المراهقة والأربعيني الحلقة (29)

المراهقة والأربعيني

الجزء الأول

الحلقة  (29)

ليليان:- بس ابتعد شويه اريد اطلع..

-ول يابه حاركه هدومي وتردين اطلعين بليه عقاب.. مو بالحيف .. يحجي همس وحسيتو مقزز ولعبت نفسي منو

-كتلك ما علقصد والله وخر..

-اششش كافي .. كبري عاد ..

وكضب حنجي وراد يقدم راسو يبوسني .. دفعتو حيل .. وردت اشرد.. كضب ايدي وجرني الو..

ورجعت اصطدمت بيه.. وسحبني الو ويكول ليمتى نبقى هيج.. هاي غرفتج وين رايحه..

ابعد بأيدو من خصري ماسكني حيل كمت ادفع بيه وابجي .. وخر ..

مد راسو يم اذني وكام يشتم .. ويتنفس .. احس جسمي كلو قشعر منو.. بودي اگطعو كد ما لعبت نفسي ..

عصرت جسمي و دفعتو بكل قوتي واندرت اركض باستعجال دا افتح الباب واطلع.. اجت حافة الباب على اصبعي الصغير ..

صح ااااخ.. شششش.. دنكت لرجلي شفتو اجه ويضحك يكولي شبيج يولي ودنك يريد يشوف رجلي

كتلو ماكو شي .. عفت رجلي ونزلت اركض.. وهو يضحك.. بس احس گلبي دكاتو مثل الطبل وسخونه بوجهي احس عركت ..

خجل على خوف واحاسيس مختلطه ضربت عندي خلتني متوتره ومرتبكه.. موقف غريب عليه .. رجال يتقرب ويتحارش ..

شي ما مار عليه قبل حتى هسه احسو اعتيادي.. احسو عيب وهذا ما جاي يعرف العيب ولا يستحي

جنت انعجب بثكلو ورزانتو بس شو بس نصير وحدنه كل ثكل ما يضل عندو ويكو يدحك ويتحارش حالو حال المايستحون

الناس مخدوعه بالظاهر مالتو .. رجال رزن وما خفيف .. عجل لو يدحكو من يتخبل ويصير مدري شلونو .. وعيونو ادحك بلا مستحى

انزل من الدرج و دحكت عمتي بالهول خففت الركض مالتي ع الدرج وسويت نفسي امشي طبيعي بس شنو احس گلبي يريد يطلع من صدري

-ها يمه خلصتي

-لا اجه وكال اني اكوي وتركتو.. جاوبتها وحلكي ناشف .. احس اديه ترجف من الموقف..

دخلت بسرعه للغرفه لا تسألني شبيج.. فتحت الكنتور واني اتمتم واسولف وي روحي.. بلا ما ادري من التوتر..

حلا:- هاي شبيج شو مخطوف لونج شمسويه..

-انصدمت هي بالغرفه.. عبالي فوك.. اندرت متغطيه بالبطانيه وعلى سرير جدتها ورافعه راسها وعاقده حواجبه وتسأل بتعجرف..

وانتي شعليج..

-والله شغلتج ما خاليه امسويتلج مكسوره وهيج خايفه الحيه

-وانتي شكو بكلشي حاشره روحج ويايه ابد لا تدخلين خووش.. اندرت منها طلعت الموبايل من صدري و خليتو بنص اهدومي

- اكفي اكفي شضميتي هذا الموبايل مو وي منو جنتي تحجين

-ما احجي وي احد.. كمت من الكنتور وسديتو

-يولي ليش ضميتي الموبايل لو ما مسويتلج فاينه مكسوره ما تضمينو هينا وتقفلين عليه وتخافين لحد يشوفج..

فايته ووجهج احمر لا عبالج تعبر عليه ..طلعي سوالفج لا افضحج والله

-دولي من وجهي ولي.. دفعتها وردت امشي كضبتني من جتف دشداشتي وتكلي

-احجي وطلعي موبايلج لا اطلع لابويه اكلو عدها صاحب قديم ودتخابرو..

-على كيفج عيوني ركبتيلي صاحب ع السريع لو هي كلمن يشوف الناس بعين طبعو وجريت نفسي منها

-تخصرتلي وتكلي يولي شتقصدين

-والله حبيبتي فهميها مثل متريدين و وخري مني ما الي خلكج الضاهر كتلت اليوم ما فادت بيج

-انه الج بسيطه تعيريني ..

-طلعت وسديت الباب ما رديت عليها رحت للحمام غسلت ومشطت واجيت.. للغرفه .. جان تصيح عليه الحجيه من الهول

-ليليان رجلج يصيح عليج شوفي شيريد..

-اي يمه هسه اشوفو.. صعدت وطبيت لغرفتو لكيت حلا واكفه يمو وهو كاعد ع التخت وعاقد حواجبو ووجهو ما يكصو السيف..

فتت كال حدري لشوف

تقربت ووكفت يمو.. حجه

:- شنو هلكلام هذا اللي سمعتو.. تعيريها بجتلتها وتكليلها عندج صاحب وهلسوالف الطايح حظها

- انت سألتها ليش هيج حجيت لو كبل تحجي ويايه

قاطعتني هي رادت تحجي .. رفعلها ايدو الها بمعنى اكفي.. وكال احجي بالله لشوف شصاير..

يحجي واحنه اثنينه واكفات يمو كل وحده على صفحه..

-نزلت منا ردت ابدل هي تكلي ويامن جنتي تخابرين كتلها ولا واحد تكلي احجي لا اصعد لابوي اكلو عدها صاحب قديم وعتخابرو

اندارلها بخزره وعصبيه .. وهي كالتلو لا والله بابا ما كلت هيج.. اني دحكتها مخطوف لونها وخايفه كتلها شبيج عبالي بيها شي ..

شو وكعت عليه رزايل كتلها ليش خايفه وضميتي التليفون تكلي الضاهر الكتله ما فادت بيج واحجي واخابر بكيفي وبس تحجين اكلو لابوج عدها صاحب حتى تتساوا الحياطين ..

اني فتحت حلكي وضحكت باستهزاء ... وكتلو والله ما هيج حجيت عتجذب .. زكح بينا وكام وكف على حيلو ويكول

:- والله عفيه بيجن مربايات وشبعانات تربيه.. بنتي وحرمتي واكفات جدامي ووحده تتهم الاخره بالمصاحب والمعاشك..

رادت تحجي هي .. ضربها جف و زكح بيها و طلعي براااا يلاااا..

هي طلعت.. ردت امشي .. صاح وييين .. حدري .. ووكف كدامي

-دحكي انه اعرف حلا جاي تجذب واعرف تطلع منها هيج سوالف تره انه ما غشيم .. ابن ابوي واعرف البير منو الحفرو

ف احجي انتي شنو حاجيه وياها لا تخليني بالله العظيم اتصرف غير تصرف

-شحجي والله هي التهجمت اول بدايه اني لا يمها ولا بكربها تريدلها حجه عليه

-اريد اعرف انتي شكلتيلها.

-كالتلي عندج صاحب كتلها كلمن يشوف الناس بعين طبعو

-قبض ايدو ويكلي يعني شنو قصدج..

سكتت

.. يعني بتي لو ما عدها صاحب وتخابر ما حجت وياج هيج مووو

-ما رديت

-شايفه عليها شي .. عدها شي احجيييي

-ما اعرف روح اسألها

-لا اسألج الج مو انتي تكولين عدها صاحب

-سكتت ..

-تعايريها بضربي الها ليليااااان

-اي اذا هي متوب مني..

-ومنو كالج انه ضارب بتي على مودج.. انجان ضربتها بس لان هي غلطانه مو لان حتى ادافعلج خليها ابالج.. انتو شنو وتعيريها بضربي الها

رفعتلو عيني .. ما عاجبني كلامو .. ضربني راشدي ويكلي من احجي عينج هاي ما تصديها بعيني افتهمتييييي ..

-اي يلا وخر

-لا تكولين وخر لا بالقران ابتلي بيج ..

اندرت منو ردت اروح.. زكح:- ما خلصت كلامييييي.. جرني وضربني الكف الثاني ..

دحكي لج.. اضرب بتي احاسبها اضربها انتي كلمه وحده ما اسمعها منج لو اسمع معيرتها اكص ركبتج والله افتهمتيييي

هزيت راسي .. اي .. واني ابجي.. صرخ انكلعي منا بساااع.. طلعت من الغرفه مالتو ابجي ..

ساعه يتغزل بيه ويصعدني للهوى وساعه يذبحني ويدفني بالكاع.. اصلا هو ما يحبني .. كل همو يدحك بجسمي الما يستحي..

نزلت للغرفه فرشت وكمت ابجي بفراشي .. صاحت الحجيه شبي صراع يمه.. ليش يصيح عليج

ما رديت عليها بقيت بفراشي ابجي ..لحد الصبح احس بلعومي تجرح.. كوه نمت..

ثاني يوم كعدتني الحجيه اسوي ريوك.. ما كعدت.. نعسانه حيل .. الحجيه ما حاجيه رايحه للمطبخ تريد تسوي ريوك الها ولحرب

نازل صراع سائلها ليش هي تسوي الاكل.. كالتلو تعبانه ونايمه البنيه كلت خطيه اكومها ..

هذا فار وجاي للغرفه .. صاح ليلياااان.. ما كعدت غلست.. دفر المخده مالتي وصاح مو احجي وياااج.. فزيت بسرعه واندرتلو ..

شتريد..

-كومي اكفي بدال امي بالمطبخ

-وبتك البارحه الضربتني لخاطرها ما تكوللها توكف..

-كمبص وصار بمستوى كعدتي ولزمني من جتفي .. تكومين لا بالله اگلب الدنيا فوك راسج . اكفيييي بساااع..

دخلت الحجيه وكالتلو يمه شجاك وياها .. اتركها هن جاي وبيضه بالدهن الي وللوليد ما عدنا شي ..

ما رد عليها وطلع.. كمت بس الدنيا طالعه من عيني. رحت للحمام غسلت و لفيت شعري..

ردت اطلع نائل كاعد.. صحت حررررب جيبلي الحجاب.. تانيت ورجعت صحت حررررب

اجه صراع دك باب الحمام.. فتحتو وانطاني الحجاب.. لبستو وطلعت..

الحجي ونائل و صراع فاتحين التلفزيون وكاعدين يحجون ع الاخبار .. اوضاع الانبار ساءت هلفتره..

خاصه الفلوجه.. وكعت بيد الارهاب .. واخبار والنفوس متوتره وصراع متعصب سياسي من يحجي يكوم يصيح ويغلط ويسب ويفشر ع السياسيين...

وعمي يصيح ونائل يناقش .. مو صباح كلو صياح من وره السياسه خاف ناقصين..

رحت وكفت الحجيه مسويه الجاي والبيض ومكمله كلشي بس مديت سفره صغيره وكعدنا نتريك..

حلا خلصت الريوك وطبت بغرفة ام سعد تعزل روحها.. انتبه صراع واني واكفه الم بالمواعين..

صاح.. حلااااااااا.. جت وكفت كدامو كالتلو ها بابا

-سالفة التختل بالغرف وسوالف الزعلانه بطليهن لا تخليني والله ابتلي بيج.. حالج حال هاي.. تكومين تنظفين وتشتغلين حسب الاصول ..

محد يشتغل خدام عندج تاكلين وتنامين امشي يلاااا

.. ضاجت حيل واجت كالت اني اغسل المواعين وانتي نظفي.. ما رديت عليها وطلعت الحجيه تحجي وياه تكلو

:-على كيفك وياهن لا هيج يمه بعدهن صغار ويتعلمن لا بالصياح والضرب ..

ردها :- وحدتهن عرمه السانهن شطوله حرام بالحرم لا ما اربيهن فلا اطلع انه..

اني اسمع وكأنو ما اسمع.. اشتغل ومعليه.. نظفت وهم كاعدين.. الحجي فتح وياه موضوع سعد..

كالو هذا ما اريد اسمع سيرتو لا هو ولا امو .. من كال هيج نائل كام صعد فوك.. والحجي بقى يترادد وياه هو والحجيه..

ما اهتميت لكلامهم كملت شغلي.. وركبت تبسي وتمن ما اعرف اضبطو .. عنبر وما اعرف شلون يطبخو . ف الحجيه طبختو..

للظهر ردنا نصب الغدا جان يدخل جد حلا ابو امها وخالتها الجبيره.. هي سوتلها فلم حظنت جدها وضلت تبجي وما تحجي بس تبجي بحظنو..

جدها كام يبوس براسها .. ويحجي وياها ويحجي على صراع شلون يأذيها وكالو جيت اخذها وياي..

كالو صراع :- لازم الاخبار بهذا البيت ما تنظم وعرفت ضاربها منين

ردو - انه خابرت على امك لان خابرت على خطها مغلق لو حتى ريحة بتي رايد تحرمني منها يا صراع..

دار وجهو ما رد.. خالتها كالتلها حلا كومي بوسي راس ابوج..

صراع:- ليش شكو وتبوس راسي

-بلا ما اعرف شي .. بنت اختي اكيد غلطانه ومسويه مكسوره وانت زعلان منها.. كومي بوسي ابوج خاله واخذي من خاطرو لا تزعلي شعندج غيرو ..

صراع:- دام تعرفيها غلطانه هي بحسبة بتج علميها ادبيها..

-ان شاءالله انه احجي وياها وما يصير خاطرك الا طيب

-كامت حلا باست راس ابوها بس بعدو ضايج.. لمت غراضها وطلعت وياهم... اني خلصت شغلي ودخلت ع الموبايل ..

الحجيه نايمه بالهول.. هو دخل للغرفه... نام على سريرها.. مهتميتلو.. كعد.وره شويه اني بفراشي امدده على بطني وادحك ع اليوتيوب

افلام مصريه قديمه.. مندمجه. وما احس الا فتح بطانيتي وتمدد وياي.. كعدت .. شتريد..

-ما رايد شي ..

-عجل شعندك يمي

-مضايقج ؟

-اي يلا كوم..

-صايره صلفه..

-عيشتكم علمتني الصلافه.. ردت اكوم .. جرني للفراش ومددني غصب على ايدو .. وكال

-اموت من المره الصلفه ديري بالج

-اي عود ماشي

-ناويه تتأدبين لو شلون. ؟؟

-عمو تره ما مضايقتك ولا جايه يم احد منكم .. شغل وجاي اشتغل وما عصيتلك امر تغلطون وتسبون وما احجي

شرايدين مني بالضبط.. تجفصون ابطني وتكولي صايره وكحه اكو واحد ادوس ابطنو وما يصرخ ويطلعلو صوت

حجيت وردت اكوم.. راد يجر ايدي وصاح حدري احجي وياج.. ليليااان.. عفتو وطلعت ما رديت..

زعل هو و ورفع شخشمو عليه كام لا يحجي وياي ولا يدحك بوجهي شلون اجه وصديتو وعفتو.

بقينا 4 ايام لا اني احجي وياه ولا هو.. بعدين هو حسيتو لان وكام يدحك يضحك .. يسمعني حجي ويضحك عليه.. واني ابد ما رديتو..

اجه من الدوام مره.. واني مطلع الزوالي الحجيه كربتني بيهن تكلي صار البيت يخنك .. حتر الجو ..

مسحي البيت لا زوالي وبس كنس.. فشلناهن وصفطناهن.. وذابحه روحي امسح بالبيت..

دخل هو وكال الكوى يابه.. ما رديت عليه بس الحجيه..

متعود يجي يضعد فوك.. شو هذا گابلنه وتمدد ع السرير واني رافع الكلابيه وامسح ومنزلتها من وراه

غير يحس ويكوم ويكول ناس تاخذ راحتها وتريد تشتغل.. لطش فد مره.. الحجيه طبت وكالت كملي وهو متمدد ويدحك وين ما اروح...

دنكت امسح بالوصله.. وصلت يمو بكل صلافه يدحك.وين ما يريد.. رفتع كلابيتي من يم صدري..

حجه هو.. :- هاي الدشداشه بعد لا تلبسيها مو حلو

-والله هي حلوه بس لو العالم تستحي شويه وتبطل ادحك واددقق اكثر من اللازم جان زين

-ابتسم وكعد من حيلو وكال منو هذا المايستحي يولي..

-ما رديتو وبقيت امسح.. كام وراد يتقرب عليه.. شلت راسي وصرخت لاااااااااااااا وادحك على رجليه

اختلس هو وكام يدحك.جوه رجليه ويكول شكو يابه شنو السالفه

ماسحه الكااااع لا ابسطالك تمشي والله تعبببببت ..

-ومرض زعتيلي العافيه شبيج عبالي مدري شنو فاتنه وصرختي ..

يولي حتى نسيتيني سالفتي على شنو كمت امداج يلغمه تركني وطلع فوك.. واني كملت مسح..

بالموت يلا خلصت شغل اوف يحجيه شكول عليج

طبيت سبحت.. وطلعت هو واكف بالمطبخ.. شافني كال حدري صبيلي غدا ميت جوع..

دخلت وكمت اصبلو.. ادحك كاعد رجل على رجل ومتجي ضهرو وره وايدو ع الطبله ومرتاح ويدحك براحتو ..

احس ربطني بحبل مو يدحك عليه وين ما امشي غيونو ما تفاركني شلبس حتى لو عبايه من يدحك احس روحي معرايه كدامو كد ما يدحك ويدقق..

اتنرفزت.. كمت اخلي الاكل كدامو بعصبيه .. اجيب الصحن واحطو حيل.. انتبه وكال على كيفج بويه لا يطكلج عرج تره ما بينه حيل عصبيتج

خليت الاكل وطلعت.. دخلت ارتاح.. اجه وراي.. يا الله شلون بيه.. والله نرفزني.. تمدد يمي وتغطى ..

اني منبطحه ادحك على موبايلي هو كله ايدو على ظهري.. كتلو كطعت نفسي وخر.. بعد ايدو وحطها على خصري خفيف ما ثكلها..

ونام .. دحكت بيه.. وجهو متعوب .. وشكلو مثل الشايل حمل الدنيا فوك جتافو.. حطيت راسي ع المخده..

وكمت ادحك بوجهو لحد ما نمت.. كعدت عليه وهو يشيل راسي ويمد ايدو جو راسي ..

كعدت.. وردت اكوم.. همس وييين خليج..

-ما اريد.. شبعت نوم

-اي لا تنامين ابقي على موبايلج.. يحجيها مغفي.. جان اجا الصوت من الحجيه..

كوم يمه صارت صلاة المغرب عود بليل واخذها يمك اذا تريدها شكو باقيه مكابلتني

-هو من حجت الحجيه .. انحرج نسى وجودها بالغرفه.. كام طلع بسرعه من الغرفه..

طلعت للمطبخ هو توضى وكال صعدي بليل فوك بالغرفه لا تنامين جوه..

ما رديت .. عافني و راح يصلي .. و هم يصلون .. اندكت الباب .. طلع حرب فتح الباب.. نور مرت عابد واهلها..

جايين زياره لبيت الحجي.. طبو وهلا ومرحبا وانخبصنا بأهلها اختها جانت وياها .. اول ما فلت انتباهي بيهم..

هي جبة اختها سوده وتتسمى صايه ناعمه وزاته روحها وخفيفه.. وبيها تطريز بنفسجي من ايدها تجنن

والردن مثل السترج وتصير من فوق ضيقه ومن جوه عريضه.. كمت ادحك عليها .. اجت ابتسام بليل هي وجهالها..

والتهينا نسويلهم عشا.. كتلها هيام هيج جبه وين يبيعوها.. كالت يولي عجبتج.. كتلها اي حيل

كالت انه اسألها ومن اروح للسوك اجيبها الج.. طبت للمطبخ نور واختها .. خطيه ميعرفون يكعدون جهزو ويانه العشا..

فهيام وهي واكفه كالت لاختها اسمها اميره.. كالت الها اميره جبتج منين ليونه انعجبت بيها حيل واريد اشتريلها منها..

كالتلها خل تاخذها..

كلت لا والرب ما اريدها اريد مثلها

-عيب والله شنو قابل شماخذه نمونه.. اخذيها ولا تكولين

راددتها هيام ولا وما تريدها بس انريد من وين جبتيها كالت ابد.. تلبسها هسه انعجبت بيها تاخذها وفدوه .. مو عيب ترديها احسبيها هديه لمرت ابو حرب..

هيام كالتلها فدوه العينج ما تقصرين.. واندارتلي كومي لبسيها بالله.. كالت بغرفة الحجيه نزعتها ..

رحت لبستها وطبت هيام ونور و اميره .. كالن تجنن عليج هلكد.كاعده على جسمج طلعتج حوريه.

اني فرحت عاد وكبر راسي كد ما مدحو بيه وكمت ارفع بياخاتي بس للاسف ما بيها ياخه..

فرحت للمرايه حيل عجبتني هي اميره هم ضعيفه مثلي فتراهمنه..

كملنا العشا وخلصنا الهوسه. واهل نور راحو بقت بس نور عدنا فرحانين بالتوم مالتها.

اجه صراع للغرفه كاللها ام علي باجر بيت عمي عزام مطهرين ابن ناظم وخابر يعزمنا وحلفني الا العائله كلهم اجيبهم.. ترحين خويه..

-والله ما عدي مانع بس شكو شنو عازم

-هو قبل يومين خابرني على موضوع سعد وامو.. ف اعتقد على هلموضوع يريد يسوي صلح ومن هلامر..

-هااا خير ان شاءالله ما بيها شي .. نروح.. اندارت لمرت عابد كالتلها ترحين..

-والتوم

-شعليهم .. انه وليليان والحجيه نعاونج بيهم..

-عادي ما عندي اشكال.

صراع:- عجل تهيرو باجر ع الساعه تسعه كونكم جاهزين ..

هيام:- تأمر خويه بس خابر على علي يقفل البيت ويجي لهين ينام دام مرت المرحوم هينا .. ما اعوفها خطيه .. والحجيه تعبانه..

-اي ان شاءالله..

رفع جهازو خابر على علي وهيام كالتلي ليونه فرشيلنه خل انام من وكت..

كلتلها اي.. جاي افرش.. صاح صراع..:- ام علاوي خابرتو وطالع للبيت يقفل ويجي..

اندار عليه ودحك افرش.. كال ليليان بويه انتي صعدي فراشج فوك خاف هينا ماكو مجال..

هزيت راسي .. وما رديت .. وفرشت ونمت يمهم ما صعدت ابد.. دز عليه بت هيام كالت خالو يريدج..

كالها كوليلو لكيتها نايمه لا تكولين كاعده ماشي..

كالت ماشي وصعدت.. واني نمت بفراشي..

لثاني يوم كعدت بالسبعه.. هو نزل هيام واكفه.. كاللها ام علي انه رايح للدوام .. انتو خلو نائل يوصلكم ..

انه مناك واطلع عليكم بس اخذلي اجازه زمنيه.. كالتلو تأمر..

اجه للمطبخ راد يطلع اني واكفه اشغل بالطباخ.. كضب ايدي حيل وحجه..

يولي مو انتي اللي تذليني وتلعبين علي انه ما شامر روحي عليج الف وحده بره تتمنى الكلمه بس كلت اصير ابن اوادم وما اظلمج بس منا وجاي اصطبريلي يصير خير.....يتبع

☆☆☆☆☆☆