المراهقة والأربعيني الحلقة (67)

المراهقة والأربعيني

 

الجزء الثاني

الحلقة  (67)

صراع:- شنو انتي جايه تهددين يولي شو حدري لهين دشووووف .. وكضبني من زندي حيل :- من تفكين حلكج وياي ادفنج هينا افتهمتييييي

.. :- اني العندي كلتو وخر يلا

-لج احترمييييي لا بالقران راسج اكسروووو حقيراااا

-كمت اجر بأيدي منو .. دفعني ع التخم وحجاها :- دماغ سز ..

كمت احك بزندي وادحكلو بعصبيه وهو خازر بوجهي ..

عافني وصعد بدل واتي بقيت گاعده بالهول وگالبه وجهي .. نزل مبدل ما دحگ بيا .. وطلع گبل

-متخلف

اخذت نفس وفتت لغرفة الحجيه .. بقت كاعده وما تحجي .. كارهه الوضع كلو وكارهه نفسي ..

ناس حقراء ..ما اعرف على شنو كارهيني .. يضربون ويغلطون ويسبون ويزكحون وهم اهل الراهي واني الغلطانه ..

اخ ربي عسى دحام بمرض بلسانو الكل ما كام يسب ابويا واهلي بي .. عسى بمرض يحرك گلبو مثل ما يحرك هو بگلبي ..

طالبني بطلابه بايگه ابني .. اليكول جان ميت عليه يس يريد يعيش براسو ويخلص من ولد لميعه الما بيهم خير ويكع براسي ..

.. كعدت الحجيه .. اتاذت حيل .. كامت تون من راسها

-ها يوم شبيج

-راسي ذبحني

-انطيج علاج

-اخذت .. تركيني ..

-بقيت ادحك بيهها وهي اتلوب من راسها .. شلت موبايلي وخابرتو :- الو

-هاا

-الحجيه جاي تتأذى تعال

-جاي

-بقيت واكفه يمها .. شوي وجا هو .. فتح الباب

-ها يمه .. اخذج

-لا ما اريد

-دكومي خل اخذج مستشفى مدام بعد وكت ..

-ما ردت عليه رجعت راسها .. التفتلي :- ها يابه تعشيتي لا ..

-دحكت عليه وما رديت .. قبل شويه يرزل وهسه يهتم وعود گلبي صفحه وينسى رزالتو وتكسر الروس مالتو

درت عنو لكيت الحجيه ادحكلو شلون يسالني اذاا تعشيت .. دحك علينا وهز ايدو واندار يطلع وحجه :- اللهي قوتك و صبرك

طلع للمطبخ وصاح وراي :- ليلياااان

.. مشيتلو .. دحك ببا :- سوي جاي نومي بصره لأمي ..

-مشيت للكاونتر اطلع نومي بصره ..

-بيج شي .. شو ما تردين

-لا شبيه ليش ازعل . حيوانه اترزل واسكت المفروض

-اخذ نفس .. حشاج ما هيج بس ليليان لا انتي و الدنيا عليه .. يعني انه متحمل الحجي عليش .. والف واحد لاطخ اسمي وراكبتو مرتو وكل همو مرتو .. وساكت بس حتى نرتاح ترحين انتي فوك حجيهن تكعدين تهددين بيا ؟

فوك ما تهديني تكوليلي لا تهتم نسند بعض ونتقوى ونبتعد عن حجيهم .. تصيرين تعلاوه فوكهم وتكمليها علي وتهددين اتشردين وتنكسين راسي جدامهم..

.. يلا ييابه تركي الموضوع ولا تخليهم يعكرون هدوء بيتنا .. غاية لميعة تسلب راحتنا وتخلينا متكاتلين لا تحققين غايتها ..

.. هزيت راسي .. تقرب وباسي خدي .. و وتعدل وكف اردانات دشداشتو .. وهسه طلعيلي شكو بثلاجه خل اضوكج طبخي .. دنشوف منو احسن يطبخ ...

-اني هسه اسوي عشا بس اخلص البيدي ..

-ميخالف نتساعد خلصي و تعاي ساعديني ..

وفتح الثلاجه .. وبقينا اني وياه بالمطبخ وكل شوي يبوس بكتفي لو يشيل بشعري ويداعبني ..

وديت جاي للحجيه .. ما رضت تاخذ .. فات وراي .. زكح بيا :- يمه عاد لا تدلليين يلا كومي هاي صحتج مو لعب .. كومي دشوف كومي .. وكعدها غصب

باس راسها :- اذا تحبيني صدك سدي السالفه وانسيها .. مستكثره علي راحتي يمه .. انه بشنو مقصر وياكم .. والله تعبت

-الله ببعد عنك التعب وليدي بس ابوك وحيد

-دعوفي ابوي هسه وكعدي شربي .. شربت وكعدنا ناكل يمها وهو كل شوي يدحك عليها .. حيل انقهر لان هي انقهرت . بقى ما مرتاح

شافها نامت .. اشرلي نشيل ونطلع ونطفي الضوا نخليها ترتاح .. كعدنا بالهول .. واتصل على حلا تنزل ..

نزلت استلمها رزاله :- بابا ما كافي موبايل عيونج راحت ساعه ووكت انتي كاعده فوك .. شسوين ارد افتهم

-هيج بابا افرفر بالمواقع من الضوجه عجل وين اروح

-جيبي موبايلج يمي بابا وكعدي تعشي يلا بسع دشوف ...

الموبايل جان بيدها .. صارت صفره من طلب جهازها .. مدتو الو .. وكعدت ع العشا .. ما تاكل بس ادحك بوجه ابوها ..وهو فتح الموبايل ويبحث بي

ندستني عود احجي وياه ..

-صراع اكل .. ما رد .. شدسوي

- هذا منو بابا ؟

- اااا بابا هذا ابن خالتي امين

-شعندج وياه شكو يراسلج

-هيج

-حذف الانستكرام وكال الها .. الأنستكرام ما يتنزل بعد مفهوم ؟

-هزت راسها وما حجت ..

-يلا اكلو .. كلملنا كال عمريلي نرگيله وطفي الجوا خلي نكعد بالصاله الفوك ..حتى امي ترتاح ..

عمرتلو اركيله وسويت صينيه ماعون حلويات وبسكت وقهوه وصعدت الو .. لكيتو مطلع فلم من مبايلو ع البلازمه ..

كعد ع التخم وامدد رجل على رجل ع الطبله خليلتلو الاركيله على يمينوو.. و كعدت بحظنو من يسرتو .. وبقى حاضني وندحك ويأركل ..

شويه يطمش وشويه ياكل وشويه يأركل وشويه يبوس .. فاتت حلا من عدنا واحنا كاعدين .. صار مؤدب .. بس هو مو وجه ادب و كال :- كومي نروح لغرفتنا ..

الحلو بي جان يطلع برا بليل و يبقى ليوين يلا يرجع .. بس من انتقلنا للبيت اكثر الاحيان ما يقبل يطلع يكول مرتاح هينا ..

تغيرت شوي من اطباعو بهذا البيت .. قله ما صار يعصب او يزكح ويحاول دائما يتلافى الاخطاء ونعديها حتى نبقى مرتاحين .. لان هو مرتاح .

يطلعنا مرات من يصير عندو مزاج عالي يفررنا بالسياره اني وبنتو .. ويودي الحجيه يم بيت الحجي لان كان الحجيه هناك مشموره صرتها .. راحتها و امانها ابيت الحجي ..

رغم شكد عاملها بجفا وتعامل حقير وما فضلها وهجرها بس هي ما قابلتو بالمثل .. تكلو لصراع انه تركت بيتي وعفت رجلي وجيت وياك

يكلها يمه يا رجلج لخاطر ربج .. تكلو عند الله هو رجلي والو حق ما اطلع الا برضاه بس انت حكمتني وجبتني لهين ...

وادافعلو بطريقه كأن هو شاريها وفاديها بروحو .. مرات احس صدك تحبو من كل گلبها لان ما تقبل ينجاب اسمو ابد .. وتلوم بصراع وتاكل راسو لو زل بحجايه عليه..

رغم هاجرها بس بعد الو مكانه بگلبها وما تنطي بي .. ف بين يوم ويوم صراع ياخذها بعد الريوك ويجيبها بليل منهم ..

اني ما اروح وياهم .. ولا اطيق اشوف احد منهم .. الا ما جا صراع وكال :- يلا كومي بدلي روحي ويانه

-وين ؟

-لبيت اهلي

-روح انت والحجيه اني ما اريد

-مو بكيفج كومي

-شعندي رايحه مو اني الكتلت بنتهم . مو اني البلا اصل الخليت ابنهم يهججهم مو اني اللعب باحوالهم وهم فقراء ومساكين ..

-البگلبچ خليه بگلبچ وكومي كعي هسوالف .. لا تخلين الكلمه عليج

-وعلى شنو ابو المثل يكول ابعد عن الشر وغنيلو

-لا ما تنفع لازم نماشي ونعيش ونغض بصر عن الفات ونفتح صفحه جديده مو ننسى بس حتى نعيش بلا مغثه .. كومي يلا

-هم اهلك مغثه

-وانتي رب المغثه .. ليش السانج زفر وتخليتي اهينج .. كومي كتلج يلا

-اخذت نفس وكمت بدلت وطلعت وياه ..اخذنا ورحنا .. فتنا .. سلمت على نور وضحى بالمطبخ ..نوال شافتني وفاتت ما تريد ادحك بوجهي

طلعت للهول .. ام سعد ما نزلت اسلم عليها بس كتلها هلو خاله شلونج .. مو بيدي ما اطيقها زور لو كوا ؟

بس الحجي ولواكه مني ردت ادنك اسلم عليه .. بس ما قبل وكال ها يوجه الشر شعندج جايتنا ..

من كالها مشيت ما حجيت بس اعصابي صعدت لراسي بودي انطي دفره الا الطشو بلميعه ام اعطوب

صراع :- ها يابا خير شنو السالفه

-انه مرتك يابه ما استهظمها .. لو ما تجيبها ونشوف وجه المسموم هواي احسن

-هلحجي حجي انه ما اقبل بي .. ان ما تحبها ولا تحترمها .. فتحترمني الي .. وما تطردها هي حرمتي وتابعه الي وان طردتها الاهانه علي مو عليها . واذا ما تحترم انه اخذها واطلع

-انت ليش ادافعلها

-ما سوت خطا حتى ادافع لو ما دافع .. رادت تسلم عليك ماكو داعي تغلط وتهين وانه موجود ما حترمت وجودي ..

عمر وانه حرمتك ما اطيقها وتحملتها ٤٥ سنه لاجلك واحتراما الك .. كف ويزي عاد .. تراها طلعت من ماعونها ..

حجاها واخذ سويج سيارتو ومبايلو من كدامو وكال .. :- كومي لشوف يلا الظاهر انه ما الي احترام هينا ..

.. عاد كام الحجي وكالو :- ما تسوى يابه وانت ابني .. ما صار شي يلا .. وباس راسو .. بس لا تزعل ابو حريب يابه .. وكضبو وكعدو ..

فات نائل سلم على ابو حرب واندارلي :- هلا بأم جفصه هلا ياب اليوم منين طلعت الشمس ..

-ضحكت .. هلا بيك

-شلونج خويه شلونج زينه

-تمام انت شلونك

-والله ياب مشتاقين لجفصاتج

صراع :- عاد هي بالجفصات اسطه هاك واستلم ..

-اندرتلو فاتحه عيوني ورافعه حواجبي

-بس هي خوش بنيه

ضحكو وبقو يسولفون .. اني رحت للمطبخ يم البنات سوالف ما الها معنى ويسالون شلونج هناك وحالكم واخباركم ..

وفد ملل يكتل .. صعدت فوك دا اتفقد الغرفه مالتنا سابقا .. وغرفة اخشابنا القديمه .. ماخذها سعد لضحى ومبقي غرفتو لجهالو .. ومحمد ماخذ غرفة حلا .. عاد شلون يستاهلون .

صراع شكد لوتي وذكي وذيب ما ينكدر ولو شما تجاري يلوفلك بغير درب ويدوخ البشر و يخلي الحق الو ومحد يغلبو .. بس ويا اهلو يختلف

وياهم احسو غبي .. شكد ما يجرحونا ما يهتم ويبقى يشيل ويصرف عليهم بلا وجع گلب .. بكلمه منهم يشيل وينطي ويفرح ويحس بروحو مسوي انجاز من شايل اهلو .. مرات احسو زوج عايشين براسو و يستغلوه وهو ساكت ..

وشحد اليجيب سيرة واحد من اهلو يضل يرعد ويمطر ويسويها هوسه و يصيح اهلي واهلي .. وهم اهلو محل مال قنادر

... فبقيت كاعده وياهم .. وهم حمى واخذو الواهس و گالو :- يابه اريد اعزم عمامي على بيت الجديد ادليهم

-اي والله يابه ذاك اليوم عمك خابرنا كال شلون ابو حرب ما يريد يدلينا بيتو ..

-لا والله على بالي بس ما فضيت .. كلت اذبح عكب باجر واعزهم كلهم بخويطهم

-كضبت الموبايل وكتبتلو ع الماسنجر .. ابو خويط اكعد لا اصير ابو مصعب الزرقاوي وافجرك

-فتح الرساله وهو مندمج يحجي ويا ابوه .. قراها ورجع الموبايل ما رد ..

هلّووو .. ويلبسني .. البس البس لشوف .. نرجع للبيت وعود ابقى لابسني اذا تكدر بس بسيطه ..

وهو منمدج يحجي ع العزيمه .. اجت رساله .. هم ما رد .. يدحك ويلبس ..

عندي فيديو سخيف شويه .. بيه اثنين يحبون بعض اجانب نفس اعمارنا هم هي اصغر منو و تبوسو بس بطريقه اباحيه ..

دحك الفيديو و الحجي يحجي .. ودار وجهو خزرني بعصبيه .. وكتب :- نصل للبيت واعلمج الا اصلخ جلدج ..

.. شفتو عصب من صدك يمه .. انطيتو حظر من الخوف وضميت الموبايل .. بقى يحجي وي اهلو .. بس عقد الحواجب ..

عاد اتفق ع العزيمه وكمل وكاللهم يلا انه اروح لبيتي .. راسي داخ اريد انام ..

كالولو نام بالاستقبال ما قبل :- لا اروح لبيتي هينا ما ارتاح جهال وهوسه شموازيني . خلي امي انه بلبل ارجعلها..

صاح على حلا كالتو عود ارجع وي جده .. اخذني و طلعنا .. و الطريق كلو .. ما كن فك حاجبو

كتلو :- صراع

-وسم

-هاي شبيك

-اصل واعلمج شبيه .. ويخزر بيه . وصلنا .. انطاني مفاتيح البيت .. وفوت هو السياره ..

فتحت البيت .. دا انزع بحجابي .. كضبني من اذني :- شنو هلمقطع السخيف هذا ليليان ؟

-جنت اتشاقى وياك والله شبيك

-ادحكين مقاطع سخيفه يولو

-لا بس

-لا شنووو عجل منين نزلتي هلمقطع .. ولا منو بعثلجياه

-لا اني نزلتو شبيك

-طلعيلي الموبايل وشوفيني منين نزلتي يلا ..

-فتحت الجنطه .. وارجف خوف .. هو صديقة وحده بعثتو ع الماسنجر واني سويتلو تحويل الو ..

انتبه ايدي ترجف :- يلا شوفيني منين

-هسه انت شنو يعني تضايقت لان بعثتلك هيج .. احنه مو متزوجين

-متزوجين وهلاشياء بيناتنا بسسسس .. ادحكين مواقع سخيفه لو ادوريها .. ركبتج اكصها فهمتي .. تتادبين وتحترمين نفسج .. الحرام انه ما اقبل بي ..

ما ينزل هلمواقع الا البنفسو ...وان جان بنفسج شي .. تكوليلي و بالحلال .. عينج من تشبع بالحرام افكسها والله ..

-ما اعيدها بعد والله

-منين حولتي الفيديو ياهو الباعثو

-محد اني نزلتو

-شفتيني زوج بنت الاوادم يول انه اعرف ساس النغل ياهو . طلعي لشوف الماسنجر..

بقيت ارجف .. هذا صدك ما يتفاهم .. جر الموبايل مني .. وبقى يدور .. لكاها .. ما حاسبني انطاها حظر .. وطفى الموبايل وضمو بجيبو و حجه

:- لو انعادت وضفتي وحده سخيفه .. راج ينكص .. و موبايل بعد ماكو .. عقاب عليج حتى تحترمين نفسج مرة اللخ..

وتركني وصعد فوك .. صفنت .. شلون حقنه ...خلاني بموقف محرج وي نفسي .. وكانو اني كاتله روحي على شغلات سخيفه واني جان قصدي بس اتشاقى ويا ..

صعدت للغرفه .. جاي يبدل .. بقيت ادحك بيه ..

:- ادحكين !! امضيعه شي بوجهي ؟

-اني جنت اتشااقى

- تقرب .. ووكف گبالي .. تشاقي لشوف

- شنو

-مو عاجبج الموضوع ومحملتو .. طلعي من بالج وسوي وياي ..

-صراع شبيك لا تحرجني .. اني ما جان قصدي هيج

-مد اديه على خصري وحاوطني .. وباس خدي .. هلاشياء حرام الله ميقبل بيها .. من تشوفين هيج شي راح يثيرج بالحرام و يسحبج للغلط من شيء الى شيء اخر .. تفتهميني .

من احد يبعثلج هيج اشياء .. تحظريها بلا نقاش لان غايتها مو حلوه ولا تكولين ما أتأثر لو دحكتي هيج مشاهد ابليس راح يجرج شويه شويه للحرام لحد ما يضيعج .. الفيسبوك عالم جبير .. احذري وانتي تستخدمي تمام ..

- هزيت راسي .. دنك بوسني ..

طلع هلسوالف من عيني .. خلاني اصيح التوبه بعد لو عدتها

لثاني يوم العصر .. اجت هيام و هي وصراع راحو تسوگو للعزيمه وحظرو وخابرنا على ام يوسف تجي تساعدنا.. وجهزنا كلشي .

وباجر كال من الصبح اذبح جريان دم للبيت ونستقبل الوادم ..

كعدت من السبعه بيتي منظفتو على اخر حبايه .. حظرت ملابس صراع ..سويت ريوك النا . و الحجي جا من الصبح تريك ويانا هو و ام سعد ..

صعدت بدلت دراعه عندي اشتريتها من الاردن لما اول ما رحنا .. لونها وردي ومطرزه وشغلها يجنن لبست وياها حذاء كعب ابيض .. ومصبغه اضافير وحطيت حجل برجلي ولبست ذهبي ومكياج ولفة حجاب مرتبه  ..

فات صراع عيبدل .. :- صفر  .. شنو هلكيك هذا .. كلو الي

-لا طبعا ..

-عقد حواجبو ..عجل المن ؟

-للخطار

-الا بالحرام اليوم ما اطلعين

-لا لا لا فدوه انتهيت لحد ما بدلت والله .. عوفني الله يخليك ماشي ..

-ضحك .. لا تنزلين ابدل وننزل سوا

-ليش

-تردين واحد يدحك بحلاوتي غيري .. حتى افگس عيونو .. انزل وياج حتى محد يحط عينو

-هم نسوان قابل راح اطلع للزلم ؟

-انه اغار لو الهوى مر من يمج مو بس النسوان

-ضحكت .. مجنون

-مجنونك

- هههههههه .. اجو ؟

-اي اجو بيت عمي صالح وعزام ولسه ما ادري شكد.اجو ..

-عجل استعجل يلا .. لبس دشداشه جوزيه ولف الجراويه وساعه وعطرو يبووه .. قبانو المجنون مالي

كمل .. اخذ ايدي قفلها بايدو ونزلنا ع الدرج اثنينا ..

ما اعرف .. حلو شعوري واني انزل وياه .. احسو ان قدمني الهم و كأني اميرتو .. اخلاص وحلا وهيام و ام سعد واختها مرت صالح وبناتها وزوجات عزام وجناينو و بناتهم ..

سحب ايدي وكال يلا ام حرب سلمي على عمامي :- تقربت سلمت منهم ورحبو بيه ترحيب حلو .. شكد ما بگلبهم حقد عليا .. ما بينوه ولا اني

عزام :- ام حرب لازم اكو طفل ان شاءالله

صراع :- اكيد حرب جاي بالطريق

حجت ام اخلاص :- ليش انت ناوي تسمي ابنك اذا اجا حرب ؟

-اي والله عمه .. على روح المرحوم ابني ..

.. ما حجن .. سلمت عليهن وحده وحده ورحبت بيهم .. ورحت للمطبخ وي ام يوسف و هيام .. دحكت هيام ضحكتلي .. :- صلاوات على محمد

شالت راسها ام يوسف :- يا ولا عرفتج والله عبالي وحده من الخطار .. شنو ولج گيمر ..

-ضحكتلهن

-شوف اللبس شيسوي .. وهلدراعه منطيتها اكبر من عمرها مسويتها مره من صدك ولا عبالك ذيج الناعمه الهلكدها

-مو لابسه كعب

-الله يستر عليج بنيتي ويحفظ راعي بيتج ان شاءالله

.. بقيت اشتغل وياهم بس كل شويه هيام تكولي لا توصخين نفسج روحي كعدي يم الحجيه يخايبه كعدي على كلوبهن اريدهن يطلعن منا ميتات نشيل جنايز ..

-ههههههههه غالي و الطلب رخيص ..

-مشيت كعدت بالهول يم الحجيه .. و احس اخلاص وخواتها وامها لو بودهن ياكلني ..

سالتني مرت عمهم :- صدك حامل ؟

-هزيت راسي بابتسامه .. عجل شسوي اروح اجذبو كدام اهلو ..

ام اخلاص :- والله صراع ما قاصر اذا حتى لقب ام حرب انطاه الها واهو امنية المرحومه لا تالي لا حصلت وليدها ولا اسمو .. كلو للغريب .. دشوف صراع وين يروح من الله ..

جاوبتها بابتسامه :- لا خاله ليش هو من حبو لابنو يريد يسمي حرب خطيه ما ناسي الا اني بودي اسمي الياس او زكريا بس بعد بكيف صراع ..

.. كامت تنافخ و الحجيه تردها .. ردت مرت ابن عمهم حجت  ..

-سمنانه وكبرانه .  اخر مره شفناش ما جان هيج حالج جنتي عود

-جان صراع مخطوف .. يا حال اليه بلياه هو صحتي وهو عافيتي من رد ردت عافيتي اليه ...

حلا :- يا عافيه غير بجال ابويه جايبلج خدامه

اخلاص :- خدامه

-اي عود بحجة فقيره تنظف البيت و نساعدها حتى ليليان ما تتعب .. غير بنت الفكر صعدت على اسطوحنا من تالي ..

رزلتها الحجيه .. واني كسرتها :- هاي شبيج عمري مو يكولون وعلى نياتكم ترزقون .  واني نيتي طيبه وي البشر والله انطاني ابو حرب يدللني واعيش بخيرو.. لو مو زينه وبگلبي غل وحقد جان بقيت عانس ومحد يگلبني ..

واخلاص فارت .. شتحجي ما تكدر تسوي مشكله .. كامت بساع ..

مرت نور .. :- هاج عابد ليليان اروح اشوف اللي بالمطبخ .. انه اطك روحي من الكعده  اذا ما احرك اديه ..

-اخذت الطفل منها وكتلو .. ول دادا قبانو لفهودي انا

ام سعد :- اسمو عابد

-لا جنسيتو اني قريتها فهد .. وفهد يا فهد .. قبانو الفهد اني .. والاعبو .. هيام من ابعيد غمتني وتضحك ..

وام سعد فارت .. تكلهن دحكن مو بس اسم حرب باكتو .. حتى اسم الولد تريد تغيرو عبالها نمشي بكيفها .

-لا خاله ليش بالعكس بس اسم فهد احلى .. واناغي للطفل ..

.. اخر شي شلتو ومشيت للمطبخ ..

-ولج كتلج موتيهن بس مو هيج خليتيهن الا شويه يشگن زياگهن ويهجن ..

فات صراع :- ها ام حرب الغدا جاهز ان شاءالله ...

-ادحك منا ومنا هاي منو ام حرب .. حسيت روحي وحده ثانيه واساسا اني حتى الجدور مال الطبخ ما وصلتها  هيام وام يوسف كضبوها .. بس جاوبتو :- اي عمري بس تكملون صلاة نصب ..

هيام :- انهجم بيتج يم عمري والله مانج هينه يم الفواين

-رجاءا انتبهي لملافظج اسمي ام حرب .. ورفعتلها حاجبي

-ههههههههههه عزا العزاج صدكتي الجذبه يولي .. الا صدك بلكي واطلعين حامل .. اخر شهريه الج شوكت

-لا وين قبل لا نشيل لهذا البيت

-ان شاءالله الله يكتبلكم ولد يشيل اسم ابوه ويسند امو بجاه الحبيب محمد

-امين

.. صبينا غدا و ذيج العزيمه التجنن و شكد ما هم هواي البيت وسع وزاد .. يمشن ويكولن صلوات مو بيت قصر .

اخلاص لو بودها تذبحني وتشرب دمي .. وحلا صافه يمها وتسمع لخالتها  .. وامهن حتى من انطيتها معلقه جرتها مني بنتر ..

امهن تكولهن انه ما ذبحني غير من صراع يصيحها ام حرب .. يا قهر گلبي كل حك بنيتي راح لهاي .. عود جاي يسويلها اسم جدام عمامو الظالم .. ما يصيحها باسمها ينطيها اسم حرب ويصيحها باسم الجان المفروض البنتي ..

واتولنو الظالم الحقير عسى لا يتهنى .. عساه لا شاف الراحه    وعساه وعساه .. كل دعوه يدعن عليه وهن ياكلن بماعونو .

.. اتذكرت كلمتو من يكول اكون ناس لازم تتكبر عليهم لان مو مستواك تنزل وترد عليهم ... الكلب لو عظني ما يرهم اردلو العض ..

كملو غداهم و طلعو بالحديقه كعدو وصوت ضحكهم عالي ونسوانهم الكبار هم طلعت وصوت سوالفهم وضحكهم علا

.. عدنا معرض كزاز بيه دي جي ..  طلعو الشباب وحطو برا .. وخلو اغنية (بين العصر و المغرب ) وكملو الكعده بچوبي

صراع ايدو ورا ضهرو و ايد يفر بسبحتو ويضرب ع الكاع ويدبچ چوبي .. طلعت ادحك عليهم وهم يركصون واضحك

من يوصل مقطع (والله لنصب مرجوحا من سطوحي لسطوحا وخلو يكولو حرامي روحي متعلگه  بروحا )

صراع يدبج ويغمزلي ويردد (روحي متعلكه بروحا ) ويرجع يدنك ينتبه لدبجة رجليه و فرة السبحه .. وكاضب ابن عمو سليمان هم بعمرو ويركصون ..

واجواء كلش حلوه .. وكعدو يسولفون .. شافني عمهم عزام    كال گربي ام حرب مو غريبه كعدي ويانه ..

وكعدت بالحديقه وياهم .. وبقى يحجي وياي على اصلي وديانتي وشلون ابويه اسلم وليش اني ما اسلمت ..

جان دار على صراع يكلو . ما كدرت تخليها على دينك .. جان يردو صراع :- عمي هاي الشقراء من قوم عيسى اللي قتلت المسلم بحبها .. مو هيج يكول ناظم الغزالي ..

ضحك عمو :- ذيج سمراء يعمي

-لا انه الله انطاني شقراء .. (شقراء من قوم عيسى من اباح لها قتل امرىء مسلماً مات بها ولهاً) ..

ضل يضحكون ويدعولنا بالسلامه .. شويه وكامو كالو بيت العامر ان شاءالله ويحفظكم و يجعلها عتبة خير وبركه عليكم..

.. شكد ذلوني بغيابو .. ونكسو اسمي من فتت للديوان ونزلت عگلهم ... وهلكد كرهوني .. اليوم رجعلي احترامي كدامهم .. خله الجبير و الغير ما يصيحلي باسمي .. كلو ام حرب  حتى يبينلهم ان مكانتي من مكانتو وما يصير ينصاحلها باسمها ..

الرياجيل تسامح و تبدي صفحه وتطلع منها كلمه حلوه الا النسوان يذبن سم ع العظم ويكومن

وما ذبحهن غير ( صراع مخلي للمصلاويه خدامه ) اهل مرتو السابقه جنو من الخدامه .. وهيج جان يظلمها وهيج سوا بيها وعساها بحظو وعساها بصحتو ..

كملنا كلشي ورجع البيت فرغ حتى هيام راحت .. و صعدت بدلت ونزلت وي ام يوسف نظفنا كلشي .. خلصنا وصعدت جبت من صراع ٢٥٠ الف وانطيتو الها .. كتلها هاي الج و الاطفالج .. بقت تبوس بيا خطيه وتندعيلي وتندعي لزوجي ..

صعدت فوك .. هو تعبان حيل واني هلكانه ..

صراع :- عمري گبل لا تنامين حظريلي جنطه صغيره باجر عندي طلعه البغداد

-وشتسوي ابغداد ؟

-عندي شغل

-شغليش هذا

-يولو غير شغلي هناك عجل شلون

-تبات

-اي عجل المن ماخذ جنطه

-وين اتبات

-ابغداد غير

-لا يعني وين ابغداد بفندق لو وين ؟

-وشيخصج ؟

-شنو شيخصني اني ما اقبل تروح لبيت ابو صفاء ..

-اي عود تامرين

-دتستهزئ حظرتك

-احترمي نفسج تعبان تره والله اندمج .. حظريلي جنطه وبلا كلام ..

-شو ما احظر وما تروح

- ولج احترمي نفسج لا تخليني بالقران ابتلي بيج .. حظرييي

-بالاول تكولي .. وين نبات

-عند بيت ابو صفاء ارتحتي ؟؟؟؟

-اروح وياك

-عندي شغل گتلچ شسوي ماخذج .

-اي ابقى بالبيت وانت كمل شغلك

-الا ما رايد روحي اخذج وياي حتى بس اطلع تهريني هري مكالمات .. سفر يومين ٣ و ارجع لا تكبريها وحظري

-گلبي لاعب منك والله ما احظر الا ورجلي على رجلك

-ولج لاعب من شنو يول  شعندي قابل انه

-اسمهان عينها عليك ما ارتاح تروح هناك .. انجن

-مالي شغل بيها انه هي مثل اختي

-ههههههااااي صدكتك .. لا حبيبي ما حزرت لبيت ام صفاء ما تروح الا واني وياك ..

-اخذ نفس .. ما اروح عمي بس حظريلي

-منظرني اصدكك عود دا تريد تسكتني

-ولج شنو لا ابالج تمشيني بكيفج انتي .. شو اروح والا ابات هناك ويا حايط يعجبج يابه لطخي راسج بعد ؟

-هسه طلعت حقارتك مو

... بس حجيتها وصفعني راشدي ..

-منو هذا الحقير هااااااا .. منو الحقييييير احجي ..

-بقيت مدنكه وما رديت ...

-كلبه مو وجه دلال .. انه اعرف بس انطيج عين تنچلبين حقيرا .. حسج عينج اسمعج تتجاوزين .. بلحرام ادفنج ..

- ماشي .. عفتو ونزلت .. جرو دموعي .. شلون جنه الصبح وشلون انگلب حالنا .. بي خل يروح الا ما اخلي يتهنى والله .  بسيطه ..

نزلت جوا بالحمام اغسل ودموعي تجري .. عود ليش الا بيت ابو صفاء ماكو فنادق ابغداد .. ما عندو فلوس يروح ؟

بس اعرفو مرتاحلها هلحقيرا ادحك بيه ومعجبه .. ابو النسوان اني الو ..

دخلت بغرفة الحجيه .. جيت جريت فراش ومديت نمت يمها

:- ها ليليان شكو ؟

-ما بيه اريد انام

-وليش مو يم زلمتج شعندج يمي ..

فات صراع :- يمه انه باجر طالع البغداد .. تعبان حيل و الصلاة وخابريني كعديني خاف ما احس ..

-ان شاءالله يمه .. بس شبيها مرتك

-هاي جاي تدلل زياده طلعت عينها عوفيها تتربى.. حجه وهف الباب وراه

-ليليان شبيج ويا صراع ...

-حجيه دايخه اريد انام

-ولكم الصبح شحلاتكم شنو انظربتو عين .. كومي امي كومي طلعي لزلمتج نامي يمو

-حجيه الله يخليج عوفيني

-ولج طلعيييي اكلج

-كمت بنتر وطلعت من الغرفه ورحت للغرفه الثانيه .. اخاف انام بيها ظلمه .. عفت الضوا معلوگ وتمددت ..

بس حيل بردت .. رحت من فوك جبت بطانيه ونمت .. للفجر .. كن عطرو قريب عليه ..

حسيت كاعد يم راسي ويدحكلي .. دنك باس كصتي وخدي وراد يبوس شفتي .. ابتعدت وكعدت :- شكو

-يولو والله ما تسوى عزلتي فراشج عني باليل وزعلانه عليش .. بالقران ما عندي شي ..

-عجل ما تروح لبيت ام صفاء

-دحكي انه احبج بس ما احب تتامرين علي .. جاي اكلج ما عندي شي .. غيرج ما يخب گلبي

-هلكلام ميمشي عندي . دحك اصابع اديك على خدي .. وجاي الك عين تصالح

-من ايدج اكو وحده تكول الرجالها من حقارتك.. كومي لا تضلين زعلانه و انه

رايح

-روح عساك لا رجعت ..

-سكت .... هاي عليّ ؟

-سكتت بس دايره وجهي منو ..

-مشكوره .. عافني و گام ‌‌‌ .. اخذ سيارتو وجنطتو وطلع راح لبغداد

بقيت اغلي نار و شابه بجسمي .. ها دحكت بوجها ها حجت وياه ها تقرب يمو .. الف سوال وهم ياكل بيا ..

يومين لا خابر ولا اتصل .. ضل الموضوع ياكل ويشرب وياي .. انوب طلع زعلان .. اخاف عناد وياي ينطيها مجال ..

الا اطك واموت والله ..   عاد كلت خل اخابرو اكسر وياه واشوف هو وين بلكت اخذ كلمه منو تريح گلبي ..

موبايلي هو ماخذو .. معاقبه .. معاقبني المتخلف .. عاد نزلت اخذت موبايل الحجيه ..

خابرتو .. دك .. دك .. دك ... رد .. كلت الو :-

اسمهان :- الو هلا حجيه .......يتبع

☆☆☆☆☆☆