المراهقة والأربعيني الحلقة (54)

المراهقة والأربعيني

 

الجزء الثاني

الحلقة  (54)

علي صفر الوجه ادحك عيونو ما تفسر .. الحجيه تصيح .. ديخيلك ربي وهيام دموعها جرت وحظنت بناتها ..

واني انتهيت لما وصلنا الهم وكالو صف عندك...

صف علي .. والخوف اكلنا .. دشاديش واسلاح وملثمين ... اديا كامت ترجف .. وهن يدعن واني مسكت الصليب وبقيت ادعو ليسوع لحتى ينجينا ..

صاحو

-انزززززل ..

علي:- جده لحد تنزل منچن‌‌ ابد .. فتح باب السياره ونزل .. فتشوه وموجهين السلاح الو .. جنسيتك

هيام:- يمه وليدي راح يمه .. انزل اتوسل بيهم ..

الحجيه- كعدي يمه نشوف وين تصل بيهم دشاديشهم طوال ذول ولد عشاير مو دواعش

- طلع الجنسيه انطاهم .. انه من اهل الرمادي بس ردت اطلع جديتي لبغداد مريضه وتيهت الطريق

الحجيه من مكانها :- خايب يمه والله ما عدنا شي رايحه لبغداد ع العلاج هينا ماضلت مستشفيات وانه تعبانه

-سنه لو شيعه انتم

علي:- سنه

- وجه اللايت علينا بالسياره .. بينكم شيعه ؟

-كلنا سنه ما بينا شيعي .. ووكف كدامنا

-عجل ليوين شارد يول

-انه ما شارد كتلك انه ماخذ جديتي لبغداد مريضه ومطلع امي وخواتي وياي لأن محد بالبيت غيري ما كدرت اتركهم ابوي شهيد وبس انه المعيل الهن

-وين مات ابوك

-ب2006 بحرب الطائفيه خطفو و وقتلو .. وعمامي موجودين بالرمادي باقين ببيوتهم ما عدنا شب اذا تحب اخبرلكياهم واخبرلك الشيخ ريكان ..

-الشيخ ريكان من هاذ

-شيخ عشيرتنا

بعدو و اشرو اللايت علينا .. اني كاعده بالكرسي اللي ورا علي .. اجا الضوا بوجهي .. وكف علي

-عمي كتلك بس نسوان وياي

-ابعد لك

-تريد اخذني بس اترك حريمنا

... اجا رجال ثاني ... انت من يا عشيره

... انطاه اسم عشيرتو .. كالو شيخ ريگان شيصيرلك

-من عمامنا

-فتشو السياره .. وتحققو من جنسيتو ومن جناسينا .. وكفت عدهم جنسيتي

-ليليان جرجيس مسيحيه ؟

-لا مسلمه موجوده عندك مكتوب زوجة خالي مسلم

-وين يشتغل خالك

-صاحب مولده كهربائيه بحي ******

-نوريه حمدان نعيميه شيعيه ؟

-لا كتلك والله كلنا سنه ما بينا شيعي واذا تريد كتلك اخابرلك شيخنا وتأكد منه انه ما شارد اوصل الحريم واردلك

.... بقو يتناقشون فتشوا غراضنه فردشوها تفردش .. نزلونه من السياره الحجيه ردت حجت وياهم صاحو بيها .. خزرها علي لان حجت ..

وبقى علي واكف واحنه بوراه ... والجو اظلم بس لايت السياره ولايتاتهم .. رعب مميت

والحجيه وهيام يدعون .. واني مديت ايدي من جوا الحجاب لصدري وكضبت الصليب ووادعي القديسين

وهم يفتشون .. ضربني علي ونزل ايدي بخفه .. وهمس اكفي وره جديتي بساااع

...اخير شي كالو شيخ ريگان نعرفو وهو لا للدوله الاسلاميه ولا للحكومه و وصل خبر لو انداست اعراضنا نثور و نجعلها دم .. تركو يطلع بحريمو

كالولو اطلع .. بساع صعدنا وحرك علي السياره ومشينا ..يماااااا احس الله انقذنا منهم مدري شلون ..

يمكن لأن شافونا كلنا حريم وعلي صغير وعرفو شيخهم .. مشونا

علي اعصابو تلفت ... يسوق ومتوتر ويغلط ويعد ويصف .. حاجتو الحجيه

-خايب دكول يا الله جده شجالك راح تدعمنا.. مو زين طلعنا يرادلها ذبيحه

- جده ديييين ما بقى براسي هاااااااي وضعييييه الله يقبلها محممممممد تيتمنا واحنه صغار لأن سنه وشيعه وكبرنا وتنكص روسنا بس لين سنه وشيعه تعبنااااا ما نخلص ما نعييييش ليمتى نضل هيج شلة وصخين يوكفوني ويدحكون بخواااااتي

وبقى يسب ويغلط ودنعل هيج و دفعل هيج وكوا... وخوات....

هيام- ولك اكضب السانط راح تعم علينا من هلسان هاذ ما كافي صارت لحم من وراك وراح طفل انذبح بسبب سوالفك

-تااااااااالي من وره سوالفي انه ذبحتو لأن دافعت عن عرضي طلعت موووووو خوش الله ما ياخذني ويخلصني من هلدنياااا نام بكبرو وخلص وانه الطاح حظيييييي

-شلون يريدني اهينو جدام البنات

-انتي سكتي خبلتيني سكتيييييي

-لا تخزر لا افكس عينك والله كلبببببب

الحجيه:- يا ولكم شجالكم كولو يا الله خل نندل الدرب ولج يمه عوفي لا يدعمنا ويموتنا خل نطلع بخير وسلامه وتكاونو براحتكم

... واني كمت اندس بهيام ... ام علي شبيج خطيه مو سهله عليه يوكفونا ويدحكون بوجهنا وهو ما يكدر يسوي شي .. سكتي منو فدوه ..

اندارت وهي تفور ..

بس معصب وموترنا وموتر الجو بأعصابو شحد اليفك حلكو بكلمه ويتصايح وي الحجيه لأن هي داخت منهم وتريد تندل نسوها حتى اسمعها

علي :- جده هسه الدرب وييييين ناويه تفوتينه بنص دااااااعش حتى هلمره من صدك نتذبح بعد ما منها مهررررب

-خايب جده والله صرعتنا بصريخك ومكاونك وي امك .. حتى ما كمت اندل دربي وتيهيت اطني صبر افسر

بقينا نفر ونجي من هينا ونطلع وليل ورعب وخوف .. طلعت الموبايل و كضبتها اتصالات بصراع و الحجي ونائل رغم ما عدنا شبكه تروح وتجي ..

طر الفجر ضوا خفييييف .. حصلت صراع ودك عندو .. رد

-ها ليليان ¥¥¥¥¥ ليش ما ¥¥¥¥¥

-صراع صوتك مو واضح احنه......... ردت احجي همستلي الحجيه :- لا تكليلو لاكونا ذول وانطي الموبايل العلي يحجي وياه

-هاك هاك علي احجي وياه بس يكطع ما مفهوم ..

- ها خالو ...

بقى يحجي هو وصراع كوه يفتهم منو .. بس انطاه روس اقلام عن الطريق .. لحد ما شفنا طريق بغداد .. يلا ارتحنا

.. و طلعنا الأنبار بألف يا الله ..

بس دخلنا بغداد .. سمعت موبايلي يدك .. فتحتو .. الحجي ..

:- الو

-انتم وين صرتو هذا الجايف ليش ما مشى ورانا

-وصلنا بغداد عمو

-اطيني عمتج ... موبايلاتهم ليش مغلقه

-يمه هذا الحجي يريدج .. انطيتها الها .. واندرت الهيام .. موبايلج وين

-هذا بس كورك ومعدومه الشبكه بس امي و هلحقير مشتغله اجهزتهم

علي:- صفن بيها علي وهز راسو واندارلي .. خطي متوقف انه ما معبيلو رصيد ..

بقت الحجيه تسولف وي الحجي ... واسمعو يصيح و يغلط .. اخر شي سدتو و طرت الجهاز عليه .. وتصيح واحدهم شايل خشمو علينا منين ما نندار مصايح شلون الله يرحمنا عجل ...

بعدها وصلنا لمنطقة اسمها الغزاليه .. بقينا نمشي لحد ما فتنا بفرع لگينا الحجي ونائل و رجال جبير بالستينات مشيب واكف و يرش بالصوندا بالباب ..

صفينا السياره .. اجو والحجي يتكاون وي الحجيه وهيام نفسيتها تعبانه خلصت الطريق مكاون وي ابنها ..

نزلنا تلگانا الرجال .. هلا بيكم يابه هلا نورت بغداد .. واجا للحجيه :- هلا بالعلويه تفضلو تفضلو

نائل:- شصار متكلولي .. علي انت ليش ما لحكتني مو طلعنا سوا

-غير خالي كال جدتك تندل بس الطرق مسدده منين ما نندار

نائل:- دفوتو يابه فوتو الحمدلله على سلامتكم

... فتنا بيت واسع يطلع مساحة ٢٠٠ متر .. دبل فاليوم وتصميمو حلو .. طلعت مره بالخمسين مربعه سمينه خدودها عاليه لابسه اسود

تلكتنا بالهلا والمرحبا ومشت للحجيه هلا بأم صراع هلا بالعلويه .. باست راسها .. دعتلها الحجيه ورحبت بيها

فتنا .. البيت مأثث .. حلا كاعده و نور تنوم بأبنها .. كتلها هااا شلونكم

نور:- هلا ليليان شبيج

-الدوخه كضبتني لعبانه روحي فد مره ضل بالنا عليكم وين صرتو ..

-اوو سكتي سالفتنا سالفه .. بمعجزه طلعنا

فاتت مرا بالثلاثين .. وكالت مرحبا .. اندرنا وسلمت علينا وباوستنا .. وهيام كعدت نفسيتها تعبانه وعصبيه والحجيه مددت ظهرها ذبحها من الكعده ومتضايقه من الحجي..

ابالي اسئله جثيره بس اسأل منو .. ليش احنه هينا عد بيت ذول .. صراع مو محظرلنا بيت .. عجل وينو وشو الكل ماخذ راحتو وامدد ولا كأنو بيت غريب

.... وتقربت من الحجيه لأن هيام اعصاب بنتها حجت زكحت بيها

.. اكول يوم صراع مو كال اني حظرتلكم بيت عجل وينو ليش نحنا جينا لهين ..

-هو هذا بيت ابو حرب

-عود صدك عجل ذول منو ؟

-ذوله اهل صديق صراع اشتشهد 2011 و وصى صراع على اهلو وعيالو لأن هو وحيدهم .. من مات صراع كعديهم هينا وشيلهم من الأيجار ويدربلهم كل شهر مصرف لاهلو وايتامو

-ياااا شو ما ادري بهسالفه

-يمكن صراع ناسي يگلچ عليها ..

ام صفاء:- اكلج يخاله شسمج نسيتو صعب ما ينحفظ يربي

-ليليان

-اي خاله محظرين غرفه الج اذا تعبانه فوتي ومددي وارتاحي ترا هو وصانا عليج هواي..

- لا عادي انام بأي غرفه بس لأن تعبانه

-لا يااا شيخلصنه من ابو حرب والله يمشي ويوصي عليج كال امها انقتلت وجهالها سكطو وشكالنا حالج

-اي .. شسوي

كامت البنيه :- كومي ادليج الغرفه

-مشيت وياها بالبيت وادحك .. وهيام طلعت وياي .. وكامت ادليني ..

:-هذا الحمام و٣ غرف جوا وحده اخشاب ووحده فرش اللي كعدنا بيها واللخ استقبال الكاعدين بيها الرياجيل و ٣ فوك

... انتي فوتي هينا بالغرفه البيها اخشاب غيري الفراش و رتبي غراضج وسبحي و نامي ..

دنحجي فاتو الجهال يلعبون .. ضحكت .. احس ممرتاحه مدري ليش .. فتت للغرفه .. دخلت البنيه فتحت الكنتور وكالت هذا جرجف نظيف فرشي

-درتلها .. شكرا .. اول ما طلعت نزعت الجبه و وبقيت بالستريج و القميص غيرت الفراش .. ونمت ما بيه ابدل متت يومين منايمه من الخوف

ما صحيت غير المغرب .. اخذت ملابس وفتت للحمام سبحت .. وطلعت للمطبخ و الخاولي على راسي ..

فتت لمطبخ كلهم كاعدين هيام تلف دولمة ونور جانت تسبح الجهال وعمتي وام سعد كاعدين بصفحة والحرمة جانت واكفة يم الطباخ جانت تكلب طاوة بيها حشية كبة

انتبهتلي دحكت بأستغراب وحجت

:- حجيه هاي الشكره منيلكم

-هااي مرت ابو حرب

شو هاي فكت حلكها متعجبه حجت :- يااا هاي شني صغيره خطيه .. بس لا هاااي المصلاويه الاخوها بداعش مو

هيام:- هي بعينها

-ابتسمتلها .. وتضايقت من هلكلمه رغم واقعيتها .. تقرب مني وحظنتني

- يماااا طلعت مرت الغالي هاي والله ويستاهل هلحسن ابو حرب شسمج يحلوه

-ليليان

-عاشت الاسامي بصعب ما ينحفظ

-ضحكت بوجهه ..

-اني ام صفاء وهاي جنتي مرت المرحوم اسمهان وعرفتني مرت ابنها الشهيد البنيه السلمت علينا بالبدايه ..

-هلا بيكم خاله

-سولفنا ابو حرب عليها بس شلون راحت من بالي والله شكثر وصانا عليج يمشي ويصيح ام صفاء المصلاويه عينج عليها

-ابتسمتلها صراع .. حجيت ووكفت ع السنك .. صاحت

-يا وتشتغلين يمااا غير ابو حرب يشيلنا والله كلشي و لا المصلاويه

-لا خاله شعندي ..

-ولج اسمهان كومي بمكانها البنيه مريضه

-لا والله مبيه شي بس صراع هيج خايف عليه .. اني اسحب وهي تسحب عاد وكفت البنيه ومقبلو اشتغل

قبانو لصروعي شكد موصيهم عليه .. للحظه حسيت نفسي السلطانه هيام مرت السلطان هههههه شو بس عرفو اني مرت ابو حرب لا تكومين ولا تتحركين ..

كعدت يم الحجيه وهن يسولفن .. بس اللي اسمها اسمهان مشالت عينها من عليه ..

صبينا امل وتعشينا .. و هاي الحرمه تشيل وتحط كبالي واني ما هلكد مشتهاتي وتخجلني لخطاري اكلي ولخاطري ..

خلصنا وكعدنا بس النفوس تعبانه .. هيام متوتره و عمتي ضغطها على طول مرتفع من موتت حرب و تم سعد كضتها بواجي على سعد لأن ما جا ويانا مع العلم ان التلفون موكع من ايدها وكل شويه تخبر وتقنع بي بلكي يجي

واني بالي بصراع صارلي بالشهر ما شايفتو . وكلبي طاك عليه يمتى اشوفو ما اعرفة

رحت للمطبخ وكفت وياهم ديشتغلون .. شفت ام صفاء تدعك بعجية كبه :- خاله مو تعشينا

-ادري حبيبه هذه لباجر

فاتت هيام بيدها انجانة وطحين ابيض فرغت الهيل وفاحت الريحة ذكرتني بليالي العيد كعدت هي وام صفاء وحدة اتكبب ووحدة تشتغل بالكليجة

ما خلصو لل12

اني تركتهم ورحت فتت للغرفه ارتب بغراضي .. حاولت اشغل التلفزيون مشتغل .. عاد نمت

لثاني يوم فاتت هيام :- يولي جهرتج صايره كلها شعر حدري احفج لا يجي ابو حرب تعبان ويلاكيج ما حافه

- وين يجي كال ما عندي مجال

-شمدريج دتعالي ... كضبت الخيط وحفتني .. دحكت وجهي صاار ابيض من العيد ما حافه .. عاد شوي صارلتلي نفسيه بلكت صدك صراع يجي ..

كمت شسورت و رتبت نفسي .. بنت هيام يمي جنات .. من الضوجه كمت امكيج بيها ... دحكت بيها شو انكلبت جهرتها للطفلايه صارت جنها مهرج

راحت لهيام تركض تكولها ماما حلوه .. وهاي عاطت بيها لأن امكيجه ..

فات علي جايب حلويات شمرلي كيكه وحب ووزع لخواته .. وكعدنا بالهول ندحك فيلم .. وام صفاء و الحجيه يكركرن حجي ..

مفتهمت من وراهن .. فتت للغرفه تمددت ع الوبايل ... شويه وحسيت هوسه صارت برا ..

التفتت اريد اجر الحجاب اشوف شكو .. جان ينفتح الباب وصوت صراع يكول ان شاءالله ان شالله يمه

... اندرت وهو كدامي بملابسو العسكريه .. ركضت من كل گلبي وكمزت عليه حظنتو .. رفعني من الكاع رحظنو .. حبيبيييييي

-عمري انتي .... افييييييش يولو هسه انه ارتاحيت .. من اشتميتج

... اني من الفرحه بشوفتو بجيت .. نزلني ..

-ما اريد اشوف دموعج ..مسح عيوني بيدو.. يولو مشتاكلج والله ..

رجعت لفيت اديه على ارگبتو وحظنتو .. بعدني وتقرب اخذ وجهي ويبوسني بلهفه.. من لهفتي واشتياقي ضيعت كلشي بحظنو .. وبادلتو بنفس اللهفه ..

حطني ع السرير ويشتم بشعري بركبتي .. وراد يكوم .. حاوطتو بأديه واني متمدده .. وييين

-افوت اسبح يول جايف صاير دحكي اللحيه

-لا لتروح اساسا لايكتلك اللحيه

-مشتاكتلي الحلوه

-اووو متتخيل .. ميته ميته

-اويلي الله يولو الدنيا كلها تخنك بلياج والله .. وبقى يبوس بيا ..

تعدل مني وكعد ع التخت .. كمت انزعو بسطالو

-لا عمري لا تتكلفين انه انزع

-مالك شغل انت .. فتحت قيطانو ما قبل ينزع كدامي ..

-ولج ٠ايف تشردين مني والله .. اكوم اسبح ابقي هينا تره حيل ابالي انتي بس اسبح واردلج لا ترحين ..

بس الا صدك ملابس الي نظيفه ماكو جنطتي برا اذا ما تعبانه كومي غسليهن

-جايبتلك ملابس ويايه ..

-ايييي فدوه العمرج دطلعيلي ..

اخذتلو الملابس للحمام .. فات هو ورفعلي حاجبو :- ها يحلوه

.. اااااا اني اطلع

-اي ادري بيج اطلعين .. بس لا تكيفين بعمرج راجعلج

-فرحت بيه لما حسيت شوي متغيره نفسيتو ... طلعت كالت هيام :- خطيه حيل تعبان حتى ما قبل يكعد

-لا فات يسبح .. بس متغيره نفسيتو كن يبتسم

-ابتسم الج احنه بس اللهلا حصلناها .

-هههههه عجل شتردين غيرها .. اسمهان واكفه وحجت

-تحبينه ؟

-وشعندي غيرو وما ما احبو .. هو اهلي وكل دنياي

-لعد ليش ما اسلمتي وياه

-عقدت حاجبي .. أسلم ؟ .. ليش وشدخل الحب بالدين ؟

-التحب رجلها تتبعه

-ما خص .. هو هم يحبني ليش ميصير مسيحي وياي ليش اني ؟ .. مالو اي دخل الحب شي والدين شي ثاني

-الله يديمها

- فتت للغرفه احظر و اعطر و وارتب .. وفرشت سويتها جنه ... سمعتو طلع من الحمام .. راد يفوت صاحو الحجي .. وراح يمهم ...

طلعت دحكتو .. صار يلمع كن زين ورتب نفسو .. وخفف اللحيه ورتبها ما زينها .. مثل ما طلبت منو .. بس الشيب كثران براسو ولحيتو من القهر اللي ما يبينو ..

كعد يسلم ويتفقد احوالهم ويسأل على جيتهم .. رد سأل على سعد .. من عرف ما قابل يجي .. شال التلفون وخابرو اول شي سلم عليه وبعدها نزل عليه دك رزايل وبعدها سدو منه بعصبيه ..

بقى كاعد اني واكفه بالباب ادحكلو .. صد نظرو بيا .. ابتسم .. :- شو واكفه حدري كعدي

-مشيت كعدت يمو ..

-كون خفتي بالطريق

-الا خرطت العافيه

-ليش شكو

-مو طلعونا ذولا الدواعش ... دحكت الحجي وعلي خزروني .. جفصتها الظاهر

-يا دواعش

.. انبه ادحك للحجي وعلي

-شصاير يابه

-مو متيهين وهذا الجايف ما تابعنا ومتلكينهم ذوله اللي انتمو الداغش من ابناء العشاير بس مفوتيهم بخير وسلامه

-انتم تحجون صدك .. شنو موكفيهم وهن بس نسوان

-يابه احجي ابن اختك عكلو يابس

-لا ليش الحجي وياك انت مو هو .. من صعدت انت ونائل وتركت هيام وجهالها و الحجيه يرحون شكال كلبك . ما عرفت تكول لأمي صعدي وي نايل وانته تصعد وياهم ..

انه لو ما هاينهم جان كتلها للحجيه خل يصعد بس ردتها تطلع منك .. يا حيف تارك بتك والله فلا توقعتها كلت ما راح يقبل وراح يراضيهم ويصعد وياهم ..

... بقى يحجي ويولول عليهم وانت الى متى شايل ايدك من هيام جايبها من الشارع .. اجعلني متت شتسوي مو انت ابوها .. وووووو سطر على روسهم لحد ما اذن وكامو يصلون ..

بس كام .. حجه الحجي :- ها ارتحتي يلصفيرا الا تحجيها كبالو ما كلتي تعبان ومالو خلك ويتكدر وهو مريض

... كمت منو وتركتو رحت للمطبخ اكف وياهم .. خلصو صلا انطتني الحرمه السفرا

- اذا تكدرين فرشي خاله

-اي ...فتت للغرفه بيدي السفرا سحبها علي مني وفرش عني ..

ادحكلو صراع عصبي ويدحك للأخبار .. حتى صوج حجيت شعرفني راح يضوج جان سكتت ..

مشيت يمو .. وكعدت

-زعلت مني

-وانتي شعليج

-لأن كتلك

-هو لو ما تجفصيها جان انه يا غافل الكم الله وحريمي ادحك بيها الدواعش وتفتش و محد يحس .. بس سهله

الحجيه:- مشت ييمه وراحت ومحد فتشنا بس علي و السياره والله ييمه

-اي وانه انتظر يفتشوكم وادعي بلكي محد يحط عينو ..

... صبو الغدا واني كاعده يمو .. يفور نار وهو يدحك بالأخبار .. كالتلو اسمهان :- يلا ابو حرب كول يا الله وكرب اتعشى ..

التفتت عليها هو بس هز راسو ما رد .. كملو .. تقرب و سما بسم الله .. ورجعو حجي سياسي حتى ع الأكل ..

كملت .. فتت للغرفه .. هسه يجي هسه يجي .. ع الموبايل اني و ل١١ وهو ما فات بعدهم ع الأخبار

تركت الموبايل وردت انام .. فات هو .. دحكتلو .. ردت اكوم

-لا تكومين . مكانج .. نزع قميص التراك وجا تمدد يمي

-ما قصدت اضايقك

-بس يمج ارتاح ليليان تركينا من اي سالفه وخلينا بنفسنا ..

-ابتسمت ... ماشي .. بس شو ضربتني بوري كلت ابقى وحدج عني وتالي كابلت اهلك

-ول يابه غيرانه من اهلي

-اني اغار من خيالك لان يمشي وراك تريد ما اغار عليك من اهلك

-وانه كلي الج بويه .. شو حدري ... وتقربت لحظنو .. وبقى سهران ويايه ..

لل٤ بليل .. اندار عني ينام .. ودفن راسو بالمخده .. كمت منو للحمام .. طلعت .. اسمهان بوجهي ..

-هااا ..

-ما حجيت وياها بس ابتسمتلها .. انتبهت عليها ادحك ركبتي .. سمعت صوت بالمطبخ .. تقربت شفتها ام صفاء تخدر جاي

شافتني بساع ضحكت وكالت :- يا صباح المعاريس ان شاءالله

-يبوووه شكد خجلت منها .. هاي شمعرفها ..

-شلون تاكلين البيض خاله

-لا تكلفين نفسج ما اتريك خاله

-حبيبه نزلي الخاولي على ارگبتچ لحد يشوفها ترا ابو صفاء راح ينزل

.. ع السريع ضميت ركبتي وفتت للغرفه .. دحكت ركبتي .. خرب بيومو .. مثل وحده مريضه صايره ..

دحكتلو شايل راسو يدحكلي :- هاا ؟

-اذا تريد فوت اسبح تره اذن من زمان

-اي .. كام واني مشطت ونمت .. هو صلا برا واجا خلاني على ايدو بس ما نام .. الا شرب دوا لساعه يلا نام

بعدو بصدمة ابنو يكابر ما طاب من يوم المات وشافو مذبوح صعب عندو النوم الا ع المهدئات و المنوم ...

صحيت .. الساعه ٣ العصر .. يبوووه شكد نايمه . التفتت هو ماكو .. لبست ثوب وطلعت بساع مثل وحده مضيعه شي وادورو ..

لكيتو كاعد بالهول .. بقيت افرك بأديه من النعاس وواكفه .. دحكت مبتسم وعيونو بيا .. رحت تحت جناحو .. وبعدني النوم براسي

-صحي النوم يحلوه ..

-شسوي غير من وراك .. مطيت نفسي .. جوعانه

-شمشتهيه ادزلج

-انت لشوكت اجازتك ..

-فد يومين

-خل نطلع برا .. نفسيتي تعبت والله ضايجه

-الوضع مو زين

-اووو صراع

-شتردين بالضبط

-تريد اكولك الحقيقه ؟

-اي

-اريد اروح للكنيسه يكولون هوايه كنائس ابغداد

-صفن بوجهي

-شبيك مو من حقي والله صار كومه ما رايحه ع الكنيسه .. اخذني

-مو اليوم ..

-ابتعدت منو .. اكوم اشرب مي وارد للغرفه .. ما منك طلب وتنفيذ ..

اندرت .. لكيت اسمهان ادحك بينا ... مدري ليش ضجت .. اندرتلو .. انت شعندك هينا ما تكوم ع الغرفه

-ضحك .. روحي وجاي وراج

-رحت غسلت ورجعت .. لكيتو بالغرفه .. شو شويه وكال يلا لبسي هم حقج بالكنيسه خل اخذج دام طيب ..

رحت حظنتو حيل وبستو بخدو .. قبانو لحبيبي

-ابتسم .. رحت لبست و بدلت واخذني للكنيسه .. هو بقى بالباب ما دخل وبعدها اخذني لمطعم بالكراده اكلنا وجبنا بقلاوه وكرزات للبيت ورجعنا

فات هو للغرفه گبل وكال وزعيلهم .. انطيت للحجيه ..

بقى يوم بعدها .. وقرر يرجع لدوامو .. اني من الليل اشتغلت بجي وشلون تروح وصعب و الوضع ..

ضاج هو .. وحجه :- لا تبقين تولولين براسي مو زين جيت ٣ ايام يولو انذار والله ماكو نزول ابد .. كوه اتفقت ويه جماعتي لأن انتي ابغداد وجيت لشوفتج . ادعيلي ارد سالم ..

بقيت ابجي مو بيدي الوضع كان نار .. ثاني يوم من الصبح ودعتو .. فحطت من البجي .. مدري ليش حس گلبي من هاي وبعد ما اشوفو ..

حظني بثنين اديه وكال والله اردلج بس لا تعلين كلبي بدموعج

-ابقى يمي الله يخليك محد بقالي غيرك لو صار بيك شي اني وين اروح

- بس كولي يا الله ولا تخلين الموت براسج .. باس راسي وراد يطلع .. اني نزلت راسي وانفجرت بالبجي ..

رد حظني .. اذا تحبيني صدك لا تبجين .. والله ما اتحمل ..

مسح دموعي .. وطلع .. دحكت .. ترك دشداشتو وملابسو االلي جان لابسها ع السرير .. كضبتها وكمت ابجي ..

ما غسلتهم .. ضميتهم بالجنطه .. كلما اشتاقيتلو اشتمو بيها ..

للظهر جت الاخبار ان منطقتنا سقطت كلياً بيد داعش واثنين من ولد عمهم عسكريين ذابحيهم داعش وامثلين بجثثهم ..

اندحك الاخبار ونسمع عن اهلهم الهناك انسبو .. والعيون كلها مدمعه .. وام سعد كل ساعه تتخربط على سعد وتخبر وما تحصلو ..

انتهينا من الحزن عليهم .. وع الوضع اللي كل يوم يسيء اكثر وداعش تتمرد اكثر

جانت بغداد مهدده بالدخول وبوقتها الوضع حيل تعب والكل توقع ان داعش راح تجتاح بغداد ..

عاد عمي كال ما نظل هينا .. نطلع لعمان احسن .. خابر على صراع .. كالو ابني شرايك اطلع اهلنا لعمان هنا ائمن من هينا ..

صراع كالو احسن لأن الوضع ما صار ينحزر وينخاف منو . اخذهم واطلع بيهم حجي ..

.. من حجا الحجي .. تخبلت كتلو ما اطلع لو اموت شتريدون تسوون رجلي على رجل زلمتي يطلع اطلع ما يطلع ما اعتب الباب لو شما تحجون ..

بقو يتوسلون ويقنعون .. كتلهم ابد والله ما اطلع .. مكافي هو بالنار واني هينا كاعده ميته خوف عليه

ليش اني شبقالي واتركو هينا واطلع .. ما اروح .. روحو انتم .. تركتهم واعتزلت بغرفتي وشكد حاولو وياي وكلهم وافقو ع السفر الا اني عاندت .

احس روحي مرتاحه بالعراق رغم الخطر و الخوف .. بس لأن هينا صراع . اروح لعمان شسوي منين اجيبو بعد .. اذا هينا بالشهر اشوفو مره .. هناك احلم بشوفتو ..

خابرني هو ...شفت اتصالو واني ابجي ويومين لا اكل ولا شرب .. رديت عليه وانفجرت بجي ... لا تحاول مااااااا اروح ما اسافر .

-ليليان لا تعلين گلبي .. بغداد مو امان طلعي

-ليش انت بأمان .. تعال سافر ويايه وبعد اذبحني اذا ما قبلت بس اعوفك هينا بنص النار لا تحلم ما اسافر .

-بويه رحمه لوالديج رحميني والله تعبان سمعي الحجي وطلعي وياه ..

-تريدني اسافر غصب مو ؟

-ليليان

-طلكني

-ولج جاي تحجين انتي صاااااااحيه اكلج سافري وي الحجي لا تبقييييين

-ما اسافر فهمممممت .. تريد طلكني خلينا نفترك واحنه مطلكين وابقى هينا ما اعوفك واحنه متتزوجين . طلكني وما الك شغل بيا .. ما ارووووح

.. اني حجيت هيج وهذا استلمني غلط ورزايل وانه تعبان وما فاضي لسوالفج وبس اجي اعلمج منو الاطلكها قفلت الخط و هو يحجي ..

انجن بالزايد .. رد خابر وكال ولج اكضبج لو لا ... الا ادبج ودشوف منو هذا اللي تسدين الخط بوجهو ..

.. شمرت الجهاز وهو ع الخط وانفجرت بجي شسوي والله كلبي يمو ما اكدر اتركو وامشي ..

بعدها انغصبت اطلع للأردن.. ولسه شكد راح اتحمل انغصب واتشرد بالغصب .. ما اعرف ..

لمينا غراضنا و العدنا والما عدنا وطلعنا للمطار اني والحجيه وحلا و الحجي وام سعد وهيام وجهالها .

نائل بقى لأن نور ما جان عدها جواز .. مال اخلص جهازها واجي وراكم ..

طلعنا بالطياره .. من مطار بغداد .. لعمان .. نزلت والجنطه بأيدي كعدت الحجيه ترتاح لأن تعبت حالتها بالطياره . وام سعد تون على سعد ابنها اللي بالرمادي ..

جاي امشي افوت .. وجان اسمع الحجي يحجي وي هيام :- شكد كتلو يا ابني بطل وهو معاند .. هسه احسن اجه كتاب نقلو لبيجي .. بس لا تحجين لاحد تره انه ما كلت لواحد هو ما يقبل خاصه مرتو وامو

جان هلخبر مثل الصاعقه على راسي ..

الكل يعرف .. ان اللي دخل بيجي بذيج الاحداث ما طلع .. جانت تبلع بشر ما تنطي

اني سمعت بيجي .. لو انجنيت .. بسرعه هبطت .. وتخربطت ... يتبع

☆☆☆☆☆☆