المراهقة والأربعيني الحلقة (14)

المراهقة والأربعيني

الجزء الأول

الحلقة  (14)

طب وصاح ليليااان.. طلعت من الغرفه .. جانت كاعده اخلاص وامها و ام سعد وعمتي.. كتلو هاا

بيدو علاليك.. كعد ع التخم.. ودحك عليهم.. رفعلهم ايدو و كال ها الله يساعدهم .. ردو هلا بيك.. اجيت وكفت يمو..

-صحتني..

-اي يابه.. اخذي هاي العلاليك كلها الج.

-كعدت ع التخم يمه وفتحت اول علاكه.. فستان بنفسجي فاتح وابيض..وسير اسود ملمع.. عليه جاكيت بنفسجي مسود..

وكفت ... اااااااأالله شكد حلو.. دحكتو وحظنتو.. شكرررا

-ههههههه بالعافيه يابه.. شكم ليليان عدنا

-بقيت افتح جايب جبه و5 كلابيات الوانهم صح غامقه بس تصاميمهم تجنن واني اصلا احب الغوامق اكثر من الالوان خاصه ملابس شتويه تكون اغمق احلى..

جايبلي اكسسوارات واحذيه وجنط.. حسيت گلبي راد.يوكف من الفرحه.. واني ادحك واحظن بيه..

عمتي فرحانه وتكلي تلبسيهن بالهنا يمه الله يهديكم ويصلح بينكم بجاه الحبيب المصطفى ويبعد عنكم العيون وصلت على النبي.

ردتها ام سعد.. تصلين انتي هو منو حاسدهم.. كالتلها محد بس انه اخاف عليهم..

عاد هو جرني لحظنو ويكلهم هاي بنيتي.. هو حظني نزلت حلا.. كالتلو بابا هاي شنو.. جان ام اخلاص تكلها اجت بنيه غيرج بعد يدللها انتي صرتي قديمه..

هي اندارتلو.. بابا عود ليش ما جبتلي..

-مقصر وياج انه يابه.. مو اول ما طر الشتا انطيتج 200 ورحتي اشتريتي انتي وخالتج وجهزتي.

-زين عود ليش ما ذكرتني هسه. لو بس ليليان. ماما شو ما جنت تجيبلها هيج

صراع:-حلاااااااا ضبي السانج لا اطلعين اعصابي ابنيتي

ليليان:- عادي حلا شنو اليعجبج منهم اخذي ماكو فرق..

-انتي حيه مسمومه كدام ابويه اداريني ووراه اتحدين اسنونج عليه .. سوالفج هاي قديمه

الحجيه:- ولج ليش ما تنجبين شوكت حاجيه وياج هي ..

-صراع تركهم وكام .. ميحب يدخل نفسه بسوالف نسوان بس اذا زادت يزكح بينا ونسكت..

وكف ع المغسله وكام يتوضى.. اني شلت الغراض وضميتهم.. هو دخل بغرفة الحجيه يقرأ قران على ما تصير الصلاة..

اني ضميت الغراض وسديت الكنتور وكعدت ادحك بوجهو.. احس بوجهو وقار وهيبه.. ومدنك يجود قران..

اني عندي حالة ثول بهيج مواقف.. بدل ما اكوم واستحي ادحكو.. جبت مخده تمددت وكعدت ادحك بوجهو تكول تلفزيون..

هو يقره ويرفع راسو يلكاني مركزه بيه.. اخر شي ختم السوره.. وطبك المصحف باسو ونزلو وكال يولي مضيعه شي بوجهي..

-لا

-عجل ؟

-فركت وجهي.. واندرت منو.. كال يولي كيكتج اكلتيها.. فزيت على كعدتي.. وكتلو نسيتها.. هي حجايه هي كومه وركضت للمطبخ..

فتحت المجمده.. شو مأكول نصها وبس كلمة Sorry.. فتت للهول... كلت منو ماكل كيكتي

ام سعد:- هي الج شدرانه بيج كصينا واكلنا

-شنو شدراج مو مكتوب عليها اسمي..

اخلاص:- وشصار عيني هي كيكة بره شنو هلنفسيه قحط قابل..

-بس هو جااا...........قاطعني صراع وهو يصيح

-ليلياااان.. فوتت راسي للغرفه.. كال تركي عنهم انه اجيبلج غيرها.

-بس اريدها مالتي

-كام من مكانو وطلع و كال يولي وكع عليها خنن.. مو نضيفه صارت خل ياكلوها .. اخاف عليج تتمرضين..

هو حجه هيج وام سعد نفضت.. عجل من بيها خنن شكو مخليها بالمجمده واكلنا منها.. اني ضحكت ودخلت للغرفه وهو يجاوبها

- هي رادت تحتفظ بيها ما تاكلها

اخلاص:- لا يعني صدك وصخه

-اي صدكيني انه ليش ما خليتها تاكل خفت عليها .. بس يلا هسه هي دخلت بطونكم بيها ما بيها بالعافيه عليكم هي وخننها

سممهم بيها.. وهنا كامن هووع وهوووع ههههههه .. اني مخليتها ع الكاونتر .. طاب الحجي لاكيها كايل لنوال كصيلي شويه اكل..

طب ياكل هو وماعونو ابو ثرب ويصيح شو هاي جامده شويه جان تصيح ام سعد.. لاااااااا لا تاكل لا تاكل بيها خنن

وهو زكح هاااااع ويطلع من حلكه ويشمر ..

اني اجيت اسويها على روحي من كد ما ضحكت .. خرب يومو عرف شلون يزوهرهم بيها

ادحك عليه منصي وبس اكتفو تهز من الضحك.. عاد قاطعنا ابن سعد.. وهو يكول اجو بيت اهل نور اجو..

قطعو الكلام وصاحو جوه جوه لملمو كووومو .. كمنا بساع ولملمنا واحنه كاعدين. ما عرفت منو نور..

ندست نوال منو.. كالت مرت عابد المرحوم..طبت محنكه وحامل وكوه تمشي.. سلمت .. وكعدت..

واهلها طبو كعدو بالهول ما قبل الحجي يكعدون بالاستقبال لان هم اقاربهم بس من بعيد ف عود انتو مو غرب

اجت ام سعد للمطبخ.. وصاحتنا كالت لازم عشا بساع هسه شنسوي.. كالتلها سلفتي خل يدزون من بره جاي يمجد راح يأذن المغرب شنلحك..

عاد كضبت حرب كالتلو صيح ابوك.. اجه.. حجت وياه..

كال.. هسه انه اجيب دجاجتين وكيلوين كباب والباقي انتو حظروه هين.

عاد كمنا مكليات وزلايط وطرشي هو خلص صلاتو وراح يجيب.. دخلت مرت عابد.. ام سعد حظنتها وكامت تبجي على ابنها حيل..

والبنيه هم تبجي حيل.. كسرو خاطري بجيت وياهم من بعيد بس دموعي صبو.. كالتلها ام سعد..

دحكي بيمن ساومو دم ابو جهالج.. هي دحكتلي وام البنيه حجت.. والله خيه البنيه مالها بالمساومه دموعها صبت ويانه.

ما حجت ويايه مرت المرحوم.. بس امها سلمت وام عابد كعدت تنوح.. وهي تبجي تكلها خاله اجيب اثنين ايتام المن..

يجون ولا اب الياخذهم .. هذا حظي وكعدت تبجي وتنوح.. حيل كسرت خاطري.. كالتلها ام سعد ان شاءالله نايل يلم ولد اخوه ويصيرلهم اب..

ردتها لا تحجين هيج خاله .. انه صح دحكت المر من عابد ومبري الذمه بس ما الي نفس بعد لا اجيبلهم اب ولا اقبل

ردتها لا ما على كيفج.. ذول جهالنا احنه نلمهم ما نقبل يربون عند الغرب.. عاد عمتي صلحتها الها لان كامت تلوص بالحجي وبقو حجي..

لهناك واجو بيت عزام عم صراع الجبير وهم سلمو.. وكعدو.. دخل صراع.. انطانا الاكل.. وكال عجلو

اني اخذت الجاي كالتلي عليه ام سعد اقدمو.. دخلت للهول اقدم جان مره حيل جبيره بالعمر كالت يااااع هاي ياهي ؟

جاوبها الحجي.. يمه هاي المره الاخذناها على دم عابد..

-تفاجئت هاي ام الحجي.. هو الحجي خاش بالعمرين انوبه هاي امو..

هي حجت.. يااااع هاي الاخذها صريع .. شنو ولج جايه اطردين بينا وتنطينا جاي..

-مفتهمت شنو تقصد.. صراع جاوبها جده العشا حاظر ان شاءالله.. واشرلي بحواجبو ادخل جوه..

دخلت.. شو ام سعد.كدامهم تكلي ما تستحين تكدميلهم الجاي.. غير بالاول العشا..

ليليان- عجل غير انتي كلتيلي قدميلهم

-ياااا ولج وانوبه اتزتيها براسي.. ما عليج عتب انتي البكتي فلوسنا لو غيرج..

-اني اختنكت من كالت هيج عمتي بقت ترادد وياها وهنه يحجن ويستفسرن ..

مدينا السفره وكعدنا ناكل.. طب نائل من برا سلم عليهم وانطى للحجيه تقارير مال التحليل السويتو البارحه.. وكعد ع السفره..

الحجيه:- يمه انه ما عرف اقره .. هو شكالك..

-حجيه كال نسبة فقر دم كلش قوي عدها..

صراع :- منو هيه ؟؟

نائل:- ليليان..

-دحك بوجهي خزرني .. التكول اني جبت الفقر الدم النفسي..كعدو كلهم.. اني ما كعدت وزعت الخبز والقواطي ودخلت بغرفة الحجيه..

لان كلهم يسمعون بالحجي ويسبون بيحيى صح يحيى غلط بس بابا اشنو دخلو حتى يسبوه..

وحتى لو يحيى غلطان .. دام اني كاعده بنصهم غريبه ينحسب عليه اخ وينغلط عليه اتضايق ..

فكعدت بوحدي.. عاد حرب اجه.. كال بابا يكول خل تجي ع السريع..

-طلعت.. ووكفت يمو.. كال كعدي تعشي.. ادحك بيهم الهول شطولو على كدها السفره صارت كلها اكل..

كتلو ما اشتهي.. خزرني حيل.. بالله هذا شمسويه وهيج يخزر.. ومن يخزر اخاف اضل ما اعرف امشي لو اكف احير..

اشرلي اطب جوه.. ودزلي بيد حرب لفة كباب وبيها كرفس.. اكلت نصها وبعد ما اشتهيت..

هو خلص اكل اول واحد وطب..

-عجل ليش ما تكعدين وياهم ع الاكل ربج وحد انتي..

-عمو والله يسمعون كلام

-لا تخليني اطلع عن طوري يحيى شخصج وتتضايقين لو غلطو عليه.

-عمو ما بس يحيى ام سعد.تكول للنسوان باكت فلوسنه .. والله اني ما بكت فلوسكم شوكت تفتهمون هلشي.. حجيت وبجيت..

-كفي دموعج يلا عاد ولا تضلين تكعدين تتبكبكين بالغرف .. و انه احجي وي ام سعد بسيطه

-ما فهمت ديرزل لو دياخذلي حقي.. والله هلرجال مريض..

اني طلعت وراه.. نوال محظره الاستكانات.. البنيه مرت المرحوم واكفه تحجي وياها.. دخلت سكتن..

اندرت للبنيه.. كتلها اني والله ما الي ذنب بيتم اطفالج. ما اذيتكم ابد.. ردت ابجي.. كالت حبيبه انه ما حاقده عليج..

انتي ليليان اعرفج جان يحجي وي صحبانو عليج ويتوعدلج.. واعرف هو الراكض وراج ما انتي .. بس يبقى موتو كسر جبير اليه..

دخل صراع.. كاللها يعني تعرفين عابد جان حلفانو كذب.. دنكت..

-عجل ليش ما كلتي يا نور..

-والله خويه ردت احجي وووو...... سكتت من دحكت ام سعد.. صراع فهم السالفه.. هز راسو وطلع..

صبو جاي.. كلتلها نوال انتي قدمي اني ما اكدر.. اوكف اغسل وانتي روحي.. ما كالت..

غسلت مواعين وهي راحت توزع. كملت صاح الحجي حدرو اخذو الاستكاين بنات..

اجيت اني.. كمت امشي لواحد واحد منهم واخذ الاستكان.. صاح صراع على محمد ابن سعد..

كالو محمد لم الاستكاين بدل عمتك كوم.. واشرلي اجي يمو.. جيت همس.. مرة اللخ لو دحكتج ادنكين وتنطين گفاج للوراج بالقران اكسر راسج..

ردت اروح.. كال لا ترحين كعدي... احس اختنكت منهم .. لا ينطون فكه ولا يخلوني اولي عنهم..

..حجت جدتهم عمرها يمكن فوك 100 سنه..

كالتلو خايب صريع ما تخليني ازوجك.. واجيبلك اخ لحرب يسندو والعمر ما ينتضر احد.. ومرتك موجوده مره نادره ومعدله وسنعه..

-من كالت هيج المره مثل وحده وضربتني كف على وجهي.. تزوجو ليش ؟ ... عجل اني شنو..

هو كاللها لا ما اريد.. وكان جوابو مو حار.. مجرد نطق وكام اخذ سبحتو وموبايلو وصعد.... بقيت ادحك بيه.. شنو هلبرود..

كمت رحت لغرفة الحجيه لكيت اخلاص ومرت المرحوم ونوال كاعدات يسولفن.. وام سعد طبت .. تكللها ولج خليصه لو سامعه جده زلوف شحجت

ردتها شحجت..

-تكل لابو حرب ليش ما تجي ازوجك ومرتك موجوده..

-صدك والله فتحت الموضوع وياااه.. اي خاله وشكال بروح ابوج..

-اني فاتحه حلكي شنو من بشر هاي ولا عدها كرامه.. جاوبتها بدل ام سعد..

-طبعا عيكول لا.. وبعدين هو يكره النسوان تذكرو بمرتو

-هي شو كامت وتصيح لا تجيبين طاري المرحومه.. وام سعد كضبتني من زندي.. وتغلط

-كتلها مو اني الحجيت .. اني ما صار شهر من دخلتلكم.. هو كال هذا الحجي ويكولي احسج غير النسوان..

نكثت ايدي من ام سعد.. طبت عمتي.. كتلها عمه اليوم الغرفه هوسه صراع ما يكدر ينام هنا.. راح اصعد انام يمو شسوي..

-عمتي بقت متفاجئه.. اخذت كدامهن ثوب قصير وصعدت.. ما اعرف ليش تصرفت هشكل ومن شنو

اني اكول ما رايدتو لصراع.. ارجع لدراستي..

وليش ما اريدو.. يمكن هو يرجعني لمدرستي .. ارجع ليحيى شسوي.. فتحت غرفتو.. حتى بدون ما ادك الباب...

هو تفاجأ من تصرفي.. عقد حاجبو بلمحة اشاره بمعنى هاا شكو.. سديت الباب وكتلو عمو اني اسفه...

بس تعبت ونعسانه واريد انام هين غرفة الحجيه كلها ناس..

-اي بويه حياج الله.. وين ما تردين نامي..

-للحظه وكفت كرهت نفسي اني شنو دا اسوي.. ليش اريد اثبت هو رايدني مع العلم ما عندي احساس يريدو..

فتحت الكنتور وطلعت فراش وبطانيه.. اندرت لصراع.. عمو.. رفع عينو من موبايلو..

-هاي المره ليش تريد تزوجك..

-جاوبني بسؤال وضحكه يحاول يخفيها:- ليش تسألين

-فضول

-نزل موبايلو وكال مو كتلج بطلي فضول..

-هزيت راسي.. اسفه.. فرشت وتمددت.. وشفت ملابس الو محطوطه على جانب التخت.. اني غاسلتهم. ليش ما مضمومات..

فكمت على حيلي.. دا اشيلهم.. كال وين تردين بيهم..

-اضمهم..

-لا لدخلين شي للكنتور ما مغسول او ما مكوي .. ما احب الخربطه..

-هاا..

-رحت جبت ميز الكوي.. وفتحتو.. وحطيت البنطرون..

-يولي شدسوين انتي هم تحركيهم

-لا عمو والله ما احركهم اريد اتعلم.

-ترك موبايلو واجه.. شلون بالله تتعلمين

-اشغلو.. واعدل القطعه من اريد اكوي.. اطفي الاوتي واكوي على حراره بسيطه حتى ما يحرك..

-ابتسم.. وكال يلا عفيه باباتي.. شغلت وعدلت القطعه.. ودا اريد اكوي.. اجه وكف ويايه ويكولي لا عيوني دحكي ما هيج

-من تقرب وكال عيوني مثل النكزه صابت كلبي.. تقرب مني وهو يعدل البنطرون بحيث ايدو اطخ بجسمي وهو يعدل

ما دحكت القطعه كد.ما ركزت بيه وبملامحو..

-يولي دتنتبهين لو بعدج تصفنين.

-اي اعرف اعرف

-عجل جربي كبالي..

-حطيت البنطرون.. وكويت.. هو لزم ايدي ويهمس على كييييفو .. لا لا هيج اكوي دحكي.. وياخذ ايدي ويعلمني..

اندكت الباب وهو بلا اهتمام صاح ادخل.. وبعدو يكوي وي ايدي.. دخلت اخلاص وتبجي.. كالتلو ابو حرب

هو حس بصوت مو طبيعي رفع راسو وشال ايدو بسرعه.. هاا اخلاص خير شكو

-تقبل هلزعطوطه ترزلني وتغلط ع المرحومه اختي.. اندار ويكول منو ليليان..

ليليان:-اني شوكت غالطه ؟

-اي مو جيتي وتكولين صراع ما يتزوج حيايه تذكرو بمرتو

-لا اني ما كلت هيج والله كلت هو يكره النسوان تذكرو بمرتو.. اندار يخزر بوجهي.. دنكت وجهي منو .. خفت لا يكوم يضربني

صراع:- هسه اني احاسبها ولا تاخذين بحجيها بت عمي تراها بعدها جاهله السانها ببغاء شيسمع يقلد ويزت بلا فهم.. ..

-شنو ابو حرب ادافعلها انته ما توقعت هذا جوابك وانه الجايتك شكايه

-لا تكبريها خويه واعتبريها مثل بتج حالها حال حلا وغلطت وانه احاسبها اكيد..

-هو حجه هيج.. اني دنكت اخفي ابتسامتي هي ضاجت حيل منو.. كالتلو مشكور يبن عمي ما قصرت. وطلعت..

تقرب من يمي واني مسويه نفسي اكوي.. حجه

-ول يابه طلعت ما احب النسوان..

-بقيت مدنكه.. اخذ الاوتي مني.. و رجع حجه..

-دحكي بنيتي دا اعلمج.. المره مثل هاي القماشه.. اذا ما تعدلها بيدك. تضل مايله.. وعدل البنطرون على الميز..

ومرات تعوج وياك فتضطرت.. تجوي اذانها حتى تصير عدله.. وكوى البنطرون حيييل شفتي صارت تمام....

بس تعرفين اذا جانت عوجتها قويه و لحيتي عليها بالكوي شيصير بيها

-تحترك

-عفيه.. وتعرفين شغله.. الاقمشه انواع.. بيها الزين والموزين.. بيها الخفيفه وبيها الثكيله.. بيها الترتاح من تلبسها وبيها التخنكك..

بس اتذكري بكل الاحوال تكدر تنزع وتبدل غيرها اللي تعجبك.. ما توكف على قماشه مايله..

حط ايدو على راسي.. وكال يكفي.. روحي نامي..

-شنو يقصد بكلامو.. مفهمت.. يلا عود باجر اسئل لهيام واعرف..

-ردت اروح للفراش.. هو بدل دشداشتو ورش عطر واخذ مسبحتو وعينزل..

اني ادحك.كل حركه منو.. طيب ليش هيجي.. البارحه جان يجنن و نايم يمي وحنون.. اليوم ليش احسو شخص ثاني

واني ليش اريدو يبقى حنون وليش اريدو ينام يمي.. دحكت.. حتى عيب انام يمو.. عفت فراشي ونزلت..

لكيتو واكف على راس عمتي.. ضغطها متخربط.. ويكلها يمه كومي اخذج للمضمد ..

كالتلو ما اريد يمه بس ارد انام.. باجر انه وهاي نروح للدكتور هم خلصان دمها المسكينه.. اخلاص والبنيه نور ونسوان واكفات فوك عمتي..

اندارلي صراع:- وانتي ليش ما تاكلين

-والله عداكل

-انه باجر اخذكم بس ارجع من الدوام.. بقو يم الحجيه وهو ما طلع بقى يم راسها خاف يصير بيها شي .. لحد.ما نامت..

اني قبل لتنام. نمت ع المده بدون فراش وهم يحجون.. فزيت على صوتو وهو يكول بابا حلا فرشي وكومي ليليان مديلها فراشها

ما كدرت ترادده.. فرشت واني احس.. بس عيوني ثكلانه اغفى واوعى..صاح ليليان كومي خل تفرش..

فرشت النا كلنا.. وحتى مرت المرحوم ويانا. حلا كالت لاخلاص خاله تباتين هين..

عاد سمعتو يكول طلعو خليهم نايمين وقررو بره.. ما كعدت غير الفجر على وجع يذبح.. كمت لما طلعو لغرفهم كملو صلاة..

دخلت للحمام.. لكيت العاده مالتي.. رجعت لفراشي اسناني يكزكزون من البرد والوجع ذبحني وساءت حالتي بسبب فقر الدم..

الحجيه جانت توها مخلصه قران. اني اون.. كالت شبيج ليليان ليش يمه تونين.. كتلها كذا وكذا..

عاد دفتني بغطى وانطتني حباية براسيتول. للصبح نمت متكسره.. ما بيه اشيل لا ايد ولا رجل. جت عمتي وهي تقره على راسي وتكول عمت عيني هلبنيه غدت كركم. خلص دمها..

خابرت صراع كالتلو.. يمه جيب وياك معلاك اليليان جايتها الشهريه وهي دم ما عدها.. اني مريضه وسمعتها.

كمت كتلها لا عمه والله عيب شنو تكوليلو هيج..

-يولي انه شكايله عجل غير يجيبلج شي يسندج يا يمه.. طبت ام سعد..

-شنو العروس محنايا اديها تعلمت نوم الضهاري..

الحجيه:- ام سعد البنيه مريضه جايتها الشهريه وهي دم ما بيها عوفيها صراع راح يجي ياخذها للدكتور..

بقت تتحاجى وياها.. خابرت هيام وقطعت سالفتهن.. واني نايمه. سولفت وياها وسألتها عن وضعها وكالتلها والله انه زينه

بس ليليان سوده عليه جايتها الشهريه وهي دم ما عدها وهسه طريح وساد ما تحرك لا رجل ولا ايد..

اني اسمع واسكت.. بالله اكو واحد ما عرف اني جايتني الشهريه.. اجتي مرت المرحوم طلعت حبابه كالتلي ادفيلج ماي تحطي على بطنج تصيرين زينه..

عاد سوتلي وحطتها بس وضعي زاد ما نقص لزمتني سخونه وي الوجع.. رادو مني اتريك اتغدى اي نفس وشهيه ماكو رفضت

خطيه عمتي كومتني لسريرها كالت خاف تصل بروده لعظامج من الكاع. نامي بمكاني ودفتني..

لشويه اجه صراع. اني غافيه بس بساع احس..مسح على شعري.. اخذ نفس ودنك باسني بكصتي وبخدي..

اني احس بس كلبي يدك لا اني ولا هو بينا صوت ..كلبي بيناتنا كن طبل يدك..

كعدني وينده بيه. ليليان .. باباتي.. فتحت عيني..

-كعدي يابه جبتلج معلاك تازه جاي يشووه وكرفس يعوض دمج .. احس من الفشله اريد ابجي.. بالله شلون بعمتي

جابت نوال المعلاك واني ما اشتهي هو يريد يوكلني واكله عمو ما اريد بس اريد انام..

-بس اكلي بابا متصيرين زينه اذا ما تاكلين.. حتى لو بدون خبز..

-خله لكمه بحلكي غصب.. كوه الوك بيها وعيوني مغوشه. طبت الحجيه.. كالت ها يمه شلون صرتي..

صراع: بسم الله يمه هاي اول لكمه

طب الحجي.. يكول شميت ريحة معلاك المن هاذ شنو صايرين اجيبون سكتاوي وتاكلون..

حجت الحجيه.. يا شبيك ما تكلي يا سكتاوي البنيه جايتها الشهريه و دم ما بيها وتخربطت ونريدها تاكل تعوض ..انته هم عليك شهريه وتنزف.

اني مغوشه وكوه اكل واون وصحت بالم بالله اكو واحد ما عرف عندي شهريه.. شنو اول بنيه.. حدث غريب.. شهرتيني

صراع بقت بس اكتافو تهز وهو يكول عجل هي الحجايه وين وكعت غير باذاعة مونتكارلو.. شيخلصج بعد

اكلت 3 قطع صغار معلاك.. ورجعت نمت هو بقى يكعد بيه يريد اكل.. عاد كال ضموها الها تكعد وتاكل.

انوبه انتبه نايمه على سرير امو. كال خل اصعدها يمي .. وانتي انطرحي نامي يمه لا تضلين كاعده وتتخربطين..

كعدني انام فوك مابيه. عاد راد يشيلني كتلو لا لا اكوم لا تشيل .. صعدت.. دحكت اخلاص بعدها هنا..ادري مقيمه دولي شكد.متحس.

صعدني فوك.. ونومني ع السرير وطلعلي 2 لحفان غطاني.. وهو نام على الطرف الثاني. انطاني ضهرو.. ونام..

اني جسمي بايد.. وادحك على شكل ضهرو ونومتو .. زين ليش ابتعد وانطاني كفاه. ليش ما اجه نام يمي واخذني بحظنو..

والله انج فاكسه يا ليليان وادورين سوالف طايحة حظ.. احجي عبالي ابالي طلعت اهذي وصوتي مسموع..

اندار .. كضب كصتي.. وكام طلع جفيه (محرمه) وبللها.. وخلاها على كصتي بساع فزيت وكتلو لا لا ما اريدها..

-ما على كيفج حرارتج عاليه بويه

-ثبتها واني درت على صفحتو.. هو انطاني ضهرو ونام.. ما اعرف ليش يتهرب مني..

هو يتقرب ومن احب قربو واتقرب يبتعد.. بقيت على هاي الحاله لحد ما كعدت ما لكيتو.. اجت هيام ودحكتني كالت باجر اخذج للطبيب ما اعوج هيج وجهج كركم..

سوتلي عصير برتقال ووكلتني معلاك مشتني للحمام شويه ورجعت نمت .. للييل حسيت بي طب.. والمنشفه على خصرو..

غمضت استحيت ادحك عليه بهيج موقف.. سمعتو تحرك.. فتحت شوي.. دحكتو مبدل برموده سوده وفانيله تعلاكه ابيض واسود.. واكف على المرايا يعطر نفسو..

غمضت.. اجه فتح الغطا.. عطرو احس خدرني .. وريحة النظافة تعط منو.. هلكد نضيف لو دحكت اديه اخجل كد ما بييض ونضيفات الدم مبين منهم رغم بيهم شعر خفيف ..

نام كلت حيتقرب يخليني بحظنو.. غلس ودار ضهرو.. ما اعرف ليش هيج اني ذابحه نفسي واريدو..

وليش هو عيتجنبني.. بقيت ساعات افكر وهو غط بنومو وضوه مشغل صفر احمر والجو داااااافي رغم صوت الهوى والمطر بره مسموع..

ما اعرف شنو حسيت وليش سويت وقربت نفسي وخليت راسي بضهره ونمت بسدو.. هو حس.. رجع ونام على ضهرو

وما تقرب.. بس رفع ايدو وخلاها على وجهوو.. وغطى عينو.. حسيت نفسي رخصت نفسي هواي ..

درت ضهري وانطيتو كفاي.. عفتو ونمت ما اهتميت ميريدني مو لازم يمكن اني اوهمت نفسي بحبو

ويمكن صرت غبيه اكثر من اللازم وانجرفت وره عواطفي.. بس احساس صابني بالرخص.. احساس بشع..

اجيت ابجي كد.ما خجلت من نفسي.. بعمري ما فكرت برجال ولا فكرت اعجب او اتقرب من احد..

كانو كثير شباب يتعرضون كدامي لما اروح فد.مكان او للسرجخانه اللي يعاكسون واللي يزتون ارقام.

ابد ما فد يوم واحد انتبهتلو او لفت نظري او اخذ من تفكيري لحظه ...

ويوم اللي انصاب بمشاعر غبيه هيج اتفشل.. عزت بنفسي ما كدرت ابقى حتى بالغرفه. رغم المي ووجعي ما كدرت..

نزلت رجليه من السرير.. فز هوه.. واندار..

- وين رايحه

-اريد انام جوه..

-بارده عليج بنيتي نامي هين والصبح نزلي خاف ما مرتاحه..

-لا ما اريد..

-ليليااان.

-اندرتلو.. جر ايدي .. ردت اوكع ع التخت.. نامي بابا واذا انه مضايق نومتج انزل افرش ع الكاع وانام..

تجيت وكعدت.. ما اعرف شنو اكول بقيت ادحك بوجهو.. رجعت راسي ونمت..

حسيت عليه كعد صلاة الفجر.. وغطاني زين.. وباس راسي.. شنو اللي ديصير هو يحبني لو لا.. واني ليش مهتمه ومتضايقه هلكد اريد اعرف..

نام على طارف السرير لحد الصبح.. كعد وراح لدوامو.. نزلت.. حالتي احسن اكدر اكوم وشوي بيه حيل..

ام سعد.. دحكت اني بيه حيل كن متحلفتلي غسل وتنضيف واصعد وانزل انهد حيلي..

وهم كاعدين يحجون بجيابة مرت المرحوم وتريد تجهز اثياب الاطفال.. وانه اشتغل.. بعد الضهر كملنا الغدا و البيت بقى بس الخبز يردوه حار ع الغدا..

ف نوال وام سعد يخبزن كبل الغدا بشويه.. ف ام سعد حكمت عليه الا اكف ع التنور واخبز..

كالتلها والله ما اعرف واخاف من التنور.. كالت العافيه تداريج وماكو احد طلع من بطن امو متعلم كضبي غطا التنور والكماشه وشلعي بيها الخبزه من التنور

تخرت سلفتي كالتلها انه امطللها الخبز.. وكفت الحراره تبث بوجهي اول مره بحياتي اكف ع التنور

كامت هي تخلي الخبز واني اكضب الغطا ومية لسعه انلسعت بالغطا وكل ما افتحو الحراره تكب بوجهي.

وكوه اكوم اتنفس كد ما صعب عليه وكفتو.. كمت اشلع خبز.. خبزه تطلع وكبزه تكع بالنار.. ومن توكع خبزه تضل تكفخ على راسي وتغلط وتسب..

احس كمت ما اشوف .. اخر شي فتحت التنور شهكت من حرارتو وما تحملت.. وهي تسب وتغلط بت الكلب خفي ايدج يلفاهيه يل ما بيج خير لا بارك الله بالبطن النكلتج

متحملت.. فقدت.. ما حسيت غير على ايد عمتي بمي وتصحي بيه.. و سلفتي واكفه بكلاص مي وعطر..

وصراع فوك راسي يكول اخذها مستشفى. كالت عمتي لا بارك الله بعمرك هاي كعدت ما بيها شي ان شاءالله ارتاح يمه جاي تعبان..

كضب خدي.. كال شلون صرتي بابا.. عجل اذا ما تتحملين التنور المن واكفه تخبزين يابويه انتي منا مريضه..

شو يلوم بيه فوك ما ام سعد خلصتها عليه تكفخ.. ما رديت عليه ضليت بس ابجي .. هو مسح على راسي ويكول يلا عدت سلامات انه اصعد ابدل تعبان..

كمت ابجي بالزايد شنو الاريدو ما اعرف الاعرفو ما عحس احس بشعور حلو.. احس رايده شي شنو هو ما اعرف

ليله وحده من گربو سببتلي كل هلالم.. ليله بيها زرعلي مشاعري بداخلي وتالي ما اهتم بشنو هو سوه..

ما فكر اني بنيه ممكن تغريني الضحكه واكع بيه.. من وكتها بدت معاناتي مع هلحجره الاربعيني يلي ما يحس بمشاعر المراهقه اللي تريدو.....يتبع

☆☆☆☆☆☆