ليتني استطيع فعلها الحلقة (46)

ليتني استطيع فعلها

 

الحلقة  (46)

طبعي بارد واني م̷ـــِْن جوة احترگ
ابتسم بس بيا حسرة مختنگ
الدنيا ماتسوا بعد
الحظ ولامرة گعد
بعد ما بقت دموع بعيني
رَب لتسامح كلمن مأذيني

......

:- ماما اكعدي ماما ، ماما فدو ماماااااا ، اسامة ليش اسااااااامة

خااد :- ساعديني خل اشيلها ، تحرررررركي

ابو امجد:- ابعدي منها لا تحضنينها راااااح تمووووو

سحبها خالد مني و شالها كمت على اسامة لزمته راشديات :- ليش تسوي بيها هييييييج ليش ضيعتنا و ضيعت رووووووحك ليييييش حيواااان

كمت اضرب بيه بلا وعي و اثار اجت تصرخ بكل صوتها :- ديار ماماااااااا

اخذت اثار ولحكت امي بسيارة خالد، الفرع كله طالع يتفرج و كلها تحجي :- ابنها كتلها كتل غسل عار

ناس ساعدت خالد و هو يصعدها و ناس تصرخ و تكله روح استعجل رووووح ، صعدت وياه ورا و اثار وياي و ابو امجد كعد بالصدر

اصحي بأمي هي و الميتة سوا و جرحها ينزف امتلت السيارة دم . حلكها صار ابيض ، تخبلت كمت اصرخ :- الله يهدددددددك رااافد الله ينتقم منك

و اثار يمي تبجي و تصرخ :- ماااااما لا تعوفيني مامااااا

وصلنا للمستشفى اخذوها من ادينا بسرعه نقلوها، ركضنا وراها دخلوها للخاص الاطباء تراكضت الها

تأكدوا ان هي حالة اعتداء بأطلاق نار حولوها لصالة العمليات، كعدت بالكاع اضرب على راسي :- لاااااا ربي لااااااااا

خالد :- ديار قوي نفسج

كمت من مكاني :- ابتعد مني ابتعددددددد كله من وراكم خسرت امي و اخوووي الله لا ينطيكم

ابو امجد :- اهدي يابه صوتج منا العالم

ديار :- امشي ما اريدك يمي الله ينتقممممم منكم كلكم روووووح

ابو امجد :- بس اكعدي يا بنتي، مو حتى اختج كامت تصرخ من وراج

- عمو امي راحت عمو، اخوي ضاع ،الله ياخذني ولا اشوف هذا اليوم

احس اكو جمرة بكلبي من القهر اصرخ بكل صوتي و ما جاي تنطفي هاي الجمرة

خالد واكف على صفحة ما حجة، سأل ابو امجد :- شنو السبب الخلا اسامة يكتل امه اشسوت حتى يكول غسلت عاري

ما رديت عليه، كعدت ابجي، خابر امجد على عمي كاله :- دخلوها للعمليات

امجد جاوبه :- اسامه راح سلم روحه للشرطة و كال الهم كتلت امي و الدنيا انخبصت هنا الفرع كله يسأل مراهق يكتل امه بمسدس شنو السبب

ابو امجد يستفسر مني و اني اكله :- والله عمو ما اعرف الصار بس خابرتني كالتلي تعاي اسامة لازم المسدس رافد راح يورطه بكتلتي

-اهدي و على كيفج خلي اني اروح اشوف هالولد اسامة شصار بيه مسلم روحه الغبي شيخلصة بعد

طلع دكتور و كال نحتاج توقيع من ذوي المريض ع العملية، في حال فقدنا المريضة المستشفى ما تتحمل المسؤلية

رادو زوجها او ابتها او اي احد من عائلتها كلت الهم: بس اني الها

وقعت على عمليتها و اخذت الموبايل و اتصلت بامجد حتى اعرف اخبار اسامة ما رد، دكيت على عمتي ردت

:- الوو ها خالة

- ها ولج ديار شصار ويا امج شلون اسامه كتلها راح نتخبل

- ما ادري بس كليلي اسامه وينه

- والله يا بنيتي ما ادري الدنيا هوسه بيت ابو رافد.يحجون شكل و النس شكل و ما عرفنا الصدك، على اساس خاينة رافد ورايحة شقة و مصورينها بصور مو اخلاقية صدك

- ماكو هيج حجي كله جذب رافد راد يوكع بين امي و اسامة و ضرب عصفورين بحجر باسلوب رخيص الناقص

- الشرطة هسه ابيتكم و هوسة صايرة

- شيصير كليلي و خبريني خالة لا تعوفيني

- ان شاءالله

قفلت الخط من عندي، اثار كاعدة بالكاع و تبجي و مخليه ايديها على عيونها، تق بت منها و اخذتها بحضني و كمت ابجي وياها

كمت اهمس و ابجي :- ياريت ما خلفتنا ياريت متنا قبل لا ننولد عدها و عد اسماعيل الخنزير ، ياريت سقطتنا من بطنها و ما جابتنا لهالظلم و لهالعار

شلون راح نواجه الناس شراح نكول شراح نحجي و شنبرر اخونا كتل امنا بغسل عار شراح انسوي اني وياج

الف مرة كلت الها يمة فكري بينا فكري بأبنج فكري بسمعتنا بمستقبلنا لحد ما وصلتنا الهالحال و وصلت روحها

شراح نسوي ؟

رجع خالد اجا .. مر من كدامنا و هو يسأل الممرض ع العملية جوا،كاله :- من تخلص نبلغكم

كمت من مكاني :- شرايدين من عدنا بعد

- اني ما ادري بكل اللي وصل رافد ولا عندي علم بيه

- منتظر مني اصدكك انت اكثر واحد تتمنى الشر لامي

- لامج بس مو الج ولا لاسامة ولا اطعن بعرض احد لو اسويها جان سويتها وكت التزوجتي امجد

دك الموبايل، باوعته امجد، رديت :-، الو ها امجد

- خ** بأمجد و خ*** بساعة السودة الشفتج بيها اسمعي لج كدامج نص ساعة لو تجين للبيت و تتبرين من كل عائلتج لو ارمي عليج يمين الطلاق و اتبرى منج

مو اني الاخذ مرة امها ساقطة و اخوها يغسل عاره منها و مرتي ويا امها العار تنتظرها تصحى اركبي سيارة و ارجعي للبيت بسرعة

- انت شجاي تحجي ذوله اهلي امي اشلون اعوفها

- انعل اهلج واحد واحد شخصني تنضر سمعتي باهلج ارجعي بسرعة ديار

- ما ارجع و شتريد تسوي سوي

- تبيعيني لخاطر اهلج العار مووو

قفلت الخط من عنده، حجه خالد :- امشي ارجعي لرجلج و اني راح ابقى وياها

- لو مو رجلي لو الدنيا كلها امي ما اعوفها بهالحالة

- بكل الاحوال انت ما بيدج شي تسوينه غير تكعدين و تنتظرين، ارجعي و اني ابلغج بأي مستجد

-ما اروح

- امج خسرت، انت لا تخسرين كومي ارجعي

- كلت الك ما اروح

اجا ضابط شرطة :- السلام عليكم

باوعت لخالد هزلي راسه ورد : و عليكم السلام

:- حضرتج شنو تقربين من المجني عليها

باوعت بوجوهم :- اسامه وين ؟

- اسامة بقبضة العدالة فياريت تخدمينا حتى القانون ياخذ مجراه ، و جاوبي ع السؤال شتقربين من المجني عليها

- تصير امي

- تكدرين تتفضلين ويانا

خالد :- العفو سيدي امها بعدها جوا

كاله :- و ان يكن التحقيق ملزم بالقضية وننتظر حالة المجني عليها

- بس بتها ماالها ذنب اللي صار

- ما كلت هي مذنبه دنحقق وياها

- حقق وياها كدامنا مو بالمركز

- انت شتقرب من الضحية ؟

- اني اخو زوجها و شاهد على كل الصار

- تفضلوا ويانا

باوع لاثار صاحلها و كال الها :- تعاي

كعدنا حقق ويانا و ذكر ان رافد كايل :- لكيت مثبت على ماسحة سيارتي بيه صور للمجني عليها و الحادثة غسل عار لان هي ما نكرت جرمها ان هي خاينته وهي على ذمته

كلت اله :- جذاب هي ما خانته و كل هالصور تلفيق عليها حتى ينتقم منها تطلبه ١٨ مليون و غلسهن عليها و من طالبته بيهن لفق الها هالتهمة و خله اخوي يكتل امي و خدعة لو شريف هو جان هو كتلها مو اخوي بس هو ورط امي و اخوي سوية

احجي بحركة و ارجف و ابجي

خالد حجه ان المرة خوش مرة و ما شفنا منها شي مو زين صار خلاف عائلي قبل ايام وردنا نعدي بس هم الاثنين جانت الامور بيناتهم متأزمة

ما اعرف عن الظرف شي اني جنت واكف اباب محلي لما شفت بنتها ديار تركض بالفرع، دكت لباب بقوة ساعدتها بكسر الباب، اطلاق النار صار ويا كسرة الباب
ما شفنا غير اسامة لازم المسدس و الام واكعة
ما جانت فاقدة لما شلناها بس جانت تنزف و ما تكدر تحجي لما شلتها و حطيتها بالسيارة اغمى عليها

كلما يحجي خالد يدك موبايله اضطر يققله حتى يكمل تحقيق، حتى اثار حجو وياها و حققوا

عافونا و مشوا سألته على اسامة ما قبل يجاوب بقيت الوب بمكاني اسامة مناك و امي منا و احتاريت من اندار و المن اروح

خابرت ابوي حتى يجي لاسامة، جان بالانبار ما يكدر ينزل ، تخبل من سمع كال :- راح اخذ اجازة و ارجع لبغداد فورا

خابرتني عمتي تكلي :- ارجعي و عوفي امج لا تخسرين رجلج تره راح يطلكج ما بينا حيل لحجي الناس و السمعة المو زينة

- خالة بضميرج سلون تريديني اعوف امي و هي بهالحالة و ليش حكمتو عليها بالعار لي ما الهالسالفة تلفيق عليها حتى رافد ينتقم منها

ام امجد :- تلفيق ما تلفيق الناس لختنا بالخ*** حتى قنوات اجت تصور على كثر ما الفرع انخبص شلون واحد مراهق يكتل امه، كفي سمعتنا من العار و تعاي والا لا تلومين امجد لو طلك

- اذا اني هلكد رخيصة عدكم طلكو والا ع القل امي تكوم بالسلامة اسمع اخبار عنها مو و هي بالعمليات تريدوني اعوفها ، نا اعوف و كولي لابنج شيريد يسوي يسوي

بقت هي تحجي و ابو امجد كام يحجي ويردوني اعوف امي و اتبرى منها حتى لا تنلطخ سمعتهم

اجت قناة عراقية تغطي الحدث و تستفسر عن الاسباب، رادوا يحجون وياي تعارك وياهم خالد و طردهم

محد اجا ولا احد وصل و امي مرت ٤ ساعات و هي بالعمليات ما طلعت ، الطلقة اللي بجتفها طلعوها بس اللي بصدرها قريبة من القلب و خطرة جدا و لهسه العملية قائمة حتى يداركون الخطر

خالد اهله ما بطلو يخابرون عليه سمعته يحجي ويا ابوه، الظاهر جاي يتعاركون وياه لان باقي وياي يردونه ينسحب حتى العار ما ما يلحگهم

لليل خلصت عملية امي، طلعوها من صالة العمليات كمت امشي وراهم و اتوسل بالدكتور :- فدوة دكتور بس كلي حالتها شلونها

- العلينا سوينا و راح ننقلها للعناية المشددة و تبقى يم الله ، ادعولها

اخذوها و مشوا بالسرير كمت ادك على راسي و ابجي ، اخوي بالسجن امي بين الحياة و الموت كعدت اصرخ و ابجي و خالد يواسي بيها و اثار حاضنتني

خابرت بتول خالد ، رد عليها ، كالتله :- عزا و صخام قناة ال*** مغطية الحدث و نازل بالاخبار

(في حدث يهز منطقة الدورة جنوبي العاصمة بغداد شاب مراهق يقوم باطلاق النار على والدته و يسلم نفسه للعداله في ظل ظروف غامضة للقضية )

و مخلين تشويش على وجه اسامة و الشرطة تحقق وياه

تخبل خالد و اني كمت الطم على اخدودي انفضحنا و انشهرنا انوب ع القنوات صارت فضيحتنا

اخذ رقم القناة و خابرهم و كال الهم :- عيب هذه مو مادة اعلانية دسمة تستفادون بيها هذا شرف ناس و سمعتهم بأي حق مطلعين الشاب و تحققون وياه

كايليله :- احنا عدنا اذن بالتصوير من ضابط تحقيق القضية و تكتمنا على اظهار وجه الشاب و زوج امه و حطينا تشويش على شخصياتهم احنا غطينا الحدث لا اكثر

حاول وياهم بس عدهم تخويل قانوني شنحجي وياهم بعد ، القنوات تفكر بس تغطية الاحداث و تتسابق ع الاحداث المهمة ميهتمون بالعوائل و الامور اللي تنفضح او تضر بسمعة الناس اللي يغطون جريمتهم و يشهروهم

الامور انلاصت فد مرة .. قلوبنا تعبت و اجسادنا هلكت من التعب و الوكفة الليل كلة منما و لا غمضت النا عين بس اثار نايمة بحضني

خابر خالد على اهله الظهر .. طلعو ماخذين رافد للتوقيف لان مختلف بالتحقيق مرة كايل الهم هي اعترفت و مرة كايللهم هي نكرت فصرت عصبي

و الصور اثبتو ان هي فوتوشوب مو حقيقية اعتبروه محرض للجريمة و ماخذينه حتى يكملون التحقيق بالقضية و منتظرين حالة امي حتى تتبين القضية

امي للاسوء ما كاعد تتحسن بالعناية و محد يكدر يوصل الها

دك موبايل خالد هو كاعد.يمنا، كام كال :- هذا رقم دولي احتمال مينا

ابتعد لهناك و رد .. اسمعه و هو يكللها :- بس لا تبجين و فهميني شصاير ، هااا لا تخافين اني باجر يمج باقرب وقت ، يربج ماكو هسه ما اكدر اجي الماما وياج لو لا

بقى يحاول يقنع بيها و طول بالاتصال وياها لما كمل و اجا ، سألته :- ها شبيها ؟

- الدكتورة محولتها عملية اليوم فورا و دا تطلبني اجي هسه

- شنو راح تجيب

- اي بس هي كالتلي الشهر الجاي المفروض ما ادري شنو صاير حتى هسه راح تجيب

- الله يسهل الها ، راح تروح

- باجر لازم اروح الها تريدني اليوم بس ما الحك الساعة ب٤ لما احصر غراضي لما اريد اطلع صاير الليل ما اكدر

ما دام اني هنا شرايج ترجعين للبيت تغسلين تبدلين انت و اختج و ترجعين ؟ سالفة الشكلها مطوله لازم تجيبيلج جنطة وياج حتى حتى اذا نقلوها ترافقيها

- ماشي

- كومي وياي حتى اخذلج تكسي

كمت نزلنا اني وياه و ديار، تلاكينا ويا امجد بالطريق
وكف كبالنا، باوعلنا :- يعني تختارين اهلج ؟

خالد :- نطلع برا و نحجي مو هنا بالطريق امشي

امجد :- و انت شعندك وياها انت شخصك بيها معليك امشي وروح للبيت ما الك علاقة بيها

خالد : والله لو لاكيك تسد مكاني فلا اوكف ولا ابقى يول استحي على نفسك مرتك بهالحال اخوها مسجون و امها مذبوحة و بس هي و هاي الطفلة لا حول ولا قوة، و انت تخيرها يا اهلج يا تطلكين كل همك الناس و شتكول الناس

اتقرب امجد ويا طول بطول و حجه :- شعندك وياها احجي
احجيييييي.. دفعه

خالد :- طريق و منا ناس لا تخليني ابتلي بيك هسه امشي من يمي

ديار :- امجد مو وكته الحجي امشي

اخذني من ايدي بقوة و مشى بيه و هو يغلط ،درت وجهي لخالد وراي اشرلي روحي

رحت ويا امجد صعدت بسيارته و هو يصيح :- ايييي واكفة ويا خاااااالد عاجبتج الوكفة وياااااه مووو كوليها هو انت تريديها من الله كوليها طلكني و خل اروح لخالد، مأممممممممنة، يهمج انت امج ميعاد

- نزلني

- شنو بالله

- جاي اكلك نزلني

- لا وفوك شينج كواة عينج

- ترى تحملتك بما فيه الكفاية عيب عليك لا انت الواكف وياي و كل اليوكف وياي تشك بيه فهمني شتريد مني ؟ تريد اطلكني طلكني
تريد تعوفني عوفني ترة والله ما بقى براسي عقل و افسر بيه تعبت كاااافي

- رجعه الج للمستشفى بعد ماكو

- مو على كيفك هاي امي لا انت و لا غيرك يمنعني منها

- امج كح... امج اخوج تورط بيها و غسسسسسل عارها شرايدة من امج بببببعد

- بنظرك هيج ميهمني اني اعرفها مظلومة و ما اتركها لو تخيرني بيني و بينها راح اختارها فخليها بعلمك

- زين لعد

ساق و سكت و هو اعصاب وصلني لبيت اهله، نزلت
ابو امجد و امه بقوا يحجون وياي عوفي المستشفى عوفي امج اكسبي رجلج

كلت الهم:- مع احترامي لامجد بس لو راح امجد يتعوض ولو الدنيا كلها تروح تتعوض ، بس لو خسرت امي منو يعوضني ؟
لو خسرت اخويه وين الكالي اخ بعد
شلون تريدوني اعوفهم و اني بالدنيا ما عندي غيرهم لا عمام ولا خوال

تريدون تصربون وياي مثل ما صبرت وياكم صار سنتين اهلا وسهلا، تشوفوني اني عار عليكم و ما اشرفكم طلكوني و خلوني اسند الباقي من امي

حجيت و صعدت فوك و اسمع ابو امجد يكله ، اصبر هالفترة و نشوف وين توصل ترا رافد انسجن و اكو اخبار تكول هو اللي لفق الصور الميعاد لان الصور طلعن فوتوشوب وراد يشهر بيها حتى ما ينطيها فلوسها و الا ليش كل هالسنين ما طلع شي على ميعاد و ما وصله شي الا باليومين التعارك بيهن وياها اكو انه بالسالفة خل نصبر ولا نظلم البنية ويانا

فتت لغرفتي و اثار وياي، تعبانة بسرعة تمددت ع السرير و تغطت و نامت، لميت غراض الي و سبحت ، ردت اروح لبيتنا كالت عمتي مقفول و ما ادري القفل عدمن

- شنو مقفول فلوس امي و مستمسكاتها و ذهبها كله بالبيت المفتاح عد منو ؟.

- والله ما ادري

خابرت على بتول ادزلي كم قطعة ملابس من بت خالد لاثار ، كالتلي اني ادبرلجياهن و ادزهن الج بيد سيف ابني

انتظرتها شوية و اجا سيف انطاني الملابس كومت اثار تبجي تريد تنام سبحتها و مشطت الها و رجعت نامت

ردت اروح ارجع للمستشفى، امجد مطنكر و بس اطلع من وراه و اخذ تكسي صعبة ، عاد خابرت على احمد اخوه كلت اله :- توصلني ؟
هيج و هيج القضية و امجد عصبي
كال :- اني جاي
بحدود نص ساعة صاحلي احمد من جوا، امجد اعترض ما يقبل اطلع يكلي :- خليها باجر لو الا اليوم حلتلج نومت المستشفيات و العالم تتفرج عليج ..

- شتتفرج امجد اني بيا حال و اباوع الناس و بعدين اني بقيت خالد هناك و مرته بعمان عدها عملية يريد يرجع يغبش الها

- هذا الكاتلج انت خاااااالد ااااي خالد كله خالد

- استغفر الله ربي و اتوب اليه جاي اكلك مرته تطلك و الولد ما قصر وياي شتريدني اكول بعد ؟ .

احمد :- امجد حقك بكل التكوله و الموضوع مو سهل و القضية توسعت و حتى بالقنوات انبثت و محد كايل مو حقك بس اصبر نشوف وين توصل يمكن صدك يطلع رافد هو المتورط مو ام ديار، يعني اذا طلع رافد هو الغلطان وياهم بدل ما نلوم رافد نطلك ديار و نقاطع امها هم ما يصير

ابو امجد :- وهذا الجاي اكوله صح الوضع صعب بس ما بدينا شي لازم نصبر و نشوف تاليها

كمت من يمهم و طلعت برا، امجد بقى يحجي احمد تفاهم وياه و اجا وصلني اني و اثار للباب حتى ما دخل وياي للمستشفى

دخلنا اني و اثار، و اني اصعد خابرني ابوي، رديت :- ها بشر

- بعد القضية لازم يتحقق بيها اسامة متورط و ننتظر حالة امج تبين حتى نتصرف اذا ماتت تتعقد القضية و اذا عاشت تكدر تتنازل عنه، بكل الاحوال ما اكدر اتصرف هسه الا تكعد امج او تموت لان القضية بالتحقيق

-وراح يبقى اسامة بالسجن هيج ؟ الله لا ينطيك رافد الله ينتقم منه

- مو الله الينتقم منه اني الانتقم منه

- شراح تسويله

- تجيج الاخبار ، امج كعدت ؟

- لا بالعناية بعدها

- اي شي يصير وياج خابريني

سديت الخط منه وكت الخلاني احتاج لاسماعيل و اخابره حتى يطلع اخوي رب لا تحطني بهالموقف دخيلك

مشيت صعدت فوك لاكاني خالد ، الفرحة بوجهه مبين حيل فرحان اول ما شافني صاح :- دياااار باركيلي ديار صار عندي ولد

حجيت بلهفة و بفرحة :- صدك ؟!!!

- اي والله خابرتني امها هسه جابت ولد ، صار عندي ولد باركيلي ديااار

يحجي و الفرحة ما واسعته ، فرحتله بكد الفرحة الاشوفها بوجهه و هو احسه طاير و الكاع ما مكفيته من الفرحة

بقيت واكفة اباوع فرحته بأبنه، يروح و يرجع و يخابر، بشر امه بشر ابوه بالولد بس بقوا يلومون عليه لان بالمستشفى سده منهم ما راد يخرب فرحته رجع خابر ام زوجته و هو يطمن على مينا شلون صحتها و يحجي بلهفة

قفل موبايله و باوعلي :- تكدرين تبقين وحدج ؟

- اي بس اريد اروح لاسامة اشوفه كلبي نار عليه

- هسه صعب الافضل تبقين هنا، لحد ما نشوف حالة امج وين توصل حتى بعدها نوكله محامي

- يمكن ابوي موكله محامي خابرني كالي اني متكفله منتظر حالة امي

- الله كريم

-راح تسافر باجر

-مضطر بس راح يبقى بالي يمج شلون راح تبقين وحدج

-الله كريم خلصت مستشفيات سلمان اركض بيه وحدي مو جديدة

- انتبهي و خليج نبهه وفطنة و فتحي عيونج و اذانج عشرة عشرة حتى محد يكدر يورطج

- شلون راح تخلص القضية ؟

- بكل الاحوال مراح تخلص سلامات، في حال ماتت امج .. راح يتورط اسامة اكثر و تتعقد اكثر و في حال صحت اسامة ممكن يطلع و يتورط رافد بس بكل الاحوال امج انفضحت لان صورة من الصور هي حقيقية ويا رجال بشقة سواء كانت قبل رافد او بعد الناس عرفت ان امج مو زينة و صاحبت شقق

يعني بمعنى اصح امج انفضحت و احتركت ورقتها و ما راح تكدر تخلص من هذا العار لو شما سوت الا اذا ماتت .. هذا اللي جنته من اعمالها

اما وضعج فهو اذا ماتت تخلصين من عارها بس يبقى يلاحكج ، و اذا عاشت انت مخيرة يا تعيشين ويا رجلج بشرف او تختارين امج و تشاركيها العار

-جاي تصعبها عليه

- حسبي الامور ليكدام حتى لا تتفاجئين بيها و تحسمين امرج

طلع واحد كال :- انت اللي ويا ميعاد فوزي ؟

كمت بلهفة :- اي اني

خالد :- بشّر ؟.... يتبع

☆☆☆☆☆

وهذه ناقة ال٧ مليون
اشكر متابعتكم و محبتكم و كل تفاعلاتكم الجميلة ❤

☆☆☆☆☆☆