المراهقة والأربعيني الحلقة (20)

المراهقة والأربعيني

الجزء الأول

الحلقة  (20)

تأملت ان بعد ما هيام حجت وي صراع ممكن يلين ويفتح صفحه جديده ويحجي ويايه..

واللي صار .. تشبث بزعلو وما بادر بالصلح ابدا.. ردت احجي اني ولو اكوله صباح الخير حتى اكسر الزعل رغم ان هو هدأ

لكن خفت يحسب ان اني زاته روحي عليه واني الغلطانه واني الاعتذرت. رغم اني مغلطانه هو اللي غلط بحقي

اقل حقوقي حارمني منها.. ميصير تحفين ميصير تلبسين الوان.. يجي احد.خطار ما يقبل اطلعلهم.. خاف يكولون شو صغيره

اني شنو شذنبي ؟!

وشعليه بأبن عمو اذا هو يدخل براحتو وياخذ ميانه بساع .. ما حجيت وياه شي عيب حتى اترزل واتحمل كل هذا..

يغار.. يمنع ابن عمو يدخل.. هو يستحي منهم ويجي يطلع غيرتو بيا.. وتالي هو اليزعل ولازم اني اصالح ..

خلي زعلان شسويلو هو من غير هيج شايف نفسو ومتكبر ع العالم .. مو انوبه اني اتوسل الصلح منو ..

اذا هو عنده كرامه اني هم عندي..

فبقينا لا هو مصالحني ولا اني صالحتو.. يحجي وي حلا.. ويطلب منها شغلاتو وملابسو

وحتى حلا ملت من صخرتو كامت كل ما يصخرها تجي تكلي كومي.. اكوم احظرلو اللي يريدو وابعثو بأيدها..

بس رغم كل هذا ما كرهتو.. صار حبي يكبر الو يوم بعد يوم.. وكل ما يمر مني اقطع انفاسي لحتى بس اشم عطرو

من يكعد اتعمد اكعد.. وابقى ادحك بوجهو.. هو يحس بس ابد مينطي ردة فعل يبقى على نفس الكبرياء وحتى ابتسامه ما ادحكها منو..

ليش احبو ما اعرف.. بس اللي اعرفو ما عندي غيرو بحياتي افكر بيه. وين اروح حياتي بس حبسه وشغل..

واعتيادي الانسان من يسوي شغله تكوم الافكار تنزل عليه طيب اللي ما عنده افكار بحياتو وين يروح..

ف ابقى ليل نهار افكر بيه وحبو يزيد ويزيد وهو مو داري بشي ابد.. وكأنو حجره ما يحس

مر اسبوع وهو على نفس موقفو ما تنازل ابد.. ومحد ادخل بينا .. كلها تاركتنا على راحتنه نتفاهم. بس صرت اكره هلوضع..

يدخل يشتري لاطفالو ويحط كدامنه .. يبوسهم ويوزعلهم واني على كتر كأنو غريبه..

صرت اتضايق حيل.. وكل يوم بليل ارش المخده مالتي من عطرو وانام عليها وبدل ما ارتاح اضل ابجي.

ليش هيج وضعي لا اني بنت بيت ولا اني متزوجه لا اني بنتو ولا اني مرتو .. صح يدافع عني.. ام سعد يحجي يوكفها .. وتخاف منو

بس هذا مو كافي هو رجلي لو لا.. اني مو صغيره .. هواي بكدي متزوجين ليش ما يريدني زوجه الو..

ليوم كنت اشتغل .. خلصت ودخلت لغرفة الحجيه.. لكيت حلا ادور بأغراضي.. تقربت منها طلعت العطر..

سحبتو منها وخليتو وره ضهري وصحت:- انتي بأي حق تلعبين بغراضي

-هذا العطر مال بابا مو

-لا مو الو..

-لا مال بابا بواكه جيبي

-ما اجيبو ومعليج انتي .. لو طلع وجه الحيه الضامتو صار ايام.

-خل اشوفج الحيه منو..

-دفعتني وكضبتني من شعري .. واني شمرت العطر وكضبتها من شعرها ومكاون اني وياها وهي تصرخ. وتبجي ومجلبه بشعري واني اصرخ عليها

عاد دخلت الحجيه :- يا يا عزا العزاجن ولجن شجاااجن يااا دعوفيها

-هي زلغت خدي اني جريت وصله من شعرها بيدي..

حلا:- جده هاي بواكه تبوك ابوي تحجي ووجه احمر وتبجي

-تذكري منو البواكه .. اشكر الرب ما بكت ابويه وخليتها براس غيري وتهمت واذيت ناس مثلج يا حيه

حجيت وهم هجمت عليه وجلبت براسها دخلت نوال تفاكك بيناتنا وهي تبجي وكلبتها درامه وتصرخ ويجي بابا واكلو والا اخلي يطردها شلعت شعري اخت الارهابي..

عاد نوال اخذت حلا وطلعت.. واني كعدت ابجي .. طلعت ورجعت فتحت الباب وبكل عصبيه وحيل تمشي . اخذت العطر وتخزر بيه..

صبو اكل ما طلعت بقيت بس ابجي وام سعد.ما قصرت حجه ولكتلها بقت تجيب وتصفط وتدعي عليه

ب3 ونص حلا سمعت سيارة ابوها دخلت الكراج هي خبصت شعرها ووكفت تنتظرو.. اني كاعده بغرفة الحجيه..

دخل كال السلام عليكم. ردو هم السلام.. وتلكتو حلا .. هي حجت وبجت بصوت عالي

-بابا تقبل ليليان تملخني ...وجامعتلو الشعر مالتها الملختو ..

-هاي شكو بويه والله تعبان

-دحك بابا شسوت بيا الكلبه.. تقبل الله عليك تقبل

-شنو السبب

-بابا كتلها ليش تبوكين ابوي وهي هجمت عليه والله

-شبايكه يمه صيحي ع الثانيه تره والله تعبانه ما بيه مشاكل

صاحت عليه الحجيه

كمت ... طلعت.. هو رفع حجابو واندار راد يحجي من دحك وجهي.. عقد حواجبو وكال

-هذا شبي وجهج شو حدري..

-ما تقربت منو.. وحجيت. مثل ما ضربتني ضربتها

-وعلى شنو

حلا:- بابا بايكه العطر مالتك اللي انت جنت ادور عليه ومخليتو بخانتها وما حجت الفكر ..

-حلاااااااا ... خزرها..

-بابا والله هي باكتو من غرفتك وفوك بوكتها تضربني .. هذا دحك..

انطتو العطر.... ما انكر خفت من ردت فعلو لا يعتبرني بايكه مثل كل مره..

بس اللي تعجبت بيه.. يمسح وجهو ويحاول يخفي ابتسامتو ويمسح على شواربو.. استغربت.. على شنو يتبسم

صراع:- حلا نبهتج بابا تبطلين مكاون وي ليليان لو لا

-بس بابا

-حلاااا ... اسمعي هل جلمتين وافتهميهن بتي.. ليليان بهذا البيت مرتي.. ودام هي مرتي يعني كلشي املك من حقها وهي شريكه بي ..

فلوسي عطري كلشي املك.. تاخذ .. ممنوع تكولين عليها باكتك .. لما تاخذ من غيري وكتها خبريني اتصرف

وياريت تبطلين فتنه وعداوه وياها صار معلوم

ليليان:- ما اعرف اني احلم لو حقيقه اسمع هيج كلام وهو يكول اني مرتو.. بقيت بس مدنكه بس العرك كام يصب من التوتر

-بس بابا ضربتني

ما رد عليها.. كام وجهو صارم.. وصاح ليليااان وصعد.. بمعنى اصعد وراه..

زين هسه هذا شنو وياي لو عليه.. صعدت وراه.. دخلت لغرفتو.. لكيتو نازع الجاكيت و عينزع بالقميص..

-حدري

-مشيت يمو.. عمو اسمع

-دا اسمع

-اني ما بكت عطرك .. اخذتو بفضول وبس ردت ادحك تصميمو... بس انت سألت عليه. وووووو جاي احجي نزع القميص..

بلعت ريكي..

-اي

-وين وصلت ... ااا هو لما انته سألت اني خفت...... نزع الفانيله الداخليه .. عركت وضيعت الكلام وكمت امتمت واحس عركت

-اي

تقرب مني صار كبالي.. وهمس كملي..

-اريد اخذ نفس حتى النفس كمت استحي اخذو يمكن وجهي صار طماطه..بس منزله راسي..

مد ايدو.. واخذ حنجي ورفعلي راسي الو.. احس راح يغمى عليه من كد الحجل والتوتر شكد.ميستحي..

-اتركيني من كل هسوالف وكليلي شنو السبب اخذتي.. ليش

-ااااا اخذتو ااااا ما اعرف.

-همم...

-تركني ومشى مني.. اووووه ربي الهوى.. ضليت اهفي على وجهي بيدي احس سخنت

-ليليان

-اندرتلو .. دحكتو رافع الموبايل .. تقربت اخذتو من ايدو

-تريدين اهلج مو

-كال هاي الكلمه لو احس گلبي انقبض.. بس لا صدك يسويها ويرجعني وارجع ليحيى .. ما اعرف ليش للحظه تمنيتو يرفض رجوعي لهناك

شنو السبب ما اعرف.. بس جاوبتو ليش...

-افتحي الموبايل..

-سحبت بأصبعي انفتح..

-الهاتف.. روحي ع السجل واتصلي

-دورت شي اسمو هاتف.. اي لكيتو.. دست السجل.. اول رقم ام ليليان..

-رفعتلو عيني .... امي

-اي مو مشتاگه الها وتردين اخبارها.. خابري واطمني عليها واخذي راحتج بالكلام اني اروح للحمام..

-هو هيج من الفرحه ما عرفت شسوي دا اكلو شكرا بس من كد ما فرحت لا اراديا حظنتو حيل وكتلو شكررررررا

بس بساع حسيت بجسمو ما لابس شي.. ابتعدت العفو العفو والله مو قصدي بس صدك فرحت.. حجيت وبجيت.

-ههههههههه لشو حدري.. اخذني لحظنو وحظني حيل واني كمت ابجي بقوه من الفرحه.

بعد شهور راح اسمع صوت ماما.. بعد كل هلغربه والمعانات راح راجع لحظات لحياتي بالموصل واتذكرها

مسح على راسي.. وكال اخذي راحتج. وطلع.. اني دست اتصال.. واتصلت..

رن.. لو احس كلبي راح يطلع من ماكنو.. هي كالت الو .. واني انفجرت بس ابجي .. بكل قوتي

وهي تكول الو ليليان..

-لا تقولي ليليان ابدا .. ليش ماما ليش .. اشقد انا رخيصه عدكي .. تعبتو ماما هوني تعبتو

-لا تقولي هكذ ماما والرب انا ما عيشي .. كل فكري بيكي بس ما عندي رقمكي .. وتبكي

-لحظات ما نحكي هي تبكي وانا ابكي.. اشقد صعب ويحد يترك اهلو ويعيش بنص ناس غربه ما ترحم وتضل وحيد بيناتم وفجأه تلقي ويحد من اهلك وتحكي معانو

هوني كل الهم ما اطيق تعبر عنو غير بصرخات بكا تطلع من نص قلبك..

مسحت دموعي.. وقتولا.. انتي وينكي ليش محد منكم جا وسأل عني ليش هكذ تركتوني

-ماما انا انتقلتو بعد زواجكي لبيت خالكي لان تقاتلتو انا و يحيى وطلعتو عشتو.. بس ما تحملتو اعيش عد احد..

وهسه رجعتو اعيش ابيت يحيى وطالبتونو يبيع البيت ويعطينا الحصه واشتغي حتى اطيق اطلقكي واخذكي يمي

بس انتي قولي اشونكي اشون احوالكي زوجكي اشونو معاكي ..

-وضعي ما يسر ماما صعبين كثيغ .. بس عيشي واكو اليرحمني..

-اصبري ماما بس اشتغي بيت اخذكي ونعيش سوا.. زوجكي اشونو معاكي

-صعب كثيغ و طبعو ما ينحمل بس غجال طيب ويخاف ربو ..

-الرب يهدي عليكي يا بنتي ويسهل امركي .. على طول اطلبلكي الامنيات بالكنيسه و افتحلكي شمعه تنور طريقكي وتسقط كل عدو الكي يا امي الرب يحميكي..

-مشتاقه للكنيسه ماما .. مشتاقه ابكي عد امنا العذرا وانا اشكي حالي لتسمعني

-تسمعكي يا امي والعذرا معاكي وتحميكي..

-عدحكي .. دخل صراع من الحمام.. قتولا ماما انا استرخصكي وما تنسيني ارجوكي وخبريني بلي يعملو يحيى الرب ياخذلي حقي منو..

-تمام ديري بالكي على حالكي وقنعي زوجكي كل فتره تتصلي بيا..

-تمام. باي..

كمت وانطيتو الموبايل .. وكتلو ما اعرف شلون اشكرك .. ما جاوب بس ابتسم وهز راسو..

-بس سؤال منين جبت رقم ماما

-دزيت واحد للموصل ياخذلي رقم امج من مرت ابوج لان ما عندي رقم خالج. وطلعت امج موجوده ابيت يحيى

واخذت الرقم

-شعجب دزيت وبحثت عن رقم ماما..

-ليليان.. وكت اللي تشتاقين لأهلج كليلي انه اخليج تخابرينهم بس رحمه لاهلج .. سالفة ارجع لأهلي انسيها..

يحيى ارهابي وامج مجبوره تعيش عندو بس شغلة انتي ترجعين تعيشين هناك.. مستحيل اقبل..

-ماما راح تشتري بيت ونعيش سوا ..

-اخذ نفس.. منا ذاك الوكت الله كريم..

-شكرا.. نزلت منو.. صح فرحت لان سمعت صوت امي.. بس حزنت اكثر لأن تذكرت ايامي وحياتي هناك.

وين كنت وين صرت .. مشتاقه للموصل لبيتنا لمدرستي لصديقتي ساره .. كل ذول اني انحرمت منهم ومجبور اتحمل اعيش هنا..

دخلت غرفة الحجيه. فرشت وكعدت ابجي جوه البطانيه ... ابد ما بطلت بجي.. كأنو كنت نايمه بسبات واتصال ماما صحاني ورجعني لبعيد..

والحجيه تفوت تطلع تسألني شبيج يمه ليله .. شبيج تبجين صراع اذاج.. وما اجاوب .. اخر شي دزت حرب على صراع..

اني نايمه وهو فات .. ها يمه .. كالتلو.. شبيك وياها يمه هاي انته التخاف ربك تكدر خاطرها علمود عطر..

-لا يمه ما حاجيتها والله بس حجت وي امها وتضايكت..

اجه وكمبص يم راسي.. شال البطانيه لكاني ابجي..

-ول يابه شمسوي بروحج بويه ليش هيج.. عجل انه خليتج تخابريها خاطر تفرحين لو خاطر تبجين اكثر..

-لا عمو فرحت بس ...اشتاقيتلهم هوايه... واختنكت بالبجي..

-كومي يابه كومي لا تضلين هيج ما يصير .. مو كلتي راح تشتري بيت وتعيشين وياها عجل ليش البجي كومي لشوف ..

-كومني.. روحي غسلي وجهج بساع .. يلا بويه ما يصلح البجي صدك جذب..

-كمت غسلت .. ادحك عيوني الجفن مورم كد ما بجيت... وهم بجيت.. مو بيدي حنيت اريد ارجع لاهلي..

اجه هو.. دحك بيه . وصاح حرب كول لجدتك و اختك يحظرون ارواحهم بعد صلاة المغرب اطلعهم اعشيهم برا...

واتقرب مني يكول .. لا تظلين هيج بويه يلا تهيري خل اخذكم دام الهوى طيب ما بارد كلش..

هزيت راسي.. ورحت حظرت نفسي ولبست .. هو لبس دشداشه ولف اليشمغ.. وكعد يتاني صلاة المغرب..

بس صلا طلعنا .. اخذنه اني والحجيه وحرب وحلا.. ذيج دايره وجهه مني..

الجو حييل حلو.. بارد. بس مو كلش .. الشهر الثاني .. من تشتم تحس تتنفس كد.ما الهوى طيب..

فاتح الجامات ومخلي الهوى يلعب بينا .. واحنه كل واحد صافن بديره...

الحجيه يمو.. واني يم الجام وحلا من الجهه الثانيه.. و حرب بوسطنا.. انتبهت كل شوي يدحك عليه من المرايا..

ما حجيت ولا بادلتو .. ضل يدور بالراديو على اذاعه او شي نسمعو.. طلعت اغنيه اسمها ..ربع حبي يعادل كل اليحبون ونص حبي الك ما حبتك امك..

تركها.. اني منتبهت بقى الاغنيه بس استمتعت واني اسمعها بهلجو.. بس الحجيه ما قبلت..

كالتلو.. شو خربان يمه من يمتى تسمع اغاني.. هاي انته التخاف ربك..

صراع:- تالي العمر يمه تالي كمت اسمع وادحك جروحي بيها..

-دسدها يمه سدها طلعنا دعا قران. شهسوالف هاي يحح..

-هو مبتسم.. اني من دحكتو مبتسم ضحكتلو.. فرح بالزايد.. وافتره.. صار يحجي ويجامل ويانه ويتشاقى وي حرب..

نزلنا للمطعم.. كل واحد طلب اللي يعجبو.. هو والحجيه طلبو دجاج.. اني وحلا كص.. وحرب راد همبرگر

هو سريع بالاكل.. اكل وگام.. كال اكلو على راحتكم انه رايح اصلي العشا لأن اذن.. الحجيه كالتلو تاني اخذني وياك..

اكو مكان بالمطعم.. زاويه الناس تصلي بيها..

هم گامو وحلا استلمتني.. تلعبين بعقل ابوي بسيطه انه الج

-مو اكلو والله هيج تكلي وتعرفي شلون يتصرف.

-دكولي ودحكي شسوي بيج..

-مخايفه منج افتهمتي..

-ضلت تغلط..

-اني بس كتلها ما ارد على غلطج عادي.. مو حلوه ارد العضه لچلب عضاني اتركو لانو كلب..

هي زات بالغلط.. واني درت وجهي منها واكل.. وهي تحرك بروحها.. عاد حرب كاللها صوتج منا الناس كافي منغوليه..

وكامت تكرص باخوها وتصكعو على راسو.. كام يبجي حرب.. اجه صراع مكمل صلاة..

-شبيكم يابه مكاون ما يوم هديتو

حرب:- بابا تغلط وتصيح على ليليان كتلها عيب منا الناس ضربتني وكرصتني..

-لا بابا والل.... خزرها وهو يصك على اسنانو ويكلها حلاااا .. دنكت رايها وما ردت..

طلبنا عصير .. شربنا.. دفع وطلعنا.. حلا طول الطريق تحجي وي الحجبه على مود يزتها على بيت جدها..

عاد حجت.. الحجيه.. يمه خل تروح لخوالها.

-ممنوع

حلا:- بابا والله جده وخاله اخلاص مشتاقاتلي جثير ورادت تجي جده البارحه وخابروني وكتلهن اگل لبابا فدوه الله يخليك..

-واني اكووول شبيج اليوم تخبله ثاري خليصان مخابرتج.

-لا تحجين على خالتي افتهمتي..

صراع:-هااااااا

الحجيه:- يمه زتها على بيت خوالها خل نخلص من لغوتها يوم راسي داخ منهن ثنينهن والله.

-بالقران راس براس بس اسمع صوت..

-درت وجهي منو ما عجبني.. هو فر فر.. ودار راح على بيت عمو.. نزلنا هي فرحت حيل باست ابوها وركضت ادك الباب..

-عمو اني ما اريد انزل .. خليني هنا

-وشعندج هين .. نزلي محد.منهم طالبج ثار ..

-نزلت كوه عليه.. فتح الباب خالها ورحب بينا.. دخو للبيت وصراع واكف يدخلنا كلنا يلا فوت هو..

اني اخر وحده.. حط ايدو على ضهري وفتنا.. طلعت خليصان والسانها يهلهل .. وهلا ومرحبا ويا وسعجب ويمه البيت منو..

اني لفيت ايدي على ايد صراع وهو ما كال بس مبتسملهم ... دخلنا للاستقبال مالتهم.. كعدت يمو ع التخم..

جدته زلوف جانت موجوده.. نايمه.. من كعدت كام باس راسها وكعد.. ويسولف ومرجع ضهرو للتخم ويفر بسبحتو..

جت خليصان.. وزعت ماي كاللها ما اريد تونا اكلنا وشربنا.. جاوبتو يا شلقصه

وابوها حجه :- ما مقبوله منك ابو حرب عجل ليش ما جيتو تعشيتو عدنا

-دايمه الله يحفظكم عمي ... المره تضايكت اليوم تعرف اهلها ما تخابرهم واليوم حجت وي امها وكلبتها مناحه حنتلهم..

عاد كتلهم بويه دكومو خل اشممكم هو منها تفتره وحرب هم كعد من المدرسه.. عطله .. عشيتهم برا

-الف عافيه

اخلاص :- عجل جاي ابو حرب

-لا الله يحفظج شربنا عصاير تونا

-اعرفك ما يكضب كلبك العصير ولا تخاف اعرفو طبعك الا استكان جديد.. هو ابتسم وكاللهم اي والله الله وايدج اذا جديد

بودي اكوم انام بخوانيكها اللوكيه.. شكد تلح. ما عندو بيت يشرب جاي وهو ما عون بس يتبسم ويضحك.. لو اني جان كال ما اريد الجاي منج تسمميني..

بس بعد خليصان قائد الميدان شلووون.. على اساس راحت تسوي جاي وهي وكفت انتجت ع الباب وادحك بوجه صراع من يحجي وي عمو..

التوبه ربي... قربت راسي منو وكتلو عمو شوكت نروح.. هو شال ضهرو من التخم وتعدل وكال هااا

-شوكت نروح.

-هسه صبري

-الصبر يارب.. وخليصان ما شالت عيونها عنو.. جت قدمت الجاي واني لا تكلي انتي ما تشربين مو..

وقدمت بس للحجيه وصراع وابوها.. كتلها لا ما اشرب الجاي بأي بيت ما استنضف الا اغسل بيدي..

صراع ندسني برجلي وخزرني..

-عمو نعست والله..

-هسه بس اخلص الجاي

-يعني بس هنا جاي هناك اسوي واشرب بس اني نعست خل نروح

-همس.. انتي ما شربت جاي اذا ما سممتيني حتى هين طلعتي روحي منو.. كومي امري لله لشوف وين تصل وياج..

كام. صاحو بعد وكت شنو السالفه ابو حرب جايك ما كملتو ..

-الله يحفظكم بس نعسو تعرفون نكعد من الصبح خل اروح احسن دايمه ان شاءلله..

اخلاص:- شنو ما تلحك ع النوم يا ابو حرب .. شبيج خايبه سممتي .. ما تصبرين.. عمي الله يعينك عليها هاي بلوه هواي تنك..

-اني هنا صدك صرت ثور كمت اطلع دخان من مناخيري 😤 اريد انطح ..

لو ما هو حاط ايدو على ضهري وكاليللهم تمون.. لا جان صدك ناطحت واول واحد انطخو هو.. بس تلاحك روحو..

طلعنا من البيت واني اقلد عليها.. صعدت بالسياره.. ما عرفت اسكت.. الله يساعدك عليها هاي بلوه واعوج حلكي واقلد بعصبيه.. ما غيرج بلوه وجه الجدر ..

وهو والحجيه يضحكون..

الحجيه:- شبيج وياها ههههه

-قليلة اصل وقليلة اخلاق ولا تربيه..

صراع:- ليليان..

-انت كادر بس على ليليان تنطيك جاي تتبسملها اني انطيك تكول مخليتلك بيه سم.. بس ترزل بيه

-هههههههههه

-اضحك اضحك.. تقدملكم جاي واني لا لو بنت اصول جان كللت اني ضيفه ابيتهم بس شلون .. على كولة هيام ام دوده.

-هههههههههههه هاي هيج ام علي تكول عليها..

درت وجهي منهم ما رديت لحد ما وصلت البيت.. صاح جاي انتي وعدتيني..

-ارجع لخليصه تشربك..

-ههههههههههههههههه

-فتت للغرفه فرشت ونمت.. بليل طب جايب حلويات اني ما ادري .. ضامتهم الحجي اليه الصبح انطتني..

وشغل وتنضيف كلعاده وام سعيدان الما تصم حلكها تعودت عليها..

للضهر اجه هو.. تعودت احظرلو ملابسو وانزل احظرلو غداه. واصعدو

فماعد.ياكل.. اجاه اتصال.. كالي مشكوره بابا اخذي راحتج.. عرفتها طرده بأدب بس ليش

طلعت وبقيت اتسمع ع الباب.. يكول.. افتهمت .. باجر اجي لبغداد ونتفاهم.. لا مو ابيتج بشقة اسامه الحجي.. ان شاءالله

-يعني بنيه.. وشقه وبيت وابغداد.. معقوله متزوج هناك..

ما اصدك منو هاي.. بقيت الوب بالممر شوي وطلع يغسل. اني سويت روحي اعزل بالدرج...

مشى للحمام وفات.. اني ركضت لغرفتو بسرعه فتحت موبايلو .. اول رقم بالسجل .. اسمها ام مصطفى ...

تخبلت منو هاي اليروحلها للشقه.. دست اتصال اريد اشوف مره جبيره لو صغيره.. اول ما رن. سحبو من اذني

-شدسوين.. هاي منو سمحلج تفتحين موبايلي وتتصلين شنو هل جرأه..

-ليش ما مسموحلي.. مسموح لبنتك تفتش غراضي وتبحوش بلكت تلكى زله عليه ومسموحلك تراقبني وتتحكم بيه ومسموح لام سعد ترزل وتسب بيه

ومسموح لامك تصخر وتكوم بيه .. ومسموحلك تضرب وتكفخ عليه.. كلكم مسموحلكم..

بالله متكلي شنو المسموحلي.. ما مسموحلي اشوف المسلسل اللي يعجبني ما مسموحلي اسمع اغنيه ما مسموحلي اناقش ما مسموحلي اي شي..

اني شنو هنا فهمني.. بس انطيني مكانتي..

بنتك ؟!!
مرتك ؟!!
خدامتك ؟!!
لو خدامة اهلك والمكفخه مالتكم.

-راح ترجعين للسانج الطويل وراح ترجعيني استخدم غير اسلوب وياج..

-لا ارجعك ولا ترجعني عمو.. ارتاح.. دنكت اخذت الصينيه.. وطلعت..

نزلت للمطبخ.. اغسل ودموعي فوك الغسل.. شوي ونزل .. متكشخ ومتعطر.. ومتشيك.. ونظل بكل غرور فات مني وما حجه..

متزوج ... اي اكيد متزوج.. اكيد.متزوج.. وكعدت بالكاع دموعي تصب.. كلها بالغرف نايمه واني كاعده وحدي ابجي..

على شنو حبيتو.. وليش .. لا من ديني ولا من ثوبي ولا بعمري ولا حتى من محافظتي..

الغباء اللي اخلاني احبو وابجي عليه ليش.. گلبي شنو شاف بيه وحبو..

خنكني هلحب خنكني.. يارب خلصني.. احس نار وتمشي بجسمي ما جاي ارتاح....

الصوج مني هو لا وعدني فد.يوم يتقبلني ولا رادني اله زوجه اني اللي احشر روحي بيه كل مره..

اني اللي شامره روحي عليه.. هو ما عاملني الا مثل بنتو.. اني اللي مننت روحي بيه.. واستاهل انكسر

حتى ما عندي الاحجيلو واشكيلو وارتاح.. بس دموعي تشكي حالي...

حسيت واحد.طلع.. كمت بساع غسلت وجهي ووكفت ع السنك.. خلصت ودخلت مددت ابجي لوحدي..

للعصر.. طلعت اخلص شغل وي نوال.. بس مبين على وجهي متعوب.. ما جا هو ابد حتى ع العشا...

ل12 يلا دخل للبيت.. الحجيه كاعد تقره قرأن .. فات باس راسها ودحك.بيه.. اني وجهي يكصو السيف..

كاعده وادحك ع التلفزيون.. شويه وحجه كاللها يمه انه باجر طالع البغداد..

كالتلو خير يا طير شكو

-شغل عندي هناك اخلصو وارجع

-ترجع بنفس اليوم لو تبات..

-لا ابات...

-اني من كال هيج .. اختنكت حسيت نفسي راح اطك.. كمت من مكاني بسرعه طلعت من باب المطبخ للحديقه..

كعدت وصفيت رجليه وضليت ابجي صدك تمنيت بيها الموت.. الموت اهون عليك من ان تشوف اللي تحبو يخونك ورايح عند غيرك يبات والاصعب ما تكدر تحجي وتعاتب وتنفجر..

لازم تبقى تاكل بروحك ودموعك تحس تجرح خدك.. مشاعر غريبه عليه.. اول مره احب بحياتي بس حيل تأذيت.

مدنكه راسي بنص رجليه ابجي ولافه نفسي بأديه.. حسيت حركه.. يمي .. اندرت بساع..

دحكتو صراع واكف وراي

-شعندج هينا كاعده..

-اشم هوى .. لو هم ما مسموحلي اشم هوى بقائمتك..

-انه بشنو اذيتج..

-لا ابد ما اذيت ..

-دحكي ليليان .. لا صار ولا عاش اليحاسبني شسوي لو وين اروح واجي...

-ردت امشي..

-يولي احجي وياج هييين. دام احجي وياج وما خلصت ممنوع تحكريني وتمشين..

-غثيتك عمو لما ردت امشي واعوفك وما اهتم لحجيك ولا بشنو تحس من اهانه من احكرك.

شفتها شكد.صعبه؟

-ليليااان..

-عمو الله يخليك اتركني لا احاسبك ولا لريد.كولشي بس اتركني.. سحبت ايدي منو

وفتت ابجي.. نمت بفراشي وغطيت راسي وابجي .. فات وراي للغرفه.. دحكني نايمه..

ما حجه غير .. عونك الهي..

الليل المر كله.. ما غفت عيني لحظه كد النار المشتعله بداخلي.. احس روحي تفور.. كعدو يصلون اني بفراشي مثل سمجه مزهوره..

لا بيه اكوم ولا بيه انام وارتاح.. احس روحي تفرفح.. الحجيه كعدت تقره قرأن الفجر هو نص ساعه ونزل كاللهة

ها يمه انه طالع البغداد..

-يمه مو مستعجل

-يمه گبل الازدحام.. بس تصير 8 ازدحام بغداد ما يرحم..

-محفوظ بعين الله يمه.. امانة الله عنده تروح وتردلي بالسلامه ويبعد عنك كل شر ...

-يحفظج الله يمه.. هاي فلوس .. وخابري هيام .. تجي تاخذها للسوك تشوف شتريد ..

-ان شاءالله يمه لا ادير بال ...

-يلا اودعناكم

-ادمرت ربي اريد اصرخ تعبت.. كمت من فراشي ما تحملت بساع طلعت وراه.. حتى نسيت الحجاب نسيت كلشي..

فتحت باب المطبخ الجو مغيب وهو لابس لفاف على ركبتو وجاكيت جلد جوزي.. صحت صرااااع..ولاول مره انطق اسمو بدون تكلف..

هو اندار بسرعه .. وفاتح باب السياره.. مستغرب وهو يدحك بيه بهلفجر وعيوني مورمه واصيحلو بأسمو

سد الباب وتقرب ... نزلو دموعي كدامو بكل ضعف واني اگلو ...اتمنى تفهم اني والله ما محتاجه فلوس...يتبع

☆☆☆☆☆☆