ليتني استطيع فعلها الحلقة (18)

ليتني استطيع فعلها

 

الحلقة  (18)

ثم قالت (قلبي يزدحم بالالام، انقذني يا الله ) 🤎

...........

-البقية بحياتكم المريض انتقل الى رحمة الله

صرخت :- لاااااااااا سلماااااان
كمت اصرخ بكل صوتي بدون وهي، و اسامه يصرخ يمي و يبجي

خالد:- انا لله و انا اليه راجعون

التمو عليه نسوان بالمستشفى و اني اصرخ و اسامه يضرب براسه بالحايط و يبجي عليه حيل، و خالد كمبص وحط ايده على وجهه ... بجى ..

كعدت بالكاع اضرب على رجليه و اصيح :- يخاف يموت هو يخاااف كلما يتوجع ما يقبل اخذه للمستفى خاف يموت

واحجي و ابجي كل قوتي، و نسوان وياي تصبر بيه:- صيري قوية كولي يا الله هذا مصيرنا كلنا هو السابق و نحن اللاحقون

خالد مسح دموعه و تقرب :- ديار شدي حيلج و صيري قوية، اني رايح اكضي الاجرائات مالته

دك على جتف اسامه و كاله :- خليك يم اختك اني راجع

بقيت بمكاني ابجي ، كابلتني مرية مبينه جنوبية
كعدت و حطت شيلتها على وجهه و صارت تنعي بس نعاويها و صوتها يبجي الحجر، حتى الزلم الجانو واكفين حطو اديهم على وجوهم و بجوا



بقيت بمكابلتها و ابجي من كل گلبي
صح ما جان الي زوج بس جان الي سند
بعمري ما شفت الراحة الشفتها ويا سلمان
كمت انام و ما على گلبي هم ..
انام و ما اخاف ابوي يجي لو يأذيني
انام و اني مأمنه اكو احد يشيل عني و يساعدني
نتعارك هواي و ما نحترم بعض بس جان يتخبل لو زعلت، و اني ما اتحمل اشوفه ضايج.

جنت اتعارك وياه من اشوفه يدوس على رجله و تأذي و يشتغل، اكله عوف الشغل لا تروح .. ما يسمع مني اللحظة و الثانية الكاه طالع ما يرجع الا العصر يخلي الفلوس بأيدي وينام.

لا فد يوم كال وين فلوسي، اشتري اليه و لأخوي ابد ما حاسبني جان يفرح من يشوفني اشتري و البس و يكعد يسوي سوالف المنية و هو يكلي هاي بفلوسي و يعيرني
بس ما جان يعيرني بحقارة، جانت سوالفه طيبة.

جنت مستعده اتحمله كل عمري و هو مريض لا فد يوم شكيت منه و لا كلت تعبت .. بس ابد ما تمنيته يموت، جنت اتمنى يطيب و يرجع النا

حتى اسامه شكد جان يتناكر وياه بس حيل جان يحبه، يضمله لفة الكص بجيبة بعلاكة و يجيبها اله مخصوص لان يعرف اسامه يحب الكص و من يكعد ياكل، يبقى يعيره و يطلعها من خشمه و يبقون يتناكرون

شكد شفت اسامه يبجي، بس مثل اليوم ما شفت، وكف كبالي و يصرخ بلا وعي :- مات سلمان ديار مااات لا لا لا شوفيهم شوفيهم خاااااف يجذبون

رجع خالد، حضن اسامه و يهدي بيه، و اهل المستسفى اعتذروا من عدنا لان بالمستشفى مرضى نايمين، ولان صارت لمة نسوان و نعاوي ما قبلوا .. كومونا

كمت من مكاني و اني ابجي و احس انبح صوتي
اني جزت مخابره على سيد جعفر كلت اله سلمان بالمستشفى، ويا ما جاي نطلع، فات سيد جعفر و سيد حيدر

شافوني كوه امشي ، وكفني سيد جعفر :- هاااا

صحت مات سلماااان

صاح :- لاااااااا

بقى خالد يحجي وياه، و مشوا جوا،كعدني برا جابلي مي و كمبص كبالي:- ما راح امنعج تبجين، ابجي و طلعي كل الحزن البداخلج و ارتاحي، بس اريدج تصيرين قوية وراج طريق طويل ، وهسه اخذي هذا المي اشربي انبح صوتج

-خالد ما راح اكدر بدونه مات سلمان راح

-الله يرحمه لا تحجين هيج، اترحميله و خلي روحه تطلع بأمان المسكين جان رغم عقله يشيل همكم فلا تزيدين همه خلي يرتاح ، خلص من هالدنيا الكضاها بس تعب و الم شحصل

اسامه:- ديار هسه هو خايف مو جان يخاف يموت
بجى

خالد:- هاي انت الاكول عليك رجال تبجي، حبيبي راح يم الارحم مني و منك بالعكس ما خايف هسه تلكاه ارتاح، شد حيلك بطل

رفعت عيني:- مو لازم نخبر اهله

-خابرت على امجد و كلت اله يبلغ اهله عمام، اليوم الدفن خاف يريدون يحظرون .

طلع سيد حيدر يحجي ويا خالد على موضوع استلام الجثة، و خالد كاله:- ساعة و يسلمونه الجثه

سيد حيدر :- راح اخابر الدفان يحظرله كبر بصف والدي بكاعنا حتى ندفنه بيها

خالد:- اتصرف بعد انت اعرف بهالامور

طلع سيد جعفر، وكفو يحجون، خابرتني امي، رديت عليها كوة و اني ابجي، صاحت :- هاااا ولج مات

ما جاوبت بس ارتفع صوتي بالبجي

كامت تهدي بيه و تترحمله و هي تبجي، وكالت:- بس انطيني اسم المستشفى اني وصلت كربلاء

انطيتها، حوالي ربع ساعة و اجت اخذتني بحضنها تبجي و اني ابجي، و اثار يمي حاضنه رجلية و تبجي
مدت ايدها لأسامه و هو يبجي و اخذته بحضنها و كامت تهدي بينا

اجا خالد سلم على امي، مسحت دموعها و كالتله :- هلا خالد شجابك هنا شلون اجيت

خالد:- خابرتني خطية تبجي ما شفت كبالي غير طريق كربلاء و اني جاي، حتى ما شايل وياي غير محفظتي بس

ميعاد:- الله ينطيك عيوني من يوم يومك غيور و صاحب نخوة

خالد:- لا ديار مثل اختي ما يحتاج احد يشكرني عليها

اجا سيد جعفر، سلم على امي و كال :- احنا راح نطلع بالجنازة لمرقد الامام الحسين ندور بيه و نروح للامام العباس، ومنها ناخذه لمگبرتنا، ارجعوا انتم اني بلغت الاهل هم بانتظاركم

حجيت وياه:- سيد بس اشوفه

جعفر:- والله جان بعيني بس مستعجلين لما ندور بيه الامامين لما نغسله و ندفنه صاير الليل و ما يصير نسوان تحضر الدفن، اتوكلي بالله بنيتي وروحي للبيت

راح خالد و سيد جعفر و سيد حيدر يكملون الجنازة حتى يستلموها ..

ما قبلت امشي ردت بس اشوف جنازته، ماما ما قبلت،

ميعاد:- شتشوفين يا بنتي هو راح و الله يرحمه لا تفجعين كلبج بمنظر جنازته هيج مناظر ما اروح من بال الواحد، كومي امشي

جبرتني اروح، حطتنا بالسيارة و رحنا لبيتنا، تجت الحجية و جناينها و المنطقة كلها انكلبت علينا

خالد راح ويا الجنازة يشيعها للدفن ..
من وصلوا مرقد الامام الحسين هواي يعرفون سلمان شالو النعش و شيعوه بمرقد الامام الحسين و العباس

رغم وحيد هو بهاي الدنيا بس سبحان الله شلون زرع محبته بكلوب هاي الناس، هواي حيل هواي اجوا لتشييعه.

اجو بيت ابو امجد، مها وياهم هي و جهالها فطوم و التوم الجديد حسن و حسين ..
مرت ابو سلمان و اخته ما اجن بس خابرن على رقمي ما مجاوبتهن الموبايل ما جان يمي وحتى لو جان يمي ما اجاوبهن و حيل حقدت عليهن من دزن عذر بيد بيت ابو امجد

شكد ما يكون الانسان جاحد و ما يوصل صلة رحمه بس الموت مو شي هين حتى بموته ما حضرن، حرامات كل حبه الهن و هن ما يستاهلن .
حتى عمه ما حضر ابد، مو اقارب الغربة احسن منهم.

بالليل اجو من الدفنه، خالد جان وياهم، سمعته اجا بس ما طلعتله، بقى كاعد ويا الولد بالأستقبال

كالولي لازم تلزمين عدة ..
بس كل التجي تكلي بسوالف ما سامعتها
وحدة تكلي لا تباوعين بالبريج لان ذكر
اللخ تكلي اذا ملابسج الداخليه مو سود تبطل العدة

وهاي التكول ما يصير تحفين لو تنتفين شعر وجهج او جسمج تبطل العدة و لازم تتبوشين وما احد يشوفج بس اخوج

وكل وحده تحجي شكل كلت اخلص العزا و اروح اسأل عن الموضوع شنو اذا ابقى عليهن عوزهن بس ينطني حبل و يكوللي خنكي روحج و موتي وراه .

الفاتحه جانت عزاء الزلم بالحسينية و النسوان بالبيت، و بس العصر يجون .. يقرون الفاتحه و يمشون.

خلصت و فضت الناس، و بيت ابو امجد الله ينطيهم مقصروا وكفاتهم وياي ما تنسي، خلا بأيدي عمو ٥٠ و امجد ٢٥ الف.

وباسو راسي و توكلوا، خالد اجا حط بأيدي ٥٠ الف و كال:- امانة الله ورسوله شتحتاجين لا تستحين الطريق ما يلزمنا عنج ترا

-ما اعرف شلون ارد جمايلك ، وكفاتك وياي ما تتجازه بيوم موت سلمان بقيت صافنه من اجيت ما توقعت تجي بهالسرعة

-غير طك راسي من خابرتي و انت تبجين ما حسيت الا و اني بكربله، صيري قوية و شتحتاجين اني خادم

ميعاد:- خادم ربك ان شاءالله وكفاتك من صدك ما تنسي تعبناك هوايه خاص بالدفن

-لا تكولين هيج ام ديار تره سلمان ابن المحله مو غريب

ميعاد:- طيب و معدل و ابن اجاويد فدوة الطولك الله ينطيك و يزيد من امثالك

-هلا بيكم اني اترخص ارجع لبغداد، شتحتاجون رقمي يمكم

-ما تقصر

سلم و طلع ، الكل طش، سدينا الباب و دخلنا.

وحشة الميت ما تبين الا لما الكل يروح و يخلى البيت، تبقى تتخيل وكفاته بكل مكان، صوت ضحكته، عصبيته وصدى كلماته و كل ذكرياته.

تصيبك غصة تذبح و تسأل نفسك (معقوله بعد ما اشوفه؟ هاي هي يعني راح بعد ما يرجع ، انتهى كلشي وياه و صار ماضي! ما اضحك وياه ولا اسولف، ما اهتم ولا اداري
شلون راح تمشي الايام بدونه ؟

كعدت بالاستقبال بمكان سريره حطيت اديه على راسي وكعدت ابجي بصوت عالي من كل گلبي

امي كابلتني و تبجي و اثار بحظنها، اسامه كاعد بالزاوية يبجي وياي، اندكت الباب

كامت امي فتحت الباب، طلع سيد جعفر و الحجية وياه، كمت فتت للغرفة بساع، اجت الحجية وراي، و السيد فات للاستقبال ويا اسامه

لبست حجابي و فاتت الحجية :- ها دويره يمه شلونج يحبّيبتي

-شلوني خاله شتتوقعين لوني

-الله يرحمه و يجعل مئواه الجنة يمه، ارتاح خطية تعذب هواي شله بهالدنيا هاي العلعلت كلبه المسكين، و انت صيري قوية اريدج سباعية تتذكرين الحجي من جان يكلج صيري سباعية بنيتي، هسه اريدج صدك اطلعين سباعيتج و تقرين و تنجحين

-خاله ما ظل الي واهس اقرأ تعبت نفسيتي

-لا ما اقبل بهالحجي، اني يمج و و ولدي اخوتج شتحتاجين و شتامرين كولي ، اريدج تنجحين و تفتخرين بنفسج الحزن لو يفيد يا بنيتي جان كلنا حزنه .. ولو يرجع الراح نحزن كل عمرنه
بس ما يفيد والله يا يمه

صيري قوية، و حطي كتابج و اقري

.. فاتت امي خلت كبال الحجية ستكان جاي و صاحت على اسامة يودي الجاي لسيد جعفر، اسامه ما سمع راحت هي .

صحت وراها، ماما .. باوعتلي اشرتلها فهمتني بس غلست ، باوعت للحجية ما تشرب الجاي:- ما شربتي خاله ؟

-الشكر هواي بنيتي

-اكوم اجيبلج

-اكعدي ما جايه اشرب جاي، شلونج انت سوفيلي وضعج البنات ميتات قهر عليج بالعباس رادن يجن وياي كتلهن باجر روحلها خلها ترتاح اليوم

-خطية ما قصرن هن نظفن البيت و شالن ٣ ايام العزا بالخدمة و الضيافة ما ادري شلون اجازيهن

-خواتج هن يمه

-اكلج حجية فدوة العدة مال الارملة شلونها النسوان بالعزا كل وحده تحجي شكل خبلني

-يمه العدة هي ٤ اشهر و عشرة ايام خلال هاي المدة ما يجوز عليج الزواج، و يحرم اظهار الزينة يعني تلبسين ذهب لو الوان فاتحه

-يعني بس اسود

-مو شرط اسود، المهم يكون لو غامج ما يجذب نظر ما تلبسينه و تحتاطين بالكلام ويا الغريب

-يعني ما يصير احجي ويا ولد

-لا مو ما يصير ، تحجين العندج و تسألين بس الكلام الما اله داعي ما يجوز .

العدة الله خلاها للمراة طهارة يا بنيتي، على المرة المتزوجة اللي زوجها داخل بيها دخول شرعي

-شلون يعني دخول شرعي

-يعني متقارب وياها مرة و رجال

-بس اذا متقاربين يعني ؟

-اي طبعا اءا ما متقاربين ما تعتبر مرته و ما عليها عده ولا شي

-ليش ؟

-الزواج شنو يبنيتي؟ يعني تزاوج بين الرجال و المرة اذا هم ما متزاوجين شلون تتسمى مرته ؟
ما تتسمى مرته ولا عليها عدة ولا اي شي من اللي ينص ع المتزوجات، اساس الزواج هو النكاح الشرعي لهذا عقد الزواج يتسمى عقد النكاح

...صفنت ويا روحي : يعني اني مو زوجة سلمان !!
لعد شتسمى ؟

بقت تحجي وياي ع العدة و شلون اتصرف وياه، بس عقلي ما كام يجمع وياها، بقيت افكر بسالفة اني مو زوجته ..

الى ان ترخصت مني و كامت، حطت بيدي ١٥٠ الف وبقت توصي بيه و تقويني.

الحجية افضالها وياي هواي، اكثر وحدة تعلمت منها بهاي الدنيا هي الحجية، علمتني احف و اخيط و اخبز و اضرب ابر ..

جان عدها علاج لازم تضربه كل يوم، تقسنلي المنطقة اربع اقسام و تكلي ضربي هنا يلا سباعية لا تخافين

و من اگلها:- حجية خاف اضرب غلط و يصير بيج شي

تجاوبني:- ضربي بنيتي ما يصير كولي يا الله و كوي كلبج
لحد ما خلتني اتجرأ اضرب ابر و اشكل كانونه، غير نصايحها المستمرة اليه، المرة المعدله هيج تسوي و المرة المعدله هيج تمشي ..

من اجيت لكربلاء جان عمري ١٦ هسه عمري ١٩ ..
صغيرة اجيت عدها شتعلمني اخذ منها ..
على كد ما جنت افتقد التعلوم عند امي، فتحت عقلي ويا الحجية و كمت اتعلم منها كلشي

امي ما جانت تعلمني غير بدروبها و بتجاربها، بس الحجية جانت تختلف عن امي تماما، خلتني التزم بصلاتي بصومي

جنت ما اصوم عد اهلي، كامت تخليني اصوم رجب و شعبان قضاء و كل يوم بالليل تاخذنا للامام نسوي اعمال الليالي نخلصهن و نجي

العيشه هنا بكربلاء حيل تختلف عن العيشة الجنت عايشتها ويا اهلي . غيرتني هواي و غيرت من طبعي حيل .. جنت اكره ربي و هواي جنت اكفر بيه لأن ما اشوفه واكف وياي بس بعد جيتي لكربلاء تغيرت، صرت احس بوجوده

كلمة ( يا سند من لا سند له ) ما صارت تفاركني
وما مرة رددتها و الا بالفعل الله يسندني و يخلصني من المشكلة لو العوز الاني بيه .

الحجية احسها نعمة بحياتي الله دزها اليه تعلمني بدال اهلي الما علموني.

فعلا الله يهدي من يشاء
مرات افكر انو امي هيج و ابوي هيج اني شلون ما مشيت هيج، اشوف الله حط ناس بطريقي حتى ما يخليني اتجه للطريق اللي اتجهتله امي او ابوي.

طلعت الحجية، و السيد حجه واكف بالباب :- يابه هاي ٥ كواني طحين و ٣ كواني تمن و صناديك مواد غذتئية وصلت بيها الناس، انتم تصرفو بيهن تبيعونهن تخلوهن الكم باللي يعجبكم

ميعاد:- ما تقصر سيد بوجودكم بنيتي ما محتاجة شي

-لا احنا اهلها ان شاءالله و ما ننساها

-عساك سالم يا ربي يزيد خيرك و يوفقك

-مشكورين يابه

سلم و طلعوا، و فاتت امي للغرفة، كلت الها :- كون دخلتي ع السيد يمه

ميعاد :- ديار شوكت تستحين ترا اني مو جاهله يمج و توصين طلعت روحي منج يا امي من يوم الاجيت و لليوم توصين

يعني و اذا طبعهم يختلف عن طبعنا، لازم نصير نشبههم حتى يرضون بينا ؟

-مو يرضون بيج بس سمعه عليه

-كلمن يشيل اخلاقه لا سمعه ولا ابد، لا تدخلين بتصرفاتي لان مصختيها، و بعدين تعاي شنو انت ناويه تبقين هنا ؟

-لعد وين اروح

-مدرسه وراح تتخرجين ، اسامه وراح يطلع السادس كعدتكم هنا شنو بعد ؟

-ارجع لبغداد شسوي ، اسامه كبر ماما ما بقى صغير و تعبرين عليه السوالف، جنت بس اني افتهم و على ذمة ابوي و ما تحملت تصرفاتج، هسه وياه شلون ؟

-و شبيها تصرفاتي يمه ؟

-ما بيج شي ماما، راتبج خير من الله خصصيلي اني و اسامه ٢٠٠ بالشهر و اني اسوي مال رعاية اجتماعية و اطلع مال ارمله و اعيش اني و اخوي هنا

وهنا الناس اهل رحم يحبون يستفقدون و يتبرعون و بيت السيد يمي كلشي ما احتاج

-براحتكم

-نعسانه حيل اكوم انام

-ارتاحي يمامه تعبتي هوايه سوده عليه

نمت و ثاني يوم بقن نسوان المحله يجن يوصلن، اني مواصلتهن كلهن الحجية عرفتني عليهن و كلما يصير شي ادز عليه اروح وياها و احط ١٠ بأيدهن

فمن صار عندي حالة وفاة كلهن وصلني بيهن الجابن قطع قماش اسود و اكثرهن يخلن فلوس

جمعت الفلوس ضميتها ، و الاقمشة لكيت امي فارشتهن و تباوع بيهن :- اذا عجبج اخذي اني اخيطلي كم وحدة

-اي هو اني دا اباوعهن، باعي هاي تصير شلون نفنوف يكطع ، خصوصا اذا سويته قصير وبلا ردن يصير يملخ ع الجسم

هزيت ايدي:- اليعجبج اخذي ماما

ميعاد:- ثانكيو بنيتي

ابتسمت :- ادور انكليزي صرتي تحجين

-هاي الدنيا ماما كلشي يرهم بيها، اسألج صدك خالد شجابه للمستشفى استغربت وجوده

-اني خابرته

-ليش خابرتي ؟

-ما اعرف من حلاة روحي، تعلكت بخالد ما عرفت المن اكول و اشكي

-بس اجا من بغداد بسرعه حتى وصل قبلي و تعب كلش هواي بالدفنه خطية، بس هو ما خربها غير من كال ديار بحسبة اختي هي مكموع شوكت صرت اخوها مخلفتك اني جايبتك هازه كاروك امك حتى بتي تصير اختك.

-خالد صاحب نخوة ما يرد احد ينخاه

-مو بس هو يمه ابو رافد و ولده كلهم هيج حتى بيت ابو امجد هم ناس طيبين الله يحفظهم، ولدهم وردة مال الله و عساج بس تنخينهم

-اي والله وكفاتهم وياي هواي بالخصوص خالد

-تلحلحي و كوشي عليه لا يفلت الرجال

عقدت حاجبي :- شلون يعني ؟

-الرجال مطلع و المكموعه مرته انكلعت اتزوجت و خالي مختلي املي الفراغ بحياته وصيري انت كلشي

-ما شفتي يكول اختي، عوفيني بحالي يمه ما الي خلك هالسوالف

-اللسان غير الگلب يبنيتي، الرجال بس املي حياته و عودي يتعود على وجودج بس ديري بالج تخنكينه، الرجال لو بيده يعبد المره عباده خاصه على شهواته بس لو نكت و بقت تخنك بيه هنا يدور الف حجة و الف لوفه حتى يشرد منها.

ابتسمت و حطيت ايدي على خدي و كلتلها :- اكلج يوووم انت صارلج هنا ٤ ايام دوامج شلون

-غير ماخذه اجازة

-اجازتج شكد

-باقية يمج شهر

-منو ينطي اجازة شهر

-بكيفهم ما ينطوني غير ازين شواربهم بالقندرة، وداعتج كل زلم الدائرة مخليتهم بجيبي شحده اليفك حلكة

-كلهم مصادقتهم ؟

-لا غدي شلي بيهم ما ادورهم، بس اعرف شلون امشي اموري وياهم.

-اذا هلكد تعرفين بالرياجيل شيحبون و شيكرهون ليش ما حاولتي تصلحين ابوي و تعدلينه

-اكو زلم يمه مثل حاوية الزباله لو تشمرين بيها سطل مي ورد ما تطلع منها غير الريحة الجايفة و هذا حال ابوج

لا جان يهمه مره ولا احد، كل همه اروح اطلع اشتغل و اجيب اله فلوس مشروب، رغم جان يعرف اني شنو و ما يهمه كل اليهمه اجيبله فلوس

-ليش ما اطلكتي ؟

-الطلاك مو شوية كل مرة جنت افكر اطلك بس وين اخذكم ؟ راتبي جان على كدي ما انصلحت احوالي ترا الا لما اتزوجت عصام

-اكوم افتح كتابي و اقرأ احسنلي من هالسوالف

-اي والله احسن كومي، انطيني الريموت من يمج خل اشغل التلفزيون صارلي ٤ ايام ما شايفة العشق الممنوع حتى ما ادري هسه شصار بسنر شسوت المكروده

-يمه ترا عدنا حالة وفاة مو مال تفتحين تلفزيون

-افكارج هاي منين متعلمتها ما اتذكر اني معلمتج على هيج سوالف، اصحي بنيتي الحزن ما ينقاس بتلفزيون

عفتها براحتها و فتت لغرفتي اقرأ ، و صحت اسامه يمي حتى اقريه بدل العرايك هو و اثار
كعدت ادرسه و ادرس اني هم.

اسامه جانت امتحاناته قبل امتحانتي، صادفت ورا وفاة سلمان بأسبوع، جنت اقريه و يروح للامتحان بكلوريا و يرجع اجوبته اكثرها صح

ركزت على دراستي هواي، رغم حزني و الناس تروح و تجي و و نفسيتي صفر بس جنت اجبر نفسي على القراية .. مخليه لكل كتاب ٤ ايام اخلصه و ليل مع نهار اقرأ، بحيث تعقدت كلش، توصل بيه حالات اكوم ابجي حيل .. ما ادري من حزني على سلمان و فقداني اله ما ادري من ضغط الدراسة

كامت امي تاخذني و تاخذ كتبي و نروح للامام الحسين، اكعد بالسرداب هم بارد و هم هدوء و هم ناس تروح و تجي تغير نفسيتي .. خصوصا صوت القرأن و الادعية مريح للاعصاب شويه يساعدني اغير نفسيتي

بس المشكله هنا الناس ما ترحم المرة الما عدها رجال، يترقبونها و يتبعون الزلة عليها حتى يحجون بيها

هواي يعرفون سلمان و يعرفوني مرته، من يشوفوني افتر ويا امي بالحجاب، يبقى الكلام :- يا تفتر و رجلها ميت

لو يشوفوني ادرس:- هي بحال دراسة غير رجلها ميت شو جنها ما مهتمه

يترقبون حتى حركات الوجه اذا ابتسمت بالغلط تنحسب علية و ديره صغيره هناك ناس تعرف ناس و ما تظل حجاية مضمومه، شفنا مرت المرحوم سلمان هيج و هيج

امي تكلي :- شعليج بيهم طز اليحجي و الما يحجي شيقدمون و شيأخرون عيشي باليعجبج و عوفي اليرضة و الما يرضى يركع راسه بالحايط المهم انت راضية عن نفسج

بس الحجية جانت تصبرني و و تنصحني اتنقب هاي الفترة حتى محد يحجي عليه، دكول :- اكل اليعجبك والبس اليعجب الناس، صح كلام الناس لا يجيب ولا يودي بس يا بنيتي الناس للناس وذوله اليحجون تحتاجين وكفتهم فد يوم ، من تكولين الناس ما تهمني و الناس مو ابالي و اسوي اليعجبني بس وكت التوكعين بشدة تظلين وحدج ومحد يعين صح الله ما يترك عبده ، بس عونة ابنادم لابد منها يبنيتي

انت وحيده و محد الج لا تخسرين احد بسوالف ما تسوى خليهم يباوعولج بالعين الحلوة، تنكبي هالفترة و اطلعي منو يدري عنج و منو يحاسبج ؟ ركزي بأمتحاناتج و عوفي الناس و حجيهم.

جنت اشوف كلام الحجية صح
لأن من وفاة سلمان و لليوم المنطقة ما عايفته، هذا الشايل عنا فلوس السحب و هذا اليدك الباب و يجيب مسواك و هاي التمر تسأل شلونج خاله و شلون صحتج

هم صح ناس تحجي على ناس بس بنفس الوكت ناس شايله ناس، و فايديني و شايلين عني هواي فنا ردت اغير صورتي بالمنطقة و يستنقدوني على شغلات ما تسوى

صح امي غير طبعي و تطلع و ما ادير بال عباية تكشفت، كذله طالعة .. يعرفوها بغدادية و بعقلهم ان ابغداد حرية اكثر من كربلاء حتى لو جانوا هواي بغداديات ملتزمات بس هم هيج ماخذين نظرة على بغداد فري مو مثل هنا مدينة دينية.

مشت فترة دراستي كوة ويا حجي الناس لان بالعدة و اداوم، ما كعدت بس جنت احاول اغض نظري عن هالامور .. و اركز بدراستي احسن
لأن هاي الفترة بالذات تحدد مصير مستقبلي بالكامل لو اجيب معدل زين لو يتفين حظي بمعدل ما بيه وجه.

بس اصعب شي جان الاربعين مال سلمان ويا امتحاناتي، بس الحمدلله جان بين امتحانين، يوم عطلة فأخذت الكتاب وياي و بالسيارة اقرأ، و من كعدت بالمطعم و اني اردد ويا نفسي التعاريف و احفظ
جانت فترة كلش صعبة عليه.

خالد جان كل فترة يخابرني بس ما اطول وياه يعرفني امتحانات فبس يسأل عني و يغلقه، بس يكلي توعديني من تكملين امتحانات ، تخابريني مخابرة طويله تحجيلي بيها عنج و عن كل اخبارج احب اسمع

الصراحة شفته مو بس يسمع اخباري، انما هو يفضفض من احجي وياه يكوم يحجيلي المشاكل اليمر بيها ، بس ما اكدر اطول وياه لهذا يطلبني اتصال

امي رجعت لبيتها و بقيت بس اني و اسامه بالبيت، هو بالبيت و اني اداوم ، لحد كوة بطلعان الروح خلصت السادس.

رجعت بيومها يا يابه بكد فرحة الثالث عشر اضعاف لدرجة بيت من الفرحة لأن خلصت مدرسة و امتحانات.

دخلت للحمام ساعه اسبح و اشمر على روحي مي حتى ارتاح و ينفك ضغط الدراسه عني، طلعت لبست ملابس خفيفه و مشطت شعري و تمددت على الجرباية بطولها ونمت

اخ يالراحة الحسيت بيها جن انولدت من جديد.
نمت نومه طويلة، اجاني سلمان بالحلم يضحك و فرحان ما حجه بس ضحكته المعتادة الشاكه حلكه طلاقتين نفسها اجا بيها، و كان هو وياي و فرحان بيه لأن ارتاحيت.

كعدت العصر الشمس تريد تغرب، ابتسمت و اني اتذكر سلمان بالحلم، كمت من مكاني رحت سويت جدر محلبي مهيل و دزيت اسامه يجيبلي جلي اخلي عليه

جان يحب هالاكله هواي من اسويها ياكل اكثر من ٦ امواعين و اذا خليتها بالليل اكعد الصبح الثلاجه فارغه كلهن ياكلهن واكعد اتعارك وياه وواكله شنو عايش ويا عميان احزا هم نريد ناكل، كمت ابتسم و اني اتذكر هاي الأيام و وويا الابتسامة دموعي تنزل و اني اخوط بالمحلبي

لحضات عادية جانت، بس ذكريات حلوة و تبجي صارت ...
فسويت بثوابه ٢٥ ماعون خليت بصينية و اسامه وزعهن بالمنطقة.

كملهن دخلته سويتله عشا و كعدت نتعشا اني وياه، اباوعله ، ابتسمت ، شافني اباوعله كال:- ها شبيج ؟

-اذا الي دعوة مستجابة يم الله ادعيه بحق كل ملك بسماواته يحفظك اليه و ما يبعدك عني

ابتسم :- اني ما اعوفج ديار، انت امي مو اللي ابغداد

لزمت ايده:- و انت كل اهلي

بقينا نسولف مع بعض، كملنا عشا انطيته فلوس راح اشترالنا نمنمات و كرزات و كعدنا نباوع فلم و ناكل، بنص الفلم تذكرت خالد

جريت موبايلي و رمشت عليه، دقيقة و رجع اتصل بيه، كلت لاسامه:- اني راح اكوم انام انت ابقى باوع تلفزيون

كمت للغرفة رديت على خالد:- الو

خالد :- بشري وكولي خلصت

-اي خلصت

-صلوات على محمد و اخيرا خلصتي

-الحمدلله حمل و انزاح عن ظهري

-شتتوقعين نجاح لو اكمل لو شنو

-حسب اجاباتي التأكدت منهن ناجحه و تبقى يم الله لان المصححين ما يرحمون بالتصحيح هواي يظلمون

خالد:- ان شالله تحصلين النتيجة التستاهليها و اكثر

-ان شاءالله يا رب

-شناويه تقدمين على يا كلية ؟

-بنفسي قانون

-القانون يحتاجله وحده جريئه ، لو امج يلوكلها

-اي تاكل و تشرب الكدامها

ضحكنا ... كلت :- لو الله ينطيني شوية من السان امي جان اني بخير

- هم زين يمعوده ما طلعتي عليه

-خالد امي صفاتها حلوه لو ما سوالفها شوية ، بس هي كلبها طيب و صاحبة ملگه

-صح

-سولفلي شخبارك امورك

-نفس الوضع

-ضحى ما خابرت على بناتها ما رادت تشوفهن كلش عافتهن ؟

-لا طلبتهن مرتين راحن الها و شافتهن عد اهلها

-اذا هيج گلبها ماناسيها ليش عافتهن

-ضحى غيورة ديار، من سافرت للاردن حاولت تتصل بيه هواي و جانت تتوسل ابتول حتى اقنع ارجعها بس اني جنت كاشه روحي منها كلش من اتذكر مسوية سحر حتى تكتل امي بودي اكتلها مو ارجعها

فهي ابالها اني طالع مسافر متونس ويا النسوان و هي مبتليه بالبنات، فحتى تقهرني و تخليني اعوف السفر، تزوجت و عافتلي البنات حتى ابتلي بيهن

- صاحية ؟

-لا ضحى غيورة تغار و بسبب غيرتها تتخبط بحياتها بدون تفكير

-بعدك تحبها ؟

-انكر اذا كلت لا، صح كاش منها و كلش طالعه روحي منها بس احبها و هواي ايام جنت احن الها، بس اكول لا التسوي مرة تسوي مرتين

-جان انطيت فرصة

-جنت ناوي بس ردت اخذ كفايتي بالوكت و انطيها درس عدل ليكن سنتين طلاك حتى اتوب، بس هي سبقتني بخطوة و اتزوجت

-الله ما كاتبها الك، يمكن الحياة فاتحتلك ابواب ثانية

-ما اريد يمعودة خليني هيج خالي مختلي كل همي بناتي اشرفلي، احجيلي انت شنو وضعج

-لا اطلع ولا اطب متقيدة هنا كلش الناس ما ترحم النا عدها رجال

-و شجابرج ليش ما ترجعين لبغداد

-خالد هنا الناس واكفة وياي، لو رجعت لبغداد منو الي ؟

-افا عليج لعد احنا وين نروح

-انت ما تتجازى ولا بيت ابو امجد، بس احجيلك واقع، اذا رجعت لبغداد مجبورة اعيش ويا امي
خالد اسامه كبر و فهم و امي سوالفها هي هي ما تجوز صعب اعيش اخوي ويا امي و هي هيج، وحدة من الاثنين يا يصير مكرن و يتعود على سوالفها و يصير مثل ابوي لو يعيش معلعل بسوالفها عمره صار ١٣ سنه ودخل عمر المراهقة واخاف منه

-يوم عن يوم جاي تفاجئيني بتفكيرج ديار، حيل كبرانه عن الاول

-الضربة الما تموتك تقويك و اني من كثر المريت بيه قويت و تعلمت هواي، خاصه من عشت هنا وحدانية و براس رجال مريض اقل غلطه تنحسب عليه فجنت قبل كل خطوة افكر الف مرة و استشير الافهم مني و تعلمت اعيش ...

-بس عفية عليج سباعية

-مو سباعية ولا اني من حديد لهسه من اشوف احد يشمئز من ادية لو الحرك البركبتي انقهر و انفرد بنفسي و ابجي ، من اتأذى اضعف و انكسر و ما الكى غير نفسي استند .. مجبورة اوكف على حيلي و اتحمل كلام الناس

-يعني بعد ما تنتقمين من احد يأذيج

-لا والله مرات يطخ بعقلي انتقم من اللي يدوسون ابطني، و بعدين استغفر الله و اتحسب ربي عليهم

-خليج هيج انت صح

بقينا نسولف اني وياه للصبح يلا نمت ..

ومرت هاي الفترة اعتيادية، بس اليضايقني هي نظرة الناس، ما اخطي خطوة لو اطلع و كالو وين راحت وين اجت، اكيد صاحبت واحد ، لو اتزوجت متعه

العيشة هنا بدون رجال مأسات ، رغم هم يحللون زواج المتعة و يعيبونه بنفس الوقت، عدهم التتزوج متعه هاي مو خوش وعليها علامة اكس.

فجنت كلش اعاني من هالوضع، فحدي لبيت السادة و بس وما اطلع الا اسامه وياي حتى اتفاده كلام الناس

جنت اشكي للحجية بس و هي تصبر بيه و تعلمني

وبمرة من المرات و هي تصبر عليه، فاجئتني بكلمة و هي تكول:- اصبري ابنيتي بس هالفترة بس تخلص ايامج اخلي سيد جعفر يعقد عليج واخليج ابيتي جنه......يتبع

☆☆☆☆☆☆