ليتني استطيع فعلها الحلقة (23)

ليتني استطيع فعلها

 

الحلقة  (23)

الحياة مستمرة سواء ضحكت أم بكيت..
فلا تحمل نفسك هموما لن تستفيد منها... ابتسم!

........

اسحب روحي من ابوي و اتصايح وياه و كمت اتضارب، و هو يجر بيه، ما احس الا بوكس على وجهي بس الالوان كمت اشوفها طفيت، سحبني من راسي و خلاني بالسيارة

بقيت افرك بوجهي و اصيح :- ماكو غيرك ماخذ اخوي احجي اسامه وينه يلاااااا

اسماعيل:- ما بكتنه من قبل ****** هسه تريدن تمشن السالفة عليه لا ما اندمجن بس اصبرلي *******

-تنكر مو انت الهددت امي و كلت الها اندمج تندمها بأسامه كافي ملينا منك الله ياخذك و يخلصنا منك

دار وجهه و لطمنة بايده على وجهي:- والله لو حجيتي بعد الا اكصبج طايحة الحظ اني اعرف احسابي وياجن

بقيت بس ابجي، طلعت الموبايل من الجنطة خليته صامت حتى ما تنسمع صوت الاحرف من اكتب، كتبت مسج لخالد ( اني رجعت من الجامعة و لكيت ابوية هو و امي يتعاركون و هسه ماخذني البيته شسوي امي ظلت وحدها بس تبجي)

بقى عشر دقايق ممجاوبني يمكن بعده ما شايف الرسالة، بس اجت الرسالة وصل ابوية للبيت ضميت الموبايل بالجنطة و نزلت وياه

فات للبيت دك الموبايل مالته، التفت عليه:- فوتي جوا يلا

مشى على صفحة رد على الاتصال مشيت وصلت باب الصالة، حاط الموبايل على اذنه و عاقد حواجبة و يستمع، استقريت بمكاني اباوعله:- شبيه !!؟

حجه:- منو انت

سكت، ورجع كال :- الو الوو
نزل الموبايل من اذنه و علامات الغضب وضحت بملامحة، رجع اتصل بس الظاهر الخط جان مقفول
نكث ايده بنتر
وكام يضرب بالحايط، تقربت منه : اكو خبر عن اسامه

-اسامه عد واحد جان يشتغل وياي، هو صوته عرفته

انخضيت من كالي هيج يعني اسامه عد واحد ارهابي، صرخت :- و شيريد من اسامة ؟!

اسماعيل:- ما يريد منه شي يريد مني

-شيريد منك ؟

-هذا فد واحد كلاوجي تعاركت وياه كبل سنتين ال***** تاهمني بايگه خمس شدات

-و انت ماخذهن منه

انفعل:- لا شماخذ منه هالحافي هاذ، خلي يولي هالساقط ال*****

-يولي و اسامه هسه عنده يعني شراح يسوي بيه

-اكيد راح يطالبني بالخمس شدات

-بابا اخوي ما اله هلاقة بشغلك انت منين طلعتنا يا الله كمت من مكاني و اني افرك بوجهي، جنت بكربلاء مرتاحة و مستقرة شرجعني ربي شرجعني، راح اخوي يا الله

التفتتله :- وهسه شراح تسوي ؟

-لا تظلين تفرين فوك راسي استقري خليني افكر

-تفكر و اخوي بين اديهم انطيهم كلشي يردونه، انت مو عندك، انطيهم ورجع اخوي.

صرخ : كلتلج لا تفري فوووووك راسي اكعدددي

كعدت و اني كل جسمي يرجف، و اباوعله ولو بودي اكله بسنوني

اخذت جنطتي و طبيت بغرفة ما اعرف المن، بيها سرير و كنتور و مرايا بس

كعدت طلعت الموبايل، خالد دازلي ( خرب بيومج اذا صدك ) ( وين هسه انت ) ( غير ترد ) ( شطلعج مو كلتي ابقى بالجامعة طرطور اني ما خابرتي ما كلتي) (ردي بسرررعة)

دزيتله رساله (اوكف اسامه طلع بايكه واحد جان يشتغل ويا ابوي )

رد (اصدميني بعد اصدميني) ( منو هذا صديق ابوج بس لا ارهابي ) (انت وين هسه )

(ابيت ابوي )

(من انعل حتى ابوج، وين صاير كليلي)

(ما اندل خالد بس يبتعد ابوي اخابرك)

(راح تخليني على الشحن لحد ما يطلع هالكلب، لا تتأخرين)

ضميت الموبايل وبقيت ادعي الله ينجي اسامه من اديهم ويرجعه بسلامة : سوده عليه هسه شحاله و شحال گلبه من الخوف
ياربي فدوتك لا تعوفه وحده دخيلك

ردت اكوم لكيت حمالة صدر نسائية قريب من السرير، لعبت نفسي كمت من السرير بسرعة اباوعله و كاشة روحي : الله ياخذك ويخلصنا منك و من وساختك اللهم امين

طلعت يمه هو يخابر، وكفت واني مخصرة ادية و استمع له يحجي ويا واحد صديقة

نهى الأتصال ، حجيت :- ها

-اني احلها بسيطة ان شاءالله يرجع اسامه

-بهالبرود انت تعرف شصاير بحاله هسه ؟ تدري شمسوين بيه

-لا تظلين تلحين براسي اسكتي ولا ادوخيني
باوع : شجنتي تسوين جوا ؟

-خابرت امجد

-ليش شعندج ؟

-مها مريضة بالمستشفى

-خير شبيها ؟

-ما ندري سوينالها تحاليل البارحة و لهسة ما طلعت، رجليها ما تكدر تمشي عليها و اديها توجعها و امه يم جهاله فيريدني ابقى يمها بالمستشفى محد عدها

-مو خوش خبر والله، مهاوي احبها ما تستاهل
كام على حيله:- امشي اوديج عدها تبقين يمها منها اشوفها و اطلع بشغله مناك

-ياريت يله

طلع كدامي و اني وراه، جانت تكو مرايا يم باب الصالة باوعت بيها وجهي اثر ضربته صايرة بعضمة خشمي مبين زراك خفيف

طلعنا خلاني بسيارته و طلع :- وين راح تروح

-اسامهة يرجع اليوم بس لا تلحين اني اعرف احل الموضوع بمعرفتي، مها وين بيا مستشفى ؟

-مدينة الطب

مشى و بعد ما حجه، خابر واحد من حمايته اتفق وياه يلتقي وياه قريب من مدينة الطب

طلعت الموبايل وكتبت رسالة لامجد( امجد اني جايه ويا ابوي لمها نشوفها سوي روحك انت مخابرني و طالبني و من اوصل احجيلك السبب )

قفلت الموبايل حجه

-هاي دزيتي الرساله لامج ؟

-لا لامجد

-كون كلتيلها اسامه هيج

-ما كلت الها ما اريد اخوفها اكثر خليها مفكرة مفقود ولا تعرف ابنها عد واحد ارهابي.

-لو لازمة البيت و داريه عن ابنها ما ضاع ولا كدر احد ياخذه بس هي ملتهيه بالكو*****

-اسامه من المدرسة انباك هو ابد ما يطلع امي مشتريه اله بلاي استيشن وكل النهار لو يقرأ لو يلعب ما يطلع

-اسكتي اسكتي لا ادافعيلها

درت وجهي منه و راسي مضروب مدري افكر بأسامه لو بامي لو مهى خطية

وصلنا المستشفى وصعدنا الها، هي نايمة ما تدري عن الدنيا، جانت ام امجد موجوده سلم ابوي عليها، ردت السلام جاف ورجعت ليورا

تقدم ابوي باس راس مهى، فتحت عينها باوعته، ابتسمت بتعب و هو يكولها :-، والله ما تستاهلين ام گلب الطيب

بجت هي و تحجي كوة :- خالو حيل ما ظل بيه خالو

بقى يصبر على راسها، خله خمسين جوا راسها مصرف و اندار عليه حجه بصيغة امر :- تبقين وياها هنا خطوة ما تتحركين عنها و شتحتاج خابريني.

هزيت راسي ما جاوبته، طلع و هو يوصيني ما اكول لاحد على موضوع اسامه هو يحلها، سايرته ما بيدي حيله.

طلع منا، ام امجد شالت الجيزدان مالتها و كالت:- هم زين اجيتي يمه بيت هناك ظال والجهال على بتول عمت عيني، خل اروح للبيت و ابقي هنا

-روحي خاله اني ابقى يمها

مشت ، جانت هي فارشة بالكاع دوشك و مخده، سانده المخدة للميز الحديد و سرير مها على جيهتي اليمنى
كعدت بالكاع، ضميت رجل و ثنيت رجل و ايدي على خدي و ابجي على اسامه

فات امجد باوع :- ها ديار اجيتي

-اي

-لعد امي وين

-راحت للبيت

كعد ع السرير كبال مها، حط ايده عليها و تنهد، اباوع عليه و دموعي بعينه، شفت عيونه غوركت بالدمع و هو يباوعلها، كمت من مكاني، ندسته :- شبيك امجد ؟

هز راسه بمعنى ( ما بيه شي )

ديار:- الطبيب كالك شنو حالتها من شنو تشكي ؟.

هز راسه و هو يمسح بعيوني (اي)

كام كن مكانه و اشرلي حركة براسه، بمعنى ( تعاي اطلعي) ... طلعت وراه :- امجد خوفتني مها شبيها

-هسه جنت عند الدكتور جبتله التحاليل حتى يقراهن

-اي ؟

-ديار مها عدها سرطان بالدم

نشغت من كل كلبي و حطيت ايدي على حلكي

امجد:- اشششش ما اريدها تعرف هسه

ديار :- يعني ما الها علاج لو شلون

-ما ادري ديار ما ادري
نزل للكاع كعد على حيله حط ايده على عيونه و يبجي

دموعي كامت تنزل بحرارة، نزلت خليت ايدي على ركبة رجله:- امجد كول الها علاج فدوة
واشهك ويا البجي و الشهكة تطلع من كلبي

رفع عينه:- الدكتور يكول لازم نباشر بالقريب العاجل وننطيها جرعات الكيمياوي

خليت اديه على عيوني و كمت ابجي بقوة، دك على ايدي:- كومي ديار اكعدي يم راسها و ظلي يمها على ما اروح و ارجع لا تحسسينها بشي ابد ، الحالة النفسية نصف العلاج و اذا كلنالها راح تدمر نفسيتها و تسوء حالتها

-وهسه شلون

-نضم عنها و نشوف الاطباء و الله كريم اءا يحتاج اطلعها برا حتى اطلعها حتى لو اعرف ابيع سيارتي و الما عندي بس كون مها توكف على حيلها

-ان شاءالله يا ربي بحق النبي محمد يارب

-كومي يمها خل اروح

كام هو و اني رجعت كابلتها و يا دموع العين صبي ، هسه صدك يحلالي البجي منين ما افتر مصيبة كبالي

باوعت الموبايل كبالي لمض، جريته ، امي مخابره ٣ مرات و خالد داز رسالتين، خابرت خالد، بس رديت انهد بيه رزايل

:- يعني هاي سواية بربج هيج تسوين مو كتلج لا اطلعين وين انت هسه.......
وهو مندمج يحجي قطع لما سمعني اشهك :- ها يربج شصاير ؟ ليش هيج تبجين

كمت من مها:- شحجيلك خالد المصايب كامت تنزل ع الراس وحدة وره وحدة

-شكو احجيييي

-مها

-شبيها ؟

-سرطان بالدم

صرخ بلهفة:- لااااااااا منين دريتي

-اني يمها هسه

-شوداج ؟

-ابوي جابني الها

-لا يا ربي والله خطية ما تستاهل ام فطومه كلش قهرتيني، لا حول ولا قوة الا بالله

-خالد جاي اموت من القهر خالد اخوي عد واحد ارهابي مخلينا لعبة بيدهم يتساومون عليه، اجي هنا اتلكا هالمصيبة كلبي راح يوكف والله بعد ما بيه اتحمل.

-ابقي بمكانج هسه اني جايج، لا اتعبين روحج و ارتاحي، لو بجيتي و انقهرتي ما راح تغيرين من الواقع شي خليج قوية.

سد الموبايل مني، نص ساعة و اجا هو، محمل وياه دجاجة شوي وخبز و فواكه و صندوك مي ابطاله

حطهن بالكاع و اجا وكف على راس مها، باس راسها
باوعلي و هز راسه بقهر :- ما تستاعل كلش قهرتيني من كلتيلي

-اسس
اشرتله بمعنى ( ما تدري لا تسمعك )

مشى تقرب يمي :- انت شسالفتج شصار
سولفتله

-اي غير تخابريني حتى اجيبج شلون رجعتي وحدج

-بتكسي والله

-عفية انوب تكسي حتى مو نفرات ، لا اتعيديها النوب والله ابتلي بيج، طلعي من يمج الاكل و اكلي وجهج صاير كركم

-ما مشتهية والله

-ماكله ؟

-لا والله من البارحة لما جنت بالجامعة بعد ما حطيت الزاد بحلكي حتى المي ما اتذكر شربت بس ما الي نفس ابد

-دكلي اكلي عوفي هالسوالف على صفحة
شافني ما اكلت، جر الاكل و هو يسأل :- امج درت بسالفة اسامه

-لا ما درت

سوا لفة صغيره و خلاها بأيدي:- اكلي، سيد جعفر عدكم و الحجية وياه

-صدك !!

-اي والله، ما ادري منين سامعين اسامه مفقود و الحجية جايه طاير كلبها عليه شكد بجت

-سودة عليه ذوله الناس لو شما اسويلهم ما اجازيهم

-و امي منو يمها

-ابوي و رافد و بتول تروح و ترجع عليها، عفتها جاي تطبخ الكم

-خطية

-دكلي شبيج

-والله ما اشتهي

-اجبري نفسج اشو
جر اللفه و حطها بحلكي، اخذت لكمة و كمت الوك بيه كوة لساني مر كلش

اجت دكتورة تفر ع المرضى وكف خالد انطاها الطبلة كالتله :- هذه الحالة تبينت كانسر اعتقد، ما الها علاج انطيها بس مسكنات لما يجي دكتور هو يحدد شنو نكتبلها

فحصت المغذي مالتها و خلت ابرتين بيه

رجع امجد، لكه خالد موجود مد ايده و سلم:- هلا ابو سارة شلونك

بقى يسولف وياه ويطمن عليه، بقى ساعتين و راح، بقى بس امجد ما يصير يكعد هنا، ظال بين الرايح و بين الراد علينا شنحتاج

كعدتها جبرتها تاكل بسكت شوية، عدلت كعدتها و بقت تباوع على اللي بالردها ، اشكال الوان الحالات و كل مريض وياه مرافق و صايرة لمه و سالفة و ضحك

شوية ترفهت على سوالف النسوان، وكعدت احجي وياها و اطمنها انو ما بيج شي ولا تخافين، كلها شوية ادوية و اطيبين و ترجعين للبيت

ظليت وياها لثاني يوم و كلساع اخابر امي، اريد اشوف ما بين اسامه و تكلي لا

هو كالي اليوم يجي، مر يومين و اسامه ما مبين ولا عندي رقم ابوي و اخابره، و تكسرت بكعدتي هنا وياه مها احست خست بملابسي اريد ابدل

فخابرت ام امجد تجي تبات بمكاني ارجع للبيت انام ارتاح و اداوم باجر و ارجعلها من ورا الظهر

وصدك رجعت للبيت امي خلصانه روحها، دوام ما مداومه، اسمها كاعدة بالبيت تدعي (ربي دخيلك اذا اني غلطت بحياتي طلعها بيه لا اطلعها ابزري والله كلبي ما يتحمل ربي) وتبجي

بقيت شويه يمها اصبر عليها و ابجي وياها، بعدين عفتها ورحت نمت لان حيل تعبانة
ثاني يوم رحت ويا خالد للجامعة

نزلوا البنات، اجيت انزل لزم ايدي:- دياري

-ها

-خليج قوية و كافي تبجين، و اذا ردتي اطلعين خابريني و كلشي يصير وياج بلغيني لاتضمين عليه شي

-دهزيت راسي، مسح على خدي:- عيونج وهي مدمعة ادمرني ما اتحمل هيج

-اسامه مثل ابني اني ربيته مو امي خالد حيلي انهد عليه

-ان شاءالله يرجع والله يرجع بس صبري گلبچ

- خالد

-عيونه

-كملة شكر قليلة بحقك لو ما انت واكف ويايه بهاي الايام و تخفف عليه لا جان الله يعلم بحالي

-امشي لج شنو غريب اني، غير من اشوفج حزنانه احترك حرك والله

-الله يحفظك اليه

ابتسم:- يلا روحي ولا تنسين طمنيني عليج

-ان شاءالله

نزلت، مشيت للكلية، فتت للقاعة، فارغة ولا اي احد بيها، ما فكرت ولا اهتميت لاحد بقيت كاعدة بمكاني

فات دكتور، باوع القاعة فارغة بس اني حاضرة :- وين الطلاب البقية ؟

-والله ما اعرف استاذ شو محد جاي

-شنو اسمج ؟

-ديار اسماعيل طاهر

سجل اسمي و طلع

جانت عدنا بس محاضرتين بس بالمحاظرتين ولا واحد دخل للقاعة، انتبهت بعدين كلهم غايبين ما جايين

رجعت للبيت، سبحت و نمت شوية، ورجعت خابرت امجد حتى اروحله، كال :- مشكورة خوية اختي اجت يمها ان شاءالله من تروح انت تجين بمكانها

-ماشي ان شاءاللع، علاج الكيمياوي شوكت راح تاخذه ؟

-والله الدكتور حدد باجر اول جرعة كيمياوي راح ينطوها و الله كريم

-ان شاءالله

بقيت بالبيت ويا امي، ثاني يوم رحت للجامعة لكيت القسم كله طالعه روحه مني، اثاري متفقين الكل يغيب لان ما عدنا محاضرات هواي ولا امتحان فمقررين يطلعون سفرة و الكل طالع و مخابريني و دازيلي رسالة و اني ما ادري

بحضوري الكل مغيبينه، اني لا شايفة رساله ولا ادري عن اي شي ، كلها تلوم بيه، وكف ممثل الشعبة يرزل بيه

- شنو معناها حضرتج جايه و مغيبتنه كلنا خابرناج و ما رديتي دزينالج رساله و اجيتي كل احنا نتغيب بسببج ما استحيتي

-لا تحجي وياي هيج كلت الكم ما جنت ادري

-سوالف الخباثة هاي مو علينه معقدة نفسية على روحج مو علينا افتهمتي ولو هو الله شمخلي بيج

الشباب يجرون بيه ويحجون عليه شلون هيج عيرني، كاللهم :- دروحووو

طلع بس اني وكفت عندي رزالته كدام القسم كلش ضجت، طلعت هو واكف بين القاعتين،حجيت :- اسمع اذا انت ضايج لأن جنت تتونس و مغيبينك فأني مصايب الدنيا فوك راسي، اخوي مخطوف و بت عمتي بيها سرطان عفتها بالمستشفى وما ددريت عن شي

الساكت مو معناه معقد نفسي تلكاه انسان ثكلت بيه همومه و انلصم على حلكه و لو اعتزل الناس بس لان الناس ما ترحم مثلك تعير و تتمضحك و تتمهزء بيه فأبتعد عنهم

مو ذنبي محتركه ولا اني الحركت روحي حتى تعيرني
بس اكولك حسبي الله و نعم الوكيل
احجي وكوة تطلع الحجاية على كبر العبرة الصارت ابلعوني و دموعي التجري

ضجوا الطلاب يلومون بيه و الشباب كلش تأذوا من هيج حجيت وياه، وكفني واحد من ولد القسم اسمه وسام، عيونه صارن حمر من شافني ابجي و احجي، حط ايده على جتفي و كال :- اوكفي اوكفي اذا ما يرجعلج حقج فلا اني ابن ابوي و انت يا ثامر رايح للعميد و حسابك هناك يمه

ثامر :- اني ما جنت ادري هيح وضعها

-ما يحتاج تدري انت عيرتها بحالتها وهذا كافي ما يشرفنا تكون ممثل عنه و احمد ربك اذا ما فصلناك من الجامعه كلها على هالتصرف

ولد وكفو وياه و اكو بقوا يهدون بالوضعية و يعتذرون مني، كتب ورقة اني الطالب وسام حسن لا اتشرف بثامر محمد ان يكون ممثل عني في الشعبة

وفر الورقة على طلاب القسم اغلبهم كتبوا عليه

ثامر كام يتعارك وياه شلون هيج يسوي عليه و كام يتهمة ان هو لوكي و ابو بنات، تلازموا بنص القسم و الشباب ادافع، لزمت الشاب:- اخي اخي بس اسمحلي فدوة، لا اريد اشتكي عليه ولا اريد منه شي هو والله

رجع يغلط عليه، ويتصايح ويا شباب القسم
فات بنصنا الدكتور، رزلهم وكف واحد اسمه (حسام) حجاله كل الموضوع و و وسام كاله: دكتور نريد نشتكي على وسام وهاي وقعنا ورقة عليه اذا ما تفصلونه تنقلونه كن القاعة كلها ما نريده

اخذني واخذ ثامر و حسام و وسام و بنية اسمها تارة
كل احنه رحنا للعميد حجوله الموضوع و اني حجيت

كال :- انتي يعني تشتكين عليه

ما ردت اسوي عداوات بالكلية و اني بعدني يا دوب مداومة بيها فكلت اله :- لا استاذ يكفي يعتذر ما اريد شي ثاني

طلب من ثامر يعتذر :- اعتذرلي و طلع
طالبوا اني ما يكون الممثل عنهم لان تنمر على بنية من بنات قسمنا

و فعلا ازاحوا و اجمعوا الكل ان يكون الممثل هو وسام، هو شاب صاحب كاريزمة و حظور بالقاعة، شكله عادي بس مرتب بس يجبر الكدامه على احترامه
هو مو من بغداد من ديالى و جاي يدرس هنا

اجا عليه، وكف كبالي و كال :- شما تحتاجين احنه اخوتج هنا بالقاعة لو طلبتي اركابنه سداده

حجه اللاخ اسمه مهند :- والله العظيم من حجت وبجت احس بركان بداخلي فار اجيت اكطعه بسنوني

وسام:- غير اشتعل دمي بالقران لو ما الولد جان حطيته و كسرت ظهرة

حجت بنية :- تره هو لمصلحتنه صار عصبي لان حضرت و غيبتنه و ما يدري عن ظروفه

مهند :- ما سمعتي شلون رجع يغلط عليه و يسمينا لوكية

-اي حالة عصبية تصير شبيكم مشوها

فات ثامر ، ضرب وسام على جتفه :- كول انت ردت تصير ممثل وسويت كل هذا الفلم حتى الحبايب يباوعلك

وسام:- توكل منا لا تخليني ابتلي بيه

دفعه:- انت شنو تهدد

وسام شمر الموبايل و المحفظة و الكتب من ايده وراد يهد عليه، وكفوا الشباب بيناتهم و يهدونهم

بعدوهم من بعض و طلعوا ثامر برا، و احنا دخلنا جوة
حضرنا بس محاضرة وحدة و طلعنا

طلعت انتظرت خالد يجي، البنات وكفن يمي ينتظرن ماكو دقيقة و صف خالد كبالنا، صعدنا وياه :- بشر ماكو اخبار عن اسامة ؟

-ما راجع للبيت والله، طلعت للاستوديو و رجعت الكم

حجت بنية اسمها حنين من وراي:- ديار شنو هاي العركة الصارت بالقسم مالتكم، يكولون ثامر غالط على بنية مشوهه بالقسم

ديار:- غلط عليه لان حضرت

خالد:- غلط عليج ؟ منو هذا

-واحد ويانا بالشعبة

-وعلى اي اساس يغلط عليج انطيني اسمه باجر اني اعلمه شلون يغلط و اربي اذا اهله ما ربوه لهالمخنث

-لا ردوه شباب القسم ما قصروا

دنيا:- غير هذا الاسمه وسام حرك الدنيا عليه و تعاركوا ثامر و وسام على مودها لان ثامر يگله انت ابو بنات و مشتغل الها لوكي

ديار:- اي خطية وسام ما قصر اصلا راد يفصله من الجامعة بس اني ما اشتكيت

دنيا:- خلوه ممثل الشعبة مو

ديار :- تدرين عن كل السالفة بعد ليش تسألين ؟

دنيا:- مو انخبصت الكلية بيها فأجينه اني و صديقتي وشفنا و حجولنا الصار كبل لا نجي، وسام بدع بالدفاع عنج

خالد عقد حواجبه:- منو وسام ؟

-طالب بالقسم ويانه دافع عني

-ها
ما حجه بعد بقن بس البنات يحجن، بس هو غابت الضحكة عن ملامحة ظلت بس الحواجب معقوده و العيون مركزة بالطريق

وصل البنات كلهن، و وصلني للبيت:- شبيك حبيبي ؟

-ما بيه شي شبيه يعني ؟

-من سمعت السالفة و انت متضايق و متوتر

-لا ماكو

-ماكو احد يعرفك بكدي حتى تضم عني

-اتضايق احد يدافع عنج غيري، ما اعرف ما حبيته

ابتسمت:- عمري كله ما حلى رجال بعيوني غيرك

ابتسم:- ادري مو من حقي احاسبج انت طالبه و شي طبيعي يكون الج زملاء بس مو بيدي اغار

-اصلا يسموني معقدة نفسيا لان ما احجي ويا احد ولا اختلط مع احد ، كل وقتي بدراستي

سحب ايدي بين ادي كام يعصر بيها، و يباوع بعيوني :- احبج يبنية

-انت روحي

سحب ايده من اديه بسرعة، التفتت امي ورانا

سلمت عليه ونزلت للبيت

اجت امي وراي:- علاقتج ويا خالد شلونها ؟

-زينه

-والله ولد ابو رافد ورده ما عافونه ولا تركونه لحظة وحدة

- معروفين هم مو اليوم و البارحة مواقفهم ويانا هواية

-ابنهم رافد ما تركنا ولا لحظة غير المسواك ووافواكه اليحطها

-رافد عنده شي اباله

-مثله مثل البال خالد

-يعني شنو ناوية تتزوجيه ؟

-الحجي هسه مو وكته ما بيه حيل

-الشرطة ما بلغتج شي مو سجلتي ابلاغ

-والله يمه شرطتنا ادك هجع وحدها ما متأمله يلكونه

-ابوي مو كال اني الكاه

-شلون يلكاه ليش هو يدري عنه

فلت الساني، اداركته:- لا يعني قصدري راح يدور و يشوف معارفة غير هو صاير ضابط

-ضابطيش انت هم مدري اشلونج ، ضابط ع القنادر ما اخليه هم يسفطهن مكلوب اخليه ضابط شرطة بس غير هالبلد هذا سطت عليه الحرامية و صار هو و امثاله

-خل اخابر امجد اليوم الجرعة مال مها

-شكد عيب لا رحنالهم و لا خذت من خاطرهم

-يعرفون بالوضع

رد امجد :- هلو امجد شلونك

-هلو ديار الحمدلله

-بشر انطوها الجرعة

-لا والله بعد منتظرين الدكتور

-شنو القصة

-اي والله

-طمني عليها

-الله كريم

قفلته منه، حجيت:- والله خطية اتكسف وضعه هو و جهاله ضاعوا

ميعاد:- سمعت امه حجت، كالت اذا ما طابت مها اخذله بتول بت ابو رافد هم مرة ارمله خطية و هم اداريه و اداري جهاله بدال ما ظاله بدون زواج ابيت اهلها

-لا ان شاءالله اطيب مها و ترجع البيتها و الله من اتخيل كلبي يوكف من القهر عليها جهالها صغار

-حظها غير

... كمت عفتها ورحت انام، كعدت المغرب، سويت جبن و جاي لامي كلس كاطعة الزاد اريدها تاكل، كعدتها اسويلها واهس تاكل

حسينا اكو شخطة صارت بالباب قوية
فزت امي من مكانها و صاحت :- ابنييييييي
فزيت وراها ، هي تركض و اني اركض بملابس البيت، فتحنا الباب لكينا كونية مشمورة بنص الشارع

ركضت امي تصرخ بصوت عالي، كعدت يم الكونية و تريد تفتحها ما تكدر شاديها بحبل ، الايد متوتره و اني جسمي كله يرجف و اجر حيل بالحبل وصوت اصراخنا عالي

فتحنا الكونية و طلع بس مو اسامه وجهه ماينعرف على كد ما معذبينه، طلعت المنطقة على صوت امي
هو لا صوت ولا نفس ، و احنا نصرخ اثنينه و اثار واكفة تبجي بصوت عالي

شالوه شباب المنطقة و النسوان تجر بينا اني و امي و هي تصيح :- ابني مااات يممممممممه

شالوه للمستشفى وركضوا بيه، اجوا بيت ابو رافد يركضون المنطقة كلها طلعت ، حطو على راس امي عباية و صعدوها بالسيارة و لحكوا اسامه

اني كمت اصرخ بمكاني، نسوان المنطقة يهدون بيه، و الزلم واكفة تحجي و تطمني و ناس تدعي و ناس تتحسب و صار الفرع هوسة

دخلوني للبيت و اني كل ظني اخوي مات كمت الطم بالبيت و اصرخ، اجت بتول دخلتني جوا، و فتحت الاستقبال للنسوان

اني فقدت ابجي و اسمع خالد من برا يصيح على بتول، بقت اطمن بيه، كال الها خل تلبس و تجيب اثار و نروح للمستشفى لا تبقى هنا اني اخذها

من سمعت هيج طلقة مدري شلبست اخذت اثار و عفت بتول بالبيت، الطريق كله ابجي و هو لازم ايدي يهدي بيه و يبوس بيها و يكلي : حركتي كلبي ديار لا تبجين هيج لخاطري

اني فقدت كلش، وصلنا المستشفى لكيت ابوي و حمايته و عمامي واكفين

دخلنا للمستشفى، جان بيه نبض بس ناقلينه جوا بالعمليات الخاصة، الطحال متضرر من كثر التعذيب ولازمه عملية

وكفت يم امي هي اخذتني بين اديها و تبجي و تدعي و ابوي يتحلف لامي و يتوعدلها، بس جانت دموعه بعينه على اسامه

تعذروا منه و كالوا انتظر بره، كام يهدد و يغلط ع المستشفى تالي طلعونا كل احنا من المستشفى و بقينا ننتظر برا

طلعت امي و هي تتعارك ويا ابوية و تغلط :- هيج منك لابو الجابك عليه كوا** سرسري ... وكامت تغلط و تفشر عليه و هو يبادلها و الناس بيناتهم تهدي منا و منا

اخذت امي و بعدتها و كعدنا اني وياها نبجي، اخذت اثار بحضنها وهي تون و دعي الله يكوم اسامه بالسلامة

كامت حجت ويا الحارس بالباب كالته :- فدوة الطولك بعد عمري والله گلبي نار على ابني شتريد انطيك و النبي بس دخلني لابني

ظلت تتوسل بيها هو انقهر عليها ، دخلها بدون علم احد بس كالي تبقين برا ما الي خلك مشاكل

رضيت هي تدخل و اني كعدت برا، اجا خالد :- لعد امج وين راحت ؟

-فاتت جوا

-اي زين

اجا عمي عماد :- ها ولج ارتاحيتن انت و امج من ضيعتن الولد ، بالقران فلا نخليجن بعد تشمن ريحته بر*****

كمت على حيل:- ماكو غيركم ناقصين شرف و غيره و كواو***د هم ما كافي السويتو بينا، كل الصار من ورا اخوك و شغل البوك مالته ضيع اخوي و كامو يساومونه عليه

ارتاحيت بكربله ٣ اسنين لا اخوي اتاذى ولا صار ويانه شي هو رجع الحياتنا و هو خربطها علينه الله ياخذه ويخلصنه منه

كمت اصرخ و ابويه يغلط عليه ويدفع يريد يلزمني و خالد يسكت بيه و يدفعهم عني هو و الولد

سحبني خالد و حطاني بالسيارة و شغلها و تحرك، و ظل يصيح عليه:- شبيج انت جنيتي ، ما تعرفيهم ذوله شنو من مله مورطه روحج و تغلطين عليهم شنو سويتي انجاز غير يتوعدلج و يأذيج

-ما سمعته كله كن وراه و باقي يلوم بينه و هو ابو الراهي علينا

-انسان ساقط و منحط و حقير مو جديدة عليه اخوج طلع و بالسلامه و عايش الحمدلله بعد التريدينه شنو اذيه زايده كافي ديار لا تزيدين الموضوع عن حدة

-اني اللي زايدة الامور مو طلعت روحي منه لك والله دمرني و دمر اخوي شرايد اكله بعد خل ياخذ روحي ويخلصني من هالعيشة تعبت مليييييت

-اشششش كافي كافي اهدي

بقى لازم ايدي و يسوق و اني ابجي، وصلنا الباب سحبت ايدي و نزلت للبيت، هو فات ورايه

لزمني:-ديار مو قصدي ارزلج بس والله من خوفي عليج

-ادري خالد ادري بس تعبت اني والله بعد ما بيه حيل اتحمل اكثر اخوي ما ادري عنه و هاي اني رجعت بسببه

-ارتاحي شوية لليل هناك اخذج نطمن عليه بس خل يولي هالخنزير هذا الله ياخذه و يلعن اشكاله

بقيت ابجي، سحبني لحضنه:- لا عاد تبجيني هلكتيني بدموعج والله

بقى يمسح على راسي و اني ابجي
اجا الصوت من ورانه

ام رافد :- هاي شجاي يصير هنا خالد ؟......يتبع

☆☆☆☆☆☆