ليتني استطيع فعلها الحلقة (5)

ليتني استطيع فعلها

 

الحلقة  (5)

ابوية باوعني و اني اشوف من الجام ، تحرك واحد وياه و فات جوا ، انفتحت الباب و واحد ملثم بس العيون طالعة لفني بأيدة و حط السلاح براسي و كال

:- ااااششششش ولا حسسسس...

-منو انت

-ارجعي لفراشج نامي وبلا حس اقل كلمة راسج يتفجر بطلقة

و هو مخلي المسدس على راسي، مشاني ورجعني للفراش، فزت اثار بساع سحب المسدس و خلاه بظهره

دخلت بفراشي و جسمي يرجف ، اخذت اثار بين ادية و تغطيت ، طلع و رد الباب وراه

رجعت اثار النومتها، و گمت من مكاني فتحت الباب قليل و هم جوه يحجون اكو شي مثل الينوص بس مخنوك كأنو بنية مسدود حلكها ..

سمعت صوت ركلة كأنها قوية، ويا الركلة اختفى الصوت !

رجع طلع وجه الملثم گبالي فزيت بساع و طبگت الباب حيل ورجعت لفراشي وغطيت راسي
غمضت عيوني حيل .. سيت خطوات اقتربت مني
انرفع الغطا و انمسكت ايدي

باوعت بخوف ورافعه ايدي فوك راسي، طلع ابوية
جريت ايدي منه:- ميل عني

الاب:- كووومي بساع

-طلع هذا شغلك مو تجيب بشر تالي الليل بكواني و تريديني اشتغل وياك، والله ما اشتغل ميل يلا

-جاي اكلج كوووومي بت الخ*****

سحبني من ايدي و كومني جانو ٣ زلم بالبيت، وداني بغرفة امي اللي جانت مثلي خايفة
الظاهر هم شايفة اللي شفته
دفعني للگاع يمها

-اللي اسمع الها صوت و يطلع منها حرف اكتلها خلاص
اللي شفتوه بينكم و بين نفسكم ما اريد تحجون بيه و الا والله تنكتلون و تنشمر جثثكم للچلاب

ميعاد :- الله ياخذك و يخلصنا ليلة ما اعيش وياك طلكني و الا والله بعالي سماه الم الدنيا عليك .. ولا تهددني بسلاحك ما تخوف جلبي

جرها من شعرها : اني ما ذابح روحي على خلقتج عبالج ما اعرف بسوالفج صار اسنين من وراي بس ساكت بمزاجي و بمزاجي اطلك افتهمتي

تجر بشعرها منه و هو يهدد ، ضربته على وجهه حيل ودفعته :- شوف عيوني لا عبالك جايب جلابك و جاي علية ترا اعرف ناس توديك ورا الشمس ففك عني احسن ما ابتلي بيك

-نشوف منو يبتلش منو يا ميعاد

راد يطلع

-لا انشوف و لا نحوف خلينا نستر ما شفنا و نتفارك بريحة طيبة اسماااعيل

-واذا طلعتي منا و بلغتي ؟ اني ما امنلج

-وعساك لا امنت منو انت و شنو حتى اورط روحي بسوالفك

تقربلها و خله عينها بعينها : زين لعد يصير خير

:- جهالي وياي

-ديار يمي

-شناوي تسوي بجهالي تريد تورطهم وياك، ما اخليك تشوف ذرة منهم

-اخذي اسامة و اثار يمج ما احتاجهم بس ديار ممنوع و انت طالك

ركضت ورا :- اسماعيل بتي ما اعوفها اسماعيل

رجعت عليه حظنتني :- يمه اسم الله بتي ما اعوفج يمه لا تخافين

وخرتها مني:- انت تصلا اقذر منه اريد افتهم انتو شنو من ملا راضعين بصدر ابليس ، ما عدكم ذرة خوف من الله ما تعرفون عيب و حرام ليش هاي الناس مو مثلكم كرهتوني بروحي
عوووفيني

-وسم فوك ما خايفة عليج ولج هذا يورطج اذا تبقين يمه يذبج بمعمعه ما تخلصين منها يمة

-و انت راح تعيشيني بنص الشرف و الترف مو ؟ انتم اصلا واحد يشبه اللاخ و الله طابقكم من جمعكم

اني ما اكدر اسكت ولا اكدر اخلي اخواني تحت رحمتكم بس ربي يسمع و يشوف بس مدري شبيه ما يساعدني

-عفتها و طلعت

اول ما طلعت من الباب انلزمت ايدي باوعتله واحد ملثم يكولي :- ابالي اخذج مشوار اضيفج بفد مكان

-عوفني ولي مني يلا

-اششش بلا نفس

اجا صوت من ورا

اسماعيل :- سعد ساعة و ترجعها اريدك تعلمها شغلنا عدل

-بخدمتك اني استادي

طلعت امي تصرخ :- وين ماخذ بتي اسماعيل عوف البنية .........قاطعها ابوية و هو يحط ايده على حلكها و يفوتها جوا

ديار:- عوف ايدي يا سفلة يا مجرمين ، عوووف ايديييييي

حط ايده على حلكي و جرني كعدني بالسيارة ، فتحت الباب رجع دخلني و اندار ، فتحت الباب ، رجع سحب الأسلاح عليه
دفعت الباب حيل :انت تخوفني بالموت ، اقكتل يلا ، لو زلمة اكتل يلاااا

بطرف السلاح و ضربني على كصتي و جاب بوكس ثاني بوجي احس عظم فكي تحرك من مكانه ، دفعني للسيارة و صعد

اريد استوعب الالم ، ضليت اتفل دم
ضليت احرك براسي اريد الالم يروح من فكي ، تحركت السيارة

فزيت بساع مديت ايدي افتح الباب، قفل كلشي من يمه، صحت :- افتح يا حيوان
احجي و ابعد الدم من حلكي

مشى و الدنيا ظلام ، بلعت ريكي
باوعتله بس العيونه طالعة، وجهه و هيئته مال مجرمين

:-انت وين ماخذني الله ياخذك
بس مو صوجك صوج القندرة العندي اللي يتسمى اب
لا وفرحانه تغير و حيسويلي عمليه و ساعات و اني اتخيل امداني

داااااا اكولك وين رايح

-الصمي

-انت الصم يا حيوان نزلني يلا
جاااااي اگلك نزلنيييي

فوك الربع ساعة و هو يمشي بالسيارة و ما وكف
وصلنا لمكان مهجور .. مكان ما سيارات بيه سكراب هواي

وكف، و اني بعدني اركز بالمكان الظلمة اريد اشوف زين شنو هذا ، طفى ضوا السيارة صار ظلام تام ، شغل لايت يدوي و نزلني

-وخررر مني جاي اكلك
بس ما سمع ، يمشي ويجر بأيدي
الجو ظلام ظلام الى درجة
گلبي انملى رعب و يمشي بيه و اتعثر بمدري شنو

وداني لمخزن فتحه بيه ٣ جثث ولد شباب ميتين بس كأن ميتين جديد لان اكو دم بالكاع ما يابس ،، رجع باوعلي و هو رافع حاجبة و كانه يضحك من ورا اللثام

-خطيييييه مو مال اخليج رابعتهم موو ؟
لو شتكولين

الصراحة انصم حلگلي ولو انذبح قطرة دم ما تنلگى بجسمي ، لشتي ترجف من فوك لجوا واني اباوعله

سحبني و سد المخزن
رجع مشاني لمخزن لاخ، رفع الستارة ما بي اي بشر ، فوتني و سد السيتارة وراه

-شرايد مني انت ؟
حجيت و صارت حركة بالكاع، مثل الكأنو فارة جريذي ما ادري ، طفى اللايت :- انت شدا تسوي شغل الضوه فدوة اخاف

.. حرحارة ايدي ما تنشاف من الظلام ، كمت امد ايدي اريد الزم شي و اتمشى خطوة خطوة
:- وينه هذا، شغل اللايت فدوة اخاف

سمعت حركة كأنو اتحرك من مكانه ، درت وجهي للمكان اللي بيه حركة ، اتمشيت اتقرب منه و اومي بيدي، لزمت شي منه

بمجرد ما خليت ايدي عليه، سحبني حيل ودفعني للحايط و لف ايدي لظهري و ضك وجهي ع الحايط قوي لدرجة حسيت وجهي لو يدخل بالحايط لو يتفلش

اني دائما ارفع شعري كباية ، فتقرب ريحته ريحة عرگ جسم و مخلوطة بجكاير ردت ازوع ، فجاة لحس ركبتي بلسانه
رجعت راسي لركبتي، كش جسمي كله وكلت:- وخر مني حيواااااااااان

ضحك و بعد ايده ، بقيت امسح برگبتي و احك بجسمي كزبر، الجو هدووووووووووووء صنطة و اظلم
ما جاي اعرف الساعة بيش حتى اتأمل يطلع الفجر

صرخت :- يا اااااااااالله شتريد مني يا وصخ اكتلني و خلصني اذا انت صدك زلمة لا تتردد، يا قذر وينك

احجي واني امسح بركبتي وعاقجة وجهي كد ما كاشة روحي ، بقيت اتنفس بحس عالي خوف من الظلام

، گعدت بمكاني ، هسه استقريت و حسيت حركة يمي فزيت و صرخت و رجعت و كفت :- يا الله

بقيت متحطة بمكاني بس صوت انفاسي اسمعة
فجأة انفتح ضوا اللايت بوجهي ، خليت ايدي على عيني بسرعة و اني احاول اباوعه

طفى الضوا ، رجع شغلة
:- انت شرايد بالضبط ؟

-رايد عقلج

-شغل ما اشتغل وياكم

-تخسرين

-طز ما عازة بنفسي بعيشتي الزينة حتى استخسر العيشة

-مو نفسج

-لعد ؟

-اقرب الناس الج

-منو تقصد ؟

تمشى و تقرب يمي، حط ايده على خصري
همس بأذني :- اخوج مثلا

-تخسي انت و شاربك تلزم اخووووي يا حيوان
حجيتها و جبتله صفكة سريعة على وجهه

هنا طفى اللايت و استلمني بوكسيات اريد افهم الأيد منين تجيني ما اعرف بس صياحي طالع بنص هالهيمة

وكعت للكاع كلبني وجهي للكاع و كعد على ظهري لازم ادية واني احرك بجسمي اريد اخلص : وخر يا حيوان

-لو ما استادي نبهني جان شوفتج هالحيوان شيسوي، اسمعي لج :- تشتغلين ويانا و على حسب الأصول و شنگلچ تكولين حاظر و امركم
والا شفتي ال٣ المقتولين اخوج يصير ثالثهم

صرخت بصوت بجي :- اخوي شعليه يا قذر عوفني
والف بنفسي اريده يگوم من ظهري، عافني و كام مني بقيت اتلمس بالكاع ، استندت و كعدت اتلمس بالكاع

اريد شي الزمه ماكو بقيت ازحف بالكاع تذكرت الجريذي خفت استقريت بمكاني
الف فكرة و سالفة ابالي
اخواني بالبيت معقوله يسوولهم شي ؟
اسامة انجن لو انمس بشعره
بس ما اكدر اتورط وياهم بهذا الشغل مستحيل

شوية شوية بديت اشوف زروف بالمخزن يعني بدا يطلع الفجر، بعدني اركز بالمخزن ما احس الا طلقة ثارت قريبة مني

صرخت و وكفت على حيلي ، اجا لزم شعري :- يلا ورانا شغل هواي كومي

شغل اللايت و جر ايدي و رجعني للسيارة، اباوع المكان چول و زبايل و سكراب :- اللهي دخيلك ساعدني

رجعني للبيت و جرني من ايدي، نزلني و اخذني للغرفة البيها المخطوف، باوعنياها ، فتحت عيني متفاجئة :- اعرفها هاي البنية ويانا بالمدرسة ابوها كلش زنگين و شايفها نفسها ع الطلاب

فات ابوية للغرفة :- فهمتها الشغل

-نعم استادي

-ما راح اشتغل و لو مسيت اسامه بشي والله اكطعك

راد يضربني هذا اللملثم كاله :- سعد اوكف
تقرب بني و طبطب على خدي :- اعرفج ذكية و ما راح تسوين شي ، يلا بابا امشي كعدي اخوج و روحي للدوام لان بعد الظهر عدنا عملية لازم انفذها

و سحبني من ملابسي حيل و صاح :- يلا
دفعني برا و قفل الغرفة و انسحبوا كلهم بقى بس واحد كاعد بالأستقبال يم اخواني

عيوني مدمعة و كلبي مليان رعب،رحت لغرفة امي لكيته ضاربها و شاد حلكها و ورجليها و اديها بربطة، فكيتها صرخت

:- ما لازم نبقى هنا لازم اخذكم و اطلع ؟

-وين نروح اني خايفة كلش ماما ، اخذوني لجول لكيت جثث و دم و رعب ما تتخيلي هددوني اذا ما اشتغل وياهم يكتلون اسامه اخوية

-شحدهم
جرتني لحظنها :- اذبحهم و ما اخليهم يلزمون شعرة منكم والله

-شلون

-ما اعرف، هسه انت كعدي اخوج و روحو للمدرسة و اني اتصرف شلون

-كومي روحي وياي هذا واحد منهم كاعد بالاستقبال

-امشي

مشينا اني وياها، فاتت لگته كاعد يشرب جكاير و يباوع على اخواني لزمته و كومته دفعته برا و ذاك الغلط و الصياح و الفشار عليه

راد يضربها هي ضربته، رفع السلاح عليها ، هجمت عليه هو و سلاحه :- كوم لك ************* تخوفني بسلاحك اطلع منا لا افضحك فضيحة والله

وكف بالكراج بس حتى تسكت ولا الناس تسمع الصوت، رفع الجهاز وكام يخابر

اندارتلنا اسامة و اثار كاعدين مفزوعين
شالت اثار و كالتلي:- بدلي انت و اسامة واطلعوا يلا

-ما نشرد هسه

-اشرد وين افر بيكم الشوارع غير امن وضعي امن عليكم، ما تشوفين هالقندرة واكف قصاص بالباب اتحركي يلا لي لاخوج

اخذت اسامة و رحنا نبدل بس ما كف اسئلة كل شوية

اسامة:- ديار شصاير ؟
منو هذا الرجال ؟
ليش امي ضربته ؟
ابوي وين ؟
ليش ما تحجين ؟

:- كافي تسال و امشي البيه كافيني رحمة لربك امشي

اخذته و مشينا للمدرسة
لا انتبهت لدرس ولا ركزت ويا مدرس
عقلي مشوش و بالي مخربط .. افكر اكول اروح لاقرب نقطة امنية و اكلهم ابويه هيج و هيج و مختطف بنية ابيتنا ، بس اخاف نروح بيها و ابويه لا ذمة ولا ضمير

ابلغ و اشرد اني و اخوي، بس وين نشرد ؟
وين اروح اني لا اعرف احد ولا اندل مكان
اصبر اشوف امي شتسوي بلكت تكدر تخلصنا

بالفرصة شفت اهل البنية يسألون بالمدرسة و يكولون من البارحة لما طلعت ما رجعت للبيت و الحارس يكول ما شفتها و المديرة تكول تأكدت بنفسي كل البنات طلعوا مبقى احد بالمدرسة

كمت ارجف حتى خفت الطالبات ينتبهون عليه ابجي و ارجف، رحت للتواليتات ، كعدت هناك و الحيرة تقرأ الف و الخوف والرجف بجسمي مو بأنصاف

يطخ بعقلي اروح اگلهم بس اخاف
:- ربي ساعدني فدوة

حليت من الدوام و اني امشي ما ادري بروحي، وكفت سيارة، اندك هورن ،فزيت ، خالد كبالي

-اصعدي

باوعت وراي ، هاي اني وين واصلة ناسية اسامة ما رحت لمدرسته فكلت :- يا عزا العزاني اخوي ما جبته من المدرسة ، لا لا رايحة اجيب اخوي

-اصعدي نحجي و روحي بسرعة

...صعدت وياه

مشى بالسيارة ، باوعتله :- شتريد ؟

-جر الموبايل من جيبة و شمره كدامي

-ديار اريد افتهم وين تريدين توصلين يعني تخيلتج صغيرة و كل العندج زعابيلج و افلامج تسويها و تشردين بس شنو هالمسجات السخيفة
لج بابا انت ما عندج ام تراقبج ما عندج اهل يكلولج شجاي تسوي

-ما فهمت شتقصد ؟

- تفهمين قصدي كلش زين

-خالد والله عقلي مشوش و راسي راح ينفجر احجي شنو الموضوع، اني بعد الصار ما تقربت منك لا انت ولا ضحى

-وهاي الرسايل ؟

-يا رسايل ؟

-اقريهن هاج

انطاني الموبايل و قريت المسجات دارميات اشبه بالجنسية و كلام مو معقول

-مو اني

-لا انت

-والله مو اني

-هاج اقري الرسالة هاي لا تغشمين روحج

قريتها المسج ( مرتك الحلوة اليوم تهجمت علينا اني اكول لو اطلكها و تفتك و تجي يمي ادلعك شتكول )

من شفتها اسودت الدنيا بعيني كمت اصيح ابجي :- يا يا الله والله تعبت شخص من هذا يطلع ذاك وين اروح

-ما فهمت

-مو اني اللي بالرسايل

-منو لعد ، ضحى بيومها اجتكم و من يومها الرسايل ما كطعت

-هاي امي

صفن بصدمة :- امج ! صدك تحجين ؟

خليت اديه على وجهي :- ياربي و القران تعبت تعببببببت و انفجرت ابجي بكل حيلي

-ديار شنو الموضع، كولي يا الله يمعودة

فتح بطل مي و جر كلينكس خلا على رجلي:- هاج اشربي و فهميني شبيج

-كول شنو المابيه تعبت من اهلي تعبت ابويه من صفحة و تمي من صفحة ما بيه اتحملهم بعد
التفتتله :- خالد اني جاي اموت من الرعب راح يوكف گلبي

-كولي يا الله شصاير

-ابويه ارهابي و جاي يهددني

رجع ظهره :- صدكتي جذبتج ؟ الرجال طلع و ما عليه تهمة

-لا هسه طلع صدك، احجارة گطفتها بظلمة و صابت
ابوية خاطف وحدة و مخليها بالبيت مالتنا

فتح عيونه :- لا ، صدك تحجين لو هذا لو هذا فلم جديد لو شنو الموضوع

-والله العظيم ما جاي اجذب عقلي راح ينجن و ما اكدر افتن عليه هددوني بأسامة

-ديار عيب عليج اسامة ابنه ماكو اب يهدد ابنه هالحجي ما يصير

-والله ما جاي اجذب و ابوية اقذر من هيج شتتوقع من واحد يعتدي على بت

طلعت منه صرخة لا ارادية : هااااه شنو ولج معتدي على بته وين كاعدين احنه

-خالد انت كلشي ما تعرف

وكف السيارة :- انت لا تخبليني و احجيلي وحدة وحدة ابوج معتدي على منو

-بالاول انهار و بعدين اني

-انهار اختج الميته

-بسببه

لحظة :- نروح للمحل و نحجي هيج كلشي ما جاي استوعب
حرك السيارة و هو يكول :- قل اعوذ برب الفلق من شر ما خلق ، لا حول ولا قوة الا بالله
اكو هيج بهالدنيا معقولة !! عمي مو زين ما الله كالبها بالعراق لا و نستغرب شنو احتلال شنو حرب طائفية و واحدنا يكتل اللاخ هو الله شلون يرحمنا بعد

وصلني للمحل كتله :- اخوي لازم تروح اجيب

-انروح سوة بعد نص ساعه و يطلع ، فوتي

دخلنا جوا للمحل، فتح الضوا و شغل البنكة و كعد كبال الميز :- اكعدي و احجيلي سالفتج يربج عقلي ما كام يجمع

-شحجيلك و منين ابدي ؟

-اختج و انتي شلون اعتدى عليكم

-اختي انهار اكبر جانت الي مثل الام اداريني و تنومني و توكلني

-شكد عمرها ؟

-١٣ تقريبا ما ادري

-اي

-جنت اشوفها بالليل تبجي و من تطلع ماما تخاف

-امج تشتغل

-اي بدائرة حكومية

-اي

-بيوم من الايام ابوي طردني و حبسني بالمطبخ و اسمع بس صراخ اختي انهار بالبيت تصيح من كل گلبها

بعدها فتحت الباب مال المطبخ و ثوبها مشكوك ، هددت ابوي تحرك نفسها ، بس ابوي جان سكير كام و كتلها
رجعت اخذت النفط و شمرته على روحها و اني قريبة منها نص ملابسي تنكعت بالنفط و كالتله اذا ما تبتعد مني احرك روحي

-ما سمعها اول ما تقرب شخطت الشخاطة و كبت اني من الخوف حظنتها كب جسمي وياها كمت اصرخ بالبيت و مخليه ادية على وجهي و اصرخ بكل صوتي و اسمعها هي تصرخ من الحرك

طب جيرانه طفاني و ناس طبو طفو اختي ابوي بوطتها سوا روحة يطفي بيها .. جنت اسمعها تصرخ من كلبها

حجيت هالكلمة و بجيت دنكت

هو دمعت عيونه ، كام من الميز كعد كدامي :- لا اله الا الله

-جنت اسمع امي تصرخ و اني اصرخ و صوت انهار اختفى

نقلونا للمستشفى اني جانت حالتي اخف منها، بس هي ما طولت ساعة و تسمم دمها و ماتت

سجلوا القضية انتحار و ابوية طلع منها و اني تشوهت بقيت ايام طويلة ما انام من الوجع اللي بجسمي
وجهي جان احسن من جسمي لان تلاحكوا عليه و طيبوني فحرك خفيف وصل وجهي ولان جنت طفله طاب احسن بس بقى اثار..
بس جسمي بقى هيج (مديت ادية يشوفهم)

- هذا مو اب هذا الحرك قليل بحقه، كل هذا و ما اكتفى و رد عليج ؟

-بابا من يوم يومه سكير و من يسكر يكوم يسوي امور ابليس ما يتخيلها

-ولج هذا كلمة بابا ما تنكال اله، بس الصوج بامج العرفت كل هذا و بقت وياه و راضيه بالعيشة و هي تشتغل

-امي نفسه اذا مو هو اقل منها

-شلون يعني

-احجيلك بس عليك الله لا تحجي

-رب الحجيتي كل هذا و خايفة ، احجي يابة قابل بلا ذمة و ضمير افضح بالعالم لا تخافين

-امي من زمان و هي تخون ابوي

-حييييل بعد ايدي شادتله كرون هلسكط، نايم السكران خلي النومة تفيده

-هو يدري بس مغلس

بتعجب :-هااه

-المهم تجيب و تنطي فلوس ما عليه هي وين تروح وين تجي ما يهتم

-استغفر الله شنو هالعائلة هاي اعوذ بالله فوك ما عار و ديوث هم شيجمع بعد الله بيه
ها لا و ارهابي بعد كلتيلي مو ؟
اي صلوات على محمد

وامج هاي من شوكت ما تعدلت ما حست على روحها ، ماكو وحدة تشتغل هيج و ما تنفضح

-اسمها بالشغل و محد يدري عن اللاخ
بس اني ادري اختي اثار مو من ابوية

-شلون عرفتي ؟!!

-كلبي هي يكلي لأن اني و انهار من جنا نلعب جانت تحط ايدي يم ايدها و تجمع شاماتنا الي بادينة
وهسه اني و اسامة هم نجمعهم .
بابا عمدة شامة بأيدة بنفس المكان

-وبس من الشامة عرفتي هي مو اختج ؟

-هيج حاسة ما متأكدة حتى جنت حيل اكره اثار بس بعدين تغيرت وياها كمت اكول هي صغيرة و تعاني مثل الجنت اعانية اذا ما احظنتها يمكن تموت لان اني من ماتت اختي حسيت نفسي متت وياها محد يعتني بيه ابد

-لا حول ولا قوة الا بالله عمي والله سبعة و تحنلتي كل هذا الا وين اكو واحد يستحمل هذا كله

-من تسمعه تصتصعبه بس اني تعايشت ويا هالمواضيع من اني وصغيرة بس هسه بديت اتعب منهم خاصة اليوم اتمنى انتحر و اخلص

-لا تكولين هيج الله يخلينا كدام اختبارات و امتحانات وهو اعلم بخلقة لا يكلف الله نفسا الا وسعها ، احجيلي سالفة التهديد شنو

-خاطفين وحدة ويانا بالمدرسة اهلها زناگيل ، و خاطيها بالبيت و ما اكدر احجي اخاف يكتلون اخوية

-لا يربج ، راح توكفين عقلي انت، ولج خاف كاعدة تتبلين عليهم عليج الله

-كلت الك والله ما جاي اجذب ، دشوفني بحالة جذب

-ما ادري ما ادري فريتي عقلي
ولج من زمان اعرفهم معقوله هيج وصخين اهلج ؟
لا يربج

- اني حايرة شنو الحل ؟

-ما اعرف حاليا عقلي ما جاي يستوعب كل الكلتي استغفر الله اكو هيج اب ، ولج مرتي زعلانه و بناتي مو يمي مثل السمجة المزوهرة الوب عليهن ويومية داز عليهن
اب يسوي هيج ابنات والله ما ادري هالدنيا شصاير بيها

دنحجي دك موبايله
خالد : لحظة

ديار : منو ؟

- ضحى
رد ع الجهاز :- الو ضحى

-هلو خالد اريد احجي وياك عليك الله لا تسد الموبايل

-نحجي بعدين

-خالد شنو ينطيك كلبك اطلكني لا تسوي بيه هيج تعرفني ما اتحمل والله اني من البارحة و اليوم ما ماكلة حتى احس الطفل ميت ابطني لا تعوفني

-ضحى مو اني الطلبت الطلاك انت اللي ايام كل ما احجي وياج تكليلي اريد اطلك و وديني لاهلي و تهددين، شنو اللي تغير هسه ؟

-ادلل عليك ميصير يعني و انت خلودي و حبيبي و ابو بيتي

-نحجي بعدين هسه مشغول اني

-منو يمك ؟

-ديار

-وتكلي ما خايني و تصيح تهددين شلون تصير الخيانة بعد خالد لا تخليني اطك و اموت

-يعني بعدج تشكين بيه ما كفيت

-مو تكلي ديار يمك

- روحي ضحى

-خالد لعد شيسمونها كعدت........

-كلت امشي ضحى، باي

سد الخط

ديار:- تشك بيك ؟

-بفضلج الحمدلله

-اني مستعدة اروح اعتذر منها و انهي الزعل البيناتكم والله اسفة

-ما يحتاج و عوفيني من ضحى كمليلي طركاعتج

-شأكمل لازم اروح اجيب اخوي

-ماشي ، بس ها شوفي شتحتاجين خابريني طمنيني لان هسه شعلتيني شعل

-ما عندي رقمك

-امج عدها رقمي و انت ما عندج !
اكتبي يمج

طلعت ورقة و قلم من جنطتي و كتبت رقمه
وصلني بالسيارة قريب من فرع مدرسة اسامة ..

وصلت للمدرسة حجيت ويا الحارس كال :- اسامة طلع من زمان ويا صديقة

اني سمعت هيج لو گلبي فز ، كمشت ملابسي وركضت للبيت ....

.........

خالد :- فرت عقلية هالبنية حيل كسرت خاطري فوك ما مشوهة هيج اهلها و حالتها رحمتك الهي
اسوق وبالي كله مشغول باللي حجته : معقوله اكو هيج بالعراق ! اب يعتدي على بناته
خرب بالحظ دمر نظام البشرية كلها قوم لوط ما سوو سوايته

من كد ما فكرت هيج والله حتى ما كمت ائمن اذا اب و دنت نفسه على بته، بناتي شلون مأمن بيهن صارلهن ٣ اسابيع عد خوالهن .. شعرف اني بنفوس البشر

اروح استر على بناتي و اجيب مرتي اشرفلي

... لفيت السيارة و طلعت على بيت اهل ضحى
دكيت الباب طلع الي ابوها رحب بيه و هلا ابني و تفضل

فاتت الاماية سلمت سلام جاف، كلتلهم والله جاي على مرتي اريد اخذها وياي

امها ما قبلت وكالت :- شنو بتي ما الها احترامها و جايها بطرك روحك روح جيب اهلك و تعال اخذها من بيت اهلها معززة مكرمة

-هي ضحى وين

-جوا و ما تطلع بناتنا مو ما الهم قيمة حتى هيج تهينها

-عمه اني ما هاينها و اذا هي ما تريد ترجع بكيفها اني ما اجبرها بس انطوني بناتي

-بنياتها يمها ما تطيهن

-كمت من مكاني:- عمي الظاهر الحجي للنسوان و انت ما بين صوتك ما دام هيج اني اخلي الوالدة و رضيعتي يجون و يجيبولي البنات و البيه زود يسد الباب

الأب :- عمي مو هيج الحجي بس البنات يم امهن و عمتك حجت الصح ما يصير تجي وحدك تاخذ المرة وهي زعلانة اهلك وينهن

-عمي تنطيني بناتي خير على خير يومين و يجون الاهل يحلون الموضوع، ما تنطونياهن وحق من انزل القرأن تحرم عليه بتك و بناتي اخذهن من عيونها

عفتهم و طلعت، حركت السيارة ، ابوها طلع البنات و خلاهن يمي بالصدر ، سد الباب و دنك راسه يحجي وياي من فتحة الشباك :- عمي على كيفك هي هم مريتك و تحبك و تغار عليك و هاي النسوان شتسوي

-والله عمي ما عدي شي وياها بس ضحى تعبتني اكلها اسود تكلي ابيض اكلها ابيض تكلي اسود ، حلفتلها بالقران بعمري كله ما خاينها و هي مستمرة تشك بيه و الشك لو دخل علاقة يدمرها فاذا تريد تحافظ على عائلتها انصحها تبطل شك مو كل بنية عرضت علي حبيتها وكت اللي تشوفني بحظن وحده ذاك الوكت الهال الحك تحجي

-الله كريم وليدي لا يضل بخاطرك
ضرب على السيارة :- توكل ابني و دير بالك على البنيات

- ان شاءالله، يلا ثيمالا

-الله وياك

.................

ديار :- رجعت ركض للبيت لكيت اسامة سابقني ضربته على راسة :- حيوان جمدت من الخوف عليك عبالي صار بيك شي غير تنتظرني اباب المدرسة ليش رحت

-اجيت اني و صديقي

الأم :- عوفونا من هالسوالف هايه ، البنية بعدها بالبيت وما نعرف شراح يصير ويانا احتمال مراقبين كلشي يصير لازم نطلع منا بأقرب وقت

-ابويه عرض عليج تاخذين اخواني و اطلعين مو ؟

-لا تفكرين ذوله ما يتأمنون

-امني اخوتي ولا تخافين عليه اني اكدر ادبر نفسي و اجيج وكتها نشوف وين نروح

-اكيد ؟ بس ما امن لا شعرفهم شيسوون بيج لفو عليج حزام ناسف و شمروج بسوك وكتها شيفيدني

-بس اتطلعون ابلغ عليهم و اشرد، كبل لا يسوون اي شي لا تخافين

-القصة مو بهالبساطة ديار

-عندج غير حل؟

-ما ادري خل اخابر اشوف ائمن المكان حتى اتفق ويا هالحيوان اخذ اخوتج و نمشي ..

-ااا صدك ماما دازة رسايل لخالد ؟

-شنو فايدة هالحجي هسه بحال خالد بالله و تجيبيلي سيرته

-حجه وياي اليوم و كال شنو هاي الرسايل الدزيها الية ، انت شنو ما عندج خجل ؟

-اووو ديار كلش مو وكتج يا امي راسي بيه الف سالفة و سالفة اكوم منج احسنلي

هزيت ايدي و فتحت الموبايل كتبت مسج لخالد ( ماما راح تاخذ اخواني و تطلع ابقى بس اني )

دزيت ارسال، شويه و اتصل رحت للحمام و فتحت اتصال و حجيت همس (الو)

-الو شنو اكو احد يمج

-لا اني بالحمام جاي احجي وياك ما اريد احد يسمعني

-شلون تعوفني

-هم هددوني بأخوي اذا طلعوا سهله ابلغ عليهم

-وشمدريج ما راح يراقبون امج و يندلون مكانها ما معقوله يأمنون بيها هيج بساع

-ما ادري

-امني نفسج ديار و حسبوها من كل الجوانب حاليا حاولوا تتعايشون ويا الوضع لحد ما تلكولكم حل مناسب .. التفكير بهيج وكت فاشل لأن مرتبكين و خايفين

-ماشي راح اگللها

سديته من عنده ورحت حجيت ويايه ماما هالحجي بس ما كلت الها خابرت خالد ، سويت نفسي بيني و بين نفسي كلت هيج ..

كالت :- لازم اخذ احتياطي من كلشي

... لليل خابرني خالد :- شسويتو ما سويتو

- بس اجو شافو البنية و طلعو و واحد باقي بالكراج كاعد ما فاركنه و حايرين شلون الحل

:- اني اكول لو نشتتهم

-شلون

-اخوج اسامة من المدرسة تاخذه من الصبح گبل لا يحل .. و اثار خلي امج تخليها يم مها بحجة ديار مدرسة و هي عدها شغل

- اي ؟ بس خاف يراقبوها

-اني اتكفل بهالموضوع، هي تروح للشغل و اني اخذ الجهال، والا اوكفي اوكفي اوكفي لكيتها

-شنو ؟

-الفلم اذا سويناه على امج راح يتصدك اكثر

-شلون يعني ؟

اسامة يروح وياج للمدرسة ، و امج كليلها روحي للشغل اني ابقى يم اثار

اي ؟

-خلي اثار يم مها وكولي اتذكرت عندي امتحان و اني اخذ اثار من مها بلا ما تعرف وبدون ما احد يحس

بهيج مها و اهلها راح يطلعون يدورون
وامج راح تنجن ولدها وين
وابوج راح يتخبل
و انت مثلي عليهم و ابجي شكد ما تكدرين
بهالحالة الكل يصدك انو الجهال انخطفوا
واحد راح يتهم الاخر

هيج امنا اثار و اسامة

-ضليت افكر بيها خطة محبوكة
بس شلون امي اكلها ؟

-ابوج من راح يشوف امج متهسترة يومين ما تعرف جهالها وين اعتقد راح يصرف نظر عنها وحتى لو ما صرف
اني اخابرها واعرف شلون افرها بطرق و مناطق و اكتشف اذا احد يتبعها لو لا و ائمنهم يم واحد صديقي لحد ما نبلغ عليه .. هاي اذا الشرطة بيها خير و لزمتهم اما اذا ماكو مضطرين اطلعون من بغداد كلها وتشوفولكم مكان بعيد

... فر عقلي .. نهيت الاتصال وياه لأن حسيت احد اجا
بس ضليت الليل كله افكر: اني جبانه شلون اكدر انفذ هيج خطة ؟

الليل بقى ابوية و جماعته يفرون بالبيت
نقلوا البنية المخطوفة منا ما ادري وين ودوها
حاولت اتصنت عليهم بس خفت
ابد ما رجعت حجيت ويا خالد حتى لا يشكون

الصبح كعدت امي كالت :- لازم اروح للشغل حتى اشوف شلون ائمن بيت و ائمن عليكم
رادت تاخذ اثار نطت بجي ما تقبل تروح، كلت الها عوفيها اني راح ابقيها يم مها من ارجع من الدوام اخذها ما اتاخر و احاول اطلع قبل الحلة اذا قبلت المديرة

امي اقتنعت .. وديت اثار لمها خطية ما كالت شي

عفتها ورحت للمدرسة بطريقي للمدرسة عرضلي هذا اللي الجان ملثم يسمونه سعد، كال :- اصعدي

-ما اصعد روح منا

-تصعدين لو اصعدج بالقوة ترا مو بصالحج ترفضين تعرفين خطية اخوج

-شرايد مني

-وقت الشغل

-شغليش ؟

-اصعدي و تعرفين ...... يتبع

☆☆☆☆☆☆