المراهقة والأربعيني الحلقة (72)

المراهقة والأربعيني

الجزء الثاني

الحلقة  (72)

لحظات خيال .. ما تتواجد بيها غير انفاسنا وهي تشرح لبعض اشكد نحب بعض رغم كل الصعوبات و الفروقات يلي بيناتنا ..
.. ما افهم هو شيفكر واحيانا احس صعب اتعامل وياه .. وهو نفس النقطه يواجه صعوبه بفهمي وفهم شنو مشاعري و تفكيري .. لكن نتفق على نقطه وحده وهي الحب يلي يجمع قلوبنا حطيت راسي على صدرو .. وهو انفاسو مضطربه يتنفس سريع .. دحكت بيه .. ابتسم وباس گصتي

-شسويتي بيا مو عدل هاذ ..
-ليش
-الشيب ترس راسي وانه ارجف عليج ..
- رديت راسي على صدرو واخذت نفس عميق
... راد يغفى .. سمع الاذان .. شال راسي :- بس اصلي وارجعلج
.. تركني وراح للحمام .. اني نزلت جوا سبحت ورحت للمطبخ سويت حليب الي و گهوة الو ..

فتحت الشباك الفجر طالع السما لونها ازرك و الجو بارد صبح بيه انتعاش يكولك بس تعال اتنفس واستشعر الراحه اخذت الشراب وصعدت فوك ..فتت للغرفه لكيتو يقرأ قرأن .. حطيت الصينيه وهو صدق وطبك المصحف ولم سجادتو

-شسويتي
-حليب الي و كهوه الك
-ليش حليب الج وكهوه اليه
-ما ادري تريد حليب ؟
-حليب مثل گلبچ و كهوه سوده مثل عيشتي مو هيج قصدج
-لا هههه شنو هلتفسير منين جبتو
.. كعد ع التخت وعكس رجل .. ومد رجل وكعدني بحظنو على رجليه وتجيت ظهري على رجلو ..
-هسه مكلتلي اسويلك حليب
-لا نكاسر هذا بهذا شرايج .. انه اتحمل كلبج الابيض وجفصاتو وانتي تتحملين عيشتي ومرارتها
-هههههه تمام .. خبط كلاص على كلاص وانطاني .. وصرنا نشرب ونضحك.
-صراع بنفسي اعرف شوكت حبيتني او بديت تحبني
-ما اعرف بس اول احساس حسيتو الج لما جنه وحدنا بالبيت وانتي بالمطبخ تكصصين سمج
-وييي لا تذكرني ام المربعات
-ههههههه جنتي فارشه السمجات وكاعده ومخبوسه ودكم الكلابيه عندج مفتوحه وترافة جسمج مبينه .. بالبدايه غضيت نظر لان جنت اعتبرج حالج حال حلا طفله كلشي متفتهمين .

انتي تشكين وانه ادحك انضربت احوالي بذيج الساعه .. تعوذت بليس وكلت الروحي هاي شبيه تدني نفسي على بنيه بكد بزري..
كلت خل افلت لا الشيطان يوازيني وهي صغيره ردت اطلع حرت وحدج بالبيت شلون اعوفج..

عاد وكتها كلتيلي عمو ساعدني .. كلت ما بيها اليوم مكتوب عليه اعاني وياها .. بدلت ووكفت وياج بالمطبخ كمتي تسالين على عطري وتضاحكيني كلت خل افلت اقرأ قران احسن ما ابليها وانه كم شهر واموديها لاهلها

-عجل ليش ما وديتني
-ابتلى گلبي بيج شسوي .. صح بكد بنتي بس بعد كلت الروحي الله جابها وحطها بطريقي و محلل وضعي وياها عليش حارم نفسي وهي ما بقالها احد غيري واخاف ارجعج لهناك واعرف الوضع مو زين .. فحبيتج وخليتج الي
- ابتسمتلو .. باسني .. ابتعدت
-زين وانتي شوكت حبيتيني ؟
-لما صالحتني بالسياره ورجعنا للبيت الكهرباء طافيه ونمت يمي . ما اعرف بيومها مو حبيت بس شعور انو اول مره اصير بهيج وضع و رجال يخليني على ايدو ويهمس باذني وهلمشاعر شويه شويه حبيتك
-جانت حاس بهلشي وجنتي دوم تحبين اخليج بحظني بس اتمادى اكثر ممنوع وصامطه جد جدي بهسالفه
-ههههههههههههههه
-فدوه رحت لهضحكه
-حظنتو .. حياتي ..
-يولو خلينا دوم هشكل وخل نكف مشاكل تعبنا
-واني شمسويه
-ببطلي طيش تصرفي عدل شكولج كولي اي .. تره انه من امرج لو اكلج على سالفه خوما رايد اضرج ؟ غير لمصلحتج .. وان ردت گربچ بس لان احبج بالقرأن
- واني هم احبك بس انت ما تقدر
-انه ما اقدر ولج ١٠ اشهر انه مقدر واكول جاهله ما اجبرها .. تتزعلين صارلج اسابيع وانه اكلج مو ذنبي يولي شبيدي وانتي ما تفهمين .. حارمتني منج وباعدتني .. انه هم رجال والي حقوق اذا لا انتي تريحيني لا اشوف الراحه من اهلي ولا من شغلي وين ما انطي وجهي متعلعل ومحد يحس بيه .. كليلي شسوي ؟

-سكتت ..
-ها صافي يلبن ؟
- هههههه اي
-صدقه لربج .. وباسني بخدي
-يلا كومي لشوف سويلي ريوك هلحليب والكهوه حمسوني حمس .. جعت
-ما شفتك يوم لا ما صحت جوعان و جعت مو ضعفت الا ترجع تسمن
-هااااه وشتردين اسوي رجيم ؟
- اي
-هاي كلها حتى لا تكومين تسوين ريوك .. خرب بغيرتج .. دحكي ولج لو يجي ابو القعقاع هلرجيم هاذ انه ما اسوي شنو بويه هن يومين ونايمين بشبر و٤ اصابع وتردين احرم روحي من جتال ابوي واترك الاكل افاااااا كومي كومي لشوف كومي جعت ول يابه جعت

-هههههههههه كمت من يمو واني اضحك وهو يدمتم ويا نفسو .. هلنوب لحكتني ع الاكل اروح اجيبلي كيمر عرب هواي اشرفلي
-ياااااا ههههههههه
-اخذ السويج ونزل وهو يضحك
.. عاد نزلت حظرت الريوك وطلعتو بالحديقه ورتبت ميز و الشمس توها طالعه .. وهو راح يجيب كيمر ..

رتبت الكعده بالحديقه .. فات هو بسيارتو .. ضحك من شافني محظره بره .. صف بالكراج ونزل وبيدو علاكة صمون حار وماعون كيمر عرب..
-ها جبت جتال ابوك
-دحك ع الكيمر .. جبتو جبتو .. الا صدك خل اكعد ابوي خطيه ياكلو شويه هو يحب الكيمر
-بقيت ادحك من طرف عيني واني اصب بالجاي .. ضحك وكعد ..
-اي يم الفواين صبي لشوف صبيتلو مد ايدو واخذ يشرب بالجاي ويجر بالصمون عياكل .. ادحك بيه وبملامحو الخسفات اللي بخدو لحيتو الخفيفه اللي الشيب مطشر بيها .. ايدو و الساعه ابتسمت والتفيت وراه وحظنتو وهو كاعد وبستو برگبتو وهمستلو :- احبك

-احو ول يابه على هلحجي كليلي اصعد اتريك فوك بلگيمر اللي انطاه الله الي ..
- لا لا لا استقر جذب جذب لا احبك ولا ابد بس اگعد
-طيح الله صبغج
-هههههه .. كعدنا ناكل اني وياه و نسولف و نضحك .. شوي و طلع الحجي .. صراع ما عول بساع صاح :- حجي جبتلك گيمر حدر حدر تريگ والحجي كعد . واني مبتسمه على سوالفو .. فتت جبت للحجي كلاص للجاي .. طلعت الحجيه .. زدت الگلاص وبقينا بالحديقه نتريك ونسولف لحد ما الشمس احترت .. فتنا جوا ردت احظر ملابس صراع يطلع .. تذكرت البرنص و الشامبو .. اندرت لصراع

-صراع ما شايف البرنص مالتي و الشامبو
-لا والله يابه گالتلي حلا البارحه بس ما شايفهم
-عجل وينهم ؟
-شدراني
-بقيت احظر بملابسو .. دحكت ملابس عسكريه .. اندرتلو :- الا صدك صراع مو على اساس ترجع للدوام .. بطلت ؟
-لا بس منتظر الكتاب يصل حتى ابلش دوام
-هااا

كملت ملابسو وطلع .. كضبت موبايلي .. دحكت محادثة يحيى لسه مبقيتها .. ردت احذفها .. بس راسلتو حجيت وياه شويه وحجالي عن وضعو وانو هو كاعد بفرن صمون يشتغل بيه وياخذ يوميه ... سألني اذا اروح وياه . گتلو لا ما اروح وحذفت المحادثه..
وبقيت على تواصل وياه .. من يطلع صراع احجي وياه ومن اخلص حجي احذف المحادثه..
.. طالع هو و اجيت امكيج .. فقدت علبة حمر مالتي كامله سيت ١٢ لون ماكو .. دورت الغرفه هم ماكو .. عجل وين راح ؟

يربي غراضي وحده وحده جاي تروح وين ؟!!
.. مكيجت وسكتت بس افتر دماغي شنو القصه هيج غراض دا تضيع .. هن ميسون بس وينهن

نزلت جوا لكيت هيام كاعده وضايجه و علي واكف يصيح..

دخلت كعدت وهو يكولها

-انه اريد اتزوج انتي عليش امانعه

هيام:- ولك امانعه شنو بعدك جامعه ما دهلت دخلص السادس واتزوج عود

-انه جامعه ما ادخل شستفادو الخريجين حتى انه استفاد .. اخلصلج السادس بعد كم شهر .. واشوف شغل واتزوج ..
-يا شغل يمه هذا مستقبلك تفهم انت لو لا .. اليوم ماكو وضايف و الوضع تعبان ما تعرف بالمستقبل الله شضاملنا ما تضل غيمه سوده لا بد يجي يوم ويتغير الوضع يا ابني

الحجيه :- جده فدوه اروحلك منين طلعتنا بسالفة هلزواجه وكت زواج يا جده

-ما ادري انه كلتلكم رايد اتزوج اخلص السادس وتخطبولي . يا عمي كولو هلولد هاذ وازتو نفسو ويريد يتزوج الا امشي بالدرب الاعوج يلا ترتاحووون ؟

هيام :- ابطن عيني بس خلص السادس يا امي وانه اشوفلك مره بس اكعد وشوف دروس وراك بكلوريا وانت تحجي بالزواج

-ما اريد تشوفيلي انه البالي اريدها وواضح وياها
-هاااااا اهاااا هينا الدگ و المدگوگ بنت سعد لا تفكر بيها انجوم السما اقربلك لو تموت ابوها ما ينطيها الك .. تعرف محمد وسعد شكد يكرهونك
-وانه شعلي بيهم قابل متزوجهم . هي رايدتني وانه رايدها هم ما الهم شغل
-مالهم شغل شلون يولي غير اهلها
-والله لو اعرف الدنيا اگلبها اخذها اخذها هذا حجي يفيدهم
-علي يمه ارحمني كافي عوف هسالفه التهي بدروسك
-العندي كلتو وبقت يمكم ..

عافهم وطلع .. بقت هيام تشكي منو وتصيح :- بالله يمه كليلي شسويله وشتصرف وياه..
-يمه هلجيل هذا يتعب ومرحلة عمرو هاي اذيه يريد يثبت نفسو بكل طريقه والعناد ماليهم وما يسمعون كلام . شتسوين كليلو الله كريم وسايري منا ليما يخلص السادس الله كريم
.. اندارتلي هيام :- ليليان انتي قريبه على علي خبرج شتكولين حنين تتواصل وياه
-ما اعرف ما عندي علم
-ما گايلج ؟
-لا ..

حجيتها وگمت منهم .. اعرف هي تتواصل وياه ويحجس بس خوما اروح انطي بيه واذا ابقى اكثر تعرفني من عيوني اراوغ الجذب ما ينفع وياي بساع تطلع جذبتي طلعت للمطبخ فات صراع..
:- ها الله يساعدج
-هلا عمري .. شفتو رافعلي حاجبو لان امكيجه ونازله
- متمكيج من وكت اليوم
-ليش يوميه ما امكيج
-لا بس اليوم مزودتها . عندج شي انه حاظر كولي عيوني الج
-هههههه لا والله بس مكيجت و طوخت شويه
-هااا عجل اذا هيج سويلي عشا جوعان
- صراع مو سالفه هاي ادير وجهك وتصيح جوعان .. سوي رجيم
-افاا يول بالقران يكولك اخرج منها انك رجيم .. الله وصف ابليس بالرجيم وتريدن انه اسوي رجيم واعاون ابليس لا يا ابليس يا بنت البليس شنو تخافين ربج انتي
- ههههههههه هااااه وهاي هيج انت تفسر الرجيم
-استغفرك ربي .. دسويلي عشا اي مگموعه لاحكتني على هلأكل هو كل وزني ٨٩ وتريدني اضعف مو حرام ما تخافين ربج انتي
- ما كايل شي طن الا شويه
- انه طن يلغبيه .. الطن الف كيلو ما ١٠٠ يلغبيه يلغبيه .. ويضرب على راسي

ولج لا بالعربي تفتهمين وتجمعين جمع مكسر خوناء وملافظ ولا برياضيات تفتهمين ولا بالاحياء تفتهمين .. ولا عليه تفهمين .. ابخت محمد انتي شتفهمين ؟

-هاي اني
-لا يابه عروگ اذاني .. دسوي سوي لشوف
-هزيت راسي ووكفت اسوي عشا .. وهو فات جوا .. كملتو ووديتو لكيت هيام تحجي وياه

صراع :- اتركي هالسالفه بعد اخوج الولد بعدو طايش مو مال زواج..

هيام :- انه هم حجيت وياه بس ما شيقنعو

-انه احجي وياه و واملص اذنو خوما بكيفو نمشي ..
.. حطيتلو الاكل ..
-اكلك صراع سيت الحمر مالتي ما شايفهم ؟
-شسالفتج انتي يوميه مضيعتلج حاجه
-لا والله بس ما لگيتو
-شدراني شوفي وين مضيعتهن .

حجه ودنك ياكل .. دك الباب نائل وفات :- ابو حرب الجماعه اجو ع السياره

-اي .

ترك الاكل وگام للاستقبال .. اني شلتو للمطبخ انظف .. وسويت جاي وكعدنا نتعلل بالهول .. و الحجي ويانه..
.. كن راحو الخطار فات نائل و صراع .. كمت صبيتلهم جاي وسالتو يا سياره ؟
-اريد ابيع هاي سيارتي واشتري سياره جديده ابالي
-هااا
.. بقى كاعدين يسولفون انوب اجو ولد عمو ورجعنا لسالفة جاي وجذب وجكاير .. تركتهم وصعدت ل١٢ يلا صعد هوا ..

لثاني يوم صراع طلع من الصبح على سالفة السياره .. كملت شغلي وانتظرتو اتغدا ما جا طول .. عاد حطيت مخده بغرفة الحجيه وغفيت..

لهناك وحسيت على صراع يكعدني .. فزيت كن سابح

-ها جيت
-اي صعدي فوك
-تريد غدا
-لا متغدي بس صعدي عندي سالفه وياج
-شنو .. تركني وصعد . طلعت وراه ع السريع .. فات للغرفه وكعد :- شكو شصاير
-غرفتج من انتي جوا قفليها وانزلي
-ليش ؟
-اسمعي الكلمه واخذيها
-ليش يولو دا اكلج قفلي شفت شي ما عجبني
.. بقيت الح بالسؤال طكت روحو الا گال :- وانه فايت للغرفه دحكت نور تفتش بغراضج انصدمت من شافتني سالتها شجاي تسوي ارتبكت وكالت عبالي ليليان هين . وانتي نايمه جوا
-عجل هي الماخذه الغراض
-حتى لو هي .. الشغلات ما يسون .. قفلي غرفتج ولا تحجين عيب..
-ليش عجل هي ما تستحي من تفوت غرفتي .. تحركني يم الحجيه ع الشغل وما حجبت .. تحجي على لبسي وما حجيت وهسه تفتش غرفتي
-سمعي الكلتو واخذي و لو سمعت كلمه طلعت منج بالقران ما تلومين الا نفسج .. صمي السانج وانه اتصرف
.. دحكت بي .. عود شيتصرف وشنو اسكت و ليش بأي حق .. بقى الموضوع ياكل ويشرب وياي .. نزلت بليل ردت احجي وياها ..

گلت خاف المجنون مالي يبهذلني وسكتت بس ما بلعتها .. ابيتي واقفل غرفتي شنو شموازيني عليها .. خو يطلع اخوه ونخلص ما مبقي البيت ذاك بس السعد وسعد مأجر بيتو وعايش بروسنا

لثاني يوم الصبح .. ام سعد و الحجي جانو طالعين مدري وين وبس اني و الححيه ونور وجهالها كاعدين نتريك.

سألت الحجيه :- اكولج يمه البرنص مالتي ماكو بحمامي ما شايفتو ؟..

نور ارتبكت ع السريع حجت :- ويييي اني اخذتو سبحت فوك بليل ونزلتو
-و الشامبو والحمر ؟
-شنو انتي دا تبوگبني ؟
-لا اني دا اسئلج
-ما بالحيف اني لو ماخذتهن اكلج ماخذتهن عيب تكولين هيج طلتي البرنص وكتلج نزلتو بس تساليني ع البقيه عيب جان اني كتلج ماخذتهن ويا البرنص بس عيب

الحجيه :- شبيجن يمه استهدن بالله

-اني ما حجيت شي يمه دا اسألها مدري شبيها گبت وبعدين اني ما مبوگتچ بس عيب اتفوتين غرفتي وتفتشين بغراضي بلا استأذان كولي واني انطيج
.. اني حجيت لو جنت :- انه افوت غرفتج يعني انه بايكتج ولج ما بالحيف انه لبوك منج اني من بيت ابويه عيوني مفتوحه مو من تالي ابوكج بس عي كلمن يشوف الناس بأخلاقه
-اذا هيج واثقه من كلامج عجل اروح لغرفتج وافتشها ونشوف وبحظورج انتي

الحجيه :- ولجن انتن شو ما تستحن كااافي

نور :- لا والله مو كافي اتبوكني انوب تريد ادور غرفتي .. والله ما اسكت ولا ما اكلبها ودقيقه ما اضل هينا يجي الكاعده براسو لشوف يقبل بهحجيها

-اني ما حجيت شي انتي التفوتين غرفتي مو عيب
.. بقت الحجيه تصيح علينا وهي طلعت من الغرفه جنت وكعدت بالكراج تبجي .. كضبت جهالها كطعتهم تكطع حتى الصغير ضربتو خلتو ينط
.. خفت حسيت السالفه انلاصت وصراع لو رجع وسمع الا يملص رگبتي ملص .

طلعت للكراج وهي كاتله روحها بجي والجهال يتصارخون .. لميتهم وشلت الصغير وكلتلها نور اني ما بقصدي بس جنت اسالج لا اكثر

ما حجت ولا ردت بس كامت بعصبيه وهي تخابر حركت التليفون حرك على نائل..

اخذت الجهال وكعدت اسوي ممه لعبودي و رحت يم الحجيه ارضعو..
- يوم هسه شسوي شو كلبتها والله صراع البارحه شافها ادور بغرفتي لما جنت اني نايمه هينا
-حتى لو فايته لغرفتج عيب تعاتبينها .. اكضبها كضبت ايد من تفوت واحجي وياها مو تخليها بوجه صراع وتكبريها جان حجيتيلي ما كدامها وانه اتصرف
-وهسه شلون
-دكومي طلعيلها رجليه ما بيه اكوم والله .. كليلها الحجيه تريدج
-كمت رحتلها وعي نار وتدعي وحسبي الله ونعم الوكيل و حاط الله وياج وانه بواكه اليوم اليوم وخابصه الدنيا
.. عفتها وفتت للمطبخ هاي شلون سالفه بالله .. شورطني وحجيت .. لو جا صراع والله ما يرحمني هو وصاني ..

طلعت الجدوره وكفت اسوي غدا واني الف حسبه براسي وفكره تاخذني و اللخ تردني..

انفتح الكراج .. متت رعب كلت جا صراع .. دحكت نائل مو صراع .. تلكتو هي من الباب وهو يزكح بيها حتى يصف السياره..

وهي موتت روحها وتبجي وتكلو هاي تاليتها اطلع حرامية ومن منو ؟! من وحدة بكد فخذي كلها بسببك كتلك انأجر ونطلع منعيش وياهم ديصدقون علينا وهو يهدي بيها
جرها وهو كاضبها وفات للمطبخ :- ليليان شصاير بعد اخوج

-نائل والله ما كلتلها شي اني بس سألتها ما بوكتها والله .. بس هي فهمت غلط .. اني اعتذر لو اخذتيها هشكل بس والله ما قصدي ابوگچ
كامت تصيح :- انتي جذابه وهسه گلبتي الحجي مسمومه تهمتيني وهسه تكلبيها عليه
.. جرها نائل للغرفه وهي تصيح وما تقبل عاد دفعها للغرفه حيل وكامو يتصايحون هو وياها .. والجهال برا يتصارخون جان اسمعها اتكلو :- انت هم حاسب روحك رجال عليه دحك غيرك شحدو اليجيب اسم نسوانهم ويسوولهن هيبه وهن زبايل وانت كاعد هينا تتصايح وياي وما تاااااخذلي حقي وهذا نائل جن .. انه مو رجال وكضبها كتلها موتها .. اريد افوت اخلصها من ايدو وهي وياه صياح وهو يضرب..

بهلأثناء وسمعت باب الكراج انسحب .. يمه خرطت العافيه .. كلت صراع اجا .. اريد احرك رجليه من الخوف كامن يرجفن مشيت للمطبخ وشفتو من صدك هو :- فات تعبان وهو يكول :- شكو يولو شنو هلمصايح وعافني ومشى يشوف شنو مصدر الصياح .. سمعهم مشى للغرفه ودك الباب حيل وصاح :-ناااااااااااائل افتح الباب يول لشوف..

ذاك فتح الباب

صراع :- شدا يصير هينا ؟

-خلها انعل يومها هلعرمه الماتحترم
-ضرب الباب عليها :- تعدلي لشوف خل ادخل اشوف شسالفتكم انتولبست حجابها وطلعت وتبجي وحالتها حاله :- ما ابقى هينا اذا تحبني اخذني لبيت اهلي فوك ما انه بواكه انوب انضرب والله ما اكعد

-دهدي يابه وبس فهميني شصاير .. ليليان جيبيلها ماي

هي تفو ونا تستقر .. جرها وكعدها كوا بالهول و الجهال يتباجون جبتلو ماي..

ونائل يصيح وهي تصيح .. عاد زكح :- تهدون لا حرام بالحرم ابتلي بيكم والله .. كفي بجي انتي واحجيلي شنو صاير بلا هلتنعوص واندار زكح بيا :- كضبي الجهال انتي..

شلت عبودي اهدي بيه وهي تحجيلو السالفه وهو اندار خزرني خزره .. احس روحي ماعت من الخوف اليشوف حالتي حاله من الرعب الاكلتو ..

اندارلي نائل:- من يا وكت نور تبوك منج ليليان مو عيب هلحجي يا يوم عي ماده ايدها على حاجه

صراع :- ليليان انه اتصرف وياها امسحها بيا خويه وحكها تاخذو من هلركبه .. حدري لشوف اعتذري منها وتراضي وياها
ليليان :- والله صراع اني بس دا اسالها ما حجيت ولا قصدي ابوكها بس سألتها ع الغراض وعمتي تشهد واسألها..

احجي وهو خازرني بغضب ..

نور:- لا اريدها تراضيني ولا تبوسني انه كعده هينا ما اريد

نائل :- خويه هي حرمتك من الأساس ما تريدنا .. من وكت الكعدنا وهي طلعت زعلانه و اعرف ما قابله انه اخذ مرني ونأجر .. ما اضل هينه

-لك من يمتى انه يمشيني حجي نسوان نااااااائل احترم نفسك لا بالقران اكسركم وراسها يتكسر فوكاكم . الرضت والما رضت الحايط واطخ راسها ما كاعد انت ابيت ابوها
-دا اكولكم ما حجيت كل السالفه سالتها شنو ما صدكتو على الله تطلع مني حجايه .. تريد تاجر لا تخليني سبب بطلعتكم
صراع:- ليلياااااااان كلبببببهه تصمبن السانج وكلمه ما تنطقيييييين دماااااااغ سز
-وليش ما انطق شنو فوك ما دخلت غرفتي بلا استأذان تقرب عليه وكضبني من ركبتي وهو خازرني طلعي فوك انه اعرف شغلي وياج . ودفعني للدرج واندار لنائل :- اسمع لك تريد تطلع اطلع بس خليها ابالك لو طلعت تنسى عندك اخ عافهم وصعد كبلي بعصبيه .. بقيت ابجي ونائل سمعتو فون نور ويحجي عليه وشنو تفوتين بلا استاذان لغرفتهم وهي تحلفلو تكلو ما فايته دجذب هاي..

فتت لغرفتي صراع يفور :- حدري لشوف

كضب زندي حيل :- انه شكلت مو هلموضوع ما تجيبيلو سيره ؟

-بس
-شحجييييييييت
-اني ....
-ولج تكسرييييين كلمتي وتحجييييبن اطلعيني بالوجه الأسووووووود جدام اخوووووي حقيراااااا
-يحجي ويعت بيا عاد جريت ايدي منو كتلو :- والله شغله تخصني احجي ما احجي سوالف نسوان انت ونائل شعليكم وتدخلو اذا هي بواكه اني شسويلها وسع عيونو بعصبيه :- شنو هلصلافه منين جايبه هلعرامه قليلة حياااا
-والله من عاشر قوما اربعين يوم صار مثلهم ..

بلمحة بصر بمجرد ما حجيت طبع جفو على خدي وهو يكول :- والله لربيج واعلمج يلما تستحيييين..

تولاني اريد افك نفسي منو ما اكدر اخر شي دفعتو وكمت ابجي وكلتو :- خيرك ع الكل بس عليه تتعدى وتضرب عفتو وطلعت ابجي .. وهو راح نزل ..لليل سمعتو ويا الحجيه كاعد وهي وتكلو :- ما حجت شي نور بساع كالتلها تبوكيني وبعدين ليليان جفصت بدايتها بس جانت تسال.

وهو يكولها :- غبيه ما تعرف تتصرف كلتلها انه اتصرف و واعرف شلون احجيها لنائل واخجلو باسلوب واخلي يطلع.

بعملتها هاي فاينتها صارت براسي .. ما اكدر بعد احجي على ابو هااا طلع اخو لجل حرمتو .. بالله كليلي انه هاي الغبيه شتصرف وياها حاجيني..

عفتهم وصعدت للغرفه .. اغلي و السالفه ما عتروح من بالي .. شويه وفات هو بدل وكعد ع التخت شغل الجكاره وجر المنفضه يدخن و كضب موبايلو..

ما تحملت كمت ع السريع رفع عينو يدحكلي .. جريت فراش ومخده وطلعت..
-وين رايحه حدري لهين
-ابعد عني لا بس تضرب بالنهار وبليل تراضيتي لاجل غايتك اتركني يلا ..
-هين يولو احجي وياااج

-لا تحجي وياي ولا احاجيك انعلت الشيطان بعد اذا اجيت يمي لا اني مرتك ولا انت رجلي تريد عندك بنتك خليها تخدمك ميكفي رضيت بالهم و الهم ما رضى بيا
- يل مخبببببله حدري احجي وياااج
.. عفتو وطلعت وهو يضحك عليه ويصيح المخبله .. نزلت جوا لكيت نور طلعت من غرفة الحجيه .. فتت اني زكحت بيا
: امشي انتي الثانيه ولي والله التعوف زلمتها وتجي يمي الا ابتلي بيها وووولن وحلا ادحك وتضحك وتهز بيدها عفتها وطلعت سمعت مصايح نور هي ونائل وهو يكولها :- يولي تخبلتي انتي دحكي الجهال نطت وهي تردو ولدك وولد اخوك داريهم انت لو يموتون ما ادحك بيهم زكح بيها وطلع وهف الباب وراه واني صاعده اصواتهم واصله لاخر الدنيا..

هو جانت عندو حبيبه بس من تهجرنا .. حبيتو طلعت لاوربا وبالفتره اللي كعدنا بالاردن هي تزوجت .. ما بقى كدامو غير يرضى بنور خصوصا بوكتها هي جانت حامل منو..

بس لهسه ما كلش مهتم بيها .. اخر همو هي شتحتاج كل همو بنفسو موبايلات مدري شكم واحد من ارقى الموبايلات .. سياره سفرات مخلص فلوسو على هلسوالف وما يدحك هي شتحتاج بس ع الجهال يجيب ويحط..

ف على طول هي وياه مكاون ما اعرف يدور بنات لو لا بس الاعرفو ما بيناتهم محبة ازواج كل علاقتهم على مود الجهال بس..

لهذا دوم ادحك بصراع وتصرفاتو ويايا وتقارنو بناىل وتضوج طلعت منها وخلصت .. بس من رجعت وعلشت وياي .. مدري شبيها حتى بغراضي كامت تفتش وادور وراي واسمها تحجي عليه كدام الحجيه اذا ما اشتغلت لان صراع موصيهم من هسالفه وتعرف الحجيه ماشيه كلمتها بالبيت وصراع صح حجه بس ما كلش يدخل بسوالفنا يتركها للحجيه.

وباقيه على هسالفه ما اعرف شلون اخلص منهم .. يعني اني جيت لهين ارتاح رجعهم كلهم وخلى المشاكل براسي وشحدني احجي .. اطلع اني المو زينه..
.. بقيت نايمه بالغرفه ما لزمني الا البجي لحد ما ادري شلون غفيت .. وحسيت الباب انفتحت .. دحكتو .. صراع جا وكبص يمي واني نايمه بالكاع ع الفراش
-يولو مخبله شوكت تعقلين
-جريت الغطا لفوك راسي ..
-مو احجي وياج بطلي هبال وكومي لغرفتج لا تضلين هينا يلا
-اندرت للصفحه الثانيه وما حجيت
-بالله شو سويلي مكان انام يمج شكلها حلوه النومه هينا
-بسع تعدلت لا تنام يمي ولا انام يمك واطلع وعوفني لا بس صفطتهم على راسي و....... قاطعني
-اشش اششش نامي نومة اهل الكهف ان شاءالله عساج لا كعدتي انفتح السانج ول يابه نااامي
.. عافني وطلع وهو يكول والله فلا صوجج..
.. رديت نمت .. لثاني يوم لا نزلت سويتلو ريوك ولا حجيت وياه ولا احجي مع اي احد .. فوك ما الي الحق انضرب وانهان وتالي هم اهل الراهي للظهر سمعت هيام اجت .. اني ما اتونس غير من تجي ما احب ابقى كاعده وحدي الا اكعد وياها..

هي حست اكو شي همستلي :- شصاير يولي الاجواء متوتره

-سولفتلها باختصار .. غمتني وكالت طاح حظج ما بيج خير
-وشنو فوكاها اني شحجيت .. دا احجي فات صراع عاقد حواجبو وعود ما يتحاجى وبيدو علاكه جبيره .. التفت عليه .
-ليليان هاج طلعي هاي فوك .. يحجيها عصبيه بس ضام ضحكتو عود متزاعلين

-ردت اثولها وما احجي وياه بس خفت .. كلشي ولا اتجاهلو كدام احد الا يذبحني لو شما اسوي فوك يكبر عقل وبتحمل الا كدام احد ابد ما يعبرها يكوم يحقد من صدك ..

اخذتها وطلعت .. دحكت جايب علبة حمر بدل الضاعت وعلبة مكياج وعطر وياها كرزات مشكله..

ضربني وعبالو يصالحني بهشغلات .. العلاكه نفسها اخذتها ونزلت .. هو كاعد يشرب جاي واني ع الدرج فاتت نور صحت نور :- هاي مني الج وامانة الله لا تواخذيني اني غلطت بحقج...
.. اخذتها هي ع السريع واجت باوستني

نور:- يلا ما صار شي انتي هم اختي

-ادحك على صراع ضاج بشكل لو بيدو يكوم يذبحني .. ضرب الاستكان بالماعون بعصبيه وحطاه وكام ..

كعدت هيام حجت :- جنيتي على نفسج اكليها يلغبيه

-والله وليهمني وين ما تصل لعكد راسها عشتو جايبلي مكايج وكرزات وعبالو يصالحني
.. ما ردت عليه بس هزت راسها بمعنى ماكو فايده منج ..
.. لليل التهيت بالمطبخ .. فات هو .. اجعلو ما شايفني ولا كن موجوده .. من جد شال وجهو .. صعد كبل ..

خلصت شغلي وكلت اصعد لغرفتي ارتبها اشوف شبيها .. فتت هو مبدل وكاعد ما دحك ولا كانو فتت على موبايلو بكل هدوء رتبت الغرفه وهو ما انطى ولا ردت فعل .. ولا كن موجوده وياه بالغرفه .. رحت سبحت ورجعت وكمت ابدل بملابسي .. ما رفع عينو ولا دحك ولا تاثر..

مشطت وعطرت نفسي .. هو ترك موبايلو ع الميز وجر الغطا واندار نام .. صفنت هاي انام هينا لو هسه يكول هاي جايه تراضيني ؟

خل انام واسكت بلا ما احجي .. تمشيت كعدت ع التخت ونمت .. هو جار للغطا كلو متغطي بي..

جريتو وهو تنافخ و يستغفر ربو بنرفزه .. كعدت صفنت :- هذا شبي .. وشكو اهتم .. خليت راسي ع المخده وتغطيت وياه كف الغطا وطرو ع التخت وكام طلع .. بقيت متعجبه من تصرفو :- شهلعقده هذا شو من صدك حقد بقيت بالغرفه لل٢ وهو ما فات بقيت احوس بمكاني .. هاي بس لا راح بالغرفه نام هناك وتركني هنا وزعل كمت جريت روب لبست فوك اهدومي وطلعت . لكبتو كاعد ع التخم اللي بالصاله يدحك رياضه و النركيله على يسارو يدخن وماد رجل ع الطبله رجل على رجل:- ما تنام ؟
-ما اجعلو سمعني عاقد حواجبو ويدخن وصوت النركيله تفور وهو يطمش ع التلفزيون تركتو ورحت نمت لل٤ وهو ما فايت للغرفه .. نمت بعد ما قاومت انتظرو اكثر .. كعدت الصبح على صوت الكنتور وهو يبدل

شلت راسي كتلو :- صباح الخير

رد بلا اهتمام وبدون ما يدحكلي :- صباح الخيرات

-كمت ع السريع لبست ونزلت حظرتلو ريوگ نزل طلع كبلا ولا عبرني .. اخذ سيارتو وسد الباب وراه

بقيت صافنه .. يمكن اتحمل منو كلشي الا هلاسلوب البارد احسو يحركني على نار هادئه يخليني الو بنفسي واكرهه واخلي اللوم بيه

ما اجا للظهر .. نحنا كاعدين و الحجي يسولف .. فات السلام عليكم ردينا :- وعليكم السلام

-حلاوي بابا بس سويلي غدا جوعان

حلا :- اي بابا

كلهم بقو يدحكون بيا .. شكد فشلني وهو يسخر غيري .. متت من تصرفاتو .. احس اختنكت ..جابتلو واني ادحك بي ما كلف نفسو ودار وجهو ودحك ولا كاني موجوده اكل وشبع .. وطلع موبايلو وبقى يكلب .. تقربت اخذت الصينيه من كدامو شلتها ما انطى ردت فعل غسلتها وبقيت بالمطبخ .. كلهم طشو بغرفهم .. واسمعو يصيح على بنتو حلا .. طلعت وهي نزلت :- ها بابا :-

باباتي نزليلي ملابس من فوك خل انام بغرفة الحجيه ما بيه اطلع فوك
-اي بابا

ليليان :- اني اجيبلو ابقي

صراع :- لا لا لا انتي ما الج علاقه بيه هي تجيب روحي بنتي

-عفتو ورحت للمطبخ ابجي من كل عقلي فشلني وكل فشله ينطينياها بالعظم .. احس طكيت من اسلوبو البارد..

لهناك سمعت الحجيه طلعت من الغرفه كعدت بالهول .. فتتت لغرفتها .. هو نايم على تخت الحجيه.

ندهتو :- صراع:-

همممم .. وهو نايم
-كوم طلعيني ضايجه
-ما رد عليه
-انت من شنو ضايج
-كام من التخت عافني وطلع بلا ما يرد .. كمت افور اغلي اغلي من اسلوبو البارد بودي اكوم تكطع شعري على كد ما طكييييييت من هلاسلوب شيريد يسوي خل يسوي بس لا يتجاهلني وكأني ما موجوده هينا من صدك احس بالاهانه..

رحت الغرفتي هو بدل وطلع .. ما عبرني .. هينا طكيت بجي لا نزلت ولا طلعت غرفتي بس كعدت ابجي لليل هو اجا .. دحك شافني عيوني باجيه .. بكل برود كالي :- مساء الخير

-مسحت عيوني وكتلو مساء النور

راح يفتح الكنتور كمت :- اروح احظرلك الحمام

-لا شكرا ما يحتاج..

هنوب يعاملني برسميه ولا كأني زوجتو .. اني هذا شنو اسوي بي يربي ..

رحت لفراشي كمت ابجي .. شويه وفات سابح .. كمت اسمعو اني ابجي ولا اهتم تمدد ع التخت ورجل ع رجل ويدحك بموبايلو طكيت متت انطحنت من اسلوبو .. كفيت الغطا وكعدت بعصبيه .. ما انطى ردة فعل

-تره اني اليوم ما تعشيت بلا اهتمام وهو يدحك بموبايلو :- ومنو كاضبج يابه ما تتعشين

-كلو من وراك غييير
-وانه شعلي يابه
-متجاهلني وتعاملني ابرود وما تهتملي
-مو انه هم ورضيتي بيا وانه ما رضيت بيج
-انت مو ضربتني
-عجل غير انه طلعت قليل حيا وما متربى وانتي عاشرتيني وصرتي مثلي
-اي غير من وراك تصيح عليه كدامهم
-انه اصيح وانه اضرب و ااسب واغلط بلا سبب وانتي المظلومه وانه الظالمج مووو ..
-شنو تنكر
-لا يابه عليش انكر انه ظالمج الله ياخذ حكج مني ان شاءالله .. دكومي طفي الضوا لشوف اريد انام ما بيه حيل لغوه

حط موبايلو واندار نام .. رحت طفيت الضوا .. للصبح بقيت ابجي وهو ولا اهتم نام

للصبح .. دحكت هو ماكو .. نزلت لكيتو كاعد ويا الحجي ويحجيلو ان اشترى سياره

مشيت يمو :- اسويلك ريوگ

ما رد .. الحجي بقى يدحك

تركتهم وعفتو والحجي يكلو :- شصاير ابني شبيكم

-ماكو شي حجي سالفه بيني وبينها

طلعت للمطبخ ادحك نائل شايل عبودي ويضحك وياه ونور تضحك .. كلها تصافت العقد مااااااااالتي طككني يربي شسوي وياه راح اشك ثوبي من القهر

للظهر جاب سياره بيضه عاليه .. وصاح لاهلو يشوفوها وطلعت الحجيه و حلا ادحك بيها وضربت بيضه عليها والحجي يصلي ع النبي..

جان يكولها حلاوي بابا شو اطلعي البسي خل اطلعج افرفرج شويه استفتح السياره بوجهج الحلو

وهي ما صدكت باستو وركضت تبدل .. اني ادحك بيه بحقد .. كام يطلع من خشمي دخان على كد ما احترگ گلبي وهو يضحك وياهم ولا كن موجوده ولا اخذ رايي بفد شغله .. نزلت مبدله وتضحك اندار للحجيه وهي بصفي جان يكللها يلا يمه صعدي بالصدر خل افرركم.

الحجيه اندارتلي :- روحي بدلي وجيبي عباتي خل نطلع

-لا لا يمه اريدها تسويلي الغدا كون ارجع الكاه جاهز جوعان اطلعي انتي ما نتأخر اونسكم شويه وارجعكم .

فتت جوا كمت ابجي من صدك صعدت للغرفه واسمعو طلع السياره واخذهم كمت اغلي اغلي النار احسها شبت بجسمي..

طكيت بجي لحد ساعتين يلا رجعو .. انتظرتو يفوت واني اروح وارجع بالغرفه . خلي يفوت اليوم الا صدك اگلب الدنيا شويه و فات للغرفه ما يدحك راح للكنتور .. صحت :- دحك هين شووووف اني هذا اسلوبك ما يصرفلي انته العيشه وياك زحمه وتنخك وما تنعاش وانت واحد ظالم وما تعرف حك الله هو يكلب بملابسو ويخفي ابتسامتو ويكول :- اي وبعد ؟

-تستهزء بيا اندارلي :- المطلوب ليون شتردين

-نرجع مثل گبل
-واني ما عندي شي وياج
-بس ما جاي تعبرني ولا تسخرني ولا حتى تهتملي
-مو هذا طلبج لو انه غلطان ؟ مو كلتي لا اني مرتك ولا انت رجلي ولا تسخرني وعندك بنتك وسوالفج هاي لو متوهم
-اني ما اتحمل هذا الاسلوب .. كعدت ابجي

جا يمي وخصر اديه :-والله حيرتيني وياج بالقران اجيج بالعيني واغاتي مترضين بالضرب متجين كفيت من عنج ماتريدين يول والله حيرتيني شنو تريدين

بكل ثول كتلو :- اريد حقي الشرعي

وسع عيونو وفتح حلكو وانصدم..

انتبهت النفسي هاي اني شكلت والله عيب قصدي حقوقي ان يحاجيني ويعاملني كزوجه بس كلمتو من يريد حقو ... انوب فوكها زيدها وغميت نفسي كدامو

رفع راسو يضحك من كل گلبو :- اني اللي اعرفو اللي عندو حك يم احد يروح ياخذو بايدو مو ؟ هههههههههههههههه..‌

من الفشله حطيت راسي بالمخده وجريت الغطى وتغطيت .. فت الغطا و حشك نفسو ودخلني بحظنو
- عمي انطيج حكج وفوكو بوسه وحبة مسك ولا تضوجين ..

بس دحكي من اتجاهلتج يومين وانتي اللي طلبتي ما اتحملتي .. حسي بنعمة المحبه اللي بيناتنا وبطلي استخبال واعرف اتصرفي..

اكول خطيه واسامح و اكبر عقل وياج بس تجبريني ارجع اعاملج مثل ما عاملت اللي كبلج وماتو من القهر.

حسي بالنعمه المنطيجياها انه وارضي بواقعج تمام..

ما رديت
-هسه تريدين حقج مو
　.. اندرت عنو شكد يحب يخجلني . هو يضحك.....يتبع

☆☆☆☆☆☆

في اللي يكول القصه بس مشاكل .. محور القصه هي الحياة الزوجيه الواقعيه بكل صفاتها بين الرجل و المرأه ..سواء بالحب و المشاكل وبكل ما يدور بين الاثنين تكاد تكون نمطها كنمط برنامج هي و هو لما يختارون اثنين ازواج ويخلون كاميرا ابيتهم ويترقبون حياتهم.

قصتنا بالمثل ... كل ما يدور بين المراهقة و الاربعيني من مشاكل وفارق العمر الواضح بتصرفاتهم كثير مواضيع والاف القصص .. لكن اني اختاريت هذا الموضوع لاحاكي الازواج العراقيين بمشاكلهم..

متابعه ممتعه للجميع

☆☆☆☆☆☆