المراهقة والأربعيني الحلقة (81)

المراهقة والأربعيني

الجزء الثاني

الحلقة  (81)

دا احجي خزرني صراع و دخلني وفتح الباب اخلاص ع السريع لبست الحجاب :- امشي بنت عمي

-لا شنو تمشي....

قاطعني وهو يخزرني ويكولي :- ولا نص كلمه

اخلاص :- استر عليه ابن عمي دخيلك ولا تفضحني

-روحي مستوره و لا تهتمين ولي

ع السريع طلعت اخلاص واني خالني وره الباب وخالسني وما مخليني احجي ،

:- انت تعال تعال شنو اطلعها شنو مستوره

سد الباب :- كلمه عن اللي صار ما اريد اسمعو ، افتهمتي

-هو شنو اللي صار

-فتت للغرفه ولكيتها بلا حجاب وتعذرت اريد اطلع وانتي صرتي بوجهي

-هههه شلون بطه تلعب شناو ، انت شنو عتضحك عليا الغرفه مقفوله واني انطيتك مفتاحها

-هذا اللي صار و ماكو غيره ويا ويلج لو سمعت حاجيه وياها لو صاير بيناتكم شي

-لا والله ما حزرت اليوم اكلب الدنيا عليها

- ولج حيوااانه استهدي ، عزا منا وفاتحه و الفضيحه تصير براسي وابيتي ، استريها ومن نخلص العزا عودينه نحجي

غرفتج قفليها وانتبهي اكثر للفوك ، وحتى الحمام لا تخلين احد يصعدلو

... شفتو عصبي من صدك لما يحجي ، خفت اراددو واروح بيها كدام الناس يتكاون وياي ويصيح ، سكتت وكلت بعدين احجي خل تخلص الفاتحه

انطاني المفتاح  قفلت ونزلت ، لكيت اخلاص كاعده ويا حلا وعمتها ام وسام ،  دحكت بيه ، لعبت روحي من وجهه بودي اروح اتفل بنص خلقتها لهل عايقه البلا مستحه تتلزك بالزلم

فتت للمطبخ هيام تنظف بالخضروات باعثيها دنحظرهم ، كعدت يمها ، انتبهت اني متوتره

-شكو يولي

-سولفتلها ، بقت صافنه وتكولي :- ولج هاي وشلت مستحاها ما بقت ذره ، هيج العانس يصير بحالها لو ما لكت رجال ، عمى بعينهن يمه شلون يذلن ارواحهن بس يحصللهن رجال ادري قحط  وووع امداها

يولي حذري منها لا تبليج وتبلي هلمكرود خل تولي

-صراع يكولي سكتي

-يريد يطمطمها عجل شيكول هلمتعوب گلب

بقينا نشتغل ، واكفه ع السنك واجت حلا تكولي :- وين مفتاح غرفة بابا

- شتردين بي ، غرفتي قفلتها

-مصدكه نفسج عندج غرفه ، بيت اهلج كلو ما يطلع بكد غرفة بابا هاي اذا بقالج بيت او اهل بالموصل دجيبي حبابه

-استحي على نفسج وولي ما انطي افتهمتي ، البيت شكبرو وروحي كعدي صراع ميقبل احد يفوت غرفتنا

.. شافت المفتاح بصدري ، جرتو خيل وهي تكول :- دجيبي اجت العصر و بنتلها قصر

اخذتو وصعدت هي واخلاص واكفتلها ع الدرج، اني طلعت الهيام ، كلتلها على حلا ، ع السريع تركت من ايدها وطلعت ، طلعت وراها

فتنا للغرفه ، حلا متمدده ع التخت و اخلاص فاتحه كنتورنا وتكلب بملابس صراع مال الطلعه

ع السريع سدتو من شافتنا وحلا تعدلت صرخت هيام :- الا صدك الأستحو ماتو ، نزلي دشوف تصعدين وتكعدين هينا ذيج غرفه مخليها الج الخلفج كعدي بيها

اندارت على اخلاص :- وانتي يلجبيره بدال متوكفين ويانا ملتهيه بسوالف طايح حظها ما تستحين تفوتين غرفة مرا ورجال

-على كيفج عيني شسوينا كلها بس كلنا نريد نكعدلنا ساعة زمان بلا صوت ، و هها وبعد تره من الصبح متشكلات وياج لا عبالج بس انتي التشتغلين

.. جريت باب الكنتور و سديتو ، وهن طلعن برا ، هيام نزلت واني دا اقفل اباب الغرفه جان توكف يمي اخلاص

:- كلشي راح يتغير وكولي اخلاص كالت لا تستعجلين على رزقج انتي بس صبري علي لا ما هججتج من هالبيت فلا اني بنت ابوي

-عانس ما ارد عليج

عفتها واخذت المفتاح ونزلت ، يربي شلون بالله اني اخلص من وحده تطلعلي الثانيه ، هلرجال هذا منين اضمه من عيون هلما يستحن يا الاجت و ذبت روحها عليه وتتمناه

اني اتحمل منو بيهن ، اخلاص لو ام مصطفى لو اسمهان لو منو ، انوب كلهن مو بعمري ، كل اعمارهن بالتلاثين ، اني اطلع وياهن هلكدي وكلشي ما اجيب من عقولهن والسانهن ، احس وحدتهن فاهمه شتكول ما مثلي اهبش و اجفص وانداس

بقيت اشتغل جوا ، الطبخ بالحديقه ، جا سليمان للمطبخ حجه ويا هيام :- خويا اللحم لسه ما استوى وما بقى غير اقل من ساعه لصلاة المغرب شنسوي

-والله يا ابن عمي ما اعرف هم شفتو وصفنت ، اشلون ما ادري

فات صراع للحديقه رفع صوتو اسليمان وصاح :- ابو حرررررب حدر يخوي

صراع :- شنو قضية اللحم

-يولو ما جاي يستوي

-و الحل

-جاي اسألك

- يصير الأكل ونصبو هيج شنسوي ما بيدنا

-غير ياكلون وجهونا على ابو طبخهم ما مستوي

-عجل يابه شنسوي ، هاك ٣ ملايين وروح دبرلي العشا ، يا مطعم هسه يحظرلك لحم مستوي باقل من نص ساعه يكفي فاتحه

نصبو هيج و عود باجر الثالث ونعوض ونكسرها ،

... ديحجي مرت المريه البارحه الحجت عليه وتكول بلا اصل ، ع السريع صراع رفع ايدو فوك و صاح :- ها خويه ام جمال شلونج

"- يا هلا ابو حرب هلا بيك يا بعد عمري شلونك خويه شلونك زين

-على الله نسأل على اخباركم ابو جمال شلونه احاولكم اموركم

-والله خويه نسأل عليك

-شوفي ام جمال من انتي كاعده ابيتي ودايسه ابساطي واجيب واحط جدامج زاد وملح عيب اطعنين بعرضي من وراي ،

رادت تحجي ، ما انطاها مجال :- دحكي انه هسه لخاطر العزا راح اسكت وهاي الكدامي شاهدين الا حرام بالحرم لو انعادت يا ام جمال ، اكعد رجلج وعمامج وحسابي وياهم ثكيل

-يا عزه بعيني خويه والله ان.....

سليمان:- لا لا عيب كلشي ولا طعن الاعراض ام جمال ما يصير

صراع :- والله بالله لو ما فاتحه جان ما سكتت

سليمان:- لا والله مو جدامك ، هلمصلاويه نحن كلنا نحجي بيها ، خلق واخلاق ما منها ، لا فد يوم سمعنا حسها لا بيوم راددت ، حتى اليحجي عليها تتحملو وتصبر ، اخلاقها ذهب

صارلي يومين بالحديقه وتشتغل ويانه ، اريد اسمع حسها حتى من تحجي بهمس وصوتها ما يطلع من صدك بالعافيه عليك الله جازاك ببنيه خلق و اخلاق

ابو جمال برا وهو زلمه ما يرضى بالباطله لو يسمع يتخبل بالقران

صراع:- لا انه اعرفو لابو جمال ما يقبلها وزلمه خوش زلمه

... تريد تحجي وتتعذر ووكفت يمهم ما انطوها مجال ، اصواتهم عاليه ونبرة حناجرهم قويه ، واحد يرفع و الثاني يكبس ، اخرها تركوها وطلعو يشوفون سالفة العشا

هي اندارت عليه :- عجل انتي وصلتيلو الكلمه انه تعذرت منج و كتلج ما جنت قاصدتج ، تحبين المشاكل انتي

-اني غريبه وما الي غير زلمتي يرد عني فكتلو وهو اليعرف يتصرف ، ليش اسوي مشاكل ،

ندستني هيام تعاي وراي ، عفتها وطلعنا للحديقه تحت ايد ابن عمهم يطبخ للفاتحه ، وهو يسخرنا

دحكت محمد من بعيد ، ابد ما يلفي علينا ولا يجي ، من رجع صراع ولليوم طم راسو وانمحت سالفتو وما انحجت ومحد جاب الها سيره كلها طمتها واني وياهم حتى امو نوال ما جايه للفاتحه لان ابيت صراع ، هي ما تحجي وياه ولا هو يحجي وياها من يوم موتت بنتها

... صبيا الاكل وفاتو ولد عمومتهم ياخذون للجادر ، واني واكفه ورا هيام استحي لان هم جايين ، وبيهم كبيعه يسالون :- هاي ياهي المره منين

لان ما كلهم يعرفوني ، مو مثل لما يجون بالعزيمه كم واحد منهم ، بالفاتحه بخويطهم يجون ما يبقى احد.ما بجي ف يسألون

كملو صب للزلم ، انتقلو للنسوان ، كمنا ناخذ ونوزع جوا ، من شافني صراع افوت واطلع كدامهم للحديقه ما قبل خزرني خزره وبقى بوجهي خازر ، عرفت قصدو ما اطلع برا

بقيت جوا يناوشوني واني امشي للنسوان ، اخرها خلت ماعون هيام وكالت خل نكعد ناكل ع السريع ونكوم مدام الاكل حار كعدي

كعدت وياهم بالهول ونسوان كلار كاعدات ، اكثرهم كيش وملفع مال عرب ، نحنا بالموصل لو شفنا مثلهم نكول عنهم بابة عرب مو حظر مثلنا

كاعده عني شويه مجموعة نسوان بس مرتبات يدحكن بوجهي ابتسمتلهن ، هن ضحكن وكالن :- انتي مرت ابو حرب مو

-اي

-عفيه وين مسويه التاتو مالتج كلش حلو

-بتركيا

-ياااا مو اكو شغلو كلش طبيعي وحلو حيل ، منو اخذج ابو حرب لتركيا

-اي بالعيد رحنا اني وياه

-يااا فدوه الله يخليكم والله هو يستاهل وحده مثلج حلوه واخلاقج حلوه ، صدك مو اجتماعيه وما تعرفنا عليج بس مبينه حبابه وهو معدل خوش زلمه الله يحفظكم

-شكرا

هيام :- هي هاي طبيعتها هادئه بكلشي صوتها ما ينسمع ما طبعها تضحك وتجامل واجتماعيه ويا الناس

-اي اي مبينه خجوله ، ما تشوفين ميت عليها حقو حلوه وصوتها ما ينسمع وشكلها مبينه مسيحيه من الملامح مو من عدنا

ام وسام :- يا شكبرتو يمعودين لا فد شويه تطلع مريم العذراء وما ندري ، السانها شطوله من تحجي

هيام :- والله عاد سبحان الماعندو طباكات ويعصب ويطلع صوتو لا انداس بمصارينو

... اني سكتت معرفت شجاوب حتى بعد خجلت اكل ، كمت ع السريع رحت للمطبخ وكفت ع الجاي

بقينا لل١٠ ، ونحنا جاي ماي روح تعال ، فضت شوي فات صراع للمطبخ ، واسليمان وراه يحجي ع الفاتحه

اندار عليه اسليمان :- بعد اخوج بس اخلاص جاي لا استكان راسي فد مره

صراع :- اكلاصين سوي

.. وكفت اسوي وهم راحو للهول لان النسوان الغربه استقرن بالاستقبال وبقن بس الحجيه و نسوان عمهم وبناتهم ، اخذت الجاي و رحت اقدمو

اول شي رحت لصراع ، اشرلي انطي لسليمان ، رحت قدمتلو كال :- ايييي والله رحمه والديج ، يابه المصلاويه هلفاتحه تعبناج

-لا عادي

رحت اقدم لصراع وهو يدحك بعيوني مبتسم ، وحجه سليمان

- عجل يابه يكولون  المصلاويات شاطرات بالاكل اديهن بركه ونفسيتهن طيبه ، ول ياب نريد نضوك اكلج كبب دولمه برياني

صراع :- لا سليمان لا لهين و اكف ، شو انت جاي تهين بينا

-ها يابه شكلت

-ول يابه خل انضوك احنه وبعدين انت ضوك

-افاااا

-نحن اختصاصنا خبال تجفيص سالفه عدله نلوصها ، الاكل وهلشغلات مو يمنا سليمان

-ااااخ لا لا ابو حرب ما اقبلها منك انه هلمصلاويه ما اقبل احد يحجي عليها

... اني من يمي كرصتو حييييل

صراع :- ولا اني اسمحلك ول يابه وين اكو منها استر عليه يولو جاي الليل وين انطي وجهي تره هي خوش مره معدله افتهمت احترم نفسسسسسك

هو حجه هيج وكلهم ضجو ضحك واسليمان يكلو :- ابو حرب شو بدلنا لازم اشتغل الخوف

-شنو خوف الا اعضاي كامت تگلگ ، مو زلمه الما يخاف من مرتو

سليمان :- ههههههههههه اي بالله

دخل عمهم عزام و الحجي جوا وهم يحجون كالو :- يابه اصواتكم اهل المرحومه جوا عيب منهم نضحك

سليمان :- كاعدين نسولف ع الزلمه الما يخاف من مرتو ابو حرب يكول مو رجال

-واهو صادك ، اكو احد ما يخاف من مرتو اطنكر ويضل حاير بليل وين يولي

كلنا ضحكنا واحنه نضحك نكول لس عيب منا منا الناس عاد ام وسام كالت :- و الله التطنكر على روحها الزلمه ما يخسر شو مكثرها النسوان

صراع :- ام وسام الاكله لا ما ابيتك ما الها طعم لو شما تكون اكلت بيتك بسيطه و على كد الحال بس تعرفها شنو ما تضر ولا تسمم اكل البره ما منو غير بس طيحان الحظ ، وهذا حال النسوان مكثرهن صحيح بس وين التلكى مثل العندك

مثلا يعني لو ابنج وسام دور على بنيتي احط ضهر اعلى ركبتي واكسرو وانعل شيب امو لابو شيب ابو

كلنا ضحكنا وام وسام ضحكت بس بينت ضاجت من كلامو ، وحلا دنكت ما ردت

وكعدو يسولفون واني كاعده يم صراع و اخلاص ما شالت عينها من صراع ادحك بيه ، همستلو :- هاي شكد ما تستحي

-ما الج علاقه بيها سكتي

-وانت ما محصله منك غير سكتي وسكتي ، عفتو وصعدت فوك .. دحكت اكو تراب اباب غرفتنا ، تنرفزت شنو هلوساخه يربي متت حتى ما بيه امسح الغرفه

كلت الصبح امسح خل انام ، فتت و هستوني تمددت ونمت فات صراع وتمدد يمي

-ها مريتي شو نمتي

-ما رديت

-تقرب اكثر وتغطى

-صراع وخر اريد انام

-ول يابه وانه

-اكولك تره فاتحه وميته تعب انت شنو ما تعبان ما تحس ، وخر

جريت الغطا واندرت ، ضاج عافني ودار وجهو ينام ، كعدت

-اكولك اخلاص شتريد منك

-مو شغلج

-شنو مو شغلي وفوكاها تهددني تكولي لا ما اهجج من هلبيت فلا اني بنت ابوي

ما حجه :- شو ما تحجي

-تعبااان

-هاااه هسه تعبان بس من تجي ادور سوالف ما تعبان

-سألي روحج من اجي واريدج وما اريد مشاكل تتحججين بس وكت النكد و النك السانج هلطوله ما يتعب ولا يسكت ، دامج تعبانه انطمري

-دحكت بيه ، جر الغطا ودار وجهو للجهه الثانيه ، اخذت نفس و رجعت راسي بس التفكير اكلني ووجع اسفل راسي و ظهري هم ، كوه نمت

كعدت الفجر على صوتو وهو يصلي ، نزلت كلها نايمه الهول ما بي مجال من كد ما كلها مجطله ، فتت دست ابطن مره صرخت ، وخرت منها دست على راس الثانيه كبت ، وعثرت عليهن وهن يصيحن ما قابلات

:- خايبه شنهييييي شنهيييي مرعدتينا

ما رديت عليهم ، يطبكم طوب ، طلعت روحي منكم فتت للمطبخ كعدت هيام و كلها كامت تصلي ، صراع فات حتى صباح الخير ما كال

عشتو زعلان لان ما رضينا مزاجو البرتقالي ، هزيت ايدي وكمت اشتغل ..

بس هذا اليوم كوا مر عليه ، اخر يوم الفاتحه وناس عينك وما تمد البيت ياخذ ما ينطي ، غرفة عمتي تعج غرفة ام سعد متروسه حتى غرفة نائل ، انزل للبيت اتيه من كثر النسوان

كوا خلصنا العشا ، كلها هجت فجأه حتى عمومتهم ما عونو يخلص الثالث ويطلعون ، نزلو الجادر ودخلو جوا

واخلاص طول الوكت كاعده يم عمتي وتضحك  ومدري شتتشاور وتسولف ودهن ودبس وياها ..

كعدو تعبانين من الفاتحه وصراع كاعد و الحجي و سعد ونائل و عمة حلا بعدها ما راحن منتظرات وسام يجيهم

كعدت يمو همستلو :- دحك لو ما حجيت وياها وطردتها واخذتلي حقي من هلحيه و قسم بيسوع يا صراع ما اسكت

دار وجهو عليه متفاجئ :- اسكتي ليليان عيب خطار منا

-يعني ما تحجي ؟

-يولي شحجي سدي السالفه لا تفضحينا ول غبيه

عدلت نفسي وصحت عموووووو

الكل انتبه ، وصراع يندسني بكتفو حتى اسكت

الحجي :- ها يابه

-اني اريد اشكيلك البارحه اخلاص صعدت للغرفه وهددتني ، و الصراحه اني سكتت احتراما للعزا وما ىدت تصير مشاكل بس هسه ما اكدر ايكت اريد اعرف اني بشنو اذيتها

-واهو شنو البيناتكم حتى تصل للتهديد

ادحك بوجه اخلاص زركت وخظر وجها من الفشله ، وصراع دنك يمسح على شواربو

-والله عمو اني حجيت حتى افتهم على شنو عتهدد

-بشنو هددتج

- تكولي اذا ما هججتج من هلبيت فلا اني بنت.......قاطعني صراع وهو يزكح :- كافي اسكتي وطلعي فوك

هيام :- لا ليش تسكتها خليها تحجي دنشوف شكو لان بنات عمك ما طايقاتها الليليان اليكول طالباتها بثار

صراع :- سوالف النسوان بعد اخوج لا ادخلونا بيها الزلم

ليليان :- عجل منو اليدخل هااا ، اذا دكولي لا ما هجتتج ما اطلع بنت ابوي ولا تستعجلين على رزقج

شو عمتي تمشي بصف الحايط وتصيح يا ستار استرني وما تفزعلها بسالفه ، وهيام لو حجت محد يتحمل احجايتها المن اشكي لمرت ابوك الساعه ووكت تصيح ما نعرف اصلها من فصلها

وانت لو حجيت وياك تكولي سكتي واني اريد اعرف هي شتريد مني تتلزك و كاتله روحها على...... قاطعني

-ليلياااان

خزرني حيل :- طلغي فوك يلا

حجة عمة حلا :- شبيج اخلاص شعندج وياها بشنو مهددتها

- يا ام هددتها ههههههه شبيكم كل السالفه هي متضايكه لان صعدنا اني وحلا ارتحنا فوك وهي ما قبلت  هاي حلا شاهده على كلامي

وهدت علينا هيام اطرد بينا وتصيح وتغلط و اني سكت كلت مهما كان نبقى بنات عم

انصدمت شلون لافت السالفه عليه كم ارجف وتعصبت -والله جذابه و قسم بيسوع جذابه انتي هددتيني

-شعندي وياج واهددج بس كافي عيب وهذا عمي كاعد واريد اشكيلو مدام انتي شكيتيلو

، تقبلون كلما تكوم وتكلي العانس وتتلزكين الرجلي وكاتله روحج على رجلي ، هو ابن عمي وعلاقتنا طيبه وهي تطعن بيه وتتهمني بي ترضوها

-ياااا اني كايله هيج انتي شكد جذابه الله لا يوفقج ، والله وقسم بالعذراء اني ما كلت هيج

-ما كلتيلي العانس ، عيب عليج تره هي قسمه ما يصير تعايرين

وكامت تبجي لو هم تخبلو وكلها كامت تحجي عليه ، وصراع يصيح :- كومي فوووك يلاااا

-لا شنو اطلع اني ما حاجيه غيج ، شنو تصدكوها

دفعني حيل :- ولج طلعييييييي

وخزر هيام واشرلها تصعدني فوك ، اني فرفحت شنو اندارت عليه وكلهم صارو ضدي فوك كوات عينها وشينها

كمت اصيح عليهم الله حسبي الله عليكم ، ما اكول غير الرب ياخلي حقي منكم يا ظلام وهو زكح :- لج بنت الاوادم طلعييييييييييي

:- هي هاي كدرتك يا رجلي ويا سندي هذا الكادر عليه تسكتني و اني المظلومه يا ظالمييييين

عفتهم وطلعت للغرفه ، اغلي نار اريد اكف ما اكدر ، شلون لافتها عليه ، وطلعت اني الحقيره مو هي ام الزلم

ما تحملت البيه ما يخليني اكعد وهي جوا ، نزلت كن راحو حتى حلا ، فات صراع يخزر بيا وفات للاستقبال

اهم شي ولت من هينا خلصت منها ، عفت وصعدت فوك طفيت ونمت

شويه وفات هو شغل الضوا وحجه :-  نمتي ؟

شلت راسي دحكت بيه

:- تعدلي احجي وياج

كعدت ، وهو تخصر وواكف كدامي ويكولي :- اسالج بالله وجاوبي ، الشي اللي صار جوا تشوفي صحيح ؟

-اذا محد ياخذلي حقي اني شسوي ، اني اخذ حقي بيدي واسمعها من هينا وغاد اني اخذ حقي بيدي ما بقيدك ما دامك ساكت وانت اول واحد ظالمني

-انه ظالمج وان كلب ابن ١٦ كلب من رضيت اخذ وحده سز وغبيه مثلج ، انه كلت لسكتي لو لا ؟؟ حجيييت لو لاااااا

-ما الي شغل بيك مليت منكم تظلموني ولازم اسكت تحجون وتهددون واسكت مليت اسكت مليييييت ، ما اريد اسكت بعد

-ول انتي من دا تحجين دا تهيني مدا تاخذين حقج غبيه ، من تكولين يا رجلي ويا سندي  انتي دا تقصدين العكس

كافي مليت منج ومن تصرفاتج عقلي ، فوك شينها وكوات عينها خليتيني اكعد اتعذر منها حيوااااانه ، انه انزل روحي لأخلاص الكح... واكولها حسبيها عليه وعديها

ولج انه متحلفلها بألف اخ وويل وانتي بغبائج هنتيني الها شلوووون وياج فهميني

ول تعبت منج شسوي وياااج فهميني لا الج احد واكعد واعاتبو واكلو يول تعبت عقلو بتكم ولا من اكعد وياج واعقلج تردين

صايرتلي مثل الموس بالبلعوم لا اكدر اجرعج ولا اكدر اعوفج فهميني التالي وياج شلووووون كليلي

كتلج يا بنت اسكتي ليش ما سكتي

-ما اسكت كافي ما اسكت

-اللي استفاديتي شنووووو

-المهم بردت گلبي

-هيج برد گلبچ يعني ؟  هااا شوفي ، انه بعد تعبت منج ، العصا وياج ما فادت والكعدت وحجيت ما يفيد والعاقبت هم ما يفيد ، انتي عرفت اليوم كلشي ما ينفع وياج الا اتركج ويطوب طوب شنو اللي يصير ويجرى من ايدج فلا ادخل بعد

.. اندار اخذ فراش من الكنتور وفرش بالكاع بعصبيه وتمدد نام ، ما نام يمي ، بقيت ويا نفسي ساعه الوم بنفسي واكول لو ساكته وساعه اكول لا كافي شنو اسكت وساعه اكول ذيابه ما ينكدرون واني تعبت منهم

للفجر ما نمت بس اتكلب بفراشي ، حسيت عليه وهو يشيل راسو من الفراش دحك بساعتو وكام للحمام توضى وجا وكف صلى .. كمل رجع لفراشو والحواجب معقوده وضايج وما يحجي ويايه رغم عرف اني كاعده

كمت من مكاني رحت يمو  كال :- ليليان كومي لمكانج وعوفيني

.. حشرت نفسي ورا وحظنتو  من ظهرو دا اريد احجي ، دفع ايدي وصاح :-  ليش تظطريني اطلع الكلمه المو حلوه وبعدين تكولين ما تحترم وتغيني كتلج كومي مني

- اني ما قصدي اغثك لو انقص منك اني.....

-كل كلمه تحجيها محسوبه عليه وتهينيني جدام اهلي وكرابتي وتنزليني لمستوى هلحثاله من ورا عقلج التعبان

-انت انغثيت لان السالفه تخص اخلاص

-ليليان ليش ما تكومين مني تعبان ومالي خلج بالقران ، شو هي السالفه جت وروحت والناس راحت اكعد بليل اتكاون واعيدها واطلع انه الحيوان و الهمجي ، تجفي شري وكومي مني

-ووووو وتالي يعني

-وتنترين فوكها ، دكومي مني كووووومي ، تره لازم اعصابي عنج بالغصب

كمت منو بنتر و كلت :- ووو ويطبك الف مرض

بعدني هستوني كعدت ع التخت دا انام ، كمشني من شعري وكال

:- عيدي شنو كلتي

خفت رفعت اديه :- ما حجيت شي ما قصدي والله

-انه اليطبني الف مرض موووو

-مو عليك لا

يعت بشعري ويصيح :- اذا بنت ابوج دحكي عليه وعيدي شنو كلتي

- كتلك مو علييييييك شعرييي

ودفعتو ، ع السريع انطاني جف ودفعني ع التخت بعصبيه ورد لفراشو

احس خدي اشتعل نار من حركة كلبي كتلو :- ضل طلع مراجلك براسي وجو صم حلكك واسكت لا تحجي عود هاي رجوله

اني حجيتها لو هو هجم عليه بكل قوتو سحبني من شعري وحط ركبة رجلو ع التخت ، اصبعي صار جواه ، هو يضرب ويصيح واني اعيط بكل صوتي واصرخ

وهو يكولي :- ول انه مو رجاااال هيج منج ومن الجابج عليه

و اصبعي تملخ تحتو متت بس اريد اجر ايدي فرفحت من الصياح وهو ما يوخر عني

تضاهرت بفقدا الوعي ، ع السريع ابتعد وكعد يصحي بيا .. دفعتو وكمت ، عاد من كمت من صدك افترت الدنيا بيا و وكعت

ما صحيت الا وهو يطش الماي على وجهي ويسب بنفسو وبيا ويحجي واعصاب ، شافني فتحت عيوني ، تركني وكام

لم فراشو على صفحه وراح طلع ملابسو العسكريه ، مشى للحمام يسبح ، اني بس ابجي كمت اناشغ من كل گلبي ، رجع سابح وهو محتقن وضايج

لبس ملابسو العسكريه ومتوتر يروح ويرجع بالغرفه ، واني ابجي كعد ع الطابوريه يلبس بالبوت  ويتنافخ ضرب الكرتا مال الحذاء بالميز وطلع و سد الباب قوي ورا

عاد تعدلت من فراشي ، ادحك ايدي توج من الوجع احسها نكسرت رحت قفلت الباب ورجعت لفراشي من صدك ابجي لحد ما فحطت ونمت واني تعبانه من الفاتحه و الليل ما نايمتو ، نمت نومة اهل الكهف ولا حسيت ع الدنيا غير ب٣ الظهر

واني غاطه بنومي احس دفرات ع الباب ، حسيت الباب حينقلع ع السريع فزيت واسمع الحجي يكول الصراع :- ول خاف هاي غميانه

وصراع يدفر بالباب و يصيح :- ما استفقدتوها ما سألتو عليها من الصبح لسه ميت عدله

فتحت الباب وصرت وراه ، لان ثوبي قصير خفت لا الحجي يشوفني ، فات صراع و الحجيه تصيح  من جوااا :- شصاير

و الحجي يردها :- الخانم نايمه ظهاري وما حاسه ع الدنيا

فات صراع وصافن بوجهي كتلو :- شبيك مضيع امك لو ابوك بوجهي

-قسما بالله ما جاي افهمج  ، شنو جنتي تسوين

-جنت نايمه

دحك ع الساعه و رد دحك عليه بنظره ما افتهمتها وهز ايدو ، مشى للكنتور وكال :- روحي مشطي وغسلي وجهج وتعالي احاجيج

عفتو ورحت للحمام اريد اغسل ، ضربت عيني بالمرايا انرعصت من شكلي شعري مكفش ومخبوص و الدم من جنت غميانه نازل من خشمي وملعوص وجهي كلو واثار اصابعو مطبوعه على وجهي

بللت شعري و مشطتو ولميتو وغسلت وجهي ورجعت للغرفه ، لكيت مبدل وكاعد كال :- حدري لشوف دا احجي وياج

-احجي من مكانك ما عاجبني اجي يمك

خزرني ، بلا كلام مشيت كعدت يمو ع التخت اخذ ايدي وسحب تنهيده مليانه ضيم وحجه :- ول ابويه انتي ليش توازيني وتخليني اطلع عن طوري

يولي شفتيني عصبي وضايج اتجنبيني ، اقلها اسكتي ولا تراددين ، بصلافه تنترين وتتجازين وتحجين حجي اكبر من راسج

ولا تضنين انه متندم لا وحك هذا الله لأن صايره ما تجرعين واليتجاوز يلوكلو الطك لانو عرمه ووكحه والله ما يجرعج

-مفهمت هسه انت دا تتفاهم ويايه لو تهيني

-انه ما جاي اهينج ، يول انه جاي انصحج ولج كافي ، جاي تأذين روحج وتأذيني بهلتصرفات الطايشه

-اي خوش نصيحه نصحتني البارحه

-من الأخير يول انتي لا جاي تجين بالعين الحمره ولا بالعين واغاتي ، بالقرأن حرت وياج شلون اتصرف ، يول اكعد دواوين والله افر عقول وانتي عقلج ما جاي احتوي ولا افهمو كليلي شنو تردين انتي

-وليش ما حجيت ويايه هيج البارحه ، خلصتها اسكتي وسدي الموضوع واتركي السالفه واطمطم لخلوصه

-انه هسه وبعد اكولج سالفة اخلاص ما احجي بيها ولا انتي تحجين ، يولو چلب لو عضچ تعضينو ؟

اخلاص واخواتها واهلها چلاب العشيره بعد لو اكثر ؟

ول انه عاشرت مره من عدهم واعرف دروبهن ووساختهن ، جوزي عنهن لا توصلين يمهن

اذا هي اخلاقها زفره واجت تتحركش بيج وتهدد ، انتي ليش تنزلين لمستواها ، هو بيتج لو بيتها وتهجج؟

لا تصفين روحج وياها وخلي العالم تميزج عنها ، لا تنزلين المستواها ،

يول العشيره كلها حاسدتني عليج اليكول جاي يجدد شبابو وياها و اليكول جامعه حسن المصلاويات بوجهه و اليكول بهدوئها ماكو

والله اخاف اطلع بيج لراس الشارع من عيونهم ، شجالج متكليلي شجاج انكلبتي

-ليش انكلبت

-صايره چلب مچلوب يرادلو لقاح

-خلف الله عليك

كمت منو ، سحبني من ايدي انجر اصبع ، شاغت روحي وصحت :- ااااااااخ

ع السريع انتبه و دحك بأصبعي صاير كأنو عجينه مختمره وارم :- هاي اشبيه اصبعج شصايرلو

-والله اسأل روحك البارحه صار جواك لما جنت تضربني

تنهد بضيم وكال :- خليج هينا هسه اجي

نزل وعافني ، شويه و فات وبيدو قالب صابون حلب نسمي ( صابون رگي ) جايبو من عمتي

حط الخاولي على كتفو وكال :- امشي لشوف

مشاني للحمام وكفني كدام المغسله وهو وراي شغل الماي الحار عليها وكام يفرك بأصبعي على كيف بصابون ركي واني اون من الوجع

كال :- تدرين هسه اذا احد صعد و شافنه راح ننفهم غلط

-ما كل العالم مثلك منحرفين

جريت ايدي منو وابتعدت

:- ها شلون صارت

-شدا تشوف ؟

-يول هاي انرضت ، نكمل غدا واخذج ، متغديه انتي ؟

-ما اشتهي

احجي من ورا خشمي

-نازل كبلج اوصي على غدا من برا

رحت للغرفه حطيت

خافي عيوب ورتبت نفسي ونزلت هو موصي على دست قلية لحم و خبز حار

... نائل مموجود و هو باعث علي يجيب ، و الحجي كاعد كن توهم طالعين خطار من عدنا و الناس منتقله لبيت سعد

جاب علي الاكل ، حطيتو و الحجيه ما راضيه حيل ضايجه ، كعدنا اني ما ردت اكعد بس صراع زكح بيا الا اكعد ، كعدت هم ماكلين الباقي من الفاتحه نور محميتلهم ما قبلو يكعدون

كعدت وهو ياكل ويلف وينطيني ويكولي :-اكلي يولي

عاد الحجي ما تحمل وحجه :- فوك ما تكسر راسها على فواينها البارحه ويا بنت عمك لو على حسها من الفحريات كعد.العالم كاعد تلفلها زقنبوت وتنطيها كافي كبرت راسها خل تولي

صراع :- اللي مضايقتو مشاكلنا بهلبيت ، اني عفتلكم بيت ثاني وترتاحون بيه

- انت جاي اطرد بابوك لأجلها ، كافي غسلت مخك لاحسه عقلك ما مخليتك تشوف احد كبالك ، اطرد بالعالم وانت كاعد ترضي بيها

-الف مره كلتلكم ماااالكم علاقه بيه ، اسممها تسممني اطلعو من حياتي لا تدخلووووون

- ما ندخل ايييش مرتك جاي تطعن ببنت عمك وبشرفها وانت راضيلها خزيتنا جدام العالم افتضحنا ونحن ساكتيلها

-بنت اخوك اكبر كح.... لا و الكح..... اشرف منها بألف مره على اقل ذيج شغلها ومفتخره الا بنت اخوك كبال الناس سبحه ويا الله و من ورا ظهور  العالم خارطتها

صراع حجه هيج لو الحجي تخبل ، وكبو مكاون بينهم اني طلعت ع السريع فوك ختلت .......يتبع

☆☆☆☆☆☆