المراهقة والأربعيني الحلقة (24)

المراهقة والأربعيني

الجزء الأول

الحلقة  (24)

وكفت اسوي عشى.. واسمع صوت صراع والحجيه على.. نصيت النار ورحت اتسمع من الباب على شنو يتصارخون

تكلو هذا ما كلام.. خذها فوك وعلمها اذا مرتاحلها شنو معناها مخليها يمي ..

-يمه ما اريدها هسه عليش جاي تلحين انه اعرف شوكت اقرر ..

-قرر شوكت ما تريد ما الي غرض بيك بس البنيه خل تشيل فراشها فوك

-ما اريدها خليها يمج

-ابني انته تريدها لو تريد تعل گلبي خذها لا تسويلها شي بس تصعد الغرفتها حالها حال كل مره متزوجه

-يمه بالله اعرفج واعرف غايتج تصعديها بغرفتي وتجبريني بيها وانه ما اريد هسه افتهمي ..

-هااا طلعت ما افتهم يا ابن بطني

-يمه ما هيج حشاج والله بس هاي السالفه تركيها رحمه لوالديج ما وكتها

-عجل ليمتى وكتها مخلي المره معلكه شنو معناها.. هاي وذيج يتضاحكن عليها .. خذ مرتك وخليها بغرفتك

تريدها ما تريدها انته وياها تتجازه..

-كتلج ما اريدها واكوم منج اشرفلي وانه كلب ابن كلب نزلت يمج..

ليليان:- دا اريد ادور .. اشرد. بس فتح الباب ودحكني واكفه ما اهتم وصعد فوك..

رحت سويتلو الاكل وصعدتو.. واني اكول هذا شبيه ليش ميريدني عجل اني مو مرته مو يتحكم بيه مثل ميريد اذا ميريدني على شنو مبقيني

.. دكيت الباب وردت ادخل...

صاح فوتي.. دخلت خليت الصينيه بالكاع.. بس هو عصبي.. دا ارفع راسي.. جان يكولي مشكوره اخذي راحتج يابه وسدي الباب وراج..

انصدمت واختنكت من كال هيج.. اني جنت حاسبه حسابي اكل وياه وهو كالي.. شبيه هسه يطردني اني شعليه..

نزلت الدمعه محبوسه بعيني.. فتت لغرفة الحجيه.. حرب كال ليليان فرشيلي.. فرشت وكعدت اصفن...

الحجيه نايمه.. لشوي نزل .. فتح الباب.. دحك عليها وحجه.. امي كاعده..

-لا نايمه ..ما دحكلي.. ومشى الها.. باس راسها وكاللها يمه.. هي دارت وجهه للحايط وما رضت تحجي وياه..

اندارلي وكال صعدي نزلي الصينيه من الغرفه .. بدون ما احجي صعدت.. لميتها وشلتها دا اصعد.. طب ضايج وما حجه شي.

هو هيج يصير من الحجيه تضغط عليه لا يكدر يتنازل ولا يكدر يزعلها.. فيبقى عصبي..

عفتو ونزلت.. غسلت صينيته ودخلت للغرفه الحجيه دايره وجهه ونايمه..

تمددت يم حرب وبقيت افكر اجيبها منا واردها منا دفاعو واسلوبو وياي يبينلي ان هو يحبني زين ليش ما يريدني اصعد بغرفتو..

هو يحبني لو يعتبرني بنتو ويحبني مثل حلا جنني هلرجال ما عفهمو صعب كلش.. بقت حسبه تاخذني واللخ تردني لوييين يلا نمت.

كعدت على حسو وهو يهمس ويحجي وياها ..

-يمه بصلاة محمد عليج لا هيج وياي.. اتركي هلموضوع وحده يجري

-لو تحط حد لهسالفه لو تطلع مني..

-يمه يا حد والله جاهله .. صغير انه ما افتهم وادلل عليج لو عليها... غير اريدها شوي تعكل يا يمه

-عكلها وهي يمك وعودها على طبعك .. عليش مخليها يمي

-مضايكه منها انتي

-شمضايكتني ماخذتلها متره من الكاع نايمه بيها.. بس لا الله ولا نبيو يقبلون بافعالك..

-كاصم راسها انه يا يمه شمسوي .. على كيفج وياي شويه شويه ساعديني بيها مو تجبريني

-العندي يمه كلتو .. خليني اكمل قران الفجر راح تطلع الشمس وانه ما قاريه..

نزلت راسها منو.. وكالت بسم الله الرحمن الرحيم . وبدت ترتل قران.. هو مكمبص يمها.. كام .. دحك عليها وتنهد.. وطلع..

رجعت نمت.. الصبح هو ماكو.. طالع الدوامو.. كملت شغلي وكلعاده مثل كل يوم.. لل4 دخل للبيت.. تلكيتو

عصبي ما يدحك على احد ابد.. صعدتلو فوك.. مبدل دشداشه ومتوضي دخل لغرفتو.. دخلت فرش سجادتو..

عمو تريد غدا..

-لا نزلي اخذي راحتج

-هاي ليش هيج يطرد بيا اني شعليه. نزلت وره شويه نزلت حلا للمطبخ تسوي اكل..

كتلها المن هذا الاكل ..

-لبابا انتي شكو لو هم ممنوع يطلب مني رجل حظرتج

-ما رديت بس ليش يطلب منها مو سألتو.. رحت بغرفة الحجيه اخذت موبايلها من جوه راسها وكمت العب بي وافكر.. وحرب كاعد.يدحك تلفزيون..

يا ربي اني والله ما سويتلو شي شبي ويايه.

طلع العصر ما حجه وي احد.. كعدنا بليل بعد العشا ع التلفزيون بالهول والحجيه صوبتها يمها متت منها ما تختنك.. شو تصيح بارده وهي ما كلش بارده.

دخل صراع سلم وكعد وصاح على حلا تصبلو جاي الحجيه حست بيه ما يحاجيني اندارتلي نزلت راسي وتنهدت بمعنى شسوي..

الحجي مطلع فلم اجنبي يدحك عليه ويكول دحج نسوانهم شخفاتهن..

الحجيه ردتو.. انته ادحك زلمهم واحدهم جنه شمس ما مثل زلمنا امچولحين و امولحين .. اني ضحكت عليها.

ردها سعد.. كاللها حجيه غير مسيح.. هم المسيح حلوين وشكران.. اندارتلي وحجت

اي مثل ليونه شكيره حليوه.. وتضحك وياي وتكلي وداعتج الا الكالج الاشكر اليلوك لهلوجه وازوجج الو.. الحلو ما يلوك الا للحلو..

صراع بساع شال راسو عليها بخزره هي ما دارتلو ابد.. كام ينافخ ودارو وجهو ويهز برجلو من التوتر..

الحجي :- ليش يابه تزوجيها عجل وابو حرب ما بعينج

-زلمتي هاذ شلون ما بعيني بس ما يتناسبون وهو معتبرها بنتو.. ما يصير نظلم بخت البنيه اخذلها اليناسبها احسن..

حيل داست بالكلام عليه.. حتى اني ضجت هو طر السبحه مالتو بالكاع وكام بهمه صعد فوك وما رد..

همست حجيه ليش هيج والله يكوم يشد وياي..

-ما عليج انتي خليها وراي وسكتي

-شويه وصاح حلااااا .. صعدي جهزيلي جنطتي بساااع.... باجر طالع واجب لكركوك اسبوع بلكت الله ياخذني وارتاح منكم يا **********

-الحجيه على نفس هدوئها .. بس الحجي كاللها .. شجالج يا نوريه.. ما تعرفين هلكلام يعصبو

-كامت وكالت ليليان طلعي الصوبه بره وطفيها.. انه رايحه انام. عافتهم وكامت واني طلعت الصوبه..

وصعدت لغرفتو.. دكيت الباب صاح فووت.. دخلت .. دحكت حلا عتجهز جنطتو.. كتلو عمو تحتاج شي.. اندارلي وهو يخز وكال لااااا شكرا ما اريد..

اخذت نفس وطلعت.. شسويلو ميقبل اخدمو .. وكأنو اني اللي محاربتو مو امو..

نزلت للغرفه كعدت .. شويه و نزلت حلا مشت للحجيه كالت اله :- جده هذا مصرف بابا راح يطلع واجب اسبوع .. ويكول اذا تحتاج شي تطلب من نائل وانه انطي..

خذت الفلوس وحطتهم جو راسها وكالتلها يرد بالسلامه....شويه واجه نائل .. كال ليليان حدري ساعديني

كمت وياه لعبه وكلعاده اسوي جاي.. صبيت وحطيت ب الصينيه.. ووديتلهم..

بعد نائل ما طلع.. هو نزل وراد يفوت.. دحكني واكفه

-شعندج هينا

-الجاي الهم غير

-وجهج ما ادحكو هين بساا عيلا ع الغرفه لا اكسر راسج ومحمد..

-تمام..

-شو واكفه..

-غير يطلع نائل ..

-دنعل ابوج لابو وكاحتج.. جيبيييي .. اخذها مني وطلع نائل

-شكو ابو حرب..

-سالم الله عليك هاي لا تصخرها على جاي للولد ممنوع افتهمت نائل لو اعيد...

-شلقصه يا ابو حرب صوتك الولد كاعدين..

-ولي منا بعدج وااااااكفه.

-تركتهم وركضت للغرفه.. شبي تخبل .. ليش يصيح عليه.. ضليت ابجي وافكر وحايره بأمرو للقبل الفجر يلا نمت

شويه وحسيتهم صارة حركه لصلاة الصبح كنت كاعده اسمع صوت الحجيه وهي تقرأ قران..

وره شويه نزل هو ببسطالو يدك ع الدرج بخطواتو.. وراح شغل سيارتو.. بس الحجيه حيل انقهرت من ما جا وودعها كبل ليسافر..

صدقت و طبكت القران وبقت تصفن..

اني كمت طلعت من الغرفه بسرعه. ودحكت من شباك المطبخ. لكيتو مطلع سيارتو ولابس زي عسكري اسود.. سد باب الكراج وطلع.

زعلان من الحجيه شلون هيج قللت منو كدام الكل..

رجعت للغرفه. الحجيه كعدت على تختها ..دحكت عليه.. وكالت :- هاا راح.

-هزيت راسي

-يرد سالم ان شاءالله.. حجتها بس كوه جرعتها حسيتها اختنگت..

شوي ودك موبايل الحجيه اني امدده شفتها ما ردت.. كمت على حيلي.. اخذت الجهاز هي كاعده ولان صراع ما ترد..

دست رد.. وكتلو الو..

-انطيني امي

-نايمه

-اعرف ما نايمه انطي الموبايل الها..

-حجيه هذا عمو صراع يريدج..

-كليلو تكول عساك سالم ترجع وليدي ما رايده غيرها يا تعب دنياي.. حجتها وحيل مقهوره..

-هو تنهد.. وكال انطي الها اكلج..

-ما تقبل نايمه

-كليلها تريدني ارد هسه للبيت..

-حجيه يكول ارجع هسه

-خلي ينتبه لطريقو وما اريد شي.. وسدي التليفون..

-تنهد وكال مع السلامه..

-حجيه ليش ما حجيتي وياه..

-نامي بنيتي كافي عليج بجي الليل .. لا تهمين اسبوع ويرد كلشي ما يصير لا تخافين..

وفعلا .. مرت 4 ايام وهو ما جا.. يخابر ع الحجيه ما ترد زعلت منو.. ما تبين بس .. تمرضت..

بقيت اداري بيها وهيام تجي هم اداريها بس هي تخلصها نوم ما تشكي من وجعها..

بهل فتره سعد قرر يشتري بيت ويقسمو ويطلع يعيش برا بيتنا مرتو ما قبلت راح عليها الحجي والحجيه هم راحت رغم مريضه وكوه قنعوها وجابوها

كال سعد شهرين واشيل بس اخلص بيتي.. واتفقو على هذا الشيء..

اداري بالحجه واشوف صراع يتصل بيها وما ارد بس شكد اشتاقيت اشوفو .. ما بيدي كل فكري بيه صح يكول ما اريدها وحتى لو يعتبرني بنتو

بس اني ما لكيت بحنيتو عليه .. حلا وام سعد حيل يأذوني بالكلام بغيابو وشدو وياي بشكل ما طبيعي لان هو ما موجود..

فصرت من ابجي .. اروح بغرفتو بليل اشم عطرو بفراشو وابقى ابجي حيل ..واشكيلو بيني وبين نفسي.

ثاني يوم.. هيام حجزت للحجيه عند الدكتور.. بس ما كدرت تروح وياها.. كالت الحجيه اخذ ليليان وياي هم تغير جو وهم تسندني ..

حيل فرحت من كالت تاخذني راح اشوف شارع وناس واتلهى شويه احس نفسيتي تعبت بهذا البيت ..

سألت الحجيه تخابر صراع تگلو..كالت ما يحتاج عليش مو شامرج براسي وبس وكت المأمر يصير رجلج ويحاسب .. معليج بي

فلبست جبه وحجاب وطلعت وياها.. اخذنه نائل .. ادحك الناس عايشين ويمشون ويتونسون.. عجل بس حظي محبوس ..

وصلنا لعيادة الدكتور.. نائل كاللها يمه ساعه واجيج .. كالتلو موفق بدربك وليدي..

نائل اكثر واحد.من ولد ام سعد يحب الحجيه وهو الوحيد يكلها يمه لو حجيه.. البقيه خاله و هم يكلولها الحجيه..

لان على ما عرفت هو ربى عدها .. ام سعد.جانت ما تهتم بي ومن تاخذو الحجيه تكيف وتروح تسد الباب عليه وع الحجي وتنام وتترك نائل ع الحجيه اداري ..

فمن شب حيل يحبها ويحترمها وما يردها ابد..

دخلنا العياده.. كومه بيها ناس الرياجيل برا واكفين والنسوان كاعدات.. وبالاسماء يصيحون

النسوان ما يبطلن حجي وحده تسأل اللخ ويجرن سوالف والحجيه وياهن.

وحده منهن سألت فدوه حجيه هاي بتج متزوجه ؟ كالتلها مرت ابني هاي.. عاد اعتذرت من الحجيه وكالتلها عبالي ما متزوجه كلت اخذها منكم الله يحفظها الكم..

ضاجت الحجيه لان تخطبوني منها ما كامت تسولف.. عاد من دخلت للطبيب كالت اكفي هين ولا تحجين وي اي وحده تسألج

كلتلها تمام.. بس هنه ما بطلن اسئله .. وين كاعدين وعندج خوات.. جاوبت لا ما عندي خوات وبيتنا بالموصل وابتعدت منهم..

لحد ما طلعت.. نزلنا من العياده.. رادت تخبر نائل بس كالت عليش يولي الولد مشغول ونشغلو .. خل ناخذ تكسي ..

صعدنا تكسي وخبرت نائل ان هي رجعت للبيت.. صف ابو التكسي اباب البيت.. نزلنا.. جانت مره جيرانهم تشطف ابابهم..

سلمت عليها الحجيه.. ها ام ضياء خيه شلونج

-هلا هلا بام صراع شلونج يابه..

واجت تحجي وياها.. شلونكم وشلونكم بعد.. كالتلها هاي بت صراع .. كالتلها لا والله مرتو ..

شو هاي خلت ايدها على خدها وتكولها يااااا كولي غيرها حجيه وينها وين صراع .. بكد بنتو ..

الحجيه ترخصت منها ودخلت للبيت.. دخلنا من باب المطبخ جاي انزع الجبه والحجيه فاتت جوه طبت سلفتي وكالت

-يولي رجلج جا وسأل عليج كتلو راحت وي عمتي للدكتور

-وينو .. شوكت اجا.. صدك سأل عليه.. ؟

-اي والله هو صعد وانتو طبيتو .. صعدي يمعوده .. شكلو تعبانه لا يبتلي بينا.

شمرت الجبه.. والحجاب فتحتو واني اركض.. يوووه شكد مشتاقتلو ومشتاقه اشوف وجهو .. صار اسبوع مشايفتو احسها سنه مو اسبوع..

دكيت باب غرفتو صاح فووت .. دخلت .. دحكتو كاعد على تختو ويريد ينزع الحذاء

كتلو هلا بيك هسه نور البيت .. ما اهتم وكأنو ما سمع ترحيبي وكال

-وين جنتي.. ؟

-دنكت انزعلو حذائو وكتلو وي الحجيه.. بالدكتور.. كضب ايدي وكال لا تتكلفين بويه انه انزع بس ليش ما عندي خبر بطلعتج..

كمت وما رديت هو مدنك ينزع.. رفع راسو ودحكلي.. بقيت ادحكلو بخوف وما ارد..

دنك وحجه :- امشي حظريلي الحمام

-اي.. ركضت لخانتو طلعتلو منشفه ورحت اعلكها بالحمام.. طب هو .. ما يحجي .. اووف هسه اني شمسويه وزعلان مني

دخلت لغرفتو رتبتها وعطرتها. وعزلت جنتطو .. دا اطلع.. دخل هو بالمنشفه دنكت منو وردت اروح.

صاح ليلياان..

-ها

-حدري يابه..

-تقربت منو.. كاضب المنشفه.. وفتح محفظتو بأيد وحده. وهي ع الميز. وطلع 6 حمر.. 150 الف .. وكال هاج ..

-دحكتهم فلوس كتلو لا عمو ما اريد الحجيه ما مقصره..

-انه رجلج لو الحجيه. ؟

-فرحت من كالي انه رجلج.. اخذت نفس.. كال :- كضبي بويه مصرفج تاخذينو مني بعد..وما اريد اسمع طالعه بدون علمي افتهمتي

-هزيت راسي بس كلمة بويه خربتلي كل تفكيري.. ساعه بويه وساعه انه رجلج والله دخت يربي بهلرجال.

نزلت سألتني الحجيه عليه.. كتلها عيبدل. هزت راسها.. شوي وفات هو .. باس راسها وسلم عليها وجايبلها هديه..

وكعد يضحك ويشاقى وياها ويبوس بيها حتى لا يخليها تضوج.. وحرب يتشاقى وياه وحلا.. عجل شبي ويايه حتى ما يرد.السلام.

زعلان وي الحجيه اني شكو.. طلعت وي سلفتي احظر العشا.. هو طلع فوك..

لوره الصلاة .. خلصو الصلاة.. صبينا العشا.. ردت اصعد.. عزت بنفسي اذا هو ما يريدني اني شكو زاته روحي عليه.

الحجيه تراضت وياه.. بس عرفت ما يحجي وياي .. كالتلي روحي صيحي رجلج اندرت ..لميت حرب..

كتلو حرب روح صيح بابا

ما كال شي.. راح صاحو.. شوي ونزل صراع لابس اتراك اسود شتائي ابو الكبوس لون العلامه مالتو برتقالي ..

ادحكلو شكد يعجبني طولو ويعجبني ادحك عليه بس هو ما اعرف شبي

كعد يتعشى وهم يسولفون ويضحكون.. واني عيوني بعيونو وما شلت راسي عنو .. وهو حس بس ثاولها وهذا اللي جنني..

ليش يعني ليش .. اني ما بشر ويحس بيا ؟

عاد.الحجيه حجت كالت اليوم بالعياده شافو ليليان تخطبوها مني عبالهم بتي..

هو مدنك راسو ياكل بس عقد حاجبو واعرفو انزعج.. كد ما ادحك بيه يمكن حفظتو اكثر من امو..

كالت حتى جيرانه ام ضياء شافتها.. وتخبلت من كتلها مرت صراع عبالها بنتو لا ابالها هم تجي تخطب.. ههههه..

مدري شجاها الحجيه ولا سكتت هو هيج هيج محملني ذنب مو ذنبي وشايل وجهوو عليه

دحكت عليه وكالتلو يمه.. :- اذا ما تريد.ليليان وتكول صغيره علي.. لا تعلكها وتوكف قسمتها خليها تنسعد

-طر الخاشوكه بالماعون.. وكال الحمدلله..

الحجيه:- وين ما اكلت

-شبعان.. حجاها واندارلي .. كملي وصعديلي الجاي

-هزيت راسي وكمت.. احنه حاطين الجاي على نار هادئه.. صبيتلو وصعدت.. دكيت الباب

صاح فووووتي.. دخلت نازع قميصو .. وباقي بس ابجامة التراك.. واعصابو مبينه عليه وهو يروح ويجي بعصبيه..

تقربت دا احط الجاي.. وكاضبه الاستكان بيدي خاف يوكع.. تقرب مني وجري ايدي.. وراد ياخذ الجاي..

بس بدل ما ياخذو عصر الاستكان بيدي ويحجي وهو يصك باسنانو..

-فرحانه مووو ..ادحك وجهج ورد من امي تحجي وهم يتخطبوج امصرفلج الموضوووع..

-لا ااا ااني معليه.. والله مالي شغل بس عمو ايدي

- وكت الاريدج مره تكليلي شايب .. و وكت الازم اصير رجلج وتاخذين كلامي تعتبريني جاهل و اطلعين بدون علمي وما اديريلي بااااال

-عمو بس ايدي عتحرك اتركنيييي..

-تحترك موو لج انه هيج يحترك گلبي من احد.يجيب سيرتج افتهمتييييي.. شال الستكان مني وطرو بالكاع ويكلي طلعي برااااا

بقيت افرك بأيدي احتركت وابجي.. وهو دفعني طلعي برااااااا .. وي دفعتو وكعت للكاع بقيت ابجي..

خليت راسي بين رجليه وزدت بالبجي بصوت وما طلعت.. وهو يروح ويجي ويفرك بوجهو ويستغفر ويدعي ربو الصبر..

تقرب مني واني كاعده.. كومي يابه روحي وبعد لا تعيديها ..

-كمت على حيلي .. اعيد شنو هاا .. تره طلعت روحي حس عاااد..

-نصي حسح لا تخليني ابتلي بيج والله

-ابتلي تريد تذبح اذبح. تعبت .. شايل وجهك مني شنو ذنبي .. شسويتلك بس تضايق من واحد تزت حركتك بيه

تريدني احس بيك واخذ امرك وما اعاندك.. مره بحياتك حسيت بيه .. كلت هاي شنو تحس .

اجيتكم مثل الاسيره لا حول ولا قوه ترحموني يوم وتذلوني اشهور شسويت شنو ذنبي وياكم. متريدني عوفني بس كافي تأذيني ..

-طلعي برا

-ما اريد اطلع. هسه تخابر امي تجي تاخذين ما اريد اضل هين .. يلا

-كلت طلعي برااااااااا

-اخذ نفس لا اطلعين اعصابي وكتلج طلعي ..

-بس جاوبني شسويتلك اني بشنو اذيتك.. وهيج تعاملني

-لا اله الا الله يولي اطلعي ما اريد اسمعج طلعيييي

-ليش اطلع وليش ابقى هنا بصفتي شنو فهمني .. بنتك لا .. مرتك لا . فارض عليه نفسك وتكلي رجلج ورجلج.. وحاكممتي وخانكني وانته ما معتبرني مره

ما كافي .. حس بدينك حسسس

-فرك وجهو حيل ويكلي احس مووو .. تقرب مني ترديني اعتبرج مره ... احجيييييي .. ترديني احسبج مره..

ماشي يجرالج... مشى سريع طفى الضوه.. الغرفه صارت ظلممممه.. من لحظتها گلبي انكمش.. وما احس الا خطواتو تتقرب مني

وفجأه دفعني بقوه للسرير .. وصرخ

شتردون مني .. تريدين اصير رجلج مووو .. بسيطه اصير .. حجه هيج.. اني ردت اكوم.. وكعني للسرير مره لخ وواجه لزم اديه حيل وثبتهم ع السرير

- وخرررر .. الله عليك وخر.. كام يشتم بركبتي.. واني اشيل بروحي وهو مثبت اديه وواوخر براسي منا ومنا ..

-هشششش ما اسمعلج نفس

-عمو الله يخليك عوفنييي

كمت ابجي حيل ما اعرف شنو يريد بس حيل خفت منو ولا كأنو ذاك نفسو اليحجي ويايه بحنيه. واحس بيه مثل حنية ابويه

والله راح اصرخ والم الدنيا عليك وخررررر مني وخررررر

احاول اسحب اديه منو .. والوي بجسمي منا و منا وهو كاضبني حيل وثقلو عليه احس اختكت وهو وجهو بركبتي وادفع بيه براسي واتلو و صرخت مامااااااااااا.. لحكوليييييييييي..

حط ايدو على حلكي وكلي هششش وهو صاك على اسنانو .. فلتت ايد مني.. ضربتو حيل وكوه دفعتو مني وطلعت اركض..

فتت للحمام ابجي واشهك بقوه .. ما فهمت الوضع شنو .. لا هو يضربني ولا هو يبوسني .. وتقززت منو حيل ..

حسيتو وحش واني احاول اسحب اديه منو.. اغسل بوجهي وركبتي .. شكد احب عطرو.. بس للمره الاولى اتقزز من ريحتو..

ادحك ركبتي .. مثل الكأنو صايبني حساسيه .. حمممممره ... ضليت ابجي بقوه.. اغسل بوجهي وابجي حيل

اندك الباب.. صحت منووو ..

صراع :- انه اطلعي

بقيت ادحك ع الباب بخوف وابجي واني اجر بثوبي واستر بصدري واخنطو على ركبتي بخوف .. اخاف منو يدخل وهم يسوي بيا هشكل..

-مو احاجيج طلعي..

-ما اطلع روووووح ..

-ليليان لا اتعبيني .. انه اسف بس طلعي احجي وياج..

-ما اريدك روووح.. خابرو ماما تجي الله يخليك

-لج بابا ما ائذيج والله بس طلعي ..

-ما اطلع الا تجي امي.. عمو الله عليك خابر امي

صعدت الحجيه وتقربت للحمام وتصيح .. شبيج يمه.. شسويتلها .. احجي وياي بنيتي شبيج منو وياج..

وادك وتصيح ليليااان يمه شبيج فتحي الباب والحجي صعد ويصيح شبيكم يابه شصاير

من سمعت الحجيه موجوده امنت.. بساع فتحت الباب وحظنتها وخليت راسي بحظنها وكمت اصرخ بصوت عالي وابجي ..

بچي وحده حيل خايفه واني الزم بملابسها بقوووه .......يتبع

☆☆☆☆☆☆