ليتني استطيع فعلها الحلقة (28)

بواسطة -


ليتني استطيع فعلها


 
الحلقة  (28)
كان على ثقة عندما قال (سأجعل من أيامكِ البيض سود) وها هو الأن ينفذ وعده 🖤
.........
لما انطيت كلمتي بالموافقة، فرحت حيل وبنفس الوكت كامت تبجي، وصتني على واحد واحد من جهالها حتى على امجد
طلبت من بتها فطوم تصيح على بابا، نزلت فطوم صاحت لأمجد، دقايق و صعد :- ها مها
مها :- اكعد اريد احجي وياك بسالفة
-شنو
-امجد اني ايامي معدودة
امجد :- مها لا تحجين هيج
-فدوتك اسمعني للأخير
-كملي
-ما اريد شي اليه، كل تفكيري جهالي، من حقك بعد ما اموت تتزوج بس ما اعرفها الراح تتزوجها منو زينة لا تراعي ولدي تخاف الله بيهم ما اعرف
-شنو هالحجي
-اسمعني امجد فدوة، اني اختاريتلك و اذا تحبني وتعزني صدك لا تردني و خليني اامن جهالي گبل لا اموت
-شختاريتي ؟
-اني اختاريتلك ديار
باوعلي بتعجب، اني مدنكة راسي ومدا اصدك كل اللي ديصير و اني اردد (معقولة سويتها !!)
امجد:- انت شجاي تحجين مها ديار مثل اختي اذا ما جانت مثل بتي، ربت عدنا و بحضنا هسه تريديني اتزوجها
-لخاطري و لخاطر جهالي امجد
-انت اكيد تخبلتي
ديار:- اني اترخص مها لازم اروح للبيت
امجد :- لا اوكفي ديار يعني انت موافقة باللي جاي تكوله اني ما رايد اظلمج وياي ، مها اني عمري ٣٧ سنة و عندي جهال وهي العشرين ما داخله و طالبة ليش هيج تظلمينها ؟
مها :- ادري بيك راح تصونها و ما راح تظلمها، بس الله عليك فكر بجهالي
امجد:- مها انت ليش هيج قانطة من رحمة الله
-امجد السرطان انتشر بجسمي و اني ما اشوف نفسي راح اتعافى
امجد :- كافي مها سدي هذا الموضوع
ديار :- فتحت الباب و نزلت ، نزل وراي امجد
-ديار ديار ، اوكفي شوية، انت صح كلتيلها موافقة
- دموعي تجري ما كدرت انطق ولا كلمة اريد استوعب اللي اني جاي اسويه شنو
-جاي اسألج جاوبي
ام امجد:- هاي شكو ابني
امجد :- يمة الظاهر مها خرفت
-شبيها مها شسوت ؟
-خاطبتلي ديار و تريدني اتزوجها و مأمنتها على جهالي بالله هاي صاحية ؟
ام امجد بقت صافية و تباوع بوجهي :- بس انت ؟
-من رخصتج خالة اروح للبيتو
عفتهم و طلعت، اكيد تعرف اني احب خالد، هي و ام رافد دوم يكعدن ويحجن.
ام امجد :- اصبر ابني خل افتهم من مها شبيها و بعدين نتصرف
صعدت لمها:- مها يمه انت شجاي تسوين ؟
-خالة اريد امن جهالي
-بس خالة
-خالة فدوة فكري بجهالي وبس
-الاعرفه ديار تحب خالد
مها :- خالد !! هي ديار من جانت زغيرة و هي تحب خالد بس جانت طفلة اتزوجت و كبرت و عافته
-ولج ذاك اليوم ام رافد تشكيلي منها تكلي تفتر على ابني هي و امها و يريدن ولدي يتزوجوهن
-لا خالة على بختج لو ما ديار ربت عدنا، و لو صدك هالحجي ما وافقت ديار على طلبي منها
-يعني هي وافقت ؟
-اي والله كالتلي لا تشيلين هم جهالج بامانتي
ام امجد :- والله يا يمة ما ادري
فات امجد :- يمه حسن لعب بالطحين انزليله
ام امجد.:- اي
امجد :- مها الجاي تسوي غلط و انانية
-يعني انت ما راضي بديار
-وشلون ارضى بيها لا تخبليني تشوفينها هي مناسبة ؟
-منو مخلي ابالك تتزوج
-ولا مخلي ابالي انت شبيج اتخبلتي بعدج بخير و اني عندي ثقة بالله تكومين على حيلج و ترجعيلنا كافي من هالموضوع و سدي
-امجد
-بلا امجد بلا شي من صدكج مها كافي، حتى عيب خليتي البنية تبجي ما تعرف شتكول
......
بتول :- جنا كاعدين و فاتت علينا ام امجد و الجهال، خلتهم يمي و كالت :- ديري بالج عليهم خالة عندي حجاية ويا امج
ام رافد :- ها صبيحة شلونج
ام امجد :- هلا خالدية عندي موضوع وياج رايده احجي
اي كعدي
كعدت ام امجد و امي و حجت :- مها حاسه بروحها راح تموت و جاي توصي
ام رافد :- خطية عمت عيني عليها حالها يكسر الكافر
-اليوم حاجية ويا ديار
-على ايش ؟
- رايدتها تتزوج امجد و تأمن جهالها عدها وديار موافقة و الصراحة الاعرفه منج هي تحب خالد و خالد يحبها و رايد يتزوجها
-لا يمه خالد منين يحبها لا بس هي رايده تتزوجه
-لعد شلون توافق على امجد
ام رافد :- اي تلكين امها لاعبة براسها هي هم صغيرة و امها فارة رافد وايدته الها و حاطه ابال ديار تتزوج خالد ، اخذيها ديار خوش بنية
-ام رافد انت بنفسج جنتي تحجيلي على خالد يحبها و يركض وراها
-مو بس خالد ولدي كلهم يركضون ورا ميعاد وبتها بس تعرفينهم لان نسوان يساعدوهن و يوكفون وياهن الا خالد لو رايدها جان من زمان اتزوجها ليش باقي لهسه بلا زواج و بناته ضايعات بس هو حجالي يريد يرجع ضحى ويسكت لو رايد ديار ما يفكر يرجع ضحى
-صدك يرجع ضحى
-والله خية تريدين الصدك ام السحورة هاي كاش منها بس احنه نحجي براسه لخاطر هالبنيات و قنع يرجعها و بعدين غير رايه و اخير شي كال عوفو الموضوع هسه بس هو حاط اباله يرجعها
-زين و كلامج على ديار والله يا خية سامعتها منج تكولين هالمشوهة حاطة عينها على ابني و لاعبه براسه
-هذا الحجي من جان لازمها خط، بعدين حتى الخط عافه من رافد راد يتزوج ميعاد ابو رافد كال الهم لبتعدوا عنهن و رفضهن
-والله يا خية ما ادري بس اني هيج سامعة منج
-تزوجيها يا خية هي هم صغيرة وما تعرف منو التريده ، استفادي منها انت بلا ما ظاله حال الضيم حالج بين مها و البيت و هذا حميد معنفص راسه ما راضي يتزوج، وهي رابيه عدكم و تعرفونها
ام امجد :- لا ديار اعرفها مربيتها عدي بس اني لان ادري منج خالد حاط عينه عليها و رايد يتزوجها هالاجيت اكلج
-لا يا منين كلت الج لو رايدها جان اخذها ما ظال بلا زواج لهسه، دخذيها يا خية اخذيها انت هم تعبانه و تريدين اليعينج
-اي والله يا خية تعبت بين المستشفيات وبين الجهال و البيت ما ادري عليمن افتر، الله ينطيها ديار الله شاهد هم ما عايفتني البنية من يصير عدها مجال تجي تلم بيتي و اداري مها
-اي لعد اخذيها و استري عليها ما دامج تعرفينها و رابيه عندج و الشين التعرفه احسن من الزين الماتعرفه
-هو حتى امجد ما راضي
-ليش ؟
-هو يحب ديار من زمان لان رابيه عنده بس مثل بته مو هسه يجي يتزوجها و مرته بالوجود، ما رايد يظلمها
-بعدها ما حاسب الموضوع اكعدي وياه و قنعي ما دامها طلعت من مها خايبة استفادي بدال ما ضاله مشلوع كلبج
بتول : اني اسمعلهن وحاطة ايدي على حلكي الادري بيه ديار تموت على خالد و خالد عاشكها مو بس حابها و قافل على رجعت ضحى لخاطرها شصاير ؟
فات رافد للبيت ، عفت امي و ام امجد و رحت سحبته انفردت بيها
رافد:- هاي شكو شكو شصاير
-اكلك خالد مو رايد ديار ؟
-اي !
-و ديار مو رايدته
-اي ليش شكو شصاير ؟
-ام امجد جوة جاي تحجي ويا امي، مها طالبة ديار لامجد و ديار موافقة
-لا ماكو هيج حجي لحد البارحة خالد يطلب مني فلوس يكلي اريد اچمل على العدي و اتزوج و افضها
بتول :- لعد.شلون ام امجد دكول هيج ؟
-ما ادري خل اخابر خالد بالله اشوف شنو الموضوع
رفع الموبايل و خابر:- الووو
خالد :- الو هلا رافد
-هلا اخوي، اكلك انت صاير شي بينك و بين ديار ؟
-لا ليش تسال
-مو هاي بتول يم و ام امجد عدنا سامعتها تكول رايدة ديار لامجد و على اساس ديار موافقة
-لا ماكو هيج حجي يمعود متوهم
-والله هذا السمعته بعد ما ادري
-لا لا ماكو هيج شي
-زين لعد اخذ راحتك
-هلا بيك
.............
ديار :- رجعت للبيت بس مو اني لا اكيد هاي مو اني، يعني راح اترك خالد ! اني صدك سويتها!
شلون راح اعيش !؟
شلون اخلص ايامي وهو مو وياي !؟
شراح يسوي لو دره ؟
لازم اتراجع عن اللي گلته، لا مستحيل اكدر اعوف خالد هو مالتي و الي و اني ما اكدر اعيش بدونه
اذا اقبل بخالد لازم اقبل بضحى تصير ضرتي
وهذا الشي المستحيل اقبل بيه ما اتحمل غيري بحياته
يا اخذه كله الي
يا اتركه كله لعائلته
غير هالخيارين ما عندي
كعدت بالكاع بغرفتي، ابجي بدون تعابير بس الدموع تنزل بهدوء و اني صافنه بدنياي
فكرة انو اعوف خالد مستحيلة
هو امنيتي
حب حياتي
هو الانسان اللي حبني صدك بدون ميباوع لعيوبي
شلون راح اعوفه ؟
يعني بعد ما اخابره ؟
ما اتواصل وياه ؟
ما اسمعه و هو يغازلني ؟
ما انتظر الليل حتى احجي وياه ؟
ما اباوع للموبايل كل شوية حتى انتظر مسج منه؟
مستحيل ما اگدر
زين اني وافقت لان اريد اترك خالد لو لان متعاطفة ويا مها و ما اريد اخيب ضنها ، اريد افتهم نفسي بالضبط منو اللي تهمني
لميت رجلية و دنكة ابجي و اني شابكة نفسي، سمعت صوت كعب يدك بالكاع، شلت راسي فاتت امي للغرفة، فتحت الضوه :- خير ولج شبيج جاي تبجين بالظلمة
كمت من مكاني :- جاي اتعذب
-عقدت حاجبها و فاتت :- شبيج ليش ؟
-اني عفت خالد !
صفنت بوجهي :- شكو شصاير
-اجت ضحى اليوم تتوسل حتى اقنع خالد يرجعها
-اي ؟
-وواني ما اكدر ابقى ويا خالد و ضحى على ذمته ، ماما اني قررت اعوفه
بجيت و حطيت ايدي وجهي
كامت :- اشش اهدي تعاي اكعدي، زين تسوين و هءا احسن شي تسوينه
-رفعت وجهي الها :- اني اموت بدون خالد
-محد يموت بدون احد كلها مسألة وقت و خالد حتى لو تحبيه يا يمه ما ينفعج
-مو انت الجنتي تكليلي لو تشعليله العشرة شمع ما تجازي و ما تلكين مثله
-ولهسه اكولها و ارجع اكولها ما يتجازة بس هو من الاساس ما جان الج هو ملك بناته و ذن البنيات الهن ام، جانت ضحى متزوجة و انت تحبينه و اكلج اخذيه هسه امهن تكسر الخاطر يا يمه واجت للبيت اتوسلتنا و الانسان بلايه رحمة شيطان مو انسان
كوي گلبچ و ابتعدي منه و خليه يرجع لبناته، لو ترضين تصيرين ضرة
-ما اكدر اصير ضرة، عندي اتنازل عنه و اعوفه اسهل عليه من انو اشاركه و اعيش بنار مشاركته يومية، لهذا انطيت موافقة لمها
-موافقة !! موافقتيش ولج ؟
-مها وصتني على جهالها و امنتني عليهم و خطبتني لامجد
-عزا العزاني كوووووووون و ووافقتي ولج
-ما عندي خيار ثاني
-ولج يا خيار يمعزاية الا تتزوجين عوفيه و عيشي
-ما راح يقبل اعوفه و حتى لو عفته اني ما راح اكدر، معناها ارجعله لا محالة لاني احبه ما كارهته او هو كارهني حتى اعوفه
ومها تكسر خاطري فرصة ابتعد عنه حتى ينجبر يرجع يعوفني و يرجع ضحى
-وحق الله ما شفت وحدة بغبائج مضحية بحياتج و مستقبلج والله مها محتاجتني لو هو يرجع لعائلته ليش هلكد مستضعفة روحج تنذرين حياتج لخدمة امجد و جهاله ليييييش........
جاي تحجي، دك الموبايل
باوعت الرقم ، امجد
رديت عليه ، حجه :- هلو ديار
-هلا امجد
-تكدرين تجين يم مها ؟
-شبيها
-والله يا يابه ما ادري اخذتها للحمام انسحنت روحها كدامي كمت اصفك بوجها مي لحد ما كعدتها و هاي هي كبالي و امي مو هنا ما ادري وين طالعة هي و مرت عمي الجهال يم بتول بس اني و ابوي بالبيت ولازم اروح اطلع اجيبلها الدوا اذا تكدرين تعاي ابقي يمها
-اي هسه جايه
قفلت منه، كمت اخذت حجابي و لفيته، حجت امي :- وين رايحة ؟
-مها متخربطة لاوم اروح
-تروحين وين اكعدي نحجي بالمصيبة الحجيتي بيها، لا تفكرين ديار ،لا تنطين بروحج اتخلي ولا تنطين افتهمتي
ما رديت عليها اخذت موبايلي و طلعت من البيت رجعت لبيت امجد، صعدت فوك دكيت الباب صاح :- تعال
فتت :- ها ؟.
-ردت اغسل الها لان وكع العصير عليها شو هاي بس شلتها تخربطت
باوعتلها تون و ملابسها مدمرة :- خل اغيرلها ملابسها و انت روح جيب الدوا
اجت ام امجد :- ها شبيها
امجد :- يا شبيها يا يمة لخاطر ربج وين رحتي
-يمه واجبنه ام عمر مو ابنها تزوج و رحنالها اني و ام رافد، هسه شبيها مها ؟
ديار:- خالة تعاي كابليني حتى نبدللها بساع
-اي
هي سحبت مها و اني نزعتها ثوبها كامت تبجي و تصيح :- ادية راح اموت من الوجع ولج يا يمممممة
دك الموبايل بجيبي و اني انزع بيها، اتخرذلت كمت اجيبها منا و اوديها منا و هي تون و ام امجد كوة جارتها ، تخربطت و انسحنت روحها بأدينا
كامت ام امجد تصرخ و تصيح و اني اني اصحي بمها افرك بايدها اضرب على خدها ماكو، و الموبايل يدك
جريت الموبايل، خالد
فتحت خط و صحت : صيح امجد بسرعة كله مها تخربطت
-هاي شكو
-دا اكولك مهاااااا تخربطت صيح امممممجد
شمرت الموبايل و بلهفة اكعد بيها :- ول مها اصحي مهاااااا
كمت ابجي ركضت للمي جبته و اجيت شمرت عليها
صعد ابو امجد فات علينا للغرفة شالها و نزل، تلكاه رافد و خالد وياه اخذها خالد من ايده و ركض بيها و اني و ام امجد نركض وراه
حطها بسيارة ابو امجد ورا، وصعد عمو بسرعة كدام الستيرن صعدت اني و ام امجد وياها صعد رافد ليكدام و خالد كال الهم :- اسبقوني جاي وراكم بسيارتي
صاح بيه ابو امجد :- لا بس قفل البيت و خبر امجد يلحكنا ع السريع
بهالكلام اني حاطة راس مها بحظني و ام امجد يم رجليها و رافد داير علينا و يكلي :- صفكي بيها كعديها لازم تكعد
وينكث بأيدها و اني اضرب على وجها :- ولج حطي راسج على صدرها شوفيها تتنفس شو هاي ما بيها روح
ابو امجد ارتبك بالسياقة كام يخض بينا اريد احط راسي و اسمه ما جاي افتهم شي حتى لو احط راسي وين اسمع دكات كلبها
حطيت ايدي كبال خشمها ما ادري تتنفس لا ، مد ايده رافد و حط ايده :- بيها الحمدلله كعديها ؤ عمي استعجل رحمة الوالديك
-ولك يا بوية نظري ضعيف ما اكدر اسرع اخاف اضربلي واحد
-انزل اني اسوق بمكانك
نزل و رافد صعد و داسلها طار بينا طيران لحد ما وصلناها للمستشفى نقلوها بسرعة بسرير ركضوا بيها حطولها اوكسجين و ظلوا يضربون على صدرها ويضغطون ، صحت
نقلوها للردهة و كالو عدها نقص بالدم لازم يتحوللها بطلين دم المريضة صايرة صفرة
راح رافد يدبر دم و اني و ام امجد بقينا فوك راسها، بس ام امجد تعبت حيل داخت كعدت :- ها خالة شبيج ؟.
-ما ادري يمكن صعد عندي الضغط راسي دخت
فات ابو امجد شافها هيج صاح ممرضة جانت واكفة برا اجت فحصتها كالت الها :- ضغطج صاعد ١٧ لازم ترتاحين ، عندج دوا
ام امجد :- اي والله خالة عندي بس البيت و انقهرت على هالبنية المسكينة ما شافت شي من حياتها
ابو امجد :- كومي للبيت لا تبقين هنا خل رافد يوصلج و ارجعي و اني ابقى ليما يجي امجد خابرني هو واصل بالطريق
ام امجد :- ان شاءالله
كامت على حيلها فات امجد :- ها يابه
ابو امجد :- وينك يا يابه البنية رادت تموت
-رحت اجيبلها علاج
-ظل وياها اني اخذ امك و ارجع للبيت
-روح
حجا و طلع الموبايل خابر رافد على الدم كاله :- تبرعت ابطل و اشتريت بطل و منتظر لما يسلمونياه اجيبه الكم
-استعجل بعد اخوك
قفل الخط، امه و ابوه راحو، تقرب المها حط ايده على راسها :- ها مها
هي مسنحة تون ما تدري عن الدنيا :- تخربطت مرة ثانية ؟
-جيت البسها كامت تون من يدها و تخربطت كوه حطينا الثوب بيها و خطية ابوك و خالد شالوها و جبناها
-هز راسه و هو يباوعلها، تنهد :- ديار اني ما رايد اظلمج انت مقتنعة باللي كلتي لمها ؟
-ما جاوبت سكت و بلعت ريكي
-جاوبي
-مها وصتني بجهالها هواي
فات خالد :- ها بشروا شلونها مها
امجد :- هلا خالد، الحمدلله هسه احسن منتظرين الدم يجيبه رافد
-والله خطية
بقوا واكفين اثنينهم يحجون، باوعت بيهم :- اني شجاي اسوي بروحي !
سحبت نفس وتنهدت كعدت، اباوع بخالد طوله هيئته ملامحه حركاته و هو يحجي، كله اعشقه و اعشق كل تفاصيله شلون راح اعوفه
دمعوا عيوني و اني اباوعه :ربي صبرني دخيلك الهي
التفت هو باوعني مدمعة سوالي حركة سريعة بعيونه و خشمة و ابتسم
اجت الممرضة فحصت مها و اني كاعدة خالد اجا وكف يمي و امجد يحجي ويا الممرضه، همس :- شبيج يروحي ؟
دنكت و درت وجهي عنه نزلو دموعي،هو تنهد و بقى واكف يباوع لامجد و صاف اديه وره ظهره
طلع امجد حتى يسوي الطبلة لان الممرضة كالتله لازم ننقلها فوك ، راح يكمل الاجرائات، التفت الي خالد :- شبيج حبيبي ليش هيج عيونج مدمعة و تبجين
كمت من مكاني و طلعت برا الردهة لان اذا ابقى راح انفجر بجي و الردهة بيها ناس هواية، اجا وراي :- ديار شبيج حبيبي صاير شي ؟
-تعرف اخر كلمة كالتها الي امك شنو ؟
-شنو ؟
-حطي وجهج كبال المرايا و شوفي يناسب ابني
-اوووو ديار هذا الموضوع تعدينا من زمان، بربج يعني علمود هذا الشي جاية تبجين ، كافي بعيني انت احلى انسانة بالدنيا ليهمج حجي احد
-اجت ضحى اليوم الصبح
-اهووو و هاي الثانية شتريد ؟
-سمعتني تسجيل لبناتك و هن يبجن على امهن
-و شنو الجديد بالموضوع هسه صارت تحن الهن و يكسر گلبها صوت بجي بناتي من اتزوجت و نامت بحضن رجال ما فكرت طفلة عمرها اشهر شلون راح تنام بدونها ؟
-هي ام
-هاي مو ام ولا اعترف بيها و انسي هالموضوع و مرة لخ من تجيج كليلي حتى صدك اوكفها عد حدها، وبعدين تعاي صدك شنو هذا الموضوع الخابرني عليه رافد
باوعتله :- خالد اني ماكدر ...... قاطعني
-على اساس امجد خاطبج و انت موافقة و من هالكلاوات
جمدت بدمي و بقيت اباوع بعيونه ما اعرف شجاوبه
-اني كلت اله ماكو هيج شي
-مها خطبتني لامجد
توقف و باوع بعيوني وكانه ينتظر اكمل :- و اني وافقت
بقى صافن بوجهي
-خالد
-شلون وافقتي يعني مفتهمت
-وافقت على امجد
صفن و علامات الاستغراب كلها وضحت بوجهه و هو متفاجئ، ما نطق ولا كلمة
-خالد اني ما اريد اصير سبب ..........
قاطعني و هو يگول :-اشششش
اندار يريد يروح ، سحبت ايده :- خالد اسمعني
ابتعد مني بسرعة، رفع ايده بمعنى (لا تتقربين ) وعيونه تخزرني بدون ما ينطق اي كلمة
فجأة الرجل الجان يحجي وياية بكل حنية ولطف يبعدني و يرفض يسمع مني و كأني اغرب الناس حتى ما منتظر مني تبرير ولا رايد يسمع
اجا رافد :- هاا امجد وين
باوعلي دموعي تجري و خالد محتقن و هو مخنز
رافد :- هاي شكو
اندار يمشي :- خالد خالد بس احجي وياك
ما سمع مشى و لا دار وجهه
رافد :- لا يكون الكالته بتول صحيح ؟
كعدت ابجي بالكاع و حاطة ادية على عيوني
رافد :- صحيح انت وافقتي تتزوجين غيره ؟
اجا امجد :- ها رافد جبت الدم
باوعلي ابجي
-شبيها ديار، ديااار
رافد :- احتمال دا تبجي على مها
امجد :- كومي يابه كومي كولي يا الله هاي حكمة ربج بعد كومي
رافد :- الدم وصل صيح وحدة من السسترات تشكللهياه روح
مشى امجد، دنك علية رافد :- اذا فعلاو صدك طلعتي موافقة على واحد غير كالد و كان من يكون فاحب اكلج انت احقر انسانة على هاي الكرة الارضية و ما تستاهلين ذرة حب من خالد الج
كمت من مكاني :- رافد والله مو بيدي
-تموع التماسيح هذه ما تمشي ماكو اي مبرر يخليج تسوين هيج
-مرته تريده......
-وهو كالج ما اريدها فعلج ما اله مبرر ديار
اجا امجد فات لردهة بدون ما يباوعلنا ، التفت رافد شافه فات ، رجع باوعلي :- ولج والله ما تستاهلين البارحة يحجي وياي جامعلج مليونين ونص و يريد يداين حتى والله شنو يعالج و يتزوجج و انت بايعته من گبر لفه اذا باوعلج بعد
عافني و فات جوا، كعدت ابجي بمكاني بقوة، اجا امجد :-هاي شجاج ديار بس تعاي يم مها اوكفي محد يمها
فتت يمه و اني كوة انشف دموعي، اريد اركز بشي ما اكدر ، عقلي كله انشغل بخالد من عافني وراح فرفح كلبي
هاهي يعني انتهت
معقوله انتهى حبنا و بعد ميريدني
يعني اعوفه ؟
يعني اشوف غيري تاخذه و عادي هيج لازم ما اهتم !
ابتعدت من مها حطيت وجهي بين اديه و بجيت، هي تحجي ويا امجد تكله :- شبيها ديار
-تبجي عليج كوميلنا بالسلامة و صيري زينة
التفتت اليه هي تحجي بصوت تعبان كلش :- ديار
بقيت ابجي ولا كاني اسمع احد
حبيبي و حلم عمري خسرته بساعتي يحالي و يا كسرتي
رافد :- اني لازم اروح تحتاج شي خويه ؟
امجد :- لا اخذ راحتك بعد اخوك كفو منك ما قصرت
-هلا بيك
كام راح، كمت من مكاني كلت الامجد :- اني رايحة للحمام اغسل
-هز راسه و هو مستغرب يباوعلي
عفته و مشيت سريع ورا رافد :- رافد رافد
التفت عليه :- ها
-اسمعني بس اسمعني الله عليك
-كولي
-وحق الله وحق من انزل القران بعمري ما حبيت غير خالد ولا حالالي احد غيره
-واضح
-لا تحجي واسمعني
- واذا سمعتج اني شيفرق ؟
-توصل الكلام الخالد، البارحة امك تهجمت عليه و هي تعيرني بوضعي و اليوم الصبح اجت مها تتوسلني حتى اقنع خالد ترجعله و مها طلبت مني اتزوج امجد و حلفتني و امنتني على جهالها والله ما بقى عقل براسي وافكر تعبت
-اذا موافقتج بلحظة غباء تراجعي عنه و اذا عن دراية فما الج اي مبرر امج انطتج الحل و كالتلج خلي يرجع ضحى ابيتنا و يأجرلج و تعيشون
-ما اتحمل والله اموت ما اكدر
-لانج انانية ما تتحملين تعيشين ضرة بس تتحملين تكسرين گلبه بعد ما امنلج
-اكدر اتنازل عنه بس ما اكدر اشاركه صعب
-المهم ديار هاي مستشفى مو مال حجي، انت حرة بقرارج واكيد خالد راح يحترمه و ما يدخل، الله يوفقج
التفت مشى سحبت نفس و اتنهدت بدموع
مسحت وجهي و اني التفت ، ممر المستشفى طويل كمت امشي بي بلا وعي و ابجي
افكر و عقلي طاير بأفكاري
الرجال اللي كل ليلة ساكن خيالي عفته ؟
اللي جنت اتمنى و اطلبه من الله بمستحاة و انطانياه بنفسي عفته !
بعد لما اخلي راسي على المخدة ابيش افكر ؟!
وشيشغل تفكيري غيرة ؟!
اكدر اعيش ويا امجد و اني مكابلة خالد ؟
لو اكدر انساه
لا اكدر استمر ولا اكدر تراجع الأثنين صعب
للحظة رجعت تركيزي و باوعت طريقي استغربت: اني وين !!؟
درت وجهي اتذكر صعدت مصعد بس هسه اني بيا طابق ؟! رجعت اريد اندل طريقي و اعرف اني وين افتر منا وارجع لهنا
طلع ولد كدامي :- شتسوين اختي هنا
-ما ادري جنت امشي ولكيت روحي هنا
-اختي هذا المكان للحجر و الامراض المعدية كلش خطر تمشين هنا بدون اي خطوات احترازية و هاي الردهة الكبالج خاصة بالسحايا شجابج هنا هاي مستشفى مو كورنيش و تتمشين اختي ارجعي
-اخوية اريد ارجع بس تيهت طريقي حتى ما اندل اني بيا طابق
-اطلعي كبل على ايدج اليسرى اكو مصعد انزلي بيه للطابق الارضي
-اشكرك
مشيت، دخلت المصعد، نزلت للطابق الارضي
رحت للردهة البيها مها ، لا مها ولا امجد موجودين
:- ديلا بالله وين راحو
طلعت موبايلي خابرت على امجد كال :- نقلوها للطابق التاسع اصعدي
رجعت للمصعد انتظرته كومه وبعده ما فتح
و ناس التمت تنظره ، لما اجا جوكة ناس تريد تصعد
كوة زرگت من بين الناس، صعد نص و سدوا الباب
كامو يصيحون :- يا طابق تريدون
داسو الطوابق اللي يردون يصعدونها سمعت احد صاح الطابق التاسع ما حجيت بعد حتى ما الي خلك احجي
وصل الطابق، فتت من بين الناس و طلعت
رحت ادور بالردهات، بعدين شفت امجد بممر مشيت يمه :- هاا نقلوها
هز راسه مقهور :- شبيك
- ديار ما شفت شصار بيها من نقلناها كامت تصرخ من الوجع جابت الطريق كله تبجي
-الله يشافي
-من صدك ادعي الله يشافيها و اذا ما كاتبلها شفاء ياخذها و يخلصها من هالالم
-فعلا تعبت
-واني هم تعبت بين شغلي بين جهالي وبينها هي اخوها العار ما فكر يجي ويسأل ، اجا قبل شهرين شلونكم شخباركم مع السلامة
-ثلثين الولد ع الخال، اذا خاله ابوي و عمو عماد شتتوقعه يطلع، شوفت عينك لا بعمره اهتم الحالنا ولا دار النا بال بس وكت مصلحتة يدورنا
-انت جدية بقرارج الكلتيه المها ؟
ابوج مراح يدخل لو يمانع، امج !؟
اخذت نفس .. تنهدت، هزيت راسي بمعنى (اي)
-ما ادري شلون راح نتقبل الموضوع لان بالله العظيم عمري ما مفكر بيج غير اختي الصغيرة، بس اذا انت راضية ع الموضوع و ما عندج مانع الله يوفقني و اصونج
سكتت واكو غصة بگلبي لو اصرخ لتصم كل مسامع العالم على كبرها ووجعها ، طبطب على جتفي
:- ابقي يمها و اني اروح اطلع اجيبلكم شي الليل نزل
طلع هو ورجعت يم مها، اصلا تعودت عيشة المستشفيات وكعدتها، على كثر ما مها نرجعها للبيت يومين تسوء حالتها و نرجع بيها للمستشفى وماكو غير لو اني لو ام امجد لو خواته مرات يجن يمها يوم ويروحن .. كلها الناس ملتهية
بقينا بالمستشفى ٣ ايام ..
كل لحظة تمر اباوع الموبايل بلكي جايني مسج من خالد لو مخابرة، ابد ما حاول يسمع مني ولا راد تبرير ولا كال ليش عفتيني ولا سأل .. اكتفى بخزرة وهو يبعد روحة مني وكاني بلحظة وحدة تحولت انسانه غريبة يرفض اتقربله
تقريبا ٩ اشهر طولت علاقتنا اني وياه
ماكو يوم مر بهالايام ما مخابرني لو دازلي مسج لو شايفتي و حاجي وياي ..
فجأة هيج انقطع كلشي
كل لحظة جاي تمر عليه اصعب من الموت
جاي اذوب شوية شوية من القهر
عفته هيج بكل سهولة !!
الموبايل على وطول ٣ ايام ما فارك ايدي و اني انتظر بلهفة اي شي يجي منه وماكو اي شي
اجت امي للمستشفى مرة وحدة للمستفى زارت مها وكعدت وياي تستفسر على سالفة موافقتي لامجد ونفس الحجي عدناه .
باليوم الرابع الصبح كتبولنا خروج، طلعناها من المستشفى اني و امجد.
.......
بتول :- جانت حالة خالد قالقتنا كلش، ٣ ايام هو ساكت ما ينطق اي شي، يجي من الشغل تعبان يكعد بالاستقبال و ما يرضى احد يكعد يمه
نصبلك غدا نصبلك اكل .. ميريد
ما اله خير الجكاير يحرك روحه بيها
حتى بناته من يجن يمه هو يكوم يكعد بالسيارة وحدة
حاول وياه ابوي كعد يمه حجه : ولك ابني شبيك شجاك لا تاكل لا تشرب
يهز راسه و يكوم من احد يساله لو يضوجه
امي احترك كلبها عليه احتارت شتسوي وياه
من طلك ضحى هم هيج انفرد لوحدة ما قبل احد يتقرب منه بس العرفناه مخابر ديار ورايح هناك لكربلاء منفه عن نفسه و كاسر حزنه
هسه تقيد مثل طير محبوس
لا يكدر يسافر ويعوف بناته ولا يكدر يكعد ولا يفتح گلبه لاحد يشكي طول وكته ساكت
رحت لرافد و لرائد كلتلهم :- خويه احجوا وياه لا تخلونه يضم بگلبه ٣ ايام صارله ساكت ما حجه وبس الجكاير تكتات تكتات يشرب
رائد:- يابه عوفوه مو صغير هو يتعدى هالحالة شوية شوية شيسوي
رافد:- بس صح لازم نكعد وياه ونحجي خوما يضل هيج يبقى تره والله اذا بقى على هالحالة بعد اكثر اذا ما يموت من القهر يموت من الجكاير شايف كحته بالليل شلونها ولك من كل صدره يكح
رائد :- هو وينه هسه ؟
-بتول طلع قبل شوية
-ننتظره من يجي نحجي وياه
-اي فدوة ترا امي غدت تراب عليه والله حتى تمرضت اليوم ما الها خلك
رافد :- هو اكو غير امج نايمة علة بگلبه، اي بنية رايدها بدال ما نلم و نزوجه كدواكفين بطريقة مخلينه يفتر ويريد يكون نفسه لحد ما انطتهياه البربو* بگلبه وكسرته
-شتسوي بعد هاي قسمتهم ضحى هم طوختها بالاربع مرات خابرتني تبجي على بناتها
رائد:- جانت نايمة وكعدت اتذكرت عدها بنات دخل الطير
نحجي وفات خالد من يمنا، صحت وراه :- خالد غدا ؟
ما رد فات للاستقبال و سد الباب
رافد :- كوم رائد كوم كل نكعد يمه
فتنا للاستقبال كعدنا يما :- ها ابو الشباب
طلع جكارة ، سحبها رافد :- دجيب ما شبعت و هاي الجداحة هم جيبها
لزم الريموت و فتح التلفزيون :- شبيك خالد
-ما بيه شي
-هو شنو ما بيك شي صارلك ٣ ايام و اليوم الرابع ساكت و ما تكابل احد لا اكل ولا شرب
تنهد :- ما بيه شي رافد بس عوفني
-ما حاولت تحجي وياه
ما رد ، بأيده دفع راسه :- هي مو احجي وياك
-يا اخي ما الي خلك فك عني
- لا تصير مطي و حاجيني ليش ما حجيت وياها
-احجييييي ويا منو رافد شبيك ؟
-ويا ديار
-ما اعرف وحدة بهالاسم
-اهووو شلون راح يبيعهن علينا كرامات، خايب دحجي هي الزلم ادنك اركابها لو مرها الحب شبيك
-لان طليان و ما نفتهم
-اشكرك بارك الله بيك و طيح حظك ان شاءالله
-رافد رحمة لاهلك عوفني والله ما الي خلك
-والله يا خوية ما ناوي اعوفك اذا انت ما رايد روحك احنه رايدينك و تعز علينه حالتك هاي ، خالد
ما رد
خالد ... ترا احنا اخوتك يا اخي افتح گلبك و احجي ويانا
-شحجي، اكو كلام ينحجي حتى احجي ؟
-ليش ما حاولت توقف هالموضوع كله تكدر تكول لامجد وتنهي الموضوع
-رب اللي هنت عليها ووافقت ادخل اني ليش
- ما بيها شي يمكن هي انضغطت و سمعت كلام جرحها عادي يا اخي تصير والله لو شايف دموعها الشفتهن اني ما جان حجيت
-وعساها بابو زايد ما اريد ولا راح احجي
رب الما وكف بعينها كل السويته وياها هان عليها كلشي، كلكم حجيتوا وياي بموضوع ضحى وكلكم حاولتو تقنعوني و بس باوعتها و شفت ما الها رد و ساكته ما احتاجيت تحجي سكتتكم كلكم بس لان هي ما رايدة ...
ولك حتى كمت اطلع من الشغل تعبان اشتغل تكسي حتى اجمع و استعجل و اخذها و الف مرة كلت الها ولج والله ما احب مها و القران ما اريدها شسوت ؟ عافتني ولا سألت ولا خابرت
هااااك هذا الموبايل وشوف مكالمة وحدة ما كلفت نفسها ما حست على روحها و اتراجعت و اني الحارك روحي حتى امن الها فلوس علاجها و ما اخلي امه و غيرها يسمعنها حجاية ويغثنها
ردت عليه امها كالتلي تبجي لان امك تعيرها اجيتك طاير حتى ادايني و اطلعها تتعالج تالي هيج اتجازة
ليش ؟
-يعني لا انت مرتاح ولا هي يا اخي ما مجبورين اني استعد اوكف وامنع هذا الزواج واحجي ويا امجد ليش هيج حاركين ارواحكم
-اسكت ولا تدخل خليها و اذا سوتها صدك و اتزوجتها يابه بالقران لخلي كل لحظة تمر عليها تتجرع الموت و ما تلكاه
-وتحول حبك الها لحقد !!
-اني بسكوتي هذا جاي احقد عليها و كل لحظة انتظار مني الها و هي ما مخابرتني ولا حاولت تنهي الموضوع حقدي بداخلي يكبر والله اجازيها والله
-وتالي
-اترك الامور تمشي و هي التقرر نهايتها
-خالد اذا قررت تشوف حياتها انت انساها وشوف حياتك
-لا والله لا اخذ حيف كل لحظة خوف مني عليها و سب اهلي واحد واحد اذا بعد حنيت على احد لو ساعدته لو اشوفلي اكبر واحد يموت بالشارع اتفل عليه و ما اساعدة لان الظاهر صارت الطيبة تضر ما تنفع
صير حقير تعيش امير
وهيج اني راح اصير وياها
يحجي بحركة دم و عيونه حمر والدموع تغرغر بيهن بس ما نزل دموعه ، سحب جكارة من ايدي واخذ جداحه شغلها و سحب نفس طويل طلع الدخان من صدرة، و بقى يفرك بعيونه و الجكارة بأيده
رافد :-اهدى خالد بهيج حالة راح تخسر نفسك و صحتك مو هي التخسر
-عساني بالمرض استاهل حتى اتوب بعد ما احن على احد واساعدة احد، خابرتني كالتلي اني بالمستشفى وحدي بسلمان ولك والله ما حسيت بنفسي غير اني يمها و على جتافي هاي شلت جنازة رجلها و دفنته و طاح حظي من التعب لخاطرها ورجعت الها وخليت بايدها المصرف البجيبي كله واكول فدوة تتعوض واداين و اشتري رصيد واخابر وما عفتها لحظة وحدة حتى لا تنقهر و تتعب و ما تدرس وتروح عليها سنة
ولك هيج تجازيني بكل گلب بارد تبيعني
اني الها
رائد :-ما اكول غير الله يساعدك و يشد على گلبك الله لا ينطيها بس هاي اكولها على كسرة كلبك و دموعك هاي
خالد :- تهون
-ان شاءالله يخوي و احنا يمك و اذا رايد تسافر اسبوع شهر روح اطلع لا تخنك روحك بناتك امانة بركبتي لو اعرف اكابلهن واكعد والله
بتول :- خلي يروح حالهن حال جهالي والله ما اعوفهن بس خل يرتاح
-لا تخافون خوية والله ما بيه شي
رائد :--شلون ما نخاف و انت جاي تاكل بروحك بهالقهر و بهالجكاير والله كلنا بالبيت ما مرتاحين دامك انت ما مرتاح
-الله كريم
......
ديار:- رجعنا مها للبيت و اترخصت منهم لان كلش تعبانه و صار ٣ ايام بالمستشفى اريد ارتاح و انام
طلعت منهم سيارة خالد بالباب دمعت عيوني و اني اباوعها ياما وياما كعدنا بهالسيارة حجينا و شكينا و زعلنا و ضحكنا، ما اعرف شلون راح اصبر وما ارجعله بعد
مشيت للبيت ، حاولت تحجي وياي امي كلت الها :- تعبانة حيل ما بيه احجي بس خل انام
نمت لليل كعدتني امي كالت :- ام امجد عدنا كومي غسلي
كمت من النوم ، غسلت وجهي و دخلت :- هلا خالة شنو مها بيها شي
-لا الحمدلله ابخير نايمة بس اني اجيت احجي ويا امج شوية و اشوفكم
ميعاد :- خير ان شاءالله زارتنا البركة
-البركة بيكم ام اسامة شلونكم انتم
-والله ماشيه على الله هالمسكينة هلكت بالمستسفى ورجعت نامت هسة كعدتها شوفت عينج
-حيل تعبناهة سودة عليه
-ما تجازيكم ام امجد وكفاتكم ما تنعد ويانه
-احنا اهل ان شاءالله
-ان شاءالله
-ردت احجي وياج بموضوع ما ادري اذا دايار حجتلج بيه
-كولي
-رايدة ديار لامجد
-والله يا خالة عاد احنا ما نلكا مثل امجد شاب مرتب و اخلاق و خوش ولد بس هو القرار يبقى قرارها صح اني اريد مصلحتها بس تبقى الكلمة الها
-الله يشافي مها ياربي بس الدكتور كاللنا على حالتها بالشهرين زين اذا طولت ويانا ومها وصت ديار على جهالها و تريدين الصدك ما الكا احسن من ديار ربيتها على ايدي و اعرفها و اعرف اخلاقها و انتم تعرفون امجد بعد
هو عندة قطعة ارض عمت عيني راد يبلش يبنيها بس من وكعت نهى عاد كام صرف العنده و الماعنده عليها حتى سيارته راد يبيعا و بقت القطعة ما مبنية
اذا هي شاطرة تلمة ويبنونها ويكعدون بيها ابوحدهم و هالجهال ذوله وياهم تعتبرهم جهالها ، وهو يشتغل راتبة مليون و نص و خير من الله ما يقصر عليها ان شاءالله
ميعاد :- و جامعتها ؟
-بعد هي وياه اني ما ادري بس اكيد ما عنده اشكال
-والله يا ام امجد مثلكم ما نلكة بس اني عندي طلب نكوله مو شرط
-وهو ؟
-حاظرها يتسلم بيدي اعالجها قبل لا تتزوج و حتى اذا مستعجلين ع الزواج تتزوج بس اعالجها خلال زواجها ما نريد لا غرفة ولا حفلة ولا هوسة ، ازيد على حاظرها مني و اطلع اعالجها لان هي تعقدت من حالتها
-والله يوم السعد الاشوف بيه ديورة متعالجة ومحد يمسها حجاية و اني وياج بهالاقتراح حتى احنا مو بحال زفة و عرس فخلي هي تستفاد بحاظرها و احنا حاظرين حتى لو احتاجت بعد ابو امجد ما يقصر
-فدوة العينكم حبيبتي ان شاءالله اهل
-لا ان شاءالله و هي بنيتي، اكوم اني و اخليكم تدانشون بيناتكم و خابريني حتى بعدها اخلي الحجي لابو امجد هو يتصرف
-ان شاءالله
طلعت ام امجد و امي راحت وراها سدت الباب:- سمعتي الحجي
بس حجت نزلت دموعي :-، ابجي ما امنعج بس يا يمة اني اشوف انت تردين و الله يريدلج الاحسن من اللي تردينه
امجد اصغر من خالد و حلو ومرتب ورجال و شخصية ويعرفج و مربيج على اديه و امه واهله خوش ناس لا خالدية تعير ولا ضحى وراج لاحكتج على هالرجال هذا وحاطة خشمها عوفي خالد يرجع لعائلته و عيشي ويا امجد
-ذاك اليوم تلوميني على موافقتي
-يمه اني ام واريد مصلحتج خالد مقارنة بامجد لا شيء، امجد عنده راتب و عنده قطعة واهله ناس طيبين و حتى امه شوفت عينج رغم بس هالاثنين عدها وتكول تلمه و تطلع و ام رافد كن مال دجاج ومسويته ٣ طوابق وشحده اليطلع هءا رافد ولده شيبو وبس يريد يطلع تسويلها فلم و تخربطت و ماتت و تخربط عليه كلشي الحب يمه لا يوكل ولا يشرب
كملي جامعتج و انت ابيت رجلج و سمعتي باذنج بمهرج تتعالجين و ما يعيبج شي بعد
الحب ييمه للاحسن مو للاول
صح تحبين خالد بس كلشي بخالد ما راهم وياج والله رايدلج الاحسن منه لا امه و خواته العرمات الشايفاته عليج الامير وليام ولا مرته اللاحكتج وواكفة ابلعومج
يوم يومين تنسين و تعيشين
عفتها و فتت للغرفة ابجي
عافتني هي اريح كلبي بالبجي
كلش انتهيت بهاي الفترة
جنت اتمنى منه كلمة اسمعها حتى اتقوى و انهي كلشي بس ما كلف روحه باتصال واحد
ثاني يوم ابو امجد مخابر على ابوي و كايله هيج و هيج حال مها و اني رايد بتك ديار لابني امجد
ابوي ما معارض كايله :- بيها الخير واني راح احجي ويا عمامها اليوم يكعدون وياكم لان اني ما متواجد هنا عندي واجب خارج بغداد
اجو عمامي اثنين لبيتنا العصر و اجا ابو امجد، حجوا بالحاظر و الغايب و هالسوالف و قروا فاتحتنا
بس انتهيت بيومها هلكد بجيت وكان ميتلي احد
بفاتحتي يعني انتهت قصتي ويا خالد
جانو مقررين هءا الاسبوع يفضوها لان مستعجلين و خايفين لا بيا ساعة تموت مها و يتعطل العرس فقرروا الاسبوع هذا عرسنا
عمامهم مناك لموا لامجد لان مرته مريضة وما عندة و اشتروله غرفة نوم جديدة، وابوه داينه المهر
وامه تبرع من عدها ٨٠٠ الف انطت فلوس النيشان و كالت :- اخلي بأيد ديار هي تروح وتشتري من السوك اليعجبها
اجت عليه و انطتني الفلوس و شكرتها امي وطبعا ما تجوز من سوالفها ، كالت الها :- خلي يجي امجد هي وياها يرحون يشترون على ذوقهم
ما كالوا لا، اجا العصر هو و كال لامي خلي ديار تجي
رحت وياه كاني ميته ، هو يختار و اني اكله اي
وصلني لمحل ملابس داخلية و سيتات نوم ، وكف ما حجة بس يباوعلي، اني دايرة وجهي بالي مو يمه ولا ادري عنه
امجد :-ديار
-ها
-اااا بس هذا المحل ... فوتي
باوعت للمحل كله ملابس خلاعية ، باوعتله ، كال :- ادخل وياج تردين ؟
-لا لا اني افوت
فتت للمحل دمعت عيوني، عامي شامي اخذت ملابس داخلية و بس ما اخذت اي سيتات نوم
طلعنا بالطريق اني وياه ما طلع من عندي اي صوت:- ديار احسج ما راضية بهالزواجة اذا مجبورة كولي ما اغصبج
-هزيت راسي لا
-لعد ليش هيج اني اعرفج يعني مو غريبه عليه حتى اكول عادي، حتى لو خجلانه بس سكوتج مو مال خجل
-مقهورة على مها يعني اكيد صعب عليها اتزوج زوجها كبالها
-بعد هاي ارادتها بنفسها لا اني ولا انت الردنا هذا الشي
هزيت راسي و بجيت، حط ايده على رجلي :- لا تبجين هذا امر الله و نصيبنا
-سحبت نفس .. تنهدت (اي)
رجعنا للبيت جان ابو امجد حاط كرسي بالباب و جهال امجد يلعبون يمه
صف السيارة و جهاله كامو يهوسون بالباب و يصيحون فرحانين بسيارة ابوهم اجا ... نزل يتلكاهم و يبوسهم و نزلت اني ، وكفت ما حجيت درت وجهي لباب بيت ام رافد اتامل البيت الكاعد بيه خالد
اتفاجئ بخالد كاعد بالسيارة و صافن يتفرج علينه ووجهه ما يطمن اني اعرف كل نظراته و حركاته الوجه الشفته بخالد اخذ كلبي .. مو هو نظرة حقد اشمئزاز استحقار
اجاني مي فزيت ، فطوم ضربتني بمسدس ابو المي
ابتسمت الها، حط ايده امجد على جتفي :- اوصل ديار يابه و ارجع عينك على الجهال
ديحجي خالد حرك السيارة بسرعة من ورانا و شخطها بحيث فزينا على صوت السيارة ، باوع امجد :- هذا شبي خالد متخبل
ميت اني بس احس الدم فار بجسمي من سوا هالحركة اكيد انقهر لما امجد حط ايده عليه
رجعت للبيت وصلني و ونزل الغراض كلهن و راح امجد
كعدت ابجي و امي تكلب بالملابس و تكول :- هذا ذوقج شو ما اصدك ، سيتات النوم وين يلطامة
عفتها وكمت ، سمعت ام امجد اجت تشوف الغراض ويا امي و قرروا بعد يومين يسوون حفلة صغيرة بيناتنا و نتزوج و استغربت لان اني ما طلعت الها كالت الها امي :- تعبانه نايمة
ما حجت
ثاني يوم ... امي بالدوام و اسامه كاعد بالهول و اثار ابيت ام رافد تلعب ويا بنات خالد، اندكت الباب اني ما طلعت كام اسامه فتح الباب
سمعت صوت خالد يحجي وياه ع الباب ويكله :- منو موجود ؟
-محد بس اني و ديار
خالد :- دروح لبيت ابو امجد امجد كاعد ينصب الغرفة روح ساعدة خطية محتاجينك
ضرب على جتفه وكاله :- يله يله روح
هذا راح ع السريع، ردت اطلع لبرا و اشوف خالد اتلفت بالفرع منا و منا وفات للبيت
مصدكة اني شايفة طوله كبالي احس كلبي سرة الدم بيه ركض و نبضاته كامو يدكون سريع ، سد الباب و فات
من باوعلي خفت من نظراته
تراجعت :- شرايد خالد
-خايفة مني ؟
-خالد لا تتخبل و اطلع من البيت لا احد يشوفك
-ويشوف شراح يكول مثلا ؟
-سمعتي خالد
ضحك ضحكة طويلة :- بنت ميعاد ادور سمعة ، انت و امج واحد تتشابهون و اني الغبي الجنت اظنج مختلفة
خالد :- الله عليك اطلع
تقرب :- ليش ميعاد صارت تستحي
مشيت من عنده خفت من نظراته ما ناوي على خير، ركضت للغرفة تبعني اجيت اسد اباب حط رجله اريد اسد ادفع ماكو اي نتيجة و هو واكف بكل برود حاط رجله
فجاة دفع الباب و دخل :- خالد اطلع برا لا تخليني الم الدنيا عليك والله
-لمي براحتج
باوع بالغرفة، فرحانه فراشة نيشانج و غراضج وتباوعيهم مو
-خالد
-عيون خالد
-اطلع الله يخليك
-ليش مو اني التتمنيني
-و اني عفتك لمرتك و جهالك
-واني لعبة بايدج وكت اللي تعترفيلي و تخليني احبج ووكت التملين تعوفيني و ترحين ووين كبال بيتي و اقرب الناس الي ؟
شسويتلج وهيج تأذيني
-جاي اتأذى اكثر منك والله
-ما خابرتي ولا كلفتي نفسج بأتصال واحد
-ولا انت
-منتظرتني اخابر بعد ما انت عفتيني
-انت الكلتلي ابتعدي
-واخذتيها راس مال و ابتعدتي ؟
-خالد احبك والله بس احنه ما نرهم لبعض
تقرب مني :- ليش ما نرهم
ادفع بيه :- خالد
دفعني للكنتور :- عيون خالد
-الله عليك وخر
-ليش مو هذا طولي التتمني بمذكراتج هياني واكف ويا طولج، اخذ ايدي مو هاي اشفايفي التحلمين تتذوقيهن كبالج
-خالد وخر
-جنت ما اتقرب منج ولا مديت ايدي عليج مرة وحدة بشهوة جنت اشتغل ليل نهار حتى اخذج بشرف بالحلال و انت الما ردتي الحلال
جنتي وياي ٢٤ ساعة اطلع و اطب بكيفي و ادري انت بوحدج ولو اني شيطان من زمان لعبت عليج و متعت نفسي بيج و اني رجال مطلك و ما شايف غيرج و جزت مانع نفسي منج بس حتى اخذج بشرف
يحجي همس بأذني و حلصرني ويا الكنتور
بقت دموعي تنزل :- الله عليك وخر
-لو مرت كلمة مو حلوة بالسالفة اغير السالفة كلها بس حتى ما احجي وياج بهيج مواضيع و استغلج ردتج بالحلال ما ردتي الحلال ليش
-ارجع لمرتك
اششش حط ايده على شفايفي :- ما اريد اسمع اي موضوع اليوم غيري اني وياج
-شرايد خالد وخررر
-رايد حقي منج
-حرام عليك والله
-وحلال التسوينه بيه مو
انفاسه بوجهي قرب شفته جوا اذني نفرت - ردت ادفعه جسمه حاصرني كمت اجر بجتفه و ادفع بيه ، لزم ايدي ، و جر الثاني هم لزمها
همس :- مو هءدذا الجنتي تردينه بخيالج مو كل عمري تتمنيني بفراشج، شصار هسه لكيتي غيري و صرت ما افيد
-خالد اذا ما ابتعدت والله اصرخ والم الناس عليك
-لمي اللي يعجبج الافعى اللي تمنت تلتف على جسمي اليوم راح احقق امنيتها
-خالد
-روح خالد
حجاها و هو يبوس بخف جوا شفتي
-كااااااااااااافي وخررررر
-صيحي بعد خليني استمتع بحرارة جسمج الما يعجب احد غيري
-خالد لا تصير حيواااان وخر مني والله اذا سويت شي فلا اسامحك
ضحك ضحكة طويله وهو رافع راسه يضحك كدرت ادفعه و اشرد للباب لزمني و دفعني للباب ربط اديه و يبوس بشفتي اوخر وجهي منا و منا و ما اكدر ابعده
كمت ابجي حيل
ابتعد :- لا اخليج تعيشين شعور الخيانة كل يوم، والله لاندمج ع الساعة العفتيني بيها لاخلي كل ايامج البيض سود
-وخر مني حرام عليك والله
همس :- ليش مو هذه جانت امنياتج ( اخلع عنك ذلك القميص المزعج )
حط اديه على قميصه وسحبه بقوة كطع الدكم كلهن
دفعته حيل و انداريت اطلع، لزمني من ايدي و شمرني للكاع ......يتبع

☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم