ليتني استطيع فعلها الحلقة (15)

ليتني استطيع فعلها

 

الحلقة  (15)

حسيت باب الكراج انطبكت ، صحت:- يممممة
ركضت وراها للباب، باوعت لابسه العباية و ماشية

:- عزا العزاني راح الرجال
بقيت افرك بأدية ، بالله شلون وياها الناس هنا كلش محافظين و اقل زلة ع المرة تنطبع مو امي التتبغدد بعبايتها بمشية بغدادية وين تمشي عدهم

عود مال اصبر و انتظر لما تجي و مصخمة وجهي لا والله ما اتحزل اروح البس عباتي و اجيب و استر على رويحتي لشرفلي

جريت الحجاب لفيته و حطيت العباية على راسي، نصيت النار، شلت اثار على متني و رحت

طلعت الفرع مالتنا ، ردت اعبر الشارع و الكا امي واكفة اباب المحل و بيدها قوطية، و كبالها عدل بيت سيد حسين

رحت الها كبل :- يمه تريدين تشهريني انت خافي على سمعتي رحمة لأبوج

ميعاد:- وهاي انت لاحكتني خايفة اخرب سمعتج، يا من طاح حظج اشفتيني ولج لا تخافين اني امج اعرف اتصرف، بس اكلج هو هذا بيت سيد حسين ؟

-يمة شرايدة منهم ؟

-جاي اسألج جاوبي ليش تعلعلين گلبي

-اي هذا ليش السؤال ؟

-مو شفت ابنهم ابو لحية الاجانا فات بهذا البيت

-وانت تراقبينه يمة

-لا اراقبه شنو شعدي وياه، رحت اشتريلي قوطية بيبسي الجو حارو نط كلبي ومحد اكو كلت امشي رجيلاتي

-درجعي يمة لخاطر ربج هنا مو مثل بغداد، المرة صعبة طلعتها

-وشسويت ركصت بالشارع، ماخذه طريقي وراجعه شحده اليفك حلكة غير اشك حلكه بالقندرة
امشي امشي للبيت

دنمشي و گبل لا نوصل لباب بيت السادة، طلع السيد حسين و ابنه جعفر وياه ، رفع راسه السيد و شاف امي ، كال :- يا هلا اليوم والدتج منورتنا

امي لفت نفسها بالعباية و دنكت راسها و حجت :- ينور ايامك حجي هلا بيك عيوني

سيد حسين:- تفضلوا نضيفكم

ديار:- مشكور سيد الأكل ع النار

ميعاد :- والله بنفسي اتعرف على الحجية واسلم عليها واشكرها ديار هواي تحجيلي بس ان شاءالله غير وكت بلكي اذا هاي بالليل نمر عليها و نسلم

السيد:- هلا بيكم بويه بكل وكت

ترخصنا منا و فتنا للفرع مالتنا، و امي تكول :- فدوة شلون زلم لا شالو راسهم ولا باوعو ، بس اكلج يمه شو ما جنهم مليانين حالتهم وسط

-عدهم املاك خير من الله ابو الحجي جان بزاز معروف بكربله بس هم ما يعتنون بالمظاهر ناس بسيطين

-شلون خش بعقلي ابنه ، شلون طول شلون صدر هيبه و لحية ووقار ، يخليج تعشكين الأسلام كوة من حلاته انوب اوجوهم كلها بيض و حمران

-يممممممه

-بعد يومين عرسي ادري والله ادري افتهمت، امشيي يلا

رجعنا للبيت لكيت اسامة واكف بالباب يدك، من شاف ماما ركض الها حظنها و هي دنكت تبوس بيه و تسلم عليه

اخذت ايده و فتنا للبيت و هي ماخذته بحظنها و تسال شلونك و شلونك بالمدرسة و هو يحجيلها عن امتحاناته

جنت ماخذه مكيف بالاقساط و مخليته بغرفة النوم انام عليه اني و سلمان و اسامه .. و سلمان من يجي كبل يفوت للغرفة ينام عليه ..

بعد ما صبيت الغدا امي راحت نامت بغرفتي
من تجا سلمان و شايف امي نايمة بالغرفة و هو ما يكدر ينام .. طنكر يريد ينام بالغرفة

-هاي الاستقبال بيها مكيف و نام

-امج ما احبها يلا طلعيها

-احترم نفسك شنو ما تحب امي، روح نام بالأستقبال و اسكت يلا

-ما انام ، هنا منتظرها تكعد يلا انام
امج البومة

-ترا اكوملك والله

ظل يغلط بس بصوت ناصي يدردم وحده على حظي ما حب امي و استحي منها اكعدها لو اضوجها هي يومين و تروح

بقى كاعد بمكانه لحد ما غفى و هو كاعد، استخطيته ردت اكومه للاستقبال ، كام يزاكط و يدفر بيه ما يقبل احد يكعدة

ظل طول ما امي موجودة هو يدردم هي انتبهت بس ما دارتله بال تعرفه من جان بالمنطقة سويج فما اهتمتله .. بقت يومين وراحت

خلصت من امي انوب سلمان حط كورة ويا كور اثار ما يريدها .. كل شوية و مبجي الطفلة و عندي دراسه تعلعلت من وره سلمان و سواية امي من جابتلي اثار

بيوم امتحاني احتاريت اثار وين احطها
اسامة خلص امتحانات بس مو مال اخليها يمه و امشي صغير وحدهم بالبيت صعبة

رحت دكيت الباب على بيت السادة ، اعرف الحجية تكعد ويا السيد من صلاة الفجر بعد ما تنام

دكيت الباب، طلع الي سيد جعفر ، دنك و اخذ صفحة :- هلا بيج خوية تفضلي

-لا تسلم بس جايه على الحجية

-اي هسه اصيحها الج
راح صاحها و اجا .. طلعتلي الحجية هي سمينة شوية و كصيرة و تلبس فوطة سودة من تمشي جنها بطة حيل احبها

الحجية:- هلا بدويره شلون ييمة تفضلي تفضلي

-هلا بيج خالة شلونج انت صحتج عافيتج

-والله يخاله على الله ، شلونها امتحاناتج ؟

-هل رايحة شوفت عينج لابسة جبة و طالع لأمتحاني بس اختي باقية عندي و احتاريت وين اخليها ما تكدرين تبقيها يمج بين ما ارجع ما اطول والله ساعتين و ارجع

-يا صدك جذب خاله عليمن تحلفين شني تكاطعت الناس ولا يهمج روحي لامتحانج ولا تفكرين احطها على گلبي

-مشكورة خالة ادعيلي الله عليج والله خايفة

-ان شاءالله يخالة اعلى الدرجات بجاه الزهرة ام الحسن، اوكفي جعفر طالع خل اوصيه يوصلج بطريقة اذا طريقه على طريقج ليش تمشين و توصلين الامتحان تعبانه

-والله ياريت انوب الحو حار متنا

-اي والله خالة الحر هذا هم غضب ، جعفررررر يمة ما توصل مرت سيد سلمان بدربك هي بحسبة بتك خطية احارة و وراها امتحان

ما كال لا، بس بدل ملابسه و اجا، كعدت ورا بالسياره و هو كدام يسوق، طلعنا، سألني :- اخوانج ليش يمج ؟

-مو امي عدها شغل ابغداد و عدها سفر و محد الهم هناك فتجيبهم يمي ، ااا صدك سيد اعتذر منك ذاك اليوم كلش خجلت من طلعت امي ما متحشمة بس امي بغدادية يعني طبعها يختلف عن هنا لان هي اصلا ابغداد ما محجبة

جعفر:- لا على بختج لا تكولين هيج، الناس طبايعها تختلف خوما نريد العالم تشبهنا ، و جان الغلط مني وكفت كبال الباب بلايا حذر تعذريلي منها

- ان شاءالله

... وصلني للمدرسة ونزلت امتحن .. جان الامتحان اسلامية و الأسئلة سهلة جاوبت و طلعت من المدرسة على السريع ورجعت لبيت السادة حتى اخذ اثار وارجع ادرس

دكيت الباب طلعت الي مرت ابنهم حيدر وما قبلت اوكف بالباب الا افوت جوا، لكيت الحجية سلمت عليها وشكرتها وردت اخذ اثار

كالت :- شعدج ماخذتها الطفلة انطلقت ويا الجهال تلعب خليها احسن ما تشلع گلبچ هناك و ما تخليج ادرسين روحي

اباوع على اثار مسوية ابن ابنهم مثل الحصان و صاعدة عليه و هو يزحف بيها ،باوعت ضحكتلي و صاحت :- ددار هيلو هيلو (ديار حلو حلو )،

-تروحين وياي لو تبقين

كامت تأشرلي بيدها عود باي ، ضحكت بستها و طلعت

بقيت هاي الفترة كلها بس امتحانات ما مفتهمة من ايامي شي غير القراءة مرات توصل بيه ابجي على كد ما اقرأ و احس ما حافظة بس من اوصل للامتحان زين اجاوب

امي عقدت على عصام و راحت وياه شهر عسل ١٠ ايام بتركيا ، خابرتها نفسيتها مرتاحة و تحجي وياي بفرحة ، رغم سوالفها و مرات اكرهه بس تبقى امي و احبها و افرح من اشوفها فرحانه

...خلصت الأمتحانات مال الثالث .. جان الية يوم سعد
رجعت للبيت اركص واهوس وماخذه البيت طول بعرض و اني اغاني

ما ادري راح انجح او راح ارسب بس المهم خلصت هم و انزاح عن گلبي على كثر ما تعبت بالقراية

فرحت كلش ومن فرحتي كمت للمطبخ اسوي حلويات علمتني عليهم رقية مرت محمد ابن السيد حسين ..
علمتني اسوي محلبي بالكيمر و اسويه طبقات و عليه جلي

فكعدت اتفنن و مرتاحة و كل شويه اتذكر بعد ما ورايه اقراية و اكول :- ايييييي يربي

اني واكفة ع الطباخ اخوط و دخل اسامة و هو ساند سلمان دخله للاستقبال، عقدت حاجبي لا اكدر امشي يحترك الأكل، و اريد اعرف سلمان شبيه، صحت :- اساااااااااامه شبيه سلمان ؟

-رجله توجعه ابو المطعم كالي اسنده و اخذه للبيت يرتاح ..

نصيت النار كلش مشيت للاستقبال و الچمچه بيدي، تفقدت حرارته زينه :- شيوجعك

ويا ما حجيت وكعت قطرة من الچمچه على وجه سلمان كام يصرخ :- الوصخة ميلي عنييييييي

-وسم غير جاي اسأل شبيك ، رجلك توجعك.

-ما توجعني يلا ولي

-ويضربك عرج هو مو صوجك

عفته ورحت اكمل المحلبي ، بس بالي يمه خطية شكله حيل متأذي .. خلصت الحلاوة ضميتها بالثلاجة و رحت كعدت يم رجله افركله

ما حجه بس شكله ارتاح لما كمت افرك بيها:- اخذك للطبيب ؟

سحب رجله :- لا ما اروح

-سلمان مو مال اعناد رجلك متأذاية يعني لازم تروح احسن ما يكصوها الك

-الخايسة صمي حلكج

-لا تغلط لا اكوم اكسرها الك افتهمت ؟

-ولي

... عفته و رحت للغرفة اخابر ماما لأن هي كالتلي من تكملين امتحاناتج كليلي حتى اجي اخذكم لبغداد
كلت اخذه هناك لطبيب زين واشوف شنو علته

دكيت اتصال :- الوو

ميعاد:- هلو ديار بشري اليوم خلصت امتحاناتج مو ؟

-اي ماما خلصت هم و انزاح هسه احس روحي ريشة خفيفة ما عليه حمل

-ان شاءالله يا رب تنجحين و اطلعين احسن معدل

-شكرا، اكول ماما شوكت تجين ؟

-هاي الأيام ، ليش اكو شي ؟

-اي ماما سلمان كلش متأذي خطية مو مال اعوفه و اسكت لازم اخذه طبيب

-دكاترة بكربلاء كومة ما اخذتيه

-لا والله امتحانات هسه خلصت ، فد مرة ابغداد
ومنها اروح اشوفله دكتور

-اي زين لعد باجر اني يمكم

-ماشي

-اثار يمج ؟

-لا يم الحجية مرت السيد

-شو كلش تعلقت بيهم هالمشيطنه

-عدهم جهال و تلعب وياهم تجي هنا گورها و گور اسامه بس يتعلركون و هم هم حبوها

-ماشي ماما حظري غراضج باجر اجيكم اخذكم و نرجع لبغداد

-ماشي

نهيت الأتصال وياها لكيت ، مها مخابرة صار ٣ اسام بس اني ما فاتحة الموبايل ولا امباوعه بيه بسبب امتحاناتي .

اتصلت عليها، ردت :- الوو

مها:- هلو عيني بالثگيلة اخابر عليج ما تردين ولا ترجعين تخابرين

-اليوم كملت امتحاناتي والله هسه يلا شفت ، باجر اجي لبغداد

-يا صلوات على محمد كن كملتي واخيرا راح تجين و اشوفج

-اي والله حيل مشتاقتلج ، شكو ماكو

-الأكو اني حامل و الماكو انت

-صدك حامل !!!

-اي والله

-الف مبروك يارب شكد عليج

-بعدني الشهر الثاني

-مرت خالد هم جابت

-ايييي صلاوات ، شجابت

-بنية بس خطية نفسيتها حيل تعبانة

-قابل بيدها هالناس شبيها ، منو بينا خالق ايد لو رجل غير قدرة الله و هيج الله قدرلها

-ولج دويرة شو صايرة تحجين بالدين هواي ؟

-والله مها بعد السواه بيه ربي و شلون خلصني من ابوي و جابني هنا، التزمت بصلاتي و كمت ادعي و اقرأ قران هواية

-و النعم بالله

-احجيلي خالد شسوا ؟

-شرايده من خالد انت شو هواي مركزة عليه
حجتها بضحكة و مكر

ضحكت :- عابت ما عندي شي بس احب اسمع اخبارة، رغم خطية يخابرني ٣ مرات بس ما جاوبته اعرف بروحي اذا اجاوبة عقلي يسرح و انشغل عن دراستي

مها:- اممممممم

-اكول مها اطفري منا يلا روحي

ظلت تضحك، نهيت الاتصال وياها، لبست حجابي و عباتي و طلعت كاسة مال محلبي و مشيت لبيت السيد

دكيت الباب، طلع الي ابنهم مسلم :- فوتي خوية فوتي الحجية و البنات جوا

-اشكرك
فتت جوا و انطيتهم المحلبي، و اثار اجتني تركض حضنتني

حجت جنتهم :- سويتي محلبي عاشت ايدج مبين طيب ، لازم خلصتي امتحانات

-اي والله خلصت ، و باجر طالعة لبغداد

الحجية :- خير ، شغل لو ونسه ؟

- لا والله حجية اخذ سلمان للدكتور حيل مريض

-يا سودة عليه بعدها رجله توجعه

- اي والله

-جان خليتي واحد من الولد ياخذه ليش اتعبينه البغداد

-لا هناك احسن هو هم مشتاق لمرت ابوه و اخته يشوفهن

-خطية

... الحجية سمعت صوت السيد يحجي ويا ابنه، صاحت :- ابوووو جعفر

اجا :- ها هلا بيهم

ديار:- هلا بيك عمو

الحجية :- سلمان خطية حيل متأذي من رجله

-اها شماله شجاه هم رجله

-اي

-حظري خل ناخذه دكتور

-ما يقبل يظل يغلط بس احجي وياه

-شلون جا يبقى هيج يا بوية ؟

-باجر اخذه لبغداد و اخلي هناك امجد و عمو يجبرونه و ياخذونه

-شعدج يا بوية و تاخذينة، احنا هنا هسه اخلي الولد يلتمون عليه و ياخذونه

-لا هو هسه نايم خطية باجر ماما تجي و ناخذه

-شكثر حدر ايدج فلوس ؟

-٢٥٠ تقريبا

-خليهن مصرف الج انا انطيج فلوس الدكتور و العلاج و شيصير وياه خابريني مو تنسين

-ان شاءالله سيد

راح لغرفته طلع الي ٥٠٠ الف و كال:- لا تقصرين وياه ابيش ما يكون علاجة جيبي هاي خمسمية الف فلوس كراويكم و و العلاج

-سيد عندي والله

-خليهن حدر ايدج بوية اذا هو مريض و ما يشتغل منين تجيبين بعد، خليهن يفيدنج و صيري سباعية بنيتي و ديري بالج على زلمتج

-ان شاءالله

سلمت عليهم اخذت اثار و رحت للبيت، كعدتهم غديتهم ووكلتهم حلاوة و خليتهم يباوعون تلفزيون

رحت يم سلمان افرك برجله خطية بعده ما نايم من الوجع :- ليش ما تاكل ؟

-ما اريد

-سويت حلاوة طيبة خل اجيبلك

-ما اريد

-لخاطري انت مو تحبني ؟ يلا حتى باجر اخذك لبغداد و نروح لحليمة العمصة و رغيدة الوصخه

شال راسه :- كولي والله ؟

-اي والله باجر ماما تجي و تاخذنه

رجع راسه:- امج الوصخة ما احبها

-خب تروحلها فدوة لا تحجي على امي

-ولي

-خوش لعد باجر راح نروح اني و اسامة و اثار و نخليك وحدك

بقى يدردم و هو ديار وجهه ، رحت جبتله محلبي، وكعدت اغريه حتى ياكل، ابو بطن بس شاف كعد على حيله .. اخذ الخاشوكة و كام ياكل

برمشة عين خلصها و كال :- بعد

-اسم الله الستار شنو شربتها ؟ خل اصبلك غدا

-لا اريد من هاي بعد

رحت جبتله ثاني .. و ثالثة .. 5 يلا كال :- شبعت

-لا عوزها بعد اكلني غير بعد ما بقيتلي

دار وجهه و نام .. غطيته ورحت احظر ملابسنا لباجر
حظرت الجنط و طلعت المغرب صليت جماعة بصحن الأمام الحسين و توجهت للامام العباس زرته و دعيت الله لسلمان بشفاء رجله ويكومه النا بالسلامة

رجعت للبيت سويت اكل لسلمان و خليت الصينية يمه :هو عود من يكعد ياكل
و طفيت البيت نومت اخوتي ونمت

ثاني يوم ب٩ الصبح اندكت الباب، طلعت امي سلمت عليها و اثار و اسامة ركضو يحضنون بيها

اباوعلها لابسة البنطرون اسود و القميص چويتي و ردانه لحد العكس مال ايدها و الحجاب ذابته ذب على شعرها :- هيج مشيت بالفرع ؟

-ليش و شبيه

-يمه هنا ما تمشي عدهم

-عدهم مو عدي و بعدين اني جاية اخذكم و اروح بسرعة مو متل كعدة حتى البس جبه و اجيج

انطيني الجنط يلا سيارتي ع الشارع

-سيارتج شنو ؟ اجيتي بسيارة خاصة ؟

-اي لعد بشنو اخذكم

-سيارة عصام جبتيها ؟

-اكلج بنيتي انت تسمعين صفح ؟ جاي اكلج سيارتي

-شوكت اشتريتي سيارة ؟

-عصام اخذها الية بمناسبة زواجنا ، امشي بعدين نحجي يلا ، مستعجلة

-اخذت ايد اثار و اندارت حتى تطلع، اني و اسامة و كمت سلمان ، ما يقبل يمشي من كتله :- رغيدة مريضة نريد نروحله
طربگ كبالي جنه حصان

كلت لاسامة :- اسنده خطية

شلت الجنط وحدة فوك جتفي و الثانية بيدي و امشي، البشارع يباوعون لامي الكعب مالتها هالعلوة و تتمايل بمشيتها جنها عارضة ازياء .. نظراتهم الها و كأنها كائن غريب و اني امشي وراها اهفي بعباتي و حجابي صفح من وره الجنطة العلى جتفي چني وحدة مجدية

وصلنا السيارتها، بيضة عالية حديثة تجنن ، حطيت الجنط بالكاع و بقيت اباوع :- معقولة هاي السيارة لأمي !!؟

فات السيد حسين بسيارة ابنه جعفر، شافنا السيد صف السيارة ونزل ، نصه عيونه للكاع و حجه :- گواكم الله بويه، رايحين ؟

اندارت امي :- هلا حجي شلونك، شلون صحتك عافيتك، الحجية شلونها

-الحمد لله انتم شلونكم ؟

-بخير، ماخذتهم لبغداد

-ما كعدتوا ؟

-لا والله حجي مستعجلين ، دايم كرمكم ان شاءالله

-هلا بيكم بوية
باوع عليه:- محتاجة شي بنيتي ؟

ديار:- عساك سالم عمو سلملي ع العلوية هواي

السيد :- ان شاءالله بويةيوصل، مودعين بالله ، يالله

صعدت امي السيارة، و وكف الحجي يساعدعا ترجع السيارة بلاما اطخ لحد ما طلعنا بسلامة، شال ايده ولوح النا :- مع السلامة
وراح صعد بسيارة ابنه

ميعاد:- والله هالحجي ماكو منه طيب واخلاقه حلوة

ديار:- سيد حسين وردة لو ما هو الله يعلم بحالي، الا صدك ماما شلون اشترالج عصام سيارة ؟

-غير هدية زواجنا يا ماما

-والله خوش، توقعت ما يتزوجج ولا يريدج

-انا امج يا ديار غير ازين شاربه بالقندرة من يلعب عليه

-بس كون توفيله و ما تلعبين وياه

اندرت عليه مبتسمة:- والله يا ماما اني حاجتي لو تصير يم چلب اگوم اصيحله (حجي چلوب) و عصام هسه فايدني

ديار:- يعني ما ناوية تكملين وياه ؟

-ما ادري الله كريم ، رجلج اشلونه ما صار زين

-لا والله على وضعه بعده يتألم
باوعتله من مراية السيارة:- ها سلمان وصخة اني لو زينه

دار وجهه عنه و كام يدردم، حجت بضحكة :- الظاهر بعدني وصخه بعينه و ما يريدني

وصلتنا لبيتها ، نزلنا سبحنا من حر الطريق و ارتاحينا و نمنا ما كعدنا غير ورا المغرب ، كالت ماما :- شنو رأيكم اخذكم فرة بالسيارة اونسكم هنا ؟

اسامة :- اي ماما لي الله عليج

اثار كامت تكمز عود تعبر عن فرحها
كلت الها:- ياريت نتونس شوية نغير جو

ميعاد:- يلا گوموا

رحت ردت البس جبة، كالتلي اخذ ملابس مني عندي ملابس تجي على كدج و اطلعي لا تحنطين نفسج بالجبة

صدك رحت لكنتورها اخذت ملابس حلوة ناسبتني و لبست حجاب فوكاه ، باوعت نفسي حلوة ادية المحتركة ووجهي الما بيه روح

طلعنا وياها بالسيارة، شغلت النا اغنية ( طلعت حرامية) واثار و اسامة كاموا يركصون عليها و سلمان يصفك حيل ....فرحانين

كعدتنا بمطعم و كال النا :- اطلبوا
وكعدنا كل واحد يطلب شكل، باوعت لسلمان و كالت اله :- هو ولك سويج حبيتني لا

دا وجهه عنها و دردم :- استغف الله غير تعوفني الوصخة

ديار:- ابو استغف الله اتأدب لا اهفك بالماعون

،جع دار وجهه و يدردم :- استغف الله استغف الله

امي ضحكت و كالتلي :- عوفي
خلصتا اكل دفعت فلوس جان المبلغ ٨٧ الف ، جكتهن مرة وحدة ولا ابالها
استغربت امي الجانت تقطر عليه الالف من جنت ابيت ابوية شكد لعد مدللها و منطيها عصام

طلعنا من المطعم سألتها
ديار:- اكلج اذا عصام هلكد ينطيج فلوس و مدللج الله يعلم زوجته الأولى شكد مدلله

ضحكت ضحكة طويلة :- منين يا حسرة عباية جربة و يقطر عليها بالقطارة

-الله عليج ؟

-اي والله شفتها مرة لابسة كلابية و فوكاها عباية وملفلفها

-ليش ؟

-لأن ذيج زوجته كدام العالم و الناس شيكولون مفلكح عرضه؟ فباقي يلفلف بيها وطم بيها ، بس اني ماخذني حتى يتونس ويشوف الدنيا بيه فأكيد اذا يريد الونسة ينطيني المقابل خوما السواد عيونه ماخذته
فيد و استفيد

-عابتله شكد اكره هيج زلم

-اكثرهم هيج يمه على نسوانهم شديد عصيب و على المتعه مالته يجيب و يكوم.

-تعرفين نفسج متعه عنده وراضية

-اني اتمتع بيه مو هو، شبيج انت ماما هم ذوله براسهم عقول عبالهم يتمتعون بالنسوان ميدري هي المستفادة ، هم رجال يونسها و هم فلوس مالية جيبها بس زواج

-محلو هيج عبالي حب و علاقتكم حلوة

-لا تصدكين اكو حب بالدنيا، كل شي بهاي الدنيا مصلحة او وقت و كل واحد يمل الأخر و بعدها تبدي لعبة الفار و البزون لو عرك لو واحد يركض ورا اللاخ الشارد منه

هزيت ايدي، معجبني الكلام نظرياتها بالحياة نظرة استخفاف ... منطقها ابد ما بيه روح الأيمان
من عشت بكربلاء شفت حياة غير الحياة اللي تشوفها امي .. ناس تتسابق حتى تقرأ قرأن لو تساعد انسان لو يكعدون يتسائلون:- شنو الصلاة اليوم ؟
لو الزيارة الجاية ليا امام
صح اكو قال و قلت و ناس مو زينة مو الكل سوية، بس من عشت بكربلاء تغيرت من شخصيتي هواي
حتى بطلت اكون عدائية او احقد على غيري

....ثاني يوم اخذتنا ماما الصبح لبيت عمو ابو امجد، بقتنا هناك و طلعت لشغلها ..

دخلت سلمنا عليهم واخذونا بالأحضان ، خطية حيل فرحوا بينا ... و كعدوا يستفسرون عن احوالنا ..
كلت الهم :- جايه على مود سلمان رجله توجعه
بقوا يسألون عن حال رجله و شصاير و شلونكم وضعكم

كل هالكلام وسلمان واكف ما قبل يكعد يريد يروح لبيت ابوه يسلم على مرت ابوه و اخته، ويلح حتى اروح وياه، اخر شي كلت اله :- روح ما اروح وياك ما تعبن نفسهن يشألن علينه بأصعب الظروف رايحتلهن هسه اسأل عليهن شكو .. روح الهم انو معليه بيك

انطاني غمة و مشى ضايج لأن ما قبلت
بيت ابو امجد سوولنا سفرة ع الغدا و كلنا التمينا و ضحك و سوالف و اجت امي كملت الكعدة

كملنا للساعة ٤ كلت الها :- كومي اخذيني للحارثية اروح على طبيب وصفوه الية كلش زين

ميعاد:- شيراد الها يا امي اركبي منا و روحي والله ما بيه حيل كلش تعبانه اريد اغفالي ساعة

عفتها و بدلت حت اروح لسلمان ابيت ابو اخذه و امشي، طلعت من بيت ابو امجد، لكيت خالد كبالي مخلي بناته بالسيارة مشغل الهن اغاني و هن يكمزن و هو منطيني ظهره يصور بيهن

بقيت واكفة اباوع عليه، كص العن صورة و كام يهزلهن بالكامرة و يهوش وياهن و هنا يلعبن بشعرهن شعر شعر
ابتسمت، و كلت :- الله يديم هالفرح

اندار بسرعة، باوعلي فتح عيونه :- لك هلااااا اليوم هنا، شو ما ادري

تقربت اله بضحكة :- شلونك بالعافية و بالخير ع المولوده الجديدة

-الله يبارك بيج، من شوكت انت هنا

-البارحة اجينا البغداد و اليوم الصبح اجينا لبيت عمو ابو امجد

-من الصبح متواجد بس محد كالي، بس سألت عن هاي السيارة المن واكفة اباب بيت عمي بس ما عرفت

-سيارة امي هي الجابتنه

-ايابه ولج منين جابت هيج سيارة

-زوجها عصام جابالهياه

-تزوجت !!!!!؟

ضحكت :- اي

-والله عمي ما تنكدر، الا كليلي وين ما وين خابرت عليج كم مره بس ما رديتي

-امتحانات اول البارحة يلا خلصت، كلت اليوم بالليل اجيكم اشوف بتك

-كل الهلا و الله ظال بالي عليج كلت شصار وياها و هيج ما ترد .. حتى طخ بعقلي اجيج

-لا ان شاءالله اليوم بالليل اجيكم، هسه اريد اروح

-وين

صاحن بناته :- يلا بابا تعاااال

اندار عليهن:- هسه باباتي دقيقة

ابتسمت : مشغلهم رقاصات

ضحك:- شسوي المرة جايبة بس نفسيتها تعبانة

-لأن عود جابت ابنية

-اي والله، هدور الوالدة الله يحفظها ما تسكت و الخوات كل وحدة تجي تسمعها حجاية، شتكول باقي اصبر بيها و انفها عنها من لا جارة هل اخذت البنات منها حتى اخليها ترتاح شوية

-ليش ما تطلع بيت وحدك

-والله مفكر بهالسالفة بعد الصار ، ان شاءالله بس تكوم على حيلها ائجر بيت قريب و ننتقل بيه

-احسنلك يمعود تخلص من هاي حجت و ذيج كالت

-شنسوي هاي بعد، انت وين رايحة ؟

-ماخذة سلمان للدكتور

-خير ان شاءالله شبي ؟

-رجله ورايحه اشوف شبيه

-وحدج ؟

-لا اني وياه غير

-قصدي تاخذينه وحدج

-اي منا اخذ تكسي و اروح

-دصعدي بابا اصعدي اني اخذج

-لا والله ابقى ونس بناتك خطية ما عليه شي تكسي يشمرني اباب الدكتور

-بناتي اخذهن وياي صدك جذب دصعدي

صعد بناته و سد عليهم الباب و صعدت يمه، سأل:- صيحي سلمان

-ابيت ابوه

-ها سهله

لاف السيارة وطلع لبيت اهل سلمان،صف بالباب نزلت دكيت الباب، طلعتلي رغيدة، كلت الها :- صيحي سلمان

-وشبيج كاتلين ابوج ما تسلمين ما تفوتين

-والله مو اشوفجن كطعتن ارواحجن انت و امج علينا بالسؤال، لو تعبت رجليكم من الجية و الروحة علينا بكربلاء

-غير انت اخذتي ورحت لا اخذتي رأينا لا كلت النا بين ليلة و يوم طلعتي و ما سألتي

-اي مو جنت ضايجة ورحت شهر عسل اتفسح بكربلة، ما تصيحن اخوج بله و تكرميني بسكوتج

فاتت و هي تهز بأيدها، عفت وصعدت بسيارة خالد ، كعدت ورا يم بناته من اجا سلمان اشرتله يصعد يم خالد .. صعد و بقى خالد يحجي وياه و يسأله

شلون فاد خالد بالأجوبة، شيسأل خالد يجاوبه (معليك) حتى سكت الولد بعد ما سأل ومشاها بضحكة

وصلنا للدكتور صعدنا للدكتور حجزنا، كالت السكرتيرة:- ساعتين و يوصلكم الحجز انتظروا برا اذا تكدرون

نزلت الخالد كلت اله، حجه :- ابقي هنا اصعد احجي وياها و انزل

صدك صعد شوية و كال:- اصعدي ادخلج فوري

ديار :- شلون قبلت ؟

ابتسم :- ملج علاقة فوتي

رحنا صعدنا، طلع مراجع و دخلتنا بسرعة
شافه الدكتور و فحصه ، طلب تحاليل و اشعة
نزلت الخالد كال :- اكعدي يم البنات اني اخذ سلمان اكملهن و ارجعلج

بقيت يمهن و هم راحو، اخذتهن للاسواق، اشتريتلهن علاكة حلويات ب5 الاف ، هم عيب خطية يفر ويانا عاد نردله ولو قليل.

كعدتهن بالسيارة و سكتتهن بالحلويات بقن بس ياكلن ويدردمن بيناتهن .. اباوعلهن شلون حلوات العيون على ابوهن اللون بين الأخضر والاصفر و الشعر بيه لمحة شگار و الملامح على امهن، ضحى هم حلوة تخبل.

ابوع عليهن، شلون نظافة شلون ترتيب يلمعن ، اختي اثار حلوة الملامح بس شوية ملحة لو اجلفها بسيم هذا لونها، بس بناته لا بيضات حلوات.

اجا هو شافهن طاشت الجبس على الكشن، صاح :- لا يربك شمسوياااااات، نعلعلا الخلفجن ليييش مو منظف الكشن يا بابا

فتح الباب نزلهن و بقى ينظف بالسيارة
ديار :- اني اشتريتلهن خطية حتى يسكتن

خالد:-يمعودة ليش كلفتي نفسج قبل شوية مشتريلهن و كراتين حلويات مصفطلهن بالكنتور بس ذن ااااخ منهن

-يسكتن خطية

-مشكورة يابه، انزلي اخذي سلمان و اصعدي للدكتور كملت التحاليل و الاشعاع

-شكد صارن فلوس الأشعة و التحاليل ؟

-اصعدييي

-لا الله عليك

-تره عيب عليج والله

ابتسمتله:- مشكور الله يحفظك ان شاءالله

اخذت سلمان و صعدت للدكتور اخذ نظرة ، وكتبله علاح و كال :- يلتزم بهذا العلاج اسبوعين و يرجعلي اذا شفتا نتيجة خير على خير و اذا لا،مضظرين نجريله عملية

- يعني حالته مو زينه دكتور

-حاليا لا واذا بقى على هذا الوضع شيئا فشيء تتعب رجله و تسكط .. التزموا و ارجعولي بعد اسبوعين

حيل اتضايقت من سمعت هشكل، نزلت كلت الخالد اللي كاله اليه الدكتور، بقى يصبر عليه

كالت السلمان:- اصعد بالسيارة بس اجيب العلاج

خالد :- اكعدي اني اجيب

ما قبلت بقيت احلف بيه حتى ميروح، اعرفه يدفع فلوس العلاج .. خطية هو كوة امشي اموره بالأستوديو

رحت للصيدلية انطيته الراجيتة جمعلي العلاج و كالي :- السعر ٢٣٠ الف

بقيت صافنه بوجهه، هذا السعر صدك لو ناصب عليه
هو عرفني من باوعت بوجه، حجة :- العلاج قوي و كاتبلج لستة ابر لازم ياخذهم و هذا السعر

طلعت و اني احجي:- هم زين الله السيد انطاني فلوس بس الكشفية ٣٠ الف هاي عود التحاليل و الاشعة دفعهن خالد تالي طلع العلاج بعد اغلى، عود اني فرحانه بروحي عدي ٢٥٠ الف اعالج بيهن سلمان ، زين الماعنده شلون يموت !!؟ الله يرحم بحال الفقير على هاي الدنيا الگشرة

انطيته فلوس و اخذت العلاج، ورجعت الخالد، نهى اتصاله ويا:- خابرت الوالدة اليوم عشاكم يمنا

-ليش هالزحمة نجي نشوف الطفلة و نروح

-رحمة رحمة اصعدي يلا

صعدنا اخذنا وصلنا لبيت عمه و هو اخذ بناته للبيت، نزلت حجيت لبيت عمو على سلمان و اللي كاله الية الدكتور و كلت الأمي :- خالد عازمنا ابيت اهله نتعشى عدهم و نروح للبيت

ميعاد:- يلا خلي نتونس شوية وياهم، اكوم ارتب نفسي

صعدت لغرفة مها فيرت الشعر و رسمت المكياج و تعطرت و اني هدومي نفسهن الرحت بيهن للدكتور عود شوية رحمت بحال وجهي و غسلته بصابونه

وبقيت حاطة ايدي و اباوع لأمي و هي تتحظر عروس على اخر حباية .. لفت الحجاب برهاوة على الشعر و كالتلي :- يلا

كمت نزلت وياها، انتبه عليها ابو امجد:- ام ديار مو جنتي عباية وين راحت

-راحت ويا اهلها حجي هاي الدنيا كل يوم بلون و شكل

ابتسم بس شكلة ما عاجبه، التفتت عليها:- كلتيلهم على زواج

-اي سولفتلهم امشي

-ما عجبهم مو ؟

-ومنتظرة احد يعجبه يمة ؟ فدوة دمشي بنيتي امشي

مشيت وياها ورحنا لبيت ابو خالد، فتنا سلمنا و نظرات الأعجاب بأمي واضحة .. متعجبين بمظهرها الجديد ، جانت تلبس فستان و عليه عباية

هسه البنطرون و القميص راسم جسمها و الحجلب اسمه على راسها .. بوستهم و كعدت تسأل :- شلونكم شخباركم بالعافية و بالخير كالو صاير عدكم طفل جديد

ام رافد :- منين كلها يلا بنية

ميعاد:- و شبيها خالة البنية ما اجيتي انت للدنيا بنية ؟ بس تكونين زلمة و ما ندري بيج يا ام رافد
وضحكت

ام رافد ردتها بضحكة :- لا والله بس خطية خويلد اريدله وليد

ميعاد :- البطن الي تجيب بنية تجيب وليد كلها بيد الله، شلونج خالة ضحى

ضحى:- الحمدلله على الله

منى :- خالة متغيرة ما جنج انت

ميعاد:- هاي الدنيا يخالة محد يضل على حاله، رافد رجلج شلونه

منى :- بخير الحمدلله

ام رافد من يمها حجت :- رافد اخ منه يصلي على ذيال مرته يموت عليها

منى باوعت بوجه ضحى، ضحى باوعتلها مستغربة و تضحك ، و امي سوت (اح ) و كالت:- الله يحفظهم

اني باقية اتفرج بس احس الاجواء متوترة ام رافد مو نفسها القديمة احسها ما راغبة جيتنا ، رغم اني تزوجت ما متقربه يم خالد بس حتى ويا امي مدري شبيها.

دخل خالد بيده علاليك حطعن بالكاع و التفت لأمي:- ام ديار الله يساعدج

ميعاد:- هلا يبعد گلبي هلا بسورها و نورها شلونك يعيني ؟

ضحك و هو يكولها : بخير الحمدلله

ميعاد:- بالعافية و بالخير على الطفلة الجديدة تتربى بعزكم و دلالكم ان شاءالله

خالد:- الله يبارك بيج
بعده ما مكمل حجي ام رافد عينها على العلاليك، حجت :- شو اليوم تنگل شکو

خزرها :- شبيج يمه

ميعاد:- طيب و سخي و معدل على ابوه عليمن يطلع اذا ابو رافد الزلمة العدل ابوه، هذا الشبل من ذاك الأسد

ام رافد :- يا ميعاد و اني شبيه ؟

ميعاد:- منو جايب طرواج بشر يا ام رافد شجاج

ام رافد :- مو طلع المعدل و اني الما الي ذكر

ميعاد:- شسويلج اذا انت تحاسبينه على هالكم علاكة و احنا كاعدين....... قاطعها خالد حتى ينهي المجادلة البينهم و حجة

خالد:- بالعافية ع السيارة ام ديار شايفة الخير ان شلءالله

.. هو قصد شي و امي فهمته، ضحكت ضحكة طويلة :- الله يعافيك عيوني مكلتلي شلونها
ورفعتله حواجبها

-الا تووووب

دخل ابو رافد ، صاح :- يا هلا و يا مرحبا زارتنا البركة

كامت امي على حيلها :- البركة بيك ابو رافد شلونك شلون عافيتك شلون صحتك هسه جنه نحجي بيك والله

....دا تسلم دخل رافد، بقى صافن :- هاي اليوم منو هنا شنو هالمفاجئة ام اسامة هنا

ميعاد:- هلا بالمعدل شلونك يابه

رافد : الحمدلله، شلون مفاجئة حلوة، هلا بجيتكم يابه شلونكم شخباركم

ميعاد:- بخير الحمدلله

بقى يسلم عليها ابو رافد، و هي تحجي وياهم، التفتت لخالد :- لعد الطفلة وين اريد اشوفها

التفت لضحى:- ضحى نزلي الطفلة

ضحى:- نايمة

خالد:- اي دنزليها خل يشوفونها

-دا اكولك نايمة

انغث من جوابها، خزرها و باوعلي :- تكدرين تصعدين فوك ؟

-لا عوفها اذا صدك نايمة

-يربج هي بت انفاس خوما تلكيها تلعب بالشارع دكومي

كام و كمت وياه، صعد هو كبالي و اني وراه، دخل للغرفة باوعت بالغرفة هوسة، هو كام يبرر :- عذرينا هوسه صايرة ضحى مريضة خطية فمااا...

قاطعته :- قابل غربة يمعود نعرف البنية نفسه شوفني الطفله بلا

شالها من مهدها باسها و كال تعاي، تقرب يمها :- اوووي كلش صغيرة

-اي صارت قبل اوانها

-تجنن اوووي

انطينياها ، خلاها بأيدي:- هاي اذا صارت عندي هيج طفله يمكن اكلها

ضحك و كال:- ان شاءالله الله يرزقج بطفلة تشبها

اباوع بالطفلة و جاوبت بغباء:- منين اجيبها يحظي

ضحك:- غير متزوجة انت يربج منين قابل
...شكد تفشلت ما عرفت شحجي بعد

فاتت ضحى:- لا عفية ديار لا تشيليها ما احب الطفلة تنشال

خالد خزرها و كال:- بقيها بقيها خل اصورها

ضحى :- هسه تذكرت تصورها عوفها خالد

خالد:- ضحى شبيج
حجاها بخزرة

عفت الطفلة و طلعت من الغرفة و نزلت ، رافد يحجي ويا رائد و يكوله :- خايب منين وكعت الشمس اليوم، فلك اسود مو مو مرة حلقوم

التفت شافني وراه، ارتبك :- هلا خوية ديار شلونج

ابتسمتله :- زينة

نزل خالد وراي، حجت امي :- شنو خايفين على الطفلة ما تنزلوها .. جيبها خل اندلعها

خالد:- جاي ترضع بيها امها هسه تنزلها امها

ام رافد :- والله مسكين هلولد هذا اريد ازوجه بلكت الله يصير عنده ولد

خالد:- يمه رحمة لوالديج
حجاها و هو يأشرلها فوك على ضحى:- اجفينا شر هالكلام كافي

كعدت يم امي، حجه ابو رافد :- عمو لعد وين رجلج ليش ما جاي على العشا

ديار :- عمو راح لبيت اهله

-شلونكم بكربلاء
فتح وياي سالفة و هو يسألني على وضعي

......
رافد .. يهمس :- ولك خويلد شتكول اذا اودي المرة الليلة لأهلها

خالد:- اني اكول تسكت و تستر على رويحتك اشرفلك لا تكوم امي و مريتك والله يكسرن ضلوعك و اني ما بيه حيل ادافعلك

رافد :- لا ينذل خايب اني اخوك الجبير
التفت لرائد:- خايب رويد انا اخوك

رائد:- والله يا رافد هالطركاعة تستحق المغامرة ، چيت بعد اخوك و اني وراك

-ابن الوادم وراي وين احترم لا بالنعال على وجهك

-نتشاقى وياك خوية فوت بزودك واني و خالد نسدسدلك

-عفية بأخوي مو مثل هذا تف على وجهك يا نذل

خالد :- منى اذا احد كالج تروحين لأهلج لا تروحين ، نصيحة ابلاش و بكيفج

بعدني ما مكمل حجايتي، اجتني دفرة من رافد
ضحكنا بصوت عالي ، التفت الوالد وكلها باوعت

ابو رافد :- ها شبيكم

رافد"- امي وصت خالد على صمون ما جاي يروح ، دكوم يا خالد شبيك دكوم

ام رافد :- يا شوكت اني وصيت

رافد :- اكوم اجيب بنفسي اشرفلي، تف عليكم يا عارات

خالد:- احسنت بارك الله بيك
حجيتها كوة و رائد يمي بس يهز من الضحك نريد نسكت يباوعولنا شكد عيب

منى :- شبيكم

رافد :- روحي انت شوفي العشى خلص لولا، اني الكم اخوتي العار

خالد :- ما اريد اصدمك رافد روح

رافد :- شكو ولك

-توكل جيب صمون

منى:- ترا خابزين يا صمون

رافد :- غير لطشت بت المنعول سالفة اني و اخوتي حاطة روحج ليش يمكن جاي نفشر جاي نصخم براس ابوج امشيييي

ديار :- اباوعلهم شبعانين ضحك بيناتهم .. و اسأل نفسي (شبيهم ؟!)

طلع رافد برا، و خالد و رائد كاعدين على نفس القنفة ، طلع و رجع رافد دنى وكعد بنصهم

رافد :- انت يالنذل لا تبقى بس كاعد و مركز بديار نسقلي بعد اخوك

خالد:- يا ديار ابنل ابنل المرة متزوجة

رافد:- ولك خويلد علينا مو ثلج بالدهن گلينا ، مشيهن على غيري بعد اخوك

خالد:- خايب ولك اسكت مو ما اريد اصدمك

رافد :- خايب دروووح

ديار :- ام رافد حيل متضايقة من وجودنا طول الكعدة و هي تسمعنا حجي و تحجي عن المتزوجات اليدورن على ارجولتهن الفهمته جاي تقصدني لأن شافتني صعدت ويا خالد

همست لأمي:- يوم اني اكول لو نروح احسن شو احس الجو متوتر ووجودنا ما مرغبوب بيه

ميعاد:- ليش ؟

-ام رافد جاي تبسمر و تسمع حجي و تغث و ما اريد انغث اكثر

-يمه شو صايرة غمة شجاج؟! جنتي اليغثج تفوتين بعينه ، هسه تعوفين و تمشين

-ما الي خلك احد كومي

-عيب الناس مسويلنا عشى، نتعشى ابيتها و نضحك و شوفي امج شراح تسوي بيها

ميعاد:- والله ياابو رافد بالعافية عليك عندك شلون ولد درة مال الله

رافد :- احم من طيب اصلج ام اسامة

ميعاد:- والله قبل شوية اكول شلون ولد على ابوهم زلمة معدل و معزب هنيال الحاويتك بيك

رافد :- ولكم هاي شو جنها كلبت على ابوي

خالد:- غزل مزدوج، بس ما اريد اصدمك

ام رافد ما اتحملت كلمة امي، حيل ضاجت و جناينها بيناتهن يضحكن ردتها بقلة احترام :- شو هواي مدحتي بأبو رافد لازم سوكج محد مشتري منه

ميعاد:- يا شجاج ام رافد ترا ابو رافد بحسبة اخوي، مو اني المحد يشتري بسوكي، الحمدلله تزوجت و مو اي احد لواء بالجيش و عايشة بخيره
و فرت بسويج سيارتها بأيدها

رافد يكح بقوة و خالد و رائد يضحكون و يدكون على ظهره

خالد :- مو كلت الك ما اريد اصدمك

-تف عليك يا سكط
كام طلع برا

ابو رافد يندس بمرته .. كعدة كوة راهمة ماكو احد طايق احد ...

ام رافد ما طايقة امي ولا طايقتني
و ضحى عاقدة حواجبها و واكفة يم الدرج
و منى ضايجة مدري شبيها

بس الولد يضحكون

كوة انصبت السفرة وكعدنا ناكل، و ابو رافد.يسأل امي على زواجها الجديد و امي انطلقت تحجي بعصام

ضحى و منى وحدة تهمس بأذن اللخ
كملنا اكل و نزل خالد بنته، كامت امي اخذتها منها و هي تكول :- يا صلوات على محمد على ابوها تكتل

خالد مبتسم و ضحى واكفة تباوع بدون ردت فعل، وكفت اني ويا امي اباوعلها، شلت ٢٥ الف خليت بگماط الطفلة

خالد:- رجعي

-كل هذا وقليل بحقك يمعود ليش انسى وكفاتك اني

-والله ازعل بس تخلين

-لا والله ما اخذها

هز راسه و رجعت الفلوس لكماط البنية ، و امي حطت ١٠ الاف و ضحى ترد بيها و تكولها (جيتكم كافي )

سلمنا عليهم و دعينا للبنية بالصحة و السلامة و طلعنا، اثار لزمت ايدي :- ديو ديو هاج

باوعت الفلوس بأيدها، التفتت على خالد :- ميصير هيج

-ما الج دخل انت هدية مني لاثار

ضحكت و طلعوا يوصلونا للباب، و هو يكول :- لا تترددين لو احتاجيتي و طمنيني على حالة سلمان

ان شاءالله ..

طلعنا منهم رحنا لبيت ابو امجد سلمنا عليهم و ودعناهم و طلعنا لبيت ابو سلمان اخذنا و رحنا للبيت

.......

خالد :- يمه قانعة بتصرفج اليوم ؟ ترا كلش مو حلو

ابو رافد :- و ما اله داعي يعني كلش عيب من تكليلها مخلية عينج على ابو رافد و هي ابيتنا ام ديار من زما نعرفها و ما طلع منها العيب

ام رافد:- وين ورضيت استقبلهن المثلهن من الباب اطردهم

خالد:- يمه ترا اني اللي عزمتهم و هم خطاري جان المفروض تحترمين الخاطري اذا مو لخاطر العيب

ام رافد :- انت بالذات تسكت و ما تسمعني صوتك، من عزمتهن بدون علمي و خليتني افر بأذني

-واحتاج علم اني اضيف اليعجبني هنا و المايعجبة شيريد يسوي يسوي

-البيت بيتي و تحترم وجودي غصبا عليك

-البيت بيتج زين لعد خلي الج و انا الأطلع منه

-عزاا العزاج ضحيوة مغيرة الولد علية، يمه يريد يعوفني يم

ابو رافد :- خالدية صوتج شهرتينا استحي يا مرااااا

خالد:- كااااافي كاااافي كلما حجيت وياج و جبتي مرتي بالطااااااري كافي، بزعتيني من تصرفاتج كااافي تحجين و ما احجي ادوسين بالمصارين و اسكت ، بناتج طالعات طابات يصيحن جابت بت و ساكت ، بس كافي ، طلعتي روحي من البيت بزعتينيييي

رافد:- خالد شبيك اهدى

-وخر رافد امك طلعتها من ماعونها لك مللتني

ام رافد :- من عمت عين الزلم التمشي بحجي النسوان و ترد امهاتها ..

رافد :- يمه رحمة الوالديج دفوتي جوا

خالد:- اني مو زلمة و الله مو زلمة اذا بقيتلج بالبيت لا ما اخليج تتحسرين على طبتي للبيت فلا اطلع اسمي خالد

رائد :- خالد بس تعال يمعود شجاك دمشي

ام رافد :- عساها بحظج و ابختح يا ضحى و الله لا ينطي ديار و امها شيشن عليه الولد وراحن

خالد :- والله اطلع ناقص شرف لو بقيتلج بالبيت
صعدت للغرفة و اصيح على ضحى تلم غراضها

فات رافد :- خالد مو هيج الحجي اهدى

-اطلع رافد

-بس احجي شبييييك

-رافد اطلع جايييييي اكلك

رافد:- تنجب و تسمع غصبا عليك، ضحى اطلعي برا عوفي الغراض

خالد:- لمي بسرعة

-هي كو**** طفلة بت انفاس طالع بيها بهالليل عدك عقل انت

فات رائد:- خوية بعد اخوك بس اهدئ نكعد نحجي و نتفاهم الوالد جوا ارتفع ضغطه لا يروح بيها و تكعد تعض الأصابع ندم . انزل اتفاهم ويا الوالد و هو يحل السالفة

خالد :- بالبيت هذا بعد ما ابقى وخر رافد

رافد :- لك حيوان منو كايلك ابقى ابوي جوا انزل اتفاهم وياه و اطلع بشوره لا تطلع زعلان

وكفت .. اجا رافد باس راسي و رائد لازمني

رافد:- اهدى خوية معقوله من ورا نسوان نتخارب وتطلع من بيت ابوك زعلان

خالد:- ولكم موتتني شلت حالي كوة امشيها و يا هالمرة ووين ماكو مشكلة زارعتها بنصنا يا جابت بت يا طلابت البت ولج يمة المرة توها جايبه عوفيها انت تمشي مرتك يمة خواتي مالهن داعي يحجن سكتيهن انت اخو مريتك مو اخو اخيتكولكم بزعتني بزعتنييييي

رافد:- حقك شتحجي حقك بالقرأن، البارحة اني و الوالد نحجي الله شاهد و هذا رائد يشهد كلتله يابة ترا خالد ضاكت روحه شوف جارة لموضوع امي ترا اذا بذيج العركة هج لسوريا هالمرة الله يعلم شيسوي، الدنيا ما تتأمن و اخونا اذا مو بين اظهورنا ما نأمن عليه و قررنا نقسم البيت ، الطابق الثالث الك و الطابق الثاني الي و الجوا لرائد و امي و ابوي و كل واحد بابه برا و ما متصل بالبيت و نكعد كلنا هنا ما نطلع

شبيك يا خويه هو احنه هالتلاثة و ابونا مريض ، وياك امي طوختها ويا نسوانا بس شنسوي خوما نذب اهلنا و نهج بنسوانه نلمها شلون ما جان و نحل السالفة

رائد:- خالد انزل هسه بوس راس ابوي و اكعد اتفاهم وياه ترا ضغطه صعد لا يوكع

خالد:- شوفوا حلفت بالله ما ابقى تريدون تنفذون الشي الكلتو راجع الكم ما تنفذون الكا بيت واكعد، بس الليلة ما ابات هنا اني حجيت و ما اتراجع

رافد:- يا يابة شلون راسك يابس و عنيد ، عمي ميخالف بس انزل احجي ويا ابوي و اطلع ودي مرتك لأهلها و بات ابيت عمي، بعد ؟

رائد:- دنزل يلا يا خوية لا تيبس راس كول يا الله

... اخذوني و نزلوني لأبوي جوا، دخلنا للأستقبال بست راسه و كتله :- يابه اعتذر منك ارتفع صوتي بوجودك بس امي تعبتني والله

ابو رافد :- ولا يهمك وليدي انا حاس بيك و مقرر احل هالموضوع بس بلا هذا العرك و المصايح يا يابة والله ما اتحمل عيال بيتي يتذابحون كدامي

خالد:- هاي هي يابه حقك عليه و اني اسف
عفته و كمت

ابو رافد : وين رايح ابني

رافد:- عوفه يابه خلي يرتاح ويهدي باله ، روح خالد

... طلعت صحت على ضحى :- حظري جنطة الج و للبنات اوديج بيت اهلج فترة

اخذت ضحى و البنات لبيت اهلها ورجعت لبيت عمي.

...........

ديار :- دخلنا للبيت لكيت عصام كاعد بالصالة منتظر ماما، سلمت عليه :- شلونك عمو

رفع عينه :- هلا بديار شلونج

-زينة

-شكله الزواج معقلج

-لا بس بعد صرت زوج امي و واجبي احترمك

ابتسم و كال :- هلا بيج

تقربت امي و كعدت على جانب القنفة مدت ايدها ادلك بشعره و باسته بخشمة و كالتله :- شمشتهي الحلو مالتي ؟

باوعلها :- مشتهيج

كلت اهووو بدو سوالفهم افوت انام اشرفلي
صحت سلمان و اخواني فرشت الهم و لفيت راسي و وتمددت ... سرحت بعالم ثاني صورة خالد ما فارقت خيالي .. وكفته طوله ضحكته تصرفاته
كلشي بيه اتمناه
استغفر الله ربي ما لازم افكر هيج حرام عليه، اني بذمة رجال
متت .. باقية بين عقلي و قلبي
صح سلمان زوجي بس مو زوج حقيقي .. اتمنى اعيش حالي حالي البنات .. اعيش احساس المودة ويا زوجي اعيش المشاعر .. ويا سلمان ماكو احساس ابد غير ان هو و اسامة نفس الشي و خالد ما جاي يفارق خيالي
خالد امنيتي الأستحي الأطلبها من الله

بقيت بصراع بين افكاري لحد ما نمت.

ثاني يوم رجعت لكربلاء اني و سلمان و اسامة ، اخذنا نفرات كيا و طلعنا

وصلنا للبيت سويت اكل النا لأن جنه طالعين من الصبح جبرت سلمان ياكل و انطيته العلاج
و اتأمل يطيب

... مرت الأسبوعين عادي مقضيتها بالبيت اباوع مسلسلات .. ما صار بيها اي فعاليات او اكشن
و يوم ورا يوم يمشي نفس القبلة ماكو تغيير

اسبوعين لا اني مخابرة خالد ولا خالد مخابرني، اصلا قطعت لأن ما يصير اتصل بيه اكوم اتحلم بيه هواي و هذا الما اريدة ، اتزوجت و هسه امي بذمة رجال اكره الخيانة حتى لو جانت بالخيال ما احب اتخيل خالد لهذا حبيت ابتعد عنه

بس جنت كاعدة بالليل الساعة ١١ تقريبا، اجت رسالة ، باوعت رقم خالد ، فتحت الرسالة مكتوب بيها ( ديار مختنك كلش )

بسرعة اتصلت بيه، رد

ديار:- الووو

خالد :- هلا ديار شلونج شخبارج

-عوفني من اخباري و كلي شبيك قلقتني

تنهد و حجاها بتعب و بصوت كلش مختنك :- ديار تعبان

-من شنو ؟

- من كلشي

-شصاير

-ما جاي اعرف ارتاح ولا جاي اعرف شديصير

-شكو خالد شغلت بالي

-مو قصدي اشغل بالج بس والله تعبان

-لا تحجي هيج و كول شبيك تعبتني

اخذ نفس و زفر:- اليوم اجيت من المحكمة

-اي ؟

-طلكت ضحى ديار.....يتبع

☆☆☆☆☆☆