المراهقة والأربعيني الحلقة (21)

المراهقة والأربعيني

الجزء الأول

الحلقة  (21)

نزلو دموعي كدامو بكل ضعف واني اگلو ...اتمنى تفهم اني والله ما محتاجه فلوس...

-صفن بوجهي بأستغراب .. وكال تمام.. اندار وبقى يفرك بوجهو وهو واكف..

تمنيت يدير وجهو ويحس بيا.. بس بلا فايده.. نزل اديه ومشى للسياره.. حسيت روحي تتلاشى بخطواتو

ليش ميحس يربي تعبت.. دخلت للمطبخ.. وسديت الباب .. وانتجيت عليه ودموعي يجرن..

تعبت رب تعبت.. دا احس بطعم الموت والله.. سمعتو شغل السياره فتحت الشباك ودحكتلو .. يا دوب يبين مخلي راسو على ستيرن سيارتو ومدنك..

بقيت ادحك عسى ولعل ينزل وما يروح.. بس فتح الكراج وطلع سيارتو ونزل قفل باب الكراج وراح..

يا اااااااالله.. دخيلك حس تعبت وابجي.. رحت للغرفه.. دخلت الحجيه توها نايمه بفراشها..

صاحت. ليليان بتي شبيج ..

ما جاوبتها.. نمت بدون رد.. بقيت ابجي بفراشي لحد ما غفيت وشهكة البجي ابلعومي واني نايمه اشهك..

الحجيه ما قابله يكعدوني كايلتلهم مريضه.. للعشره يله اني كعدت.. ادحك.شعندي هينا وشجابني وين جنت وين صرت

كاتله روحي على واحد.ما يحس.. صفنت.. واني ليش كاتله روحي..

شو اكبر مني واني الف اليتمناني .. الله ما خلق غيرو يعني.. ضعف مني لو بجيت بعد.. من اليوم الغي من حساباتي وبعد ما اريدو..

من اليوم نفسي وبس.. اي هو هذا الاحسن..

لميت شعري ورحت ولبست الحجاب ورحت للحمام.. غسلت وجهي .. الجفن فوك عيني احمر و وارم..

عفت وطلعت.. لكيت نوال كالبه خلقتها لان ما كاعده من الصبح.. وهي مخلصه الشغل..

مهتميت.. صاحتني الحجيه اكل ما اشتهيت.. كتلها ما اريد.. نظفت الاستقبال ردت اطلع للكراج.. كالت نوال نظفته يلعروس..

عاد كعدت بالغرفه ما الي اي خلك.. الحجيه تقره قرأن يمي .. واني صافنه وافكر بروحي..

صاحتني ام سعد على مود اللكط الخظره.. كمت بتململ.. دا اريد ادخل للمطبخ وانصدم صراع نزل من فوك..

بقيت شاهكه عيوني.. نزل دايخ و الوجه عصبي وتعبان.. اني مثل واحد وتصنم.. اتحلم بيه لو شلون ؟

فات وكعد ع التخم.. ويفرك بكصتو بألم.. وكال

-تحركي جيبيلي ماي

-انت مو رحت لبغداد

-ما رحت عندج اعتراض.. حجاها بنتر وهو يخزر بيه..

-هذا شبي ؟ رحت جبتلو ماي وانطيتو واني ادحك بوجهو.. فتت جاي امشي صاح

- وينج ويول ..

-هاا

-صعدي حظريلي ملابس اريد اروح للجامع..

-تمام.. صعدت.. ما اعرف احساسي شنو .. فرحانه بروجعتو و ضايجه بعصبيتو ومزاجو..

بس المهم ... ما راح

صعدت.. طلعتلو ملابسو و اصفن.. ههه .. ما راح.. معقوله على مودي .. معقوله يحبني

..فتح الباب ودخل.. اندرت..

-دشداشه مو ..

-ليليان ..

-ها

-ليش جنتي تبجين الصبح..

-شگلو يربي الا هسه يسأل .. لو سأل بوكتها يمكن من لهفتي اكلو احبك.. هسه شكول

ااا جنت مريضه و الشكر للرب.. صرت زينه..

-رفع حاجبو واابتسم ابتسامه خفيفه بتعب وكال الحمد لله انج صرتي زينه..

-ابتسمتلو .. و طلعت. شهلرجال هذا يربي ياخذ عقلي من يبتسم .. احبو.. لا احبو شنو.. الا اموت بيه..

نزلت اضحك ومرتهيه.. وتلكتني ام سعد تغلط وتعد.. ما اهتميت كد ما فرحانه.. اوووف شسحرو هلرجال بيدو ياخذلي روحي وبيدو يحييني..

دا الكط خظره.. نزل هو ... ويكلي .. بويه انه رايح للجامع.. موبايلي حطيتو فوك.. خلي ع الشحن .. ونامي عيونج مورمه من السهر..

عوفي البيت ما راح ينهجم لو ما خليتي ايدج يا مكثرها النسوان..

نوال وام سعد كلبو ووجوهم.. اني اليلزم كلبي يحسو راح يطلع كد ما دكاتو تركص بصدري..

مشى من يمي وبس عطرو يلفح بالوجه.. دحكتو وهو يمشي بطولو.. من فدوه اروح لطولو اني..

خلصت البيدي.. وركضت لغرفتو..اتنفس البروده والعطر الباقي منو احسها الجنه مالتو.. شوكت يىحمني ويحطني بجنتو ما اعرف..

اخذت موبايلو ونبش عن اللي اسمها ام مصطفى..

الرسائل ماكو.. بس دخلت ع برنامج الواتساب.. حاجي وي ثنين وهي الثالثه.. فتحت

وصعدت بالرسائل فوك.. ادزلو صور لجسمها وهي لابسه قصير .. بس ما راد عليها..

وي كل صوره تكتبلو كلشي بيه مشتاقلك شكد ما تستحي.. نزلت بالرسائل جثير حاجيه وهو ماكو رد منو ..

كاتبتلو اخر شي.. لو ما اجيت اجيك للرمادي خس بيه حيل راح اموت على شوفتك..

رادها .. انتي تعاي وشوفي.. ومخابره... دقيقه و30 ثانييه..

واليوم كاتبتلو منتظرتك تجي..

راد.. ما اجي..

رادتو .. ليش
مو وعدتني
حرام عليك واني متحظره
ابو حرب رد الله يخليك
منتظرتك اني لا تفشلني

وره نص ساعه كاتبلها.. ما اكدر اجي ان شاءالله ايام واجي ساعة زمان انهي هلزواجه وكلمن يروح بطريقو..

كاتبتلو.. يعني شنو كلمن يروح بطريقو

ما ردا.. عاد جارتها رسايل .. انه احبك ولا تتركني وتعرف حالتي وبراحتك لا تجي بس لا تنهي زواجنه منو الي

ما راد عليها بعد..

فرحت من قريت الرسايل.. الحمدلله ميريدها.. بقيت اكلب بالصور .. شكد شايف روحو شكد يصور بنفسو خاصه بالدشداشه واليشمغ..

كومه صور عندو. كمت ابوس بصورو.. قفلت موبايلو ونمت.. افكر بهاي شلون تبعثلو صورها وهي بملابس تخزي

كبر ما تستحي.. شلون ساقطه.. اول مره بحياتي اشوف وحده هيج جريئه ودز هيج صور

عجل شكد شايف نسوان هو وشكد معاشر.. هه متشوفه ما يدحكلي بنظره ومثكل روحو ..

ما ملطلط مثلي ويكتل روحو ع الخالي بلاش .. امداني .. بقيت افكر بيها واتذكر جسمها..

مو ضعيفه.. انوبه جسمها مليان.. كمت من الفراش ادحك روحي بالمرايا يربي عوده هاي شينعجب بيه حتى ما بيه شوفه.

اكل بعد هواي .. اي حتى اسمن.. هو شكبرو وهي هم ضخمه واني زرزور مهلس ..

ما نمت.. نزلت للحجيه لكيت هيام وبتها ساره موجوده ياااي .. بوستهم و سلمت عليهم..

سألتني هيام ليش باجيه اليوم والحجيه ضال بالها. كتلها لا جنت مرضه وصرت زينه.. ما راددت بعد.كالت عندج العافيه ان شاءالله..

كعدت.. وهن يسولفن... مديت نفسي اريد اخذ الريموت.. ف طلعت شوي من رجلي

اني كل مره البس بجامه جوه الثوب لان شتا وبارده بس الجو صحى.. ف كمت ما البس..

من طلعت رجلي انتبهت الحجيه لرجليه.. وصاحت .. يااا ليليان هاي رجليج ليش هيج كلهن شعر..

-استحيت.. غطيت رجليه.. وكتلها حجيه امي ما تقبل اخذ من جسمي تكول عيب البنيه تاخذ كبل لا تتزوج.

-هاي امج وين عايشه احنه هم قديمات بس هيج ما حلو هاي نظافه.. دحكي حلا بنت صراع ما بكدج وتاخذ خيط وتشير جسمها انتي شبيج يا يمه

حتى الرجال لو يشوفج يشرد من هلشعر هذا.. خجلت شرد..

هيام:- ليونه هاي نظافه ما عيب.. العيب الواحد يخلي جسمو وصخ وبيه شعر.. ما دحكتي امج فد يوم تسوي كدامج

-امي ما بيها شعر حتى اني.. شعراية جسمي ناعمه وما تبين فما نسوي كلشي.. دحكي ايدي شعرها ناعم..

بس رجليه مره شفت بالتلفزيون وحده تستخدم مكينة حلاقه وقلدتهم وسويت بمكينة يحيى

بس لزمتني ماما كتل شلون اخذت رجليه من يومها بعد ما اخذت وطلع اسود الشعر ما ناعم واشكر وخفت اخذو ..

-لا هسه ادزلج واخلي ساره تسويلج ما بيها شي انتي مثل بنيتي وتتعلمين..

حيل خجلت منهم.. شسوي امي جانت طامتني بالحياة كلشي عدها عيب وما يصير ..

البنات بكدي اشكال الوان يسوون وهي ما تقبل تكلي معليج بغيرج.. عاد شوي وراحت هيام جابتلي شيره اسمها لين بالعسل..

انطتها لساره.. وكالت فوتن جوه وعلى راحتجن سون.. طبيت اني وياها. طلعتها حلاوه شفافه ..

كامت تمط بيها بيدها.. كتلها عود ليش..

-احسن حتى تلين و تاخذ ما تضل صلبه

-خلصت مط شو الحلاوه تغير لونها صارت بنيه ..

مطتها على رجلي وشالت.. واني صرخت اااااخ .. ضلت تضحك كالت يله شوي ويخدر..

كامت تاخذ شوي شوي صدك خدرت شوي .. اخذت رجليه.. اشوف رجليه صارو بيييييض..

سوتلي رجليه لفوك.. شو شويه وصاح عليها علي.. كالت لا تلبسين.. بعد ممكمله بس اشوف علي شيريد..

كتلها ماشي.. وكفت على حيلي ..دحكت المرايا كبالي .. وكفت كدامها.. بس بالثوب قصير اللي ينلبس جوه الملابس (اتگ)

لونو اسود رياضي بيه خطين من الجوانب ومكتوب عليه استار اكاديمي بالانكليزي..

دحكت نفسي خرب بحظي عود جسمي مثل جسم هاي البلموبايل شسمنها واني عوده.. غير كووووون اسممممن.

واكفه واخصر بالثوب على جسمي واتمايل منا ومنا ادحك.بجسمي. اي بس تره حلو ابيض وبيه شوفه حتى لو عظام هو موديلها الضعيفه..

بس لو اسمن شويه اصير اخبل ... انفتحت الباب.. كلت ساره شيصير لو اسمن شويه دحكي مو اصير احلى..

اندرت واني احجي ومخصره الثوب عليه.. وصراع واكف كبالي ومتصنم ويدحك بنظرة واحد صدك ما يستحي

واني صرخت لاااااااااااع .. سد الباااااب .. هو انخبص ما يعرف يطلع ويسد الباب لو يفوت ..

كام يفتح ويسد الباب واني افتر بالغرفه على ثوبي.. جريتو ولبستو بالمكلوب دخلت ساره وصراع طلع بساع..

هي دحكتني لابسه الثوب مكلوب .. لو هاي خرطت روحها من الضحك.. واني بودي ابجي من الفشله وكلبي يدك حيل و مصخنه من الفشله.

كتله دكومي كملي كومي خرب يوم.. والله موقف وكعت بي. كامت كملتلي وكلساع تعيد السالفه واني احس روحي صرت مضحكه وفشله

شكد عيب انوب اگلو مو اسمن اصير احلى.. خررب شكد غبيه اني .. خلصنا ورحت سبحت وهو هم زين ماكو

بس ساره الفطيره ماكو واحد.ما كالتلو خالو صراع دخل على ليليان وهي مصلخه وهي لبست الثوب بالمكلوب

وامها تضحك وتكلها وج شهرتيها.. كتلها ديلا منو جدتها نفس الطينه واني واكعه بديكم

ضحكت الحجيه و غمتني وتكول فلشج كون انه ولج اشهر بيج..

-ها نسيتي من جتي عليه الشهريه جان عوزج بس اطلعين باخبار التاسعه وتكولين ليليان اجتها الشهرييييييه

خربن من ضحك واحنه كاعدين.. سوالف وعصريات وتعاليل كعك وجاي

لهناك سوينه العشا وحطينا بعد صلاة المغرب وصحنا الولد.. سعد من جت مرتو لليوم ما يتحاجون فما يتواجد ونائل بالمحل مالتو

بس صراع والحجي كعدو يتعشون.. اني ما شلت وجهي بعينو الفشله بعدها بيه.. طلعت اخبار مسلسلات تركيه..

والفنانات وحدتهن عوده.. كالت هيام عزه العزاهن كون ولا يسمنن ولا عدهن كرش شو احنه نجيب الاول ونطك وحدتنه تصير برميل حصو ..

-اني بكل فطاريه كتلها لا وينها حلوه شفايتلي لو اسمن .. مو عاد ابقى معصعصه..

شو صراع بكل ميانه يكول.. يولي حلاة البنيه بضعفها وبنعومتها خوما ثور استرالي تناطح رجلها بيه ؟! الناعمه شحلاتها

- صرت بنص اهدومي من كال هيج حسيتو يبسمرتي على سؤالي لما كلت اذا اسمن مو اصير احلى

حتى اللكمه وكفت ابلعومي لا هي واكعه ولا هي طالعه.. وادور صراع حجه وياي ويكلي انتي عاد لا تاكلين جثير لا تسمنين كومي

اني كال هيج واللكمه بلعومي شكبرها.. سويت عوووع وشمرتها بالصينيه.. وهو صاح عااااااااااع كتلج كومي مو تزوعين بالاكل ..

هو صرخ لو هم الكاعدين وكعو من الضحك الحجيه غصت وكامت والحجي يصيح مااااي وهيام كامت تبجي من الضحك ولازمه بطنها

وهذا صراع يدحك ع اللكمه الشمرتها ومعفص وجهو ويتفل صفح ويكول خرب يومج لعبتي نفسي كمت اهوع ويتفل

هو موتو ولا تسوي كدامو حاجه تقزز تلعب روحو تجز نفسو من الاكل.. ما تحمل كام وطلع..

واني بودي ابجي كلها تضحك عليه.. عاد تركتهم يضحكون.. وكمت للمطبخ.. جت نوال وراي تضحك عليه وتكلي يولي خرب يومج شسويتي بالرجال..

-شسويت حظي تفشلت لو ذابحني ولا هلموقف يتفل من وراي

-ول يابه زعتي بصينتو شتريدين يسوي

-نواااال رحمه لاهلج كافي .. شلت القوري صبيت الجاي واخذتو للهول.. بس صراع ماكو..

كتلهم طلع.. كالت الحجيه لا بالاستقبال كاعد .. شلت استكانو.. ومشيت للاستقبال .. شلون راح ادحك بوجهو يا الله..

دخلت للاستقبال .. هو مركز بالاخبار.. دنكت احط كدامو الجاي.. ومن الفشله والتوتر ارجف الاستكان يركص بيدي..

كضبتو حيل بس كربت دا احطو.. انكلب الجاي ومو ع الطبله على ايدي وعلى ثوبي وصل لرجليه. صحت اااااي..

هو فز من مكانو الله الله يابه متكوليلي شبيج ما جبتي الجاي مره اذا ما كلبتي..

-قابل متعمده حتى احتركت.. كعدني ع التخم وكمبص كبالي.. ويكلي دشوف ايدج.. احتركت..

-ايدي و وكع على رجلي هم.. كتلو هيج شو هذا بلا تكلف.. يرفع الدشداشه..

-اني حتى اوخرو .. كتلو لا عمو ما بيها شي.. وكمت انزل بثوبي .

-بس لحظه لا متأذيه اخذج للمضمد..

-ما بيه شي. حسيت لمستو لرجليه مو حلوه.. كزبري جلدي منها.. وهو يكول ول يابه اذا گيمر لا اطلعينو كدام محروم وتخلين نفسو بهلرجلين وتحترك..

دفعتو بسرعه وكمت منو بخوف.. عابت شكد ما يستحي.. شنو اكو واحد يحجي هيج.

شكد نزل من عيني كلامو يذكرني بالساقطين اليتغزلون بالشارع.. ولمساتو اووووع لعبت روحي..

زين هاي اللي تبعثلو صورها. هم هيج يكلها لو يلمسها. لا ما اعتقد.. هو رجال يخاف ربو بس هسه ما اعرف شبيه طلعت عينو مدري اني اتخيلو هشكل وهو لا..

زين هاي اذا رادني زوجه هم هيج يحجي وياي بدون مستحه لو يلمس رجليه ... اوع غير اذبحو اكش..

هذا عبد الحليم شلون جان يبوس صباح ما يكش يحط حلكه بحلكها.. من ادحكها بالتلفزيون الشغله حلوه..

بس بالواقع لا عييع.. ما اتحمل .. لا يله هو قابل الزواج بس هيج .. اهم شي يحبني وينومني بحظنو..

كل مفهومي عن الزوج كان ان الرجال ياخذ زوجته بغرفتهم وينامون بحظن بعض واذا كلش صارو رومانسيين يبوسها.. وحتى البوسه كنت اقرف من اتخيلها واقعيا وياي

ما كان عندي تطلع على الحياة واعرف شبيها.. عايشه بعالم مغلق رغم انفتاحه بالالكترونيات.. بس ما جان عندي موبايل ولا عندي اختلاط

بس ساره وهاي مثلي ما نعرف غير المدرسه والكتاب كل كلامنه عن القرايه اذا غيرنا موضوع نحجي لو بلبس او بمسلسل

رغم حتى المسلسلات التركيه امي جانت مانعتها بس مصري والمسلسل المصري محافظ ما بي شرح وعلاقات مثل الافلام..

وهذه نقطه.. تحسب الغبائي والغباء لازم يندفع ضريبتو..

لما طلعت ولد عم صراع جو .. فهو طلع كال سويلنا جاي بويه.. يدحك بعيني شكد استحيت منو.. كتلو اي

طبعا هاي كعداتهم ما تخلص يموتون ع اللمه.. ويبقون يسولفون بالرياضه و الوضع.. واكثر شي كانو حجيهم سياسي خاصه المالكي

هذا الرئيس كمت اكرهو كد ما اسمعهم يحجون بيه وابو ثرب يهمبل ولو اني بمكان المالكي والا اعدل الوضوع ولو اني ولو اني

هسه غير يكعد عريف شلتاغ هو امور بيتو ما حالها وحالو حال الحايط مو تنوب يحكم العراق.

يعني كعداتهم هاي مجرد جاي وجذب وجكاير وبس صبيتلهم الجاي.. ورحت دكيت أباب طلع صراع..

ارتبكت من دحكتو.. اخذ الصينيه مني بلا اهتمام مندمج بسالفتهم ويضحك.. شدعوه يحظي دحك بعيني ابتسم اضحك لو بس الهم..

تركتهم.. ودخلت للغرفه.. الحجيه بيها طبع الصوبه ما تفاركها ابد حتى لو الدنيا صارت زينه هي الا صوبه تكول اعضامي يكومن يصلن علي وضهري ينكصم من الوجع.

ف دوم حاطه الصوبه وتجرش راشي ودبس تيبس خبز تشوي شلغم.. المهم صوبتها يمها. وتاكل

هي كاعده بالهول بس من وراها حتى الغرفه صارت جهنم.. واني لابسه ثوب قديفه.. كمت انفخ بالثوب على جسمي واصيح الهوى ربي

اخر شي كمت طلعت ثوب قصير من اللي كنت البسهم عد اهلي ربع ردن وجوه الركبه بشويه

بدلت وگلت انام.. هسه حطيت راسي .. صاحت الحجيه ليلياااان..

كمت طلعتلها راسي من الغرفه.. هااا حجيه..

-هاي الصوبه دتطفه طلعي ترسيها نفط..

-اهووو اكثر سالفه اتعقد.منها هي سالفة ترس الصوبه.. جنت عد اهلي السان امي يوكع وما اكوم اترس هي تترس ..

احط بطانيتين واكعد اقره ادحك تلفزيون انام المهم ما اتحرك واترس .. هين تشكلت هلشغله براسي

طبيت لبست الملف مالت الحجيه مال الصلاة طويل وتطلع منو الادين

شيلبسني ثوب وحجاب هاي احسن واسرع.. اروح اترس واجي.. رحت الها.. الصوبه جانت من هاي الصوبه لونها بني يسموها علاء الدين

مو ذن الصالون اللي يصير الجلكان مالتها منفصل تاخذو تترسو وترجعو.. لا هاي لازم تاخذين الصوبه كلها..

والحجيه ما تحب ذنيج .. معتزه بهاي صوبتها تكول من جان صراع هلكدو هاي عندي مداريتها..

ادري مسجله عليها طابو دشمريها.. بس هي تحب التراث ف الوحيده بالبيت .. هيج صوبتها..

شلتها.. كالت

-طفيها وياج لا تعبيها وهي مشتغله تروح تنفجر..

-اي اي.. لفيت الملف بيدي وشلتها طلعتها.. بره بالكراج برميل النفط .. خليت الشافطه ابطن البرميل والصونده بالصوبه ما طفيت نسيت

وكمت اترس.. شوي وانملت الصوبه كام يجري النفط.. سحب الصونده مال الشافطه حيل وهي بعده تضخ نفط..

وكع النفط منها على الصوبه وعلى الملف اللابستو كبت الصوبه ولاحت الملف واشتعل اذيالو بيه..

اني من الخوف بس كمت اصرخ الحكوووووولي اااااااااااااا واطفر اريد انزع الملبس مجلبات بديه .. طلعو الرياجيل بساع

وصراع يركض حيل من راسي وجر الملف مني ودفعني للحديقه ويطفي بيها بالكاع والولد يطفون بالصوبه جابو ماي بسطوله وطفوها..

واني ابجي وفرفحت روحي رجلي انسلخت احتركت .. هم يصرخون واحد ع اللاخ وهوسه ما افتهمهم من وجعي

صراع دحكني واني بثوب قصير والولد واكفين.. چك سحاب القميص مال التراك مالتو ونزعو وسترني بيه ولمني باديه وصاح عليهم فوتو خلصت طفت امشو منا..

واني متخبله وابجي واصرخ.. واكلو احتركت متت متت وابجي.. وهو يصرخ ومنفعل وينعل يومج و اشتعلو اهلج .. ويصرخ بس ثبتي اشوووف..

دحك رجلي واني ابجي.. صاح على محمد و حرب يجيبولو عبايه و سويج السياره. طلعت الحجيه و نوال يركضن زكح بيهن عباااااااااايه جيبو عباااايه.

اجت الحجيه... وتصرخ سترك ربي جان انفجرنا سترنا الله لو مفجور البرميل وراحت البنيه شنكول وشنحجي احمدك ربي واشكرك

وهو يصرخ ثوله غبيه اكو وحده تترس والنار مشتعله ولكم انه شمسوي والله باليني بهيج وحده ثوووووله

لو محتركه وين انطي وجهي عقلج هاذ مااااااااا يشتغل.. وفوكها مصلخه كدااااام هلرياجيييييل.

ابجي وهذا يرزل فوك المي الحرك.. ردت اكوم الثيل منكع واني كاعده احس البرد وي الحرك ذبحوني

جاب محمد العبايه.. جر القميص مني وخله على كتفو ولفني بالعبايه واني ابجي وصاح حرررررررب ..

كالو اجيت بابا.. انطاه السويج وميمشيني .. شافني كوه امشي شمر السويج لمحمد كالو افتح السياره وباب الكراج بسااااع.. وشالني..

محمد من السويج داس وشغل السياره وركض فتح الباب وحطني وره.. والحجيه جانت تحجي وترزل تالي كالتلو تاني اجي وياك..

رادت اطب .. طلعت نوال وجايبه البعبايه اخذتها منها الحجيه وصعدت وي صراع.. اني احس انتهيت من الوجع..

شغل السياره وطلعنا.. راح لمضمد ع الشارع نزل يمو واني حافيه حتى ما لابسه.. دحك الشارع ما جثير ناس بي ..

شالني واخذني للمضمد دخلني محد بيه.. بس رجال جبير كالو احتركت بنفط و اتأذت رجلها..

كال كعدها.. كعدني ع كرسي واني ابجي وافر براسي واواهز بيدي حيل من الوجع واعض بيها.

الحجيه كوه تمشي كعدنا وصفينا يله فاتت هي.. كعد الرجال كبالي وهو حط معقم لو شاغت روحي ..

كضبني صراع من ايدي وحط ايدو على ضهري وسحبني الو.. وهو ينظف ويعقم بيها .. وصراع يدك على ضهري

خلصت يابه خلصت.. بس اصبري.. لحد ما لفها وضمدها روحي انتهت... راد يضربني ابره مال التهلبات.. ما قبل صراع كالو انطيني انه اضربها الها بالبيت..

تركتا يحاسبو ومشينا

مشتني الحجيه حافيه.. صعدنا بالسياره.. اجه هو .. وركب.. وانطاني علاج كال هذا مسكن الم والثاني مال التهابات

وهاي عصاره مال حروق وباندج يوميه غيري الجرح.. وبالبيت انطيج الابره. رجعنا للبيت .. تلكانه الحجي ها شلونها

كالتلو الحجيه عدت على خير الحمد لله..

عاد نزل الحجي رزاله وليمتى تضلين ثوله وشبيج ما تنتبهين.. وام سعد وياه تكلو عمتها كالتلها طفي الصوبه وترسي بس هاي عرمه ما ترد..

واحد يرفع والثاني يكبس.. واني ابجي وما احجي.. دخل صراع كال ها .. سمعهم يحجون...

اندارلو الحجي وكاله والله يا يابه الله يساعدك بلوه هاي و زتها الله على راسك..

اني زدت بالبجي.. كالو لا ليونه خوش ليون لا تحجي هيج حجي بس هي شوي تنسى ..وتتعلم ان شاءالله..

اجه اخذني جوه ايدو وباس راسي وكال الحمدلله على سلامتج بويه..

ام سعد:- ما يصير هيج دام غلطت لزوم ترزلها حتى ما تعيدها بعد..

-شنو سالفتكم ما طلعت هاي .. مصيبه والله دفعها والحمدلله عدت على خير كولو يا الله..

لو مفجور البرميل جان كلنا متنا والله دفعها ومشت غلطت واحتركت ودرس الها تتعلم منو بعد وعرفت غلطها وين..

كومي بويه لغرفتج نامي كومي.. اندار النائل وكالو.. نائل باجر جيب ذبيحه لوجه الله تعالى جراية دم عنا وعن البيت ووزعها للفقره.

-تأمر ابو حرب

صراع ونائل اكثر مصرف البيت عليهم.. سعد عندو فلوس متلتله وعندو مولده والناس كلها تسحب وخير وهو جلف ميطلع الربع كوه ياخذون منو

بس نائل و صراع يصرفون ع البيت ما يديرون بال لشي ف كل مسؤلية البيت متعلكه بركابهم..

نائل عندو صيرفه ويشتغل وي خالو بمعرض سيارات وصراع عريف بالجيش وعندو اسهم بمول ابغداد ويشتغل شريك بعماره وشقق وي صديقو ايجارات..

.....دخلت بغرفة الحجيه وتمددت .. فات هو وراي والحجيه واكفه على راسي.. تكلو يمكن سخنت شو صارت حمره البنيه

كضب راسي كاللها زينه حرارتها.. من الخوفه بعدها بيها.. ديري يابه خل اضربج الابره..

-ما اريد اريد انام

-خل انطيج تسكنين واطيبين بساع يا بويه دكومي

الحجيه:- تستحي يمه اتركها باجر تجي هيام تضربها الها

-يمه لازم تضربها هسه.. باجر شنو دديري يا يابه راح ناكلج خوما راح ناكل لو ما اليوم كشفنا المستور

-هو كله من وراكم احتركت . شبيقيتو بيه ناس صلختني بالشيره وناس بالجي وكملها النفط عليه موتوني وخلصو مني عليش مبقيني بعد

هو يضحك وبس الكتاف تهتز بضحكتو.. كتلو اضحك شعليك كله من وراك مو كلت هلرجلين كيمر ضلت بنفسي .. واحتركت

خزرني ويصيح ليليااان.. والحجيه ضحكت .. وغمتني .. امداج يلمفضوحه..

-انتي ما تعرفين تخليلج سالفه مستوره شلون اكصو للسانج وافتك.

درت وجهي.. ونمت والحجيه تكلو اتركها يمه.. خليها باجر تجي هيام وتضربها.. ترك وكال بس خل تشرب الدوه

اروح اسبح ريحة الدخان والحرك بجسمي جيفتني.. هو طلع والحجيه انطتني دواي ونمت.

لهناك ودخل هو .. اني غافيه بس سمعتو يحجي وي الحجي

-نامت

-اي خطيه فرفح گلبها من الحرگه تلوج لحد ما نامت

-تقرب مني.. مسح على شعري ولمه الشعر ليوره.. ودنك باسني بكصتي و بخدي .. وغطاني ويكول انوبه هي مصلخه يربي شتحجي بطرك هلثوب المشلتح..

زنودها ورجليها صارت فرجه للرايح والجاي بالله لو ما محتركه جان انه حركتها على منظرها هذا جدام ولد عمي بهلثوب...يتبع

☆☆☆☆☆☆