المراهقة والأربعيني الحلقة (23)
المراهقة والأربعيني
الجزء الأول
الحلقة (23)
طلع من المطبخ وصاح.. ليلياااااان.. مشيت وراه. كضب ايدي ودخلني لغرفة الحجيه
كالتلو:- ها يمه خير بيك شي
-يمه رايد اطلع وهلمشاكل شلت راسي
الاريدو منج ليليان لو طبت المطبخ واشتغلت ايدج والنعال على راسها
-تم يبعد امك
-دحكت ع الحجيه وهو طلع.. ابتسمت..
-يولي اتركيهن وصعدي حطي راسج و نامي
كعدي تلفزيون شعندج مگابلتهن مو رجلج متعوره ؟
-هو هم بيج.. اصعد فوك احسن لي.. رحت
لغرفتو لملمتها ونظفت وكعدت اطمش ع التلفزيون..
جانت اكو قناة اسمها فتافيت.. شكد يعجبني اطمش عليها.. واحب
اتعلم الاكل بس الشكر للرب ولا اكله حفظتها من المتابعه لهل قناة
كاعده.. وطبت حلا ضايجه مختنكه ووجهه احمر عرفت صراع ضاربها
راشدي مو غريب عليه هلچف ماكلتو
..
نزعت الجبه وكالت:- يولي حيه مسمومه
النهار كلو كاعده وانتي اشوفين ابويه وتصيرين نادره كدامو عبالج ما اعرف سمومج كل
همج تشوهين صورتي
-لا حبيبتي غلطانه
-انجبي وكلمه ما اسمع.. بس بسيطه خل
يهدا الوضع اذا ما علمتج الله حك..
-ما رديت عليها هي نزلت بساع..
ادحك و مليت من التفرج ع التلفزيون .. نزلت.. لكيتهم يصبون اكل
.. كعدت يم عمتي .. وكل شوي اريد اكوم اعاونهم اكول خطيه وتكعدني الححيه وتكلي
مالج غرض المطبخ مليان نسوان..
صبينا وكعدت اكل.. والعجيبه اخلاص للان ما رايحه شنو من بشر
هاي ما اعرف.. اكلنه وام سعد حجت
-ويشكون حالها يكولون ما تاكل فقر دم..
وهي تريكت ب11 و هسه وحده ونص وتريد تتغده بعد اكليني .. صدك لو كالو حظ الجايف
نايف
-ردت احجي ندستني الحجي.. همست الها ..
متسمعين
-خايبه شبيج لو ما غاثتهن وطالعه
ارواحهن منج ما حجن ليش تريحين گلبهن وتردين.. اكلي جثير وغثيهن فوك مغثتهن..
....ضحكت.. اي صدوك خوش فكره.. اخذت السوب
وشربت الكاسه كلها شرب.. انوبه التمن.. اني احبو وي اللبن (روبه)
كتلها ساره عللبة اللبن بالثلاجه كومي جيبيها.. ما كالت لا..
كمت اصب لبن ناشف وي التمن واكل..
وام سعد ادحك وتكول يا يا يا هاي الما تاكل.. هي حجت هيج..
وكعت على سطلة اللبن بالخاشوكه اكل اكل اكل .. طيرت نصها..
وهاي ام سعد الا شويه جان انجلطت. بس عدت حرامات متموت ما بيها خير..
اني اكل وهيام مدنكه وتضحك بس الكتاف تهتز.. يمكن اول مره
بحياتي اكل هلكد..
كملت ودكيت على كرشي واحجي وي الحجيه.. يمه كليلي مبروك اني
حامل بطفل اسمو كرش
وهنه هيام والحجيه خربن ضحك.. كتلهن شلون اكل طيب عاشت ايدج
خاله ام سعد.. تعيشين واطبخيلنا غيرو الله يحفظج..
-مو الخدامه مالت النغوله مالتج بنت
الكلب
-لا لا صدك الاكل طيب.. يابه يرادلي
سفن انزل طفلي الكرش بيه ..
-الحجيه تضحك.. ومدت بجيبها طلعت
فلوس.. مر ابن سعد الصغير كالتلو روح اشتري بطل سفن بساع عدنا حامل نريد نجيبها
بسفن..
هي تحجي وهيام خربت ضحك.. وذن كاعدات وعود ما مهتمات وهن بودهن
ياكلني.. كامن لمن الصينيه..
اني رحت غسلت.. حلا تلم بالمواعين و اخلاص تغسل ع السنك.. رحت
كعدت يم الحجيه.. فات صراع بدشداشتو ويفر بسبحتو..
دحكني كاعده يم الحجيه ابتسم.. دنك راسو للمطبخ.. شافهم
عيغسلون اجه كعد يمنه اني والحجيه بالهول ..
-ها الله يساعدهم
-هلا بيك يمه
-شو هاي ما ولت
-شسوي يا بني ادميه ما عدها ذرة
كرامه.. بجت وابوك الحنين كضبها وما ترحين وبقت.. قابل اكوم اطردها..
-هز راسو.. وانتي .. دحك عليه..
حجت الحجيه :- اتركها هاي حامل
-شنو حامل يمه. شهلحجي
-حامل بكرش يمه..
-
هي غير لو تاكل ام البسكت
-كلت يمه لا تخاف كلت اليوم وعوزها بس
تاكلهن ع الواهس وحبلت بكرش ومتانين السفن يجي دنزل الكرش
-ههههههههههه والله عليكم سوالف هههييي
ياربي اروح اصعد انام اشرفلي من الكروش والسفن..
ديكوم.. اجه ابن سعد.. جايب بطل سفن صغير..
اخذو صراع وكالو اي بعد عمك انه هم حبلى بكرش واريدو ينزل فتح
البطل وشرب بدون كلاص..
نزلو وسد البطل ودحك عليه يولي تشربينو لو تكشين اطلبلج غيرو..
-لا عادي اشربو..
بأبتسامه خفيفه ورفع حواجبو ونزلهم وكلي هاج .. شكد عيب هسه
اروح اشرب من حلگو كدامو..
الشربت كال هاي ميته عليه وتشرب من حلكي.. والمسحت البطل من
فوك.. كال هاي تكش مني .. وعيب
عاد. كمت اخذت كلاص وشربت.. وصعدت فوك.. لكيتو عيبدل.. مديت
فراشي وردت انام
ما جاني نوم.. هو طفى وبساع غفى.. شغلت التلفزيون هم ملل.. عاد
الشيطان تربع براسي وكمت رحت يمو..
دحكتو نايم.. جريت الموبايل مالتو على كيييف.. رجعت دحكتو ما
فز.. كعدت بالكاع وكمت ابحوش دست الهوم..
ماكو قفل.. فقط سحب.. مررت اصبعي .. طلع صوت شلون المي من سحبت
الشاشه.. صكيت سناني وغمضت عيوني من طلع صوت..
كلت كعد.. رفعت راسي .. بعدو نايم وايدو على عيونو.. دخلت
الاسماء.. دست حرف أ ..
كومه اسامي بهلحرف.. دست ا و خ.. طلعت بساع .. اخلاص..
حذفت الاسم من القائمه.. رحت ع الرسائل .. اخر رساله بليل
كاتبتلو ابو حرب بروح العزاز رد علي
دا اصعد اقره الرسايل بعد.. ما احس الا نسحب الموبايل من
ايدي.. درتو كاعد . وساند على ايدو وكال
-يولي مو عيب تفتشين بشي ما يخصج..
-لا عمو دطلع العاب
-شفتيني جاهل انه وتجذبين علي مالت
العاب هي
-دنكت وكتلو اسفه..
-ول يابه ريحي راسج ولا تفكرين بشي
اكبر من عمرج.. واطمني بويه.. هذا تره مقفول .. اشر على گلبو.. ومفتاحو ضايع..
-دحكت عليه ليش ضايع
-المره الزينه والتمشي على مايي تلكاه
بس هسه مقفول يلا بويه نزلي سويلي جاي وبعد لا تعيديها
-هزيت راسي عبالك تعاقبت.. بس فرحت من
كال هيج يعني ميحب اي وحده..
يعتي حتى اني ميحبني ؟؟ لا هو كال انتي صرتي اعز من حلا.. يعني
يحبني ما مثل خليصان ام حثل و وام مصطفى الما تستحي..
نزلت.. حلا واخلاص كاعدات بالمطبخ يحجن. ما اهتميت .. طشيت الجاي وسويت جديد..
وكعدت ارتبلو الصينيه والاستكان مالتو..
حلا:- دحكي واسمعي زين لا عبالج تصيرين مره لابويه تحلمين
والله مخططاتج كلها نعرف بيها حيه مسمومه
-دحكت الها بطرف عيني وكلت..ملعوب
بعقلج ما ارد عليج
اخلاص :- وشكالت عيني حقها ابوها وهي حره بيه
-واني مرتو افتهمتي ومحد حاجي وياج
وطالب رأيج ف لا تدخلين .... لزكه..
رادت تهد عليه حلا .. و جرتها اخلاص .. :- كعدي يولي ما بينه
حيل هلجلبه المسمومه الماتستحي تروح تتبكبك كدام ابوج وتطلع هي المسكينه
درت منها.. بس لمحت اشرت الها اشاره ما عرفتها صبيت الجاي وردت
امشي.. دا اطلع حلا مدلي رجل وجان انجبح اني والجاي على ركبي
صحت اااخ.. ردت اسند ايدي.. دحكت رجلين صراع .. سحب ايدي وكال
كومي لشوف بويه.. سحبني وراه ودخل للمطبخ.
-شال حلا من شعرها رفعها.. اطلعين فوك
وجهج ما ادحكو.. وحسابي وياج بس اصعد.. كلببببه
ودفعها واندار على اخلاص .. اتخصر وكاللها هاي عود انتي
الجبيره عجل شنحجي ع الجاهله.. اسمومج حتى البنتي جاي تبثيها..
دحكيييي واشرلي واني ابجي وهو يصرخ...ليش هيج تسوون بيها بشنو
اذتج ليليان فهمينييييي.. طالبتها ثار .. داخله بيتج و سابتج.
انه ما خلصت من اختج وحقارتها وانطمت اطلعيلي انتي ... هي تريد تحجي بس هو وصوتو عالي وما
خلالها حرف تنطق..
رفع ايدو واشر للباب.. دقيقه ما تظلين يلااااا .. الضاهر انتي واختج طينه وحده ما تجن
بالعين والاغاتي لا اطردجن يلا تجرن..
حجاها.. واندار كال صعدي جدامي انتي بسااااع.. صعدت.. و هو
وراي من عصبيتو بودي احط ايدي وره خاف تجيني ضربه بلا ما اعرف..
بس ما ضربني راح كبل للغرفه.. دخل على حلا.. و سد الباب.. وهي
تكلو بابا والله بعد.ما اعيدها
وهو يصرخ لج بنت الكلبه تتعلمين حقاراتهن انتي.. ويضرب وصوت
ضربتو على جسمها تنسمع. وهي تبجي وتتوسل.
اني حطيت اصابعي باذاني وركضت للحمام اختفي من كدامو. لا هم يكتلني.. احس بطني ذبحتني الم
من الخوف وهو اسمع صراخو بالبيت..
اخر شي.. اجه للحمام ضرب حيل وصاح من هيناااا
فتحت الباب ودموعي تجري من الخوف وبساع حجيت وكتلو عمو والرب ما حجيت وياهن هن يغلطن عليه.. حجيت واختنكت وبجيت
فتحت الباب ودموعي تجري من الخوف وبساع حجيت وكتلو عمو والرب ما حجيت وياهن هن يغلطن عليه.. حجيت واختنكت وبجيت
-يولي طلعي لخاطر الله.. بعدني وفات
للحمام دنك و حط راسو جو البوري.. والمي على راسو يجري.. صاح منشفه..
ركضت جبتلو واجيت.. واني ارجف منو لان شرايين ركبتو كلها طالعه
واحمممر من العصبيه.. وحلا تبجي بغرفتها والحجيه واكفه ع الباب..
اجت كالتلو يمه كتلك على كيفك.. صحتك اهم وليدي.. شال راسو وحط
الخاولي نشف بساع ونزل وزكح
-يا صحه وذن الساقطات على كلبي ..
دزيتها بس تسويلي جاي يكلبنها هي والجااااي ..
ما كالن وجهه يحترك كزازه تطفر بعينها.. هاي انه نايم فوك
وسبوها سبايه.. عجل
لو اروح شلووون يشربون دمها وين حاطها انه يا امة الاسلام وييين
لو يهود هم عدهم رحم من خر****** ب***** حتى كو******يد .. طلع
وهو يحجي وينشف براسو ..
-فوك انه وسمعتهن يتلاغن وياها.. كلت
انزل اشوف شكو.. انه انزل وهن يكلبنها هي والجاي الحار جدامي ..
ماخذه ورثهن بنات الكلب.. وهاي حلا بالله لو سمعت حسها الا
راسها اكصو.. مخلفلي وجدان ثانيه ابيتي كلبببببه..
حجه ونزف خشمو دم.. ركضت جبت كطن..هو طب للغرفه.. بساع جبت
الجيس كلو.. وانطيتو
شويه
خلاه على خشمو ورفع راسو.. رغم كل صياحو يدافعلي واني دموعي
تجري وارجف خوف منو لا يضربني ويطلع عصبيتو بيا..
تمدد ع السرير.. وهو يمسح الدم.. وكف تقريبا بس حيل تعب حسيتو
كام يشهك.. وصدرو يصعد.وينزل
خفت يصير بي شي والحجيه واكفه وتحجي وياه وتكلو كوم راح تموت
كوم روح للمستشفى كوووم..
اني متحملت مسكت ايدو وكعدت ع الكاع و خليت راسي على ايدو وكمت
ابجي حيل بصوت عالي..
كام من مكانو.. :- يولو انتي شبيج ما تكليلي
-اني ما ارد وما اعرف ليش جاي ابجي خوف
منو وعليه.. اخاف يضربني واخاف يصير بي شي واخسرو
اتخر شوي ومد ايدو وكال حدري لشوف .. تراج ذبحتيني.. جرني
لحظنو.. ضحكت الحجيه.
كالتلو بعد.ما اخاف عليك دام تحظنت نزل ضغطك.. طفت الضوه
وطلعت.. واني بس ابجي بقوه..
وهو يمسح على شعري ويكلي لا تبجين يولي .. والله احركو
اليوصلج.. انه موجود وهلدموع تنزل ..
-حاط راسي بصدرو .. ويمسح على شعري..
ابجي ابجي حيل مدري شبيه لحد ما هديت.. وثكلت ايدو فوك راسي واني عيوتي ثكلن من
البجي وتعبت
ونمت اني وياه.. ما حسينا بشي .. لحد.ما تحرك صدرو .. حسيت فتحت
عيني بس ضلام وضوه خفيييف من الكراج ..
-همس بيش الساعه ..
_ما اعرف .. بحظنو ومد ايدو مني وزت
حملو عليه وشغل التيبلام .. دحك ايدو.. ساعتو واكفه غاسلها
اندار للحايط.. 8 و عشره.. يلعن ابليس استغفر الله صلاة المغرب
والعشا راحو عليه.. كف الغطا وسحب ايدو من جوه راسي و كام بسرعه مني وطلع..
رجعت راسي مرتاحه الجو شويه بروده والفراش داااافي وظلمه بس
ضوه التيبلام.
رجعت عيوني بين التغفى و التصحى.. دخل هو .. شغل الضوه ومد
سجادتو.. ووكف يصلي
كمل اجه كعد وتمدد وسند راسو بأيدو ودحكلي وحجه ..:- تعرفين ان
انه مو نوام هشكل وما اغفل عن صلاتي وجان عندي موعد وي ولد كلهن تخربطو؟
-خابرو وروحلو
-يولون مخبل انه اترك غرفتي هسه واطلع..
-واني حاطه راسي ع المخده ابتسمت..
-ابتسم... صار عمري 43 سنه ولا فد يوم
جذبتني مره وصارت بنفسي وتركت كلشي وكابلتها لان مرتاح
-مرتك الاولى شبيها ليش ما جنت تحبها
-الله يرحمها تصرفاتها تغثني اكره
المره العدها خباثه وهي عدها حقاره .
-يعني متحبها
-
من جنت وياها ما كلش جنت احبها بس على
كولتهم عايشين خاطر الاطفال والعمام ما يتخاربون..
-اني سمعت شويه عنها كالو جانت ما زينه
وي الحجيه..
-دحكي ليليان.. يمكن انه الرجال الوحيد
گلبي بيد امي.. ومفتاحو عدها من كتلج مقفول.. اعشق المره الترتاحلها امي وتريح
گلبها..
امي فقيره وجثير يستغلنها ويستغلن طيبتها فما احبهن ولا يكربن
يمي بشي
-اني مرات احسها امي.. لان من ادافعلي
تصيرلي سند.. حتى من انت ما موجود ما تخلي احد يأذيني
-ليليان امي فقيره.. وشافت ضيم بس الله
يعلم شكبره..
-حجتلي هيام عليها شوي وابوك ما يريدها.
-ابوي مو بس ما يريدها بس كتلج امي
فقيره من اهل الله.. اسمعي خل احجيلج..
ابوي من عشيره معروفه بالانبار.. وامي غريبه ما من عشيرتو
علويه سنيه من سادة عشيرة النعيمي ..
-يعني شنو
-يعني نسبها من نسب الرسول محمد عليه
الصلاة والسلام.. من تزوجت ابوي اتأخرت كم سنه ما حبلت..
ابوي رادلو حجه.. وراد يتزوج وحده من اقاربو يحبها .. رغم عرف
امي حبلت بس كاللها انه اريد اتزوج..
بدت معانات امي من يوم الدخلت لميعه ام سعد لبيت ابوي.. جانت
امي حامل ولميعه مر على زواجها 5 اشهر وما حبلت
فكلولها انتي مثل امج تحبلين متأخر وما تخلفين بس بنات.. اهل
گبل جانو يصدكون بالخرافات وهيج كلام.. فهي صدكت ان هي مثل امها ..
وامي النسوان كاللها ابطنج ولد.. هاي سمعت لو الكاع ما لمتها..
ما خلت طريقه حتى توكع الطفل اللي ابطن امي..
حتى سم .. سممتها .. وامي فقيره لا تشكي ولا تحجي وعدها اهل بس
هم فقره مثلها مابيهم شدة ظهر
جانت بطنها شكبرها واخر ايامها وهي بالظهريه الحمره ابستان
ابوي تشتغل.. لحد ما جالها الطلوك وهي تحوش
جابتني اني بنص الزرع.. كالت راح يموت ما يبقى لان حيل تأذت
بيه وصلت الموت.. بس لا انه ولا هي صار بينا شي..
من يومها سمتني صراع.. على كد ما صارعت الدنيه حتى تولدني واول
نظره منها الي كالت اليوم انولد زلمتي الراح الصارع بيه دنياي..
ابوي هجرها كل الدنيا تعرف بحالها وواكفه وي لميعه. فما رادت من الدنيا غير الله يحفظني
ويجعلني سند الها والكبرها..
مشت الايام صعبه حييل .. انه صغير ما جنت واعي وهي ما كلش
تسولفنا على معاناتها تكول بس الله يعلم بيها ما اريد غير الله يعرف
بس اتذكر عمري 5 اسنين مدري 6 .. الناس لحو على ابوي شلون هاجر
امي يجي يكسر الهجر بينهم ويعتبرها مره..
وابوي ما كال لا.. اجه لامي ليله.. لميعه درت و كلبت الدنيا
فوك راس ابوي شلون يوصلها لعبت باحولو لعب..
وبالفعل من ذاك اليوم ابوي هجر امي فعليا.. بس اللي صار امي
حملت مره لخ.. وجابت هيام.
من جابت هيام.. حسيت اكو لعابه دخلت لحياتي شحدو اليكربها انام
يمها اعتني بيها. لان ام سعد جانت تضربني وما تخليني العب انه وسعد..
فروحي تعلكت بهيام حتى على رجليه جنت انومها من ماكو امي..
ومرات امي تلهي عنها .. اروح اجيبلها حليب بقر واشربها.
من يوم الصارت هيام.. تشكلت بهلركبه ..وضرب على ركبتو.. وبدت
معانات اصعب واقسى ..
ابوي عينو على جهالو من لميعه وما فد يوم ضحك وياي لو لاعب
هيام.. جنت اوكف ابجي وانه ادحك.ابوي ما يلاعبنا ولا يضحك ويانه ..
هذا البجي شكد قسى گلبي وخلا حجر ما يحس من اشوف يلاعب اطفالو
واني وهيام نخاف نتكرب وتكتلنه لميعه وابوي ما يردها عنه ولو دافعتلنه امي تنكتل
ويانه..
جانت حتى اكل ما تنطينه ماعون واحد مرك او اي اكله .. وكرصة
خبز غيرها ماكو انه وامي وهيام بيها..
جنت صغير بس اكال .. اريد اكل اكل ما مثل البنيه وارضى بربع
ماعون واشبع لميعه تنطينه ماعون.. انه ماعونين ما يكفني من اكل .. ولد اريد طاقه..
وجانت امي ادور منا ومنا وتجيب خبز يابس وتسوي وياه مركة هوى
وتخلي الخبز بوسطو.. وناكل بس لو درت لميعه احنه ماكلين ننكتل..
ولو لكيت سعد ياكل تمن ومرك وكعدت يمو .. تجرني من اذاني
تضربني وتشحتني على ابو انه مرهوگ واريد اكل الاكل مال ابنها ..
صرت بالمدرسه وهينا امي اشتغلت .. كامت تحوك ليف وبالبستان
تسوي مكانيس سعف. وتلم الليف بسكوت وتخليهن بجنطتي
انطيهن لاخوها من اروح وينطيني مكانهن جم فلس اروح اشتري بيه
خبز وطماطه لو بصل .. يعني شغلات بسيطه ناكل ونشبع منها واذا زاد فلس تضمو امي حتى
تشتريلنا ملابس انه وهيام..
ضليت على هذا الحال سنين.. وانه ادحك امي سهرانه الليل ع ضوه
الفانوس وتحوك .. حتى توكلنه جم لكمه.
مرات جنت ابجي بدون علمها.. اكول ليش بس احنه هيج عايشين.. ابوي
عندو خير واخوتي اطيب اكل واحلى لبس ياخذون..
وانه وهيام غير عنهم .. اتحسر اللحم و الدجاج ما تخليني اكل
لميعه.. ايام غصتهن لليوم بزردومي شكد ما تعدي ما ينسن
بيوم عمري 11 سنه فرشتلي امي سجاده.. وكالتلي يمه صلي .. كتلها
ما اصلي هو الله شنو واصليلو منطيني عيشه مثل العالم من بين اخوتي انه جني قرد..
ليش اني مو بشر الله ما يشوف
كالت استغفر ربك وليدي ولا تكول هيج.. ان الله اذا احب عبدا
ابتلاه.. وبدت تسولفلي على النبي ايوب وشلون اخذ اطفالو ومالو وجاهو ومرضو وزتوه
بره المدينه يم الوصخ.
والله جازه صبرو ورجع ايوب احسن من قبل بفضل الله لان نجح
بالاختبار فشبهت حياتي بحياة ايوب وكالتلي اصبر وخل الله يشوفك نجحت بالاختبار حتى
ينطيك..
ساعات وهي كاعده تعلمني وتسولف وياي.. وفعلا كمت صليت. وكامت على كل وكت صلاة تندهني وتكلي
كوم صلي..
اسبوع واحد من بعد صلاتي. اجالي واحد اخو صديقي كال تشتغل بمعمل
نستله كلت لامي كالت بعد الدوام اشتغل
وبالفعل كمت اشتغل وكم اشوف ينطوني اليوميه وافرح جن الله صدك
رزقني ومو جم فلس لا جن الله انطاني كنز وتعلقت بصلاتي وبربي اكثر
كمت اشتغل واجيب اكل والباقي انطي لامي. اجيب نستله كومه من المعمل تزود
ينطوها الي.. هلكد.طيبه واجيبها لامي
وما ينطيني كلبي اكل انه وهيام واخوتي لا جنت حيل احبهم وبالسر
ابوسهم العب وياهم..
ف اروح بسكوت اصيح سعد واخوتو يجون يدحكون انه شجايب وياكلون
ويانه. على كد ما جان بسيط الاكل.. بس فرحه ولذه بيها ما توصف
وافرح من اشوف اخوتي ياكلون.. واحس ماكلين شي بجالي. من چدي..
بس خواتي من ام سعد ما جنت اطيقهن اصيحهن ياكلن بس يتكاونن و
هيام ويكتلنها فاكتلهن واطردهن..
اما اخوتي فلا من احنه صغار هم يحبوني ويحترموني لان انه
جبيرهم.. ما فد يوم سمعوني كلمه لو غثوني..
وحتى من كبرو.. ابوي فقير ما وراه فزعه.. فمن يحتاجون شي
يتكاونون انه اطلع اكاون عنهم وشحدو اليصلهم..
وتعودو شكو سالفه عدهم من هم صغار يجولي انه احلها ولو صعبت
اروح على عمامي احشمهم فصرتلهم سند وهم سندوني وشاد ضهري بيهم..
كبرو ولليوم يحترموني.. هذا سعد اكبرهم مو.. لو ضربتو جف .. ما
يشيل عينو.. خو عابد يوووه شكد اكل جتلات مني بسبب سوالفو بس ما فد يوم رفع وجهو
بوجهي ابد..
اي .. من شفت الشغل زين وانه كمت استلم فلوس حلالي الوضع
طلبوني شفتين صبحي ومسائي ويوميتي تتضاعف..
ف بطلت من المدرسه بدون علم امي واوهمتها ان زادو يوميتي بس
ايام وكشفتني وكالت ارجع كتلها فصلوني من المدرسه بعد..
وتركت وكمت اكد على امي واختي وشلت مسؤليتهن وانه عمري 12 او
اقل ..
-صغير
-اخذ نفس انه اصلا ما شفت من صغري شي
طفل وشايل حمل كبار.. فطفولتي ما حسيت بيها.. عشت عيشة فقير يتيم ابيت والدي
الجبير
من كمت اشتغل مضاعف وانطي لامي.. امي حريصه كامت تصرف ربع
يوميتي والباقي تضمو..
بس ما كانت تقصر حاجه اذا علي او على اختي.. كمنا نشتري .. من
صار عمري 18 . هين دخلت عسكرية ..
وراتبي زاد.. بس صرت بخطر.. حرب ايران.. والدنيا نار.. وامي
اشتعل راسها من القهر علي وكل شهر تكول ابني مات
الى ان فد مره تأخرت ما جيتهم 4 اشهر ما صار نزول والحرب حاميه
.. مزينه شعرها وناذرتو لسلامتي وفاتحه صدرها لالله..
كايلتلو لو صراع صار بي شي ياربي هذا حد صبري وياك.. خذت مني
عمري وشباب ودنياي ونطيتني بس صراع وتمن علي بيه وتاخذو..
معتزله العالم بوكتها.. وفعلا انه جنت بنص الموت وكعت بنص الشط
اللي يفصل العراق عن ايران..
والطلق والقصف فوك راسي وانه لليوم حاير شلون عشت يومين بالماي
وجنت كاطع الظنه اعيش .. اكثر شي تأملتو ان اعيش واروح اسير لايران.
بس معجزه وطلعت كلشي ما بيه. وانطوني اجازه ونزلت لاهلي.. دحكتني
امي.. عمري ما سامع حسها على وبذاك اليوم لاول مره اسمع امي تهلهل وتبجي وتهوس
ونزلت يم رجليه تريد تبوست جدامي كد فرحتها. اخذتها بحظني وكمت ابجي على حالها
وعلى شوقها الي..
اخذ نفس..تخسي مره تجيب شعره من شعر امي.. انه امي ترهم تاج
للنسوان.. وماكو غيرها دخلت كلبي الله شاهد..
-خطيه الرب يحفظها..
-تحملت ضيم وقهر جبال ما تحملو.. دحكت
جثير نسوان محتاجات .. ومالن على الدرب الاعوج لو مدن ايدهن للرايح والجاي
وامي ما مدت ايدها غير لله وهي تدعي..
راتب العسكريه جان زين.. وهم جنت اخلي بيد امي وهي تصرف
وتنطيني مصرفي وتلم وتلم وانه ما ادري كل ضني هي تصرفهن لما انه بالواجب
ومو بس شغلي .. هي و هيام جانن يخيطن ملابس.. ويحوكن ليف و مكانيس
ويضربن ابر.. وهواي يشتغلن ويتلهن..
بهذا الوكت لميعه كفت عن امي لان من صرت شاب وكبرت .. اول ما
كبرت على لميعه.. ومره دخلت نازل من الواجب ولكيتها تتكاون وي امي وتريد تكتلها
انه تخبلت و سحبت سلاحي عليها واركض وراها ويكظبوني عنها و
طلعت هجت من البيت بطرك العبايه تخاف مني احطلي جيله براسها ..
ومن يومها خافت تتدنى لامي لو لهيام. تحجي تغلط تتكاون بس ما تضربهن ولا
توكف بطريقهن .. خاف يوصللي الحجي واشيل سلاحي عليها
الحجي ما حسبتو اب .. جان اقل كلمه يحجيها وياي اتكاون وياه
لان كل عيشتنه وتعاستنا بسببو ف ما يتگربلي يعرف عصبي ووكت اعصابي افقد
سنه من السنوات.. كاع ابوي مولحت ما كامت تحصد ولا تزرع.. ابوي
نزل مستواه المادي تضرر حيل..
راد يبيع الكاع لان مطلوب عليها وهي ما منها حصاد.. كالتلي امي
عليها.. كتلها يمه وانه منين اجيب واشتري بستان ابوي شو بطرك الراتب
كالتلي عجل يمه رواتبك الفاتت وين راحن.. كتلها غير مصرف
الجن.. كالت لا يبعد امك انته تتعب بنص الموت وانه واختك ناكل تعبك بلاش.
انه واختك نشتغل وعايشين خير من الله وهاي رواتبك .. وهذا
الضميناه من شغلنا. جمعو ودحج شكد تجيب كاع ابوك واشتريها
وصدك سألت ابوي على سعر البستان ما كتلو اشتري كالي بالسعر ..
جان اكبر من اللي عندي ..
ف رحت على عمي الجبير عزام يحترمني حيل لليوم.. يكلي انته من
يوم كماطك زلمه .. امك ما خلفت جاهل طلعت من بطنها زلمه حوك ينشد الظهر بيك..
يعرف بحال امي وشكد عانت لجلي انه واختي بس ما يدخل لان كم مره
حجى وي ابوي وابوي بعقلو بس لميعه..
فجان يحترمني وطلبي عندو مستجاب رغم هاي جانت تعز نفسي اطلب
منو حاجه . بس
ع الكاع رحت طلبت منو دين فلوس وشاورتو على موضوع الكاع..
كال امضي وانه بظهرك.. وشكد تحتاج ركبتي سداده ولو تنطيني كل
شهر دينار انه راضي.
وصدك جمعت الفلوس وجبتهم لابوي كتلو هاي فلوس الكاع انه
اشتريها. لميعه
ما رضت يبيعلي بس عمي وكف وكال الكاع ما تنباع الا لصراع
والارض ترجع لاهلها.. واشتريتها واتسجلت بأسمي والكاع النولدت
بيها واختلط دمي بتربتها اليوم صارت بسمي
مو كاع .. لا جن ملكت الدنيا .. من صدك فرحت وسجدت لله على
تربتها ..
وشغلت الكاع وعمي جابلي فلح يفتهمون وامي كامت تطلع للكاع
وياهم.
وانه اروح للواجب اسلم مسؤلية البستان لامي و لعمي .. بارك
الله بالتربه وطلعت محصول خير
من يومها انه ما دحكت بعد الفقر شلونو.. الله قلب حالي من حال
لحال .. والناس الجنت اتمنى منهم اللكمه صرت انه اعيلهم
لان غير الكاع ابوي ما يملك.. منين يصرف ع البيت وعلى هلجهال..
جان بودي اجوعهم بكد الجوع الشفتو منهم..
بس امي كالت يمه النطاك يكدر ياخذ منك كلشي بلحظه لا تعتقد
الله من انطاك.. خلصت الاختبار لا هين اختبار اكبر من الاول
هينا من انطاك يريد يدحكك تتكبر وتصير ظالم لو تتعلم الرحمه
منو وتنطي شكد ما كابلوك بجفاف..
وفعلا ما كصرت لا على ابوي ولا على اخواني مصاريف مدارسهم جنت
انه شايلها. حتى
على لميعه كمت اصرف .. والبكلبي عليها دفنتو بكلبي والله اليجازي..
دخل علينا الحصار وانه بخير كاعي تمد.. ما دحكت الحصار شلونو..
ولا خليت واحد.من اهلي يجوع ويحتاز..
بس رغم كل هاي ما بطلت من الجيش رغم شكد امي تلح.. ما اشوف
نفسي الا وانه ابدلتي العسكريه.. هناك احس روحي وبقيمتها .. مو بالكاع وانه فلاح..
فضلت العسكريه والموت ع الفلاحه ما جنت احبها.. بس حاط فلح خير
من الله بيها..
امي عاشت بخير.. هيام عيشتها اميره.. شتطلب تأمر ..
البلتلفزيون تدحكو ع الممثلات انه اتعنى واجيبو الها
..امي واختي .. ثنين مال الهن بديل
بحياتي اكبر وحده ما تعلى عليهن بشعرايه..
الى ان قررت اتزوج.. لميعه بوكت الصار عندي فلوس صارت مثل
الدهن والدبس وياي ابني وشتأمر .. فحجتلي على بت عمي وجدان..
انه ما فكرتلها هي بت اختها لو شلون تريد تسيطر عليه وعلى كاعي
وهيج تفكير ما دخل بالي ولا امي وهيام هم فقره..
ويعرفوني اكره الغريبه.. رغم شكد شفت مر من القرابه بس ما احب
النسوان الغرب على كد ما مرن بحياتي نسوان ما يستحن وهن عد العالم هن وبس.
ويجن يمي يتحايلن وحدتهن ما تستحي فكشت روحي من كل وحده غريبه
وصلت بيه اكول كل غريبه كح... بعيني دام ما متعايش وياها
لان شفت نسوان يفتخرون بيهن شو من اوصل الهن خارطاتها ..ففقدت
الثقه ..واخذت بت عمي..
الله شاهد.. بت عمي شريفه والعالم ما داحكه اضفرها بس عيبها ..
ثلثين الولد ع الخال وهي نسخة لميعه عندي
انه وجنت كاره ابوي لان مشى بحجي النسوان وعاف امي.. طلعت كل
كرهي من ابوي بوجدان.. من جنت اشوف حقارتها اتذكر حقارة خالتها
فانطيت وعد على نفسي كلت تخسي المره التكسرني لو تمشيني بشورها. لو تغيرني على امي واختي
ف ابد ما خذت منها حجايه ولا سمعتلها ومن اسمع محقره وي امي
اكتلها واطردها وترد تجيني بلا كرامه ترجع بدون ما اجيبها من اهلها واكرها بالازيد..
واكرها اكثر من تجي تلبس وتحاول تغريني وعود تكسرني برغبتي ابد
ما جنت اخضع.. ولا افكر اخضع لجل رغبه..
من كد ما جان ماكو احساس وياها ما اتذكر انه جنت ابوسها لو لا
.. اتكربلها شلون شعوري وياها كل احساس ماكو بيناتنا..
هيام تزوجت بعد زواجي بأشهر .. فقررت اطلع من اهلي واخذ امي بس
ما قبلت امي تروح.. متعوده على مكانها وغرفتها
كالت روح يمه الله يوفقك.. بس انته ابني كل يوم مرني ولا
تحرمني من شوفتك. وانه امك
وعزلت بس شعزلت ..انزل من الدوام كبل لهين عند امي انام على
رجلها واشتم ريحتها للعصر اروح لبيتي اسبح وابدل واطلع وي جماعتي امر بليل لهين
على امي
اجيبلها البنفسها واكعد اسولف وياها لل10 اكوم اروح لبيتي ..
وهاي حياتي مشت هيج بس جنه يوميه مكاون انه وجدان لان امر امي يوميه
تكول اكعد كابلنا كابل بتك.. اكلها يولي مو ارجع ب10 ساعه اشوف
بتي بيها واساعه اكابلج مره ورجال وب12 انام.. انه بيش مقصر وياج بعد...
ما ترد امك وامك تسممني من افوت لحد ما انام تدرم ما تسكت الا
ازكح بيها لو اكوم اضربها. ومن اضربها تزيد وتصيح تشيشك عليه وتوز بيك ..
صار السقوط وانه بيتي وحد.. و مرتي اخاف عليها وانه شغلي ما
بيدي مره بين بغداد.كركوك وديالى و الرمادي
وهي تنك براسي لو رحت لامي.. عاد كتلها بالله ما ترجعين لاهلي
هناك كابلي امي واحجي .. بعت البيت ورجعت لاهلي هي انجنت ..
كتلها ذاك بيت الخلفج وروحي درب السد لا يرد.. اختي خدامه
كاعده عد الخلفوج وانتي تدللين علي..
زعلت وصارت شكبرها و زتوها براس هيام.. بس انه جان ابالي ادخل
مشروع.. طلع ابغداد مولات..
فبعت بيتي والبستان والعندي والماعندي ودينت فوكهن واشتريت
اسهم الي بمول ابغداد..
هين ارتاحيت.. وارد المول جدا عالي ويجيني منو خير من الله..
وفيت ديني واشتريت بيت ابغداد.. وشقق شاركت..
الحمدلله الله بارك .. الفلس الاكضبو كام يصير بيدي ذهب..
بهلفتره هيام ترملت.. وعاشت ابيت ابوي سنه تقريبا
وجدان و ام سعد يكرهن هيام وهي ارمله وايتامها بعيني وانه ما
كل الوكت مجابلهم.. بس كل بالي بيهم..
اكول هم ترجع لميعه وتمنع الاكل عن علي وترجع مأساتي بهلطفل..
اخذت فتره ادور بيت بس كون قريب على بيتنا حتى تصير تحت عيونا..
لكيت شويه عنا.. اخذتو وما كلت لاي بشر.. لان نسوان يحجن
والحجايه اذا انحجت كول انسمعت وطشت والف عارض و قارض تخرب..
فكولت القول اليكول (اقضوا حوائجكم بالكتمان)
فكملت الشغله كلها.. اشتريتو ورممتو واثثتو وهي ما تدري بس
ادحكها تبجي وتشكي من وجدان ولميعه
وانه ما كل الوكت احب ادخل بسوالف النسوان اشتغلت حجت مشت..
صعبه حاشر روحي بهلسوالف.
الى ان اجه يوم لكيت وجدان وهيام متمالخات علمود الجهال علي
كاتل حلا براسها مدميها ووجدان كاتله علي وهوسه
وكاعدات كبالي اثنينهن يشكن. هاي مرتي والمكتوله بتي .. والكبالي
اختي.. شحجي اويامن اصير..
كتلها خويه هيام.. كعده الج بهلبيت بعد ماكو.. انتي اخيتي واعز
الناس عليه بعد امي.. بس المشاكل طالت يا خويه..
انه اشتريتلج بيت .. وهذا مفاتيحو تكعدين بيه ونفتك.. ومصرفج
ومسواكج واصل و ما نقصر ان شاءالله..
انه حجيت هيج. لو وجدان كبت.. تشتري بيت لاختك وانه
عايفني.. كتلها مو ما ترديها وتكولين اختك سوسة مشاكل هاي خلصتي منها..
انهدت صياح وعياط .. وتكلي ما ابقالك دقيقه هين. كتلها الله وياج وسدي الباب وراج بس
خلي بعلمج لو شبختي عتبة الباب .. تحلمين بعد تصيرلي مره..
وبالفعل عاندت وطلعت وشرطها ما ترجع الا يشتريلي بيت.. جو
عمامي وحجي وكعده وتقنيع..
كتلهم هي ما احسبها بعد مره.. وتريد بيت من باجر و يجرالها..
بس نطلع وامي وياي.. كالو من حگك
هي كالت يطلكني وما تطلع امو وياي.. ما اكابل امو.. كتلهم
كلولها ايام وورقة طلاكج يمج.. وبحيل الله بيت جديد ومره جديده وامي وياي وهي
خليها عد اهلها..
لهين وقفلت
رجعو كالو قبلت تطلع امك وياك.. كتلهم وانه بشور مره تقبل لو
ما تقبل لهين وبس گلت انتهت وياها.
ردو كالولي المره حامل منك.. كتلهم تجيبو واخذو وبدربها
السلامه.. كم شهر وكالولي حامل بولد تره..
كتلهم خير وبركه الله انطى وما قصر.. منتظر الولد انه .. رجعها
...كتلهم ابد.. المره التتشرط علي ما تصيرلي مره..
عاد وره ايام جيت من الدوام.. لكيتها بالبيت جايبها ابوها.. ما
دحكت بوجها ولا كربتلها.. ولا هي طخت راس واجت تگلب صفحه وياي..
بقينه شهور محد يدحك بوجه اللاخ
نهاية الشهر ال8 من حملها كامت تشكي هواي من الالم.. انطيت
فلوس لامي كتلها تاخذيها للدكتور
.
وهي تكلها هين اموت وما اروح لا هو
ياخذني
كلت هاي تتعاير تريدني اجيلها وما تعرف بيا طريقه ولكت هاي حجه
تذلني بيها وتحلم .. لا انه طخيت راس ولا هي..
لحد ما فد يوم كامت تصرخ.. دخلت البيت تشكلت بقميصي وتكلي راح
اموت الحكلي فدوه..
انه شلتها كبل وخليتها بالسياره لان فعلا حسيت بيها متأذيه مو
سوالف نسوان.. ركضت بيها وكلت لامي تلحكني هي وسعد..
وصلتها المستشفى.. اخذوها من ايدي بساع. كالو بيا شهر كتلهم طبت التاسع بس ما
ادري يا يوم..
دخلوها للعمليات فورا واجت امي وام سعد واهلها و اخلاص جانت هم
موجوده... كالو الجاره ما اعرف شنو مضروبه عدها..
بألف يا الله طلع الطفل عايش بس مريض حيل.. وهي بعدها
بالعمليات.. ما كادرين يوقفون النزف عدها استأصلو الرحم مالها وما متحمله وماتت ..
اجذب لو كلت ما حزنت وبجيت على فراكها بساعتها... العشره متهون
على ابن الحلال..
طلعوها النا بريتها الذمه ودفناها وقمنا فاتحتها وبعد منتظر
مصير الطفل يعيش لو لا.. فتره تحسن وصار زين.. وطلعوه من الخدج وانطونياه.
شلتو بيدي.. ودحكت بوجهو .. ابتسمت بستو وسميتو حرب .. لا جان
بوكتها حرب الطائفيه والارهاب بالانبار وحيل تعبنا منها وخسرت 2 من اخوتي بيها.
امي اخذت حرب ربتو هي وهيام تجي كل يوم تهتم بي.. ومن ذاك
اليوم لهذا اليوم يردوني اتزوج ورفضت.
حيل اكره النسوان ومشاكلهن .. وانوبه يردولي اخلاص اختها ..
كتلهم انه دفنت الاولى اروح اجيبلي الثانيه..
بس مشكلتي ما اثق بغريبه واخذ. فبقيت معلك.. لحد ما جيتي ووكعتي على
كلبي وعلكتيني من كراعي بالزايد..
-هههههه ليش شمسويتلك
-جنت خالي هسه لا انه المتزوج ولا انه
الخالي هههههههه معلك خوش تعليكه..
-ههههه يعني شنو تريدو.. باسني براسي..
وكال
-رايد سلامتج بنيتي كلشي ما رايد..
-بگلبي كلت امده حظي فرحت كلت راح يكلي
اريدج مره تاليتو يكلي اريد سلامتج.
دحك ع الساعه وكال ولج ساعه 11 تدرين.. حتى محد جا يسلم علينا
يشوفنا ميتين عدلين
-يعرفوك عصبي واليتقرب تكسرلو راسو
-ههههههههههه دكومي كومي .. ميت جوع..
شوفي شنو موجود وسويلنا دناكل..
نزلت وهو نزل وراي.. فتتت للمطبخ وهو فات لغرفة الحجيه... طلعت
كبب واكو دجاج.. كلت اسألو شنو يريد..
دخلت وهو كاعد على سرير الحجيه هيام ماخذه ابنها ورايحه
لبيتها.. جانو يحجون .. دخلت كالت ها شصار ما صار..
صراع:- جنت اسولفلها على حياتنا كبل وشلون جبناها
-هااا الله يثخن لبنكم..
-بعدو يمه الهايشه ما والده حتى يصير
عدنا لبن لسه ماينا صافي هههههه
ضحكت الحجيه ودارت وكالتو متبطل من سوالفك.. مفتهمت شنو يقصدون
ف كتلو شنو تريد كبب ومكلايات لو دجاج وتشريب
-كبب ودجاج كلي اذا مسلوك..
-حيييل اطول اسلكو ..
-شتريدين سوي بس جيبي بطني صفرت انوبه
شربت السفن مالتج صدك نزل الكرش وصفطت بطني من الجوع
-ضحكت وطلعت.. وسمعت الحجيه تكلو من
الظهر لسه كاعد تسولف وياها طلعت فوك نار الظهر ونزلتك هسه ثلج شسالفتك وياها
وليدي احجي ترتاحلها
وهو يكلها. يمه ليليان الله انطاها الي مثل طفل تعب من البجي والقهر تالي
انطو لعبه وكالولو العب..
الله يعرفني ما اطيق مكايد النسوان .. انطاني طفله طينه كلشي
ما تفتهم وكالي ركبها بكيفك.. اعلمها على طبعي على الاريدو والما اريدو..
انه ما اريدها بس زوجه .. انه اريد اربيها على ايدي من البدايه
ابدي وياها لحد ما احس فهمتني ذاك الوكت .. اخذها ..
ليليان:- فتت للمطبخ.. افتهمو !!.. ليش هسه اني افتهم؟.. بس
شنو ياخذني .. عود
وين ياخذني .. معقوله يرجعني للموصل 😕........يتبع
☆☆☆☆☆☆☆☆
حلقه بينتلكم بيها كيف انبنت شخصية صراع وليش هو بين الحنيه
والقساوه ومنين صار وشلون وصل .
بأختصار بينتلكم شخصية صراع على حقيقتها..
رأيكم بي .. ؟
ومتابعه ممتعه للجميع ❤
☆☆☆☆☆☆
تعليقات
إرسال تعليق
اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم