المراهقة والأربعيني الحلقة (43)

المراهقة والأربعيني

 

الجزء الأول

الحلقة  (43)

مخليه ايدي على عيوني اريد ادحك منو صاحب السياره.. طفى الضوه والسياره.. ونزل..

اووووو حنا .. تقرب وما شايفني .. وكف يم ميلان ..

_ها وين ..

انتبه عليه.. لا لا ما اصدك.. ليلياااان.. لك هلوووو.. واندار يسلم عليه..

فتح باب السياره ومد ايدو وسلم اني ما نطقت كلمه.. بس سلمت عليه من خدو..

-شلون اوووف شكد متغير هاي شصاير بيج..

-ابتسمت .. شسوي

-اطلقتي مو

-لاا بس اجيت هينا ارتاح شويه

- لا ممعقول بعدج عايشه وياهم بالعرب ..

-هم ما بالعرب عايشين بمدينه..

ميلان:- لك حنا راح تضل تحجي دنريد نروح..

-اوك اني لاحگکم اليوم الونسه الزينه عيووني..

-سد الباب وتبعنا بسيارتو .. نزلنا للمول .. شعري احسو يلعب على متني شكد مستحيه منو ..

سنين هذا ستايلي وب10 اشهر بس.. كدرت اتعود على ستايلهم هيج.. ادحك منا ومنا ول لو يشوفني صراع الا يذبحني والرب..

ميلان خل نرجع

-اووووه ليلو لا تعقديها تونسي و انسي ذولاك الناس.. عيشي حياتج يا عيني..

... افتر بالمحلات وي ميلان.. اني هم عند اهلي محبوسه ما اطلع .. والمفروض هسه طايره من الفرحه..

بس ابد مفرحانه.. احس شي ناقصني.. والاهم ان اني ادور بوجوه الناس مو بالملابس وابحث عسى الكى وجه صراع كدامي..

من المستحيل الكاه هينا بس اني ما كفيت بحث عنو بوجوه الناس ما اعرف ليش..

جا حنا وصاح ورانا.. انداريت.. دحكت لبسو .. قميص احمر وبنطرونو جينز محكوك ومضرب..

درت عنو .. ما مثل لبس صراع ولا بيجيبو بشوي .. اكره الدشاديش العربيه بس على صراع اعشقها وهو يتمايل بكتافو وكاعده عليه ومليانه بيه.

نفتر ونحجي واني بالي مو يمهم ابد.. وكفنا بمحل ميلان تقيس ملابس عليها.. دحكت شكلي من فوك ليجوه بمرايا طويله

لا هذه مو اني .. مو ليليان ابد.. ادحك.وجهي كلو مكياج. وشعري مشمور وملابسي ما اشوفها توالمني..

لا ما اكدر.. اندرت .. كلت لابو المحل اريد ملفع .. ما عرف شحجي.. تفربت مني ميلان وكالت كردي ما يعرف عربي شنو تردين..

-ملفع ما دا ارتاح هيج..

-عقلج ضرب يبنت.. اندارت عليه وطلبت منو بالكردي.. اشرلها لمحل قريب مال شالات..

تركتها ورحت للمحل حنا.. واكف بالباب .. تبعني .. مديت ايدي ع الشال..

-شنو تسوين بي

-اريدو .. عامل .. السعر 7 الاف.. طلعت فلوس من عندي.. حنا دفع قبلي..

لا عفيه هاك اخذ ما اريد عندي

-عادي واذا عندج اعتبري هديه

-لا ما اكدر بقيت شايله الفلوس وامشي وراه..

-ليليان لتكبريها شنو نسيتي منو اني

-ولأن ما نسيت منو انت ما اقبل .. اني متزوجه و زوجي ما حارمني من فلس عندي خير ما احتاج احد يدفع بمكاني.

انطيتو الفلوس ومشيت.. شكد تضايقت منو .. تزوجت وما فك.. بعدو عندو امل اطلق وارجعلو..

رحت لميلان كتلها بس اريد حمام.. مشينا صعدنا للمطعم.. هم كعدو وهي دلتني على طريق الحمام..

مشيت قبل لا ادخل الحمام اكو طاوله وبنيه كاعده اطلع كلينكس مبلل وتمسح وجه طفلها ..

جيت طلبت منها.. ما فهمت كلامي كرديه.. بس عرفت اشارتي.. ضحكت وحجت ويايه بمعنى اخذي..

اخذت وابتسمتلها .. سوباس

دخلت للحمام .. خففت المكياج كله بوجهي.. هييي احس هسه تنفس وجهي.. جنت احس وجهي محنط مو امكيج.

كملت .. لفيت شعري وجريت خصله منو ضبطتو بيها.. ولفيت الشال بطريقه بسيطه ما ضبيتو.. بس ذبيتو على راسي .. اي هيج احسن..

طلعت كعدت يمهم.. حنا طالب نركيله و ميلان ادخن جكاره.. ضحكت .. من يمتى ادخنين..

-من اني هناك جربتها مره وادمنتها

-زوجج يقبل

-ليش شنو شعلي .. هو هم يدخن.. عادي .. ليش زوجج ميدخن

-اي يدخن ..

-ما يقبل ادخنين

-لا مو ما يقبل بس اني اكره ريحة الجكاير..

حنا:- من صدك هو يضربج شلون عايشه وياه..

- حرت شحجي.. اضوج اذمو كدامهم.. احس اقلل من نفسي مو منو.. هم تهموني ان اني خايتو فضربني

-وليش ما واثق بيج ويشك..

-مو هيج بس هو عصبي وينفعل بسرعه.. وما بس اني ضربني من عرف بنتو تاهمتني هم ضربها ونقلوها للمستشفى

ميلان -عزااااااا وي بنتو هيج

-هي مخطوبه وتحب غير خطيبها فضربها

-لا لا هذا حيوان اكييد..

-هو ما حيوان .. خوش رجل بس كل انسان بي عيوب وهو عيبو وقت اعصابو تتصرف ايدو قبل عقلو..

-شبقى للحيوان لعد اذا من يعصب يفقد عقله..

-اي يمكن هو حيوان بس من صنف الاسد.. لانو من يزئر يكسح كل اللي كدامو ..

-شكد.تحبي ولج شايب شحبيتي بي

-ما اعرف .. حنا مدنك على موبايلو كن ما يسمع..

احس اختنكت من احجي بي.. شكد متأذيه منو .. بس السؤال اللي ما اعرفلو جواب ليش ادافعلو وليش هلكد احبو..

دك موبايلي.. جريتو من الجيزدان.. دقات قلبي.. فعلا احس دقات قلبي انضربت بأتصالو.. سويتو صامت وخفت ارد..

بعث رساله (يولي گلبج حجر بالله تعب گلبي بغيابج ما اتحمل زعلج شكد.حقوده حتى ما كلتي اخابر واطمن عليه)

ما رديت .. رجع بعث ( عصفورتي اني طلعت للبيت تعبان والله خل ادز عليج هسه نائل وتعاي وياه ول يابه مشتاقلج)

عرفتو ما يعرف لحد الان اني بأربيل.. بعثت ( اني بأربيل واللي بيناتنا انتهى صراع )

اتصل بسرعه ... ما رديت رجع بعث (شنو باربيل ردي لا اگلب الدنيا والله)

قفلت الموبايل وما رديت عليه بعد..خلي يعيش الالم ما بس اني اتأذى منو..

طلبو عشا اكلت شوية مقبلات ما اشتهيت ابد.. خلصنا كتلها خل نرجع.. كالت يلا..

حنا لحظه لحظه.. اوكفو.. رفع موبايلو واحنه كاعدين حول الطاوله. وصورنا كلنا .. انوب ميلان خلت راسها على كتفو وصورو..

كمنا وجرتني وكفتني يمها رفعت عيني ويكول كولن جييز .. ابتسمت. صورنا.

ميلان:- ابعثلي الصور فدوه حبيبي

-ماشي .. ليليان عندج فيسبوك

-عندي بس ممسوح.. اسمو مشاعر بريئه..

ميلان-عندج الرقم اللي سويتي عليه..

-اي

-هسه ارجعلجياه وضيفيني اني و حنا..

-اخذت موبايلي وهي تمشي ترجع بيه.. انوب وكفتنا كالت بس افعلو بس نطلع يروح النت..

اتصل بيدها.. دقات قلبي .. انطتو رفض وكملت.. جا الرمز على الخط.. وهم اتصل بس هيام ما صراع..

هم رفضتو .. وفعلت الفيسبوك بسرعه وكالت هاج هذا رجع.. انطتنياه واتصلت الحجيه..

رديت واني امشي .. هاا يوم

-يولي مفجوعه كايله لصراع انه باربيل

-وانتو ليش ما كلتلو

-يولي شنو من ابنيه انتي رايده تذبحين ابني توه طالع من المستشفى.. ما تخافين عليه انتي راد يموت..

امشي وناس تطلع من المول كوه امشي واكلها هاا شنو ما اسمع

-يمكصوفة الركبه انتي وين

-ماما اني طالعه وي ميلاااان.. وكفت وسكتت لان سياره فاتت رادت تدعمني.

ماما بس خل اوصل اللسياره احجي وياج..

صراع:- لج انتي وييييين طالعه..

يمه سمعت صوت صراع وكفت بنص الشارع وحنا ركض اخذ ايدي ويكلي ..

-ليليان من كل عقلج بنص الشارع دنطيني ايدج.. سحبني وهو يوكف السيارات ويمشي..

وذاك يكلي .. منو اليمج.. قفلت الخط بوجهو وركضت وي حنا فتنا الشارع وصلني لسيارة ميلان.

والحجيه تتصل وانوبه صراع.. قفلت الجهاز.. بس الخوف اكل گلبي ..

صعدت السياره ومشت ميلان وعلت صوت السياره وادحكت عليه..

-لج يمعوده دنسيهم شنو ذوووول عيشي .. اخذت مني الموبايل وزتتو وتغني وي صوت المسجل مال السياره.

اني كل بالي يم صراع مريض وهيج اسوي بي شيصير.. جريت الموبايل وفتحتو..

جانت اكو ميزه بخط اسيسيل من تغلق الخط ويخابرون عليك وترجع تفتحو يبعث للي اتصل عليك.. الرقم مالتك ويكتب متاح حاليا..

فمجرد ما شغلتو .. شويه واتصل صراع .. نصيت المسجل حيييل وكتلها ميلان لا تحجين..

رديت..

-وين انتي احجي بساع

-اخذنا خالو مشانا ع الشارع

-الصوت مو صوت خالج

-لا صوت بنت خالتي

-السمعتو صوت ولد شاب لا تجذبين

-لا هي صوتها مثل صوت الولد بس هي هيج.

ميلان وكفت السياره بساع.. درتلها وخزرتها حيل وسويتلها باصبعي هسسسس.. وهي تأشرلي اني صوتي ولد..

-ول انه شسوي بيج .. اطلعين بلا علمي ما تكولين رجلي بالمستشفىىىىىىىىى

- لا والله طلعت بحجاب وما خليت مكياج

-ول يابه بس لا صدك طالعه بلا حجاب .. بالقران اذبحج ليليااااااان..

-لا لبست والله.. اكلك صدك وبعدين انت شعليك.. اني راح اطلك .. روووح

-انه اجي واعلمج اشلون اطلكج.. بسيطه.

قفل الخط بوجهي.. يلا هو يقفل بوجهي ولا يضل عصبي ويوكع ..

شويه واتصلت هيام.. كالت يمعزايه شسويتي ليش كلتيلو .. انه هسه عد اهلي والله لعب بالحجي والحجيه جوله شلون قابلين اطلعين..

كتلها عجل شنو يريدني تحت رحمتو

-ول هو ما يعرف انتي رحتي .. وبعدين تغشمين روحج متعرفين شكد يحبج وهو مريض والله

-اكول هيام مو انتي اللي كلتيلي اذا عندج ذرة كرامه روحي وبعد لا ترجعين..

-ول امي هذا كلام اول ونحنه ولد اليوم.. وصراع يحبج والله ما تعرفين شلون جن ويفتر بالبيت من عرف انتي بأربيل فرفحت روحو يعشكج يولي والله

-ما اعرف ام علي .. الحياة هينا غير وعند صراع غير.. بس المشكله لا اكدر ابقى هينا ولا اكدر اتحمل صراع وعصبيتو اكثر وارجع..

عدحجي سمعتو يكوللها.. كليلها من تطلع تستر نفسها وحجابها لو وكع من راسها اسحلها من اربيل شحط..

قفلت الخط منو.. قبل لا تحجي..

اشنو اسوي.. اتركو واعيش حياتي هينا .. لو ارجع.. وصلنا البيت .. بدلت وكعدت بغرفة ريتا اني وميلان .

شويه وفات علينا حنا كعد ويانه .. وكل واحد بينا على موبايلو.. وحنا كل شوي رافع موبايلو ومصور سيلفي انستكرام ويحجي..

ميلان كعدت تشوفني صورها و صور زوجها.. بالمسبح .. كتلها زوجج ميحجي يقبل ادخلين بالمسبح وهيج يبين جسمج..

-لعد مو تشوفينه ويايه ليش ميقبل قابل شمسوين ذابحين لو مفجرين احد.. جاي نسبح ونستمتع..

... صفنت على صورهم تتباوس هي وياه ع البحر واني لو جا وباسني بالغرفه جوه البطانيه الحجيه تصير ااااااااالله اكبر وتأذن بروسنا.. ومصير ما نستحي

شكد حسيت فرق بين حياتهم وحياتنا.. عاد كالت عندج صور رجلج خل نشوفو..

كتلها عندي كم صوره بموبايلي وحده بالدشداشه والسبحه بيدو. ووحده عسكري وشايل سلاحو رشاشه كتفو ومنتجي ع السياره.

اول ما شافت صورتو بالدشداشه.. كالت مبين عصبي ما توقعت شكلو هيج .. تخيلتو عُربي مبهذل ..

... اوو لج بالنظافه والقيافه ماكو مثلو فد شايف روحو ومعتني بنفسو ..

درت على صورة العسكري جان تكول اويلي اويلي لج هنا يذوب كلوب .. واخذت الموبايل مني .. اووي عيني باع الابتسامه الخفيفه يا ويلي ..

دحكت عليه .. ورجعت ادحك ع الصوره.

ولج هاي وين توصليله.. بكد زنده انتي ..

-هههه اصل شويه اقل من كتفو ..

-لا لا غيرت رأيي لج حبي حبي رجل والرجال قليلو

-هههههههههه جا حنا وشاف شكلو .. كال مبين ضارب مناسف و ثريد لحد ما مال .. وجهو عربي مبين املح

.. اخذت منو وكتلو ما املح اسمر من الشمس .. ما مثلك ابيض وعيونك زرك .. اندار ويكلي يروحي فدوه..

هزيت ايدي .. بقت هي تكلب بموبايلي واني اكلب بموبايلها.. وحنا عافنا وطلع..

هي نامت واني بقيت اكلب.. ردت انزل الستار اطفي الواي فاي حتى انام.. شفت اعلانات جايه بالاشعارات..

بس اعلانات اباحيه.. فضولي دفعني افتح الاعلان .. بموبايلي ابد ماكو هيج.. اول ما دخل .. صوره كلش سخيفه ويكلي تحميل..

طلعت بسرعه من ابرنامج وقفلت الجهاز.. واحس عركت وسخنت من الشفتو... بقيت مصدومه باللي شفتو..

ضل يدور ابالي .. اخر شي .. حاولت ابعد.هلافكار والصوره من بالي ونمت

لثاني يوم.. كال خالو ترحين ويانا للصلاة بالكنيسه نأدي القداس مع البابا..

كتلو الله صار شكد.ما داخله كنيسه .. يمكن سنه..

-ليش رجلج ما يخليج ترحين

-ما كتلو فد يوم وحتى ما اعتقد.اكو بالانبار كنائس .. الا هو لا جبرني على تغيير ديني ولا على طقوس دينهم.. بس فرض عليه الحجاب..

-يلا خالو بدلي دنروح نحظر القداس

بدلنا كلنا لبست بنطرون كتان وقميص طويل شويه عن الركبه.. ولبست حجاب لفيتو على راسي..

ورحنا اول ما دخلت باب الكنيسه.. احس روحي رجعتلي.. شكد ارتاحيت وحسيت بطمأنينه..

...بسم الأب و الأبن والروح القدس الاله الواحد امين .. ضميت اديه كدام صدري وغمضت عيوني ..

دحكت على مريم العذراء.. اشتقت الى ديارك يا امي

مشيت شغلت شمعه.. وكعدت اصلي لربنا.. وقف البابا يؤدي القداس واحنا نردد التراتيل ..
مغمضه عيوني وادعي واصلي

اني لرافع يدي الى السماء ..
ويداي ممدودتان يارب العلى..
استمع صلاتي واستجب دعاي..
في وقت ضيقي بحثت عن النجاة..
فجئت اليك قائلا يا رب الحياة..
استمع صلاتي واستجب دعاي..

... اؤدي القداس واتذكر صراع.. وصوتو وهو يرتل .. (يس والقران الحكيم )ما اعرف شنو اللي عصف جوايه.. احساس بالانتماء لدينين ..

دين عيسى ودين محمد... احس هلدينين يجمعهم شي اكبر من الحب.. قلبي مع قلب صراع رغم كل الفروقات اللي بينا..

خلصت الصلاة وكملنا.. احس ارتاحيت حيل هموم مال سنه انزاحت عن ظهري..

ركبنا السياره و طلعنا للبيت .. وي ما صفينا دننزل صفت سيارة .. بيها صراع و الحجي و سعد..

دحك بيا بساع شردت انهزمت جوه.. خالو دخلهم للاستقبال رحت بدلت بسرعه ووكفت ع الباب استمع..

الحجي يحجي والكل ساكت.. وديحجون بموضوعنا.. وصراع ماكو صوتو..

كعدنا اني وميلان وهي تكلي هذا صوته.. هزيت راسي لا.. هذا الحجي ابوه.. حنا كون موجود ؟

-لا طالع ليش

-هم زين

نستمع و خالو حجى .. وكالو .. اسمع اخ دحام.. بنتنا انطعنت منكم هواي.. تهمتوها مره واجت عدكم شفتوها وعاشت وياكم وعرفتو اخلاقها وهم رجعتو طعنتو بشرفها.. وشكيتو بيها

.. صراع كل الوكت ساكت بس من حجى هيج خالو.. رد..

-دحج يابه .. انت واثق من اخلاق بت اختك.. وتعتقد هي شريفه

-طبعا اني واثق من بنت اختي ..

-هه.. حك لحيتو.. عجل من انت واثق بيها وبشرفها ليش جيت تتوسل بس ستروها.. مو تعرف اخلاقها جان اخذتها لابنك ونهيت سالفتها..

ليش رفضت ابنك يتزوجها..

-سكت....

-فرك سبحتو...دحج يابه سالفة شكيتو بيها وطعنتو بشرفها .. احجيها لغيري .. انه ما مخنث وبنطروني نازل وحرمتي تخوني واكتفي بكم جف..

لعلمك لو شاك بيها ذره.. جان خلصت عليها ونهيت سالفتها واسأل عنا اذا ما تعرفنا.. شلون نتصرف وي الحرمه التخون

انه ردت منها تبرير ليش واكفه بالشارع وهي نكرت.. رجعت عدت عليها اسؤال كم مره وما جاوبت ولا حجتلي شي ..

فضربتها تأديب مو شك.. لو شاك بيها ما استخدم جفي .. جان سلاحي اشتغل بدل عني..

جيت للرمادي ودخلت اخذت حرمتي من بيتي بدون علمي .. بأي حق بويه..

-ابو حرب احنه من البدايه اتفقنا زواج كم شهر وتفض..

-ما على كيف احد بويا .. انه الاقرر انهي لو ابدي .. الزواج ماهو لعبه حتى تحصرو بأتفاق..

حرمتي وعاشت وياي 10 اشهر وتكلي اتفاق..

-البنت هي ما تريد عيشتكم. ملت وخابرتني تبجي

-لا تكلي البت.. المره حرمتي.. ان بجت وانجرحت انه الاداوي .. ما اسمح لأحد يدخل ابيتي..

وهي مراهقه ما تعرف مصلحتها وانت لو عندك عيشه.. جان حويت امها.. ما انجبرت تعيش بالموصل وي واحد.داعشي على عيشتك..

اختك بنفسك ما كدرت تحوي اختك.. ولا ردت بتها وكت اللي طعنو بيها جاي هسه تكول البنيه بجت وما تتحمل..

شتتحمل عدك.. يومين وتهججها لاخوها لو ين توديها..

-انه ما متبري من اختي وطول عمري اصرف عليها وما متعاجز بس بشر وي بشر ما يرهم..

-دحج يابه احنه هم عدنا خوات .. وهم عدي ارمله ونايمه بهلركبه لا البالك بس انته المبتلي

يزين شاربو الزلمه لو زت اختو .. عجل وين تروح.. متعجب انت منطي بس افلوس.. وهي ما حملت عيشتك ورجعت لابن رجلها تتحملو..

وهسه جاي تكلي احوي بتها .. حرمتي ما الها كعده هينا... صيحوها..

-شوف ابو حرب هي ما بالغصب البنت تعبت من عيشتكم. وانه اتحمل مسؤليتها. وهي ما تايهه تره عدها عمام واهل ..

-ههه من هسه كلت عدها عمام ومفكر تزتها.. عجل وينهم ما دحكت منهم واحد جا وشاف حالها..

... بقى صراع يحجي وخالو يرد اتركها هينا وهي تقرر.. وصراع رافض ما الها كعده هينا. وارتفع الجدال بين صراع وخالو والحجي وسعد..

شوي وطك خشم صراع دم.. طلب كلينكس والحجي يكلو .. كلنالك يابوي انت مريض اترك البنت شويه اهدئ

وخالو طلع قطن بسرعه.. ركضت للمطبخ وميلان وياي.. طلعتلي قطن.. رحت للاستقبال ما لكيتو..

كال سعد بالحمام انطي.. دخلت للحمام هو مدنك ع المغسله يغسل.. قميصو زيتوني ساده و البنطرون اسود..

شكد احس مشتاقتلو.. واني ادحك بضهرو .. انطيتو كطن. كال لا وكف شكرا.. ورفع راسو بسرعه..

دحكني كبالو.. ها ام الفواين بينتي والله بيج كتله.. جر الخاولي نشف وجهو.. بس بيج بخت مشتاقلج..

مد ايدو .. سد الباب وتخصرلي.. هيج ليليان اتركيني واني بالمستشفى.. دنكت راسي..

...يكولون مليتي مني وما ترديني بعد وعيشتي ما تنحمل صدك..

-ما رديت.. تقرب مني حيل .. وكف كبالي .. رفع وجهي.. ادري اذيتج حيل .. وحيل بيا شما تسوين بس لا تحرميني منج..

يولو والله احبج اكتل روحي وتخلصين مني واخلص..

مد ايدو على جيبتو الورا.. جر محفظتو.. طلع منها 3 اوراق.. وخلاهم بيدي..

-اخذ هاي مصرف ابقي هينا كم يوم ادري نفسيتج تعبانه.. غيري جو.. وانه كم يوم واجيج تمام..

هزيت راسي.. كضب راسي بثنين اديه.. لا اطلعين بليه حجاب ولبسج مستور لا ضيك ماشي..

-ماشي.. رفع راسي ويدحك بوجهي..

-يولو لا تزعلين والله احبج.. دنك باس خدي ورجع يدحك بوجهي نزلت راسي منو.. رجع دنك يبوسني بلهفه

حركت ايدي.. ومسكت خدو.. هو حس اني تجاوبت وياه.. لف اديه عليه وصعدني لمستواه.. واخذ وجهي بكل لهفه شكد بينلي شوقو الي ..

بعدت وجهي منو.. حس .. ورجعني.. ابتسم.. كضب خدي روحي وياي هسه.. والله خالج اكبر جذاب لو بيه خير ولج جان عاشت امج عندو..

-خليني هينا كم يوم..

-تعبانه..

-هزيت راسي .. اي

-باس خدي .. براحتج يابه .. انه كم يوم واجيج..

اندار غسل وجهو.. ونشف.. عدل ملابسو .. وفتح الباب وهو يكلي ما اوصيج بعد.. وحاولي لا اطلعين جثير.. وموبايلج دوم يمج مفهوم..

طلع .. وراح للاستقبال واني غسلت وفتت للهول.. ميلان تغمزلي .. ضحكت..

اتفقو وي خالو ما اعرف شنو وكالو انه راح اتركها هينا كم يوم ترتاح واجي اخذها.. رحت سلمت على سعد والحجي وراحو..

بقيت عند بيت خالو 5 ايام. ويوميه يخابر ما ارد.. ليش ما اعرف .. صح تقربت منو وبستو بس ما نسيت اذيتو وقت لما حبسني

موقفي ذاك ما انبلع وياي.. فهو يخابر واني ما ارد.. نطلع اني وميلان. وجا زوجها وسافرت ع الدنمارك

وبقيت عدهم بس حنا بالبيت .. عاد بيومها كليتي رجعت اذتني اخذت مرت خالو ورحت للدكتور..

خابرني هو .. كتلو اني بالدكتور وهيج وهيج حالتي.. ما حجه ليش ما تجاوبين ولا سأل نسى بقى بس يستفسر شبيج وشوكت عندج كلى . وباجر اني يمج..

وصدك .. الظهر جا بطياره من بغداد على اربيل .. وصل ساعه 4 علينا.. رادو منو يبقى يبات..

كاللهم صايم والله لازم ارجع باجر كبل الظهر للانبار..

كتلو :- عجل وين نروح هسه..

-نطلع لبغداد نبات غاد وباجر من الصبح نغبش للرمادي بحيل الله.. اخذ الجنط مالتي وكال جاهزه.

كتلو اي... بنطرون وقميص طويل .. هز راسو وكال يلا عود هناك امشي هسه امشي..

هم زين حنا ما جان موجود من جا طالع .. لو شايفو ومتذكرو .. يبوووه شيخلصني..

طلعنا من اربيل رجعنا البغداد بليل.. دخلني مطعم وهو فطر واني تعشيت. ادحكلو وهو ياكل ..

اديه تحسهم شفافات من كد ما نظيفه ومدنك ياكل .. رفع راسو.. ها صافنه بوجهي.

-دنكت ..

-يولو بعدج زعلان شو ساعه تحجين وساعه اديرين الوجه..

-اخذت نفس.. ليش شكيت بيه.. مو كلت بعد ما اضربج..

-والقران حاولت اكضب اعصابي عنج بس انتي ثوله شسويلج.. يعني صيري بمكاني تلمحين واحد مثلي ولابس ملابسي وبسيارتي وصاعده اخلاص وياه شتفكرين

حتى لو تعرفيني ما اطيقها وما احبها ..ما تشيلج الغيره وتعصبين وتجين تحاسبيني زين واذا نكرت وانتي متأكده لمحتي اخلاص بسيارتي . شتسوين..

يجي ابالج واحد متنكر بسيارتي .. لو بساع بالج يفكر وتلحين ع الحقيقه وما ارد عليج شيصير بيج..

-دنكت راسي مجرد فكره عصبتني وطلعت روحي لا ويجيب اسمها على السانها .. بدي اطر الخاشوكه بوجهو وهو يحجي باسمها..

كاعدين وهادين اخلاص شجابها بيناتنا لو حتى هينا لاحكتنيييييي..

-ليليان رحمه لوالديج بطلي ثول .. يولي تفكرين بالبدل الضايع..

.. ما رديت بقيت اكل.. هو رجع كمل فطورو.. خلصنا.. وكملنا طريقنا..

وصلني لعماره بيها شقق.. احم.. هاي احنه وين راح نضل

-بالشقه اليوم نبات.. وباجر الصبح نطلع.. ليش

-وهاي نفسها الشقه الجنت تجيب بيها ام مصطفى مووو..

-هز راسو وفتح الشقه وهو يضحك.. فات كبالي .. دخلت صحت هي لو لااا..

-على فكره غرفتي اللي بيت اهلي نفسها جانت تنام بيها وجدان والله..

تخصرتلو.. تمدد كبالي ع السرير وهو يضحك.....يتبع

☆☆☆☆☆☆