المراهقة والأربعيني الحلقة (68)

المراهقة والأربعيني

 

الجزء الثاني

الحلقة  (68)

اسمهان :- الو هلا حجيه

... انصدمت من سمعت صوتها .. وترد على موبايلو ؟!! احس النار صعدت الراسي :- موبايل صراع شيسوي بيدج

-منو انتي

-انتي اللي منو

-يا ليليان والله هو نايم و جهازه ع الشحن ودك وهاي بنت جيرانا فتحتو بساع فرديت .. شلونج انتي

-صراع عندكم ؟

-اي بلي عدنا .. كولي

-انطي الموبايل

-نايم هسه وما اكدر افوت واصحي خطيه بغير وكت خابري

-انعل ابوج لابو الخلفج لابو اللي خلاج تكضبين موبايل رجلي يا ساقطه يا بواكة الزلم بعدي من رجلي لا افضحج فضاحه والله

طوط.. طوط.. طوط .. دحكت قفلت الجهاز بوجهي .. اخ يا الله اليوم شسوي بصراع .. ااكضبو لو لا ... الا اشرب من دمو ...

بقيت افتر و النار تشيط مني ...يمكن حتى دخان يطلع من راسي على كد الغضب الاني بي ... تحفيه عدنا بالهول شلتها وكسرتها

وشلت الموبايل شمرتو .. وصرخت اااااااا ..

حلا طلعت تركض :- هاي شبيج ؟

-مالج شغل بيا انتي ...مشيت بهمه وابعد شعري من وجهي بقوه .. ورجعت اخذت الموبايل .. شغلتو .. ورديت اتصلت ماكو رد ..

اتصلت مره لخ .. انطاني مشغول .. احس روحي فرفحت بودي اطلع من الموبايل واكلو ..

حلا :- لج شصاير احجي

الحجيه:- هاي شدا يصير فوگ حلااااا

-والله جده ما اعرف هاي شبيها متخبله وترجف ..

... تركتهم وفتت لغرفتي .. انوب كذلتي فوك قهري مدري شبيها لطشت بوجهي ابعد وترجع .. كمت املش براسي من القهر واصرخ ..

.. صراع اكضبك لو لا .. اااااااخ لا ابرد كلبي بيك حقير ساقط ابو النسوان عبالو يجذب عليه .. اكص ايديا اثنينم اذا ما طلع عندك شي وياها وتستشرف براسي ..

كتبتلو ترد لا احرك الدنيا فوك راسك والله .. دست ارسال

.. رجلي تهز واكل بأضافري من التوتر وادحك بالموبايل بلكت يرد .. ما رد

رديت كتبتلو .. عاجبك تحرگ بگلبي ردددددد ..

وبعدو ما رد .. خابرت خابرت .. وهم ماكو رد ..

نزلت للحجيه .. ابو صفاء حافظه رقمو ؟

-شرايده يولو ؟ شصاير

-احجي حافظتو لو لا الله يخليج تره راح اموووت ..

-غير افهم يا امي شنو شجرالج متخبله وشعرج معطب هشكل

-انعل ابو شعري دا اكولج حافظتو لو لااااا

-جيبي موبايلي

-ما اجيب احجي

-ولج تحترمين نفسج لو شلون

-عفتها وطلعت .. ادور بالاسماء .. لكيت اسم ابو صفاء .. دكيت اتصال .. واديه اكرض بيهم باسناني من التوتر وانتظرو يرد ..

رد :- الو هلا بالعلويه

-الو هلا عموو

-منو

-اني مرت ابو حرب

-هلا بيج يابه .. تفضلي امر خدمه

.-بس دا اتصل بابو حرب ما دا يرد عليه .. محتاجتوو

-والله يابه هستوه طلع اااها ... بالله اشوفو بالشارع يمكن بعدو ..

.. كام يمشى واسمع خطواتو ..:- لا والله يابه شكلو راح

-ها راح اي .. شكرا .. وقفلتو ..

وين تروح مني .. اطيييير اكضبك اكضبك..

دا اريد اطلع للهول .. دك الجهاز .. ( صراع )

انطيت رد :- وصرخت انته شنووووووو تري....... قاطعني

-لج بنت ******* انعل شيب الجابج عليه بنت ال******* .. ارجع لو شفتج كبالي لا املصو لراس..... قفلت الخط بوجهو ..

خفت من صياحو .. هذا شبي .. رد اتصل .. خفت اجاوب .. بس خاف ما اجوب ويجي يموتني ..

-رديت .. صرخ بأذني :- وتقفلين الخط بوجهي حيوااااااااانه ولج ارجع لاربيج والله اصبريلي .. وسد الخط ..

والله والو عين وهو الزعلان وضايج .. فوك شينو كوات عينو ويغلط .. مدري شنو شعوري خوف غضب .. بس سوالي ردة فعل جنت ضايجه .. لو ما راد يمكن اكل روحي

بس هم ما يكفي .. اخابرو واعرف على اي اساس يغلط ويصيح عليه شنو فوكاها.. خابرت .. ما رد ...

فاتت الحجيه :- ولج انتي شو ما تستحين شو جيبي موبايلي .. جيبي

.. انطيتو الها .. وصعدت اكل بروحي ... بقيت اليوم كلو .. بحركان دم .. هاي الساقطه هيجتو عليه . اي شوف شنو حجت وياه وكالتلو ..وخلتو ينزل بيا ..

لثاني يوم وهم ما رد .. شنو القصه صار ٣ ايام و ما اجه .. ليطلع متزوجها واني ما ادري .. شعندو كاعد وياهم وياكل ويشرب ... وما عندو شي مستحيل

ما طبعو يكاعد الغريب ... يعني متزوجها ؟ .. لا هو كال اني متكفلها ومتكفل ايتامها .. عسى الرب طمها وره رجلها الجايفه .. رجلها مات راحت ادور غيرو ام الزلم ما توفرلها احد ..

مر رابع يوم وهو هم ما جا .. عيشني بحرب نفسيه وي روحي .. يمكن لو جاي ومتكاونين اني وياه وكتمالخين احسنلي من هلخركه اللي عايفني بيها ..

الدقيقه تمر عبالك سنه .. مرات اراقب الساعه .. وكل شويه اكول هسه اسمه جرت الباب ويدخل سيارتو .. وماكو يمر اليوم و يروح .. واني بالف اه وقهر ..

اجت ام يوسف ٥ يوم .. وكمت اشتغل وياها بالبيت .. وبلا مزاج ..

ام يوسف :- عجل ام علي ما تجيكم

-لا هلفتره جهالها عندهم امتحانات ما تجي ..

-هاا .. شو مو على بعضج شبيج ؟

-راسي يوجعني

- والله هلوجع الراس هذا ذابحنه من القهر

-شسوي

- كل واحد قهرو هلكدو .. مدري منين مجيبها ..

-ليش شبيج

-حماي خيه ذابحني منافسني على عيشتي ..

-اخو زوجج المات

-اي والله

-شبي

-الناس باطله فوك قهري وكسرة ظهري على جهالي .. هو فوكاي . شارني ع الحبل تشتغل بالبيوت وهيج تطلع وهيج ترجع وهم فلس احمر ما احصل منهم للجهال عجل شناكل شنشرب .. عالم ما تفكر بس تطعن وتكسر بالوادم ..

-الله لينطي .. جربتها لوعة يتهمونج وانتي ما الج ذنب .. تذبح

-اي والله يا حبيبه ...انتي شجاج وجهج اصفر

-اني و ابو حرب شوية مشاكل

-خير يا ستار ولج هو يعشكج

-شلون عرفتي ؟

-ما شفت عيونو شلون تراقبج من يفوت للمطبخ ... تتلامع من يدحك بيج .. خو اكو وحده شكد تكرهج الشر ينكط من عيونها

-منو هي

-ما اعرفها بنيه ضخمه صاحبة جتاف عاليه .. تص وي بت رجلج

-يااا هاي بنت عمو .. تصير اخت ضرتي الميته ..

-يااا وتكرهج لان بدال اختها

-لا تريدو الها

-عزا العزاها كوون .. وتريد رجل اختها ...

-عانس بعد .. اسمك رجل يهواي من وحشة الليل ..

-وهي القاهرتج

-لا .. وبقيت اشتغل اني وياها ونسولف لبعض ..

دنشتغل .. وسمعت صوت الكراج انسحبت الباب .. طفرت من مكاني ..

ام يوسف خلصي شغلج هينا .. اجه ابو حرب .. وطفرت وكفت بالمطبخ .. قفل سيارتو .. ومشى .. فات للمطبخ

:- ها الله يساعدج

-شيساعد بيا .. وين جنت

-ما رد راد يمشي ..

-لا حبيبي لا اكف اكف .. عبالك بالهين اعوفك .. واندرت قفلت باب المطبخ

-ليليان تعبان بعدي عني لا بالقران ابتلي بيج

-شوف دحك هين تبتلي ما تبتلي هسه تكلي شتسوي اسبوع ضليت ابغداد

-بكيفي وبمزاجي ما انتي اللي تحاسبيني

واندار يطلع من الباب الثانيه .. ركضت قبلو :- طلعه ما تطلع والله تكعد وياي وتفهمنييييي .. وسحبتوو..

كضبني حيل من زندي .. اني بالايد الثانيه طبكت الباب وفريت المفتاح وجريتو ..

-لج دحكي تعبااااان تجفي شري لا تخليني انهد بيج

-ما علييييه هسه تكلي شجنت تسووووي ابغدااااد

-فتحي الباب

-ما افتتتتتتتتتتح .. وخليت المفتاحين بجسمي .. هسه تكولي شجنتي تسوي . وخل يكون بعلمك لو مو تذبحني لو تصلبني ما اعوفك الا تكلي شعندك هناك

-دار وجهو وتنهد .. استغفرك اللهم واتوب اليك .. اللهم طولج ياروح .. لج بويه تعبان فتحي الباب خليني اولي اصعد وخري عني

-ولك ارحمنييييي متت والله متت ليش تسوي بيا هيج .. شذنبييييي

-ذنبج تتجاوزين وتصرفاتج صارت ما تنطاااااق

-من حركة گلبي انت ليش ما تحس بيااا يعني لو ما احبك اني اهتم .. ولك افهم افهمممممممم جاي اموت . وكمت اضرب بيه وابجي ..

زت الجنطه ووخرني .. :- ولج عقلي عقليييييي ذبحتينيييي

-ليش انت خليت عندي عقل وافكررررر بي ولك حرام عليك والله لا ليلي ليل ولا نهاري نهار .. متت القهر اكلني حس بياااا

-وانه شمسووووي .. الف مره كتلج ولج ما عندي شي بالقران ما عندي شي تروحين تفشليني وي الوادم ومرتي تغلط عليهم وتسب بيهم . الى متى تبقين هيج .. كافي ارحميني طيشج ذبحني

خليها بعلمج لو راجع بوكتها بالقران اجنزج بس كبرت عقل وتركتج زعديتها وهسه فتحي الباب خليني اولي ارتاح لأن طكت روووحي

-ما تقنعني والله ما تقنعني .. اني گلبي حااااس اكو شي احجيلي شعندك هناك ضليييت احجيلي

-ولج انطيني المفتاخ خل امشييي

-ما اعوفك والله ما اعوفك الا تكلي شعندك بقيت اسبوع انت مو كلتو٣ ايام .. شعندك اسبوووع بقيت يلا احجي يلا

-مو انتي اللي كلتي عساك لا رديت وهاي ما رديت شرايده مني بعد ..

- جريت الكرسي وكعدت .. امسح بدموعي وارد ...وهو يتنهد وداير وجهو ويستغفر ..

طلعت المفاتيح خليتهم كبالو .. ودنكت ابجي ..

-يولو كافي ولج ذبحتيني والله ذبحتيني كافي

-عوفني واطلع

-بقى يدحك بيا .. اخرها سحب المفتاح .. فتح الباب وراح طلع صعد فوك

والحجيه تصيح :- ليليااان ..

ما رديت ولا رحت .. بقيت بمكاني ابجي .. فات ام يوسف

-يا خيه شجاج كومي كومي كولي يا الله ولج والله هم الرياجيل كلهم هيج ما يجي من وراهم غير الهم .. وابو حرب يحبج والله لا تخلين لغيرج مجال .. امشي صعدي فتحي صفحه جديده وحظريلو الحمام .. قاهره روحج وقاهرتو عليش .

.. كومتني غسلتلي وجهي .. ولبست عبايته :- انه اروح وانتي صعدي لرجلج لا اتركينه .. ولج الف وحده تتمنى تتشمت بيج لا تنطيهن مجال .. كسري عيونهن وتحملي ما دامو يحبج بنتي .. يلا صعدي

-هزيت راسي .. وهي باستني ومشت ..

[ ] رحت للحجيه .. وتولتني بالاكشر : تستقبلينو بالمشاكل وهو شمحصل منج غير القهر و الهم .. للعالم سابيتو من وراج وانتي شالعه كلبو .. تعبان وانتي هيج تلاكي لا ملكه بي خير لا لكمه لا تحظريله هدمات .. وفوكاها تتصايحين وياه بنص البيت وتصيحين ولك وهو لا بكدج ولا بكبرج وما تحترمين وووووو

اخرها .. تركتها ومشيت صعدت فتت للغرفه .. هو متمدد وايدو على عينو .. حس .. رفع ايدو .. دحك و رد لوضعو

-كعدت ع التخت .. وندستو بجتفو ..

-رفع ايدو .. دحك .. شرايده

-تكعد تسولفلي كلشي ..

-كعد بتململ .. ثنى رجلو واندارلي :- ينت الناس كوليلي شيريحج وانه احجي مو تعبت

-تحجيلي كلشي

-شحجيلج .

-شعندك وي اسمهان

-كل وحده ادحكلي عندي شي وياها ؟ انتي شنو ما تثقين بيا .. شاكه بحبي الج ..

-عجل شعندك تروحلهم

-بيتي غير

-وليش متروح للشقه ..

-مأجرها والله .. شعندي بعد بيها .. شقه مفرغها عود بالسنه اخذج الها .. شلتها واجرتها ..

-اي طبعا خلصت سوالفك وي ام مصطفى وبعد متفيدك ..

-ااااااهااا رحم الله والديج . بالضبط ..

-انت شنو تريد تستفزني

-عجل وازني كلمتج واحجي عدل

-مجذبه ؟؟؟ .. احسك بؤرة نسوان .. لعبت روحي منك ..

-ول يابه شلون وياج انتي ليش ما تحترميييين نفسج

-كمت من التخت ووكفت كبالو .. مليييت مليت تفتهم . يا الجايه حاطه عينها عليك اني جاي اموووت

-وانه شذنبي

-لا تمثل دور الفقير وتتمسكن والله عاجبك الموضوع ومصرفلك .. واني طكتتتتتتت روحي منك

-المطلوب

-تكلي ليش تروح لبيت ابو انعال

-ولج احترمي يولي والتالي وياج شلون

-جاوب

-اخذ .. ولج البيت بيتي وانه مخليلي غرفه عدهم وهم مثل اهلي ...بدال ما اروح اكعد بفندق اكعد عدهم وكت شغلي يومين هم يخدموني وهم اشوف شمحتاجين ما محتاجين ابنهم صاحبي ومات وهو يوصيني عليهم

بعد ؟؟؟؟؟

-واسمهان شعدها تمشي كبالك ؟ شو احنه من يجي زلمه صوتنا جوا ما نعلي وهي تسرسح كبالك فايته طالعه وياريت بس هيج .. ادحك بيك ما كن تشيل عيونها عنك بلا مستحى

- يبنت الناس واني شذنبي بيها .. هلجدامج اخلاص بايعه روحها كبالي .. شفتيني فد يوم عبرتها . ؟ والله والقران بعيني ما تحلى غيرج .. لا كل وحده ادحكليني تكلبين حياتي جهنم من وراها

انه رجال الي قيمتي بين اهلي وناس وعندي خير وكلمتي حلوه ويا الناس .. وجثير نسوان تعرض روحها كبالي .. انه هيج ملطلط وطايح حظ .. راكض وراهن ..

انتي ولهكد طولج شبر وما كادر احويج مجنون انه ابتلي بسوالف النسوان .. دعقلي يا بويه مو ذبحتيني .. كافي مكاون وصياح تعبنا . حدري لهين بحظني دشوف

-وانت ما هامك غير رغباتك وحاجتك الا ما ميت عليه

-والله لنعل شيب الخلفج لابو شيب الجابج عليه بنت الجلااااب طلعي من جدامي لشوف طلعيييييي

وكام .. جر ايدي وهو يصيح ويغلط وشمرني براا الغرفه وهف الباب وراي ويصيح :- حقيرااااا سممتيني طلعتي روحي ابتليت بوحده سز مثلج ..

عفتو وكعدت ب الصاله .. اخذ نفس واتنهد .. وحايره شسوي .. وشلون اعرف شصاير .. ما شاكه بي واعرفو يحبني و ما ملطلط نسوان ويركض وراهن بس گلبي ما مرتاح .. احساسي يكولي اكو شي .. وهو الف مره سالتو ويكل ما عندي شي ..

... تركتو نص ساعه .. كن خفت عجاجتو بالغرفه ونام .

رديت فتت .. مطفي الضوا

تقربت كعدت ع التخت .. مغمض عيونو وداير نايم ومكتف اديه .. عكست ايدي وتمددت ادحك بيه واهو مغمض

.. شكلو مال جذاب .. لا .. مال واحد.يحجي صدك ؟ هم لا .. اني شاكه بي .. بس ما اعرف شك شنو . ادحك وافسر وجهو وهو نايم

فتح عيونو .. جفت وزلكت ايدي .. وضميت راسي واتلمس بالبطانيه وجليتها فوك راسي .. خفت لا يزكح بيا ..

تنافخ واستغفر ربو ودار نام للجهه الثانيه .. ما اعرف .. صح ما مأمنه وشاكه اكو شي .. بس مجرد هو نايم هينا كبالي ..كلبي مطمن محد ادحك بيه غيري فاكدر انام مرتاحه ..

.. اخذت غفه .. لهناك كعدت هو ماكو .. والنوم بعيني .. كمت مرعوبه .. افجرو لو راح لبغداد

نزلت بهمه . دحكت الحجي كاعد و هو كاعد كبالو ويحجون .. دحك بيا و رد يحجي وي ابوه

:- ها شلونك عمو

-دحك .. هلا .. اي ابني .. تره انه تعبت واخوتك مخليهم براسي .  بالله انه منين اجيبلهم .. سعيد نايم وعوايلو براسي .. لا واحد ولا اثنين ١١ جاهل عندو واثنين نسوان .. اركض انه ونائل وما الحك على عيشتهم ..

-وهو ليش ما يشتغل ؟ .

- شيشتغل يا بابه .. اذا هو مخلصها نوم بغرفتو .. راحت المولده كعد عطال بطال .  عزد ماجر بيتو ويصرف بي وربع ما ينطي للبيت .

-يابه انه تعبان و مشاكلي لفوك راسي وكوه افسر كلي هسه انه شمطلوب مني

-تعيني عجل انت تركتني .  انه منين اجيب .. وهذا سعيد شوفلو شغل

-العبادي يا يابه انه واشغلو .. ما يحس على روحو ويطلع يدور شغل ..  ابنو بطولو واصرف عليه حتى عيب شنو ماكو احساس ليمتى يضل نايم براسي ..

-شسوي انه ابوك اراح اطك واموت من القهر انت تكول يحس وهو ما يطلع وانه حاير بهلجهال ..  ونايل يادبو يكدر يسد مصاريف الكلنا

-ان شاءالله حجي ان شاءالله .. لا تقهر نفسك اتركو انه احجي وياه

...  اندار عليه :- امشي اصعدي سحبيلي ٥٠٠ من الفلوس الفوك .. يلا بساع

.. صعدت .. جبتلو الفلوس وانطيتو .. والحجي يشكي ويلوب بي عايفني وانه ابوم وراح اموت وانت اسبوع ما داري عني  .. واسطوانتو المعهوده كل مره لحد ما راح .

- هيريلي لگمه خل اتزقنب ..

.. رحت مشيت للمطبخ وبقى وهو امو يحجون بالحجي .. شلت الصينيه .  وحطيتها بالهول    وكعدنا اني وهو ..

الحجيه كالتلو اكلنا اني وحلا بالعافيه.. بقينا ناكل ... نا يدحك بوجهي .. عاد اني هم شلت وجهي وما حجيت وياه  ..

ل٢ وهو جوا كاعد ع الموبايل .. اني نمت .. لهناك حسيت عليه وهو ينام وراي ويخلي راسي على ايدو ..

كعدت الصبح على همساتو وهو يبوس باذني .. ويكولي كعدي يحلوه .. حظرتلج ريوك من اديه

.. نزلت اكلت وياه .. بس ما احاجي .. هو ما لح .. من شافني شايله وجهي .. ثكل حجي وياي ..

لثاني يوم .. ابن عمهم امزوج بنتو .. عزمتنا مرتو اني و الحجيه .. ف بدلنا ورحنا اني وياها وحلا ...

دحكت العروس شلون فرحانه .. ابتسمت لضحكتها ...

هم حاسبه روحي مثل البنات .. واني حتى بدلة عرس ممجربتها ولا عايشه شعورها ..

زفيناها ومشينا وياها لبيت العريس واجواء حلوه  وفرحه ...  وخلصنا ورجعنا ب٨ بليل ...

كلها طشت وحلا راحت وي خوالها .. والحجيه تعبت وراحت وي نائل  اللي اجه اخذ امو و نور ومشت لبيت الحجي.  لان صراع اتاخر عليه ..

لل١٠ ادك عليه وما يرد .. تنرفزت حيل وتعبت ودوخه براسي .. وكلما ارد ينطي مشغول .. عود واصل قريب وما يريد يرد ..

اخر شي لطشت هري مكالمت هو يكطع واني اتصل .. رد

-ولج هااااي وصلت شبيييج .

-ليش تنطيني مشغول

-غير وصلت

-حتى لو بالباب ما تنطيني مشغول ..

-وهذا حجيج ومكاونج جدامهم .. اصبريلي

-وسداه .. ثواني وسمعت سيارتو طبكت بالباب .. فات اني بالحديقه    اخابر .. تجاهلني وفات سلم على ابن عمو وعماتو

رادو يكعدو .. كاللهم والله تعبان والمره هرتني هري بالاتصالات لان تأخرت نعست  ..

رادو يوكفو يبات .. اتعذر وطلعنا ..

صعدنا بالسياره :-عجل امي وين ؟

-راحت لبيت الحجي تعبت وحلا راحت وي خوالها

-اي حلا انطتني خبر .. مسح على لحيتو ودحك .. يعني الليله وحدنا

-نعسانه وصوت الضجه صارعه راسي ما اعون اصل وانام

- نصل ونشوف منو يخليج تنامين يحلوه

... راد يحرك .. اندك الشباك ووكفو ابن عمو .  نزل الجام .. :- ها خويه امرني

سليمان :- خابرونا اهل الولد .. العريس ماخذ البت وماكو دم .. و صايره هوسه انت تعرف ابنهم الجبير مو

-اي صاحبي

-عجل خل نركب ونروح نشوف شكو .. لا تصير دم وابوها هسه تهستر .. امشنا  .

-ما عندي شي .. بس ..اندار .. نزلي ليليان    شويه ونردلج

-شنو صراع........

-لا لا خليها انه راح اخذ امي وانت اخذ حرمتك ونمشيلهم .. يلا خويه ..

- يلا .. حرك السياره ومشو ..

-وهسه وين رايح

-لبيت العريس غير

-شكو

-يكولون مو بنيه  وصايره مشكله

-عجل شنو ولد

-يولي يعني ماكو دم عذريتها

-اي وشنو يعني

-صار سنين متزوجج وما فهمتي .. شنو طينتج انتي ..

-اعرف العذريه بس يعني شنو مو بنيه

-اندار يدحك بيا .. وضحك وهز ايدو ..

-لا صدك عود هسه شصاير

-يول عذرية البنيه راية شرف بالنسبه لعشايرنا .. ولو هو صار مو مقياس هلنسوان تحير شتسوي .. غشاء و وجيب وودي بس هسوالف متعبر علينا

- عابت شنو هلسوالف والله انتم ما تستحون ..

-ابتسم .. ويهز براسو

-اي جان خلتلها غشاء صيني وفضتها هاي شبيها .

-لا والله .. ولج جاي تصدميني بافكارج الفاشله يولو بس المو شريفه تسوي هيج .. ولا عبالج نحن نعرف الدم صحيح لو مغشوش ..

- شمدريني اني .. غير هيج اقرا بالفيس .. حتى ما اعرف السالفه الحقيقه شنو .. دوخه انتم واني نعسانه كوه افسر

-والله ماحد خرب عقلج غير هلفيس هذا ..

-اكولك شلون تعرف الدم حقيقي لو جذب ...

- الحقيقي يصير لونو غامق اسود دم عذريه معروف .. الصيني يصير لون الدم فاتح كانما جرح عادي

- وصلنا بيت العريس .. وهوسه كابه و البنيه مكتوله .. فتنا اني وعمتهم . لفينا البنيه وكفنا يمها ..

وصراع و سليمان يتحاجون وي اهل العريس

ويتصايحو وصراع يزكح ويحجي وي اخوهم الجبير :- انت شنو راضي على حجيهم لو ما تعرفونا ومعاشرينا عرضنا ما يطلع الباب و التنشز منهن طلقه براسه وما نتنجس بيها ..

جر اسلاحو من ظهرو وحطو بيد العريس وكالو .. هاك هذا لو طلعت مو ابنيه انه اكلك اكتلها وثق واعتقد لو طلعت مظلومه . حكها منكم ناخذو ناخذو مربع جزات بهذلتكم الها والنا وشهيرتها بهشكل ..

وصاح علينا نجيب البنيه و حجه وي اخوهم الجبير كاللهم اريد امكم وياي تجي ..

عاد اني وعمتهم وامهم واسليمان والعريس واخوه .. اخذنا العروس .. خطيه ترجف وتبجي .. ورحنا لقابله ..

فات صراع واسليمان وحجو ويا القابله وذمموها .. ان شنو الحقيقه تحجيها النه وما تضمين ولا حرف ولو عرفنا مستره لو ما حاجيه .. حسابنا وياج انتي ..

فاتت العروس وفتنا اني و عمتهم وامهم .. وهي تفحص .. اني وكفت على راسها والبنيه تستحي يفحصوها وتبجي وامهم تغلط وتكلها لو شريفه ما تخافين ..

شكد تذكرت نفسي بيها من جنت اخجل من الفحص .. خطيه كمت ابجي وياها ..

عاد جبروها الا تفحص .. وفحصتها وكالت .. خطيه غشاءها قوي وما يصير هيج وياها .. ولا بمره ولا بمرتين الا عمليه جراحيه صغيره ينفتح لو يبقى يصبر عليها لحد ما يفك ...

طلعت وحجت هذا الحجي كدامهم ... واحنا شهدنا ع السالفه .. عاد صراع وسليمان لعبو جوله بالعريس واهلو ..

ورادو ياخذون البنيه وصراع يكلهم .. بجزات شهرتكم الها الا اكعدكم فصل و والعب بعشايركم جوله والله ..

واخوهم يتعذر و سليمان يزكح .. وكونه شكبرها .. وما قبلو ينطون البنيه وترد وياهم .. عاد اخوهم الجبير كاللهم اخذوها وحكك علينا باجر نحن نجي مشيه الكم ونرد البنيه ونتعذر منكم جدام الوادم ..

.. اخذنا البنيه ورجعناها للبيت وساعه يحجون ويتناقشون و حجي وهيج نسوي وهيج نفعل

واني صرت مطي من النعاس .. كمت اشوف الواحد اثنين .. ادحك الساعه ٢ ونص وصراعو حامي ويحجي ..

حطيت راسي على جانب التخم .. وغفيت ... كعدت وهم يدحكون بيا ويضحكون ويكولوله روح ام حرب نامت هينا ..

مشاني ورحنا للسياره .. اول ما صعدني كملت النومه بالسياره .. ركب صعد هو .. مد باسني وحرك ومشى ..

ما حسيت غير وهو يشيلني من السياره ومدخها الكراج وساد الباب .. وفاتح البيت .. وشايلني ويمشي بيا ..

نومني جوا بالغرفه .. وراح بدل وجابلي ملابس ونزعلي حذائي وبدلي .. وغطاني ..

للفجر .. حسيت عليه .. صلى ورجع .. فتحتلو ايديا بعين مفتحه وعين مغمضه .. ضحك وجا حظني ..

-احبك بس اكرهك .

-و انه اموووت عليج بالقران ..

-ليش تجرحني

-وج والله اعشكج وما يهلي تبجين    بس شلون احويج ما عرف عجزت وانه اكلج ما عندي غيرج والله

-ضميت راسي بحظنو ...واخذني الو

... البيت فاضي وبس النا .. عشنا كانو عرسان ..  يتغزل ويتحارش بكيفو وين ما عجبو .. سوينا اكل مع بعض وبقى وياي مكابلني ما فاركني ولا ثانيه ..

لليل وهو وياي .. حتى الحجيه ما راح عليها ..

بس اني ما عندي فرحه تكمل .. كاعدين مع بعض واجاه اتصال ..

رد .. كالو نائل .. الحك الحجي تخربط وماخذو للمستشفى ..

شكو ؟؟؟

اتكاون هو وسعد ووكع ..

چك الدشداشه ع السريع وكال قفلي البوب بسع وراي ولا تفتحين ابد .. وراح ركض ..

بقيت وحدي .. وبالي مشغول اتصل ميرد .. عاد نمت واني انتظرو .. ل١ بليل كن جابو الحجي هو وام سعد و الحجيه وصراع ونائل .

فتحتلهم الباب وتخبيت ورا الباب لان ما لابسه حجاب من نائل ..

الحجي شاديلو مغذي ويصيح ويحجي على صراع تركتني وخليتني وارجع وانه تعبت تريدون تجلطوني انه هذا سعيد ما اتحملو نايم وعايف عوايلو براسي .

وصراع يكلو .. حجي رجعه لذاك البيت انه ما ارجع .. هذا بيتي وانه ما بيه مشاكل ..

-لا ترجع ورجلك فوك راسك تعبت انه ابوك تتركني لجل هلمصلاوي يول حس على روحك بايع هلك لاجلها ..

-يابه انه ما لخاطر احد .. انه مشتري راحتي يزي عاد الف مره كتلك ما ارجع .. بيت مفتوح الك شوكت ما تجي هلا بيك بس رجعه الكم ماكو ...

الحجي :- عجل افتحلي غرفه الي و الحرمتي هينا اكعد وابعدني عن سعيد ..

-هلا بيك بس شلون وبيتك بويه غير انه عفتو الك خوما السعد مو كال اطلع المؤجر ويرجع لبيتو ..

-لا اريدو ولا اريد ركعة وجه سعيد .. انه هينا اعيش وياك حالي حال الحجيه امك وام سعد هم مثل امك ولا تخاف مالنا علاقه بحرمتك  .. شو جنك ما رايدني

-لا يابه صدك جذب هلا بيك هو بيتك ..

ورفع راسو يدحك بيا .. اني شطت للسما ونزلت .. احس النار طلعت من هامتي تركتهم وصعد

شويه ورد صعد وراي .. واستلمتو .....يتبع

☆☆☆☆☆☆