ليتني استطيع فعلها الحلقة (4)

ليتني استطيع فعلها

 

الحلقة  (4)

المكان : بيت خالد
التوقيت : الساعة الثامنة صباحا

ام رافد : يا يمه سودة عليه وليدي ليش يمة نايم على هالكرويتة و مكسر ضلوعك

...تحركت بمكاني مطيت جسمي احسه مكسر .. فركت وجهي باوعتلها : هلا يمة صباح الخير

-هلا يبعد امك صباح النور، انت نايم هنا ييمة و اني اريد اروح لاخيك النايم بالمستشفى

-اغسل و اخذج يمه هسه دقايق
جاي اكوم نزلت ضحى : و اخذني وياك لبيت اهلي

خالد :- براحتج، يمه كولي لبتول تساعد ضحى و تنزللها الغراض حتى اخذها ترتاح عد اهلها

الأم :- يمه هنا محد مصخرها و اخواتك ممقصرات

ضحى:- لا عمة اني ما رايحة ارتاح ، اني رايحة اطلك و غراضي عود جيبوها وراي

الام: يمه اسم الله الرحمن شصاير يبنيتي

بقت ضحى تشكي مني و الحجية تهدي بيها اني عفتهم ورحت للمغسلة غسلت ..
اجيت بعدها داكة رجل تريد تطلع لبيت اهلها و تطلك

وامي تقنع بيها رادت تحجي وياي طكيت : يممممة ليلي ما نايمة و راسي على ساعة ينفجر و الكعبة الاسمعه يحجي لانفجر بيه

اليريد يروح خل يروح اني ما لازم احد
-انتظركم بالسيارة

................

سلمان ..
جان بيتهم قريب من ملجئ العامرية
بسنة ١٩٩١ و اثناء ما العراق كان بأحتلال الكويت
امريكا قصفت بغداد، و تحديدا العامرية و ملجئ العامرية .. وقتها راح ضحيتها تقريبا ٤٠٠ عراقي بينهم ٢٠٠ امرأة و ٥٠ طفل ..

بوقت الضربة كان سلمان و امه و واخو اله ثاني، بالبيت وابوهم برا البيت ما جان موجود ، واثناء القصف جزء من البيت واكع .. ام سلمان واخوه ماتوا جوا الانقاض بس سلمان انقذوه و هو طفل ابن عمر ٦ سنوات

سلمان ذاك الطفل الجميل .. ما عاد جميل
وراح جماله بالحادثة اللي صارتله
رجله ما انصلحت و بقى طول عمره اعرج
وعقله ... يفتهم بس مو بذاك الوعي
انسان مو كامل اجزاء من عقله تضررت بسبب الحادث الصار وياه.

ابو من بعدها اشترى بيت هنا بالدورة و جاب سلمان وياه و تزوج حليمة ..
حليمة جانت فعلا ينكال الها (زوجة اب) قاسية ويا الى ابعد حد .. خاصة لما مات ابوه
انطتا غرفة اشبه بالمخزن لا مروحة لا تدفئة
كل يوم اطرده من البيت ..

اهل المنطقة كلهم يعرفون سلمان مو بس فرعنا .. المنطقة كلها، معروف بسلمان المرعوص او سلمان ابو الرعاويص او سويج
هيج الناس تطلق عليه
بس هو ما يزعل و شايل گلب ابيض من الثلج

شاغول ما يخلي شغلة ما يشتغلها بس الفلوس لمرت ابوه تكتله اذا ما انطاها

يتغزل بالنسوان هواية و بسبب هالموضوع كل يوم محصله كتله مكسر من وراها، بس حتى اليكتلونه ايام و يسامحونه و يرجعون يتعاملون وياه ويضحكون عليه

هو صانع ويا واحد يبيع فلافل بالمنطقة وكلها تحبه

حسب ما هو يكول مرت ابوه جانت تنتله بالكهرباء
ما اعرف حقيقة او صحيح لان هو جذاب اكشر و اكبر كلاوچي و الحباية يسويها كباية و دائما يحب يبين هو زلمة و يتمرجل على جهال المنطقة.

.... كاعد ويانه و احنه جاي نفتح بالجكليت اليابس و ناكل .. سنونه رادت تتشلع، بس بعد بلاش وماكو اطيب من اكل البلاش

شوية و فات ابوية : ديار

كمت من مكاني بسرعة : ها بابا
فات شاف سلمان عدنا

-هاذ شعده هنا ؟

-بابا حليمة طاردته و اااا جبنا اني و اسامه هنا ويانة يتريك خطية

-بقى ريوك ؟

-لا

-كوم انت هييي روح لبيتكم يلا

سلمان يهز بيده : السكران طلع من السجن هي يا الله

الأب :-شكلت ولك ؟

سلمان :-امشي ارهابي ابو الوصخ

بسرعة ابوي ضربه على علباته و لزمه من فالينته حيل شدها على ركبته : اخنكك و اموتك و اشمرك للجلاب والله اذا مره ثانية حجيت، واذا عديت عتبت الباب الا اخليهم يصلخون جلدك

كمنا اني و اسامة نجر بايد ابوية و نتوسل بيه يتركة: لا بابا فدوة عوفه الله عليك هذا سويج كلشي ما يفتهم عوفه بابا

سلمان جنه جريذي لا حجة لا كال مصخم الوجه هو وصل الباب و هو صاح : اسمااااااااااعيل السكرااااان الخااااايس ابو الوووووصخ الا اروح مره ثانية للشرطة و اكلهم ارهابي

هو طلع يعرج برجله سريع و ابويه طلع وراه، لزمة وراد يجره للبيت، احنا وكفنا اني و اسامة نتكرضم من الخوف على سلمان شراح يسوي بيه بابا

ربك رجال جارنا موجود ركض فاككه من ايد ابويه، وضل يحجي على ابويه و يكله : يا ابو اسامة تصدك بهالولد نعرفه جذاب و فارغ

روح ابني روح لا تجي بعد لهنا

اسماعيل: ****** الزمك الزمك وين تروح

فات للبيت عصبي، اني و اخواني نتراجف من الخوف
اثار كامت تبجي : اوووه مو وكتج انت فوتي جوا

اخذتها و كعدنا جوا، هو كعد بالاستقبال فوك الساعة و هو يشرب ، الى ان كام ... صاح على اسامة
طلع اله اسامة يركص : تعال لك هاك روح جيبلي باكيت جكاير ع السريع يلا

..من سمعت صوت اسامة طلع و ابوية يصيح، ركضت لباب الغرفة قفلتها، اجا بابا يدك بالباب قوي: ديار افتحي الباب

-بابا فدوة الله عليك

-جااااااااااي اگلچ فتحي الباااااب

-لا الله عليك بابا فدوة

كام يضرب بالباب قوي و اثار تصرخ من كل گلبها و اني حاضنتها حيل ، دفع الباب و فات و صرخ بأثار تطلع .. و استفرد بيه .

...... الأب هي اكثر كلمة بيها حنية
وخاصة للبنية ..
الأب خيمة لبنيته، فياي الها و سند
تنتجي عليه كلما مالت بيها الدنيا ..
ما تهاب احد بوجوده
ترفع راسها بزوده
تنام و تطمن هو اليحميها
....بس المصيبة لو صار العكس

التفيت بفراشي ارجف و ابجي
اسمع صوت اثار اللي فحطت من البجي
تقربت يمي حطت راسها على راسي
رجعتني لأيام ما رحمتني
بنفس وضعها و بنفس وضعي

هدئت انفاسي، غاب صوتي
كل اللي جنت افكر بيه اعيد الماضي و انهي معاناتي
اختي نامت و هي بوضعها على راسي، عيوني بين النايمة و بين الصاحية، دخلت بحالة اسمع صوت بغرفتي
: ديار ، ديار، ديااااااار
فتحت عيني خفيف اختي انهار كبالي ، شهكت ابجي و كأني اشكيلها : انهاااار اخذيني يمج انهااار

-انت مو مثلي، انت قوية و راح تكدرين

-لا لا ما اكدر
احجي و ابجي

-راح تكدرين راح تسوين اللي ما كدرت اسويه

-انهار انهاااار

فزيت من مكاني ادور انهار
حلم
فزت اختي من راسي ، جريتها حيل لحضني ، حضنتها و كمت ابجي بقوة
هي مستغربة لأن فازة من النوم، ما راح اعوفج
ما راح اخليج تشوفين اللي شفته ما اعوفج
حاضنتها و ابجي

للمغرب و ابويه و اسامه ما الهم صوت بالبيت، انفتح باب البيت، اجا صوت امي : اثااار ، ديااار وينكم

اجت للغرفة لكتنا كاعدين اثنينه بلا صوت

-يا ستار شبيجن شصاير ؟

اثار ركضت الامي شالتها و بوستها و رجعتلي : شبيج ماما ديار صاير شي

اثار حاولت تحجيلها بس متفتهم عليها
: ولج گليلي شصاير

ديار : ليش خلفتيني ؟

-شنوه !! شبيج ماما غير افتهم

-ابويه

-شبي ؟

-دنكت راسي و بجيت

-احجي لا تبجين شسوالج ؟

-وخري مني الله لا ينطيكم وخر

-تعدى عليج ؟

- وخري انت كل السبب بيج وخري

.. كامت من عندي بس حسيتها من صدك فارت، وكفت بالممر و دك اتصالات على بابا ما رد، رجعت خابرت عمو حارت شحجت و شصيحت عليه و كالتله : اليوم كلكم اريدكم هنا

و قفلت الخط بوجهه: ما كافي شمرلي وحدة بالزبالة ، ما كفاني ضيم الراحت مني بساع بساع انوب يعيدها بديار ، والله يا اسماعيل ما اسكتلك

نص ساعة و اجت عمتي و عمي بقت امي تحجي وياهم و تصيح و عمتي تكلها : لا تكبريها ميعاد الرجال كلنا نعرفه سكران و مو بوعيه، اذا على البنية اني اخذها بيدي لجدة تحطلها خركة لحمة و تخيطها و خلصنا
ما عايزين فضايح فكينا ما عدنا شغل و عمل ملتهين ابتج احنه

-يعني متبرين منه مو ... اهااااا خوش لعد اني اعرف شتترف وياه لا ما اجرجرة و اخلي بين الرجلين فلا اتسمى بسمي

فات ابوية للبيت ، كايمة امي هاده عليه ضاربته و دافعته ، هو لازم امي خانكها
اسامة اجاني يركص : ديار بابا راح يكتل ماما الحكي

-معليك بيهم عساهم يموتون اكعد هنا

-فاتت عمتي : اليسمع ميعاد يكول البت ماتت هاي كلشي ما بيها مجمعه اخوتها و جنها حصان
شنو يمه جرح مشاعرج ؟
كسر خاطرج
والله انت و امج اكبر شياطين ابتلى بيجن هالمسكين بلوة عبالجن ما ندري راكباته و صاعدات فوك راسه

هي تحجي و عمي و امي و ابوي هناك مخبوصين، عفتها تحجي و ما رديت

انتهت بعمامي يسحبون ابوية و يطلعون من البيت
وامي راحت لغرفتها ..
مرت ساعتين و امي نايمة بغرفتها واخواني مكابليني و كاعدين

ما الي خلك وكل اللي اتمناه انتحر بفد طريقة و اموت
بس لو متت ذوله شنو ذنبهم يعيشون مثلي لا ام اداريهم و لا اب اليوكف على روسهم

اخوي من كد ما يشوف من امي و ابوي ما يحجي ولا يسأل كل اللي يسويه يجي يختل بحضني
واثار رغم هي طفله بعمر ٣ سنوات بس جاي احسها شايله هموم اكبر من عمرها و الله يعلم شنو الجاي تعاني

لو ضعفت كل ذوله يوكعون و المشكله ما عندي قوة او الأصح ما عندي سند استند عليه و اتقوى

بقيت اباوع بيهم مكابليني ما عافوني لحظة وحدة ، حجيت وياهم : جوعانيين ؟

اسامة : اي حيل

اثار اللوكية من شافتني حجيت و نطقت كمزت لحظني و كامت تتملعب عود حتى تضحكني و تريدني العب وياها

مسحت على خدها وكومتهم للمطبخ لكيت امي جايبة خبز و مخضر بانواعه ، كليت الهم بتيته درك و اثار ثردت الها خبز و جاي وكعدت اوكل بيها هي و اسامة

هم ديسولفون و يضحكون، و اسمع صوت لأمي بالغرفة:- بالله سكتوا خل اسمع

دا تضحك بصوت عالي بالموبايل ، اخذت نفس و تنهدت :- اطخ ابالي اخذكم و اشرد بيكم بس وين نروح ؟ چلاب الشارع اوحش من چلاب البيت

الا صدك اسامة وين رحت انت و بابا ؟

-اخذني على واحد ما اعرفه ضلو يحجون على بنية بالمدرسة

-بنية بالمدرسة شنو، لا يعني قصدي هم اذى سلمان لو راحله

-لا لا

-سلمان وين

-ما ادري ما شفته، ديار بابا كال راح اشتريلكم تلفزيونات ٢ واحد الك و لأختك و واحد اليه

-اقبض من دبش كوم شوف الساعة بالأستقبال بيش

راح شافها و اجا : الساعة ب٨ و نص

-بعد وكت كوموا وياية

رحت فتحت الباب على امي، هي تحجي بالموبايل باوعتلي و اشرتلي براسها بمعنى (شرايده ؟)

جربت الجيزدان مالتها ع الميز لكيت بيه فلوس هواية، اخذت خمس الاف و طلعت ، هي تخزر بيه عود رجعي متكدر تنهي الاتصال ، سديت الباب عليها و طلعت .

لبست اخواني انعالاتهم و باوعت لاثار : تمشين مشي لو تبقين هنا ؟ ترا لو تموتين ما اشيلج

بقت تكمز و تضحك و تدلع كبالي، حجة اسامة : لا لا اني الزم ايدها

اخذ ايدها و كامت تمشي وياه جنها بطة :- مو تترك ايدها اسامة ترا توكع

طلعتهم كدامي وسديت الباب و لزمت ايد اثار الثانية و مشينا ، اول شي رحت للدكان اشتريتلهم
ادور اخذتهم لبيت مها ..

مها: ليش ما اجيتي الظهر مو كتلج ارجعيلي

بلعت ريكي:- ما كدرت

-صاير شي شو مو على بعضج

-لا ما صاير شي بس شويه مريضة

-اكلج ديار بيناتنا الحجي انت و مرت خالد متحاجيات شصاير

-قصدج ضحى ، لا شبيها

-راحت زعلانه لأهلها و عمتي ام رافد تكول ما حجت بس تكول خلي ديار تفيدكم شمسوية ديار و خالد ما راضي يحجي و ضارب الوضعية كلها و باقي بالمستشفى ويه اخوه

-يعني خالد ممهتملها زعلت ؟

-لا مو هيج بس متعاركين وما ادري شصاير بيناتهم ولج هو يعشكها شجاه ما ندري ولو سوده عليه هم شيصير اخوهم مصوب بالمستشفى و حايرين بيه
المحيرني هي ليش جابت اسمج

-ما اعرف، يلا اني اروح تحتاجين شي ؟

-هاج اخذي هذا الجدر و هاي علاكة خليتلج بيها فواكه عود اكليها انت و الجهال

-مشكورة

اخذنا الاكل و ردت اروح للبيت، اتذكرت سلمان و مرت ابوه العمصة ، دكيت الباب على بيتهم طلعتلي رغد بتهم

-سلمان وين

-ما ادري بيه، ديار عدج شي ؟

-لا كولي

-امي وكعت الصبح و ظهرها و رجلها حيل متأذيه خابرت على كرايبنا محد اجا خل ناخذها اني وياج للمضمد اللي براس الفرع

-ابقى هنا اني راح اروحله اجيبه و اجي عدج فلوس تنطينه ؟

-اي اي عندي

-زين لعد خلي اخواني يمج اركض بسرعه اصيحه و اجي و بدربي اشوف سلمان وينه ، بس ديربالج على اخواني والله اذا اذيتهم اكسرج فوك امج

-شنوه ؟

-يعني قصدي ديري بالج عليهم وسدي الباب يلا فوتي

مشيت سريع ع الشارع لكيت سلمان سويج كاعد ويا الولد يضحك ، عفته و رحت للمضمد كلت اله هيج و هيج و المرة متكسرة ما اكدر اجيبها طنكر ما يجي للبيت الا هي تجي للعيادة

عفته و مشيت : ديله هذا هم حظي كسرت المرة تالي اني ابتلي بيها

رحت لسلمان و الولد الواكفين، شفت عباس ابن ام الحصة واكف وياهم ، تقربت يمهم : انت هييي سويج لا بس فالح تفر بالشوارع مرت ابوك مريضة كوم امشي وياي يلا

-روحي اتي الوصخة ما عليه اني

-اكلكم تكدرون تساعدوني هذا ما براسه حظ و مرت ابوه واكعه من الدرج ولازم نشيلها للمضمد

الولد هم بيهم همه، كلهم كالو:- يلا امشي

-اكلك عباس روح جيب العربانة الخشب مال الحصة مالتكم خل نشيلها بيها

-ميخالف هسه اجيبها و اجيكم طياره امشوا كبالي واني الحك كم

شو هذا سلمان رعوصة نفش ريشه و يتمشى كدامنه

-شعدك جاي ويانه يلا امشي ولي

-اتي ولي لا ادفرچ جلاق

غميته و مشيت ، رحنا للبيت .. طلع مو ظهرها رجلها ملتوية و متأذاية شالوها الشباب على ظهورهم و خلوها بالعربانه و زفيناها للمضمد يمكن بينا ١٢ واحد اني و اخواني و رغد و سويج و ولد المنطقة

ناس تصفك و ناس تصفر و عباس طاير بالعربانه واحنا وراه، وشايله اثار على جتفي و اهفي بيها وراهم
ماكو واحد بالحي ما شافنا و كال :- ها خير يمعودين

دخلناها للمضمد لف الها رجلها و انطاها عصارة لظهرها و كال الها : لازم ما تتحركين فد ٥ ايام

رجعنا شلناها و خليناها بالعربانه ، جتفي انخلع بس من ورا اثار ... هم خليتها بالعربانه شفت رغد تحاسب بالمضمد رجعتلها :هاا

-يريد بعد ٣ الالف ، خل انروح للبيت انجيب و نجي

- شترجعين دهاج هاج عي هم بوكه و ما نتهنى بيها دخذي
اخذت من عندي ٣ الاف بقت بجيبي بس ٥٠٠
طلعنا اني ورغد شو ذوله ماكو

اباوع يمنى و اشوف عباس طاير بيهم طيران، طكيناها ركضه اني ورغد وراهم ، غير ربك تگبن العربانه و تنگلب

صرخت : اختييييييي انجعصت ولكم ،اثااار
وركضت حيل اجر بيها من جوا حليمة و هاي كامت تبجي و تصرخ من رجلها، و اني اصيح : شيلي روحج اختي انداست مصارييييييييينها

ذوله الشباب يشيلون بالعمصة و خربانين ضحك ، واثار نطت من البجي تأذت، گامت تشتم بيهم و تصيح عليهم : عساكم لا شلتوني كسرتوني ولد ******

هم شبعانين ضحك خلوها بالعربانه و يمشون بيها على كيف، لحد ما وصلناها للبيت و نومناها بفراشها وطلعو الولد .. بقيت اني و رغد دهنه ظهرها بالمسكن و انطيناها العلاج و كلت الها

- عوفيها بغرفتها تنام ترتاح ، وعوفي سلمان يمج خاف تحتاجين شي و خطية شوفي جوعان شيحتاج انطي هو هم اخوج لا تصيرين چلبه انت هم

- اني هم ؟!! ليش منو غيري قصدج

-يعني الا اگلچ امج ؟

-ديار احترمي نفسج

-دولي ، اسمعي شتحتاجين تعاليلي للبيت ماشي ، ولا تنسين التلثتالاف مالتي الداينتجياهن اريدهن باجر البنك مال امج ما مفتح يمي فهمتي ؟

ضحكت : ماشي ماشي اذا ما عندج تعاي هنا يمي بالنهار عطلة و ضوجة

-احاول يلا مع السلامة

طلعت من الغرفة و شلت اثار على اجتافي لكيت اسامة يم سلمان : يلا اسوم ، و انت هيي سويج لا تطلع و تعوف مرت ابوك وحدها انجعم بالبيت و انجب

-انجبي انت يالعورة

مشيت اخذت اخواني و رجعت لكيت امي واكفة بالباب

الأم : وين رحتي و اخذتي اخوتج بهالليل

- ام رغد مريضة و وديناها للمضمد

-و انت شعليج بيها تمرضت ماتت احنا ملنا علاقة تروحين تورطينه بسوالفج الناس ما تتأمن

-والله الناس و الغربه اشرف منكم و امن بيهم اكثر منكم

-السانج بعده ؟ اليشوفج قبل ٥ ساعات يكول هاي مواته بس ا ااها اصحى مني وكلشي ما يصيبج

-بفضلج هاي مو اول مرة حتى استغرب بسببج و بسبب استهتارج خليتي هذا حال بناتج

-لا تتجاوزين

-صيري ام حتى لا اتجاوز، منو بينا ما عانت من وراج
انهار الماتت محتركة لو اللي خلفتيها و صارت من نصيب الزباله لو اني الهذا حالي لو اثار
فهميني منو بينا ما طيحتى حظها

كافي صبغ شعرج ب٣٠٠ ورجليج واضافيرج و جسمج اهم من عدنا .. اهتميتي بحال هالطفلة بكد ما مهتمة تنسقين الحجل ويا السوار

سألتيني وكعدتي وياي و سولفتي كد ما لازمة الموبايل و تخابرين هذا و ذاك

لو عندي ام بيها خير ابوي بعمره ما يتجرأ علينا، انت سبب كل اللي جاي نعانيه ، و الله يطلع حوبتنا بيج ان شاءالله

عفتها و دخلت للغرفة فرشت فراش النا و تمددو اخواني يمي ... صفنت بحالي المثلي هسه بصدمة و منعزله و لا تاكل ولا تشرب و شوف حالي حتى امي مصدومة مني

تعودت اشوف و اتحمل و اتجرع و اعيش عادي ولا كأني صاير بيه شي .. كثرة الطك ع الجسم يدمغ

يربي حتى احساسي ومشاعري مو مثل البنات
يعبرن ينكسرن يبجن ينعزلن اني كلشي ما عندي من البنات ولد بكفشة بت

صفنت صدك شو اني حتى ولا بعمري متخربطة ؟!!
هاي البنات بس يتأثرن يغمى عليهن و يتخربطن عود اني ليش ما اتخربط !!

كسرت صفنتي امي لما دخلت و هي تكول :- الخمسة الأخذتيها مني وينها ؟

ديار:- خلصت

-شخلصها اشتريتني انت و اخوتج الباقي وين

-هاي بس ٥٠٠
شمرتها يم رجليها : و الباقي داينته لاخت سلمان

-عشتو والله ادور عليه هالمسودن و اهله

-اكلج ما تروحين مني ترا ما للي خلكج

-لا تعاي اريد احجي وياج بموضوع

-شنو هو ؟

-تعاي بالغرفة لا كدام اخوانج

كمت من يمهم رحت بغرفتها : شنو الموضوع

-سمعتيني مساعة احجي بالتليفون

-اي سمعتج تتمضحكين هواي

-معليج بضحكي الاريده اگلچ بيه .. عندي شقة بشارع فلسطين هي مو الي بس حجيت بيها راح اجرها الية

-اييه ؟

-شنو اي اطلك من ابوج و نروح نعيش هناكه

-حتى بدل اسماعيل واحد ١٠٠ اسماعيل، و اسماعيل راح و اسماعيل لاخ راجع مو ؟

-اذا اجوني خطار انت شلج علاقة بيهم ؟ انت و اخوتج الكم غرفة خاصة و نظيفة و اخليلكم بيها تلفزيون و اسرة

-تريدين تطلكين اطلكي بالنسبة الية اتحمل هنا احسن ما اروح اتورط وياج، الچلاب الاعرفها احسن من الچلاب الما اعرفها

ما مجبورة بيه روحي اطلكي احسن ما تضلين تسوين كل هالسوالف و انت براس ابوي اني من باجر اطلع ادور شغل اعين نفسي و اخوي و حتى اثار خليها يمي
شوفو حياتكم .. لا انت و لا ابوي الكم علاقة بيه ولا اني الي علاقة بيكم

-الى متى تبقين غبيه و هذا تفكيرج ؟

-لما يموت گلبي مثلج و اكوم ما اهتم ولا اشيل هم هذا جاع وهذا عانى و هذا توجع ..
للأسف ما طلعت عليج

-دكومي كومي ولي من وجهي وجهج بيه سبع لطامات اوي

عفتها و رحت للغرفة، اول ما دخلت .. تضايقت حيل و اني اتذكر الموقف .. كعدت افرك بوجهي وافكر بيا طريقة اخلص منا .

جبتها منا على هنا ما عرفت شسوي
لازم اشتغل سالفة اضل جوا اديهم و تحت حكمهم بعد ما اتحملها
بس شلون ؟

.......عفت كل هالتفكير تمددت بفراشي و فضلت انتقل لعالم خيالي احسن .

الصبح
كعدنا على صوت امي ما رايحة للشغل، رايحة جايبتلنا گيمر عرب ومربى و مسويتلنا جاي وتكعد بينا حتى نتريك وياها

كمنا من النوم غسلنا و كابلناها ع الصينية
اباوعلها الشعر منثور و المكياج و لابسة نفنوف ينكاله (نور و مهند ) مثل اللي تلبسه نور البطلة بالمسلسل التركي نور .. هيج الموديل

اسامة:- ماما طالعة اليوم حلوة

-حبيب ماما انت الحلوة عيونك يروووحي، امممم اني اليوم قررت اكولكم شي و بما انو انتم كبار و اطفالي الاحبهم فحبيت افاتحكم بيه و انطيكم خبر

ديار :- عفت الصمونة من ايدي و باوعتلها

الأم:- قررت اطلق من ابوكم و نعيش بمكان لاخ شكلتو

-رجعتي عدتي الموضوع ؟

-شتكول ماما حبيبي اسامة

اسامة :-ماما اني ما راح اعوف بابا، شكرا اني شبعت ما اريد اتريك

-لك وييين تعااال

ديار:- و اني هم شبعت بالعافية

- يل البوم والله فلا وجه خير انتو و ابقو تحت رحمة اسماعيل يسكر و يصكع على روسكم دا اشوف من اروح اني شلون حتعيشون بدوني، اولكم و تاليكم ترجعون اليه و ما الكم غيري

ما ردينا عليها كعدنا بالاستقبال، و هي تحجي اندكت الباب ، كامت من مكانها .. بس دك الباب قوي نربد البيت

فتحت الباب هي، سمعت صوت ضحى مرت خالد

:- وينها بتج الساقطة وينها تريد تاخذ رجلي مو وييييينج

الأم -حدج عيوني حدج مو بانزين خانه و فايته

ضحى:- لو عندج ذرة مستحى جان لزمتي بتج وربيتيها بواكات الزلم يل ما تستحن برابي.....

دفعتها امي برا و ردتها :- والله لو ما عيونها لام رافد جان عرفت شرد عليج يالعوبة هو لو بيج خير يدور عليج

عدلت زخمت ثوبها و تخصرتلها : و تريدين الصدك رجلج حلو و ينحب ، شلون يمة تغمض بتي حتى ما تشوف الحلوة مالج
وتهزلها بصدرها ..

-والله انتن ساقطات ودايخات بنات شوارع مو مثلجن....

- ساقطات يعيني و شرايده ؟
وتهز بجسمها و متخصرة

-والله اذا بتج كربت من رجلي الا احركجن ..

-والله حبيبتي حلاوتج لا اطلعيها و الجوعان ما تدني نفسه ، الا كوليلي بداعتي سمعت خلودي خلدلد مبورج عد اهلج صدوك ؟

- يا فدوة لالله هو يباوع لشكولجن عابدني عبادة يموت عليه يعشك تراب رجليه

-ههههههههيييييي صدووووك ، مدام هيييج اشعندج ابابي يحلوة
وتهز

.... سمعي بنيتي المثلج مارات عليه هواية بتي لا بحال رجلج ولا بعداله ولو خليت رجلج ابالي اطلكج و ابهذلج و اخليج تفترين و ما تحصلين وبتي تاخذ كلشي، يلا فاركي بابي ولا تشوفيني خلقتج زين يماما

وسدت الباب بوجهه

اندارت باوعتلي : لسة تنكرين انت متحبين خالد ؟

-ما احبه

-لعد شسويتي الهاي و تجت شايشه ؟

-عيبت على وجهي، اخذت موبايل خالد و خابرتها حركت كلبها مثل ما تشمتت بيه و اذتني

-زين تسوين

..... بيت خالد .....

نايم بغرفتي وحدي، ضحى زعلانة و عد اهلها
بس اني و نايم الصبح مثل الكأن اسمع صوت ضحى جوا

رفعت راسي و صدك تدخل ضحى للغرفة

:- اكعد اكعد شوف ويا منو خليتني ، اني احجي ويا ديار و امها الساقطة تطردني لا و تتمركصلي و تهز .........

-رحتي لبيت ديار

-لعد شتريد يمه اسكتلها على عملتها ويايه لا والله ما اسكت و اذا ما اطيح حظها فلا اطلع اسمي ضحى

تنهدت و تعدلت من نومي و كعدت ، هي مستمرة تسولف صياح

-رد عليه ليش ساكت

-كملتي ؟

-كول احجي يلا

سحبت الموبايل من الميز ، طلعت رقم اخوها و خابرت، رد :- هلا ضياء شلون شلونك زين والله الحمدلله ماشية خوية بس ردت اكلك تجي تاخذ اختك مثل ما دخلنا بالمعروف نطلع بالمعروف المرة الما احترمت كلمتي ولا قدرتني تحرم عشرتي وياها

- ياااااا خالد اطلكني

-مع السلامة خوية

-خالد

جريت ايدي منها جريت ملابسي و سويج سيارتي و نزلت بدلت و طلعت .

(بعد مرور ٣ اسابيع )

ماما بلغت ابويه بموضوع الطلاق
.. بس بابا ما رد ولا اجا بقى اسبوع عد اهلها و الوضع سنطة

بهذه الأسابيع ما خليت شي يعتب عليه ما دورته على مود شغل ماكو
رحت لوحدة تطلع تشتغل بالبيوت كلت الها اساعدج و اليطلع منج .. ما رضت كالت : عدي وياي بتي تساعدني
رحت لوحدة خياطة و كلتلها اساعدج و اتعلم منج ما رضت
افتريت ع الأسواق و الدكاكين عاملة اشتغل محد قبل
رحت للسوك و دورت ليما مليت ماكو
ايست من خياتي كلش
واحس ما الي امل اتخلص من اهلي و وضعهم

خالد ما تقربتله ابد
حتى من اباوعه من بعيد يضوج مني ما يتحملني
سمعت من مها عايف مرته عد اهلها و ما يريدها بعد
بس رغم هاي ما رغبني
فبقى شخص ساكن خيالي و بس
افكر و اعيش وياه حياة بخيالي
اما بالواقع فهو يشوف ابليس و ما يشوفني

بيوم .. اجا ابوي دخل علينا
لابس دشداشة بيضة و خاچية مال صلاة و سبحة بيدة

فات علينا لغرفتنا اني و اخواني كعد يمي ، كمت من يمه

- اني يا ولدي تغيرت و الله هداني و بطلت الشرب
باوعلي ... الشرب اللي يأذي بنتي و يخليني اسوي سوالف مو زينه حرمته بعد للأبد و ناويه اقلب وياكم صفحة جديدة ... ديار

-ما رديت
طلع من جيبه موبايل يسمونه (دفتري ) لونه وردي ، هذا الموبايل غالي و مو هواي ناس تشتري

الأب :- هذا اشتريته الج

ما باوعتله ولا رديت

-و اشتريتلكم تلفزيون و دش و ستلايت و اشتريت لاسامة بلي

اسامة تخبل راح حظن بابا و بوسه و صدك بابا الله عليك جبتلي بلي

- اي ، ديار و جبتلج حجابات منا و غاد اريد اشوفج محجبة ممنوع اطلعين مفرعة

حجاها و كام

...بقيت صافنة معقوله هذا بابا

طلع من الغرفة ماما تتصنت كال الها : شوكت ما تريدين الطلاك اني حاضر

جتفت اديها و دارت وجها منه

...راح ، اجت امي فاتت علينا

- دا تحسون اكو شي متغير بأبوكم لو لا ؟

اسامة : اي ماما بابا صاير حباب

ديار : شدا يقصد بهالتصرف

-ما اعرف بس الحلو صار زين وياج و هاي جابلج موبايل حتى احسن من موبايلي بعد شتردين

ديار :- ما ادري يمكن الله هداه ، بس لو مو يهتدي لو يحرك روحه ما اسامحه ولا انسى اللي سواه

.....بالليل جابلنا التلفزيون و الاشياء الكال عنها و شكله النا و انطانه فلوس كال النا:- اشترو بيها ملابس الكم حلوة

الأب :- ديار من اليوم و رايح غرفتكم تنتقل لغرفة امكم ما دامها ناويا ع الطلاك و غرفتكم تفرغوها اريدها مخزن

ميعاد :- مخزن شنو و اني بكيف اطلع و بكيفي لا مو انت التحكمني لو تطردني و تاخذ مكاني و تنطيه بكيفك

اسماعيل: انت اللي دزيت عليه مرتين بموضوع الطلاك مو اني

-ششتغلت و جبت هيج فلوس و دا تحط

-مو شغلج تعرفين

عافها و طلع .... ما اجا بالليل
امي ما صرفلها الوضع بعد ما جانت تتخشلع و تدلع و تريد طلاك هسه غيرت رأيها .. بقت منتظرته الليل كله لحد ما نامت

كعدت ب٦ الصبح للممدرسة بدلت و لبست و انوب كعدت اسامة هم بدلتله و سويت ريوگ تريكنا

كاعدين و اندكت الباب، كام اسامة فتحه
طلع ابوية ..فات للبيت و دخل للمطبخ كعد ويانا ع الصينية و صار ياكل

عفته و كمت لزم ايدي:- اكعدي اريد احجي وياج

-وراي مدرسة اتأخرت

-ديااااار احجي وياج
اني رايد اكلب صفحة وياج انت بالذات
وبس تصير عندي فلوس هواي راح اطلعج برا اعالج الحرك البجسمج كله واخلي الجانت تتشمت بيج تغار منج

درت اله وجهي :- اذا سويت هيج راح اسامحك على كل السويته و راح اكلب صفحة

-راح اسوي، شرط

-شنو ؟

-اريد اخذج وياي

-وين

-لمكان موجودات منج هواية بنات مسلمات عفيفات، تتعلمين منهن شغل

-اني دورت شغل هواي و ما لكيت

-راح تشتغلين و راح تحصلين فلوس تبنين بيها بيت لوحدج حتى ما تحتاجينه لا اني و لا امج

-شنو هذا الشغل

-شغلات نوصيج عليها تنفذيها و بس، مثلا ندزج على بيت ادگين الباب تخترعيلج حجة حتى تفوتين داخل البيت تحفظيلنا مداخل البيت و مخارجة و شنو هو من الداخل و كم واحد بالبيت و هاي هي

-شنو الغاية من هالشغل

-استخبارات و هالامور سرية نساعد بيها الدولة حتى نتخلص من الكفار اللي محتلين ارضنا

-كفار !!

-هسه انت بعدين تفهمين هذا الحجي شكلتي ؟

-ما عندي مانع اشتغل

-عفية اعرفج سبعه على ابوج، يلا هسه روحي لمدرستج

-ماشي

-الا اكول ديار

-ها ؟

-سلمان عندج صداقة وياه مو ؟

-اي ابن المنطقة اعرفه طبعا

- كلش زين روحي لا تتأخري

... اخذت اسامة و رحنا للمدرسة
كملنا الدوام و رجعنا، ماما ماكو بس اثار باقية و ابوية

من شفت اثار وحدها خفت ركضت الها شلتها و فتت بيها لغرفتنا، انصدمت غرفتنا مقفوله ، اجا صوت من وراي

اسماعيل :- غرفتكم صارت بغرفة امكم هذه الغرفة احتاجها

عفتها و مشيت للغرفة مال امي كعدت اثار وحجيت وياها :- بابا اذاج سوالج اوا

بقت ادردم .. الفهمته ممأذيها بالعكس ماخذها للدكان مشتريلها حلويات اشكال الوان

اطمئنيت و بديت ارتاح اكثر لتغير ابوية
خلصنا من اسماعيل السكران وابطالة العرك كأن انولدنا اب جديد

امي عصت بالغرفة ما تقبل تنطيها و كأنوا ما تقبل تطلك فهو عافها ما رد عليها

كمنا انام بالأستقبال و هو بالليل ما يتواجد .. بس بالنهار يجي

... بالليل و احنا نايمين سمعت همس و حركة رجلين بالبيت ، كمت من مكاني .. حاولت افتح باب الأستقبال ما ينفتح

لا منا ولا منا البابين مقفولين
فتحت البردة شفت زلم لابسين دشاديش بيض و ملثمين بلثام اسود

انرعبت كلت :دخلوا علينا حرامية

الصدمة ابويه جان وياهم اشرلهم يفوتون
فاتو اثنين و بيدهم كونية جبيرة و بيها ما اعرف شنو بس كأنوا شايلين احد بيها

شنو هذا ؟
شديصير
و منو هذا البلكونية

ابوية باوعني و اني اشوف من الجام ، تحرك واحد وياه و فات جوا ، انفتحت الباب و واحد ملثم بس العيون طالعة لفني بأيدة و حط السلاح براسي و كال

:- ااااششششش ولا حسسسس.....يتبع

☆☆☆☆☆☆