المراهقة والأربعيني الحلقة (19)
المراهقة والأربعيني
الجزء الأول
الحلقة (19)
دحكت شو هذا بساع يشمر ميانه بس وجهو وكلامو حيل محبوب
ردت اشيل المواعين .. اتقرب وكال اني اشيل عنج اكعدي هلكدج
لا يطك ضهرج والله عمي مبخت صراع بهلفختايه....
ضحكتلوو وهو واكف يمي ويشيل.. دخلت حلا.. كالت ها تردين مساعده..
تعجبت من سؤالها.. بس كتلها يلا الله وايدج.. تعبت.. وكفت وياي
تغسل وطب ياسر كاللها ها حلا شلونج..
واخذته بالسلام شلونك شلونك زين.. متغير وصاير ما نشوفك..
كال الها :- شسوي غير بعد بالجامعه..
كتلو يااا صدك انت بالجامعه.
-اي ابغداد..
-حلوو وابغداد هم
-اي جامعة بغداد بالاقسام الداخليه
-واني اكول حجيك مختلف بيه بغدادي..
-هههههه شلون يعني
-ما اعرف بس هم يجرون بالكلام مثل عمو
صراع يكول انه.. مو اني.. ما عرف مو ما أعرف.. هيج شي
-لعد لو تشوفين هناك شيسوون بيه من
احجي بلهجة اهلي..
-انته حتى لعد تكول مو عجل
-مره حجيت كبالهم وكتلهم عجل يابه وين
نلحك نقره كل هاذ.. وهم استلموني تحشيش ويمشون وراي ويكولون اي عجل يابااااا
شلوناااااك.
خلوني اتوب منها هههههههه
-يعني ابغداد كلهم يحجون هيج..
-مو كلهم بس هم يدققون بالكلام وبحسب
الميانه يكومون يحششون عليك يجبرونك تحجي مثلهم ومن عاشر قوما 40 يوما صار منهم
وانه عايش وياهم بالاقسام..
حلا:- بس لهجتك حيل حلوه .. واصلا بغداد واكعتلك مغيره شكلك..
خجل وغمض عين ويحك بلحيتو ويكول شكرا..
-يا قسم.
-علوم سياسيه..
-اووو اني كان حلمي ادخل كلية هندسه ..
-شمخلصه انتي..
-خامس علمي وبطلت.. جابوني لهنا من
تزوجت.
-حرامات...
دنحجي ودخل صراع.. وضرب على جتف ياسر .. هلا بياسر شلونك يابه..
-
هلا بابو حرب انته شلونك.. انصدمت من
شفت هاي مرتك.
-هههه مو بالله هاي تالي عمري. شلونك
بالدراسه..
حجاها واندار عليه .. سوي جاي
ياسر :- والله بخير
-شتسوي هينا واكف
-والله جيت اخذ جاي شفت هلبنيه وحدها..
عاد حشمت الولد يساعدوها بالجدوره..
-هااا.. اندار.. وكال صبي الجاي ودخلي
جوه ..
-وهلمواعين منو يغسلهم..
-نفذي ولا تناقشين.
-حميت الجاي وصبيتلو.. ودخلت جوه. شوي وصاحت ام سعد على المواعين اكملها.
طلعت اكمل حلا واكفه عود تغسل بس كاظبه السفنجه وتحجي وي
ياسر.. عاد تقربت وكمت اني اغسل وهي تشطف وتحجي..
واني شاركتهم الحديث.. انوب جابوها ع الموبايلات. ياسر سأل على صفحه عندي بالفيس او
انستكرام..
كتلو ما اعرفهم ما عندي موبايل..
-لا عود صدك.. اكو وحده اليوم ما عدها
موبايل
-من جنت عد اهلي ماما ما تقبل يكول
يفسد البنات..
-هههههه عمي والله زين.. بس شلون مكضيه
وكتج
-ملل ولعبان نفس بس شسوي وين اروح
-زين ابو حرب ليش ما يشتريلج
حلا:- لا بابا ما يقبل تكضب موبايل عود من تريد تسمع اغنيه
مرات انه انطيها موبايلي
-حتى اغنيه تجديها شطلعت هاي ..
-ههههه مأسات
-يابه اشتريلج MB3 وفضيها. واسمعي براحتج والاغنيه التعجبج دخلي
الرام بموبايل حلا وحملي.
-منو يجيبلي اتمنى بس عمو صراع ميقبل
يكول حرام الاغاني
-شطلعت هاي. عمي اني عندي واحد وحتى رام بيه اودي
الج بليل ابيد علي وسمعي سجن خوما سجن.
خلصنا شغل واحنه نحجي هو راح هناك بقينه بس اني وحلا نحجي..
كالت .. دحكتي شكد حلو يخبل
-اي شكلو يجنن ولبسو شيك وراقي.. شكد
عمرو
-يمكن 22 سنه..
-ياااي شكد حلو عمرو خوما شايب يحظي
-ههههههه
-دنحجي ونضحك.. التفتت والكه صراع واكف
ورانا ومتخوصر.. كتلو.. ها عمو تريد شي
-اخذ نفس ... انه شكلت
-كلت فوتي جوه.. بس عمو ام سعد بس اطب
جوه ترزلني كدام النسوان..
-اي بابا صح.. رزلتها..
-لتدخلين انتي وطلعي برا.. وانتي
اللخ.. صعدي فوك..
تركت وصعدت.. شويه وصعدتلي حلا... كعدت يمي ونحجي وهم جابت
سيرة ياسر عرفتها معجبه بي..
كتلها دكوليها من النهايه.. وكلي عاجبني وغمزتلها.. ضلت تضحك
وتكول لااا ولج مو هيج. بس
كتلها بس .. تووووب يجنن..
-الله عليج
-اي والرب .. خو القيافه والنزاكه اووي
.. لج مثل فارس الاحلام.
-عابت هههههههه
-اي والله شبيج. جنت احلم من جنت عند اهل اخذ واحد
اسمر مرتب شكلو رجولي وشاب يجنن ويلبس موديل.
وتالي طن وكعت الزاويه على احلامي واطشرو
-واخذتي بابا ههههههه
-اي فالح بس يصيح ويزكح..ويكفخ فوك
راسي .. راحو احلامي راحو..
دنحجي ونضحك.. دخل هو بدون كلام فتح باب والكنتور واكف ويدحك..
احنه خلسنا بس طب..
دحكتو بس واكف كدام الكنتور ويدحك ما يعرف شيريد.. كمت اشوف
اساعدو بشنو يطلب..
بس وصلت يمو زكح .. وخري عني انتي..
هذا شبي.. !!!
-اخذ الخاولي وطلع... درت لحلا.. ابوج
شبي ؟!!
-ول يابه بس لا سمعنا
-ما اعتقد بس يمكن ام سعد مضايقتو
بالكلام جوه.
خلصت العزيمه والناس بلشت تروح .. صراع متخبل عليه مدري شبيه..
وحلا الله هاديها مدري شعجب
بس اللي عرفتو هي تتقربلي وتكعد وياي وقت اللي ابتعد عن
ابوها.. او ابوها ميريدني .. هنا ما عدها اشكال وياي..
بس لو طلب مني شغله او حجه او اي تصرف بدر منو .. بساع تتضايق
وتبتعد..
نزلنا بعد العزيمه.. مرت المرحوم نور.. رايحه ماخذيها اهلها..
صراع طلع ما اعرف وين..
بقينا نشتغل ونحجي ويوم عادي.. بليل اجه علي عياخذ امو..
انطاني MB3 اخذتو وكتلو ااااااالله.. اليه هذا
-اي ياسر ابن جدو عزاام زتو الج..
-خطيه.. اشكره علاوي فدوه.. شلون يشتغل
-بالله ادحك.. ما بي شحن.. هاي الاي سي
مالتو مثل الموبايل السامسونج احجي وي حلا تنطيج شاحنه شحني وسمعي بيه.
-اني من صار عندي كأني ملكت الدنيا شي
غريب صار عندي كهديه عجبتني.. رحت خليتو ع الشحن واستمعتلو..
بيه اغاني كومه نص احبها ونص لا.. وحلا اخذت الرام هم حملتلي
من موبايلها اغاني اللي تعجبني
اخذ عقلي وحيل فرحت بيه.. صرت انام اكعد اسمع بيه بالشغل الصبح. اخلي بأذني واشتغل وانفصل وحدي
ومنها ما اسمع صياح ورزايل ام سعد.. اخلص شغل على راحتي.. اسمع
واتخيل صراع بالاغاني.. واطير على الحان الاغاني وافكر بيه..
بس واقعيا جدا بعدني من صراع.. او الاصح.. صراع ما اعرف شبي.
لا يجي يمي لا يسأل ولا حتى يصيحلي على شغله يحتاجها
وعصبي ومتوتر ما اعرف ليش .. ف اروح اكعد ادور وراه شبي..
تركتو احسن هو وحدو يهدئ شسويلو..
بس المشكله لو تركتو هم ما يقبل.. التقربت منو يعصب واللي
تركتو يعصب اكثر لان ما اهتميت بأشيائو ..
حرت وياه.. اخر شي تركتو يصيح واني ابقى مخليه السماعات بأذني
وما اسمع شنو يحجي لو يغلط..
مر اسبوعين على هذا حاله وما عيهدئ بالعكس يزيد.. واني بدا
صبري يفقد.بس شسوي ما عندي غير اتحمل..
فد.يوم هو كان كاعد ما عندو دوام.. نزل واني ما ادري بي لان هو
خلص ريوكو وصعد..
ما احس الا واحد يندسني حيل احس اهتزيت.. نزلت السماعه من اذني
دحكتو صراع..
-وييين بالج صار ساعه اصيح ما تسمعين
طررررشه
-شنو تريد عمو
-شنو هذا اللي بأذنج ..
ضرب على اذني حتى اطلعلو .. لان اني لابسه حجابي والجهاز بصدري
ممبين شكلو..
طلعتو.. وانطيتو الو..
-شنو هاذ منيلج.. اخذ السماعه خلاها
على اذنو جانت اغاني
-كم مره مانعج ما تسمعين اغاني.. انتي
ليش تحبين بس تثيرين اعصااااابي هااااا..
-عمو ما ....
-منيلج هاذ احجي منو جابلجياه ..
-ياسر ابن عمك انطانياه..
-شلون شلووووووون.. ومنين تعرفين ياسر
انتي وتاخذين منو.. كضبني من اذني...
-عمو اذني شبيك..
-احجيييييي
-ما اخذت منو هو بعثو بأيد علي ابن
هيام..
-هااأاه والله ومخليه الولد مرسال الج
ياخذ ويودي مووووووو
-يحجي ويجر بأذني واني رافع اديه واكلو
عمو بس اتركني..
كضب الجهاز مال MB3 وطرو بالحايط صار طشار..
بساع دفعتو و درت وجهي الو.. وتخصرت عود ليش..
-ولج ادفعين وتتخصريلي بعد.. صعدي
للغرفه خل اعلمج الادب شلون يصير..
-لا تعلمني ولا اعلمك.. لهين وبس اني
بعد ما اتحملك دقيقه والرب.. شمرت الوصله طريتها بالكاع ومشيت بعصبيه..
وهو كضبني ولج انتي تتعاندين وياااااااي..
-لا اتعاند وياك ولا ابد.. هسه توديني
لبيت اهلي واني اكول ليحيى يوصلني لخوالي
-لج تصعديني لا احرك شيب الخلفج
واااااالله
الحجيه:- ولكم يمه استهدو بالرحمن شبيكم ياااا شجاكم..
-التفيت وره الحجي وكتلها احجي وياه
دحكي على شنو كالبو خلقتو صار اسابيع..
-لج بتتتتتت الكلب منو اللي كالب خلقتو
اليوم اعرف شلون اربيج..
-بقيت ابجي والحجي تسدسدلي وادفع بيه
واني جواها وهو نار ويصرخ.. ويريد.يجرني من جواها..
اجه الحجي ونائل كضبوه.. وهو يصرخ هلساقطه الا اعلمها شلون
تتربى
-ما اريد وما اريدو تعبت كافي اريد
ارجع لاهلي اخذتوني خدامه تكفخون عليه لو تسترون عليه.
ما اريد ابقى هنا اريد ارجع لاهلي
الحجي:- يا اهل بويه نرجعج للارهابي
-اعيش وي الارهابي ولا وي ابنك عمو ما
ينحمل تعبت بس يصيح ويغلط اني ما اريدو والله ما اريد رجعونيييي.
احجي وهو كل شوي يريد يهجم ويكلهم بس انطونياها وطلعو منها
وانه اعلمها شلون ما تريد...
كوه كوه طلعو نائل وسكتتني الحجيه وكعدت ابجي.. عيشتيش اني
عايشتها هنا
اقلها هناك جنت اروح مدرسه عندي صديقه احجي اشكي اضحك اسولف
وياها هنا منو كاعده بس يكفخون على راسي..
عاندت بيومها الا يودوني لاهلي ما اريد ابقى بعد عدهم.. عاد
الحجيه خابرت على هيام واجت
دحكتني ابجي وحالتي حاله .. كعدت يمي انطتني مي وقرت على راسي
وشمرت مي بوجهي..
صحت لااا هيام فدوه..
-ولج الشيطان نار وما يطفى الا بماي
اهدي وخل نحجي..
-شحجي هيام والله تعبت ماكو شي يغثني
ما يسوي 24 ساعه صياح وعياط.. مليت تعبت .. اتقرب منو عصب ابتعد هم يعصب
وبالحالتين اني ماكله الرزاله.. مدكليلي شجابرني.. عندي ام
غصبا عليها تتحملني وتشوف عيشتي شنو عايشه عليه
-لج يولي وين تلكين مثل كلب ابو حرب بس
تلكين اعصابو تعبانه من الشغل قدري وضعو.
-اقدر وضعو وهو شوكت يقدر وضعي ويرحمني
-بس يهدئ هو يقدر ويجي من حالو..
-ما يجي ولا اريد يجي تعبت تفتهمين شنو
تعبت..
-حقج والله حقج .. كومي روحي وياي
يومين ارتاحي هناك يمي وي البنات والله كريم.
بقت تبوس بيه وتهدي.. الحجي كال الهيام علوا تاخذيها شوي يهدئ
الجو ..
عاد لميت هدومي ورحت وي هيام لبيتها.. بس الحجيه جانت ما قابله
بطلعتي..
تكول سترن ع الرجال حيل مابيه بعد ويعصب ويصعد ضغطو..
-عاد جاوبتها. واني شذنبي اتحمل المر حتى ما يصعد
ضغطو هو كاتل روحو بروحو.
ما قبلت ضلت تحجي وتحسب عليه وراح تكتلين وليدي وربحي بيمن.
عاد حجت وياها هيام..
كالت الها..:- يمه بس يومين هي تهدئ و ابو حرب يهدئ ويرجعون
ليش مكبره الموضوع..
والله عاد رحنه.. دخلت بيت هيام.. خطيه ساره وجنات تلكوني
ويضحكون وفرحانين بيه .
يكيفون احد يطب عليهم.. لان لا هن يطلعن ولا احد يطب عليهم
هيام قافله بابها وساكته دوم حدها لاهلها..
هيام:- لا تتقيدين ليليان نزعي وطبي سبحي وارتاحي لا تخلين
ابالج انسي..
-هزيت راسي.. اجت ساره كالت دفيتلج
الحمام طبي سبحي حتى اشسورلج شعرج شتكولين
-يلا ياريت.. فرحت بساع و گمت سبحت
وغسلت وجيت نشفتلي شعري وكعدت تشسورلي وهيام كدامنه نحجي..
بعدها ممخلصه.. طفت الكهرباء..
هيام -هاي طفيتها السحب تجي ب6 .. امشن نكعد بالطرمه زين الجو
مو بارد كلش..
-لملمنا الهوسه مالتنا وطلعنا بالطرمه
الجو حلو مو بارد كلش..فرشت هيام بساط.. وكعدت..
اني دحكت مرايه يم المرافق فوك المغسله.. رحت ادحك نفسي بيها..
ياااي شعري يجنن صار كمت اكلب بيه منا ومنا
دحكتلي هيام.. كالت يولي ليش ما تخليني احفلج وجهج. اوخر الشعر يصير وجهج يضوي
-لا عفيه امي متقبل تذبحني
-يلفطيره امج شكو غير متزوجه..
-بس يوجع مره ساره صديقتي سوتلي شواربي
ابيتهم كمت اكمز .. موتتها يله خلصتو
-لج بساع يخدر ما تحسين بس اول خيطين
حدري يولي خل اشيل هلشعر المعجعج على وجهج..
-عاد كعدت كبالها كالتلها ساره جيبيلي
الخيط والمگص الزغير و الملقط..
جابتهم.. ولفت الخيط على ايدها وطرف بحلكها.. اول ما جرته واني
صرخت عااااااااا..
-وجعه وطمه يولي شهرتينا دكعدي
-لا عفيه والله يوجع عوفي
-ولج اخذت اذا يبقى هيج يصير وجهج امبكع
ويصيحوج البگعه..
-اهئ اهئ اهئ والله يوجع.. اخذت مره
لخ.. وهم فزيت.. وكتلها لا لا فدوه ما اريد..
كالت بلله شو.. وجابتني جف على خدي احسو اشتعل نار.. وهي تضحك
كالت هاهيه تخدر بعد..
بس شدي وجهج وكضبي عدل..
غمضت عيوني وهي تحف.. مو حفافه تكول تعذيب موت احمر.. خلصت
وجهي .. اجت لحواجبي. راد تشيلهم ..
اوف ربي شيفضها.. عوفيهن هيام فدوه متت اهئ اهئ..
-ول يابه خلصنا حالج حال البعير للمنخر
وبرك. لما
كملنا صحتي كافي تحملي..
هي تحف واني اكمز ومغمضه والطم على رجليه حتى اواسي الالم.
هي جرت من الحاجب واني فزيت للسما .. صاحت خرب بيج يول طار
الحاجب خرب ببليسج شو حدرييي
شنو طار الحاجب..
-ولج ما جا عدل ليش هيج خليتيني اطبرو
جنج حرامي بفلم اجنبي
-لا لا هيام عفيه عدلي فدوه
-
بس شوي كعديلي عدل خل اعدلو..
-كعدت وحفتلياهم ثنينهم.. بس طبرتو ..
خلت الرفعه مالته عدل ما بيه كسره.. صاير شطب..
رحت دحكتو بالمرايا.. يا شصاير بوجهي.. حاجبي خلصان.. هاي شلون
هيام..
-يولي البس عباتي اروح اجيبلج قلم جوزي
وخطي يطلع يجنن هسه الموديل هيج ما بي كسره .
بقيت اعدل بيه هي لبست وراحت جابتلي قلم جوزي وقلم كحل ..
قربتني وخطتو.. وكالت خلي كحل كتلها اخاف..
-يولي شجاج حتى كحل ما ادبري .. شو
حدري.. خلي هيج وخطي عينج.
خطتلي الاولى.. وكالت جربي الثانيه .. رحت للمرايا اجرب ايدي
ترجف خطيت بس مو عدل.. عدلتو اليه وكالت تتعلمين.
-رحت دحكت بالمرايا واعدل بشعري ..
حسيت نفسي من ذن الممثلات وجهي تغير 180 درجه
عمري كله ما حافه وهسه حفيت صدك كمت اشوف وجهي ابيض والعيون هم
اول مره اكحلها احس فتحت..
كرصت خدودي سويتهن حمر.. يمه طلعت اجنن تروحلي فدوه ام سعد هي
الطليان مو اني تغار مني ام افچوچ
طلعت هيام تسمعني واني احجي وي روحي.. ضحكت وكالت ..يلا خل نطب
جت الكهرباء نزل المغرب وبردت حيل
.
.
طبينا .. وساره تسألها ماما شنسوي عشا.. بعدها ممجاوبه اندك
الباب حيل..
هيام:- يا ستار .. منو هذا ..دحكت من باب الهول.. كأنو ابو حرب
.. سياره ولابس دشداشه واكف.. انطني حجابي خل اطلع..
-اني بقيت ادحك.لحد ما فتحت الباب وصدك
هو سلم وكالتلو فوت هلا بيك..
وجهو ما يكصو السيف.. اني ركضت للغرفه الصغيره بسرعه.
صراع:- وينها خل تطلع بساع
-استهدي بالله خويه وكت مغرب صلي اذكر
الله وكلشي ينحل
-ام علي لا طلعين خلكي صيحيها خل اولي
-هل أذن خويه صلي وهسه انه اخليها تلبس
وتروح وياك بس على كيفك انته منا ضغط يا خويه هدي
-نفخ.. وصاح على ساره خالو خل اتوضى ..
اخذتو للحمام .. ودخلت هيام عليه..
اول مطبت كتلها لو يموت ما اروح وياه
-الموت يصيب عدوج ليش هيج مفاولتو تره
ما اقبل تحجين هشكل عليه ليليان والرجال مريض.. كضبي السانج وطيعي
وان ضربج لو طخج خابريني انه اجي اتكاون وياه يس مال تفاولينو
بالموت لا لهين وحدج ما اقبل
-خلي يرجعني لاهلي ما اريدو تعبت
-ديلا عاد يا بنيتي يا اهل متكليلي
اخوج الباعج لو خوالج الاجو هنا يبوسون بالادين بس سترو عليها ..
امشي وي رجلج امي وصيري خوش بنيه وشيحجي لا تردي.. هو يهدئ
وحدو.
-بقيت ابجي .. فعلا حسيت ما الي احد..
جت باست راسي
-لج يولي والله دره ما يتعوض يخايبه لا
تخسري اكسبي وكسبي حياتج وياه .. بس لا تراددين حتى لو حكج لا تحجين وكت اعصابو
يتخبل بالزايد من يعصب سكتي ومن يهدأ ثوله لو سكتيلو .. كعدي
وياه وحاسبي على وحده وحده.. واخذي حكج منو بعگل مو بهوسه.
بقت تحجي وياي واني ابجي.. لحد ما خلص صلاتو هو وكاللها ام علي
انه بالسياره 5 دقايق اذا ما طلعت بالقران اگلب عاليها واطيها..
كمت.. لبست حجابي وهي توصي وتحجي وتبوس براسي حتى ما اضوج ..
طلعت هو كاعد بالسياره ما دار وجهو .
سلمت وصعدت.. مشى بدون اي حرف.. وصل للبيت حتى ما نزل فتح
الباب داس هورن حيل طوووووووووووووووووووووووووط طورشنا
بساع طلع ابن سعد يركض فتحلو باب الكراج .. فوت السياره ونزل ضرب الباب. اني نزلت الدموع بعيني احس اختنكت وما
الي احد اروحلو
باقيه ركبتي بيدو شلون ما يحب يتعامل ساعه زين وساعه شين واني
لازم اتحمل كل مزاجو
دخلت كبل لغرفة الحجيه. ونزعت الشال وكعدت ابجي.. طبت الحجيه
.. على كيفج ولا تسوين هيج بنفسج ولو ما يحبج ما يتعنى ويجي
والا جان زتج على اهلج وافتك من مسؤليتج وعلى كيفج وياه. ومن هلكلام. بجيت بجيت وهديت وحدي..
اجت حلا.. طببت راسها من الباب وكالت :- ليليان اذا ما عندج شي
حدري اوكفي وياي بالمطبخ محد بس اني اشتغل..
كمت وياها.. لان مرت سعد لليوم ما تقبل تجي وهو معاند ما
يريدها وباقين
مشيت للمطبخ اشتغل وياها حضرنا العشا.. انتبهتلي كالت :- حافه
وجهج
-اي
-طالع يجنن اببببيض .. جان الشعر معجعج
على وجهج مسويج سوده.
-هو ابوج خلاني اتهنى بالحفافه لو اشوف
نفسي اجاني طاير كن ملك الموت اخذني واجه.
صدك خل اشوفج شعري هم سوتو ساره.. حللتو الها وكالت يخبل ..
نكمل ونصعد شسوريلي شعري..
-علميني وتدللين اني اشسورلج وانتي
اشسوريلي شعدنا شو لا طلعه ولا طبه.
-هههه ديلا لبسي خل نودي الاكل
-شمرت الحجاب منا ومنا ما ضبطتو ودخلنا
العشا بصينيه لان مو هواي هم..
جان كاعد صراع و نائل عيحسبون لان نائل شغلو صيرفه وحسابات
فكاعد صراع يحسبلو..
صاحت الحجيه يلا يمه كومو تعشو گبل لا تصير صلاة العشا خل نفض
عشانا
اندي دنكت اخلي الخبز.. اندار صراع.. يريد يدنا للصينيه. شو دحكني وكام يخزر..
بساع عدلت حجابي كلت يمكن لان حجابي ما لافتو عدل.. كعدت بدون
مشتهى .. هو ينافخ ويتنهد وتحسو متوتر ومو طايق احد..
بس تسويلو بز.. ينفجر..كملت ورحت للمطبخ لان مو كلش اشتهي ...
دخلت ودا اوكف ع السنك..
كضبني من ايدي حيل .. وداريني الو..
-ااااخ عمو شبيك..
-شمسويه بوجهج كضبني من حنجي .. ويصك
على اسنانو.. وتتمكيجين بت السكط.
-ما متمكيجه والله
-المن زالغه وجهج.. لج دحكي هسوالف مال
وحده بايعه.. تسويها بالقران راسج اكصو..
-عمو دوخر شبيك.. سوالفيش .. بعدتو..
وصحت بس حفيت شسويت قابل حتى الحفافه حرام.
-المن حافه منو هذا الرايده يدخك بوجهج
ويتغزل بيج ولج جايه ادوريلي معجبين ابيتي اذبحج والله
-يا معجبين يا سوالف .. تره بس حفافه
حطيت وكحل شوي ما جرمت ولا بكت فلوسك حتى هم تكتلي ..
-ولج رد لا تردين بوجهي ليليااااااان..
وكضبني من ركبتي يخنك بيه ويخز حيل ويصيح حرام بالحرم اذبحج
دفعتو من صدرو وصرخت.. ما اريدك افتهم ما اريدك.. اذا شفت روحك
شيبت تره بعدني الشباب ما شايفتو لا تكعد تدفن بيه بس لان انته جبير
ما اناسبك عوفني اروح لاهلي سترت عليه الله ينطيك كافي مليييت ..
اني كلت هيج وهو كضبني من شعري... ويكلي انه شايب وادورين عليه
الشاب مووو..
وجر بيه من شعري كمت اصرخ بيدون واضرب وخررر ما اريدك وخر.. اجه
الحجي كضبو ويكله بويه على كيفك وياها جاهله ما هيج
وهو يصرخ .. ما جاهله هاااااي حرمتي ماااا جاهله..
جرتني الحجيه من اديه وهو يصرخ شيحجي ما ادري بس حيل فقد وطلع.
واني كعدت ابجي حيل..
دخلتني الحجيه للغرفه.. فرشت وتمددت.. ابجي والحجيه تكول شجاكم
بس دخلت اصلي كبيتو حتى ما عرفت شكلت بصلاتي وشحجيت وي ربي
ما عونت اكمل واكوم اشوف شبيكم... متكلولي شجاكم جهال .. اغو .. يرادلكم تعلوم..
ما رديتها ابد ولا حجيت بقيت بس ابجي بمكاني.. للصبح واني ابجي
... صوتي كلو انبح من كد ما بجيت ..
ثاني يوم اجت هيام.. كعدت طلعت حركتي بيهة .. كتلها هذا اخوج
التكليلي احترمي طيعي دحكي شسوه بيه مو كتلج ما اريدو ما اريد اروح وياه.
كل اليصير بيه بذمتكم .. تعبت رحموني .. مليت خلوني اشحد
بالشوارع ولا علعيشه عوفوني..
هي ابد لا حجت.. بس تكول حقج اهدي اني احجي وياه.. من حجت هيج
درت وجهي منها وحتى تنظيف ما طلعت..
انعل ابوهم لابو اليخدمهم .. اخدم وممحصله بس الكفخات والضرب..
لوكيه يسوون نفسهم يخافون الله والرب بريئ منهم..
بقيت ادردم بمكاني و هيام كامت نظفت وساعدت ام سعد بالطبخ..
للضهر كعدوني على غدا ما قبلت اكعد..
نايمه بفراشي وسمعت هيام فتحت الموضوع وي صراع عاد كمت بساع
لطشت اذني ع الباب اتسمعلهم..
هيام:- شبيك وياها يا خويه بعدها صغيره. ليش هيج تتعامل وياها ..
-ام علي اطلعي منها انه عرف ائدبها لهل
سز.. وبعدين انتي شمخربطه بجهرتها وشمسويه بيها هااا
-شسويت بس حفيتلها
-وشكو تحفيلها من كايلج خربطي بجهرتها
من غير شي الناس عيونهم عشره عشره جايه مصخمه وجهه شكو منز عاتب عليج
-ما بيها شي ابو حرب تره البنيه متزوجه
ما بنية بيت ويضل وجها مليان شعر حتى اليطب يستنقد..
-منيلها متزوجه هااا .. دحكتيني اخذتها . وما علي بالناس .. شتحجي انعل والديهم
... سالم الله عليج هيام تركي ليليان ولا تدخلين بيها..
-شدعوه هيج صارت ابو حرب غريبه انه
والعب بوجها واتصرف بكيفي..
-ام علي مخيره بهلبيت عسى ما تهجمينو
مالي غرض بس ليليان لا توصليها... تريدين ابوس راسج حتى تاخذين احجايتي
-لا شعلي بيكم عمي لا تبوس راسي ولا
ابوس راسك.. مرتك منك الها .. ذاك بيتي اكعد وانجب بيه شدخلني بيكم انه ناقصه مشاكل
بس گبل لا اطلع.. خليها ابالك البنيه مراهقه. والدك على الحديد يفلو لو طكت وهجت
بالشوارع وتصخمت وجوهنه ... انت المسؤال وانته التتحملها .
ومع السلامه.. لبست عبايتها وطلعت..
-
اني بقيت بالغرفه ورجعت لفراشي.. هو
من بعدها ابد ما دحك بوجهي ولا طلب مني احضرلو شي يخصو. ولا اني سألتو..
مرت 3 ايام على هذا الحال.. بس صراع متوتر ما طايق الدنيا
والبيت كله متوتر من وراه
لان من يعصب يبتلي اللي يطلع صوت بالبيت ما يعون يلكالو شي
يتكاون وياه ويطلع اعصابو بي.. ف البيت هدوء ..
حتى ام سعد تخلس وما تكوم تتكاون وياي بصوت عالي .. مكاونه كله
يصير سكته والحجيه تسكتنا وتكول والله هسه ينزل علينه يكلبها بينا ونسكت.
ف بيوم.. اجه نائل كال ليليان اليوم لعبه و اريدج تكفين
بالمطبخ ع الجاي بس حمي انه اسوي النراكيل واني انكل ..
كتلو بعيوني صار.. ف وكفنا اني وحلا بليل نسولف. طبعا هاي من ماكو اخلاص صارت وياي زبد..
بس من تجي خالتها تكوم ما اطيقني.. وهليام خليصان ماكو ..
فخلصانين من المشاكل..
فوكفنا نحظر استكاين وجاي.. واجه نائل يمنا وكف ع الفحم ويفتت
عسولي ما ادري شيسمو ..
و حلا تزرفلو الفناجين .. ف واحنه واكفين طب ياسر..
اللي عرفتو ياسر من هو وصغير متعود عليهم وماخذ ميانه يبات يطب
يطلع جان صغير رابي وي ولدهم وكل لعبو وونستو هنا
بس من صار بالجامعه ابتعد لان استقر ابغداد بس بالعطل يجيهم..
ف من يجي ما يتحرز منهم يفوت للبيت بدون تكلف ..
وهم ماينين وياه ما يحجون .. ف طب بضحكه وشقى يضرب بحلا وينكت. واني واكفه صفح
حتى من يتشاقى وياي اسوي روحي ملتهيه اشتغل حتى لا يطب العقده
مالتي وابتلي على عمري..
وما خيبني .. طب صراع بس جان بره بيدو علاكة مسواك.. ياسر
تلكاه وكالو هلا بالزين يابه بس انت تفتهم
واخذ العلاكه من ايدو وكعد ياخذ منها وحلا تتكاون وياه بالشقى
وتضحك وتجر منو..
صراع يبتسملهم ويدحك عليه..وكال شجاي تسوون ..
ما رديتو..
نائل-نائل هم لعبه
-ابو حرب ترانا واكفين ودنسوي النراكيل
بدينا وذيج حرمتك هلواكفه بس تحرر جاي خوما تعبناج خويه
-ابتسمتلو وكتلو لا تعبك راحه. هو
اندار خزرني.. اني بساع انداريت اصفط بالستكاين
وضحك وياه ياسر واجه يضرب على كتف ابو حرب ويكلو اي يابه يخاف
على فختايته تتعب بويه ..
ويغمز لنائل ويضحكون.. بس صراع ما رد عليه .. ضاج حيل.. يريد
يحجي وياي وهم واكفين.
كام يحوس .. اعرف اطباعو من عندو كلمه وبالعها وما يكدر يحجي
يبقى يتنهد هواي ويفرك بوجهو ويمسح على شواربو..
رغم كل قسوتو وعجرفتو بس ما اكدر اكرهو وما ينطيني كلبي اقسي
عليه.. لو اخليه يحتار ويتعذب..
ف سويت نفسي اريد شي من الكاونتر اللي هو واكف يمو ومديت ايدي
اريد افتح الجام الفوك..
وهو بساع كال شرايده بويه.. اندار بحجة ينطيني الاريدو.. وهو
اصلا ما يعرف شأريد ولا اني اعرف..
همس .. ما اريد ادحكج هين بساع اطلعين فوك..
هزيت راسي.. تركتهم وطلعت.. هو مشى وراي .. ما حجه اني دخلت
بغرفة الحجيه وهو راح للاستقبال
تمددت بفراشي وبقيت ادحك ع التلفزيون عاكسه ايدي ومتجي راسي
عليها ونايمه.. ورى شوي فات.. دحك الحجيه نايمه.
خله علاكة الحلويات كبالي بدون ميحجي وكعد يم راسي.. يتصفح
بموبايلو..
لا اني حجيت ولا هو حجى.. تمنيتو يحجي بس ما حجه.. اعرفو ما
يعترف بنفسو غلطان دام طولت لساني وياه يبرر لنفسو تستاهل من السانها..
بس اذا ما اطاول وياه لا يجي يعتذر.. ويحس ظلمني واني ما
رديت.. بس اني شيسكتني وكت انهد.. يصير الساني برنو.. ومن ضيمو طبعا.
اكلت حلويات شوي.. وردت اكوم اغسل.. ف و اني اعين نفسي اكوم
حجيت وي روحي .. اكوم اغسل اسناني احسنلي..
حتى انطي خبر.. اني رايحه اغسل ما رايحه يمهم.. ف يطمن وما
يكوم وراي..
هو وصلو المسج وبقى كاعد.. اني غسلت بساع ورجعت.. تمددت
بفراشي.. وهو على نفس كعدتو..
لحد ما غفيت ووكعت ايدي ونزل راسي ع المخده.. حسيتو يجر الغطا .. غطاني وباس راسي وخدي..
اخذ نفس .. مسح على شعري بهدوء وكام طلع من الغرفه.. ابتسمت
وطير عقلي بحنيتو و ثگلو بنفس الوقت
احسو رجال وعندو كرامه لو شكد ما يلين گلبو كرامتو تمنعو
يتنازل .. وهلشي حبيتو رغم ان محلو هيج يتركني..
شوي وفتحت الكنتور.. طلعت عطرو .. رشيت على مخدتي ورجعت ضميتو
.. وكمت اشم بالمخده اوووووه ..
اتخيل نفسي حاظنتو واني بين اديه.. والحقيقه حاظنه المخده..
ثاني يوم كعدنا الصبح.. سوينا الريوك.. وخلينا .. بقى يدحكلي
ينتظر مني اكلو صباح الخير عود هو زعلان واني الغلطانه..
بس اني ما اشوف نفسي غلطانه كلت خلي هو يتنازل ويحاجيني اني
شكو شامره روحي عليه..
وما تنازل ولا حجه وفوك هذا ضاج وصار عصبي وشال مناخرو .. لان
ما حجيت وياه. كام
بس ينافخ.. ويزكح.. على اي واحد يمر منو..
هو من يصير عصبي هم يستغل الوضع لان يخافون عليه يصير اعصاب
اكثر و يرتفع ضغطو.. فيكوم يأمر عليهم والاعوج بيهم يعدلو
وشحدو الما ينعدل حجه ويريدها من الله حتى يكوم يتكاون ويطلع
عصبيتو بواحد منهم..
ف وهو ضايج كال لسعد انته ليمتى راح تبقى هيج جهالك هين ضايعين
وامهم زعلانه وانته فرار بين المولده ومرتك الثانيه ..
كالو ابو حرب نأجل الموضوع.. زكح بيه لا يتاجل وهسه تكوم
نجيبها وتعتذر منها وتتفاهمون والا حرام بالحرم ادور بانزين على هلبيت واحركو انتو
وياه..
وكام ويسب ويغلط وكام بعصبيه كاللها حجيه تهيري خل نروح انه
وياج وسعد نروح نجيبها.
ام سعد كالتو وانه.. دحك.بيها وكال اخذج بس بالقران لو طلعت
جلمه ناكصه منج جدام اهل المره ما تلومين الا نفسج..
عاد كلهم لبسو الحجي والحجي وسعد وامو صراع.. راحو على نوال..
بقيت اني والجهال وحلا بالبيت ونائل نايم فوك بغرفتو..
حلا ما نزلت .. والجهال كعدتهم بغرفة اهلهم وكمت ع البيت شغل. طلبت من محمد يساعدني بغسل الكراج لان
صراع ما يقبل اطلع..
والولد خطيه ما كال..كملت طبيت سبحت.. طبو جايبين نوال.. طلعت
والخاولي على راسي سلمت عليها وباوستها
عاد صراع صاح.. يمه دامج واكفه خل نروح لهيام نجيبها هي
وجهالها تتغده هين..
كالتلو يلا.. هي زعلانه منو لان حجه عليها وكاللها لا تدخلين
بليليان ف ما يتحمل زعلها راح يراضيها ويجيبها
بس اني باقي يبيع كرامه براسي..
ام سعد كامت بس طبخت مرك دجاج احمر وتمن كالت صراع راح يجيب
قوزي ع الغدا بثواب المرحوم عابد..
فبقيت اعاونها. شويه وطبت هيام هي وجهالها ..
استقبلتها وفاتحه اديه. كالت هلا بأم ملگه الحلو
حظنتها حيل وسلمت
-مشتاقين
-احنه الاشوق عيني لازم امورج توب
وتغمزلي
-لا والله على حطة ايدج..
-خرب يومكم شطلعت هاي .. وانه اكول
سوده عليه وجهه متعوب ومهدود حيلو
-لتخافين عليه بحيل 10 سباع ..
-تف من عيونج اي والله يخايبه ..
-
هههههههه سلمت عليهم واجت يمي كالت
-
وينو صراع طلع
-لا فوك عيبدل...
-اروح احجي وياه اشوف شنو موضوعو ... صعدت فوك.. ودكيت الباب .. صاح ..
ادخل .. فتت
-هلا ام علي حدري خويه..
-هلا بيك خويه.. اجيت اسأل على اخبارك
-الحمدلله تحت رحمتو
-شصاير خويه ليش هيج متعوب
-الدنيا مو دار راحه خويه شسوي
الحمدلله..
-زين وليليان
-شبيها ليليان
-وضعكم يبقى هيج
-شريد اسوي مثلا ..
-خويه البنيه حرمتك وانته عايفها
-شعايف ام علي يا حرمه يا مره.. سكتي
خويه رحمه لوالديج..
-عجل شلون يا صراع
-ام علي والله دايخ وتعبان من هلموضوع
اتركيني منو
-غير اعرف شنو المتعبك حتى اساعدك يا
خويه احجي فضفض طلع البكلبك انته ليش بس تكتم وتطحن بروحك..
-ام علي كاره روحي بالقران .. الا انه
تالي عمري اغار على مرتي من واحد مربي على اديه وبكد جهالي ..
ولج مو ذاك اليوم ياسر يلعب عدنا وي الجهال اليوم انه اغار منو
لان مرتي تتمنى واحد مثلو ومو انه البالها
-تتمنى شنو لا ليش تفكر بيها هيج
-ام علي هذا تفكيرها سمعتو بأذني تفكر
بمواصفات مثلو تريدو شاب عشريني يفهمها وحقها بس غير افتهم..
لا انه راضي اعوفها ولا انه ريدها وطالعه روحي وكاره الدنيا
-زين ليش ما تريد..
-شريد .. اخذلي وحده بكد بتي واغصبها
علي وتعاي حبيني غصب على الخلفج وهي بالها بغير شي ومو انه التفكر بيه..
-منو كال متفكر بيك. ابو حرب انته انطيتها فرصه
-ام علي ليليان رايدتني اب الها ما
رايدتني رجل.. هي تريد تعوض بيه حنان اهلها بس مو مال زواج ابد..
صغيره وتفكيرها اصغر منها .. وانه روحي محتركه على شنو ما
اعرف.. لا عمري حبيت ولا فد يوم خليت مره ابالي
تالي خلك وحده مراهقه اتفر راسي وتخليني ما اندل دربي منين..
-هسه انته حاول وياها يا خويه وشوفها
حسسها بحبك سمعها كلام مو مال اب حسسها انت تريدها
شحسس ام علي البنيه طفله تعرفين شنو طفله .. ومو بس طفله طينه
كلشي ما تفتهم.. بتي حلا واعيه اكثر منها ما ادري وين جانت عايشه..
-هي صدك على نياتها وبنيه خام ذهب صافي
.. بس انته هم حاول وياها واكسبها ..
-دخل تكبر اول يا ام علي .. اذا هي
للان جاي ما تعرف تسوي .. اروح اعلمها على زواج وتعاي حبيني
مخليها على الله تتعلم شويه شويه والله كريم..
-والنعم بالله بس انته لا تقهر بنفسك
واحجي وياها حتى لو مثل ابوها .. بس لا تبقون هيج.. حتى الشامت يكوم يتشمت بوضعك..
اترك الموضوع على الله .. وعيشو على حب الله ..
وان شاءلله ماكو حال يضل على حالو
وان شاءلله ماكو حال يضل على حالو
-ان شاءالله الله كريم.
-انه نازله لا تضل مهموم ومتكدر.. كوم
احجي وياها وفكو وانزل تغدا تره صبو..
-نزلي هسه انه انزل وراج
ليليان:- دحكت هيام نازله من فوك .. كتلها ها.. شكال
-كال ما عندي شي وياها بس هي تعذبني
وما تتعلم وتعاند وتطاول.. كتلو ان شاءالله تتعلم وتصير مثل ما تريد..
-دنحجي نزل هو .. رافع خشمو .. كأنو
الله خلقو كسر القالب .. شايف روحو..
ما حجه ولا دحك بينا فات من عدنا كعد بالهول..
احنه صبيا الاكل ونكلنا للسفره.. كعدت كدامو. كل شوي ادحكلو ابد ما دار وجهو عليه ..
نائل ياكل ويكلب بالتلفزيون.. طلعت اغنيه قدييييييمه حييييل
كلها تراب .. كالو
صراع بالله عليك نائل اتركها
نائل: ها ابو حرب صرت تسمع اغاني مو تبت منهم وما عاد تسمعو
لناظم الغزالي
-ول يابه ناظم يفتحلي جروح .. وهو موال
مو طرب تركو.. خلنا نسمعو شويه..
-يغني المطرب وهو مندمج ويهز راسو
وكلها تصبح الله الله وذاك يغني فصحى عقدني حتى ذوقو بالاغاني ما حلو يربي.. اشبيه
احمد السلطان والكبد مالي مو احسن من هذا العقده مثلو
اسم الاغنيه او موال كان اقول وقد ناحت بقربي حمامةً.. هو يسمع
ومندمج.. ومتأثر
**
أقُولُ وَقَدْ نَاحَتْ بِقُرْبي حمامَة ٌ: أيا جارتا هل تشعرين
بحالي ؟
معاذَ الهوى !
ماذقتُ طارقة َ النوى ، وَلا خَطَرَتْ
مِنكِ الهُمُومُ ببالِ
أتحملُ محزونَ الفؤادِ قوادمٌ ، على غصنٍ نائي المسافة ِ عالِ
؟
أيا جارتا ، ما أنصفَ الدهرُ بيننا ! تَعَالَيْ أُقَاسِمْكِ الهُمُومَ، تَعَالِي!
تَعَالَيْ تَرَيْ رُوحاً لَدَيّ ضَعِيفَة ً، تَرَدّدُ في
جِسْمٍ يُعَذّبُ بَالي
أيَضْحَكُ مأسُورٌ، وَتَبكي طَلِيقَة ٌ، ويسكتُ محزونٌ ،
ويندبُ سالِ ؟
لقد كنتُ أولى منكِ بالدمعِ مقلة ً؛ وَلَكِنّ دَمْعي في
الحَوَادِثِ غَالِ! ...
-هز راسو ويكول اي والله.. ونائل يكلو
ها ابو حرب الله يعز دموعك..ويضحكون وهو بس يهز براسو.......يتبع
☆☆☆☆☆☆☆
متى تشعر المراهقة بقلب الاربعيني ومتى يفهم الاربعيني ما تريد
المراهقه..
☆☆☆☆☆☆
تعليقات
إرسال تعليق
اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم