المراهقة والأربعيني الحلقة (3)

المراهقة والأربعيني

الجزء الأول

الحلقة  (3)

........الموصل ........
الساعة 12 منتصف الليل

ليليان:-قيعده ابكي على حظي وأتوسل بأبويي يرجع ولو يوم وينقذني من أمي و يحيى وقسوتم..

إلام:- بعدكي لسه تبكي يا غبيبي.. إنا أريد مصلحتكي.. و حنا اهلو مليانين وحالتهم عاليه أحسن من الفقر يلي عياشينو..

إلى متى خالكي يبعثلنا فلوس حتى نعيش.. أريد ازوجكي واطمن عليكي يا بنتي

-ماما لو كنتي صح تغيدي مصلحتي.. ما تزوجيني.. تنتظري وتتحملي معايي كن كمل دراستي ونسافر مع بعض إنا وياكي ونعيش

ما هكذا تزوجيني لويحد ما أحبو ولا اطيقو.. حرام عليكي..

-لك اشلون إنا بيكي.. ولكي غبيي اشقد أنتي وحيده ما تفتهم.. لو ردنا نسافر ب اشنو نسافر هااا

بنملك 100 إلف كن نسافر بيم ؟.. أبو ألحنا صاحب محلات كثيغه بالموصل واربيل.. وحنا صح طالب بس عندو منظومة انترنت..

بالشهر دخلو كذا مبلغ وهو قيعد يدرس .. يقدر يسفرنا برا ونعيش حياتنا.. فكري معايي يا غبيي

-ماما ماما والرب ما قاعد اطيقو لتفكيركي المادي.. أمي إنا ما سلعه تبيعيني حتى تسافرين تعيشين برا..

عدقلك (داكولج) إنا ما أحبو يا الله و حياة أمنا العذراء إنا ما اطيقو حرام عليكي. افهميني أريد ادرس ماما ارجوكي

-ما على كيفكي.. من غدا (باجر) نلم إغراضنا ونخبرو لخالكي يجي ياخذنا لنخلص من يحيى وجوز التيس يلي جايبو..

-إنا ما أسافر ولا أغيد أسافر فهمتي

-قلتلكي ما على كيفكي اسكتي ولا كلمه اسمع منكي حيواني. إنا أمكي وإنا اعرف بمصلحتكي ما تيجي أنتي وتقوليلي اشنو اللي لازم اعملو

نسافر غدا ع اربيل وخلصنا

-بقيت ابكي بمكاني يارب اشلون ورطي هاي.. اشلون اخلص منم.. اقتلم ولا اقتل حالي..

نمت وإنا ابكي.....

............. بغداد .........
الساعة 12 ونص ليلا

أبو حرب:- نايم ودايخ بتفكيري ساعة أجيبها على حلا وحرب وساعة على حياتي..

عايدة:- ها أبو حرب شو صافن..

-حجت وجرت أيدي تمددت عليها..

-دايخ ومشاكل الأهل ما جاي تخلص..

-افتح گلبك واحجلي دشوف شنو هالمشاكل اللي مدوخه الشهم مالتي..

-مدت راسهة دتخلي على صدري بعدتها ونزلت رجليه من السرير وكعدت.... شغلات ما تخصج.

عايدة - كعدت...اعرف متخصني واني زوجه إلك بس بليل ما فد يوم طلبت أكثر لو ردت أتعدى حياتك.. يكفيني جيتك إليه وسفري وياك وين متروح..

بس احجيلي حتى ترتاح ليش كاتم على گلبك..

-أخذت نفس.. سحبت قميصي وكمت.. عايدة السوالف هواي منين تردين ابدي..

من دوامي ويوميه ناقليني لمكان.. لو أبوي وحرمته وبلاويها.. لو من مرض أمي وتعبها لو أختي الارمله وفروخها

لو عابد وسوالفه لو سعد المتزوج على مرته بالسر وعنده 3 جهال ويريد يجهر زواجه لو اللاخ اللي ما اعرف وين يجي ووين يروح..

لو حلا الكبرت جدامي وانه ما اكدر أصادقها واعرف شبيها.. وما تستجيب لعمتها وفكرها بس الخوالها..

وانه خوالها ما ارتاحلهم.. بس... أخذت نفس ولبست القميص

-بعدها إخلاص تركض وراك..

-هزيت راسي بمعنى إي... دحگي إخلاص انه ما أريدها كونها أخت المرحومة زوجتي وجدان..

هي جانت خوش مره ونضيفه بس تنك.. ومشاكلها ما تخلص وأختها مثلها..

جثير أفكر أخذها واستقر وألم جهالي بيها.. انه احتاج التلمني.. بتي تحتاج التصادقها وهي خالتها ومثل أمها.. وحرب بعد جاهل ويحتاجله عناية بدراستو

ما عرف شلون ما اصفنلها اتعب..

-شنو خلصن بنات الناس وما بقت بس إخلاص تتزوجها

-تعرفيني اشك باظافري مال أجيب حرمه غريبة وأحطها أبيتي وأمنها على مالي وحلالي وجهالي.. مستحيل..

-هههه تقربت منه..عريف صراع أبو حرب يلي يحير عقول محتار .. ما عرفتك هيج

-هه هي هنا المشكلة.. اكدر احل أمور غير بس أموري اعجز أحلها.. لأني شكاك وما أثق بأحد ابد.. حتى امن بي..

تنهدت... الله كريم... أكوم أسبح واصلي صلاة الليل والله يدبرها..

،،،،،،،،،،الموصل،،،،،،،،،

ليليان:- لما نمت وإنا ابكي.. كوبست .. وأحلام مزعجه ما اعرف من وين.. خلصتو الحلم اركض واهرب من ناس ما اعرفهم..

أخيرها ضربت بغجال طويل ولابس دشداشه.. وبالحلم كأنو دخلت بينو.. وتخبيت بجسمو .. بس اختنقت وإنا اتخبى

لحد ما قيعدتو.. العرق يصب راسي ونفسي قوي.. قمتو من مكاني.. رحت شربت مي..

يارب اشنو هالاحلام المزعجة أش يعني مكافي علينو أمي ويحيى وبلاويم..

هوووف.. رحتو غسلتو وجي ومشطتو شعري.. وبدلتو وطلعت ع بيت سارة..

مشينا إنا وياها.. وحكيتولا عن الحلم.. وانو غجال لابس دشداشه دخلت بينو واختنقت..

سارة:- ولكي ليليان بس لا اخوكي يزوجكي لويحد طويل وعندو كرش ويلبس دشداشه..

-ويييييع اقتل روحي والله .. إنا أتزوج ويحد يلبس دشداشه وعُربي .. عييييع .. لا سارة لا تحكي هاكذا راح ابكي ..

-ههههههههههه اشنو أسمو يلي خطبكي من اخوكي

-خالد .. بس لا تحكي ولا شي إنا اعرف فارس أحلامي غجال اسمر وحلو وعضلات ويلبس زي رسمي ما دشداشه

-خالد يا خالد.سمين وعندو كرش ودشداشتو وصخي وتعالي يا ليليان نضفيها ههههههههههههه

-ساااااااااره راح اضربكي هوني والله اسكتي راح ابكي لا لا ما هكذا ما هكذذذذذذ عااا

-ههههههه ولكي فضحتينا اسكتي وصلنا المدرسة..

-اوووف

-هههههههههههه .. اهووو دحقي منو قدامنا..

-دحقت.. نفسو الولد اللي يعاكسنا كلما مرينه.. نزلي راسكي.. وخل نمشي بسرعة.. معليكي منّو.. فتنا وهو حكي....

-يسعد صباحك يا قمر.. شنو هالجمال دخيلك الله.. بوياااااااي.. -صفّر-

-الطريق كان ما بينو احد .. فارغ تماما بس إنا و سارة.. ف تجرأ وتقرب من عدنا..

ومسك أيدي..

-لج شبيج انه مو أحجي وياج دسمعي ليش تحكريني.. تره كليبي متعذب بهالحسن..

-استحي واترك أيدي يا حقير..

-تمونين بالغلط يا حلوه.. بس كليلي شبيج وياي مو رايدج..

ليليان - عدقلك اتركنيييي.. والله اصرخ وألم الدنيا عليك.. اتركنيي.. اصرخ وسارة تصرخ معايي وضربته الجنطه ع راسو..

سحبت أيدي منو بسرعة.. وركضنا إني وياها.. وقلبي مثل الطبل يدق..

سارة:- اشقد ويحد ما عندو أدب.. يا أمي قلبي رح ينفجر قد الخوف يلي ماليني..

ليليان:- إنا من الخوف ما قدرت احكي بس امشي بسرعة وابكي.. وصلنا للمدرسة.. صفينا ع الاصطفاف..

وخلصت اليوم كلو ما قدرت انتبه على شي قد ما أفكر اشلون راح نرجع.. وهو موجود..

لما طلعنا.. اتفقنا إنا وسارة نمشي من غير طريق..

دخلت ع البيت.. كان يحيى وصديقو موجود.. وآمو قيعد تطبخ غدا الهم.. وأمي واقفة وتحكي معاها

قلت مرحبا.. اغشعت عليه أمي بسرعة.. وجرتني للغرفة..

-ياااا أمي اشبيكي على كيفكي اشنو صاييير..

-ارتاح قلبك ليليان.. اللي أسمو خالد صدق اخوكي الغبي هوني وجاي ليخطبكي..

-وأنتي اشنو قلتيلو..

-اشنو أقول إنا.. اخوكي يتفاهم.. خلينا نلم إغراضنا يا أمي.. ونهرب..

-أمي اشنو نهرب هذا بيت أبويي ومو من حقو ليحيى يزوجني ع كيفو.. ولا على كيفكي..

-ولكي وعوبه.. إنا وأنتي ما نقدر نواجو ليحيى نبقى نسوان وما نقدرلو.. خلي خالكي يتفاهم وياه..

-إي أمي خبري خالي يجي.. إنا عندي امتحانات والله ما اقدر اهرب..

-تقلي امتحانات هلغبيه.. ولكي أنتي اشنو من بشر.. راح يزوكي ويجبركي تتركي دراستك يا بنتي خلينا نهرب..

قيعد نحكي.. دخل يخيى.. سكتنا..

يحيى:- ليليان.. تعالي معايي

-اشنو اتغيد يحيى ؟

-هذا الغجال يريد يشوفكي..

-اشنو يشوفني إنا بضاعة ويشوفني يحيى ما اريدو.. بس قلت همذ أجه ومسكني من شعري بقوهو ويقول..

-اسمعي ولك والله .. اذبحكي وما يرفلي جفن.. تعالي معايي احسنلك..

-اتركني حرام عليك الله يلي تحلف بينو ما يقبل باللي تعملو بيا وصرت ابكي

-عدقلك امشي قدامي..

-طيب بس أغير ملابسي..

-ما يحتاج امشي..

-طيب طيب.. امشي وإنا امسح الدموع من عيوني.. مشيت قدامو ودخلت.. اتفاجئت بالغجال يلي جايبو

شعرو ولحيتو طوال ولابس دشداشه لونها رصاصي ووجهو اسود.. من شفتو والله نزلو دموعي..

هو اغشعني ونزل راسو.. وقال

-أهلا بالأخت ليليان جعلكِ الله من البنات المؤمنات المسلمات إلى الله ورسوله..

-اشنو يحكي هذا.. كلامو فصحى.. ومنزل راسو ويحكي

خالد:- إنا على بينة انكِ مسيحيه ولا ترتدي الحجاب الشرعي وسيهديك الله بهدايته إن شاء الله..

-إنا ما كافره حتى يهديني.. إنا مؤمنه..

-كل دين غير الإسلام لا صحة له يا أختاه..

-اشنو تحكي أنتا..

يحيى:-ليلياااان

خالد:- اتركها يا أخ يحيى إنا أريد إن اسمع ما تفكر به لكي اهديها إلى الإيمان بأذن الله.. وتكون من بنات الدولة الاسلاميه..

-يرجع يقلي يهديني.. دينا ما كافر وإنا اعرف سيرة النبي محمد لما قاتلوه قريش طلب من ملك الحبشة يحمي المسلمين لأنو يعرف انه ملك مسيحي مؤمن..

لما تكفر كلام نبيك أنتا الكافر اليهديك ما إنا.. فهمت.. إنا ما كافره إن مسيحيه مؤمنه..

تركتم وقمت بسرعة.. طلع ورأيي يحيى راد يمسكني أمي دفعتني وصارت قيدامو..

-ولك والله لاذبحكي حقيراااا تتجرئي اطلعي صوتك قيدام الرجال.. إن ما علمتك الأدب ما اطلع إنا يحيى..

إلام:- ما تتزوجو فهمت بنتي ما تتزوج هذا الإرهابي

يحيى:- اقتلكي أنتي وياها والله..

مسك أمي يريد يضربها وآمو تحاول تبعدو ويصرخو.. إنا دخلت الغرفة.. وصرت ابكي كثيغ

دخلت أمي ورايي وقفلت الباب وقعدت تبكي وتنادي على روح أبي ليسمعنا ويغشع حالنا ومع منو تركنا

هذا اللي ترك دينو حتى يخلفو هكذا يعمل باختو.. تقربت لامي.. وحضنتها وصرت ابكي بحضنها بقوه..

ماما خلصيني من يحيى ارجوكي..

-قلتلكي يا بنتي خلينا نهرب وانأ وعد اخليكي تكملي دراستك والرب

- ماما إنا خايفه كثيغ.. ما غشعتي الرجال اشقد.مرعب شكلو ماما ما اريدو والله حتى كلامو غريب يحكي فصحى ..

-والله يا ماما ما اعرف اعتقد هذا إرهابي.. سمعتو يقول الدولة الاسلاميه..

-رفعت راسي ألها.. اشنو هذا الدولة الاسلاميه..

-مجموعه شريرة تعتبر نفسها تحارب لأجل الدين..

-إرهاب يعني ؟

-ما اعرف يا بنتي إرهاب ولا مليشيات .. ما اعرفهم زين.. بس سامعه انو هم أشرار..

-باين على شكلو انو هو شرير ماما شكلو مخيف كلو شعر..

-اطلبي من يسوع يا بنت حتى يخلصنا منم.. يا روح القدس أمنا وأنقذنا وخلصنا من الأشرار..

-أمين... نزلت راسي بحضنها.. وبقيت ابكي.. خبرت أمي خالي قال غدا العصر يجي يأخذنا لان هو مسافر ع دهوك اليوم..

،،،،،،،،،،،،أبو حرب،،،،،،،،،

نقلوني لبغداد وانه ما اكدر أضل رايح جاي رحت على لواء اعرفه عدنا بالديره.. اتفقت وياه والغي سالفة نقلي..

ووانطاني كتاب.. ومنها أخذت سيارتي وطلعت للرمادي.. وصلت لهلي الظهر..

طبيت.. أم علي واكفه بالمطبخ.. تلكتني..

-هلا أبو حرب الكوة الخويه..

-الله يكويج أم علاوي.. منو هنا

-بيت عمي صالح

-هااا بس حظريلي الحمام ميت تعب.. حجيت وفتت جوه.. صحت هااا السلاااااام عليكم شلونك عمي

خليت سلاحي ع الميز ونزعت حذائي ورحت سلمت عليه.. وبست راسو.. اشلونك اشلون صحتك..

صالح:- الحمد لله نسأل عليك يا بويه وينك.. مختفي

-والله يا عمي بهالدنيا نقلوني البغداد.. وجثير بلاوي على راسي ما احك إذني وها جيتي والله.. طلعت أرواحنا..

-الله يساعدك يابه حقك الدنيا تلاهي..

إخلاص:- ها أبو حرب شلونك .. شلونك زين توه نور البيت ..

-هلا بيج خويه منور بيكم.. الله يحفظج..

-ابن الحلال بذكره تونا نحجي بيك انه وعمتي..

-عاد خير شر.. إنا حكتني رجلي بالسيارة.. بس ما عرفت منهو كاص بيه.. هههههههه

-يااا على بختك احنه نكص بيك لا والله بالخير كلت خطيه هالرجال يوميه ناقلينو..

-إي والله شنسوي هاي بعد أمور ألدوله تعبانه..

-أروح اجيبلك ماي بارد تعبان...

-إي والله الله ينطيج.. عطشان حيل دا أحجي واجاني حرب.. صحت هلا بالذيب.. هلا بابني السبع..

كعد يمي .. اشلون الدراسة..

-زين

حلا:- جذاب بابا ماخذ 4 بالإملاء.. حتى المعلمة طالبه ولي أمره..

-أخ ليش بابا هيج..

-بابا صعب والله أريد أبطل..

-لا باباتي ما يصير.. مستقبلك هاذ.. مدتلي إخلاص كلاص الماي.. اخذتو.. وحجت هيه..

إخلاص:- حقو يابه لا احد يدرسو ولا احد يهتم بيه اشلون ينجح عمت عيني عليج خيه أم حرب لو عايشه يضل هيج الولد يرادلو متابعه..

-حلا ليش مدرسين اخوج..

- بابا هو كوة يحفظ يتعبني والله..

-لا والله يا يابه كولي هالزفت الموبايل إلي مخليه راسج بي طول الوكت وما داريه عن اخوج..

أم سعد:- تعتب على هالجاهله تعتني بي شد حيلك وأتزوج وجيبلك أم إداريه..

-هزيت راسي وما رديت..

أم علي:- خويه تكوم تسبح لو نصب ألغدا..

-لا أسبح.. آكلو انه شبعان.. أترخص منك عمي تعبان ..

-اخذ راحتك يبوي..

صعدت سبحت و صليت ونمت.. ما كعدت غير العصر كلها طاشه.. فتت على غرفة الحجية أمي..

دحكت متمدده.. ها يمه كواج الله..

-هلا ييمه هلا بيك..

-ابقي ابقي نايمه لا تكعدين..

-لا ييمه ما نايمه بس متمدده من وجع ظهري..

-ياذيج ؟ خليني اخذج للطبيب

-لا يبعد أمك عساك سالم.. هذا دواي أخذته والشفا من الله..

- بست راسها وكعدت.. والنعم بالله.. شلونج أنتي شلون صحتج..

-نشكره ونحمده.. انته شسويت على سالفة نقلك..

-فضيتها.. وي اللواء ورجعت..

-بعد ما ترجع البغداد..

-لا يبقى دوامي هينه مثل الأول..

-الله يريحك يا يمه ويصفي بالك..

-يحفظج حجية.. ضايجه تردين اطلعج اشممج هوة.. خاف متضايكه من كعدت البيت ومشاكله..

-لا ييمه متضايكه عليك شوكت ترتاح.. ابنك يحتاجلو مداراة يا ابني ليا وكت راح تبقى هيج..

-يمه إذا أنتي متضايكه من وضعي توكلي على الله وخطبي انه ما عندي مانع..

-يمه انه ما ضارني شي .. انه الخاطرك..

-الله يحفظج.. توكلي واخطبي اللي تعجبج..

-حتى لو إخلاص ؟؟

-مسحت وجهي وكمت امسح بشواربي وأدحك بالكاع ورجعت دحكت بيها...يمه ما تناسب

-بت عمك هاي من دمك ولحمك.. صدك صارت مشاكل بس يمه هي بنفسها انته.. وخوش بنيه ونعرفها خدومة تلمك وتلم جهالك..

والشين التعرف أحسن من الزين ألما تعرف.. اخطبلك غريبه وطلعت اضرب منها شتسوي..

-هاهيه يمه التشوفينه .. تعبان والله حتى ما بيه أفكر..

-الله يعينك وليدي.. انه اخل الموضوع أنت اخذ راحتك يمه.....

،،،،،،،،،،الموصل،،،،،،،،

ليليان.. لما طلع الغجال من البيت يحيى قلب البيت ع راسنا.. يصيح ويغلط ويضرب بالبيبان.. ويتحلف إلي ولامي.. وأموا تهدي بيه

وأمي قيعده تسمعو.. وتدعي علينو.. يخلصنا منو..

لليل يلا قدرت أمي تطلع وتجيبلنا أكل ناكل إنا وياها.. ورجعت قفلت الباب..

بقينا الليل كلو نفكر اشلون نخلص من المصيبة يلي بلانا بيا يحيى..

ثاني يوم.. ما قدرت أغيب وقلتولا لماما عندي امتحان وقلتلي روحي اليوم حتى لا يشك بينا يحيى.. خلي الوضع طبيعي..

طلعت خفيه منو.. ورحت على سارة ومشينا من طريق ثاني حتى لا يتعرضلنا الغجال نفسو يلي مسك أيدي البيحه.. (البارحة)

خلصنا اليوم ورجعنا هم من الطريق الثاني .. وصلت لفرعنا وسارة دخلت ع بيتها.. وإنا امشي..

صفت سيارة ونزل منها الرجال الشرطي يلي تعرضلي البارحة.. ردت امشي..

مسكني من أيدي ويقلي

عابد:- ليش تشردين مني يا حلوه مو والله احبج .

ليليان-اتركني يا وصخ.. والله اصرخ والمو الناس عليك اتركنييي.. صرت ابكي وهو يضحك ويجر بيا للسيارة..

عابد-ولج ما أطول والله بس أحجي وياج شويه طاك كلبي صار يومين متمرين عليه ليش هيج تعذبيني مو انه ميت بيج..

-هو يجر وإنا ابكي واصرخ اتركنيييي حقيييير اتركنيييي.. وان اصرخ طلعت مره عجوز من بيتم واجت تركض علينو..

-ولك اتركها قليل الأدب ابتعددد..

-لتدخلين حجية هاي صاحبتي وزعلانه وأريد أصالحها أنتي معليج

-ولك اشقد ويحد بلا مستحى أنتا.. هذه بنت بيت أبو يحيى.. واعرفها اتركها..

-إي اعرفها ليليان يا حجية صاحبتي.. لج حبيبتي ليش هيج تكبريها دصعدي بس نتفاهم..

-كذاب والله ابتعد ما اعرفك إنا .. اتركني.. سحبتني المرة منو وحكت..

الحجية:- مع الأسف بنتو لابو يحيى يطلع منها هكذا تصرف..

-لا والله خاله كذاب.. قيعد احكي وطلع زوجها للمرة.. الولد اللي كان ماسك أيدي بمجرد ما دحق الغجال..

ركب سيارتو وطلع... وتركني إنا والمرة يلي ترزل بيا.. وإنا ابررر وابكي..

وما أحس إلا يحيى يطلع من بيتنا ويشوفني واجه يمشي سريع لغشنو اشنو صاير..

نشف دمي لما غشعتو ليحيى.. قلت انتهيت.....يتبع

☆☆☆☆☆☆