المراهقة والأربعيني الحلقة (64)

المراهقة والأربعيني

 

الجزء الثاني

الحلقة  (64)

مر شهرين على رجعتهم للبيت .. صراع يطلع من الصبح يشرف على بناء بيتنا ويرد يرجع الظهر يتغدا وينام ..

و العصريات يكعد شوي ويا اهلو .. ومرات لو يطلع لو يبقى يمي بالغرفه ع اللابتوب ..

نوبات الوجع مرات تخف ومرات تزيد حسب التزامو بالعلاج .. نفسيتو شوي شوي بدت تتحسن ..

اللي اكتشفتو ان هو مراجع دكتور نفسي بس مكايل لأي بشر ..اكتشفتها من الراجيته مضمومه بمحفظتو ..

ما حجيت ولا اجعلني عرفت .. هو يريد يطيب ويخلص من حالتو وهذا اللي اريدو .. فما احرجتو او عرفتو ان اني عرفت ..

اهلو ابد ما غثوني بهلفتره ولا سمعت منهم اي كلمه تغث .. بس عيونهم تشرح الحقد اللي بداخلهم..

لان صراع هو من اساسو لو كعد يحبسني يمو مو عاد مريض .. كن اني ام وهو طفلي .. من هو بالبيت يريدني وين ما يلتفت اني يمو ..

متعلق بيا بشكل ما طبيعي .. مرات لو اتأخر نص صاعه وما اصعدلو . يكوم يصيح :- وينج ووين صرتي وعايفتني وما مهتمه بيا ..

عاد احلى فقره افارك اشكالهم واكابل وجه العافيه المجنون مالي صروعي ..

من بعد الشهرين خلص بناء البيت .. خابرني كال :- نص ساعه واني يمج اريدج جاهزه

-وين

-ملج علاقه ..جهزي وخليها عليه

-سبرايز يعني

-سبرايز شنو ذكريني بيها تره عگلي طكه ونص

-هههههه العقل كلو .. مفاجئه يعني

-هااا مفاجئه . اي مفاجئة .. تهيري عجل يابه

-تمام ..

ركضت لبخة مكياج خفيف ع السريح وبدلت و لعدلت الحجاب .. رمش يعني هو جوا .. اخذت الجنطه وطلعت .. لاگتني نور

-وين طالعه ؟

- صراع خابرني وكال مفاجئه

-عجل و مواعين الغدا مو عليج .

-ضحى ونوال موجودات ..خلي وحده منهم تغسل .. باي

.. مشيت وشكلها ما راضيه بحركة انزعاج وتهز ايدها ورافعه حواجبها ..

تركتهم .. فتت للحجيه .. يوم صراع برا راح اطلع

-الله وياكم يمه

-مشهيه شي

-لا ييمه بالعافيه

-الله يعافيج حجيه ..

خطيه بدت تتحسن حالتها خاصه صراع ما سكت راجع بيها جثير اطباء واذا تعبان يخلي علي و هيام ياهذوها ويدبر طلعتهم لبغداد .. فشوي تحسمت صارت تخطي خطواتهل وتكف على حيلها .

... طلعت لكيتو بالباب يدحك بالساعه وحواجبو عاقدهن .. فتحت الباب وكعدت

-وينج صار ساعه واكف

-على كيفك لا اطيرنا . هو ما صارلك ساعه من خابرت وكلتلي تهيري .. توك رمشت ..

- هز راسو منزعج صروع ما عاجبو الكلام .. يمكن لان حقيقه ومكدر يرد ..

مشى بيه مسافة مو بعيده يمكن ١٠ دقايق او اقل .. ووكف كدام بيت بنائو حديث دبل فاليوم ..

-نزلي

-شنو هذا

-نزلي وتعرفي

-الباب اسود جبير سحب .. فتحو وكال فوتي

-دخلت .. لا تكولها .. بيتنا ؟!!!!

.. هز راسو اي ومبتسم ..

-كمزت عليه حظنتو حيل .. صدك والله بيتنا ..

-دفوتي يولو تحظنين و الباب مفتوح .. تلحكين جوا

-لازم مخلي ابالك

-افااا عجل ما نستفتح ما بالحيف ..

-ههههههههه ...رد سحب الباب وقفلو . ادحك بالبيت اول ما تفوك كراج مسكف طويل مثل الممر مسوي يسع ٣ سيارات ورا بعض و ع الجيهتين حدايق

-هاي سكفت الكراج حتى تاخذين راحتج تغسلين اطلعلين بلا حجاب محد تحط عينو عليج

-ههههه قبانو ابو عقل الحلو .. ادحك فاصل الحدايق عن الكراج بمصطبات مرمر .. وعمدان سيراميك اسود .. وتصميم ياخذ العقل .. وهو يمشي يشرح هينا نحط شتلات وهينا اجيب كذا ..

واني بس اهز راسي اي .. فتنا للبيت .. الهول جبير حيل جبير وبنصو درج ملتوي .. و المحجر مالتو ياخذ العقل ..

المطبخ واسع و سيراميك ابيض و بنفسجي فاتح ..

فتت للاستقبال واجيت اطم روحي :- تحجي صدك صراع

-ليش

-شكبرهاااا

-اي غير حتى تسع خطارنا .. ما يضل احد كاعد برا

-وانت من هسه متحزم للعزايم

-وانتي من هسه استلمتيني ما بيه حيل .. امشي لا ادفرج ...

...فوتنا جوا ٣ غرف واسعات .. وحمام و تواليت غربي سواه للحجيه .. الشرقي خلاه برا للرياجيل عود اذا اجونا .. محظر كلشي وحاسب احساب حتى التواليت ..

الفوك ٤ غرف و صاله على تصميم الصاله الجوه .. واحلى شي الحمام شي خيال بانيو وشوار و فد تصميم مبدع بيه ..

-هينا نسبح ..

..اندرتلو ادحك بطرف عيني :- نسبح !

-من نكعد وحدنا لا تحلمين تفوتين حمام بوحدج .. ابد لا تفكيرها .. رجلي على رجلج

-اويلي يابه متحظرلي بالطيحان حظ ..

-يا طايحة الحظ امشي دا اكملج .. فتح الغرفه وهاااااي غرفتنا ..

-تجنن .. سقف ثانوي وتصميم بالمروحه و الاضويه يجنن .. عجل ليش ما خليت الحمام بالغرفه

-لاااا ما احب حمام .. منعزل احسن .. انقرف من الحمام بغرفتي .. وهو البيت بس اني وياج يعني عادي محد هينا وتستحين .. بس امي جوا

-وحلا

-حلا شهر ورايحه حجينا بسالفتها طالت .

-وبس اني وياك ولا اي واحد من عدهم ويانا ..اكعد مرتاحه و اصبح بلا مغثه ومحد كاعدلي ع الكلمه ..

-انه وعدتج اخليج اسعد انسانه والله .. لخليهم يتمنون عيشتج والله .. هلمصلاوي بكد ما ذلوها بلسانهم لارفعها عنهم

-يمه يمه يمه فدوه لزلمتي وراعي بيتي .. وقربت بستو بشفايفو وابعدت .. ومسحتو .. ادمرت حمرا .

-لا لا ما يهم حدري اساسا اريد اجرب الحمام يجربي ينسبح بي لو لا .. حدري لشوف

-لا لا لا .. وخر ..

-حرام بالحرام الا اجرب . هو بكيفج ..

-ااااااااييي .. بيتي وكلو كيفي افتهمت .. وانتجيت على صدرو

-بيتج بكيفج بس انتي وبيتج بكيفي .. وحدري هسه خل اشوفج كيفي ..

-منحررررررف ..

..... بعدها فرفرني ع محلات الاثاث .. اختارينا غرفة تركيه .. ديوان للاستقبال .. تخم للهول الجوا و الفوك .. غرفة نوم لحلا.

-عجل مو راح تتزوج

-وشيهم من تجي خطار غرفتها موجوده خوما اتضل ادورلها غرفه ابيت ابوها وتستجدي .. هاي باقيه الها ..

-و الحجيه

-امي لازم اخذ خاف ما تقبل بجديد تريد غرفتها .. صورتيلها البيت ..

-اي صورتو ..

كملنا اثاث البيت و حجزو .. كال مشتهيه شي ..

-بيتزا باللحم ..

-نزل جاب واخذتها ورجعنا .. نزلت للبيت طايره من الفرحه .. واصيح بحلا ودحكي هاي غرفتج وهاي اثاثها وهاي غرفتي ..

والحجيه تصيح كافي يمه .. اصعدي ليليان .. انشاءالله عتبة خير .. ولج صعدي ..

حلا :- شبيج يا جدا خل نشوف دحكي التصميم يجننن .. عود صدك هذا بيت بابا .. يااااي والله اغث خوات وسام خل يشوفووون بيتهم ما يطلع بكد غرفتي . يااااي فدوا لبابا .. دزيلي خل اشوف وسام ..

الحجيه :- انتن شووووو ما تستحن . لا تهجمن البيت علينا . استرنا .

-صفنا بيها .. ندحك نوال ادحك من وره وجهه وحتى ما شاركتنا اني و حلا الفرحه .. نور واكفه ادحك ويانا وبلا ردة فعل بس ادحك ..

و الحجيه تخزر وتصعد اخر شي نبتها ام سعد :- شني خيه خايفه نحسد بيتكم تره نحن مو ولد فكر شايفين وعايفين و البيوت مو بعينا ..

... فات صراع :- ها الله يساعدج يمه

-هلا ييمه ..

-شفتي البيت

-اي يمه شفتو ان شاءالله عتبة خير عليك ..

وخزرتو واشرتلو ... بساع افتهمها ..

-ليليان طلعي حظريلي الحمام ..

-بس نتعشى ..

-عجل تركي الموبايل .. وكعدن اكلن ..

.. راحت حلا تجيب كلاصات الي والها .. وكعدنا ناكل وهو اخذ قطعه ياكل ويانا .. عزم نور ونوال و ضحى . كالن لا بالعافيا تونا لمينا العشا ..

ادحكلو وهو كاعد بالبنطرون الكابوي و القميص الاسود و السويج و الايفون بيدو .. وشكلو يجنن وهو ملتحي .. صدك هو عافيتي .. بدونه ضعت .. وهسه الفرحه ما سايعتني بجالو .. خفت احسدو .. كمت ادعي وادحكلو

التفت لكى عيني عليه .. ابتسم وبانت خسفات وجهو بلحيتو . غمزلي واشرلي بحواجبو عود صعديلي فوك .. وگام باس راس الحجيه وطلع .

صعدت وراها .. عيبدل .. تقربت منو مبتسمه .. رفعت اديه وحاوطت عنقو ومتجيه نفسي عليه .. تدري شگد احبك

.. لف اديه على خصري ومتبسم :- مو بگدي .. يولو والله اعشگچ من جدمج لحد هامتج ..

... مسك حنجي وبوسني ....

ليليتها نمت واحلام وافكار براسي شكثررررررررر .. شلون راح ارتب البيت وشلون راح اديره وشلون حيصير عندي بيت خاص بيه وووو احلام وافكار ما تنعد ولا تحصى ..

طلعت الشمس و اني بعدني افكر .. اخرها نمت مدري شوكت .. بس كعدت ثاني يوم متأخره ..

دحكت الساعه ب٢ الظهر .. هو مموجود .. دحكت من فوك للكراج سيارتو ماكو .. يعني طالع .. راح استلم الحجي ..

يلا يطبهم طوب .. اتحملهم بس هليومين .. رحت للحمام سبحت وطلعت رتبت نفسي ومكيجت .. ونزلت كاعدين بالهول ...

الساعه ٤ الا ثلث شگلهم هلو مرحبا صباح الخير .. شافني الحجي دار وجهو متضايق ويهز بيدو

دحكت للحجيه :- ها يوم .. كضبت رجلها وكعدت

-مو بعد وكت لو طابكتها النومه وي اليل ونازلتنا باجر ..

-يوم ما كعدت والله طلعت الشمس واني بعدني كاعده ..

نزلت حلا تمط بجسمها هستوها كاعده ..

ام سعد :- لا هواي كضبتن بيت .. دشوف هذا البيت التصيرن بي شلونه .. لا ما جايف انه معتبه ..

حلا :- و شكو طالبيني بطلابه .. بيت ابويه واكعد وكت اليعجبني والما يعجبو براحتو

الحجي :- ولج احترني جديتج لا بالله اكضبو لراس املصو ..

... صوت باب الكراج انفتح . كمت من مكاني دشوف هذا صراع .. دحكتو من شباج المطبخ .. اي هو ..

صف سيارتو وفات .. ها الله يساعدج

-هلا عمري .. جنت بالبيت

-لا بشغله رحت

-شوكت نشيل

-ان شاءالله باجر اخذج انتي وحلا وهيام تغسلوه حتى ننتقل .. بس هسه تهيريلي بالغدا حيل جوعان .. شنو غدانا

-ما اعرف

-ما متغديه

-هستوني كعدت كلشي ما ماكله .. دحك الساعه .. وابتسم .. عجل سويلنا اكل ناكل سوه ..

سويت اكل الي والو والحلا .. وهو صعد بدل كلابيه خفيفه ونزل .. وتغدينا ..

بعدها كعدنا عصريه سوالف سويت جاي و ضحى مسويه كعك وكعدنا نتعلل .. الحجي وصراع ونائل وسعد كاعد ..

اني بصف صراع متجيه ايدي على رجلو واشرب جاي وهو يحجي ويسولف وي الحجي ..

رؤى كاعده بحظن امها .. طفله تضحك للهوى وهي كاعده و واد دا دا وتحجي وياي وتأشر .. واني الاعبها و اضحكلها .. اندار صراع يضاحكها وكاللها تعاي ..

اجتو و هي كاضبه مصاصتها والحلك يرول والادين مدبگه.. يضاحكها وكاضب اديها باصابعو و يكولها

:- امج الطايح حظها ليش ما تغسلج يحلوه .. ملتهيه بالسوالف ..

وهي ادردم وهلكدوتها كصيره وبيضه والعيون بيها لون . تجنن اليكول گصة بقلاوه .. بقينا اني وياه نلاعبها .

-اريد تصير عندي هيج بنيه حلوه

-شفايتلنا مثل هلعسل تجينا بنيه وتخبص غرفتنا بصياحها غير اكلها هي وامها .. دحكي ياولي شكد تشبه حرب

-هههههه الله يرحمو

-نوااال . ول ياااااابه ع السوالف الجاتلتجن نوااال

.. نوال ملتهيه حجي هي ونور وهيام .. سوالف .. اندارتلو ها ابو حرب

-بس الطفله يولي حلكها يرول و دبكه .. غسليلها ..

-اي هسه .. واندارت تكمل سالفتها وي هيام ..

-ول كومي هاي تصعد.ضغطي .. الطفله الحلا اكل خدودها وامها ملتهين .. كومي غسليلها ... وجيبيها خل اكل من خدودها شويه ..

-هههه .. كمت شلت الطفله صاحت نوال :- لا ليليان انه اغسللها .. هسه ..

- لا ما عندي شي عادي كعدي .. رحت غسلتلها بالمطبخ كامت تبجي نزلتها .. ولميت السنك

ورجعت للهول .. جددت الجاي وكعدت ع الدرج اسولف وي ضحى ..

اجت نوال :- ليليان وين رؤى

-شمدريني

-مو اخذتيها غسلتيلها

-يمعوده صار بالنص ساعه واني مشيتها كتلها روحي لعمو

-الطفله ماكو شنو مشيتيها ..

-كمت من مكاني وصعدت ادور فوك وهم يدورون جوا .. صاحو :- هااا لكيتيها .

-لا ماكو .. احجي وافتح بالغرف وادحك ماكو ..

صعدت للطابق الفوك هم ماكو ..

كلها هجت ادور الطفله وين ..

وصراع يصيح :- دوري بالخانات بالكانتير الطفله ناعمه يمكن تختل تلعب .

-دووورت ماكو ..

.. حلا ادور وياي واني وحنين فوك فردشنا مكان مكان

نوال كامت تلطم بنتي راحت عزا العزاج ليليان كتلج اني اغسللها .. راحت بنتي

.. احتقنت انوب صارت بوجهي . كمت الوم بروحي لو مرجعتها لامها شبيا بس مشيتها ..

ادور و الدمعه بعيوني .. والحجي كام يصيح وصراع يزكح :- ملتهيات بالسواااالف طفله هلكدها ما ندري ويييين ..

.. وطشو طلعو للشارع يدورون .. ماكو ..

جان بيومها .. سعد فاتح المجاري مال البيت و المنهول اللي يم التواليت مال الكراج مفتوحه ..

ف انتبه عليها ابن سعد من ضحى .. من بيناتنا نكز واحنا اندور جان يصيح

:- صددددددك انه شفتها يم المنهوله تلعب العصر

-بس كال هيج الكل فز و راح للمنهوله ..

هي جبيره حيل وجانت طافحه وديمشيها ما مشت .. كال باجر اجيبلها ابو مجاري يسويها .. وتركها

يدحكون و سعد نزل يمشي ايدو .. جر ايد وطلعت ايد الطفله سودا من الخيسه ..

كل احنه صرخنا .. امها كابلتها وصرخت وسعد يبجي وصراع يريد يجرها من اديهم ..

اني صفصفت بمكاني لزمتني الرجفه .. احس اني سبب موتها .. شبيه مشيتها لو مرجعتها لامها .. اني عفتها للطفله ..

جرها صراع من اديهم .. حطها جوا المغسله ويويدك بصدرها ويتحسس .. واحنه ملتمين عليه نبجي ..

نائل شغل السياره وطلعو بيها هو وصراع .. لحكهم سعد و الحجي بالسياره .

والبيت انگلب عزا الجيران التمت و الدنيا انكلبت ع الصراخ .. وامها تكسر الخاطر تصرخ وتبجي وام سعد تصرخ ..

واني انتهيت احس عقلي انضرب دموعي تجري و الوم بنفسي ورجليه رجل برجل اطك ارجف ..

خابرو .. كالو ماتت الطفله ..

وامها ثارت عليا :- انتي كتلتي بنتييييي الله لا ينطيج يلمسموووومه انتي اخذتيها وشمرتيها بالمنهوله

وتضرب وتهد ويدافعوها عني واني ارجف وابجي وساكته ما احس اكدر اشيل ايد وادافع ..

عمتي تصيح بيهن وتكلهن هذا يومها والناس صدكت كن اني كاتلتها واني ما نطقت كلمه الرجفه ذبحتني احس الساني انبلع .. وبس الدموع تجري ..

جرتني هيام منهن وكعدتني على صفحه .. وانتبهت الايد ترجف .. كالت :- شبيج .. ولج شعليج انتي يولي هذا يومها ونوال تعبانه هسه

عافتني ومشت .. مرت نور وحجت :- تره صوجج لو ما اخذتيها من حظن امها ما وكعت شعليج امها تكمل وتروح تغسللها .. رحتي طلعتيها ..

... بقيت مدنكه بلا رد .. بس الدموع تهل ..

... هوسه صارت وناس وضجه واني نفس وضعي الا ما فاتو صراع و سعد .. العيون دم وجايين من الدفنه .. وحالهم حاله ..

وتلكتو نوال وتصرخ بوجو .. :- كلو من مرررررتك موتت بنتييييي عيونكم نفست بنتي .. تكومون وتكعدون صحتو تشبه حررررب ماتت بنتي بسببكممممم

صراع مو طبيعي كن محتقن وتعبان .. وهي تصرخ بكل صوتها عليه .. جابها راشدي هو راشدي هي لطشه بالحايط .. وانهد بيها

بنت كلب طفله هلكدها ما حويتيهاااااا ملتهيه بالسوالف .. وسعد انجن وياه كضب نوال دك بيها التوبه .. ميعرفون يكضبون صراع اللي انهد وفقد وكام يدفر لو سعد اللي وكع على مرتو .. ونهاها ..

اني دحكت صراع بهلحاله وهو يصرخ بكل صوتو وولد عمو فاتو و اصواتهم علت وهم يفازعون .. موقف مرعب احسو ..

وما انرعبت غير من صراع ...كلت راح يذبحني .. متجمده بمكاني ... شفتي انطعنت زرررركه و الوجه حيل اصفر وارجف من فوك لجوا ..

دحكت ساره بنت هيام وكالت :- شبيج ليليان باعي حلكج شبيج ترجفين ..

دحكت بيها .. احس مثل الصفاره صفرت بأذني .. وانغمى عليه ..

ما حسيت غير اني بين ادين صراع شلون الواحد غركان ومطلعي من الماي وهم يشمرون الماي على وجهي وصراع يرش عطر ويشمم بيا ..

فتحت عيوني .. وجسمي كلو يرجف .. وما اكدر احرك اي شي مثل الوحده الضاربيها بنج يحجي ويايه ما اكدر ارد متجمده ..

يكولي اكعدي يحاجيني .. عبالو دا ادلل عليه ومتخربطه .. وهو عصبي فشمرني من ايدو عبالو اكعد .. رجعت وكعت ..

رد كضبني ويصيح يلو شبييييج احجي .. مو احجي وياااج ليليان .. بس الدموع كامت تجري ما اكدر اكف احس بالشلل جسمي ما املكو ..

هيام فوك راسي .. و نسوان واكفات يصيحن هاي خافت كضبتها خوفه

شالني وصعدني للغرفه فوك وهيام وحلا على راسو .. حطني ع التخت ..

:- هاي ترجف شبيها متكلووولي لج احجي مو جاي ادحكين بوجهي احجي باباتي بس احجي

هيام :- يمكن صخنت

-يولو الجسم بارد .. ول يابه بس ردي علي ليلياان .

هيام :- ولج يمه بس نطقي احجي ليش مدا تحجين

-اري. انطق وماكو الساني انعكد .. ما اكدر احجي .. كمت ارجف من الخوف من حالتي بالزايد وجسمي مثل المشلول .

صراع :- ول يابه دحكي شلون ترجف ... حلا الغطا من الكنتور ع السرررريع .

هيام:- بس خل نغير ثوبها مبلل يمكن مستبرده .. غيرولي الملابس واني لا ايد ولا رجل

صراع:- اللهي الساعه عبرت ال١ هاي وين انكي وجهي بيها ..

جاب ٤ بطانيات ودثرني بيهم ويقرأ على راسي .. :- ياهو الحجه وياها بس انطوني اسمو والله لردو ابطن الخلفتو

ويرجع يقرا قران .. وهيام وبناتها وحلا وحنين كلهن بالغرفه ..

بقى يقرأ على راسي لحد.ما هديت وغفيت .. ما فزيت غير الصبح .. هو ماكو .. نزلت من الجربايه .. فرحت .. كلت الشكر للرب عبالي انشليت ..

بس وجع براسي قوي حيل .. كمت وكفت على طولي .. رجليا منمله شلون البسامير .. كوه اكدر اكف حيل اتوجع .

كمت امشي واحس اريد اوكع .. شويه شويه خف وجع التنمل واختفى كمت اتمشى للحمام .. بس وجع راسي ذابحني ..

البيت جوا هوسه عزا ..

فاتت ساره :- ها صباح الخير شلون صرتي خفنا عليج ..

:- انتبهت على نفسي .. وكفت بس ما نطقت .. اريد اجاوبها .. لساني ما يتحرك .. بس يطلع صوت انين اااأاا ماكو كلام ..

كمت احاول احجي .. واصيح ااااااا واريد انطق الساني معكود ما اكدر احجي .. كمت اكضب بركبتي وابجي واحس حنجرتي اشتعلت نار من احاول وما اكدر احجي ..

كعدت بالكاع تخبلت واني اخنك بركبتي من وجع بلعومي واني اريد احجي .. ساره كاضبتني وتكلي ولج شبيج بس احجي شبيج ..

اشرتلها ان ما اكدر احجي .. الساني ما دا يتحرك ..

نزلت طايره تصيح بامها .. واني اتخبلت كمت الطم .. اريد احجي اختنكت .. احس خرسيت ..

اجت هيام تحاجيني تريد .. جنيت .. شربتني ماي .. اريد انطق ماكو .. خابرت على صراع .. كالتلو : يمعود تعال هاي ما جاي تحجي مثل الخرست الحكلي شسويلها تعال شوفها ..

دقايق وصعد العيون دم .. هو حيل اتأثر بموت الطفل كن حرب اليوم مات .. رجع يبجي على ابنو .. فصعد محتقن واعصاب ..

:- ها ام علي شسالفتها هاي شبيها

مديتلو ايديا استنجد بي ودموعي تجري واشكيلو ان ماكو صوت ..

جا حظني ويمسح على راسي شربني مي .. :- باباتي بس اهدي كفي دموع .. اهدي اهدي و دححكي تردين تحجين .

هزيتلو راسي بمعنى اي..

-بس لا تخافين و كولي صر ااع

-احاول انطقها وياه تطلع ونه ما يطلع حرف ..

-احتقن وكام يفرك وجهو بيدو ويدحك على هيام :- بس كليلي منو سوا بيها هيج منين خافت

-محد والله بس هي خوافه .. مدري شعكد السانها

مشاني للغرفه كعدني ع التخت ويحاول يحجي بيه .. احرك شفايفي بس بصعوبه الكلمه متطلع ..

وكتها شكو بجي الله شمرا عليا من كل عقلي كمت اناشغ .. انتهيت من البجي اني احاول احجي وما يطلع كلام .. وهو حاظني ويحاول وياي ويكلي بس اهدي ولا تبجين بويه والله شليتي حالي ..

اخرها راد يكوم .. كضبت بيدو مثل الطفل واتوسل بيه واشرلو ان ما يطلع

-اي بويه والله ما اعوفج بس عيب زلم صدقاني جوا جايين بس اخلص منهم واصعدلج .. اهدي ونامي وانه بس اخلص شغلي اجيج .

كن يقنع بيا مثل الطفل ورجعني .. كعدت بمكاني .. وكت ظهريه و الناس ملتهيه صلاة وغدا ..

بقيت وحدي بالغرفه .. ردت صعدتلي هيام وكالت :- كومي اكلي لا تقهرين نفسج هذا قدر ومكتوب يلا امي كومي اكلي ..

رفضت اكل .. ولا قبلت احط لگمه بحلكي .. اقنعت خلاص ان اني صرت خرسه ..

للمغرب فات صراع :- يولي شلون ياج يا ليليان .. كاعده بس تبجين .. كومي لشوف كومي ..

طلعلي ملابس .. ومشاني للحمام .. دخلني .. وازن الماي .. وشغلو ..

-اسبحج انه خاف ما تكدرين

-اشرتلو لا اطلع اني اسبح ..

-عجل سبحي انه نازل ارجع الكاج مكمله . يلا بويه ..

.. مسح على راسي وطلع .. سبحت وغسلت .. وكل شوي احاول وي نفسي احجي وصوت ماكو ..

طلعت للغرفه وكعدت امشط ومقتنعه ان الطفله ماتت بسببي .. اتذكر ضحكتها و لعبها واشبع قهر .. وكلام نور ابد ما راح من بالي ..من كالتلي كله صوجج انتي اخذتي الطفله

كل الصريخ ومنظرها الاسود من طلعوها براسي يرن .. خفت حيل وكلها بكوم وخوفي من صراع بكوم .. خفت لا يكلي انه كتلج رجعيلياها ليش تركتيها تمشي ..

بس ما حاسبني صار ويايا .. واني افكر فات هو .. حيل تعبان ومهدود حيلو ..

:- ها ليون شلون صرتي

- دحكت بوجهو .. بانكسار .. ردت ابجي

-اش اشش لتبجين .. نزلي وياي لشوف كلتلهم يحظرولج عشا .. تعشي حتى ترتاحين وامي جوا هسه ترقيلج .. وترجعين ورد بس لا تخافين .

يلا كولي يا الله وكومي ..

- هزيت راسي اي.. ومشيت وياه .. نزلني .. كن الناس خفت .. كاعده خواتو اسماء و شيماء و اخلاص وياهن ونور

صراع :- يمه هاي انعكد.السانها ما جاي تحجي ما تقرين على راسها .

الحجيه :- حدري بنيتي .. كعدي يمي ..

هي كاعده ع التخم واني كعدت بالكاع على ركبي وخلت راسها على ايدي ..

هي الحجيه معروفه بالمنطقه علويه وخوش مره من اهل الله ف الناس الفقره تجي تتعنالها تقرا على راسهم ويطيبون من ايدها

.. وكعدت تقراه على راسي وترقيلي .. بس حظي مافد وياه شي .. تحاول وياي انطق ما اكدر بس ابجي.. وصراع كاضب ايدي ويفرك بيها ..

فات الحجي ونائل .. وسال الحجي :- ها شبيها ..

دحكلهم بلا اهتمام ورد يدحكلي ما بيها شي بس تعبانه .. كن صاير شي وميحجي وياهم مثگل وجهو ..

.. كام راح للمطبخ يكلهم على عشاي ..

اخلاص :- والله خوش فلم حتى بدل ما يحاسبوها يداروها .. انخرست كال ..

.. الحجي كعد حاول يحجيني .. اشرلو اكلو ما اكدر احجي .. ما اقتنع .. يكلهم هاي تمثل تريد تددل براس هلمتعوب

.. رد جا صراع .. كن كلهم تعبانين من العزا .. حجيهم خفيف وصراع كعدني يمو .. ومن احاول .. يكولي خلص لتحاولين لتعبين نفسج ارتاحي..

خلت حلا الأكل گبالي .. :- اكلي

:- اشرتلو على حلكي وهزيت ايدي .. انو ما اشتهي

-عجل بابه تموتين حالج يا عمري .. اكلي لشوف .

-.. اظحك كلها ادحكلي ممصدكين انو ما انطق .. حتى عمتي تصيح معقوله .. هي خاف ما تريد تحجي

صاح بيهم :- هسه معقوله ممعقوله تركوها البنيه بحاااالها .. تحجي ما تحجي بكيفها .. مدلله على راسي ما ادللت على راس احد بيكم ...

حجاها بنتر .. كن اكو شي صاير وسمع كلام ابو لما حجاه عليه وهو بالمطبخ ..

جر قطعة لحم .. لفها بخبز وزكح بيا :- اكلييي انتي .

هاااج .. ودشوف ما تاكلين

-جريتها من الخوف اكلتها ..

-اعصابو طالعه وعاقد الحواجب ويلف .. وينطيني واكل .. تخمني واني طالعه روحي ...

طبطبت على رجلو واشرتلو ع بطني وحلكي وهزيت ايدي انو والله شبعت بعد ما اريد ..

ترك الخبزه من ايدو .. واخ نفس .. كمت للمغسله اغسل .. انتبهت ام سعد و سعد و نوال ماكو .. وحتى ضحى ما هيه ..

... غسلت وصعدت لغرفتي .. اخذت الكتاب المقدس .. جابلياه هو قبل فتره لما طلبتو منو .. كضبتو وضليت اتوسل بيسوع وابجي ..

الكتاب على صدري .. ورافعه راسي والددموع تجري .. فات هو ..

:- ول يابه ما يصير هيج .. شو شو .. اخذ الكتاب حطاه ع ال ميز ورفعني للتخت وحظني بثنبن اديه وراسي بصدرو ..

--لا تهتمين والله نفسيتج تعبانه يوم يومين ويرد هلسان الحلو يغرد بس لا تجتلين حالج ..

ادحكلو .. بعيوني .. اكره نفسي من ما اكدر انطق .. سحب الفون من جيب بنطرونو .. وحطو بايدي ..

-هاج كتبيلي واحجي ويلي كتابه وطلعي البگلبج

كتبتلو :- اني السبب بموت رؤى ؟

قراها :- شنو هالحجي هذا قدرها تعددت الاسباب والموت واحد صحيح امها قصرت ما انتبهت عليها ولو كن دارت بالها جان ماصار الي صار والحذر منع القدر بس هاي مكتوبة بعد طير بالجنه

- كتبتلو .. عجل ليش ضربت نوال

قرا :- من نار گلبي ساعه انه اصيح وهي ملتهيه بالسوالف و وتاليها تجي تتهم غيرها وتبري نفسها من المسؤليه وفوكاه تصرخ بوجعي لهلچلبه

كتبتلو :- اني خفت منك تحاسبني ضليت ارجف

قرأ:- يولو انتي شذنبج بيها واحاسبج .. الذنب ذنب امها ما دارت بالها وسعد هم غلطان من ترك المنهوله مفتوحه ونحن عدنا جهال ..

كتبتلو :- راح اضل هيج

قرأ :- لا عمري ما اخليج والله من باجر اطلع بيج لبغداد وما اخليج الا اعالجج ..

باس راسي .. ارتاحي كضبي الفون دحكي اللي يعجبج ولعبي ولا تضلين تفكرين بحالتج ...

مددني على صدرو وخلا ايدو تحت راسو .. واني ادحك بالفون مالتو .. التهيت بالفون . انتبهت غفى ..

كمت من مكاني .. جبتلو غطا وغطيتو .. حس .. رجع نفسو وفتحلي اديه .. نمدت على ايدو وانطيتو ضهري وبقيت اكلب بالتليفون لحد ما نمت ..

ثاني يوم ... الصبح كعدني وكال يلا . خل اخذج بغداد حتى العصر اوديج للدكتور ..

كمت لميت بجنطه ملابس الو والي .. وبدلنا ونزلنا ..

كلهم ضايجين

مني ومعتقدين اني امثل واسوي افلام حتى محد يحاسبني .. بس صراع مهتملهم

سحب ايدي وطلعني للسياره وطلعنا لبغداد ..

وداني للبيت اللي رحنالو لما تهجرنا بيت ابو صفاء .. نزلني ودك الباب ..

طلعت المره اللي اسمهان .....يتبع

☆☆☆☆☆☆