المراهقة والأربعيني الحلقة (62)

المراهقة والأربعيني

 

الجزء الثاني

الحلقة  (62)

.. حطيتلو الصينيه ..

-متريگه ؟

-لا بس اكل انت اني ما مشتهيه

-ليش شبيج ؟

- خاصرتي دتوجعني

-حدري لشوف .. بالله

-لا ميحتاج اكل حبيبي

الحجيه :- حدري يمي افركلجياها شويه ..

... تقربت يم الحجيه تفركلي وهي كاعده وهو عيونو عليه

-اذيتج مو

-لا مو مهم هي من زمان توجعني

مدلي ايدو ..  رحت عندو كعدت ولمني بحظنو .. مسح على شعري وباسني ..

-تريگي لشوف .. وجهج صاير اصفر جاتلج الهم يولو عليش

-عليك غير

- اشعل شيب اهلهم والله .. لا تشيلين هم تريكي

- اكوم اجيب كلاص جاي

- شربي وياي لا تگومين .. هاج

-ابتسمتلو وبستو بخدو

الحجيه :- ونحن شلون نضل ندحك ؟

... ضحكنا اثنينا وهي ضحكت :- الله يحفظكم ان شاءالله ..

فاتت هيام هي وبناتها :- ها صباح الخير

.. رفع راسو .. هلا ام علاوي هلا بيج خويه .. بوكتج حدري تريكي

-ضحكت .. بالعافيه خويه هني ومري .. وگربت تبوس راسو .. ابو نفس الطيبه الله لا يحرمنا منك يا بعد هلي ٣ بيضات وتعزم عليهن ..

-الله يسلمج خويه .. هلموجود ..

-شلون صحتك اليوم اشوفك زين

-على الله

...فات علي شاف صراع كاعد .. خاااالي هاا ها ها جيت هلمعرض

صراع :- دار وجهو اجتنا الدوخه .. حدر لهين ابو الفواين لا بس ذبيت حجاياتك وشردت اليوم اكضي بيك التوبه

علي :- لا لا لا رجاءا خالو ما اسمحلك هااا .. انه ابو الفواين هذا اللقب خاص بالصفيرا مالتك انه عليوي ابو الطلايب احفظ اللقب رجائا

هيام :- هههه ما عم عليك غير السانك ولك اكعد

علي:- اووو استلم الكراوي التعبانه .. هسه انه شگلت متگليلي

صراع :- اكعد يول هينا لشوف گبالي ..

-اجاك الموت يا تارك الصلاة ..  كعد وحط المخده بحظنو .. دحك خالو لا تكلي سولف وشصاير توني كاعد ودماغي ما يشتغل الا بصينيه بيها ٣ بيضات وكرصتين خبز ..

-عندي سم تريد ؟

-والله شيطلع منك نعم الله ..

.. دنك ياكل صراع ومبتسم ويهز براسو ..

علي :- كومي ام الفواين سويلي ريوك

-اشتغل عندك ؟

صراع :- دحك لساره .. خالو كومي سوي ريوك لأخوج لحتى اكضبو بعدها املص رگبتو

- افاا خالو حسستني انه طلي تنطيني ماي كبل لا اذبحني ..

... كلنا ضلينا نضحك على سوالفو .. فاتت حنين و حلا .

صراع دحك بحنين ورد دحك على علاوي شافو يدحكلها حجه وياها :- ها عمو ؟

-هيج اجيت اكعد هينا

-هلا بيج كعدي هينا لشوف ..

.. وكعدها يم سرير الحجيه من الجهه الكاعد بيها علاوي و بيناتهم الميز .. حتى لا تجي عينو عليها ويدحك بيها ..

علاوي استلم الرنه .. كام يحك برگبتو ويدحگ بالسگف ويغني  .. يا ظالمني مة ترتاح راح اتعلمك الايام ربك فوك راسك شوف صاحي وعينه ابد متنام .

كلنا ضحكنا .. وصراع مدنك يغمس وثاولها .. نريد نحجي بسالفة سعد وبنتو كاعده .. عاد هيام كالتلها عمه حنين متشوفين ساره وين صارت هذا جوعان يريد يطلع

هي ما عولت .. بساع كامت .. فتحت السالفه هيام وحجت وي صراع على شنو كالولك

كاللها كذا وكذا وكذا .. ردتو :- الله لا ينطيهم ان شاءالله شلون محوريها صدك لو كالو ضربني وبكى سبقني واشتكى ..

كعدت يمو وسولفتلو السالفه كلهااا .. وصراع عندو كلام هيام بصمه ميحتاج يدور وراه لو يشك بيه .. خلص عرف الحق من الباطل والحجيه هم ايدت الكلام

ردت دخلت حلا على نص الحجي وكالتلو على محمد شلون ضربها وسولفتلها وهو انجن .. يضربج وابيتي .. داس الگاع وگام ..

طلع من الغرفه .. الحجي گاعد :- محمد وين ؟

-طالع ليش

-خابرو دشوف يلا ..

-شصاير

-انطيني موبايلك حجي .  اخذو وكالو رقمو وين    يحجي وهو يدور بالأرقام ..

الحجي باگ هوى عبالو اني حجيتلو سالفة محمد كالو :- بس استهدي يابه وگللنا شحجتلك هاي

-اندارلو صراع منو هاي

هيام :- يابه صراع يريد يحجي وياه بسالفة حلا لما ضربها .. رفع المبايل صراع يحجي وي محمد ويرز لبي ويكلو هسه تجي .  هيام شاورت الحجي ان ليليان ما حجت شي اسكت لا تخبلو

سكت الحجي وگعد وصراع ضل يفتر بالبيت فاير من الغضب ..

كواوي.... منتظريني امووووت وتحوشون الجواي .. وانه ملفيك مثل البزازين ابيتي كلااااب .. لا يغزر وياكم ملح ولا ينفع وياكم طيييب ..

بس انه الكم والله لهججكم وانعل عشايركم

الحجي:- صريع يابه بس اهدي خل نفهمك

-الا انت حجيييي كلمه مااا اريد اسمعها .. خااااااابرتك وانه بنص الموت وكتلك حجي امانة الله ورسولو بنتي ومرتي .. عينك عليهن ولا تظلمهن تااااالي هيج تسوي بيهن

وحده اطعنون بشرفها والثانيه تمسحون الكاع بيهااااا ..  عبالكممم عيني غفت واتوليتوووووهن حقراااااء ..

دشوف هذا سعيّد وينو .. و وگف على المحجر .. سعدددددد سعدددد.. وراد يصعد وكضبتو هيام

-خويه صحتك بس اهدي والله كلشي ينحل

-وخررري عنييييي ..

حجت حنين من فوك : عمو بابا مو هين والله طالع ..

-وييين طالع ... ديحجي وسمع ام سعد من الطبخ كالت الله لا ينطيها لهلا بلا اصل هيجتو وهدتو علينا ..

وهو رجع .. شلوووووون ؟

سكتت

-منو البلا اصل ومنو الهيجتو وهدتو .. مرتي كح... وانه حيوان موووو ..

بعدها ما حاجيه وجابها براشدي للكاع وكعها .. ورد كضبها من ركبتها ويخنك بيها ويصرخ  انجر بي نريد اشتعل نار ..

وانخبص الجو و هي تصرخ و تصيح تضربنييييي انه تالي شيباتي تضربني وتخنكني يصريع ..

و نحن كاضبي و هو يصرخ  هدوووووني اشرب من دمهاااااااااا لهلعجوز الماااااااا تستحييييييي ..

والحجي يجر بصراع .. بحسبة امك وخر عنها افاااا عليك تضرب امك شجالك الله لا ينطيج ان شاءالله هجمتيناااا

صراع :- هسه تطلع من هيناااااا هلعجوز ما تكعد ابيتيييي هسه اطلعوهاااااا اذبحها والله واطلع ضيم گلبي بيها لهلدايحه السايبااااا .. ونزل عليها فشار ما ينلبس عليه ثوب ..

اخذها الحجي وطلع و صراع  يلهث وبعدو يصيح ..

نوال واكفه ع الدرج ما ادخلت ابد ولا واحد من بيت سعد ادخل ..

و حتى علي كاعد بغرفة الحجيه امدد رجل على رجل و ع الموبايل .. ولا فازعلهم .. ويصيح حلل يستاهلون بعد خالي هججهم ..  وعافهم وكام طلع ..

وبس اني وحلا و هيام نفازع ورا صراع ونجر بيه ..

من دحك نوال گال الها

صراع :- هسه تخبرين رجلج ما اريد ولا واااااحد هينا يلااااااا ... لاملي شلة هتليه ابيتيييي

ومحمد وين ما اگضبو لاملص رگبتو لهلخنثه يتمرجل راس بنتي من تالي

.. طشن هن يلملمن بغراضهن اني صعدت وي حلا لجهال نائل يبجون وامهم مو هينا ... صاح من جوا

... ليليااااان .. فزيت بسع ركض نزلتلو ..

-علاجي بساع راح ينفجر راسي .. يحجي و مرجع راسو للتخم .. وهيام اجتو تفتحلو دكم دشداشتو احتقن واختنك من كد ما صيح ..

ركضت جبتلو علاجو و ماي .. وهو ما كام يدحك من الوجع .. نريدو بس يشرب .. راسو اذاه حيل ..

نزلت نوال اخذت جهالها و مخوزره علينا وطلعت اخوها بالباب جا ..

هيام خابرت على نائل گالتلو الحك ابو حرب مو زين .. كاللها خابرني الحجي هسه انه مسافة الطريق يمكم .

.. شربتو العلاج كوا .. ركضت جبت طشت و منشفه وكتلي ماي بارد يغسل راسو حتى يرتاح ..

حطيتهن وهيام تساعدو حتى بنزل راسو يغسل .. غسلتلو راسو وحلا وكفت كاضبه المنشفه    شال راسو حطتلو المنشفه على راسو باستو .. يبعد الشر عنك بابا الله يخليك لا تأذي نفسك .

.. هز راسو .. ومدد ع التخم .. نزلت ضحى مرت سعد الثانيه و كالت ليليان بس جهال نائل خطيه نطو بجي اني اجاني ابويه طالعه ..

صراع امدد وحاط ايدو على راسو وحجه :- نزلي الجهال يم امي ليليان

.. صعدت جبت الجهال احمد و محمد سكتو .. بس هذا عابد الصغير نط ولا يرضى خطيه يريد امو ..

رحت للمطبخ الولي بي وانومو ما يقبل انطي ممه ميريد يصرخ .. حرت وياه .. حتى بحلا ما يقبل ..

فات نائل صحت  :-  الله جابك يمعود ابنك طك بجى ..

-وينو ابو حرب .. وفات بسرعه ما دحكلي .. هاي شلون مشكله و عبودي يبجي .. رحت وراهم هو يتفقد بصراع وصراع يكلو

:- ما بيه شي بس شيل ابنك سكتو ..

-اجاني .. تعال بابا ليش تبجي ليش .. اخذو ... تعاي ليليان ..  رحت وراه ..

-شصار ما افتهمت ع الحجي بس يصيح شكو ..

- امك غلطت على صراع وهو تعبان وراسو متعبو وجع عاد انهد بيها وضربها و طرد سعد و عائلتو

-هو سعد وينو

-ما اعرف يكولون طالع من الصبح ..

-شلون بهلمشاكل الما تخلص يا الله .. امي هم مدري شلونها هو رجال مريض دسكتي .. يوميه كابين مكاون والله مليت ..

... يحجي ويهز بابنو نام على جتفو من التعب ..

-هاج هذا نام خلي بغرفة الحجيه .. دشوف شسوي ..

... فتت بغرفة الحجيه نومتو

الحجيه :- صراع شلون صار

-نايم ع القنفه

-راح يموت هلرجال والله .. والله يايمه لو تسدون هلسوالف احسن .. راحت و ولت تموتن الرجال هسه عليش

-يمه اني ما حاجيه والله بس غير بعد الشيخ كالها وهو يتحقق ويريد يعرف السالفه وشفتي بعينج هم شلون فارين الحجي عليه يعني ضروري يسمع من عدنا ..

.... هدئ الوضع كلهم هجو وطلعو و صراع غفى و الطفل نام . وحلا اخذت محمد واحمد فوك حتى لا يطلع صوت وصراع نايم .  ونائل طلع راح للحجي ..

واني وهيام وكفنا بالمطبخ وحده مگابله اللخ .. وايدنا على حلگنا وصافنين .

- صدك صراع تعب بس والله هسه برد گلبي و شفى غليلي منهم ..

-هههه ولج بس تعب حيل الله لا ينطيهم ما يرتاحون الا يموتونو .. اكوم اطبخ الغدا وانتي كومي يم رجلج شوفي خاف يحتاج شي يلا ..

.. مشيت من يمو .. رفع ايدو .. دحك .. ما نايم .. رد ايدو على وجهو ..

-محتاج شي حبيبي

-تركيني ليليان راسي تعبان

... اندكت الباب .. مشيت دحكت .. نور وامها وابوها جايين ..

صراع :- منو

-نور واهلها

-اخذ نفس وكعد .. دحك بالكاع .. وفرك وجهو و گام .. استقبلهم و وفوتهم للهول ما للاستقبال ويگلهم .. وهلا بيكم وفوتو هينا قابل خطار انتو نحن اهل ..

وصاح ام علي غداج ..

ابوها :- لا والله دايمه جينه نشوفك ونتحمدلك بالسلامه

-ما يصير ابد والله .. جيبو ماااي يابه ..

دا يحجي ونور كامت باستو براسو :- اعذرني والله زلة السان من حركة كلبي من الجهال تعبت و طلعت مني بلا قصد الا انه لو شسوي ما اجازيك والله

صراع :- يلا ما صار شي بعد اخوج .. هلا بيج

الاب :- والله طيحنا حظها كلتلها ولج الا ابو حرب وتتجاوزين ينكض السانج يولو  ..

-يلا هي هم بحسبة اختي و بنتي .. وانه هم جنت تعبان وو صارت ..

-اي والله كالتنا تعبان الله ينعلهم والله عمي زلمه وما تخبلت الا الينسجن عدهم ما يطلع الا لمستشفى المجانين من ظلمهم .. سبع ومقاوم ..

وفتحوها حديث على كرايبهم هم مخطوف ..

هيام :- ولج حاجيني شنسوي غدا وذن سالكات بس فاصوليه

-خابري علي يجيب مسكوف و نسوي تمن عجل شنسوي  .. فاتت نور سلمت .  سلمنا عليهاو

-عجل وينهم

هيام :- هججهم ابو حرب وراج ههههه

-صدك والله

-اي والله كتل ام سعد كتله .. تسوه عمرها

-يااا وشسوت

-شسوت انطردت فوكاها وهي الممنونه .. عوفي السوالف واكفي ويانه خل نفض الغدا عيب راح يأذن ..

.... فضينا الغدا وصبيا السفره .. وادحك بصراع كاعد ويحجي ..شكد فرحانه بكعدتو بينا .. احس اخذلي حقي بيهم واكدر ارفع راسي بجالو ..

.ابتسمت بساع عينو التفتتلي .. فهمها .. دنك و حاول يخفي ابتسامتو كدام ابو نور ..

فات الحجي و نائل ونحنا نصب سلمو وكعدو ع السفره ..

كعدت يم صراع .. وهمستلو واني اجر بالخاشوگه

-يا فرحتي بيك بردتلي گلبي

- زلمتج انه يابه اخذلج الحگ مربع افااا .. يحجي ويفلس بالسمج ما مبينها يحجي ويايه

- قبانو الزلمتي .. احلى زلمه ..

شال راسو ويستمع لحجيهم ومبتسم .. دحكت ع الحجي خازرني .. ما اهتميتلو ولا عاد اهتملو .

.. كملنا ولمينا وغسلنا .. و راحو اهل نور .. وهم كعدو ويا صراع يحجون والحجي يلوم بيه

- وانت زلمتي وجبيري هيج تهين ام سعد بحسبة امك وما يصير .. هججت اخوك وعوايله

ردو :- حجي راسي تعبان اسكت عني رحمه لأهلك .. ودحك على  نائل ... العصر اريد سيمكارت وموبايل يمي اريد اعزم عمامي باجر ..

الحجي :- ليش شكو

-اريد اذبح بثواب حرب ما ذابحلو ولا مثوبلو .. لهذا اريد اعزمهم

-بيها الخير ان شاءالله الله يرحمو .. انه اخابر عمامك ..

-ياريت بس كون هم وعوايلهم ما بس هم .. حجاها وصعد .. وصاح ليلياااان .. تركت وصعدت وراه ...

فتت جاي يبدل .. اتفاجئت بجسمو كلو مشوه من التعذيب .. هو دار وجهو يحجي انتبه متفاجئه بي بساع چك الدشداشه ..

-هاي كلهجروح بيك .. شنو المسوي بيك انت ..

-مشى وكعد ع السرير ما حجه ..

-ما تتوجع

-لا تشيلين هم انسي ..

-صراع يحتاجلك دكتور

-من طلعت السجن اخذوني مستشفى وما عليهم ضرر .. لتخافين

-بس اكو ورم بضهرك صراع ..

-اريد اروح لبغداد اراجع عليه .. لتخافين كتلج ما يوجعني ..

-نزلو دموعي واني صافنه بي .. ما اعرف فعلا ما يوجعنو لو هو ما يريد يشغل بالي ..

.. سحبني وكعدني بحظنو .. وعصرني باديه كتلج لا تفكرين .. الا احجيلي شعورج بكتلت الحيزبون

دحكت بوجهو ..

-ابتسم .. نامي .. باس راسي و ولفني حيل .. ابتعدت منو من تحظني تتأذى

-لا بالعكس ارتاح .. حدري كتلج لا تشلين هم ..

.. ورجعني على ايدو يمسح على راسي وما يخليني احجي لحد ما خلاني اغفى وهو هم نام ..

... كعدت المغرب هو ماكو .. نزلت لكيتو يم الحجيه تعاتبو لان ضرب ام سعد وتكلو :- ما يصير يمه مرا جبيره وعذا عقلها اتركها بشيباتها وتكتلها حتى مو حلوه بحقك شيكولون عليك

وهو يرد :- محد يحجي خلي ائدبها لهلعجوز الما تستحي ما الها رداد و تلغي بكيفها وتطعن بهذا وذاك ..

عاد هي مشت عليه طكه ونص خل استفاد من هلطكه وابرد كلبي بيها وليس على المريض حرج ..

هيام :- ههههههه حشاك

-والله بالله كضيت عمري عاگل شحصليت جتلتني بهمها عاد خل اكتلها وانه مجنون كبل لا اصحى ويلوموني ..

حرامات لو مخليني  اموتها لو حاطلي سجينه بگلبها وخلصان .. بلكت ارتاح .. عود الله كريم اذبلي جم دمعه بفاتحتها وانعل داعش الخذت عگلي وخلتني اتخبل ..

كلهنا طكينا ضحكنا .. دحكلي :- اي ضحكي اضحكي اليوم بردان گلبچ شعليج ..

-غير بجالك .. حركتها و كتلتها وطردتها .. الا اطكلك اصبعتين واركصلك هجع مو بس اضحكلك

-تركصيلي هچع يول مو .. انتي هم خربانه من وراي ويرادلج ضب

-عجل شد حيلك

-اندار موسع عيونو وفاك حلكو .. والحجيه وهيام طكنها ضحكه .. هو هز راسو ودنك ..

... دك الباب نائل .. وفات .. ابو حرب هذا الموبايل و السيمكارت .. شرايك دكوم وياي نتسوك لباچر ونجيب الذبيحه .. غير جو يا خويه لا كلو كاعد بهلبيت وبنص المشاكل ..

-راسي تعبان بالله هو انه بحال مشاكل بس شسوي منين ما التفت طلابه ..

-دكوم وياي كووم

... كام وي نائل راح واحنه بقينا كاعدين نسولف ..

لثاني يوم من الفجر ذبح ٢ خرفان على روح حرب .. ومن ٨ الصبح الناس بدت تحي واولهم شرفتنا زلوف بگصايبها الحمر النازله من الشيله ووجهه جنه كرش وحده جايبتلها ١٦ طفل ..

بقينا نشتغل كلهاااااا اجت عمامهم بخويطهم هم ونسوانهم وجهالهم حتى خلصلص قائد الميدان ما بالحيف تفوتلها عزيمه لابو حرب ما تكعد تتلوگ

نزل صراع .. شاف زلوف كاعده هي ما اجت بيوم الاجه فصاع :- هلا والله بزلوووف شلونج يااابه

-هلا بابو حريب المعدل حدر جده احبك ..

-باس راسها وكاللها بعدج ادورين حب وبوس ولج كعدي راحه البكدج شبعو موت كرطتي روس الوادم .. شنو عزراييل ناسيج عدنا ..

-هااااع وانه جاعده عدك ماكله بچدك وتريدتي اموت ..

- والله يا زلوف طولتي كليلي اذا عزراييل متأخر ارمشلو اشوفو وينو عنج شو بطى ..

-عسى كلمن يدعي علي بالموت سرطان اريد بغراضو كون يطك وينجتل من القهر وما يكدر يكول علتو ..

هي حجتها لو طكينا من الضحك الا بجينا .. وهو رافع راسو يضحك من كل گلبو

-ولج مو كتلج كعدي راح زلوف مخليه عينج ع الوادم جدي صار تراب وانتي ادورين وره غراض خلگ الله وتدعين عليهن ..

-خايب انت عوفك مني ولك شو صاير صوندا شجالك جده هناك ما ينطونك اجل

- ينطوني هوى  واجلت هوى ليما مليت

-ياااا

-عجل اجذب عليج ..

-سرطان بغراضهم ان شاءالله ما بي شفى ولا علاج

.... كلنا ضحكنا على سوالفها وهو ما يمل يداهر بيها وملساع يكلها شو طولتي شنو السالفه .. وهي تتخبل اخر شي كالتلو لكيتلك مره

جان يصرخ بضحكه :- هو ما عمى عليه غير المرا مالتج حتى عطلت من وراج

-خايب مو رجال الما يثني اتزوج واكسر عين هلفرخه المصلاويه

ليليان - ياااا شنو فرخه والله عيب كلمه ما زينه ..

نائل كام  وصاح :- نستقبل اول جفصه ونكول الووو

وضحكو عليه

صراع :- شتقصدين يولو ليش مو زينه

- كلمة عيب ما تنگال

-شو الا تحجيها ..

عفتهم ومشيت وهم يضحكون .. وعود يعوفني ..

- حدري هين يولو .. الا تكليلي شنو هاي العيب

-كلمة فرخ عندنا بالموصل كلمه ما زينه عيب

-مبتسم ويغمز .. ليش شنو معناها

-تعرف مبين امشي مني

-والله ما اعوفج الا تكولينها

-يعني الولد اليحب ولد ..

-اي

-اي شنو اي هي هاي .. جدتك كلما كامت وكالت عني فرخه

-الفرخ عدنا يعني جاهل .. وهي الكلمه ريفيه ما مثل عقلج المنحرف .. اساسا انتم المصالوه منحرفين

-ياااااا والله منحرفين بقينا الادب الك يبو الاداب ..

-ههههه صعدي جيبيلي علاجي راسي صدع .

.... صعدت جبتلو و كلها ملتمه بس سعد وامو ماكو .. فضينا الغدا وخلصنا و غسلنا وصبينا جاي وكعدنا كلنا بالهول ..

لان الول جبير حيل .. كعدو يشربون جاي .. صراع اشر لنور و الحلا يسحبون شكو طفل يطلعونهم بالكراج حتى يحجي بدون هوسه ..

انوب صاع علينه :- ياريت نسوانه يكعدون حتى نحجي والكل يشهد عندي سالفه وياكم ..

كلها هدت .. عمو الجبير كالو تفضل ..

صراع :- الله بالخير

-ردو الله بالخير عليك ..

-ام علي گبل لا احجي .. جيبيلي القران خلي بيناتنا .

عزام :- افاا ابو حرب شصاير

-والله عمي انه عندي سالفه وياكم واريد اشهدكم واحط كتاب الله بيناتنا يعثر ويوكع الماعندو بخت ويطعن بأعراض العالم ..

عزام :- لا ان شاءالله ما بيناتنا شي و القران حطو على صفحه

-لا لا لا .. انه ما رايد اضر احد بكلام الله .. اني حاط القران اشهد العندي واكيد سامع تاهمين حرمتي وي ابن اختي و انه حاط القران عليهم مو على احد غيرهم ..

-عوف القران  يابه نحن اهل وكلام الله مو لعبه و هههههه هي حتى مريتك مسيحيه يا يابه

-لا على بختك عمي انه من يمتى اخلي النسوان تحجي لو امشي بحجي نسوان حتى احلف مريتي لو اهتم الحجيها .

انه طلابتي وي ابن اختي وانتم تاهمين عرضي وياه .. وانه حاط القران عليه يحلف ويحجي الحك والعندو بخت وصادك يحط ايدو ع القران ويحلف ما عدنا اشكال

مو خالو .. والتفت العلي

علي :- ما عندي اشكال خالو هاي احط ايدي ع القران واكولها كدام الكل ما اجذب بكل كلمه احجي .. قابل انه خايف ..

عزام :- محشوم ابو حرب تره محد جايب عرضك بشينه هاي جدام عمامك يشهدون

-مصدكك عمي بس هو اكو احجي وانه هينا كاعد اشهدكم لا اكثر حتى فيما بعد لو احد جاب طار عرضي بحجايه لو ذبلو كلمه .. وكتها اشيل اسلاحي وادكو حتى لو جان ابوي  خليها بمعلومكم ..

احجي خالو ...

... بدأ علي يحجي من لما جدو صاح علينا ونحن بالمطبخ وجدو زكح بيه راد يسكتو ..

ردو صراع من رخصتك عمي خلي يحجي يكمل واذا تريد ترزلو بعدين انفرد بي وعلى راحتك..

كمل علي يحجي وكل كلمه يكولها يقسم ع القران وصراع يستجوبو كدامهم ويأكدلو على كل كلمه ويستفسر ويتراددون وصراع يسكتهم ويخلي الحجي العلي

بعدها عمو عاتبو ان هي راحت للشيخ ولو جايه عندي .. صراع انفتح بيهم ان لما راحت للشيخ يلا حسيتو هي مظلومه ..

تريدون تلومون لوم ابوي انه وصيتو وهو خان الوصيه والحجي يحلف بتراب ولدو ان هو ما جان رايد يظلمني وان اني وكحه ..

واخرها جابها عمو كالو انت معدل يابو حرب ولا تخلي جاهله تحجي براسك وتخربك على اهلك

ردو صراع :- افااا عليك عمي هذا وكلام الله جدامك لهسه انه ما سأئلها شسويتي لو شعملو بيج لان الحجي ما اخذو منها انه اعرف منين اخذ وشلون اتصرف ..

بس عمي حرمتي جاهله والكلمه التذبها والله ما تعرف معناها وطايشه ما تعرف روحها من خيالها وتصرفاتها بلا حسبان .. وانه ان جنت متعاطف وياها مو لجل شي بس هي يتيمه وما الها احد

مو الله يكول واما اليتيم فلا تقهر .. بس اغيب يا عمي يهجولوها ويكفخون براسها يصييير ؟ .. اتركك منها عجل انه ما الي احترام من اطعنون بعرضي من وراي ما وكفت بعين احد ..

... هو يحجي وهم يگلولو لا والله حكك ولا تهتم وان شاءالله عرضك محشوم .. وردوها .. بس ما يصير تطرد اخوك وتكتل مرت ابوك حسبة امك هاي وانت معدل تعجبنا طلعت منك

ردهم :- عني انه عگل ما ضال براسي وهلحرمه من يوم الله خلقني واهو مسلطها فوك راسي تكوم تكعد تصيح على حرمتي كح... و بلا اصل والكلمه يا عمي تمسني ما تمس حرمتي عجل اني الفي كحا... ؟

الف مره حذرتها ما تعيد هاي الكلمه وما اتوب وانه والله يا هل ناس عقلي ما ضال براسي .. اجي من ضيم الله اشكال انواع العذاب شتو واريد ارتاح الكه الطلايب بكل مكان ..

اخر جلمتين عمي .. سعد وامو ما الي كلمه وياهم جاز گلبي منهم .. الاخ اليطعن بعرض اخوه هذا ما اخ وانه متبري منهم وكعده الهم هينا ماكو ..

رادو يحجون ولا ما يصير كاللهم لا لا لا هلمره ما اطردهم لا .. انه هذا البيت بايعو .. وبنتي يوين ورايحه الرجلها ..

اخذ امي وحرمتي واعزل البيت وابرد راسي ..

-عجل تترك ابوك

-ابوي على عيني وراسي ارگبتي ترخصلو وين ما يريد يكعد .. بس حرمتو انه ما استقبلها ..

بقو يحجون وياه ويهدون بيه ونحن اهل وما نريد الشيطان يخربنا و انت طيب وگلبك جبير بس حقك انت تعبان ويرادلك راحه .. ويكولون للحجي اتركو حجي هسه وليدك تعبان نحن النه جيه ثانيه الو ..

كاللهم هلا بيكم على راسي ... كملو الجاي و الجذب مالهم وكالو نحن نترخص .. وكفهم على عشى ما قبلو راحو ..

سدينا الباب .. كال انه اصعد راسي راح يطك من الألم .. بقيت وي البنات الملم .. اخلاص وخواتها بعدهن كاعدات يحجن بسالفة حلا ..

اكنس واسمع عمة حلا تكلهن شفتن شلون يفازعلها بحيل صدر ووكف عمامو وسكتهم بس حتى ما يجيبون طاري المصلاويه

اخلاص :- مو كالوها حظ الكح... كاعد عجل مثل حظي ..

حلا :- بس خاله هم صدك سبوها سبايه من راح ابويا ..

-انتي لا تظلين عوبه وتفزعيلها .. هاي اخذت مكان امج .. ما جان يضرب بامج ويطردها ..وهسه واكف دفاع لهلمصلاويه ..

-خاله غير يحبها بعد شيسوي

-ياا حتى انتي غسلت راسج ..

اخلاص: خاب هاي عوبه لو ما انه كايلتلها لا تدخلين من يكتلوها جان كل ما هادين على ليليان تشكف عنها وتنسحل .. ما كتلها محمد كلو من راس هلحيه ..

حلا :- لا هي شعليها خاله والله عشت وياها سنه ونص بالاردن شو طيبه مو مسمومه

غمنها ويكللها لعبت براسج وضمتج بجيبها امداج يلخايبه ..

عفتهن ورحت كعدت يم الحجيه هي وهيام تحجي ويسولفن بحجي صراع وهيام تكلها فدوه الطولو والله كحل عيني

بقيت اسواف وياهن شوي .. وكلت خل اصعد اشوف صراع .. صعدت .. دخلت الغرفه ..

ماكو ع السرير .. درت وجهي ولكيتو واكع متخربط بالكاع ..

ركضتلو واصرخ صراااااع .. احجي ويااااك صراع .. الحكوووووووووالي .. صراع جاوبنيييييي ..

اضرب على خدو و فاقد ...... يتبع

☆☆☆☆☆☆