ليتني استطيع فعلها الحلقة (9)

بواسطة -


ليتني استطيع فعلها



الحلقة  (9)
شريد انه ؟
غير اصعد سفينة نوح
وابدي بكاع غير الكاع !
وابدي بناس غير الناس !
وابدي بوحدي متنازل عالوشالة
كضيت جروحي مجرورة على ظهري حبل
صبري انكطع و الصيت عتاله
اشد ياهي و الم ياهي ؟
وعلى جتافي اثر و حزوز جتالة
بقيت لوحدي احب روحي
انا الماكو احد بحالة

للشاعرة  هراء عباس الدليمي
.................
كام من مكانه اشر للحماية مالته يطلعون .. وكال الها :- كدامج ١٢ ساعة بالضبط لو تودين هذه المريضة لابوها لو تاخذين جهالج واطلعين من البيت فورا
ميعاد:- فدوة ابو نور ابوس ايدك اسمعني
ديار:- جاي يطردج تبوسين ايده ليش كافي تذلين بينا كاااافي خل يولي
ضربتني راشدي ووكعت عليه ضرب باديها و هي تدفع بيه جوا : كافي مرمرتيني كاااافي صمي حلكج
اجيت احجي حطت ايدها على حلكي :- كلمة ما تحجين اكعدي يم اخوتج و لو سمعتلج صوت ادفنج
... عافتني و طلعت
وسمعتها تحجي وياه و هو كأن ما يسمع
اخر شي عافها و طلع
رجعتلي و هي تمشي بهمة، لزمتني من فكي :- ارتاحيتي هسه ؟ من طردنا بالشارع استفاديتي
ولج عذبتيني ديار ولج اكتل روحي من وراج شسوي فهميني شلعتي گلبي الله لا ينطيج
بعدت ايدها مني و دفعتها و كمت :- خلصتينا من ابوي حتى تجيبينا هنا انت وياه بنص البيت، شجابرنا فهميني
-ولج وين نروح حيوااااانه
-كاع الله شكبره ما مجبورين نكعد الا بالمنصور شوفيلج مكان و خل نشيل منا و اني ادور شغل حتى لو اطلع اجدي بالشارع و لا نعيش هنا
-بت الفكر بيا فكر اشيلكم وين اوديكم اكعدكم بخرابة
-نكعد بخرابة بشرف ولا نكعد بقصر و احنا ناقصين شرف
ضربتني راشدي:- صايرة صلفة و تتجاوزين
-لا عاد تضربين ما اسمحلج و هذا مو تجاوز هذا حقيقة ليش الحقيقة تضوجج واذا تضوجج ليش مستمرة بيها
بجيت ....:- كافي ماما الله عليج فكري بينا بسمعتي بسمعة ابنج باجر يكبر ما يعيرونه بيج ... خلي نشيل منا ايجار ب١٥٠ و مصرفنا ١٥٠ ولا هاي العيشة
ماكو احد يموت من الجوع
بقت تفرك بوجهه، كعدت ع السرير :- مفكره الموضوع سهل ؟
-مو سهل بس احسن من الوضع اللي احنه بيه، نخلص من ابوي تجيبيلنا هذا ؟ مستعدين اني و اسامه نترك المدرسه و نفتحلنا بسطية و نساعدج بالعيشة ولا تعيشينا بهذا الذل
بقت تاخذ نفس و تتنهد :- والله يا ديار شلعتي گلبي ، نامو هسه اشوف للصبح شلون تنحل الله كريم ارجعوا لفراشكم يلا
كامت وصلت للباب، حاولت تعدله ثكيل ما كدرت :- راح اطفي ضوا الهول عوفو الباب الصبح نشوف شلون نعدلة نامو
مشت و اثار راحت وراها
تقرب اسامة :- ديار شصار ليش هذا يريد يكتلج؟
ديار:- اسكت اسامة عوفني روح نام
... تمددت بچربايتي و تغطيت، افكر بالموقف و جسمي نار يرجف .. نص ساعة اكل بروحي اكل
اني خلصت من بابا اجي لهذا شلون يعني ما مكتوبلي ارتاح
تذكرت موبايلي عفت خالد ع الخط، كفيت الغطا و شفت جهازي مشمور ، باوعته كلشي ما بيه .. خالد قاطع الأتصال من يمه اكيد سمع كل الصار
بقيت هواية افكر
ساعة اكول انهزم و خليها تعيش اخواني
و ساعة اكول لا عيشتيش تعيش اخواني اجبرها تطلع منا احسن .. و ارجع اكول وين نروح ... و تبقى افكاري توديني و تجيبني
لحد ما نمت ....
.........
خالد :- كاعد بالأستقبال جوا استمع لعركة ديار و صاحب امها فاتت ضحى علية، تخصرت كبالي و وكفت
ابتسمت، وخرت الموبايل من أذني و قفلت الجهاز
كمت من مكاني، حجت :- ضحك و سوالف تالي الليل و من احجي تكول تشكين
مو كافي
-اي صح كافي و لهذا قفلت حتى نصعد
-خالد راح تخبلني
عفتها و مشيت للغرفة اجت وراي
ضحى:- لا تخليني احرك روحي
-اذا حركتيها شراح تستفادين ؟ تجي غيرج تصير ام لبناتج و انت جوا التراب، تسوى ؟ .. لج يخبله شبيج والله ما عندي شي وياها
-ما عندك شي و سوالف و ضحك راح تسودني
-خابرتها اطمئن عليها وضعها مو تمام
-و انت شدخل بوضعها
-صح ما الي دخل بس البنية ما الها احد ما بيها شي لو وكفنا وياها ترا الناس للناس
-اوف ربي اوف شوكت الله يخلصني من هالمشوهة و افتك مليت
... سحبتها من ايدها و كعدتها بحظني:- اول شي عيب و حرام تحجين هيج شي عليها، خافي الله لا يكلبها بيج بحادث واحد تصيرين مثلها تقبلين كلمتج تنكال عليج ؟ ....لا
ومن ثم ابشري راح تخلصين منها
- شلون ؟
-راح ازوجها
-يممممممة غير اكطعك والله
-يا خبلة جاي اكلج ازوجها مو اتزوجها عقلج الحلوة شغلي وياي
-والمن تزوجها
-كلت بما انو انت تحبيها كلش، ازوجها لأخوي رائد ااصوب بانفجار و تفيده و هم منها تكابلج انت و امي وسون حلف عليها و نكلب البيت طاخ و طيخ
-يا فدوة والله عمتي غير تهججها بليلة ظلمة، رائد الجنة كمر تزوجه لديار
-اي وشبيها مو هسه اني متزوجج ؟!!
كامت مني متضايقة، ضحكت ضحكة عالية :- اتشاقى وياج والله مفكر ازوجها لاحد ابالي
-منو هذا اللي ابالك
-شعليج ؟
-هسه يطلع انته نفسك تزوجها و تبعدها
-اي جائز ليش لا الله حلل ٤ ما بيها شي
ضحكت و انداريت جريت الغطا و نمت و هي بقت تكمز ....
.........
ديار:- عبرت الساعة ١٢ و احنا نايمين ،فزيت على صوت الموبايل و هو يدك ، شلت راسي و رديت :- الووو
امجد:- هلا ديار شلونج
ديار:- هلو امجد هاي انت
-اي احنا بالمنصور و جايين عليكم وين انتم
-والله ما اندل
فزيت من مكاني امشي: لحظة اسأل امي
رحت صعدت امي ماكو بالشغل
:- هاي امي طالعة خابر عليها و اخذ العنوان
-ماشي ماشي يلا روحي
نزلت اثار نايمة يم اسامة و الكل نايم امي طالعة للشغل، كعدت بالهول فتحت التلفزيون خليته على قران و فتحت البردات و الباب حتى يتهوى البيت
شوية و خابرتني ماما :- ديار لملمي البيت خاف اكو شي عيب امجد و مرته جايين وديري بالج تزلكين بكلمة كدامهم كل سؤال جاوبي ما اعرف افتهمتي ؟
-اي
-طلعيلهم ع الشارع حتى يشوفوج و وصليهم للبيت يلا نص ساعة و اني يمكم
-ماشي
قفلت الخط، لملمت البيت و ع السريع طلعت للشارع انتظرتهم، رد خابرني امج. انطيته اسم المطعم اللي براس فرعنا كال: عرفت اندليت
خمس دقايق و جاي خطية و جايب النا ثلاجة مشتريها هو و مها عبالهم ما عدنا اثاث و عود يردون يساعدونا
وصل للبيت نزل الثلاجة هو و السايق مال ابو التكسي، و حطوها بالبيت
سلمت عليهم و بوسوتي و تحاضنة و شلونكم و شخباركم
امجد:- زين زين البيت مبين توب
... دخلو للبيت و تفاجئو بالأثاث
مها :- ياا هاي مأثثين و مشترين حتى ثلاجة عزا و احنه اشترينا ثلاجة كلنا خطية خاف ما عدهم
ديار:- لا ماما اثثت البيت
امجد:- اثاث البيت مو شوية منين جابت امج حتى اثثت كل هذا
-ما ادري يمكن قسط
مها:- حتى لو قسط يمعودة هاي الثلاجة اشتريزاها الكم والله بالقسط اخذتها ب٦٠٠ الف .. قابل هي هينه بس تريدين الصدك سالفة تصفن كل هالاثاث و البيت بالمنصور امج منيلها كل هذا
امجد :- تعرف احد ؟
-هي و صديقاتها
امجد:- ما اقتنعت المهم اشلونكم شخباركم شكو ماكو
-والله زينين بس مشتاقتلكم
مها:- الله شاهد شكد مشتاقتلج اسألي امجد.يومية احجي بيج عاد كتله طك كلبي خل ناخذلهم هدية نساعدهم و هم نشوف ديار و نندل البيت
-هلا بيكم والله فرحت من اجيتو تدرون اني بودي ارجع وياكم هتا كلش ما حبيت مو مثل هناك بالدورة و الناس و الجوارين و المنطقة
امجد:- هلا بيج والله تعاي نخليج بعيونه
دنحجي و فاتت ماما ، بنطرون و تيشيرت و الشعر منثور و سلمت عليهم .. هم سلموا و استغربوا الوضع
بقوا يسألون ماما .. ماما تجاوبهم اجوبة مختصرة ما حبوا يدخلون .. شربو جاي وطلعوا
تفشلوا لان جابو الثلاجة و احنه ما محتاجيها رغم ماما تشكرت منهم هواية
... ودعناهم وراحو و دخلنا للبيت، حجيت :- جان لبستي عباية ودخلتي ترا مو حلوة طبتج عليهم هيج
-اذا الباب كبال الهول منين اجيب و البس ؟
-جان رمشتي دزيتي رسالة عل موبايلي و اني اطلعلج اثار لو اسامة ، انوب شكد فشلة لما سألو ع الأثاث ادور جايبين ثلاجة
-يلا يمعودة شصار،تسوكت مسواك للبيت دخلي و عزليه
-مسواك ليش ما تعرفين الواء مالج انطاج مهلة ١٢ ساعة لو اطلعين من البيت لو اطرديني ، بس يمكن مفكرة اطرديني و تضلين لان مو ابالج اطلعين
-شجاي تمسلتين انت ابيع ضناي ودم گلبي على واحد من الشارع ، يمه بيوت الدنيا كلها ما تعادلكم بس لا تخافين على امج رب الفريت راسه و خليته يأجر و يشتري كل هذا ما تصعب عليه هالشغلة بس اوعديني بعد ما تتصادمين وياه
-لا يفوت للبيت واني ما اتصادم وياه
-ولج مخليته ابالي نتزوج
-هذا مو مال زواج
-يجيج الصافي انت بس تفرجي ..
-اتفرج عليج و انت بين اديه هيج وضع والله ما اتحمله
-ديار ليش محسستني جنه بالجنة و هنا اختلف وضعنا ؟ لو ما جنتي ابيت ابوج اتعس الكرصة كوة نحصلها ابوج مخلص كل مصرفنا ع الشرب ولا انت انت ماخذه راحتج و اني وضعي نفسه
هسه حظرتج تحسستي
-والى متى
-ما الج علاقة
.... صوت سيارة صفت بالباب، اندك الباب
ميعاد :- فوتي جوا و اسحبي اخوانج
طلعت للباب، طلع عصام دخل للبيت و كعدته بالاستقبال:- اسمعي ميعاد اني كلتلج كلام البارحة و خيرتج و رايد اسمع جوابج
ميعاد:- اسمع يا رجال اذا جان ابالك افضل شي على جهالي تكون غلطان اني ام و مستحيل اكدر افرط بواحد من اولادي بتج جانت او ولد
و انت مشكور و الله يزيد نعمتك ما قصرت، اجرتلنا و كعدتنا بس اني جنت واضحة وياك من البداية و كلتلك كذا وضع بتي و هيج تعرضت و هيج صغير و هيج صارت ما جذبت عليك
-بس مو الهالحد ميعاد
-لا اكثر البنية تعرضت للحرك و هي طفلة و تعرضت للاغتصاب من اقرب انسان الها و العالم و الناس يكومون يكعدون يكولولها المشوهة شتريدها تطلع ملاك ؟
وبعدين انت شفت بعينك راحت بلغت على ابوها بدون خوف ولا تردد شتتوقع من بنية بهالعمر تزكف كدام الشرطة و تحجي ؟
وغيرها رادت تكتله بسجينه لو ما اني متلاحكتلها و غيرها و غيرها هاي ديار شسوي ؟
-اذن البنية تحتاج ان ندخلها مصح عقلي
-بتي مو مخبله ابو نور و انت مشكور و زاد فضلك بس ما مجبور بينا اني كلتلك من البداية اني مرة وحيدانية و هذا وضعي وردتك سند استند عليه بس هاي بعد مع الأسف شنسوي
المهم اني طامعة بكرمك و اطلب منك مهلة شهر اشوفلي بيت و امن وضعي اني و جهالي و ننتقل من هذا البيت ادلل
-بصراحة ما اكدر ... اني خسرت بهذا البيت هواي و اني ما رايد افرط بيج راغبج بس بتج اعذريني
-انت الدكيت صدرك و كلتلي عد عيناج و الزلمة لو وعد و خلف زحمة و ما اتوقعها تطلع منك اعرفك زلمة حوك و بألف زلمة و بالعافية اعلى الحاويتك هنيالها بيك
....... بقت تحجي وياه فرت راسه فعلا و طلع عاف الموضوع .. ما تصالحو بس ما طلعها من البيت انطاها مهلة شهر
ديار :- راح ادورين بيت ؟
ميعاد :- طبعا لا . اعوف هذا البيت وادور زبايل ليش ؟
-ومنين راح نجيب ايجار ٨٠٠
-هو يدفع
-مو انطاج مهلة شهر
-شهر مو يوم ، و هي الدنيا تتغير بين اليوم و الثاني شايله هم لشهر .. لخلي حتى رجلي يبوسها و شكوله يكول امرج
-انت شلون هيج مسيطرة
-ولج يمة ذولة الزلم سالفتهم سالفة .. يحبون المرة الضعيفة و بنفس الوكت يعشكون القوية
يحبون التجذب عليهم و ادلعهم هواي حتى لو يدري هي تجذب عليه المهم هي ادلعه و مرتاح .
ما يحب النكد بس يحبها ٢٤ ساعة مشغوله بيه ومحسسته ما عدها شغلة و عمله غيرة
واهم شي النفخ
الرجال يحب النفخ .. من تكليله انت زلمتي و انت سندي و انت و انت و ماكو منك و تكعدين تصبغين بيه يحس روحه هو ولا عنه ..
ويا شوية دلع و خشلعة و ع المرام
يكعد وزون ويصير محبس هنا
واشرت على اصبعها
.... يمكن لو اضل كل عمري ما اكدر اسوي التسويه امي ما ادري ليش ما طلعت عليها، بس اكره هيج امور واكعد اتزين حتى اعجب رجال و اخليه يحبني
اصلا ما احب اتزين ولا بعمري اهتميت بنفسي
.... باوعت اجت رسالة على موبايلي فتحتها مكتوب بيها (ما عرفتوة خبر عن اخوج اسامة و اختج ؟ )
رجعت الرسالة (منو انت؟)
اتصل، كمت من مكاني رحت للغرفة جوا، دست رد :- الو
اسماعيل:- اخوتج ما عرفتي اخبار عنهم ؟
-انت شرايد من عدنا ما كافي اللي سويته
-اكلي ****** و جاوبيني
-لا ما لكيناهم بس كافي من عدنا بابا والله تعبنا منك المفروض هسه احنا نحتمي بيك مو نكعد ننذل لهذا و ذاك حتى نحتمي منك
-العرفته امكم ماخذتلكم بيت بالمنصور
-هذا الهامك ؟
.....دخل اسامة :- ديار تعاي سويلي التلفزيون
ظميت الموبايل ع السريع و خزرته واشرت :- رووح
راح رجعت الموبايل، ابوية يحجي:- وتضمون عليه جلاب عرفتها امج المهاخذة الجهال و تمثل علي بس كليلها وين تروحين مني
-دكافي تهدد ملينا منك حس على روحك لعبت روحنا ما نخلص منك يعني، وهلي يكون بعلمك امي راح تتزوج واحد لواء بالجيش وهسه كاعدين ابيته يعني بس تتقرب من عدنا لا انت ولا جماعتك يمردكم مرد
وهو يصيح ويرزل قفلت الجهاز بوجهه
:- شكد قذر يا الله ماكو هيج قذارة الله ياخذه ويخلصنا منه
كمت من مكاني رحت كلت لأمي على تهديد ابوي، كالت:- عوفي يمسلت وحده خيولي
الجاي افكر بيه اريد اروح لهناك لمدارسكم و انقلكم هنا
-هو غير نستقر يالله منعرف احنا للسما لو للكاع هم تنقلينا و يشيلنا و نرجع ننقل
-منو يشيلكم ماما اكبر شارب ازينه بكعب قندرتي انت بس اصبري عليه و شوفي ..
اووووه
مليت من اسلوبها عفتها و مشيت للغرفة فتحت تلفزيون و كعدت ، دك موبايلي
باوعته ...خالد
كلبي يفز من يشوف رقمه يكوم يدك بطريقة مو نظامية ، عدلت كعدتي اخذت نفس و دست رد
ديار :- الوو
خالد:- هلو ديار
-هلو خالد
-شلونج اليوم ظل بالي البارحة العركة جانت حامية
-خير امي و انطاها مهلة ١٢ ساعة لو توديني لأبوي لو تطردني من البيت
-هلوووووو هاي بدايتها، اي وبعدين ؟
-امي تگلي لا تفكرين خليها عليه و معليج ،اجا حجت وياه و اخذته حاصل فاصل و طلع
-امج واثقه من روحها هواي
-كلش حتى كمت اخاف من ثقتها هاي او لعبت نفسي منها
-ديار نحجي الحق ؟
-اي ؟
-ما اعرف انت ليش مستغربة و متضايقة من الموضوع بس السالفة مو جديدة جانت ابيت ابوج وعدها رجال و ما تكعد .. هسه شنو الاختلاف
-والى متى نبقى هيج
-تعدي هاي الفترة و گليلها هالموضوع هسه الوكت كل مو وكته .. جنتي ابيت ابوج اتعس عي من صفحة و ابوج سكران و عايشة بخوف منه و اللكمة حسرة عليكم ..
هسه الوضع غير بيتكم زين اكل شرب غرفكم وضعكم تغير ابوج ابتعد .. بقت بس هي ... عدي يا بشر
لا توكفين ع المواقف تريدين تنتقلين من المستنقع الجنتي بيه للجنة كبل ترا ماكو هيج شي العافية درجات
-ما جاي اتحمل
-لا تتحملين
-انت البارحة حجيت كلت اني مستعد اخلصج من كل هذا
-الخلاص اللي اريد اكلج عليه صح تبتعدين بس يراد منج قوة و تحمل مسؤلية
-شلون يعني
-اول شي خل اگلچ شي اني ضامه عليج
-شنو هو ؟
-سلمان بخير و عد واحد اعرفه
-اااااالله عليك دكول والله
-والله العظيم
-شلون ؟
-هاي الشلون سالفتها طويلة
-اسمع اسمع احجي كلبي نار عليه يومية ابجي عليه واحس اني السبب بوضعه عبالي اخذوه
-هو بيوم الخابرتي وكلتيلي على سلمان، شفت عباس ابن ام الحصة كبالي و كلتله اريدك تساعدني بالموضوع سلمان بخطر ولازم نبعده
فاخذنا و خليناه بالمخزن مال الحصة التومينية صار ايام و جاي اندورله شغل بمكان بعيد حتى نبعده
-وليش ما كتلي
-كافي اللي انت بيه ما ردت اشبك موضوع بموضوع .. بعدته عنج و بعدتج عنه حتى اثنينكم ما تتأذون
-اي و هسه شلونه
-بخير ياكل و يشرب و ينام
-الحمدلله رب العالمين والله فرحتني
-ديار تتزوجين سلمان ؟
بعدني بفرحتي صدمني بهالكلام :- شنو ؟
-الصراحة اريد اوفق بيناتكم و ازوجج السلمان هم انت تخلصين من وضع امج هذا و هم هو يصير عنده بيت و عائلة و تبتعدون
-اني اتزوج سلمان !!!
-وشبي سلمان ديار ؟ رجال و شاغول وگلبه طيب صح شوي عنده رعوصه بس ما بيه شي الرجال مو بيده كل الصار بيه قدره هذا و من حقه يتزوج ويكون عائلة
وازيدج شغلة .. هو عنده حق ابيت ابوه ورث فأذا اخذتي ورث ابوه و فتحتيلج بيت بعد لا تحتاجين امج ولا ابوج تعيشين حياة خاصة بيج بعيد عنهم
-مرت ابوه وقعته على اوراق واخذت كل حقه وجانت تطرده يومية ما اله كل حق
-اوراقيش يمعودة انت، ليش هو بالعراق اكو قانون حتى تفيدها اوراق ؟ امشي بيها عشائريا و انطيهم كم مليون من باجر يخلوها تزوعلج حقه على داير مليم شبيج انت ؟
-اني شفتهم بالعشاير و هالسوالف ما ادري
-لا تخافين احنا وياج و ندليج الطريق انت بس اخلصي من امج و مستنقعاتها، و الموضوع راجع الج طبعا هاي حياتج و انت اعرف اني بس ردت افيدج بهالموضوع لا اكثر
بدال ما تبقين عد امج و سمعتج رايحة و مذلوله جوا اليسوى و الما يسوى ، اخذي سلمان و عيشي بجاله عيشة شريفه
-ما ادري شگلك يعني ما اعرف ....
فقدت كل الكلام ... ابالي غير افكار و غير احلام
ما جنت متأملة ان هو يتزوجني لو يعرض عليه الزواج بس اني بيني وبين خيالي هو فارس احلامي و ليل و نهار افكر بيه صدمني حيل من كالي هيج موضوع
فارس احلامي الاحبه يزوجني لواحد عقله مو تمام و اعرج، استغفر الله مو انتقص بس مو هو البالي و لا هذا الاتمناه خيالي و عقلي غير
خالد:- ديار اني ما رايد اجرحج بس اكو كلمة لازم تعرفيها، كل اللي جاي يصير بسلمان و الخطر اللي يدور حواليه هو بسببج الولد جان عايش على حب الله كافي عليه مرت ابوه اجيتي انت خليتي يبلغ على ابوج و يعمي على روحه
صح غلطتي بس اغلاطج لابد تتحملين نتيجتها و عواقبها .. المسؤلية عليج هسه تاخذين سلمان و تبتعدون من بغداد احسن و تروحين تعيشين وياه تسندينه ويساندج
ديار:- قفلت الخط من خالد حتى ما عرفت شجاوبه
صفنت ويا روحي ، كمت للمرايا اباوع نفسي
اني مشوهه و وحدة مريضة نفسية ووجهي اي واحد ما يباوع بيه بأي حق اتحلم لو افكر اتزوج واحد حلو ومواصفات و صاحي ؟
اني طايرة بأحلامي و خيالي بعيد بس تبقى احلام و الاحلام وردية و الواقع اظلم و تعيس
اصلا اليناسبني سلمان بهذا الوجه شريد اخذ ملك جمال يعني اكيد محد راح يرضى بيه لو اضل بايرة على كلب امي لو اسوي اللي كاله خالد و اتزوج سلمان و اخلص
ما اعرف ليش دموعي جاي تنزل و گلبي رافض هيج افكار و باقي عايش بوهم انو يجي يوم و واحد يحبني واحبه و بمواصفات خيالية ..
يعيشني ابيت و يعوضني عن الفقر الشفته عد اهلي و العذاب و نقص الاهتمام
احلامي مثل المرايا الصافية جانت و الواقع طلقة صابت هذه المرايا وتحطمت كل هالاحلام فوك راسي لكلام خالد
كعدت بالكاع افكر و راسي داخ
فاتت امي :- ها شو كاعدة هنا شبيج ؟
استغربت :- جاي تبجين ؟ شبيج ماما احجي
كعدت كبالي ،حجيت :- يعني ماكو علاج اتعالج ؟
-شنو ؟!!!
مسحت وجهي وعدلت كعدتي :- هيج ماكو شي
-شصاير ؟
-خالد خابرني و كالي شغلة
-شنو هي ؟
-لاكي سلمان
-واحنا شعلينا بسلمان ؟
-حجه وياي يگلي ليش ما تتزوجين سلمان
-سلمان !! شنو سلمان و تتزوجيه ؟
-يكلي اله حق ابيت ابوه و عشائريا تكدرين تاخذين حقه وتفتحين بيت و تعيشين و هو خوش رجال و شاغول احسن ما باقية بين امج و ابوج
عدلت كعدتها :- ولج صدك تفكيره كلش خوش فكرة، سلمان جان يجيب ويحط بأيد مرت ابوه غير راتب الرعاية الاجتماعية مالته اللي ماخذتها حليمة وبيت ابوه
ولج صدك اذا تزوجتي تعيشين
-شلون اعيش معقوله اتزوج سلمان
-الرجال ما يعيبه شي
-واني المعيوبه مو ؟
-مو معيوبه بنيتي بس انت و سلمان تقريبا وضعكم متشابه ، هو ما نولد معوق ولا انت انولدتي مشوهه كل واحد مر بظروف اذته حيل فليش ما تخلين جرحج على جرحه و تتوالمون بدال ما باقية هيج
-هيج شلون يعني ؟ اني اريد اكمل مدرستي اريد اوصل عندي احلام و طموح
-المدرسة مو كلشي يا بتي خلي نعيش والله كريم ع الطموح و الاحلام، عدج رقم خالد ؟
-شتسوين بيه ؟
-احتاجه انطينيناه ضاع مني
... انطيتها رقم خالد و صعدت فوك تخابره ، صعدت وراها
خابرته، رد :- الو
ميعاد:- هلو خالد شلونك
-ام ديار ؟
-اي اني، حجت وياي بتي بالموضوع الكلت الها عليه
-بخصوص زواجها من سلمان ؟
-اي
-انت تضمن الولد
-اضمنه شلون يعني ؟ هو ابن المنطقة و حالي من حالكم اعرفه بس ردت اوفق بينهم بدال ما ظال هيج وضعهم وخاصة ديار هي السبب بهالوضع
-اني اشوفها خوش فكرة و زينة هم استر على بتي و هم امنها يم واحد خوش ولد و نعرفه
-ناقشي ديار و شوفي رأيها حتى اذا اقتنعت نحجي ويا ابو امجد و ننطي خبر لمرت ابوه و عمامه هم نوديلهم علم .. ونمشي بيها
-ان شاءالله ان شاءالله سلملي على امك هواي
-يوصل، مع السلامة
كعدت امي كبالي وبلشت حجي و هي تقنع بيه وسوته اليه الملاك المنقذ .. لليل و هي تحجي وياي الى ان صعد اسامة يركض كال :- ماما ماما هذا الرجال الأسمه عصام جاي بالباب
فزت من مكانها :- كومو بساع فوتو جوا لغرفتكم ما اريد ولا نفس يطلع
نزلتنا و سدت الباب علينا و مشت
اسامه :- ديار منو هذا اليجينا يومية و شعده جاينه ؟
-هذا ابو البيت
-يعني راح يعيش ويانه ؟
-بعدين افهمك اسامه هسه اسكت مني ما الي خلك
كمت من مكاني و طلعت من الغرفة هم بالاستقبال كاعدين .. باوعتهم هي كاعدة دايره وجهه و هو يحجي وياها ويتعذر
ميعاد:- مو شغلة زعلانة منك بس خيبت ظني جزت حاسبتك سند و حزام لظهري و عفت كلشي هناك و اجيت هنا معتمدة عليك بس انت خيبتني
عصام:- ما خيبتج ولج وحك الخلقج اعشك تراب رجليج بس السوته بتج مو شوية تدرين لهسه مرتي كالبة الدنيا بالبيت و اني عايفها و جاي اطلب رضاج
-اني احبك و كلبي ميت بيك و فلا حلى رجال بعيني مثل ما انت حليت زلمة معدل و شهم ووكفت وياي بس اني ما جذبت عليك هاي بتي شسوي قابل اشمر ضناي لو شكد ما احبك عصام بس ذوله جهالي و اني ام
-افتهم و اني جاي هنا نفض الزعل البيناتنا تعبان شبيج ليش هيج دايرة عني
انداريت علي، سحبت ايده ودخلت بحضنه باست صدره و حضنته حيل :- اوعدني بعد ما تخيبني و تأذيني مثل ما سويت اليوم
حجتها بدلع و هي مدمعه، باس كصتها و عصرها بحضنه و يكلها :- سبي هلي لو اذيتج بعد ولج اخذتي عقلي شغل ما عرفت اشتغل اليوم و اني مزعلج كلت اذا ما اروح اخذها بحضني ما ارتاح
-شوكت نعقد
-اني لو بيدي باجر بس غير عدة بعدج ما مخلصة
ديار...... اباوعهم هزيت بيدي
عفتهم و كعدت بالمطبخ:- حتى امي احسن من حظي على الاقل حابها واحد ضابط وميت عليها و حتى هو حلو و هيبة و شخصية مو اني المشوهه اللي مو من حقي كلشي ..
سويت اكل لأخواني و دخلته للغرفه اعشيهم بس ما اكلت عقلي مشوش ونفسيتي صفر
صح المفروض اقبل بسلمان بس الصعبان عليه هي احلامي و تخيلاتي الجنت اتحلمهن الواقع كلش ظالم
كملوا اكل وشلت الصينية اغسلها بالمطبخ سمعت اصواتهم و هم يضحكون لعبت نفسي
:- مستعدة اتحمل سلمان و كلشي بيه ولا اتحمل العيشه ويا ذول لان اخاف اطك بعقلي و اسوي بيهم جريمة و ابتلي
...لليل واني افكر حتى النوم ما اجا العيني
اخواني ناموا و البيت هدووووء تقريبا الساعة ب٣ بالليل
طلعت للكراج كعدت الجو حلو و بيه شوية برودة و اكدر افكر براحة اكثر احس البيت حبس على انفاسي
كاعده و صافنة بأفكاري، فويت على صوت ....
عصام:- اليوم عاقلة
ردت اكوم من مكاني
عصام:- اكعدي اكعدي اريد احجي وياج
-ما عندي حجي وياك
-لا اني حابج ورايدج ولا انت حابتني ورايدتني و اثنينه ما طايقين بعض بس اني احب امج ورايدها
-و المطلوب
تقرب مني، تنهد :- امج سولفتلي على هذا سلمان و سولفتلي ع الموضوع
-شرايد
-اني اوعدج اذا طلعتي من خياتنا ورحتي تزوجتي امج راح تعيش مرتاحه و ما راح تحتاج الشي
-بالحرام ؟
-لا ابالي اتزوجها بس انت وياها مستحيل ما اطيق اشوف وجهج بالبيت منكد عليه كل الموضوع
-شوف احترم نفسك احسنلك تره ولا اني طايقة وجودك .. واذا ساكته اليوم فلأن راسي مشغول ... بس اذا تتزوج امي احاول اتحملك
-بس اني ما اتحملج ما يهمني تتزوجين او لا .. بس اني بهذا البيت ما اريدج تروحين لابوج تتزوجين تنتحرين وين ما تريدين ولي بس عوفينا اني و امج مرتاحين
سكتت و درت وجهي من عنده ،هو هم دخل جوا ما بقى يمي، دخلت للبيت اخذت موبايلي و دزيت رسالة لخالد (موافقة)
دقايق مرت و اتصل عليه :- موافقة على الزواج ؟
-اي
-ههههه يا رب يكتبلج البيه خير و يوفقج
-بس خايفة
-الخوف طبيعي و من حقج بس لا تخافين ما راح اعوفج بس تحتاجين شي كولي و ما اقصر
-بس وين نعيش يعني ؟
- ما اعرف جاي ادور لسلمان على شغل بالمحافظات وصيت جماعتي الاعرفهم بس لهسه ما وصلني اي شي
-العيشة ابغداد صعبة خصوصا بابا حر و ديراقب
-اني افضل تروحين لمنطقة يصعب يدهل بيها ارهاب
-يا منطقة مثلا
-المناطق المقدسة .. الكاظمية او تروحين كربلاء نجف قريب من المراقد .. هيج اماكن تكون مشددة بالحراسة و اذا تريدين نصيحتي عوفي الكاظمية غالية و صعب تشترين و تعيشين بيها .. برأيي كربلاء افضل مكان و ائمن بعد من النجف و الكاظمية
-ما اندل
-هناك ما اتيهين .. تركبين كية منا يذبج كبال الامام تروحين هناك الأيجارات هواي تأجرين و بمية الف تشتريلج بضاعة بسطية و تفتحين تعيشين بخير والله ... على ما يجيج الورث مال سلمان ليما يمشون بيها و ينباع
-يعني انت تريدينا بأسرع وكت
-اني ما اريد شي وما داخل بجيبي شي قابل شعدي، بس سلمان صارله اسبوع تقريبا خطية بالمخزن كاعد و احتاه نجيبله اكل و شرب لازم نخلصه و نهزمه لمكان بعيد
-يعني شوكت مثلا
-اذا هاي باجر احجي ويا امجد يفاتح ابوه و اذا هاي نمر عليكم و نتفق
-ماشي
-يعني موافقة ؟
-ما اعتقد عندي حل ثاني
-انت مو مجبورة
-اليجبرني وضعي خالد كلش كارهه العيشة هنا اول شي اختنكت لان لا اطلع ولا اطب بس بالبيت ثاني شي روميو وجوليت العايشة وياهم اذا بقيت ارتكبلي جريمة بيهم
ضحك ضحكة طويلة :- نعلعلا غيرتج يعني تصالحوا
- وعوزة بس سبوس رجلها
-هاي امج مو شوية هههههههههههه ساحلته للواء خوش سحلة
-احسن من حظي
-ديار لا تقارنين نفسج بأي بشر الله ما خلق احد يشبه احد لا بلون ولا بعيشة ولا بحظ .. قارني نفسج بنفسج
شوفي قبل شهر شلون جنت و وره اسبوع شلون صار حالج ورجعي قارني باليوم .. و اطمحي تعيشين باجر باحسن من اليوم ..
راح تشوفين شلون الله مغيرج من حال الحال و انت ما تدرين .. (ولأن شكرتم لازيدنكم ) احمدي ربج حتى يهيألج الافضل
.. قفلت الخط وبقيت افكر بكلامة ..
فعلا قبل شهر جنت عايشة بخوف من ابوية لا يتقربلي
واطور الموضوع و صار ارهابي .. بس رغم هذا ما تاذيت والله كفا شر ابويه و جماعته عني و عن اخواني و خلصنا و جابنا هنا .. و ما ادري بعد شضاملي
شوية شوية بديت ويا روحي واخليها تتقبل موضوع سلمان و ان العيشة وياه عسى تكون احسن من العيشة هنا... وعود اذا ما كدرت وياه اطلك
......ثاني يوم الظهر كعدتني كالت :- بيت ابو امجد راح يجون كومي رتبي نفسج عدلي يلا
-ليش عود اعدل نفسي
-يا امي جايين يحجون بسالفة زواجج كومي خوما تطلعيلهم بهشكل و عيونج مغوشة من النوم فوتي اسبحي و عدي نفسج يلا حبيبتي
كمت على حيلي رحت للحمام سبحت و مشطت ولبست اتركسود جايبتليله امي جديد
اجو امجد و امه و ابوه و مها و خالد و مرته و امه وسلمان وياهم سلمت عليهم وصلت لسلمان
مستحية منه :- شلونك سلمان
-اممم عود الوصخة سابحة
-انجب يلا ولي مو صوجك
امجد :- هههههه لك حيوان راح تصير مرتك
سلمان :- تصير مرتي وتجيب جهال وصخين مثلها هاهاهاها
خالد:- سلماااان مو وكتك
خجلت حيل منهم وهم كاعدين وهذا المرعوص هيج يحجي عفتهم ودخلت جوا ردت ابجي :- شنو هذا حظي و اتزوجه لا ما اريد غيرت رأيي ما اتزوج
ردت اطلع تراجعت يا الله شلووون ما اريده
فاتت امي:- كومي ولج وياي قدميلهم عصير
-ماما ترا هم مو غربة
- طايحة الحظ دكومي لا تكعدين
فاتت مها :- لا ام اسامة لا تهجين عليها هيج روحي هسه اني احجي وياها ..
طلعت امي وكعدت مها، باستني من خدي :- حقج تخجلين و تستحين و حتى لو تضوجين اعرف سلمان مو الجان يتخيله عقلج كل بنية بكدج عدها احلام وتفكر بمواصفات اللي تتزوجه بس هي هاي الحياة الاحلام مو مثل الواقع و ان شاءالله يطلع خوش زلمة ويعيشج و يعوضج عن العشتيه ابيت اهلج
بقت تحجي وياي هواي لحد ما كومتني، مرت خالد كاعدة يم امه و تضحك متشمته بيه و تهمس العمتها :- ترا والله كلش يلوكون البعض
و تضحك وعمتها تخزر بيها و تسكت بيها
بقوا يحجون وياي هواي .. و امجد و خالد و ابو امجد تبرعوا منهم حتى يشترولنا غرفة نوم ..
بس وين الغرفة نوم بقو يسولفون بهذا الموضوع
واتفقوا واحد منهم يروح ويانا يأجر النا بكربلاء ونعيش
ابو امجد اقترح عليهم اول بداية يزوجنا هنا قبل لا ياخذونا هناك لكربلاء .. وينطينا غرفة من بيته نتزوج بيها مؤقت
حجوا ويا امي اذا عدها شروط او حجي كالت الهم :- ما عندي شي بالعكس كلامكم ع الراس اهم شي الستر يعيوني
كالو هاي هيه باجر نجي ناخذ ديار للصالون ونسويلهم حفلة صغيرة على كدهم
... بيومها اسودت الدنيا بعيني
مثل البالع موس لا يكدر يطلعه ولا يكدر يبلعه
واني اكدر ارفض ولا موافقة بسلمان
جاي احس احلامي و سنين عمري كلها تبدت كبالي ..
بيومها مها باتت يمنا خلاها امجد ..
كعدت هي و امي حفولي جسمي و نظفوني و يفهموني ع الزواج و هالامور .. مها ما تعرف اني فاقدة عذريتي
فكعدت توصيني لا تخافين و لا ترتبكين و هيج و هيج الموضوع
كمت ابجي حيل ما اعرف على وضعي هذا لو على السواه بيه ابوية ... احس الظنيا وكفت بعيني واتمنى بهالساعة اموت ولا هيج اعيش
كلش الدنيا طلعت من عيني
جنت كل مأساتي و مشاكلي ومعاناتي اصبر روحي بيها بعالم خيالي .. هسه هذا العالم مراح ما جاي اتخيل روحي بغير عالم لو اتأمل بفارس احلام لو انعشك وانحب
ليلتها بجيت بجي بس الله يعلم بيه ..
ثاني يوم ... اخذتني امي للصالون هي و مها حفولي حواجبي و لبسوني بدلة بيضة بكمام طويلة و سوولي مكياج و غيروا شكلي حتى ما كمت اعرف نفسي
صح جتت مو حلوة و هسه احلى بس كلش كرهت هالشكل اتمنى ارجع لطبيعتي احسن ..اكو غصة بكلبي كلش قوية
رحت للمكان اللي يلبسون بيه كعدت خابرت خالد رد يكول الو اني انفجرت ابجي من كل گلبي هو اتخبل كام يصيح :- ديار شبيج لا يربج على شنو تبجين .. غير تحجي خبلتيني ليش هيج تبجين شصاير
بقيت بس ابجي حيل اخر كلمة كلتها كوة :- ما اريد اتزوج ... وقفلت الخط ابجي بقوة
فاتت امي:- عزا العزاج خربتي المكياج كله شجاج دكومي كلنا هيج بيوم زواجنا خايفين و مستغربين كومي يا امي
-ما اريد اتزوج ماما خلينا نرجع للبيت
-ولج شترجعين كومي كومي خلي نعدل المكياج باع شسويتي شبيج يا امي
.. اخذتني لام الصالون رجعت رتبتني و كالت :- بعد لا تبجين
اليكتل بالموضوع .. خالد هو اللي جان جاي عليه بالصالون حتى ياخذني للحفلة مال زواجي ابيت ابو امجد
طلعوني اني و بدلتي من الصالون، كعدوني بالسيارة ، عيوني دم ، امي واكفة بالباب ادخل ابدلتي و مها رجعت للصالون تجيب غراضنا، هو جان متضايق حيل باوعلي بمراية السيارة بأبتسامة حزن :- شبيج ؟
نزلو دموعي :- انت بيه .....يتبع

☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم