المراهقة والأربعيني الحلقة (55)
المراهقة والأربعيني
الجزء الثاني
الحلقة (55)
ابد
متحملت ان صراع يداوم ابيجي .. جانت بيجي مكبره ما ترد ميت والكل يعرف الفات بيها
ما طلع سالم
..
لما سمعت
الخبر انهاريت وتخربطت .. كعدت وهم يصحون بيا ويغسلون بوجهي .. دحكت الحجيه ..
حطيت راسي بحظنها وكمت ابجي ..
معرفو
اني عرفت هو ابيجي واني ما حجيت بس دموعي تشرح حالي بقيت ابجي بجي اليتيم المالو
احد ..
بقت
الحجيه تحجيه ويايه وتهديني وتكلي ادعيلو ولا تفاولينو ومو زين عليه
... اعرف بس
شيصبر گلبي ؟ اني شاردة بنفسي وتاركه اعز
الناس عندي بوسط النار !
نزلنا
عمان وطلعنا بالسياره المنطقه اسمها الشميسات
.. منطقه حيل حلوا وهادئه وتكثر بيها الشقق الفندقيه .. هينا صراع مشغل
فلوسو بالعقارات و والأيجارات ..
صراع
عندو حكمة بالتصرف .. اليشوفو ابد ميكول عندو هلكد فلوس .. عايش عيشه طبيعيه يصرف
على كد الحد ما يحب التبذير .. ولا يحب البخل
من بعد
سقوط النظام البعثي بالعراق .. هو باع
المزرعه و باع بيتو و وذهب مرتو وامو و سيارتو والعندو والماعندو واشترك
بأسهم بمول ابغداد ابداية السقوط
هذا جان
اربح وارد لصراع .. المول ابغداد حيل ناجح لأن بغداد مدينه ناسها تحب تطلع وتفر
وتتونس ما بس كاعدين بالبيت . يعني نسبيا
بيها انفتاح اغلب من بقية المناطق ..
فصراع
كام هاي الاموال يستثمرها .. كام يشتري ويبيع وشقق وايجارات وكل هذا وارد الو
ويكبر يوم يوم
..
وهو عندو
نوع الكرم الو كلمه يكول انه مجرب روحي شكد ما اكرم الله يكرمني بمضاعف ..
فتفاجأت
عندو شقق بعمان هيج حلو ومرتبه .. اخذنا شقتين لأن الشقق ما كلش كبار مال عرسان
عبالك غرفتين وصاله وملحقات وبلكونه شقه كامله مأثثه
.. شقه اني
والحجيه وهيام وجهالها وشقه فوكانا لام سعد و الحجي و حلا ..
اني
والحجيه اخذنا غرفه هي ع التخت واني ع الكاع فرشت .. و هيام غرفه هي وبناتها و
الصاله لعلي
..
هيام
استلمت المطبخ هي تطبخ الما و التنظيف اكو عاملات ينظفون من ضمن خدمة الشقق واني
اكف شتراد او شتحتاج هيام
بس هي ما
تسخرني مقدره حزني على صراع وهو من طلعو وهو يوصي بيهم عليه و يكلهم :- هلله هلله
بيها تراها يتيمه وما الها احد.بديرة الغربه صيرولها اهل من بعدي ..
ف ابد
متحب تأذيني كلو على راحتي .. وراحتي مسلوبه ببعدي عنو .. لا ليلي ليل ولا نهاري
نهار .. اسمها الدمعه بعيوني عليه واخاف من اللحظه اليجون يكولولي راح و الله
بعوضج ...
لو شكد
ما اهيئ نفسي واتحمل .. تحس نفسي صفر وكلشي ما اتحمل ..
رغم
المكان حيل حلو و هادئ واجواء غير الأجواء التعودت عليها من راحه وحياة غير حياتنا
العايشيه .
بس تحس
الكأبه ماخذه حيفها من المكان .. احس ايامي هينا بالابيض و الاسود ما بيها اي
الوان
على
الرغم ان لما جنت وياهم .. جنت حيل اكره هوستهم وعزايمهم والمشاكل .. من جيت لهين
ولهل هدوء شكلي حنتي لكلشي هناك ..
حتى وكفة
المطبخ و اللمه .. كمت استفقد هل شيء بالأردن .. مرات احس احن لأيام الرمادي اكثر
من الموصل
..
صح سنه
بس جانت تختصر احداث عمري اللي فات كلها لأن كبلهم جنت عايشه حياة ما يتعدى كتابي
ومدرستي فقط
..
و رغم
المر الشفتو منهم بالرمادي .. بس والله مستعده اتحمل ١٠ اضعاف بس خل ارجع يم صراع
واطمئن بشوفتو
..
جان
يطلعني ونغير مكان انام ابيت هيام او بالشقه او بأي مكان ما اهتم .. اتوسد ايدو
وافوت بنوم ثكيل ما احس أيحتاج افكر واشغل بالي وهو موجود ..
هينا
اختلفت الامور .. كلشي عندي ممل وكئيب ..
....نايمه
بليل بعد يومين من جيتنا لهين ما اقبل لا اطلع ولا اطلع .. حسيت جهازي يرج يمي ..
دحكت
صراع يدك ماسنجر .. رديت وكمت من الحجيه لأن نايمه .. طلعت بالصاله علي يلعب بلاي
رحت
للمطبخ .. رديت الوو
-الو هلو
عمري
-لتكلي
عمري حاقده عليك بگد الدنيا
-ادري بس
والله لمصلحتج
-انت
اناني .. فكرت اتأمني وتطمئن عليه بس ما فكرت شكد موتتني ببعدك عني ليش منو باقيلي
غيرك صراع حرام عليك والله حرام
-يولو
والله احسنلج هناك طلعي غيري جو .. لا تخافين لو صارتلي فرصه الدرب ما يكضبني لو
حتى اسبوع .. اطك الطياره واجيج واتعنى
-ابيجي
صراع انت شنو تريد تموت انت ممفكر بيا ممفكر بحلا اللي صارت جثه من يوم اللي مات
اخوها ولليوم .. فكر بينا وين نروح من دونك ..
-يول لا
تعليلي گلبي كافي بالقرأن مشتاگلچ فتحيلي كاميرا اشوفج طاك گلبي ..
... فتحت
كاميرا ... اخذ نفس وهو يدحك بيا .. اني ادحكلو وشكد مشتاقه اشوف ملامحو .. مايل
راسو ويدحك بيا وصافن .. احجي وياه ميرد ..
عاد صحت
مو تحجي وياك .. انتبه وكن شفت عيونا تلمع .. فرك وجهو ورجع يدحكلي ويدحك
-شيصير لو
العراق بخير وهسه انتي بحظني وما مفترقين ..
-نزلو
دموعي
-يولو
فراكج جاي يذبح بيه وانه اشوف سواد الجوا العين واثار الحزن ماخذه بملامحج .
-صراع ما
ضلت الي روح بعدك والله خليني ارجع الله عليك ..
-هز راسو
اي . ارجعج بالقرأن ارجعج .. بس احس اكو تطور بالوضع ارجعج لبغداد
-انت وين
هسه
-بالدوام
.... بقيت
سهرانه وياه للصبح .. نسولف ونشرح اشتياقنه البعض .. لحد ما شافني كل شويه اتثاؤب
.. ابتسم وكال انطيني بوستي ونوميلي هلعيون الحلوه ولا تبجيلياهم تره قوتي وصبري
استمدهن منهن
..
بوستو ..
وقفلنا الخط ... ونمنا
طلعت ..
علي يلعب
-تعالي
لعبي وياي
-لا
نعسانه اريد انام
-خالو
شلونه
--زين يسلم
عليكم ... تصبح على خير
- و انتي
من اهله
رحت
للغرفه انام .. الحجيه :- هاا شلونه ابو حرب
-زين يسلم
عليج
-الله
يسلمو .. ارتحتي من سمعتي صوته
-اي شويه
.. نمت نوعاً ما مرتاحه لأن حجيت وسهرت وياها .. حطيت راسي واني افكر بحجاياتو و
كلامو
.. بعدها
مرت 4 ايام .. وصراع ماكو رجعت نفسيتي تعبت والف فكره براسي تجيب وتودي .. شبي
وشصاير وياه
مليت من
الوضع هينا .. حياة كئيبه ما تنطاق .. كلمن بغرفتو ما ننجمع غير على الأكل ..
يوم يوم
يمر واني كأني منتظره يتغير شي لو اكول باجر يمكن يجي خبر ونرجع لو صراع راح يتصل
.. ويعدي اليوم مثل الگبلو بكل ملل
الا ما
فد يوم فاتت عليه هيام وگالت خل نطلع هينا نشم هوا ملينه يولي
-وين
يمعوده لا نروح نتيه وشيرجعنا
-يولي ابو
حرب جايبنا مرتين لهل مكان انه وامي وكم مره رايحه للسوك .. كومي ما انتيه
-شو اني
ما اعرف بكل هلأمور ليش .. كل هاي عندو واني ما ادري
-يولي هو
انتي صارلج شكد من صرتي مرتو كلهن شهرين وانسلينا بعد شوكت يحجيلج دكومي ..
.... گمت بدلت
ورحنا اني وهيام وبناتها .. اممشي بالشارع وادحك اول مرا اطلع برا العراق وشكد جان
بنفسي اسافر ومن سافرت شكد كرهت روحي لان مغصوبه ع السفر ..
كلشي
هينا يختلف عن اللي بالعراق ناس بسيطين وهادئين و الراحه مبينه بوجوهم .. ما مثل
وجوه العراقيين اللي التعب و الحزن ماخذه حيز من وجوهم
هينا شعب
مرتاح رغم هما ما عدهم لا نفط ولا عدهم زراعة وعيشتهم صعبة الشي عدهم غالي الفقير
هناك يمووت والضرائب كاسرة ضهرهم
مفروضة
على كلشي حتى التكسي الي تصعدو
بي عداد
يطلع نسبة الضريبة للدولة بس الخبز مدعوم من الدولة ورخيص
امشي
وادحك واصفن للهجتهم شلون يحجون لا هو عراقي ولاهو سوري كلو حجيهم يا زلمي ويا
زلمي
طلعنا
لسوك اسمو وسط البلد شنو يجي ع البال موجود ورخيص سوك شعبي .. مشينا وتسوكت اليه
تراكات و لصراع كومه شتريت سبح و وساعات و حتى ملابس ..
وهيام
اشترت البناتها.. نمشي ولا نحس بالوكت .. الا ما كالت هيام :- يولي نزل الليل امشي
غير مره نرجع وهم نشتري ..
رجعنا
للبيت مشتريه اشكال والوان .. من الكأبه
البداخلي حتى ما دحك شنو جبت شلت الغراض و طريتهم بالخانه ..
ونمت ما
كعدت الا لثاني يوم .. ب٧ الصبح هيام والحجيه كاعدات وام سعد من الضوجه تجي يم
الحجيه يسولفن هي تشكيلها على سعد ابنها وعمتي على صراع ويتكابلن .
والحجي
يطلع شافلو واحد بكدو هم حجي وطول النهار
وياه ..
.. صباح
الخير
هيام :-
هلا بليون يلا حدري خل نتريك ..
مشيت
وياها ردت اساعدها .. ما شفت عدها شي مخلصه كلشي .. و مدري ليش لعبت نفسي من
المطبخ .. لان ريحة تقلا البيض وهي تقلي
كضبت
بطني ومشيت يم الحجيه .. جان الجو بارد حيل برا .. وصوت مطر .. كعدت .. خلت
الصينيه هيام .. طكت ريحة البيض بخشمي متحملت ركضت للحمام بسرعه ..
تقيئت
شكو شي ابطني وهيام ادك ع الباب :- يولي شبيج فتحي الباب شجالج ..
غسلت
وطلعت انشف بوجهي .. ما اعرف نفسي لعبانه مدري ليش .. حجيت واني امشي حجت الحجيه
:- ان
شاءالله البالي يكون صحيح ويطلع ابن صراع ابطنج ..
.. عقدت
حاجبي واندرت الهيام ... معقوله .. يعني عادي احبل
-عجل شنو
المانع
-ما اعرف
ما صار جثير من سقطت ..
-ما عليه
.. مدام نظفتي يصير حمل .. شوية لخ انزل اجيبلج تحليل ونشوف
-فرحت
ماشي .. كضبت بطني واني مبتسمه احس انخلقلي امل جديد .. ٣ ايام شفتو بس ... وخلقلي
روح من روحو جواتي ..
بعدت
الحجيه عني البيض واكلت لبنه و شربت جاي .. كملت .. كتلها يلا ام علي روحي جيبيلي ..
ضحكت ..
ولبست وكال روحي لبسي جبتج ننزل سوا ..
ما گلت
لا .. بدلت ع السريع ونزلت .. رحنا جبنا تحليل وجينا .. بجيتي للحمام .. سويت
تحليل ..
طلع خط
واضح و خط ضعيف .. يعني شنو ؟
رحت
الهيام ..
:- يمكن
بعدو لأن بداية شهرج .. نحلل العصر سونار ونشوف .. الحجيه يمكن فرحت اكثر مني ..
وبقت ادك وتنطي هوسات وجنات ترگصلها ..
لساعه ١٢
الظهر .. وسمعت جهاز الحجيه يدك .. رغم ما بي اسم .. دحكت بالارقام .. عرفتو صراع
.. يمااااا طرت من الفرح .. حمل وصراع فرحتين بيوم واحد .. لا هيج گلبي ما يتحمل
هلكد فرح اموووت
رديت هو
گال الو ها يمه شلونج
-اني امك
واهلك وانت كل دنياي
-روحي
وعمري والنفس اليصعد وينزل انتي .. شلونج ابويه
-مشتاقتلك
صراع حيل حيل حيل .. وبجيت من الفرحه ومن شوكي الو ..
-يولو
الشوگ البيه الج بگد رحمة الله .. شلونج شخبارج مرتاحه
-ناقصني
انت صراع شوكت نجي اريد اشوفك
-ان
شاءالله اذا اراد الله نتشاوف ويخلص الشوك .. امي وين ..
-هينا تريدها
-اي والله
حيل مشتاگلها .. طلعت اركض .. حجيه هذا صراع صراع اخذي ..
هي حجت
وياه وسلمت وانطتو الهيام ودنكت الدموع تهل .. كعدت يمها .. والله احس بيج هلكد ما
مشتاقتلو ..
مسحت
دموعها :- يرد سالم انشالله يحمي ويحفظو من كل شر بجاه هو رب العالمين ..
ردتلي هيام
:- هاج ليلو يريدج ..
اخذت
الجهاز وفتت للغرفه .. :- ها عمري
-مرتاحه
كون احد مضايكج
-لا والله
محد مضايقني
-تدرين
شكد ارتاحيت هسه من سمعتج فرحانه و احس حالتج شويه احسن
-اي ...
ردت اكلو حامل .. خفت اعشمو بلاش .. فكتلو الحمدلله انت بس خليك بخير اني اصير بخير
... اخذت نفس .. شمسي انت واني ورده بدونك اذبل واموت والله ..
:- وردتي
انتي .. ديري بالج على نفسج ولا تقهريها انه ما بيه شي بس لا يضل بالج . اطلعي
انتي وهيام اتونسي لا تبقين مهمومه
-اوعدني
ترد لحظني بخير
-ان
شاءالله اذا اراد الله نرد ونعيش احلى حياة .. لأخليج ملكه والله بس صبريلي بهلوضع
... بقيت
احجي وياه شويه .. وقفلتو .. بس احس نفسيتي شوي اتحسنت ..
لثاني
يوم رحت للدكتوره سوتلي فحص .. كالتلي حامل
.. هلكد فرحت احس عيوني دمعت .. يربي رجعلي امل جديد لحياتي
.. رجعت
للحجيه طايره .. خبرتها وهي حيل فرحتلي كامت تهلهل وتصفك .. وحتى الحجي اجا وباس
راسي وكالي ديري بالج على نفسج لا اتعبيها خل يثبت وليدو ابطنج ..
وفرحت
حيل حيل فرحت .. بس اللي ذابحني انو صراع ماكو واخابرو .. اتصل وماكو .. منقطعه
اخبارو ..
اسبوعين
واني احاول اخبرو وما عندو لا نت ولا شبكه ويتحصل .. بقت فرحتي ناقصه ومنتظره تكمل
لما اخبرو و يفرح ويايه ..
...بس ما
اني ما عندي فرحه تكمل ابد .. بيوم حسيت عندي مغص عادي مثل لما تجيني الشهريه ..
كلتلها لهيام .. كالت ارتاحي .. للعصر شفت نزل عندي دم ..
تخبلت
رحت لهيام وللحجيه اركض .. اخذتني هيام ورحنا للدكتوره .. كالتلي الطفل سقط ..
ليش بس
ما نزل عندي دم هوايه ولا الم قوي عادي مال دوره ..
جاوبتني
:- لان الطفل لساتو بأولو وحتى ما يحتاج كورتاج مجرد علاج .. والاسقاط بسبب فايروس
داء القطط صاير عندي بالرحم .. يقتل الطفل ويسقطو لهذا ميثبت ابطني ..
.. احس
ادمرت صدك نفسيتي انذبحت .. وصراع حبلت وسقطت وهو ماكو ولا داري عني وما اعرف
اخبارو ..
رجعت
للبيت انهرت . ماكو شي كدامي ما كسرتو
غراض حطمتها ملابس شككتها واصرخ بكل صوتي لييييش ما مكتوبلي افرح لييييش ..
واصرخ
واكسر ودخلت بنهيار عصبي محد كدر يوكفني لو يهديني منو .. علي وهيام و الحجيه ..
واني فقدت كلش اخر شي كمت املخ رزحي واشمر بالعلاج والطم ..
لحد ما
تخربطت .. صحيت واني بيد الحجيه تصحي بيا .. كامو دموعي يجري بسكوت .. وصوت جامع
يأذن و المؤذن صوت يقشعر البدن الو من الخشوع البيه ..
كمت
اناشغ من البجي .. احس صدك صفيت بلا اي شيء لا اهل لا اخ لا اقارب ولا زوج وحتى
صحتي و طفلي خسرتهم ..
شعور
يذبح .. تعبت نفسيتي الى اخر درجه .. صرت ابد ما اضحك واحس ماكو شيء بالدنيا يستحق
الضحك ..
شكد صعبت
حالتي بوفاة امي .. بس اهون من هسه لأن صراع وكتها ما تركني وجان ويايه .. هسه
انتهيت .
جنت اخر فتره
كلها تكول ادعبلتي وسمنتي .. وصلت مرحله صرت جلد وعظم ونزل وزني بشكل عجيب كد ما
قطعت الاكل ايااااام ..
اتصل
صراع عليهم .. سأل وسلم وكم مره رادني كالوله تسبح .. رجع اتصل مره لخ كالتلو
الحجيه اخذتها هيام ومشت يتونسن .. بس ما قنع يكولها يمه مرتي اذا بيها شي كليلي
ليش تظمون علي .. وما كالتلو
واني
منعت احجي وياه ولا ردتو يحجي وياي ويشوف لأي حد اني وصلت بالضعف و الأنكسار .. ما
اريد اشغلو بيا وهو بنص الموت ..
هيام ما
تركتني بهاي الايام .. هلانسانه شكد ما اوصفه ما اوافيها حقها صارتلي ام واخت
وصديقه ..
كل وكتي
منعزله ومن تسمعني ابجي تجيب العده مالتها الشيلات مال الخيوط و الادوات مال النسج
(البيز ) السناره وتكعد يمي تحوك وتعلمني وتحاول تخليني اسوي وياها ..
وتسولف
سوالف تضحك .. وتحاول اطلعني من العزله اللي اني بيها ..
كمت
اشتغل وياها بالتطريز واتعلم .. من شافتني اتعلم .. كامت تاخذني لمرا جيرانا
اردنيه اسمها اسماعيل
فد وحده
معدله عمرها يطلع بالخمسين نظيفه و مرتبه مبينه من كسرة الاوتي اللي بحجابها
الأبيض ..
تشتغل
بالتطريز وتبيع بيها بدنانير . والاردنيين
يقدرون الشغل اليدوي بشكل ويحبوه والو قيمه عدهم و الناس تشتري ..
اقترحت على هيام تبيع التطريز العدها .. بس هيام رفضت
.. وكالتلها اني اشتغل للونسه لا اكثر ..
بقيت كم
يوم اروح وياها وبعدين قطعت ..
بهلفتره
نائل جاب نور واجه هو والتوم .. ونور بطنها عاليه والتوم تجننت عليهم هلكد
مشتاقتلهم
..
كتلها
انور بقيهم يمي وارتاحي انتي معليج بيهم ولا تشغلين بال .. وصعدو نور ونايل بشقة
الحجي وحلا نزلت يمنا وياي بغرفة الحجيه ..
قضيت كل
وقتي ع التوم الاعب واوكل واهتم واريد الهي احظاني ببرائتهم وخاصه امهم حيل تعبانه
من الحمل .. فما يهلي اخليها ينشلع كلبها بيهم .
اخذهم
الصبح من اكعد وارجعهم بيد علي بليل من ينعسون .. اما احمد فجان يعند ويصر يبقى
بحظني ما يطلع لأمو ..
رد خابر
صراع بعد اسبوعين .. وهم سلم عليهم و وحجه وياهم اخر شيء كاللها يمه اريد ليليان
لا تنطبني حجه ولا تكليلي ماكو .. تخلقيلياها وتجيبيها احجي وياها .. دشوف شبيها ..
اني ما
احس مستعده احجي وياها وهو بساحات المعركه والموت يحاوطو من كل مكان وازيدو
بأوجاعي ..
احس كلشي
بداخلي همد .. مو ذيج ليليان اللي تحجي وتهلهل وتسولف ٢٤ ساعه وحيويتها و فكاهتها
.. انتهيت وانتهى كلشي بيا .. اليحاجيني لو ارد بكلمه لو اهز براسي ..
بعد
اصرارو على ان الا يحجي وياي .. اخذت
الفون وفتت جوا
كتلو الو ..
-هلا عمري
شلونج
-زينه
-شبيج
-ما بيه
شي
-شنو
الصاير وياج احجيلي .. ولا اكلج .. فتحي كاميرا اريد اشوفج يول وحك الله مشتاكلج
.. ولج هيج كلبج حجر وما تردين تسمعين صوتي ليش .. فتحي كاميرا دشوف
-كال على
كاميرا تني ركضت للمرايا اعدل بشعري وهو يحجي .. صاح فتحي شبيج ..
فتحتها .. هو يعدل بالفون ودحك بوجهي مبتسم .. فجأه
الأبتسامه تلاشت من وجهو .. هاي شصاير بيج ليش هيج عظام وجهج كلها طالعه لييش ..
-ما بيه
شي بس مشتاقتلك كتلك وما طايقه ايامي من دونك
-ليليان
ما مرتاح .. كل فتره احلم بيج وتجيني بالطيف
واكعد واحس انتي مو بخير
- بقيت
صافنه بملامحو وهو صافن بيه ومدمع .. وايدو على حلكو ومنصدم بمنظري
-تحلمت
قبل مره وخابرتهم لان خفت بيج شي .. جن بالطيف اطلع مفتاح من جيبي واحطو بأيدج
واسدها واكلج ليليان ضمي .. تفتحين ايدج كن ضايع المفتاح وما تدرين بي ..
-اختنكت
من كال طيفو .. حاولت اصبر وابتسملو وكتلو لا ما بيه شي
-لا
تكوليها يول والله اعرفج .. انه اليوم الطيف الثاني يمرني بيج وانه ما اخطأ بطيفي
وكتلج نادر اتحلم انه ..
واليوم
بالطيف واشوف روحي واكف وياج واحط محبس بي الماسه بأصبعج .. انه احطو بأصبعج و الاماسه تكع .. مرتين
ثبتت الاماسه وارد البسج وبس البسج تكع وما تثبت .. وكعدت ابد ما مرتاح
احجيلي
صاير وياج شي
-انفجرت
بجي .. وقفلت الكاميرا ودنكت راسي وبجيت .
-لا تبجين
احجيلي شبيج يول ردي
- ما بيه
بس اريدك ادير بالك على نفسك وترجعلي سالم وما بيك شيء ..
-يعني ما
بيج شيء
-لا ...
احجي وكوه انطق الكلمه .. وامسح بدموعي ومختنكه ..
سلم وراح
ما حجه .. غطيت بفراشي ابجي بجي يذوب الصخر ..
نايمه و
ب٣ بليل ..انتبهت ع موبايل يدك .. دحكت .. صراع .. شصاير ..
كمت فزيت
وكتلو ها حبيبي .. حجيتها و النوم بعيني
-اسف
كعدتج من النوم بس والله ما غمضت عيني
-سلامتك
حبيبي شبيج
-ليش ما
كلتيلي اجهضتي
-منو گلك
؟
-ما مهم
.. توجعتي وانه ما موجود .. هم صحتي صراع وانه ما گلتلج ها
-اختنكت
.. انطيت كتم .. وبجيت حيل .. بقى يكول الو الو وينج ..
اخذت نفس
وفتحت الكتم .. ها حبيبي وياك ..
-احجيلي
عمري ولا تخنكين نفسج بهمج .. خليني اشاركج البگلبچ لا تبعديني عنچ
-اني زينه
هسه بخير صدكني
-تواسيني
ليليان ؟
-صراع
اريدك
-اخذ نفس
.. هانت
-وشوكت
تهون وتردلي مليييت ..
-يولو وحك
الله مشتاك لكل شبر بيج .. ما رايد من الدنيا غير احطج على گلبي و أرتاح ..
-وشوكت
هلوضع يخلص
-ليش هو
بيدي
-وما تبطل
كافي
-والله ما
يجوز حرام .. من الله وين اروح اذا انه وغيري تشاردنه وتركنا اهلنا وناسنا تتذبح ..
.... بقى يحجي
ويايه لحد ما اذن الفجر قفلنا الخط حنى يروح يصلي ..
كعدت
الصبح .. رحت للمطبخ .. هيام واكفه ..
-صباح
الخير
-صباح
النور .. ها شلونج المكرود شلون انقهر من سمع بيج اجهضتي
-انتي
كلتيلو
-اي ليش
خابرج
-خابرني
ب٣ كال ما كدرت انام .. وبقى يواسيني
-عمت عيني
عليه فوك قهرو يواسي .. لا تصعبيها ليليان تفائلي و كولي يا الله وا انشاءالله يرد
سالم
-اني ما متشائمه
بس ما ضلتلي رغبه بالحياة تعبت ام علي ما احس بعد بيه حيل ...
-لا ما
يصير حرام ولا تيأسوا من روح الله .. دنحجي اندكت الباب ..
راحت
هيام فتحتو .. طلعت المره ام اسماعيل .. جت زياره .. استقبلتها عمتي و ام سعد و
هيام ..
فاتت
وكالت :- ليكون فيقتكون
الحجيه
:- لا يخاله هلا ومرحبا بيج بكل وكت كاعدين من الصبح احنه بس هلولد يسهر وينام
بالصاله فوتي فوتي هلا بيج
... علي جان
هو وبطانيته ونايم على وجهه ع التخم ... كعدتو هيام وكالتلو روح بغرفة جدتك فوت ..
فات مني
.. كوه فاتح عيونو .. الله يخلي شكد ياخذ طول وعرض جتاف .. اني اصل وي كتفو بالطول .
وهم كلهم
طوال سواء نائل او صراع او سعد و اغلب ولد عمومتهم طوال بس الحجي كصير ..
... كعدت
المرا اني رحت سويت جاي وصبيت بأستكان و كلاص ماي .. وكعك سمسم مسويه هيام وضامتو..
قدمتلها
وسلمت .. وهي كالت :- اهلا و سهلا فيكي يا حلوه .
-ابتسمتلها
.. وحجيت بگلبي هاي من كل عقلها تشوفني حلوه .. واني چني النمس اللي اباب الحاره
من الضعف و القهر
كعدت
تسولف وتضحك ويانا .. اخر شي جان تكول انا جيي لعندكم وعندي طلب ان شاءالله خير
الحجيه:-
كولي خاله ان شاءالله بعينا ..
-انا جيي
لاخطب هي بنتكون لأبني براء .. عجبتني وابني كمان عجبتو لما جت لعندنا قبل بمره
... اندرت
متفاجئ عشوف على منو تقصد .. عبالي بنت هيام وراي كاعده .. شفت ماكو احد يعني جايه
عليه !!!!!
...تريد
تحجي هيام وهي تولتها .. بدللها وبحسبها متل بنتي والله واسألو عنا لتعرفونا اكتر
ونحن نعرفكون
..
هيام:-
خاله اذا تقدين ليون ف هاي مو بنتي هاي مرت اخويه الجبير
-بلا شو
طلعتي متزوجي يعني .. خلت ايدها على حنكها متفاجئه .. وانا كاعده اخطط واتأمل تالي
طلعتي متزوجي .. وضحكت
-ضحكت
هيام اي والله خاله مرت اخوي
-ما عندا
اخت تانيه
هيام :-
لا والله للأسف الوحيده لأهلها واخذناها احنه
-مين من
اخواتك متزوجا ليكون هذا الضعيف
-لا ذاك
التقصدي نائل متزوج وفوك كاعد وي الحجي بس هاي زوجة اخوي صراع
-ابو حرب
ما غيرو .. بس كيف هيك .. هي بتطلع بعمر بنتو
الحجيه:-
هاي القسمه بعد لا اعتراض على امر الله
-حاشا لله
.. بقت ادحك بيا ومتفاجئ وكل شوي تكول صدمتوني ..
... اني ما
حجيت بس ابتسمت .. شوي وراحت وفتنا نلملم الصاله وهيام تضحك و تكول
:- وينك ابو
حرب تجي وتشوف مرتك جايينها خطابه ...يمااا جان اجانه طاير بطايره يشيلها للمرا ..
ويزكح بيها :- ابنج ينعجب بمرررررتي يا كاع انشگي وطميني ..
-عجل خل
اروح اكلو ابن الجيران معجب بيا وجاي يخطبني .. تجي لو اتزوج ... بلكي يجي
-الا يجي
ويزفج انتي والمعجب بيج وتذكره على احسابو لجهنم .
مرت
الأيام .. ويوم يمر اتعس من يوم .. صراع ما اتصل من ذاك اليوم وطولت اخباره ..
مر شهر
وهو ولا بين .. كلما اخابر ما احصل .. و الحجي يكول خابرني بس مشغول حيل من يفضى
يخابر ويححي وياجن ..
حالتي
يوم عن يوم تسوء بغيابو .. اعتزلت العالم وبس ابجي حتى تغيرت ملامحي وعجزت من
القهر ..
علي ما
تركني .. جان على طول ويايه يكعدني وياه نشوف فيلم او نلعب بلاي اني وياه وحلا ..
حلا مو
احسن من حالتي .. من بعد موت اخوها حيل انكسرت وعاشت بصدمه .. قله ما تحجي او
تختلط دوووووووم على الموبايل بس ...
خاصه
خطيبها ما طلع من الرمادي .. و اجانا خبر اخوه قتلوه داعش ... حيل انقهرت وانسبت
عليه ..
واسمنا
اني وياها جارين سيار وكاعدين بالغرفه و راسنا بالموبايل وفراشاتنا يم بعض لو تطلع
بيناتنا سالفه لو اصلا ما نحجي .. سكون تام ..
... دفر
الباب علي .. هاااا .. هل يجوز لنا الدخول الى غرفة الارامل
والمطلقات والعانسات و المدفورات .
درتلو ..
ما تفوت منو لازمك
-جا كعد ع
التخت ويدحكلنا
-بالله
هاي وجوه .. قانعات بشكولجن .. ما ينطلع بيجن .. هم زين مشى سوكجن وتزوجتن الا جان
برتن .
حلا :- و
المطلوب هسه
-لا صدك
خل ندخل جد .. ونحجي عدل .. انه رايح للسينما
بنفسجن اطلعن تغيرن جو بما ان اني هينا الوحيد البتلي بيجن والرسول يكول
رفقا بالقزارير فحبيت اصير لطيف شرايجن بيا
-بيك لو
بالروحه
-بالأثنين
-اذا بيك
.. ف الجواب ما يسرك و اذا بالروحه ما ادري ..
-اذا
تريدن والله اطلعجن اشممجن هوا بدل ما كاعدات جنجن غراب البين بس تنوحن
....اندرت
لحلا .. ترحين ؟
-ما اعرف
.. يحتاجلنا نغير جو مو ؟
علي:-
كدامجن نص ساعه ترحن كومن ما ترحن انه مبدل وطالع ..
كمنا
اخذنا رأي هيام .. جان تكول كلنا نروح وخلي الحجيه تصعد فوك يم الحجي ونقفل ..
صارلنا
واهس وكمنا بدلنا ولبسنا .. وطلعنا واخذنا
ع السينا الموجوده بمكه مول بعمان ..
احنه
كلنا ردنا فيلم انجلينا جولي رومانس .. شو هذا دحك علينا بأستهزاء
-وحدتجن
عزبه و زلمتها ماكو وادورن رومانس ..
هيام:-
ههههههههه والله حقك
-امشن
وراي ومعليجن الظاهر عدجن جفاف واني اعرف شلون ابللجن ..
اخذنا
وقطعلنا تذاكر وانطونا وياها نظارات 3D على فلم
رعب كلو جن وارواح وخلا دموعنا وصياحنا بفلس ومو بس احنا وكل الموجودين
وكل ساع
واطر النظارات واحس الجن فات بيا .. وادحك علي يدحكلنا وميت ضحك ..
كتلو
بسيطه اني الك بالطلعه على هلفلم الصدك بللنا من الخوف .. وهو غاص ضحك لان هيام
تبجي وتصيح
دخيلك
محمد يماااااااا اجان الجني وما تدري بالناس من وره النظارت وتصرررخ ..
.... لهناك
وحده تركت الفلم وطلعت .. اجا واحد كعد يمي .. جان يكوم علي ويكلو بلا زحمه بس هذة
اختي حاب اكعد يمها ..
ما حجه
.. كام .. اني كملت الفلم وخلصتو جفلات
وصريخ ..
طلعنا وعلي شبعان ضحك علينا ويصنف وحلا تضحك وهيام تقلد وسكرانه ضحك ..
انتبهت
.. الولد اللي كومو علي .. يدحك بيا ويأشر على اذنو ويغمز .. درت وجهي عنو ومرديت ..
شكلو
مرتب ولابس نظاره طبيه وشعرو قصه حديثه و لحيتو مرتبه .. كلما علي تحرك هو يدور
ويخاف علي ينتبه .
واحنا
نمشي بالمول .. علي دخل محل واحنا دخلنا محل ثاني .. فات يدحك بالمحل وذب كلام ..
ما انطيت اي ردة فعل ولا اجعلني سمعت..
انوبه
تقرب وحط بأيدي رقم واني هينا نفرت .. وشلت جنطتي وهي بيها قوطيتين بيبسي ودك على
راسو
واصرخ
ابن الكلب تتتحرش بياااااا يا ما عندك شرررف ولك اني مرت ابو حرب تعرفو لو
لااااااااااااااا ..
ولا
توقعت نفسي فد يوم اتجرئ وهيج اسوي بس كن الله ذب بيه حيل زلمه و اكفخ بيه واكلو
ول ما عاش اليتحرش بيا واني مرت صراع ..
فلشتو
للولد خطيه ولا اجعلني اسمع شنو يحجي ويعتذر ويريد يبتعد .. الا ما ركضت هيام
وتجرني منو
..
فقدت كمت
ابجي.. وما احس الا علي من وراي اجا طاير وبوكسو ونام فوكا ع الكاع وتولا بوكسيات
ابتلى
المفجوع وتحرش فلشناه خطيه وهو بس يريد يفلت ..
الا ما
اجا السكيورتي مال المول وفض السالفه وشالو علي .. عرفونا عراقيين وخطيه بقو يعتذرون وحئكون علينا ولا تحملو هم
ويكضبون
بعلي كن ديج ويريد يكافش محد يكدر يكضبو وهو يصرخ .. وذولو يصيحو يا زلمي ما صار
شي سوء فهم
ويجرون
بي ويا زلمي و يازلمي .. الا ما اخذونا ع المكتب مال الأمن وطلع بطاقته الولد طلع
طالب كلية طب
..
اعتذرو
من عدنا وهو اعتذر وطلعنا .. اني جنت بيها مشتعله نار وطلعت احجي وعصبيه واصيح
الكلب يتحرش بياا
اندار
علي وهو عصبي وضحك ..
-ها وتضحك
فوك قهري انت
... نحن قبل
يومين اني وياه جنه ندحك فيلم خالتي فرنسا وطلعت لقطه منى زكي تتبلى ع العالم
وتكتلهم وتصيح بيتحرش فيااااااااا
اندارلي
علي ويكلي ها منى زكي .. وبيتحرش بياااا .. عاد اني طكيتها ضحكه وضربتو وطلعت ..
وهو كل
الطريق يضحك ومضحك عليا العالم ويقلد عليه هو وامو شلون توليت الولد كفخات ..
وعلي يفتح اديه ويصيح بيتحرش
بيااااااااا.....يتبع
☆☆☆☆☆☆
تعليقات
إرسال تعليق
اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم