المراهقة والأربعيني الحلقة (22)
المراهقة والأربعيني
الجزء الأول
الحلقة (22)
تقرب مني.. مسح على شعري ولمه الشعر ليوره.. ودنك باسني بكصتي و بخدي
.. وغطاني ويكول انوبه هي مصلخه يربي شتحجي بطرك هلثوب المشلتح..
زنودها ورجليها صارت فرجه للرايح والجاي بالله لو ما محتركه جان انه
حركتها على منظرها هذا جدام ولد عمي بهلثوب...
الحجيه:- عجل يمه اذا انت تغار عليها وبنفسك ليش ما تاخذها..
-يمه بعد وكت على هالكلام.. وطبختج كل ما خليتيها
على نار هاديه تطلع اطيب وتستوي على راحتها تركي الامور هي تمشي وحدها والله كريم
حجه وطلع.. ما فهمت شنو نار هاديه شنو تستوي ووين ياخذني. المهم
ما درت بال.
درت ونمت..
كعدت الصبح .. صراع كان ما موجود.. بس حلا جايه والعرفتو صراع رايح
جايبها وجاي وهي مبوزه وما عاجبها لان ما قابل تبقى اسبوع يومين وغابشلها من الصبح..
مگلوبه خلقتها.. تركتها .. طلعت .. متريكين..
الحجيه:- يمه الجاي على الطباخ والريوك بالثلاجه والبيض موجود. لا يضل
حلكج فاهي وادحكي وجهج صاير كركم حتى علاجج ما جاي تاخذي يا بنتي..
جانت كاعده بالهول وماده رجليه والصوبه يمها.. تقربت وكعدت يمها وخليت
راسي على رجلها وتمددت واكولها..
-عمه رجلي توجعني
ام سعد :- لا تكعدين تدللين كومي كفي اردانج واكفي وي سلفتج ع البيت..
-مابيه رجلي توجعني
-هلكلام ما يمشي يمي.. يلا شو كومي. كومي بساع ..
الحجيه- خافي ربج ام سعد البت محتركه وينها وين الگومه..
-بهذا حجيج جاي اطلعين عينها ترانا ما خدامين عدج
وعد جنتج خوووش وتكوم تنظف حالها حال جنتي..
-دام صار الحجي جنتج وجنتي يا ام سعد.. عجل صار
لازم ينوضع حد.. ونعزل كل واحد لحالو
... كل هذا الحجي واني مخليه راسي على رجل الحجيه
وهي مخليه ايدها على راسي وتحجي..صدك احسها امي من ادافع عني..
دخل الحجي كال ليش اصواتكم طالعه .. جاوبتو ام سعد.. تقبلها يا ابو صراع المره نوال ليل ونهار تشتغل وكلنا واكفين وهاي
تتمرغل وادورلها حجج وما تشتغل
البيت هم الو حگ عليها .. هي چنه
الحجي:- اي لا حگ غصب عنها وان ما گامت الج الحگ تحجين وتترزلين
وتكطعين اذنها بعد.. لو ما ثولها جان احنه ميتين البارحه ..
وانتي يا نوريه ما عارفه تضبينها.. لا تدخلين دامج ما بيج تشتغلين نوال
وام سعد تعبانات وهي تخوتل وما تشتغل
-ما زال انه ما عرف اضبها وصرت ما عرف حگ الله
عجل اخبر صراع وهو يجي وتفاهم وياه وگلو مرتك ما زينه ضبها.
الحجي:- انتي صايره ادورين مشاكل يا نوريه مالج غرض ان اشتغلت وان لا..
كومي يول لشوف شلون ما تشتغلين
-الحجيه دارت وجهه ضاجت .. اني شسوي كتلو اي عمو
هسه اكوم.. جاي اكوم .. طبت هيام..
صاحت خير الصوت واصل ليبره.. شكو ..
ام سعد :- كولو تمت دام دخلت هيام
-ها خاله اليسمعج يكول داخله بيتج ما بيت ابوي
واطردين بيه..
الحجي:- هويمه تحجين وي امج وهاي يمشن عدل لا بالله واتصرف وياكم غير
تصرف .. شنو يابه يشتغلون عدها وهي كاعده ورجليها ما تعرفلها حاجه..
صوبه لو ترستها گببتها وحرگتها
-اكلك بويه شو اليوم كاعد تدخل بشغل النسوان.. ان
تدخلت ودافعت عن حرمتك.. صراع يجي ويدخل وتصير الشغله ما زينه شلك بهسالفه
الحجي:- هويمه خليج محظر خير يابه وخلي حمولج خفيفه
-نعرف الخير ابويه ونعرف حمولنه بس اعرف حگ الله
واحكم على اي اساس ليليان تشتغل بهالبيت ها
ماخذها صراع .. زوجتو شرعيا ؟ يجوزلك تاخذ بنيه وانت ما عاطيها حگ الله
وتريد منها شغل و ومشاعل
ام سعد :- تشتغل حگ اكلها بهلبيت .. شني نعبي بحلكها بلاش
-ما ماكله من چد احد هي .. ماكله من خير رجلها
وانتي نفسج تاكلين من خيرو ..
ام سعد :- ييييح تعيريني هويمه
ليليان:- يابه والله اگوم شنو القصه ام علي فدوه .. اتركي الموضوع
-كعدي ليليان .. دام الحجي اليوم محركينو عليج
عندج رجل من يجي عود هو اليتصرف..
-انوبه حرت اكوم ولا اكعد.. وهمه كامت مكاويمهم..
الحجي يزاكح والحجيه دارت وجهه وما قبلت و ام سعد اكلتهم حاصل فاصل
بالحجي
واجت نوال كملتها وياهم تكلهم تره الشغل ما يأذي احد وهي فارغه.. شيصير
لو جت وعاونتني انه هم عدي جهال ومسؤليه
هيام ضلت تحجي ... وهي ما تساعدج حكمي ضميرج عيب عليج يوميه مو متشكله
وياج اليوم رجلها محروكه..
حتى العسكر ينطي للمصاب اجازه.. الله اكبر عمي انه اكوم بمكانها ما
طلعت هاي
-ام علي ما بيه شي .. اكوم والله.. االحرك بعضلة
رجلي ما بقدمي
كامت ما ردت.. عاد رحت وياها لان جو البيت تكهرب وام سعد گلبتها.. وساعه هي والحجي يدردمون.
الحجيه كامت لغرفتها تصلي واني وهيام رحنا للمطبخ وكفت هيام تركب وبقت
تحجي وياي على الحادث مال البارحه شلون صار..
بقينه نسولف.. ونشتغل ركبنا الغدا واني سويتلي لفه واكلت وياها جاي
ورحنا لغرفة الحجيه
هيام لكت حلا كاعده ع الموبايل زكحت بيها.. يلمحنايه وانتي شبيج ما
تكومين تعاونين البلبيت
-وشكو اكوم شو متروس نسوان حاطات عينجن علي شوكت
اكوم وشوكت كعدت..
-تربية اخليصان شترجه منج. بس
خل يجي الخلفج لشوف شلون بعد.يخليج عدها
-عمه انتي لا تدخلين بيني وبين ابوي لو رحت انه
ما ضارتج
-وعمى العماج .. حسج ما اسمعو افتهمتييي..
سكتت.. بقت ام علي تسولف وتحجي وي الحجيه لان الحجيه حيل تتضايك لو صاح
بيها الحجي بعد هالعمر فكعدت تنفه عنها
اني كاعده اسمعلهم.. ونمت لهناك سمعت صراع دخل يكول :- ها الله يساعدهم
كعد بالهول شويه محد حجه ولا احد جاب سيره للموضوع.. فات لغرفة
الحجيه.. هي متمدده..
دنك باس راسها.. وكال الها ها يمه الله يساعدج
-هلا بيك وليدي
-خير ما على بعضج .. وكضب وجهه
-ما بيه يعزيز امك شويه الضغط صاعد..
-اخذج للطبيب؟ كومي
طبت هيام هاا.
-شو الحجيه ما على بعضها
-لا لتخاف عليها تضايكت نفسيتها
-شكو
-سوالف ما تنفع راحت . اصبلك غده خويه..
-بكيفج بعد اخوج الا ليليان شلونها...
اجه يمي فتحت عيوني..
-شلونج بويه..
-زينه ..
-علاجج خذتي الابره ام علي ما ضربتيها
-لا و الله خويه محد كلي عليها
-ضربيها خويه .. تره تنفعها اطيب بساع.. انوبه
وجهه اصفر شجالج يا بويه علاج الفقر دم تاخذينو انتي لو لا
الحجيه:- والله يايمه يسمع حسك. العلاج بس كومة فلوس
وتاليتو للمجر محد.ياخذو
-ليش باباتي ما تخذينو احسن هيج دمج خلصان..
-انساه ما اتذكرو..
-ام علي شربيها عيني الدوه .. انه اصعد ارتاح.
-بعيني روح خويه هسه اصبلك ولا ادير بال.
طلع
. هيام كالت بس احطلو الغدا ع النار واجيج. راحت
شوي واجت خبطت الابره وضربتني و انطتني العلاج وراحت تكمل اكلو..
اني جريت موبايل الحجيه والعب.. موبايلها جان نوكيا بس ان 95 .. حلو بس
كلشي ما بيه حتى نت.
لعبه وحده لكيتها.. دا العب ونزلت حلا ضايجه لان مرزلها
ابوها وگالبه خلقتها وتغلط عليه . نزلت الموبايل .. دحكت ورجعتو
هه مريضه نفسيه..
ضلت تصرخ عليمن حقيره حيه بواكة الزلم. اني درت وجهي وانطيتها
ضهري العب والحجيه استلمتها غلط وكالتلها تاني ينزل ابوج وهو يأدبج.
لشويه جت هيام كالت تكومين نسوي كيكه انه وياج.. كتلها يله. اموت
ع الحلويات ويعجبني ادحك من واحد يسوي حتى بلكت اتعلمها.
راحت.. خلت المضرب مال الخلاط بيدي والطاسه. وكامت تخلي مواد واني
اخبط ..
الى ان صارت الخبطه ناعمه تجنن .. دهنت القاب براشي.. كتلها مو زيت..
كالت لا الراشي ينزلها بساع ابد.ما يخليها تلزك.. الزيت مو زين..
خليناها بالفرن.. نزل صراع.. كال هاا شو هينا ..
-عنسوي كيك .. عمو دز نوتيلا ندهنها
عفيه
هيام:- يولي انه اسوي خبطة الكاكو.. ليدز عليمن
هو كال محفظتي فوك اخذو منها وسوو اللي تردوه بس اريدلي استكان جاي.
كمت سويتلو.. و رحت انطيتو.. اخذ وحجه بضحكه الحمدلله هلمره لا انه ولا
انتي احتركنه بهلجاي وصل سلامات..
ضحكت ورحت للمطبخ .. كل همي الكيكه اريد افتح الفرن وهيام
متقبل.. طلع الحجي وام سعد و حلا وبنات هيام..
وكلهم التمو بالهول العصريه.. بس محد فتح السالفه مال الصبح سكتو..
نوال طلعت رمان كومه وكعدتنه كلنا نفرط.
خلصناه.. سوتو عصير طيب.. وحطينا الكيك .. وسوالف وضحك واليشوفنا يكول
الله هنيالكم گلب على گلب من كد ضحكنه
والحجي يذكر بطولاته ابو التهمبل والحجيه تفشله وتذكره بالسالفه الصدك
واحنه نخرب ضحك..
لليل الساعه 8.. علاوي ابن هيام.. كاللها ماما طالع ويه صاحبي لمكان
قريب هسه نجي هيام كالتلو اكعد يمه نريد نروح
حجه الحجي بساع.. اكعد وين مولي بهليل والوضع ما طيب. اكعد
يم امك واستر عليها..
ما رد علي حجه وطلع كأن دينطيهم خبر مو ياخذ رأيهم .. بقينه نسولف ونحجي شويه وتعاركت نوال وسعد
وكلها راحت تهدي بيهم.. اني ما بيه حيل لمشاكلهم ما طلعت.. شويه واخذها
سعد لاهلها و راحو..
بس بقى البيت متوتر وعمامهم جو تعاليل بليل كلعاده (جاي وجذب وجكاير)
ل12 وهيام تحوس.. كتلها شبيج
-علي ما جا ضل بالي الادب سز الا يخلي خوالو
يحجون علي يلا يرتاح.. انه اعلمو
الحجيه:- شتردين من الولد تلكينو براس الفرع هسه يجي لا تكتمين على
انفاسو صار رجال
وبقت تتصل ما يرد.. اخر شي ندست بتها بعصبيه كالتلها كومي صيحي خالج
نائل بساع..
راحت البنيه واجه صراع گبل نائل ..
-ها ام علي خير شبيج خويه..
اجه نائل.. ها ام علي
-هلادب سز علي تأخر وما جا وانه اريد اروح للبيت
..ياريت واحد منكم يوصلني
صراع:- نامي الليله هينا يا خويه بيتج ما طاير
-لا خويه بيتك العامر عساك سالم بس كلي روحي ..
بيتي مناك مالو احد..
صراع:-عجل يابه انه ازتج خويه كومي تهيري
نائل:- هو علي وينو جاي اتصل ماكو رد.. شقضيتو
-تعبت منهم والله يا خويه حملهم ما هو سهل
نائل:- لا تهمين خويه انه طالع ادحك وينو..
لمت هيام غراضها هي والجهال.. وطلعو .. بعدهم وصلو بالباب وسمعنا صرخت
هيام.. فزينه اني والجيه بساع طلعنا ودخلت هيام تبجي وتضرب على وجها وتصيح راح
ابني يمه رااح..
طلع الحجي بساع يركض واحنه نخبصنا ونهدي بيها وهي تبجي.. نريد نفتهم
كوه يطلع الكلام منها
واحد جا علي بيتنا كايل لصراع ..علي سوه حادث بالماطور هو وصاحبو ..
وصراع راح يركض
الحجيه تدعي وام سعد تهون عليها وهيام تصرخ وساره وجنات يبجون وحلا
وياهم تبجي
واني مكابله هيام تنوح وتعدد على ابنها . فرفحت سوده عليه..
الحجيه تتصل محد يرد.. انخبصنا خبص واني كاضبه ايدها واكولها ما يصير
بي شي والرب العذرا تحمي صدكيني لا تخافين احجي ودموعي تجري وياها..
لشويه طب صراع مستعجل كلنا گمنالو .. وهيام كضبت بأيدو خويه وين ابني
بداعة الله احجي صاير بي شي
-كولي يا الله خويه ما بي شي كالب بيهم الماطور
وبس الولد صاحبو متأذي لان هو اليسوق لا تخافي خويه علي تمام
-ان جان زين عجل وينو ابني ليش ما جبتو وياك..
علي بي شي صراع حاجيني راح اموت
-خويه والله ما بي شي نائل والحجي نقلوه للمستشفى
خدوش بضهرو بس
..
حجاها وصعد بساع وهي تكول ابني متأذي كلبي يكلي علي مو زين. ساعه تغلط
عليه شلون طلع وساعه تدعي الله يحمي ويرجعو الها سالم.
وتكلو ربي انت ما ظالم وتحرمني من وليدي .. رجعلياه بجاه حبيبك المصطفى
.. تحجي ودموعها تتجاره على خدودها..
نزل صراع مستعجل بساع وطلع.. ما دحك بينا.. كالت ابني ما زين .. انه
عرف ابني راح وما يكلولي..
بقينا مخبوصين لحد الصبح ما غمضتلنا عين.. والحجيه وام سعد يسكتن بيها
وهي تنوح وتبجي على ابنها..
بعد الشمس ما طلعت.. طب صراع. ركضتلو هيام.. خويه ابني
وينو بدين محمد عليك احجي..
-استهدي برحمانج ام علي انه اعرفج قويه ومؤمنه ما
يصير هيج وليدج طيب ما بي شي ان شاءالله كبل الظهر انطلعو اذا اراد الله..
-لو ما بي شي عجل ليش تبيتونه بالمستشفى خويه
احلفك بالقران اخذني وياك اشوف ابني
-شلو قهر يا محمد خويه المستشفى كلها وادم ملتمه
وين اخذج صبري كتلج الظهر اطلعو بحيل الله
.. هي ما سكتت بس تبجي واحنه مكابليها .. طلع
صراع وصاح ليليااااان..
-طلعت ركض ها عمو
-حدري بويه هيري الجاي و حطي بترمز وحلي بشكر .
وطلعي استكاين جدد بكارتونهن وخليهن بالعلاكه ..
جبتلكم كيمر و بيض وصمون .. عزلي منو النا والباقي تريكو بيه ..
-تمام
-يله بويه همي نفسج وهيري لبين ما اخض لشتي واصلي
الصبح اريد كلشي تام
....بديت احظر وهو شوي ورجعلي .. ليليان البيض
سلكي النا مو اطكي.. حتى اخذو ..
تمام.. طلعت جدر وترتستو مي وخليت 25 بيضه الهم والنا.. وكعدت اكمل..
خلصت نزل هو
..
عاشت ايدج... اخذهم للسياره وطلع.. ورجعلي ليليان
-كول
-رتبي غرفة الحجيه احتمال شوية لخ اجيبو لعلي
-تأمر .. مديت السفره بالهول وصبيت الريوك.. وفتت
الغرفة الحجيه كلها نايمه بيها.. ام سعد تشوخر.. و حلا ادحك بموبايلها
والحجيه متمدده وبالسبحه تسبح.. وهيام منيمه بناتها على رجليها وماسكه
المصحف تقرأ قران وتبجي..
حجيه صبيت الريوك بالهول كومو تريكو .. سمت يا الله وكعدت
اندارت لهيام
الحجيه:- يلا بنيتي زتي حمولج على رب العباد ما ينسالو عبد ..كومي
اكليلج لگمه
..
...هيام ما ردت ولا كن سمعت .. دموعها تجري وتقرأ
قران..
-دكومو يلا الجاي راح يبرد اريد انظف الغرفه
حيجيبوه لعلي
صدقت هيام وشالت راسها :- بصلاة محمد عليج ليليان صدك راح يجيبو ؟
-اي والرب صراع كال نظفي الغرفه لبين ما اروح
اجيبو.. كلت هيج.. هيام كامت و كومت بناتها بسرعه وكعدتهن والحجيه كعدت وندهت ام
سعد
كامو تريكو بساع وطلعن ع البيت تنظيف هيام وبناتها.. واني فتت للغرفه
غيرت الفراش وبالمكنسه الكهربائيه كنست ولمعتها وعطرت وسديتها
كملت طلعت للمطبخ... رجلي كامت تصل عليه من الوجع لان ما كعدت.. بس
شسوي بس اني وحلا ما نزلت صعدت فوك كملت نومها..
ام سعد ركبت الغدا تمن وباميا .. وكالت سوي زلاطه ناعمه.. قبل صلاة
الضهر..
دخلو جابو علي.. صراع شايلو.. مكسوره رجلو ووجهو مدمه و ضهرو مشدود
وكلهم انخبصو
نومو على سرير الحجي وهيام حظنتو تصرخ بصوت عالي وتبجي وبناتها يمها
حاطات راسهن على ضهرها ويبجن..
ضليت ابجي وصراع يگلها ول يابه لو ما جبنا عدل ولج اجعلو قرد ما يصيبو
شي عجل لو ادحكين صديقو لهسه راكد بالمستشفى خطيه
الله دفع شرها حمدي ربج طلع سلامات تفاولينو بالبجي يا خويه ..ويهدي
بيها..
وهم كلهم دخلو غرفة الحجيه.. صاح نائل .. نسوانه يابه طلعو من هينا
عمامو يردون يدخلون يدحكون الولد..
طلعت بساع. وعمامو دخلو واللبيت انخبص.. شوي ودخلت
اخلاص وابوها وامها واختها الجبيره وتصبح عمت عيني عليك ابن الغالي ..
وتبجي العياره ام اعطوب
ووكفه ع الطباخ جاي وماي شلت حالي للعصر ومحد رايح.. غير يكولون ناس
تعبانه عدهم مريض محد عندو احساس يزيدون ما ينقصون
واني ضاله روح تعاي جيب ودي.. والليل ما نايمتو عيوني صارو حمر فد
نوب.. غسلت الستكاين وكعدت بالكاع بالمطبخ..
دخل صراع.. هاي يابه تعبتي مو
-شسوي
-عجل حلا وينها ما تعاونج
-ما اعرف ما نزلت ولا شفتها
-انه اعلمها يلا بويه اخذي فراشج وغطاج وصعدي
نامي فوك لا تضلين تره ما تخلص..
-تمام.. دا اكوم.. تقرب للجاي يحط ايدو ع القوري
.. هذا حار
-احمي تريد
-والله يابه ياريت حيل تعبان وراسي ذبحني عاد
اكعدو بالجاي..
-صبيتلو.. وكال عاشت ايدج يلا صعدي ارتاحي..
..كتلو تمام.. فتت لغرفة الحجيه لان الرياجيل
كلهم انتقلو لااستقبال.. ردت اخذ ملابس اسبح.
دا افتح الكنتور.. حجت ام اخلاص.. شبيج خايبه ما تسلمين شني نبزز.
-هلا بيج خاله..حجيتها ودرت اطلع.. ردت
-مكلفه نفسج. هذا اليجيب وحده ما معروف
اصلها ما تعرف الواجب.
-ما رديتها حيل تعبانه بس الحجيه كامت ترد عني
وتكلها لا تعبت خطيه من البارحه بس هي بالبيت ورجلها متأذي .. وكامت تشكي حالي..
اخذت وطلعت سبحت فوك.. ودخلت غرفة صراع.. حلا عتخابر.. تخزرني بعينها
وتأشر عود شكو جايه
ما رديت عليها.. نزلت الموبايل وكالت هيي مو وياج شعدج جيتي وراي ..
-ميته عليج وكلت اشوفج.. مديت فراش .. هي حجت يلا
عود بعدين اخابر.. وسدتو .. وتكلي وانتي شعندج بغرفة ابويه ما تستحين طلعي برا
-اعتقد ابوج رجلي واني حره بغرفتو انام اكسر
ابوك.. كيفي ولا نسيتي شگالج ؟
-الا انتي فعلا وحده ما عندج حيا تلزكين بروحج
گوه.
-مددت ونمت..
- منو موجود جوه
-الفرقه الذهبيه مال خوالج كلها
-منو يعني
-خالتج خلوص و تغريد وامهم جوه
-خاله تغريد جوه بربج
-حجيت هيج.. شو هاي كمزت تعدل بنفسها وتگرص
بخدودها ونزلت تركض.. على كولة صراع اللهم ثبت علينا العگل
تمددت ردت انام.. اتكلب منا ومنا.. ما جاني نوم. لل5
قبل الصلاة يلا نزلت.. دحكت حلا تتوسل بأبوها تروح وي جدها و جدتها
وهو رافض عاد جدها كاللها كومي جدو شني تالي شيبي ابوج يفرض علي
ويمنعني منج.
لشوف شلون يمنعج
صراع ما رد عليه ولا كن سمعو.. سوه نفسو يخابر وصدك خابر ولد وكعد يحجي
ويتفق العرفتو على اجازه كم يوم
اجو رياجيل وراح لااستقبال وغشا وجاي وماي ورجليه صارت خيوط واحس ضهري
صار خياره مايعه من التعب ..
لل10.. فضو كلها راحت بس خلو ما خلتها ام سعد تكلها اريدج وياي
تعاونيني وهاي ما صدكت لطشت
دخلت كلهم كاعدين بالاستقبال الغرب طالعين بس عيال البيت وخلوص قائد
الميدان..
فتت الم النفاظات وامسح الطبلات والملم حتى اصعد.. وهيام تكول اريد
اروح للبيت وصراع يكول ماكو روحه شتحتاجين من البيت كومي روحي وي نائل جيبي وتعاي..
اندارت عليه هيام و حجت
-ول امي ما عرف شلون نجازيج ليونه تعبتي وانتي
مريضه
-لا ام علي تعبج راحه انتي امي واختي..
ضحك صراع وهو كايم.. كال يلا بعد ابوج طلعي ارتاحي الشغل ما يخلص وذيج
انه الها لا ما اصلخ جلدها
يقصد حلا راحت غصب عنو حرجتو كدام ج.ها وراحت بلا موافقه..
تقربت اريد اطلع سحبني كدامهم جوه ايدو وباسني براسي .. ويسألني تعبتي
مو.....
-راح اصعد انام احجي و احس صرت بنص هدومي وهم
كلهم كاعدين.. كالتلو جدتو فد مره جان مددتها هينا
ما تستحي تبوسها جدامنه ..
ردها
.. بنيتي ومريتي هاي جده امددها تمددني انتي اطلعي منها .
عفتهم و صعدت فوك بس احس صخنت من الفشله..شكد عيب هيج يبوس ويكول
كدامهم..
بس احسن خليصه كاعده.. هسه احترك كلبها ام الزلم... بدلت ثوبي القديفه
ثخين بثوب خفيف انام بي مديت يم الكنتور..
من التعب اول ما حطيت راسي غطيت بنومي..
شويه وحسيت بطكطه فوك راسي.. دحكت.. صراع عيطلع منشفه... رجعت نمت..
فكيت عيني وهو كبال المرايا بس بالشورت الداخلي..
رش معطر جسم كبل لا ينام وراح لفراشو.. بين الافتح والاغمض عيني كل شوي
اغفى واكعد..
سمعت موبايلو يرج. جاوب.. ما كنت مهتمه بالاتصال لان
نعسانه وهو يكول هلا ..اي.. او امم مال واحد تعبان ويحجي
بس من سمعتو يكول .. يعني وتالي وياج ... سكت ...... ورجع حجه.. اسمعي يولي لا انتي من ثوبي ولا انه من ثوبج وگطنه وشلعيها من اذنج
كافي عاد تره انه لسه كاضب اعصابي عنج ....
اني ركزت بكلامو .. من عرفت هاي وحده يحجي وياها صرت كلي اذانات حتى اسمع
اني ركزت بكلامو .. من عرفت هاي وحده يحجي وياها صرت كلي اذانات حتى اسمع
تفاجأت لما يكول - لج اخلاص خليلج كرامه . شلج غرض انتي ان خذت
مرتي لو لا.. شعتبرها اعتبرها مرتي بتي... عيب عليج استحي لا تدخلين
البكدج يدور عمره وحج وانتي دحكي بيا سوالف ملتهيه... انكلعي بويه رحمه
لوالديج..
وقفل الخط وهو ينافخ ويعدل بفراشو ويكول شلون ناس ما تستحي وزايحتها فد
مره... استغفرك اللهم واتوب اليك..
وبقى يردد ادعيه قبل لينام لحد غفى ..
بقيت مصدومه.. هاي عود صدك هيج حاشره روحها بي... شلون بيها بالله يوم
يومين وقنعتو لو غرتو اني شسوي وين اروح..
يربي والله تعبت.. هسه غير يحس ويكول مرتي .. بنتي وبنتي اليكول هو
مخلفني .. حتى من كد ما يكول بنتي استحي اصيحلو بأسمو..
بقيت اتكلب بفراشي وافكر.. ما ادري من غفيت.. بس حسيت انطبك الباب..
فزيت. دحكتو ماكو بفراشو.. مشغل بس تيبلام..
هاي بس لا نزل الها.. كمت من فراشي بساع وطلعت.. سمعت المي بالحمام
يجري.. دكحتو كاعد يتوضى..
طلع ودنك مسح رجليه وحجه.. ها بويه شو كاعده. لا تضلين تفترين بهذا
ثوبج الگصير هينا تره نائل للان ضوه غرفتو شاعل ويحجي بالموبايل لا يطلع ويدحكج
بهلوضع
-لا بس ردت ادخل الحمام .
-عجل واكفه ادحكين بوجهي.. فوتي.
-دخلت للحمام .. خلصت وطلعت لغرفتو.. دحكتو
يصلي.. رحت لفراشي.. واطمش عليه شلون يصلي
شكلو يجنن وهو يصلي ويسوي حركات الصلاة.. يرفع اديه يدعي.. يركع يسجد..
بهدوء وكلماتو واضحه..
خاصه من يرفع راسو ويكول سمع الله لمن حمده. يربي صرت اعشقو لهرجال.. وهو لا يمو ولا حاس بشي..
كمل صلاتو التفت يمين و شمال ونهى الصلاة وشال السجاده.. وراح لفراشو..
وطفى التيبللام..
بقيت افكر يربي والله راح يطير الرجال من ايدي واخسرو شسوي.. كل وحده
اجرأ من اللخ
وحده ادزلو صورها بملابس نوم والثانيه تسألو اذا هو يريدني او لا وتزت
بروحها عليه واني الغبيه كاعده اطمش ع الرايحه والراده لحد ما يطير..
من غبائي الزايد.. كمت من مكاني ووكفت يم راسو.. بلا هسه اني شحس.. هو
مغمض ومخلي ايدو على عيونو
ضوه خفيييف يجي من الكراج .. حس ورفع ايدو وكال ها يابه بيج شي... ؟
-لا
-عجل شبيج واكفه يم راسي
- لا سلامتك درت ردت اروح .. صاح
-يولي حدري لا تستحين اذا محتاجه شي كولي تره
صرتي اعز من حلا..
-هو كال هيج بلا تفكير .. فتحت غطاه ونمت يمو..
هو تفاجأه من تصرفي بس ثولها وضحك
ورجع حط ايدو على عينو ونام.. المسافه البني وبينو يمكن 3 اشبار.. كلت
بلله هسه اني شلون حماره من سويت هيج
هسه مو راح ياخذ عليه نظره ما حلوه.. تحرك واندار انطاني ضهرو ونام ..
عود ليش على تختو ما يدحكني ولا يتقرب يمي.
شكد احس بحبو لما احنه جوه.. بس بغرفتو يبتعد حيل مني ما اعرف ليش
وكأنو يتحاشني غصب عنو..
من تالي عرفت الجواب....
-ادحك بضهرو.. الا و الرب انا ما استحي نايمه يمو
وهو بس بالشورت.. شكلت لروحي من سويت هيج
تمنيت تصير عندي جرأه اكثر واتقرب وانام بضهرو.. بس بقيت هيج احسن..
لحد ما غفيت..
ما فزيت الصبح الا على صوت الباب يندك.. الضوه خفيف البردات مسدوده..
هو رفع راسو وبتك عين يدحك ويكول منو..
اني مسويه روحي نايمه . وهو نايم على ضهرو جان وايدو مخليها على عينو..
وكعد يحجي
من كالت ابو حرب انه اخلاص.. اني بسرعه بس سمعت هيج.. بحجة نايمه
واتكلب
اندرت وخليت راسي على صدرو وعود نايمه اشخر ما احس.. هو ضل بصدمه لا
يكدر يدفعني ولا يكدر يحجي..
هي فاتت بلا ما يكول دخلي.. نزل ايدو على ضهري وحظني ورفع الغطا الصدرو
لان كان ما لابس غير الشورت وصدرو طالع..
-اسفه ابو حرب ما عبالي نايمين بس الحجي يريدك
بشغله وصار ساعه يتصل عليك وما ترد..
-موبايلي صامت .. تعبان مابيه كليلو انه شويه
وانزل.. ردي الباب وراج بلا زحمه
واني على صدرو اندار صفح و حظني وغطا راسنا ..ماي بارد ونزل على صدري
من دحكتنا بهشكل العوره الما تستحي ..
سدت الباب.. هو ضل جامد بمكانو .. بس حسيتو عرك وما اعرف شصار بيه ..
نفسو تغير وكام بسرعه.. وسحب ايدو من جوه راسي حيل .
فزيت.. هو مدنك وراح للكنتور يلبس بساع.. كعدت على حيلي.. عيلبس
بالبجامه..
كتلو اسفه بليل خفت حيل لان ظلمه واستحيت احجي ونمت هين.
-لا ولا يهمج عمو عادي.. حجاها وهو يلبس القميص و
ميدحك بوجهي ونزل بسرعه.
استغربت شنو يكلي عمو.. ما مكفيني بابا هنوب صارت عمو .. خرب بحظي كمت
لميت شعري وبدلت كلبيتي ..
ادحك الساعه 11 ونص.. يا عزه كل هلوقت وما حاسه.. غرفتو حيل مريحه واذا
هو نايم يعرفون ممنوع احد يسوي طكطكه يم بابو
لان يكعد معصب ويبتلي بيهم.. فمحد يتقرب لهيج ما حسيت مو مثل غرفة
الحجيه. بس تصير ال7 الصبح الباب يضل طاب طيب .. محد يكدر ينام انجبر اكعد..
فتحت الباب ونزلت.. الكل كاعدين وملتهين كل واحد يشغله و صراع
بالاستقبال يم الولد اسمع صوتو..
فتت للمطبخ حميت الجاي وحظرت الصينيه وحطيت بسكت وي الاكل ورحت للهول
كلت لحرب صيح بابا يتريك .. اخلاص كاعده تخوزر وتنافخ وادير بوجها
اجه هو.. كعد وصاح بابا حرب حدر تريك.. كالو تريكت بابا .. انتبهت الكل
متريك بس اني وياه..
هيام طلعت.. عزمها تكعد ويانه. كالتلو بالعافيه خويه من
ال8 تريكنا كلنا.. موقف يخجل كلها متريكه واحنه ضاربيها وكاعدين الظهر ..
عادتي الصبح مو كلش اشتهي .. ف اكثر شي احبو الصبح بسكت وجاي.. هو ياكل
ويدحك عليه. احط بسكت واصب الجاي فوكو واكل..
-بويه لو اشتريلج سيليلاك فد مره مو احسنلج من
هاذ
-هااا
-يا ها بويه كاتلج فقر الدم وانتي فالحه بسكت
وجاي .. شال خبزه كص شويه منها وكال اكلي عوفي هلخرابيط التاكليها
دخلت ام سعد... عيني يل كاعده الظهر ما تكولين خطارنا رايح راد اكعد من
صباحيات الله لابده فوك شنو معناها
ردها صراع:- خفي حملج عنها بويه هلبيت شكثر نسوانو كادره على هاي ..
ليل نهار تشتغل تركيها تاكل براحتها ... اكلي بويه وعوفي هلبسكت..
جر الصحن من كدامي.. وام سعد حجت
-وين التشتغل ليل ونهار اسكت يمه لا يروح احد
يصدك... هههييي وتهز بيدها .. كاعد يدافع لحرمتو تالي وكت.. حجت وراحت
هو ما علق عليها.. اندار على اخلاص وكال...
-بت عمي اذا ترجعين اليوم بس ابعثي حلا بدربج
شوفي منو يوصلج خل ترد نفس السياره.
-ادحك عليها اختنكت وكالتلو تأمر ابن عمي.. وراحت
للمطبخ.. اني مدنكه راسي وكاتمه ضحكتي..
كام .. كال الحمدلله.. اني هم لمست وشلت الصينيه للمطبخ.. فتت لكيت
هيام
-ها بشري شلون صار علاوي
-والله ليونه الله دفعها وستر عليه والحمدلله بس
رجلو كسر وضهرو مشخط..
-الشكر للرب على حمايتو.. وكفت اغسل المواعين
فاتت ام سعد.. كالت :- اليوم نسوي تشريب وتمن احتمال ولد اختي يجون ع الغدا
فاتت اخلاص.. كالتلها لا ترحين امج خابرتني اخوتج راح يجون اتغدي وروحي..
-تأمرين خاله
-اني اغسل واضحك ع الوضع شكد ما عدها كرامه..
ام سعد :- ليليان هيري الجدوره دنطبخ..
-اي .. دنكت للكاونتر متمسكه بايدي على حافة
الكاونتر و ايد اطلع بيها..
جت اخلاص دفعت الكاونتر حيل عليه .. وفاتت عود ما تدري.. رفعتلها وزكحت
بيها.. ما عتفسرين اذيتيني
-اسم الله عليج عيني ما ندري بيج هلكد ترفه
وتتأذين
طلعت الجدوره وهي متجيه على الكاونتر وتحجي:- من صدگ ناس ما تستحي
ام سعد :- خير شبيج
-لا هيج سالفة وحده حتى ما تسوى احجي بيها اصلا
-عجل شكو حاطتها ابالج خل تولي
-مو خلك وحده بكد فردة النعال وشايله الخجل
والمستحى فد نوب.. كدام العالم شريفه وهي اكبر كح...
ليليان:- عليمن تقصدين
- والله يعرفون نفسهم
-هااا يمكن هذوله نفسهم الماعدهم لا حيا و لا
كرامه يتلزكون بتوالي الليل للرياجيل ويخابرون وينطردون
-ولج هاي عليمن تقصدين
-يعرفون نفسهم ما حاج اوصخ الساني بيهم اصلا ما
يسوون اضفر من اضافير رجلي واحجي بيهم..
ام سعد :- وانتي منو مصخم وجهج حاجيه وياج هي جايه يمج
-ومنو كالج اني اقصدها تره دنحجي اني وياها عادي
شبيج خاله
-خاله الخلخلت عظامج.. طلعي النومي لشوف ملتهيه
بالتلزك بالرياجيل والنوم الما تستحي
والله ما لازكه بغريب .. رجلي وانام بغرفتو الناس شحارك حمامها.. احجي
واني اريد افتح الخانه الفوك اخذ نومي بصره..
هي واكفه مثل شمعة الفكر.. زكحت بيها.. بالله انطي درب شويه خل نشتغل
ما بطرانين احنه ونتلزك.. شو وخري ودفعتها
دا امد ايدي للملحق.. جريت علبة النومي بصره. شو هاي انطيني دفعه ووكفت
ايدي كلها تزلغت بحافة المغناطيس مال الكاونتر.. والعلبه وكعت وانكسرت
.. زكحت شبيج شنو هلخباثه ليش هيج
ترفع خشمها وتكلي ما ادري
ع الصوت فاتت هيام وام سعد حجت
-ما متقصدتج ما تدري لا تكبريها .. من غيرتج منها
تتبلين عليها
هيام:- شكو يابه شلصوت
-ام علي دحكي ايدي شلون زلغتها بس ادفع وتسد الكاونتر
على اديه
..
-اخلاص وكفتج من عدمها ماكو فايده.. لو تفوتين
تنظفي لو اتشوفينا عرض اجتافج كافي تره ما ناقصينج ..
اخلاص:-ما جايه ابيتج احبيبه بيت عمي
كلمه من اخلاص وكلمه من هيام علكت بينهن بالاكلام هاي ترد وهاي تصد..
كمت اسكت بهيام حتى تفض كلها موجوده بالاستقبال..
وام سعد فالحه ادعي عليه وتكلل النغله والنغله.. دحكت صراع نزل ع
الدرج.. واجه للمطبخ بساع..
زكح يولي شكاعد يصير حسجن طالع شكووو
نازل مبدل وكاشخ يريد يطلع.. اندارتلو هيام.. كالتلو بدين محمد عليك
دحك خباثتهن.. وجرت ايدي
كاعده هينا لا شغله وبا عمله اتكفخ وتبسمر بهلمسكينه..
ام سعد :- مسكينتيش هيام صارلها ساعه تغلط عليها عرفي حك الله ليليان
عرمه ووكحه والسانها ما ينجرع..
صراع :- ولجن هاااااااااااااااس .. فضحتنه.. دحك عليه وكال وانتي شبيها
ايدج احجي
-حجيتلو السالفه .. قاطعتني اخلاص وكالتلو والله
يا ابن عمي فاتت ع المطبخ تسمع حجي ما يستحن وبلا حيا وكرامه ويتلزكن للرياجيل
ويخابرن المن تقصد..
اندار عليه متفاجئ و خزر... كتلو بساع .. عمو والله هي اللي بدت من فتت
وهي تسمعني شايل المستحى ونايمه وي الرياجيل وتحظن
مو عيب عليها تحجي هشكل نايمه وي ولد الشارع اني وتحجي عليه هيج وام
سعد ادافعلها
اني شسوي اذا هن يدوسن ابطني..
ما رد عليه واندار وصاح محمممممممد.. صاح ها عمو..
-حدر بويه اسمعني.. توصل عمتك اخلاص لبيتهم
وتردلي ذيج الكلبه بدربك..
ام سعد :- تطردها ابو حرب .. ما عرفناك يلكريم وبيتك مفتوح للكل تفر
راسك مره وتخليك تطرد بت عمك..
-دحكي ام سعد.. تجوزون مني لا حرام بالحرم البيت
احرگو فوك روسكم..
اندار مشى وصاح ليليااااااااان......يتبع
☆☆☆☆☆☆
تعليقات
إرسال تعليق
اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم