ليتني استطيع فعلها الحلقة (47)

ليتني استطيع فعلها

الحلقة  (47)

لم يلمس احد قلبي مثلما فعلت انت ... ❤

.......

خالد :- بشّر ؟

- المريضة كعدت و ان شاءالله تعدت مرحلة الخطر

شهكت بقوة بسرعة دموعي نزلو من الفرحة حضنت اختي اثار حيل و هي فرحانة و خالد يضحك :- الحمدلله ياربي الحمدلله، فدوة اكدر اشوفها ؟

- مو هسه فد نص ساعة و تشوفينها

- الحمد لله ربي ، سمعت خالد امي كعدت الحمدالله، يعني راح تتنازل عن اسامة و يطلع و ينحل كلشي يارب

خالد :- الحمدلله على سلامتها ، زين ربي و تعدتها

ديار :- اي راح تصير زينة
شلت الموبايل خابرت على امجد :- الوو

امجد :- هاا

- امي كعدت و تعدت مرحلة الخطر الحمدلله

- زين

- شبيك شنو زين جاي اكلك امي كعدت

- هذا ما يغير من الموضوع شي بالعكس يزيدة

- هاي شبيك انت من صدكك، ما اريد اخرب فرحتي بكلامك ، مع السلامة

سديته و خابرت ابوي :- الو

اسماعيل :- الو خلو ديار

- امي كعدت و الدكتور يكول تعدت مرحلة الخطر

- الحمدلله الحمدلله هيج راح تسهل القضية على اسامة هواي

- يعني راح يطلع مو ؟

- اي يطلع اذا امج تنازلت، يطلع

- الحمدلله ربي ، زين اكدر ازور اسامة اريد اشوفه اطمن عليه

- هسه مو وكتها شوفيلنا امج و خل تحل القضية ما بيه حيل دوخة راس

سديت الموبايل من عنده، التفتت الخالد، كاعد يخابر بموبايله، تقربت منه، نهى مكالمته :- ها

- اذا هاي روح انت بعد هم وراك تحضر نفسك تسافر باجر

- نطمن على امج و بعدها اروح، هسه راح انزل اشتريلكم عشا ، شتحتاجون بعد ؟

- ليش واكف وياي ؟

- شنو ؟

- ليش واكف وياي صارلك يومين ما عفتنا ولا ساعة بينما هم اهلك المعتدين و لازم تصف وياهم

- اني مو بصف اهلي ولا ميعاد ولا رافد، كل الصار ما راضي ومستحيل ارضى بطعن الاعراض حتى لو شما جانت ما اقبل ، بس وكفتي هنا لان محد وياج مو لخاطر امج

- اعرف ، اشكرك هواية

- ما احب كلمات الشكر تحسسني اني شخص غريب

اثار :- اني احبك

ضحكت و ضربتها :- عيب

خالد :- كبري و خلي اخذج و اصفط ٣ زوجات

- لاااا اني اتزوج مهيمن بس انت يعني مثل اسومي

- توكعينة توكعينة الكبلج حطت براسها ووكعته شلون وكعة

ضحكت :- لا هي وكعته من زمان و مشتريلها هدية

- لا هذا سابقنا من هسه، اذا اني ورافد كل واحد اثنين ... فهذا يسجلهم فريق

- الله ينتقم منه

- كل داعي شر اله نصيب من دعائه لا تدعين، اذا جان ظالم الله يجازي

- السواه الشر بذاته ورط اخوي بقتل امي

- هو شاف صور و كل رجال ما يتحملها

- هن فوتوشوب و بعدين شنو انت ادافعله

- اني ما ادافعله و لا ابررله بس ما ارضى تحجين عليه مثل ما انت ما ترضين احد يحجي على امج رغم كل اخطائها !

- اروح اشوف الدكتور اذا يخليني اقوت اشوف امي

-ديار

-التفتت اله .. ها

- اللي بين رافد و امج ما اله علاقة باللي بيني و بينج

- شنو اللي بيني و بينك ؟!

- لربما صداقة!

بقيت اباوعله، اخذت نفس هزيت راسي، دك موبايله راح من كدامي حتى يجاوب، اني رحت اتفق ويا السستر حتى ادخل

تريد مني ٢٥ الف حتى ادخلني بسرعة و كلما اريد ادخلني الها، شلت الها ال٢٥ و انطيتها و دخلتني

تقربت من ماما، الاجهزة بجسمها الاوكسجين على خشمها، مغمضة و جهاز النبض يدك يمها، الوجه متعوب كلش ملبسينها بدلة عملية زركة

دمعت عيوني من شفتها، هذه اللي مسكته العالم بالسانها و لاعبه عليهم لعب هذا حالها ؟
كمت اجر بخشمي و اني ابجي، حطيت ايدي على ايدها ، حركت عيونها

باوعتلي بس ما حجت كلش تعبانة ، كامت دموعي تجري بقوة، ضمت ايدي بأيدها بلا ما تحجي ، تقربت بست راسها و خدها :- الحمدلله ع السلامة ماما

حجت بصوت انين ناصي من الوجع :- دياااار

- ليش هيج سويتي بينا ، اسامة ضاع و انت بهذا حالج ... ليش

غمضت عيونها ، مسحت دموعي ما اريد ازيد عليها لأن واضح هي تعبانة كلش، رحت طلبت من السسترة بس ادخل اختي اثار تشوفها، بالبوكة دخلتها

هسه دا امشيها لامي، هي شافتها و ركضت الها، حضنت ماما و كامت تصرخ بكل علو صوتها

-اتأذت امي بساع نشغت ، جريتها بسرعة من حضن امي :- مو هيج ديري بالج حيوانه غير مسوية عملية

اثار:- اررييييييييد اميييييييي مامااااااا كومي مامااااااا

- ولج اششش لا تلميهم علينا دسكتي

- ارررررررررريد اميييييييي

- هاي كدامج امي بلا عيارة راح يطردونا من وراج

اشرتلي اعوفها، بقت شابكة بطن امي و تون تبجي، جريتها :- يلا خل نطلع

نطقت بصوت ناصي متوجعة :- اسامة وين ؟

-بالسجن سلم نفسه للشرطة

سكتت، اجت السستر كالت :- يلا حبيبتي اطلعي ما يقبلون تبقين اكثر ، باجر الصبح ننقلها للردهة و اشبعي منها و اعتني بيها

بسنا امي اني و اثار و كلنالها :- مع السلامة
و عيونة مدمعة، هي هزت راسها خفيف
طلعنا، خالد واكف برا ، شافنا اجا

:- ها شلون صحتها

-كلش تعبانة

-التعرضتله مو سهل ان شالله تتحسن صحتها ، شوفي ديار ادخلي لهاي الردهة لذيج الردهة و احجزي سرير يناسبج و يناسب امج ،و نامي عليها اليوم انت و اختج لحد ما يطلعون امج من العناية باجر

و هاي جبت الكم صندوك مي و فواكه و دجاج تتعشين انت و اختج، تحتاجين شي بعد ؟

- تسلم ما قصرت

- طلع خمسين من محفظته، حطيت ايدي :- لا اطلع شي شايله وياي تقريبا ١٥٠ الف

- خليهم يفيدونج علاج و بعد امور هواي

- عندي والله زوجتك جايبه ضمهن يفيدنك

حاول وياي هواي ما اخذتها منه، رجع و كال :-شتحتاجين خابريني حتى لو بأردن اني اخابر اللي يساعدونج

- مشكور و ما قصرت الله ينطيك ان شاء الله

- الشكر لله، يلا لعد مع السلامة

- الله وياك توصل بالسلامة ان شاءالله، لا تنسى دزلي صورته ع الواتساب

ابتسم و هو يمشي :- ان شاءالله

راح و اني و اثار مشينا للردهة حجزنا سرير لامي و طلبنا بطانية و نمنا بسريرها للصبح، الصبح غبشت للبيت من ٨ خلست اثار بالمكان و كلت الها لا تتحركين منا لما ارجعلج

رحت لكيت امجد ماكو و عمي و عمتي نايمين، فتحت الباب بالقدرة يلا كدرت ادخل، جبت غطا و فراش و حضرت جنطة لامي من ملابسي و رجعت للمستشفى
اثار كاعدة بمكانها تبجي و تكلي :- ليش عفتيني اني عبالي رحتي بعد ما تجين

كلت الها:- اي مو كتلج ارجعلج بعد شكو تتعايرين

اخذتها ورحنا انتظرنا يطلعون امي، لل١٠ و نص يلا نقلوها للردهة حضرت سريرها و عدلته و حطيتله جرجف نظيف و نامت هي

كلشي ما تكدر تحجي بس نايمة
عذراء مرتين خابرتني و ما جاوبتها ، هسه خابرت رديت عليها سألتني ( ليش ما اداومين )

سولفتلها الصار ويا امي، تخبلت ..
كالت :- باجر احنا يمج و شتحتاجين كولي

بيومها اجا امجد الظهر ،شاف وضعنا و هو واكف ، سألني اذا احتاج مصرف ، كلت اله :- ما اريد
خلا وراح

خابرت بتول حجيت وياها اسال على خالد اذا راح ، كالتلي اي راح بس ديار بعد لا تخابرين لان امي اذا عرفت اني جاي اتواصل وياج تسويلي مشكلة

ما خابرتها بعد ما ردت اثكل عليهة

حالتها ما تسمح تحجي لهذا الدكاترة اجلت قضية التحقيق وياها الى ان تتحسن

حاولت اخذها للحمام، ردت اسند ايدها حتى تمشي ايدها اليسرة ما تتحرك ، تنطيني اليمنة ، باوعتلها :- ليش ما تحركيها

- ما احس بيها من جسمي

بقيت اباوع بوجهه:- معقولة ايدج انشلت ؟

- ساعديني اروح

مشيتها بس انقلقت حيل على حالتها، هي تضايقت ، وديتها ورجعتها ، ما حجيت وياها بس هي بقت مركزة على ايدها

تباوعلها تحاول بس ايدها مشلولة ما تتحرك، اجا الطبيب فحص ايدها كال الها، حاليا نركز على علاج القلب انت نجيتي منها بقوة و ان شاءالله من بعدين نشتغل الها علاج فيزيائي و اذا اراد الله تتحسن

من طلع الدكتور منها بقت تبجي ، تكلي هذا درس اليه ما اسلم ايدي بأيد احد و اثق بيها، هاي تالية الثقة الثقيتها خسرت ايدي

- تصير زينة لا تخافين بس كومي على حيلج انت حتى يحققون وياج و تتنازلين عن اسامة خطية بالسجن حتى ما شايفته

- ما اتنازل عن اي احد

- يعني شنو ؟.

- اذا اني ما عرفت اربي خلي السجن يربيه

- لا مستحيل مو بكيفج كافي راح ضحية زواجاتج ليش تريدين تورطينه بعد

- سدي الموضوع ديار

- لا ما اسده و اخوي تتنازلين عن قضيته والا والله اعوفج و امشي

- عوفي اثار وروحي لبيت رجلج

- ماما لا تسوين هيج تعرفين اسامة ضحية

- كلت لج روحي، ولا تشوفيني وجهج بعد

- ما اروح بس اسامة تتنازلين عن قضيته

داؤت وجهه مني، كمت احجي اريدها تجاوبني بعد ما كامت ترد عليه ، لحيت حتى تفتهم و تتنازل عن اسامة ... ما ردت ولا باوعتلي

اجو يحققون وياه، سألوها اذا يكدرون يستجوبوها ، كالت الهم :- اهلا وسهلا

- الاسم ميعاد فوزي جابر

- نعم

- اسامة اسماعيل طاهر ابنج ؟

هزت راسها

- لا جاوبي حتى تتسجل الافادة

- ابني اي

- شلون صار الحادث

سولفت الهم ان رافد زوجها جانت متعاركة وياه قبل يومين لان بنت بيت و ساعدته بكذا مبلغ و هو لعب عليها و طالبته بالفلوس ورفض ينطيها الفلوس وبعدها جاب صور الي مركبها على جسم عريان و بلقطات مو زينه و كعد يتهمها ان هذه هي

سألها :- اكو صورة ثبتت ان هي مو فوتوشوب حقيقية ويا رجال

- هذا جان زوجي السابق

- زوجج ؟

- اي زوجي

- منو يعرف بهذا الزواج ؟

- عقد.شيخ و اني ما عندي احد حتى يعرف بس جهالي، ابني صغير و بس بتي هاي المتزوجة

- تعرف بزواجج

- اي

بقيت اباوع بعيونها، هي ما باوعتلي، سألني اذا اني اعرف بهذا الزواج، هزيت راسي ، طلب مني اجابة
انوب شهادة زور هسه شحجي ؟ .. كلت اي
شهادة زور ولا يكولون مو زوجها و ننفضح
عود بيناتنا نتحاسب على هذا الما اعرفه منو

رجع سألها ان زوجج المدعو رافد قاسم مطر اقر ان الصور لكاهم على جام سيارته و ان هو سألج و انت نكرتي اللي بالصورة وبعدين اعترفتي

- لا نكرت ولا اعترفت اني كلت اله الصور جذب و الصوره هاي قبل لا اتزوجك بس هو ما جان اباله يصدك هو ناوي على كل ها ليش يصدد و ابني ضاربه قبل يوم ، و هو توعدلنا كدام شهود هواي
ابني و بتي و اخوانه اثنين ..هددنا

-شنو كان صياغ التهديد ؟

حجتله .. اخذوا افادتها و شكوتها على رافد .. كالولها اذا عدها شي اخر تضيفه او شي تحجي

كالتلهم اريد تحقون العدالة على كل اللي اذاني و تاخذولي حقي منهم حتى لو جان ابني.

هنا هم باوعو بوجه بعض ، سجلو افادتها وطلعو

حجيت اني :- انت مو ام ، انت احقر انسان شفته على هاي الكاع، شنو ما كفاج شسويتي بينا بزواحاتج ورغباتج من واحد لواحد لحد ما ضيعتي اخوي و هسه ما تتنازلين

اذا ما تتنازلين عنه اتبرى منح والله و اعتبر امي ماتت وخلصت ، الا اسامة انت الدمرتي يا ما كتلج ابنج فكري بيه حسي بيه و انت اللي ما فكرتي

هي ساكته ما نطقت ولا كلمة ، رجعت حجيت وياها :- اسامه ندتتنازلين عنه و اتبري من عدنا بعدها لا نريدج ولا نريد نعيش وياح و ارتاحي من عدنا و اتزوحي شكد ما تريدين ما اراح امنعح والله بس طلعي اسامة

ما ردت عليه كعدت ابجي بالكاع ، معقوله ينحكم و ينسجن مستحيل، اتخبل غير اشرب من دمها اذا سوتها

ما تحملت ابقى يمها اخذت جنطتي و طلعت من المستشفى و بقيت يمها اثار، رجعت للبيت، امجد جان موجود ، فتت بلا سلام صعدت لغرفتي

كام يصيح وراي ، صعدت ما رديت عليهم اجو الجهال كلهم وراي يبوسون بيه و يحضنون ، وخرتهم من عندي، فات هو :- يكلفج لو سلمتي البيت مو كوترا ادخلين هيج

- ادخل بالطرييييييييقة اللي تعجبني اليعجبه يعجبه الما يعجبه لااااا يشوفني وجهه

ضربني راشدي :- تصيحين على منو انت ، هاااااا

-دفعته حيل من عندي و كمت اصيح حيل :- عوفني وخررر مني عوووووفني بحالي ، دفعته برا الغرفة حيل و طبكت الباب بكل قوة قفلتها

هو كام يضربها قوي، كعدت ابجي بقوة وصوت البجي مالتي مسموع و عالي ، رد حجه :- شصاير وياج احجي

- امشي مني امششششش عوفوووني

بقيت بمكاني ابجي، هو ما دك الباب بعد
بقيت حايرة شسوي و شلون اخلص اخوي من هالسجن اللي تورط بيه ، الاعرفه وسام ابوه محامي قانوني معروف و اله خبره

كلت اخابره اذا يكدر يساعدني لو اعرف ادفع روحي ثمن بس يطلع اخوي من سجنة

خابرته و حسنت صوتي حتى ما يعرف اني باجية بس اول ما حجيت وياه كال :- صوتج مو طبيعي شكو

سولفتله، كال حجت عذراء و التهينا امتحانات والله ما كدرنا نجي و تعذر مني هواي

كلت اله احتاجك اذا ابوك يكدر يساعدنا بهاي القضية فدوة

كال :- صدك جذب هسه اخابره و ابلغه بالموضوع

- حتى اذا يحتاج شكد ما يريد انطي عادي بس خل يساعدني اطلع اخوي

- لا على بختج لا تكولين هذا الكلام باجر احنا يمج

شكرته و قفلت الخط، خابر ابوي رديت عليه، كلت اله هيج و هيج و امي ما تقبل تتنازل

كام يصيح و يغلط :- و بكيفها هي و ابني ينام بالحبوس و تتشوه سمعتي بسببها و بسبب ازواجها و لعبها ، اني اتصرف وياها و شحدها ما تتنازل الا اكمل الما كمله اسامة

خفت من كلامه و تهديدة قفلته بسرعة :- هذا لا يروح للمستشفى و يأذيها، اني شجاني و حجيت، لو باقيه احاول ويا امي اشرفلي

باوعت من جاي النت واصلة رسايل واتساب، خالد دازلي صور ابنه، من شفته ابتسمت لا ارادي، الولد صغير حيل ومصلخ و بالخدج نايم بس الحفاظة بجسمة

راسلته :- ليش مخليله اوكسجين
ما جاوبني، رجعت دزيتله :- يتربى بعزك و دلالك يا رب يسندك و يكون الك عون بحياتك

هم ما جاوب .. عفته و كمت نزلت جوا، امجد طالع ، حجت وياي عمتي؛- شبيج و ليش هيج صوتج طالع اول تالي

سولفت الها بقت اتذم بامي، صح امي مضوجتني و مشيطة دمي بس من اسمع احد يذمها اتضايق

اخذت الجهال سبحتهم نظفت الهم ، صعدت نومتهم، و نمت بسريري صعد امجد ما يحجي وياي ولا اني ادنيت و حجيت ما الي خلك

بس الصبح كعدني كال :- اليوم تروحين للمستشفى ؟

- اي و خابرت وسام زميلي ابوه محامي راح يجي يساعدني اشوف اسامة و يساعدني بقضيته هم

- منو منو منو ؟

.- ابو وسام

-اكسر رجلج بس اطلعين

- تكسر رجلي شنو رايحة اتونس اني غير اخوي كنو عنده غيري ؟

- تالي عمري مرتي تخش مراكز غير الدنيا اكلبها فوك راسح انسي ما عندج اهل لا تفكرين بيهم

- امجد مصارت هاي لا انت تنوب عني و تساعدني بقضية اخوية ولا تخليني اروح شلون كلي

- اكعدي و اسكتي كافي الفضيحة اللاطختنا من وره اهلج تصحى امج تتبرين منهم كلش لا تكولين اهلي ولا ابد، ما اعول تخلص مستشفى انوب مراكز

- اكلك شو من جنت انام مستشفى ويا مها ايام و اسابيع ما كلتلي اريد اخلص ولا كلتلي العالم تتفرج عليج ، هسه ويا امي ظلمتها

- مو قبلت لا تزيديها بعد روحه للمركز ماكو

- تروح انت

- اني شلي علاقة بيهم و الطخ سمعتي، عنده اب و عمام يجون يشوفون قضيته

- يا اب يا عمام اني اعوف اخوي لابوي و عمامي و اترجاهم يساعدونه

- العندي كلته و روحه ما الج

- و اني كلت الك اخوي ما اعوفه و بعد بكيفك

- بكيفي مووو ، اسمعي لعد باب هذا البيت اذا عتبتيه اعتبري روحج طالق

- يكولون الرجل لو ضاع ..موجود ،و الاخو لو ضاع ..مفقود ، اطلع و اللي يعجبك سوي

هز راسه و طلع، اني لميت ملابس الية بجنطة و طلعت للمستشفى، دخلت الردهة اثار يم امي، و امي نايمة
سألتها على وضعها كالتلي :- ما ادري بس البارحه بجت هواي

تقربت منها بست خدها و هي نايمة فتحت عيونها ، باوعتلي :- المن اجيتي

- كافي ماما الله يخليج والله البيه كافيني منا انت و مناك اسامة و من صفحة امجد كال لو طلعتي اعتبري روحج طالق اني المن اصير و يا هم منكم اشيله.

ميعاد :- ليش كالج هيج

- غير ما شفتي الفضيحة الصارت ترا الكل جاي يحجي بسيرتنا و عليج، صرنا علج بحلك الرايح و الجاي، لا تكولين رافد لعبها و هالحجي الناس ما تعترف بيه الكل تكول ابنها و رجلها كتلوها لأن مو خوش مرة.

- اكوم على حيلي و الله كريم

- شراح تسوين

- اول شي نسويه اشيل من البيت و من الدورة كلها ، وبعدها اكعدالهم واحد واحد

- عوفيهم الله ينتقم منهم بس خل نطلع من هالمصيبة سلامات

دك الموبايل باوعته وسام، رديت:- هلو وسام

- هلو ديار، ابوي موجود يمي، انت وين

- اني بالمستشفى

- ابقي بمكانج احنا راح نجي لعد

- زين

انتظرتهم نص ساعة تقريبا و اجو، خابرني ، انطيته المكان صعدلي، انتظرته بالباب مال الردهة من شافني اجا

وسام :- ها السلام عليكم

محمد (ابو وسام) :- السلام عليكم

ديار :- اهلا وعليكم السلام

انطاني وسام علاليك الفواكه و كال :- بشري شلونها الوالدة

- والله بعدها، بس نكول الحمدلله على كل حال

فاتو اثنينهم سلم ابو وسام على امي، امي تنحنحت من مكانها و هي متمددة و كالت اله :- و عليكم السلام اهلا وسهلا عيوني يا هلا و مرحبا

محمد :- الحمد لله ع السلامة ان شاءالله مشافاة

- الله يسلمك هلا بيك

وسام :- ابويه محمامي معروف و اجا حتى يعرف القضية و يطلع عليها

سولفتله امي كل الصار و ان زوجها تعارك وياها وراد يوقع ابنها وياها و سوا هالفلم

اني ووسام واكفين و عمو جبتله كرسي كعد كبال امي و بقى يحجي وياعا و يعرف الموضوع، شفت ابو وسام تعاطف ويا امي لان امي اخذته بكلامها و السانها و طريقتها

حجيت ويا وسام و كلت اله :- اريدة محامي لاخوية

وسام :- يابة احنا هنا اجينا حتى يعني اخوها ، و باوع لابوه

حجه الاب:- الولد مراهق و قتل امه بالخطأ بدافع غسل العار و اتضح ان القضية كذب و المحرض زوج المدام ، و على كلا هي قضايا غسل العار مخفف الحكم بيها حتى لو الضحية فقدت حياتها الحكم ما يتعدى ال٥ سنوات، و بما ان هي بصحتها و هو اخطأ اعتقد نكدر نخفف عليه الحكم

- عمو اني اريده يطلع

- هو اجرم بحق امه، و اني مع الوالدة اشوف انه يستحق بعض من العقاب ، الاقبال على قتل امه قبل ان يفهمي شي ليس بالشيء السهل ابدا

- بس هو ما اله ذنب كله من رافد

- القانون لا يحمي المغفلين لكن مع هذا راح ابذل جهدي بهذه القضية

همست لوسام :- لا تقصر ، فهمه موضوعي فدوة اني استحي منا

- اني احجي وياه لا تخافين

- زين اريد اشوف اخوية يصير

وسام :- عذراء سولفتلي زوجج ما قابل

- هو ما قابل ما قابل بس اني متت صارلي ايام ع الجمر كاعدة اريد اشوفه اطمن عليه

وسام:- تشوفينه بس مو هسه، زوجج اله حق اني لو بمكانه ما اقبل زوجتي تدخل مراكز فلا تخسرين بهالخصوص تخلص القضية و نرهملج زيارة و تشوفينة بحظورة

سكتت.. سلمو علينا و كالو (نبقى ع الاتصال نتفاهم) وراحو

...كعدت ويا امي ساعدتها بالكعدة شوية انطيتها عصير و بسكت تاكل شوية ، و بقينا لليل محد مر علينا ولا احد اجانا

خابرتني ام امجد بالليل :- ولا تخسرين رجلج و قنعي و ديري بالج و من هالكلام التعبت منه
سديته من عدها

شفت اللي بالردهة مسويات لمة وكاعدات يتعللن و كل وحدة مطلعة فاكهة لو حلويات من عدهم و مخلياتها و يسولفن

كعدت اني و اثار وياهم ، و بقيت اسولف وياهن ، طلعت بيهن وحدة تعرف تاخذ خيرة بالقرأن ، و المعروف احنا النسوان نموت على هالسوالف

فكلهن طلبن من عدها خيرة ، اخذت الهن و هنينطنها هاليطلع منهن ، وصلت اليه كالتلي حطي ايدج ع القرأن

خليت وسميت بأسم الله الرحمن الرحيم
قرت هي، و فتحتلي .. امي باوعت كالت :- تقربن يمي

رحنا يم امي و المره تباوع بالقرأن، كالت :- مو زينة

- ليش

- عندج ذنوب هواي بس هم عندج كلب طيب، بس هواي ناس اتأذت منج

- ناس !!

- اي مو هسه ، اعمال قديمة سويتيها اثارها لهسة

- صحيح من جنت صغيرة جنت مشوة و الناس يعيبون عليه و كل اليعيب عليه ابلي بمصيبة

- طاعنتهم بشرفهم ، اكو هنا عندج رمي المحصنات

- اي

- جاي ينطعن بشرفج ؟

- صفنت ... اي

- وراح تنطعنين هواي و بعد كدامج طريق طويل

- ليش

- لان الطعنتي بيهم لليوم يدعون عليج و انت حتى ما مستغفرة و لا طالبة التوبة حتى الله يعفو عنج و يحصنج من دعواتهم

بقيت اباوع بوجهاا

حجت امي :- جانت صغيرة ما تفتهم كل التعرفه اللي يأذيها تأذي

- الاذية احتمال زوجة مطلقة من زوج كانت تحبه او بنية اهلها شكو بيها و زوجها او او او .. هيج اذية تكون متلازمة للانسان لهذا يومنا ويعاني منها و ماكو انسان يأذي انسان ما يلاكي اعماله ولا يلكه الراحة

و من يعمل مثقال ذرة خير يره
و من يعمل مثقال ذرة شر يره
هذا قانون ما يعرف صغير لو جبير من انت صغير و تسوي الشر ترسم طريقك و اتعب نفسك باعمالك لان انت اختاريت لنفسك هيج تكون حياتك
ليش نكول دائما من احد يأذيك كول حسبي الله و نعم الوكيل

هاي الكلمة معناها الله يتكفل الاذاج ، تعرفين شنو يعني الله يتكفلج يعني ما يبقيلج ذرة حق و ما ياخذه من اللي ظلمج

بس لو رجعتي اذيتج للناس لأنهم اذوج، فراح ترجعلج الاذية نفسها .. بس هي هم عدها كلب طيب، اكو كفالة يتيم ، كافلة يتيم انت ؟

ميعاد.:- اي هم ٣ ايتام تزوجت على مودهم

- اي و لهذا الله واكفلها بكل مشكلة تفوت بيها يوكفلها و يساعدها لأن هي هم تساعد الناس
اكو اثنين نسوان احذريهن

- منو ؟

- ما اعرف هم اثنين نسوان و اكو كيد و اكو مشكلة راح تصير وياج

سدت القرأن امي كالتلي :- انطيها عشرة، بس كمليلها

رجعت فتحت الية و اني خليت بحضنها عشرة الاف

كالت :- زوجج هذا ما راح تستمرين وياه زواجكم بالايام و الشهور و تنتهون

عندج حياة بعد ثانية بس اتعبين وراج تعب هواي بسبب دعاوي الناس عليج، ابعدي هاي الدعاوي عنج بالصلاة و الاستغفار و بحيل الله يبعد عنج الشر

رددي ( لا اله الا انت سبحانك اني كنت من الظالمين ) عشر مرات يوميه هاي الاية كفيلة تبعدج من كل شر و كل انسان يريدلج شر و اطلعج من كل مشكلة ، اي مشكلة تواجهج رددي هاي الكلمات اللي طلعت يونس من بطن الحوت الاستجابة بيها مضمونة
والله يوفقج

طبكت القرأن ، امري رادت تاخذ، عفتهن هي و امي وكمت طلعت من الردهة افكر بكل اللي كالته معقوله الناس اللي اذيتهم بصغري لحد هسه يعانون من اذيتي ؟ زين وين الكاهم و اعتذر الهم اذا هم دعاويهم مدمرة حياتي !!

استغفرك ربي و اتوب اليك والله ربي ما جنت بعقلي جان اليعيب على شكلي بودي احركه و اشوهه مثلي حتى يحس بمعاناتي بس كبرت و فهمت و كمت اضم بكلبي و اسكت ما ارد اذية احد

..... مرت ايام
امي بدت تتحسن ، رافد مصر ان مو هو اللي صمم الصور و لحد هسه ما معترف و يكول اني لكيتهم على ماسحة سيارتي

امي حايرة بفد شغلة ، صورتها ويا الرجال اللي بالشقة من وين اجت لرافد، رافد ما يعرف بهذا الرجال ولا يعرفه منين جاب هيج شي ؟
تشك ان اللي مساعدة واحد يعرفها و قريب منها و يعرف بهيج شي

كلت الها منو تشكين بيه، كالتلي :- عندي صديقات اثنين اني اتخاربت وياهن صار اسهر بس قبل جنت اشاركهن كل لحضاتي و طلعاتي و نعرف هواي اشياء عن بعض ، وحده منهن اشك بيها هي اللي جانت ويا رافد بالشقة

- شلون وليش شكيتي ؟

- لان دزت الصور الية لو ما اهمها جان دزت الصور لزوجته الولى و لو تريد تخرب حياته جان دزتلنا اثنينا ، و صورة الية هم واصلة لرافد .. جاي احس نفس الأسلوب .. و الشخص اللي دزلي و دز لرافد هاي الصورة .. هو واحد

-تشكين بمنو ؟

- رباب صديقتي الاجت تتذكرينها ؟

- اي اتذكرتها الوصلتني لما سقطت

- عفية ، هي متزوجة جانت و تخون رجلها و اطلكت من رجلها صار فترة

- ليش شكيتي بيها بالذات

- مرة شفت رقمها بموبايل رافد بس هو تلاعب وياي بالضحك و مشاها رجعت بعدين للموبايل ممسوح سألته ، كال خابرتني مرة طلبت مني اساعدها

وبسبب هالموضوع تخاربنا لأن كلت الها لو رايده شي من رجلي جان خابرتيني ليش تخابرينه من وراية كامت تغلط عليه و على رافد و تك ل اني بحالكم

بس ما اطمنت الها

- و شراح تسوين ؟

- ما اسوي شي اله التأكد منها هي لو لا

- و اسامة

- خبلتيني بأسامة ، اخوج هذا اثول بتحريض من رافد باع نفسه و باعني وورطنا ، خليه السجن يصنع زلم

- قصدج مجرمين ترا نايم ويا زبالة الدنيا شيتعلم و شيصنع بربج

ما قنعت ولا رضت، خابرها ابوي هددها في حال ما سحبت الشكوة اللي على اسامة، اسحب منج اثار غصبا عنج و تحلمين تشوفينها بعد

امي عاندت ما تتنازل، اجا من صدك للمستشفى اخذ اثار وياه و كام يغلط عليها و يصيح، هي انجنت شلون اخذ اثار

كالتلي سجلي خروج على مسؤليتنا من المستشفى و خلي نطلع ، رحت سجلت خروج و طلعنا للبيت
وصلنا ، مقفول البيت
باوعتلي :- المفتاح عد منو ؟

- ما ادري

- شنو ما تدرين كل فلوسي هنا و ذهبي

- ما ادري عنهن جنت ملتهية بيج و باسامة

- امشي للشارع صيحي واحد يكسر القفل

ؤحت ع الشارع ابو انشائية طلبت منه يساعدني، جاب جاكوج و اجا وياي من وصل للباب، عرف احنا البيت الصارت بيه الحادث

بقى يسأل عن الحادث ما جاوبنا لا اني ولا امي، كسر الباب تشكرت منه امي و فتنا ، خابرت ابوية تتصايح وياه على مود اسامة ابوي ساد الموبايل منها

بقيت وياها اني علمود تتنازل عن اسامة و تحل القضية، هي جانت مريضة و مو بحيلها و اثار اكثر وحدة من عدنا هي تعلكت بيها لان الكعدة

وبعد ضغط و معارك و مصايح قررت تتنازل عن اسامة بس كالتلي :-كولي لاخوج لا يجي لهنا ولا يشوفني وجهه اني متبرية منه و احسب روحي ما مخلفة ولد

خابرت على وسام فرحانه طايرة كلت اله بلغ ابوك ان امي راح تتنازل

وسام :- صدك

- اي والله

- اي ع الخير ان شاءالله ما تشوفون مشكلة بعدها

- تسلم

غلقت الجهاز منه و بلغت ابوي ان امي راح تتنازل، كال خل تمشي للمركز و تسحب الشكوى و ارجع الها اثار بس خلي يكون بعلمها اسامة بعد ما يعيش عدها ، يعيش ابيتي

كلت اله :- يعيش يمي ، لا يمك ولا يمها

كال :- اثنينجن ما اخلي يمجن ، يجي عندي و اني اساعده بالشغل و الكاله شغل يناسبه

كلت اله :- هسه خلي يطلع و عود الله كريم هو شيختار بكيفه بس خل يطلع و اشوفه

.... غلقت الجهاز منه
جنت فرحانة كلش بهالخبر،
امجد ما يحجي وياي متزاعلين، حتى اهله ما عاد خابروني ، يومين .. صدك و طلع اسامة

يافرحتي يا فرحتي ما احس برجلية من الفرحة
كال ابوي جبته للبيت، اخذت تكسي ورحت طايرة لبيت ابوي

شفته و دموعي كامت تجري ١٠ .. ١٠ ، حضنته و بس ابجي، ضعفان و سمران و التعب ماكله، شواربه و لحيته مشرذمات

كعدت وياه حجيت وياه، ما يحجي ولا يجاوب بس من احجي وياه يبتسم شوية و يسكت
كلت اله :- تعيش وياي معليك بأمي

-لا ابقى ويا ابوي و ما انساج كل فترة امر ازورج و على الموبايل اخابرج يومية بس بعد ما ارجع هناك ابقى ويا ابوي

بقيت ابجي و هو يواسي بيه، باوعت اثار تباوع النا، اشرتلها تجيني، اجت بستها و كعدتها على رجلي :- شلونج ؟

-زينه بس اريد امي
حجتها و بجت

حضنتها :- لا تبجين هسه نروح لبيت ماما و تشوفينها

اسماعيل :- انت ورجلج شنو مشكلتكم

- شعليك بينا انت ؟

- احجي لا بالنعال

- لا تدخل بحياتي

- ولج انت ليش هيج صلفة جاي احجي وياج عن رجلج ليش متزاعلين

- من صارت سالفة امي هاي و لليوم هو عصبي يريدني اتبرى من امي

- و هو الصحيح امج ما تستحي

- تشبهك
حجيتها و كمت، اسامة همسلي :- لا تحجين هذا الحجي
و هو تولاني غلط و مصايح، باوعت لاثار و كلت الها :- يلا حبيبتي خل نروح للبيت

اخذتها وكف بوجهي :- اثار ما تروح تبقى هنا

- شرايد منها

- هنا محد النا هي اللي ادير بالها علينا

- اثار مدلله لا تعرف تطبخ ولا تعرف اداري احد عوفها

- اثار ما تطلع

- اسمع انت ما الك ذرة حق بأثار ، فأبعد منها ولا تشوفها وجهك، كافي اللي سويته وياي استحي على نفسك شيبك ترس راسك و انت ما تستحي

ضربني راشدي و لزمني من راسي :- بنت الكلب منو هذا الما يستحي

وكف اسامة بعدني منه و يهدي بيه و هو يغلط و يصيح عليه، كلت اله :- اثار ما تبقى يمك افتهمت

هي لازمتني من ملابسي حيل و تكول :- ديار لا تعوفيني فدوة

اسامة :- اخذيها و روحي ديار

اسماعيل :- ما تطلع كلت ما تطلع ، رجعي اثار للغرفة

اسامة:- بس اسمعني يابه افهمك ، ديااار روحي

سحبت اثار و هو يصيح و اسامة لازمة عنه و يحاول يحجي وياه، طلعنا من البيت اثنينا نبجي ، سكتتها و صعدنا تكسي رحنا لبيت امي

وصلنا للفرع، مرة حجت :- عفية نسوان شكد عينهن كوية البارحة غسلو عارهن و اليوم يتمشن بالشارع

وكفتها :- تقصدين منو انت

- مو وياج عيوني

حجتها و مشت، حجيت : صدك ناس ما عدها ذرة مستحة عايفين عيوبهم و مركزين بغيرهم ، فشلة

بقت تحجي وراي، عفتها و فتت للبيت، اسمع صوت امي تبجي، ركضنا اني واثار لكينها جاي تحاول اطلع ملابس العا، جتفها و صدرها يوجعنها و ايدعا ما تتحرك
كاعدة بالكاع من العجز مالتها تبجي بقوة

من شافت اثار حضنتها و كامت تبجي بصوت عالي و اثار تبجي وياها، كومتها من الكاع، كعدتها ع السرير لبستها ملابسها و نومتها

اثار تمددت وياها على طولها غطيتهن اثنينهن، سألتني :- اسامة شلونه

- تعبان وضعه كلش

اخذت نغدفس و تنهدت و هزت راسها و غمضت، عفتهن ينامن و طلعت اتسوك للبيت
فتت من باب بيت امجد و رافد، بس بنات خالد ورافد و فطومة يلعبن بالباب

صحت لفطومة اجتني ركض حضنتني و شلتها على كلبي بستها :- شلونج ؟

- زينه

- بيبي شلونها جدو ؟

- زينين اني مشتاقتج

- و اني هم مشتاقتلج هواية و نشتاقة لحسوني و حساني

- ليش عوفينا ؟

- ما عفتكم بس ماما مريضة ، ان شالله من تصير زينة نرجع ماشي

- باستني بخدي حضنتها، شفت ضحى واكفة تباوع على بناتها

سلمت عليها، ردت السلام، طلعت الف انطيت لفطومة مشيت ع الشارع حتى اتسوك، مرت سيارة امجد من كدامي ما باوعلي ولا وكفلي
و اني هم عفته ما بيه اراضي احد كافي عليه روحي
اتسوكت ورجعت

من رجعت لأن مريت ابيت ابو امجد و هم عدهم راوتر ، اجتني رسائل الواتساب صارلهن قرابة الاسبوع ما ادري عنهن لأن مو كل الناس عدها رواتر كم واحد امي ما مشتريته بس امجد مشتري راوتر فاجت الاشعارات لأن وكفت ابابهم

فتحت الواتساب ، خالد دازلي :- اي مريض بالخدج لان اجا قبل اوانة و متأذي حيل وبعدنا وياه بالمستشفى رغم امه زينه حالتها بس هو ، ادعيله ديار ابني يتعافى

دزيتله :- الله يعافيه خطية فدوة حبيبي الله يبعد عنه كل شر و ما يوجع كلبك بيه ، لا تخاف ان شاءاله ما بيه شي

.. دزيتها بس ما جان عندي نت بقت الرسالة يمي معلكة لليل صار عليها احمر ما وصلت اله

.. اتصلت بيه ع الخط هسه جاي اسلم عليه و اتحمدله بالسلامة ، انكطع الاتصال رصيدي خلص
عاد هو ما اتصل بعد

...من بعد يومين
كمت اروح للجامهة اخاف لا يفصلوني و انطيت الاوراق حتى ينطوني الاجازة ع الايام الغبت بيهن
و التمت عليه الامتحانات من كل جانب
هم زين امجد زعلان عليه جان التهيت بالبيت و ما قريت ، كعدت ابيت امي بس اقرأ
لا نطلع ولا نطب حدي للكلية و ارجع منتظرة امي تكوم على حيلها حتى نلكا بيت ايجار كالت نأجر بالسيدية

... رافد طلع من بعد يومين .. تعجبنا بس هو بمجمل القضية ، هو لا قاتل ولا اكو دليل على ان الصور هو المفبركهن .. الصور واصلات اله
و هذا اللي حجاه .. يعني القضية مو قوية

من طلع .. عرفنا ان الفلوس و الذهب مالت امي عد رافد .. رجعهن الها بأيد بتول .. و كايل الها :- تنسى الدين مالتها ما الها اي دين يمي و طلاك ما اطلك تريد خل تروح هي ترفع دعوة و اطلك و تتنازل عن حقوقها

ميعاد :- يعني يريدها حرب رافد و ما رايد ينهيها على خير ؟ سهلة

راحت بتول، كلت الها :- شتريدين تسوين

- تعرفين بعدين

ما عرفت هي شتريد تسوي ، بس العرفته توعدت اله
ايام و هي لكت النا بيت ثاني ننتقل بيه لان هاي المنطقة ما نكدر نعيش بيها بعد
كلها تباوعلنا بعين الفضيحة و العار
شاعت عليها ابنها كتلها لأن مو خوش مرة محد يدور بحقيقة الموضوع، الناس ادور بس الفضيحة

بهاي الأيام خالد رجع، جايب مرته من سوريا و جاي ، سمعت بيه، بس صادف رجوعه ويا شيلتنا فالتهيت عنه

اجرت عمال ينقلون كل غراضنا ، اتكفلت كل الشيلة لأن امي يا دوب تحرك ايد وحدة و جرحها بعده يوجعها

واكفة اشيل و اناوش العمال، وكف خالد :-، الله يساعدج

- هلااا شلونك، كالو رجعت بس والله التهيت بشرني شلونه ابنك

- بعده مريض و بتي سارة منا مريضة ، جبت ابني و المرة و اجيت لهنا اعالجهم اثنينهم

- شبيها سارة

- عدها فايروس بالامعاء و تشكي من بطنها و كل يوم تخابرني تبجي، كليلي انت شلونج شكو ماكو

- ماشية

- راح تشيلون

- اي والله

- احسن الكم امج شلون صارت ؟

- زينة بس ايدها

- دريت عنها كالتلي بتول

- انت ناخذ الاخبار مسبقا و تسأل

- ههه لا والله اول ما اجيت حجيت سألت بتول عنكم و حجتلي

حجا و التفتت للعامل يفتحله طريق حتى يشيل ، اني دخلت جوا حتى اكمل

طلعت اله امي، كالتله :- كالولي ما عفت ديار وكت الوكعت

خالد :- اكيد مو لخاطرج

ميعاد :- ما ناسيتكم خلوني اكوم على حيلي وكتها يبدي اللعب

خالد :- انت ورجلج اني ما الي دخل بيكم

- تريد تقنعني انت ما الك ايد بالصار

- مو ابالي تقتنعين او لا ، بس الحمدلله على سلامتج ا

ميعاد :- الله يسلمك و يسلم اخوك اذا راح يكدر يسلم

... راح هو و عافنا
شلت للبيت الثاني و اني و اثار هلكنا يلا كملنا البيت خصوصا هي عاشت مدللة مو مثلي امي جانت تعوفني احير بأسامة و بروحي شناكل و شنشرب، هاي تحضر الها الاكل من الليل حتى تجي تاكل و تلكا اكل

المعانات العشناها اني و اسامة ما عاشتها اثار فمايعة كل شوية تتحجج حتى تكعد و امي تصيح بيه :- صدك تعبت عوفيها حاطة كورج وياها

- لعد اني ما تعبت

- تعبتي عوفي ارتاحي و ارجعي

- و الشغل شيكمله
لزمت الماسحة وركضت ورا اثار، اندكت الباب

فتحته ، دخلت ام امجد سلمت علينا و تباركت لامي و تحمدت الها، امي سلامها جان جاف لأن بمشكلتها هاي محد وكف النا ولا حتى كلفوا نفسهم باتصال

اجت تكول:- اريد ارجع ديار و ضالين بالضيم و خطي مرت احمد يوميه تجي تنظف النا و تروح

ميعاد :- وكت المرينا بضيق محد منكم وكف وينا ولا احد كال هاي البنية الله يعينها امها و الميته و اخوها مسجون ، وبدل ما تقنعون رجلها ترجعون عليها رجلج و رجلج، هسه جايين تاخذوها من احتاجيتوها

ام امجد :- لا احنا ما عفناها بس رجلها عاند و الموضوع هم مو سهل رغم هذا عفنا الموضوع لحد ما اطيبين و نرجع نردها

ميعاد :- اعذريني بتي مال الها رجعه يمكم ، من رضت تتكفل جهال امجد و ضحت بنفسها و حياتها لخاطرهم مو يعني هي خدامة بس لان كلبها طيب ما قبلت تترك جهال مها و هي موصيتها بس انتم زدتوها حيل، وكت التمرضت عفتوها ورجعتخا و حذرتكم ووكت الطاحت بمصيبة اتخليتو عنها و هسه جايه تريدين ترجعينها و مو لعيونها لا لان محتاجينها و مرت احمد تعبت و هي تخدمكم كم يوم خطية .. اعذريني بتي ما ترجع

بقت تحجي ويا امي ، امي عاندت على رجعتي ما قبلت

بالليل خابرني امجد يصيح :- طابت امج و شعندج حجة بعد و انت ترديها حجه حتى تخلصين ، و تريدين الطلاك كولي ما واكف عليج طلعت روحي منج ما معتبر روحي متزوج
ومن هالكلام
ما حجيت ولا رديت عليه
كمل كلامة .. كلت اله :- كملت

كال :- اي

- زين لعد مع السلامة
قفلت الجهاز بقى يخابر ما رديت عليه

ثاني يوم داومت جامعة بس لان بعده شغل البيت ما كمل و هواي بالبيت يحتاجله تعديل، خاصه البوراي مي بالقطارة ديجي اشتريت ماطو بس ما عرفت اشده
فكملت اول محاضرة ورجعت

بالطريق خابرني خالد ، يسلم عليه ، كال محتاجة شي
كلت اله لا تسلم، بس الماطور عندي و هسه اخابر اشوف واحد ابو بواري يشدلي الماطور

كال :- انطيني عنوان البيت اني اجي اشده الكم ما يحتاجله شي

:- اني مسافة الطريق من اوصل اخابرك

رجعت للبيت، امي لابسه هي و اثار يريدن يروحن

:- ها وين ؟

ميعاد:- اريد اروح للتربية حتى اكمل نقل مدرستها

- و البواري ؟

- ارجع و الله كريم

- خالد خابرني كال اني اشده الكم

- جوزي من خالد ما اجتنا من وراه بس المشاكل

- هو شعليه ؟ و بعدين من ذوله ناسج و العالم كله محد وكف ويانا غيره

- دوريله تبرير بكل مرة حتى ما تعوفينه و اطلعينه من بالج، اروح اتأخرنا عود من ارجع نحجي

راحت هي و اثار و اني بدلت و بقيت ارتب بالبيت، اندك الموبايل ، باوعته خالد رديت

:- الو

- اني بالشارع الكلتيلي علية انتم بيتكم وين

- بالفرع اللي ع اليسرة مقابيل مرطبات احمد

- ها هذا اي كدامي

فات للفرع :- يا بيت

طلعت من البيت مديت راسي شفته من بعيد ، كلت اله :- جاي اشرلك

اجا هو :- بالعافية خوش بيت مبين

- اي بس تعبني كلش

- الماطور وينه ؟

هذت بالباب ، كعد يم الباب باوعه
طلب العدة درنفيش و ابلايس
انطيته و كعد يشد

:- ابنك شلونه

- اخذته البارحة للطبيب يكلي ما بيه شي بس كتبلي اله حليب طبي

- ان شاءالله خير ،

- اخبارج انت و امجد شنو

- خابرني البارحة يصيح و يغلط يريدني ارجع

- شقررتي

- ما موكفني عن الطلاك غير جهال مها

- الله كريم

- انت وضعك ويا زوجاتك شلونه

- حلوة مال زوجاتي ، عايفهن يضربن ابعض و طالع منها

- صدك والله ؟

- اي والله كافي عليه قهر جهال و هنا لا يوكفهن قهر ولا يكعدهن ضيم ، الف راسي وانام بالاستقبال واعوف امي تفاكك و تشعل بيناتهن

- السورية قابلة تبقى هنا

- هي الرادت تجي هنا وتكابل ضحى تغار

- مبينه تحبك

- اكو مرة ما تحب رجلها ؟

- ايي

- لو اكو ؟

- شتقصد ؟

- اقصد الماطور شديته راح اشغله اصعدي شوفي يوصل مي للتانكي

صعدت للتانكي ماكو مي

نزلت اله :' ماكو

فتح الصوندة :- يربج هذا المي قوي ليش ماكو

- ما يفتح

- اشو اصعد

- محد البيت شلون تفوت

- و قابل شراح اسوي دسويلي مجال

صعد فوك للتانكي ، اندكت الباب
هو بقى يفحص بالتانكي و اني نزلت جوا، فتحت الباب ، امجد كبالي

- السلام عليكم

صفنت بوجهه :- شجابك

- اجيت عليج مو كافي صبرت بما فيه الكفاية مستشفى و خليتج امج و طابت الرايدته بعد شنو

حجاها و هو يفوت للبيت

نزل خالد :- التانكي كملته عيوني جرى بعد شتحتاجين ؟

امجد وكف بمكانه ، يباوعلي و يباوعله.....يتبع

☆☆☆☆☆☆

☆☆☆☆☆☆