ليتني استطيع فعلها الحلقة (27)

بواسطة -


ليتني استطيع فعلها


 
الحلقة  (27)
ليتني لم أقترب من الأشياء التي أعجبتني حين لمحتها أول مرة , ليتني بقيت انظر لها فقط من بعيد ♥️
............
ام رافد :- يبووووووووووووووووو ابني و بجري يريد ياخذ ميعاد الدايحة، يممممممه خلصن النسوان و ما بقن بس هاااااي
تحجي و تلطم على خدودها و تصرخ
ابو رافد :- شجاج خالدية صوتج منا الوادم ،اسكتييييي
-ماكو غيرك الميبس راس ولدك، لو على جثتي ميعاد ما تاخذها يرويفد، اخلص من خويلد و ذيج المشوهة تردلي انت بأمها الدايحة اسويلكياها عزا هنا والله
رافد:- يمة ما منتظر موافقة احد اني قررت و انتهت، جاي انطيكم خبر مو اكثر.
خالد:- يمه اكعدي بس اكعدي لا تصرخين
-عووووفني ميل عني انت ، ولكم الله يوفقكم من ولد يبتو كلبي علعلتوني مرمرتونيييييييي، بس اني الها الهاي الدايحة لا ما اهجم بيتها فلا اطلع اتسمى بأسمي
ابو رافد:- خاااااالدية طلعة من البيت ماكو
-لا والله ما اسكت، و هالدايحة الفارة راس الزلم لا ما اتوبها
ابو رافد:- بس اطلعين و تتعاركين وياها يا خالدية الا اندمج والله، الحجي بيني و بين ولدي نكمل كلام ياله نكلج
-شتكلي هلهلي لو افرحي لابنج اشو والله ما اسكت و اريد اشوف منو يجيب ميعاد جنة لبيتي
رافد:- بس اني ما رايد اجيبها بالبيت هنا، اشيل عنها ايجار بيتها و تبقى ابيتها
-هنيااااااااالي، خايب من اهممممممداك يالبعير فرحان ييشيل عنها ايجار البيت و من اكلك انطيني الف ادز بيه معجون ، تكلي يمه مو انطيج شهريه وين توديها
يالمابيكم خير بس للنسوااااااااااان
ابو رافد:- خاااااالدية
-ماتت خالدية وخلصت منكم ولدك راح يجلطونيييييي
بتول :- يمة فدوتج فوتي
-خالد :- دفوتي يا يمه
-عوووووووفوني والله يا رويفد لو تزوجتها لا اني امك ولا اعرف و تفو على اليوم الخلفتكم بيه
رافد كاعد داير وجهه عنها، و ما رد و الوالد عصبي و يصيح عليها و مانعها تطلع، و اني و بتول نجر بيها و هي تفلت من بينا و تصرخ و تشامر باديها
ابن رافد عمره ١٢ سنه، سامع بالهوسة و مفتهم على شنو بيبيته جاي تتعارك، رايح لأمه بالطابق الثالث، وكايل الها :- بيبي جاي تتعارك ويا بابا و جدو لان ابوي يريد تتزوج
و نزلت منى طايرة، بعدنا ما مسكتين امي و صرخت منى :- تسويها رافد و تتزوج عليه، تخطب غيري رااااافد
رافد عاف الهوسة و طلع برا و عافهن يصرخن بالبيت وهاي تتوعد و هاي تكول املخ و اصلخ
عفت بتول يمهن و طلعت ورا رافد و الوالد طلع ورانا:- ها رافد ؟
ابو رافد:- اني اكول لو تأجل هالموضوع شوية يا ابني حتى نشوف شلون تصفى
رافد هز راسه:- ان شاءالله يابه، المهم صار عدهم علم اني اريد اتزوج
خالد :- اني اروح بقت نص ساعة للخط لازم اروح بسرعة، اذا صار شي خابرني
ابو رافد:- روح ابني اتوكل
.......
ديار:- رجعت للبيت بلاعيمي توجعني عفت الجنطة و تمددت ع التخم اغفي لأن شربت مسكن و اللليل كوة نمته من الوجع، فغفيت ما حسيت الا على صوت موبايل امي يدك، كعدت على الدرج و ردت
:- هلا بشيخ الشباب شلونك عيوني
-هلا ام ديار شلونج
-اني بخير من انت بخير يبعد ام اديار و گلبها، خير شو جنك متضايق يبعد عمري
-فتحت موضوع الزواج ويا الوالد
-يا زواج ؟
-اني ناوي اتقدملج على سنة الله ورسوله
-شهم و ابن اوادم
-اني گلت الچ اني صادق وياج
-و ما اشك بهالشي
-اي، فاتحت الوالد و خالد بهالموضوع و سمعتنا الوالدة و كبرتها
-امك و حقها ميخالف
-لا اني كلت الها ما جاي اخذ موافقت احد جاي انطي علم
-اي ؟
-مرتي درت و كبرت و عفت البيت و طلعت
-ليش انت مو كلت هي تددري اتزوج وموافقة
-من صارت صدك گلبت
-مرتك و حقها ميخالف
-امك حقها و مرتي حقها، لعد اني حقي وين
-حقك يجي بالتعويد
-شلون
-كلشي نتفاجئ بيه اليوم نتعود عليه باجر و هم صار عدهم علم ان انت رايد تتزوج و عارضوا و انت سكتت و طلعت
اللي تسوي راح تسكت بس تخلي علم عدهم ان انت ما بطلت من الموضوع، هيج راح يضل ابالهم ان انت تريد تتزوج و مخلي هالشي ابالك و متوقعين بأي لحظة ترجع تفتح الموضوع، فترة و تلكاهم ملوا حتى لو عارضو ما راح يهم لان ممتفاجئين وردة فعلهم محد راح يهتملها لان الكل يعرف انت مصر على هالموضوع وتعودوا
-الوالد هم كال اجل الموضوع
-بالضبط، انت كايلي على قطعة الارض اللي اشتريتها قبل سنتين
-اي بس ما عندي ابني، بالقليل يحتاج ٤٠ مليون
-ماكو شي ينبني بيوم حتى السما و الكاع انبنن ب٦ ايام، و اني وياك حالي و مالي كلهن بين اديك شعندي غيرك
ديار:- ماماااا
ميعاد:- نعم حبيبتي، اترخص منك يبعد عمري ابنيتي مريضة و لازم اكابلها، باي
ديار :- ماااماا
-اجيييت
-الدا تحجين وياه منو ؟ رافد صح ؟
-اي
-شعندج وياه
-ليش السؤال ؟
-خربتي علاقتي ابيت السيد كافي، انت تعرفين اني و خالد نريد بعض
-و شعليه بيكم انت و خالد ؟
-و تاخذين اخوه ؟
-و شبيها ؟
-ويومين و تعوفينه
-منو كالج هالكلام رايده استقر
-و مرته و جهاله
-شعليه بيهم اني ابيت و هي ابيت
-و البيت التكليله ابني و اني وياك
-غير يريد يتزوجني خوما نبقى بالايجار
-انت تاخذين ما تنطين لا تقنغيني تريدين تساعدين
-اللي رايدته اأمن مستقبلكم
-انت بهيج حالة ما امنتي مستقبلنا هدمتي، كافي ماما بابا الاول و عصام و سيد جعفر و تريدين رافد الرابع ارحمي سمعتنا
-و شمسوية اني؟ عسى ما اتزوج ١٠٠ و بالحلال افتخر لان ما مسوية شي غلط
-انت الغلط نفسه امي، مجتمعنا ما يرحم لو المرة اطلكت مرة ما يرحموها بألساناتهم شلون و انت هذا الرابع ؟
-كلام الناس اذا يهمج فهو و قندرتي سوا المهم عايشه الناس لا راح توكلني ولا راح تعيش بمكاني، والي يحجي هو و النعال لا يجيب ولا يودي عايشة و مرتاحه و اذا حجو ؟
-اذا انت ما تهتمين اني اهتم و انقهر و انذبح من اسمع كلمة تمسج لو تمسنا
-واهتمي يطبج طوب شسويلج، الدا اسويه المصلحتكم والا انت هسه منين عايشة خطج و ملابسج و جامعتج و طلعتج و احتياجاتج منين، من الناس لو مني
اكف من اللي اني بيه و عودي جيبي الناس اللي تحجي هل تعيشج
-انت طول عمرج تكولين لمصلحتكم وانت مهدمتنا ما ما معيشتنه، جنتي ويا ابوي تخونين و تكولين لمصلحتكم منين جاي تاكلون و تشربون ، و هسه تزوجين هذا و اطلكين هذا و تحطين بجيبج و تكولين لمصلحتكم ، يا مصلحة هاي فهمينييييي ؟
اذا جنت محتاجة و تغلطين هسه انت مو بحاجة شي اكتفي و بطلي طمع
-ذاك اليوم ابطني جاي تحسبيني انت
-يمه كبررررت كبررررررت ابنج كبررررر اثار جاي تكبرررر خافي على سمعتنا، خافي على ابنج هذا لو طلع للشارع و سمع حجاية هم يتحملها مثلج ؟
كلمة الشرف ثكيلة على الولد ما يتحملها لا تخلينه باجر عكبة يكبر و يتورطله بواحد من وراج خافي الله بينا
-هذا كله راح يصير بس لأن اتزوج رافد
-لو بس زواج سهلة والله سهلة اعرفج والله ما تبقين وياه، انت تعودتي تخلين اكبر واحد جوا رجلج و تمشين راح ترضين رجال يتحكم بيج ؟
و الاكثر من هذا انت راح ترضين تبقين وياه العمر كله ؟
-هاي الامور ما تخصج، والله !! بت بطني و تحاسبني
عافتني ومشت مشيت لغرفتي لكيت اسامه كاعد و صافن، شافني طب :- امي رايده تتزوج مو ؟
-ما اعرف هسه
-ديار امي اذا اتزوجت اني اروح اعيش ويا ابوي
-لا تحجي هذا الحجي، حتى لو اتزوجت تبقى هي ما مسوية شي غلط بعدها صغيرة و تتزوج مو اول وحدة تتزوج
-معليه بيها بس اني ما راح اعيش وياها بنفس البيت حتى رجلها يجي يوميه للبيت، اعيش ويا ابوي احسن
مشيت يمه كعدت ، اخذت اديه:- ما راح اخليك تروح لا لبابا ولا تبقى يم ماما
-وين نروح ؟
-لما يجي ذاك الوكت الله كريم، لا تشغل بالك بهيج سوالف
دك موبايلي، كمت للهول اجيبه، باوعته خالد، طلعت للكراج احجي وياه
:- الو هلو خالد
-هلا عمري، بشري شلون صرتي
-اوو حتى نسيت نفسي مريضة بالقران
-شكو شصاير
-انت تعرف اخوك رافد يريد.امي
-البيت كاب هسه بسبب هالسالفة
-وهسه تعاركت وياه امي
-على شنو
-سولفتله البداخلي
خالد:- والله يا ديار تريدين الصراحة اني كلش ما قانع بزواج رافد بس هو قرارهم هذا شنسوي، معلينا بيهم اللي عليه اخذج و ابتعد من كل هالسوالف لان اني هم مليت ، ابوي يصيح اتزوج و امي تكول اتزوج و ضحى لازكتلي فد لزكة اريد اخذج و اخذ بناتي و اشك حلكه اليمسنا بكلمة لو يوصلنا
-اووف هيج واخلص من كل هالسوالف
-ان شاءالله و تصير سوالف هم
-ما اتوقع
-كولي يا الله
-انت وين هسه ؟
-وصلت الخط قبل شوية ووصلت البيت، خابرت اطمن عليج كبل لا افوت للبيت و اتلكا الطاخ و الطيخ
-ماشي حبيبي روح ارتاح و خابرني لما تكمل
خالد :- ماشي عمري
سديت الموبايل منها، و دخلت للبيت، هدوووء، صحت :- بتوووول
-ها خويه
-تعاي يابه
-كول
-شصار ؟.
-مرت رافد صعدت للطابق مالتهم فوك، و امي و ابوي تعاركوا و كعدت بغرفتها، خويه الصراحة انت قانع بزواج رافد و ميعاد ؟
-ما النا علاقه بيهم مو احنا النكول نرضى لو لا هو حر بحياته
-بس مو ميعاد، هسه لو تاخذ ديار انت والله فلا احجي بس ميعاد ما احسها راهمة
-الله كريم، سارة وين ؟ كون بجت اليوم
-بالغرفة فوك بعدها تتوجع خطية جاي اخذلها الدروس من اثار و اقريها
اجت مروة و نورة لزموا رجلية :- شلتهم لثنينهم ابوس بيهم و الاعبهم ، اجو جهال بتول وياهن و كعدت بالهول الاعبهم و اصعدهم على ظهري و امشي بعيه
شويه و اجت امي عصبية :- طلعت تريد تاخذ ديار للاردن يخويلد مووو ، ولكم اليووووم اليوووووم
-شصاير يمة
-ميل مني
-شكوو يمه شنو هذا بيدج
دفعتني و طلعت:- بتول شكو ؟
-اندري دفتر رسم بيد اثار و ساره اخذته قرته و تخبلت
-شنو هذا الدفتر
-ما ادري دفتر لاثار يرسمن بيه
-الحكيها يمعوده ما بينا حيل مصيبه بالمنطقة امشي
لبست عبايتها و اني طلعت وراهن، بس شتقرب افاكك بين النسوان لو اجرجر بامي بالفرع زحمة، خابرت ابوي كتله :- يابه تعال للبيت بسرعة
.........
ديار:- كاعدة بالبيت امي فوك، اسامه يمي جاي يلعب و اثار يم بت خالد يقرن سوا، فجاة اندكت الباب قوي
فزيت على حيلي، طلعت للصالة و الباب تندك حيل نزلت امي تركض ع الدرج :- هاي منو ع الباب
-ما ادري ؟
طلعت فتحت الباب و فات ام رافد تصرخ بنص البيت و تفشر، دفعتها امي :- حيلج عيني تريدين تفرغين شوفيلج غيرنا عيوني
ام رافد :- ولجن كح**** رايدات ولديييي تلعبن بروسهن و تردن تاخذن ولدي مني يالسااااااقطات
ميعاد:- بيج خير لزمي ولدج لا تهدين حيلج علينا يلا منا ولا تخلين اسقط الجورة و القرابة البيناتنا و اشوفج الوجه الثاني
-وجه ثاني شوفي بتج شكاتبه على ابني شوووفي
ديار :- فتحت عيوني و دمي جمد من شفت دفتر مذكراتي بأيدها، كاتبة بيه اشياء كلش خاصه ما يصير تنقري
لزمت امي المذكرات قرت بيهن، جاي تحجي سحبت الدفتر ام خالد:- جيبي عبالجن اسكتلجن اليوم افضحجن والله
حجت امي:- الا انت وحدة صدك ما تستحين ما كافي عليج جايه تتهجمين علينا ابيتي لا و ماخذه دفتر اشعار و خواطر لبنية مراهقة و تهددين بعد، ما راح اتصرف وياج اخابر ولدج و اشوف اكو اليطلعلج لو لا حتى اذا ماكو حتى اتفرغلج لا اني قصيرة السلان ولا قصيرة ايد
فاتت امي تخابر و بتول تجر بامها و تكلها :- اقري اقري هاي الساقطة شكاتبة على ابني شوفي المصاااايب، ابدال ما تكعد تربي بتها لاهية ويا الزلم اتفر بعقوووووووولهم ساااااقطات امهات الشوااارع
فات خالد سحب امه حيل، رادت تصيح بيه حط ايده على حلكها و جتف اديها و خلاها بالسيارة ، سديت الباب واني ارجف
الدفتر هذا شوصله لام خالد اني ضامته بكنتوري، اثار معقوله مطلعته، بس لا حتى لو خذته اثار شيوديه بأيد ام خالد شصاير يربي
امي خابرت على رافد و حجتله، كال الها جاي ، اجت :- وينها ؟
-سحبها خالد و اخذها
-كله صوجج كاتبة مذكراتج و البكلبج كله بدفتر و فضحتي روحج
-كاتبتة بدفتر بيه قفل ويومية اشيله اخلي بالكنتور و اضمه ماكو غير اثار الماخذته
-الزمها الهاي العرمه لو لا ، لا ما اتوبها بس خل تجي
فتت جوا و اني ارجف، دفتر مذكراتي لازم اجيبه من يمها ، خابرت خالد مرة و مرتين و تلاثة و ماكو
بقيت ادك ما عفته بالكوة يلا رد
الووو
:- الو ها ديار
-خالد دفتر مذكراتي كلشي يخصني كاتبته بيه حتى ابوي و اللي جان يسويه وياي كلشي كاتبه بيه
خالد:- انت تحجين صدك ! شلون تسوين هيج
-ما اعرف خالد ما اعرف فدوة انقذني
-هسه خل الحك اخذه من ايدها
-روووح
سديته من عنده و اني افتر، شجاني و كتبت كل مصايبي بهالدفتر امداني عود بيه خير و اكتب مذكراتي الله ياخذني
خالد:- غصبت امي على الرجعه و تعاركت وياها على سالفة ديار و هي تكلي :-تريد تاخذها و تشرد ولك ، تاخذ وحدة ابوها نايم وياها و امها سااااااااقطة .
خالد:- هذا الموضوع انت ما تدخلين بيه يمه، اني وحدي الأقرر
-شتقرر ووووولك، تاخذلك وحدة عايبة ولكم راح تجلطوني انتمممممممممممممممم ، ولكم شيبتم راسي ولكم طيحتو حظي عساني مخلفة درزن بنات ولا مخلفتكم شليتووووووو حالي
هي تحجي و اني ارد و هوسه و ديار حركت الموبايل حرك علية، طلعت من البيت ورديت عليها طلعت كاتبة من حياتها و اسرارها بهالدفتر و اني اكول امي منين عرفت ديار ابوها معتدي عليها، بقيت اضرب بالسيارة من وره غبائها الضيعتنا بيه فضحت نفسها و فضحتني وياها
فتت للبيت، لكيتها تفتر و تحجي و ادور بالدفتر تريد تقرأ اكثر عن اسرارها، سحبته منها حيل انشكت كم ورقة منه كامت تضرب بيه و ادفع تريده
ما رديت عليها، سحبته و طلعت رادت تطلع وراي، اجا ابوي تصايحو هي وياه و فاتو جوه
اخذت دفتر المذكرات و صعدت بسيلرتي، طلعت بتي تبجي وراي، عفت الدفتر بالسيارة و نزلت اخذتها و صعدت فوك، شفت اثار كاعدة ويا سارةؤ كلت الها :- كومي بابا روحي لبيتكم باجر بالمدرسة تكملين قراية
كعدت بناتي فتحت الهن طيور الجنة و نزلت الهن كارتونه مال حلويات وزعتلهن و حجيت :- اكعدن بابا ما اريد صوت شوية و ارجعلكم ماشي
نزلت ابويه و امي اصواتهم طالعة، التفتت على بتول :- خالد فوت انت هديهم ترا ابوي ما راح يسكت ولا امي لا تكبر دخيلك
-لا حول ولا قوة الا بالله هاليوم ما راح يخلص
فات رافد :- امي شجاها متكلي
-اسكت يمعود لا اطك هي وابوي،
-امشي
دكينا الباب على غرفتهم و فتح رافد الباب، لكيناهم واحد يصرخ بوجه اللاخ ، سحبنا ابوي و طلعنا و صحت على بتول تدخل يم امي
رحنا للاستقبال ، انطيت لابوي مي، رفع راسه و كال :- التحجي امك صدك يخالد ؟
-بس اهدئ يابه و بعدين نتفاهم
-صحيح ديار ابوها معتدي عليها
- لا
-تضم خالد
-ما اضم يابه وكافي تحجون بهالموضوه احنا مو زغار
-و شرفنا مو لعبة باديكم
رافد:- وشكالولك علينا يابه ما عدنا شرف
-اسمعوا ميعاد و بتها تبتعدون عنهن نهائي و قسما عظما لو واحد منكم اتقرب منهن لا اني ابوكم ولا اعرفكم
خالد:- اني اعرف عيشتي وياكم ما ترهم، ولو بقيت هنا تبقون تحاولون بكل صورة تمشوني بكيفكم، بس بكيفك يابه انت اقسم و اني اقسملك بالله العظيم لو حرمت علي شي ليلة ما ابقيلك بالعراق من باجر اني اخذ بناتي و اطلع و كلشي ما اريد منكم
ابو رافد :- خااااالد
عفته و طلعت و هم يصيحون وراي طلعت من الباب، فات رائد ، انضربت جتف وياه و مشيت عنه طلعت البيت، كعدت بسيارتي الموبايل و الظفتر بالسيارة ديار متصلة ب٧ مرات
ضربت الموبايل و اني انعل اليوم الاجيب بيه طالعه روحي من الدنيا كلها، سحبت دفتر مذكراتها كمت اقرأ بيه
فاير ، اكلب بيه بعصبية قريت خواطر الها ذاكرتني بطريقة تطير العقل، قريت شكاتبة عني و شمعبرة تعجبت بكمية حبها اليه المعبره بيه مدقفه بأدق تفاصيلي ضحكتي كلماتي نسيت نفسي و اني اقرأ
ضجت ع الكم ورقة المشكوكات لان بيهن كلام يخبل بس ناقص، كلبت اقرأ الوراها تعجبت عليها شلون تكتب خواطر جريئة، كمت اردد خواطرها و اني طاير بنص كتاباتها
لا استطيع البوح بذلك
ولا يمكنني ان اقول لك بأنني اتمنى معانقة جسدك و الألتفاف عليه كما تلتف الأفعى على الشجرة
استشعر حرارتك
استمع لنبضاتك
ارتفع و انخفض مع شهقاتك و زفراتك
اغصانك تتفقد جسدي النحيل.
شفتيك اهً شفتيك
كعنقود عنب اتوق لألتهامها
اغمض عيني لأستمتع بحلاوتهما
تزداد شراهتي في الأكل
فأستحي ان اقول اود تمزيقهما
اخلع عنك ذلك القميص المزعج
دعني اعبث بشجرتي كيفما اشاء
اه من صدرك الذي طالما حلمت بأن اضع رأسي عليه بعد الأنتهاء من خوض رحلة متعبة بين اغصانك
على شريعة الحب اود ان اعيش الحب معك
لكنني اخجل من قول ذلك
....بقيت اردد بهاي الخاطرة شي ٥٠ مرة متعجب معقولة ديار يطلع من عدها هيج كتابة !!،
كلش خجوله وياي واصلا ابد ما نتطرق لهيج مواضيع خاصة حتى لو صدفت و صارت كلمة مو حلوة و ضحكت هي تعتذر و تتحجج و تقفل الخط ما تقبل تكمل
بقيت صافن مبتسم وارجع اقرا ، انداريت اجيب الموبايل اللطشته و طفر ورا، اتصلت بيها، ردت علية، ملهوفة و خايفة :- ها خالد بشر بس كون الدفتر اخذته فدوة
خالد :- اخلع عنك ذلك القميص المزعج
-شنو ؟
-دعني اعبث بشجرتي كيفما اشاء
-لتكولي قريت
ضحكت بصوت عالي
-لا خالد لا فدوة عيب رجعلياه
-عييييب ، ههههههههههههههههههههههههه ، شنو هالكتابة و الخواطر
-لتحجي ورجعلياه فدوة
-هالدفتر يبقى يمي
-لا خالد الله عليك
-شفتيك اه شفتيك
سدت الموبايل بوجهي ضحكت بصوت عالي، رجعت اقرا، خابرت :- خالد رجعلي الدفتر احركه و اخلص منه الله عليك لا اريد مذكرات ولا اريد اصخام
-احركج هذا احلى شي اقراه بحياتي، تدرين ما اتوقع بيوم من الايام بنية تحبني بهالطريقة هاي، هلكد انت تحبيني و تتمنيني ؟
-خااالد
-روح خالد انت ولج وربج لجاهد عليج جهاد المؤمنين و اخذج من حلك السبع
-و الدفتر ترجعليه حباب
-ممنوع
-لا والله مو اخاف احد يكشفه عندك
-رب الجان عندج اوكع بيد امي تخافين عليه عندي ، ما الج علاقة اضمه يمي ما اخلي احد يلكاه
-لا الله عليك كتلك
-كلت الج ممنوع لا تخليني التف عليج التفاف الافعى والدغج
-خااااالد
قفلت الخط بوجهه ، بعد شيخلصني من السانه
باوعت اثار ماما كتلتها كتلة قوية بس بودي بعد اكتلها على هالفضيحة السوتها الية، ولو اني صوجي هي مال مذكرات و اكتب عشت عالم الافلام و كعدت اكتب
.....
من بعد هذه الحادثة تغيرت الامور
اهل خالد كلش قفلوا على زواج خالد مني و زواج رافد من امي ابوهم رفض و فرض على امهم ما تنطق كلمة وحدة عن شرفنا تقدير ان احنا اقاربهم
بس اصر ولده ما يتقربون من عدنا
حكم على خالد ما ياخذني خط بعد، رائد صار ياخذنا
كم مرة يتنرفز و يقرر يسافر ، بس اني امنعه و اكله اصبر نكون نفسنا على كيف ذاك الوكت نقرر ما مجبورين نتزوج هسه بهاي الظروف و نعاند كلشي.
مرت فترة تقريبا ٧ اشهر
ابوي ضاج كلش لان سالفة الخطبة مالتي من المدير العام ما ضبطت وياه ويكول الرجال اتزوج جديد، كم مرة اجا طالب باسامة بس بالحقيقة هو يريد اسامه و ميريده لان ما عنده احد بالبيت يعتني بأسامه فبكل مرة يضغط على امي عسى ان تخضع و تقبل ترجعله، بس جانت ابد ما تتنازل ، رفع دعوة علبها مال حضانه بس انقل للانبار و بقت الدعوة ما مشى بيها و سكتت السالفة.
اما ابيت ابو امجد مها اخذت الجرعات مال الكيمياوي كلهن، وفترة و تحسنت ورجعت شوية تمشي على رجليها، باخر فحص الحمدلله اتشافت من هذا المرض و فرحت و رجعت تقريبا الحياتها بس حالها يقهر شعرها كله واكع هسه بدا يطلع الها جديد
ورة ٣ اشهر من تحسنها رجعت سوت فحص طلع المرض راجعلها و منتشر بالكبد بسرعة مو طبيعية
جنت امتحانات بس ابد ما عفتها من امتحاني اطلع الها و بالتناوب يوم ام امجد يوم اني ابقى يمها
ومرات من خوات امجد يجن يباتن وياها
علاقتي بخالد مستمرة طبيعي بس بعيدة عن اعين الناس، تعلقنا ابعض بشكل مو طبيعي
هو لكه شغل بشركة و صار عنده راتب، و ابوه فتح محل شويه عن بيتنا يكعد هو بيه بالليل
ضحى اطلكت و كم مرة حاولت تدخل بيني و بين خالد بس هو رافضها رفض قطعي لهذا ما اهتميت الها،
طليقها الثاني مكاومهم عشائريا و ماخذ ابنه من عدها، انكسرت على ابنها كلش من جهه بناتها، رجعت لخالد تحجي وياه بلكي يقبل ينطيها بناتها
خالد مجاوبها :- الج عين اطالبين بيهن بعد ما انت شمرتيهن و اتزوجتي، روحي ضحى ولا تفكرين لا بيه ولا ابناتي انسي
صايرة شوشرة بيناتهم و متعاركين وتحلفت اله الا ترفع دعوة و تسحب بناتها منه بالقانون
لما اجت تريد ترفع دعوة حضانه ابوها معارض و كايل الها :- ما بيه حيل مشاكل البنات لابوهن اني ما اتحمل مسؤليتهن خالد ما راضي ينطيهن و هاي دنيا كلشي يصير بيها و الوكت مو زين ينخطفن يوكعن يصيرلهن شي اني ما اتحملهن البنات عد اهلهن ما الهن عيشة ابيتي
فهي متجهه لأبو رافد، داخله عنده و شاكية و تريد تعيش ويا بناتها وابوها ما راضي تاخذ بناتها و متوسلته يرجعها لخالد
هم اهله من الاساس شادين حيلهم ويا خالد ما يريدونه يتزوجني وكل هالفترة الفاتت ابوه معارض، فحاجي ويا خالد انو يرجع ضحى
خالد مو اباله على نفس بروده مكتفي بالرفض وبس ، اني جنت بالمستشفى ويا نهى وهو فتح وياي الموضوع، كلت اله :- وشكلت اله
-شكلت اله يعني اقفل الموضوع ولا تحجيلي بيه مرة ثانية
-خالد ضحى ما راح تفك من عدنا رايدتك
-هي من يوم يومها رايدتني و اني اللي رافضها
-والى متى نبقى بهالوضع يعني لو نكسر كلمتهم و نتزوج بدون رضاتهم لو ما يقبلون
-لا تشغلين بالج عمري كملي امتحاناتج والله كريم
... بقيت ويا مها بالمستشفى بس كلش ضايقني هالموضوع، هو هيج هيج ابوه ما رايدني انوب اجته ضحى هسه يكعد بعقل خالد و تتعقد السالفة اكثر
لثاني يوم رحت للجامعة ورجعت للبيت كلش تعبانة امي جانت مو بالبيت بالدوام، بدلت ملابسي و صبيت اني و اخواني اتغدينا و كعدت اقري بأسامه هم امتحان عنده، بس اثار خلصت امتحانات ونجحت للثاني
اندكت الباب، كلت لأسامة :- احفظ هذوله الفصلين حتى امتحنك شفهي بيهن يلا
كمت للباب فتحته ضحى كبالي
ضحى :- مرحبا
-هلو، شكو ؟
- امج موجودة ؟
-لا
-رايدتها بموضوع
-هسه هي مو هنا
-اي انتظرها يمتى تجي ؟
-على جية
فتحت الها الباب :- فوتي
فاتت كعدت بالاستقبال، جبتلها مي و حطيت كبالها، ما حجت :- شرايده من امي
-موضوع
-ليكون يخص خالد
-تجي و تعرفين
-كمت من يمها رمشت على امي خابرتني، كلت الها ضحى هنا ، كالت :- هسه اني بالطريق جاية
١٠ دقايق و فتحت الباب امي و دخلت :- هلا ضحى شلونج خاله
كامت ضحى باوستها و سلمن على بعض و كعدت، حطت امي جنطتها صفح و نزعت الكعب مالتها و كعدت ع التخم و كالتلي :- جيبيلي المرطب بسرعة رجلية راحوا من الكعب خل ادلكهم
ضحى ساكته، رحت جبت الها و اجيت و هي تكول :- يا يابه شنو هالحر هذا ، اي ضحى ليش ساكته كالتلي تريدج بموضوع خير
تحجي امي و ادلك برجليها، بجت ضحى ، عافت من ايدها امي و كال الها :- خيرج خالة ليش تبجين
-انت ام و اني ام و داخله عليج خالة تساعديني
-كولي بنيتي اذا كدرت ما اقصر ان شاءالله
-ابو ابني سحب ابني من و حرك گلبي و من ذاك اليوم و لهذا اليوم اني الوب و كلبي محترك والله
ميعاد:- الله يعينج مو سهل فراك الضنا
-ما الي غير بناتي خالة ردت اخذهم من خالد بالقانون بس ابوي ما يرضى يبقي عندي البنات ما يتحمل مسؤليتهن
-الرايدته شنو
-الرايدته ارجع لخالد و كبل لا تحجين و تكولين اني شعليه اني جايه و داخله عليج و اعرفج خوش مرة و قوية و تكدرين توكفين وياي
ميعاد:- ليش خالد ليش ما ترجعين لطليقج و تعيشين ويا ابنج هو صغير و محتاج الحنان اكثر من بناتج و حتى هن تعودن على فراكج
-خالة الام ما تتعود على فراك جهالها و بناتي علة بكلبي من يوم التنازلت بيهن لابوهن ما مرتاحة والله كل يوم ابجي عليهن
-احجيلي الصدك العلة البكلبج خالد لو بناتج ؟
-خالة لو افر الدنيا كلها ما الكى مثل خالد لا باحترامه ولا بحبه و لا بتعامله ويا طليقي شفت الضيم اهله ما ينحملون و هو اطباعه صعبه و مرته الاولى لوعتني
-ما رضت بجزة رضت بجزة و خروف شلونه يصير الغباء يخاله احمر اصفر خسرتي رجلج و بيتج و جهالج على سوالف لا تجيب ولا تودي و شمرتي بناتج و خسرتي الاول و التالي ليش ؟
بقت تبجي
ديار :- شرايده من خالد يعني ؟
ميعاد :- تغشمين نفسح ييمه جاي تكلج رايدته
-و انت تعرفيني ماما
-والله يا ماما اكوم اغسل رجلية و انتن كعدن كبال بعض تلاطمن لحد ما الكالجن الحل و ارجعلجن
-ماما
-اغسل رجلي يا بنتي
راحت و ضحى تمسح بدموعهة و تبجي حتى ما طلع من الساني اي كلمة، فاتت امي لازمه الخاولي كعدت تنشف برجليها و حجت :- كافي يخالة ما ناوية افتحلي ساكية هنا هالكثر بجيتي ما تسوة الدنيا تراها
عندي الحل بس شرط ما تناقشين بيه ضحى
ضحى:- والله ما احجي بس خل ارجع لخالد
ديار:- ماما
-اسمعي، ترجعين .. بس !! ترجعين جنة ابيت اهله وبنتي يتزوجها و يطلعها ابيت
ديار :- مستحيل ما اكدر
-اسمعي للنهاية بنتي
ابو رافد رافض زواجج من خالد نهائي ، يكعد خالد يتفاهم وياه ما ارجع ضحى الا تخليني اتزوج ديار
-خالد ما منتظر موافقة من احد
-وانت ما راح تتزوجين ابدون موافقة اهله
-ماما
-ديار خلي عقلج براسج يا بنتي
كمت من يمهم و اسمعها تكول لضحى (بقي الموضوع يمي والله كريم ) طلعت و اجت امي
- انت شلون هيج تفرطين بيه لمجرد.اجت عندج و اشتكت
-من صالحج يغبية بدل ما تتزوجين و تتورطين ابناته
-اييي اتورط ابناته و بمرته مووو
-هي تعيش عد اهله و انت ابيت وحدج كملي جامعتج و اني مستعدة اشوفلج واسطة تشغلج ليش تخلصين عمرج تخدمين ابزر غير بزرج
-ما اتحمل انت تعرفين شنو وضعي راح تخليني بموقف اكره نفسي منه راح تصير هي زوجته الشرعية و اني الثانية هي الحلوة و اني المشوهة هي ام بناته و اني نزوة
-ديار بنتي فكري ابناته عوفي الحب على صفحة و فكري بأنسانية ليش ترفضين بنات يعيشن بحضن امهن
-هي العافتهن
-سبحان الما يغلط يا بنتي
-ماما ما اتحمل فدوة جاي تخلين روحي تشتعل
-اكعدي و ارتاحي و فكري على راحتج يا بنتي
-ولا افكر ما اتحمل اموت تفتهمين شنو اموت
-ترضين ام تعيش مكسورة ؟ ولج ما قهرتج دموعها خطية حتى لو غبية تبقى ام
-ماما قهرتني يس ما اكدر انطي خالد اموووت
-محد يموت على احد يبنيتي نبجي يوم و يومين و نعيش و نتعود و انت بشطارتج اكسبي خالد لصفج هي غبية ترا ما تعرف تكسب الها رجال صيري اشطر منها
-واعيش حياتي بسباق حتى هو يباوعلي و ما يباوعلها ارحميني من هالافكار دخيلج ما اكدر
-والله ماما هذا الموجود مو تردينه حار و حلو ومكسب لازم الواحد يحني جتفه للدنيا شوية حتى هي تنحنيله مو راس براس ما ترهم
عافتني و طلعت بقيت الوب بمكاني ساعة افكر بيها و بدموعها و انقهر عليها و ساعة افكر بخالد و انجن ما اكدر اشاركه
خابرت امي على خالد و كالتله :- اريدك تجيني بشغلة
حدود ساعة اجا و كعد بالاستقبال كالتله :- ضحى جانت هنا و تبجي و توسلتني اقنعك حتى ترجعها
خالد :- اني قافل هالموضوع ام ديار ياريت ما تحجيلي بيه
-مدام بناتك موجودات خالة ماكو سالفة تنقفل
-بناتي عندي
-عمر الرجال ما يحويله طفل جذب مثل حنان الام
-وليش عافتهن اذا هيج تحبهن
-هسه ابتلت يا خالة غلطت المرة و تندمت و سبحان الما يغلط
- ام ديار
-لا ام ديار ولا ام غيرها اسمعني خالة للاخير و انت العاقل الفاهم طول بالك وياي
بتي يخاله ما طالعة من فطر الكاع و تتزوح واحد اهله ما راضين عليها
-هاي جديدة السالفة ؟
-لا قديمة بس ما فاتحة موضوعها، ادريك ابن اجاويد تقبل تاخذ بت اهلك ما موافقين عليها و تخلي الناس تحجي عليها وتعيبها
-يعني اذا ابوي ما راضي شنو اسويله ؟
-تتفاوض وياه و انت الربحان
-بشنو
-تكله اوافق ارجع ضحى بشرط انت بنفسك تخطبلي ديار
-ما راح يقبل ولا اريد هالسالفة
-ما تنلام بيك امك من تكول عنودي يخالة بس خل اتفاهم وياك راح يقبل هو يدري كلش زين انت لو ردت شي راح تنفذ كله اني هيج هيج متزوج ديار
تريد توافق على ديار و ارجع ضحى
لو تخليني اخذ ديار و اطلع منا بعد ما تشوفني
دكله هذا الكلام و غم كصتي اذا ما قبل
-وديار ؟
ديار :- اني استمع الهم من ورا الباب من كال هالكلمة بجيت يعني اقتنع
ميعاد :- ديار خليها عليه
بقت تحجي وياه و تقنع بيه و طلع
خابرني اني ما رديت ، من ما رديت عرف اني ما راضية باللي جاي يصير دزلي رسالة ( ميصير الا اللي يعجبج حبيبي لا اتعبيلي فكرج )
امي من خلصت من خالد حطت الحجي على ايد رافد حتى يقنع خالد بالزايد و يقنعون ابوهم بالحجي، رافد كلش فرح بالفكرة و يكللها :- فكرة ذكية هم يرجعن البنات بين امهن و ابوهن و هم خالد يتزوج اللي يريدها و يرتاح
.... بقيت بين نارين نار نفسي و نار ضحى
لو اقبل بضحى تصير ضرتي
لو احرمها من بناتها و اخذهم
والأثنين ما اتحملهن
الصراحة ما اكدر ..
ولا اتحمل اذا اريد اتحمل شتحمل
ضحى احلى مني
و اني اصلا جسمي مشوه مال اتامل اتعالج فكرة بعيدة
اليوم خالد يحبني من تمر الايام ما اعرف شنو يصير يمكن يرجع يحبها يمكن يساوي بيني وبينها و تالي يقارني بيها و اخسره و حتى لو مو خالد فالناس مراح ترحمني بكلامها
.... خالد من شافني قافلة ع الموضوع قفله نهائي ما عاد فتحه، مر اسبوعين تقريبا هدوء
خالد رافض اي احد يفتح هذا الموضوع و مخابر ضحى كايل الها :- اني كلت الج سابقا اذا بطلاكج تتأملين ارجعج على ذمتي فكطنة و شيليها من اذنج ابقي عد رجلج و اسلكي اني واعد بنت الناس و مثل ما شفتي حياتج اني رايد اشوف حياتي ، و تصرفاتج الغبية انت التدفعين ثمنهن مو اني اطلعي من حياتي و انسيني و انسي بيوم عرفتي احد اسمه خالد
..... اطمنت و انسد الموضوع
خلصت امتحانات و تفرغت لمها اغلب وقتي وياها طلعت من المستشفى و بقت بالبيت بس رجليها ما يتحركن كله على كرسي
حالها يقهر الكافر ، كعدت تشكيلي :- ديار اني بعد ما الي امل بهاي الدنيا و احس ايامي معدودة
-لا تكولين هيج كولي يا الله
-و النعم بالله ديار جهالي
بجت
-مها لا تبجين الله موجود خلي ايمانج بألله قوي
-ديار ولدي عمرهم ٣ سنوات ديار ما شبعت منهم
بقيت ابجي وياها، مسحت دموعها و حجت :- عمتي جانت ناويه اذا متت تزوج امجد لبتول
-اسم الله عليج مهاوي لتكولين هيج والله تحركين دمي
-الموت حق ديار و عيال بتول حاكمينها اذا تتزوج تنطيهم جهالها ما يقبلون بزرهم يعيش عد الغريب
-سمعت هيج شي الله كريم لا تفكرين بهالامور
-اريد اوصيج على جهالي ديار
كمت اباوع بعيونها و ابجي، حجت :- اريد امنهم عندج حتى اموت و اني مرتاحة انت صديقتي من جنتي صغيرة يمكن ربيتي عدي و اعرفج و اعرف معدنج
-اخليهم بعيوني والله ما اقصر وياهم ولا تفكرين هيج
-ديار اني اريدج تتزوجين امجد و اني عايشة حتى اموت و اني امئمنه حاطة جهالي عد وحدة اعرفها ما ادري بعد موتي امجد منو يتزوج و منو يختار بس اريد اختارج كبل لا هم يختارون و امن جهالي عندج
صفنت بوجهه :- مستحيل امجد مثل اخوي اني ما اقصر بجهالج ولا راح اعوفهم
-لا ترديني اذا الي يمج خاطر
-انت ارتاحي هسه ولا اتعبين نفسج مفاوله روحج بالموت ليش
-اريد اأمن جهالي ديار والله كلبي محترك لو متت وين يرحون لا ترديني و خليني ارتاح
-دنامي هسه نامي و الله كريم
نومتها و طلعت بس حيل حركت گلبي نظفت غرفتها و سبحت جهالها و كعدتهم و رجعت للبيت مالتنا
بقيت افتر بالبيت و الوب ولا ارتاحيت من وصتني على جهالها و لهسه، كلش احب مها ولا اتخيل تموت و افاركها
بالليل اختنكت كلت خل البس حجابي و اطلع اشتري و اشتم هوى، مشيت للمحل مال بيت ابو رافد باوعت منو بيه حتى اذا خالد ادخل
باوعت خالد بس يمه ولد، فتت للمحل هو وكف :- اهلا تفضلي و ابتسم
الولد بقى واكف اني افتر ع البرادات اخذ اصلا ما مشتهية شي بس اريد اشتم هوى، طلعت سينالكو و حطيته كباله ، و هو يكول للولد :- ان اشاءالله ان شاءالله روح هسه روح والله كريم
الولد حس ان يريده يطلع فقبقى يباوع و طلع، اخذ السينالكو و حطها بعلاكة :- شو اليوم طالع حبيبي خير
-مقهورة على مها كلش هوايه
-اي والله من اشوفها كلش انقهر حالها و حال جهالها
-احس روحي مختنكة
ام رافد :- خنكج البين ان شاءالله انت ما ناوية اتفكين امن ابني ؟
خالد :- يمه مو بالمحل ارجعي للبيت و هناك نتفاهم
-ليش ما تشتغل الها مهفة ما دامها مختكة ولك شلون بيك و برافد اني ولكم راح تخبلوني ، ليش ما تفكين منه و تخلينه يرجع مريته مو حرام عليج حارمته من عائلته حتى انت يصفالج الجو
خالد :- يمه جاي اكلج روحي شقضيتج دمشي
ديار :- طلعت ربع من الجيزدان و حطيته ع الكزازة : هاي فلوس المشروب مع السلامة
طلعت منهم اجت امه وراي :- ما تخافين الله ؟ ما تكولين بنيات يردن امهن
-ما مانعته اني
-اذا ابني غبي يباوعلج ترضين لو لا ولج خافي ربج ولج ضيعتي ابني عوفي بحاله ما تحسين على روحج اهله كاشين منج و انت مجلبتنا باوعي وجهج بالمرايا ينحط ويا وجه ابني
تنهدت عفتها و مشيت ، رجعت للبيت ابجي
ميعاد :- ها خير ان شاءالله شكو ؟
-سولفت الها و اني ابجي و اكولها :- كافي مليت الناس تعير بوجهي كافي والله مليت
-وانت شعليج بالناس يا بنتي يعني شلون اني ويا هالمرة هاي ما افتك منها
ابجي و خالد يتصل، جرت الموبايل امي :- ها خالة ها سودة علية بتي تبجي ليش امك مخليه على حالها حال حتى تسأل شلونها
اي تعيرها خاله تعيرها لان هي مشوهة عجيبه هالناس ما بقت بكلبها رحمة
من ترتاح تحجي وياك عوفها هسه ترتاح روح روح
-شسوي
-انطمري شتسوين ما تعولين تسمعيلج كلمة حتى تلطمين طز بالناس الحجت و الما حجت شتسوين بيها
-يعني شلون تريديني ما اهتم، احجاياتهم توجع الله بقرانه يكول لرسوله ( ولقد نعلم انك يضيق صدرك بما يقولون ) و تريديني اني العادية ما اهتم
-الطمي براحتج الطمي دشوف هاللطم بشنو يفيدج
عافتني و مشت
ثاني يوم الصبح ساعة ١١ جاي ابدل حتى اروح لمها ابقى يمها .. اندكت الباب
فتحتها طلعت ضحى:- شرايدة مني بعد ضحى
لزمت الباب:- احجي وياج كلمتين و امشي
-احجي
فتحت موبايلها و انطتنياه، تسجيل صوتي لمكالمة بينها و بين بناتها هي تبجي و مروة و سارة يبجن عليها و يكللها عمو يصيح علينا و بيبي تسخرنا و كلام بيناتهن و ضحى جاي تحجي بيهن و تكللهن يعني بيبي تصيح عليكم و هن يكللها اي ، تجن يمي و هن كللها اي هي بجت و بناتها بجن وياها
انعصر كلبي بلعت ريكي، انطيتها الموبايل :- شتريدين مني
-خالد
-كلت الج اذا كدرتي تاخذينه ما اراح اتقرب الكم
-خالد واعدج بزواج و ما يكدر يخلف بوعده وياج اني ما رايده افرقكم رايده بس ابقى يم بناتي
عفتها بالمكان و طلعت امشي لبيت امجد سريع
اريد عقلي يركز كمت ما اجمع راسي ضرب
شفكر بحب خالد الي لو بطلب مها مني لو ابجي ضحى و بناتها لو تعيير ام خالد الي و استهزائها بيها اريد الزم سالفة بعقلي واركز بيها دخت
فتت بيت امجد، باوعت لامجد :- ها وين مها ؟
-بغرفتها فوك
- محد يمها
-لا وحدها
-خطية تكعد لوحدها هم تضوج و تبقى تفكر
-شسوي ديار والله تعبان اصعدي يمها
مشيت فتت للبيت ، سلمت على ابو امجد و ام امجد، حجت ام امجد :- ديوره فدوة لعينج يوم بس غسلي لحسوني مسوي بحفاظته
-اي جيبي
اخذت لحسوني شطفتله و غسلت اله و رحت جبت حساني هم غسلت اله و صعدتهم فوك فتت المها و اثنينهم بأيد، سلمت عليها ورحت لخانتهم طلعت الهم ملابس و لبستهم
هي تباوعلي كملت الهم رشيت الهم عطر و خليتهم ينزلون ، كعدت يم مها :- اشلونج اليوم
-على الله
-كومي على حيلج و طيبي بكلبي سوالف هواي احجيلجياهن
-صيري يمي و سولفيلي
-صعب
-لخاطري فكري بجهالي والله گلبي محترك ما اكدر اامنهم عد وحدة غيرج
-مها
-لخاطري ديار
دنكت و دنكت همومي كلها وياي عقلي ما كام يركز بشي تعبت، بقيت يمها ساعة و نزلت انظف
افتر بالبيت و عقلي يدور بالتفكير
خالد ما اكدر اعوفه لا ..
بس ضحى و بناتها ما يهونون عليه
ما اكدر اصير حقيرة لهدرجة و امنعها من بناتها حتى لو هي الغلطانه، بس بنفس الوكت ما اكدر اخليها تصير شريجتي
غمضت عيوني و اتخيلت خالد بدوني ..
لو اني ما جنت بحياته جان كدروا يقنعون يرجع ضحى لا جان مرجعها من زمان بس هو محسب حساب يتزوجني و يخليني ام لبناته
اذا طلعت من حياته راح ينجبر يرجع لعائلته
لا ما اكدر اعيش بدون
بس هم ما اكدر اعيش و اني مشاركته ويا وحدة غيري
راح اموت من التفكير
تعبت كلش
عرضت كبالي مها و حالها و وصيتها
مرة على فراش الموت كل املها بيه اعتني بجهالها و تامنهم يمي
هاي شجاي يصير بعقلي !!!!
كملت تنظيف رجعت صعدت يمها
وهم رجعت فتحت الموضوع وياي و بجت بجيت وياها ...
لحظتها نطقت اكبر كلمة غبية بتاريخ حياتي
بعمري ما اغفر لنفسي هذا الغباء اللي سويته
واتمنى لو بس ارجع لهاي اللحظة من عمري و امحي الدقيقة الكلت بيها ( لا تشيلين هم موافقة و اطمني )
اتمنى لو بس ارجع جان اني بخير
يا ريت لو بس ارجع
ليتني استطيع فعلها .......يتبع
☆☆☆☆☆☆
ومن هنا تبدأ الحكاية....




☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم