ليتني استطيع فعلها الحلقة (20)

ليتني استطيع فعلها

الحلقة  (20)

‏‏نم وأنتَ مبتسم
فأن الله لا يخيب ظن من وثق به 💙

................

فاتت الحجية للغرفة مصدوم، حجت :- ابني شجاي يصير

-يمه ام ديار زوجتي على سنة الله و رسوله

بقت صافنه بيه ما تعرف شتحجي، بس وجهه يضرب الوان، كعدت بالكاع تعبت، كام هو يريد يلزمها كالتله :- حدك لا تكضني

حجتها و هي مغمضة و تخربطت، تراكضنا كلنا الها سندناها، يصحي بيها بقوة و بلهفة :- علوية يمه ، اصحي يممممممه

ديار بنبرة بجي :- حجية اكعدي الله عليج، سيد شيلها بساع فدوة الحجية ما جاي تكعد

شالها و صاح على اسامة يفتح السيارة بسرعة، هو طلع و امي سحبت العباية من عندي و الحجاب و طلعت وراه، ركضت جوا اجيبلي عباية ثانية

وصيت اثار تكعد ع قناة الكارتون و ما تتحرك لحد ما نجي، اخذت اسامة و رحت وراهم، بس ما عرفت وين راحو بسيارتهم، بقيت بس امشي بالشارع و احجي:- شكول عليج يا امي، هاي سواية تسوينها، ما كافي لعبج ابغداد اجيتي هنا تخربين سمعتي، ما فكرتي بيه ما كلتي هاي عايشة وياهم شراح يكولون عليها

احجي و اسامه يمشي وياي و يسكت بيه، كال:- ديار يعني امي صارت مرت سيد جعفر هسه ؟

-اي مو سمعت

-شوكت تزوجو ليش ما كالت النا

-اسامه ما ادري علمي علمك عوفني هسه من امي خل نشوف الحجية شصاير بيها
تفقدت نفسي الموبايل ناسيته:- خل نرجع للبيت نخابرهم حتى نعرف مكانهم

...رجعنا و خابرت على امي، اول مرة ما ردت بالمكالمة الثانية، جاوبت :- ها ديار

-وين انتم

-راجعين

-شلونها الحجية

-زينة بعدين نحجي روحي

-راح ترجعون لهنا لو لبيت السادة

-روحي هسه ما ادري

نهت الاتصال:- الحمدلله ربي الحجية ما بيها شي لو صاير عليها شي بحياتي كلها ما اسامح امي

بقيت انتظرهم، بس ماكو احد بين، كلت خل البس عباتي و اخذ اسامة و نروح لبيت السادة بلكت جاية و اطمن عليها

جاي اكوم لعباتي، سمعت الباب انفتحت، ركضت بسرعة، امي فاتت :- هااا

-شهااا، عقدتها الحجية كلش دخيل بختها

-يمه انت شنو السويتي ما فكرتي بسمعتي ما كلتي هاي شراح يكولون عنها ؟

-و شسويت ؟؟؟؟ اتزوجته على سنة الله ورسوله لا كفرت ولا زنيت

-و بالسر ؟ اذا زواج ليش احنا ما ندري ؟

-كلت اكللكم بالوقت المناسب و هاي كلتلكم بعد شرايدة مني

-يعني لما ضجتي مني من كتلج الحجية خطبتني ضجتي لأن متزوجج

-كافي ديار دوختيني

-يمه تعبتيني بتصرفاتج فدوة ارحميني، الى متى اني ابقى اعاني منج و من ابوي، مو هاي الناس كلها عدها اباء و امهات ليش مو مثلكم فهميني

-ولج طايحة الحظ شسويت لا تخبليني زواج و تزوجته

-الحجي وياج ضايع، البس عباتي و اروح اشوف الحجية المسكينة شسويتو بيها

-لا تروحين هسه خليها بعدين

-لا اشو اروح ومحد اله علاقة بيه

لبست العباية و طلعت من البيت و ضربت الباب وراي حيل، ومشيت اسامه يتصايح ويا امي سمعته، رجعت للبيت، فتحت الباب ومديت راسي:-اساااااامه تعال وياي

اجا طلع و ضرب الباب حيل، كلش ضايج :- والله بعد ما اتحمل هاي امي

-عوفها لا تدخل بيها ولا تحجي وياها

-ديار ما شفتيها شسوت ؟ صباني اذا عرفو امي متزوجة سيد جعفر بالسر ما يضحكون عليه

-محد مراح يضحك ، اهدئ وصلنا بيت السادة، دكينا الباب، طلعت جنتهم:- الحجية موجودة ؟

-اي بس نايمة

-حسيت وجهه مو طبيعي مثكلة، هزيت راسي و كلت الها:- اذا كعدت كلسلها ديار اجت عليج تشوفج و تطمن عليج خل تخابرني من تصير زينة لان بالي كلش مشغول عليه

-ان شاءالله

حجت و سمعت صوت سيد جعفر يصيح جوا، سدت الباب هي، حجه اسامة :-، لاحظتي ؟ حتى ما دخلونا للبيت يا يوم بيت السيد ندك بابهم و ما يكلولنا تفضلو، يعني امي والله اذا اذبحها ما يشفى دمي منها

-يمكن صايرة مشكلة جوا عدهم ما سمعت صياح سيد جعفر، امشي خل نرجع

دخلنا للبيت، سمعنا صوت الدوش بالحمام يشتغل، يعني امي بالحمام، دخلنا للأستقبال نزعت العباية و الحجاب و كعدنا كبال بعض و ايدينا على خدنا و صافنين ما نغرف شنسوي.

طلعت امي من الحمام، الخاولي على راسها ولابسه برموده و تيشيرت، حجت :- شبيكم ؟ وجهكم يلطم

راد يحجي، اسامه، سبقته و عليت صوتي على صوته:- يمه رحمة لوالديج كااافي ما بينا حيل عوفينا بحالنا
كمت من مكاني :- اكوم اجيب افراش افرش احسنلي

كمت للغرفه اجيب الفراش و اثار كامت تنكل وياي، فرشت لأسامه ، و ؤدت افرش لامي كالت :- اني انام جوا لا تفرشين، ظهري يوجعني ما بيه لنوم الكاع

حجت و كامت للغرفة:- اثار تنامين هنا لو جوا

-لا هنا اباوع تفزيون

-اي هسه تلفزيون و بالليل تعوفين فراشج و تجين تحصرين روحج

كامت تضحك بمكر، واجت يمي حظنت بطني:- ديار سويلي اكل جوعانه

اخذتها للمطبخ، سويتلها لفة جبن، و صحت على اسامه اذا جوعان، صاح :- لا نعسان اريد انام

دخلتها للغرفة و رحت لغرفتي، امي متمدده و الموبايل بأيدها:- احجيلي شوكت تزوجتي ؟

نزلت الموبايل، باوعتلي:- ورا موتت سلمان بشهر

-يعني صارلكم شهرين

-تقريبا

-ليش ما كلتيلنا

-احنا جنه ناوين نسوي عرس بس هو عنده شروط يلا

-شنو هي ؟

-كال اني رايدج وهاويج بس شرطي عليج تعوفين شغلج ابغداد و تجين هنا اني اشيل مصرفج و مصرف ولدج بس تتحجيين و تلبسين عباه

-اوافقتي ؟

-طبعا لا، كلت اله انت اذا تحبني ترضى بكل طبعي و طبايعي و اذا تشوف ان المحجبة مو زينة و هيج تقيس عوفني

-هو شوكت حبج هيج

-من زمان جنت احس بيه معجب بيه بس هو رجال متدين ما عنده هيج سوالف، كلت ابادر اني و اجيبه
دزيتله ( جمعة مباركة) و دعاء عريض، بعد رجال متدين ما عدنا نجي من باب الادعية

-يعني تعترفين انت جبتي

-تريدين اسولفلج لو تبقين كل شويه نابصه بام السالفة ؟

-كملي يلا

كعدت صفح وحطت ايده عكس و سندت راسها و حجت:- من دزيتله هو سوا روحه ما يعرفني بس اعرفه جذاب هو مسجل رقمي يمه من زمان ، خابرني كال :- منو

كتله : اني ام ديار

بقى يسلم عليه و يمدح بيه و انت خوش مرة و بتج ديار نعم التربية و عاشت ايدج على تربيتها

صار كله فترة يخابر شتحتاجين ما تحتاجين ، بعت عليه ثكل و كلت اله:- سيد اني اعرفك معدل و اخو خيتك و نشمي بس اني مرة وحيدة و اخاف الله ما اكدر اظل هيج احجي وياك عيب بحق نفسي

كام يتعذر مني و كال :- ام ديار اني ما اريد اطول بالسالفة و رايدج زوجة الي على سنة الله و رسوله

كلت اله :- هنيال التحويك يالمعدل، اني ما عندي مانع تعرفني مرة وحيدة و مالي احد بهاي الدنيا و العمر مشى بينا يا سيد و نحتاج اليسندنه

كال:- اصيرلج سند و حزام ظهر و ما اقصر ان شاءالله، بس انا يا ام ديار عندي شروط

كتله :- و شنو هي شروطك

-احنا ناس معروفين و مستورين هو صح الحجاب مو مقياس شرف بس ما نحب نشوف نسوانا بلا حجاب و الشغلة الثانية شغلج ابغداد تعوفينه و اني شتريدين ما اقصر لا عليج ولا على ولدج، تجين تعيشين هنا معززة مكرمة و اني بالخدمة

كلت اله :- خادم ربك بس يا سيد اليحب مو يغير اليحبه حتى يرضى بيه، شروطك هاي على عيني و على راسي بس احس بيها استنقاص، اني مو ربة بيت و ما اعرف اكعد بلا شغل يعني لازم تتقبل هذا الواقع اما سالفة الحجاب و العباية فهي قناعة و هداية و ادعي الله يهديني بس العافية تداريج مو بين ليلة و يوم من سافرة و شعر مشمور لعباية و محنكه براحتي اني اقتنع

بقى يحجي وياي و يقنعني، كمت اثكل عليه
اقارحت عليه نتزوج و ابقى ابغداد
كال نتزوج و اعلن زواجنا لما تتحجبين و تلبسين العباية، لان هسه اذا اخذج كدام الناس زحمة بحقي يكولون مرت السيد مفرعة و انا ما رايد اغصبج

وهيج تزوجنا بس امه كامت تشك بيه لان صار يجي لبغداد هواي، فاتوقع رادت تجس نبض و تضرب عفورين بحجر بخطبتج لابنها و تعرف الحقيقة .. و عرفت

-والله يا امي ما اعرف شأكلج، زين انكشف زواجج منه يعني مجبورة تعيشين وياه هنا

-هذا منو اليجبرني شبيج ماما ؟

- لعد شلون تحليها ؟

-ما اعرف نشوف شلون تمشي الامور كلشي بوقته حلو ، بس الاعرفه اني ما اجي هنا ، شعندي جايه يا طلعت يا طبت و انحبس ابيت و اسكت

سيارتي و شغلي وراتبي بالمليون اعوفهن حتى اجي هنا، مخبله !

سحبت الموبايل و نامت على ظهرها و خلت رجل على رجل و بقت تكلب بالموبايل، هزيت ايدي و كمت منها، ردت اخلي الموبايل ع الشحن شفت خالد متصل مرتين و الجهاز مغلق

طلعت برا و كعدت بالحوش رمشت عليه لان ما جان عندي رصيد، خابر عليه ...رفعت الخط :- الو

-هلو ديار

-هلو خالد

-شلون الاوضاع

-رجعت لكربلاء

-اهاا ليش شبالعجل رجعتو ؟

-امي رجعتنا

-صوتج مو طبيعي كانو ما الج خلك، شبيج مريضة ؟

-لا بس تعبت من امي خالد

-شبيها

-طلعت متزوجة سيد جعفر بالسر

-ايابة هههههههههههههههههههههههههه متزوجة و سيد جعفر و بالسر هم .. هاي شوكت هالاحداث خرب بيومها امج والله عايشة حياتها ثانية بثانية و ضاربة الدنيا جلاق

ضحكت:- شسوي خالد خبلتني، لا تفكر بيه لا تفكر بسمعتي لا تكول

-شكو يربج دا تكولين متزوجة يعني ما مسوية غلط

-بس بالسر

-مو صغار هم كل واحد بيهم وصل مرحلة البلوغ و هاي حياتهم خاصة بيهم لا من حقج ولا من حق كل احد يدخل بيهم ما دام متزوجين بشرع الله، بس هو ليش ماخذها بسر يعرف عنها شي لو شنو و هيج

-لا كايل الها شوكت ما تتحجبين و تلبسين عباة اعلن عن الزواج عيب اني سيد و مرتي مفرعة

-يعني هو حابها لو شنو

-اي ولو اشك امي تحب

-لعد شنو ؟

-خالد امي طبعها عجيب تنعجب بشي، تاخذه تبقى وياه فترة حب و هالسوالف بعدين تمل و تنسحب يعني لا تتوقع تستمر بهذا الزواج ما دام ما عدها طفل يلزمها

-مشكلة بس شتسوين اتأقلمي ديار ما عندج غير حل، لا تظلين تشغلين بالج بأسئلة ما تنفعج ليش صار هيج شلون سوت هيج راح تسوي هيج، عيشي يومج و اتأقلمي وياه

-جاي تضر بسمعتي خالد

-هي لحد الان متزوجة ما زانية فأي سمعة بعد .. حتى لو عرفوا الناس السيد ضام زواجه مو هي لان المرة ابغداد مو بكربلاء و ما عدها اهل او كرايب حتى تعلن زواجها فالكلام على السيد نفسه

-هالمجتمع ميعيب الرجال حتى لو العيب بيه يخلوه بيها

-لا تكبرين الموضوع وتقهرين نفسج الصار صار و خلصنا

-قاهرتني الحجية تخربطت ادور حتى رحتلهم ما دخلت جوا تعذرت مني جنتهم هاي من البداية ثكلوا وجه

-ديار تريدين نصيحتي ؟ ارجعي لبغداد، و عيشي براس امج، بعد يومين كلية تحتاجين صرف خطوط ملازم مصرف طلعه كعدة كل هذا تتاملين الناس تشيلج بيه

ارجعي و عيشي براسها كملي كليتج براسها اوكفي على حيلج و بعدين الله كريم ابعدي نفسج عنها اذا اذتج تصرفاتها

-ما ادري، خالد ما اتحملها كلش تستفزني بتصرفاتها
حسيت الموبايل سكت، اباوع طافي خلصان شحن

كمت حطيته ع الموبايل و نمت

ثاني يوم رحت للحجية بست راسها و اطمنت عليه و حجيت وياه:- علوية اعذريني والله اني ما ادري عن الموضوع و تفاجئت قبل لا تفوتين و حال من حالج ما اعرف بكلشي انصدمت

الحجية:- يبنيتي الله شاهد انت بحسبة بناتي ٣ سنين وياج ما شفت منج العايبة بس يا يمه يا ديار اعذريني اذا اذيج بهالحجاية امج ما ارتاحلها

من جانت تفوت ابيتي و تاكل و تشرب تصرفاتها ما تعجبني صح احبها و اضيفها بس ما ارضاها جنه الي و زوجة لأبني اعذريني لو انت احطج على راسي بس امج لا

-خاله اني ما الي دخل بكل هالسوالف يتزوجها يطلكها معليه، هي كاعده ابيتها و اني كاعده ابيتي

-احسنلج يمه، بس اني ما ارضى على سيد جعفر على هاي سوايته و ما اشوف وجهه ليما اموت

...بقيت يمها شوية و كمت رجعت للبيت
امي من ثاني يوم رجعت لبيتها و ظليت اني و اسامة، و اسامة حيل متضايق من جماعته يكلوله (صدك امك متزوجة سيد جعفر بالسر)

النسوان من اروح اتسوك لو اطلع اشوف شنحتاج يسألني و يبسمرني بهالموضوع

بيت السيد احسهم كاموا يتجنبوني مو مثل گبل وياي ، صح ما عدهم شي بس لا احد كام يجيني ولا احد يسأل عني مو مثل كبل الحجية يومية تتصل و تشوفني شمحتاجة زعلانه على ابنها و معتزله كلشي

السيد حاجي ويا امي و كايل الها :- بعد ما اتحمل حجاية الناس و زعل الوالدة بنت الناس لو تجين تعيشين هنا ويانا على حب الله و تبوسين راس الحجية و تتصافى الگلوب لو كلمن يروح بطريقه

امي مجاوبته:- اني بغداد ما اكدر اطلع منها، و شغلي هماتين ما اكدر اعوفه، وجنت واضحة وياك من البداية و كلتلي اصبر عليج ليما تقتنعين، تريد اطلكني و تكسر ابختي و انت ما صارلك شهرين من تزوجتني ما يصير
ادري بيك معدل و ما ترضاها علية و اني ما الي احد

اذا صدك عزمت الطلاك و تريد اطلكني تامنلي حياتي، و اريدج تشتريلي بيت على كدي الم بيه جهالي و اكعد
شذنبي اني ما صارلي شهرين وياك و تكسرني

فالسيد هم ما كايل لا .. بفلوس مهرها الحاظر و الغايب ٢٠ مليون و ضايف عليه هم ٢٠ و اشترالها بيت صغير بمنطقة الشعب ابغداد

و هسه تريد تأجره و تخلي فلوس ايجاره بجيبها

اني من يوم الصار هذا الموقف و امي اطلكت من السيد بعد ما الي عين افوت بيت السادة و الناس طالت بحجيها، قررت ارجع لبغداد واعيش هناك احسنلي

خابرت امي و بلغتها و كلت الها :- يمه اني ارجع لبغداد

-اي احسنلج بعد شعندج كاعده ابيتهم و قابله الراتب منهم كل شهر

-بفضلج غير جنت مرتاحة خربطتيلي حياتي

-اخ منج يلطامة ولج يالبومة تنغطين عليمن و هاي حصلت النا بيت و باسمنا و ايجاره بجيبنا بدال ما كاعده عدهم بفضلهم، خليتهم يشترولج بيت و تكعدين ابيتج مو عد احد

-مو بهالطريقة امي

-لطمي ظلي لطمي ياللطامة ،ولج يمه هاي الدنيا لا ما تلاويها و تتحايلين وياها تلويج و تكص اذراعج

لا بگت من احد ولا زنيت كله بالحلال

-هسه عوفينا من الحجي، الاسبوع الجاي لازم اسوي انسيابيتي فلازم انتقل هذا الاسبوع، بس يوم المنطقة الانت عايشة بيها ما اريدها

-لعد وين تريدين نعيشي بيت حلو و ما بي شي

-لا اخذيلنا بيت بالدورة قريب من بيت عمو ابو امجد اني ارتاح الهم

-ترتاحيلهم لو ترتاحين للبصفهم ؟

-شتقصدين

-خلدلد يماما

-لا تحجين هيج

-اشون تستحي الملعونه ولج لا ما اخلي يبوس رجليج و يتوسلج حتى ترضين بيه فلا اتسمى ميعاد

-اطلعي من عدها موضوعي ويا خالد لا تدخلين بيه

-لا ما اطلع اذا تبقى عليج الرجال يتزوج و يتزحلك بالمشمش و تبقين بوجهج اليلطم كبالي ما اتحمل

-معليج اني ادبر امري

-الله كريم الله كريم، بس تدرين ؟.

-شنو

-ابنهم رافد شلون عاجبني، اخ ابو عيون الخضر شلون طول شلون قيافة

-يممممممممه

-وغمة، مع السلامة اشرد كبل لا تلطمين بوجهي

.......
بعد ما حجيت ويا امي وصيت خالد يشوفلنا بيت على كدنا قريب منهم، كال :- اكو براس الشارع بيت ايجار اسئل الكم عليه

سئل بيومها و رجعلي بالجواب، ايجاره ٤٠٠ الف غرفة فوك و غرفة جوه و استقبال وصاله و مطبخ و صحيات ونظيف

حجيت ويا امي، راحت شافته كالت: كلش حلو ما بيه شي

وره يومين امجد و احمد اجو لكربلاء اجروا سيارة وفتحوا غراضي و حملوهن، مشيت على جيراني سلمت عليهم و اخر شي رحت لبيت السيد بست الحجية من راسها و اعتذرت منها و كلت الها :- ادعيلنا و ابريلنا الذمة

خطية كامت تبجي هي و البنات تحاضنه و توادعنه و طلعت و دموعي تجري و رجعت لبغداد

بس هالمرة رجعت بارادتي، بس ما ادري اذا اعيش بيها بأرادتي لو راح ابقى انجبر بواقع تخفيه الايام ..
توكلت على الله ورجعت

رافد ساعدني بالانسيابية، هو موضف بالبنك خريج ادارة و اقتصاد و جاي يدرس ماجستير و يفتهم بهالامور و خالد نصحني بيه ...

و هو ما قصر وياي، درجلي الجامعات التناسبني، ورسمها باللي تنفعني، و الحمدلله رب العالمين طلعلي قسم قانون بجامعة الامام الصادق عليه السلام

كلش فرحت و الفرحة ما وسعتني
اخذتني امي و اشترتلي ملابس و احذية و حجابات و كالتلي بس يصير عندي جوا ايدي مبلغ زين اخذج لأربيل و اعالج اثار الحروك البجسمج

فرحت حيل و حسيت حياتي تغيرت و الدنيا ضحكتلي خاصة من عرفت راح تعالج الاثار البجسمي

... لأن مرحلة اولى جان دوامي متأخر عن دوام البقية
انقل اسامة و صار يداوم بمتوسطة هنا بالدورة
و اثار رغم عمرها ٦ بس امي مشت معاملتها و سجلتها مدرسة وصارت بصف اول ويا سارة بنت خالد

اول ايام اني و خالد ناخذهن اثنينهن بسيارته و نبقى ننتظرهم .. ونكضيها سوالف و حجي لحد ما يطلعون

بس بقت علاقتنا صداقة ابد ما احس عنده مشاعر اتجاهي غير انو يحسبني صديقته و يحجيلي كل اللي يصير وياه

بيوم....
جنت راجعه اني و خالد من المدرسة بعد اسبوع على دوام البنات، تعودن يبقن وحدهن بالمدرسه فصرنا نوصلهن و نرجع، بس رجعت لكيت سيارة ابابنا

عقدت حاجبي و سألت خالد :- منو هذا ؟

-ما ادري

نزلت من السيارة، فتح الباب و نزل الرجال، بقيت واكفة متصنمة بمكاني .... تقرب و كال

اسماعيل:- شلونج بابا ديار ......يتبع

☆☆☆☆☆☆