المراهقة والأربعيني الحلقة (15)

المراهقة والأربعيني

 

الجزء الأول

الحلقة  (15)

... ما اعرف ليش روحي تعلقت بيلي اسمو صراع.. ما كنت اهتملو .. هسه لا تغير الوضع.. اتضايق لو ما اهتملي ...

ف صرت اني اهتم بيه وبكل تفاصيلو.. يعجبني اهتم.. ارتاح بهلاهتمام.. رغم مملاكيه منو شي..

ف بيومها.. لما تخربطت من حرارة التنور.. هو اطمن عليه وصعد.. جبرتني عمتي الا اكوم واكل حتى لا اتخربط من فقر الدم..

فردت اكل.. دحكت ما هو جوه .. كلتلها عمه.. عمو صراع وينو..

-ما يحب الدولمه ما ينزل عليها.. خلصي وشوفي شتسويلو اكل..

-ما طمنت اكل وهو لا.. كلت خل اصعد شنو يريدو احاول اسوي الو..

صعدت لغرفتو.. دكيت الباب.. صاح ادخل.. دخلت متمدد و مبايلو بيدو

-هلا باباتي حدري..

-صعدت اشوف اذا تريد شي غير الدولمه اسويه الك.. لان الحجيه كالت متاكلها.

-لا يابه بالعافيه اكلي.. انه تعبان.بس اريد انام.

-اهااا.. ردت اطلع.. صاح ورايا..

-ليليان

-اندرت.. هااا

-انه راح انام.. بس يأذن العصر كعديني يابه حتى اصلي واخذج للدكتور لا تبقين خلصان دمج..

-تمام..

-كبل لا تنزلين بابا نزلي البردات وطفي الضوه وشغلي التدفئه..

-سويت وردت اشغل التدفئه.. وطنيه ماكو..فشغلتلو صوبه كهربائيه هيتر.. معلكه بالحايط. صار ضواها بالغرفه ينعس..

تركتو و نزلت.. اكلت شوي.. ورحت للغرفه ع التلفزيون... لحد ما دحكت الحجيه كامت تريد تصلي..

عاد صعدت.. دخلت لغرفتو.. هو نايم.. والغرفه تشهي نوم.. سديت الباب.. وتقربت منو. ايدو تحت راسو ومغمض..

ادحك بيه.. لحيه ما عندو بس شوارب.. حواجبو ثخان.. خشمو طويل.. شعرو خفيف وحفر..

بقيت اتأمل ملامحو.. تقربت اكثر.. وكمبصت يم التخت وادحك بوجهو واركز.. عطرو اكثر شي .. يسحرني بي..

لما تتقرب منو.. ما بودك تبتعد على كد عطرو الطيب.. احس بالامان من اشتمها..

بقيت اركز اكثر فيه.. صدرو عالي.. وبيه شعر.. واكو شعر مشيب بصدرو.. على زندو خط شمس.. نص اسمر ونص ابيض..

بيه حاله .. ما ينزع الساعه من ايدو ابببببببد.. حتى من يدخل الحمام.. اذا اني واكفه.. يكولي اكضبيهم.. واذا لا يخليهم ع المغسله يخلص وريرجع يلبسها

ف حتى وهو نايم الساعه بيدو ما تفاركه..

واني مركزه بيه.. وكاعده.. فتح عيونو.. فزيت بساع بدل ما اكوم من الفزه والخوفه وكعت على حيلي ليوره..

كام بسرعه هو كف الغطا.. وكال الله الله يابه شبيج ... شجنتي تسوين وين بالج متكليلي

-لا بس ردت اكعدك.. كمت بساع.. مو كلت كعديني ع الصلاة..احجي واحك بضهري ..

دحك بساعتو..وكال

- ساعه 3 ونص.. كومي طلعيلي ملابس اليه على ما اتوضى وواصلي.. ونزلي بدلي بساع حتى نروح..

-تمام.. فتحت خانتو.. طلعت بنطرون اسود وقميص رصاصي مقفل.. وجاكيت اسود ولفاف وساعه

حظرتهم .. دخل.. دحك بيهم.. كال هذا هو.. نزلي تهيري بساع .. حتى نصل من وكت..

نزلت اركض.. طلعت الفستان اللي جابو ولبستو.. وحظرت نفسي.. وخذت عطر من خانة حلا ورشيت..

لو تدري جان قومت القيامه..

نزل هو وعطرو سبقو.. طلعت هو يعدل بساعتو.. ويكول ها بويه خلصتي..

-اي .. رفع راسو.. دحكلي عقد حاجبو..

-هذا اللبس بارد عليج بويه روحي غيري

-لا ما بارد والرب دافي..

-لا يابه بارد.. غيري دا اكلج

-والله ما بارد ومو قصدك بارد.. لان حلو طلع تضايقت البسو..

-بانت البسمه بوجهو بس عود صارم وهو يكول دا اكلج غيري..

-تضايقت حيل.. كتلو ما بلازم اروح.. بطلت عساني اموت.. طنكرت ودخلت لغرفة الحجيه...

هو تخوصر ووكف ينافخ ويردد الاستغفار.. كامت الحجيه .. كالت ليش تعاندين يا يمه كالج غيري غيري .. مرتو انتي وبكيفو

-وين مرتو اني هااا وين.. لا هو زوجي ولا اني مرتو هو يكلي انتي مثل حلا وحلا تلبس اشكال الوان شو ميحاسبها بس عليه..

ما قبل الوان فاتحه وهاي الوان الفستان غامقه اشنو يريد بعد هااا..

دخل وزكح.. يولي شو طولان السانج.. تأدبي لا بالقران اكصو..

-لا اتكصو ولا ابد.. ابدل وانام احسن.. ما اريد دكتور..

الحجيه:- ولج يمه تعوذي بليس وكومي وي رجلج وامشي بشورو المرا ما زين تكسر كلمة رجلها يا يمه

-لا اكسر ولا ابد ما اريد اروح.. خلص خل يروح لشغلو ما اريد ..

-لج دحكي هين بنت ال....... هاي مال خلص خل يروح سوالف كح... و المسلسلات التركيه اذا سمعتج حاجيتهن يول والله اذبحج فااااهمه.

-ما رديتو بس درت وجهي.. وكمت ابجي.. وهو مخوز وصاح.

-كومي بدلي لشوف شلون تكسرين كلمتي..

-حجه هيج.. اني نزعت الجاكيت... زتيتو واندرت نمت على السرير وانطيتو ضهري..

هو تخبل شلون هيج انطي ضهري.. هد راد يجرني من ضهري.. كضبتو الحجيه وهو يغلط ويهادد ويريد يكضبني.

كمت بسرعه ورحت يم الكنتور.. كتلو ما اريد.دكتور والرب ما اريد اروح .. لا اعاند ولا ابد.. اتركني وروح..

-لج بنت التايه انه امشي بشورج.. وبكيفج اروح لو ما اروح.. انه كاعد هين وارد.اشوف منهي التكسر كلمتي وما تبدل وتصعد وياي..

كعد ع السرير بكل عصبيه.. الحجيه دارت وخزرتني وتعض على ايدها وتكلي اتجفي الشر يمكصوفة الرگبه..

مشيت بنتر طلعت جبه نيليه وغيرت لبسي.. وعلى عناد لبست شال لونو وردي فااااتح..

صار يشع بوجهي.. فتح اكثر.. وشتا وخشمي وخدودي حمر.. طلعت.. جان يزكح ماكو غير هذااااااا الحجاب..

هنا عمتي زكحت بيه.. وشمرتني عليه وصرخت خذها هاااك و فد نوبه ادفنها واخلص منها وارتاح.. هاي لا ..هاي لا ..هاي لا..

بنيه بكد زرك تريد تدفنها بس لان وجها ابيض ما تريدها تبين ويدحكوها الناس الله واكبر عليك..

امشي يمه امشي حتى هلدكتور هذا اليطلع منو ما نريدو انه اوديج شنو بعيد لو صعب الدرب.. وصاحت ناااايل وينك نااايل..

هو كام بقوه جر ايدي وطلع. كتلو جنطتي بس اخذها..

-انعل ابوج لابو جنطتج بت التايهين هلكدج وما اسيطر عليج بس بسيطه.. . يمشي ويسب ويغلط.. وشمرني بالسياره..

راد يسد الباب صاحت بنت سعد اميمه.. عمو بس جنطتها.. اخذها وشمرها بوجهي وسد الباب حيل وراح فتح باب الكراج

طلع سيارتو وقفل الباب واجه صعد.. ورزايل وغلط طول الطريق وانه مو رجال اذا ما اعلمج وما طالع من ضهر ابوي اذا ما ادبج وهيج منج وهيج من اهلج

اني دايره وجهي عنو.. وابجي.. وما ارد على صياحو وغلطو.. وصلنا الدكتور نزل ويكلي امشي جدامي..

مشيت.. اجه هو.. وكفت.. زكح اكلج امشي جدامي.. وين اندل وامشي كدامو غير هو يدليني..

امشي وهو يصيح مو منا ثوله منا.. امشي ويكول منااااا.. وكفت وما مشيت...

-بالقران راح يخبلني الثول مالج تمشين لا امشيج انه..

-خليت ايدي بعكس ايدو.. وكتلو عمو والله ما اندل امشي كدامك وتبقى تصرخ انثول.. عاد نمشي سوه..

نافخ.. وتنهد.. ومشى.. واني ماسكه ايدو بس احس ماسكه جنح طياره هلكد سريع..

-عمو على كيفك والله راح اكع.

-خفف شويه.. ورجع مشى سريع ويصعد الدرج يطافر درجتين درجتين واني كوه اصعد الدرجه حيل ما بيه..

وصلت اني وياه لغرفة الدكتور.. ازدحام حيل.. كال ضلي واكفه هيين بالباب.. مشى حجه وي السكرتير ويدحك شوي على السكرتير وشويه عليه

خاف ادحك منا منا لو واحد يدحك بيه تكول خاطفني ويخاف انشاف وينفضح..

شويه واشرلي تعاي.. تقربت الو.. كال كدامنا 14 واحد..

-حيييل وشلون

-ننتظر عجل يابه شنسوي هاي بعد الله بلاني ولا اعتراض على امره..

-يقصد بلاه بيه.. تضايقت من كلمتو وبقيت مدنكه وواكفه. وهو يدحك مكان يكعدني بيه .. وكل شويه ويدحك عليه من فوك لجوه ويهز ايدو

ومكان ماكو يكعدني.. ويسب لنعل ابوج لابو الجابج عليه ..هسه انه موكف عرضي بنص هلعالم يدحكون بيه من وراج..

-اني شعليه غير انته موكفني هنا

-لا اطلعين صوت لا ومحمد ادفنج.. يحجيها ويضغط على ايدي حيل.. اخذت نفس وكلت يارب صبرني يرادلو كلب اخطبوط ب5 گلوب يلا يتحملو

اخر شي.. حجه وي رجال كاعد يم مرتو.. كالو بعد اخوك.. المره واكفه بلا زحمه ما تكعد بمكانك زحمه موكف طولها بين هلخلگ

عاد الرجال گالو اي بالخدمه.. كام وكعدني اني.. هو وكف يمي وانتجى عل الحايط.. وكل شوي يدحك بساعتو وينافخ..

اندارلي ويهمس يولي ما تكدرين تسويلج فلم وتتخربطين حتى ندخل بساع

-ما اعرف.. شنو قابل امثل

-امداج يلغمه.. شمرج على گلبي ثوله كلشي ما تفتهمين هاي لو اخلاص بمكانج جان هين موتت نفسها ودبرتها. ومشت التمثيليه..

-لاول مره تطلع من فمو هيج حجايه ويقارني بأخلاص.. حيل تنرفزت.. وجاوبتو بساع. شجابك عليه هو انتو زمرت جذب وتمثيل اني ما اناسبكم.

تناسبك اخلاص انته وياها جدر وقبق تتراهمون.. لا ادورني ..ولو نرجع للبيت هواي احسن..

-يولي اتشاقى لا تضلين اتخربطين بالكلام لا اكصو للسانج والله..

-كص منو لازمك. بس السانك التغلط بيه عليه وتسب بيه وتقارني بوحده جذابه منو يكصو..

-مد ايدو.. وكضبني من ايدي وحيل عصرها احسها رادت تنكسر بيدو.

-دحكي.. احترمي نفسج لا بالقران ابتلي بيج.

-سكتت.. هو اندار عني وانطاني ضهرو.. ويدحك على ذيج الجيهه.. طالع روحي منو.. وجان تجي وحده وعود.عثرت عليه مسكها ويكلها الله الله..

وهي محفحفه وحواجبها تاتو شيطاني وعدسات ولابسه بنطرون وقميص ضيكات وتكلو اسفه هوايه اووي مدري شلون وكعت..

وهو يكللها لا ولا يهمج ما صار شي .. واني رديتها عميه غير هلكاع شكبرها ومتشوفين.. هي تفاجئت هزت ايدها ومشت.. اندارلي.

-ول يابه انتي ما تستحين تحاجين المره هيج

-لو اني واكعه جان كلت عني ثوله بس للحلوات تتبسم وتتمضحك وتكلهن لااااا ولا يهمج..

ابتسم باستهزاء ويهز ايدو.. ودار وجهو عني

كولو بالموت يلا وصلنا السره ودخلنا.. بعد ما طكت مرارتي من الانتظار. فحصني الدكتور و طلب تحاليل دم..

رحنا حللت.. واخذتو.. كال فقر دم حاد.. انطاني علاج ابر وحبوب وصى عليه بالاكل والفواكه..

كملنا.. وطلعنا.. صعدني بالسياره وهو راح يجيب العلاج. واجه صعد.. دحك ع الساعه 8 الا ثلث..

صاح خرب يومج صلاة المغرب راحت والعشا هم صارت وراحت نعلعلا.. كلها من وراج. صلاتي تأخرت.

-ما رديت.. متضايقه من كلمتو.. هو شغل ومشى.. نزل على مطعم.. جاب لفتين معلاك وعصير برتقال

حطهن بحظني وكال اللفتين اريد تاكليهم راسج ينكص لو ما اكلتيهن.. ما بيه حيل ينشف دمج وتموتين وابتلي بيج..

-عجل من تكص راسي ما اموت وتبتلي بيه.. ؟!

-ام السان اكلي ولا تعلقين .. حجاها وهو يخفي ابتسامتو..

-بقيت كاعده ما فتحت الاكل زكح :- مو اكلج اكلي

-عجل بالسياره اكل غير بالبيت

-يابه بالبيت الف عين تنفسج على هلكمه دكليهن يا بويه وفضيهن والله كتلني حلكج الفاهي..

-ما اعرف اكل والسياره تمشي..

-لحظه اوكف السياره هين .. انه ادخل الجامع اصلي المغرب والعشا وانتي اكلي براحتج. راح اقفل السياره .. وابقي التدفئه مشتغله خاف تبردين..

عاد سوه ونزل.. ادحك عليه يمشي.. ما اعرف عجيب ساعه يطلع روحي يخليني اكرهو اموت منو وساعه اشوف بيه حنيه اني فاقدتها واحس بكلماته بالامان

بقيت افكر بيه شويه.. واخذت الاكل طلعت لفه وكمت اكل واشرب.. واني اكل نعست.. اللفه ما كملتها..

بقت بحظني رجعت راسي.. غمضت عيني نعسانه.. عيني ما كالت باطل بساع نمت.. ما حسيت غير وهو يصعد..

بقيت نايمه البروده مال الجام والجو وتدفئة السياره ما تخليني افتح عيني.. بقيت مغمضه..

اخذ العصير من ايدي.. وخلا على جنب.. واللفه ضمها.. وينكث بجبتي.فتحت عيني وهو جر معقم. يعقم اديه..

دحكلي فتحت.. جر ايدي وحط بيها معقم.. وكال فركيهم.. ضليت افرك بأديه.. شيت ايدي ريحة المعقم تجنن بيه عطر لونو ابيض وبيه حبيبات..

اندرت شفتو يدحك بوجهي.. كتلو .. هاا..

-ليش تخليني اقسى عليج يا بويه

-مفهمت

-اخذ نفس.. مسح على راسي وكال ارتاحي رجعي نامي.. ودار يشغل السياره..

بقيت ادحك بوجهو.. زين هسه هذا ينحب لو ينكره ما فتهمت..

ساعه اموت منو وساعه اموت بحنيتو.. وصلني للبيت.. كال نزلي بس اتسوك حلويات لجهالي واجي ..

نزلت دخلت البيت وهو حرك سيارتو.. رحت للحجيه استلمتني استفسارات.. كتلها ابر.. وعلاجات.. كالت دام عندج ابر امشي نروح لهيام اضربيهن.

كتلها ما بيه والله.. بدلت و فرشت وتمددت حرب كاعد ع الكارتون.. وحلا على الموبايل..

حرب من فرشت تمدد يمي.. وكال نعسان.. وانطاني الريموت.. درتو على مسلسل تركي وكعدت ادحك عليه..

شويه ودخل صراع.. :- هاا الله يساعدهم.. ومشى باس راس الحجيه وكعد.. يسألها على صحتها ويسولفون..

لهناك وكال بابا حلا كومي سويلي العشا.. هي متمدده بفراشها.. وكالت ليليان كومي انتي.. اني احس نفسي مصخنه.

-هو فز .. شبيج بابا مصخنه ونزل كبص يمها ويقيس بحرارتها ويكلها حرارتج زينه بابا ليش ما بيج حيل..

تكلو يمكن صخونه داخليه.. غطاها زين ويبوس براسها.. اخذت نفس وطلعت.. خوش تمثيل وهو واكعلها بوس..

رحت لكيت نوال سالكه نص دجاجه لرجلها.. كتلها كلها ياكلها سعد.. كالت لا مسويه اكل ..زين اذا اكل شويه منها..

عاد اخذت الفخذ.. وكليتو وكسبتو وكليت وياه كبة تمن و بتيته وطرشي وزلاطه جهزتلو الصينيه وخليتلو 3 كرص خبز ووديتها الو..

لكيتو كاعد فوك من فراشي.. ويدحك بموبايلو.. خليتلو الاكل.. كعد ياكل.. اني رحت خليت الجاي على نار هادئه وجبتلو مي وحطيتو يمو.

هو ياكل.. كعدت.. ادحك على التلفزيون.. طلعت لقطة البطل يقرب وجهو من البطله وعود.ديحجي وياها ويدحك على شفايفها..

هو بس صدت عينو على التفزيون زكح.. ديري شنو ذوله الساقطين ومطلعتهم.. ديري ما احب هيج مسلسلا فاكسه ادحگين عليها افتهمتي

اخذ الريموت بعصبيه ودار القناة.. اخذت نفس ياربي حتى المسلسل ميقبل بي.. خلاها اخبار وكعد يركز بيها وياكل..

بقيت اصفن وياه ع الاخبار.. حرب نام والحجيه نايمه وحلا بموبايلها الجذابه ام الصخونه ..

صاحت نوال على الجاي رحت صبيتلو ووانطيتو.. هو رد الصينيه عنو واخذ الجاي ويدحك بالاخبار..

عاد عجبني اكعد اكل.. تقربت للصينيه .. حجه

- لفتج هاي معلاك باباتي نزلتها وياي..

-كرهتو والله .. اريد كبه

-براحتج يابه بالعافيه بس اكلي..

-بقيت اكل بليه خبز.. دحكتو كام يغسل.. اخذت الصينيه للمطبخ عزلتها وغسلتها وغسلت اني ورجعت للغرفه..

لكيتو كاسر المخده مالتي ومتمدد على البساط ما على الفراش عكس فراشي..

زين شلون انام.. اخذت مخده لخ وخليتها يم ايدو ونمت.. واني اشم عطرو قريب عليه

تمنيتو ما عكسي.. يجي يتمدد جنبي احس بينو يمي .. غفيت واني اشم بعطرو وهو بعدو عني شبر..

شوي وكعدت.. الكل نايم بس حلا وجهه بموبايلها .. كمت دحكتو نايم وما مبدل. صعدت جبتلو تراك خفيف..

ونزلت كعدت يمو.. ردت اكعدو.. جان تحجي حلا.. لوكيه معليج بي. لا ضلين ادتحشرين نفسج بيه حتى يتعود عليج ويريدج.. انجوم السما اقربلج

ما درتلها راسي ابد.. وعناد بيها.. مديت ايدي على راسو وكتلو عمو.. فز بساع..

بس اكعد بدل ملابسك لتتقيد بيهم ونام على الفراش الكاع صلبه تأذيك.. كعد على حيلو فرك وجهو.. وفتح القميص ونزعو .. وانطانياه..

اني اخذتو.. علكتو ورحت طفيت التلفزيون.. هو وكف نزع البنطرون وانطانياه.. وبدل.. ورجع للفراش نام...

علكت ملابسو.. وتمددت يمو.. اخذت نفس.. هسه يلا احس براحه. رغم هو انطاني ضهرو وحظن حرب بس كلبي ارتاح لان هو تمدد يمي.. .

مجرد قربو مني كافي عليه.. غفيت وبينا تقريبا شبرين.. نمت مرتاحه.. فزيت على صوت الحجيه وهي تندهو يكعد يصلي الفجر..

عاد انتظرتو يرجع ينام.. الضاهر صلا وصعد فوك.....

ما غفت عيني ابد.. وكأني فقدت الراحه بالنوم... بقيت اكلب لحد.مشفت الساعه 7 الا ربع..

صعدت لغرفتو.. لكيتو نايم.. كعدتو للدوام.. فز بسرعه وكعد يفرك بوجهو ويمط بجسمو.

طلع للحمام واني طلعتلو ملابسو العسكريه والحذاء والجواريب .. ونزلت حطيت الجاي وطكيت بيضتين عين.. وحظرت الصينيه..

شوي ونزل هو..

-ها صباح الخير

-صباح النور.. حظرتلك الريوك تتري...... ممكمله كلامي سحب الكرسي وكعد ياكل..

اخذت نفس.. وكعدت كابلتو.. بس ادحك بوجهو وهو ياكل.. كلشي بيه صار يعجبني ادحك عليه..

صرت احب كلشي يخصو واهتم بيه.. حتى لو ما اهتملي بس .. بس مجرد هلشي يسعدني..

كمل اكل وكال الحمدلله.. رحت جبتلو مي.. شرب وغسل .. انطاني 10 كال تنطيها للحجيه مصرف.. وحجه محتاجه شي

كتلو لا.. عاد سلم وطلع.. بقيت هيمانه بطولو وهو يمشي..

من كد ما عندي واهس وانضف ما احس بتعب كد ما افكر بيه لان كد تفكيري بيه واني مستمتعه.. ما احس الا الشغل البيدي خلص..

خلصت كلشي وصعدت بغرفتو المع وانظف كلشي كبالي.. ملابسو ميحب تتصفط عبطيا..

الخانه الوسط ملابسو الداخليه على اليسار والتراكات على اليمين.. كل فانيله داخليه شورتها مصفط بداخلها..

كل تراك بجامتو مصفطه بداخلها... كاعد وارتب بواهس.. فتحت خانة ملابسو اللي معلكه..

هم رتبتهم حسب نظامو .. الدشاديش اولا انوبه ملابس الرسميه انوبه العسكريه اخيرا..

سويت غرفتو جنه.. حتى اللي لبسهم البارحه وغسلتهم رحت جبتهم من الحبل .. و كويتهم على مهل ابد ما حركت بيهم..

كملت كلشي.. رحت لميز التواليت.. دحكت عطورتو.. معطر جسم يستخدم ليزر.. والعطر قنينه سوده كلها
ومكتوب عليها بالانكليزي عموديا

B
O
S
S

ابتسمت واني ادحك بيها.. فتحت القبق مالتها وشميتها.. اخذت نفس طويل و اااااااه.. يجنن عطرها.

رشيت بالهوى وارفع وجهي اشتم.. ووووووي يجنن .. حسيت الباب تنفتح.. ضميت العطر وراي بسرعه ..

دخل هو تعبان.. ما شافني راد يكعد.. ودحك عليه..

-ها ليون شجايه تسوين

-ما سويت شي ابد

-ههههه جنج عامله مصيبه..

-لا قصدي يعني كويت قميصك بس والله ما حركتو..

-كام بساع وكال وج بس لا صدك.. ولزم القميص يدور بيه..

-لا والله ما حركتو عرفت اكوي..

-ابتسم.. وتقربلي.. يمه خفت من تقرب واني مخليه اديه ورى ضهري اريد اخلي العطر بس خفت ارجع ليوره واحطو وينتبه.. وصرت بموقف غبي والعرك يجري..

حط ايدو على راسي وكال شاطره عفيه ..

-ابتسمت بخوف.. وعفتو وركضت منو.. وطلعت.. بس شبيه خايفه ما اعرف وليش اخذت العطر..

دحكتو يلا حتى ابقى اشم عطرو براحتي.. نزلت وضميتو بين ملابسي.. وقفلت الخانه..

بليل سأل عنو وبقى يدور استحيت اكلو عندي.. كلت اشمرو بغرفتو من يطلع.. وضميتو .. عاد الحجيه التهت وتعبت ادور كاللها اتركي يمه اني هسه طالع واشتري غيرها..

فتركتها وبقيتها الي .. وضامتها بسابع مضمام يوميه اطلعها اشم بيها واضمها لا احد يشوفها عندي

صارت كل ايامي امشي واني اراقبو.. ادحك بيه وين ميروح.. يكعد انسى نفسي والباقين وابقى بس ادحك بوجهو..

هو احس ينتبه على كل نظراتي الو.. بس مطنش ما اعرف ليش... بعد ايام.. كنا كاعدين وره العشا واهلو كاعدين..

واني ناسيه روحي ومركزه بيه فهمت كل حركه بيه
. حركة حاجبو لما ينزعج.. الكلمه يلي تضحكو طريقة مسك الاستكانه .. صفنتو

اخفاء امر مضايقو بضحكه.. تجاهل البشر ايحجي براسو كثير .. كل لمحه وحركه اني حفظتها بيه كد ما ادحك بيه..

يمكن عرفتو اكثر من امو..

من كاعد يشرب جاي ويتصفح بالموبايل واني ناسيه نفسي.. ما احس الا الحجيه اطبطب على رجلي وتكلي يولي مو احاجيج..

-ها ها شنو .. شحجيتي

-يمعزايه صارلي ساعه اكلج كومي جيبيلي ماي.. وين بالج

-هاا ... ااا .. اي هسه اجيب.. كمت وهو دحكتو ابتسم وهي تكلو فاهيه هلبنيه مدري شبي عگلها كوه تستلم وتفتهم..

وهو يبتسم ويردها.. على كيفج وياها يمه بعدها صغير ..

ليش مطنشني.. وليش يعتبرني صغيره.. مو هو زوجي.. عجل المن تزوجني..

اني ما صغيره وهيام تكلي ما الج غيرو ولازم تحبي واداريه بس ليش متكلو الو لازم يحبني..

زين اكلها لهيام تكلو.. لا عيب.. وبعدين هو عنيد ما ياخذ حجي من احد لو حجيت افشل نفسي واطلع اني الكاتله روحي عليه واريد اتزوجو..

اخذت المي ورجعت انطيتو للحجيه وكتلو عمو اني راح انام تطلب شيء.. صاح نائل

لا ليليان بس خدري الجاي ولد عمي جاايين الليليه يسهرون يمنه لعبه مال ريال مدريد.. اريد تسوين جاي و تشعلين فحم النراكيل

صراع:- وهي شفهمها بتعمير النركيله يا نائل عمرها انته وممنوع ليليان اطب على الرياجيل .. انت تاخذ الجاي وانت تجيبو

-اي هو انه اخذها ..هي عليها بس تشعلي الفحم يا صراع ليش مكبرها..

-ما كلت.. رحت طلعت قوري جبير.. وخليت الجاي ع نار هادئه.. وكعدت اصفن.. ما اعرف ليش من شميت ريحة الجاي خطرتلي امي..

امي ليش ما سئلت عليه.. ليش ما جت شافتني شبيه ما بيه كتلوني ذبحوني.. هيج كلبها اطمئن اني بخير..

دا افكر طب صراع.. بساع اندرتلو بسؤال.. اكول عمو

اندارلي وهو يدور على كلاصو يريد يشرب..

-هاا

-كمت انطيتو وكتلو امي ما خابرتك ابد..

عقج حاجبو.. ليش هلسؤال ؟؟

-بس دا اسئل ليش نستني بساع ما سئلت لا كالت عني ..

-ليليان حياتج السابقه عد اهلج انسيها .. وانسي اهلج وياهم..

-ليش اني راح ابقى دوم هنا .

-مضايگه من شي ؟؟

-لا بس مصيري ما معروف هنا.. اني اريد ارجع لاهلي ارجع لدراستي.. هنا الحياة مو مثل حياتنا .. الى متى ابقى هيج خدامه..

-منو كايلج انتي خدامه

-عجل شنو الكراب الاكربو من الصبح لليل.. اني عند اهلي اسويلهم فضل لو كمت غسلت مواعين..

-باباتي كل بنيه تتغير حياتها بعد الزواج..

-بعد الزواج !! ليش اني متزوجه ؟!

اخذ نفس.. وخلى ايدو على زندي ويكلي انسي بابا انسي.. وطلع

دحكت عليه.. هلرجال ليش ما ناوي يرحمني..

ساعه يكول عني صغيره .. ساعه متزوجه.. شنو اللي يريدو بالضبط.. طفيت الجاي وكعدت مدنكه وكلي هموم..

سمعت ام سعد.طلعت ادك الباب حيل على ابنها سعد.. رحت بساع جان تكله مرت المرحوم جاي تطلك كوم بساع.

كلها طلعت وانخبصت صراع يكلهم تردون اخذكم كاله سعد.لا ما يحتاج .. عود اخابرك اذا احتاج..

طلعو وهدأ البيت وصراع راح كعد وي ولد عمه ع اللعبه.. ونائل بقى كل شوي يجي يحط عسل مدري شنو بهاي مال النركيله ويحط سليفون ويزرف ويكلي زرفي هيج على ما اودي الجاي..

وابقى ازرف بالسليفون.. لحد.ما يجي.. زرفنا اني وياه 5 نركيلات.. شال ثنين وكال جيبي وراي اثنين حطيهم بالباب..

اني شلتهم ونسيت نفسي دحكتو دخل دخلت وراه.. ما افز الا على صوت صراع هيييييين هيييييين ادحك كلهم رياجيل ..

ركزت وشفتو لصراع

خزرني وكال طلعي.. خليت النركيله حيل بالكاع وشردت.. واسمع نائل يصيح لا يا ثوله كسرتيها ولج هو هيج اليحط بالكاع.. هاي شلون بيها

صراع- وانته شكو تخليها تجيبهن..

-كتلها خليها بالباب بس هاي عقلها مبطنش كلشي ما تفتهم

رحت للمطبخ.. اجه وراي صراع كضبني من ايدي. وزكح :-انتي ما تستحين فايته بطولج بنص الرياجيل..

-نسيت والرب

-دنسي بعد.بالقران الا اطكج على راسج صدك اسويلج فقدان ذاكره واخليج تنسين من صدك..

-نكث ايدي وطلع.. اخذت نفس كلعاده اكرهو ساعه واحبو ساعه..

بقى نائل كل نص ساعه يكلي جددي الجاي.. دا اصب جاي واسمعهم صرخو وطلعو يتصارخون مثل المجانين

اني عبالي انفجرت عليهم النركيله. فتحت باب المطبخ وتلكيتهم... هاااا هااااا شنو انفجرنا

شو ذوله شافوني واخترعو نزلو روسهم وطبو بساع يا شبيهم ..

طلع صراع يمشي حيل وشايل ايدو ويسب:- لنعل حتى شيب الخلفج فضحتينيييي

اني دحكتو جاي عليه بهمه.. ركضت ودخلت المطبخ وقفلت الباب عليه.. وهو يصرخ ويضرب بالباب

-ولج وتالي وياج انهيج اطلعين مناك تجين تصخمين وجهي منااااا وين احطج وتركديييين

-عبالي انفجرو والله

-انفجر شيب اهلج بتل المسطول كولو اريال مدريد وطلعو الولد فرحانين انتي شمطلعج الهمممممممم

-روح روح بعد.والله ما اطلع.. ما فتحتلو الباب بس شكد ضحكت على فشلتي كبالهم.. هو راح.. واجاني من الباب الثانيه..

-امشي ولي نامي لا ابتلي بيج والله

-هو يحجي واني صايره حمره من كد ما ضحكت على روحي..

-ابتسم من شافني اضحك.. هز ايدو وكال روحي نامي بويه والله شيبتي راسي اشتعل شيب اهل نائل بيوم الوصاج على هلجاي الاكشر ..

-فتت للغرفه واني اضحك.. وخلصت الليل كلو افكر بيه وهو شلون عصبي ويبتسم.. افكر وعمتي كل شويه تتصل بأم سعد على اخبار مرت المرحوم..

اخر شي نمت.. حسيت على صراع وهو يصبح على امه بعد صلاة الصبح ويسألها على مرت المرحوم وهي تكلو دخلوها العمليات وان شاءالله تكوم بسلامه.

بقيت على نومتي وهو تحرك.. دحكتو غطى حرب وحلا .. واجه تقرب مني غطاني زين وطلع.

لثاني يوم.. كعدت الصبح على خبر ان نور مرت المرحوم عابد جابت وكلها فرحانه وتستبشر ويبجون لان عابد مات وما شاف جهالو

عمتي كالت حظرن الغرفه مالتي الها تنام على التخت..

-عجل عمه ليش تجي هنا ليش مو عد اهلها

الحجيه:- يا ابنيتي غير جهال المرحوم اول ما يدخلون .. يدخلون بيت ابوهم خوما ينولدون عد الغرب

عاد حظرنا الغرفه ورتبناها وكركوت 2 صغار جابو للجهال وحظرناهن وشموع و جكليت والكل فرحان..

لحد الليل يلا خابر سعد كال جايبهم وانه بالطريق انخبصنا ناس تحظر مي وناس تحظر جاي وناس تتفقد الكراج وتلملمه خاف بيه شي..

لحد ما اجو.. نوال طشت جكليت فوك البنيه الجابت وام عبد تهلهل وتبجي وعمتي تصفك وتكول يا عين صلي ع النبي جازانا وانطانا صبي

الجكليت صارو كوم بالكاع دنكت اخذت اثنين والكل فرحان.. عمامهم اجو وحتى بيت اخلاص.. وخليصه بأول الميدان

كعدناها بغرفة الحجيه والنسوان صفت والرياجيل بيت عمهم طبو هم يصيحون عليه يردوني اصب الجاي واني امش وراهم اريد ادحك الاطفال الاثنين..

عاد صاح الحجي كعدو ليش كلكم واكفين.. اني صرت بسد عمتي حتى اشوف التوم.. كعدت عمتي على طارف السرير واني يمها بالكاع..

وكام واحد واحد يبوس بيهم ويصلون على النبي.. الحجي كاضبهم.. وصراع كاعد يم عمامه كاله ابوه تعال كبر وأذن بأذنهم..

عاد كام .. شالهم وعيونو تلمع من الفرحه وهو يبوس بيهم.. واحد منا واحد منا.. وكفت وياه عمتي اخذت منو واحد.

كتلو عمو خل اشوفهم الله عليك.. رفعلي راسو مبتسم ويكلي تعاي.. اجيت وخلاه بحظني ويكلي سندي ضهرو لا من راسو تكضبي..

مسكتهم وعيوني ادمع من الفرحه هلكد صغار يجننون اول مره بحياتي امسك طفل بهلعمر ابد ما شايفه اطفال ولا ماسكتهم. ما عدنا بعائلتنه اني اصغر وحده بيهم..

العب بخشمو واكلو حبيبي يجنن.. وصراع مخلي ايدو تحت ايدي يخاف ما اعرف امسكو وواكف يدحك ويايه..

عمتي كالت بجاه الحبيب محمد يوم الادحك جهالكم تارسه البيت ويفرح كلبي بيهم.. درتلها اضحك وارجع ادحك بالطفل واكلها يخبل..

هو اخذ الطفل الثاني من ايد امو ويكلها ... اسماءهم احمد ومحمد ان شاءالله.. على اسم حبيبنا ورسولنا محمد..

واذن بصوت عالي بأذنهم.. حلوه تقاليدهم ع الطفل وفرحت وياهم حيل.. اخذت الحجيه منؤ الطفل

وابتعدت دا اطلع .. وادحك سحر تخوز لان واكفه وي صراع وفرحانه بالاطفال.. طلعت لنوال لكيتها صابه جاي وهلكد دردمت شلون ما اجيت عاونتها..

صبينا ووزعنا.. لهناك صراع تعب.. كال طلعي گبلي حظريلي الملابس والحمام بسرعه اريد اسبح نعست وراي دوام..

طلعت حظرتلو تراك.. واخذت منشفه نظيفه لان هو عادته.. المنشفه من يسبح وينشف بيها ممنوع ترجع تتعلك..

تروح وي الملابس الوصخ ويكش يسدخدمها مره لخ الا تنغسل يكول انه انشف بيها وتصير كلها ماي وتضميها غير تخمخم..

ف4 مناشف اله وغسل وياه وياه باليوم منشفتين .. فحظرتلو المنشفه النظيفه بالحمام. وطلعت..

دحكتو واكف على باب غرفة الجهال ويتسمع.. تقربت منو.. دا اريد اكلو حظرتلك الحمام..

بعدني ما ناطقه.. و هو خزرني وحط اصبعو على فمو ويكول هشششششششش...

خفت.. سكتت بساع.. وتقربت منو اتسمع.. حرب وحلا يتكاونون وحرب يهدد اختو و يكول........ يتبع

☆☆☆☆☆☆