المراهقة والأربعيني الحلقة (1)

المراهقة والأربعيني

رواية حقيقية لفتاة عراقية لأخ إرهابي (داعشي) يقوم ببيعها لمن ظلموها فتبدأ رحلتها مع رجل أربعيني يكبرها بثلاث عقود.

يقال إن الحب يتعدى كل شيء.. لكن ماذا لو كان الفارق 30 عام.. هل يستمر الحب أم يبقى الفارق مفارق.. ؟!❤

الجزء الأول

الحلقة  (1)

أين قلبي من ذاك القلب المتحجر..
 أو كلما تقربت إليه خطوه.. ابتعد..
 وكلما حاولت إبعاد قلبي عنه اقترب..
 ف يتركني في نارً لا ترحم ولا تِذر..

المراهقة.. هي فترة انتقاليه من مرحلة الطفولة والاستعداد لدخول مرحلة الشباب

..

عادة تكون من عمر 12 سنه إلى ال18 أو تستمر إلى عمر 21 سنه...

في هذه الفترة.. يكون عقل الإنسان متقلب .. مرحله ليست بالسهل.. ف فيها يتغير شكلك صوتك فكرك مشاعرك..

هنا يكون الإنسان متقلب المزاج... يصعب على الإنسان البالغ فهم ما يشعر به المراهق إلا الأب وإلام..

لذلك يفضل احتوائهم وترسيخ المبادئ الصحيحة في عقولهم بدل تركهم لأشخاص مجهولين الأخلاق تعلمهم أشياء لا تناسبهم.. ف يقعون..

هنا بدأت القصة

الموصل_حي الرفاعي_عائلة يحيى_الساعة 10 مساءاً

يحيى:- دخلت للبيت بليل جيت من الشغل.. فتحت الباب صحت يووووووم

أم يحيى:- هلا أمي هوني إنا تعال

يحيى:- اشونكي يمه..

-هلا حبيبي اشلونك أنتَ .. أش عملت على شغله إقبال

-والله يما بعد حكيت مع أخوها وقال إن شاء الله خير .. بس إنا خايف ما يعطوها..

-لا تقول هكذا قول إن شاء الله

-يما منو يقبل يعطي بنتو الواحد ما عنده أهل ولا عمام ولا عشيرة

-خوالك موجودين يا أمي لا تقول هكذا وكل أمرك لله..

-أخذت نفس.. أمنت بالله يما أمنت بالله.. إلا اقللكي صدق... ليليان وين

-تلقيها تدرس بالغرفة أش تريد منها

-جوعان تعملي أكل.. ناديت... ليلياااااااااان ... قمت على رجليه ومشيت وانأ أصيح.. لك يا ليليااااااان

ليليان:- اهووووو أش يريد هذا ما يتركو الواحد يدرس براحتو.. بقى ينادي صرخت هااااا هااااا

-وجع يلي يوجع قلبك تعالي هوني احكي معك

-لا وفوقها يغلط..

أم ليليان: إي يا أمي قومي شوفي اخوكي أش يريد..

-قمت هياني قمت.. اووف هااا يحيى أش تريد

-تعالي اعملي أكل جوعان كثير

-قاعدة ادرس إنا ما أطيق اعمل هسه اصبر

-اقللكي جوعان ما تفهمي أنتي تعالي بسرعة لا تجبريني أتصرف غير تصرف..

-اوووووووو ليليان ليليان والله تعبت ما في غيري بالبيت يعني ما تقولو بنت تدرس وتعباني.. امشي للمطبخ وانأ احكي.

والله تعبت ما احد يحس بيا يقول هاي البنت مسكينة إنا من يوم يلي مات أبي انتو ما حد يرحمني..

يحيى:- لك قصي ألسانك لا تخليني إنا أجي اقصو لراسك والله

-نصيت صوتي وانأ اطلع الأكل من الثلاجة واحكي وابكي.. كثير اشتاق لأبي هو الوحيد يلي يحس بيا

إنا تعبت يارب موت واخلص من هالعيشه

يحيى:- بعدك تحكي لك يا ليليان كافي عايش قلتلكي بس اعملي أكل..

-إي وإنا خدامه ليليان قومي ليليان قعدي.. ما حد يقول هاي البنت قاعدة تدرس كل شوي قومي قومي

-ياااا الله انفجر راسي اشقد ما حكيتي ..وإلا اقللكي يلا أحسن وإنا يلي كنت جايبلكي هديه.. خففتي عني يرحم ابوكي

ليليان:- بلعت ريقي ااااا لا يعني إنا ما قصدي أتضايق من عمل الأكل بالعكس أنت فهمتني غلط إنا احكي هكذا بس لأنو مشتاقة لبابا وتعباني من الدراسة..

-حكي يفيدكي ما ينفع ويايا

-طيب بس اغشع (أشوف) اشنو الهدية

-راحت لغيرك يا حرام

-بيعطيك قلبك هدية أختك الوحيدة تعطيها لغيرها

-صراحة لا.. بس هي حيوانه تحب مصلحتا بس

-لا لا ما هكذا أبدا.. كل القصة كنت تعباني يا أخي اشبيك أنتا..

-بقيت ادحق بعيونها وابتسم.. طيب راح اعطيكي لما تكملي الأكل..

-لا لا لا هسه هسه علمود يصير عندي طاقة أكمل الشغل بسرعة..

-هههههههه طيب طيب... دخلت أيدي بجيبتي وطلعت كيس في شغلات بناتيه.. واعطيتو ألها

ليليان:- طلعلي الكيس وبي أسوار وحجل و محبس وقلادة خناقه يصيرون من خيط اسود نايلون مطاط

دحقتو وإنا طايره من الفرح أخذت الهدية وحظنتو لأخي حبيبيييييييي احبك احبك احبك..

-وإنا احبكي بس كملي الأكل يرحم اهلك ميت جوع

-يأمر حبيبي يهوووو

-هسه صرت حبيبي ... طيب وشغلة موت واخلص نسيتيها

-ههههههههههه لك لا تصدق كلشي.. إنا احكي كلام فاضي

-ليليان كملي الأكل وتعالي اقعدي معي عندي حكي نحكي إنا وأنتي بخصوص حنا

-اووو يحيى صدقني ما اريدو لحنا بس أمي.....

-كملي وتعالي نحكي

- ماشي خليت الأكل ع النار وقعدت البس بالاكسيسوار يلي جابهم يحيى

كثير حلوات وحبيتم خاصة القلادة ع رقبتي صارت تجنن..

لحظه قبل ما ابعث الأكل لأخي.. ضروري احكي عن نفسي شوي..

إنا اسمي ليليان.. عمري 17 سنه.. صف خامس علمي..

مسيحيه بس أخي مسلم..

شغله حيرة كل من شافنا إنا واخي.. اشلون إنا مسيحيه وأخي مسلم رغم إنا وهو من نفس الأب..

أبي أسمو جرجيس.. مسيحي من أم وأب مسيح.. أتزوج أمي وكانو سعيدين بحياتهم..

بس الله شاء وما رزقهم أطفال.. وهو يحبها لامي.. ما يطيق يطلقها.. بس كان يحب انو يجيلو طفل..

7 أسنين ما تركو دكتور إلا وراحولو كن يعالجو أمي بس ما تعالجت..

تعسر الأمر على بابا بوقتها.. الطلاق صعب عند المسيح ما يقدر يطلق براحتو.. إلا بخيانة ودليل يثبت خيانتو يلا يتم الطلاق

هكذا قانون المسيح بالعراق الطلاق عندهم كلش صعب.. وأيضا ماكو زواج ثاني دينا ما يسمح بتعدد الزوجات..

ف بقى بابا حاير وهو بنفسو الطفل.. إلى إن قرر يسلم ويعتنق الإسلام حتى تتغير جنسيتو ويسمحولو بالزواج من ثانيه..

وبالفعل اسلم... ولما اسلم اهلو كلهم تبرو منو اعتبروا كفر بدين المسيح.. فطردو منم وانتقل مع أمي اللي ما طاقت تتركو وحدو.. وبقت وياه..

وأتزوج مرا اسمها خالديه.. وبعد شهرين حملت خالديه بطفل وجابت أخي يحيى بعدها حملت بطفل ثاني وسمتو أمير..

بس أمير ما طاق كان مريض أول أيام وتوفى.. بعدها ما صار عدها أطفال وقيعدت وبقت مع بابا..

بعد سنين وبمشيئة الرب قدر لامي تحبل وتصير حامل.. كان بابا كثير سعيد بحمل أمي..

وكأن معجزه صارت.. ومرت الأيام وجابتني إنا ليليان..

أخي كانت آمو مسلمه فعلمته الإسلام وما قبلت يصير مسيحي..

وإنا أمي علمتني المسيح وما قبلت أصير مسلمه..

أبويا كان غجال (رجال) فقير يا دوب يشتغل ويرجع يلف راسو وينام.. ما عليه بينا

بس الامانه لله كان يحبني كثير .. ويداريني.. وكنت مدلله عندو .. لأني بنت حبيتو يلي من دينو الأصلي ويلي حاربت ووقفت وياه طول عمرو

كان يحب يحيى بس مو مثلي إنا كان يحبني اكثر ..

بحكم جنسيتي يلي تقرأ مسلمه.. انجبرت ادرس الإسلام واطّلع عليه.. بدرس الاسلاميه ..

وكنت أحفظ آيات قران كثيرة .. بس ما أسلمت وبقيت مع أمي احظر قداس كل يوم احد واصلي وانتمي لجذوري وما اسلم..

كبرنا وصار أخي إسلامي جيد ويحفظ القران بكثرة وبابا ما كان يمانع عندو الدين انك تعبد الله ما كان يمنع نتبع من

إما إنا فكان الصليب ما يفارق رقبتي وكل دعواي ليسوع وأمنا العذراء..

قبل سنه شاء القدر وتمرض بابا بمرض سرطان الدم.. حاولنا نعالجو بس ما قدرنا 4 أشهر وفارقنا

كثير بكيت علينو.. كان حبيبي وصديقي وامني وأماني.. من مات حسيت انو إنا وقفت حياتي وما بقالي احد استند عليه

صح كان يحيى موجود بس مثل إي اثنين أخوه.. نتكاون على طول وبعدين نتصالح.. كثير مرات يقسي عليا بس يصالحني ما اقدر اكرهو أبقى أحبو لأنو أخي الوحيد..

من بعد موت أبي.. أخي يريدني أتزوج مسلم حتى اسلم.. وأمي تريدني أتزوج مسيحي حتى أبقى ع ديني المسيح.. وما اكفر

إنا ما كان عندي مانع بالأديان .. بس إنا ما عاجبني تدخلم بحياتي بهكذا شكل .. لسه ما خلصت دراستي..

ومثل إي بنت.. تنتظر فارس أحلامها يجي ياخدها بالفرس الأبيض وامشي معو لمكان بعيد عن صراعات أهلي القومية..

ابن خالي أسمو حنا .. تقول أمي انو هو يحبني كثير ويريد يتزوجني.. بس إنا ما أحبو أبدا..

حنا شاب عمرو 21 سنه طالب كلية ما اعرف إي قسم ولا يهمني اعرف.. بس شكلو أشقر وعيونو زرق والشعر كفشه.. والطول ما اعرف كم مو طويل يمكن 170سم..

صراحة اكره هذا الشكل كلش.. أحب صفات عراقيه اسمر شعرو مرتب ما كفشه.. خشن يعني أحس بينو رجل

إما حنا فكنت أحس نفسي جنبو رجال قد ما حلو ويتمايل بالكلام ويجبر حالو يحكي بغدادي عود حتى اشوفوني إنا مثقف..

ما كنت أحب هكذا تصرفات وشكل أبدا.. بس أمي مصره آخذو وتقلي اخذي اللي يحبك ما اللي تحبي..

إنا ما أريد أتزوج أبدا إي حب إي بطيخ.. أمي تحكي وحدها.. أروح اخذ الأكل لأخي أحسن..

خليت الصينية وقعدت جنب أخي .. هو ياكل وإنا شاركتو الأكل..

يحيى:- ما تعشيتي

-لا تعشيت بس أشاركك ما يصير ؟

-هزيت راسي ... مفجوعه..

-هع هع هع

-أقول ليليان حنا أش سالفتك أنتي وأمك وياه..

-يحيى دخيل ربك والله ما اريدو..

-طيب ليش عمتي تقول يريد يخطبك

-أمي تحكي باللي يطلع بمزاجها..

-ليليان إنا صديقي خالد تقدم لخطبتك أمبارح اشنو رأيك..

-يحيى اشنو تحكي إنا ما أريد أتزوج

-وليمتى؟ ليليان أنتي كبرتي

-اشنو كبرت يحيى عمري 16 سنه.. وكل اللي معي بالمدرسة ما متزوجين..

-وين تريدي توصلي بالدراسة.. اللي عندهم شهادة هندسه ما فلحو ولا لقوا تعيين وأنتي تريدي تدرسي ليليان فكري اكثر بحياتك

خالد رجال والنعم منو وإنا امن عليكي عندو إما حنا ف إنا ما اقبل بي ولا اريدو أبدا.. خليها أبالكي

-يحيى وإنا أقلك ما اريد لا حنا ولا صديقك.. فهمت قمت منه زعلانه وأعصابي تالفة.

يحيى:- ما على راحتك تتزوجي يعني تتزوجي أريد أتزوج واخلص .. ما اخلص عمري وإنا اصرف عليكي وعلى أمك..

ليليان:- اشنو اللي صرفتا علينو هااا .. خالي قاعد يبعث لامي كل شهر مبلغ وإحنا نصرف منو.. استكثرت الأكل يلي أنت تتسوقو للبيت..

اطمأن منا ورايح أكل اندومي وما أشاركك الأكل .. ارتاح... تركتو وهو يحكي ويغلط ...رحت للغرفة لاقتني أمي..

-اشنو يريد منكي يحيى

-يا ماما بس خلصوني ما أريد أتزوج حرام عليكم.. خلصوني

-يا حيوانه حنا يحبكي ومستعد يلبيلكي كل اللي تتمنيه اشنو تريدي أكثر ؟

-اللي أتمناه ما أتزوج بس... فهمتي.. رادت تحكي.. صرخت يا أمي يكفي ما أريد اسمع شي الخاطر يسوع يا امي

لزمت الكتاب أريد اقره بينو ما افهم شي قد ما عقلي بي كثير سوالف يعني اشنو ما اريد أتزوج هي بالغصب..

طبقت الكتاب.. وحظرت جدولي وصفيت جنطتي وإغراضي وفرشت إلي ولأمي ونمت ع فراشي وانأ أفكر..

اوووف يحسبون عندي أم.. كل هما أتزوج وتخلص مني ولا كأني الوحيدة. وتجبرني أتزوج ابن أخوها المايع

وينك بابا لو أنت هوني ما كان إنا حالي هكذا كان منعتم وقلتلهم هاي بنتي الوحيدة ما اسمح الواحد يأذيها..

يا مريم العذراء يا أمي ساعديني ارجوكي.. صرت ابكي بفراشي كثير الوحدي.. شوي وحست أمي عليا

-لا يا غبية ليش تبكي إنا اريد مصلحتك بس يلا ابكي براحتك من يبكي كثيرا يضحك أخيرا.. ابكي اقللكي ابكي بتالي راح تضحكي ويا حنا كثير

-ينعل أبو حنا

-اشنو قلتي ولك

-قلت تصبحين على خير أمي..

<<<<♡♡♡>>>>

الانبار_الرمادي_بيت أبو حرب الساعة 11 بليل

عابد:- ولج أنتي معليج بيه فتهمتي أحب 10 عشرين أنتي شكو شنو ترديني كلي ألج

نور:- هو شنو شعليه بيك غير رجلي عجل إني ها شنو خراعة خضره يوميه حاب عليه وملابسك كلها حمر نسوان

عابد:- الكعده يمج تكصر العمر أكوم اشرفلي

-اشو والله متكوم .. عابد تبقى على هاي سوالفك وحق إل لا اله الا الله ساعة ما أبقى هنا.

راد يطلع صرخت ما تطلع والله يوميه حاگرني وما اديرلي بال والله متطلع إلا تفهمني أمرك..

-لج وخري مني لا اجتلج والله بالله

-اجتلني ما اوخر فاتهمت هسه تاخذني بيت أهلي وما أبقى والله

-لمي ملابسج عساج لا جيتي اليكول إني ميت عليج..

صراع:- دخلت للبيت اسمع صوت عرايك عابد ومرتو.. مشيت للهول اوكفت يم الدرج صوتهم واصل لأخر الدنيا

دحكت الحجي طلع.. صرخت شنو قضيتهم ذول

الحجي:-سوالف عابد يابه ما تعرفه عوفهم هم يهدئون وحدهم

-شنو نعوفهم يابه شهرونا بأصواتهم خل اصعد أشوف شنو موضوعهم..

صعدت ومشيت خطوات لغرفتهم اسمع بس مرتو تبجي .. دكيت الباب..

عابد:- منووووو

-انه صراع افتح

-هلا أبو حرب تفضل..

-فتحلي الباب ودخلت.. شنو انتم متستحون متگلون البيوت ألها حرمتها صوتكم واصل لأخر الدنيا شجرالكم

نور:- خويه صراع احجو وياه تعبت والله تعبت.......

عابد:- أبو حرب بس خل احجيلك.........

صراع:-بله اسكتو أثنينكم وانجبو خل أفتهم اثنينكم تصارخون صرعتوني...

عابد:- صراع هيه......

-كلت أنجب واطلع بره.. ما أريد أدحك وجهك كبالي بسرعة.. اخذ باكيت جكايره و طلع بعصبيه.. يضربه وجع طلعتو لان شفت مرتو تلم بإغراضها

فكسرت بي حتى هي تستحي وتكعد.. درتلها أنتي شجاي تلمين..

-أريد أروح لبيت أهلي

- إي مو هي لعب جهال يوميه أهلي... هذا بيتج واحنه اهلج.. سالفة أروح لأهلي عيب لا تعيديها سمعتي

-لا أبو حرب والله مليت ما اكدر بعد.. تعبت من سوالفه يوميه

-شنو اللي ما تكدريله نووووور...أريد أفتهم من تزوجتي شكان بالج الزواج ...هاااا يباوع الحلكج ويخلصها وياج فراش ... شوي هدي وكعدي وكبري عقلج

وغصب عنج تقبلين بي هذا رجلج..و المرة المعدلة تتحمل رجلها بالزينة والشينه..

شناقصج هاا كولي فلوس أكل ملابس عيشه كلشي ما كاصرج بعد شكو .

-أبو حرب وخيانته ألما يتحملها إي بشر تعبت منه والله

-خيانتيش جابلج مره وحطها على فراشج؟.. گصر عليج وشفتي راتبو لصاحباته..

اكعدي شوي واكضبي السانج وياه إني من جوه فار دمي من صوتج بوجهو.. هو شلون..

حامل وابطنج توم موليه لاهلج شتسوين.. منو يتحملهم.. وعبالج من يصيرون نخليهم ألج لو بقيتي عد اهلج

والله بيوم ولادتج ناخذهم منج.. فصبري وصيري أدميه وصوتج ما اريدو يعلى بالبيت ..

وإلا تشوفين مني شي ما يعجبج والقران.. تركتها وصفگت الباب وراي... ونزلت شايط على عابد.. لكيت أمه واكفه كبالي

ها أم سعد أبنج التحفه وينه

-أبو حرب لا تتعارك وياه تعرفه هو طگه ونص

-اشو ابعدي من جدامي

-أبو حرب عدي ألليله على خير دخيلك...

-اششششش وطبي جوه انه وياه نتصافى.. طبكت الباب وراي وطلعت صحت عااااابد..

دحكلي وشمر جكارته بالكاع وسحكها.. مشيتله.. أول ما وصلت انطيتو راشدي..

-أبو حرب شسالفتك يخوي مو صغير وتضربني

-دامك مو صغير ..صير رجال و استرجل مو حسك وحس مرتك يلعلع بنص البيت..

صوتك حسك اسمعو ومحمد أدفنك ..

-ما أريدها كوة.. اطلكها وأجيب عشره أحسن منها والله

-تاكل خ... وتنجب فاتهمت.. بنات الناس مو لعب بأيدك تزوج وأطلك بكيفك راسك اكصو والله

يا عار مره محترمتك ومقدرتك ومداريتك وحامل منك بتوم شرايد بعد ولك..

-دشوفها هم وجه هاي وأدحك بيها حقي أدحك (اباوع) للحلوات إذا هي جنها قرد

-ما غيرك القرد يا قرد.. لك حامل بتوم تعرف شنو توم.. قندرتين حطهن على راسك وامشي مراح تتحمل وتتعب مو ثنين جهال أبطنك شنو من بشر أنت..

ولك كديش مرتك هاي.. حبها داريها شوفها شتريد .. أنت تاليها وياك زوجناك كلنا تعگل بليتنا بلوه

-أبو حرب بس لا تدخل إني اعرف أتصرف وياها

-اسمعني لك والله بالله حسك لو حس مرتك إذا سمعتو بالبيت انته حصتي چيله أحطها بكلبك وشوف إذا ما سويتها.. وكول أبو حرب كال.

دفعته ومشيت.. دخلت للبيت من الباب الثاني.. دخلت لغرفة أمي الحجية..

-ها الله يساعدج يمه..

-هلا ييمه شلونك

-شلوني بعد من وره هلناقص عابد..

-يمه هذا أغم توكع وذرة ألسانك وهو ما يتغير

-أريد أشوفه ما يتغير إلا اصلخه والله.. انداريت على حلا بنتي.. شدسوين يابه..

-كاعده على الانستكرام بابا..

-باباتي ابتعدي من هالمواقع الطايح حظها تفسدج يا بويه..

-بابا قابل إني ما أفتهم . صار عمري 17 سنه وأنت تخاف عليه. لتخاف باباتي

-أخذت نفس وكلتلها كومي سويلي لكمه بابا خل أكل ميت جوع

الحجيه:- عبالنا متعشي بره وما عزلنالك أكل

-لا والله متعشيت أمور هواي براسي وما ادري دايخ شلون أحلها

-كلنالك ييمه خل نخطبلك إخلاص ما قبلت

-يمه شتحجين أنتي لخاطر الله..ما بيه خلك نسوان . خليني هسه كافي علي هموم الشغل مالتي الوضع بالعراق حيل تعبان ونقلوني لبغداد..

-ياااا يمه صراع.. نقلوك ليش

-بعد يمه الأوامر مو بكيفي لهيج ضايكه روحي دوامي أسبوع هنا وأسبوع هناك. مرار..

دحكت على ابني حرب نايم.. تمددت يمه وأبوس بيه تحرك بفراشه.. الذيب مال أبوه شلونه

-ييمه خطيه عوفو نايم

-يمه مشتاگله الناقص ما شفته اليوم

-غير بمدرسته ضهري

-حاولت وياه يكعد زعجتو بلحيتي ضاج وكام يتذمر.. بستو وغطيتو وكمت..

-ييمه شلون تبقى هيج بلا زواج

-كاعد على كلبج يا يمه ؟

-لا يبعد أمك بس اريدلك مره تطرد عنك وحشة الليل

-وحشة الليل .. أخذت نفس هو يحتاج بس يمه دايخ ما بيه والله خلني أعيش بوحشة الليل بوحدي
ولا تجي وحده اداريني بالليل وبالنهار تشلع كلبي

-ييمه مو كلهن مثل وجدان..

-وتردين أتزوج أخت وجدان... حتى تعل كلبي مثل أختها

- عجل ياهي التريدها

-ما اعرف يمه الله إذا قاسملي أتزوج مره عسما بالصين يجيبها ويزوجني بطرفة عين خليني هسه من هالموضوع

اتركيها على الله..

- أرد أشوف التاخذها ومتانيها تجي من الصين شلونها يا أبو حرب.......يتبع

☆☆☆☆☆☆