ليتني استطيع فعلها الحلقة (22)

ليتني استطيع فعلها

الحلقة  (22)

تمسّك بألعلاقه التي لاتجّد فيهاَ كلمٌه أحبك ، لكنك تجد فيها كّل شيٓ يثبت ذلك ❤

...........

جنه كاعدين بنص الشارع المقابيل الفرع مالتنه و منتجية ع السيارة و هو كبالي، بعدني ما مستوعبه كل كلامه، صفت سيارة كبالنا
كمزنا اثنينا و گمنا فزينا

رافد :- ترا عاد مو بالشارع ولك فضحتنا

خالد :- امشي منا لا اشحتك

رافد بضحكة:- عمي اشحتني بس كلي موعد العرس شوكت حتى نحظر ارواحنا

كلش خجلت من صف رافد وشافنا، مسحت الدموع من عيني و اني ابتسم، و صعدت بالسيارة و خالد راح لرافد يشحته ، و رجع صعد

ممصدگة كل الوضع الجاي امر بيه، معقوله نطق !!
كعد هو ، التفت علية يباوع، دنك يشوف عيوني

-امممم عيون الجانن يبجن هسه ضحك

فشلني خجلت كلش درت وجهي، ضحك بصوت عالي:- لك فدووووووة

مشا بالسيارة، بعدها الرجفة بأيدي و الحرارة منصدكة كل الجاي يصير، معقوله اني مو بحلم خالد الخلت سنيني احلم بيه هسه هو يمي و يتغزل !

اخذ ايدي، شبك اصابيعه بأصابيعي:- لگيت شغل بشركة و شغل الخط هذا و الاستوديو و جاي اجمع شي على شي حتى ائجر بيت و اثثه و بعدها نتزوج بحيل الله، كل الموضوع كم شهر ان شاءالله اصبري عليه.

-ما اعرف شنو اكولك

-ايدج دا ترجف بأيدي الهسة

-انت متعرف شنو بالنسبة الية، شخص عايش ليل نهار بخيالي اتحلم بيك مو كل يوم لا كل ثانية.

ابتسم، سحب ايدي باسها:- ديار اني حاس و من زمان حاس من اول يوم التقيتج ابيت ابو امجد، بس كلت مراهقة عادية الشغلة ما اهتميت

باوعتله:- ليش

-طبيعي بنية بعمر ١٦ سنة تنعجب لو تباوع هالامور كلها تصير بمرحلة المراهقة مو شي تهتمله، بس الوكفني و الحيرني و ضرب عقلي هو منظرج من اتزوجتي و انت عروس و جاوبتيني الجواب (انت بيه) ما تعرفين شسويتي بيه، مو سهل بنية و بيوم زواجها و ابدلت عرسها و بوسط دموعها تعترفلك و انت مزوجها بأيدك ! خليتني اضرب اخماس بسداس معقوله اني ظلمتها؟! زين هي تحبني و اني زوجتها شصاير بيها هسه ؟! ليش سويت بيها هيج، من يومها كمت اشيل همج و افكر مو حب بس احساس بالمسؤلية، بعدها صرتي صديقة قريبة مني كلش لما جنه نحجي .. من مات سلمان و صرنا نحجي عقلي كام يفكر بيج بطريقة مختلفة، صرت اهتم لتفاصيلج، اخاف و ارجف لو صار بيج، مز تتأذين اتأذى بس ما ردت اكلج اني احبج و اكعد اواعدج بحب و هيج امور كلت اخلص اموري و افوت من الباب

بس صارت بعد ...

- و ضحى ؟

-ماكو شي بحياتي اسمه ضحى، تزوجت و خلفت وانتهت

-مو تريد بناتها

-بعد ما شمرتهن ؟ تدرين عافت نورة عمرها اشهر مشي ما تمشي و ع الممة ترضع، اني الصرت ام و اب الهن و هي راحت بحضن رجال غريب حتى شنو تقهرني، تولي ما توكف عليها و بناتي تحلم بيهن.

نتزوج و يعيشون بيناتنا اني وياج، هي صار عدها رجال و طفل بعد، انتهت .

باوعت هو يحجي و ابتعد عن البيت :- وين ماخذنا ؟

-والله ما ادري ؟ كمت اسوق و ما ادري بروحي
التفت و غمز :- يمكن هذا تأثير الحب

ضحكت:- جج لا عفية لا تحجي هيج

ضحك بصوت عالي و لف لمنطقتنا
احس گلبي كلش مرتاح و نفسيتي كلش ارتاحت
شريد بعد الاحبه صار الي.

وصلني للباب، لزم ايدي:- ديار اريد اوصيج بشي

-كول

-امج كلشي تنصحج بيه و توصيج بيه تكليلي

-ليش ؟

-اشوف نصيحتها تناسبج لو لا، لا تعتبريها شي بس

-حتى ما اصير امي

-لو رايدة تصيرين جان صرتي بس انت مو هيج لهذا من حقي اخاف عليج من نصايحها

-ماشي

-ديري بالج على نفسج

-اكو شي ما حاجيتلكياه

-شنو هو ؟

-بالليل اكولك بي

- ادري لعد المن حجيتي جان خليتيها لليل راح تخليني اتحرمص منا لما اعرف السالفة

-ههههه لا مو شي مهم نحجي بالليل و اكولك

-ان شاءالله، يلا

نزلت وصلت الباب ، انداريت هو يباوع، ابتسمتله و لوحت له بأيدي، ابتسم ،حرك السيارة و مشى.

فتت للبيت مرتاحة ، احس روحي مثل الفراشة الترفرف بجناحاتها على كد ما طايرة و امشي براحة

شفت گدامي اثار شلتها ابوس بيها و كمت افر بيها بالهوى و العب وياها، اجا اسامة :- هلو ديار

-هلو حبيبي

عفتهم و رحت للغرفة، بدلت و وكفت و اني خالة ايدية على صدري:- الحمدلله رب العالمين مو بس يحبني و ديكون روحه حتى نتزوج، ربي لو شكد ما احمدك و اشكرك ما اكفيك شكرا شكرا شكرا

فاتت امي:- تخبلت رسني البنية

-اريد انام

-نزلي تغدي

-اكلت بالجامعة

-و على شنو فرحانة

-ماكو شي

-ها

-عافتني و راحت، لزمت دفتر و كعدت اكتب مذكرة بكتاب ابو قفل جبته من زمان بس كلشي مكاتبة بيه، اول صفحة بيه جانت من صيب خالد

كعدت اكتب بيه كل حبي و لهفتي عليه من يوم الشفته و لحد اليوم شرحت رجفتي و دموعي و شبكة اصابيعنا ... كلشي كتبته .. لدرجة اخذ من ٦ اوراق و اني اشرح

احس اللي بداخلي لازم اعبر عنه على كد ما طايرة فما لكيت غير الورق احجيله و اشرحلة البگلبي

سمعت صوت صوت بالجو
جان بداية الشهر ١١ و الجو هسه بدا يبرد، بس هسه غيمت و كامت ترعد ،اخذت الموبايل و صعدت فوك بالسطح المطر جان خفيف كلش بس ريحة التراب طلعت تجنن و الجو غيم

رمشت على خالد، خابر :- ها يخبله

اخذت نفس عميق و تنهدت:- دتشوف المطر ؟

-اي اني بالسيارة و دا اشوف الجو تغير

-افتح جام و اتنفس

-مرتاحة يروحي ؟

-اني روحك

-انت لهسه ما تعرفين شتعنيلي ولح والله اكابر

-ما استاهل هالحب كله

-اششش ما اريد اسمع هذا الكلام نهائي

-رايده واحد يكرصني كلش خايفة يطلع الجاي امر بيه حلم

-الحلم للما ننجمع اني وياج ابيت واحد بالحلال وتصيرين مرتي

-ما احس راح يجي هذا اليوم ما اتوقع حلمي يتحقق

-لا تكولين هيج احلامج ذمة بركبتي احققهن الج

اسمع و اني احس طايرة و هو يسولف اغمض و ابقى استمع الها يحجي بهدوووء بصوت يريح البال

مغمضة ما اريد اصحى من اللي اني بيه ابد

همس :- اريد اسميج اسم محد يصيحج بي غيري ؟

-كول ؟

اخذ نفس:- دياري

ابتسمت و اني اتنفس همساته ، احس گلبي راح يطلع من مكانه على كد ما فرحانة

طلع واحد من اهله، اضطر يسد الموبايل
شغلت اغنية و حطيت الموبايل ع الشباك و كمت الف بالسطح و الهوى الهاب ماخذني

واردد ويا الأغنية
يسمعني حين يراقصني كلمات ليست كالكلمات
يأخذني من تحت جناحي يزرعني بأحدى الغيمات



ناسية روحي و اني اغني و افتر بالهوى

ميعاد:- يمة عزا العزاني تخبلت البنية، ولج ماجدة الرومي شبيج اليوم تركصين بالسطح

فزيت على صوت امي:- شني ماما وين ما اروح لاحكتني

-غير افتهم شبيج ؟

-ماكو شي

-تضمين عليه ؟

مشيت يمها و كعدت على دجة الباب، اخذت نفس:- خالد

-و شبي يمه خلدلد

-صارحني اليوم وكال اني احبج و جاي اكون نفسي حتى نتزوج

-يا صلاوات على محمد كلللللللللللللوش

-هاي شبيج يمه اسسسس بالسطح احنا الجيران منا

-ولج بتي راح تتزوج و تريديني ما اهلهل

-ما اتزوجت هسه بعده جاي يكون نفسه

-اي وبعد شكالج

- شيكول بعد اكثر من انو يعترفلي ؟

-شلون حجاها هيج من وحده

-لا راسلته ضحى و ضت و نزلت و هو نزل ورايه و اعترف

-و ضحى شرايدة منه يمه مو طلكها و اتزوجت و خلفت

-تريد تطلك من ذاك و ترجع لخالد فتريد تشوف اكو امل بخالد حتى تطلك

-ديار يمه الحب هذا المطيرة گلبچ بيه مأمنه نفسج بزواجه ؟

-انت تعرفينه خالد ما يحتاج احجي

-مو خالد الورا خالد

- شلون يعني

-مرته جانت حلوة و تخبل و امه شايفة ابنها كمر عليه و جزعتها لحد ما اطلكوا، انت شلون اني ما اريد اكسر فرحتج بس الواقع غير

-قصدج جسمي و التشوه مالي

-حطيها ابالج لا تتوقعين تعيشين ويا خالد مثل زواجج من سلمان وعيشتج وياه

هذاك جان مريض و العالم تستخطيج بيه
بس المريض هسه انت و هو الما بيه عيب

-بس خالد ما تفرق عنده هالشي

- بس امه راح تفرق

-انت جاي تخوفيني

-لا مو اخوفج اريد اخلي الحجي ابالج حتى تحطي ابال خالد يكون حذر و يحذر امه ما تدخل بعلاقتكم ابد، خالد عنودي و لو عاند على شغله ياخذها
فخلي يعاند عليج و اكسبي لجانبج

... كلامها خلاني اصفن و كالعادة من احلامي تنركعت بالكاع ... بهالجسم المشوه باي حق اخذ رجال الف وحدة تتمناه

بقيت لليل افكر، اذا فعلا امه وكفت بطريقنا
بس لا خالد ما راح يقبل الها اني اعرفه ما تكدر توكف بوجهه، بس راح اتحمل مقارناتهم بيني و بين خالد ؟

المشكلة جسمي هواي بيه اثار حتى لو اريد اطيب .. شداوي و شرمم .. جسمي عدم و لو ردت اتعالج يحتاجلي كومة ملايين

الجلسة الوحدة بالمليون و ما يتصلح من جلسة يحتاج جلسات ، و هاي جسمي كله شلون راح يتعالج

رحت اباوع بالمرايا
يربي الى متى ابقى اعيش ويا هاي الاثار

جاي اباوع، اتصل خالد

-الو

-هلا دياري شلونج

تنهدت :- زينة

-شو زينة و وياها حسرة شكو ؟

-خالد امي حجت وياي و لخبطتلي عقلي

-شكو

-اول شي اريد اسألك سؤال، جسمي و الحروق البيه انت ما شايفة بس كله يشبه اديه

-اي اعرف بهالشي
امخذ نفس و تنهد:- ديار لا تفكرين بهالأمور كلت الج احلامج كلهن احققهن و اول احلامج هي الاثار البجسمج

-شتسوي يعني

-اذا اضطريت و ما كفت فلوس شغلي ابيع سيارتي و اعالجج، اني كلت الج اريد اكون نفسي و حاسب حساب الكل اهلي و الناس الراح يضايقونج بالكلام و السخرية ، كبل لا اخذج راح اعالجج من كلشي مو لان هذا و ذاك اهتمله لا... بس ما رايد اشوف مشاعر الحرج كبالي لو تزوجنا

تنهد ... لهذا اريد اشتغل هواي حتى اكدر اسوي البالي

-خالد اني ما اتوقع راح اطيب

-انت ليش متشائمة ؟ ما احب هالطبع ديار، خليج متفائله .. و هسه كليلي شنو الموضوع الكلتي عليه الظهر

-ها
سولفتله الكاله ابوية

-و في حال رفضتي شراح يسوي ؟

-ما ادري

-على هذا الكلام راح تخليني اغير تفكيري و اطلع بيج للاردن نعيش

-و اخواني ؟

-شبيهم ؟

-ما اكدر اعوف اسامه

-هسه مو مشكله اسامه بس لا والله يمكن اخذج و نطلع للاردن اني و بناتي اصلا شغلي هناك بالتصوير خير بس غير على مود بناتي رجعت

-اتمنى خالد صدك اتمنى اذا طلعت و طلعت اسامة وياي اني بالجنة

-لعد كولي لا اشغل تفكيري ابيت و اثاث، افكر نأمن كم فلس و نروح هناك احسن النا

-بس منا لما تأمن شغلك و نفسك اني شكول لابوي ؟

-كليله بابا اني وياك بس لا تأذيني ولا تأذي احد من اخواني بس بشرط ... لما اكمل المرحلة الاولى .. ما اكدر اترك هسه و اتزوج خاصه و اني هسه مات رجلي ... يعني دبريها و قنعي ان انت موافقة بس تحتاجين وقت

-هاا اي ماشي

-وهسه روحي حبيبي نامي لان باجر ورانا دوام

-ماشي

-ديار

-ها

-كليلي احبك

ابتسمت:- يعني انت متعرف

-اني اعرف بس رايد اسمعها

-احبك مو حب عادي حب بنية تنام و تصحى على اسمك

-اااااالله هههههههه اموت عليج يلا روحي تصبحين على خير

-تلاكي الخير

قفلت الخط و انداريت نمت على ظهري
اول ليلة بحياتي انام و اني طايرة من الفرح ولا بودي يخلص هاليوم على كثر ما حبيته

... ثاني يوم كعدت على صوت الموبايل و هو يدك

فتحت نص عين، كوة اباوع، دست الرد بلا ما اركز
اجاني الصوت:- صباح الخير

-صباح النور، نشيط كاعد من الصبح

-هسه فتحت عيوني بعدني بفراشي كلت اكعدج وياي

-يعني الواحد شيريد من الله غير هيج صباح

-و شيريد غير بنية مثلج تتغزل بيه من الصبح اااخ

ضحكت و كمت من فراشي و اني احجي وياه، فاتت امي حتى تكعدني:- ها كاعدة

-اي كعدت

-استعجلي يلا و نزلي سوي الريوك على ما اسبح

-ماشي

خالد:- يلا روحي نص ساعة و اني بالباب

-ماشي

لبست ملابسي و صعدت لغرفة امي اريد احط مكياج بس ما اعرف، صحت امي تحطلي
خبصتها على الحمام لحد ما طلعت و هي تصيح
خلتلي و نزلت لبست الحجاب مالتي و طلعت نسيت اسوي الريوك الهم و اصلا ما اتذكر شي غير ان هو منتظرني

طلعت هو ماكو ، رمشت عليه طلع من البيت

تمشيت للبيت مالتهم و السما بعدها مغيمة و الساعة سته ونص هو وكف منتظرني

وصلت يمه :- صباح الخير

ضحك :- صباح النور

-ليش تضحك

-لان جايه كلش من وكت

-يا نسيت اسويلهم ريوك عزااا

رفع راسه و هو يضحك بصوت عالي

-صوتك راح تفضحنا

-يخبله انت يخبلة اصعدي يلا

صعدت وياه و مشينا نلم البنات صعدوا كلهم، هو تعمد سحب ايدي و شبكها بأيده ... و مشغل اغنية لفيروز (بكتب اسمك يا حبيبي)

وصلنا للجامعة مرت من كدامي دنيا و كالت:- اذا كلش هيج حابته و متلازمة وياه ما يحتاج تستشرفين براسنا و تصيحين عيب و عيب

-الولد اقاربي و انت ما الج دخل باللي بيناتنا

-والله عمي حظوظ هي بقت الج
باوعت على ايدي باستنكاف مشت و هي تهز ايدها
عفتها و مشيت

رحت للمحاضرة و اني كاعدة ورا وتفكيري مو يم الاستاذة كلش طاير بغير مكان .. بس متت من الكعدة بمكاني محاضرة ساعتين طلعت روحي اريد اطلع افتر

كملت المحاظرة و بدوا هم يتفقون على منو يصير ممثل الشعبة، لهسه اني ما اعرف اي احد منهم
بس اختاريت واحد اسمه ( ثامر ) وصوتت عليه
مبين خوش ولد

تعرفت على وحدة كاعدة يمي بالقاعة مثل حالتي هم انطوائية و مو اجتماعية فصارت تكعد يمي و نتناقش بالمحاضرة لو ناخذ ملاحظات من بعض و باليوم الواحد لو نحجيلنا سالوفتين لو ماكو

مرت فترة تقريبا اسبوعين ..
اني و خالد كلش تعلقنه ابعض، ليل مع نهار مخابرات
من لما نصحى لحد ما انام وحتى اثناء المحاضرات نتراسل مسجات جانت اكو خدمة (١٠٠ رسالة مجانية) نخلصها محادثات و حتى من انام مرات نعوف الخط.مفتوح و انام ...

تعلقت بيه مو شلون ما جان
ما احسبها ساعه من يومي اذا ما اخابرة لو يخابرني ويتواصل وياي.

بس العرفته بخالد شغلة .. عنده طنكورة اذا واحد حاول يحاسبة، مرات احب اسأل وين رايح وين جاي وين جنت ويا منو حجيت

يكلي هاي السالفة بطليها

امي تكلي :- ولج يمه لا اطيرينه من اديج الرجال يموت من المرة التلح ، حاسبي بس بطريقة ما يكرهه هو

-شلون يعني

-يعني اذا ردت تعرفين وين رايح لا تكليله وين رايح بصيغة محاسبة و سؤال،كليلة (راح اشتاقلك وين رايح و عايفني) واذا ردتي تسالينه وين جنت كليله (اني ميته بفراكك و انت ماكو وين رحت و عفتني )

هيج كون تحسسينه هو ابنج و خايفة عليه مو وحدة تتامر علية و خانكته ، الرجال مثل الطفل يحب الاهتمام و الحنية بس يكره الضغط عليه

جربت اتعامل مثلها، بس ما اتقن سوالفها وكلماتها بس يعني احاول احاجي بطريقة اهتمام و صح شفته يحبني اكثر و يجاوبني بكل ممنونية.

ابوية قابلته مرة وحدة و كلت اله:- بابا اني فكرت بكل اللي كلته الي صح الموضوع بصالحي و اني راح استفاد بس ما اكدر هسه الا اخلص كلية

بقى يحاول يقنعني بس اني جنت مصرة على موقفي شرط ان يبتعد من عدنا و ما يأذي امي

الحسيته هو صدك متغير عن الاول بس ما متغيرة حقارته، الرايد يزوجني اله عمره ٦٤ سنة بس عنده منصب و رايد يستفاد براسي ما عندي حل ثاني غير اقنعه لحد اطول فترة

بيوم جنت بالدوام وصلنا البنات ورجعنا اني و خالد، شفنا ام امجد طلعت مستعجلة وكف خالد و كال الها:- خير عمه شبيج شكو ؟

-مرت امجد اتخربطت عمت عيني ونقلوها للمستشفى

خالد:- اصعدي بسرعة خل نروح
التفت الي:- ديار انزلي و ابقي يم الجهال

ام امجد :- لا الجهال خليتهم يم بتول امنتهم بس استعجل ابني فدوة طار كلبي على هالمسكينة بساع بساع ماعت عمت عيني

اني عيوني دمعت و كلبي كام يرجف من سمعت هيج صاير بمها، حجيت :- اطلع خالد خل انشوف شبيها

حرك السيارة و مشى، خابرت امي كلت الها:- ارجعي للبيت بسرعة اني طالعة لمها تخربطت

كالت:- راجعة بس لا تنسين طمنيني عليها شبيها

-ان شاءالله

بقيت على نار لنا لحد ما اوصلها، خابرنا عليهم طلعوا متوجهين لمدينة الطب اخذنا خالد و ساق بينا ركن السيارة بالكراج و طلعنا مشي للمستسفى

خابرنا دلانا وين هو رحناله بسرعة، لكينا امجد كلش منقهر على مها و كاعد كبالها و لازم ايدها و ابو امجد فوك روسهم

خالد :- ها عمي، امجد شكالولكم عليها

-حولها ع المفراش

-ليش شبيها ؟

-ما ندري بس كلش تعبانه كاعد تسوء حالتها يوم عن يوم وصلت بيها اليوم رجلها ما تكدر تحركها

تقربت اني يمها و الدموع تجري، اباوع الامجد دموعه بعينه و هو يباوعها حجابها ملفوف على وجهه و خلصانه روحها فاقدة

لزمت ايدها و اني ابجي، فتحت عينها خفيف باوعتلي، حجت بألم بصوت انين :- هااا ديار راح اموووت

كمت ابجي حيل:- لا تكولين هيج ان شاءالله ما بيج شي بس كولي يا الله

-جهالي ديار جهالي
وكامت تبجي

امجد ما اتحمل طلع من الردهة بقوا يلومون عليها :- صيري سباعية و ازمة و تعدي و توكفين على حيلج لا تضعضعين روحج

اني لازمتها و ابجي و هم مستمرين يحجون وياها

اجا واحد كال:- لازم على باجر المفراس لأن ابو المفراس ما موجود عنده ظرف

امجد:- مرتي جاي تموت شنو على باجر لحمة الوالديك

-يعني سنسوي اخي خايفة على مرتك اطلع اخذلها التحاليل من برا

التفت النا امجد:- لعد عليمن باقين ناخذها للبيت ترتاح و العصر ناخذها للدكتور

مها حجت بوجع :- ما اكدر امجد ما بيه حيل

خالد :- جيبلها كرسي متحرك البنية ما تكدر تكوم على حيلها

امجد:- وين الكا هسه يمعود

-يا اخي من اي احد استأجره اشتريه ولا تباوع فلوس امج. شتحتاج جيبونا كدامك لا ادير بال

-كفو كنك يالطيب هسه خل ننقلها للبيت لما اشوف منين اجيب الكرسي

طلبنا كرسي متحرك من المستشفى و انطى للبنگالية فلوس حتها بالكرسي و مشت

وصلتنا للسيارة و ابو امجد نزل كبلنا يحضر السيارة كبال المستشفى

صعدناها بالسيارة و توجهنا للكراج ولحكناهم
خليناها بالبيت مددناها ع التخم ارتاحت

لميت البيت و نظفت
خالد خابر على صديقه امه مقعده و طلب من عنده الكرسي كاله :- عندي مريصة و احتاج الكرسي

الولد ما كال ، راح خالد جابه و اجا
امجد كالي ديار انت امشي وياي للدكتور امي مرة مريضة مو مال تمشي و تسندها ما تكدر

كلت اله :- اي بعيني اروح وياها طبعا

بدلت و صعدت وياه و اخذناها للدكتور سوينالها التحاليل المطلوبة كلها .. بس حيل غالي خطية اباوع محفظة امجد صفرت

بعدنا بالطريق،خابرتني امي رفعت الخط:- الووو ها يوم احنا جايين بالطريق ان شاءالله

-ديار اخوج الظهر من اجيتي ما شفتي

-لا ما شفته شنو ما رجع

-رجعت للبيت ب٢ وربع بس ما لكيته بالبيت مشيت لمدرسته مداومين الشفت الظهري و الحارس يكول الكل طلع

-ما يروح بعيد خاف ويا جماعته

ميعاد:- يا جماعة هو ما يعرف احد بالمنطقة كل وكته بالبيت على البلاي ستيشن

-قلقتيني امي وين راح هذا

-ما ادري اني هسه واكفة بالباب ولج يمه گلبي لاچمني على اخوج يكفك يخفك ما مرتاحة صدري قبط اختنكت

سمعتها بجت انجنيت، التفتت الامجد :- امجد استعجل فدوة

-خير شكو ؟

-اسامه ماكو

-وين يروح تلكونه بالمنطقة يفتر.

-ما ادري امجد كلش خفت امي جاي تبجي

-كولي يا الله يمعوده ماكو شي ان شاءالله

بقيت متوترة الطريق كله و عيوني مغورگة، وتمر ابالي هواي تخيلات مو حلوة انوب كمت ابجي بالزايد واني اتخيل بيه شي.

لحد ما وصلنا بيت امجد ساعدته و نزلت مها وياه، خليتها بالكرسي، و كالتله : اترخص ابو فطومه بس اروح اشوف اخوي وين

-روحي خوية ما قصرتي، اني هسه انوم مها و اجي ادوره وياكم

طلع رافد من بيت ابو امجد :- ها شلونها مها

-بعد التحاليل مو هسه تطلع، رافد روح ويا ديار اخوها اسامه مختفي

-هاي شنو، يلا يلا امشي

-اني رايحة كدامك ، عدلت مها بالكرسي و طلعت مشي بأستعجال لبيتنا، رافد حرك سيارته و مشى بيها تعداني

صف سيارته اباب البيت نزل و اني وصلت لكينا امي كاعده بالباب و اديها على راسه مدنكة و تبجي

رافد:- هاي شنو ام ديار كولي يا الله

-ما اجا يعني وين يروح ماما
كعدت يمها دموعي كامت تجري بقوة

وهي تكول :- ولج يمة گلبي محترك ابني بيه شي اني اعرف گلبي حاس

رافد:- كومي نبلغ عليه نشوف نسأل وينه كومي ام ديار ما يصير هيج بس كاعدة و تبجين

-دورت عليه رافد و سألت هواي ولفيت الدورة كلها شارع شارع ما لكيته و لو رحت بلغت ما يسوون شي الا تمر ٢٤ ساعة يلا شلون بيه يا يمة

صفت سيارة خالد، نزل :- ها خير شكو شبيها ام ديار

رافد :- اسامه ماكو جاي يدورون عليه ما موجود

خالد:- ديار ما خابرتي ابوج خاف هو ماخذه

التفتت امي:- ولج خاف صدك اسماعيل لو صدك هو ااااخ والله لأشرب من دمه

ديار :--ماعندي رقمه ! وين الكاه

خالد:- شنو القضية يعني هسه نكعد هيج نلطم و ننتظر امشي رافد نروح على بيت اخو اسماعيل نطلب رقمه و نخابره

رافد:- اخذ ديار و روح هي التسأل عمامها انت تروح شتگلهم عم وليد خال بنية و هم ناس كبايح ما يتواجهون

خالد :- كومي ديار، يلا يا عيني ليش هالبجي مفاولات الولد بالشر كولو يا الله

كمت ابجي و عفت امي و اثار كاعدات بالباب و رافد واكف و مشيت ويا خالد لبيت عمي عماد، دكيت الباب علية طلع الي

-هلا عمي شلونك

-شنهي تريدين تموتين و جايه علينه ولج ؟

-عمي ما جايه اعاتب جايه اطلب رقم ابوي عندك

-شرايده منه؟

-اخوي اسامه ما موجود اريد اخابره خاف هو ماخذه

-اسماعيل مو هنا صارله يومين بصلاح الدين

-رايده بس رقمه

طلع موبايله من جيبه و خابر على ابوي كاله :- ها اسماعيل خوي شلونك هاي بتك بالباب و جاي تسأل على اخوها تكول ماكو

اسماعيل:- اسامه شلون ماكو وينه ؟

انوب ابوي كام يغلط و يفشر بالموبايل و كال :- خل تبلغ امها البرب... اذا اجيت باجر و اسامه ماكو الا اشنقها من رجليها و اخليها فرجه كدام خلك الله

سد المكالمة عمي و كام يهدد بينا و يغلط عليه و يتهجم، سحبني خالد و حطني بالسيارة كمت ابجي بقوة:- خالد اخوي ماكو راح انجن وين راح اموت بدونه والله

وهو يهدي بيه بس احتقن كلشو داخ رجعني للبيت ، لكينا امجد و ابو امجد و ابو رافد و ام رافد كلهم ابيتنا و وولد من المنطقة واكفين

كلها ضجت ادور على اسامة وينه، كعدت ابجي من كل گلبي و الناس تهدي بامي الفقدت على اسامه ، شويه و تخربطت

شالها رافد و ام رافد و ركضوا بيها للسيارة اخذوها، اني ردت اروح بس الكل ابيتنا واثار ما اكدر اعوفها ، وكفت بالباب مثل الوحدة مضيعة اهلها ابجي بلا وعي اخوي من صفحة و امي من صفحة

مخلية ادية على وجهي و ابجي بقوة و خالد من صفحة يهدي و امجد يجر بيه حتى يكعدني

كمت اصيح :- اخويه يا ناس وينه لك اساااامه

نسوان المنطقة اجن و ووكفن بالباب و الدنيا انگلبت

اجا احمد يركض:- امجد الحك مها تخربطت
كام بسرعة ركض للبيت شالوها و طلعوا للمستشفى

كلها بقت واكفة وياي و تهدي بيه
وناس تدعي و تترجى الله يرجع الولد بسلامة

لل١١ ونص الكل طش
بقى بس خالد و بتول و ابو رافد، بتول رجعت لجهالها و ابو رافد تعب و مشى و هو يوصي بيه و يهدي بيه

دخلني جوا خالد، و هو يهدي بيه
كعدت ع التخم و هو كبالي:- مكافي ما تعبتي من ذيج الساعة تبجين كافي ارتاحي

-خالد اخوي ماكو تعرف شنو يعني اخوي ماكو

-يرجع ان شاءالله يرجع لو هلكتي نفسج ما راح تلكين ولا تغيرين من الوضع شي دياري بس ارتاحي فدوة اروحلج

مددني ع التخم و دز اثار تجيب غطا و كال، اهدي و نامي:- من الستة كاعدة تفرين يا جامعة يا مستشفى يا دكاترة ارتاحي و الصباح رباح

-شلون ارتاح و اخوي ماكو

جاب كرسي حطه كبالي و اني متجية و لامة رجلية و ابجي، اخذ ايدي و هو يمسح عليه، اني اباوع لأيده و ابجي

التفت لأثار واكفة يم راسي، كال الها :- باباتي جيبي فراش و فرشي هنا

برطمت و كالت:- اريد ديار سحبتها و خليتها بحضني كمت امسد لشعرها، وخالد كاعد كبالي

نامت بسرعة شالها من حضني و حطها على التخم اللاخ، اني كمت من مكاني شلت الغطا و خليته

انداريت هو كبالي، تقرب مني، مسح على شعري بأثنين اديه و لزم راسي:- ما اتحمل اشوف هالدموع والله، ادفع عمري كله ولا اشوف عيونج تبجي كافي ديار لخاطري كافي

سحبني لحضنه و خلاني على صدره ككت ابجي و اني اشكيله، اندكت الباب، ابتعدت منه و ركضت للباب ع السريع يلكي خبر من اخوي

طلعت ام رافد و رافد جايبين امي مشكليلها كانوله بأيدها ضغطها نازل ، نامت ع التخم بس حالها صاير تراب

العيون حمر دم و حيل ما بيها

التفتت عليه ام رافد:- اعتني بأمج خالة يلا ولدي باجر الصبح تبين

خالد:- يا ريت ما نخليهم وحدهم الام و بتها تعبانات

ام رافد :- قابل شتسويلهن تلوليلهن امشي يا ابني

خالد:- روحو انتم اني راح احط سيارتي بالباب و اظل بيها حتى اذا احتاجوا احد يمهم

رافد:- ابقى انت و اني الصبح اجيك تروح ترتاح و ابقى وياهم

ان شاءالله، طلعوا كلهم و رافد يوصي :- لو احتاجيتي شي خابري ديار لا تترددين

خابرت على امجد حتى اعرف اخبار مها، كال :- لهسه احنا بالمستشفى وبس امي وياها

المشكلة مها ما عدها خوات بس اخوة، و امها و ابوها ميتين، كلت اله :- خابر اخوتها اخوها ضياء مو قريب خل يجيب مرته تبقى وياها

امجد :- رحمة لربج هو ما فد يوم خطى عتبة بابنا نجي هسه نگله فدوة جيب مرتك اني اشوف وحدة من خواتي تجي تبات وياه

-خواته وحدة بديالى و اللخ بالاسكندرية و الثالثة بالسيديا بس عيالها حاكميناها حتى من تجي يوم واحد و تروح

كلت اله :- اذا كدرت باجر اجي ابقى يمها

امجد :- لا البيكم كافي امي هنا و الجهال عد بيت عمي هسه و الله كريم

غلقته منه و رحت لزمت ايد امي و حطيت راسي يم راسها و غفيت

الصبح لكيتها حاطتلي فراش و مغطيتني و هي ماكو

طلعت، واكفة بالباب و خالد بالسيارة مرجع الكشن وماد راسه ليوره و غافي

-ها ماما

-وين راح نلكا اخوج

-لا عد ابويه ولا عد احد وين راح

-تتوقعين يروح لكربلاء ؟

-لا شيوديه قبل راح لكربلاء على مودي هسه شكو

-ما ادري جاي افكر بكل الاماكن الممكن هو يروحلهن

اخذت موبايلها و دزت رسالة لسيد جعفر (مرحبا سيد كلش اعتذر ادز رسالة بهذا الوكت بس ابني مفقود و اريد اسأل اذا جاي لكربلاء بدون علمنا)

وقفلت الموبايل:- كومي روحي لجامعتج

-يا جامعه و اخوي مفقود

-اذا غبتي ما راح ترجعينه لا تضيعين محاضراتج امشي يلا عود اني بس احصل معلومة اخابرج

جبرتني اروح للجامعة اخذني خالد وصلنا اني و البنات حضرت محاضرة وحدة و رجعت ما كدرت اصلا بكلشي ما اركز و بس ابجي حتى الاستاذ كالي ( بنتي اطلبي اجازة و رجعي للبيت و الله يرجع اخوج بالسلامة)

طلعت رجعت للبيت لكيت ابوي واكف يتعارك ويا امي وحمايته بالبيت و الجيران متواجدين و بس رافد واكف

بس شافني سحبني من ايدي و كال الها، ذوله ولدي كلهم يرجعون الي و الله يا ميعاد لا ما خليتج تتندمين بكد شعر راسج فلا اطلع اسمي اسماعيل

جرني من ايدي وكفت هي تجر بيه و تتصايح وياه و رافد بيناتهم، نزلوا حماية ابوية رفعوا السلاح على رافد امي جرته و تصيح بأبوي:- جر جلابك اسماعيل انطيني بتي

اسماعيل:- ما الج بت يمي

اسحب روحي من ابوي و اتصايح وياه و كمت اتضارب ما احس الا بوكس على وجهي بس الالوان كمت اشوفها طفيت، سحبني من راسي و خلاني بالسيارة......يتبع

☆☆☆☆☆☆