المراهقة والأربعيني الحلقة (59)

المراهقة والأربعيني

 

الجزء الثاني

الحلقة  (59)

كعد الحجي و سعد وكالو .. خابرنا خالها يجي ياخذها ويخلصنا من عارها ..

طلعت الهم :- عمو حرام عليكم والله حرام كلش زين تعرفون اني ما عندي شي وي علي ليش تسوون بيا هيج وتفضحوني شسويتلكم

سعد :- امشي كح.... لا بارك الله بيج من مره وي ابن اخت رجلج ما جذبت امي من كالت نغله بلا اصل

-اصلي يشرفك ويشرف عشيرتك افتهمت لو لااااا لو ما انت ناقص شرف ما تفضحني ..

هد عليه بكل حيلو وذوله ينترون ويفشرون .. وكف علي كدامي و تلازم ويا سعد من ياخاتو ..

-والله ما عشت ولا صرت وتمد ايدك عليها ابيتنا ..

صالح:- ولك عليوووووي كوااااا... ابببببببعد

بندر :- يول حدر هين خل اااااربيك

وگضبوه مكاون وياه وعرك واني فتت جوا ابجي ساره وجنات واكفات و الكونه گابه .. اخر شيء طردهم من البيت .. وسد الباب .

وفات يلهث و يغلط ويضرب ويدفر بالغراض وانعل واشعل وهيج منكم وهيج من ابهاتكم ...

... خابرت هيام واني ابجي ردت عليه

-الو

-ها ام علي

-شبيج شصاير

-سعد والحجي وبندر وابو جانو عدنا وتكاونو وي علي وطردهم لأن سعد راد يكتلني

-وانتي شصخم وجهج وجيتي للبيت ما ابقيتي ابيتج ليليااااااان عزا العزااااااج ان شاءالله

-ام علي سعد طردني من البيت شسوي

-ولج انتي شنو من غبييييييييه ترجعين لبيتج هسه يلاااااااا

وسدت الخط .. دحكت بالموبايل .. شكد حسيت نفسي رخيصه وثكيله ع الناس .. وين ما اروح انطرد ..

بقت دموعي تجري بدلت وكتلو علي وديني للبيت

علي:- طلعه الج من هيييين ماكو كعدي ليليان

-امك تكلي رجعي لبيتج

-مالج شغل بيهم انعل ابوهم

-علي خل ارجع ما اريد .. يجي خالو واروح وياه

-ولج لو رحتي يفلسونج من كلشي

-ما اريد كلشي منو كايللكم اني اريييييد افلوس طعنوا شرفي ما الي كعده هين بعد ..

... توسلت يوديني معاند وما يقبل اروح .. بقيت كاعده وابجي

اندكت الباب راح علي فتح .. دخل نائل

-وين ليليان

-ها نائل كومي امشي وياي

..... فاتت هيام وهجمت على علي انتي شنو من غبي وتجيبهاااااااا ولك فتيت كلبي وعلعلتنيييييي

تريد تضربو وعلي كاضب ايدها ويدفع بيها ونائل يكلها كافي يا ام علي كافي هسه اني اخذها

علي:- انتي شنو من بشر خالي مو وصاج عليها .. مو كالج بأمانتج

-ولك انت مالك شغل تدخل ليييش

-عجل ترديييين اشوفها تنطررررد واسكت

-بييييت رجلها ولك جبتلي التايهه ولطخت سمعتنا بسوايتك هاااااااي غبي .. وفوكاها طارد اجدادك من البيت

-انعل ابوهم لا ابو الخلفهم

نائل:- احترم نفسك لا راسك اكسررررو والله

-تكسروووو عجل وينك من طردوها .. لو انت خايف عليها من يلطخون شرفها ما جيت وراي البارحه وادهلت هسه جاي تاخذها من طعنتو بشرفهاااا

اطلع كل روحه الها من هينا مااااااكو

... تكاون علي ونائل و هيام تفاكك بيهم .. ولك تجيب الكلمه الك ليش ناقص بلاوي انت

عاد انفجرت متحملت :- حتى انتي تبريتي مني وتخافين على ابنج من مشاكلي هااي عود هو وصاج بس يا حيف تعبو و وصيتو ما تتنفذ

-مكااااااانج بيت رجلج ليليااااان مو هين

علي :- انتي بس كليليييي من شنو خايفه هيج كلبج حجر وذابتها بيناتهم

-ولك معليك انت اطللللع منها

نائل :- امشي ليلياااان تره طلعت روحييييي امشيييي

علي:- اتركها هين ... واندار لامو ... طعنو شرفها وخونها وياي .. انه مستعد اعقد عليها واسترها

-صخام بوجهي ان شاءالله

نائل:- يعني انت من صدك حاط عينك على مرت خالك

-الله فوك راسي و يكص ركبتي ان شاءالله لو حطيت عيني على عرض خالي بس انه ما رايدها ترجع لبيت جدو كلهم ما راح يسكتولها

هيام:- ولك يمه ما يصير تعقد عليها رجلها مفقود ما ميت تفهم انت لو لا ... عيفنا احنه نتصرف

-بس ارد افتهم انتي من شنو خايفه

-ولك يمه سمعتنا سمعتي سمعة خواتك كلها لطختها و تهموك جايبها لبيت

-خواتي موجودات انه جبتهن كلهن

-محد يكول موجودات الكل يعرف انه مو هينا الناس باطله يمه

- وشعليج بالناس طززز بالناس لا عيشتنا عليهم ولا محتاجين لأحد .. الله يعرفنا شبينا

-ولك سمعة خوااااااااتك علي .. اطلع منها اكلك ... جرتني ودفعتني وكالت :- امشي رووووحي وي نائل خلصيني ..

طلعت وصعدت بسيارة نائل .. الدموع تتجاره وعلي يصيح ويكلها كل همكم الناس شكالت وشتحجي وبنيه بلا ذنب تاركتها هناك طاعنين بشرفهاا بس حتى الناس ترضى يعني لو راحت هنااااااك راح يبروووها ..

.... مشى نائل

-شعندج طلعتي وي علي ليليان

-اني مو گد افلامكم .. اخوك طردني ورجع تهمني . من صدك اتمنى صراع يرجع ويشوف وضعية اهلو شسوو بيا

-انطي وكاله لسعد واخلصي

-ليش مو الك

-انه مالي خلك مشاكل سعد .. تنازلي عن الوكاله لسعد واخلصي

-وليش اتنازل .. خو اتنازل اذا اريد لعلي

-هم رجعت وكالت علي مو حقهم يشكون بيج وياه ... شعندج وياه

-لان هو الزلمه الوحيد الشفتو بعد صراع .. الباقين كلها تلف جوا الحياطين وتخاف

-انتيييييي شقصدج احترمي نفسسسسسج ليليان لا تجبريني استعمل غير أسلوووووب وياج ..

مو حقو سعد يريد يأدبج لان السانج ما ينجرع ولا جن مره مكسوره على رجلها تكاون والسانج بطولج وصوتج اشعلوو

-من ضيمكم ما خليتو كلمه الا وتهمتوني بيهة .. وتريدني اسكت ومحد يدافعلي

- خالج جاي بالطريق ياخذج واخلصي

-وهذا احسن شي ولا اضل بذلتكم ..

... وصلنا البيت سعد جايب نسوانو اثنينهم و بناتو .. وصلت يخزر بيا ولو بدو ياكلني و صاك على اسنانو وكال بلا تربيه ..

فتت وتركته بغرفة الحجيه كاعده نوال ع التخت سلمت محد ردت .. تركتهن و طلعت لغرفتي .. افتح الباب مقفول ..

صحت نوووور قفل باب غرفتي وينوو ..

ام سعد :- يماااااااا شلون وحده عايقه ولا تنكسر عينها كل هلفضيحه الصارت و لا هامها ويطلعلها صوت ..

سعد :- عجل الكح... شلون يصير لونها

ليليان:- امي القديسه مريم اطهر مرا وانظلمت مني راح تاخذلي حقي منكم اكييد .. اختنكت منهم مسحت عيني بحركه ... وصحت وين مفتاح الغرفه نوور

الحجي :- ما الج غرفه منا ولهين واعلمج شلون انتي اشرف منا وتتجاوزين يا جليلة حيا

-عمو هو منو التجاوز اني لو انتم .. تره والله حرام اللي جاي تسووه بيا .. شلون تصلي وتصوم وانت طاعن بشرف مرت ابنك

-انجازي يا وكحة بساعة الطلعتي وي علي ونمتي ابيتو ومحد بي

-اني طلعتتتتت !!!! مو انتم طردتوني .. وبعدين ابات وحدي بي عيب والله عيب

-ول تعلمينا العييييب .. هد وراد يصعد ..

-اي عيب مو جنه بالاردن بس اني وياه وحلا بالبيت وانتم بلبنتن وانام وحدنا بالبيت شو ما خونتنونه .. كضبني من شعري

و كفخات على راسي واني اوخر بي وهو يصيح وام سعد من جوا تصيح اذبحها اكطع السانها اصلخها .. وسعد يكلو انهيها لهل مصلاويه العرمه

فات نائل للبيت سمع الصوت وصعد وضل يتكاون وي ابو على ابو تالي شيباتك تمد ايدك على بنيه لا حول ولا قوه اهلها ميتين ورجلها مفقود

الحجي انوب تكاون وي نائل ويصيح يعني تكلي انه مووووو رجال وتكاون وياه .. عاد صاح بصوت عالي و دفر تحفيه جبيره وانكسرت وبقى يصيح

غضب الله عليكمممم تعبناااا ما تهيدووووون ساعه .. والله حكو من جااااان يصيح تعبان ثاري كل طلايبكم براسو وهو يركع وراكمممممم وهسه جبيرنا هو محزم للمشاكل حزام دكااااافي رحمه لمحمد خلصونا كلها على  موووود الفلوس مو عيشه هاي

صرااااااااع وصى واملاكو لبنتو ولمرتو وغيركم اليمد ايدو باطل باطل باطل .. ولا يصلي ولا يصوم ولا يبيع بعد دين بروووووسنا .

فقد يصيح و سعد من جوا يصيح عليه والحجي خلس ما طلع صوتو .. زكح بيا افوت جوا وسعد صعد .. نائل تركو وهف باب غرفتو وراه .

اني دخلت بغرفة حلا جانت ماموجوده عد بيت اجدادها .. سعد يدك بغرفة نائل ذاك مطنش ونور بالغرفه ما يكدر يفتح ويفوت .. بقى يغلط ويصيح لحد ما نزل ..

كعدت ابجي بغرفتي ...للظهر كالو خالج اجا ... بسرعه نزلت حظنتو وكمت ابجي كن حسيت واحد من اهلي احتمي بيه ..

اول شي حضني وكام يمسح على راسي ويعزيني بغياب صراع

-خالو جرحوني واذوني كيييغ

.. واني ابجي كعد الحجي و سعد و ام سعد بالاستقبال كدام خالو

-اهلا ابو حنا

-اهلا بيك ابو صراع  الرب يصبركم على غياب ابنكم صراع

- تسلم يابه .. انه خابرت عليك بخصوص بنت اختك ليليان

-اي

-ليليان صح طايشه وصغيره بس يا ابو حنا ما احترمت فقدان رجلها وتصرفاتها ما زينه نحن ولد عشاير ما نرضى بالعوجه

-ليش شنو صاير وي ليليان

-شردت من بيتنا و راحت وي ابن حماتها باتت ابيتو ومحد موجود وبفعلها هذا تنزل عكلنا لو خليناها عدنا

ليليان:- خالو والله جذب هم طردوني لأن ما سويتلهم وكاله

الحجي :- هاااااي منو الجذاااااب ياااا متربايه

دريد :- لا لحظه اخ دحام خل اسمعها شنو وكاله

-خالو يردون مني اسوي وكاله لسعد ولان ما قبلت طردني بليل وجا علي اخذني وتهموني وياه

احجي ويقاطعون بيا .... رديت خالو علي نفسو عاش ويايه سنه ونص بالبيت واخر فتره تركونا وحدنا من انجلطت الحجيه و بقينا بالشقه بس هو وخواتو وحلا واني  .. والبارحه هم خواتو جانو موجودات بس كلها تطعني بشرفي ومحد بيهم يرحم

سعد يصيح و الحجي يغلط شلون اجذبهم بس خالو خلى اذنو يمي و سمع كل كلامي

اندار للحجي وكالو :- تره ما يصير يا ابو صراع الشرف مو شويه وكلما كام واحد منكم تهمتوها بشرفها

قبلها تهمها ابنكم وفضحها وانظلمت بسببه وتالي ابو حرب اثبتلكم ان هي طاهره ومحد كاضبها

ام سعد :- يااااااا وانت منو وتكول على ابني عابد جذاب .. ما جذبو بيها .. هجامة البيوت البلا اصل

دريد :- اخ دحام المفروض ترد على زوجتك وتسكتها اصل ليليان مو قليل وناس معروفين بس الدنيا دارت وغلطة ابوها غير دينه وابتعدو منه ..

اني ما اكدر اخذ بنت اختي .. على يا اساس اخذها وهي الها حق هنا ؟ اخذها يمي وتهجمون بيتي بعدين ؟

اني رجال صاحب عائله ومالي بالمشاكل .. وليليان ما اكدر استلمها

-بس خالو اني ما اريد ابقى هينا حتى غرفتي طردوني منها ..

-لا خالو عذريني انه امج استقبلتها وتحملت اشكال الوان من يحيى ورجعت لبيتها و عاشت وياه كله على الورث ..

وهسه انتي من تالي تاركه خير رجلج وجايتني بمصايبج .. لا عذروني ما استقبل ..

سعد :- يعني انت حاط عينك على ورثنا

دريد :- مو ورثك هذا حقها واني ما استلمها الا بعد ما تنطوها كامل حقوقها وبلا مشاكل بذاك الوكت اي اخذها .. وهسه اني اگوم اروووح

طلع وعافني بيناتهم طكيت بجى يربي وين ارووووح مليت تعبت من الهموم والدموع والله .. كمت اتوسل بي خالو الله يخليك لا تتركني يمهم .. ما سمع ..

سلم وطلع .. كلها كامت تصيح خال ليليان يريد ورث خالها طالبنا بورث واخوناه مفقود .. طلعو مو هم اليدورون ورث خالي اللي طالب وهم صاحب الحق وشلون خالها يحجي بالورث واخونا ما دارين عنو ..

دخلت بغرفة الحجيه شحالي ابجي والدموع عشره عشره .. فوك محد الي انوب شرفي هتكو وسمعتي بالحظيظ شلون اخلص روحي منهم ما اعرف..

... بقيت كاعده عدهم وسعد انتقل بيتهم هينا ويكول ما ضل جبير هينا لازم اكعد .. واخذ غرفه عابد وغرفتو القديمه وبنتو وي حلا .. واجر بيتو وكعد عدنا

لأن المولده مالتو راحت بالتحرير حركوها .. فاجر بيتو وخلاه مصرف الو وهو كعد فوك روسنا

ونسوانو ما يرحمون الطفل البيهم يتأمر عليه وشحدني اطلع كلمه اشتغل بلا صوت سعد يكوم يكعد يغلط ويفشر عليه .. ولو رديت بوجهو هذا اللي الله كتبو عليه

هيام وي الحجيه بالمستشفى طلعت بيها بعد ١٧ يوم .. ورجعت الحجيه للبيت .. احسن شوي انام يمها واخلص من محمد وعيونو التلاحكني طول الوكت ..

ما تقرب لأن ما اطلع و البيت فارغ بس ما جاز مني . هيام بالبيت بس حيل تعبت ساعه ادافعلي وساعه تكلي اصبري الله كريم

علي ما خابرتو ولا خابرني ولا وصلني امو مانعتو مني ..

للحظه حسيت محد ضل الي .. فكرت اكثر من مره بالشرده بس اخاف وين اروح و الشارع ما يتأمن

هينا كم ذيب بالشارع الف ذيب ما اكدر اذب روحي وارخصها .. وخاصه بعد داعش صح تحررنا بس خلايا نائمه ما تخلى

ما كطعت الامل برجوع صراع بس تمر الايام يوم يوم وتثبتلي انو اني انتظر حلم ما يتحقق .. واتأمل بسراب

الكل ينتقد كعدتي عدهم لأن غريبه وصغيره وعدهم ولد .. وياهو الجاي حاجي بسمعتي .. اسهل شيء عدهم طعن الشرف .. ولا يرحمون الغريب ...

هيام يوميه تجي وتروح على الحجيه ومو مثل اول ما عاد عدها حيل ابنها يشتغل وبناتها وحدهم بالبيت و هينا الحجيه وغياب صراع حيل كسرها ..

جزعوني عيشتي كلو ع الوكاله اريد اتنازل و هيام تكلي لا صبري واتحملي .. ٣ سنوات وتستلمين كل حقوقج بس تتنازلين يبهذلونج

ولو انظرلها فعلا .. لو تنازلت اني وين اروح ؟ خالو ورفضني ويحيى داعشي وما مبين بيا كاع وهم هسه البيت بيتي وهيج تعاملهم عجل من اسويلهم شيسوون بيه ؟

الى ما فد يوم جاي اغسل مواعين وواكفه وهمومي هاده جتافي من ثكلها .. ركضت اميمه بنت سعد مني وال يوكع الماعون وينكسر وينكلب التايت ..

البنيه مدري شلون اتزحلكت وكصتها اجت وي كسرت الماعون تخبلت من شفت كصتها تجري دم ..

اتراكضو كلهم واجو عليها اخذتها نوال فرفحت وهي تطلبها وتصيح شلون وشبيها اخذها سعد ونائل وركضو ..

واني استلمني النسوان كفخات وعياط وصياح وام سعد كضبتني نهتني واني ابجي واتوسل بيهم  اخر شي ما شفى كلبها جرتني للطباخ وخلت السجين حمتها وحطتها على ايدي ..

خلتني اشيط للسما واصرخ من الالم والحجيه من الغرفه تصيح عليهم تريد تكف ما تكدر

بقيت اصرخ .. لبست الحجاب و العبايه واني ابجي ردت اطلع كضبني محمد .. دفعتو ومشيت ..

فرفحت روحي للشارع .. على راس الشارع وشفت علي ركضلي ..

ايدي دم وحرك يريد يكضبني ما اكدر .. وكف تكسي من الطريق واخذني للمضمد .. لفها اليه وعقمها واني الدموع تجري عشره عشره ..

هيج الما الو احد ينسبي ويضيع بهلدنيا .. شنو ذنبي السويتو وبشنو اذيتهم اني

من اليوم الدخلتهم لليوم محد طايقني وكل كلمتهم المصلاويه و الكح...

طلعني علي .. شفت السيارات كبالي اول شي اجا ابالي اذب روحي جوا السياره واخلص .. دا اخطي كضبني علي حيل

-شبيج تخبلتي

-علي عوفني

-لج حراااام تكتلين نفسج حرام اكو رب ادعي

-حتى الله مل من دععائي وما كام يستجيب اتركنيي

-امشي

-اتركنيييي

-امشي اكلج اني اعرف وين اخذج ... مشى بيا بسياره .. ووصلني لمضيف الشيخ ريكان ..

نزلنا كال اني هذا حدي ذاك البيت فوتي للشيخ وكليله داخله عليك تنقذني غريبه بكاعك اني وهسه يطلعلج حقج من عيونهم ويفضحهم فضيحه ..

بقيت صافنه بوجهو  علي شجاي تحجي اخاف

-وربج يطلعلج حقج ويطيحلج عكلهم والله .. سولفيله من اول ما جيتي للأنبار ولليوم وخل يتصرف بس هااا ..

لفي الشال هاذ على وجهج واخفي معالمو وطلعي بس عيونج .. وادخلي ولا تخافين هذا حلج الوحيد ..

بقيت ادحكلو وادحك للباب .. شلون ما اشوفها صعبه وخاصه هم ولد عشاير زحمه عدهم فوتت المرا لديوان الشيخ ..

بس ما بقالي حل اخر ...

لفيت الحجاب على وجهي وطلعت بس عيوني ... خطوه تاخذني و الخ تردني ..

وصلت للباب .. واكف رجال طويل صاح :- ها يابه خير

-عمو اريد الشيخ

-شنوو .. شعندج يابه وي الشيخ

-بس اريد احجي وياه وبجيت .. هو دحك ايدي ملفوفه اباندج و ابجي مشاني لبيت يصير قريب من المضيف كال امشي وياي ..

دخلني للبيت وفوتني باستقبال وصاح على نسوان تجيبلي ماي وتكعد يمي وكاله انه اخوه للشيخ ريكان انتي ياهي

-اني ليليان ..

- والنعم بس شكلج مو من هينا لكنتج غريبه .. منين انتي يابه

-مصلاويه

-هاا ع الراس ان شاءالله .. جابولي ماي .. شربي يابه والجاي بي هلا بي ..

اريد اكضب الكلاص كل جسمي يرجف .. هذا تاليتي مرت ابو حرب وهيج مصيري .. اخذتي بس شربت قلييل ورجعتو .. بقن النسوان كاعدات

-نازحه انتي ؟

-لا ما نازحه اني متزوجه هينا

-زوجة منو ؟

... ديحجي فات رجال جبير الشيب ماخذ من وجهو .. كال السلام عليكم

-وعليكم السلام

-يابه شيخنا هذة الحرمه داخله عندنا مصلاويه ومتزوجه هينا بس هذا العرفته عنها

-هلا بيها .. جايكم ضايفاتكم وين

-عمو اني محد الي عينا زوجي مفقود واهلي بالموصل اتذبحو وجيت لعندك اشكيلك من الظلموني

-سالفتج اعتبريها مكضيه يابه ارتاحي واهدي وما يصير خاطرج الا طيب

جابولي عصير ما اشتهيت .. كال شربي يابه ما نرضى ضيفنا يفوت عدنا وما نضيفه هذي ما هي من شيمنا .. احنه اهل الكرم سالفتج بركبتي .. شربي

-شربت بلا مشتهه بس عيب منو .. بس اريد احجي وانفجر وخايفه ورجل برج اطك من الخوف والايد ترجف وهو انتبه

-زوجة منو انتي

-زوجي اسمو ابو حرب

-هستوني حجيت شو هذا صفك على ايدو وكال افااااا حرمة صراع ابو حرب ما غيره ؟

-اي

-لا حول ولا قوة الا بالله .. هذا احد ابطال عشيرتنا الضحينا بدمه لجل ديرتنا ..

بقو واحد يدحك باللاخ ويحجي للنسوان ويكللهن هذا الكذا ابو الكذا

واندار شكم عمرج انتي

-١٩سنه

-بس لا انتي الجيتي براس المرحوم عابد ابنهم مو

-اي

... بقيت اسولفلهم وهم يستمعون .. كالو مو غريبه يابه نحن نعرفه الزلمه من اهو وزغير لوعته مرت ابوه وامه العلويه فقيره

والله ما يستاهل هذا البطل هيج يصير بحريمه من بعده .. اعتبريها منتهيه يابه .. انه هسه اخابر على ابو صراع وعمهم ابو سليمان و ان شاءالله ما يصير خاطرج الا طيب ..

خابر على عمهم عزام وكالو حرمتكم عدنا تفضلو نحجي بأمرها ..

وذاك المضياف وذاك الكرم رغم ما ردت اكل ابد بس ما قبل الا ينصبلي اكل وتمن ولحم مكوم خلو كبالي .. بس يا نفس تريد

لهناك والا  الحجي وعمامهم ٤ و سعد ونائل فاتو للمضيف .. اخذتني المرا ووكفتني يم الباب نستمع ..

سولف وياهم ويتعاتب وياهم ويكلهم هاي مرت البطل اللي هو والمثله نفتخر بيهم بدمهم ديرتنا تحررت لا شردو ولا خافو الموت هيج تسوون بعوايلهم من بعده

والحجي وعمامهم تخبلو وماكو هيج حجي وهي بتنا ومو احنه النذب حريمنا و هي الدكت ورادت خالها وخالها ما قبل بيها وطالبنا بورث وتكاونا وياه وهي معززه مكرمه ابيتنا

لا احد وصل يمها ولا احد كربها بس انه مثل ابوها واخاف عليها وهي ساعه ووكت خلت عباتها وطلعت من البيت ونحن ما عدنا حرمه تطلع وتعرفنا ما عدنا مشاكل

كالو الحرمه محروكه ايدها .. كالو تتجاوز وتغلط على ام سعد وامكاون نسوان واحنه والله ما جنه بالبيت ..

عاد الشيخ كال الهم انه اتركها ترجع وياكم اسبوع وبعدها اجي برجلي عدكم واشوف لو واحد تكرب الها ذاك الوكت اخذ حكها مربع من عيونكم ..

طلعت وياهم و الشيخ يوصي لو احد جا يمي لو اذاني والحجي يكلو هي بنتي ما يحتاج توصينا عليها

وبقى الشيخ يكلهم مرت بطل ويتيمه وخافو الله بيها و الفلوس تروح و تجي ..

اخذوني واحس واحدهم يريد يشرب من دمي ويغلطون ويسبون بعلي عرفو هاي سوالفه ..

وعمهم يكلهم هاي لازم تنحط جيله براسها على سوايتها تالي عكلنا اطيحه وحده مصلاويه ما نعرف اصلها منين ..

والحجي يكلهم تلوموني من اكلكم وكحه وعرمه وما تنكدر اكو مره اطر ديوان الشيخ شوداج شجابج بس ااااخ علي لو اكضبو ..

رجعوني للبيت .. انطاني مفتاح غرفتي وكال ولي جهرتج يلصفيرا ما اريد اشوفها ..

فتت رحت لخانة صراع كعدت وكمت اشيل بالهدوم واشمر وابجي واگلو شوف وين وصلتني ليييش وين خليتني شوف شسوو بيا ..

واسمع الحجي يكلهم شسوي بيها كلولي شلون اشرب من دمها انه تالي وكتي هاي تهيني جدام العشيره ..

ام سعد كالتلو انه اصعد اضربها وائدبها وكللهم مكاون نسوان .. اني قفلت الباب بالعجل وكعدت ..

هو يكلها تركيها وهي تكلو اعرف شلون ائذيها وما اخليها تحجي بس اصبر .. صعدت وتضرب ع الباب وتضرب وتريد تكسر بالباب وتصيح وما فتحتو ...

ونزلت تغلط وتحجي ويعد يكللهم انطونياها اكتلها واشمرها واكول شردت و الوضع مو زين و انذبحت .

وبعدهم يتناقشون بيا طريقه يتخلصون مني

سمعت صاحو هيام ونزلو مكاون وياها شلون علي مدليني ديوان الشيخ بهذلوها خطيه

بقيت بغرفتي ما اطلع بس من ينامووون اروح للحمام والحجيه ابيد حلا ادزلي لفات وتكللها جده هاي امانة ابوج ..

٦ايام وهم متحلفيلي بيا طريقه يبعدوني من هينا .. يمكن هم حتى لو طلعت من الغرفه ما يكتلوتي لأن الشيخ موصي عليه بس اني من الخوف ما اكابل احد ..

حبست روحي فد حبسه ... وكلت بس يجي الشيخ اكلو صارو زينين واخلص لان اذا ما حجيت هيج مو بعيده يكضبوني ويذبحوني ويتخلصون مني ويكولون شردت مثل ما كال سعد

٦ايام بالغرفه عايشتها بالموت وما اعرف مصيري الوين .  مرات احس حتى الله مل من دعائي لأن ما كام يستجيب

بوراها يوم .. نايمه واندكت الاب حيل .. جفلت وكمزت على حيلي خفت لا احد منهم يريد يكتلني ..

سمعت هيام تصيح ولج ليلياااااااان فتحي ليلياااااااان ابو حرب

ما وعيت شنو كالت ركضت فتحت الباب شفت دموعها بعينها و تضحك وحظنتني حيل

-شبي صراع

-ابو حرب عاااايش ليليااان عاااايش راح يجيبوووه.... يتبع

☆☆☆☆☆☆

☆☆☆☆☆☆