المراهقة والأربعيني الحلقة (49)

المراهقة والأربعيني

الجزء الثاني

الحلقة  (49)

الحجيه:- شصاير غير تفهمونه شكاللولكم .. شسويتو ..

الحجي :- يابه كعدنا وكلنالهم هذا ابنا علي واحنا نعترف هو ضاربو بس ابنكم هيج وهيج حاجي ترضوها يطعن بأعراضنا .. ضلينا نحجي بسالفه

وجدهم الجبير هم رجال خّير كاللهم عشرة عمر وي بيت ابو صراع 30 سنه ولدهم ذهب لا بيوم سمعنا عنهم شكوه ولا بيوم طلعت منهم العايله ..

والشيخ ريگان هم ما قصر بيهم .. حجه حجي معدل بس هذا قيس الجايف ما ارتحالو ونائل يكول دحكتو مشى لصراع وحجه بأذنو وطلع ..

بس ابو حرب يكول ما كال شيء .. عجل شبي ضايج ومتوتر لازم حاجيلو شغله هالسرسري ..

عمهم عزام كعد يحجي وي الحجي ويوصي بي لا نطلع ونكض بولدنا ونوصيهم ما يدخلون بنقاشات سياسه ومن هلحجي كام يوصي

اريد اصعد لصراع .. الحجي كال جايكم يابه وينو ..

نور:- روحي ليليان سوي الجاي ..

-بقيت حايره اسوي الجاي لو اصعد ادحك صراع گلبي يمو .. عاد زكحت مو ديكلولج جاي اتحركي متشوفين اني جاي اوكل جهالي ..

مشيت لمطبخ وطالعه روحي منها توكل جهالها بسكت وجاي .. واني روحي مفرفحه اريد اعرف صراع شبي ..

اعرفو ما طبيعي ..

سمعت صوت فوك .. تركت و ركضت اصعد .. طلع نائل فاتح باب الغرفه وصراع واكف ونائل يكلو :- اذا مهددك يا خويه احجيلنه انت ليش تظم

بايع روحك انت كول ..

صراع:- انه ما قصة بايع روحي .. بس نائل صار لازم نرتب طلعتنا من الرمادي ..

نائل :- منطقتنا مسيطره ما وكعت بيد الدواعش عليش نترك بيوتنا

-اسمعها مني .. اشوف شلون نرتبلنا بيت ابغداد وننتقل شننتظر يدخلون داعش وننهجم ؟

يحجي بس بالو مشغول ويفتر يطلع ملابس ويروح منا ويرجع يرد ..

نائل :-صراع والله وضعك ما عاجبني بس فيدني بهاي قيس شكالك

-الملعون فر راسي .. انه ما خايف منو خلگ صعلوك .. بس اخاف يأذي واحد من اهلنا ..

-شكالك

-كالي تتذكرني ان شاءالله

-يعني تهديد

-ما ادري تهديد اليه لو لأهلي ... شبچ بالي هلكلب

ليليان:- صراع الله يخليك خلينا نروح منا .. خاف يكتلوك

-لا تخافين بويه .. ان شاءالله اشوف شلون ارتبها .. ونطلع لبغداد ..

نائل:- بغداد شنو ابو حرب هي بغداد مهدده بالدخول .. اترك دوامك واطلع من العراق تره راح تجلطنا..

-هم رجع لصخامي يابه دموامي شعلي .. ما اترك .. هسه انه كل همي ائمن عائلتي واهلي والباقي يهون يا نائل

-هو شيهون خويه انت شنو بايع روحك .. كومة لحم براسك وين يروحون .. فكر بيهم يا اخي

-نائل يرحم اهلك .. والله دايخ .. خليني افكر شلون ارتب طلعتنا لبغداد ..

-زين انت من حاجاك ما كلت الشيخ ريكان هيج كالي

-يا شيخ انت هم دواعش يكضبهم شيخ .. داعشي هاذ .. العشيره كل ما بيدها تتبرا منو ..

-زين الحل هسه شلون

-الحل يم ربك لا تهم بأمر .. كول يا الله خلصت السالفه على خير ..

-والله مدري شلون مأمن انت

-انه ما مأمن وبأقرب وكت اطلع لبغداد واشوف هناك ..... تقرب يغير .. طلع نائل و هو يبلد بس راسو يفكر ومشغول ..

ما يدري شيكضب وشيحط .. كضبت اديه .. صراع لا تضحي بروحك لخاطري ولخاطر اللي ابطني فدوه

-اخذ نفس .. تنهد .. دحكي بويا .. هلنفس هاذ ما يكطعو الا الخلقو .. لا تشغلين بالج بهلامور .. خليها علي و ريحي حالج ..

بدل ونزل .. اني كمت ارتب وبالي مشغول بي .. يربي عود صدك هددوه .. اوووف فدوه احمي واحفظو من كل شر ..

نزلت .. عمامهم رايحين .. بس الحجي وسعد والعائله كاعده ويقنعون بصراع يترك شغلو ويكضب الشقق اللي بعمان ويطلع من العراق ..

بس صراع ثاولها ما يقبل بس يكلهم اي ان شاءالله والحجيه تحجي بحرگة گلب وتكلو وليدي براسك ايتام لا تجازف بروحك اطلع ..

ادحك عليهم يحجون وكلبي محترك .. هو ما يتجاوب وياهم شلون بيه

.. سمعت نور صاحتلي .. رحت الها للمطبخ .. تنتر عليا شلون عايفه الجاي وصاعده ..

كلتلها :- تره والله عقل ما براسي يفسر بالي يم صراع ..

-تلحكين اصعدين يمو وتفتهمين كلشي انتبهي لشغلج شنو بس اني مبتليه

-نور مو من الصبح اني وياكم شسوي بعد ..

-اي دطلعي من الثلاجه دنفض العشا .. اريد اروح لغرفتي ارتاح راسي طك تره

-وما ترحين منو كاضبج .. تره بزعتينا احنا بيا حال وانتي بيا حال ..

... تركت ومشيت طالعه روحي مدري شبيها هاي حاطه گورها و گوري لا والحظ حتى وياها حظي ما كعد..

بقيت استمع الهم وهم يحجون .. هو يبينلهم انو ما مهتم بس الحيره باينه بعيون ..

رجعت للمطبخ .. شفت نائل و نور يتكاونو بالمطبخ ..بس ما بصوت عالي .. هي تشكي ومعصب عليها ويغلط .. شافني تركها وطلع ..

دحكتلي بعصبيه و تركت كلشي وراحت لغرفتها .. ديلا خاف عايزه هاي تكملها عليه ..

بس ما بحالها .. راسي كلو بصراع اشتغل وافكر بي .. طلع روحي لا راضي يقنع ولا راضي ياخذ حجايه كاتل روحو على هلجيش ..

خلصنا العشا اني ومرت سعد الثانيه .. وكفت وياي شو جنها خوش بنيه احسن من الاعرفهن عاد بيها وكفه وما غثتني الا الحيايا الغيرها ذبحني

ما اعرف المن اصد لسمومهن لو لصراع لو الظهري

اللي مدري احسو انفصم من التعب من الصبح لسه افتر ما كعدت .. فضينا العشا و مواعينو ..

واجو خطار جماعة سعد ..

وجاي طالع وجاي راجع .. تشكلت ونور محقره وياي ذبحتني تفوت وتطلع ماتمد ايدها ونوال المسمومه تزن براسها شلون ضرتها وكفت وياي .. ماتت .. واخلاص شعلتها علي وراحت

الخطار بالاستقبال و العائله بالهول يتناقشون وصراع وياهم .. وكل شويه ينتبهلي ويكلي تعبتي يولي صعدي مددي ظهرج ..

والحجي هم يصيح كعدي يول وحافظي على وليدو ابطنج .. بس شسوي براسي براسي .. و هيام خافت من تهديد صراع لا يأذي ويأذي ابنها ومفتر راسها وكاعده وياهم ..

كملت شغلي وطلعت انكث بأديه .. وفات محمد كال ثنين جاي ..

صراع رفع راسو :- صعدي يولي حامل من الصبح لسه تهفين ..

بعدو هسه نطق و نبتو نور :- ابو حرب فدوه تره الطفل ما معلك بخيط ويكع من الشغل والتعب.. تصعد شنو تخلي هلهوسه براسي ..

صراع دحكلها متفاجئ شلون تردو وتحجي بوجهو .. بعدو ما مستوعب كلامها

ومنشوف الا نائل مدري منين طلع وكضبها من راسها .. ويصرخ ولج احنه بيا حال وانتي حاطه كورج وياها الف مره كتلج حسج ما اسمعو ..

بساع صراع گاملو .. واحنه التمينا علي نريد نخلصها من ايدو وهو يصرخ .. :- عمري ما حاط عيني بعين اخوي و اكف بوجهو تجين من تالي تحاسبينو .. اليوم اهجج والله ..

وصراع يزكح بيه :- يول اطنا صبر نفتهم ولي يابه شجرالك اهدى انه اتفاهم وياها .. ويجر بي .. ويصرخ

ونائل يصرخ و ومن بينا يدفر و يجر بيها .. صراع كاضبو من جتافو ويدفع بي والحجي واكف ويصيح عليه ..

ونور تصرخ ما اضل هينا طلعت روحي عيشة السودا عساها.. هم حاسبينو علي زوااااج ما اضل هينا والله

نائل:- ول يابه تهددين انتي ... بنعال ما اشتريج من عين باجر اجيب مره واحطها ام لجهال اخوي وبألف قوندرا وراج ..

وهي ادفع بينا تريد تمشي والحجيه وام سعد كاضبيها ..و نائل صاير نار .. اول مره اشوفو بهلعصبيه . ولا هدأ ..

ويصيح اطلكها والله .. ولكم فگرتني هلفكر فگرتني .. ما اريد والقران ما اريدها .. زور لو كوا هي .. ارحموني منها ما اريدها ..

وهي تكلو لا تريدني طلكني ..

زكح صراع بأمو :- يمه انتي موكفتها هينا شنو منتظرتهم يتذابحون دخليها جواااا .. سحلناها بالزور جوا لغرفة الحجيه ..

وصراع يدفع بنائل بره .. نائل اخذ موبايلو وسويج سيارتو وطلع ..

-نائل حدر هينا خل نفتهم شصاير

-ابو حرب رحمة لميتينك عوفني بحالي يا اخي .. ما اريدها ذبحتوني بيها ما احبها والله .. ماااا اريدهاااااا .. حجاها بصرخه وطلع من البيت

التوم نطو من البجي ومحد يدحكلهم .. شلتهم اثنيهم ..اريد اسيطر .. صلوات واحدهم مدبدب ويشمرون بارواحهم .. حرت شلون اكضبهم وامهم تصرخ بغرفة الحجيه وتبجي ..

علي اخذ مني احمد واني اسكت بمحمد الصغير ..

زكح بيا صراع :- يول صاير بيناتكم شيء شبيها متحمله عليج ..

-لا والله ما عدي شي وياها بس هي مدري شبيها صايره ..

الحجي:- هاذ نايل ناوي يطلك وياخذ البراسو لهذا جاي يهجج بهلمكروده خطيه

صراع:- ويامن تحجي وبيمن تقنع .. صغار هم .. يولي جيبيلي ماي صعد ضغطي هلرعنين ذول .. خاف انه ناقص هم يكملوها فوك راسي هل ادبسزيه

كعد تعبان واعصابو ناطه ويغلط .. رحت جبتلو ماي والطفل بيدي ما سكت .. صاح بمحمد ابن سعد كالو اخذ الجاهل اشتريلو فكنا دختتتتت ..

فات سعد .. ها شكو ..

-اكعد سعد خل ادحك هذولي شالفتهم .. دشوف الحل وياهم شلون .. حدري ليليان..

وگفت كبالو .. جت هيام وكفت وياي تريد تفهم الحجي من صراع ..

... ليش نور تحاسبج على شغل ..

-صراع الشغل بيناتنا مقسم بس هي مدري شبيها ..

-عايفه شغلج عليها ؟

هيام:- ابو حرب اذا ع الشغل سهله .. هم واصله بيهم للطلاك واحد ما طايق اللاخ ..

ليليان :- اني كتلو لصراع هي دتقارن بيناتنا ومن يوم التم زواجنا هي كن ماطايقتني ..

صراع :- ام علي صيحيها لهين دشوف الحل وياها .. او اكلج فرغيلي الغرفه من الهوسه .. جوا احسن .. وگام

.. راد يدخل .. صاح تعاي .. رحت وراه ..

-يولي الموضوع الصار ذاك اليوم كون تعاتبتي وياها لو حجيتي

-لا والله ما حجيت بس هاي اخلاص ونوال محشداتها عليه .. وهي متحمله عليه مدري سبيها حتى على حملي ما باركتلي .. اذا ما يريدها نائل اني شذنبي ..

... اخذ نفس مسح على شواربو .. هز راسو وكال .. سهله .. مشى للغرفه .. مشيت وراه

دخلنا هي وجها دم وتبجي ..

كعد صراع وكاللها .. حدري بعد اخوج احجيلي .. مشكلتج بالضبط وين ..

طكت بجي بوجهو وتكلو مليت والله طلعت روحي

-تركيني من البجي واحجيلي .. مشكلتج بليليان ما تساعدج لو برجلج ؟

.. سكتت ودنكت ..

-لا تسكتين احجي .. حتى اذا السالفه سالفة شغل وهلتلعوص هاذ مال الزعاطيط اعزل كلمن جدرو وكل لشه تتعلك من كراعها ..

واذا السالفه يم نائل هينا اكف واحجي وياج عدل ..

نور:- انتم ما دشوفونه تصرفاتو طلعاتو مخابرتو .. حاسبو احجو وياه

صراع :- نور احنه من اخذناج .. ما اخذناج مره الو .. كل همنا الجهال ذول وهلشيء گلنا الج من البدايه ..

مثل ما انتي ما الج ذنب وتردينو رجل .. هو هم مالو ذنب بمرة اخو و الجهال ..

نائل تصعب عندو لأن انتي مرت اخوه .. والشغله الثانيه گبل لا يموت عابد ... وهو عاشك وحده ويريدها .. شذنبو بيكم ما من حگو ياخذ اللي يحبها ؟

نور:- زين واني شنو ذنبي

-انتي فهميني رايده رجل لو واحد يلم جهالج ويداريج انطيني هلنقطة حتى احجي وياج بعدها بالصريح

.. بقت ساكته ما حجت .. ردها .. خويه تردين رجل وتتزوجين باطل اليكلج لا .. حياتج وانتي حره .. اطلكي وروحي شوفي اللي يناسبج ..

دكولين اريد جهالي .. تحملي لخاطر جهالج واگعدي

وخليها ابالج .. الحياة يحتاجلها تنازل .. يا تختارين نفسج وتتنازلين عن جهالج يا العكس وانتي براحتج ..

... بقت بس الدموع تتجاره وما ترد ..

عاد كام من مكانو باس راسها وكاللها لج يول والله بغلاة هيام وحلا انتي .. ما ينطيني گلبي يكسر بيج .. تحملي يابه منه .. تره والله كاسر ظهرو لخاطرج الا جان من زمان اتزوج وراح ..

راد نخطبلو .. فرضت الا بيت لوحدج ترتاحين بي انتي وجهالج ما يحطج وي ضره وتنقهرين ..

صبري بويه .. يلا سباعيه كومي غسلي وجهج واتركي يولي وين ما يريد .. مردو يرجع ..

كعدت الحجيه تبوس بيها وهيام تهدي بيها .. هدأت شويه .. عاد كاللها صراع .. لمي غراضج اخذج باجر لبيت اهلج ارتاحي منا لورا العيد حتى نفسيتج ترتاح ..طلعي تونسي .. شتردين سوي

وجر محفظتو وانطاها ورقتين وكاللها هاي الج اشتري النفسج ولا تظلين كاتمه على روحج .. مالج غرض بالجهال مصرفهم يصل .. شوفي روحج ..

والحجيه وهيام وام سعد كلبوها ضحك وبعد شتردين وروحي واديج بالدهن وكلبو الگعده ضحك..

واني ادحكلها .. ما اعرف احسها تكسر خاطري

طلع واشرلي اجي .. رحت عندو

-طلعي حظريلي الحمام والله دايخ احس راسي راح ينفجر بالقران ..

بستو بخدو وكتلو تأمر ..

-هااا يول ليكون انتي هم ترديلج ورقتين

-شعرفك ؟

-يولو گلب والده هههههه

-ههههههههه لا والله بس هيج محبه الا يا ورقتين اني انطيك بس خلوني انام متت

-عمت عيني طلعي نامي يولو لا اتعبين بيه اني اطلع احظر ..

-لا حياتي .. خدمتهم كلهم .. ليمك و اكف .. شصار ..

حظرتلو .. ورحت للغرفه .. نمت ما دريت .. حتى الضوا والتلفزيون مشتغل كاعد عليه حرب ..

فزيت لكيت صراع داير وجهو لحرب نايم يمو وحاظنو .. والغرفه مطفايه .. تگربت يمو .. حس عليا .. رجع ظهرو وفتح ايدو ..

وخلا ايد لحرب نايم عليها وايد اليه .. حظنا اثنينا وهو بعدو غافي ..

... كعدت الصبح على صوت الباب حرب نزل .. دحكت .. الساعه 9 الا عشره ..

طلعت .. صدت بوجهي نور شايله ابنها للحمام .. ما حجت كن خجلانه .. كلتلها صباح الخير .. ردت صباح النور وفاتت ..

ما اعرف رغم اسلوبها وياي صار مدري شلونو بس خطيه احسها صدك مظلومه يمكن اني لو بمكانها وصراع مثل نائل ما يهتم وادحك غيري مدلل .. هم اقارن روحي واضوج ..

نزلت للحجيه .. تلكتني .. هلا بأم مسلم ..

-ها حجيه تلكيتيني بمسلم .. بعدين شو ابنج يقرر اسماء بكيفو اني بنفسي اسمي زكريا اذا البطني ولد .. واذا بنيه مريم ..

-الولد الو والبنيه الج .. اذا طلعت بنيه سميها مريم .. وهسه هيريلنا الريوك بنيتي خطيه حرب لسه ما تريك .

... رحت خلصت العليا .. ونور بس بغرفتها ونائل دحكتو جوا بغرفة سعد القديمه نايم ..

للظهر خابر صراع امو وكاللها انطي خبر لنور اجي الكاها حاظره اوديها لأهلها .. جا اخذها وطلع حتى ما قبل يتغدا .. كال تعبان بس اكعد اتبند وما بيه اكف بعد

..رجع اني محظرتلو الاكل .. حطيتلو بالهول ..

-شوفيلي نائل هينا بالغرفه كوليلو ابو حرب يريدك

.. رحت فتحت الباب .. كاعد والسماعات بأذنو .. وخرهم وكال ها ليليان ..

-ابو حرب يريدك

-صفن بالكاع شويه وهز راسو اي .. كوليلو جاي ..

-طلعت .. كتلو ورحت اجيب العصير لصراع .. خليتلو ثلج و گصبه .. اجيت لكيت نائل عيطلع من الغرفه .. والحجي كعد

.. صراع ياكل وشال راسو .. :- اسمعك نائل احجي

-ابو حرب اريد اطلك

الحجي :- يابه وليدات اخوك بعد ابوك ياهو الالهم ..

نائل:- حجي رحمه لهلكم فهموني بالقرأن تعبت .. ما ترهم وياي .. جاي اتنازل واحاول بس ما ترهم .. يا ناس الجان وياها يتوسد ابن امي وابوي .. انتم تفهموني لولا ..

صراع:- نائل بس ما ترهم وياك لو اكو شي ثاني

-صراع اريد اتزوج

-محد مانعك يول بس خاف الله بنور وجهالها .. جهال اخوك ذول لو طلكتها يتيهون ..

-صراع ذبحتني ليل نهار .. شكالت ليليان وشسوت ليليان وليش هي هيج وانه هيج وزن ورن ما تمل حاطها راسها وي ليليان

وانه ما اتقارن بيك ولا هي بليليان .. انه ما رايدها .. وتقبلتها بس لأن استعطفتها .. وخنت الاحبها وقبلتها في سبيل ما اظلمها بس ما جاي ترهم بالقران ..

شلو ما اصد هي مرت اخوي عابد نفسيتي ما تتقبلها ..

-شوف نائل .. سالفة اطلك نور .. گطنه واشلعها من اذنك .. طلاك ماكو .. هذا حجيك المفروض تحسبو من الاول وتكول ما اريدها .. مثل ما انه حسبتها ورفضتها ..

-كل همي جانو جهال عابد وانت تعرف اهل نور شلونهم

-عجل تحمل يخوي .. ما جدامنا غير انك تتحمل .. تريد تتزوج من حكك ناقص عرض اليمنعك .. بس بحق .. مثل ما التتزوجها مرتك .. نور نفس الحاله ما تنقص ذره من حقوقها ..

وكف مشاكلك وياها تره كفيلك الله ما بيه حيل بعد .. ارحمني يا خويه وكول هلرجال تعبان المن التفت الك لو المن بيكم

الحجي:- ابني تره والله نور طيبه وبنيتنه هلله هلله وياها .. شايلتك وشايله اهلك وجهال اخوك .. شتريدها يابويه تصير .. هي هم بشر وحالها حال النسوان تشوف وتريد ..

بقو يحجون وياه ويعقلوه وهو سكت .. وبعدها كلها طشت لغرفها والجهال ماكو وصراع صعد نام .. وحرب هادئ ابد ما عندو مشاكسه بالبيت

تربية الحجيه وشكد يعجبني تربيتها .. دوم مكعدتو يمها وتعلم بي وصايرلها بوديكارد .. شتريد تكلو جده كوملي وجيبلي ..

بقى البيت يصوصي .. هدووووووء .. عكس البارحه تماما .. صعدت اخذت الف من محفظة صراع ونزلت ..

گلتلو حرب كومي اشتريلي ..

-شتردين

-هو شكو بالمحل ؟

-اشكال الوان

-يعني مثلا ؟

-اروح اعددلج ..

-حرب والله اتلعب ارواحنا من تشترينا .. يا اخي تذلنا .. ما عندك غير جيس ليز وحب بطريق مو هذا ابوك يجيبلنا اشكال الوان ..

-عجل شسوي .. غير انتو تكلولي .. وصيتوني على غير شي وما جبتو

-انطيك موبايلي تصورالنا المحل ومن نريد نشتري مرت اللخ ندور الصوره ونكلك هذا ..

-ماشي بس ما اريد موبايلج اخذ الايباد..

..براحتك بس روح ... اخذ الايباد وراح يصورلي المحل.. نزلت حلا

-شو ماكو احد

-مدري شو كلها هدت بالغرف ..

-اريد اسوي حلاوه ضايجه بس ما اعرف شنو من حلاوه .

دتحجي .. دخل حرب .. مصورلي المحل وكفت حلا ادحك وياي على حلويات المحل ..

اكو صوره بيها ابو المحل بس هلكد حلو يجنن .. اني ركزت عليه جان حلا تحط ايدها على ابو المحل وتكلو لحرب اني اريد من هاي الحلاوه ..

دحكتلها وضليت اضحك .. الا صدك حلاوه احسن من حلوياتج الما بيها خير

-قابل حلوياتي وحلويات الله سوه .. صنع رباني دحكي العيون من بعيد تضوي يجعلني جبس ليز واكابلو

حرب:- والله انتن ما استحن اني اصورلجن الحلويات وانتن ادحكن ع الزلم

-اسكت لا يروح يسمعك ابوك الا يصلخنا ..

حلا:- هذا من شوكت مفتح هلمحل معقوله هيج حلاوه بفرعنا وما ندري بيها ..

واخذت الموبايل ادحك بيه .. وحرب ضاج شلون نتغزل بابو المحل .. عاد وصينا شيشتريلنا

حلا:- انطيني 500 واني من يكعد باباب انطيج

ليليان:- هو اني خامطتها من جيب ابوج دشتري يمعوده ..

راح اشترالنا وكعدنا بغرفة الحجيه ناكل وعلى موبايلاتنا ..

شوي ونزل صراع .. فتح الباب .. هااا شو هينا ..

حرب:- بابا هم زين اجيت ذن يرادلهن جتله يدحكن ع الزلم ..

-يا عزه العزاك شوكت هاااي حرب

صراع:- على منو يدحكن بابا .. وكعد يمو ..

-دحك بابا صورتلهن المحل .. هن يكولن نريد من هاي الحلاوه ..

-منو الكالت ؟

ليليان:- حلا

حلا:- ليليان

... ضحكنا اثنينا ...

-الله يطيح حظجن .. شفت بويه ليش ما اخليهن يطلعن .. النساوين يبوي مو امان يدورن حلويات ..

-كلش عاد انتم شرفاء

-لا ياب .. كوا.... مثل اخ منك يلساني .. ليش ما تسكتين انتي .. دكومي سويلي جاي كومي

رحت اسوي وهو كاعد وي جهالو يضحك ويتشاقى .. وكعدت الحجيه طلعتنا اصابع كعك ابو الدهن من جنطتها وكالت اكلو ..

صراع:- ليليان باجر حظري روحج ع الساعه 9 الصبح الكاج جاهزه .. نعقد بالمحكمه ..

حلا كامت .. دحكتلها و كتلو تمام ..

-حظري المستمسكات مو تنسين ..

الحجيه:- يمه شوكت تروح بغداد .. لا تضل هينا والله ييمه خايفه عليك

-ان شاءالله حجيه بس خل اعقد محكمه الليليان اول .. كلشي يصير لا سامح الله وتضيع بين الرجلين .. ائمنها منا وبعدها اشوف شوكت اطلع لبغداد وارتبها هليومين ..

-اسم الله عليك وليدي تعيش ويعيشون بخيرك ان شاءالله بس اخذ حذرك يا ابني والنعم بالله بس الحذر واجب ..

-ان شاءالله ..

... طلع هو ووصى امو تاخذ حذرها علينا .. والحجي اخذ ام سعد وراحو لبيت سعد يتعشون .. بقينا بس اني والحجيه وجهال صراع ..

سوينا عاد اني وحلا بيتزا ودزينا على هيام تتعشى ويانا .. وعلي ما قصر نص البيتزا صارت ابطنو .. ويكفخ على راسي وراس حلا و ساره اليكول نشتغل عندو .. واني كلساع ودافعتو من المطبخ .. ويرد يكفخ ..

واهددو اصورو من يشخر وادزها لذولاك الناس وهو يخزر ويخرب من الضحك ويرجع يكفخ بيا وامو تكلو يول حامل على كيفك

يردها:- يمه خوما الطفل نايم براسها .. هاي براسها مطي حتى مخ ما تلكين

-يا فدوه لالله ليش يمه .. اشو عقلي يوزن بلد .. تروحلي فدوه عيطه (اسمي عيطه لأن طويل وضعيف)

-اني عيطه وانتي ؟ قوطية ميرندا دبل

-شنووووو اني سمينه .. لااا اني ما سمينه حلوه ..

-شايفه روحها انجلينا جولي

ونبقى اني وياه مثل الرويسيه نتعارك ونفس الحال وي حلا .. وساره .. حاط كوره وكورنا .. وشايخ علينا ..

لليل راحت هيام و صعدت بغرفتي .. فتحت تلفزيون و كعدت اطمش ع التفزيون .. مسلسل حريم السلطان ..

مدري ليش هذا المسلسل لو ينعاد الف مره اكعد اطمش عليه وكأن اول مرة اشوفو .. حيل اعشقو واعشق حب السطان وهويام ..

.. واني اطمش فات صراع .. اني مربعه ع السرير وعيني بالمسلسل.. تقرب ودنك باس خدي :- شلونج عمري

-هلا حبيبي .. ورديت اطمش .. ترك علاكه الحلويات كبالي ومشى يبدل .. ويحجي مدري شنو منتبهت .. فكري بالمسلسل .. سكت عرف بالي مو يمو ..

مديت ايدي اخذت حب عين الشمس من العلاكه وجريت المنفظه وخليتها كدامي واكرز و واطمش .. هو جا وتمدد عكس ورجلي للكاع .. دحك شويه .. وكضب الريموت ..

جريتو منو بساااع

-لاااا لا اديرو

-يولي اريد اشوف الأخبار

-بس شويه والله راح يخلص ما بقى شيء ..

سكت ومد ايدو لجيس الحب بحظني اخذ صمه و بقى يكرز و يدحك وياي ..

. جانت لقطة هويام مسويه مصيبه وبدل ميعاقبها السلطان باسها و ضرتها ادحك عليها .. حجيت :- الله شكد يحبها

-عجل حدري خل احبج وابوسج مثلو ..

-بس هاي هاي الجذبتك .. دحك العشك بينم يجنن رغم عندو الف وحده بالحرملك وهو ما بگلبو بس هيام ..

- دحكي يولي الرجال ممكن يعاشر جثير نسوان بس ما تدخل گلبو غير وحده بس ..

-و الله حبيبي اشوف كلبكم كوستر يسع كل النسوان ..

-هههههه هاذي رغبة وتمثيل بالحب لا اكثر .. بس لما يحب فعلا راح يعتزلهن كلهن وتبطل رغبتو تنجذب لغير اللي يحبها ..

-وشلون نعرفو يحب ؟

-لما يصير يتنازل تدريجيا عن اشياء هو ما يقبل بيها سابقا ..يصرف نظر عن الأخطاء .. يسامح ..يتادرك الامور .. يتفاهم .. بأختصار يتغير تغير ملفت طوعا للتقرب من اللي يحبها ..

-واووو حلو .. بس منو اللي يحبها اذا عشرات شيميز منهن ؟

-ما يميز هو .. هي التتميز .. الرجال يعشق المختلفه .. اللي يحس بيها شيء ما شافو ابقية النسوان اللي مرو عليه سابقا .

وهذا الشيء اللي خلا السلطان يعشق هويام بالذات .. لانها مختلفه .. واختلافها بذكاءها .. تعرف اشلون تجذبو وتخلي هايم بيها ..

-ضحكت وشكيت حلكي بابتسامه وكتلو ..يعني حبيبي هسه انت مثل السلطان تحبني اني لأن مختلفه وذكيه مثل هويام ؟

-بالضبط مختلفه .. بس باختلاف بسيط .. هو حبها لأن ذكيه وتعرف تجذو وانه حبيتج لأن غبيه و ثوله ومخلصتها وياي تجفص ..

-صفنت بوجهو واحس نقطة عرك نزلت براسي مثل ماروكو

...دنك مبتسم يضحك

.. بالله هسه هاي رزاله مغازله مفتهمت .. صارلك ساعه تحجي حلو عجل من وصلتلي لصتها مثل البعير للمنخر و برك

حجيت وفز بسااع كضبني من شعري .. يول منو هذا البعير

- لا لا لا والله ما انته ما انته والله ما علقصد طلعت بلا ما اعرف والرب زلة السان ..

.... ضربني على راسي :- شوفي وهذا دليل الثول و الغباء مالج.. ول يابه انه احجي عن تجربه عبالج عبط .. وضحك .. عاد اني هم طكيتها بضحكه ولواكه حتى ادارك الجفصه

-هههههههههههه حبيبي انت ابو زعطوطي البطني .. صروعي اكو احد يلحكك يا سلطان يا رمان .. انت السلطان مالي ..

-صبغي بعد صبغي ..

-والله احبك وتقربت يمو

-دحكلي مبتسم وهز راسو .. شمرت روحي عليه واضحك .. ونسيت المسلسل ..

والحمدلله مرت الجفصه على خير وبركه الا كلت انعلست ..

ثاني يوم .. بعد ما طلع للدوام كال ساعه وارجعلج.. كعدت ارتب بنفسي ..

لل9 اجه هو .. اخذني ورحنا للمحكمه .. دخلت .. كال :- راسج يول لا ترفعي كلهم جماعتي

-تمام .. بقيت منزله عيوني .. وهو كاضبني من معصم ايدي ويمشي وياي ..

:- اكفي هين ..

تركني و اندار يحجي وي جماعه .. شوي وفتنا للقاضي .. هو واكف واني .. سلم عليه رجال جاي وي صراع .. حجه وياه ..

لان اني قاصر ومحد من اهلي جاي وياي .. فمعرفه وي القاضي دبروها .. بس كال انتي ليليان جرجيس ..

كتلو اي .. كتب و وقع وحاجه ابو حرب على اهلي كالو ابوها متوفي وامها بالموصل بس تعرف الوضع ..

انطاه العقد وكالو مبروك .. ردو :- الله يبارك بيك

واشرلي نطلع .. اخذ ايدي وطلعنا ..

-هاهيه ؟

-عجل شتردين بعد

-شو ما كال اعلنكما زوجا وزوجه وهلسوالف

-هههههه هاي بس بمسلسلاتج تلكيها .. امشي .. اخذني وصعدني بالسياره .. صعدت وجر راسي وباسني بكصتي وكال مبروك

-شنو تذكرت

-لا بس ما كدرت ابوسج بالمحكمه وجماعتي موجودين .. تنهد .. الله يقدرني ويخليني اسعدج وما اخليج تحتاجين اي بشر ..

-الله يخليك اليه ..

-هذا ما بس عقد زواج .. انه زوجج واهلج وامج وابوج .. كلهم انه بهذا العقد .. ولو صارلي شي بهذا العقد حاربي واخذي حقج

..

-ليش تحجي هيج ..

-الاعمار بيد الله .. ما احجي هيج لان مهدد بس .. هو الموت على باب كل ابنادم ما يدري بيا ساعه يسلم امانتو ..

اكدر اموت هسه وبالي امين .. ضمنت حقوقج امام الله ..

-لا تخوفني فدوه والله اموت لو صار بيك شيء ..

-مدام انه اشتم الهوى ما اريد اسمع كلمة خوف ع السانج .. اطمني ولا تشغلين بالج .. وخليج فرحانه ..

.. اخذت ايدو من الگير بستو ... احبك ..

تقرب باس خدي .. :- وانه اعشك كل شبر بيج

شغل و مشى وفتح اغنية (ربع حبي ) .. صرت تسمع اغاني ؟

-لا والله ما اسمع .. بس مدري ليش ذاك اليوم بالدوام طلعت اتغده وانتي على بالي .. لا ارادي ركز بالي وي هلاغنيه اسمع واكول اي والله عاد حملتها بجهازي كلما اشتاقلج افتحها واسمع ...

-ههههههه اموت عليك

-اعشكج ..

-بقى يمشي واني استمعلها احس هو يغنيلياها .. شكد استلذيت بيها ..

...صراااع خل نحتفل .. نسوي حفله ونحتفل بزواجنا ونسوي كيك وعصير

-اي عمري الفلوس تندليهم فوك شنو ابالج اخذي ولا اتردين وسوي الترتاحيلو

-وانت ؟

-انه عدي شغل والله جان احتفلت وياج بس تعرفين اريد استعجل بسالفة طلعتنا لبغداد ف اريد اروح بشغله .. ان شاءالله من ارجع نحتفل انه وياج سويه ..

-هااا .. ما اعرف .. حزت بنفسي مدري ليش . جنت اتمنى اسوي حفله لو البس بدله بنفسي اصير عروسه وافرح بس شكلها هلامنيه هم صار لازم الغيها من قائمة امنياتي مثل ما لغيت الدراسه ..

لسه بعد شنو مكتوبلي الغي من قائمة امنياتي حتى اماشي الحياة و اعيش ؟!!! الله اعلم.....يتبع

☆☆☆☆☆☆