخذت الجهال و نزلت اني ردت اطلع جان تصيح وراي
-ليلياان
-هاا
-الحجي اللي صار صدك
-شنو ؟
-علي عود يحبج وانتي وياه تتباوسون بالباب الصبح
-احترمي نفسج شنو هلحجي والله عيب .. هو اكو احد يلحك ضفر صراع حتى انطي نظره من عيني مو نفسي
بعمري ما لمسني غيرو واكص ايد التنمد عليا غيرو .. تركتها ومشيت صدك استفزتني وجايه تتحقق ويايه ..
ضربت الباب ودخلت لغرفتي .. فتحت كنتوره وكعدت بين ملابسو .. اشبع بجي من اكعد هينا رغم شكد مر لسه عطر ملابسو متشبعه الخانه بيها ..
من اشتاق اكعد بيها واحس هو موجود .. شكد كاعد تتعب نفسيتي من يتهموني بالخيانه وي غيرو .. ما اتحمل اسمي ينحط وي غير اسم صراع ..
شكد يلوموني لأن بقيت عندو ويكلولي ما بعمرج شلون حبيتي ... اني شفت بصراع شي ما شفتو عند كل الشباب ..
هوو ما جان بس زوج .. هو اب وسند وزوج واول رجال اعشكو ويدكلو كلبي .. وياه عرفت شلون احب شلون احس شلون هي مشاعر المره للرجال
هو فتحة عيني ما اكدر اتخيل روحي وي غيرو ابدددد .. بقيت ابجي بالخانه لحد ما كمت اشهك واحس كلبي وي الشهكه يريد يطلع ونمت والشهكه بيه ..
... ما احس الا وانفتح باب الكنتور عليه .. وصراع كدامي ...
فتحت عيوني حيل .. مدلي ايدو وطلعني وهو مبتسم .. ادحكلو شحالو الثوب اسود وكن كلو تراب ..
بس رغم هذا رحت حظنتو حيييييييل وابوس بيه وهو ماكو حركه ... دحكت حبل ملفوف على اركبتو
هو بس دحكت كن يحاول يجر الحبل من ركبتو ويحاول يخلص نفسو ... واني بس ادحك ما مديت ايدي وساعدتو ..
انفتح وفات ابويه كن صحت بابااااا ومتفاجأه .. بس ولا كان اريدو والتفيت وره ضهر صراع .. ولا ابويه التفتلي .. كن جاي على صراع ويكلو امشي وياي يردونك
وصراع يكلو لا ما اجي كللهم عندي شغل ... ومسك ايدي فزيت على حيلي كمزت ..
　
　
يااارب ادحك .. هاي اني وين ؟
اتذكرت اني كاعده بالخانه ادحك ملابسو ... اتلمسهم ومصدومه ... فتحت الباب وطلعت من الخانه صراع ماكو كلو حلم
ادحك مكانو ... هينا كان واكف .. كعدت بمكانو ابجي حيييل .. واسمع اذان يطلع .. دحكت ع الشباك كن ماكو ضوه من وره البرده ..
معقوله ليل هسه ؟
كمت من مكاني فعلا صاير ليل عجل اني شكد نمت ؟
اخذت حجابي وطلعت نزلت جوا
كلهم بالأستقبال مخبوصين .. ردت افوت واخلاص تكلهم انه جنت اسمعها تحجي وياها وهو الأغبر صدك خذها وشرد
ونائل يكول لنور ددوريها ما معقوله تشرد علي خابرتو يحلف هي مو وياه ..
نور : نائل والله ماكو وحتى بغرفتها ماكو اني صعدت ما لكيتها الغرفه فارغه
نائل:- دصعدي شوفي هدومها شوفي غراضها صدك شارده
فتت عليهم :- هاي على منو جاي تحجون
-كلهم بقو صافنين بوجهي
نائل:- هاي وين جنتي ؟
-نايمه بغرفتي
نور:- انه دخلت ماكو
-بالكنتور نايمه
نائل:- ابخت محمد تحجين صدك ليليان .. وج انتي عاقله
-هي التحظن هدوم رجلها المفقود وتكعد تشكيلهن وكل عقلها يسمعها .. هذه ضلت عدها عقل ؟

اخلاص:- شوف العياره شوف .. شلون تتمسكن وهي شابچه الوادم لحيه بلحيه

-اني ما جايه يم احد .. هي العالم مجاي تتركني
.... رادت تحجي اخلاص صاح نائل :- طلعن برا وتركن ليليان عندي كلمه وياها

...طلعن وكعد ... حدري كعدي هينا دشوف
-الحجيه شلونها
-اتركيني من الحجيه ... سالفتج وي علي شنو
-نائل اني سالفتي مو وي علي وي محمد
-و الصوره ليليان اجذب عيوني
-هو اشفت بالصوره .. جاي اسد الباب وراه والله
- و الفجر
- الحجيه ما كدرت تصلي وراسها وجعها خابرت هيام ما ردت رجعت لعلي جابلي علاجها بجنطة هيام ناسيتو
انطاه وطلع سديت الباب
-ومحمد.شسالفتو
-هذا سافل نائل ششرحلك كلب هينا واشرت ع المكان .. حصرني وادفع بيه ويكلي لو علي جان انطيتي مجال .....
جاي نحجي فات سعد .. هاااا حتى وي نائل تتختلين .. ما مخليه واحد بنفسج واتذبينها براس ابني
نائل :- سعدددددددددد اكضب السانك لا بالقران الدنيا اكلبها
-انت تكعد صفح وما تدخل مسوي روحك الجبير وجاي تحل قضيه راسك اكصو لو تجاهلتني وكبرت راسك كلب
-تكص رااااااااس منو.........
- واسحكو بالقوندرا من يعلى صوتك
-سعددددددد
وووكفو واحد وي الثاني ...
-ها وتريد تمد ايدك على اخوك الجبير لخاطر هاي الكح.....
-يول انت شنو من بشر الحرمه عرض اخوك ... مرت صرااااااع افتهم .. تطعن بيها بليا ما تسمعلها ..
-وصراع لفاها من الشوارع وصار لازم ترد لأصلها ..
-طلعه الليليان من هينا ماكو .. صراع وصى ووصيتو تتنفذ
-هههه والله يا خوي ضحكتني اكلك لا يكون انت مخلي عينك على ورثو وجاي ادكلها ناعم ..
-هذا تفكيرك انت ما تفكيري انه سعد ... الفاقدينو اخ يولو حزام ظهر ما تعوضو فلوس .. يكفي مشاكل يرحم اهلكم خلو البنيه بحالها وابنك ممنوع يفوت لهينا
-جاي تتحكم بالبيت انت لو شنو
-ما رايد اتحكم بالبيت عمي تعال وصفط على روسنا اخ وتأمر .. بس كف من المشاكل يرحمممم اهلك ... تعبنااااا

- عجل ساندني وخل نكضب شغل اخونه صالو شهور رايح هدد .. خل يسوللنا وكاله
-هو بكيفي يسولك وكاله غير بكيفهن
-واحنه ننطر الغريب يبوك تعب اخونا ويصير لدريد المسيحي
ليليان :-والله حرام عليك اني لا رايده فلوس ولا مفكره بورث جاي تطعنون بشرفي بس على مود فلوس
-ام الشرف انتي برااااا خل نكعد نحجي انه ونائل
نائل:- ليليان روحي هسه بعدين نكمل حجي
.. طلعت نور واكفه و اخلاص يتسمعن .. عفتهن وفتت ..
.. الا صد نور نوال و ضرتها مو جو لهين عجل وينهم
-ينتضروج ؟ .. كعدو وبقو ٤ ساعات وراحو لبيتهم .
-و الحجيه ؟
-بالمستشفى ام سعد و هيام والحجي وياها هل جاي يروح سعد يجيب امو
-شدخلني بام .... لا تخليني احجي الحجيه شنو وضعها ؟
اخلاص :- تحجين على خالتي
-انتي مو على اساس تاخذين حلا وتمشين شو جلبتي هينا
-مصدكه روحج البيت بيتج . والله ما بالحيف اتركلج بيت اختي واروح ..
تركتهن ... فتت لغرفة الحجيه لكيت جنات و ساره كاعدات .. كعدت يمهن .. سألتهن على علي .. كالن بس جا اخذ موبايل امي وراح ما دخل هينا ..
......لهناك جا الحجي وام سعد ... صاحني الحجي وهم كاعدين و سعد واخلاص ونور ..
الحجي :- كعدي ليليان
- حسيت عدهم موضوع كعدت
-دحكي يابه شغل صراع متوكف و ما نكدر نتدخل بي الا تسوولنا وكاله حتى لا يكف ونكمل شغلو
-وليش تكملو هو وراح بعد المن
-عجل كل هلشقق ابغداد و عمان شلون منو يكضبها نتركها هيج .. صارلها شهور متوقفه
-وهسه شنو
-انه رجال جبير ما اكدر اكف على شغل .. اريد تسوين وكاله لسعد يكضب الشغل من بعد اخو وان شاءالله ما حككم موجود احنه ما ناكل حك احد ..
-عمو اني بعمري ما همتني فلوس الراح مني ما يعوضو كنوز الدنيا كلها بس اني م الي احد اروحلو وسعد وابنو طعنو بعرضي وحتى محد منكم دافعلي ولا كن هو تعرضلي
سعد :- انتي جاي تتبلين على ابنيييييي ؟
-شوف لهذا اني ما اكدر اثق وامن نفسي عندو لان اني ما اهمو .. تريد اسوي وكاله لنائل ما عندي اشكال .. اعرفو كد كلمتو ويحب صراع وما راح يبهذلني
-انتي شنوووو تريدين تتجاهلينييييييييي
-ليش اتجاهلك .. صراع ما ماخذ فلوسو منك حتى جايه اخذ الورث منك لو اتجاهلك
اخلاص:- هلفلوس كلها فلوس المرحومه اختي الباع بيتها و ذهبها وفلوسها كلها و بنى زكبر بيهن جايه تتسلطين من تالي بفلوس اختي
-بيتها بيت صراع والذهب هو اشتراه وكلشي منو ما جايبه شي من اختج واني بايكتو ..
ام سعد :- خايبه يلدايحه عجل شلون جيتي محمل ذهب وكنوز .. حلوه هاي اجت العصر وتريد القصر ..
-اني ما ماخذه ولا اريد .. كل الاريدو اعيش بدون ما احد يبهذلني لو يذلني .. وهو بنفسو الوصى عليه بس كن محد عاجبو ينفذ وصيتو
سعد :- دحكي هينا وسمعيني كعده ما الج هينا ولو ضليتي الا رجليج اكسرهن افتهمتيييي يلااااااااا
-مااااا من حقك تطردني
-اطردج واطرد الخلفوووووووج كلبه يلااااااااا براااااا
وكام يدفع بيه برا والحجي يكلو استهدي بالرحمن يابه مرت اخوك هااااي . وهذا يطرد بيا .. ووكفني بالكراج ..
... علي جان جاي بلباب منتظر خواتو يطلعون حتى ياخذهن للبيت يرجع .. هو سمع الكونه و فات جوا ..
حتى ما تعارك وياهم جر ايدي ومشى والحجي كام يصيح و يزكح بي وصاح على ساره ترد تجيبلي عبايه .. وام سعد واخلاص يكلله انت مالك غرض لا تخلي العمام تتشابج اطلع منها ..
وتلازم وياه سعد "- ولك انت تريد تحوش كلشي ووووووووووولك
:- بالقران ما اتعب الساني وياك .. مو طردتها ؟ خلص بتلعافيه عليك البيت .. بيتنا مفتوح لمرت خالي واعرف شلون اردو ..
هم يحجون وياه يتصايحون وعلي يدفع بيا برا ويكلي طلعي لا تحجين اي كلمه .. و نور تجر بيا وتكلي ليليان ردي يجي نائل ويحجي وياهم لا توكعين نفسج بمكسوره فوتي ..
واني ابجي معرف وين انطي وجهي لعلي اليخزر وعصبي ويكلي طلعي وسعد الطردني لو ارد واتحمل ..
سحبني علي وسحب خواتو ورحت وياه وعفتهم .. وطلعنا لبيت هيام ..
فتنا للبيت هو فاير من العصبيه .. كعدنا بلا صوت وبس هو يسب ويغلط ويدفر واشوفهم واندمهم ..
ردت احجي بس خفت يزكح بيا .. بقيت ساكته .. وصاح بيه
-والله لو رديتي الا راسج اكسر هذا بيت وكعدي حالج حال خواتي محتاجه احد انتي
ساره:- انت مشفتهم شلون بدو وياها وبنتي وحبيبتي من يردوها تتنازل بس رفضت طردها خالو الكلب
علي:- عرفتهم بالقران عرفتهم .. ووصيتها لا تتنازل
-هي رادت تتنازل لنائل
-حتى لنائل ما تتنازلين عيفيهم بنارهم وما يحصلون فلس والله لو اخذو منج وكاله الجواج و الوراج يلفونو ويبهذلونج ..
-اكلك هو بس اني الوريثه .. امك وحلا و الحجي و الحجيه ..
-ولج ذيابه ماكدرو لوحده منهم كاتلتهم شلون انتي غريبه وتاخذين حك وورث لهذا طعنو بيج حتى يطردونج لاهلج وحكج يضل الهم وياخذونه بالعشاير من خالج ..
ويحرمون اي محامي ياخذ قضيتج يهددو بالقتل وتتبهذلين وتفلسين
بس لو ضليتي هينا عشاير عليمن يهدون ؟ .. ماكو عشيره تهد على مره .. مجبورين يقبلون بامرج لهذا لا ترحين لخالج ابببببد
.. هزيت راسي و تذكرت كلمة صراع من كال لو متت ابد لا ترحين لاهلج ضلي هينا يم امي والج حك بكلشي انه املكو ..
معقول جان يعرف نواياهم ؟!!
بعد ما سولفنا جثير .. فرشنا اني و البنات جوا و علي بالصاله ضل كاعد ونام بيها ..
للصبح سمعت هيام خابرت على علي وتتصايح وياه وتكلو عززززززززززه بعين علاوي ولك تاخذها لبيتنا واني ما مووووووجوده وهم تاهمينك بيها ..
وهذا يصرخ ويكلها طردوهااااا من البيت شتحجيييين انتي ..
سدت الموبايل ... واندكت الباب .. بس علي كاعد واني والبنات جوا نايمات .. فتحو الباب وطلع جدو وعمو بندر .. اني واكفه بس دحكوني ..
ضربو علي .. وتجيبها تبياته للبيت ولك وتولوه وبندر يصيح بس انت وياااااه بالبيت وتريد احد يصدكك ما عندك شي وياها ..
ويتصايحون وياه وجدو يكلو انت تريد تورطنا وانه ما اخلص من مصايبك مات ابوك وعافك لمره تربيك وتربية نسوان وتلفي كحا.....
وعركه وياه وهو يصيح ويبرر الهم ان سعد طردني وهذا بيت خالو و البيت هم بيتها وجدو يكلو غبي العشيره كلها عرفت انت اخذت مرة خالك واختليت وياها بالبيت وامك ما موجوده ..
شويه ورد فات الحجي وسعد كعدو بالكراج وكالو خابرنا على خالها يجي ياخذها لهاي البلا شرف ..
كلهم يعرفون اني بريئه وعلي ما عندو شي وياي بس كل هلفلم بس لحتى يطردوني لبيت خالي ويفلسوني من ورث صراع .......يتبع

☆☆☆☆☆☆