ليتني استطيع فعلها الحلقة (21)

بواسطة -


ليتني استطيع فعلها


 
الحلقة  (21)
لا تُـشبه إلا نَـفسها، كُـل يوم تـزداد جَمالاً و نُضجـاً 🖤
.......
اسماعيل:- شلونج بابا ديار
تصنمت بمكاني و اني اباوعه، قاط لابس و سيارة صاعد، و سيارة حماية وراه كاعدين:- معقولة هذا ابوي؟
كلشي بيه متغير نهائي
التفتت الخالد، نازل من السيارة وواگف، اشرتله يروح، حجة :- ديار انتظرج بسرعة لازم نروح نجيب البنات
اسماعيل :- انت ابن ابو رافد مو ؟
خالد:- نعم
-روح ابني اني اتكفل الموضوع
-لا ما اكدر بناتي اجيبهم وياها سوا، ديار
اسماعيل:- راح نبقى بالباب لو ندخل للبيت ؟
ديار:- انت شرايد من عدنا طالع بوجهنا بعد كل هاي السنين
-اني مو اسماعيل القديم، تغيرت....... قاطعته
-واضح
فتت للبيت، و هو اشر للحماية يوكفون بالباب، و خالد بقى بالسيارة
دخلت، هو دخل وراي ... للحظة خفت
استرجعت ذاكرتي لحظات الخوف لما جنت ابقى وياه بالبيت وحدي، التفتت عليه بتوتر :- احجي اللي تريده و روح منا
-اني ابوج ديار و مشتاقلكم
-بعمرك ما جنت ابوية لو نسيت شسويت بيه لو شسويت بأنهار هسه جاي تكول اني ابوج و مشتاق، احنا ما نشتاق و ابتعد من عدنا
-رايد اشوف اسامه و احجي ويا امج بموضوع
-من تتواجد امي تعال، و اسامه بالمدرسة ، هسه اطلع
لاحظ الرجفة بجسمي و الخوف البيه، حجة :- لا ترجفين ولا تخافين كلت الج اني مو اسماعيل القديم، دورت عليج هواي ما جنت اعرف وينج بس الأعرفه اخذتي المرعوص و طلعتي لكربله
-وهسه شرايد من عدنا
-رايد اعوضكم عن كل اللي فات، اني اليوم غير عن البارحه
-اتذكرك ارهابي، شصرت هسه ؟
-ضابط
تفاجئت من كالي ضابط، حجيت:- انت سادس ما مخلص شلون صرت ضابط
-دمج يا بنتي
-لا بنتك ولا اعرفك و ابتعد من الله عليك ما بيه حيل مشاكل، اريد اكمل دراستي بهدوء
-واني ما جاي اخرب حياتج اريد افتخر بيج و اكلهم بتي واصله و دارسة
-هذا حجيك هسه بعد ما جنت تكول البنية مكانها البيت اذا ما اندفنت
-كلت الج تغيرت، سويلي جاي راح اكعد انتظر امج ليما ترجع
عفته و رحت للمطبخ، لكيت رسالة من خالد:- ديار اني واكف برا وما جاي اكدر اروح طمنيني شنو الجاي يصير
دزيتله:- اطمن ماكو شي روح ارتاح هو منتظر امي
رجعلي:- لا ما اكدر اروح راح ابقى بالباب حتى لو صار شي ادخل بساع
ابتسمت ... يعني خايف عليه !
طلعت رقم امي، خابرتها:- الو
ميعاد:- ها ديار
-اگلج يوم هذا ابوي هنا
-عزا العزاني وين هنا لا تكليلي ابيتنا ؟
-اي كاعد جوا
-ما كالج شرايد ؟
-يكول اريد احجي ويا امج
-حاجا عزرائيل ان شاءالله ،مسافة الطريق و اني بالبيت، لا تغلطين عليه ولا تحجين وياه يروح يهيج عليج الثور ، انت وحدج بالبيت مو ؟
-خالد بالباب
-زين لعد جاية
- انتظرج بس استعجلي
بقيت كاعدة بالمطبخ، انتظرها، صاح هو :- وين الجاي الديار ؟
ديار:- ع النار
...اجا للمطبخ، باوع للطباخ فارغ، و اني كاعدة بالكاع مكرفصة، حجه :- خايفة مني ؟.
-ماما جايه بالطريق
-زوجج سلمان وينه
-مات
-همم الله يرحمه، شلون مات ؟
-هو مريض و مات
-لو مخليتني ازوجج الاعرفة، هسه هو منتسب و خير من الله.
-عوف الله و خليني بحالي، كلت الك امي راح تجي و احجي وياها
-اي كومي سويلي الجاي ع السريع يلا
كمت على حيلي طلعت القوري، و خليته ع النار انداريت وراي، واكف يباوع:- روح اني اجيبلك
تقرب مني
-بابا روح جاي اكلك
-مشتاقلج بابا ورايد اعوضج عن كل الايام الراحت
-ما اريد منك اي تعويض امشي مني
ادموعي كامت تنزل و جسمي يرجف
من شافني هيج، عافني و طلع كعدت بمكاني حطيت وجهي بين ادية و بجيت.
سويتله الجاي ووديته يمه، قرابة الثلث ساعة وصلت امي، فتحت الباب و فاتت هو يباوعلها ، البنطرون بصفحة الشعر، نظرات الاستغراب بعيونه
اسماعيل:- هاي انت ميعاد متغيرة حيل ما عرفتج
-طالعلي تالي وكت و كاعد بنص بيتي حتى تگلي متغيرة، فضني شرايد
-شغيرج هيج ؟ شسويتي ؟
-السويته ما وكفت حياتي عليك، طلعتك من حياتي و سحبت وراك السيفون.
-اني جاي حتى اتفاهم وياج، وضعي تغير و صرت ضابط
ضحكت ضحكة طويلة و طكتله اصبع:- هلهل و طك اصبع يا عراق الفخخوك صاروا يحكموك، والله عمي كرت عين هالبلد اذا انت صرت ضابط بيه
-ما جاي اتصادم وياج، اني راجع لهنا حتى ارجعكم و ارجع اعيشكم
-شو عايش دور الأوكسجين هواي، شايفنه ميتين حتى تعيشنا، روح شوفلك غير صرفه اسماعيل و ابتعد مني و من جهالي
-جهالج جهالي
ضحكتله ضحكة طويلة:- صاير تضحك هواي، اكووول توكل يبعد عيني لا تخليني اصيح هسه و الم لك المنطقة كلها هنا ساعتها يتبهذلن نجماتك خطيبية
-كاعد تستهزئين هواي، اني اكدر اسحب جهالي منج و بالقانون وكتها افلسج من كلشي، بس ما رايد اتصادم وياج، اريد نرجع على حب الله.
- هههههههههههههههه تعرف الله انت، تهي يا ربي كال حب الله، والله عمي كلمن كام و حجا الله و الله صعد فوك روسنا و تولانا هي ظلت الكم
اسمع شوف اكولك مو انت التهددني افتهمت، و نجماتك ذن المشتريهن من لنگة باب الشرجي نگعهن و اشربهن يومية ع الريك، ترى الاكبر منك زينت شاربه بالقندرة.
كام على حيله و لزمها من شعرها، و كاللها :-منو التزين شاربي ولج
جابته ضربه على خشمه، عاف شعرها ولزم وجهه بسرعة دفعته من عدها و كامت تصيح :- اطلع منا يلا
وظلت ادفع، بيه و هو راد يهجم عليه، فات خالد، لزمه و صار بيناتهم:- ام ديار اخذي ديار و اصعدي
اسماعيل:- ولج كح..... اني التصربيني و تغلطين علي لا ما اندمج و ابجيج دم فلا اطلع اسمي اسماعيل
و امي واكفة تصيح عليه، و خالد يصيح بيه:- صعدييييها
اجر بأمي ما تنجر ... الحماية مال ابوي كامو يهدون بيه و يسحبون، طلع و هم انسحبوا وراه و خالد طلع وراهم.
و امي بعدها تفشر و تغلط عليه و تصيح، حطيت ايدي على حلكها:- كافي كافي شسويتي انت شسويتي احسن هيج كام يتعودلنا
-خل يروح هالكو.... صايرلي ضابط مال قنادر و يجي بديتمرجل عليه ، لا ما احط رجلي بحلكه و اشكه لهالعار
كعدتها و هي تحجي و تردم، اخر شي كالت:- حرك دمي هالحيوان حتى ما يستاهل احرك دمي عليه، اكوم اسبح و ابرد نفسي
اخذت ملابس و نزلت، نزلت وراها، رافد و خالد برا واكفين يحجون، طلعت الهم :- هلا بالشباب ليش واكفين بالباب ما تفوتون
رافد:- شلونج ام ديار
-جنت مو زينة بس هسه لا صرت احسن
خالد:- ام ديار ما جان لازم تردينه هيج، ابعد عن الشر و غنيله
-خلي يولي كاعد يهدد شتريد اسويله اهزله جتف لو اطكله اصبع غير اطرده
رافد:- جنت جاي منا شفت خالد و اسماعيل يحجون وكفت سيارتي و نزلت، لا تخافين احنا موجودين ام ديار بحيل الله ما نخلي احد يقترب منكم
ميعاد:- من اروحن فدوة الطولك شيخ الشباب انت اكو احد بغيرتك، تفضلو ليش ع الباب خل نضيفكم
فات خالد و رافد جوا، التفت اليه خالد:- كون ضربج ؟
-لا بس امي اتصادمت وياه و ما حبيت كل الصار
خالد:- ما عولنا انكلع شرجعه
-صاير ضابط و متغير و يكول اريد ارجعكم
-هي ظلت لشكوله، ديار اخذي حذرج ما اتوقع راح يسكت بعد الصار
-شسوي مدا تشوف بعينك امي ولا ابالها هاي جاي تسولف ويا رافد
-الله كريم، هسه اني اروح انت ظلي هنا عود الظهر اجيب البنات ، صاح على رافد و كاله:- راااافد يلا اخوي
كام راد يطلع و خالد وياه، حجت امي:- خالد
التفت الها
-مشكور عيوني على وكفتك ويانا، ديار كالتلي انت نا عفتها و ظليت واكف بالباب
-ما سويت شي اكيد ما راح اروح و اني اعرف اسماعيل شنو، المهم هسه اديرون بالكم على نفسكم كلش زين.
-مشكورين
طلعوا ... هي فاتت للحمام و اني كعدت بمكاني
لازم اروح لأبوي و احجي وياه و اتفاهم احسن ما يروح يأذينا اني و اخواني لو يأذي امي
دنكت افرك بوجهي : بس لو اعرف شلون صار ضابط ما ادري
رحت لامي، دكيت الباب:- ماما اطلعي بسرعة لازم تروحين على اسامة و اثار تجيبيهم لا تورطين خالد بجيبوبتهم و يتأذى
فتحت الباب و الخاولي على راسها:- خايفة على خلدلد يمة ؟
فاتت مني:- الولد متفضل ماكو داعي نورطه
-هسه ارتاح شوية و اروح اجيبهم، كعدت:- جيبلي الكريم ال الرجلين مالتي فوك
-يمه ابوي مهددنا و روحي رايحة و انت حايرة برجليج
-يعني اذا كابلت وجهج و لطمت هاي انحلت، دصعدي اصعدي
صعدت جبتلها و اجيت كامت تدهن برجليها و ترطبهن، هزيت ايدي و درت وجهي منها.
لهناك بدلت و راحت جابتهم و اجت
بقيت عايشة بخوف و ترقب شنو الراح يسوي بابا
و الكاتلي اكثر من هذا برود امي كلش ما مهتمة.
مرت ٤ ايام طبيعي
نروح اني و خالد نودي البنات و نرجعهم و اغلب الاحيان يبقي سارة بنته يمنا حتى تقرا ويا اثار سوية و يكملون واجباتهم.
خوفه عليه و سؤاله الدائم و اتصالاته و اهتمامه، كل هذا خلاني اتعلق بيه اكثر و اكثر و احبه حيل بس ما اكدر انطق و اگله اريدها تطلع من عنده.
ما اعرف صدك يعتبرني صديقة و او يحبني و يخفي، ما اعرف شنو هو، ما معقوله كل اهتمامه هذا صداقة !
اجا علية مرة و جايب وياه بناته البقية نورة و مروة بالسيارة، نورة الصغيرة كلش و مدلله عنده حيل لأن من تركتها ضحى و تزوجت جانت صغيرة
و احنا ننتظر نورة كاعدة تلعب على گلبه لعبت باحواله لعب و ما ترضى الا بيه، مخلت موبايل مشمرته ملابسه جرجرتهم شعره تملخ بيه و هو يضحك و يبوس بيها
كاعده اباوعلهم و اضحك، درت وجهي مبتسمة شفت ابوي واكف بعيد هو و سيارته، انداريت لخالد و كلت اله:- نازله شوية وارجع
نزلت بسرعه و اني احجي قبل ليكمل سؤاله :- وين رايحه
سديت الباب و توجهت لابوية، شافني نزل من سيارته، وكفت كباله :- بابا الله يخليك والله ما الي خلك مشاكل، اني اعتذر عن اللي سوته امي بس فك من عدنا
-اصعدي وياي حتى نحجي
-لازم ارجع اختي
-ابن ابو رافد يرجعها
-البيت محد بيه وين يرجعها
-تصعدين نتفاهم لو تمشين عني ؟
التفتت الخالد جان نازل من السيارة:- اني رايحة اذا تكدر اخذ اثار لبيتكم و اني فد شوية اجي
خالد:- وين رايحة ديار ؟
اشرتله و اني اترجاه، صعدت ويا ابوي و مشيت، تحركت السيارة و مشى بيه، جان بيته بحي الجامعة، وكف السيارة و كال انزلي
-منو هنا ؟
-محد انزلي
رفعت راسي الرب العالمين:- يا سند من لا سند له ساعدني و احميني
نزلت وياه، دخلت البيت، جان فارغ، سألته:- انت ليش ما تزوجت ؟
-اتزوجت و طلكت
-حقها، اكدر افهم ليش جبتني لهنا
-اني اعرف انت افهم من امج و افهم اخوتج لهذا اريد احجي وياج
-شتحجي
- رايد اسامه
-بشنو رايد تورط اخوي ؟
-ديااااااار لا تخلين اعصابي تطلع عليج
-بابا عوفنا الله يخليك والله تعبنا و احنا نتختل منك اني شايفة الواحد لو يخاف يلبد بأبوه مو يلبد منه كافي
-كلت الج تغيرت
-انت مستمر تهدد وتطالب شتغيرت
-قنعي امج تسلمني اسامه احسن ما اخذه بنفسي
-ليش تريد اقنعها اذا انت كادر تاخذه، شيفيد التقنيع بالحالتين ماخذه
-اني هسه بوضع حساس ما اريد اتورط بقضايا و هالامور، اريد كلشي قانوني، بس اكو شغلة اذا انت سويتيها راح اعوف كلشي
-شنو هي
-بالاول اني اريد اسفرج برا
-ليش؟
-تتعالجين من كل الحروق البجسمج، و مو بس هيج، و بافضل المراكز بالعالم راح ادخلج حتى يخلوج اجمل انثى بالدنيا
صفنت:- وليش هيج تسوي
-بنت ابوج تعرفين افكاري، اسوي هالأمر لشغلة كلش مهمة
-و هي ؟
-عندي شخص صديق بالدوله اذا كدرت اتناسب وياه و ازوجج اله راح اكدر اصعد بالدوله و اخذ منصب مهم
-اني اريد ادرس ممفكرة بكل هالامور
-فكري ورجعيلي الجواب مراح تخسرين ابد، هم تعالجين نفسج و هم تعيشين ملكة عد واحد زنكيل
بقيت صافنه مجاوبته ابد، كلت اله:- اريد ارجع للبيت
-راح يوصلج السايق مالتي فكري بالموضوع زين.
رجعت بالسيارة، وصلني لراس الفرع وكفته و نزلت خابرت على خالد، رد بسرعة و حجة:- الو ديار مخبلة انت رحتي وياه ، انجنيتي ؟
-اني براس الفرع مالتنه خالد انت وين
-طالع الج
ظليت امشي بالفرع، شفته طلع من باب بيتهم، مشيت اله، حجه بنبرة عصبية :- صاحية انت ؟
-خالد ما عندي غير حل شأنتظر يأذينا و احنا ساكتين لازم اتفاهم وياه
-و هسه شتفاهمتي بالله
-يريد اسامه
-كال تفاهمت
-اثار وين
-جوا كاعد تقريهن بتول، ديار هاي سوالفج بطليها قيدتيني خليتني مربط كرهت روحي جايب بناتي وياي لا اكدر الحكج و لا اكدر ابقى بمكاني حركتيني حرك والله
-لا تخاف ما علية شي والله
-يا ما عليج شي انت
ابتسمت:- خايف عليه
-سؤال هذا ولج بعمري كلبي ما راجف هيح من رحتي ولهسه ارجف وافور والله خفت لا يسوي بيج شي و اني هنا كاعد مربط ما ادري عنج، فوتي جوا يلا
-لا راح اروح يم مها من تخلص اثار دراسة اجيها
-مو اطلعين وحدج ترا المرة الجاية والله اكسر رجليج جزاة الخوفة الوكلتينياها اليوم
ضحكت:- اذا طلعت راح اكلك
-ماشي
...رحت لبيت امجد بس محاسة على روحي و اني دتخلة، ردة فعل خالد و خوفه عليه نسوني كل الخوف و الرهبة الجنت احس بيها
فتت للمطبخ كبل سلمت على مها، جانت حاطة راسها ع الطبلة و غافية:- هلو مهاوي شلونج
رفعت راسها:- هلو ديوره شلونج
-شبيج ما الج خلك
-لا شوية دايخة من هوسة الجهال و ايدي هاي كل ما جال ما اكدر احركها اذتني حيل
باوعتها صاير بيها زراك:- ولج هاي مزركة ليش ساكته
-اليوم شفت الزراك و امجد بالدوام ما جاي
-صارلها شكد تأذيج
-من زمان بس جان وجع بسيط هسه ما عاد احركها
-واكعه، ملتوية، لو شنو ؟
-لا والله لا واكعه ولا ابد
-حظري روحج العصر اخذج و نروح، اعرف دكتور كلش زين مال اعصاب جنت اراجعه على سلمان
-وجهالي
-امجد من يرجع من الدوام يبقى يمهم، اني وياج ناخذ تكسي منا و نروح لا تسكتين ترا روحج هاي مو بلاش و هيج متحمل الوجع
-والله ما ادري يا ديار كلش متأذية
جبت زيت، دهنت ايدها و گمت امرغها،و هي تكول:- اي اي اخ يا يابة
ضليت ادلك بيها بالزيت :- كومي نامي كومي ارتاحي عود العصر اكعدج و تروحين
-و الجهال يمعودة حسن و حسين كاعدين صايرين نباشين الگبور ميكعدون هلكوني
- ميخالف عمة ام امجد موجودة و اني راح ابقى هنا لحد العصر اصعدي
-اي والله ارتاحلي شوية مشكورة ديورة حبيبتي
صعدت و اني بقيت انتظر الأكل لما يخلص، فات امجد :- هلو هلووو اليوم ديورة يمنا
-هلو امجد الله يساعدك
-يساعد بختج يابة، لعد مها وين ؟
- صعدت نامت، اكلك انت ممنتبه لأيدها توجعها خطية صايرة زركة
-صايرة زركة !! اني ادري بيها توجعها و كل نا اكلها على دكتور تكلي خليها باجر هي وينها هسة ؟
-فوك
صعد الها، فاتت اثار للبيت :- ديار جوعانه
-هسه راح اصب بس هل اخابر امي اكلها احنا هنا
-ما نلوح للبيت ؟
-لا اكعدي جوا
خابرت امي و خبرتها، بس ما كلت الها التقيت ابوي عود من ارجع اسولف الها
فات رافد للمطبخ:- هلا بديار شلونج
-هلو رافد
-لعد مرت عمي وين ؟
-جوا كاعد تقرأ قرأن
-شمسوين اكل
-مرگت دجاج احمر و تمن شعرية
-اييي صبيلي اذا تكدرين لان الاهل مسوين دولمة و اني ما احبها
-راح اصب للكل تريد ويانا لو تاكل وحدك ؟
-لا لعد خليها وياكم
رحت لام امجد اشوفها كملت قرأن، سألتها كالتلي:- صبي بتي اني جاية
رحت صبيت و سويت سفرة و دزيت اثار على مها و امجد ياكلون، نزلوا الكل التمو و كعدوا ع السفرة، فات خالد :- ايا خونه يا مجرمين كاعدين ملتمين هزا و اني مخليني هناك بس هوست الجهال فوك راسي
-هو اني شردت من الجهال و لحكتني
-لا يا جاهل يا ابنل....... خوش زلمة
ابو امجد ضحك و كاله:- تفضل وليدي الخير هواي
كعدنا، مها سألتني:- التوم وينهم ؟
ام امجد:- نيتهم بتي اكلي انت
بقوا يسألوها على ايدها و هي تشوفهم الزراك ، ظلوا يلومون عليها، كلت الهم اعرف طبيب و كلت الها اخذج العصر
امجد :- لا خاف ما تكدرين اني اخذها
-بكيفك اني كلت لأن راجع من الدوام تبقى هنا يم التوم تساعد بيهم عمة
-اي والله رحم الله والديج بس راح يظل بالي عليها ما اكدر
مها بقت اطمنه عليها و توصي ع التوم شلون يعتني بيهم
رافد فتح موضوع ويا ابو امجد و كاله:- الوالد باع سيارته خطية دريت عمي
ابو امجد :- اليوم ردت اسأل ليش باعها
-ابو عمار اللي براس الفرع مو عارض السوبر ماركت مالته للأيجار، يريد يأجره و يفتحها النا
ديار:- هذا البصف بيتنا ؟
رافد :- اي
ابو امجد:- والله زين يسوي احسن ما ظالين الولد بلا شغل
خالد:- بس عمي هو ابو عمار خسر بيه و راد يأجره، ابوي هم جازف
ابو امجد:- والله يا عمي هو على مودك شايل همك و هم بناتك يريد يزوجك حتى ترتاح.
خالد:- عمي ما ارضاها يبيع سيارته فاجئني بهالموضوع جان خلاني اني ابيع سيارتي
رافد:- ابوي خايف لا تبقى هيج اطك روحك و تسافر
خالد:- شسافر يابه و بناتي اشمرهن بالشارع !
رافد:- ضحى مو جاي اطالب ابناتها
-لو تموت ، رب الشمرتهن و تزوجت هسه جايه تريدهن، باحلامها، وبعدين اساسا اكو شركة اعلانات جاي اوقع عقد وياهم على شغل تصوير و الشركة كلش مشهورة وراتبها زين يعني ما احتاج المحل
رافد:- خالد الوالد و الوالدة خايفين منك لا اطك بعقلك و تسافر و تعوفهم يريدون يسوولك محل و يزوجونك حتى تستقر
ابو امجد:- يابة انت ليش ما تتزوج ؟ مو حتى الطلكتها اتزوجت و خلفت و انت باقي هيج
-عمي اني مو صغير و الزواج يحتاجله تفكير مو تخبط، بنت الناس اجيبها على اي اساس ؟ بس خدامة لبناتي لو تصبر و اني ما عندي شغل لو بعد هذا العمر احطها جنة ويا امي و تجزعها مثل الاول، يا مرة ترضى بهالوضع ؟ و حتى لو رضت اني ما ارضاها
اذا ما اكون نفسي من الألف للياء و امن بيت الي و لعائلتي ما اتزوج.

بقو يتناقشون و احنا مستمعين، خالد محاط فكرة الزواج براسه يريد يأمن نفسه، و ضحى تريد بناتها
السالفة شابكة
كملوا اكل لميت السفرة و البيت و نومت فطومة و صعدتها فوك، دكيت الباب، صاح امجد، فوت
دخلت هو متمدد على الجرباية يباوع تلفزيون و يغفي، و مها تحظر بروحها، حجيت:- فطومة نامت وين اخليها ؟
امحد:-جيبيها يمي
فتح بطانيته و خليتها بحظنه و التفتت لمها:- ها كملتي
-ديار رجلية كلش ما بيه امشي
-نأجر تكسي من الباب يذبنا اباب الدكتور دمشي لا تتعاجزين
مشيتها اني و نزلنا، كال احمد:- اني اوصلكم بسيارتي
صعدنا بسيارته، و خابرت امي تجي لاثار رجعت لبيت ام رافد تلعب ويا بنات خالد و جهال بتول
وصلنا ليم الدكتور، كال احمد:- اني راح الف هنا مو بعيد من تكملون رمشولي
كلناله :- ماشي
دخلنا للدكتور، شاف ايدها حولهاا فحوصات و اشعة، اخذتها امشيها گوة ساندتها ، بعدنا بنص الشارع و اتخربطت ووكعت تخبلت، كمت اصيح و الناس التمت، شالوها دخلوها لمحل نصحي بيها، صحت بس كوة تباوع كلش دايخة
خليتها ورحت اشتريلها عصير برتقال طبيعي حتى شوي تسترد قوتها بالفيتامينات، خابرت احمد كتله ارجعلنا مها تخربطت
ماكو دقايق و احمد يمنا، سندناها و خليناها بالسيارة كامت تبجي و تصيح :- رجعوني للبيت فدوة دخت
انجبرنا نرجعها للبيت، صعدناها بالغرفة، نامت بسرعة، بقيت قلقه عليها و امجد واكف حاير و ابو امجد يصيح من جوا، يابه شيلوها خل ناخذها للمستشفى
ما قبلت تكوم بس اخذت حسوني بحظنها و نامت
ترخصت منهم و كلت الهم:- باجر اجي اشوفها
طلعت امي صفت بالباب و نزلت:- ها شبيها مها
-كلش مريضة خطية
ميعاد:- سودة علية ما تستاهل ام فطومة اروح اشوفها
-نامت عوفيها باجر نرجع الها
-باجر لازم اداومين
-اووو شلون نسيت
-هنيالي والله عود طالبة مرحلة اولى يحظي، دصعدي اصعدي دشوف ، رادت تصعد، طلع خالد من بيتهم حجت امي:- هلا بأبو سارة المعدل هلا بأبو النخوة و الغيرة
ابتسم:- هلا ام ديار كولي
-طالبتك يابو الوليد
-امريني
-بتي ديار باجر اول يوم الها بالجامعة و اني بصراحة ما الكا احد امن عليها غيرك اريدك تلزمها خط
-اي اني بالخدمة، بس يعني خط .... قاطعته
-اي خط هم هي تشوفلك الكلية هناك فرة صبحية بالشهر بجيبك ٤٠٠ الف ما ضارباتك بعصا هم انت المستفاد وهم مأمنه على بنيتي ، شكلت يبعد روحي ؟
-والله خوش فكرة ما بيها شب، اني هم ظال بالي على ديار و ما امن خاصة لما اليوم راحت ويا ابوها
-منو هاي الراحت ويا ابوها ؟
- ما حجتلج
التفتتلي :- ولج شوكت شفتي لللمصخم ابوج
ديار:- اصعدي وبالبيت انسولف
-والله صايرة ادكين ادروب من وراي ولج ما تنكدرين
اندارت على خالد :- اترخص منك عيوني سلملي هواي على العود شيخ الشباب رفوده
ضحك و هو يكوللها :- ان شاءالله يوصل
صعدت ... حجيت :- ليش طلبتي من خالد ياخذني خط، مو متفقة ويا ابو سعدون
-اذا تبقى عليج يمه تفلسين يروح الرجال و نشرب وراه مي وانت مثل البومه بالبيت تتصفنين و تحجين ويا روحج و تتخايلي تلحلحي عليه شوية راح يطير الرجال
-كلت الج لا تدخلين بيني و بين هالد، و بعدين اثار منو ياخذها و يردها ؟
-مو صعبة يبنيتي، خط ب٢٠ الف ياخذ اختج ويرجعها ما واكفة الدنيا عليه، عوفيني من خالد احجيلي رحتي لابوج شتسوين
-يمه ابوي ما لازم نعاديه، ما بينا حيل مشاكل رحت اتفاهم وياه و اسوف شيريد
-وشراد هالمصخم
-راد اسامة ..
-قندرة بنص خلقته احسن
-لو
-لو شنو
-يريد يطلعني برا للخارج يعالجني و يرتبني حتى يزوجني لواحد صديق اله بالدولة
-منو هذا بالدولة
-اشوفج صرفلج الموضوع
-غير نسأل نستفسر خوما هيج
-لو رئيس الوزراء بنفسه ما اوافق ما اريد
-خلدلد يمه الحب شيعمل
-يمممه
-حقج يمه حقج خلدلد ماكو منه السوبر مان مالتج وين تلكين احسن منه
-ما تشوفين ان انت راح اطلعين الدورة كلها و جان المفروض نرجع للبيت ؟
-اي كلت نفتر شةية و نحجي
-اخواني بالبيت ارجعي
-رجعنا ، بس هذا اللي بالدولة ما عرفتي منو اليعرفه المصخم ابوج
- لا، شتريدين منه
-بلكت يعرفني عليه ازين شاربه و شارب ابوج واستفاد بروسهم بلكت يخليني بمكان احسن من هذا
-تحجين صدك انت
ضحكت ضحكة طويلة:- اتشاقى بنيتي
هزيت ايدي و ضحكت:- عاد بزيان الشارب انت اسطة
ضحكت بصوت عالي:- بس دليني على شواربهم و ما الج علاقة
ضحكت وياه، صفت بالباب و نزلنا للبيت نضحك، حضرت ملابسي لباجر امي كوتهن ويا ملابسها
رحت لفراشي من وكت الساعة ١٠ تمددت انام بس افكاري بخالد متخليني، اتذكر خوفه و لهفته عليه، كلامه ويا رافد و عمه
-ااااه يا خالد ما اعرف شوكت تحس بيه و تبادلني هالشعور، معقوله ما اعجبة لأن محروكة ، يعني معقوله يعني شكلي ما يعجبة ؟ لا خالد مو هيج بس ليش ساكت
اتذكرت منظره هو و بنته الصغيرة شلون تلعب وياه و يحبها .. ابتسمت
الا ليتني طفلك المدلل ذاك ..
الذي كلما نظرت اليه ارتسمت البسمة على شفتيك ..
تأخذه بين يديك ..
تحتظنه ..
تقبله ..
تداعبه ..
يشاكسك
فتقوم بأطلاق ضحكاتك العالية فرحا
لتطرب مسامعي عشقا ..
...الا ليتني
بقيت بأفكاري لحد ما نمت
ثاني يوم الصبح كعدتني امي، كمت غسلت وجهي و فرشت اسناني، و بدلت و لبست الحجاب و كعدت البس بالحذاء
فاتت امي:- خير بطوطه وين رايحه ؟
-غير للجامعة
-يا عبالي رايحة لسوك المخضر بهالشكل
-ليش
-ماما ترا انت طالة كلية مو مدرسة، يعني ما ترهم تروحين هيج ، شو انزعي هالحجاب، و تعاي اصعدي وياي
صعدتني لغرفتها، شفتها طلعت المكياج :- لا لا ما احب المكياج عوفي
-ماكو بنية متحط مكياج وين كاعدة انت، مدا اكلج كومي شوفي بدل ما بشرتج شاحبة جنج وحدة نفسه ذابتلها بطلين دم، خلي هذا كريم اساس هم يوحد لون بشرتج و هم لونه طبيعي مو جنه طحين بوجهج
كحل هذا حطي خط واحد لا اطوخين بس رسمي عينج، مسكاره خفيفة، خدود شوية يفتح وجهج بدل ما لاطم ، تاتو تعبين بيه فراغات حواجبج و حمرة خفيفة ترسم شفايفج، شفتي ؟
اباوع نفسي، مكياج كلش طبيعي بس غير وجهي
-اسمعي هاي الحمرة تحطيها بجنطتج كل ما حسيتي الحمرة بشفتج قلت وصارت بالاطراف خلي منها، مو تنسين و حلكج يصير مال وحدة ماكلة ازبري
عطر لا تنسينه وكلنكس ما يفارك جنطتج، حتى من تعركين بالكلنسة خفيف طبطبي على وجهج و تنشفين مو تمسحين و يصير وجهج جنه كيكة كريمة دايسين بيها
لفت الي الحجاب لفة خليجية حلوة و رتبتلياه، و حطت الجنطة بعكس ايدي:- ها باوعي هسه لو قبل شوية جنج ابله منيرة ؟
-لا صرت حلوة
-يلا بتي توكلي الله يوفقج ان شاءلله و يحميج من كل شر
نزلت لكيت خالد منظر بالسيارة جوا، صعدت و هو يكول:- صار ساعة اتصل عليج
باوع:- هلا يابه هاي شطالعة اكيد هاي اسوالف امج
ابتسمت:- جبرتني احط مكياج
-ما بين بس طالعة حلوة
-شكرا
-ظلي دوم هيج ديار عيشي مثل البنات لا تشيلين على اكتافج اهموم اكبر من عمرج و تكبرين نفسج عيشي حياتج
-شسوي خالد من فكيت عيني على هالدنيا و اني معلعله، الحمدلله على كل حال
-و النعم بالله
-البنات منو راح ياخذهن ؟
-حجيت ويا رائد اخوي بدال ما كاعد ياخذهن خط بسيارته و يشوفله من المنطقة هم
-اي احسن
وصلني للكلية و دخل وياي ابطاقتي:- باوعت كانوا عالم ثاني شنو البنات شنو الشباب كل واحد بيهم يصفن و البنات كأنهم عارضات ازياء وحدة تكول للخ اني احلى منج
شكد جنت معجبه بملابسي و اشوفها حلوة هسه صرت اتفشل منها على جمال لبسهن، باوعت الخالد اذا هو منبهر مثلي و يباوع عليهن، شفت الموضوع عادي عنده
يمشي اعتيادي
وصلني و ساعدني و كال:- يلا هسه محتاجة شي ؟
-لا سلامتك
-اجيج بالوحدة ان شاءالله و اي شي تحتاجين خابريني، ماشي ؟
-ماشي
اول يوم جانت المحاظرات تعريفية كل استاذ يدخل، يعرفنه عليه وعلى المادة اللي راح يقدمها النا و يتعرف علينه
اكثر قاعتنا جانت شباب، و البنات يحجون وياهم عادي، ما اعرف يعرفوهم من زمان اليوم اتعارفوا بس كانوا متعارفين هواي.
حسيت نفسي بوسط القاعة متجبجبة و عازلة نفسي و اني بالفعل هيج، مو اجتماعية و اعرف اجامل و اضحك، ما اكدر اخجل
جان اول يوم صعب نوعا ما لأن احسه عالم جديد علية بس بنفس الوكت حلو .. عالم تكبر و تطلع ع الحياة من خلاله
كملت خابرت خالد، كال:- اني برا اطلعي
طلعت و انصدمت ٣ بنات صاعدات ورا، و هو كاعد اشرلي، صعدت وياه، حجة :-شلون جان يومج
-زين
عرفني مستغربة الوراي، ففسر :- وصيت الحرس اذا اكو بنات من الدورة محتاجات خط، من اجيت هسه جايب ٥ كلت اله اني احتاج ب٣ صعدو وياي هالبنات
باوعتلهم، ابتسمت الهم:- هلا بيكم
ردن :- هلو بيج
حجت وحدة:- عفية نريد اغاني كون تولع الجو بالاغاني و يومي تنوع النا
هو بدون ما يرد عليها، حط سيدي و شغل اغنية :- لك عيني لك حباب
رجعت سألت:- انتم مخطوبين لو شنو د
-باوعلها بالمرايا، منو تقصدين ؟ احنا !
صبا:- اي انت و هاي البنية
خالد:- قريبتي
سكتن ما اعرف ليش ما ارتاحيتلهن، ينعمن بحجيهن اكثر من اللازم و اني ما احب هيج صنف من البنات
دلنه على بيوتهن وصلهن كلهن و رجع وصلني
رحت بدلت و نمت كبل
ما كعدتني غير امي العصر و هي تكلي :- شنو ميته لا دريتي عن البيت لا عن احد اخوانج ما موكلتهم ليش
-رجعت تعبانه و بعدين الثلاجة مليانة اكل و الصمون يمهم
ما حاجتني عافتني و طلعت، بدلت و اخذت اسامه و رحت لبيت ابو امجد كالو اخذها امجد وراح للطبيب
رجعت للبيت، اتصلت بأمجد بالليل كال :- ماكو شي ان شاءالله بسيطة الدكتور كال النا سوفان و انطانه علاج
-الحمدلله رب العالمين الله يكومها بالسلامة ان شاءالله
لثاني يوم رحت للجامعة عادي، و من ردنا نطلع، وكفت انتظر خالد اجو البنات ال٣ يمي:- عفية يبنية شنو اسمج
-ديار
-وين صار ابو الخط
-بالطريق ازدحام هسه يجي
-هو كرايبج ؟
-اي
-متزوج منفصل شنو وضعه
-ليش السؤال
-بنات بيناتنا و نسأل ما بيها شي
-منفصل و عنده ٣ بنات
حجت وياها الثانية :- شتريدين منه
دنيا:- ولج يجنن ما شفتي شلون حلو الشعر العيون الطول الثكل الشخصية غير ردت اموت عليه
ظلن يضحكن اني درت وجهي منهن، رجعت صاحت علية و جرت ايدي:- عفية ديار اليوم اكعدي يم البنات ورا و خليني اني اكعد يمه
-شنو معنى هالتصرف
حجت الثانية :- حبيبتي كولي انت حاطة عينج عليه و رايدته
-لا مو هيج بس عيب اللي دا تسوه
دنيا :- عيبنا علينا انت كعدي ورا و معليج اني اتحمل العيب ماشي ؟
ما رديت عليه، صف خالد بسيارته هي مشت گبلي و فتحت الباب المقدمة، حجه هو :- المكان للبنية الوراج
دنيا:- يعني و اذا اخذنا المكان بيها اشكال اني احب اكعد.بالصدر اختنك ورا
رديته:- عادي اني راح اكعد ورا
الصراحة كعدت الورا حبيتها اكثر لان شفت نظرات خالد ما فاركتني كل شوية يرفع عيونه و يباوعلي و يبتسم
وصلهن كلهن صعدت بالصدر يمه، حجه :- بعد انت اكعدي هنا لا تسمحين لوحدة تاخذ مكانج
-مو هي طلبت مني قبل لا نصعد
-الصبح هي طلبت رقمي بحجة تخابرني و اعرف غايتها، اني امصعدهن هنا امانة عندي مو حتى ارقمهن لو اعشمهن حتى استفاد، فأنت اكعدي بعد هنا
ديحجي شفت رسالة اجت و الأسم مكتوب ضحى:- ضحى دزت رسالة
-عوفيها
-ليش تراسلك هي
-زعلانه عد اهلها فجاي تحجي وياي حتى اذا بيه امل تعوف ذاك و ترجعلي
-اي و انت
-ناوي ارجعها
من كال هيج انقبض على گلبي،صعدت الحرارة بجسمي وصلت لراسي، كمت اتنفس قوي، ضحك :- اتشاقى وياج لا تصدكين
عيوني غوركن ما تحملت، كلت اله :- نزلني خالد
-شبيج يربج ليش بجيت
-اوكف جاي اكلك
-ديار
فتحت الباب، وكف هو بسرعة نزلت و هو نزل ع السريع:- اوكفي ديار
-خالد الله يخليك لا تسوي بيه هيج كافي تعبت
-من ايش تعبتي
-عوفني اروح
-تتوقعين اشوف ادموعج و اخليج، احجي شبيج ؟
-انت لو غشيم لو تغشم نفسك سنين صار و لهسه عيوني ما شرحتلك شبيه ؟
-اني بيهن ادري والله ادري
حجاها متحملت كعدت و انتجيت ع السيارة ابجي، كمبص كابلني، اخذ ادية و باسهن :- وحك عرش الله و سماواته احبج بس ما اريد الوثج انت انقى من ان اقيم علاقة وياج واني جاي اشتغل و ادور هنا و هناك و اتوسل الشغل حتى اوكف على رجلية و اخذج بشرف
بقيت صافنه بوجهه و الدموع تجري من عيوني:- وليش متكول ؟
-ردت اخليها صداقة لحد ما استاهلج صدك و اخذج، البنية الأهلها بنص الحرام و ما ادنت للحرام مستحيل الوثها بحرام، والله رايدج بس جاي اكابر
جنه كاعدين بنص الشارع المقابيل الفرع مالتنه و منتجية ع السيارة و هو كبالي، بعدني ما مستوعبه كل كلامه، صفت سيارة كبالنا
كمزنا اثنينا و گمنا .........يتبع


☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم