المراهقة والأربعيني الحلقة (40)

المراهقة والأربعيني

 

الجزء الأول

الحلقة  (40)

اخذت نفس.. تنهدت.. وما حجيت.. هو نكث ايدي وطلع عصبي .. وضرب الباب وراه..

بلعت ريكي.. رب اشنو اسوي .. اخذج واخذج وين ياخذني والله تعبت .. ما عفهمو اشنو اللي يريدو..

كملت شغلي ودخلت بالغرفه افكر.. دحكت بموبايلي.. اخابر ساره اسألها هي الوحيده يمكن تفهمني.. اني حافظه رقمها انطتنياه..

اتصلت.. خارج نطاق التغطيه.. ما متواجده .. النت انقطع .. والشبكات يمهم شبه مقطوعه..

گلت شسوي هذا اللي اكدر عليه .. اتركو هو يهدئ وحدو.. جا هو بليل .. اني متمدده بفراشي كاعد اتابع مسلسل خليجي..

انطى علاكة الحلويات للحجيه.. ونتر بيه ..
:-تحركي جيبيلي مي

رحت جبتلو واجيت .. سمعتو يسولف وياها على شغلو بالمول وهلسوالف ما افهمها.. انطيتو اخذ بلا ما يدحك عليه..

ردت اكعد.. اندار :- صعدي شغلي المكيف و حظريلي الحمام.. اريد ارتاح.. وهاج اخذي الموبايل خلي ع الشحن..

اوووف ربي.. مو مسلسل من يكعد هو يصير عليه سم.. كمت.. حطيتلو الموبايل .. بس الشيطان تربع بمخي .. وكلت ادور جهازو

دورت الماسنجر و الواتساب .. ماكو شي .. بس بالرسايل لكيت رساله منو لأم مصطفى.. كاتب بيها..

💬(عكب باجر اجي لبغداد ويصير خير)

دورت ماكو رسائل قبلها بس هو باعث هلرساله .. احس للحظه الدم صعد الراسي واشتعل .. اختنكت

فات للغرفه وهو ينزع دكم بداية قميصو..

-شجاي تسوين..

-شنو هذي

-شوو .. اخذ الموبايل .. دحك الرسايل .. رفع حاجبو .. وغلق شاشة القفل.. طفى ..

-ما فهمت

-مو شغلج تفتهمين

-عكب باجر طالع البغداد ؟

-ما رد

-مو احجي وياك..

-حظريلي الحمام

-اني ما خدامتك حتى تريدني بس اخدمك وانت تخون

-ولا انه مجبور بيج اصرف واداري واحب وادافع واوفي وبالمقابل كلشي ما احصل .. الزواج اخذ وعطا..

-انت اشنو اللي تريدو

-تفتهمين كل الزين ما يحتاج احجي

-والرب ما عدفتهم اشنو اللي تريدو

-تغشمين نفسج..

-منو ام مصطفى

-گلت مو شغلج..

-ما تروح البغداد

-تأمرين امر خانم ويلا روحي حظريلي الحمام..

-انت جاي تستهزأ لو شمو متروح والله

-ليليااااااان احترمي نفسج واطلعي مني

-ماااا اطلع..

-اللهم يصبرج ياروح ...

حجاهاا واندار يطلع.. گضبتو من ايدو .. انت على شنو ناوي

-ما ناوي على شي يابه يواشج عني .. لا اله الا الله .. لك صدك بلوه هاي .. لا انطيك ولا اخلي رحمة الله تجيك..

.. نكث ايدو وطلع مزعوج.. يربي راح انجن.. نزلت جوه واني ضايعه بافكاري .. شسوي شلون اكدر امنعو يسافر..

رحت لفراشي كلعاده تغطيت وبجيت لحد ممليت وغفيت.. ثاني يوم.. كعدت ب9 .. هو ماكو ..

اشتغل وبالي مشغول .. شلون اخلي ما يسافر.. احسن حل اصعد يمو بليل وشيريد.يسوي خل يسوي حتى لو يذبحني اموت ولا ابقى بهلحاله..

خلصت شغلي وصعدت لغرفتو رتبتها وغيرت فراشها وسويتها تجنن.. هيج فجأه گب النشاط بداخلي وتحمست انو اتقرب واتحمل اللي يريدو..

خلصت غرفتو و نزلت رحت لنور كتلها تعرفين تحفين وجهي.. كالت اي بس جيبي خيط..

رحت جبتلها وحفيت وجهي ونظفت نفسي.. دخلت سبحت وطولت بالحمام بواهس تنظيف طلعت المع..

رحت لغرفة حلا اخذت الكاويه مالتها بدون ما تعرف ودخلت لغرفة صراع.. طلعت باليوتيوب اسهل طريقة كوي الشعر .. وكمت اكوي بشعري ..

خلصت .. ضميتو كلت بعدين ارجعو من تنام.. كعدت بغرفتو اتفرج وانتظرو يجي حتى اراضي واحجي وياه..

انتظر و انتظر وحسيتو تأخر .. دحكت الساعه 5 العصر .. شو اتأخر ليش .. طلعت ردت انزل دحكت حلا هم ماكو رجعت المكوي وخليت منها كحل لعيوني

و نزلت جوه نور سوالف وحجي.. بس كل عقلي يمو وادحك الساعه وهو ما بين يوميه ب3 يفوت .. وين راح.. ردت اخابرو.. گلت لا هسه يفكر زاته روحي عليه واخابرو ويرفض ويعكر مزاجي.

خليني هيج منتظرتو احسن.. صار المغرب وسوينا العشا .. وهو ما بين.. كلت اخلص تنضيف العشا واكول للحجيه تخابرو وتعرف وين هو وليش اتأخر..

فضيت البيدي ورحت للحجيه :- يوم شو صراع اتأخر ليش ..

-ما يجي اليوم

-ليش

-طالع بشغل

-وين

-لبغداد

-شنووو !!!!!!!

مثل جام خلصت كل يوم تلمع بيها وجا واحد برصاصه فلشها كلها.. هيج كانت صدمتي بداخلي والعبره اختنكت ابلعومي..

لا اكدر احجي واجاوب.. ولا اكدر ابجي كدامها واني اسألها ومتفائلها وفجأه وجهي يتغير كبالها..

بلعتها وطلعت.. رحت صعدت بغرفتو .. قفلتها و وابجي بجي بحرگه .. صدك احس تفشلت..

ادحك بروحي بالمرايا وشكد حسيت بروحي رخيصه.. واني محظره وفرحانه انتظرو وهو راح وما دارلي بال..

دحكت بموبايلي.. للحظه طكت براسي اخابرو بس اطلع كل حركة گلبي وانفجر بيه واسدو..

دست اتصال.. رن .. رن .. رن.. شجاي اسوي .. لو غلطت عليه واني بهلحاله يذبحني واجني على نفسي اكثر.. وما الي مكان اشرد الو

قطعتو بسرعه قبل ليرد.. ربي ليش هيج تريد تذلني ليش .. شيصير لو هسه عندي اهل والله ما ابقى ..

وين اروح والموصل نار ما تنطب..

فكرت اخابر خالو.. بس ما عندي رقمو .. تذكرت حنا ابن خالي .. يمكن اعرف صفحتو ع الفيس..

هو يحبني من زمان وما جنت احبو .. اخابرو واشرحلو حالي بلكي يجي ياخذني لبيت خال

حملت الفيسبوك بسرعه.. فتحت البرنامج.. كاتبلي سجل دخول او انشئ حساب جديد..

هاي شلون سالفه ما اعرف لهيج سوالف .. شلون اسوي صفحه اتبعت الخطوات وخربشت وكتبت اسم مشاعر بريئه..

وانطي موافق.. يكتبلي فيسبوك يتطلب اسماء حقيقيه لكي يتسنى للصدقاء معرفتك..

يربي شلون سالفه اووووف.. اكتب اسمي الحقيقي.. ردت اكتب واتذكرت علي من يكول بس ادخلين رقم على الفيسبوك يطلع اذا مسوي حساب

هللللو .. رقمي عد.صراع اذا عرف قبل لا يرد عليه حنا الا يذبحني والله..

واني اصلا شكو خايفه هو يخون واني اخاف .. طز

كتبت اللاسم وحطيت الرقم.. يكولي هذا الرقم مستخدم لحساب اخر.. وما يصير اسوي

اووووف الله... كعدت ابجي.. دك الموبايل بيدي.. دحكتو .. صراع .. عشتو كاتبتو ( دقات قلبي)

فطور رجليه احسن .. يا دقات .. ينعل يوم العرفتو والله ما رد.. انطيتو رفض .. رد خابر مره لخ بساع.. وهم انطيتو رفض.

اكيد كاعد يمها الحقير الكلب .. تفو عليك يا خاين.. رد اتصل .. رفضت حيل ضغطت ع الشاشه بحرگة گلب..

اعرف لو اجاوبو واني هيج محترك دمي منو راح الوص واجفص بالحجي واتجاوز ويرجع وهم يشعل شيب الخلفني ولازم اسكت لان ما عندي مكان اروحلو

فما ارد احسن..

بعث رساله (يولي خبال مو انتي خابرتي عليش ترفضين )

اي ومرتاح ومتونس الحقير واني هينا دمي محترك من وراه.. رد اتصل .. مسحت دمعتي حيل ورفضت .. يل ما تستحي

بعث ( براحتج بويه الضاهر طباگاتج رجعن .. محتاجه شي )

عاد هينا صدك متت من يضحك وينكت ومرتاح واني مفرفحه من وراه كتبتلو ( يارب عساك ما ترجع )

بساع جاوب (مشكوره)

وبعد ما اتصل .. بس اني شنو حالي اتذكرو هو هاك واتخيلو كاعد.وياها وابجي ومحترك دمي.. للفجر يله نمت..

لل10.. اندكت الباب مال الغرفه.. كعدت بسرعه.. فتحتها.. صراع دحك بوجهي وعقد حواجبو .. وفات.

تركتو ونزلت.. غسلت وجهي وكفت وي نور تنظيف بس هي گالبه وجهه وتشتغل بسرعه.. لان كاعده متأخره ونص الشغل مخلصتو..

ما حجيت وياها .. وطلعت للكراج نضفتو وفتت للاستقبال .. دا انضف .. فات صراع..

تخصرلي ويدحك وعاقد حواجبو .. اندرتلو .. دحكتو بهلحاله نزلت راسي منو ..

من انه هينا .. وجهج وجه ابليس .. بس انه اطلع وانتي تحفحفين وتسرحين و لا وتتكحلين هم..

شقصدج ليليان

-شعليك هم حرام احف واحط كحل .. كضبني من ايدي حيل .. وحجه

-دحكي لج احترمي نفسج لا بالقران الكريم راسج يتكسر

-اي دوخر ايدك يلا

-صك على اسنانو .... ليليااااااااان..

-سكتت واني عاقده حواجبي وطالعه روحي منو.. ترك ايدي وطلع وهو يكول :- ادبسز ..

-كلنا ما عدنا ادب بس انته.. كمت امسح حيل بالطبلات .. اخر شي طريت الوصله وما كملت .. اشتغل عدهم يصيحون و يخون .. واني اخدم..

عفتهم ورحت غسلت ايدي وكعدت .. واتمنى منهم كلمه تطلع حتى صدك انفجر بيهم وغصبا عنهم يودوني لبيت خالي..

دخلت بغرفة سعد القديمه ع الموبايل.. صاحو على غدا.. كتلهم ما اريد..

صاح صراع ... ليليااااااان..

-ماتت ليليان وخلصت منك.. طلعت كاعدين عالغدا .. هااا

-حدري

- ما اريد شبعانه

الحجيه:- انتي حتى ما تريكتي يا يمه شالج مطنكره وحدج

-ما مطنكره .. بس ما مشتهيه

صراع:- شحجيت

-ما بالغصب ما مشتهيه شلون يعني

-بالحرام راح اكوم واعلمج شلون ترادديييين كلبه.. كلت حدري تسممي .. تكولي امرك وتحدرين..

-كعدت وياهم ع الاكل .. بس احس بروحي تفور .. هو رفع راسو لامو وكال الها ..

-منو خدم الولد البارحه بالسهره من جو ع لعبة الريال

نور:- انه ليش

-ياسر فات ساعدج بالمطبخ لو ما وكف

-لا هو فات يم الحجيه يسولف وياها .. انه حظرتلهم الجاي والنراكيل وصعدت لولدي فوك..

-هز راسو .. بس مبين على وجهو الانزعاج.. وعرفتو ليش مزعوج..

مفكر اني جوه من جا ابن عمو ياسر وكاعد يم الحجيه.. وعبالو اني مبدله ومعدله نفسي الو ... بس اني جنت صعدت لغرفتو لما خلصت تنظيف العشا وسألت الحجيه..

بعد ما نزلت...

.. هو ياكل ويتنهد ومزعوج وخابص نفسو .. وما تحمل .. گام بسرعه.. وكال صعديلي الجاي

دحكتو كام.. رحت سويت الجاي وانطيتو لنور كتلها صعدي اني انظف مواعين الغدا انتي انطي الجاي لصراع وروحي لاطفالج اني اخلص الباقي.

ما كالت شي .. اخذتو من ايدي وطلعت فوك ..

خلصت .. ردت ادخل بغرفة سعد.. لكيت نائل متمدد بيها .. هذا هم مثل حالي مهجر وما متفق وي زوجتو ..

الفرق بينا هو تارك الغرفه لنور وهو ينزل ينام هينا.. واني تاركه الغرفه لصراع وانام يم الحجيه..

هو دحكني فتحت الباب وتراجعت.. صاح وراي .. ليلياااان..

-هااا

-تعاي كعدي يابه اذا تردين.. ما عندي شي..

-فتت .. كعدت على صفحه وادحك بموبايلي .. وهو متمدد على موبايلو ..

فاتت نور.. دحكتني كاعده.. وكفت نائل :- محتاج شي ؟

-لا سلامتج ارتاحي.. ورجع يدحك بموبايلو..

اني مشغله يوتيوب .. والسماعات بغرفة صراع.. زت عليه السماعات كال حطيهن.. يمكن الصوت زعجو..

اخذتهم وخليتهم .. نور طلعت.. واني بقيت كاعد والمخده بحظني وادحك ع الموبايل مندمجه..

شويه واحس واحد طر عليه المخده.. دحكت.. صراع واكف متخصر .. نزلت السماعات.. ونائل يكول رجلج صار ساعه يصيح يولي..

دحكتلو :- شتريد

-خزرني وكال كومي

-كمت .. طلعت وياه.. سديت الباب وكتلو شتريد..

-هو ع الدرج ويكول صعدي

-ما اصعد عندك حجي كولو هينا

-اندار متفاجأ

-يولي تتگوين علي انتي لو شنو ..

-تركتو ومشيت للمطبخ.. لان غرفة ام سعد قريبه وهم كلهم بغرفهم.. جا وراي ..

-ليليان لا تختبرين صبري بالله العظيم اكسرج لو بقيتي بهاي افعالج

-شعندك ابغداد البارحه ..

-شغل انتي شخصج بي

-لاااااا والله ..

-لج احجي عدل وياي لا تخليني اضربج ... تخصر ... البارحه شجنتي تسوين من ياسر يم الحجيه

-ما اكول الا تكلي شسويت ابغداد..

-انتي شنو تحايليني جاي اكلج شغل ..

-هااااه وهاي الكح.... مالتك هم شغل .. بمجرد حجيت .. ضربني راشدي .. سكتت ودنكت واحس النار اشتغلت جواي

-من يمتى انتي صايره تفشرين كبالي وتحجين هشكل.. انه ارافگ كحا.... حيوانه..

-تأمر بشي اريد انام تعبانه..

-عساج لا كعدتي ولي من وجهي..

-ردت امشي .. كضب ثوبي من يم ايدي.. وكال .. :- لو سمعت انتي داكه حنج وي ياسر لو ضاحكه موتج على ايدي

-جريت ايدي منو ومشيت لغرفة الحجيه.. فات هو وراي.. الحجيه متمدده.. تخصر وگال الها

:- يمه منو جان كاعد من جا ياسر

-شبيك يمه

-جاوبي يمه رحمه لوالديج لا اطلعين اعصابي انتي هم

-حلا و حرب

-وهاي .. اشر عليه

-ما ادري جانت بره.. حتى ما نامت هينا ليش شصاير ..

-اندار عليه .. وين جنتي ..

-ما رديت

-لج احجي لا اطلعين اعصاااااابي ليلياااااان

فزت الحجيه وكامت بساع:- اسم الله يمه الرحمن شجالكم..

ووكفت كبالو ..

-يمه هااااي الكلبه تريدني ابتلي بيها بالقران.. لج احجيييي راح ادفرج والله ..

-گمت على حيلي وصيحت... بغرفتك جنت بغرفتك وحتى ما ادري منو جا ومنو راح كملت شغل وصعدت ارتاحيييييت ..حجيتها ونزلو دموعي ..

طلعت بساااع.. انعل حتى اليوم الشفتكم بيه يا حقراء .. فتحت المخزن وكعدت بي .. ابجي..

ادحكو يروح ويجي من الباب .. سمعت خطواتو ع الدرج صعد.. واني مستمره ابجي بدون صوت والمخزن حاااار ..

رد نزل ويفتر.. لشويه فتح الباب دحكني كاعده بالظلمه.. فتح الضوه... هز ايدو طبك الباب وصعد بعد ما نزل..

اني بقيت ابجي.. لحد ما حسيت نور نزلت للمطبخ.. استحيت تشوفني كاعده وابجي.. مسحت دموعي وصعدت لغرفة عابد..

اول ما دخلت غرفتو .. لو ما انت كان اني عد اهلي ما كاعده هينا اتحمل مصايبك ومصايب اخوك.. الله لا يرضى عليكم..

للمغرب تفكير وبجي احس روحي اختنكت ما اكدر اعيش هينا اكثر حياطين هلبيت دتكتم على انفاسي..

اريد ارجع لبيت خالي وهو يرجعني لاهلي حتى لو داعش اموت وياهم يطبني مرض ولا ابقى انهان هينا تعبت ما اكدر اعيش وياهم بعد..

كمت على حيلي .. مسحت دموعي.. فتت للحمام غسلت وجهي عيوني حمر دم صايرات من البجي..

مشيت لغرفتو .. فتحت الباب وفتت هو بيدو المصحف يقرأه قران.. وگفت كبالو .. صدق .. ورفعلي راسو ..

كعدت ع السرير.. انته تخاف الله صح.. وما ترضى بالظلم موو ..

دنك راسو يستمع ما حجى..

-جاوب

-شنو اللي تردي يابه

-اريد ارجع لاهلي .. راد يحجي.. ولا تكول داعش.. اني راضيه اموت

- يولي منو كال داعش يكتلوج .. استري روحج بويه واستهدي ..

-ما اريد.. زين وديني لبيت خالي .. بأربيل هم اكو داعش ؟

-اريد اكمل تلاوه ...كومي يابه مني

-زين انت تخاف الله ليش ظالمني

-بشنو ظالمج بويه .. كتيلي لا تضرب ومتحملج كوه على روحي .. تعداج واحد وسكتتلو ؟؟ .. طلبت شي وما جبتو .. بشنو مگصر انه

تعبت وياج بالله العظيم واكول جاهله اكبر عقلي وياه واتحمل..

-اني ما جاهله

-عجل افتهمي بويه .. تعبتيني بالقران تعبتيني . بوجهي تكليلي الكح.... مالتك.. ابوج يقبل تكوليها بوجهو ..

-اهلي ما يحجون هيج انتم هيج حجيكم ..

-لا تكليلي انتم .. احترمي نفسج واعرفي ويامن تحجين هيج.. بوجه الاكبر منج ما تزتيها عيييب ..

انتي ما تعلمتي من هلبيت بس هاي فلحتي بيها مو هاي وياج مرت نائل .. لا سمعت حسها لا راددت لا حجت ..

ليوين تبقين بهلعقليه.. تربي عاد مللتيني .. عنادج وصلافتج كل ما جالها تزيد واكول خطيه ما اذيها

-ما اريد اعيش هينا الله عليك وديني لبيت خالي .. بجيت

- استغفر الله العظيم واتوب اليه.. شناگصج هينا كولي .. الردتج مره عفتيني وشدتي التركتج برحتج بجيت وودوني لاهلج..

انطيني الحل وياج اشلون بالقران شليتي عقلي .. ولج يابه تعبان والله منين اتلكاها لخاطر الله رحميني..

-گمت منو .. واني دموعي بعيني طلعت من غرفتو .. يربي وين اروح.. ساعه احس ما اكدر بدونو وساعه ما اطيق اعيش وياه لحظه .

نزلت العيون وارمه.. وكفت نور ع العشا هي ما حجت وياي عرفتني ضايجه .. ما ادخلت.

كملت حطيت الصينيه هو كاعد.. وفتت بغرفة سعد وكتلها حجيه ما اشتهي لا تصيحيني..

وكعدت .. ادحك بالموبايل .. بس النفسيه زفت والعيون كوه مفتحتهم كد ما كضيتها بجي

مدري شكد مر وكت.. انفتحت الباب .. الضوه مطفي.. دحكت طول صراع والضوه بظهرو ما ينشاف شكلو..

فت الضوه .. جان لابس دشداشه وغتره ومعطر .. جاي من بره وبيدو علاليك.. حطهم يم رجليه. ما درتلو عيوني بالموبايل وبالي مركز وياه

... كعد يمي.. دحكت العلاليك.. كارتونة بيتزا و علبة ايس كريم.. حط ايدو على ركبة رجلي

-ليليااان..

-ما رديت

-يولي شرايده شنو القاهرج ومذبلج هيج بالقران ما عندي شي ..

- ساكته ..

-مو واحجي وياج..

-الله يخليك والله تعبانه وروحي طالعه اتركني ..

-احجيلي اشكيلي .. خل افهمج

-ما اريد عوفني ..

-تنهد.. بالقران ما اتحمل اشوفج هيج ذبلانه غير اعرف شبيج..

-عزت بنفسي اكلو جنت متحظرتلك وفرحانه شوكت اتلكاك وانت فشلتني وطلعت رايح لبغداد للمحروسه .. ما حجيت ابد.. بقيت ساكته

... ما حجه هو مسح على راسي وكال براحتج...تركني وطلع..

نزلت المويل وادحك للعلاليك وافكر .. ما اعرف اشلون اتصرف وي هلوضع يخون ويجي كن ما صاير شي ..

لا اني و لا مشاعري لعبة عندو.. دا افكر قطع سلسلة افكاري نائل وهو يفوت.. تعدلت.. هو تراجع كتلو فوت نائل..

دخل.. اول ما فات صاح هااااه.. اي عيني بيتزا ليش لا ... اااا اوياها موطه.. ابتسمت..

فتح الباب صراع .. ابو عين الفراغه مو الك..

-لك بابا انتو تكاونو شكد ما تكدرون ورحمه الوالديك كثرلنا المواچيل بالمصالحه.

تره احلى شي هو الأكل اذا رضت معدتك رضى عقلك وگلبك .. كعد وفتح العلاليك.. وصراع فات جر منو وكالو

:- يولو كوه جاي نتلوك وما ماشيه لا تخربها علي بكرشك رحمه لوالديك..

-لا يولي هسه تاكل وياي شحدها والله اكتلها ..

جر العلاليك من صراع .. وحطهم بالكاع وكال لو ما جيتي انتي خسرانه.. فاتت نور .. كالتلو هلا هلا تاكلون بيتزا واني اكل طماطه لاچعه يصيير؟

نائل:- حدري اكلي بويه براس المتزاعلين .. بس گبل لا تكعدين من الثلاجه قواطي بيبسي .. منو يشرب

ليليان تشربي .. وانت .. اي جيبي 4 قواطي.

صراع:- امداج يلفاهيه البيتزا ب15 الف لحلك هذا الجايف ..

كف دشداشتو من الوسط وكعد كابل نائل ع البيتزا جت نور هم كعدت.. وضربتني على رجلي وحجت

-ولج الزعل ما يشبع كرش حدري يولي ..

وجرتني.. تقربت اكلت وياهم قطعه على ضحكهم وشقاهم.. وصراع يدحكلي بس ما دحكت بوجهو ابد..

نائل:- هاي الموطه بيها خواشيك بالله نور من يمج جيبيها خل نضوك طعمها طيب لو لا .

فات حرب انتجى على ظهر صراع وكالو :- بابا انطيني بيتزا.. اخر قطعه شالها وكالو هاك بابا اكعد اكل..

وانطاه خاشوكة موطه صغيره و زتلي وحده.. ويكلي اكلي طيبه والله.. اكلنا الموطه كل احنا..

وكمت غسلت .. ورحت لغرفة الحجيه فرشت الي ولحرب .. وتمددت.. فات هو يحجي وي الحجيه ع الشغل ..

اني عيني بموبايلي .. اخر شي قفلتو ولفيت راسي واندرت نمت..

ثاني يوم.. صراع بالدوام والحجي بلا ما يكول لاحد طالع من الصبح متسوك خطيه لان احتمال باجر رمضان..

ام سعد اذبحها ولا الحجي يتسوگ.. حيل تضوج .. رغم الحجي عندو ومتمكن وهم كلهم ما بيهم الفقير .. بس هي نفسيتها هيج..

يعني كلما يكول الحجي راح اتسوك فلان حاجه الكم.. تسبقو وتروح لصراع تكلو هيج محتاجين.

وصراع يجيب .. لا هو ولا الحجي يهتمون للصرف .. عدهم هو البيت بيتهم ما يتعاينو على منو يجيب ومنو يحط..

بس سعد جان يغلس على هلشغلات وكاضب ايدو وما يصرف .. بس محد حاسبو ..

ونائل الا احنه نطلب نكلو جيب ما يبخل ولا يحجي يجيب بس اذا ما نوصي ما يعرف احنه شنحتاج للبيت..

مو مثل صراع كل يوم سبت او جمعه يفوت للمطبخ .. ويكول شتحتاجون يابه اتسوكلكم..
انسجلو بورقه وننطي يجيب بالجمله ما شغله شغلتين..

والحجي نفس طبع صراع.. ابد ما بخيل وگلبو طيب بس مشكلتو يمشي بشور ام سعد وحيل يحبها ..

ف هم الولد بالبيت محد مضايقو الصرف .. بس احنه النسوان.. نحس ام سعد تتغالب وي صراع..

والحجيه تكول هذا مو حك هذا غلب ماكو فرق صراع لو الحجي يتسوكون ليش تتغالب وتكعها براس هلمكرود..

ف بيومها جا الحجي ومتسوك مسواك رمضان ما مخلي شي ما جايبو .. وبكثره ... ام سعد تخبلت.. وضلت تتكاون وياه

وهو يگلها عجل بويه شلون غير بيتنا ونصرف عليه قابل جايب لغرب انه .. عيال بيتنا ..بدل ما يوميه طالبين حاجه ونطلع واحنه صايمين جبتو هسه..

نور التوم مالها يبجون. ذوله مشكله يبجون سوه ويسكتون سوه .. فصعدتلهم.. والحجي نزل المسواك بالكراج وكال فوتو..

وكعت الشغله براسي ساعه 12 وحاره تموز .. واشيل صناديك.. وام سعد تصيح وطالعه روها وتزكح بيه الفاهيه وامشي حيل واستعجلي. ..

اخر شي ضل صندوك فواكه برتقال.. ردت اشيلو .. احس ظهري طك.. كتلها ما اكدر بعد تعبت ..

ام سعد :- ما على كيفج شيلي بسااااع يلا ما مثل البهايم بس تاكلين بروسنا

-ما صارفه من جيبج افتهمتي .. انتي هم تاكلين براس رجلي شو ما حجيت

-اجي انوم الصندوك براسج شيل بساع عرمه ..

الحجيه:- شبيكم يابه الجيران منا صدك جذب صياحكم لوين واصل..

ليليان:- يوم والله تعبت فوتت المسواك كلو بقى بس هذا ثكيل

-عوفي يمه هذا نوزعو المغربيه ثواب ..

ام سعد :- والله ما توزعين ثواب بروسنا .. احجي وي ابنج يجيب ويوزع .. شيلي يلا انتي فوتي بساع..

ليليان:- ما اشيل عندج جنه فد شويه تنزل وكوليلها تشيلو ..

همت عليه وكضبتني من هدومي حيل وتكلي اركع راسج بالحايط ساقطه

دفعت دوخري شنو عبده عندج تركعين راسي بالحايط.. وما اشيلو لو تطلع نخله براسج هم ما اشيلو بعددد..

ام سعد :- والله اليوم ما تفوتين للبيت لا ما تشيلي وارد اشوف شلون تعانديني يل بلا اصل

-ما اشيل وشعندج لا تقصرين وخل اشوفج البلا اصل شلون ..

الحجيه:- ليليان يمه كسري الشر وشيلي .. ما بينا مصايب والله

-قسم بيسوع ما اشيلو .. وهاي قسمت ..

جت نور كالت شسالفه خاله انه اشيلو .. دنكت
. دفعتها ام سعد وتكلها لا الا هاي النغله تشيل واريد اشوف شلون تعاند..

كعدت على الدجه بالكراج وما كمت. هاي كالت لشوف شلون اربيج فاتت وقفلت الباب واسمع الحجيه و ام سعد يتكاونون

تكولها هاي وكحه وبلا تربيه وانتي مطلعه عينها ..

والحجيه تكلها حرام عليج يتيمه صالبتها بهلظهريه جاهله وتعاند لا تحطين عقلج وياها من يجي صراع اشكيها الو وهو يحاسبها..

تكلها لا والله اليوم الا اربيها..

ضليت بالشمس لل2 ونص ..

جسمي يصب عرك والوجه انطعن دم.. واحس الدنيا كامت ادور براسي من الحراره رغم كعدت بالفياي وكل شوي اروح لمغسلة الكراج اغسل.

قوة الشمس ما ظل فياي .. وكفت تخصرت والدمعه بعيوني وادحك للبيت اختنكت.. انفتح باب الكراج.. اندرت صراع ..

بس شفتو نزلو دموعي.. راد يفتح الباب حيل من دحكني .. سدو وحدر يمي ..

-شبيج يلولو ليش هيج حالج..

-اسأل مرت ابوك قافله عليه الباب بالشمس بس لان ما شلت هذا الصندوك.. والله شلت المسواك كلو وهذا ثكيل انكسر ظهري ..

كتلها ما اكدر والحجيه كالتلها نوزعو وهي علقصد الا اني و ضلت تسب وتغلط على ابوي وتكلي نغلا وبلا اصل وتركوتني بالشمس تحركني..

مشا كبالي .. راد يفتح الباب وام سعد. من دايره وجهه تصب غدا و تحجي ..ضلي يلنغله لا ما اعيد.تربيتج واحركج بهلظهريه يل بلا اصل ..

هي حجت هيج.. وصراع تولى الباب دفرات حيل.. ويصيح.. لشوف منو يربي منوووووو كلااااااااب......يتبع

☆☆☆☆☆☆