ليتني استطيع فعلها الحلقة (24)

ليتني استطيع فعلها

 

الحلقة  (24)

من يريدك ارادك بالذي تكن 💙

........

ام رافد :- خالد شجاي يصير ؟

ابتعدت منه بسرعة و اني امسح دموعي و ادور وجهي، هو بكل برود جاوبها :- دا اوصلها للبيت تعاركت ويا ابوها

.. جانت هي و بتول ابيتنا، الناس كامت تجي للبيت تستفسر فتركت بوتل بالبيت و ام رافد جاي يمها

مشت هي و هو بقى واگف، صاحت عليه :- ابني مو احجي وياك

خالد:- يمه امشي گبالي للبيت واني جاي وراج

ام رافد:- لا هسه تجي

عافها و اجا وكف ع الباب، اني كعدت و هو حجة ويا بتول:- خويه ابقي انت هنا اذا ما عندج شي

بتول:- اي ما عندي شي بس سارة و يوسف باجر دوام شلون ؟

ديار:- ما عندي شي خالد خل تروح خطية تعبت

بتول:- اخذ اثار وياي ؟

ام رافد :- راح تبقى واكف

بتول:- يمه مو كالج امشي هسه جايين وراج

هو وكف يتنهد و ما رد، و اني كلت الها:- يا ريت تاخذين اثار يمج تخليها ويا سارة لأن خطية باجر دوام تروح عليها الحروف

بتول:- زين لعد بس انطيني جنطتها وملابسها

كمت من مكاني جبت الها غراض اثار و بوست اثار و كلت الها:- لا تخافين ولا تبجين اني باجر اجيج

اثار:- اثامة وينه ؟

-ما بيه شي اسامه، باجر ماما تجيبه و تجي روحي وياها

طلعت وياهم، خالد بقى يوصيني ويكلي :- شوية و ارجعلج لا تخافين ارتاحي انت و اطمني اسامة بخير ان شاءالله

ديار:- خالة ام رافد شكلها ضاجت من شافتنا هيج شكد عيب، هو صوجي جان المفروض ما اسوي هيج

-و انت شسويتي ؟ وعلى شنو تفكرين عادي اني ما خايف من احد ولا منتظر احد يقبل او لا، لا تفكرين بهالموضوع كلش.

-روح و طمني اذا صار شي

-ماشي يروحي فوتي جوا و ارتاحي و قفلي الباب زين.

راح و سديت الباب و فتت للبيت، البيت هوسة بس ما بيه اشتغل عفته و رحت تمددت بغرفتي، و اني ابجي على اخوي.

......

خالد:- رجعنا للبيت، امي ماشية كبالي، لگيتها منتظرتني بالأستقبال، اول ما فتنا اني و بتول صاحت

:- خااااالد

-ها يمة

-تعال يمي رايدتك

اجيت و بتول مشت وراي، دخلت :- كولي ؟

ام رافد :- شعندك ويا ديار

-ليش السؤال ؟

-اني امك و من حقي اعرف

-لما اقرر شي اكيد راح اجي اگلچ و راح تعرفين !

-تقرر شنو ؟

-كلت الج وكت لما اقرر اكلج شنو قررت

-لما يوكع الفاس بالراس ؟

-شتقصدين ؟

-شعدك ويا بت ميعاد خااالد

-كل خير

-حجيك الغاز عود شنو انت تضحك عليه لو جاي تلعب عليه

-العب عليج ليش ؟ شعندي وياج !
اسمعي يمه انت امي على عيني و على راسي واجبي احترمج بس مو الواجب عليه امشي بكيفج، اني حر بحياتي و حر بأختياراتي

-تحبها يعني ؟

-شي خاص بيه

-خالد لا تحطها ابالك والا والله........قاطعها

-شتسوين؟ تتهجمين عليها صح ؟ تشهريها لو تغلطين عليها ؟ شتسوين كليلي

-اطيح حظها مو اني لاخذ لأبني وحدة مشوهة

-اني ما جاي اشوف التشوه بديار على كثر ما جاي اشوفه بتفكيرج، على العموم الحبيتيها او لا شي ميهمني شي راجعلج

وخليها ابالح لو تقربتيلها لو اذيتيها صدكي و ثقي بالله بعمرج ما راح تشوفيني

-جاي تهدد انت و على مود منو على مود بت ميعاد الدايحة ؟

بتول :- شبيح يمه شجاج

خالد:- راسي دايخ مالي خلك لهالسوالف التعبانة اروح

ام رافد :- ما الك شغل تسوي سواياتك و ادور وجهك لو شايفة الشفته حاطه راسها بحضنة و تبجي هالساقطة، والله لو يضل اخر يوم بعمري يا خالد لا تتوقع احليك تاخذ هالمشوهه بت الدايحة

فات رافد:- خير خير يمعودين الدنيا مگلوبة برا و انتم هنا طالع صوتكم شكو

خالد:- عود كول للوالدة تبطل تدخل بحياتي

رافد:- شصاير يا حياة ؟ شبيج يمه

ام رافد:- لا كملت من اجيت انت و قبطت السبحة اذا بكري و فتحت عيني صاير سايق لميعاد يوديها و يجيبها

رافد:- يمه لخاطر الله شرايده

-اسمع اخوك رايد بت ميعاد ام الشوارع حاطها بحظنه و جاي يكلي شي خاص انت مو اخوه ما تحجي وياه ما تعقله

التفتلي رافد :- حاط ديار بحظنك يالناقص مو كتلي ما اريدها بالحرام رايدها بالحلال

ام رافد:- يبووووووووو عزا العزاني ولك يا حلال تريده يتزوجها

خالد:- ما جان بقصدي شي حرام والله هي جانت تبجي و جنت احاول اهدي بيها

-صايرلي ابو گلب الحنين ؟ كافي ما الكم علاقة بيهن بعد لگن الولد هاهيه سوينا العلينا و زايد

رافد:- و شلج علاقة يمة؟ كافي تدخلين بحياته خل يامن مستقبله ويا اللي يشوفها تناسبه

ام رافد :- يا مستقبل هذا ويا بت ميعاد ؟ مخبل انت ابوها ارهابي جان و امها مطلكة و تفتر بالشوارع الله اليعلم شتسوي ما تسوي و تريدني اخذها لاخوك

-ياخذها ما ياخذها هو حر و بعدين عيب يمه ام ديار جارتنا ومن اقاربنا شلون تحجين عليها هيج، مرة لا جاية يمج ولا داكة بابج عيب هالكلام زحمة.

-ما داكة بابي ولك لو ما صايرلها حماية انت وين ما تلتفت انت كبالها

-خلصتي من خالد التفيتي عليه، امشي منج اشرفلي

ام رافد :- خلوها ابالكم انت و ذاك اخوك ابو راس اليابس ميعاد و بتها لا تحلمون ارضى بيهن افتهمتوا

خالد:- عفتها تحجي ما رديت عليها صعدت لغرفتي اخذت ملابس سبحت و بدلت و رجعت لديار

دكيت الباب، تأخرت يلا فتحت :- شو تأخرتي وينج

-جوا كعدت و غفيت ما ادري

-اي لعد نامي و ارتاحي اني باجر من الصبح يمج

-امك كون حجت

-الحجت و الما حجت ميهم، اني الرايدج مو هي

-ما اريد اصير سبب خلاف بينك و بين امك حاول تهدي الوضع لا تأزمه

-ان شاءالله، فوتي جوا و اني راح ابقى بالسيارة كاعد شتحتاجين گولي

-خالد اشكرك

-لا عاد تعيديها، تحسسيني اني غريب

-انت اقرب اليه من روحي

-اي هيج غازليني يربج و خليني ارتاح مو اشكرك و سوالف ما بيها حظ

ابتسمت و هو راح كعد بالسيارة و اشر ع الموبايل بمعنى (راح اخابر )

دخلت جوا خابرني و بقى الليل يسولف و يتغزل و يحاول يلهيني حتى ما ابجي او اتأذى بالوضع اللي اني بيه، اخيرها نعست كال :- نامي و عوفي ابخط مفتوح
ضحكت و عفت الخط و نمت و الظاهر هو هم نام و الخط مفتوح، كعدت على صوت بالموبايل مثل واحد دك الجام عليه

مغفيه و استمع، طلعت امه، تكول :- هنيالي والله مشتغللها حارس لبت ميعاد، كوم للبيت الساعة ٥و انت نايم بالشارع ابابها كوم

خالد و هو نعسان:- يمه روحي الجو بارد خليني اسد الجام

-ولك شموازيك تنام بنص الشارع ذاك بيتك و ذيج غرفتك لف بفراشك و ادفى

-ما شاكيلج يمه بس خلي انام

-عزا العزاني كون، رافد رجع للمستشفى ما اجا و خالد نايم اباب المسعده.

غلقت الجهاز من يمي، وكعدت افكر بكلامها وردة فعلها اكيد ما تريدني لأبنها، مشوهه و ابوية ارهابي و امي مرة مو ملتزمة بالعادات و التقاليد ضاربة حجي الناس بعرض الحايط و عايشة، بس اني شلون راح اعيش و اواجهه كل هذا

جاي احجي، اندكت الباب، كمت من مكاني، فتحت الباب، طلعت هي ام خالد :- هلا خالة كولي

-اني جاية اكلج كلمة وحدة

اباوع الساعة خمسة :- خالة متحلمة بيه يا كلمة بهالوكت

-اسمعي ابني تبتعدين منه ما اريده يتأذى انت تعرفين ابوج كلش زين ليش تورطين ابني وياج، اذا هو ماشي وراج مثل الاعمى فأنت خافي على ولد العالم و ابتعدي

- ما اكدر الومج بخوفج على خالد فعلا ابوي ما ينحزر وحقج بكل التكولسنه، اني راح احجي وياه و اگله يبتعد

-اي عفية ما دام تخافين عليه اريدج تبتعدين منه و ما تتقربيله.

اخذت نفس و تنهدت:- ان شاءالله خالة

نزل هو من السيارة كال الها :- يمه من صدكج ؟ داكه الباب عليهم بالساعة و تحجين وياها ؟

اندارتلي :- مثل ما وصيتج

عافته و هي تهز براسه و تنفخ ما راضيه عليه، باوعلي هو:- فوتي جوا و سدي الباب باردة

هزيت راسي بمعنى(ماشي) و سديت الباب، اتصل على موبايلي، رحت للغرفة اخذته ورديت:- صباح الخير

خالد:- صباح الانوار عمري، شرادت امي منج

-خايفة عليك و الصراحة خوفه بمحله خالد ابوية ما ينحزر

-اكول حبيبتي انجبي

-احجي صدك والله

-و شرايدة

-خالد اني هم اخاف عليك ابوي عنده القتل شربة ماي

-و هسه المفروض اخاف و ابتعد ؟

-الحذر يقيك الضرر

-و الله يكول قل لن يصيبنا الا ما كتب الله لنا، ترا مو مرجلة اترك الاحبها لان اخاف على روحي فياريت تنجبين حبيبتي و تسكتين و متسمعيني هذا الكلام مرة لخ

-انجن لو تأذيت خالد

-و اذا تأذيتي اني تمشي عندي، عادي مو؟

-مو هيج خالد

-للمرة الثالثة اكول انجبي حبيبتي و ديري بالج من الرابعة ما اريدها تنعاد.

-هسه شكول ؟

ضحك ضحكة مسموعة و كال:- اني اكول لو تكومين تسويلي ريوك من اديج الحلوة حتى نشبع و نطلع للجامعة

-يا جامعة ؟! لازم اروح لاخوية

-اي بس اني وراي خط لازم اوصل البنات ما اكدر اعوفهن، وبعدين انت ليش ما اداومين ؟ ترا اخوج يمه امج ما عليه شي، ساعة و اتصلي بيها هي اطمنج عليه

-ما الي خلك

-بطلي تشائم و سلبية و گومي سوي ريوك دنطلع

ضحكت:- ماشي

سويت ريوگ، ورحت اوديله، فتحت اله الباب هو منتجي على السيارة لاف ادية من البرد و يباوع بالفرع و صافن، اباوع على طوله ملامحة كلشي بيه يعجب

ضعيف بس اجتافه اعراض، طوله يراوح ب١٨٠سم، عيونه شهل و الشعر بأيده يرجع بيه ورا ناعم حيل
عمره ٣٩ سنة بس ابد ممبين عليه لأن هو من النوع بارد الاعصاب يقنع نفسه انو هالشي ما يستاهل يحزن عليه و ما يحزن يروح يطلع يسافر حتى لا يضوج نفسه بفد شي، لهذا ميكبر.

عصبي بس اعصابه مو بكل وقت، يطبق قول اللي يكول (اتقي شر الحليم لو غضب) بكل الوقت هادئ بس اذا صار عصبي اتعوذ منه، يقفل بعد ما يتنازل لو اكبر واحد يجي كباله

طبيعته مو متسرع، كلشي عنده بتخطيط و تفكير و ينطي وقت للايام يلا يقرر ابد ما يخطي خطوة بدون ما يدرسها.

الهدووووووء اهم صفاته كل مشاكله و المشاكل اللي تصير كباله يحلها بهدوء و هو كاعد، و الهدوء يستخدمه حتى ويا الانسان اليضغط عليه لو يزعجه بحيث يخلي الواحد يشتعل كباله وهو كاعد كالثلج مريح و مرتاح كاتل الكباله بهدوئه.

مرات من يضوج مني لو يتضايق اعرفه من سكوته، اكوم احجي وياه يجاوبني جواب مختصر او مرات يتعمد ميجاوب يخلي روحي تطلع لحد ما ابجي يلا يفك.

اليغلط وياه ما ينساها اله يحقد بهالموضوع لا يسامح ولا يعدي، ينبهني على هالموضوع دائما و يكلي :- اليغلط وياي بجرة قلم اشطبه من حياتي و ما التفتله بعد لا اسامح ولا اعدي ولا اريد اشوفه نهائي.
لهذا دائما يحذرني ان ما اغلط وياه.

احلى صفاته و يمكن هي صفة عامة يشترك بيها اغلب العراقيين و هي النخوة و الغيرة لو نخيتيه للموت يفزع و ما يفكر و لو طلبت منه يجود من الموجود ميرد

اكثر وضع احبه اله هو و بيده الكاميرا، كاميرته دوم بسيارته بس شي يعجبه جرها و كعد يصور
يثني رجله يكعد يتمدد و اشكال الوضعيات تشوفها بيه حتى يطلع اللقطة حلوة، وكلش احب تصويره.

وكفت اباوعله و اني بيدي الصينية و هو بعدها عقله شارد و هو يباوع بالفرع، دار وجهه لا ابالي، لكاني اباوعله، ابتسم

تقرب مني:- انطيني وفوتي جوا لا احد يشوفج واكفة وياي بالهاساعة و يروح يألف

-اذا عندك رصيد خابر امي اني ما عندي رصيد

سحب الموبايل من جيبه و انطانياه: اخذي الموبايل و اني اخذ الصينية، اتصلي على ما اتريك

-ماشي
اخذت موبايله دكيت رقم امي، طلع مسجلها (ام ديار)
... رن رن رن ... ردت :- الو

ديار:- الو هلو ماما

ميعاد:- هلو ديار شلونج امي

-طمنيني اسامة شلونه

-الحمدلله طلعوه من العمليات و هسه اني يمه

-يعني حالته زينه ؟

-اي الحمدلله عدت

-عمامي هم اذوج ؟

-لا بالليل رجعوا ميتين على اخوج و يباتون وياه

- و ابوي ؟

-هم رجع

-زين راح اجي اشوفه

-تلحگين تشوفينه البسي و اطلعي للجامعة

-لا كلش بالي يمه

-من تجين من الجامعة مري عليه، اثار نايمة ؟

-عد بتول اخذتها وياها

-والله بيت ابو رافد ما نعرف شنجازيهم، رافد ما عافني ولا ابوهم يحلف بيه شتحتاجين و شتريدين الله ينطيهم العافية

-وهذا رقم خالد اخابرج منه اساسا ما عافني للصبح نايم بالباب لان وحدي

-ولج المثل الخالد تشعليله العشرة شمع و ما تجازينه يا ديار

-اي والله، روحي هسه خاف يخلص رصيد الولد

-انوووب، تخاف حتى على فلوس، دهررررر

ضحكت:- بوسيلي اسامه هوايه و من يكعد خابريني حتى احجي وياه ميته عليه

-اي عيني روحي يلا لا يخلص رصيده لخلودة

سديت الموبايل، فرصتي حتى شوي ابحوش بجهازه
الحلو احسه هو من حقي وكلشي بيه ملكي حتى لو بعدنا منتزوجينه بس بكد ما حبيته كمت احس هالاحساس

بقيت اكلب بموبايله الرسائل مالته كومه بيه بنات مراسلته، دخلت عليهم ردوده عليهم عادية يعني صديقاته، عفتهن ...
لكيت دنيا اللي بالخط مراسلته و دازتله كومه دارميات و هو مغلس، ضحى دازتله رسالة دارمي

(يم بيتي ريتك كون واشمرلك العين
تشبعلي منك شوف وتردها بعدين )

انوب ( جك جك تطيح الناس بس آنه طباه
اسم الله محد كال كالولي وجعاه)

هزيت ايدي غلقت الجهاز و طلعت انطيه، لكيته لازم كلاص الجاي يشرب و الاكل على حطيته :- شو ما ماكل

-لا اكلت شوية بس هو اني ما احب الريوك بس الجاي علمود الجكارة، خابرتي امج شلونه اخوج ؟

-اي زين طالع من العمليات و عمامي و ابوي راجعين بالليل باقية بس هي

-لا خابرت ابوي بالليل راجع هو و ابو امجد بس رافد باقي وياها

-اي ظلت تمدح بيه هواي
مديتله الموبايلة

-بشريني اخذتيلج فرة تفتيشية سريعة لو لا

ابتسمت :- الصدك اي

-و شتبين ؟

-جكجك و طباه

ضحك ضحكة طويلة :- لازم قريتي

-اي، ليش تراسلك لهسه ؟

- عندج اعتراض لو راسلتني ؟

-ثقتي بيك مو بيها فما اهتميت لا الها ولا لغيرها اصلا هزيت ايدي و جبتلك الموبايل، الحابته رجال مو شبه رجال حتى يخليني اثق بيه و يخون.

ابتسم:- احبج

خجلت بأبتسامة كلت اله:- اروح ابدل

-منتظرج

-هذا جهازي بقي يمك اخاف تكول بس اني بحوشت بموبايلك

-شيلي الموبايلي و اخذي ولا تعيديها

-ليش

-عيب دوري غيري يسويها، لو شاك بيج ما ابقى وياج وانتهت، فأخذي الجهاز و فوتي جوه عاد خلصيني دنروح

ابتسمت اله، اخذت الجهاز و فتت جوا لبست و طلعتله
وصلنا للجامعة خلصت محاظراتي و رجع وصلنا، امه خابرت عليه هواي اضطر يعوفني بالبيت و يرجع لامه

اثاري طلعت تريده يوصلها لمها
خابرت امي حتى اخذ تكسي و اجي اشوف اسامة ما قبلت كالت :- ابقي بمكانج اصلا اريد اطلعه كتبت خروج و اني جايه ما اريد ابقى بالمستشفى و ابوج يحوم علينا خليني ارجعه للبيت اجيب علاجه و احنا نهتم بيه عود لو صار بيه شي المستشفى مو بعيدة

طلبت منها احجي ويا اسامة، خلت الموبايل بأيده، حجه وياي ما كدرت احجي بس كمت ابجي،من بجى هو سحبت الموبايل ماما و كالت :- ولي لطامة الولد ما بيه حيل يلطم وياج.

فرحت حيل من كالتلي راح يجي سويت اله حلاوة جكليتية و نذرتها بثواب سلمان الله يرحمه جان يحب هيج حلاوات يكعد يلطع بيهن

دزيت اثار على جكليت و نظفت البيت و انتظرته ما اجو، كلت اكعد بغرفتي ارتاح لما يجون، فتت لكيت اثار ضمت شي

-طلعي كتبج يلا خل اقريج، هذا شنو الضميتي وراج

-ماكو شي

-طلعي كتبج يلا، كعدت يمها و مديت راسي لكيتها مطلعه دفتر مذكراتي، صرخت بيها :- ليييييش اطلعينه حيوانه يعني ماكو احد يكدر يكتب مذكراته براحته الا تكعدين تنكين عليه، جيبيييي واءا اخذتي بعد اكص ايدج

بقت تبجي و تريده الها، كلت الها :- والله هسه لو تموتين هم انطيجياه ولي يلا

طلعت من الغرفة تبجي، كعدت ردت اكتب، صراخها مال البيت، كمت من مكاني:- تعاي اقري اني اجيبلج غيره باجر

عاندت الا هذا و ادك ابرجلها، كلت الها :- خب دولي

عفتها و سديت الباب حتى ما اسمع صوتها
كعدت اكتب مذكراتي مال هاي الايام
من يوم اللي اعترفلي خالد و لليوم بس اخلص منه اتصاب اكعد اكتب شنو حجينا و شنو سولفنا بشكل مختصر بس اذا بالليل كتبت يعجبني اكتب خواطر

واشكال الخواطر .. مرات حزين او رومانسي جريئ بس لنفسي لان هذا الدفتر بيه قفل يعني بس الية، رغم هاي اللوكية اثار تعرف تفتح القفل بس اني ما اقبل الها تلزمه و دائما اخذه منها

فكعدت اكتب مذكرات الأيام المرينا بيها هاي الفترة اني و خالد، التهيت اكتب اندكت الباب

فزت على حيلي اخذت جيس الجكليت و ركضت للباب و اثار كبالي تحاول تفتح بيه، فتحته وشفته كبالي شايله رافد هلهلت و اني ابجي و اطش جكليت رغم ما اعرف اهلهل، هلهلولتي طلع بس صياح

فوته رافد و كعده ع التخم بس هو كلش ما بيه حيل، بس مبتسم حظنته و بجيت بس امي و رافد صاحوا بيه

ميعاد:- هي لطامة جرح الولد يا يا يا

:- لا لا لا تحضنينه مو زين على جرحه خلي خلي يرتاح

-شبيكم بس ردت اسلم عليه

ميعاد:- بس سلامج لطم دضحكي فرحي للولد خلصانه روحه دومج ويومج تلطمين بوجه الله

ابتعدت من عنده، اندكت البابؤ اجا ابو امجد :- ها الله يساعدهم

ميعاد:- هلا هلا بأبو امجد شلونك شلونك زين شلون صحتك مها شلونها والله كلوبنا يمها

ابو امجد :- بخير بخير، الحمدلله على سلامة الولد
تقدم باس راس اسامة :- شلونك وليدي

اسامه هز راسه، امي حجت :- ديار جاي لعمج ابو امجد

ابو امجد :- لا لا اكعدي متغدي و شارب جاي اجيت اشوف الولد و اتحمدلكم بالسلامة

ياله ما دام اطمنا عليه زيارة المريض لازم تكون خفيفة ، حط جوا راسه ٢٥ الف و كاله :- كرت عينج برجعته ام اسامه

-الله يخليك حجي بس جيتك كافية من فدوة رحتك، خلي الفلوس لجهال امجد خطية

-عدنا خير من الله هاي هديه لاسامه و اني بس يكوم بالسلامة اشتريله موبايل

تشكرت منه امي، مشى ابو امجد و اشر لرافد يطلع كدامه، كام رافد طلع و امي بقت تباوع عليهم

اني كعدت يم اسامه بست خده و لزمت ايده :- مصدكه اني رجعتلي بالسلامة والله ردت اموت بلايك

بقى يحجيلي كوة شصار بيه و شلون خطفوه، العرفناه ان الخاطفه هو من جماعة ابوي رايد يهدد ابوي بيه

ردت انطي حلاوة كالت امي: مو زين على عمليته ، لازم شوربات خفيفة نسويله

فخليت الحلاوة بصينية صغيرة و طلبت من اثار ادك البيبان و توزع الحلاوة

ردت انطي لامي كالت:- لا لا حلاة هواي مسوية دايت ما اريد، فايته انام عينج على اخوج

-روحي

هسه فاتت تنام، اجت ام خالد و بتول وياها، دنكن الباب :- ام اسااااامة هنا

صحت :- هلا خالة فوتي فوتي

سلمت عليه امه بس ما باستني، بس بتول بوستني
طلعت امي:- هلا هلا فوتن فوتن
وتلكتهن مباوسن و دك شلونج

كعدن و هن يطمنن على اسامة، قدمت الهن كعك جايبة امي و جاي وكعدت يمهن ، باوعتلي ام رافد و حجت ويا امي :- هاهي ام ديار اعتقد كفينا ووفينا ياريت بعد تخلين ولدي يشوفون شغلهم خطية كن يوم الضاع اسامه و هم تاركين شغلهم ووياجن

ميعاد:- يا شجاج ام رافد

ام رافد :- اني تعرفيني شكد احبج بس اني والده و هم حقي اخاف على ولدي من اسماعيل

ميعاد:- يعابي اللي يعابيح يمرافد محد كال انت على باطل بس لا اني ولا بتي دكينا بابكم ولا خابرنا على ولدج وكلنالهم اوكفولنا هم ولد حلال ووكفولنا شلون بالله نطردهم ؟

-لا بس هاي هي لهنا و اكطعي راس الحية

ميعاد:- ماكو حية ان شاءالله و ان جان اني او بتي محد بينا واصل يم احد من ولدج وتريدين الصدك وكفاتهم وكفت زلم فدوة الطولهم ما نعرف انجازيهم فأذا ابالح اطردهم اعذريني ما اطرد احد متفضل عليه، خايفه عليهم ولو هذا مو سبب لان كل المنطقة ما شاءالله ما قصروا قابل اسماعيل ما عده شغل و عمل ظال يلكط اليساعدنا بس مع ذلك اذا ما رايدتهم فأنت امهم و امنعيهم مني يمج، و اذا ما تكدرين لا تذبين عجزج ويا ولدج براسي اعذريني لان ابيتي بلعتها منج الحجاية و اخذتها برحابة صدر الا لو مو ابيتي جان الي غير كلام.

كامت ام رافد :- اني وصيتج و خليها ابالج حتى نصير صريحين من البداية اذا بتج مفكرة بخالد فكطنه و خل تشيلها من اذنها ما اقبل ابني يتزوج بتج ما تناسبه

ميعاد:- هههههههه والله يا ام رافد هاي بعدج شايفة ولدج ولد الامير اتشارلز وواحدهم الامير وليام ههههههههه

ترا بتي طالبة قانون وباجر عكبة تتخرج و تاخذ اليناسبها لا حاطة ابالها زواج ولا مخليه بعقلها تتزوج واحد اقل منها و ما مخلص جامعة

وبعدين ابنج شنو حتى يناسب بتي عمره حيخش بالاربعين و ما عنده شغل غير سايق عد بتي ومطلك و بناته بركبته ، اني خالد احبه بس كلمن ياخذ اليناسبة و اعذريني ابنج مو بمقام بتي

... كلش ضاجت ام رافد من كلامها، طلعت و هي تكللها :- سوي الزين و ذب بالشط صدك لو كالو عين ابنادم ما يغزر بيها غير التراب

بتول بقت تتحاجه ويا امي و تكله :- خاله هالكلام ما مقبول منج

ميعاد:- يشهد الله يا خالة معزتج بكلبي من معزة ديار بس انت شفتي تصرف امج وشلون تقلل من بتي و شايفتها زايده على اخوج لا احترمت عتبت بيتي و لا احترمت شدتي و اني طالعة من مصيبة و هاي جيتي من المستشفى

بتول:- ميخالف خالة تعرفيها لامي تخاف على اخوتي ما عدها غير هالتلاثه

-والله خاله تخاف عليهم خل تجومهم و تگابلهم مو ما تكدرلهم و جايه تحاسبنا و تسمعنا كلام خشن و احنا بحالة مو مال نتحمل

بقت تتعذر بتول و طلعت، سدت الاباب امي و هي تهز بأيدها، حجيت :- ليش هيج حجيتي على خالد ما يستاهل هالكلام

-ادريه ما يستاهل بس امه تستاهل، شايفته علينا هارون الرشيد لا ينشاف ولا يتكابل و النسوان تتمايله

-شعليج بأمه هسه اذا سمع اني شگله ؟

-كليله امي تعتذر عن الكلام بس حجت هالحجي حتى ترد امك لان امك عيرتنا بوضعي

-بس هي ما عيرتنا

-ولج ما سمعتيها و هي تكول بتج ما تناسب ابني، اشو هو مطلك و جهاله عنده و انت ارمله يعني وضعج احسن منه بس هي تقصد وضعج بكلمة ما تناسب ابني ، كلابه الدنيا اي والله كملي جامعه لاخلي اكبر شارب جوه قندرتج

-اني لا اريد اشوارب ولا اريد تردسن على امه خليها شما تحجي تحجي، بس مرة ثانية لا تمسين خالد بحجاية

ميعاد:- ما تولين من كدامي دوليييي

عافتني ومشت نامت، وره شوية اجا خالد النا للبيت شايل علاليك فواكه و كعك النا و تحمدلي بالسلامة على رجعت اخوي و كومته بالسلامة، وضعه جان كلش طبيعي ارتاحيت من ما تأثر بحجاية امي

عاف العلاليك وراح، بقيت كاعدة يم اخوي
.......

بتول :- جانت امي منتظرة خالد على نار حتى يجي و تكله ميعاد هيح كالت عنك، ورنا بكم ساعه فات هو تعبان، حط المسواك بالمطبخ و صاح عليه

خالد :- بتووووول

-ها خوية

-هذا المسواك صفي و صبيلي غدا ميت جوع ما متغدي

ام رافد:- اكعد خالد رايدتك بحجاية

خالد :- يمه والله تعبان ما بيه خليها غير وكت

-كلت الك اكعد

-احجي على السريع شكو شصاير

-رحت لبست ام ديار اتحمدلها بالسلامة واكلها احنا كفينا ووفينا ابعدي عن ولدي تدري شجاوبتني

-يمه صدك جذب رايحه كايله للمرة هيج تره اذا مو اقاربنا هم جيرانا و اءا مو جيرانه فهاي انسانية شلون تروحين تكليلها هيج

-اسمع انت اسمع ابو الانسانية ، شايف شتكلي ؟ تكلي والله ابعدي ابنج خالد عن ابني ترا ما يناسب بتي هو خلك سايق لبتي و بتي طالبة قانون و هو واحد مطلك عايب بناته على حالة ما يناسبها لا تخلين ابنج يلعب بعقل بتي

خالد :- هويت راسي و كلت الها :- اكو شي ثاني لو هذا كل العندج ؟

رافد :- يبو قرار و انسانية مخلص ليلك نايم ابابها تحميها و هن شايفاتك خلك سايق عدها ولك هاين نفسك وياها لييييش

-بتول ماكو داعي بعد تسويلي غده، تزقنبت وشبعت

... عاف و طلع
بتول :- خالد خالد معليك بحجي امي، تعال هنا
يمه ارتاحيتي هيج من زقنبتي الولد و طلعتيه

ام رافد :- عوفي يتزقنب ولا يبتلي بالمشوهه و امه الدايحة

بتول:- اي ظلي زقنبي عود من يطك ويسافر ظلي نوحي و كابليني ظلي ...

............

ديار:- نومت اسامه بمكانه و رحت حتى انام، طلعت المذكرات و كتبت البداخلي كله عبرت عن الضيق اللي اتضايقته من كلام امي لان مست خالد

واني اكتب اشتاقيتله، رمشت عليه ما خابر
رمشتله مرة ثانية ماكو ، كلت خاف ما انتبه
رحت اخذت الموبايل من راس امي و طلعت للكراج خابرته مرتين يلا بنهاية الدكة جاوب

خالد : الو

-هلو حبيبي رمشتلك اكثر من مرة مجاوبت

-ما شفت

-وخابرت مرتين يلا رديت

-و هاي رديت ديار كولي

-شكول اشتاقيتلك و خابرت

-همم و غيرها

-غيرها !!! شنو ممكن يكون ؟

-ديار تعبان هسه، ما اريد يطلع من عندي كلام اتندم عليه بعدين فخليني هسه

-امك سمعتك الحجي يعني

-ولا يهمج لا يظل ابالج، يلا مع السلامة

-خالد اوكف اوكف

-كولي

-ترا والله ......... قاطعني

-ما اريد احجي بالموضوع

-بس اسمعني والله اني

-ديار لا تلحين بالموضوع و اقفلي

- الح !!!

تنهد :- كلت الج تعبان وما اريد يطلع مني كلام اتندم عليه، اني اهدئ و اخابرج وخاف تكولين زعلان مني لا ما زعلان و اني احبج و اموت عليج بعد ؟ بس قفلي الموضوع بداعتي و عوفيني هسه

-ماشي
حجيتها و اني خنكتني العبرة

حجه :- لا حول ولا قوة الا بالله ليش دا تبجين

-ما ادري
بجيت

تنهد:- ارتاحي و اخذي راحتج باي
قفله مني و هو مختنك ، كعدت ابجي، رحت لامي، حطيت الموبايل يمها بقوة، فزت :- اسم الله الستار شبيج فززتيني

-كلت الج خالد راح يتضايق من الموضوع

-وهاي مفززتني على مود خالد من طاح حظج، انوب سطرته للموبايل بس فلوسه بكدر راسج يالغبية

اخذت الموبايل تگلب بيه

عفتها و طلعت منها متنرفزة و دموعي بعيني، كعدت بغرفتي ابجي، لكيته مخابر عليه مرة، رجعت رمشت عليه ما خابر

انتظرته يخابر لحد ما نمت و هو ماكو..
ثاني يوم الصبح، هو بالعدة يمر عليه اول وحدة، بس اليوم جايب اللي بالفرع الثاني يلا جاي عليه مصعدني وفر على بقية البنات اخذهم بدون اي كلمة حتى صباح الخير ما گالها، تنرفزت من تصرفه بس ما حجيت بقيت ساكته طول الطريق

وصلنا للجامعة نزلت اني اول وحدة و منتظرته يحجي، انتبه هو بس بعد طنكورته كابه فما يتنازل و يبادر بالكلام

اخذنا محاضرتين و اتفقوا الشلة ان يطلعون يتغدون، فطلبوني اطلع وياهم، فوافقت اطلع اتغدا برا بمطعم

طلعنا برا الجامعة جان المفروض نطلع اني و مريم و صديقتي حوراء بسيارة وسام و غير بنات ويا حسام و مهند. بس الصار حوراء راحت ويا مهند و مريم كالت

:اني راح اروح للبيت انتو روحو اتغدوا

وسام :- مريم لا تخربيها اصعدي و خلينا نتونس

مريم :- لا اعذروني والله بس اليوم بيت عمي عدنا و اني نبهتني لازم ارجع

-لج يابه بعد للدوام ساعتين و يخلص لا تعقديها اصعدي

ديار :- اصعدي قابل اروح لوحدي اصعدي

-لا والله ما اكدر امي خابرتني لازم اروح

اتعذرت من عدنا و مشت، حجه وسام :- اصعدي ديار

-بس

-لا بس ولا دبس لا تخربيها انت اللخ

-هو وينه المطعم

-يابه هيانه قريب اصعدي

صعدت وياه و رحنا للمطعم،طلبنا بيتزا و قواطي بيبسي و تحلية وافل

الصراحة رغم اني مو كلش اختلط وياهم بس كعدت الشباب حيل حلوة تحس روحهم طيبه و بلغتنا نكول عليهم حشاشين هواي ينكتون ويضحكون لدرجة كمنا نبجي من الضحك هاي واني انطوائية بس بسرعة اندمجت وياهم

و اني بالكعدة اتصل بيه امجد، كمت من يمهم و رديت :- الو

امجد :- هلو ديار وين انت

-بالجامعة ليش ؟

-كلش محتاجج مها تعبانه و امي اتخربطت و رجعت للبيت و محد يم مها هسه

-هسه اخذ سيارة و اجيك نص ساعة و اني يمك

امجد :- اي فدوة ما يقبلون اضل يمها لان الردهه بس نسوان و مها وحدها فدوة استعجلي

-ماشي ماشي

رجعت للطاولة، الشباب متفقين كل شاب يتحمل مصاريف اكل البنات اللي اجو وياه، فصاح وسام :- بس اني ربحان اجت وياي بس ديار

ديار:- اني لازم اروح كلش اعتذر بت عمتي بالمستشفى ماخذه جرعة كيمياوي ومحد يمها

صاحوا الشباب:- لااا مو كاعدين

وسام :- كملوا كعدتكم اني اني اوصلها

ديار:- لا كلش اشكرك اني اخذ تكسي

-مو عيب اجيتي بسيارتي و ترجعين بتكسي ؟ امشي امشي كل عذر ما مقبول

سلمنا عليهم و طلعت ويا وسام، صعدت وياه، كال :- بمدينة الطب مو ؟

-اي

اخذني لمدينة الطب وصلني للباب، سلمت عليه ورجع ، دخلت اني خطية امجد جان على نار ، من اجيت صاح :- اييي الله جابج يمعوده فدوة روحي يمها كلش خطية

ديار :- لا يظل بالك هسه اني اروح يمها

رحت يمها خطية لكيتها متقيئه و النسوان ماسحات الها بس ما مدلات الها، و هي دموعها بعينها

تقربت يمها ابتسمت:- ليش هالدموع ليش

مها :- اني تاليتي هيج يصير بيه ولج ديار

-مسحت دموعها و بست راسها هذا الانسان بكلشي يمل يوم مر و يوم حلو و هاي الدنيا خوما نريدها كلها ناخذها بحيل صدر

احجي وياها و اني ابدل الها، طلعت الها كلينكس مبلل مسحت الها و انطيتها خاولي نظيف تخلي جواها و رجعتها لنومتها حتى ترتاح

كعدت يمها الظاهر هي عرفت بيها سرطان من اللافتات اللي مكتوبة على حيطان الطابق خاص بالكيمياوي، ظلت تشكي و اني اصبر عليها و اكولها :- ترا دا تخسرين نفسج هيج اني اعرف هواي ناس تشافوا من هذا المرض لان جانوا اقوياء و تغلبوا عليه هذا المرض بالات يعتمد على الحالة النفسية اذا حالتج النفسية تعبت تسوء حالتج و هذا الما نريده صيري قوية و خلي القران و اقري حتى ترجعين لجهالج بخير و سلامة

بقت تهز راسها، كمت من يمها و كلت الها :- اني رايحة اغسل ذني الملابس و اكول لامجد يدبرلج قران حتى تقرين بيه

مها:- ياريت على الاقل تهدا اوجاعي بكلمات ربي

-ان شاءالله

......

خالد:- اجيت على البنات حتى اخذهم صعدوا كلهم بس ديار ماكو، خابرت عليها ٥ مرات ما جاوبت ، حجت دنيا

:- اني اعرف مهند زميلها بالقسم تريد اخابره حتى اعرف هم طلعوا او لا ؟

-خابريها ..
خابرت هي و اني خابرت امها خاف هاي لان اخذت بخاطرها الصبح طلعت وحده، كالتلي امها :- بعدها ما جايه للبيت

الفتت على دنيا و هي تحجي:- ها اوك اوك ماشي

خالد :- ها ؟

دنيا :- جانت طالعة هي و الشلة للمطعم مناك ماخذها وسام و رايحين يتونسون وحدهم

خالد:- منو هذا وسام ؟

دنيا:-هذا شبيك اللي ذاك اليوم تعارك على مودها، هو كل القسم يكولون يحبها و دافعلها و هسه عايفين الشلة بالمطعم و طلعو لوحيدهم......يتبع

☆☆☆☆☆☆

للأسف على الرغم ان الانسان مو ملك نفسه ملك الظروف لكن بعض الكلام جدا اذاني اللي يكول يوميه تموت واحد حتى تاخذ استراحة و ماتنزل و اللي يكول بعد يومين تموت زوجها حتى تاخذ استراحة
الكلمة الطيبة صدقة ... صدق رسول الله
حسافة شحت الصدقات عند البعض

الاستراحات ابدا مو بصالحي لان افقد احساس القصة و ان توقفت فلاني مجبورة اللي ماتوا هم اقرب الناس اليه لا اني من حديد ولا من صخر حتى ما اتأثر لو ابجي لو تتعب نفسيتي و القصة يحتاجلها خلك اذا ما عندك خلك شلون تنكتب ؟

اما بالنسبة للي يكول المفروض يكتبها قبل لا يبلش بيها، فأحب اكوله القصة حقيقية و بعد كل بارت ينزل ابطال القصة يتذكرون من حياتهم احداث جديدة و يبعثولي
احيانا اضطر امسح البارت الكاتبتة و اعدله حتى اضيف الاحداث اللي يتذكروها متاخر ، فشلون اكتب و اضم ؟

حلقة اليوم جان المفروض مو هيج احداث الحلقة بس فتحت الجهاز لكيت بمبعوثلي مذكرات اضافية ، حذفت و كتبت من جديد ..

اضافة الى ان اللي توفت هي كانت بمثابة امي، وكلنا منهارين خصوصا ماما، غير انوا طفلي مريض وكل شوية دينشمر

ما اعتقد اني مرتاحة و قصرت !!
الظروف تجبرني ، مع هذا احب اشكر كل اللي ترحم و قدم كلمة مواساة و ان شاءالله اعوض ايام الانقطاع ببارتات اضافية

محبتي ❤

☆☆☆☆☆☆