المراهقة والأربعيني الحلقة (4)

المراهقة والأربعيني

اللهجة من الحلقة ال4 تتغير من المصلاوي للهجة العامية

الجزء الأول

الحلقة  (4)

الموصل ...........

ليليان.. لما دحقت أخويه يحيى وهو طالع من بيتنا ويمشي اتجاهي.. انتهيت متت بمكاني.. وصل وكال..

يحيى:- هاي شكو شدا يصير ؟

حجت جارتنه وكالتله:- أمي دير بالك على أختك صغيره لا تجيبلكم الفضيحة..بنات هلوكت مالهم أمان..

-شديصير ليلياااااان..

-ااا ما صاير شي والله .. كنت جايه من المدرسة و......

الحجي:- بويه اخذ أختك واستر عليها وعلمها تره عيب تطلع وتجيب صاحبها للمحلة وصياحهم بالشارع.. لو ما أبوكم جان رجال مستور.. مع الأسف..

يحيى:- أنت شجاي تحجي.. شلون تحجي على أختي هيج.. دفعه للكاع وراد يتضارب وياه.. والحجي كامله وتلازم وياه.. ويتصايحون

والحجية لزمت بيه و وتكله ياااا ولك عين تحجي بدل متهد علينه روح ربي أختك.. وخر يابه وخر فوكاها هم أهل الراهي..

إني بس دموعي تجري.. تركتم وركضت ع البيت أبجي.. أول مدخلت البيت أنضرب الباب وراي وطب يحيى..

لج ساااااقطه منو هذاااااا.. وين تشردين مني اشرب منج دم والله... ليلياااااااااان

أم ليليان:- يمه بنتي سترك ربي.. شصاير.. شكووو

-ماما فدوه الحكيلي.. وحضنتها.. أجه يحيى دفع أمي حيل ولزمني من شعري.. ولج ساااقطه منين هذاااا

تردين تفضحينه بالممممممممممحله.. ولج تجيبينو للبيت يوصلج كلببببه..

-أبجي واحجي وياه.. يحيى والله ما اعرفو.. هو لاطش ما اعرفو والرب.. وأمي تجر بيه وتصيح اختتتتتتتتك يحيى لااااااا هيج.. شصاااااير يمه بنتي..

وأمه تجر بيه وهو يصرخ ويضرب ويدفر ويغلط ويكفر..

يحيى:- دازيج للمدرسه تكو..... لو أدرسين ادبسز.. وترفضين ياهو الجاي طلعتي ضامتلج واحد وتردين فضيحتنه بالمنطقة موووو..

ليليان:- ما أرد بس أبجي وضامه راسي بظهر أمي وأمه لازمه بي.. وهو يصرخ ويعيط بكل علو صوته انوب جر جنطتي وطلع كتبي وكامي يلزم ويشك..

كمت اصرخ حيل كتبي لا يحيى فدوه لاااا مدرستي... وهو يشك ويغلط فرفحت روحي ع الكتب يجرون منو.. وهو يشكك بيهم كمت الطم على وجهي من القهر

وأصيح والله ما اعرفو هو لاحكني والرب مالي شغل بي حرام عليكم.. جرتني ماما وأخذتني للغرفة..

أخدودي كلها زلغتها ووجهي احمر كد ما صفكت على وجهي من القهر شاط دمي.. شنو ذنبي باللي صار هو لاحكني والله..

إلام:- وج يمه فهميني منو هذا ..

-يووم والله ما اعرفو قسم بيسوع ما اعرفو والله.. وابجي..

-عجل منين هذاااااا وشعندو لاحكج.. صخام الصخمج منين اجتج هالمصيبه شجابو عليج.

-ماما كتبي حرام عليكم ما أريد أبطل من المدرسة.. فدوه أحجي وياه لا تخلي يبطلني الله يخليج ماما فدووووه..

-دنشوف وين توصل يا أمي والله كريم .. سترك ربي منين اجتنه هالمصيبه..

ليليان:- نحجي إني وماما.. و دخل يحيى كمت إني وماما وكفنا وهي كبالي ساده عني....

يحيى:- ما اضربج بس كليلي منو هذا ؟

-ما اعرفو والله يحيى..

-ولج لا تنكريييين لا تخبلييييني اذبحج والله كولي منين هذاااااااا.. وين أهله منيييين عرفتي شلون يجيبج للمحلة.

-ما جابني والله يحيى هو لحكني..

-شعندو وياج احجييييي

-كلما أفوت إنا وسارة يسمعني كلام وصار أيام والله منمر من طريقو حتى لا يتعرض إلنا.. بيش اقسملك بس والله ما اعرفو يحيى .. أحجي وابجي وامسح بوجي..

-منين وين يشتغل.. شسممممممه.

-ما اعرف.. بس اللي اعرفو يشتغل بالسيطرة اللي قبل الفرع مال المدرسة..

-شنو شكلو شسمو من يا منطقه..

- أسمو ما اعرفه .. طويل وشعرو خفيف وعندو شامه فوك حاجبو وكلامو ما مصلاوي.. لهجتو غربيه..

-اسمعيني طلعه من هنا ماكو.. عتبت الباب ما توصلين فتهمتي لحد ما ارجع..

-هزيتله راسي والدموع بعيني..

طلع وأمي و مرت أبويه كاعدات يمي ويحجون ويايه واني أبجي..

بيومها على أساس يجي خالي بس تعطل وما أجه.. خابرته عليه ماما أكثر من مره بعدو بدهوك..

جا يحيى بالليل هو وأصدقاء الو لابسين دشاديش ولحاياهم طويلة.. أكثر كلامهم كان فصيح...

وما كدرنا نستمع هواي لان يحيى زكح بينا وكال التتسمع متلوم إلا نفسها ونريد چاي بسرعة..

إني تركتم ورحت ع الغرفة.. وبقت ماما و مرت أبويه يحجون.. كل همي كان كتبي ومدرستي لامه الكتب المشككة واجمع بيهم وابجي.. ميصيرون

شيرجعني.. المدرسة لو شافت هيج كتبي تفصلني. ما أريد أبطل يارب فدوه .. مدرستي أحبها.. ساعة أشم بكتبي وأخليها على عيوني وابجي وساعة أكلب بيهم ودموعي فوكاهم..

.............الرمادي ..............

صراع:- بالمركز دا اشتغل.. ودك موبايلي.. دحگت عليه... مكتوب طلال.. منو هذا طلال.. ما أتذكر منو..

رفعت خط.. الووو

-الو العريف صراع

-نعم تفضل

-إني الشرطي طلال الرافع اللي بالفوج وي عابد..

-هاااا هلا يابه أهلا وسهلا .. اعذرني الذاكرة تخون. شلونك يابه اشلون الصحة..

-الحمد لله أبو حرب.. خابرتك على شغله صارت البارحة وما مطمئن ألها..

-اللي هيه ؟

-البارحة العصر مرو جماعه يسألون على ولد مواصفاته تشبه عابد وكالو من الغربية وعرفت يقصدونه..

جان عابد نازل فكنالهم ما موجود.. العجيب من البارحة ولليوم عابد مفقود..

-اكف لحظه هين.. شنو ذوله الجماعة منين وشيردون من عابد.. ؟ وشنو يعني عابد مختفي.. وحده وحده خل أفتهم

-والله أبو حرب ما اعرفهم.. بس يخوفون.. لابسين دشاديش و لحايه.. والخوف إذا جانو من جماعة الدوله الاسلاميه..

-يابه شنو القضية .. شجاب عابد على الدوله الاسلاميه وشعندو وياهم.. فهمني.. خابرت عابد انته.. اكف خل أخابره..

- أبو حرب إني خابرتك حتى تشوفه هم جانو 4 رجاجيل.. 3 أصحاب لحايه.. وواحد منهم اشكر ابيض.. شكله مال أكراد..

-خل اخابرو وارجع أخابرك.. خل أشوف هذا وين.. سديت الخط وانه گلبي يخفك على عابد بس لا صايرلو شي..

خابرت.. موبايلو يدك وما يشيله.. ارجع أخابر وهم ميرد.. ب8 مكالمات ميدك.. تركت المركز وطلعت..

خابرت على سعد و نائل إخوتي.. كلتلهم هيج وهيج السالفة انه طالع للموصل أدحك وين صاير..

طلعت للموصل وصلت الظهر للسيطرة مال عابد.. حجيت وي جماعتو ميعرفون وين.. الأهل خبصوني اتصالات.. وما أرد..

شرد أكلهم مختفي.. بقيت محتار.. واتصل وماكو.. جن الدنيا صفكتني على وجهي.. دخت ما أندل طريقي منين..

وآلامه كلها تخابر.. اجت رسالة دحكت عليها.. من سعد كال احنه بالموصل أنت وين.. خابرتو واتلاكينه..

ولد عمي كلهم تسلحو واجو.. 4 سيارات .. كالو ما تبينلك شي ما دريت عنه..

-شدري عنه فص ملح وذاب.. غير كون يرد.. راح أتخبل..

جاي نحجي.. خابر طلال وكال أبو حرب تكدر ترجع للفوج مالتنا.. اكو واحد.عنده كلام عن عابد.. صديقه اللح..

كتلو ثواني واحنه يمك.........

،،،،،،،،،،، الموصل ،،،،،،،،،،

ليليان:- لثاني يوم ما رحت ع المدرسة مرت عليه سارة.. وطالعلها يحيى كايللها بطلت من المدرسة بعد.ما تروح..

ذاك اليوم ابد ما نشفو أدموعي على مدرستي.. شعوط كلبي من القهر..

أجه خالو ومرته.. الظهر.. وتغدو.. طبت عليه أمي تكلي لمي غراضج ترحين وي خالج واني اتبعج بعدين..

ما حجيت رحت الم ملابسي بسرعة...

واني دا الم بملابسي.. سمعنا صراخ واعياط بالشارع وصوت يحيى واضح..... كل احنه ركظنا للشارع دنشوف شصاير

واحد من المنطقة معير يحيى بيا ومتضارب وياه..والمنطقة كلها واكفه ويفاككون..

.. خالو عرف شنو سالفة الولد وتخبل ويلوم بأمي ويصيح عليها على أبو ما عرفتي تربين بنتج..

ومرت خال جن جنونها تحجي وتسمعنا كلام السم.. و هاي أم الولد السمعتها بالكاع ناخذها لابنه.. لو تضل اخر وحده فلا أخذها جنه ..

حجت هيج وأمي طكت وياها.. شلون تكولين هيج على بنتي.. محد يصدك إني ما عندي شي وياه كلها مقتنعة إن إني جنت وياه.. وهذا اللي كان مخبلني..

محد يسمع منك.. كلها تقتنع بفكره هي تخيلتها.. القهر اللي صابني ذبحني.. اشنو ذنبي إني وهيج يصير بيا..

صارت المناكر والصوت ارتفع بين خالي ومرته وأمي.. تكللها بنتي ما عدها شي وهذا لاحكها وشوه سمعتها ومرت خالي ترده ماكو دخان بدون نار وبتج طاش خبرها وي صاحبها وأجيبها لابني شنو قلة نسوان..

وبعد المصايح.. خالو اخذ مرتو و طلعوا بس أمي حيل أتأذت وكامت تبجي وساعة تلوم بيه وساعة تدعي عليه من حرگة قلبها..

بقيت محبوسة بالغرفة.. يومين.. لا اطلع ولا أجي وبس أبجي اجت سارة مره و يحيى طاردها ما قابل تدخل.. عشت بقهر فضيع على دراستي..

كاعده بالطرمه الساعة 10 الصبح وأقارن لو هسه إني رايحه للمدرسة يمكن هسه الدرس ال3

وابجي وأتذكر.. كل كلمه بيني وبين سارة وخوفنا من الامتحان والمراجعات.. يارب شلون راح أتحمل أريد ارجع لمدرستي..

دا أفكر وي نفسي.. اندكت الباب.. گمت صحت من وره الباب... منو... صاح ...انه ..

-منو انته ؟

-غير تفتحين الباب ونحجي.. واكلج منو انه..

-فتحت الباب شويه... ومديت راسي ادحق منو .. شفت رجاجيل كومه.. و4 سيارات حديثه وواكفين أبابنه..

حجه وياي رجال وكال ..بيت يحيى هاذ ؟

-رديت الباب من الخوف وحجيت من وراه... اااا اي.. منو انته وشرايد ..

-صيحي أريد أحجي وياه..

-ما موجود بالبيت الظهر يرجع..

-أنتي اللي أسمج ليليان مو ؟

-رجعت ادحق عليه منين يعرفني.. أنت منو.. بقيت أركز بملامحو.. بساع شبهت على وجهو.. نفس هذا اللي لحكني وتحرش بيه بس هذا مشيب ذاك لا ..يمكن أخوه..

طبكت الباب بوجهو حيل وما رديت وركضت جوه.. ما ادري شصاح وراي ما سمعت.. دخلت على أمي فحطانه وخايفه... أصيح ماما ماما لحكي..

اجت مرت أبوي.. صرخت شكووو..

-باجي رجاجيل وسيارات كومه بالباب

-منو همه ؟

-ما اعرف ما اعرف طلعيلهم.. اجت أمي كالت منو.. شكو.. طلعت مرت أبويه.. وأمي وراها..

واني وكفت ادحق عليهم من باب الهول.. أمي و مرت أبويه يحجون وأدور خابرن يحيى والرجاجيل بعدهم بالباب.

إني شفت شكلو يشبه ذاك الحقير معقولة أتخيل.. لا والله ما أتخيل إني متأكدة بس هذا مشيب وسمين.. وذاك شاب وضعيف..

إي إي والله نفس العيون والخشم حتى الحاجب نفسه بس هذا عندو شوارب ذاك ما عندو..

شعدهم جايين يا الله بس لا تصير مصيبة دخيلك يارب.. لشوي دخلت ماما..

ركضتلها.. ها ماما منو ذول.. أحجي والله خايفه..

-اسكتي لحظه بس خل يجي يحيى.. .. ها يحيى يله يمعود وينك اشتهرنا كلهم بالباب واكفين ومسلحين وبس احنه بالبيت تعال

إي إي أمك جاي تحجي وياهم استعجل فدوه .. يلا .. بس لا تتأخر..

-ماما بس أحجي منو ذوله وشرايدين. ليش جايين ..

-يكولون أنريد ابنه..

-منو ابنهم..

-اسمه عابد .. تعرفينه..

-لا ما اعرف هيج اسم.

-يكولون يحيى يعرفو نريد يحيى..

-بقينا على أعصابنا وهم بالباب لحد ما جا يحيى.. ودخلو للاستقبال..

احنه بيتنا صغير.. الكراج اله باب واحد يدخل للبيت وهو باب الهول.. ومن الهول.. تدخل للاستقبال على الأيد اليمنى..

ف من طبو دخلنا للمطبخ.. وهم فاتو للاستقبال.. مشينا بساع وكفنا على جانب الباب نتسمع.

يحيى:- دا أكلكم ابنكم ما اعرفو ولا شايفو.. شنو تردون تبلوني بيه...

صراع:- دحج يابه ترانا مو زعاطيط جدامك وتضحك علينا.. كلش زين تعرف عابد وين.. وصار عندي علم إن هو عندو علاقة وي أختك..

بعد وين علستو اخوي.. تكولون إلا حرام بالحرم اگلب عاليها واطيها بالقران.. ولا تعتقد الجماعة وياك يحموك.

أسئل ودحج عشايرنه منين نترس عين الشمس لو صدينه.. تكول اخوي وين خيراً على خير .. ما تكول وتتخاتل وياي..

بالقران انخلي البرنو يحجي والدم يصير للركب..

يحيى:- انته شنو جاي أتهدد اكبر واحد.بيكم ما يخوفني.. وأخوك ما اعرف وينو و شتريد تسوي سوي.. افتهممممت ويله برااااااا..

- دام هيج الحجي احنه نكوم ويصير خير..

طلعوا واحنه يم الباب صاحت مرت أبويه.. يمه شرايدين من وليدي وتهددون .. شعدكم ويااااه..

التفتلها رجال وكاللها.. مثل ما ولدج غالي ولدنا هم إعزاز حجية.. سلمونه أخونا والكم الأمان..

حجاها وطلع.. كامن أمي وباجي يلطمن ويضربن على خدودهن وركضن ولزمن بيحيى ما خلنه يطلع وراهم..

وحده تصرخ وحده تسأل انخبصنا خبص واني واكفه أبجي.. مرت أبويه تسأل وتملخ بيحيى منو ذول يمه أحجي ولك كووول منين أخوهم وينو..

يحيى:- أنعل والديهم والله إلا اخلي الدوله الاسلاميه تفنيهم همه وعشايرهم بالقران.

-عزه بعينج خالديه ولك يا دوله إسلاميه ولك يمه خاف الله انته ويامن تتورط.. يحيى .. وينك وين الدوله الاسلاميه استر علينا ابنيييييي..

إني وأختك ومرت أبوك كلنا نسوان يهدون علينا ويصخمون وجوهنه يييمه.. ابنهم وييييينه.

يحيى:- يمه دعوفيني لخاطر الله .. إني أتفاهم وياهم..

-شتتفاهم ولك أنت شفت أسلحتهم وسياراتهم يحيى وينك وين الطلايب مو كدهم انته يمه.. لا عم ولا عشيرة توكفلك خاف الله بينا يحيييييى..

-يمه الدوله الاسلاميه بظهري وكلهم جماعتي شحده اليطخ بابي يفجرونه.

-صخام الصخمني تخزيتي وتعزيتي خالديه.. ولك يمه إرهاب ذوله ويامن تورطنه يحيى أذبحك والله وما تطلع

-يمه شقضيتج دوخري خل طلع

-ما تطلع والله إلا تكلي ابنهم وين

-يمه ابنهم ساقط ولازم يتعاقب

-ولك أنت الله وتعاقب اكعد واستر عليه وكلي ابنهم ويييييين..

-وخري يمه استغفر اااااااالله..

-ما اوخر وما تمشي إلا على جثتي والله
.. كلي ابنهم ويييين.. بس جاوبني ابنهم عدل لو ميت..

-عدل عدل بس وخرييييي..

-ما اوخر هسه تودي الهم..

-يمه الخاطر الله دووووووخري..

دفع أمه من الباب وطلع... وأمي تفتر وتبجي وتدعي وأمه تلطم على أخدودها وتصيح ابني راح يكتلوه. ابنيييي..

ما بقت من حركت كلبها طلعت وراه للباب بسرعة وتصيح. وهو يمشي.. عثرت ووكعت على عتبت الباب وعلى وجهه..

ركضنا إني وأمي.. ويحيى رجعلها ووجها وحجابها كله مخربط والدم يجري من خشمها وتصيح وليدي لا تروح يمه ما إلي غيرك..

وتخربطت بيده.. يحيى يبجي ويصحي بيها وأمي وكفت كدام سيارة ماشيه وخلتها تشيل مرت أبويه

وصعد يحيى و وأمي وياها... واني واكفه أبجي.. حركت السيارة ومشت.. ركضت للبيت قفلته وكعدت وحدي أبجي بقوه..

ليش هيج.ديصير ربي .. دخيلك يارب أنقذنا والله ما سويت شي.. احمينا منهم يااارب..

ل الضهر2 ومحد منهم أجه ولا خبر.. اندكت الباب وكفت على حيلي والشهكه مال البجي ترتفع أبلعومي.

طلعت وصحت بصوت مبحوح. منوو..

-إني سارة ليليان فتحي الباب..

-ركضت فتحتو.. وحضنتها بقوه واصرخ بالبجي بكل قوتي .. أبجي بخوف برعب بقلق بقهر.. بذنب إني ممسويته

حاجتني أم سارة.. كومي بنتي كومي لا تبقين وحدج هنا مو زين عليج وأنتي بنيه.. تعالي يمنه لحد.ما يجون اهلج..

أخذوني لبيتهم وللان أبجي وما سكتت ابد.. لحد ما تعبت صدك لليل ونمت.. صحيت على صوت أمي وهي تحجي وي أم سارة وتتشكرها..

بساع كمتلها.. ماما اشلونها باجي خالديه..

-السكر صعد عدها حيل.. وحالتها تعبانه. بالمستشفى هسه.. لباجر نشوف الدكتور شيكول.. يلا امشي خل نروح..

ماما خلينا هنا الله يخليج خاف يجون علينا..

-عيب بنتي كومي.. شلون نبقى هنا..

-أتشكرت منهم أمي وطلعنا.. دخلنا البيت قفلته.. وخلت مخدة وتمددت وبقت تون..

تمددت يمها ونمت.. ل3 بالليل .. اندكت الباب.. كعدنا إني وأمي.. وحده تلوذ بالثانية من الخوف..

ماما منو ديدوك..

-اصبري بنتي.. يا يسوع احمينا.. يا أمنا العذراء أنقذينا..

وكفنا ندحق منو ع الباب .. سكت الدك.. بس صوت مطافر.. رادت تجرني أمي للغرفة.. دفرو الباب ودخلو وكلهم ملثمين بغتر..

أمي خلتني وره ظهرها وكامت تصيح منو انتم شرايدين من عدنا اطلعوا برااااا ..

-يحيى وينو.. ما نريد غيرو ولا عدنا شي وياكم. كلولنه يحيى وييين..

-والله يحيى ما موجود بس إني وهالبنيه استروا عليه الله يستر على إعراضكم لا ننفضح يمه أبوس اديكم...

وهي تحجي واحد افتر على كل الغرف بسرعة واجه كال...

-أبو حرب الظاهر البيت ما بي محرم خل نطلع

-إلا اكظبو لهلكلب.. اطلعوا..

.. انسحبوا من البيت بسرعة .. وأمي ركضت تريد تقفل الباب وراهم.. واحد.منهم لزم الباب.. .. وحجه

-اكفي لحظه... بس احجو ما نسويلكم شي والله... يحيى وين .. عابد وين وديتو.. احجوو مثل ما أنتي أم.. عابد له أم كلبها مثل النار عليه بس كولو وييييين..

يحجي ويهز بالباب بعصبيه واني لازمه بملابس أمي حيل وأشهك.. أصواتهم وأسلحتهم وأشخاصهم.. تخوف بليل.. أحس شعر راسي وكف من الخوف..

تمنيت بابا موجود وأحس بالأمان ولو لحظه بوجوده...

صرخ بس كوووووولووو ويييين.........يتبع

☆☆☆☆☆☆